အခန်း (၂၇၇-၂၇၈)
Vol. 28 Ch. 277-278
အခန်း (၂၇၇) - ဟယ့်မင်ယဲ့နှင့် စစ်ယင်တို့၏ တုန်လှုပ်မှု
ရွှီနင်၏ ချီးကျူးစကားကို ကြားပြီးနောက် ဖန်းယိုလိက ခေါင်းကုတ်လိုက်လေသည်။
“ဒုတိယဂိုဏ်းချုပ်ချန်က ကျွန်တော့်ကို အရင်းအမြစ်တွေ အလုံအလောက်ပေးလို့ ကျွန်တော့်အဆင့်က ဒီလောက်မြန်မြန် တက်လာတာပါ”
လွန်ခဲ့သောနှစ်ဝက်ခန့်က ဂိုဏ်းသို့ စတင်ဝင်ရောက်လာချိန်နှင့် နှိုင်းယှဉ်လျှင် ဖန်းယိုလိသည် ယခုအခါ ပို၍ ရင့်ကျက်တည်ငြိမ်လာပုံရပေသည်။
ဖန်းယိုလိ ဂိုဏ်းသို့ စတင်ဝင်ရောက်လာစက သူ၏ လုပ်ရပ်များမှာ မဆင်မခြင်နိုင်လွန်းလှသည်။
သို့သော် ယခု ဂိုဏ်းနှင့် အကျွမ်းတဝင်ရှိသွားပြီးနောက်တွင်မူ သူသည် အနည်းငယ် ရင့်ကျက်လာခဲ့ချေပြီ။
“မင်းရဲ့ သိုင်းပညာပါရမီကို အလဟဿ မဖြစ်စေနဲ့။ မင်း တာအိုနယ်ပယ်ကို အမြန်ဆုံး ချိုးဖျက်ဝင်ရောက်နိုင်ဖို့ ငါ မျှော်လင့်နေမယ်”
ရွှီနင်က ဖန်းယိုလိအား အားပေးစကား ဆိုလိုက်လေသည်။
ဖန်းယိုလိ၏ ကြီးမားလှသော တိုးတက်မှုကို မြင်တွေ့ပြီးနောက် ရွှီနင် အတော်လေး ကျေနပ်အားရသွားသည်။
ယန့်လုဂိုဏ်း၏ တပည့်များထဲတွင် ဖန်းယိုလိ တစ်ယောက်တည်းသာ စစ်မှန်သော ပါရမီ ပါလာသူ ဖြစ်ပေသည်။
ယန့်လုဂိုဏ်း၏ အမွေအနှစ်များ မပြည့်မစုံ ဖြစ်မနေစေရန် ဖန်းယိုလိ အမြန်ဆုံး ကြီးထွားလာစေရန်လည်း သူ မျှော်လင့်နေမိသည်။
‘ဖန်းယိုလိရဲ့ ကျင့်ကြံပုံက ငါနဲ့ဆင်တူတယ်။ သူလည်း ပြင်ပအရင်းအမြစ်တွေကို သုံးတာပဲ...’
ရွှီနင်သည် ဖန်းယိုလိအား ကျေနပ်အားရစွာ ကြည့်လိုက်လေသည်။
‘ဒါပေမဲ့ ဖန်းယိုလိက ကျင့်ကြံမှုအမြန်နှုန်းနဲ့ အရည်အသွေးပိုင်းမှာတော့ ငါ့ထက် အများကြီး နောက်ကျနေသေးတာပဲ...’
သိုင်းပညာမျက်နှာပြင်၏ အကူအညီဖြင့် ရွှီနင်၏ အဆင့်တက်နှုန်းသည် မြန်ဆန်ရုံသာမက အဆင့်တစ်ခုချင်းစီ၏ အထွတ်အထိပ်အထိ တိုက်ရိုက်တက်လှမ်းနိုင်စေသည်။
အရေးအကြီးဆုံးမှာ လုံလောက်သော စွမ်းအင်များသာ ရှိနေသရွေ့ ရွှီနင်၏ အနာဂတ်တိုးတက်မှုလမ်းကြောင်းသည် အကန့်အသတ်မဲ့နေခြင်းပင် ဖြစ်လေသည်။
ထိုအချက်နှင့်ယှဉ်လျှင် အခြားသူများ အလွန်မြင့်မားသည်ဟု ထင်မြင်ထားကြသော ဖန်းယိုလိ၏ ပါရမီသည် ရွှီနင်၏ရှေ့မှောက်တွင် နှိုင်းယှဉ်၍ပင် မရနိုင်ချေ။
“မင်း အရင်သွားလို့ရပြီ”
ဖန်းယိုလိနှင့် ပေါ့ပေါ့ပါးပါး စကားပြောပြီးနောက် ရွှီနင်က လက်ကာပြလိုက်သည်။
“ဂိုဏ်းချုပ်”
သို့သော် ဖန်းယိုလိက ချက်ချင်း ထွက်မသွားသေးပေ။
“ကျွန်တော့်ရဲ့ သိုင်းပညာပါရမီကို ဂိုဏ်းချုပ် ကျေနပ်တယ်ဆိုတော့ ကျွန်တော် ဂိုဏ်းချုပ်ရဲ့ ကိုယ်ပိုင်တပည့် ဖြစ်ခွင့်ရှိမလား”
ဖန်းယိုလိ ဂိုဏ်းသို့ စတင်ဝင်ရောက်လာချိန်က သူသည် ခေါင်းမာလွန်းလှပြီး ဂိုဏ်းချုပ်၏ ကိုယ်ပိုင်တပည့် ဖြစ်ရမည်ဟုသာ တင်းခံနေခဲ့သည်။
သို့သော် အဆုံး၌မူ သူသည် အလျှော့ပေးလိုက်ရုံမှလွဲ၍ အခြားရွေးချယ်စရာ မရှိခဲ့ပေ။
“မင်းရဲ့ ပါရမီနဲ့ သိုင်းပညာတိုးတက်မှုလမ်းကြောင်းက တော်တော်လေး ထူးခြားတယ်။ မင်း ငါ့ကို ဆရာတစ်ယောက်လို ဂါရဝပြုရင်တောင် မင်းကို သင်ပေးစရာ ငါ့မှာ ဘာမှမရှိဘူး”
ရွှီနင်က ပြောလိုက်သည်။
“မင်း ဂိုဏ်းရဲ့ အရင်းအမြစ်တွေကို လွတ်လွတ်လပ်လပ် သုံးစွဲခွင့်ရှိသလို အတွင်းစည်းတပည့် နေရာတစ်ခုလည်း ရထားတာပဲ။ ပြီးတော့ မလိုအပ်တဲ့ ကန့်သတ်ချက်တွေလည်း ဘာမှမရှိဘူးလေ။ ဒါက လုံလောက်နေပြီ မဟုတ်ဘူးလား”
“အဲဒါလည်း ဟုတ်တာပါပဲ...”
ဖန်းယိုလိ မျက်မှောင်ကြုံ့သွားလေသည်။
“ဒါဆိုရင်လည်း ကျွန်တော့်ကို သွားခွင့်ပြုပါဦး”
ဖန်းယိုလိက လှမ်းထွက်သွားရင်း ရေရွတ်လိုက်သည်။
“ဒီ ဖန်းယိုလိက အနာဂတ်မှာ ယန့်လုဂိုဏ်းရဲ့ ဦးဆောင်တပည့် ဖြစ်လာမှာပဲ”
ချန်ကျန်းထောင်းသည် ဖန်းယိုလိအပေါ် ရွှီနင်ကဲ့သို့ပင် အကဲဖြတ်ထားလေသည်။
“အစ်ကိုက ဖန်းယိုလိကို စောင့်ကြည့်လာတာ နှစ်ဝက်ရှိပြီဆိုတော့ သူ့အကြောင်း အသစ်သိလာတာမျိုးများ ရှိလား”
ရွှီနင်က မေးလိုက်သည်။
“ဒီကောင်လေးက ဖြောင့်မတ်တဲ့ စရိုက်ရှိတယ်။ သူ ဂိုဏ်းထဲမှာ နေလာတာ နှစ်ဝက်ကျော်ရှိပြီဖြစ်ပြီး လူမှုရေးကျွမ်းကျင်မှု တချို့ကို သင်ယူတတ်မြောက်ထားပေမဲ့ သူ့ရဲ့ မူလသဘာဝကတော့ မပြောင်းလဲသေးဘူး”
ချန်ကျန်းထောင်းက ပြောလေသည်။
“ကျွန်တော် နှစ်ဝက်လောက် စောင့်ကြည့်လေ့လာရသလောက်တော့ သူ့ရဲ့ ခန္ဓာကိုယ်အခြေခံက တော်တော်လေး ထူးခြားတာကို အခြေခံအားဖြင့် သေချာပြောနိုင်တယ်။ မိစ္ဆာသားရဲတစ်ကောင်ရဲ့ သွေးမျိုးဆက်က အဆင့်တက်သွားသလိုမျိုးပဲ။ သူ့ရဲ့ အဆင့်တက်လှမ်းမှုတွေ အားလုံးက သူ့ခန္ဓာကိုယ်က ကန့်သတ်ချက်ကို ရောက်သွားပြီးနောက် သဘာဝအလျောက် အဆင့်တက်သွားတာချည်းပဲ”
“သူ့ရဲ့ အတိတ်အကြောင်းကိုလည်း အသေးစိတ် စုံစမ်းကြည့်ပါသေးတယ်။ ဒါပေမဲ့ ငယ်ငယ်တုန်းက တောင်ပေါ်မှာ မွေးစားအဖေ ကောက်ယူမွေးစားခဲ့တာကို သိရတာကလွဲရင် တခြားဘာမှ မတွေ့ရပါဘူး”
“ဘယ်လိုပဲဖြစ်ဖြစ် ဖန်းယိုလိရဲ့ နောက်ခံက သာမန်တော့ မဟုတ်ဘူး...”
ရွှီနင်က ပြောလိုက်သည်။
“သူ့ကို ယန့်လုဂိုဏ်းရဲ့တပည့်အဖြစ် လက်ခံထားမှတော့ သူ့ကို ပြုစုပျိုးထောင်ဖို့ ကျွန်တော်တို့ အစွမ်းကုန် ကြိုးစားကြတာပေါ့”
“အင်း...”
ချန်ကျန်းထောင်းက ပြန်ဖြေပေးလိုက်သည်။
“ဂိုဏ်းက အများကြီး ပြောင်းလဲသွားပြီလို့ ချန်ရှုန်းဆီကနေ ကြားတယ်”
ရွှီနင်က စကားလမ်းကြောင်း လွှဲလိုက်လေသည်။
ရွှီနင် ဤအကြောင်းကို ပြောလာသည်ကို ကြားသောအခါ ချန်ကျန်းထောင်း၏ မျက်နှာပေါ်တွင် ဂုဏ်ယူဝင့်ကြွားသည့် အရိပ်အယောင်တစ်ခု ပေါ်လာသည်။
ထို့နောက် ချန်ကျန်းထောင်းသည် ရွှီနင် မရှိခိုက် ယန့်လုဂိုဏ်းတွင် ဖြစ်ပျက်ခဲ့သမျှ အရာအားလုံးကို ပြောပြလေတော့သည်။
သူ ရှင်းပြသည်မှာ ချန်ရှုန်းထက်ပင် ပို၍ အသေးစိတ်ကျလေသည်။
ရွှီနင်သည် ချန်ကျန်းထောင်း၏ ရှင်းပြချက်ကို နားထောင်ရင်း လက်ရှိ ယန့်လုဂိုဏ်း၏ အခြေအနေကို ပိုမိုနားလည်သဘောပေါက်သွားလေသည်။
ထိုသတင်းများထဲတွင် ရွှီနင် အိတ်ဝင်စားဆုံးအရာမှာ ယန့်လုဂိုဏ်းသည် ယဲ့ဘုရင်ခံအိမ်တော်၏ အကူအညီဖြင့် ပြီးပြည့်စုံသော သိုင်းပညာအရင်းအမြစ် ကုန်သွယ်မှုစနစ်တစ်ခုကို တည်ထောင်နိုင်ခဲ့ခြင်းပင် ဖြစ်ပေသည်။
ယခု နှစ်ဝက်ကြာမြင့်ပြီးနောက် ယန့်လုဂိုဏ်း၏ သိုင်းပညာအရင်းအမြစ် ကုန်သွယ်မှုသည် ဝင်ငွေနှင့် ထွက်ငွေ မျှတသည့် အခြေအနေသို့ ရောက်ရှိနေချေပြီ။
နောက်နှစ်အနည်းငယ်အတွင်း ဆိုလျှင် အမြတ်အစွန်းများပင် ရရှိလာနိုင်ပေမည်။ ထိုအချိန်ကျလျှင် ရွှီနင်တို့သည် ဂိုဏ်းတိုးတက်ရေးအတွက် အပိုအရင်းအမြစ်များကို သုံးစွဲရန် လိုအပ်တော့မည် မဟုတ်ချေ။
ရွှီနင်သည် ယန့်လုဂိုဏ်းထံမှ အရင်းအမြစ်များကိုပင် ပြန်လည် ခံစားခွင့်ရရှိနိုင်ပေလိမ့်မည်။
“ကောင်းတယ်။ အစ်ကို အလုပ်လုပ်တာ တော်တော်ကောင်းတယ်”
ချန်ကျန်းထောင်း၏ စကားများကို နားထောင်ပြီးနောက် ရွှီနင်က ချီးကျူးလိုက်လေသည်။
အမှန်စင်စစ် ချန်ကျန်းထောင်းသည် ရွှီနင်၏ ချီးကျူးစကားကို လိုအပ်နေသည်တော့ မဟုတ်ပေ။
ယန့်လုဂိုဏ်း မပြိုကွဲမီကတည်းက သစ္စာရှိတပည့်တစ်ဦးဖြစ်ခဲ့သူပီပီ ယန့်လုဂိုဏ်း တစ်နေ့တခြား တိုးတက်လာသည်ကို မြင်တွေ့ရခြင်းက ချန်ကျန်းထောင်းအတွက် အကြီးမားဆုံးသော ပျော်ရွှင်မှုပင် ဖြစ်လေသည်။
“ဩော်... ဒါနဲ့...”
ရွှီနင် တစ်စုံတစ်ခုကို သတိရသွားသည်။
“ဖုန်းဝူအိမ်တော်က ချန်ယွီမော်နဲ့ ချင်းဖုန်းဂိုဏ်းက လျန်ထင်အန်တို့ကို ကျွန်တော် သတ်လိုက်ပြီ”
“ဘာဗျ”
ချန်ကျန်းထောင်းမှာ အလွန်အမင်း တုန်လှုပ်သွားပြီး တစ်ကိုယ်လုံးပင် ထုံကျင်သွားတော့သည်။
“ဂိုဏ်းချုပ်... တကယ်ပြောနေတာလား”
ချန်ကျန်းထောင်းက ရွှီနင်၏ ခွန်အားကို မေးခွန်းထုတ်နေခြင်း မဟုတ်ဘဲ ဤသတင်းမှာ သူ့အတွက် အလွန်အမင်း တုန်လှုပ်စရာ ကောင်းနေသောကြောင့် ဖြစ်ပေသည်။
ယန့်လုဂိုဏ်း ပြိုကွဲပျက်စီးမှုကို သူကိုယ်တိုင် ကြုံတွေ့ခဲ့ရပြီး သူ၏ဆရာဖြစ်သူမှာလည်း သေရပါစေဟု တောင်းဆိုခဲ့ရသည့်အထိ ဖိအားပေးခံခဲ့ရသဖြင့် ချန်ကျန်းထောင်းသည် ချန်ယွီမော်နှင့် လျန်ထင်အန်တို့ကို အရိုးထဲစွဲသည်အထိ မုန်းတီးနေခဲ့ခြင်း ဖြစ်သည်။
သူတို့သည် ချန်ကျန်းထောင်း အမုန်းတီးဆုံးသော ရန်သူများပင် ဖြစ်လေသည်။
သို့သော် ယခုအခါ ထိုရန်သူနှစ်ဦးမှာ ရုတ်တရက် အသတ်ခံလိုက်ရပြီး ၎င်းကို ယန့်လုဂိုဏ်း၏ လက်ရှိဂိုဏ်းချုပ်မှ လုပ်ဆောင်ခဲ့ခြင်းဖြစ်ရာ ချန်ကျန်းထောင်းအတွက် အလွန်အံ့အားသင့်သွားစေခဲ့သည်။
“သေချာတာပေါ့”
ရွှီနင်က ပြောလိုက်လေသည်။
“ဒါ့အပြင် သူတို့ဂိုဏ်းက အတော်ဆုံးဆိုတဲ့သူတွေလည်း အားလုံး အသတ်ခံလိုက်ရပြီ။ သူတို့ဂိုဏ်းထဲမှာ အသက်ရှင်ကျန်ရစ်တဲ့ တပည့်တချို့ ရှိနေသေးရင်တောင်မှ ပြိုကွဲဖို့ သိပ်မလိုတော့ပါဘူး”
ချန်ယွီမော်နှင့် လျန်ထင်အန်တို့မှ ရွှယ်ကျင်ဟွားအပေါ် စတင်ကြံစည်သည့် အချိန်ကတည်းက မော့လန်သည် သူတို့ကို သုတ်သင်ရမည့် စာရင်းထဲသို့ ထည့်သွင်းပြီးဖြစ်ကြောင်း ရွှီနင် ကောင်းကောင်း သိထားလေသည်။
ချန်ကျန်းထောင်း၏ ခန္ဓာကိုယ်မှာ အနည်းငယ် တုန်ရီသွားသည်။
“ကောင်းတယ်... ကောင်းတယ်...”
ယန့်လုဂိုဏ်းကို ပြန်လည်တည်ဆောက်မှု ပြီးမြောက်သွားပြီဖြစ်သလို ကလဲ့စားချေမှုလည်း ပြီးဆုံးသွားခဲ့ချေပြီ။
ချန်ကျန်းထောင်းတစ်ယောက် ဖြတ်သန်းခဲ့ရသော နာကျင်ဖွယ် အတွေ့အကြုံများနှင့် ပတ်သက်၍ နောင်တရစရာ မရှိတော့ပေ။
ချန်ကျန်းထောင်းတစ်ယောက် ရွှီနင်အား ရူးသွပ်မတတ် လေးစားကြည်ညိုသော အကြည့်များဖြင့် ကြည့်လိုက်လေသည်။
အလွန်တိုတောင်းသော အချိန်ကာလလေး အတွင်းမှာပင် သူ တစ်သက်လုံး လုပ်နိုင်မည်မဟုတ်ဟု ထင်ထားခဲ့သောအရာကို ရွှီနင်က လုပ်ဆောင်ပေးခဲ့လေသည်။
“ကောင်းပြီ... အစ်ကို လုပ်စရာရှိတာ သွားလုပ်လိုက်ပါ။ ကျွန်တော်လည်း ဒီအချိန်တစ်လျှောက်လုံး ခရီးတွေပဲ သွားနေရတာဆိုတော့ နားချင်နေပြီ”
အရာအားလုံးကို ရှင်းပြပြီးနောက် ရွှီနင် ဆက်ပြောရန် အစီအစဉ် မရှိတော့ပေ။
“ဟုတ်ကဲ့ပါ ဂိုဏ်းချုပ်”
ချန်ကျန်းထောင်းက ရိုသေလေးစားစွာ ပြောလိုက်ပြီးနောက် လျင်မြန်စွာ ထွက်ခွာသွားလေတော့သည်။
ယန့်လုဂိုဏ်း၏ တပည့်ဟောင်းများကို ဤသတင်းအား သူ အမြန်ဆုံး ပြောပြချင်နေမိသည်။
ယန့်လုဂိုဏ်း ပြိုကွဲပျက်စီးမှုကို ကြုံတွေ့ခဲ့ရပြီးနောက် ၎င်းတို့သည် ဤသတင်းကို ကြားရပါက သေချာပေါက် အတိုင်းမသိ ဝမ်းသာပျော်ရွှင်ကြမည်မှာ အသေအချာပင်။
ချန်ကျန်းထောင်း ထွက်သွားပြီးနောက် ရွှီနင်သည် မီးခိုးရောင်လေးနှင့် ချင်းယင်တို့ကို အပြင်သို့ ထုတ်ပေးလိုက်သည်။
တစ်ချိန်တည်းမှာပင် ရွှီနင်က ပင်လယ်ရပ်ခြား၌ ဖမ်းဆီးခဲ့သော တာအိုနယ်ပယ် မိစ္ဆာသားရဲများကို ဆင့်ခေါ်ကာ ယန့်လုဂိုဏ်းအား စောင့်ကြပ်ခိုင်းရန် မီးခိုးရောင်လေးကို အမိန့်ပေးလိုက်လေသည်။
ဤတာအိုနယ်ပယ် မိစ္ဆာသားရဲများ ရှိနေခြင်းကြောင့် ယန့်လုဂိုဏ်း၏ တိုက်ခိုက်ရေးစွမ်းအားမှာ ပိုမိုအားကောင်းလာခဲ့ချေပြီ။
‘အချိန်တန်ရင် မိစ္ဆာသားရဲပန်းချီကားလိပ်ကို ပြုပြင်ဖို့ မီးခိုးရောင်လေးကို ကူညီပေးရမယ်’
ရွှီနင် စိတ်ထဲမှ တွေးလိုက်မိသည်။
သူ၏နယ်ပယ် တိုးတက်လာပြီး ဗဟုသုတများ ကျယ်ပြန့်လာသည်နှင့်အမျှ ဤမိစ္ဆာသားရဲပန်းချီကားလိပ်သည် အလွန်အဆင့်မြင့်မားသော လျှို့ဝှက်ရတနာတစ်ခု ဖြစ်ကြောင်း ရွှီနင် အသေအချာ သိရှိလာခဲ့သည်။
ယခင်က သားရဲထိန်းချုပ်သူသည် မိစ္ဆာသားရဲပန်းချီကားလိပ်ကို သန့်စင်ခဲ့သည့် ထိပ်တန်းသိုင်းပညာရှင်တစ်ဦး မဟုတ်ဘဲ မိစ္ဆာသားရဲပန်းချီကားလိပ်၏ အမွေဆက်ခံသူသာ ဖြစ်လိမ့်မည်ဟု ရွှီနင် ကောက်ချက်ချလိုက်သည်။
သို့သော် သူသည် မိစ္ဆာသားရဲပန်းချီကားလိပ်ကို မထိန်းချုပ်နိုင်ခဲ့သဖြင့် ပျက်စီးသွားရခြင်း ဖြစ်ပေသည်။
မိစ္ဆာသားရဲပန်းချီကားလိပ်၏ ပထမဆုံး ပိုင်ရှင်သည် တာအိုနယ်ပယ်၏ အဆင့်မြင့်အဆင့်တွင် ရှိနေသော သို့မဟုတ် တာအိုနယ်ပယ်၏ ကန့်သတ်ချက်သို့ ရောက်ရှိနေသော ထိပ်တန်း အစွမ်းထက်ပုဂ္ဂိုလ်တစ်ဦး ဖြစ်လောက်သည်ဟု ရွှီနင် ခံစားမိလေသည်။
…
နောက်ထပ် အချိန်ကာလတစ်လျှောက်တွင် ရွှီနင် မည်သည့်နေရာမျှ မသွားတော့ဘဲ ဂိုဏ်းထဲတွင်သာ နေထိုင်ပြီး ဆေးလုံးအချို့ သန့်စင်ခြင်း၊ အရင်းအမြစ်အချို့ စုပ်ယူခြင်းနှင့် တပည့်များကို သင်ကြားပြသခြင်းများကိုသာ ပြုလုပ်နေခဲ့သည်။
ရွှီနင်သည် ဖန်းယိုလိ၏နောက်သို့ ကိုယ်တိုင်ကိုယ်ကျ လိုက်ပါကာ သူ၏ အဆင့်တက်လှမ်းမှု လမ်းကြောင်းကို အာရုံခံကြည့်ခဲ့သော်လည်း လောလောဆယ်တွင် ထူးခြားသည့်အရာကို မတွေ့ရသေးချေ။
ဒီနေ့တွင်တော့...
ဂိုဏ်းတံခါးစောင့် တပည့်တစ်ဦးသည် ပင်မတောင်ထွတ်သို့ ရောက်ရှိလာလေသည်။
“ဂိုဏ်းချုပ်... ဂိုဏ်းအပြင်ဘက်မှာ ဂိုဏ်းချုပ်ကို တွေ့ချင်နေတဲ့သူတွေရှိပါတယ်”
ယန့်လုဂိုဏ်း၏ တံခါးစောင့်တပည့်များအားလုံးမှာ အပြင်စည်းတပည့်များ ဖြစ်ကြပြီး သူတို့၏ စွမ်းအားမှာ သာမန်လူသားနယ်ပယ်တွင်သာ ရှိကြသေးသည်။
ရွှီနင်နှင့် မျက်နှာချင်းဆိုင်ရချိန်တွင် သူသည် စိတ်လှုပ်ရှားမှုနှင့် အထိတ်တလန့် ဖြစ်မှု နှစ်မျိုးလုံးကို ခံစားနေရသည်။
ချန်ကျန်းထောင်းမှ ရွှီနင်၏ လုပ်ရပ်များကို ဂိုဏ်းအတွင်း ဖြန့်ဝေခဲ့ပြီးနောက် ယန့်လုဂိုဏ်း၏ တပည့်တိုင်းလိုလိုက ရွှီနင်အား ဂိုဏ်း၏ အကြွင်းမဲ့ အချက်အချာနှင့် စိတ်ပိုင်းဆိုင်ရာ မှီခိုရာအဖြစ် သတ်မှတ်ထားကြလေသည်။
“ငါ့ကို ဘယ်သူက တွေ့ချင်လို့လဲ”
ရွှီနင်က မေးလိုက်သည်။
ယေဘုယျအားဖြင့် သာမန်ဧည့်သည်များက ယန့်လုဂိုဏ်း၏ အထက်လူကြီးများကို လာရောက်တွေ့ဆုံလိုပါက သူတို့အချင်းချင်း ကြိုတင် သဘောတူညီချက် မရှိထားလျှင် မောင်းထုတ်ခံရလေ့ရှိသည်။
ယခုကဲ့သို့ တပည့်များက ကိုယ်တိုင်ကိုယ်ကျ လာရောက်၍ တွေ့ဆုံလိုသလားဟု မေးမြန်းရသူများမှာ အထူးသီးသန့် အဆင့်အတန်းရှိသူများသာ ဖြစ်ပေသည်။
ထိုကဲ့သို့သော လူများသည် တွေ့ဆုံရန် ကြိုတင်ချိန်းဆိုထားခြင်း မရှိသော်လည်း သူတို့၏ အဆင့်အတန်းကြောင့် ဒီအတိုင်း မောင်းထုတ်လိုက်၍ မရနိုင်ချေ။
“အမျိုးသားတစ်ယောက်နဲ့ အမျိုးသမီးတစ်ယောက် လာတာပါ။ သူတို့က ချောက်နက်ကြီးမြောက်ပိုင်းက လာတာဖြစ်ပြီး ဂိုဏ်းချုပ်ရဲ့ မိတ်ဆွေဟောင်းတွေပါလို့ ပြောပါတယ်”
တပည့်ဖြစ်သူက အမှန်အတိုင်း ပြန်ဖြေလိုက်လေသည်။
“ချောက်နက်ကြီးမြောက်ပိုင်းက မိတ်ဆွေဟောင်းတွေ...”
ရွှီနင်၏ တည်ငြိမ်နေသော မျက်နှာအမူအရာမှာ အနည်းငယ် ပြောင်းလဲသွားသည်။
“ဟုတ်ပါတယ်”
တပည့်ဖြစ်သူက ပြောလိုက်လေသည်။
“တစ်ယောက်က ဟယ့်မင်ယဲ့ဖြစ်ပြီး နောက်တစ်ယောက်က စစ်ယင်ပါ”
“အစ်ကိုဟယ်... အစ်မစစ်...”
ရွှီနင် ပြုံးလိုက်လေသည်။
ဒီနှစ်ယောက် ရုတ်တရက် ရောက်လာလိမ့်မည်ဟု သူ ထင်မထားခဲ့ပေ။
‘သူတို့ အဆင့်တက်ပြီးမှ ရောက်လာတာလား ဒါမှမဟုတ် တခြားတာအိုနယ်ပယ် သိုင်းပညာရှင်တွေနဲ့ သင်္ဘောစီးပြီး လာကြတာလား...’
‘အကယ်၍ ပထမအချက်သာဆိုရင်တော့ လွန်ခဲ့တဲ့ နှစ်နှစ်အတွင်းမှာ သူတို့နှစ်ယောက်လုံး ကိုယ်ပိုင်ကံကောင်းမှုတွေ ကြုံတွေ့ခဲ့ရမှာ အသေအချာပဲ’
သူတို့၏ ပါရမီများအရ နှစ်နှစ်အတွင်း တာအိုနယ်ပယ်သို့ ချိုးဖျက်ဝင်ရောက်နိုင်ရန် ဆိုသည်မှာ လက်တွေ့မဆန်လှကြောင်း ရွှီနင် ကောင်းကောင်း သိထားလေသည်။
ထို့နောက် ရွှီနင် ရွေ့လျားလိုက်ရာ သူရှိနေသော နေရာမှ ပျောက်ကွယ်သွားလေတော့သည်။
ရွှီနင်သည် သူ၏ မိတ်ဆွေဟောင်းများကို တွေ့ရန် အလွန်စိတ်အားထက်သန်နေသည်။
“အစ်ကိုဟယ်... အစ်မစစ်...”
ရွှီနင် ပျောက်ကွယ်သွားသည်ကို မြင်လိုက်ရပြီးနောက် တပည့်ဖြစ်သူသည် ရွှီနင်၏ စကားများကို ပြန်လည်စဉ်းစားနေမိသည်။
ထိုအမျိုးသားနှင့် အမျိုးသမီးသည် ဂိုဏ်းချုပ်၏ ရင်ထဲတွင် မြင့်မားသော အဆင့်အတန်းတစ်ခု ရှိနေကြောင်း သူ သေချာပေါက် သိလိုက်လေသည်။
‘သူတို့နဲ့တွေ့တုန်းက ငါ သူတို့ကို ရိုရိုသေသေနဲ့ ယဉ်ယဉ်ကျေးကျေး ရှိခဲ့တာဆိုတော့ အထင်အမြင်လွဲမှားတာမျိုးတွေ ရှိမှာမဟုတ်ပါဘူးလေ...’
တပည့်ဖြစ်သူက သူ၏ လုပ်ရပ်များကို ပြန်တွေးကြည့်ပြီး စိတ်သက်သာရာရစွာ သက်ပြင်းချလိုက်မိသည်။
ထိုအချိန်လေးမှာပင်...
ယန့်လုဂိုဏ်း၏ အဝင်ဝတွင်…
ဟယ့်မင်ယဲ့နှင့် စစ်ယင်တို့သည် ခေါင်းမော့ကာ ရပ်နေကြသည်။
သူတို့နှစ်ဦးလုံးသည် ယန့်လုဂိုဏ်း၏ ကြီးကျယ်ခမ်းနားမှုကို မြင်တွေ့ပြီးနောက် အလွန်အမင်း တုန်လှုပ်နေကြလေသည်။
မူလက သူတို့နှစ်ဦးသည် ဝမ်ရှန့်ပြည်နယ်ရှိ ယွမ်ရှန်းဂိုဏ်းသို့ သွားရောက်ကာ ရွှီနင်အကြောင်း စုံစမ်းရန် စီစဉ်ထားခဲ့ကြသည်။
သို့သော် ခရီးတစ်ဝက်တွင် ဝမ်ရှန့်ပြည်နယ်နှင့် နယ်နိမိတ်ချင်း ထိစပ်နေသော ပြည်နယ်များကို ဖြတ်သန်းသွားစဉ် ကုချင်းစီရင်စုရှိ ယန့်လုဂိုဏ်း၏ ဂုဏ်သတင်းမှာ ကုချင်းစီရင်စုကို ကျော်လွန်၍ပင် ပျံ့နှံ့နေကြောင်း သူတို့ တွေ့ရှိခဲ့ရသည်။
သူတို့ မထင်ရှားလှဟု ထင်မှတ်ထားခဲ့သော ယန့်လုဂိုဏ်းသည် ယခုအခါ ကုချင်းစီရင်စု၏ အဓိကဂိုဏ်းကြီးတစ်ခု ဖြစ်လာခဲ့ချေပြီ။
အစပိုင်းတွင် ဟယ့်မင်ယဲ့နှင့် စစ်ယင်တို့သည် အမည်တူဂိုဏ်းတစ်ခုဟုတွေးကာ မယုံနိုင်အောင် ဖြစ်နေခဲ့ကြသည်။
ထို့နောက် သူတို့ ကုချင်းစီရင်စုသို့ သွားရောက်စုံစမ်းကြည့်သောအခါ လက်ရှိ ယန့်လုဂိုဏ်း၏ ဂိုဏ်းချုပ်မှာ ရွှီနင်ဟု အမည်ရကြောင်းနှင့် ဂိုဏ်းသည် လွန်ခဲ့သော နှစ်နှစ်အတွင်း ရုတ်တရက် အင်အားကြီးမားလာခဲ့ကြောင်း သိရှိလိုက်ရလေသည်။ ထိုအခါမှသာ သူတို့ ထင်ထားသည်မှာ မမှားကြောင်း သိလိုက်ရတော့သည်။
ဤသည်ကား ရွှီနင် ပြန်လည်တည်ဆောက်ထားသော ယန့်လုဂိုဏ်းပင် ဖြစ်လေတော့သည်။
အခန်း (၂၇၈) - ထောင်ထောင့်ထံမှ စာ
“ရွှီနင်ရဲ့ ပါရမီနဲ့ စွမ်းဆောင်ရည်တွေအရ ချောက်နက်ကြီးမြောက်ပိုင်းကနေ ဝမ်ရှန့်ပြည်နယ်ကို ရောက်လာရင်တောင် သူက ထိပ်တန်းအဆင့်မှာ ရှိနေဆဲပဲဆိုတာ သေချာတယ်”
ဟယ့်မင်ယဲ့သည် သူ၏ရှေ့မှောက်ရှိ အင်အားကြီးမားသော ဂိုဏ်းကြီးကို ကြည့်ကာ သက်ပြင်းချလိုက်လေသည်။
စစ်ယင်သည်လည်း မျှော်လင့်ချက်များဖြင့် ပြည့်နှက်နေသည်။
သူမ ရွှီနင်နှင့် ပထမဆုံးအကြိမ် တွေ့ဆုံခဲ့စဉ်က ရွှီနင်သည် သူမ၏အသက်ကို ကယ်တင်ပေးခဲ့ခြင်းဖြစ်သည်။
ထိုအချိန်မှစ၍ စစ်ယင်သည် ရွှီနင်အား အမြဲတမ်း ကြည်ညိုလေးစားခဲ့လေသည်။
“ဂိုဏ်းတူအစ်ကိုကြီး... စီနီယာအစ်မစစ်”
သူတို့နှစ်ဦး စောင့်ဆိုင်းနေစဉ် ရုတ်တရက် သူတို့ရှေ့တွင် ပုံရိပ်တစ်ခု လျှပ်တစ်ပြက် ထွက်ပေါ်လာသည်ကို မြင်လိုက်ရသည်။
ရွှီနင်သည် မျက်နှာပေါ်တွင် အပြုံးတစ်ပွင့်ကို ပန်ဆင်လျက် ရှေ့သို့ လျှောက်လာလေသည်။
“ရွှီနင်”
ရွှီနင် ပေါ်လာသည်ကို မြင်သောအခါ ဟယ့်မင်ယဲ့နှင့် စစ်ယင်တို့သည်လည်း မိတ်ဆွေဟောင်းနှင့် ပြန်လည်ဆုံတွေ့ရသည့်အတွက် ဝမ်းသာပျော်ရွှင်သွားကြလေသည်။
“ခင်ဗျားတို့နှစ်ယောက် ကျွန်တော့်ဆီ ရောက်လာလိမ့်မယ်လို့ မထင်ထားခဲ့ဘူး”
ရင်းနှီးနေသော မျက်နှာနှစ်ခုကို မြင်လိုက်ရသောအခါ ရွှီနင်၏ ရင်ထဲတွင် နွေးထွေးသွားခဲ့သည်။
နှစ်နှစ်ကြာပြီးနောက် စိမ်းသက်သောနေရာတွင် မိတ်ဆွေဟောင်းများနှင့် ပြန်လည်ဆုံတွေ့ရသည့် ခံစားချက်မှာ အလွန်ပင် နွေးထွေးလှပေသည်။
“လာ... ဂိုဏ်းထဲ သွားကြစို့”
ထို့နောက် ရွှီနင်သည် သူတို့နှစ်ဦးကို ပင်မတောင်ထွတ်ဆီသို့ ကိုယ်တိုင်ကိုယ်ကျ ခေါ်ဆောင်သွားလေသည်။
ရွှီနင်သည် သူတို့တစ်ဦးစီအတွက် ဝိညာဉ်ဆေးဘက်ဝင် လက်ဖက်ရည်တစ်ခွက်စီ ဖျော်ပေးလိုက်သည်။
“ဂိုဏ်းတူအစ်ကိုကြီးနဲ့ စီနီယာအစ်မစစ်... ခင်ဗျားတို့ တာအိုနယ်ပယ်ကို ဘယ်တုန်းက ချိုးဖျက်ဝင်ရောက်ခဲ့ကြတာလဲ” ရွှီနင်က မေးလိုက်သည်။
ရွှီနင်သည် သူတို့နှစ်ဦးကို မြင်လိုက်ချိန်မှာပင် သူတို့နှစ်ဦးလုံးမှာ တာအိုနယ်ပယ်၏ ပထမအဆင့်သို့ တက်လှမ်းသွားကြပြီဖြစ်ကြောင်း သတိပြုမိခဲ့လေသည်။
“ငါတို့နှစ်ယောက်စလုံး ကိုယ်ပိုင် ကံကောင်းမှုတွေနဲ့ ကြုံခဲ့ရတာပါ”
ဟယ့်မင်ယဲ့က သူနှင့် စစ်ယင်တို့ အဆင့်တက်လှမ်းခဲ့ပုံကို ရွှီနင်အား ပြောပြလိုက်သည်။
“ငါတို့ အဆင့်တက်လှမ်းနိုင်ခဲ့တာက တော်တော်လေး ကံကောင်းသွားလို့ပါ”
စစ်ယင်က ပြုံးလျက် ပြောလိုက်သည်။
“ငါတို့က ပြင်ပအင်အားတွေကို အားကိုးခဲ့ရတာဆိုတော့ အခြေခံက သိပ်ခိုင်မာမှုတော့ မရှိဘူး”
“ရပါတယ်”
ရွှီနင်က ပြောလိုက်သည်။
“ဝမ်ရှန့်ပြည်နယ်မှာ ဝိညာဉ်စွမ်းအင်တွေ ပေါကြွယ်ဝပြီး ပိုကောင်းတဲ့ ကျင့်ကြံခြင်း ပတ်ဝန်းကျင်ရှိတယ်။ အဲဒါက အစ်ကိုတို့ရဲ့ အခြေခံကို အချိန်တိုအတွင်း ခိုင်မာအောင် ကူညီပေးနိုင်လိမ့်မယ်။ ပြီးတော့ ဒီလိုငယ်ရွယ်တဲ့အရွယ်နဲ့ တာအိုနယ်ပယ်ကို ရောက်လာတာဆိုတော့ ဝမ်ရှန့်ပြည်နယ်မှာတောင် ပျမ်းမျှအထက်မှာ ရှိတယ်လို့ သတ်မှတ်လို့ရတယ်”
ဟယ့်မင်ယဲ့နှင့် စစ်ယင်တို့သည် အသက်သုံးဆယ်ကျော်များသာ ရှိကြသေးသည်။
တာအိုနယ်ပယ် သိုင်းပညာရှင်တစ်ဦး၏ သက်တမ်းအရဆိုလျှင် သူတို့အတွက် ကျင့်ကြံရန် အချိန်များစွာ ကျန်ရှိနေသေးလေသည်။
“ရွှီနင်... မင်း ယန့်လုဂိုဏ်းကို နှစ်နှစ်အတွင်းမှာ ဒီလောက်အထိ ပြန်လည်တည်ဆောက်နိုင်လိမ့်မယ်လို့ ငါတို့ မထင်ထားခဲ့ဘူး။ တကယ်ကို မယုံနိုင်စရာပဲ”
ဟယ့်မင်ယဲ့က ဆက်၍ ပြောလေသည်။
“မင်း ယန့်လုဂိုဏ်းကို ဒီအခြေအနေအထိ ဦးဆောင်နိုင်ခဲ့တယ်ဆိုတာကို စီနီယာဝမ့်ယယ်သာ သိရင် သေချာပေါက် အရမ်းဝမ်းသာနေမှာပဲ။ သူ ချောက်နက်ကြီးမြောက်ပိုင်းကနေ ဒီကိုတောင် ချက်ချင်း ပြေးလာလောက်တယ်”
“ကျွန်တော် ကံကောင်းသွားလို့ပါ”
ရွှီနင်က နှိမ့်ချစွာ ပြောလိုက်သည်။
ဟယ့်မင်ယဲ့နှင့် စစ်ယင်တို့သည် ပြုံးရုံသာ ပြုံးနေလိုက်ကြသည်။
ရွှီနင်သည် အလွန်နှိမ့်ချတတ်ကြောင်း သူတို့ သိထားကြသည်။
တစ်ချိန်တည်းမှာပင် ရွှီနင်သည် သူ၏ စွမ်းအားနှင့် အဆင့်အတန်းကြောင့် သူတို့အပေါ်ထားရှိသောသဘောထားမှာ ပြောင်းလဲသွားခြင်းမရှိဘဲ ယခင်အတိုင်းပင် ဖြစ်နေသည်ကို မြင်ရသောအခါ သူတို့နှစ်ဦးမှာ အလွန်ဝမ်းသာသွားကြလေသည်။
“အကြီးအကဲဝမ့်ယယ် အခု ဘယ်လိုနေသေးလဲ”
သူတို့က ဝမ့်ယယ်အကြောင်း ပြောလာသဖြင့် ရွှီနင်သည် သူတို့နှစ်ဦးအား ဝမ့်ယယ်၏အခြေအနေကို မေးမြန်းလိုက်သည်။
“စီနီယာဝမ့်ယယ်ရဲ့ ဒဏ်ရာဟောင်းတွေက အလုံးစုံ မပျောက်သေးပေမယ့် အခုတော့ ဒဏ်ရာတွေကို ထိန်းချုပ်ထားနိုင်ပါပြီ”
ဟယ့်မင်ယဲ့က ပြောပြလေသည်။
“မင်း ချောက်နက်ကြီးမြောက်ပိုင်းကနေ မထွက်ခွာခင် ပေးခဲ့တဲ့ ဆေးလုံးတွေက အရမ်းအသုံးဝင်တယ်လို့ စီနီယာဝမ့်ယယ်က ပြောတယ်”
“ဒါဆိုလည်း ကောင်းတာပေါ့”
ဝမ့်ယယ်၏ ဒဏ်ရာများကို ထိန်းချုပ်ထားနိုင်ပြီဖြစ်ကြောင်း ကြားရသောအခါ ရွှီနင် ခေါင်းညိတ်လိုက်သည်။
ရွှီနင်၏ လက်ရှိအဆင့်ဖြင့်ဆိုလျှင် ဝမ့်ယယ်၏ ဒဏ်ရာများကို ကုသရန်အတွက် ပိုမိုထိရောက်သော ဆေးလုံးများကို အလွယ်တကူ ဖော်စပ်နိုင်ပြီဖြစ်သည်။
ခေတ္တမျှ အနားယူကုသလိုက်ရုံဖြင့် ရွှီနင်သည် ဝမ့်ယယ်အား သူ၏ အမြင့်ဆုံးအခြေအနေသို့ ပြန်လည်ရောက်ရှိစေနိုင်ပေသည်။
ရွှီနင်သည် အချိန်ယူကာ ချောက်နက်ကြီးမြောက်ပိုင်းသို့ ပြန်သွားပြီး ဝမ့်ယယ်၏ ဒဏ်ရာများကို အလုံးစုံ ကုသပေးရန် စီစဉ်လိုက်သည်။
“ဆရာရယ်... အကြီးအကဲ ချိုးရန့်ရှန်း၊ အကြီးအကဲ တုယွမ်နဲ့ သွမ့်ချင်းဟွေးတို့ရော အားလုံး အဆင်ပြေကြရဲ့လား”
ရွှီနင် ထပ်မေးလိုက်သည်။
ချိုးရန့်ရှန်း၊ တုယွမ်နှင့် သွမ့်ချင်းဟွေးတို့သည် တာအိုနယ်ပယ်သို့ အတင်းအကျပ် ချိုးဖျက်ဝင်ရောက်ခဲ့ပြီး ကျောက်စိမ်းညဂိုဏ်းမှ လူများ၏ ပြင်းထန်သော တိုက်ခိုက်မှုကြောင့် ဒဏ်ရာရခဲ့ကြသည်။ သူတို့သည် နှစ်အတန်ကြာ အနားယူရမည် ဖြစ်သည်။
“အကြီးအကဲသုံးယောက်လုံး အခြေအနေ ကောင်းပါတယ်... ဒါပေမယ့် သူတို့ အလုံးစုံ ပြန်ကောင်းလာဖို့ဆိုရင် နောက်ထပ် ငါးနှစ်လောက် အချိန်ယူရဦးမယ်”
ဟယ့်မင်ယဲ့က ပြောလေသည်။
“သူတို့သုံးယောက်က ငါးနှစ်ကြာရင် ဝမ်ရှန့်ပြည်နယ်ကို လာဖို့ စီစဉ်ထားကြတယ်”
“ဆရာ့အတွက်ကတော့ သူက ဓာတ်စွမ်းအင်မျိုးစေ့တစ်ခုကို ဖွဲ့စည်းနိုင်ခဲ့ပြီ။ ဒုတိယတစ်ခုကို ဆက်ဖွဲ့စည်းနေတုန်းပဲ။ ဆရာ တာအိုနယ်ပယ်ကို ချိုးဖျက်ဝင်ရောက်ချင်တယ်ဆိုရင်တော့ အချိန်ပိုကြာလိမ့်မယ်”
“သြော်...”
ရွှီနင် ခေါင်းညိတ်လိုက်သည်။
မီရှင်းယယ်သည် ချောက်နက်ကြီးမြောက်ပိုင်းရှိ ဂိုဏ်းကြီးတစ်ခု၏ ခေါင်းဆောင်တစ်ဦးဖြစ်ခဲ့လေသည်။
သို့သော် ဝမ်ရှန့်ပြည်နယ်တွင်မူ ထိုအဆင့်မှာ မဆိုးလှဟုသာ သတ်မှတ်နိုင်ပေသည်။
“ဒါနဲ့ ရွှီနင်...”
ဟယ့်မင်ယဲ့က စာတစ်စောင်ကို ထုတ်ကာ သူ့ထံ ကမ်းပေးလိုက်သည်။
“ဒါ ဘယ်သူရေးလိုက်တာလဲ”
ရွှီနင်က မေးလိုက်သည်။
“မင်းဘာသာ ဖတ်ကြည့်လိုက်ပါ”
ဟယ့်မင်ယဲ့က ပြုံးလိုက်သည်။
ရွှီနင် လှမ်းယူလိုက်ပြီး စာအိတ်ပေါ်ရှိ ကလေးဆန်ဆန် လက်ရေးကို ကြည့်လိုက်သည်။ ၎င်းအပေါ်တွင် “ချစ်လှစွာသော ဦးလေး” ဟု ရေးသားထားလေသည်။
“ထောင်ထောင်လား”
ရွှီနင်၏ မျက်လုံးများ အရောင်တောက်သွားသည်။
ရွှီနင် ထွက်ခွာလာစဉ်က ထောင်ထောင့်၏ စာရေးသားမှုမှာ မပြည့်စုံသေးဘဲ လက်ရေးများမှာလည်း ကောက်ကွေးနေဆဲဖြစ်သည်။ ယခုမူ အနည်းငယ် ကလေးဆန်နေသေးသော်လည်း လက်ရေးမှာ အလွန်ဖြောင့်မတ်နေပြီ ဖြစ်သည်။
ရွှီနင်သည် စာကို အမြန်ဖွင့်ဖတ်လိုက်လေသည်။
ရွှီနင် စာဖတ်နေစဉ် သူ၏ နှုတ်ခမ်းများ ပြုံးယောင်သန်းနေလေသည်။
ရွှီနင်သည် စကားလုံးရာပေါင်းများစွာ ပါဝင်သော ထိုစာကို အတန်ကြာအောင် ဖတ်နေလေသည်။
“ဒီကလေးမလေး ထောင်ထောင်ကတော့...”
ဖတ်ပြီးနောက် ရွှီနင်သည် စာကို သေချာစွာ သိမ်းဆည်းလိုက်သည်။
စာထဲတွင် ထောင်ထောင်က ထောင်မိသားစုအကြောင်းကို ပြောပြထားလေသည်။
ပထမဦးစွာ ထောင်ထောင်ကိုယ်တိုင် ယွမ်ရှန်းဂိုဏ်းသို့ ဝင်ရောက်ခဲ့ပြီး ဂိုဏ်းချုပ်ဖုန်းရှိုး၏ တပည့် ဖြစ်လာခဲ့သည်။
ရွှီနင်ကြောင့် ဖုန်းရှိုးသည် သူမကို အလွန်အလေးထားခဲ့၏။
ထောင်ထောင်ကလည်း သူမ၏ ဦးလေးဖြစ်သူ ရွှီနင်အတွက် မျက်နှာမပျက်စေရန် ကိုယ်ခံပညာကို အလွန်ကြိုးစားလေ့ကျင့်ခဲ့ကြောင်း သိရသည်။
ထောင်ထောင်သည် အသက် ကိုးနှစ်သာ ရှိသေးသော်လည်း သူမ၏ ကိုယ်ပိုင်ကြိုးစားအားထုတ်မှုနှင့် ရွှီနင် ချန်ထားရစ်ခဲ့သော ဆေးလုံးများကြောင့် သာမန်လူသားနယ်ပယ် ဆဋ္ဌမအဆင့်သို့ ရောက်ရှိနေပြီ ဖြစ်သည်။
သို့သော် ဤရလဒ်သည် သူမ အခြေခံကောင်းမွန်စေရန် အချိန်များစွာယူပြီး တည်ဆောက်ခဲ့ပြီးမှသာ ရရှိလာခဲ့ခြင်း ဖြစ်သည်။
ထောင်ထောင်သည် ရွှီနင်နှင့် ယှဉ်လျှင် အများကြီး ကွာခြားနေသေးသော်လည်း သူမ၏ ကျင့်ကြံမှုအရှိန်အဟုန်ကို ရွှီနင် အလွန်ကျေနပ်နေပြီ ဖြစ်သည်။
ထောင်ထောင်သည် သူမအကြောင်းသာမက သူမ၏ မိဘများဖြစ်သော ရွှီနင်၏ ယောက်ဖ ထောင်ယွင်ချွမ်းနှင့် အစ်မဖြစ်သူ ရွှီလျန်တို့အကြောင်းကိုပါ ထည့်ရေးထားသေးသည်။
သူတို့နှစ်ဦးသည် သိုင်းပညာ မလေ့ကျင့်ခဲ့သော်လည်း ဆေးလုံးများ စားသုံးခဲ့သောကြောင့် သာမန်လူသားနယ်ပယ်၏ အဆင့်မြင့်ပိုင်းသို့ အတင်းအကျပ် တွန်းပို့ခြင်း ခံခဲ့ရသည်။
သူတို့တွင် လက်တွေ့တိုက်ပွဲ အတွေ့အကြုံဟူ၍ မရှိပေ။ သိုင်းပညာနယ်ပယ် တိုးတက်လာခြင်းဆိုသည်မှာ သူတို့၏ ခန္ဓာကိုယ်များကို ကြံ့ခိုင်စေရန်အတွက်သာ ဖြစ်ပေသည်။
ထောင်ယွင်ချွမ်းနှင့် ရွှီလျန်တို့သည် ထောင်ထောင့်ကို စောင့်ရှောက်နိုင်ရန်အတွက် ယွင်ယင်းမြို့တွင် နေထိုင်ကာ ဝေ့မိသားစုနှင့်အတူ နေထိုင်ခဲ့ကြသည်။
ရွှီနင်၏ အရှိန်အဝါကြောင့် သူတို့၏ ဘဝမှာ အတော်လေး သက်တောင့်သက်သာ ရှိခဲ့လေသည်။
တစ်ခုတည်းသော အဆင်မပြေမှုမှာ သူတို့၏ ဇာတိရွာနှင့် အလွန်ဝေးကွာနေခြင်းပင် ဖြစ်သည်။
စာ၏ အဆုံးပိုင်းတွင် ထောင်ထောင်က ကောယယ်အကြောင်းကို ထည့်ရေးထားလေသည်။
ကောယယ်၏ ဘဝပြောင်းလဲမှုများက ရွှီနင်ကို အံ့အားသင့်သွားစေခဲ့သည်။
လွန်ခဲ့သော နှစ်နှစ်အတွင်း ကောယယ်သည် အိမ်ထောင်ကျသွားခဲ့ပြီး သားလေးတစ်ယောက်ပင် ရနေပြီ ဖြစ်သည်။
ရွှီနင် စာကိုကြည့်ရင်း အသံထွက်ရယ်မောမိမတတ် ဖြစ်သွားရလေသည်။
ရွှီနင်သည် ပြန်သွားပြီး ကောယယ်၏သားကို သူ၏ မွေးစားသားအဖြစ် ခံယူချင်စိတ်များပင် ပေါ်လာတော့သည်။
“နှစ်နှစ်ပဲ ရှိသေးတယ်... ဒါပေမယ့် အများကြီး ပြောင်းလဲသွားခဲ့တာပဲ”
ရွှီနင်တစ်ယောက် လွမ်းဆွတ်စွာဖြင့် သက်ပြင်းချလိုက်မိသည်။
ထောင်ထောင်သည် ကလေးကြီးတစ်ယောက် ဖြစ်လာခဲ့ပြီး ကောယယ်မှာလည်း သားတစ်ယောက် ရနေလေပြီ။
“အချိန်တန်ရင် ချောက်နက်ကြီးမြောက်ပိုင်းကို ပြန်သွားပြီး ကြည့်ကြတာပေါ့”
စစ်ယင်သည်လည်း ရွှီနင်၏ အိမ်လွမ်းစိတ်ကို ရိပ်မိပြီး ပြောလိုက်သည်။
“အင်း...”
ရွှီနင် ခေါင်းညိတ်လိုက်သည်။
“ဒါနဲ့ ဂိုဏ်းတူအစ်ကိုကြီး... စီနီယာအစ်မစစ်” စကားအနည်းငယ် ပြောပြီးနောက် ရွှီနင်က မေးလိုက်သည်။
“ဝမ်ရှန့်ပြည်နယ်ကို ရောက်လာပြီးတော့ ဘာတွေဆက်လုပ်ဖို့ အစီအစဉ်ရှိလဲ”
“သီးသန့် အစီအစဉ်တော့ မရှိပါဘူး”
ဟယ့်မင်ယဲ့က ပွင့်ပွင့်လင်းလင်းပင် ပြောလိုက်သည်။
“ဒီကိုမလာခင်ကတည်းက စဉ်းစားထားပြီးသားပါ... ငါတို့က မင်းဆီမှာ ခိုလှုံဖို့ လာခဲ့တာ”
ရွှီနင် ရယ်မောလိုက်သည်။
“ကောင်းပါပြီ... ဒါဆိုရင် ခင်ဗျားတို့နှစ်ယောက်လုံး ယန့်လုဂိုဏ်းကို ဝင်လို့ရတာပေါ့”
“ကောင်းပြီလေ”
ဟယ့်မင်ယဲ့နှင့် စစ်ယင်တို့ တစ်ပြိုင်နက်တည်း ပြန်ဖြေလိုက်ကြသည်။
သူတို့ ကျေနပ်သွားကြလေသည်။
ဝမ်ရှန့်ပြည်နယ်သို့ ရောက်လာသော သာမန် ပြင်ပလူများအတွက် ခြေရာချနိုင်ရန် ဆယ်စုနှစ်တစ်ခုကျော် သို့မဟုတ် ဆယ်စုနှစ်ပေါင်းများစွာပင် အချိန်ယူရပေမည်။
သို့သော် ရွှီနင်ကြောင့် ဝမ်ရှန့်ပြည်နယ်တွင် သူတို့နေထိုင်ရန် နေရာတစ်ခု ရရှိခဲ့လေပြီ။
ရွှီနင်၏ စောင့်ရှောက်မှုဖြင့် သူတို့၏ ကျင့်ကြံခြင်း အရင်းအမြစ်များနှင့် လုံခြုံရေးအတွက် ပူပန်စရာ မလိုတော့ချေ။
“ဒါပေမယ့် ဂိုဏ်းကိုဝင်မယ်ဆိုရင် ခင်ဗျားတို့ကို အရန်အကြီးအကဲ ရာထူးအရင်ပေးထားမှ ရလိမ့်မယ်။ မဟုတ်ရင် ဂိုဏ်းထဲမှာ မကျေနပ်မှုတွေ ရှိလာနိုင်တယ်”
ရွှီနင်က ပွင့်ပွင့်လင်းလင်းပင် ပြောလိုက်သည်။
“မင်း သဘောပါပဲ”
ဟယ့်မင်ယဲ့နှင့် စစ်ယင်တို့သည် ထိုကိစ္စကို ဂရုမစိုက်ကြပေ။
ယန့်လုဂိုဏ်းတွင် အာဏာရယူရန် သူတို့ စိတ်မဝင်စားကြချေ။
“ဒါပေမယ့်...”
ဟယ့်မင်ယဲ့က ရုတ်တရက် ပြောလိုက်သည်။
“ယန့်လုဂိုဏ်းကို တရားဝင်မဝင်ခင် ငါတို့ ဝမ်ရှန့်ပြည်နယ်က ယွမ်ရှန်းဂိုဏ်းကို အရင်သွားရဦးမယ်”
“ယွမ်ရှန်းဂိုဏ်းက ချောက်နက်ကြီးမြောက်ပိုင်းနဲ့ ဆက်သွယ်လို့ရတဲ့ နည်းလမ်းရှိတယ်လေ။ ဒါကြောင့် ငါတို့ အန္တရာယ်ကင်းကင်း ရောက်လာပြီဆိုတဲ့ သတင်းကို ပို့ပေးရမယ်။ ပြီးတော့ ချောက်နက်ကြီးမြောက်ပိုင်းက ဂိုဏ်းချုပ်ဖုန်းရှိုးကလည်း ဝမ်ရှန့်ပြည်နယ်က ယွမ်ရှန်းဂိုဏ်းကို သွားကြည့်ပေးဖို့ ငါတို့ကို အကူအညီတောင်းထားသေးတယ်”
“ရပါတယ်”
ရွှီနင် ခေါင်းညိတ်လိုက်သည်။
ယခင်က ရွှီနင် ဘေးကင်းစွာ ရောက်ရှိပြီးနောက် ချောက်နက်ကြီးမြောက်ပိုင်းသို့ သတင်းပို့ပေးရန် ယွမ်ရှန်းဂိုဏ်းကို အကူအညီတောင်းခဲ့ဖူးလေသည်။
“ရွှီနင်... မကြာသေးခင်က ဝမ်ရှန့်ပြည်နယ်က ယွမ်ရှန်းဂိုဏ်းနဲ့ ဆက်သွယ်ဖြစ်သေးလား”
ဟယ့်မင်ယဲ့က မေးလိုက်သည်။
“ဟင့်အင်း”
ရွှီနင်က ပြန်ဖြေလိုက်သည်။
“ဝမ်ရှန့်ပြည်နယ်မှာ လမ်းခွဲပြီးကတည်းက ကျွန်တော်တို့ ပြန်မတွေ့ဖြစ်ကြတော့ဘူး”
“သြော်... ဒါဆိုရင်တော့...”
ဟယ့်မင်ယဲ့က စဉ်းစားကာ ပြောလိုက်သည်။
“ဂိုဏ်းချုပ်ဖုန်းရှိုးက ဝမ်ရှန့်ပြည်နယ်ကို ရောက်ရင် ယွမ်ရှန်းဂိုဏ်းကို သွားကြည့်ခိုင်းတဲ့ အကြောင်းရင်းက ဝမ်ရှန့်ပြည်နယ်ကနေ သတင်းအစအနမရတာ တစ်နှစ်ကျော်နေပြီမို့လို့လေ။ အဲဒါကြောင့် ဂိုဏ်းချုပ်ဖုန်းရှိုးက နည်းနည်း စိတ်ပူနေတာ”
“အိုး...”
ရွှီနင် မျက်ခုံးပင့်လိုက်မိသည်။
ယွမ်ရှန်းဂိုဏ်းနှစ်ခုကြား ဆက်သွယ်မှုသည် အထူးပစ္စည်းတစ်ခုမှတစ်ဆင့် ပြုလုပ်ရကြောင်း ရွှီနင် သိထားလေသည်။
သို့သော် ထိုအထူးပစ္စည်းမှာ အပြန်အလှန် ဆက်သွယ်နိုင်ခြင်း မရှိဘဲ တစ်ဖက်သတ် ဆက်သွယ်မှုသာ ပြုလုပ်နိုင်ပေသည်။
ဝမ်ရှန့်ပြည်နယ်ကသာ ချောက်နက်ကြီးမြောက်ပိုင်းသို့ သတင်းပို့နိုင်ပြီး ဟိုဘက်မှ ပြန်လည်သတင်းပို့၍ မရနိုင်ချေ။
ကျောက်စိမ်းညဂိုဏ်းမှ ချောက်နက်ကြီးမြောက်ပိုင်းကို ကျူးကျော်ဝင်ရောက်စဉ်က ဝမ်ရှန့်ပြည်နယ်မှ မြောက်ပိုင်းချောက်နက်သို့ တစ်ဖက်သတ် သတင်းပေးပို့ခဲ့ခြင်း ဖြစ်သည်။
“ဒါဆိုရင်တော့...”
ရွှီနင် ခေတ္တမျှ စဉ်းစားလိုက်သည်။
“ဒီလိုဆိုမှတော့ ရက်အနည်းငယ်နေရင် အစ်ကိုတို့နဲ့အတူ ကျွန်တော် လိုက်ခဲ့မယ်လေ”
ဝမ်ရှန့်ပြည်နယ်သို့ ရောက်ရှိလာခဲ့သော နှစ်နှစ်တာ ကာလအတွင်း ထန်ယွင်ခုံးနှင့် ကူမန့်တို့က သူ့ကို ဖိတ်ခေါ်ခဲ့ကြသော်လည်း ရွှီနင်သည် ယွမ်ရှန်းဂိုဏ်းနှင့် အဆက်အသွယ် မလုပ်ဖြစ်ခဲ့ပေ။
ထို့အပြင် ယွမ်ရှန်းဂိုဏ်းတည်ရှိရာ ကုချင်းစီရင်စုနှင့် ဖုန်းလင်စီရင်စုတို့မှာ အလွန်ဝေးကွာသောကြောင့် တစ်ဦးနှင့်တစ်ဦး သတင်းအစအန မကြားခဲ့ရခြင်း ဖြစ်သည်။
နှစ်နှစ်ကြာ အလုပ်ရှုပ်နေပြီးနောက် ယခု အချိန်ရပြီဖြစ်ရာ ရွှီနင်သည် သူတို့ထံ သွားရောက်လည်ပတ်ရန် ဆုံးဖြတ်လိုက်သည်။
“ကောင်းပြီ”
ဟယ့်မင်ယဲ့က ပြောလိုက်သည်။
“ဒါဆိုရင် သုံးရက်နေရင် ငါတို့ ထွက်ကြတာပေါ့”
“ကောင်းပါပြီ”
ရွှီနင်က ပြန်ဖြေလိုက်သည်။
“ဂိုဏ်းချုပ်”
ချန်ကျန်းထောင်းသည် ပင်မတောင်ထွတ်ဆီသို့ ရုတ်တရက် အပြေးရောက်လာလေသည်။
ဂိုဏ်းချုပ်၏ မိတ်ဆွေများ ချောက်နက်ကြီးမြောက်ပိုင်းမှ ရောက်ရှိနေကြောင်း သူ၏တပည့်ထံမှ သိရသဖြင့် သူတို့ကို တွေ့ဆုံရန် အမြန်ရောက်လာခြင်း ဖြစ်သည်။
“စီနီယာအစ်ကိုချန်... အချိန်ကိုက်ပဲ”
ရွှီနင်သည် အစပိုင်းက ချန်ကျန်းထောင်းကို ရှာဖွေပြီး ဟယ့်မင်ယဲ့နှင့် စစ်ယင်တို့ကို ဂိုဏ်းနှင့် အသားကျစေရန် ကိုယ်တိုင်ကိုယ်ကျ ကူညီပေးရန် အကူအညီတောင်းလိုခဲ့သော်လည်း ယခုတော့ သူကိုယ်တိုင် ရောက်လာခဲ့လေပြီ။
“ဒီနှစ်ယောက်က ချောက်နက်ကြီးမြောက်ပိုင်းက ကျွန်တော့်ရဲ့ ဂိုဏ်းတူအစ်ကိုကြီးဟယ့်မင်ယဲ့နဲ့ စီနီယာအစ်မစစ်ယင်တို့ပဲ။ သူတို့နှစ်ယောက်လုံးက တာအိုနယ်ပယ် ပထမအဆင့်မှာ ရှိကြတယ်။ သူတို့ကို ဂိုဏ်းရဲ့ အရန်အကြီးအကဲတွေအဖြစ် ခန့်အပ်ဖို့ စီစဉ်ထားတယ်။ လိုအပ်တာတွေ စီစဉ်ပေးပါဦး”
ရွှီနင်က ပြောလိုက်သည်။
“ဟုတ်ကဲ့ပါ ဂိုဏ်းချုပ်”
ချန်ကျန်းထောင်းက ပြန်ဖြေလိုက်သည်။
ရွှီနင်၏ တောင်းဆိုမှုမှာ အကြောင်းမဲ့သက်သက် မဟုတ်ပေ။ တာအိုနယ်ပယ် သိုင်းပညာရှင် နှစ်ဦးသည် ဂိုဏ်း၏ အရန်အကြီးအကဲများ ဖြစ်လာရန် သင့်လျော်ပေသည်။
ထို့အပြင် ရွှီနင်က သူတို့ကို တရားဝင် အကြီးအကဲများအဖြစ် ခန့်အပ်လျှင်ပင် ဂိုဏ်းထဲတွင် မည်သူကမျှ မကျေနပ်ချက်များကို ထုတ်ဖော်ပြောဆိုရဲကြမည် မဟုတ်ပေ။