အခန်း (၂၂၁-၂၂၂)

အခန်း (၂၂၁)- နင်းရှောင်ဟွေ့က ယွမ်တာရှန့်ကို အပြည့်အဝ ပြုပြင်ပေးခြင်း

ယခုအခါတွင်မူ နင်းရှောင်ဟွေ့အား ညစဉ်ညတိုင်း အိမ်မက်ဆိုးများ ပေးခဲ့သည့် တရားခံဖြစ်သော ထိုအရာအား ပြန်လည်ပြင်ဆင်ရန် တာဝန်မှာ သူမ၏ လက်ထဲသို့ ရောက်ရှိလာခဲ့လေပြီ။

မကြာမီပင် နင်းရှောင်ဟွေ့၏ ရှေ့မှောက်၌ အာကာသကူးပြောင်းခြင်း အစီအရင်တစ်ခု ပေါ်ပေါက်လာပြီး အလင်းတန်းတစ်ခု ဖြတ်သန်းသွားပြီးနောက်တွင် ရွှေသွေးတိုက်ပွဲဝင်မျောက်မှာ သူမ၏ ရှေ့မှောက်သို့ ရောက်ရှိလာတော့သည်။

စားပွဲပေါ်ရှိ ရွှေသွေးတိုက်ပွဲဝင်မျောက်ကို မြင်လိုက်ရသောအခါ သူမ၏ မျက်နှာထက်တွင် ရှုပ်ထွေးလှသော ခံစားချက်များ အရိပ်ထင်သွားချေသည်။

ချက်ချင်းဆိုသလိုပင် သူမ၏ မျက်ဝန်းတို့မှာ ရက်စက်ကြမ်းကြုတ်သည့် အရိပ်အယောင်များဖြင့် ပြည့်နှက်သွားတော့၏။

နင်းရှောင်ဟွေ့သည် ရွှေသွေးတိုက်ပွဲဝင်မျောက်ကို ကြည့်ရင်း စိတ်ထဲတွင် နင်းကျော့၏ မျက်နှာကို ပုံဖော်ကာ သွားကြိတ်လျက် ရေရွတ်လိုက်သည်။

"ကောင်းတယ်၊ တကယ်ကို ကောင်းတာပဲ"

"ငါ နင့်ကို အကောင်းဆုံးဖြစ်အောင် အစွမ်းကုန် ပြုပြင်ပေးမယ်။ မင်းရဲ့ အစွမ်းအထက်ဆုံး အခြေအနေကို ပြန်ရောက်စေရမယ်"

"ပြီးရင်တော့ အဲ့ဒီလူတွေအတွက် မင်းကို အကြီးမားဆုံး အတားအဆီး ဖြစ်အောင် ငါ လုပ်ပြမယ်။ ငါ ခံစားခဲ့ရတဲ့ နာကျင်မှုတွေအတွက် သူတို့ကို အဆပေါင်း ထောင်သောင်းမက ပြန်ပေးဆပ်ခိုင်းရမယ်"

နင်းရှောင်ဟွေ့သည် ပြောရင်းပြောရင်းဖြင့် ပို၍ စိတ်လှုပ်ရှားလာကာ သူမ၏ မျက်ဝန်းများမှာလည်း တောက်ပလာချေသည်။

ရွှေသွေးတိုက်ပွဲဝင်မျောက်ကို ကြည့်ရင်း သူမသည် ကလဲ့စားချေနိုင်မည့် မျှော်လင့်ချက်ကို မြင်တွေ့နေရခြင်း ဖြစ်သည်။

ထို့နောက်တွင်မူ နင်းရှောင်ဟွေ့သည် သူမ၏ အာရုံအားလုံးကို စုစည်းကာ ရွှေသွေးတိုက်ပွဲဝင်မျောက်၏ အခြေအနေကို စတင်စစ်ဆေးတော့သည်။

ရွှေသွေးတိုက်ပွဲဝင်မျောက်၏ ကိုယ်ထည်မှာ နေရာအနှံ့ ဒဏ်ရာများ ရရှိထားပြီး အချို့နေရာများမှာ အတော်ပင် ပြင်းထန်လှသည်။

မကြာသေးမီကပင် နင်းကျော့သည် ဗုဒ္ဓဘာသာဂိုဏ်း၏ နောက်ဆုံးစမ်းသပ်မှုကို ဖြတ်ကျော်ရန် ဤမျောက်ကို အသုံးပြုခဲ့ခြင်းကြောင့် ၎င်းမှာ မှတ်မိနိုင်စရာ မရှိအောင် ပျက်စီးနေကာ ဒဏ်ရာကြီးများကြားမှ အတွင်းပိုင်းရှိ စက်မှုအစိတ်အပိုင်းများကိုပင် မြင်တွေ့နေရချေသည်။

ခေတ္တမျှ စစ်ဆေးကြည့်ပြီးနောက် နင်းရှောင်ဟွေ့၏ မျက်မှောင်တို့မှာ နက်ရှိုင်းစွာ ကြုတ်သွားတော့သည်။

"ဒီရွှေသွေးတိုက်ပွဲဝင်မျောက်က အရမ်းကို ပျက်စီးနေတာပဲ။ သူ့ရဲ့ တကယ့်ခွန်အားကို ထုတ်သုံးဖို့တောင် တော်တော်လေး ခက်ခဲနေပြီ"

"နင်းကျော့က ဒါကို အခွင့်ကောင်းယူသွားတာ ဖြစ်ရမယ်။ ဒါကြောင့်လည်း သူက ဒီစက်မှုလက်ရာကို ပြန်ပြီး မောင်းထုတ်နိုင်ခဲ့တာပေါ့"

နင်းရှောင်ဟွေ့သည် ရွှေသွေးတိုက်ပွဲဝင်မျောက်၏ လည်ပတ်ပုံ လျှို့ဝှက်ချက်များကို များစွာ သတိမပြုမိခဲ့ပေ။ အမှန်စင်စစ်တွင်မူ နင်းကျော့ ကိုယ်တိုင်ပင်လျှင် သူ၏ ဤစက်မှုလက်ရာနှင့် ပတ်သက်၍ အသေးစိတ် အကုန်အစင် မသိရှိသေးချေ။

"ငါက သူ့ရဲ့ တည်ဆောက်ပုံကို နားမလည်တာပဲဖြစ်ဖြစ်၊ စက်မှုပုံစံကားချပ်တွေ မရှိတာပဲဖြစ်ဖြစ် ဒါတွေက သူ့ကို ပြုပြင် ကုသပေးဖို့အတွက် အနှောင့်အယှက် မဖြစ်စေရဘူး"

"ငါ့ရဲ့ ကျောက်စိမ်းနှင်းဆီ လက်ပညာရပ်က အဲ့ဒီလို အဓိပ္ပာယ်မရှိလောက်အောင် အစွမ်းထက်တာလေ။ ဟားဟားဟား"

နင်းရှောင်ဟွေ့သည် ဆေးပုလင်းတစ်လုံးကို ထုတ်ယူကာ ဆေးလုံးပေါင်း များစွာကို ပါးစပ်ထဲသို့ သွတ်သွင်းလိုက်သည်။

ထို့နောက် တင်ပျဉ်ခွေထိုင်ကာ ဆေးစွမ်းများကို အလျင်အမြန်ပင် ချေဖျက်ရင်း သူမ၏ အခြေအနေကို အကောင်းဆုံးဖြစ်အောင် ပြင်ဆင်လိုက်တော့သည်။

သူမသည် မိမိ၏ ပါရဂူအဆင့် ပညာရပ်ကို အစွမ်းကုန် အသုံးချကာ ရွှေသွေးတိုက်ပွဲဝင်မျောက်အား ကြီးမားလှသော ရေခဲတုံးကြီးတစ်ခုအတွင်း ပိတ်လှောင်လိုက်ချေသည်။

နင်းရှောင်ဟွေ့သည် သူမ၏ စွမ်းအားအားလုံးကို အစွမ်းကုန် ထုတ်သုံးနေခြင်းကြောင့် မျက်နှာရှိ အပေါက်ခုနစ်ပေါက်မှ သွေးများပင် စိမ့်ထွက်လာတော့သည်။

နဂါးလိပ် မီးလျှံဝိညာဉ်ကမူ "..."

၎င်းက စိတ်ထဲမှ တိုးတိုးလေး ရေရွတ်နေမိသည်။ "မဟုတ်သေးဘူးလေ နင်းရှောင်ဟွေ့ရာ။ မင်းက ဒီလောက်အထိ အသက်နဲ့လဲပြီး လုပ်ဖို့ လိုလို့လား"

နင်းရှောင်ဟွေ့ အဘယ်ကြောင့် ဤသို့ ပြုလုပ်ရသည်ကို နဂါးလိပ် မီးလျှံဝိညာဉ်က နားလည်သော်လည်း ဘေးထွက်ကြည့်ရှုသူ တစ်ဦးအနေဖြင့်မူ ၎င်းက အခြေအနေမှန်ကို ကောင်းစွာ သိရှိနေသည်။

ဤရွှေသွေးတိုက်ပွဲဝင်မျောက်မှာ ချော်ရည်နန်းတော် စမ်းသပ်မှုအတွင်း နင်းကျော့၏ အရေးအပါဆုံးသော စစ်သည်တော် ဖြစ်ပေသည်။

နဂါးလိပ် မီးလျှံဝိညာဉ်က တွေးတောနေမိသည်။

"နင်းရှောင်ဟွေ့သာ သူမ အပင်ပန်းခံ ပြုပြင်ပေးနေတဲ့ ရွှေသွေးတိုက်ပွဲဝင်မျောက်က သူမ အမုန်းဆုံးလူရဲ့ စက်မှုလက်ရာဆိုတာ သိသွားရင် ဘယ်လိုများ နေမလဲမသိဘူး"

နဂါးလိပ် မီးလျှံဝိညာဉ်မှာ ထိုမြင်ကွင်းကို ပုံဖော်၍ မရသော်လည်း ရင်ခုန်လှုပ်ရှားစွာဖြင့် စောင့်ကြည့်လိုစိတ် ဖြစ်ပေါ်နေမိသည်။ ထိုစဉ်မှာပင် ၎င်း၏ မျက်နှာအမူအရာ ပြောင်းလဲသွားချေသည်။

၎င်းသည် ချော်ရည်နန်းတော်၏ အစွမ်းကို အသုံးပြုကာ အာကာသ အလွှာလွှာကို ဖြတ်ကျော်လျက် ကျူးရွှမ်းကျိအား လှမ်းကြည့်လိုက်သည်။

ကျူးရွှမ်းကျိမှာ မိစ္ဆာစစ်သူကြီးကို ရရှိခဲ့သည့် အချိန်မှစ၍ ၎င်းအား ပြုပြင်ရန် အစဉ်တစိုက် ကြိုးပမ်းနေခဲ့သူ ဖြစ်သည်။

ယခုအခါတွင်မူ မိစ္ဆာစစ်သူကြီး၏ ပြတ်တောက်နေသော ဘယ်ဘက်လက်မောင်းကို ပြန်လည် ဆက်သွယ်ပြီးသွားလေပြီ။

ကျူးရွှမ်းကျိမှာ ဤအရာအတွက် နေ့မအား ညမနား အပင်ပန်းခံ လုပ်ဆောင်နေခဲ့ခြင်း ဖြစ်သည်။

နန်းတွင်းမှ ပြန်စာကို လက်ခံရရှိလိုက်သောအခါ ကျူးရွှမ်းကျိမှာ ခေတ္တမျှ မှင်တက်သွားပြီးမှ သတိပြန်ဝင်လာသည်။ ယခင်က ကျူးရွှမ်းကျိသည် မျောက်ကလေး၏ အကြောင်းကို စုံစမ်းရန်အတွက် နန်းတွင်းထံမှ အကူအညီ တောင်းခံခဲ့ဖူးသည်။

၎င်းက ထိုမျောက်ကလေး အရွယ်ရောက်လာလျှင် မည်သို့သော ပုံပန်းသဏ္ဌာန် ရှိမည်ကို သိရှိလိုသဖြင့် ပုံတူကားချပ်တစ်ခု တောင်းဆိုခဲ့ခြင်း ဖြစ်သည်။

ယခုအခါတွင်မူ နန်းတွင်း၏ ပြန်စာ ရောက်ရှိလာလေပြီ။ ကျူးရွှမ်းကျိသည် စာလွှာကို ဖွင့်လိုက်ရာ နန်းတွင်းသုံး လျှို့ဝှက်သင်္ကေတများဖြင့် ရေးသားထားသည်ကို တွေ့လိုက်ရသည်။

သို့သော် ၎င်းက သူ့အတွက် အခက်အခဲ မဟုတ်ပေ။

ကျူးရွှမ်းကျိသည် ထိုသင်္ကေတများကို စိတ်ထဲမှ အလျင်အမြန် ဘာသာပြန်လိုက်သည်။ ထိုအခါ ယွမ်တာရှန့်၏ အရွယ်ရောက်ပြီး အချိန်နှင့် အသက်ကြီးလာချိန် ပုံရိပ်များမှာ သူ၏ အသိဉာဏ်ထဲတွင် ပေါ်ပေါက်လာတော့သည်။

"ယွမ်တာရှန့်လား" ကျူးရွှမ်းကျိမှာ အံ့အားသင့်သွားရသည်။

သူသည် ကျောက်ရုပ်တစ်ရုပ်ကဲ့သို့ ငြိမ်သက်သွားသော်လည်း သူ၏ အသိဉာဏ်ထဲတွင်မူ အတွေးပေါင်းစုံမှာ မုန်တိုင်းတစ်ခုကဲ့သို့ ရိုက်ခတ်နေချေပြီ။

နဂါးလိပ် မီးလျှံဝိညာဉ်မှာ ဤမြင်ကွင်းကို မြင်လိုက်ရသောအခါ စိတ်လှုပ်ရှားစွာဖြင့် မတ်တပ်ထရပ်လိုက်သည်။

၎င်းသည် နန်းတွင်းပြန်စာ၏ အကြောင်းအရာကို နားမလည်သော်လည်း ကျူးရွှမ်းကျိ၏ ရုတ်တရက် ပြောင်းလဲသွားသော မျက်နှာအမူအရာကို ကြည့်ကာ တစ်ခုခုကို ခန့်မှန်းမိလိုက်သည်။

"နင်းကျော့ကို သွားဖမ်းတော့။ နင်းကျော့ကို သွားဖမ်း"

"သူကပဲ တကယ့် တရားခံအစစ်အမှန်။ သူကပဲ နောက်ကွယ်က ကြိုးကိုင်သူ"

"သူ့ကို အမြန်သွားဖမ်းစမ်းပါ။ ဟားဟားဟား"

ကျူးရွှမ်းကျိက နင်းကျော့ကို ဖမ်းဆီးတော့မည်ဟု တွေးတောကာ နဂါးလိပ် မီးလျှံဝိညာဉ်မှာ အလွန်အမင်း စိတ်လှုပ်ရှားကာ ဝမ်းသာအားရ ဖြစ်နေတော့သည်။ ၎င်းသည် ထိုမြင်ကွင်းကို ယခုချက်ချင်းပင် မြင်တွေ့ချင်နေသဖြင့် မရိုးမရွ ဖြစ်နေရှာတော့သတည်း။

အခန်း (၂၂၂) - တန်တျန်သုံးခု အခြေခံအုတ်မြစ်တည်ဆောက်ခြင်း

“ယွမ်တာရှန့်လား” ကျူးရွှမ်းကျိ၏ မျက်သူငယ်အိမ်တို့မှာ အနည်းငယ် ကျုံ့သွားကာ ထိုနေရာတွင်ပင် ဆွံ့အလျက် အတန်ကြာ ရပ်နေမိတော့သည်။

“တကယ်ပဲ ယွမ်တာရှန့် ဖြစ်နေတာလား”

သူသည် ဤဖြစ်နိုင်ခြေကို အရင်က စဉ်းစားဖူးသော်လည်း ထိုအတွေးပေါ်လာသည်နှင့် ချက်ချင်းပင် ပြန်လည်ပယ်ဖျက်ခဲ့ဖူး၏။

အကြောင်းမူကား ကျူးရွှမ်းကျိ၏ အမြင်တွင် အရိပ်နက် မိစ္ဆာစစ်သူကြီးသည် ရွှေအမြုတေအဆင့် စွမ်းအားရှိသည်မှာ သံသယဖြစ်ဖွယ်မရှိပေ။

ယင်း၏အတွင်း၌ ရှိသော သွေးသွေးချင်းဆက်နွယ်မှုဇယားတွင် မှတ်တမ်းတင်ထားသော ကျမ်းစာသည် အနည်းဆုံး ရွှေအမြုတေအဆင့် ရှိရမည်ဖြစ်သည်။

ထိုသို့မဟုတ်ပါက ဤသွေးသွေးချင်းဆက်နွယ်မှုဇယားသည် ရွှေအမြုတေအဆင့်ရှိသော အရိပ်နက် မိစ္ဆာစစ်သူကြီးအတွက် အသုံးဝင်မည်မဟုတ်ချေ။

ယွမ်တာရှန့်သည် ရွှေအမြုတေအဆင့်ရှိသော မိစ္ဆာကျင့်ကြံသူ မဟုတ်ခဲ့ပေ။ သူသည် အမြဲတမ်း အခြေခံအုတ်မြစ်တည်ဆောက်ခြင်းအဆင့်တွင်သာ ရှိနေခဲ့ခြင်းဖြစ်သည်။

သူ၏ မိစ္ဆာပညာရပ်များကို မထုတ်ဖော်မီအထိ မျောက်ခေါင်းဂိုဏ်း တစ်ဂိုဏ်းလုံးကပင် သူ့တွင် ကျင့်ကြံခြင်း မရှိဟု ယုံကြည်ခဲ့ကြသည်။

မကြာသေးမီက ကျူးရွှမ်းကျိသည် ရွှေအမြုတေအဆင့်ရှိသော ဘိုးဘေးသုံးဦးကို ဦးဆောင်ကာ မီးလျှံတောင်တန်းအတွင်းသို့ နက်ရှိုင်းစွာ ဝင်ရောက်ခဲ့ပြီး ချော်ရည်နတ်ဆိုးမျောက်များနှင့် တိုက်ခိုက်ခဲ့သည်။

ထိုချော်ရည်နတ်ဆိုးမျောက်များသည် မိစ္ဆာသားရဲများဖြစ်ကြပြီး သူတို့၏ ခိုင်မာသော ခန္ဓာကိုယ်ကို အားကိုးကာ မည်သည့်ကျင့်စဉ်ကိုမျှ ကျင့်ကြံခြင်းမရှိဘဲ ရွှေအမြုတေအဆင့် တိုက်ခိုက်ရေးစွမ်းအား ရှိကြသည်။

ယွမ်တာရှန့်သည်လည်း ထိုသို့သော သားရဲတစ်ကောင်ကဲ့သို့သာ အထင်အမြင် ကျန်ရစ်ခဲ့ပြီး ယွမ်ယီ မွေးမြူထားသော မိစ္ဆာသားရဲတစ်ကောင်သာဖြစ်ကာ မိစ္ဆာကျင့်ကြံသူတစ်ဦး မဟုတ်ခဲ့ပေ။

“ယွမ်တာရှန့်က မသေခင်မှာ အလွန်ဆုံးရှိလှ ရွှေအမြုတေအဆင့်ကို လှမ်းနေတဲ့ အဆင့်ပဲ ရှိတာ”

“သူ့မှာသာ ရွှေအမြုတေအဆင့် ကျမ်းစာ ရှိနေရင် ဘာလို့ မကျင့်ကြံခဲ့တာလဲ”

“တကယ်လို့ သူက ကျင့်ကြံခဲ့တယ်၊ ရွှေအမြုတေအဆင့် ကျမ်းစာကိုလည်း ပိုင်ဆိုင်ထားတယ်ဆိုရင် ဘယ်လိုလုပ် အခြေခံအုတ်မြစ်တည်ဆောက်ခြင်းအဆင့်မှာပဲ ရှိနေဦးမှာလဲ”

“သူသာ ရွှေအမြုတေအဆင့် မိစ္ဆာကျင့်ကြံသူဖြစ်ရင် ယွမ်အာကို မကာကွယ်နိုင်ဘဲ နေမှာမဟုတ်သလို သူ့အသက်လည်း ဆုံးရှုံးမှာ မဟုတ်ဘူး”

မီးလျှံသီးပွဲတော်တွင် ယွမ်တာရှန့်၌ မိစ္ဆာကျင့်ကြံခြင်း အခြေခံအချို့ ရှိသည်ကို ကျူးရွှမ်းကျိ သတိထားမိခဲ့သော်လည်း ထိုအခြေခံမှာ ရွှေအမြုတေအဆင့်သို့ ရောက်ရန် အလွန်ဝေးကွာနေသေးကြောင်း သူသိသည်။

ဤအချိန်တွင် ကျူးရွှမ်းကျိ၏ စိတ်ထဲတွင် ရှုပ်ထွေးပွေလီသော အတွေးများဖြင့် ပြည့်နှက်နေတော့သည်။

အတိတ်က ပုံရိပ်လွှာများသည် သူ၏ စိတ်အာရုံထဲတွင် တဖျတ်ဖျတ် ပြန်လည်ပေါ်ပေါက်လာသည်။

သူသည် မီးလျှံသီးပွဲတော်နေ့သို့ ပြန်လည်ရောက်ရှိသွားသလို ခံစားရပြီး သူ၏ နတ်ဘုရားမျက်စိနှင့် ရွှေမျက်စိ ပညာရပ်မှတစ်ဆင့် ယွမ်တာရှန့်ကို မြင်ယောင်လာသည်။

ထိုစဉ်က ယွမ်တာရှန့်သည် သူ၏ မိစ္ဆာစွမ်းအားများကို ထုတ်ဖော်ချင်သော်လည်း မိမိကိုယ်ကိုယ် အတင်းအကျပ် ဖိနှိပ်ခဲ့ပြီး နောက်ဆုံးတွင် ထုတ်မသုံးခဲ့ပေ။

သူသည် ဒဏ်ရာပြင်းထန်စွာရကာ သေလုမျောပါး ဖြစ်နေခဲ့၏။ ကျူးရွှမ်းကျိသာ မကယ်တင်ခဲ့ပါက သူသည် သေသည်မှာ ကြာလှပြီဖြစ်သည်။

ထို့နောက် ကျူးရွှမ်းကျိသည် ကျိုးမျိုးနွယ်စုမှ ရွှေအမြုတေအဆင့် ဘိုးဘေး၊ ဖေးစီတို့နှင့်အတူ အမိုးကိုခွာကာ ချန်ချာ၏ စက်မှုအလုပ်ရုံထဲသို့ ကျူးကျော်ဝင်ရောက်ခဲ့သည်ကို ပြန်လည်မြင်ယောင်လာသည်။

သူတို့ သုံးဦးသည် ယွမ်တာရှန့်၏ အလောင်းကို စစ်ဆေးခဲ့ရာ ပြုပြင်ရန် စတင်နေပြီဖြစ်သော်လည်း သွေးများမှာမူ ထုတ်ယူပြီးဖြစ်နေသည်ကို တွေ့ခဲ့ရသည်။

ဤသည်ကို “မြင်” လိုက်ရသောအခါ ကျူးရွှမ်းကျိ၏ နှလုံးသားမှာ အနည်းငယ် တုန်လှုပ်သွားပြီး မတွေးဘဲ မနေနိုင်တော့ချေ။

“မိစ္ဆာစစ်သူကြီးရဲ့ အတွင်းပိုင်း အစိတ်အပိုင်း အများစုက သွေးဓာတ်နဲ့ ဆက်နွယ်နေတာပဲ။”

“သွေးသွေးချင်းဆက်နွယ်မှုဇယားပေါ်က မိစ္ဆာပညာရပ်တွေက သွေးဓာတ်ကျင့်ကြံခြင်းကိုပဲ အဓိကထားတာ ဖြစ်ရမယ်။”

“ဒါပေမဲ့ ငါတို့ အလုပ်ရုံကို ရောက်တဲ့အချိန်မှာ ယွမ်တာရှန့်က သေနေပြီ၊ သူ့ရဲ့ သွေးဓာတ်တွေ အားလုံးကိုလည်း ထုတ်ယူပြီးသား ဖြစ်နေတယ်။”

“ဒီလုပ်ရပ်က တကယ်ကို မြန်လွန်းတယ်။”

ယွမ်တာရှန့်၊ သွေးဓာတ်နှင့် ဆက်နွယ်နေသော မိစ္ဆာကျမ်းစာ၊ ပြီးတော့ အရေးပါလှသော ဝိညာဉ်စွမ်းအား သန့်စင်ခြင်း တတိယအဆင့် ကျင့်ကြံသူ လူငယ်လေး၊ လူမမည်လေး... နင်းကျော့။

“ကောင်းတယ်၊ ကောင်းတယ်၊ နင်းကျော့ဆိုတဲ့ လူမမည်လေးက တကယ်ကို တော်တာပဲ။”

“ငါ ကျူးရွှမ်းကျိတောင် မင်းရဲ့ လှည့်စားတာကို ခံလိုက်ရတာကိုး။”

ဤအချက်ကို သဘောပေါက်သွားသည်နှင့် ကျူးရွှမ်းကျိသည် မိစ္ဆာစစ်သူကြီးကို ချက်ချင်း ပြန်သိမ်းကာ အမိုးကို ဖောက်ထွက်ပြီး ကောင်းကင်သို့ ပျံတက်သွားတော့သည်။

...

နင်းကျော့၏ ဝိညာဉ်သည် သူ၏ ခန္ဓာကိုယ်အတွင်းသို့ ပြန်လည်ဝင်ရောက်သွားကာ မြေအောက် လျှို့ဝှက်ခန်းမဆောင်အတွင်းသို့ ဆင်းသက်လိုက်သည်။

သူသည် ပျံလွှားတိမ်တိုက်ပဝါကို အသက်သွင်းလိုက်ပြီး မိမိကိုယ်ကို ဖြူဖွေးသော တိမ်တိုက်လွှာများဖြင့် ရစ်ပတ်လိုက်၏။

အတန်ကြာပြီးနောက်။

တိမ်တိုက်အိမ်အတွင်းရှိ နင်းကျော့၏ မျက်နှာတွင် သံသယများ ပြည့်နှက်နေသည်။

ဝိညာဉ်သည် ခန္ဓာကိုယ်ထဲ ပြန်ရောက်သည်နှင့် သူသည် အခြေခံအုတ်မြစ်တည်ဆောက်ခြင်း နည်းလမ်းကို ချက်ချင်း စတင်ဆင်ခြင်တော့သည်။

သေချာစွာ စဉ်းစားကြည့်သောအခါ ဤအခြေခံအုတ်မြစ်တည်ဆောက်ခြင်း နည်းလမ်းမှာ သူထင်ထားသည်နှင့် အတော်ပင် ကွာခြားနေကြောင်း တွေ့ရသည်။

“ငါရရှိထားတဲ့ အခြေခံအုတ်မြစ်တည်ဆောက်ခြင်း နည်းလမ်းက အသိဉာဏ်ပင်လယ်ကို အဓိက အခြေစိုက်စခန်းအဖြစ် သုံးထားတာပဲ။ ကျန်တဲ့ တန်တျန်နှစ်ခုကိုတော့ အဖြည့်ခံအဖြစ် သုံးပြီး အဆင့်ကျော်ဖြတ်ကာ နောက်ဆုံးမှာ အခြေခံအုတ်မြစ်တည်ဆောက်ခြင်းအဆင့်ကို တက်လှမ်းဖို့ ဖြစ်နေတယ်။”

“ဒါပေမဲ့ ငါအရင်က နားလည်ထားတာအရဆိုရင် တန်တျန်သုံးခုလုံးက တန်းတူအရေးကြီးပြီး တစ်ခုကိုမှ ဦးစားမပေးဘဲ သုံးခုလုံးကို တစ်ပြိုင်နက်တည်း အဆင့်ကျော်ဖြတ်ရမှာ မဟုတ်လား။”

“ငါရထားတဲ့ အခြေခံအုတ်မြစ်တည်ဆောက်ခြင်း နည်းလမ်းက မှန်ဝိညာဉ် ဆက်သွယ်ခြင်းပညာရပ်ကို အခြေခံထားပြီး ကျန်တဲ့ ပညာရပ်နှစ်ခုကို အားဖြည့်အနေနဲ့ပဲ သုံးထားတာ သိသာတယ်။”

“ဒါက တကယ်ပဲ ဘိုးဘေးဆရာ သုံးဦးရဲ့ စီစဉ်မှုလား။ ဒါမှမဟုတ် ငါရထားတာနဲ့ မတူတဲ့ တခြားရှုထောင့်တွေကို အလေးပေးထားတဲ့ အခြေခံအုတ်မြစ်တည်ဆောက်ခြင်း နည်းလမ်း နောက်ထပ် နှစ်မျိုး ရှိနေသေးတာလား။”

“နောက်တစ်ခါ မသေမျိုးနန်းတော်ကို သွားစမ်းသပ်တဲ့အခါ နဂါးလိပ် မီးလျှံဝိညာဉ်ကို မေးကြည့်ရမယ်။”

“တကယ်လို့ သူ့ကို ဆက်သွယ်လို့ မရရင်တော့ တခြားလမ်းကြောင်း နှစ်ခုကို ဖော်ထုတ်ပြီး အခြေခံအုတ်မြစ်တည်ဆောက်ခြင်း နည်းလမ်းအားလုံးကို စုဆောင်းမှ အမှန်တရားကို သိရလိမ့်မယ်။”

သူ၏ ခန့်မှန်းချက်မှာ မှန်ကန်နေသည်ဟု နင်းကျော့၏ စိတ်အာရုံက ပြောနေသည်။

အခြေခံအုတ်မြစ်တည်ဆောက်ခြင်း နည်းလမ်းအားလုံးကို စုဆောင်းပြီး ပေါင်းစပ်နိုင်မှသာ တန်တျန်သုံးခုလုံးကို တစ်ပြိုင်နက်တည်း ကျင့်ကြံခြင်း၏ စစ်မှန်သော အဓိပ္ပာယ်ကို ရရှိနိုင်မည်ဖြစ်သည်။

“ဒါကို စောစောကတည်းက သိခဲ့ရင် အဲဒီအချိန်မှာ နဂါးလိပ် မီးလျှံဝိညာဉ်ကို တိုက်ရိုက် မေးခဲ့သင့်တာ။”

နင်းကျော့ သက်ပြင်းချလိုက်မိသည်။

သူ၏ အခြေခံအုတ်မြစ်တည်ဆောက်ခြင်းအဆင့်သို့ တက်လှမ်းမည့် အစီအစဉ်ကို ခေတ္တဆိုင်းငံ့ထားလိုက်ရတော့သည်။

...

မသေမျိုးနန်းတော်၏ ပင်မခန်းမဆောင် အနက်ရှိုင်းဆုံးနေရာတွင်။

နဂါးလိပ် မီးလျှံဝိညာဉ်သည်လည်း သက်ပြင်းချနေ၏။

နင်းကျော့၏ ဝိညာဉ်သည် ခန္ဓာကိုယ်အတွင်းသို့ ပြန်လည်ဝင်ရောက်ကာ ချော်ရည်နန်းတော်မှ ထွက်ခွာသွားပြီးနောက် နဂါးလိပ် မီးလျှံဝိညာဉ်သည် သူ့ကိုသာ စိုက်ကြည့်နေခဲ့သည်။

တိမ်တိုက်လွှာများ အလွန်အမင်း ကုန်ဆုံးသွားမည်ကို စိုးရိမ်သောကြောင့် နင်းကျော့ကို အတင်းအကျပ် ချောင်းမကြည့်ခဲ့ပေ။

နဂါးလိပ် မီးလျှံဝိညာဉ်သည် စိတ်ထဲမှ ရေရွတ်နေမိသည်။

“တကယ့် အခြေခံအုတ်မြစ်တည်ဆောက်ခြင်း နည်းလမ်းကိုတော့ ဖုံးကွယ်ထားလို့ မရပါလား။”

နင်းကျော့၏ ခန့်မှန်းချက်မှာ မှန်ကန်နေပေသည်။

အမှန်တကယ် ပြည့်စုံသော အခြေခံအုတ်မြစ်တည်ဆောက်ခြင်း နည်းလမ်းကို စမ်းသပ်ခံတပည့်သည် လမ်းကြောင်း သုံးခုလုံးမှတစ်ဆင့် ပြည့်ပြည့်စုံစုံ နားလည်ထားရမည်ဖြစ်ပြီး အပိုင်း သုံးပိုင်းလုံးကို စုစည်းပေါင်းစပ်နိုင်မှသာ စစ်မှန်သော နည်းလမ်းကို ရရှိနိုင်မည် ဖြစ်သည်။

ယင်းမှာ နင်းကျော့ ယခုလက်ဝယ်ရှိနေသော နည်းလမ်းမှာ ချို့ယွင်းချက်ရှိနေသည်ဟု မဆိုလိုပေ။ အမှန်တကယ်တွင် သူသည် ထိုနည်းလမ်းကို အသုံးပြုနိုင်ပါသည်။

ဤစီစဉ်မှုမှာ ဘိုးဘေးဆရာ သုံးဦးက အထူးတလည် သတ်မှတ်ထားခြင်း ဖြစ်သည်။

ဤနည်းလမ်းသည် ဗုဒ္ဓဘာသာလမ်းစဉ်ကို ပြည့်စုံစွာ နားလည်သော်လည်း ကျန်လမ်းစဉ်နှစ်ခုတွင် ပါရမီနည်းပါးသူများအတွက် သင့်တော်သည်။

ထိုသူများအတွက် ဤနည်းလမ်းကို အသုံးပြုကာ ရှေ့မဆက်နိုင်ဘဲ တစ်ဆို့မနေစေဘဲ အခြေခံအုတ်မြစ်တည်ဆောက်ခြင်းအဆင့်သို့ ရောက်ရှိနိုင်စေရန် ဖြစ်သည်။

နဂါးလိပ် မီးလျှံဝိညာဉ်သည် နင်းကျော့နှင့် ဆက်သွယ်စဉ်က ဤအကြောင်းအရာကို ရည်ရွယ်ချက်ရှိရှိ ရှောင်လွှဲခဲ့ခြင်းဖြစ်သည်။

ထိုစဉ်က နင်းကျော့သည် အခြေခံအုတ်မြစ်တည်ဆောက်ခြင်း နည်းလမ်းကို နက်နက်ရှိုင်းရှိုင်း မလေ့လာရသေးသဖြင့် ဤပြဿနာကို သတိမပြုမိခဲ့ဘဲ နဂါးလိပ် မီးလျှံဝိညာဉ်၏ လှည့်စားမှုကို ခေတ္တခံခဲ့ရခြင်းဖြစ်သည်။

နဂါးလိပ် မီးလျှံဝိညာဉ် သိထားသည်မှာ အခြေခံအုတ်မြစ်တည်ဆောက်ခြင်း နည်းလမ်းအပြည့်အစုံကို စုစည်းနိုင်မှသာ နင်းကျော့သည် တန်တျန်သုံးခုလုံးတွင် စစ်မှန်သော တစ်ပြိုင်နက်တည်း အဆင့်ကျော်ဖြတ်မှုကို ရရှိနိုင်မည် ဖြစ်ကြောင်းပင်။

ဤနည်းလမ်းဖြင့် တက်လှမ်းလာသော ကျင့်ကြံသူများသည် ချော်ရည်နန်းတော်၏ အထူးဂရုစိုက်မှုနှင့် ကြီးမားသော ထောက်ပံ့မှုများကို ရရှိမည်ဖြစ်သည်။

အတိုချုပ်ပြောရလျှင် ဤစစ်မှန်သော နည်းလမ်းဖြင့် အခြေခံအုတ်မြစ်တည်ဆောက်နိုင်သော ကျင့်ကြံသူများမှာ ချော်ရည်နန်းတော်၏ ကံကြမ္မာပါသော စစ်မှန်သော တပည့်များပင် ဖြစ်ကြတော့သည်။

...

တိမ်တိုက်လွှာများ၏ အနက်ရှိုင်းဆုံးနေရာတွင်။

နင်းကျော့သည် အခြေခံအုတ်မြစ်တည်ဆောက်ခြင်း နည်းလမ်းကို ခေတ္တဘေးဖယ်ထားကာ သူ၏ စိတ်ထဲရှိ ဆေးဝါးခန်းမဆောင် အုပ်ချုပ်ရေးမှူး တံဆိပ်ပြားကို တိတ်တဆိတ် အာရုံခံကြည့်နေသည်။

ဤတရားဝင် တံဆိပ်ပြားသည် အမှန်တကယ်တွင် ရတနာတစ်ခုဖြစ်သည်။ ထို့ကြောင့် နင်းကျော့၏ တန်တျန်အတွင်း၌ တိုက်ရိုက်သိမ်းဆည်းကာ မွေးမြူထားနိုင်သည်။

ဆေးဝါးခန်းမဆောင် အုပ်ချုပ်ရေးမှူး တံဆိပ်ပြားနှင့် ဆက်သွယ်ခြင်းဖြင့် နင်းကျော့သည် ချော်ရည်နန်းတော်ရှိ ဆေးဝါးခန်းမဆောင်ကို ချက်ချင်း အာရုံခံနိုင်ပေသည်။

တစ်ချိန်တည်းမှာပင် သူသည် သူ၏ လက်အောက်ငယ်သားများ၏ အခြေအနေကိုလည်း မရေမရာ အာရုံခံနိုင်သည်။

နင်းရှောင်ဟွေ့ကို အာရုံခံလိုက်သောအခါ သူမ၏ ရှေ့တွင် ကြီးမားသော ရေခဲတုံးကြီးတစ်ခု ရှိနေသည်ကို တွေ့ရသည်။

နောက်တစ်ခဏတွင် နင်းရှောင်ဟွေ့သည် သူမ၏ သွယ်လျသော ကျောက်စိမ်းရောင် လက်ချောင်းလေးကို ဆန့်ထုတ်ကာ ရေခဲတုံး၏ မျက်နှာပြင်ကို အသာအယာ ထိတွေ့လိုက်သည်။

ထိုရေခဲတုံးမှာ ရုတ်တရက် ကွဲကြေသွားကာ ရွှေသွေးတိုက်ပွဲဝင်မျောက်သည် အသက်ဝင်လာပြီး မူလအခြေအနေသို့ ပြန်လည်ရောက်ရှိသွားတော့သည်။

နင်းကျော့မှာ စိတ်ရင်းအမှန်ဖြင့် မချီးကျူးဘဲ မနေနိုင်တော့ချေ။ “ကျောက်စိမ်းနှင်းဆီ လက်ပညာရပ်... တကယ့်ကို အံ့သြစရာကောင်းတဲ့ ပါရမီပါလား။”

“ဒီတစ်ခါတော့ နင်းရှောင်ဟွေ့က တကယ်ကို အကူအညီဖြစ်စေခဲ့တာပဲ။”

ယင်းကို နတ်ဘုရားပညာရပ်များအတွက် မြေဆီလွှာဟု ခေါ်ဆိုကြပြီး နတ်ဘုရားပညာရပ်များမှာ ကမ္ဘာဦးတရားသဘောများကို နက်ရှိုင်းစွာ အသုံးချခြင်း ဖြစ်သည်။

ထို့ကြောင့် ပါရမီသည် ကျိုးကြောင်းဆီလျော်မှုကို မလိုက်နာပေ။

တစ်ချိန်တည်းမှာပင် ပါရမီသည် အမြင့်မြတ်ဆုံးသော တရားသဘောများကိုလည်း လိုက်နာတတ်ပေသည်။

နင်းကျော့နှင့် နှိုင်းယှဉ်လျှင် နင်းရှောင်ဟွေ့သည် ရွှေသွေးတိုက်ပွဲဝင်မျောက်၏ တည်ဆောက်ပုံကို နားလည်မှု ပိုနည်းသော်လည်း သူမ၏ ပါရမီကို အားကိုးကာ ယင်းကို ပြုပြင်ပေးနိုင်ခဲ့ခြင်းဖြစ်သည်။

နည်းလမ်းပေါင်းစုံမှတစ်ဆင့် နင်းကျော့သည် ကျောက်စိမ်းနှင်းဆီ လက်ပညာရပ်နှင့် ပတ်သက်သော အချက်အလက်များစွာကို တဖြည်းဖြည်း နားလည်လာခဲ့ပြီဖြစ်သည်။

“ကျောက်စိမ်းနှင်းဆီ လက်ပညာရပ်ရဲ့ အနှစ်သာရက သေခြင်းတရားကနေ ပြန်လည်ရှင်သန်ခြင်းပဲ။ ကောင်းကင်ဘုံက လူတွေအတွက် အမြဲတမ်း ထွက်ပေါက်တစ်ခု ချန်ထားပေးတယ်ဆိုတဲ့ တရားသဘောကို ကိုယ်စားပြုတာပဲ။”

“စက်မှုပစ္စည်းတွေက မူလကတည်းက သက်မဲ့အရာတွေ ဖြစ်ပေမဲ့ ကျောက်စိမ်းနှင်းဆီ လက်ပညာရပ်ရဲ့ ပါရမီနဲ့ မထင်မှတ်ဘဲ ကောင်းကောင်း အံဝင်ခွင်ကျ ဖြစ်နေပြီး သက်ရှိတွေထက်တောင် ပိုပြီး ကုသမှု ထိရောက်နေတာပဲ။”

“ဒါပေမဲ့ နင်းရှောင်ဟွေ့လို ပါရမီရှင်မျိုးက ငါ့အတွက် ဘယ်တော့မှ စိတ်လိုလက်ရ အလုပ်လုပ်ပေးမှာလဲ”

နင်းကျော့မှာ အဆင်ပြေချောမွေ့လွန်းလှသည်ဟု ခံစားနေရသည်။

စွမ်းဆောင်ရည်ရှိသော လက်အောက်ငယ်သားတစ်ဦး ရှိနေခြင်းမှာ တကယ်ကို ကောင်းမွန်လှပေသည်။

သူသည် ချော်ရည်နန်းတော်ကို အကာအကွယ်ယူကာ နင်းရှောင်ဟွေ့အား အမှန်တရားကို ဖုံးကွယ်ထားပြီး သူမအား သွယ်ဝိုက်သောနည်းဖြင့် သူ့အတွက် အလုပ်လုပ်ပေးစေခဲ့ခြင်းဖြစ်သည်။

အကယ်၍ နင်းရှောင်ဟွေ့သာ အမှန်တရားကို သိသွားပါက သူမသည် သူ့ကို သေချာပေါက် ပြန်လည်တိုက်ခိုက်ပေလိမ့်မည်။

နင်းကျော့သည် စိတ်ထဲမှ သက်ပြင်းချလိုက်မိသည်။

သူသိထားသည်မှာ သူ၏ ဩဇာအာဏာမှာ သိသိသာသာ ကြီးထွားလာသော်လည်း သူ မလုပ်ဆောင်နိုင်သေးသော အရာတစ်ခု ရှိနေသေးကြောင်းပင်။

ယင်းမှာ ပါရမီရှိသော ကျင့်ကြံသူများကို သူ့အတွက် စိတ်လိုလက်ရ အလုပ်လုပ်ပေးစေရန် ဖြစ်သည်။

လူအများစုမှာ ယခုအခါ သူ၏ ပါရမီကို အသိအမှတ်ပြုပြီး တောက်ပသော အနာဂတ်ရှိသည်ဟု မြင်သောကြောင့်သာ သူ့ထံတွင် ခိုလှုံလာကြခြင်းဖြစ်သည်။

နင်းကျော့၏ လက်အောက်ငယ်သားများတွင် ပါရမီ မရှိကြချေ။ သူ၏ လက်ရှိ အင်အားစုအသေးစားလေးမှာ ထိုသို့သော စွမ်းဆောင်ရည်ရှိသူများကို ထိန်းထားနိုင်စွမ်း မရှိသေးပေ။

ဗိမာန်က သေးငယ်လွန်းသဖြင့် ဘုရားကြီးကို မပင့်ဆောင်နိုင်သကဲ့သို့ပင်။

ပါရမီရှိသော ကျင့်ကြံသူများသည် နေရာအနှံ့မှ ကမ်းလှမ်းမှုများကို လက်ခံရရှိကြပြီး မျိုးနွယ်စုများ၊ ဂိုဏ်းများနှင့် နိုင်ငံများတွင် ပိုမိုများပြားသော ထောက်ပံ့မှုနှင့် အရင်းအမြစ်များကို ရရှိကြသဖြင့် နင်းကျော့၏ လက်အောက်တွင် ဆက်နေရန်မှာ မဖြစ်နိုင်သလောက်ပင်။

နင်းကျော့၏ ဩဇာအာဏာမှာ ယခုအချိန်တွင် သေးငယ်လွန်းနေသေးသဖြင့် ဤပါရမီရှင်များ သူတို့၏ စွမ်းဆောင်ရည်ကို ထုတ်ဖော်ပြသရန် နေရာမရှိသလောက် ဖြစ်နေသည်။

“ငါသာ ချော်ရည်နန်းတော်ကို ရရှိပြီး မသေမျိုးနန်းတော်ရဲ့ အရှင်သခင် ဖြစ်လာမှပဲ ရလိမ့်မယ်။”

နင်းကျော့သည် အနာဂတ်ကို မျှော်လင့်နေမိကာ ကျူးရွှမ်းကျိသည် သက်တန့်ရောင်စဉ်တစ်ခုအဖြစ် အသွင်ပြောင်းကာ သူ့ထံသို့ လျင်မြန်စွာ ပျံသန်းလာနေသည်ကို လုံးဝ သတိမပြုမိခဲ့ချေ။

ကျူးရွှမ်းကျိ၏ လှုပ်ရှားမှုမှာ ဖုံးကွယ်ထားခြင်းမရှိသဖြင့် မြို့အတွင်းရှိ ကျင့်ကြံသူ အမြောက်အမြားမှာ ချက်ချင်းပင် သတိပြုမိသွားကြသည်။

အကြောင်းစုံကို သိနေသူမှာ နဂါးလိပ် မီးလျှံဝိညာဉ် တစ်ဦးတည်းသာ ဖြစ်သည်။

“လာပြီ၊ လာပြီ။” နဂါးလိပ် မီးလျှံဝိညာဉ်မှာ အလွန်အမင်း စိတ်လှုပ်ရှားနေ၏။

ယင်းသည် ပင်မခန်းမဆောင်ရှိ ထိုင်ခုံပေါ်တွင် ဝပ်နေကာ မျက်လုံးများမှာလည်း တလက်လက် တောက်ပနေပြီး မကြာမီ စတင်တော့မည့် ပြဇာတ်ကို စိတ်အားထက်သန်စွာ စောင့်မျှော်နေတော့သည်။

မြေအောက် ကျင့်ကြံခြင်း လျှို့ဝှက်ခန်းမအတွင်း၌။

နင်းကျော့၏ ပတ်ပတ်လည်ရှိ တိမ်တိုက်လွှာများသည် ရုတ်တရက် လျင်မြန်စွာ ကုန်ဆုံးသွားသည်။

နင်းကျော့မှာ ချက်ချင်း သတိရှိသွားကာ တိမ်တိုက်လွှာများကို ပြန်သိမ်းပြီး သူ၏ ခုခံရေး အစီအရင်များကို အသက်သွင်းလျက် ဟစ်အော်လိုက်သည်။ “ဘယ်သူလဲ။”

ဘုန်း။

နောက်တစ်ခဏတွင် ကျူးရွှမ်းကျိသည် နင်းကျော့၏ အိမ်အပေါ်တည့်တည့်၌ ဝဲပျံနေတော့သည်။

သူသည် လက်ဝါးကို ဆန့်ထုတ်ကာ လက်ဖဝါးအလယ်ကို အောက်သို့ ချိန်ရွယ်ပြီး အသာအယာ ဆုပ်ကိုင်ကာ ဆွဲတင်လိုက်သည်။

မမြင်ရသော အားတစ်ခုသည် အိမ်ခေါင်မိုးကို မတင်လိုက်ပြီးနောက် ယင်းကို လွှင့်ပစ်လိုက်သည်။

ကျူးရွှမ်းကျိက ထပ်မံဆုပ်ကိုင်ကာ ဆွဲတင်လိုက်ပြန်ရာ ကြမ်းပြင်မှာလည်း ကွာထွက်သွားတော့သည်။

မြေအောက် လျှို့ဝှက်ခန်းမအတွင်းရှိ နင်းကျော့မှာ ထိုသို့ဖြင့် ပေါ်ထွက်လာရတော့သည်။

“အကြီးအကဲ ကျူးရွှမ်းကျိပါလား။” နင်းကျော့သည် အပေါ်သို့ မော့ကြည့်လိုက်ရာ ကျူးရွှမ်းကျိကို တွေ့ရသဖြင့် ဆွံ့အလျက် ထိတ်လန့်သွားကာ အလျင်အမြန်ပင် ဦးညွှတ်လိုက်ရသည်။

ကျူးရွှမ်းကျိသည် ကောင်းကင်မှ ဆင်းသက်လာပြီး နင်းကျော့၏ ရှေ့တွင် ဖြည်းညှင်းစွာ ရပ်နားလိုက်သည်။

သူ၏ မျက်နှာတွင် သတ်ဖြတ်လိုသော အငွေ့အသက်များ ပြည့်နှက်နေပြီး သူ၏ လေးထောင့်ကျသော မျက်နှာမှာလည်း ဤအချိန်တွင် ဩဇာအရှိန်အဝါများ ထွက်ပေါ်နေသည်။

သူ၏ နက်မှောင်သော မျက်သူငယ်အိမ် အလယ်မှ ရွှေရောင်အလင်းတန်းများ ဖြာထွက်နေပြီး သူ၏ နတ်ဘုရားမျက်စိနှင့် ရွှေမျက်စိ ပညာရပ်ကို အသက်သွင်းထားသည်မှာ သိသာလှပေသည်။

ကျူးရွှမ်းကျိသည် အနက်ရောင် ပန်းထိုးထားသော တောက်ပသည့် အနီရောင် ဝတ်ရုံကို ဝတ်ဆင်ထားပြီး သူ၏ ခါးတွင်လည်း နတ်ဘုရားမုဆိုးရုံးဟု ရေးထိုးထားသော ခါးချိတ်တံဆိပ်ကို ချိတ်ဆွဲထားရာ လူတို့၏ အာရုံကို ဖမ်းစားထားပြီး အခြားသူများအပေါ်တွင် ကြီးမားသော စိတ်ပိုင်းဆိုင်ရာ ဖိအားများကို ပေးစွမ်းနေတော့သည်။