အခန်း (၇၁၈-၇၂၀)

အခန်း (၇၁၈) ဝိညာဉ်လမ်းစဉ်ဂိုဏ်း၏ တာ့ဝူဖုန်း။ ရန်သူများ ချဉ်းကပ်လာခြင်း။ (၁)

“ငါ မင်းကို ဘယ်သူ့ကိုမှ မသတ်ခိုင်းဘူး။ သူ့ကို အရှင်ဖမ်းလာခဲ့ဖို့ပဲ လိုတယ်” ဝတ်ရုံနက်နှင့် လူက ပြောလိုက်သည်။

“အရှင်ဖမ်းရမယ်။ သူက ဘယ်သူမို့လို့လဲခင်ဗျ။”

ပိုင်ယင်ခွမ်း အံ့ဩသွားသည်။ သူ၏ ရှေ့မှ ဝတ်ရုံနက်နှင့် လူမှာ အလွန် မြင့်မားသော အဆင့်အတန်းရှိသူ ဖြစ်ပြီး တစ်စုံတစ်ဦးကို ဖမ်းဆီးရန်အတွက် သူ့ထံသို့ ကိုယ်တိုင်လာရောက် ညွှန်ကြားသည်ဆိုပါက ထိုကိစ္စမှာ အလွန် အရေးကြီးနေ၍သာ ဖြစ်ပေလိမ့်မည်။

“သူ့နာမည်က တာ့ဝူဖုန်းတဲ့။ ဖန်ရှန့်ဝူက သူ့လက်ထဲမှာ ရှုံးနိမ့်သွားပြီး အခုတော့ ရှယန်မိသားစုရဲ့ ထိန်းသိမ်းမှုကို ခံနေရတယ်။ မင်း တာ့ဝူဖုန်းကို အရှင်ဖမ်းပြီး လက်ရှိ ရှယန်မိသားစုမှာ ဧည့်သည်အကြီးအကဲအဖြစ် ရှိနေတဲ့ ဖန်ရှန့်ဝူနဲ့ ပြန်လဲလှယ် စေချင်တယ်”

ဝတ်ရုံနက်နှင့် လူ၏ လေသံမှာ တည်ငြိမ်လွန်းသော်လည်း ပိုင်ယင်ခွမ်းကတော့ အနည်းငယ် တုန်လှုပ်သွားသည်။

“ဖန်ရှန့်ဝူ ရှုံးသွားတယ် ဟုတ်လားခင်ဗျ။ ရှယန်မိသားစု လက်ထဲ ရောက်သွားတာလား။”

ပိုင်ယင်ခွမ်း မျက်မှောင်ကြုတ်လိုက်သည်။ ဖန်ရှန့်ဝူမှာ သူတို့ 'အသက်ခြွေအဖွဲ့အစည်း' ၏ ဒုတိယအရှင်သခင် ဖြစ်ပြီး သူ၏ ပါရမီကြောင့် အလွန် ထူးခြားသော မိစ္ဆာသိုင်းပညာရှင် တစ်ဦး ဖြစ်သည်။ အရှင်သခင်ကိုယ်တိုင်က သူ့ကို တန်ဖိုးထားပြီး အသေအချာ ပြုစုပျိုးထောင်ပေးခဲ့ခြင်း ဖြစ်သည်။

သို့သော် ယခုအခါ ဖန်ရှန့်ဝူမှာ တာ့ဝူဖုန်း အမည်ရှိ သိုင်းပညာရှင်တစ်ဦးလက်တွင် ရှုံးနိမ့်သွားပြီး ရှယန်မိသားစု၏ အကျဉ်းသား ဖြစ်သွားခဲ့သည်။ ဝတ်ရုံနက်နှင့် လူက ပိုင်ယင်ခွမ်းကို တာ့ဝူဖုန်းအား အရှင်ဖမ်းခိုင်းခြင်းမှာ သူ့ကို ဓားစာခံအဖြစ် အသုံးပြုကာ ဟုန်းကျန်းရှန့်နှင့် ပြန်လည် လဲလှယ်ရန် ဖြစ်သည်။

အမှန်တကယ်တွင် ဖန်ရှန့်ဝူမှာ သေဆုံးသွားပြီဖြစ်ပြီး သူ၏ ဝိညာဉ်ကို ဟုန်းကျန်းရှန့်က ဝါးမြိုလိုက်ခြင်း ဖြစ်သော်လည်း အရှင်သခင်အတွက်မူ ထိုအချက်မှာ အရေးမကြီးပေ။ သူ အလိုရှိသည်မှာ ဖန်ရှန့်ဝူ မဟုတ်ဘဲ အကြိမ်ကြိမ် အဆင့်မြှင့်တင်ထားပြီး အခြားသူများ၏ ဝိညာဉ်နှင့် ဆန္ဒများကို လက်ခံနိုင်စွမ်းရှိသော သူ၏ ခန္ဓာကိုယ်သာ ဖြစ်သည်။

သို့သော် ယခုအခါ ဟုန်းကျန်းရှန့်သည် အန္တရာယ်ကို အာရုံခံမိပြီး ရှယန်မိသားစု၏ ဖိတ်ကြားချက်ဖြင့် သူတို့၏ ကောင်းကင်ဂူနန်းအတွင်းသို့ ဝင်ရောက် ကျင့်ကြံနေပြီ ဖြစ်သည်။ အသင်းတော်အရှင်က မည်မျှပင် အစွမ်းထက်စေကာမူ ရှယန်မိသားစု၏ ကောင်းကင်ဂူနန်းထဲသို့ အတင်းအကျပ် ဝင်ရောက်ရန် မဖြစ်နိုင်ပေ။ ထို့ကြောင့် သူသည် အခြားနည်းလမ်းကို သုံးရန် ဆုံးဖြတ်လိုက်ခြင်း ဖြစ်သည်။

တာ့ဝူဖုန်းကို ဖမ်းပြီး ဟုန်းကျန့်ရှန်းနှင့် လဲလှယ်မည်။ အကယ်၍ လဲလှယ်၍ မရခဲ့လျှင်ပင် သူ့ကို သတ်လိုက်ခြင်းက ကလဲ့စားချေပြီးသား ဖြစ်ပေလိမ့်မည်။

“ဖန်ရှန့်ဝူတောင် သူ့လက်မှာ ရှုံးတယ်ဆိုတော့ ဒီတာ့ဝူဖုန်းက အစွမ်းတစ်ခုခု ရှိမှာပဲ။ ကျွန်တော်က သတ်ဖြတ်တဲ့နေရာမှာတော့ ကျွမ်းကျင်ပါတယ်။ ဒါပေမဲ့ အရှင်ဖမ်းဖို့ကျတော့...”

ပိုင်ယင်ခွမ်း က အနည်းငယ် တွန့်ဆုတ်စွာ ပြောလိုက်သည်။ အစွမ်းထက်သော ပြိုင်ဘက်ကို သတ်ခြင်းထက် အရှင်ဖမ်းခြင်းက ပိုမို ခက်ခဲလှသည်။ ပြိုင်ဘက်က အသက်လုပြီး ပြန်တိုက်ခိုက်လျှင် သော်လည်းကောင်း ထွက်ပြေးသွားလျှင် သော်လည်းကောင်း အခက်တွေ့နိုင်သည်။ ထို့ပြင် ပြိုင်ဘက်မှာ ရှယန်မိသားစု၏ ဧည့်သည်အကြီးအကဲ ဖြစ်သဖြင့် အကူအညီ လှမ်းတောင်းပါက ရှယန်မိသားစုမှ အဖိုးကြီးများ ထွက်လာနိုင်ပြီး အခြေအနေမှာ ပိုမို ရှုပ်ထွေးသွားနိုင်သည်။

“မင်းနဲ့အတူ ဝူမုန့်နဲ့ ဝူချင်းတို့ကိုပါ လွှတ်လိုက်မယ်” ဟု ဝတ်ရုံနက်နှင့် လူက ပြောလိုက်သည်။

“ဝူမုန့်နဲ့ ဝူချင်းက ကျွန်တော်နဲ့အတူ လိုက်မှာလား။”

ဤစကားကြောင့် ပိုင်ယင်ခွမ်း အံ့အားသင့်သွားသည်။ ဝူမုန့်နှင့် ဝူချင်းတို့မှာ အသက်ခြွေအဖွဲ့အစည်း၏ ဝါရင့်အကြီးအကဲများ ဖြစ်ကြပြီး အရှင်သခင်ကိုယ်တိုင် ပြုစုပျိုးထောင်ထားသည့် ထူးခြားသော ပါရမီရှင် ထိပ်တန်း မိစ္ဆာသိုင်းပညာရှင်များ ဖြစ်ကြသည်။ ဖန်ရှန့်ဝူက အဖွဲ့၏ အထွေထွေကိစ္စများကို စီမံခန့်ခွဲနေစဉ် သူတို့မှာမူ အဆင့်မြင့်ဆုံး ပြောင်းလဲမှုကို ရရှိရန်အတွက် ကိုယ်ပိုင်ကျင့်ကြံမှုများကိုသာ အာရုံစိုက်နေသူများ ဖြစ်သည်။

သူတို့ တစ်ဦးချင်းစီမှာ မူလနယ်ပယ် သိုင်းပညာရှင်များကြားတွင် လွှမ်းမိုးနိုင်သော ထိပ်တန်း မိစ္ဆာသိုင်းပညာရှင်များ ဖြစ်ကြသည်။ ယခုအခါ သုံးဦးစလုံး တစ်ပြိုင်တည်း လှုပ်ရှားမည်ဆိုပါက တာ့ဝူဖုန်းမှာ သူတို့အရှင်သခင်အတွက် မည်မျှ အရေးကြီးကြောင်း သိသာနေသည်။

“ဒီလူက... သိုင်းဝိဇ္ဇာသူတော်စင် ဝင်စားများလား။”

ပိုင်ယင်ခွမ်းက အသံထွက်၍ ရေရွတ်လိုက်သည်။ သူ၏ မျက်လုံးများထဲတွင် ထူးခြားသော အလင်းတန်းတစ်ခု ဖြတ်ပြေးသွားသည်။ အသက်ခြွေအဖွဲ့အစည်း၏ အကြီးအကဲ သုံးဦးစလုံး လှုပ်ရှားရမည်ဆိုပါက ပြိုင်ဘက်မှာ သာမန်လူ မဖြစ်နိုင်ကြောင်း သူ သဘောပေါက်လိုက်သည်။

“ငါ့ရဲ့ စောင့်ကြည့်ချက်အရ သူ၏ ခန္ဓာကိုယ်ထဲမှာ နတ်ဘုရားမျိုးစေ့ မရှိဘူး။ ဒါကြောင့် သူက သိုင်းဝိဇ္ဇာသူတော်စင် ဝင်စားတာတော့ မဟုတ်လောက်ဘူး” ဝတ်ရုံနက်နှင့် လူက ပြောပြသည်။

ပုံမှန်အားဖြင့် နတ်ဘုရားသားတော်များမှာ သိုင်းဝိဇ္ဇာသူတော်စင်များ၏ မျိုးဆက်ဖြစ်ပြီး သူတို့၏ ဘိုးဘေးများက ချန်ထားခဲ့သော နတ်ဘုရားမျိုးစေ့ကို ပိုင်ဆိုင်ထားကြသဖြင့် အခြားသူများ မမီနိုင်သော အဆင့်သို့ လွယ်ကူစွာ ရောက်ရှိနိုင်ကြသည်။ သို့သော် အရှင်သခင်၏ စုံစမ်းမှုအရ တာ့ဝူဖုန်းတွင် နတ်ဘုရားမျိုးစေ့၏ အရှိန်အဝါ မရှိပေ။ ထို့ကြောင့် သူသည် ဤခေတ်တွင် မွေးဖွားလာသော ပါရမီရှင်တစ်ဦးသာ ဖြစ်နိုင်ခြေ များသည်။

နတ်ဘုရားမျိုးစေ့ မရှိပါက စစ်မှန်သော နတ်ဘုရားသားတော်များနှင့် ယှဉ်လျှင် တိုက်ခိုက်နိုင်စွမ်းမှာ များစွာ အားနည်းပေလိမ့်မည်။ ထိုအခါမှ ပိုင်ယင်ခွမ်း စိတ်အေးသွားပြီး ယုံကြည်ချက်အပြည့်ဖြင့် ပြောလိုက်သည်။ “ကောင်းပါပြီ။ ကျွန်တော်တို့ဆီသာ လွှဲထားလိုက်ပါ။ ဒီတာ့ဝူဖုန်းက တကယ်ပဲ သိုင်းဝိဇ္ဇာသူတော်စင် ဝင်စားရင်တောင် နတ်ဘုရားမျိုးစေ့ မရှိဘူးဆိုရင် ကျွန်တော်တို့ သုံးယောက်ပေါင်းပြီး သူ့ကို အလွယ်လေး အရှင်ဖမ်းနိုင်ပါတယ်။”

“တာ့ဝူဖုန်းက ရှယန်မိသားစုရဲ့ ဧည့်သည်အကြီးအကဲ ဖြစ်သလို ဝိညာဉ်လမ်းစဉ်ဂိုဏ်းရဲ့ ဧည့်သည်အကြီးအကဲလည်း ဖြစ်တယ်။ အခု သူ ကျုံးလင်တောင်မှာ ရှိနေတယ်။ မင်းတို့ သုံးယောက် အမြန်ဆုံး လှုပ်ရှားပြီး သူ့ကို ဖမ်းလာခဲ့ကြ။”

“ကောင်းပါပြီ။ ကျွန်တော် အခုပဲ ဝူမုန့်နဲ့ ဝူချင်းဆီ သွားလိုက်ပါ့မယ်။” ပိုင်ယင်ခွမ်း ၏ မျက်နှာတွင် စိတ်လှုပ်ရှားမှုများ ပြည့်နှက်နေသည်။ အားရပါးရ တိုက်ခိုက်ရမည့် ပြိုင်ဘက်နှင့် မတွေ့ရသည်မှာ ကြာပြီ မဟုတ်ပါလား။

“ငါကိုယ်တိုင် လှုပ်ရှားစရာ မလိုတော့ဘူးလို့ မျှော်လင့်ရတာပဲ” ဝတ်ရုံနက်နှင့် လူက သူ၏ လက်များကို နောက်ကျောတွင် ထားလျက် ရပ်နေသည်။ သူ၏ ရွှေရောင်မျက်လုံးများမှာ နက်နဲသော အဓိပ္ပာယ်တစ်ခုဖြင့် တောက်ပနေလျက်။

...

ကျုံးလင်တောင်ရှိ ဝိညာဉ်လမ်းစဉ်ဂိုဏ်းတွင်မူ စူးချန်ခုန်းသည် ပုံမှန်အတိုင်း ကျင့်ကြံနေဆဲ ဖြစ်သည်။ သူသည် တင်ပျဉ်ခွေထိုင်လျက် စွမ်းအင်သိုလှောင်ရာအတွင်းရှိ ချီစွမ်းအင်များကို သူ၏ ဆန်းကြယ်လိပ်ချီစွမ်းအင်အရည် အတွင်းသို့ ပေါင်းစပ်နေသည်။

ဆန်းကြယ်လိပ်ချီစွမ်းအင်မှာ ကြီးထွားလာပြီးနောက် တစ်စက်အဖြစ် ထပ်မံ ကွဲထွက်လာခဲ့သည်။

“အခုဆိုရင် ဆန်းကြယ်လိပ်ချီစွမ်းအင်အရည် ၁၄ စက် ရှိသွားပြီ”

စူးချန်ခုန်း၏ မျက်နှာတွင် ရွှင်ပျသော အပြုံးတစ်ခု ပေါ်လာသည်။ ဝိညာဉ်လမ်းစဉ်ဂိုဏ်းမှ မူလနယ်ပယ် သိုင်းပညာရှင် တစ်ရာကျော်ကို သူ၏ လမ်းညွှန်မှုဖြင့် ကျင့်ကြံစေခဲ့ရာ သူတို့ထံမှ ရရှိသော 'လိပ်အသက်ရှူနည်း ချီစွမ်းအင်' များမှာ ပိုမို များပြားလာပြီး အရည်အသွေးလည်း ပိုကောင်းလာခဲ့သည်။ ထို့ကြောင့် ချီစွမ်းအင် တစ်စက် ဖြစ်ပေါ်ရန်အတွက် ရက်ပေါင်း ၂၀ ခန့်သာ ကြာမြင့်တော့လေသည်။

အခန်း (၇၁၉) ဝိညာဉ်လမ်းစဉ်ဂိုဏ်း၏ တာ့ဝူဖုန်း။ ရန်သူများ ချဉ်းကပ်လာခြင်း။ (၂)

ထိုစဉ် စူးချန်ခုန်း၏ စိတ်ထဲတွင် လှုပ်ရှားမှုတစ်ခု ဖြစ်ပေါ်လာပြီး သူ၏ စာပေရနံ့အိတ်ထဲမှ တုံကင်တံဆိပ်ပြားတစ်ခုကို ထုတ်ယူလိုက်သည်။ ၎င်းမှာ ရှယန်မိသားစု၏ ဧည့်သည်အကြီးအကဲ တံဆိပ်ပြား ဖြစ်သည်။ ယခုအခါ ထိုတံဆိပ်ပြားမှာ ဖျော့တော့သော အလင်းတန်းများ မှိတ်တုတ်မှိတ်တုတ် ဖြစ်နေသည်။ ရှယန်ကျယ်က သတင်းပို့နေခြင်း ဖြစ်သည်။

“ကောင်းကင်နဂါး ကျောက်စိမ်းတံဆိပ်ပြားအကြောင်း သတင်းရလို့လား မသိဘူး။”

စူးချန်ခုန်း တံဆိပ်ပြားကို ကိုင်လိုက်ပြီး အတွင်းမှ သတင်းစကားကို အာရုံခံလိုက်သည်။

“အကြီးအကဲတာ့... ကျွန်တော်တို့ ရရှိထားတဲ့ သတင်းအရ ငွေလမင်းအင်ပါယာရဲ့ ယန်တော်ဝင်မိသားစုက အခုစပြီး နောက်သုံးလအကြာမှာ ‘ကောင်းကင်နဂါး ကျောက်စိမ်းတံဆိပ်ပြား’ ပိုင်ဆိုင်ထားသူတွေကို ‘ကောင်းကင်နဂါးတောင်’ မှာ စုရပ်လုပ်ပြီး ‘ကောင်းကင်နဂါး ကောင်းကင်ဘုံနန်း’ ကို အတူတူဖွင့်လှစ်ဖို့ ဖိတ်ခေါ်ထားပါတယ်” ဟု ရှယန်ကျယ်၏ သတင်းစကားက ဆိုသည်။

နဂါးမင်းနိုင်ငံတော် ပျက်စီးသွားပြီးနောက် လုံမိသားစု၏ ကံကြမ္မာမှာလည်း ကုန်ဆုံးသွားခဲ့သည်။ ကောင်းကင်နဂါး သိုင်းဝိဇ္ဇာသူတော်စင် ချန်ထားခဲ့သော ကျောက်စိမ်းတံဆိပ်ပြား ၅ ခု စုံမှသာ ထိုမင်္ဂလာမြေကို ဖွင့်လှစ်နိုင်မည် ဖြစ်သည်။ ငွေလမင်းအင်ပါယာ၏ ယန်မိသားစုမှာလည်း တံဆိပ်ပြားတစ်ခုကို ပိုင်ဆိုင်ထားပြီး ထိုမင်္ဂလာမြေ၏ တည်နေရာမှာလည်း သူတို့၏ နယ်မြေအတွင်း၌ ရှိနေသဖြင့် ကျန်ရှိသော တံဆိပ်ပြားပိုင်ရှင်များကို ဖိတ်ခေါ်လိုက်ခြင်း ဖြစ်သည်။

သို့သော် စူးချန်ခုန်းက မျက်မှောင်ကြုတ်ကာ စိုးရိမ်ပူပန်စွာ စဉ်းစားလိုက်သည်။ “ဒါပေမဲ့ ငွေလမင်းအင်ပါယာကို သွားရင် ရတနာတွေ ရခဲ့ရင်တောင် အဲဒါတွေက ယန်မိသားစုရဲ့ လက်ထဲ ရောက်သွားမှာ မဟုတ်ဘူးလား။”

ငွေလမင်းအင်ပါယာ၏ ယန်မိသားစုမှာ ရှယန်မိသားစုကဲ့သို့ပင် အလွန် အစွမ်းထက်လှသည်။ သူတို့၏ မိသားစုထဲတွင် ထိပ်တန်းပညာရှင်များစွာ ရှိနေပေလိမ့်မည်။ အပြင်လူတစ်ယောက်အနေဖြင့် သူတို့၏ နယ်မြေထဲတွင် ရတနာရယူပြီး ဘေးကင်းစွာ ပြန်ထွက်လာရန်မှာ မလွယ်ကူပေ။ အကယ်၍ ယန်မိသားစု၏ သိုင်းဝိဇ္ဇာသူတော်စင်ကိုယ်တိုင်သာ လှုပ်ရှားလာပါက မည်သူက ယှဉ်နိုင်မည်နည်း။

ထိုစဉ် တံဆိပ်ပြားမှာ ထပ်မံလင်းလက်လာပြီး ရှယန်ကျယ်က သတင်း ထပ်ပို့ပြန်သည်။

“ယန်မိသားစုရဲ့ ဘိုးဘေးကိုယ်တိုင်က အမိန့်ထုတ်ထားပါတယ်။ ကျောက်စိမ်းတံဆိပ်ပြား ပိုင်ဆိုင်သူ ဘယ်သူမဆို မင်္ဂလာမြေထဲကို ဝင်ရောက်နိုင်ပြီး ရတနာတွေကို ကိုယ်ပိုင် အရည်အချင်းအလိုက် ရယူနိုင်ပါတယ်။ ရတနာရရှိသူတွေကိုလည်း ငွေလမင်းအင်ပါယာကနေ ဘေးကင်းကင်းနဲ့ ပြန်ထွက်သွားနိုင်ဖို့ ယန်မိသားစုက အာမခံပါတယ်” ထိုသတင်းစကားက စူးချန်ခုန်း၏ စိုးရိမ်မှုကို ဖြေဖျောက်ပေးလိုက်သည်။

ယန်မိသားစုအနေဖြင့်လည်း ဤအချက်ကို နားလည်ပုံရသည်။ အကယ်၍ ဘေးကင်းမှု မရှိပါက မည်သူကမျှ တံဆိပ်ပြားယူပြီး လာမည်မဟုတ်ဘဲ မင်္ဂလာမြေမှာလည်း ဘယ်တော့မှ ပွင့်လာမည် မဟုတ်ပေ။ ထို့ကြောင့် ယန်မိသားစု၏ သိုင်းဝိဇ္ဇာသူတော်စင်ကိုယ်တိုင်က သူတို့၏ ဂုဏ်သိက္ခာကို ရင်း၍ အာမခံလိုက်ခြင်း ဖြစ်သည်။ နိုင်ငံတစ်ခု၏ အမြင့်ဆုံးနေရာတွင် ရှိနေသော သိုင်းဝိဇ္ဇာသူတော်စင်တစ်ပါး၏ ကတိစကားမှာ အလွန်ပင် လေးနက်လှသည်။

အခြားရတနာများကို သူတစ်ပါး ယူသွားနိုင်သော်လည်း မင်္ဂလာမြေကိုတော့ နေရာရွှေ့၍ မရပေ။ ယန်မိသားစုအတွက် ထိုမြေပွင့်သွားခြင်းကပင် သူတို့အတွက် အကြီးမားဆုံးသော အမြတ်အစွန်း ဖြစ်ပေလိမ့်မည်။

သို့ပေမယ့် သတိတော့ ထားရဦးမည်။ အကယ်၍ ရရှိသော ရတနာမှာ သိုင်းဝိဇ္ဇာသူတော်စင်တစ်ပါးပင် မနေနိုင်လောက်အောင် တန်ဖိုးကြီးလွန်းလျှင် ကတိတည်မတည်ဆိုသည်မှာ မသေချာပေ။ သို့သော် သိုင်းဝိဇ္ဇာသူတော်စင်၏ အာမခံချက် ရှိနေသဖြင့် ငွေလမင်းအင်ပါယာသို့ သွားရန်မှာ ထိုက်တန်လှသည်။

“သုံးလ စောင့်ပြီးရင် ကောင်းကင်နဂါး မင်္ဂလာမြေဆီ သွားမယ်။”

စူးချန်ခုန်း ဆုံးဖြတ်လိုက်သည်။ ကျောက်စိမ်းတံဆိပ်ပြားကို ရယူထားပြီးမှတော့ ရလာသော အခွင့်အရေးကို သူ လက်လွတ်ခံမည် မဟုတ်ပေ။

စူးချန်ခုန်း တိတ်ဆိတ်စွာ စောင့်ဆိုင်းနေစဉ်မှာပင် သူ့ထံသို့ အန္တရာယ်က တိတ်တဆိတ် ချဉ်းကပ်လာနေသည်ကို သူ မသိခဲ့ပေ။ ညဉ့်နက်သန်းခေါင်အချိန် ဝိညာဉ်လမ်းစဉ်ဂိုဏ်းမှာ တိတ်ဆိတ်ငြိမ်သက်နေပြီး ကင်းစောင့်တပည့်အချို့မှလွဲ၍ ကျန်သူများမှာ အိပ်မောကျနေကြသည်။

“လိပ်အသက်ရှူနည်းကျင့်စဉ်... နောက်ထပ် အဆင့်တက်ပြန်ပြီ။ ငါ အကြီးအကဲစူးအတွက် ပိုပြီး အသုံးဝင်လာနိုင်ပြီကွ။”

တိတ်ဆိတ်သော အခန်းတစ်ခုအတွင်းတွင် လူငယ်တစ်ဦးသည် အသက်ရှူလေ့ကျင့်ခန်း လုပ်နေရင်း သူ၏ ချီစွမ်းအင်သိုလှောင်ရာအတွင်းရှိ တိုးပွားလာသော 'လိပ်အသက်ရှူနည်း ချီစွမ်းအင်' ကြောင့် ဝမ်းသာအားရ ပြုံးလိုက်သည်။ ဤလူငယ်လေးမှာ ကျိုးချိုး ဖြစ်ပြီး စူးချန်ခုန်း၏ ဆန်းကြယ်လိပ် ချီစွမ်းအင်အရည်ကြောင့် မူလနယ်ပယ်အဆင့်သို့ ပထမဆုံး ရောက်ရှိခဲ့သော တပည့်ဖြစ်သည်။ သူသည် စူးချန်ခုန်းကို အလွန် ကျေးဇူးတင်သဖြင့် လိပ်အသက်ရှူနည်းကျင့်စဉ်ကို ကြိုးစားကျင့်ကြံနေသူ ဖြစ်သည်။

“ဒုတ် ဒုတ် ဒုတ်”

ရုတ်တရက် ကျိုးချိုး၏ နှလုံးခုန်သံမှာ ပြင်းထန်လာပြီး ကောင်းကင်ယံသို့ ထိတ်လန့်တကြား မော့ကြည့်လိုက်သည်။ သားရဲကြီးတစ်ကောင် သို့မဟုတ် ရေကြီးသကဲ့သို့ ပြင်းထန်လှသော အရှိန်အဝါတစ်ခုက သူ့ကို လွှမ်းမိုးလာသည်ကို ခံစားလိုက်ရပြီး သူ၏ ဝိညာဉ်ထဲတွင် ကြောက်ရွံ့မှုများ ဖြစ်ပေါ်လာခဲ့သည်။

ကျိုးချိုးသာမက ဝိညာဉ်လမ်းစဉ်ဂိုဏ်းရှိ မူလနယ်ပယ် သိုင်းပညာရှင် အားလုံးမှာလည်း ထိုကဲ့သို့ပင် ခံစားလိုက်ရသည်။ သားရဲကြီးတစ်ကောင်က သူတို့အားလုံးကို အမဲလိုက်ရန် ချောင်းမြောင်းနေသကဲ့သို့ပင်။

“ဘယ်သူလဲ။

ဂိုဏ်းချုပ် ဟေးလျန်ယွမ်၏ မျက်ခွံများမှာ တုန်ယင်သွားသည်။ တစ်စုံတစ်ဦးက သူတို့ကို ပစ်မှတ်ထားနေသည်ဟူသော ထိတ်လန့်ဖွယ် ခံစားချက်ကြီးကို သူလည်း ခံစားလိုက်ရသည်။

ထိုအချိန်တွင် ဝိညာဉ်လမ်းစဉ်ဂိုဏ်း၏ အထက် ကောင်းကင်ယံရှိ မှောင်အတိကျနေသော တိမ်တိုက်တစ်ခုအတွင်းတွင် လူသုံးယောက်က အောက်ဘက်သို့ ငုံ့ကြည့်နေကြသည်။ ထိုသုံးယောက်မှာ ထွားကျိုင်းသော ပိုင်ယင်ခွမ်းနှင့်အတူ အခြားနှစ်ဦး ဖြစ်ကြသည်။ ထိုနှစ်ဦးမှာ အနက်ရောင်နှင့် အစိမ်းရောင် ဝတ်ရုံများကို အသီးသီး ဝတ်ဆင်ထားကြပြီး အမွှာများကဲ့သို့ ရုပ်ချင်းတူသော်လည်း သူတို့၏ အရှိန်အဝါမှာ လုံးဝ ကွဲပြားသည်။

ဝတ်ရုံနက်နှင့်လူမှာ အသက် ၂၀ ခန့်ရှိပုံရပြီး ကျောက်စိမ်းကဲ့သို့ ဖြူဖွေးသော အသားအရေရှိသော်လည်း သူ၏ မျက်လုံးများမှာ ရိုင်းစိုင်းကာ ယုတ်မာသော အရှိန်အဝါများ ရှိနေသည်။ သူ၏ အကြည့်များမှာ သားကောင်ကို ကြည့်နေသကဲ့သို့ပင်။ ဝတ်ရုံစိမ်းနှင့်လူမှာမူ အလွန်ပင် ဖော်ရွေပုံရသော အပြုံးတစ်ခုကို ဆင်မြန်းထားသည်။ သို့သော် ထိုအပြုံးမှာ ကြည့်ရသူကို ကျောချမ်းစေသည်။

“ဒီဝိညာဉ်လမ်းစဉ်ဂိုဏ်းက တတိယတန်းစား ဂိုဏ်းလေးတစ်ခုပဲဟာ...တာ့ဝူဖုန်းလို အစွမ်းထက်တဲ့သူက တကယ်ပဲ ဒီထဲမှာ ရှိနေတာလား။” ဟု ဝတ်ရုံနက်နှင့်လူ ဝူချင်းက အေးစက်သောအသံဖြင့် ပြောလိုက်သည်။

“အသင်းတော် အရှင်က ဘယ်တော့မှ မှားမှာ မဟုတ်ဘူး” ဟု ပိုင်ယင်ခွမ်းက မကျေမနပ် ပြန်ပြောလိုက်သည်။

သူတို့၏ အရှင်သခင် ကိုယ်တိုင်က သူတို့ သုံးယောက်စလုံးကို ဤနေရာသို့ စေလွှတ်လိုက်ခြင်း ဖြစ်ရာ သူတို့၏ ပစ်မှတ်မှာ ဤဂိုဏ်းငယ်လေးအတွင်း၌ ရှိနေသည်မှာ မြေကြီးလက်ခတ်မလွဲပါပေ။

အခန်း (၇၂၀) ဝိညာဉ်လမ်းစဉ်ဂိုဏ်း၏ တာ့ဝူဖုန်း။ ရန်သူများ ချဉ်းကပ်လာခြင်း။ (၃)

ဝတ်ရုံနက်နှင့်လူ ဝူချင်းမှာ တိတ်ဆိတ်နေသော်လည်း ဝတ်ရုံစိမ်းနှင့်လူ ဝူမုန့်၏ မျက်ဆုံများမှာမူ ပျောက်ကွယ်သွားပြီး မျက်လုံးအိမ်တစ်ခုလုံး ဗလာဖြစ်သွားသည်။ သူသည် အထက်မှ ငုံ့ကြည့်လိုက်ရာ ဝိညာဉ်စွမ်းအင် အစုအဝေးများနှင့် လူတို့၏ ပုံရိပ်များကို မြင်တွေ့နေရပြီး တစ်ဦးချင်းစီ၏ ဝိညာဉ်စွမ်းအင် အားကောင်းမှုကိုပါ ခွဲခြားသိမြင်နေသည်။

ဝူမုန့်က အနည်းငယ် အံ့အားသင့်စွာဖြင့် ပြောလိုက်သည်။ “ဒီဝိညာဉ်လမ်းစဉ်ဂိုဏ်းက တော်တော် စိတ်ဝင်စားဖို့ ကောင်းတာပဲ... မူလနယ်ပယ် သိုင်းပညာရှင် အရေအတွက်က အနည်းဆုံး တစ်ရာကျော် ရှိနေတယ်။ သူတို့ရဲ့ အစွမ်းက သာမန်လောက်ပဲ။ အသန်မာဆုံးလူတောင် ‘မြေကမ္ဘာပန်းပွင့်အဆင့်’ ပဲ ရှိသေးပေမဲ့ ဒီအရေအတွက်က ထိပ်တန်း သိုင်းဂိုဏ်းအချို့ထက်တောင် သာနေသေးတယ်။ တာ့ဝူဖုန်း ဒီထဲမှာ ရှိနေတာ သေချာပြီ။”

ဝိညာဉ်စွမ်းအင် အသင့်အတင့်သာရှိသော တတိယတန်းစား ဂိုဏ်းငယ်လေးတစ်ခုတွင် မူလနယ်ပယ် သိုင်းပညာရှင် ဆယ်ယောက်ရှိလျှင်ပင် အလွန် ထူးခြားနေပြီ ဖြစ်သော်လည်း ဝူမုန့်၏ အာရုံခံချက်အရ တစ်ရာကျော် ရှိနေခြင်း ဖြစ်သည်။ ဤသည်မှာ သာမန်အခြေအနေ မဟုတ်ဘဲ လျှို့ဝှက်ဆန်းကြယ်သော တာ့ဝူဖုန်း၏ လက်ချက်ဖြစ်မည်မှာ မြေကြီးလက်ခတ်မလွဲပေ။

“သူ ရှိမရှိဆိုတာ စမ်းသပ်ကြည့်ရင် သိရမှာပေါ့” ဝူချင်းက စိတ်မရှည်စွာဖြင့် ပြောလိုက်ရာ သူ၏ မျက်လုံးများထဲတွင် ယုတ်မာသော အလင်းတန်းများ ဖြတ်ပြေးသွားသည်။

“ကောင်းကင်မှာ လူတွေ ရှိနေတယ်...”

“သူတို့... သူတို့က ပျံနိုင်တာလား။ သိုင်းဝိဇ္ဇာသူတော်စင်တွေများလား။”

ထိုအချိန်တွင် ဝိညာဉ်လမ်းစဉ်ဂိုဏ်းရှိ တပည့်ပေါင်း ထောင်ချီမှာ အသက်ရှူရကျပ်လောက်သော ကြောက်မက်ဖွယ် အရှိန်အဝါကြီးကို ခံစားလိုက်ရသည်။ လူအများအပြားမှာ ထိတ်လန့်တကြားဖြင့် ကောင်းကင်ယံရှိ တိမ်တိုက်မည်းကြီးနှင့် ထိုထဲမှ လူရိပ်သုံးခုကို ကြည့်ရင်း တံတွေးများကို အခါခါ မျိုချနေကြသည်။ သူတို့၏ အမြင်တွင် သိုင်းဝိဇ္ဇာသူတော်စင်များသာ ပျံသန်းနိုင်သည် မဟုတ်ပါလား။

“သူတို့က ဘယ်သူတွေလဲ။ ဒီလောက် ကြောက်စရာကောင်းတဲ့ အရှိန်အဝါမျိုး... အရင်က ဝိညာဉ်လမ်းစဉ်ဂိုဏ်းကို လာတိုက်ခဲ့တဲ့ မိစ္ဆာဂိုဏ်းက သိုင်းသမားတွေထက်တောင် ပိုပြီး ပြင်းထန်နေပါလား။”

ဂိုဏ်းချုပ် ဟေးလျန်ယွမ်မှာ သူ၏ ကျင့်ကြံရာ အခန်းထဲမှ ပြေးထွက်လာပြီး ကောင်းကင်ယံရှိ မိစ္ဆာနတ်ဘုရား သုံးပါးနှင့်တူသော ပုံရိပ်များကို မော့ကြည့်လိုက်ရာ ဦးရေခွံများပင် စိမ့်တက်သွားသည်။ ပိုင်ယင်ခွမ်းနှင့် အခြားနှစ်ဦးမှာ သူတို့၏ အရှိန်အဝါကို တမင်တကာ ထုတ်မပြသော်လည်း အလိုအလျောက် ယိုစိမ့်လာသော အငွေ့အသက်လေးကပင် လူသားတို့၏ အာရုံကြောများကို တုန်လှုပ်စေရန် လုံလောက်လှသည်။

“တာ့ဝူဖုန်း.. ထွက်ခဲ့စမ်း”

ပိုင်ယင်ခွမ်းက အောက်ဘက်ရှိ ထိတ်လန့်နေသော အကြည့်များကို ကြည့်ကာ ကျယ်လောင်စွာ ရယ်မောရင်း မိုးခြိမ်းသံကဲ့သို့ ဟိန်းဟောက်လိုက်သည်။

“တာ့ဝူဖုန်း… ထွက်ခဲ့စမ်း”

ထိုဟိန်းဟောက်သံမှာ ကျုံးလင်တောင်တစ်ခုလုံးကို တုန်ခါသွားစေပြီး ကောင်းကင်တွင် မိုးကြိုးပေါက်ကွဲသကဲ့သို့ပင် ဖြစ်သည်။ ဝိညာဉ်လမ်းစဉ်ဂိုဏ်း တပည့်အများအပြားမှာ နားထဲတွင် အူသွားပြီး မျက်စိများ ပြာဝေကာ မူးလဲလုနီးပါး ဖြစ်သွားကြသည်။

“တာ့ဝူဖုန်း… မကြာခင်ကတင် လော့မိသားစုကို အမြစ်ပြတ်အောင် သုတ်သင်ခဲ့တဲ့ တာ့ဝူဖုန်းလား။”

“ဒီလူသုံးယောက်က သူ့ကို လာရှာတာလား။”

ဝိညာဉ်လမ်းစဉ်ဂိုဏ်းသားအချို့မှာ မူးဝေအံ့သြနေသလို ဇဝေဇဝါလည်း ဖြစ်နေကြသည်။ တာ့ဝူဖုန်း၏ အမည်မှာ မကြာသေးမီကပင် အလွန် ကျော်ကြားလာခဲ့သည်။ မူလဓာတ်ငါးပါးသိုင်းပညာရှင် တစ်ဦးကို သတ်ခဲ့ခြင်း၊ မိစ္ဆာဂိုဏ်းများကို တိုက်ခိုက်ခြင်းနှင့် တိလော့မြို့ရှိ 'လော့မိသားစု' တစ်ခုလုံးကို မြေလှန်ပစ်ခဲ့ခြင်းတို့ကြောင့် ဖြစ်သည်။

သို့သော် ထိုသူနှင့် ဝိညာဉ်လမ်းစဉ်ဂိုဏ်းက ဘာများ သက်ဆိုင်နေသနည်း။

“တာ့ဝူဖုန်း၊ မင်းက ငကြောက်ကြီးလို ပုန်းနေဦးမှာလား။ ထွက်မလာရင် ငါ ဒီနေရာမှာရှိတဲ့လူတွေကို အကုန်သတ်ပစ်မယ်။”

ပိုင်ယင်ခွမ်းက ဒေါသတကြီး အော်ဟစ်လိုက်ရာ ကောင်းကင်ရှိ တိမ်တိုက်များမှာ မင်ရည်များ လောင်းချလိုက်သကဲ့သို့ ပိုမိုမည်းမှောင်လာပြီး ကောင်းကင်ကြီး တစ်ခုလုံး ပြိုကျတော့မည့်အလား ထင်မှတ်ရသည်။ အောက်ဘက်ရှိ ဝိညာဉ်လမ်းစဉ်ဂိုဏ်းသားများမှာ ခုခံနိုင်စွမ်းမရှိသော မျှော်လင့်ချက်မဲ့သည့် ခံစားချက်ကြီးကို ခံစားနေရသည်။

“သူတို့က... ဘယ်လို မိစ္ဆာကောင်တွေလဲ။”

ဟေးလျန်ယွမ်၊ ချိုင်ဖေးနှင့် ကျိုးချိုးတို့မှာ ကြောက်လန့်နေကြသည်။ ဤလူသုံးဦး၏ အရှိန်အဝါမှာ သူတို့ ရင်ဆိုင်နိုင်စွမ်းထက် များစွာ ကျော်လွန်နေသည်။

“မိတ်ဆွေတို့... ဒီနေရာမှာ ဘာကြောင့် ဒီလောက် ဆူညံအောင် လုပ်နေရတာလဲ။”

ထိုအချိန်တွင် အေးစက်သောအသံတစ်ခု ထွက်ပေါ်လာသည်။ ပေသုံးဆယ်ခန့် ကျယ်သော အတောင်ပံများရှိသည့် ကြိုးကြာငှက်ဖြူကြီးတစ်ကောင်မှာ ကျုံးလင်တောင်ပေါ်မှ ကောင်းကင်သို့ ပျံတက်လာသည်။ ၎င်း၏ ကျောပေါ်တွင် ဝတ်စုံနက်နှင့် တည်ငြိမ်အေးဆေးသော လူငယ်တစ်ဦး မတ်တတ်ရပ်နေသည်။

အနှီလူက စူးချန်ခုန်းပင် ဖြစ်သည်။

‘ဒီသုံးယောက်စလုံးက... မိစ္ဆာ သိုင်းပညာရှင်တွေလား။ သူတို့ရဲ့ အရှိန်အဝါက ဖန်ရှန့်ဝူထက် မနိမ့်ဘူးပဲ။’

စူးချန်ခုန်း၏ မျက်နှာမှာ တည်ငြိမ်နေသော်လည်း မျက်မှောင်ကို အနည်းငယ် ကြုတ်လိုက်သည်။ ဤမိစ္ဆာစစ်သည်တော် သုံးဦး ရောက်ရှိလာသည်နှင့် သူ ချက်ချင်း အာရုံခံမိသည်။ သူ အံ့ဩမိသည်မှာ ဤသူများက ဝိညာဉ်လမ်းစဉ်ဂိုဏ်းကို တိုက်ရိုက် ရှာတွေ့သွားပြီး သူ၏ အမည်ကိုပါ သိနေခြင်း ဖြစ်သည်။ သူသည် မိမိကိုယ်ကိုယ် အသေအချာ ဖုံးကွယ်ထားသည်ဟု ထင်ခဲ့သော်လည်း ဤသူများ မည်သို့ သိသွားသနည်း။

“မင်းက တာ့ဝူဖုန်းလား။ မင်းရဲ့ အရှိန်အဝါကို ဖုံးကွယ်ထားတာ အရမ်းတော်လို့ တောင်ပေါ်မှာတောင် ငါ မရိပ်မိခဲ့ဘူး။” ဝူမုန့်က စူးချန်ခုန်းကို နက်နဲသော အကြည့်ဖြင့် ကြည့်ကာ ပြောလိုက်သည်။

ဤလူငယ်၏ အသက်နှင့် ရုပ်သွင်မှာ သူတို့ ရရှိထားသော သတင်းနှင့် မကိုက်ညီသော်လည်း သူစီးနင်းလာသော ကြိုးကြာငှက်ဖြူမှာ ဝိညာဉ်စွမ်းအင်ဖြင့် ဖန်တီးထားခြင်းဖြစ်ရာ အနည်းဆုံး ‘နတ်ဘုရားစွမ်းရည်တစ်ပိုင်း’ အဆင့် ရှိသည်မှာ သေချာသည်။ သူတို့ အရှင်သခင် ပြောခဲ့သလိုပင် တာ့ဝူဖုန်းမှာ ဝိညာဉ်လမ်းစဉ်ဂိုဏ်းထဲတွင် ပုန်းနေခြင်း ဖြစ်သည်။

“မိတ်ဆွေတို့ ကျွန်တော်နဲ့ ပြောစရာရှိရင် တခြားတစ်နေရာကို သွားပြီး ပြောကြရအောင်” ဟု စူးချန်ခုန်းက အေးစက်စွာ ပြောလိုက်ပြီး ကြိုးကြာငှက်ဖြူကို အဝေးသို့ ဦးတည် ပျံသန်းစေလိုက်သည်။

ဤမိစ္ဆာသိုင်းပညာရှင် သုံးဦးစလုံးမှာ သာမန်ပြိုင်ဘက်များ မဟုတ်ကြရာ တိုက်ပွဲ ဖြစ်ပွားရန် သေချာသလောက် ရှိသည်။ ထို့ကြောင့် အောက်ဘက်ရှိ ဝိညာဉ်လမ်းစဉ်ဂိုဏ်းသားများ ထိခိုက်မှုမရှိစေရန် စူးချန်ခုန်းက နေရာပြောင်းလိုက်ခြင်း ဖြစ်သည်။ ပိုင်ယင်ခွမ်းနှင့် အခြားနှစ်ဦးမှာလည်း ယုတ်မာစွာ ပြုံးရင်း တိမ်မည်းကြီးများနှင့်အတူ ထပ်ကြပ်မကွာ လိုက်ပါသွားကြသည်။

“ခုနက လူသုံးယောက်က ဘယ်သူတွေလဲဟ။ သူတို့က တာ့ဝူဖုန်းကို လာရှာတာလား။”

“ကြိုးကြာငှက်ဖြူ စီးသွားတဲ့သူက အခုတလော နာမည်ကြီးနေတဲ့ တာ့ဝူဖုန်းလား။ နှမြောစရာပဲ…အောက်ကနေကြည့်တော့ သူ့မျက်နှာကို သေချာ မမြင်လိုက်ရဘူး။”

အရှိန်အဝါကြီးများ ပျောက်ကွယ်သွားသောအခါ ဝိညာဉ်လမ်းစဉ်ဂိုဏ်းသားများမှာ သက်ပြင်းချနိုင်တော့သည်။ သို့သော် ဟေးလျန်ယွမ်၊ ချိုင်ဖေး နှင့် ကျိုးချိုးတို့မှာမူ ထိတ်လန့်တကြားဖြင့် ကျန်ရစ်ခဲ့ကြသည်။ “ခုနက... အကြီးအကဲစူး မဟုတ်လား။ အကြီးအကဲစူးက... တာ့ဝူဖုန်းလား။”