အခန်း (၃၀၆-၃၀၇)

အခန်း (၃၀၆) ကံကြမ္မာတံခါးကို ဖွင့်လှစ်ခြင်း

"အတူတူ တိုက်ခိုက်ကြမယ်..." ဝေယန်ထောင်းက တုံးရှိုးကျစ်ကို ကြည့်ရင်း သူ့လက်ထဲမှ ဝိညာဉ်ဓားကို မသိမသာ တင်းတင်းကျပ်ကျပ် ဆုပ်ကိုင်လိုက်၏။

ဝေယန်ထောင်း၏ စကားကို ကြားသောအခါ တုံးရှိုးကျစ်၏ နှုတ်ခမ်းများက သရော်ပြုံး တစ်ခုအဖြစ် ကွေးတက်သွားသည်။

အကယ်၍ ဝေယန်ထောင်းနှင့် ဖုန်းရှိုးဖူတို့သာ အခြေအနေ ကောင်းနေသေးမည် ဆိုလျှင် ဤသုံးယောက်တစ်ယောက် တိုက်ပွဲက အနည်းငယ်တော့ ကွာခြားသွားနိုင်ပေ၏။

သို့သော်လည်း ယခုအခိုက်အတန့်၌ ဖုန်းရှိုးဖူရော ဝေယန်ထောင်းပါ ပြင်းထန်စွာ ဒဏ်ရာရထားကြပြီး သူတို့၏ တိုက်ခိုက်နိုင်စွမ်း သုံးဆယ်ရာခိုင်နှုန်းမျှ ကျန်ရှိနေသေးသလား ဆိုသည်ကပင် မေးခွန်းထုတ်စရာ ဖြစ်နေသည်။

ချန်ဖေး၏ ကိုယ်ဖော့ပညာက အမှန်တကယ်ပင် ထူးချွန်လှပြီး ပြီးခဲ့သည့်အကြိမ် သူတို့ ဆုံတွေ့ခဲ့စဉ်ကထက် များစွာ ပိုမိုကောင်းမွန်နေ၏။ ပြီးခဲ့သည့်အကြိမ်ကလည်း ချန်ဖေးမှာ သူ၏ ကိုယ်ဖော့ပညာကြောင့်သာ လွတ်မြောက်သွားနိုင်ခဲ့ခြင်း ဖြစ်သည်။

သို့သော်လည်း ယခုအခါတွင် တုံးရှိုးကျစ်က ဤအားနည်းချက်ကို ဖြည့်ဆည်းထားပြီးပြီ ဖြစ်သည်။ အကယ်၍ ချန်ဖေး တစ်ယောက်တည်းသာ ထွက်ပြေးမည် ဆိုပါက လွတ်မြောက်ရန် အခွင့်အရေး အနည်းငယ် ရှိနိုင်သေး၏။ သို့သော် ဤဝန်ထုပ်ဝန်ပိုး နှစ်ခုကို သယ်ဆောင်သွားမည် ဆိုလျှင်တော့ စိတ်ကူးယဉ်သက်သက်သာ ဖြစ်ပေလိမ့်မည်။

ဖုန်းရှိုးဖူက ချန်ဖေးကို လှည့်ကြည့်လိုက်ရာ သူ၏ မျက်လုံးများထဲတွင် စိုးရိမ်ပူပန်မှုများ ပြည့်နှက်နေသည်။ ချန်ဖေးက အလွန် စွမ်းအားကြီးမားပြီး ဒွာရသန့်စင်ခြင်း အဆင့်သို့ ယခုမှ ရောက်ရှိလာသော သိုင်းပညာရှင် တစ်ယောက်ကဲ့သို့ သဘောထား၍ မရကြောင်းကို ဖုန်းရှိုးဖူ နားလည်ထား၏။

ချန်ဟုန်ဂိုဏ်းမှ ဒွာရသန့်စင်ခြင်း အဆင့်ရှိ စီနီယာ သုံးယောက်ကို သတ်ဖြတ်နိုင်ခဲ့ခြင်းက ချန်ဖေး၏ စွမ်းအားကို ရှင်းလင်းစွာ သက်သေပြနေသည်။ သို့သော်လည်း ဖုန်းရှိုးဖူ ကိုယ်တိုင်က ထိုမြင်ကွင်းကို မျက်မြင်ကိုယ်တွေ့ မမြင်ခဲ့ရပေ။

ဒွာရသန့်စင်ခြင်း အစောပိုင်းအဆင့်၏ အထွတ်အထိပ်သို့ နီးကပ်နေပြီဖြစ်သော တုံးရှိုးကျစ်မှာ ကျင့်ကြံမှုပိုင်းတွင် ဝူယုံးကျောက်နှင့် လျောင်ဟန်ချင်တို့ထက် များစွာ နိမ့်ကျနေခြင်း မရှိချေ။ သို့သော်လည်း သူက ရှန်းယန်ဂိုဏ်း၏ အဓိက တပည့်မျိုးဆက် မဟုတ်သည့်အတွက် လောလောဆယ်တွင် အဆင့်မြင့် ဝိညာဉ်လက်နက်ကို မကိုင်ဆောင်နိုင်ဘဲ အလယ်အလတ်အဆင့် ဝိညာဉ်ဓားကိုသာ ကိုင်ဆောင်ထားရ၏။

ဒွာရသန့်စင်ခြင်း အစောပိုင်းအဆင့်၏ အထွတ်အထိပ် ကျင့်ကြံမှုနှင့် အလယ်အလတ်အဆင့် ဝိညာဉ်ဓား ပေါင်းစပ်မှုမှာ ဒွာရသန့်စင်ခြင်း အစောပိုင်းအဆင့် အတွက် ပြိုင်ဘက်ကင်း မဟုတ်သော်လည်း သာမန် ဒွာရသန့်စင်ခြင်း အစောပိုင်းအဆင့်ထက် သေချာပေါက် များစွာ သာလွန်နေပေသည်။

ဤစွမ်းအားကြောင့်ပင် ဝူယုံးကျောက်က တုံးရှိုးကျစ်ကို သူတို့နောက်သို့ တစ်ယောက်တည်း လိုက်ဖမ်းရန် စေလွှတ်ခဲ့ခြင်း ဖြစ်ပြီး မိုင်အနည်းငယ် အကွာတွင် ရှိနေသော နင်းယုံးဖေးမှာ အပို ကာကွယ်မှု အလွှာတစ်ခုသာ ဖြစ်၏။

ဝေယန်ထောင်းက အသက်ပြင်းပြင်း တစ်ချက်ရှူ၍ တုံးရှိုးကျစ်ထံသို့ ခုန်အုပ်တော့မည့်ဆဲဆဲတွင် ရုတ်တရက် လက်တစ်ဖက်က သူ့ကို တားဆီးလိုက်သည်။ ဝေယန်ထောင်းက ချန်ဖေးကို ဝေခွဲမရစွာဖြင့် ကြည့်လိုက်၏။

"ခင်ဗျားတို့ အနားယူနေကြပါ... ကျွန်တော် ခဏနေရင် ပြန်လာခဲ့မယ်..."

ချန်ဖေး စကားပြောအပြီးတွင် သူ၏ ပုံရိပ်က တစ္ဆေတစ်ကောင်သဖွယ် ပျောက်ကွယ်သွားသည်။ သူ ပြန်ပေါ်လာသောအခါ တုံးရှိုးကျစ်၏ အရှေ့သို့ ရောက်ရှိနေပြီ ဖြစ်ပြီး သူ၏ လက်ထဲမှ ချန်ယွမ်ဓားပေါ်တွင် သိပ်သည်းလှသော အနက်ရောင် ယွမ်ချီစွမ်းအင်များ ဖုံးလွှမ်းနေ၏။

ဝေယန်ထောင်းမှာ ချန်ဖေး၏ စကားများမှ သတိမဝင်လာသေးမီမှာပင် ချန်ဖေး တစ်ယောက်တည်း ရှေ့သို့ ပြေးထွက်သွားသည်ကို မြင်လိုက်ရသည်။ ဝေယန်ထောင်းက ဖုန်းရှိုးဖူကို မသိစိတ်မှ လှမ်းကြည့်လိုက်ပြီး သူ၏ စိတ်ထဲတွင် တစ်ခဏမျှ ဗလာကျင်းသွား၏။

"ဟားဟား... မင်းက အချိန်ကိုက် ရောက်လာတာပဲ..."

တုံးရှိုးကျစ်က ချန်ဖေး တစ်ယောက်တည်း ပြေးဝင်လာသည်ကို မြင်သောအခါ အကျယ်ကြီး မရယ်ဘဲ မနေနိုင်တော့ချေ။

မာနကြီးပြီး ဘဝင်မြင့်နေသော ချန်ဖေး၏ ပါရမီက ငြင်းပယ်၍မရအောင် ထူးချွန်ကြောင်းကို တုံးရှိုးကျစ်၏ မျက်လုံးများထဲတွင် ချက်ချင်းပင် သိသာထင်ရှားစွာ မြင်တွေ့နေရသည်။

ပါရမီပိုင်းတွင် သူက ချန်ဖေးအောက် များစွာ နိမ့်ကျကြောင်းကို တုံးရှိုးကျစ် ဝန်ခံသော်လည်း ဘာဖြစ်သေးသနည်း။ အစွမ်းအထက်ဆုံး ပါရမီရှင်ပင်လျှင် အချိန်တစ်ခု ယူရန် လိုအပ်ပေသည်။

ယခုအချိန်က သူ့ဘက်တွင် ရှိနေ၏။ သူက ချန်ဖေးထက် ဆယ်စုနှစ်ပေါင်းများစွာ ပို၍ ကျင့်ကြံခဲ့ရပြီး ထိုဆယ်စုနှစ်များက သူ၏ အကြီးမားဆုံးသော အားသာချက်ပင် ဖြစ်သည်။

ချန်ဖေးက သူ့ဓားကို ထိုးသွင်းလိုက်ရာ ချန်ယွမ်ဓားက အနက်ရောင် အလင်းတန်းများဖြင့် တောက်ပသွားသည်။ အနီးကပ် သေချာကြည့်မည် ဆိုပါက အတွင်း၌ ဓားပုလဲစေ့ အလုံး ခြောက်ဆယ်ခန့် လျှပ်တစ်ပြက် ဖြတ်သန်းသွားသည်ကို မြင်တွေ့နိုင်၏။

ကျုံးယွမ် ဓားသိုင်း အစီအရင်က ဓားအစီအရင်ကို ဖြန့်ကျက်ရန် မလိုအပ်ပေ။ အကယ်၍ တစ်စုံတစ်ယောက်က ကျင့်စဉ်အပေါ် နားလည်သဘောပေါက်မှု မြင့်မားပြီး ထိန်းချုပ်နိုင်စွမ်း အလုံအလောက် အားကောင်းမည် ဆိုပါက ဓားအစီအရင်ကို ဓားသွားပေါ်သို့ တိုက်ရိုက် စုစည်းနိုင်ပေသည်။

ဓားတစ်ချက် ခုတ်ပိုင်းလိုက်သည်နှင့် စွမ်းအားအားလုံး စုဆုံသွား၏။ ပိတ်လှောင်မှု အာနိသင် မရှိသည်မှလွဲ၍ ဓားအစီအရင်၏ စုစည်းထားသော စွမ်းအားက အမှန်တကယ်ပင် ပို၍ စွမ်းအားကြီးမားစေသည်။

ဝူယုံးကျောက်က မိုင် ၂၀ ကျော် အကွာတွင် ရှိနေဆဲ ဖြစ်သည်။ နတ်တိမ်ဓားဂိုဏ်းမှ လူနှစ်ယောက်မှာ သေချာပေါက် သေဆုံးနေလောက်ပြီ ဖြစ်ပြီး ကျန်ရှိနေသော ရှန်းယန်ဂိုဏ်းသားများကလည်း အချိန်မရွေး ပြေးလာနိုင်၏။ ထို့ကြောင့် တုံးရှိုးကျစ်နှင့် ရင်ဆိုင်ရချိန်တွင် ချန်ဖေး လုပ်ဆောင်ရန် လိုအပ်သည်မှာ သူ့ကို ဖိနှိပ် သတ်ဖြတ်ပစ်ရန်ပင် ဖြစ်သည်။

"ဝုန်း..."

နဂါးဆင်များ ရင်ဆိုင်တိုက်ခိုက်သကဲ့သို့သော အသံတစ်သံက ချန်ဖေး၏ နောက်ကျောမှ ထွက်ပေါ်လာပြီး ချန်ယွမ်ဓား ထိုးသွင်းလိုက်သည့် အရှိန်က ထပ်မံ မြင့်တက်သွားကာ ပတ်ဝန်းကျင် တစ်ခွင်လုံးကို ကြမ်းတမ်း ပြင်းထန်သော အရှိန်အဝါများဖြင့် တမုဟုတ်ချင်း ပြည့်နှက်သွားစေသည်။

ရယ်မောနေသော တုံးရှိုးကျစ်၏ မျက်နှာက ချန်ဖေး၏ ဓားထိုးသွင်းလိုက်ချိန်တွင် အေးခဲသွား၏။ အသိစိတ်ပင်လယ် အတွင်းရှိ သူ၏ စိတ်က ဤဓားချက်က အံ့မခန်း စွမ်းအားကြီးမားကြောင်းကို ရူးသွပ်မတတ် သတိပေးနေသည်။ ယခုအခိုက်အတန့်၌ တုံးရှိုးကျစ်၏ မျက်လုံးများထဲတွင် မိုးထိတောင်ထွတ်ကြီး တစ်ခုက ကောင်းကင်နှင့် မြေကြီးကို ဖောက်ထွက်၍ သူ့အပေါ်သို့ ဖိချလာသကဲ့သို့ ထင်မှတ်ရပြီး ပတ်ဝန်းကျင်မှ လေထုက အခဲအဖြစ် ပြောင်းလဲသွားကာ သူ့ကို အနည်းငယ်မျှ လှုပ်ရှားရန်ပင် အလွန် ခက်ခဲသွားစေသည်။

ချန်ဖေးက ဒွာရသန့်စင်ခြင်း အဆင့်သို့ တက်လှမ်းခဲ့သည်မှာ နှစ်နှစ်သာ ရှိသေးသော်လည်း မည်သို့လုပ်၍ ဤမျှလောက်သော တိုက်ခိုက်ရေး စွမ်းအားမျိုး ပိုင်ဆိုင်ထားရသနည်း။ ယခင်က လူသုံးယောက် ဝိုင်းဝန်း တိုက်ခိုက်စဉ်က ချန်ဖေး၏ စွမ်းဆောင်ရည်က လုံလောက်အောင်ပင် အလွန်အကျွံ ဖြစ်နေခဲ့ပြီး သူတို့ထဲမှ တစ်ယောက်ကို ဓားတစ်ချက်တည်းနှင့်ပင် နှစ်ပိုင်းပိုင်းနိုင်ခဲ့သည်။ သို့သော် ယခုအခိုက်အတန့်တွင် ယခင်ကနှင့် နှိုင်းယှဉ်ပါက ချန်ဖေး၏ စွမ်းအားက နောက်တစ်ကြိမ် သိသိသာသာ ထပ်မံ မြင့်တက်လာခဲ့ပြန်သည်။

ပါရမီက မည်မျှပင် အံ့မခန်း ဖြစ်နေပါစေ၊ မွေးရာပါ စွမ်းရည်များက မည်မျှပင် အားကောင်းနေပါစေ၊ အချိန်တစ်ခုတော့ ယူရန် လိုအပ်နေဆဲ ဖြစ်သည်။ ဤမျှ တိုတောင်းသော အချိန်အတွင်း ချန်ဖေးက ဤအရာကို မည်သို့ လုပ်ဆောင်နိုင်ခဲ့သနည်း။ ထို့အပြင် ယွမ်ချန်ဓားဂိုဏ်း၏ သယံဇာတများက ချန်ဖေးကို ယနေ့ ဤအဆင့်ထိ ရောက်ရှိလာစေရန် အထောက်အပံ့ပေးနိုင်စွမ်း ရှိမည် မဟုတ်ပေ။

"ယွီ..."

တုံးရှိုးကျစ် နားမလည်နိုင်ဖြစ်နေသော်လည်း သူ၏ ခန္ဓာကိုယ်က ကြိုတင်၍ တုံ့ပြန်နေပြီ ဖြစ်သည်။ သူ့လက်ထဲမှ အလယ်အလတ်အဆင့် ဝိညာဉ်ဓားက လင်းလက် တောက်ပသွားပြီး တုံးရှိုးကျစ်၏ အရှိန်အဝါကို ရုတ်တရက် တုန်ခါသွားစေသည်။

အလယ်အလတ်အဆင့် ဝိညာဉ်လက်နက်က အဆင့်နိမ့် ဝိညာဉ်လက်နက်နှင့် နှိုင်းယှဉ်ပါက သေချာပေါက် များစွာ ပိုမို စွမ်းအားကြီးမားပေသည်။ အခြား လက္ခဏာရပ်များကို ထည့်မတွက်ဘဲ ရိုးရှင်း တိုက်ရိုက်ကျသော အလုံးစုံ တွက်ချက်မှုတစ်ခုတည်း အရပင် အလယ်အလတ်အဆင့် ဝိညာဉ်လက်နက်များက ဒွာရသန့်စင်ခြင်း အဆင့်၏ စွမ်းအားကို ဒွာရ ငါးပေါက်ခန့်အထိ တိုးမြှင့်ပေးနိုင်သည်။

ထို့ကြောင့် အလယ်အလတ်အဆင့် ဝိညာဉ်လက်နက်ကို ကိုင်ဆောင်ထားသော တုံးရှိုးကျစ်မှာ ယခုအခိုက်အတန့်တွင် ဒွာရ ၃၆ ခု ပေါင်းစပ်ထားသည့် ဒွာရသန့်စင်ခြင်း အလယ်အလတ်အဆင့်ကဲ့သို့ ပြည့်စုံလုံလောက်သော စွမ်းအားမျိုး မရှိသည်မှလွဲ၍ ဒွာရ အရေအတွက် သီးသန့်အရ ဒွာရသန့်စင်ခြင်း အလယ်အလတ်အဆင့်သို့ ရောက်ရှိနေပြီ ဖြစ်၏။

"ဘုန်း..."

ဝိညာဉ်ဓား နှစ်လက် ထိပ်တိုက် တွေ့ဆုံသွားပြီး ထိုဓားနှစ်လက်ထံမှ ပြင်းထန်သော လှိုင်းလုံးကြီး တစ်ခုက ပတ်ဝန်းကျင်သို့ တိုက်ခတ်သွားသည်။

"ဖူး..."

တစ်ခဏမျှ အကြိတ်အနယ် ဖြစ်သွားပြီးနောက် တုံးရှိုးကျစ်က သွေးမြူခိုးများကို ရုတ်တရက် အန်ချလိုက်ပြီး သူ၏ ခန္ဓာကိုယ်ကို လုံးဝ ထိန်းချုပ်နိုင်စွမ်း ကင်းမဲ့သွားကာ နောက်ဘက်သို့ အလိုအလျောက် ဆုတ်ခွာသွားရ၏။

တစ်စုံတစ်ခု မှားယွင်းနေကြောင်း သတိပြုမိသည်နှင့် တုံးရှိုးကျစ်က ချက်ချင်းပင် ခုခံရန် ရွေးချယ်ခဲ့သော်လည်း ချန်ဖေး၏ ဓားထဲတွင် ပါဝင်သော စွမ်းအားက ကြီးမားလွန်းလှသဖြင့် သူ အသည်းအသန် ခုခံကာကွယ်သည့်တိုင်အောင် ထိုစွမ်းအားကို တားဆီးနိုင်စွမ်း မရှိခဲ့ပေ။

အဝေးမှ ကြည့်နေသော ဝေယန်ထောင်း၏ မျက်လုံးများ ပြူးကျယ်သွားသည်။

ချန်ဖေးသည် တုံးရှိုးကျစ်ထံ ပြေးဝင်၍ ဓားချက်တစ်ချက် ခုတ်ပိုင်းလိုက်ပြီး အံ့မခန်း အရှိန်အဝါကို ထုတ်ဖော်ပြသလိုက်သည်။ တုံးရှိုးကျစ် သွေးအန်ပြီး နောက်ဆုတ်သွားရခြင်းက ဝေယန်ထောင်း၏ မျက်လုံးများကို ပို၍ပင် ပြူးကျယ်သွားစေသည်။ သူ ထင်ယောင်ထင်မှား ဖြစ်နေသလားဟု ဝေယန်ထောင်း တွေးလိုက်မိ၏။

သူ၏ စိတ်ထဲတွင် ရေတွက်၍မရသော အတွေးများက တုံးရှိုးကျစ်နည်းတူ ဖြစ်ပေါ်နေသည်။ ချန်ဖေးက ဤမျှလောက်သော တိုက်ခိုက်ရေး စွမ်းအားမျိုးကို မည်သို့ ထုတ်ဖော်ပြသနိုင်ခဲ့သနည်း ဆိုသည်ကို သူ နားမလည်နိုင် ဖြစ်နေ၏။

အလယ်အလတ်အဆင့် ဝိညာဉ်ဓားကို ကိုင်ဆောင်ထားသည့် ဒွာရသန့်စင်ခြင်း အစောပိုင်းအဆင့်၏ အထွတ်အထိပ် ပညာရှင် တစ်ယောက်ကို ဒွာရသန့်စင်ခြင်း အဆင့်၌ နှစ်နှစ်ခန့်သာ ရှိသေးသော သိုင်းပညာရှင် တစ်ယောက်က သွေးအန်ပြီး နောက်ဆုတ်သွားရသည်အထိ ခုတ်ပိုင်းနိုင်ခဲ့သည်။ ဤမြင်ကွင်းက ဘယ်လိုပဲကြည့်ကြည့် လက်တွေ့မဆန်လှပေ။

ဝေယန်ထောင်းက ဖုန်းရှိုးဖူကို မသိစိတ်မှ လှည့်ကြည့်လိုက်ရာ ဖုန်းရှိုးဖူ၏ မျက်လုံးများထဲတွင်လည်း အံ့ဩမှုများ ပြည့်နှက်နေသည်ကို တွေ့လိုက်ရသော်လည်း ထိုအံ့ဩမှု ပမာဏက ဝေယန်ထောင်းလောက်တော့ အလွန်အကျွံ မဖြစ်လှချေ။

ချန်ဖေးက စွမ်းအားကြီးမားကြောင်း ဖုန်းရှိုးဖူ သိထားသော်လည်း ထိုစွမ်းအားက သေချာပေါက် အဆပေါင်းများစွာ တိုးတက်လာခဲ့ပြီ ဖြစ်သည်။

ချန်ဖေးက ချန်ဟုန်ဂိုဏ်းမှ ဒွာရသန့်စင်ခြင်း အဆင့်သုံးယောက်ကို သတ်ဖြတ်ခဲ့ဖူးသည်ကို ထည့်တွက်မည် ဆိုလျှင်ပင် တုံးရှိုးကျစ်ကို ဓားတစ်ချက်တည်းဖြင့် ဒဏ်ရာရစေရန်မှာ အလွန် ခက်ခဲလှသည်။ သို့သော် ချန်ဖေးက လုပ်နိုင်ခဲ့၏။

တစ်နည်းအားဖြင့် ထိုကိစ္စပြီး နောက်တွင် ချန်ဖေး၏ တိုးတက်မှု အရှိန်အဟုန်က လုံးဝ နှေးကွေးမသွားဘဲ အလွန်အကျွံ အဆင့်တစ်ခုအထိ ဆက်လက် မြင့်တက်လာခဲ့ခြင်း ဖြစ်သည်။

သိုင်းပညာ လေ့ကျင့်ခြင်းက အမြဲတမ်း လွယ်ကူရာမှ ခက်ခဲရာသို့ တက်လှမ်းရလေ့ရှိ၏။ ခွန်အားက အဆင့်တစ်ခုသို့ ရောက်ရှိသွားသည်နှင့် တိုးတက်မှု အနည်းငယ်စီ အတွက်ပင် ကြီးမားသော အားထုတ်မှုနှင့် အခက်အခဲများ လိုအပ်ပေသည်။ ထိုသို့ ဖြစ်သည့်တိုင်အောင် အားထုတ်မှု အားလုံး ပြီးနောက်တွင် အကျိုးအမြတ် ရရှိမည်ဟု အာမခံချက် မရှိပေ။

ခန္ဓာကိုယ် ကြံ့ခိုင်ခြင်း အဆင့်တွင်လည်း အတူတူပင် ဖြစ်ပြီး ဒွာရသန့်စင်ခြင်း အဆင့်တွင်မူ ပို၍ပင် ဆိုးရွားလှသည်။ စွမ်းအား တိုးတက်မှု နှုန်းထားက တဖြည်းဖြည်း နှေးကွေးလာမည် ဖြစ်ပြီး နောက်ဆုံးတွင် ရပ်တန့်သွားနိုင်ချေလည်း ရှိ၏။

ချန်ဖေး၏ အားကောင်းသော နားလည်သဘောပေါက်နိုင်စွမ်းကို ဖုန်းရှိုးဖူ ကြိုတင် မြင်တွေ့ခဲ့သော်လည်း ချန်ဖေး၏ အလားအလာအပေါ် သူ၏ သုံးသပ်ချက်က ချန်ဖေး၏ စွမ်းရည်များကို လျှော့တွက်ထားသလို ဖြစ်နေမည်ဟု သူမမျှော်လင့်ထားခဲ့ပေ။

ချန်ဖေးက မျက်နှာသေဖြင့် ရှေ့သို့ တစ်လှမ်း တိုးလာသည်။ ချန်ယွမ်ဓားက တစ်ဖန် မြင့်တက်လာပြီး ဓားသွားပေါ်ရှိ ဓားပုလဲစေ့ အလုံး ခြောက်ဆယ်၏ လည်ပတ်မှု အရှိန်က အဆက်မပြတ် မြင့်တက်လာ၏။ ကျုံးယွမ် ဓားသိုင်းနှင့် ဘီလူး ဝိညာဉ် ဓားသိုင်းတို့မှ ပေါင်းစပ် ဖန်တီးထားသော စွမ်းအားက ချန်ယွမ်ဓား၏ ဝိညာဉ်ရေးရာကို အဆက်မပြတ် တုန်ခါသွားစေသည်။

"ပွင့်စမ်း..."

တုံးရှိုးကျစ်က ဒေါသတကြီး ဟိန်းဟောက်လိုက်ရာ သူ၏ ခန္ဓာကိုယ် အတွင်းရှိ ကျင့်စဉ် လည်ပတ်မှု အရှိန်က တမုဟုတ်ချင်းပင် အမြင့်ဆုံးသို့ ထိုးတက်သွားပြီး စွမ်းအင် ပေါက်ကွဲမှု တစ်ခုကဲ့သို့ပင်... ချိတ်ပိတ်ထားသော နေရာက ပွင့်ဟသွားကာ တုံးရှိုးကျစ်၏ အသိဉာဏ်ကို ပိုမို မြင့်တက်လာစေသည်။ ကံကြမ္မာတံခါးကို ဖွင့်လှစ်လိုက်ခြင်းပင်။

ဤသည်မှာ အလွန်အမင်း လိုအပ်လာသည်မှလွဲ၍ တုံးရှိုးကျစ် လုံးဝ အသုံးမပြုမည့် သိုင်းကွက် တစ်ကွက် ဖြစ်သည်။ အဘယ်ကြောင့်ဆိုသော် သူ၏ ခန္ဓာကိုယ် အတွင်းရှိ မူလအစစွမ်းအင်များကို သိသိသာသာ ကုန်ဆုံးသွားစေမည် ဖြစ်သောကြောင့်ပင်။ ဤဆုံးရှုံးမှုက ငါးနှစ်တိုင်တိုင် ကြာမြင့်မည် ဖြစ်ပြီး ထိုအချိန်အတွင်း ကျင့်ကြံခြင်းက ရွေ့လျားနိုင်မည် မဟုတ်ဘဲ အားနည်းနေမည် ဖြစ်ကာ တိုက်ခိုက်ရေး စွမ်းအားမှာလည်း ငါးနှစ်အတွင်း ၆၀ ရာခိုင်နှုန်းအောက်သို့ ကျဆင်းသွားမည် ဖြစ်သည်။ အကယ်၍ ခန္ဓာကိုယ်ကို သေချာစွာ မပြုစုမပျိုးထောင်ပါက ကျင့်ကြံခြင်းက နောက်ပြန်ပင် ဆုတ်သွားနိုင်၏။

သိုင်းပညာ အောင်မြင်မှုများကို ပိုမို မြင့်မားစွာ ရယူလိုသူ တစ်ယောက်အတွက် ငါးနှစ် ဆိုသည်မှာ ရက်စက်လှသော ကိန်းဂဏန်း တစ်ခု ဖြစ်ပြီး တုံးရှိုးကျစ်မှာ ယခုအခါ ဒွာရသန့်စင်ခြင်း အစောပိုင်းအဆင့်၏ အထွတ်အထိပ်တွင် ရှိနေကာ ဒွာရသန့်စင်ခြင်း အလယ်အလတ်အဆင့်သို့ တက်လှမ်းရန် အသင့်ဖြစ်နေပြီ ဖြစ်သည်။

ဤအရေးကြီးသော အချက်ကို ဖွင့်လှစ်လိုက်သည်နှင့် ငါးနှစ်တိုင်တိုင် တိုးတက်မှု မရရှိနိုင်တော့ဘဲ သူ၏ အကောင်းဆုံး အဆင့်တက်နိုင်မည့် အချိန်ကာလကို ဆုံးရှုံးသွားမည်ဟု ဆိုလိုခြင်း ဖြစ်သည်။ ထိုအချိန် ကျော်လွန်သွားပြီးနောက် သူ ထပ်မံ အဆင့်တက်နိုင်မည်လား ဆိုသည်မှာ ပြောရခက်၏။

သို့သော် ချန်ဖေးနှင့် ရင်ဆိုင်ရချိန်တွင် တုံးရှိုးကျစ်၌ အခြား ရွေးချယ်စရာ မရှိတော့ပေ။ အကယ်၍ သူသာ ကံကြမ္မာတံခါးကို မဖွင့်လှစ်ပါက သေချာပေါက် သေဆုံးရလိမ့်မည်။ တုံးရှိုးကျစ်က ဤအချက်ကို ယခုအခိုက်အတန့်တွင် အလွန် ရှင်းလင်းစွာ နားလည်ထားသည်။

ချန်ဖေးနောက်သို့ လိုက်ဖမ်းစဉ်က သူ ခံစားခဲ့ရသော ပီတိများမှာ လုံးဝ ပျောက်ကွယ်သွားပြီ ဖြစ်သည်။ ယခုအခါ တုံးရှိုးကျစ်၏ တစ်ခုတည်းသော အတွေးမှာ ချန်ဖေး၏ လက်မှ လွတ်မြောက်ရန်သာ ဖြစ်၏။ ဤတိုက်ခိုက်မှုကို ခံနိုင်ရည်ရှိရန်နှင့် ထို့နောက် ဝိညာဉ်လက်နက် မပါဘဲ ကိုယ်ဖော့ပညာကို အသုံးပြုရန် ဖြစ်သည်။

တုံးရှိုးကျစ်က သူ့တွင် မျှော်လင့်ချက် ရှိသေးသည်ဟု ယုံကြည်နေဆဲ ဖြစ်ပြီး ဓားချက် တစ်ချက်ကိုသာ ထပ်မံ တောင့်ခံထားရန် လိုအပ်ပေသည်။

တုံးရှိုးကျစ်၏ ချီစွမ်းအင်များ တစ်ဖန် မြင့်တက်လာခြင်းကို ခံစားမိသောအခါ ချန်ဖေး အနည်းငယ် အံ့အားသင့်သွားသော်လည်း ဒွာရသန့်စင်ခြင်း အဆင့် တစ်ယောက်အနေဖြင့် အသက်ကယ် နည်းစနစ်အချို့ ရှိနေခြင်းက လုံးဝ ပုံမှန်သာ ဖြစ်ပေသည်။ တုံးရှိုးကျစ်က အခြားသူများနှင့် ဆိုလျှင် အခွင့်အရေး ရှိကောင်း ရှိနိုင်သော်လည်း ချန်ဖေးနှင့် ဆိုလျှင်တော့ မဖြစ်နိုင်ပေ။

"ရွှစ်..."

ချန်ယွမ်ဓားပေါ်ရှိ ဓားပုလဲစေ့ အလုံး ခြောက်ဆယ် ရုတ်တရက် ကွဲကွာသွားပြီး ဓားကို ကြိုးမျှင်အဖြစ် သန့်စင်သွားစေသည်။ လက်ရှိဓားမှ မရေမတွက်နိုင်သော ဓားကြိုးမျှင်များ ထွက်ပေါ်လာပြီး သိပ်သည်းလှသော ဓားကြိုးမျှင်များက ဓားကို အလွှာလိုက် ရစ်ပတ်ထားသဖြင့် ဓားကြိုးမျှင်များကို မမြင်နိုင်တော့ချေ။

ချန်ယွမ်ဓား ပတ်ဝန်းကျင်ရှိ လေထု၏ ပြင်းထန်သော တုန်ခါမှုကိုသာ ခံစားရနိုင်သည်။

အသိစိတ်ပင်လယ် အတွင်း၌ ဝိညာဉ်စွမ်းအားများက နဂါးဆင်အဖြစ် ပေါ်ထွက်လာပြီး ချန်ဖေး၏ ခန္ဓာကိုယ်ကို လွှမ်းမိုးထားသည့် ထူးခြားသော ကြိမ်နှုန်းတစ်ခုကို သယ်ဆောင်လာသည်။ သူ၏ သွေးများက ပြဒါးရည်ကဲ့သို့ လေးလံ နေ၏။

ချန်ဖေး၏ ခန္ဓာကိုယ်က အနည်းငယ် တုန်ခါသွားသည်။ သူ၏ ခန္ဓာကိုယ်က အရင်အတိုင်းပင် ဖြစ်သော်လည်း တစ်ချက်ကြည့်လိုက်ရုံဖြင့် ချန်ဖေးက ကောင်းကင်ယံမှ ဧရာမ ဘီလူးကြီး တစ်ကောင်အဖြစ် ပြောင်းလဲသွားသကဲ့သို့ ရှိနေသည်။

"ဘုန်း..."

ချန်ယွမ်ဓားက တုံးရှိုးကျစ်၏ ဝိညာဉ်ဓားကို ရိုက်ခတ်သွားရာ တုံးရှိုးကျစ်၏ လက်မောင်းကို ပြင်းထန်စွာ တုန်ခါသွားစေသည်။ ထို့နောက် ချန်ယွမ်ဓားက တုံးရှိုးကျစ်၏ ဝိညာဉ်ဓားကို ဖိချ၍ တုံးရှိုးကျစ်၏ ရင်ဘတ်ထဲသို့ ဝင်ဆောင့်သွား၏။ အရေပြား၊ အသားနှင့် အရိုးများ တစ်ခုပြီးတစ်ခု ကျိုးကြေပျက်စီးသွားပြီး လုံးဝ တားဆီး၍မရတော့ချေ။

တုံးရှိုးကျစ်၏ မျက်လုံးများထဲတွင် မျှော်လင့်ချက်မဲ့မှုများ ပြည့်နှက်သွားသည်။ အကယ်၍ သူသာ နောက်ထပ် ဓားချက်တစ်ချက်ကို ကာကွယ်နိုင်ခဲ့မည် ဆိုပါက လွတ်မြောက်ရန် အခွင့်အရေး ရှိနိုင်သော်လည်း သူက ရိုးရှင်းစွာပင် မခံနိုင်ခဲ့ပေ။

"ဘုန်း..."

ချန်ယွမ်ဓားက တုံးရှိုးကျစ်ကို ဖြတ်၍ မြေပြင်ပေါ်သို့ ရိုက်ချလိုက်ရာ မြေကြီးကို ပြင်းထန်စွာ တုန်ခါသွားစေပြီး ရှေ့သို့ ဆက်လက် ဆန့်ထွက်နေသော ဧရာမ တွင်းချိုင့်ကြီး တစ်ခု အက်ကွဲသွားစေသည်။ သွေးမြူခိုးများ လေထဲတွင် ပြန့်လွင့်နေပြီး ချန်ဖေး၏ ဆံပင်များ လေထဲတွင် လွင့်ဝဲနေ၏။ သူ ရှေ့သို့ ကြည့်လိုက်သောအခါ အဝေးတွင် ပုံရိပ်တစ်ခု ပေါ်လာသည်။ ထိုပုံရိပ်မှာ သူ၏ နောက်သို့ လိုက်လာခဲ့သော နင်းယုံးဖေးပင် ဖြစ်သည်။

အခန်း (၃၀၇) အပြစ်ကို အရှေ့ဘက်သို့ လွှဲချခြင်း

ဝေယန်ထောင်း၏ မျက်လုံးများက ပြူးကျယ်နေရုံသာမက ပြုတ်ထွက်မတတ် ဖြစ်နေ၏။

ကျင့်ကြံမှု အဆင့်အရ တုံးရှိုးကျစ်နှင့် ဆင်တူသော နတ်တိမ်ဓားဂိုဏ်းမှ ကျူးဇီရှန်မှာလည်း အလယ်အလတ်အဆင့် ဝိညာဉ်လက်နက်ကို ပိုင်ဆိုင်ထားပြီး သူ၏ ကျင့်စဉ်များက တုံးရှိုးကျစ်ထက် သာလွန်ပေသည်။ သို့သော် သူက ဝူယုံးကျောက်၏ အပြတ်အသတ် အနိုင်ယူခြင်းကို ခံလိုက်ရဆဲ ဖြစ်သည်။

ချန်ဖေးက တုံးရှိုးကျစ်ကို ဓားနှစ်ချက်တည်းဖြင့် သတ်ဖြတ်ခဲ့သည်။

သူ၏ စွမ်းအားက ဝူယုံးကျောက်နှင့် အကြမ်းဖျင်း တန်းတူလောက် ဖြစ်နေပြီး အနည်းငယ်လောက်သာ နိမ့်ကျပေလိမ့်မည်။

ဤဝူယုံးကျောက်၏ ကျင့်ကြံမှုက ဒွာရသန့်စင်ခြင်း အလယ်အလတ်အဆင့်သို့ တက်လှမ်းရန် ခြေတစ်လှမ်းသာ လိုတော့ကြောင်း သိထားရမည် ဖြစ်ပြီး ထို့အပြင် သူက အဆင့်မြင့် ဝိညာဉ်လက်နက်ကိုပါ ကိုင်ဆောင်ထားသေး၏။

သာမန် ဒွာရသန့်စင်ခြင်း အစောပိုင်းအဆင့် တစ်ယောက်ပင် ဝူယုံးကျောက်နှင့် ရင်ဆိုင်ရလျှင် သိုင်းကွက် အနည်းငယ်ထက် ပို၍ တောင့်ခံနိုင်မည် မဟုတ်ပေ။

ယခုအခိုက်အတန့်တွင် ချန်ဖေးက ဤမျှ အံ့မခန်း တိုက်ခိုက်ရေး စွမ်းအားမျိုးကို ထုတ်ဖော်ပြသခဲ့သည်။ အဆင့်တက်လှမ်းခဲ့သည်မှာ နှစ်နှစ်ခန့်သာ ရှိသေးသော်လည်း ချန်ဖေး၏ နှစ်နှစ်တာ ကာလက အနှစ်နှစ်ဆယ်ခန့် ကုန်လွန်သွားသကဲ့သို့ ခံစားရစေသည်။

"ကျွန်တော့်ကို ခဏ စောင့်နေကြ..."

ချန်ဖေးက လျင်မြန်စွာ ရွေ့လျား၍ နင်းယုံးဖေးထံသို့ ပြေးသွားလိုက်၏။ ယခု တုံးရှိုးကျစ် သေဆုံးသွားပြီ ဖြစ်ရာ နင်းယုံးဖေးကိုလည်း လွှတ်ပေးထား၍ မရတော့ပေ။ ဤနည်းဖြင့်သာ အပြစ်များကို နတ်တိမ်ဓားဂိုဏ်းထံသို့ လွှဲချနိုင်မည် ဖြစ်သည်။

ဖုန်းရှိုးဖူက ထွက်သွားသော ချန်ဖေး၏ ပုံရိပ်ကို ကြည့်ရင်း သတိထားရန် လှမ်းပြောတော့မည် ပြင်လိုက်သည်။ သို့သော်လည်း အစောက ချန်ဖေး၏ တိုက်ခိုက်ရေး စွမ်းရည်နှင့် နင်းယုံးဖေးမှာ တုံးရှိုးကျစ်ထက် များစွာ စွမ်းရည်နိမ့်ကျနေသည်ကို ထည့်တွက်လိုက်သောအခါ ချန်ဖေး အနေဖြင့် ကြောက်ရွံ့စရာ ဘာမှမရှိတော့ချေ။ သတိထားသင့်သော တစ်ဦးတည်းသော သူမှာ နင်းယုံးဖေးသာ ဖြစ်သည်။

နင်းယုံးဖေးက ကျောက်တုံးတစ်တုံးပေါ်သို့ နင်းတက်လိုက်ရာ သူ၏ ပုံရိပ်က ကျော့ရှင်းစွာ လျှောတိုက်သွား၏။

ရုတ်တရက် အတွေးတစ်ခု ဝင်လာသဖြင့် သူ ရှေ့သို့ မော့ကြည့်လိုက်ရာ အလွန် မြန်ဆန်သော အရှိန်ဖြင့် သူ့ထံသို့ ပြေးဝင်လာသည့် ပုံရိပ်တစ်ခုကို အချိန်ကိုက် မြင်လိုက်ရသည်။

နင်းယုံးဖေး မျက်မှောင်ကြုတ်သွားပြီး အနီးကပ် သေချာကြည့်လိုက်သောအခါ ယွမ်ချန်ဓားဂိုဏ်းမှ ချန်ဖေး ဖြစ်နေကြောင်း သိလိုက်ရ၏။

တုံးရှိုးကျစ်က ချန်ဖေးနှင့် အခြားလူနှစ်ယောက်ကို လိုက်ဖမ်းနေသည်မှာ ရှင်းလင်းနေပါလျက် ချန်ဖေးက အဘယ်ကြောင့် သူ့ထံသို့ တစ်ယောက်တည်း ပြေးဝင်လာရသနည်း။ တုံးရှိုးကျစ် တစ်ခုခု ဖြစ်သွားတာလား။ ဂိုဏ်းမှ အခြားကျောင်းသားများ အနီးအနားမှာ ရှိနေသလား။ အစောက ငါ ခံစားမိတဲ့ စွမ်းအင် အတက်အကျတွေက... သူတို့ တိုက်ခိုက်နေကြတာလား…

အကယ်၍ အခြား ဂိုဏ်းများ သို့မဟုတ် နတ်တိမ်ဓားဂိုဏ်းမှ လူများ ပေါ်လာမည် ဆိုပါက ကိစ္စများ ရှုပ်ထွေးသွားလိမ့်မည်ကို နားလည်လိုက်သဖြင့် နင်းယုံးဖေး ခေတ္တ ရပ်တန့်သွားသည်။ သူ့ထံသို့ ချန်ဖေး ပြေးဝင်လာခြင်းက အခြားဂိုဏ်းများ ဝိုင်းဝန်း တိုက်ခိုက်ချိန်တွင် သူ့ကို အချိန်ဆွဲထားရန် ကြိုးစားခြင်း ဖြစ်နိုင်ပေသည်။

ဤအချက်ကို နားလည်သွားသောအခါ နင်းယုံးဖေးက ရုတ်တရက် ရပ်တန့်လိုက်ပြီး သူ၏ ညာဘက်ခြေထောက်ဖြင့် မြေကြီးကို ပုတ်၍ ရှေ့သို့ ဆက်မသွားတော့ဘဲ သူ လာရာလမ်းအတိုင်း နောက်သို့ ပြန်လည် ဆုတ်ခွာ ပြေးလွှားသွားသည်။ နတ်တိမ်ဓားဂိုဏ်း၏ နောက်ဆက်တွဲ လက်တုံ့ပြန်မှုကို ပြင်ဆင်နိုင်ရန် အခြေအနေကို ဝူယုံးကျောက်ထံ သူ အကြောင်းကြားရန် လိုအပ်ပေသည်။

တုံးရှိုးကျစ်နှင့် ပတ်သက်၍မူ လျောင်ဟန်ချင် ကိုယ်တိုင် ရောက်မလာသရွေ့ တုံးရှိုးကျစ်က သူ၏ အသက်ကို သေချာပေါက် ကယ်တင်နိုင်မည်ဟု နင်းယုံးဖေး ယုံကြည်ထားသဖြင့် သူ စိတ်ပူစရာ ဘာမှမရှိပေ။

နင်းယုံးဖေး မိုင်ဝက်ခန့်ပင် မပြေးရသေးမီ သူ၏ မျက်နှာက ဖြူရော်သွား၏။ ချန်ဖေးက မီလာပြီ ဖြစ်သည်။ လွန်ခဲ့သော အခိုက်အတန့်လေးကမှ သူတို့နှစ်ယောက်မှာ အတော်လေး ကွာဝေးနေခဲ့ခြင်း ဖြစ်၏။

ဖုန်းရှိုးဖူနှင့် ဝေယန်ထောင်းတို့၏ ဝန်ထုပ်ဝန်ပိုး မရှိတော့သဖြင့် ချန်ဖေး၏ ကိုယ်ဖော့ပညာ အမြန်နှုန်းက နင်းယုံးဖေးကို အမှန်တကယ်ပင် အံ့အားသင့်သွားစေသည်။ ဤကိုယ်ဖော့ပညာ ပါရမီမှာ ရိုးရှင်းစွာပင် မယုံနိုင်စရာ ကောင်းလှ၏။ အချိန် အနည်းငယ် အတွင်းမှာပင် ချန်ဖေး၏ အသက်ရှူသံက သူ၏ နောက်သို့ ရောက်ရှိနေပြီ ဖြစ်သည်။

နင်းယုံးဖေး၏ ခန္ဓာကိုယ် တစ်ခုလုံး ယွမ်ချီစွမ်းအင်များဖြင့် ပြည့်လျှံသွားပြီး တန်ပြန် တိုက်ခိုက်မှု တစ်ခုကဲ့သို့ပင် သူ လှည့်ပတ်၍ သူ၏ ဓားရှည်ကို ထိုးသွင်းလိုက်သည်။ ယွမ်ချီစွမ်းအင်များကို အမှတ်တစ်နေရာတည်းသို့ တိုက်ရိုက် ထုတ်လွှတ်လိုက်သော အလွန်တရာ အံ့မခန်းဖြစ်သည့် ဓားသိုင်းပညာ တစ်ခုပင်။

"ထွက်သွားစမ်း..."

ဟိန်းဟောက်သံ တစ်ခုနှင့်အတူ နင်းယုံးဖေးက ချန်ဖေး၏ စိတ်ကို ဦးတည်၍ ပြင်းထန်သော ဓားဆန္ဒ တစ်ခုကို ထုတ်လွှတ်လိုက်သည်။ သူ့ကို အချိန်ဆွဲထားရန် ကြိုးစားခြင်းနှင့် အခြားသူများ ဝိုင်းဝန်း သတ်ဖြတ်မည်ကို စောင့်ဆိုင်းခြင်းက ပေးဆပ်မှု တစ်ခု ရှိလာမည် ဆိုသည်ကို ချန်ဖေး နားလည်စေရန် ဖြစ်၏။

ချန်ဖေးက မတုန်မလှုပ် ရှိနေဆဲ ဖြစ်ပြီး နင်းယုံးဖေး၏ ဓားဆန္ဒ တိုက်ခိုက်မှုက သူ့အပေါ် မည်သည့် သက်ရောက်မှုမျှ မရှိခဲ့ပေ။ ချန်ယွမ်ဓား ပတ်လည်တွင် အနက်ရောင် အလင်းတန်းများ စီးဆင်းသွားပြီး ဓားပုလဲစေ့ အလုံး ခြောက်ဆယ်က တစ်ခုနှင့်တစ်ခု ပဲ့တင်ထပ်နေကြ၏။ နဂါးဆင်၏ ဟိန်းဟောက်သံနှင့်အတူ ချန်ဖေးက သူ၏ ဓားဖြင့် ခုတ်ပိုင်းချလိုက်သည်။ နင်းယုံးဖေး၏ အမူအရာက တစ်ခဏချင်းပင် ပြင်းထန်စွာ ပြောင်းလဲသွားပြီး သူ နောက်ဆုတ်လိုက်သော်လည်း နောက်ကျသွားပြီ ဖြစ်သည်။

"ဘုန်း..."

ပေါက်ကွဲသံများက ပတ်ဝန်းကျင် တစ်ခွင်လုံး ပဲ့တင်ထပ်သွားပြီး ပြင်းထန်သော သွေးနံ့များဖြင့် ပြည့်နှက်သွား၏။

မိုင်ဝက်ကျော် အကွာတွင် ဝေယန်ထောင်းမှာ ဗယောက်ဗယက် အခြေအနေ ဖြစ်နေပြီး ငြိမ်သက်မသွားနိုင်သေးပေ။

အခြားတစ်ဖက်တွင်မူ ဖုန်းရှိုးဖူက မြေပြင်ပေါ်၌ တင်ပျဉ်ခွေ ထိုင်နေပြီ ဖြစ်ပြီး သူ၏ ခန္ဓာကိုယ် အတွင်းရှိ ဒဏ်ရာများကို ပြုပြင်ရန် ဆေးလုံးများ သောက်သုံးနေ၏။

အဝေးမှ လာသော တိုးညှင်းသည့် အသံတစ်သံကို ကြားလိုက်ရသဖြင့် ဝေယန်ထောင်းက ရှေ့သို့ မျက်လုံးပြူး၍ ကြည့်လိုက်သော်လည်း အမှောင်ထုထဲတွင် ဤမျှ ဝေးကွာသော အကွာအဝေး၌ သူ ဘာကိုမျှ မမြင်နိုင်ခဲ့ပေ။

"မင်းရဲ့ တပည့်က သူ့ကိုယ်သူ ဘယ်လိုများ ကျင့်ကြံထားတာလဲ..." ဝေယန်ထောင်းက နောက်ဆုံးတွင် မထိန်းနိုင်တော့ဘဲ ဖုန်းရှိုးဖူ၏ မျက်နှာချင်းဆိုင်တွင် ဝင်ထိုင်၍ တိုးညှင်းသော အသံဖြင့် မေးလိုက်သည်။

ဖုန်းရှိုးဖူ အံ့အားသင့်သွားသော်လည်း သူက အချို့အရာများကို ရှင်းလင်းစွာ ကြိုတင် မျှော်လင့်ထားပြီး ဖြစ်သည်။ ချန်ဖေး၏ စွမ်းအားကြောင့် လုံးဝ မိန်းမောသွားပြီး ဘာပြောရမှန်း မသိဖြစ်နေသော သူနှင့် မတူပေ။

"ပါရမီကောင်းတော့လည်း ကျင့်ကြံရတာ ပိုလွယ်တာပေါ့..."

ဖုန်းရှိုးဖူ မျက်လုံးဖွင့်၍ ဝေယန်ထောင်းကို ကြည့်ကာ ပြုံးလိုက်မိသည်။ သူ ဂုဏ်ယူမိ၏။ ချန်ဖေး၏ စွမ်းအားက မည်မျှပင် ပြောင်းလဲသွားပါစေ၊ အမြဲတမ်း တည်မြဲနေမည့် အရာတစ်ခု ရှိသည်။ ထိုအရာမှာ ချန်ဖေးက သူ၏ တပည့် ဆိုသည့်အချက်ဖြစ်သည်။

အစပိုင်းတွင် ချန်ဖေးက ဒွာရသန့်စင်ခြင်း အဆင့်သို့ တက်လှမ်းစဉ်က လူအများ၏ အားကျစရာ ဖြစ်ခဲ့ပြီး ဖြစ်သည်။

သူသည် ကျင့်စဉ် နှစ်ခုကို တစ်ပြိုင်နက်တည်း ကျွမ်းကျင်အောင် လုပ်ဆောင်နိုင်စေသော စွမ်းရည်ရှိသူ ဖြစ်၏။ ထိုအချိန်က မြင်တွေ့ခဲ့ရသူတိုင်း သေချာပေါက် မနာလို ဖြစ်ခဲ့ကြသည်။

ယခု နှစ်နှစ် အကြာတွင် ချန်ဖေးက သူ၏ ဆရာကို ကျော်လွန်သွားပြီ ဖြစ်ပြီး ဖုန်းရှိုးဖူ သည် ချန်ဖေး၏ ဆရာ တစ်ယောက်အနေနှင့် ပို၍ပင် ဂုဏ်ယူ ဝမ်းမြောက်မိရုံသာ တတ်နိုင်တော့သည်။

ဖုန်းရှိုးဖူ၏ စကားကို ကြားသောအခါ ဝေယန်ထောင်းက မျက်လုံးလှန်ပြလိုက်သည်။

ဤအဖြေက အဖြေမပေးသည်နှင့် အတူတူပင် ဖြစ်၏။ ဝေယန်ထောင်း အနေဖြင့် ပါရမီရှင်များက မြန်မြန် ကျင့်ကြံနိုင်သည်ကို သေချာပေါက် သိထားသော်လည်း ဤကျင့်ကြံမှု အရှိန်ကတော့ နည်းနည်း မြန်လွန်းနေပေသည်။

ချန်ဟုန်ဂိုဏ်း၏ တံခါးပေါက်တွင် ချန်ဖေးနှင့် ရှန်းထူချန်တို့ ယှဉ်ပြိုင်စဉ်က ဝေယန်ထောင်းလည်း ရှိနေခဲ့သည်။

ထိုအချိန်က ချန်ဖေး၏ ပါရမီက အမှန်တကယ်ပင် ထူးကဲလှပြီး ရှန်းထူချန်ထက်ပင် သာလွန်နေသည်ဟု သူ တွေးခဲ့၏။ ယခု ပြန်တွေးကြည့်သောအခါ ချန်ဖေးက ရှင်းလင်းစွာပင် အင်အားလျှော့ထားခဲ့ခြင်း ဖြစ်သည်။ အကယ်၍ ချန်ဖေးသာ အမှန်တကယ် အလေးအနက်ထားခဲ့မည် ဆိုပါက ဓားတစ်ချက်တည်းနှင့်ပင် ရှန်းထူချန်ကို အနိုင်ယူနိုင်လောက်ပေသည်။

"ချန်ဖေး ပြန်လာပြီ..."

ဝေယန်ထောင်း ထပ်မေးချင်သေးသော်လည်း ဖုန်းရှိုးဖူက ရုတ်တရက် ပြောလိုက်သည်။ ဝေယန်ထောင်း ခေါင်းလှည့်ကြည့်လိုက်ရာ အလွန် မြန်ဆန်သော အရှိန်ဖြင့် ပြန်လာနေသည့် ပုံရိပ်တစ်ခုကို မြင်လိုက်ရ၏။ ချန်ဖေးပင် ဖြစ်သည်။

"သူ့ကို သတ်လိုက်ပြီလား..." ချန်ဖေး၏ ကိုယ်ပေါ်မှ သွေးနံ့အနည်းငယ်ကို အာရုံခံမိသဖြင့် ဝေယန်ထောင်းက မေးလိုက်သည်။

"သတ်လိုက်ပြီ..."

ချန်ဖေး ခေါင်းညိတ်လိုက်၏။ သူက ရန်သူကို သတ်ရုံသာမက ပစ္စည်းအချို့ကိုလည်း ယူဆောင်လာခဲ့သည်။ များများစားစားတော့ မဟုတ်ပေ။ ဝိညာဉ်ကျောက်တုံး အချို့၊ ဆေးပုလင်း အနည်းငယ်နှင့် နင်းယုံးဖေး လက်ထဲမှ ဝိညာဉ်ဓားတို့ ဖြစ်သည်။

"ကောင်းတယ်... သိပ်ကောင်းတယ်..." ဝေယန်ထောင်းက ပြုံးဖြီးဖြီး မလုပ်ဘဲ မနေနိုင်တော့ချေ။

ချန်ဖေးသည် တုံးရှိုးကျစ်၏ အလောင်းကို အကဲခတ်ကာ ရှာဖွေလိုက်သည့်အချိန်ကို ပြန်စဉ်းစားလိုက်သည်။ သူက ဝိညာဉ်ကျောက်တုံးများနှင့် ဆေးလုံးများကိုသာ တွေ့ရှိခဲ့ပြီး အရေအတွက် သိပ်မများလှပေ။

အမှန်တကယ် တန်ဖိုးရှိသော အရာများမှာ တုံးရှိုးကျစ်၏ ရင်ခွင်ထဲမှ ပုတီးစေ့ပုံစံ ဝိညာဉ်လက်နက် တစ်ခုနှင့် အလယ်အလတ်အဆင့် ဝိညာဉ်ဓား တစ်လက် ဖြစ်သည်။

ဤအလယ်အလတ်အဆင့် ဝိညာဉ်ဓားက တုံးရှိုးကျစ်၏ လုပ်ရပ်များကြောင့် ဝိညာဉ်ရေးရာ စွမ်းအင် အများအပြားကို ဆုံးရှုံးသွားခဲ့ရသော်လည်း အချိန်တိုလွန်းသည့် အတွက် ဓားက လောလောဆယ်တွင် အလယ်အလတ်အဆင့် ဝိညာဉ်လက်နက် အမျိုးအစားတွင် ရှိနေဆဲ ဖြစ်သည်။

ဤဝိညာဉ်ဓား တစ်လက်တည်းကပင် အကယ်၍ ရောင်းချမည် ဆိုပါက ဝိညာဉ်ကျောက်တုံး အမြောက်အမြား ရရှိပေလိမ့်မည်။ သို့သော်လည်း နတ်တိမ်မြို့ရှိ မည်သူမျှ ရှန်းယန်ဂိုဏ်း၏ ဝိညာဉ်လက်နက်ကို ရောင်းချဝံ့မည် မဟုတ်ဘဲ ပြဿနာများကို ဖိတ်ခေါ်သလို သေချာပေါက် ဖြစ်လာမည်ဟု ခန့်မှန်းရ၏။

"ကျွန်တော် ပစ္စည်းတွေကို တစ်နေရာရာမှာ ဝှက်ထားလိုက်ဦးမယ်... ကျွန်တော့်ကို စောင့်နေကြ..."

ချန်ဖေးက နေရာမှ မပျောက်ကွယ်မီ ဖုန်းရှိုးဖူနှင့် ဝေယန်ထောင်းတို့ကို လှမ်းကြည့်လိုက်သည်။ မိုင်ဝက်ကျော် ပြေးလွှားပြီးနောက် ချန်ဖေးက သစ်တောအုပ် တစ်ခုကို တွေ့လိုက်ရပြီး အတွင်းသို့ ဝင်ရောက် ပျောက်ကွယ်သွား၏။

သူ၏ တိုက်ပွဲဝင် ပစ္စည်းများ အားလုံးကို နေရာလွတ် အကွက်ထဲသို့ ပစ်ထည့်ခဲ့ပြီး ခဏအကြာတွင် ချန်ဖေး ပြန်ထွက်လာခဲ့သည်။

နင်းယုံးဖေး၏ အဆင့်နိမ့် ဝိညာဉ်ဓားရော တုံးရှိုးကျစ်၏ အလယ်အလတ်အဆင့် ဝိညာဉ်ဓားကိုပါ ရောင်းချရန် ချန်ဖေး ရည်ရွယ်မထားပေ။

ဤလူနှစ်ယောက် သေဆုံးမှုက ချန်ဖေးနှင့် ယွမ်ချန်ဓားဂိုဏ်းကို မပါဝင်ပတ်သက်စေရပေ၊ သို့မဟုတ်ပါက ယွမ်ချန်ဓားဂိုဏ်း အနေဖြင့် ရှန်းယန်ဂိုဏ်း၏ ဒေါသကို ခံနိုင်ရည်ရှိမည် မဟုတ်ချေ။

"ဤလူနှစ်ယောက် သေဆုံးမှုကို နတ်တိမ်ဓားဂိုဏ်း အပေါ်ကို ပုံချရမယ်..." ချန်ဖေးက သူတို့အနားသို့ ပြန်လည် ပေါ်လာပြီး ဖုန်းရှိုးဖူက ချန်ဖေးကို တည်ကြည်လေးနက်စွာ ကြည့်လိုက်၏။

"လျောင်ဟန်ချင်ရဲ့ ခေါင်းပေါ်ကို ပုံချလိုက်... ရှန်းယန်ဂိုဏ်းက လူတွေက မင်း တုံးရှိုးကျစ်တို့ကို သတ်လိုက်တယ် ဆိုတာကို ယုံမှာ မဟုတ်ဘူး..." ဝေယန်ထောင်းက ဆက်ပြောလိုက်သည်။ ချန်ဖေး ခေါင်းညိတ်လိုက်၏။

တုံးရှိုးကျစ်နှင့် နင်းယုံးဖေးတို့ နှစ်ယောက်စလုံး သေဆုံးသွားပြီ ဖြစ်ရာ အချက်အလက်များကို အတည်ပြုရန် နည်းလမ်း မရှိတော့ပေ။ ထို့အပြင် အဆင့်တက်လှမ်းခဲ့သည်မှာ နှစ်နှစ်သာ ရှိသေးသည့် ချန်ဖေးက လူနှစ်ယောက်ကို သတ်ဖြတ်နိုင်ခဲ့သည် ဆိုသည်ကို ပြင်ပလူများ အနေဖြင့် ယုံကြည်ရန် ခက်ခဲပေလိမ့်မည်။

ဤသည်မှာ "ကိုယ့်နှာခေါင်းအောက်က အရာကို မမြင်ခြင်း" ဆိုသောစကားပုံကဲ့သို့ ပုံသေ တွေးခေါ်မှု တစ်ခုလည်း ဖြစ်သည်။

"နေ့လယ်တုန်းက ကျွန်တော် လျောင်ဟန်ချင်နဲ့ ဆုံခဲ့တယ်... သူ ဒီနေရာကနေ သိပ်မဝေးဘူး... သူ့ကို ရှာကြည့်ကြတာပေါ့..."

ချန်ဖေးက နေ့လယ်က ဖြစ်ရပ်များကို အတိုချုပ် ပြန်လည် ပြောပြလိုက်ရာ သူတို့ သုံးယောက်က သဘောတူညီချက် တစ်ခုကို လျင်မြန်စွာ ရရှိသွားကြသည်။

နတ်တိမ်ဓားဂိုဏ်းနှင့် ရှန်းယန်ဂိုဏ်းကြားရှိ သတင်းအချက်အလက် ကွာဟမှုကို အသုံးချ၍ တုံးရှိုးကျစ်ကို နတ်တိမ်ဓားဂိုဏ်းမှ လူများက သတ်ဖြတ်ခဲ့သည်ဟု ရှန်းယန်ဂိုဏ်းသားများ အထင်မှားစေရန် ပြုလုပ်ရန် ဖြစ်သည်။

ဝူယုံးကျောက်က လျောင်ဟန်ချင်နှင့် လုံးဝ မျက်နှာချင်းဆိုင်မည် မဟုတ်ပေ။

သူတို့ကြားတွင် ယုံကြည်မှု မရှိဘဲ သူ ပြောသမျှကို လိမ်ညာမှု တစ်ခုအဖြစ်သာ မှတ်ယူကြပေလိမ့်မည်။ ထို့အပြင် အကယ်၍ သူတို့သာ ဆုံတွေ့ခဲ့မည် ဆိုပါက တိုက်ပွဲ မစတင်မီ စကားတစ်ခွန်းမျှပင် အပြန်အလှန် ပြောဖြစ်ကြမည် မဟုတ်ချေ။

ချန်ဖေးက ဖြစ်ရပ်မှန် ခြေရာလက်ရာ အားလုံးကို ဖျက်ဆီးလိုက်ပြီး ဖုန်းရှိုးဖူ၊ ဝေယန်ထောင်းတို့နှင့် အတူ နေ့လယ်က လျောင်ဟန်ချင်နှင့် ဆုံတွေ့ခဲ့ရာ နေရာသို့ ပြေးလွှားသွားကြ၏။

လ္ဘက်ရည် တစ်ခွက်စာ သောက်ချိန်ထက် နည်းသော အချိန်အတွင်း ချန်ဖေးက နေ့လယ်က ဓားဆန္ဒကို ခံစားမိခဲ့သည့် နေရာသို့ ရောက်ရှိသွားသော်လည်း မည်သူ့ကိုမျှ မတွေ့ရချေ။ သူတို့ သုံးယောက် တိုင်ပင်ဆွေးနွေးပြီးနောက် မျက်နှာစာ သုံးဘက်သို့ ခွဲ၍ ရှာဖွေကြသည်။

တစ်ခဏအကြာတွင် ချန်ဖေးက လေထဲ၌ တုန်ခါနေသော အေးစိမ့်သည့် အရှိန်အဝါ တစ်ခုကို အာရုံခံမိလိုက်၏။ လျောင်ဟန်ချင်က နေရာကို တိုက်ရိုက် ပြသနေပြီး အာရုံခံမိသူတိုင်း တက်တက်ကြွကြွ လာရောက် ရှာဖွေရန် ညွှန်ကြားနေခြင်း ဖြစ်သည်။ ချန်ဖေးက နောက်ပြန်လှည့်၍ ဖုန်းရှိုးဖူနှင့် ဝေယန်ထောင်းတို့ကို ရှာဖွေလိုက်သည်။ သူတို့ သုံးယောက် ပြန်လည် ပေါင်းစည်းပြီးနောက် လျောင်ဟန်ချင်ကို ရှာတွေ့သွား၏။

"လျှို့ဝှက်နယ်မြေထဲမှာ ရှန်းယန်ဂိုဏ်းက လူတစ်ယောက် ပေါ်လာတယ်ပေါ့..." လျောင်ဟန်ချင်က ရုတ်တရက် မတ်တတ်ရပ်လိုက်ရာ သူ၏ ခါးမှ ဝိညာဉ်ဓားက သူ၏ ခံစားချက်များနှင့်အတူ အဆက်မပြတ် တုန်ခါနေပြီး ဂူတစ်ခုလုံးကို အေးစိမ့်သော အရှိန်အဝါများဖြင့် ပြည့်နှက်သွားစေသည်။

ဂူအတွင်းရှိ အခြား နတ်တိမ်ဓားဂိုဏ်းမှ လူများကလည်း ချက်ချင်းပင် တည်ကြည်လေးနက်သွားကြ၏။

"ကျွန်တော်တို့ နှစ်ယောက်စလုံး ရှန်းယန်ဂိုဏ်းရဲ့ တိုက်ခိုက်မှုကြောင့် ဒဏ်ရာရခဲ့တယ်... ကံကောင်းလို့ ကျွန်တော်တို့ မြန်မြန် ပြေးနိုင်ခဲ့တာ... မဟုတ်ရင် အဲ့နေရာမှာ တစ်သက်လုံး ပိတ်မိနေမှာ..."

ဝေယန်ထောင်း သက်ပြင်းချလိုက်သည်။ ဤစကားများက လိမ်ညာမှု မဟုတ်ဘဲ အမှန်တရား ဖြစ်၏။ အကယ်၍ ချန်ဖေးသာ သူတို့ကို ဆွဲမခေါ်လာခဲ့ပါက သူတို့ ထိုနေရာတွင် ထာဝရ ရှိနေကြရပေလိမ့်မည်။

"ရှန်းယန်ဂိုဏ်းနဲ့ ဆုံခဲ့တုန်းက ဖြစ်ခဲ့သမျှ အားလုံးကို အသေးစိတ် ပြောပြပါ..." လျောင်ဟန်ချင်က ဖုန်းရှိုးဖူနှင့် ဝေယန်ထောင်းတို့၏ အသက်စွမ်းအင် လက္ခဏာများကို အာရုံခံကြည့်လိုက်ရာ သူတို့က အမှန်တကယ်ပင် ပြင်းထန်စွာ ဒဏ်ရာရထားကြ၏။

"ရှန်းယန်ဂိုဏ်းသားတွေက တခြားလူတွေကို ဝိုင်းရံတိုက်ခိုက်နေတုန်းပဲ ထင်တယ်... ကျွန်တော်တို့ သွားကြည့်ကြမလား..." ဖုန်းရှိုးဖူက တိုးညှင်းစွာ ပြောလိုက်သည်။

နေ့လယ်က သူ မဆုံတွေ့ခဲ့ရသေးသော ဂိုဏ်းတူ ညီအစ်ကိုများကို တွေးမိလိုက်သောအခါ လျောင်ဟန်ချင်၏ အမူအရာ ပြောင်းလဲသွား၏။ လျှို့ဝှက်နယ်မြေ အတွင်းသို့ ဝင်ရောက်လာပြီးနောက် ရှန်းယန်ဂိုဏ်း အသတ်ချင်ဆုံး သူမှာ မည်သူနည်းဟု မေးလာပါက သေချာပေါက် နတ်တိမ်ဓားဂိုဏ်းပင် ဖြစ်ပေလိမ့်မည်။

"လမ်းပြ..." လျောင်ဟန်ချင်က တိုးညှင်းစွာ ပြောလိုက်သည်။

မိုင်ပေါင်းများစွာ အကွာတွင် တုံးရှိုးကျစ်နှင့် နင်းယုံးဖေးတို့ ပြန်မလာခြင်းက တိုက်ခိုက်ရာနေရာကို ရှင်းလင်းနေသော ရှန်းယန်ဂိုဏ်းသား လေးယောက်ကို တစ်စုံတစ်ခု မှားယွင်းနေကြောင်း ချက်ချင်း သတိပေးလိုက်သကဲ့သို့ ဖြစ်သွား၏။

တုံးရှိုးကျစ် ထွက်သွားခဲ့သော လမ်းကြောင်းအတိုင်း သူတို့ လေးယောက် အပြင်ဘက်သို့ ရှာဖွေခဲ့ကြသော်လည်း အတန်ကြာ ရှာဖွေပြီးနောက် သူတို့၏ အရှိန်က ရုတ်တရက် နှေးကွေးသွားသည်။ မည်သို့ပင်ဖြစ်စေ မိုင် ၂၀ ကျော် ကွာဝေးသော အကွာအဝေး တစ်ခု ဖြစ်ပြီး ချန်ဖေးက လမ်းတစ်လျှောက် ဖြတ်လမ်းများစွာကို တမင်တကာ အသုံးပြုခဲ့ကာ မျဉ်းဖြောင့်အတိုင်း ပြေးခဲ့ခြင်း မဟုတ်ပေ။ အချိန် တော်တော်ကြာ ကုန်ဆုံးသွားပြီးနောက် နောက်ဆုံးတွင် သူတို့ လေးယောက်က တိုက်ပွဲဖြစ်ပွားခဲ့ရာ နေရာ နှစ်ခုကို တွေ့ရှိသွားကြ၏။

"တိုက်ပွဲက အချိန် အရမ်းတိုတောင်းတယ်... ပြီးတော့ ဝိုင်းဝန်း တိုက်ခိုက်တာလည်း မဟုတ်ဘူး..."

ဝူယုံးကျောက်က မြင်ကွင်းကို ကြည့်၍ မျက်မှောင်ကြုတ်လိုက်သည်။ လေထဲတွင် သွေးနံ့ သဲ့သဲ့လေး ကျန်ရစ်နေ၏။ ဝူယုံးကျောက်၏ မျက်လုံးများ အနည်းငယ် ကျဉ်းမြောင်းသွားသည်။ တုံးရှိုးကျစ်နှင့် အခြားတစ်ယောက် သေချာပေါက် သေဆုံးသွားလောက်ပြီ ဖြစ်သည်။

တုံးရှိုးကျစ်ကို ဤမျှ တိုတောင်းသော အချိန်အတွင်း သတ်ဖြတ်နိုင်သူကို စဉ်းစားလိုက်သောအခါ ဝူယုံးကျောက်၏ စိတ်ထဲတွင် ပထမဆုံး ပေါ်လာသူမှာ လျောင်ဟန်ချင်ပင် ဖြစ်သည်။

ရုတ်တရက် ဝူယုံးကျောက်က လူအများအပြား ရှိနေသည့် အရှေ့ဘက်သို့ ခေါင်းလှည့်ကြည့်လိုက်၏။ ဒွာရသန့်စင်ခြင်း အဆင့် အငွေ့အသက်တစ်ခု ပေါ်လာပြီး ဤဘက်သို့ တစ်ဟုန်ထိုး ပြေးလာနေသည်။