အခန်း (၁၅၇-၁၅၈)

အခန်း ၁၅၇ - အသစ်စက်စက် အဆင့် ၈ ရတနာသေတ္တာနှင့် တန်ဖိုးကြီးမားသော ဖန်တီးမှုကုန်ကြမ်းများ

စက်လုံးပုံသဏ္ဌာန် ပစ္စည်းကို ကိုင်ဆောင်ထားလျက် ဝေါလီက ပြေးလာကာ သူ၏ခေါင်းပေါ်သို့ မြှောက်တင်ပြလိုက်လေ၏။

"ကောင်းလိုက်တာ ဝေါလီ၊ မင်းက တကယ်ကို ငါ့ရဲ့ အထက်မြက်ဆုံး စက်ရုပ်လေးပဲ"

သူက ပြောလိုက်သော်လည်း တကယ်တမ်းတွင် သူ၏ထံ၌ စက်ရုပ်တစ်ရုပ်တည်းသာ ရှိနေခဲ့ခြင်း ဖြစ်ပေသည်။

သူက စက်လုံးကို ယူလိုက်ကာ တစ်ဆက်တည်းမှာပင် ဝေါလီ၏ ခေါင်းကို ပွတ်သပ်ပေးလိုက်လေ၏။

"မင်း ထိခိုက်ဒဏ်ရာ မရခဲ့ဘူးမလား"

ဝေါလီက ခေါင်းရမ်းလိုက်ပြီး သူ၏ မျက်လုံးနှစ်လုံးက ပျော်ရွှင်စွာဖြင့် ကွေးညွတ်သွားလေသည်။ ၎င်းက သခင်ဖြစ်သူ၏ ချီးကျူးမှုနှင့် ဂရုစိုက်မှုကို အလွန်အမင်း သဘောကျနေကြောင်း ရှင်းလင်းစွာ ပြသနေခဲ့ပေ၏။

"ဒါဆိုလည်း ကောင်းတာပေါ့။ အို... ဟုတ်သားပဲ၊ မင်းကို အားသွင်းပေးရဦးမယ်"

ရဲချီယန်က လက်ဖျောက်တစ်ချက် တီးလိုက်ရာ ရထားတွဲအတွင်းရှိ လေဟာနယ် လျှပ်စစ်မီးဖိုက ဝေါလီ၏ ခန္ဓာကိုယ်ထဲသို့ လျှပ်စစ်စွမ်းအင်များကို တိုက်ရိုက် ပို့လွှတ်ပေးလိုက်လေ၏။

ရင်းနှီးနေသော လျှပ်စစ်စီးကြောင်းကို ခံစားလိုက်ရသောအခါ စက်ရုပ်လေးက ပျော်ရွှင်စွာဖြင့် မျက်လုံးများကို မှေးစင်းသွားကာ သက်တောင့်သက်သာရှိလွန်းသဖြင့် မေ့လဲတော့မည့်အလား ဖြစ်နေခဲ့ပေသည်။

၎င်းကို အနားယူစရာနေရာလေးအောက်သို့ သယ်ဆောင်သွားပြီးနောက် ရဲချီယန်က ပြုံးလျက် ခေါင်းရမ်းလိုက်ကာ နောက်ဆုံးတွင်တော့ သူ၏ အကြည့်များက စက်လုံးပုံသဏ္ဌာန် ပစ္စည်းထံသို့ ကျရောက်သွားလေတော့၏။

【အဆင့် ၇ ရတနာသေတ္တာ (ဖွင့်နိုင်သည်)】

၎င်းက ရတနာသေတ္တာတစ်ခု ဖြစ်လေ၏။

ဆိုလိုသည်မှာ...

အဆင့်မြင့် အသွင်ကူးပြောင်းခြင်း ပြုလုပ်နိုင်ပေသည်။

ရဲချီယန်က အချိန်ဆွဲမနေတော့ဘဲ စက်လုံးပုံသဏ္ဌာန် ရတနာသေတ္တာကို ပွတ်သပ်ကာ တိုးညင်းစွာ ရေရွတ်လိုက်လေ၏။

"အဆင့်မြင့် အသွင်ကူးပြောင်းခြင်း"

【ကိုယ်ခံစွမ်းအား ၁၄၀ - ၈၀】 【စိတ်စွမ်းအား ၁၅၀ - ၉၀】

ပြီးခဲ့သည့်အကြိမ်ကကဲ့သို့ပင် ၁၂၀ ပွိုင့် စားသုံးသွားခဲ့ခြင်း ဖြစ်လေသည်။

သူ၏လက်ထဲရှိ စက်လုံးက အတိတ်ကကဲ့သို့ပင် ရုပ်ပိုင်းဆိုင်ရာ ပြောင်းလဲမှု တစ်စုံတစ်ရာမျှ မရှိခဲ့ချေ။

【အဆင့် ၈ ရတနာသေတ္တာ (ဖွင့်နိုင်သည်)】

အဆင့်မြင့် အသွင်ကူးပြောင်းခြင်းက အောင်မြင်သွားချေပြီ။ မျက်လုံးများ တောက်ပနေလျက် ရဲချီယန်က ၎င်းကို ဖွင့်ရန်ပင် မစောင့်ဆိုင်းနိုင်တော့ချေ။

【ရတနာသေတ္တာ ပွင့်သွားပါပြီ။ အောက်ပါပစ္စည်းများကို ရရှိပါသည်】

【၁။ တစ်နာရီ ရပ်နားချိန် × ၂ (ကုန်သွယ်နိုင်သည်)】

【၂။ ရထားမောင်းနှင်သူ မော်ဂျူး ကတ်ပြား - အဝတ်အစား ဖန်တီးခြင်း】

【၃။ သားရဲဧကရာဇ်၏ ဆူပွက်နေသောသွေး (အဆင့် ၈) × ၁】

【၄။ ပုံစံကြမ်း - သားရဲဘုရင် အတွင်းခံသံချပ်ကာ (အဆင့် ၈) × ၁】

ဆုလာဘ်လေးခုဖြစ်ကာ ၎င်းတို့အနက်မှ နှစ်ခုက အဆင့် ၈ ဟု မှတ်သားထားပေသည်။

သူက ပထမဆုံးအရာမှစတင်၍ ကြည့်ရှုလိုက်လေ၏။

ကုန်သွယ်နိုင်သော နှစ်နာရီ ရပ်နားချိန်။ ကျူရှင်းထူထံမှ သူ သိရှိခဲ့ရသော တန်ဖိုးအရ ကုန်သွယ်နိုင်သော အချိန်နှစ်နာရီကို ရထားဒင်္ဂါး ၆၀ အထိ ဈေးကောင်းရအောင် ရောင်းချနိုင်ပေသည်။

သို့သော်လည်း ရဲချီယန်က ၎င်းကို ရောင်းချရန် မရည်ရွယ်ထားခဲ့ချေ။

မကြာသေးမီက ရထားကို အဆင့်မြှင့်တင်ရာတွင် ရထား ရပ်နားခြင်းအတွက် ရွေးချယ်စရာက ပေါ်ထွက်မလာခဲ့ပေ။

အကယ်၍ ရထား၏ ရပ်နားချိန်ကို ၂၄ နာရီကျော်လွန်စေချင်ပါက အချိန်တိုးမြှင့်ရန် ဤကဲ့သို့သော ကုန်သွယ်နိုင်သည့် အချိန်များကိုသာ အားထားရမည်ဟု ထင်ရလေ၏။

ဒုတိယ ဆုလာဘ်။

【ရထားမောင်းနှင်သူ မော်ဂျူး ကတ်ပြား - အဝတ်အစား ဖန်တီးခြင်း】

【စိတ်စွမ်းအားနှင့် ကုန်ကြမ်းများကို စားသုံး၍ အဝတ်အစားများကို ဖန်တီးခွင့်ပြုသည်】

၎င်းက အထူးတလည် ကောင်းမွန်လွန်းသော မော်ဂျူးတစ်ခု မဟုတ်သော်လည်း အားသာချက်မှာ ၎င်းက မော်ဂျူး ကတ်ပြားတစ်ခု ဖြစ်နေခြင်းပင်။ ဆိုလိုသည်မှာ ၎င်းကို အဆင့်မြင့် အသွင်ကူးပြောင်းခြင်း တစ်ကြိမ် ပြုလုပ်နိုင်ပေသည်။

သူက ၎င်းကို နောက်မှလုပ်ရန် ဘေးဖယ်ထားလိုက်လေ၏။

သူက ဆက်လက်ဖတ်ရှုလိုက်သည်။

【သားရဲဧကရာဇ်၏ ဆူပွက်နေသောသွေး (အဆင့် ၈)】

【စားသုံးနိုင်သောအရာ】

【စားသုံးပြီးနောက် အများဆုံး ကိုယ်ခံစွမ်းအားကို ၃၀၀ ပွိုင့် တိုးမြှင့်ပေးကာ မိနစ် ၆၀ ကြာ ကိုယ်ခံစွမ်းအား ၃၀၀ ကို ပြန်လည်ဖြည့်တင်းပေးသည်။ ထိုအချိန်အတွင်း အများဆုံး စိတ်စွမ်းအားက ၁၅၀ ပွိုင့် လျော့ကျသွားမည် ဖြစ်သည်။ အချိန်ကုန်ဆုံးသွားသည်နှင့် တစ်ပြိုင်နက် ကိုယ်ခံစွမ်းအားနှင့် စိတ်စွမ်းအားတို့က မူလအခြေအနေသို့ ပြန်လည်ရောက်ရှိသွားမည်】

ဟူး... ဒီအရာက အတော်လေး အစွန်းရောက်လှပေသည်။

အများဆုံး စိတ်စွမ်းအား ၁၅၀ ပွိုင့် လျှော့ချခံရခြင်းနှင့် အများဆုံး ကိုယ်ခံစွမ်းအား ၃၀၀ ပွိုင့် တိုးမြှင့်လာခြင်းကို လဲလှယ်ရခြင်းပင်။ အကယ်၍ ဤအရာကို စိတ်စွမ်းအား အဆင့်မြှင့်တင်ထားခြင်း မရှိသော ရထားမောင်းနှင်သူ တစ်ယောက်သာ သုံးလိုက်ပါက သူတို့ သုံးနိုင်မည်ပင် မဟုတ်ချေ။

အဆင့်မြင့် ရထားမောင်းနှင်သူတစ်ဦး သို့မဟုတ် သူ့ကဲ့သို့ စိတ်စွမ်းအားကို မြှင့်တင်ထားသူအတွက်ပင် ဤစားသုံးနိုင်သောအရာကို အသုံးပြုလိုက်ပါက သူတို့၏ စိတ်စွမ်းအားက သုညအထိ ကျဆင်းသွားမည် ဖြစ်လေသည်။ ဆိုလိုသည်မှာ ထိုအချိန်ကာလအတွင်း လုံးဝရူးသွပ်မှုထဲသို့ ကျဆင်းသွားမည် ဖြစ်ပေ၏။

"ဒါက ပစ္စည်းကောင်းတစ်ခုပဲ... မရောင်းတာ ပိုကောင်းမယ်"

ရဲချီယန်က သွေးပုလင်းကို သိမ်းဆည်းရင်း စိတ်ထဲတွင် ၎င်း၏ အလားအလာရှိသော အသုံးပြုမှုများကို တွက်ချက်ကာ သူ့ဘာသာ ရေရွတ်လိုက်လေ၏။

သူကိုယ်တိုင် သောက်မလား။ လျော့ကျမှုများကြောင့် သူ၏ စိတ်စွမ်းအားက ပြောင်းလဲသွားပုံမရသော်လည်း သုညအထိ ကျဆင်းသွားခြင်းက အလွန်အမင်း အန္တရာယ်များလွန်းလှပေသည်။

သူ၏ အကြည့်များက အောက်သို့ ဆက်လက်ရွေ့လျားသွားကာ နောက်ဆုံးဆုလာဘ်ပေါ်သို့ ကျရောက်သွားလေတော့၏။

【ပုံစံကြမ်း - သားရဲဘုရင် အတွင်းခံသံချပ်ကာ (အဆင့် ၈)】

【လိုအပ်သောကုန်ကြမ်း - အော့က်နတ်ဆိုးကြီး၏ တင်းပုတ် + အော့က်သားရေ + အိပ်မက် ပိုးကြိုး】

ပုံစံကြမ်းတစ်ခု။

တိကျသော အာနိသင်များက ၎င်းကို ဖန်တီးပြီးမှသာ ထွက်ပေါ်လာမည် ဖြစ်ပေသည်။

သူ၏ စစ်ဆေးမှုများ ပြီးဆုံးသွားပြီးနောက် ရဲချီယန်က ပထမဆုံး ဆုလာဘ်ဖြစ်သော ရပ်နားချိန်ကို အရင်ဆုံး အသုံးပြုလိုက်လေ၏။ သူ၏ ရပ်နားချိန်က ၁၅ နာရီမှ ၁၇ နာရီသို့ ပြောင်းလဲသွားချေပြီ။

သူက မီးခိုးနုရောင် ကတ်ပြားကို လက်ထဲတွင် ကိုင်ထားလိုက်လေသည်။

သူ မော်ဂျူး ကတ်ပြား တစ်ခုကို နောက်ဆုံးရရှိခဲ့သည်မှာ အချိန်အတော်ကြာခဲ့ပြီ ဖြစ်လေ၏။

မကြာသေးမီက သူရရှိခဲ့သော မော်ဂျူးများအားလုံးက ရုပ်ပိုင်းဆိုင်ရာ ကတ်ပြားများအဖြစ် မဟုတ်ဘဲ သူ၏အပေါ်သို့ တိုက်ရိုက် သက်ရောက်သွားခဲ့ခြင်း ဖြစ်ပေသည်။

ယနေ့ပစ္စည်းက နောက်ဆုံးတွင်တော့ သူ့အား အဆင့်မြင့် အသွင်ကူးပြောင်းခြင်း ပြုလုပ်ရန် အခွင့်အရေးတစ်ခု ပေးအပ်ခဲ့လေပြီ။

ရဲချီယန်က လက်နှစ်ဖက်ကို ပွတ်သပ်လိုက်ကာ ကတ်ပြားကို ကျွမ်းကျင်စွာဖြင့် ပြောလိုက်လေ၏။

"အဆင့်မြင့် အသွင်ကူးပြောင်းခြင်း"

ရင့်ရှိုင်းသော အပြာရောင် အလင်းတန်းတစ်ခုက ကတ်ပြားကို လွှမ်းခြုံသွားလေသည်။

စိတ်စွမ်းအားနှင့် ကိုယ်ခံစွမ်းအားတို့က တစ်ပြိုင်နက်တည်း ကုန်ဆုံးသွားလေ၏။ မျက်တောင်တစ်ခတ်အတွင်းတွင် မူလက မီးခိုးနုရောင် ကတ်ပြားက တောက်ပသော အလင်းရောင်တစ်ခုကို ထုတ်လွှတ်လာခဲ့ပေသည်။

【ကိုယ်ခံစွမ်းအား ၈၀ - ၆၀】 【စိတ်စွမ်းအား ၉၀ - ၄၀】

【ရထားမောင်းနှင်သူ မော်ဂျူး ကတ်ပြား - အဝတ်အစား ဖန်တီးခြင်း ပြောင်းလဲသွားသည် ရထားမောင်းနှင်သူ အဆင့်မြင့် မော်ဂျူး ကတ်ပြား - အသွင်ယူခြင်း】

【ရထားမောင်းနှင်သူ အဆင့်မြင့် မော်ဂျူး ကတ်ပြား - အသွင်ယူခြင်း】

【ဤမော်ဂျူး ကတ်ပြားကို အသုံးပြုပြီးနောက် အောက်ပါ အထူး မော်ဂျူး စွမ်းရည်ကို ရရှိပါသည်】

【အသွင်ယူခြင်း - တပ်ဆင်ထားသော စက်ပစ္စည်း၊ အဝတ်အစား၊ အလှဆင်ပစ္စည်းများကို ဖုံးကွယ်ရန်နှင့် ၎င်းတို့ကို အခြား စိတ်ကူးယဉ် ပုံစံများအဖြစ် ဖန်တီးရန် စိတ်စွမ်းအားကို စားသုံးပါသည်။ ထိခိုက်ဒဏ်ရာ ရရှိပါက အသွင်ယူခြင်းက ပျောက်ကွယ်သွားမည် ဖြစ်သည်】

ရှင်းလင်းချက်က အနည်းငယ် စကားရှည်နေပုံရသော်လည်း ရိုးရိုးရှင်းရှင်း ပြောရလျှင် ဤမော်ဂျူးက မိမိ၏ အဝတ်အစားများကို ပြောင်းလဲရန် အသုံးပြုခြင်းပင် ဖြစ်လေ၏။

ကတ်ပြားကို အသုံးပြုပြီးနောက် ရဲချီယန်က မော်ဂျူးကို စမ်းသပ် အသက်သွင်းလိုက်လေသည်။

သူဝတ်ဆင်ထားသော အဝတ်အစားများက လိမ်ကောက်ကာ ပုံပန်းသဏ္ဌာန် ပြောင်းလဲသွားလေ၏။ ချက်ချင်းဆိုသလိုပင် ၎င်းတို့က ကျောင်းဝတ်စုံနှင့်တူသော အရာတစ်ခုအဖြစ်သို့ ပြောင်းလဲသွားလေတော့သည်။

သူက ဆက်လက်ပြောင်းလဲနေခဲ့ကာ ကျောင်းဝတ်စုံမှသည် အတော်လေး ခန့်ညားထည်ဝါပုံရသော ရှေးဟောင်း စစ်သူကြီးတစ်ဦး၏ သံချပ်ကာအဖြစ်သို့ ပြောင်းလဲလိုက်လေ၏။

သို့သော် တကယ်တမ်းတွင်တော့ အသွင်ယူထားသော ပစ္စည်းများက တစ်ချက်တိုက်ခိုက်ခံရပြီးနောက်တွင် ပျက်စီးသွားမည်ဖြစ်ကာ မည်သည့် လက်တွေ့ကျသော လုပ်ဆောင်ချက်မျှ ရှိမနေခဲ့ချေ။

အခြေခံအားဖြင့် ဤအရာက ဂိမ်းတစ်ခုထဲရှိ ဇာတ်ကောင် စကင် ပြောင်းလဲခြင်းနှင့် ညီမျှနေခဲ့ပေသည်။

"အတော်လေး စိတ်ဝင်စားစရာကောင်းတာပဲ။ အနာဂတ်မှာ ငါ ဝတ်စရာ အဝတ်အစား ရှားပါးတော့မှာ မဟုတ်ဘူး"

ရဲချီယန်က ဤမော်ဂျူးကို အတော်လေး ကျေနပ်သွားလေ၏။

အောက်သို့ ငုံ့ကြည့်လိုက်ရာ ရတနာသေတ္တာထဲရှိ နောက်ဆုံး ပုံစံကြမ်းက သူ၏ မျက်စိကို ဖမ်းစားသွားလေသည်။

"ဒါတစ်ခုပဲ ကျန်တော့တယ်။ အင်း... အရင်ဆုံး ဖန်တီးကြည့်လိုက်ရအောင်"

ပထမကုန်ကြမ်း နှစ်ခုက ရရှိရန် မခက်ခဲလှချေ။

ရဲချီယန်က ထို အော့က်နတ်ဆိုးကြီး၏ တင်းပုတ်ကို ပြန်လည်အသုံးမပြုရသေးဘဲ ၎င်းက အော့က်နတ်ဆိုးမြို့တော်၏ အပျက်အစီးများထဲတွင် တိတ်ဆိတ်စွာ ရှိနေဆဲဖြစ်လေ၏။

သူက ကျီးကန်းနတ်ဆိုးကို ၎င်းအား သွားယူခိုင်းလိုက်ပြီး တစ်ဆက်တည်းမှာပင် အလောင်းအချို့ထံမှ အော့က်သားရေများကိုပါ ရယူခဲ့လေသည်။

သို့သော် နောက်ဆုံးကုန်ကြမ်းဖြစ်သော အိပ်မက် ပိုးကြိုးက ပုံမှန် ကုန်သွယ်ရေး နေရာများတွင် ရှိမနေခဲ့ချေ။ ရဲချီယန်က မှောင်ခိုဈေးကွက်သို့ သွားရောက်စစ်ဆေးလိုက်ရာ သူမြင်တွေ့လိုက်ရသောအရာကြောင့် အံ့အားသင့်သွားလေ၏။

【အိပ်မက် ပိုးကြိုး】

【ဈေးနှုန်း - ရထားဒင်္ဂါး ၃၀】

【အဝတ်အစား ကုန်ကြမ်း】

ကုန်ကြမ်းတစ်ခုတည်းကပင် ရထားဒင်္ဂါး ၃၀ ကျသင့်နေလေသည်။ ဤအရာက အနည်းငယ် ချဲ့ကားလွန်းနေကာ လတ်တလောတွင် သူ၏ထံ၌ ရထားဒင်္ဂါး ခြောက်ဆယ့်ငါးပြားသာ စုစုပေါင်း ရှိနေခဲ့ပေသည်။

သူ ဝယ်သင့်သလား။

ရဲချီယန်က တွန့်ဆုတ်နေခြင်းအလျဉ်းမရှိဘဲ ခေါင်းရမ်းလိုက်လေ၏။

ဝယ်ရမှာပေါ့။ ဘာလို့ မဝယ်ရမှာလဲ။

သူ လုံးဝ ပိုက်ဆံပြတ်နေတာမှ မဟုတ်တာ။

ပိုက်ဆံကုန်သွားရင်တောင် နောက်ထပ်ရှာဖို့ နည်းလမ်းတွေ အမြဲရှိပေမဲ့ မိမိကိုယ်ကိုယ် တိုးတက်စေနိုင်တဲ့ လက်နက်ကိရိယာတွေက ပိုအရေးကြီးတယ်လေ။

ဒါ့အပြင် မနက်ဖြန်ဆိုရင် မှောင်ခိုဈေးကွက်မှာ သူတင်ထားတဲ့ လေလံပစ္စည်းတွေက လေလံစဆွဲတော့မှာ ဖြစ်လေသည်။ ထိုအချိန်ရောက်လျှင် သူ့အတွက် အနည်းဆုံး ရထားဒင်္ဂါး ၈၀ ဝင်ငွေ သေချာနေခဲ့ပြီ ဖြစ်ပေ၏။

သူက အခြားသူများ ထင်မြင်ထားသလောက် ပိုက်ဆံရှားပါးနေသူ မဟုတ်ချေ။

"ငါ့အတွက် ရထားဒင်္ဂါး ၃၀ တောင် ကုန်ကျသွားတဲ့ ဒီပစ္စည်းက ဖန်တီးပြီးသွားရင် ဘယ်လိုပုံစံ ဖြစ်လာမလဲဆိုတာကို ငါ တကယ်ကို မြင်ချင်နေပြီ"

အခန်း ၁၅၈ - သားရဲဘုရင် အတွင်းခံသံချပ်ကာ ကိုယ်ခံစွမ်းအား ကန့်သတ်ချက် တိုးလာချေပြီ

ဝယ်ယူမှု အောင်မြင်သွားကာ ဖန်တီးမှု စတင်တော့မည် ဖြစ်လေ၏။

လုပ်ငန်းစဉ်ခုံကို ပြန်လည်ခေါ်ယူလိုက်ပြီး ပုံစံကြမ်းနှင့် ကုန်ကြမ်းများအားလုံးကို ၎င်းအပေါ်သို့ တင်လိုက်သည်။

၎င်းတို့က ပေါင်းစပ်သွားကာ မှေးမှိန်သော အနီရောင်အလင်းတန်းတစ်ခုက အပြင်ဘက်သို့ ပျံ့နှံ့ထွက်ပေါ်လာလေ၏။

အော့က်သားရေနှင့် ထိုဧရာမ တင်းပုတ်ကြီးတို့မှာ အိပ်မက် ပိုးကြိုး၏ လွှမ်းခြုံဝါးမျိုခြင်းကို ခံလိုက်ရပြီး အရိပ်အယောင်မျှပင် မကျန်တော့ဘဲ ပျောက်ကွယ်သွားလေတော့သည်။

ပိုးကြိုးက လေထဲတွင် လွင့်မျောနေပြီး ၎င်းဘာသာ ဖြတ်တောက်နေခဲ့ပေသည်။

အသစ်စက်စက်ဖြစ်ကာ အလင်းပေါက်လုနီးပါး ပါးလွှာနေသော အဝတ်အစားတစ်ခုက ရဲချီယန်၏ ရှေ့တွင် ပေါ်ထွက်လာခဲ့လေ၏။

【သားရဲဘုရင် အတွင်းခံသံချပ်ကာ (အဆင့် ၈)】

【စွမ်းရည်များ ရရှိရန် တပ်ဆင်ပါ】

【သားရဲဘုရင်၏ ဘုန်းတန်ခိုး - သားရဲ အမျိုးအစား မကောင်းဆိုးဝါးများအားလုံးက သင့်ကို ကြောက်ရွံ့ကြမည် ဖြစ်သည်】

【သားရဲဘုရင်၏သွေး - တပ်ဆင်ချိန်တွင် ချိတ်ဆက်နိုင်ပြီး ဝတ်ဆင်သူ၏ အများဆုံး ကိုယ်ခံစွမ်းအားကို ၃၀ ပွိုင့် အမြဲတမ်း တိုးမြှင့်ပေးမည် ဖြစ်သည်】

【ချိတ်ဆက်ပြီးနောက် ဤစက်ပစ္စည်းက ပျောက်ကွယ်သွားမည်ဖြစ်ကာ သားရဲဘုရင်၏ ဘုန်းတန်ခိုးမှာ ရထားမောင်းနှင်သူ မော်ဂျူးအဖြစ်သို့ ပြောင်းလဲသွားမည် ဖြစ်သည်】

"ဟင်"

အခြားစွမ်းရည်များအားလုံးက အရေးမကြီးတော့ချေ။ ရဲချီယန်၏ အကြည့်များက အရာတစ်ခုတည်းအပေါ်တွင်သာ စူးစိုက်နေခဲ့လေ၏။

အများဆုံး ကိုယ်ခံစွမ်းအား ၃၀ ပွိုင့်တဲ့လား။ ဒါက လုံလောက်နေခဲ့ပြီ။

ရထားဒင်္ဂါး ၃၀ ကုန်ကျရခြင်းက တန်သည်၊ အလွန်ကို တန်လွန်းလှပေသည်။

သူ့ရှေ့ရှိ ငှက်မွေးတစ်မျှ ပေါ့ပါးလှသော အတွင်းခံသံချပ်ကာကို ကောက်ယူလိုက်ရာ ဤအရာကို အဝတ်အစားတစ်ခုဟု တွေးထင်ရန်ပင် ခက်ခဲလှပေသည်။

သူ ဝတ်ဆင်လိုက်သည်နှင့် တစ်ပြိုင်နက် ချိတ်ဆက်လိုခြင်း ရှိမရှိ မေးမြန်းထားသော စနစ်၏ အသိပေးချက်တစ်ခုက မျက်စိရှေ့ရှိ အလင်းမျက်နှာပြင်ပေါ်တွင် ပေါ်ထွက်လာလေ၏။

"အဆင့်မြင့် အသွင်ကူးပြောင်းခြင်း တစ်ကြိမ်လည်း လုပ်လို့ရသေးတာပဲ"

ရဲချီယန်က အလျင်မလိုခဲ့ချေ။ ကိုယ်ခံစွမ်းအားနှင့် စိတ်စွမ်းအားတို့ အနည်းငယ် ပြန်လည်ပြည့်ဖြိုးလာစေရန် ခေတ္တမျှ စောင့်ဆိုင်းလိုက်ပြီးနောက် ဗိုက်စင်သီး တစ်လုံးကို စားလိုက်ကာ အဆင့်မြင့် အသွင်ကူးပြောင်းခြင်း စတင်ရန် စိတ်အားထက်သန်စွာ ပြင်ဆင်လိုက်လေတော့သည်။

ရင့်ရှိုင်းသော အပြာရောင် အလင်းတန်းတစ်ခု ပေါ်ထွက်လာလေ၏။ သားရဲဘုရင် အတွင်းခံသံချပ်ကာ တစ်ခုလုံးက မျက်တောင်တစ်ခတ်အတွင်းမှာပင် ယခင်ကထက် ပို၍ ပါးလွှာသွားလေတော့သည်။

မြန်လိုက်တာ။ ပစ္စည်းတစ်ခုကို အဆင့်မြင့် အသွင်ကူးပြောင်းခြင်း ပြုလုပ်ရာတွင် အရှိန်အဟုန်က ဤမျှလောက်အထိ မြန်ဆန်နိုင်ကြောင်း ရဲချီယန် ပထမဆုံးအကြိမ် ခံစားလိုက်ရခြင်း ဖြစ်ပေသည်။

ထို့အပြင်... စားသုံးသွားတဲ့ ပမာဏကလည်း သိပ်မများဘူးပဲ။

【ကိုယ်ခံစွမ်းအား ၉၀ - ၃၀】 【စိတ်စွမ်းအား ၉၂ - ၃၂】

၁၂၀ ပွိုင့်သာဖြစ်ရာ အဆင့် ၇ မှ ၈ ရတနာသေတ္တာအတွက် ကုန်ကျစရိတ်နှင့် အတူတူပင် ဖြစ်နေခဲ့လေ၏။

【ဘုန်းကျက်သရေရှိသော သားရဲဘုရင် အတွင်းခံသံချပ်ကာ】

【ဘုန်းကျက်သရေ - သတ်မှတ်ထားသော အကွာအဝေးအတွင်းရှိ မဟာမိတ်များအားလုံးက ကိုယ်ခံစွမ်းအား တစ်စိတ်တစ်ပိုင်းကို ရရှိမည် ဖြစ်သည်】

ယခင်အရာနှင့် နှိုင်းယှဉ်ပါက အခြားသူများအား စွမ်းရည်မြှင့်တင်ပေးနိုင်သော အလိုအလျောက် အာနိသင်တစ်ခုကို ရရှိသွားခဲ့လေ၏။ ထို့အပြင် ၎င်း၏ အဆင့်ကလည်း ပျောက်ကွယ်သွားခဲ့ပေသည်။

"မဆိုးဘူး၊ အသုံးဝင်သားပဲ"

"ချိတ်ဆက်လိုက်တာပေါ့"

ချိတ်ဆက်မှု အောင်မြင်သွားချေပြီ။ သားရဲဘုရင် အတွင်းခံသံချပ်ကာက လေထဲတွင် ပျောက်ကွယ်သွားကာ အလင်းမှုန်လေးများအဖြစ် ပြောင်းလဲသွားပြီး ရဲချီယန်၏ ခန္ဓာကိုယ်ပတ်လည်တွင် ရစ်ဝဲနေခဲ့လေ၏။

ထိုအလင်းတန်းများက သူ့ထံသို့ ချဉ်းကပ်လာကာ သူ၏ ခန္ဓာကိုယ်ထဲသို့ ပေါင်းစပ်ဝင်ရောက်သွားလေသည်။

သူ၏ အရေပြားအောက်တွင် မှေးမှိန်သော အနီရောင် အမှတ်အသားတစ်ခုက မပီဝေဝါ ပေါ်ထွက်လာပြီးနောက် အရိပ်အယောင်မျှပင် မကျန်တော့ဘဲ အလျင်အမြန် ပျောက်ကွယ်သွားလေတော့သည်။

ကိုယ်ခံစွမ်းအားက တိုးပွားလာနေခဲ့၏။ ရဲချီယန်က ၎င်းကို ခံစားနေရပေသည်။ အလင်းတန်းများ ပျောက်ကွယ်သွားပြီးနောက် အရာအားလုံးက တိတ်ဆိတ်ငြိမ်သက်သွားပြန်သည်။

【အများဆုံး ကိုယ်ခံစွမ်းအား ၁၄၀ - ၁၇၀】

သူက လက်သီးကို ဆုပ်ကာ တစ်ချက် ထိုးချလိုက်ရာ မလှမ်းမကမ်းရှိ သစ်ပင်ကြီးတစ်ပင်က အလိုက်သင့်ပင် လဲကျသွားလေ၏။

"ဘုရားရေ၊ ငါက စူပါလူသားတစ်ယောက် ဖြစ်သွားပြီလား"

ရဲချီယန်က ဤမြင်ကွင်းကို အံ့သြတကြီး ကြည့်နေမိလေသည်။

ကိုယ်ခံစွမ်းအား တိုးပွားလာခြင်းက ကိုယ်ခံစွမ်းအား သက်သက်သာ မဟုတ်ချေ။ ခွန်အား၊ အမြန်နှုန်း၊ ခံနိုင်ရည်၊ ကာကွယ်ရေး... ခန္ဓာကိုယ်နှင့် ပတ်သက်သော တန်ဖိုးအားလုံးက တစ်ပြိုင်နက်တည်း တိုးတက်လာခဲ့ခြင်း ဖြစ်ပေသည်။

၁၇၀ ပွိုင့်ဆိုသည်မှာ သာမန်လူသားများ ရရှိနိုင်သော ကန့်သတ်ချက်များကို ကျော်လွန်နေခဲ့ပြီ ဖြစ်လေ၏။ သူ့ကို ယခုအခါ စူပါလူသားဟု ဖော်ပြရမည်ဆိုလျှင် ချဲ့ကားပြောဆိုရာ ရောက်မည် မဟုတ်ချေ။

အကယ်၍ ၁၇၀ ပွိုင့်ကပင် ဤအဆင့်အထိ ရောက်ရှိနိုင်စွမ်းရှိသည်ဆိုပါက...

သူသာ ထို သားရဲဧကရာဇ်၏ ဆူပွက်နေသောသွေးပုလင်းကို သောက်လိုက်ပြီး ကိုယ်ခံစွမ်းအား ၃၀၀ ပွိုင့် ထပ်မံရရှိသွားမည်ဆိုလျှင်...

ဟူး...

ထိုအချိန်ရောက်လျှင် သူ၏ ရုပ်ပိုင်းဆိုင်ရာ ခွန်အားက မည်မျှလောက်အထိ အစွမ်းထက်လာမည်ဆိုတာကို သူ တွေးတောင် မတွေးရဲတော့ချေ။

"ငါ့ရဲ့ အများဆုံး ကိုယ်ခံစွမ်းအားက စိတ်စွမ်းအားထက် ပိုများသွားတာ ဒါ ပထမဆုံးအကြိမ်ပဲ ထင်တယ်"

သူက သူ၏ လက်ရှိခွန်အားနှင့် အသားကျသွားစေရန် ပြုလုပ်လိုက်ရာ အနည်းဆုံးတော့ ခွက်တစ်ခုကို ကိုင်လိုက်သည့်အခါ မတော်တဆ ချေမွမိတော့မည် မဟုတ်ချေ။

အဆင့်မြင့် အသွင်ကူးပြောင်းခြင်းများအားလုံး ပြီးဆုံးသွားပြီဖြစ်ရာ ဤမှတ်တိုင်မှ ရရှိသော အကျိုးအမြတ်များကလည်း နီးပါးလောက် ကုန်ဆုံးသွားခဲ့ပြီ ဖြစ်လေ၏။

သူက အပ်ကြီးပျားများအားလုံးကို ပြန်လည်ခေါ်ယူလိုက်လေသည်။ ၎င်းတို့က တောအုပ်ထဲတွင် လွတ်လပ်စွာ အမဲလိုက်ခဲ့ကြပြီး သားကောင်အမြောက်အမြားကို စုဆောင်းနိုင်ခဲ့ကြကာ လုပ်ငန်းစဉ်ခုံမှတစ်ဆင့် ပြန်လည်အသုံးပြုပြီးနောက် အစားအစာများအဖြစ် သိုလှောင်ခန်းများထဲတွင် ထုပ်ပိုးသိမ်းဆည်းလိုက်လေ၏။

ထိုမျှသာမက ၎င်းတို့က အော့က်အလောင်း အတော်များများကိုပါ စုဆောင်းနိုင်ခဲ့ကြပေသည်။ ထိုအလောင်းများကို အပိုင်းပိုင်းခုတ်ထစ်ပြီးနောက် အပ်ကြီးပျားများအတွက် အစားအစာ သို့မဟုတ် စိုက်ပျိုးရေး ရထားတွဲအတွင်းရှိ အပင်များ လိုအပ်သော မြေသြဇာအဖြစ် ပြောင်းလဲသွားနိုင်ပေသည်။

"သိုလှောင်ခန်းတွေ ကုန်သွားတော့မယ် ထင်တယ်..."

မှတ်တိုင်များစွာကို ဖြတ်သန်းပြီးနောက် သိုလှောင်ရေး ရထားတွဲအတွင်းရှိ သိုလှောင်ခန်း ၅၁ ခန်းအနက်မှ အထူးအခန်း ၃ ခန်းကို ဖယ်ချန်လိုက်ပါက ကျန်ရှိနေသော သာမန်အခန်း ၄၈ ခန်းထဲမှ အခန်းအနည်းငယ်သာ ကျန်ရှိတော့ပေသည်။

နောက်မှတ်တိုင်တွင် သူသာ ကုန်ကြမ်း သို့မဟုတ် ပစ္စည်းအသစ်များနှင့် ကြုံတွေ့ရပါက ၎င်းတို့က အလွန်လျင်မြန်စွာပင် လုံးဝ ကုန်ခန်းသွားမည်မှာ သေချာပေသည်။

သို့သော် သိုလှောင်ရေး ရထားတွဲကဲ့သို့သောအရာကို မှောင်ခိုဈေးကွက်ထဲတွင်ပင် မည်သူကမျှ ရောင်းချခြင်း မရှိခဲ့ချေ။

၎င်းကို ရယူရန်အတွက် လက်ရှိအချိန်တွင် နည်းလမ်းနှစ်ခုသာ ရှိပုံရလေ၏။ တာဝန်အချို့ကို ပြီးမြောက်ပြီးနောက် ရထားတွဲ လဲလှယ်ရေး လက်မှတ်တစ်ခု ရယူခြင်း သို့မဟုတ် သာမန်ရထားတွဲတစ်ခုကို အဆင့်မြင့် အသွင်ကူးပြောင်းခြင်း ပြုလုပ်၍ သိုလှောင်ခန်းများကို ကျပန်းရယူခြင်းပင် ဖြစ်လေသည်။

သေချာပေါက် နောက်ထပ်နည်းလမ်းတစ်ခု ရှိနေသေးပေသည်။

"အဆင့်မြင့် အသွင်ကူးပြောင်းခြင်းပေါ့..."

ရဲချီယန်က သိုလှောင်ရေး ရထားတွဲ၏ အရှေ့တွင် ရပ်ကာ ၎င်းကို ညင်သာစွာ ပွတ်သပ်ရင်း အတွေးနက်နေခဲ့လေ၏။

ဤရထားတွဲ၏ အလားအလာများက ကုန်ခန်းသွားခဲ့ပြီဖြစ်သော်လည်း ၎င်းက နောက်ထပ် အဆင့်မြင့် အသွင်ကူးပြောင်းခြင်း တစ်ကြိမ်အတွက် အခွင့်အရေး လုံးဝမရှိတော့ဟု ဆိုလိုခြင်း မဟုတ်ချေ။

"ရထားတွဲ ပေါင်းစပ်ခြင်း..."

အကယ်၍ သူသာ ၎င်းနှင့် ပေါင်းစပ်ရန် အလားတူ ရထားတွဲတစ်ခု ရှိခဲ့မည်ဆိုပါက။

၎င်း၏ အလားအလာများကလည်း အလိုက်သင့် တိုးတက်လာမည်ဖြစ်ကာ နောက်ထပ် အဆင့်မြင့် အသွင်ကူးပြောင်းခြင်းကို ပြုလုပ်နိုင်လာမည် ဖြစ်ပေသည်။

"နောက်တစ်ခါ မြို့တော်တစ်ခုကို ရောက်တဲ့အခါ ကုန်သွယ်ရေးဆိုင်မှာ တစ်ခုလောက် သွားရှာကြည့်ရမယ်"

အချိန်တွေ ကုန်လွန်သွားလေ၏။

ရဲချီယန်က သူ၏ အကျိုးအမြတ်များအားလုံးကို တွက်ချက်ပြီးနောက် ရထားပေါ်သို့ ပြန်လာခဲ့လေသည်။

သူက စက်ခေါင်းတွဲထဲတွင် ရပ်ကာ အရှေ့ရှိ အလင်းမျက်နှာပြင်ပေါ်မှ ဆိုက်ကပ်ချိန် ရေတွက်မှုကို ကြည့်နေခဲ့ပေသည်။

နောက်ဆုံး သုံးနာရီသို့ ရောက်ရှိလာချိန်တွင် VIP ဦးစားပေး ထွက်ခွာခွင့်က အသက်ဝင်လာလေ၏။

သူက ထွက်ခွာမည့် ရွေးချယ်စရာကို နှိပ်လိုက်လေသည်။

ရထားသံလမ်းများက ဆန့်ထွက်သွားကာ လေဟာနယ်က ပေါ်ထွက်လာလေ၏။

၎င်းထဲသို့ ဝင်ရောက်သွားပြီးနောက် ရထားပြတင်းပေါက်အပြင်ဘက်ရှိ ကမ္ဘာကြီးက ရင်းနှီးနေသော လွင်တီးခေါင်ပြင်အဖြစ်သို့ ပြန်လည်ပြောင်းလဲသွားလေတော့သည်။

"ဆိုက်ကပ်ချိန်က ပိုပိုပြီး ကြာလာတယ်။ ထွက်ခွာခွင့်လိုမျိုး အရာတွေကို ရနိုင်ပါသေးရဲ့လား မသိဘူး"

အချိန်၊ ၆:၃၅:၀၂။

လွင်တီးခေါင်ပြင်သို့ ပြန်ရောက်လာချိန်တွင် မနက်သုံးနာရီပင် ရှိနေခဲ့ပြီ ဖြစ်လေ၏။

ပြီးခဲ့သည့် မှတ်တိုင်တွင် သူ အိပ်ခဲ့ပြီးဖြစ်သောကြောင့် သူ၏ စိတ်က အတော်လေး ကြည်လင်နေကာ အိပ်ချင်စိတ် လုံးဝမရှိတော့ချေ။

ရထားတွဲထဲရှိ ကုတင်ဘေးတွင် သူက တင်ပျဉ်ခွေထိုင်ကာ အရှေ့ရှိ ဂိမ်းစက်၏ မျက်နှာပြင်ကို စူးစိုက်ကြည့်နေခဲ့လေသည်။

ဂိမ်းထဲရှိ ဇာတ်ကောင်က နောက်ဆုံးအချက်ကို တိုက်ခိုက်လိုက်သည်နှင့် တစ်ပြိုင်နက် ဘော့စ်က အလိုက်သင့်ပင် လဲကျသွားလေ၏။

"ဟူး နောက်ဆုံးတော့ ရှင်းလင်းပစ်နိုင်ပြီပဲ"

လက်နက်ကိရိယာ မပါ၊ အဆင့်မရှိဘဲ စစ်မှန်သော တုံ့ပြန်မှုများဖြင့်သာ ဂိမ်းထဲရှိ ကြယ်တွေကို ဖျက်ဆီးမယ့် ဗိုလ်ချုပ်ကို အနိုင်ယူနိုင်ခဲ့ခြင်း ဖြစ်လေသည်။

"အနာဂတ် မှတ်တိုင်တွေမှာ ဂိမ်းကမ္ဘာထဲကို ငါ တကယ် သွားရမလား မသိဘူး... ဟားဟား ငါ့ဆီမှာ နာမည်ကြီး လရိပ်ဓားတောင် ရှိနေပြီဆိုတော့ သေချာပေါက် သွားရလောက်မှာပါနော်"

သူက ကုတင်ပေါ်သို့ လှဲချလိုက်သော်လည်း နိုးကြားနေဆဲပင် ဖြစ်လေ၏။

ဂိမ်းပြောင်းပြီး ဆက်ကစားရန် ပြင်လိုက်ချိန်တွင်ပင်

ရင်းနှီးနေသော သူငယ်ချင်း အသိပေးချက် အသံက ထပ်မံထွက်ပေါ်လာပြန်သည်။

"ပြီးခဲ့တဲ့တစ်ခေါက်က ငါ အိပ်နေတုန်း၊ ဒီတစ်ခေါက်က သန်းခေါင်ယံကြီးမှာ။ ငါနဲ့ စကားပြောဖို့ ဒီထက်ပိုကောင်းတဲ့ အချိန်ကို မရှာနိုင်တော့ဘူးလား"

သူက ဂိမ်းခလုတ်ကို အောက်ချလိုက်ကာ အလင်းမျက်နှာပြင်ကို ခေါ်ထုတ်လိုက်လေ၏။

သူငယ်ချင်း စာရင်း မျက်နှာပြင်တွင် ကျောက်လင်၏ အကောင့်ပုံလေးက မှိတ်တုတ်မှိတ်တုတ် ဖြစ်နေလေသည်။

"ဟင်၊ ဪ... ဟုတ်သားပဲ၊ ငါ သူမကိုတောင် မေ့နေတော့မလို့။ သူမရဲ့ ပြီးခဲ့တဲ့ မှတ်တိုင်က ကံကောင်းရဲ့လား"

သူက ချက်ဘောက်စ် မျက်နှာပြင်ကို ဖွင့်လိုက်ရာ ကျောက်လင်က စာတစ်စောင်သာ ပို့ထားခဲ့လေ၏။

【"အစ်ကိုချီယန်... ကျွန်မ၊ ကျွန်မ နည်းနည်း ထူးဆန်းနေသလိုပဲ"】

ထူးဆန်းနေတယ် ဟုတ်လား။

【"ဘာဖြစ်လို့လဲ။ ကံဆိုးခြင်း တွေ ရှိနေတုန်းပဲလား"】

ထို လူလိမ်မ ကျူရှင်းထူက ကံဆိုးခြင်းများကို ဖယ်ရှားလိုက်ပြီဖြစ်သောကြောင့် ကျောက်လင်ထံသို့ ပြန်လည်ရောက်ရှိလာတာများလား။

အဲဒီလောက်တော့ မမြန်နိုင်လောက်ပါဘူးနော်။

【"မဟုတ်ဘူး၊ သိပ်တော့... တကယ်လား။ အင်း..."】

【"တကယ်လား၊ ပြန်ရောက်နေပြီလား ဆိုတာကိုတောင် မင်းကိုယ်မင်း မသိဘူးလား"】

ရထားတွဲအတွင်းတွင် တစ်ညလုံး နိုးနေခဲ့သော ကျောက်လင်က အလင်းမျက်နှာပြင်ပေါ်ရှိ စာများကို ကြည့်ရင်း နှုတ်ခမ်းကိုကိုက်ကာ အကြောင်းပြန်လိုက်လေသည်။

【"ကျွန်မ၊ ကျွန်မ ပြီးခဲ့တဲ့ မှတ်တိုင်မှာ ဘာအန္တရာယ်မှတော့ မကြုံခဲ့ရဘူး၊ ဒါပေမဲ့... ရတနာသေတ္တာလည်း ရှာမတွေ့ခဲ့ဘူး"】

ဤအရာက ပုံမှန်မဟုတ်သော အစိတ်အပိုင်းပင် ဖြစ်လေ၏။

အခြားသူတစ်ယောက်သာဆိုလျှင် ရတနာသေတ္တာ ရှာမတွေ့ခြင်းကို ပုံမှန်ဟု သတ်မှတ်နိုင်ပေသည်။

သို့သော် သူမက ကျောက်လင် ဖြစ်လေ၏။ ကံကောင်းခြင်း ပါရမီတစ်ခုတည်းကိုသာ ပိုင်ဆိုင်ထားသော ကျောက်လင် ပင် ဖြစ်ပေသည်။

ပြီးခဲ့သည့် မှတ်တိုင်တွင် သူမ ရတနာသေတ္တာ ရှာမတွေ့ခဲ့ဘူးဆိုသည်မှာ...

【"ကံကောင်းခြင်းတွေက အဆုံးအစမရှိတာ မဟုတ်ဘူး၊ မင်း အဲလိုပြောချင်တာမလား"】

【"...ဟုတ်ကဲ့... အစ်ကိုချီယန်၊ အရင်တုန်းကနဲ့မတူဘဲ အခု ကျွန်မ ကံကောင်းချင်ရင် အချိန်တွေ စုဆောင်းဖို့ လိုအပ်နေပြီဆိုတာကို အကြမ်းဖျင်း ခံစားလို့ရတယ်"】

ကံဆိုးခြင်းတွေနဲ့အတူ ဆက်တိုက်တက်လာတာကနေ ရိုးရိုးရှင်းရှင်း စားသုံးသွားတဲ့အဖြစ် ပြောင်းလဲသွားတာလား။

ရိုးရိုးသားသားပြောရလျှင် ဤအရာက ယခင်ကထက် ပိုကောင်းနေမည်ဟုတော့ မဆိုသာပေ။

၎င်းက အောက်ခြေကန့်သတ်ချက် ပိုမြင့်လာမည်ဟု ဆိုလိုခြင်းသာဖြစ်သော်လည်း လုံလောက်သော အချိန်သာ စုဆောင်းမိမည်ဆိုပါက အမြင့်ဆုံးကန့်သတ်ချက်က ပိုနိမ့်နေမည်ဟုတော့ မပြောနိုင်ချေ။

သို့သော် သူမ၏ ပါရမီတွင် ဖြစ်ပေါ်လာသော ဤပြောင်းလဲမှုက ကြယ်တစ်ထောင်မြို့တော်သို့ မဝင်ရောက်မီ ဘူတာရုံတွင် ရထားနှင့် ၎င်းအတွင်းရှိလူများ နီးပါးလောက် ပျက်စီးသွားရသည့်ကဲ့သို့ ကံကောင်းခြင်း ဘူတာပြီးနောက် ကျောက်လင် အနေဖြင့် ကြီးမားသော ကံဆိုးခြင်းများကို ကြုံတွေ့ရတော့မည် မဟုတ်ကြောင်း ဆိုလိုခြင်းပင် ဖြစ်လေ၏။

ဒါက ကောင်းတဲ့အရာများလား။