အခန်း (၁၁၈၇-၁၁၈၈)

အခန်း (၁၁၈၇) ဘလက်စတား၊ မင်းရဲ့နည်းလမ်းတွေကို ငါ ကျွမ်းကျင်သွားပြီ

နဂါးတောင်ကုန်း တိုက်ပွဲသည် အချက်ပြမှုတစ်ခုနှင့် တူသည်။ နောက်နှစ်ရက်အတွင်း မေလ်တန်ဂြိုဟ်ပေါ်ရှိ နေရာတိုင်းတွင် စစ်မီးလျှံများ ပေါက်ကွဲထွက်ပေါ်လာသည်။ ဂိုဏ်းမဟာမိတ် ကစားသမားများ၏ သွေးချောင်းစီးမှုမှာ အဆုံးသတ်ခြင်းမရှိပေ။ အခြေစိုက်စခန်းများစွာရှိ စစ်မြေပြင် ရာပေါင်းများစွာတွင် အချိန်တိုင်း တိုက်ပွဲများ ဖြစ်ပွားနေ၏။ ၎င်းသည် မေလ်တန်ဂြိုဟ်ကို နှစ်ရက်ဆက်တိုက် ဗုံးကြဲခံနေရသည်နှင့် တူသည်။ ကစားသမား သန်းရာနှင့်ချီတို့ကြောင့် မျက်နှာပြင်မှာ လုံးဝ ပျက်စီးသွားသည်။

ဖိုရမ်များသည် အခြေခံအားဖြင့် ပို့စ်အမျိုးအစား နှစ်မျိုးဖြင့်သာ ပြည့်နှက်နေခဲ့ပြီး ပြိုင်ဘက်ကစားသမားများ၏ မိသားစုများကို ကြင်နာစွာ နှုတ်ဆက်သည့် ပို့စ်များနှင့် စစ်မြေပြင် သတင်းထောက်အသီးသီး၏ စစ်ပွဲအစီရင်ခံစာများ ဖြစ်သည်။

(TN: ဒီစာ‌ရေးဆရာ တကယ်ရေးတတ်တယ်၊ ဘာသာပြန်ရင်း ဘာပြောလဲနားလည်အောင် သေချာပြန်ဖတ်လိုက်ရတယ်၊ “မိသားစုများကို ကြင်နာစွာ နှုတ်ဆက်သည့် ပို့စ်” တဲ့။ ဘာလဲဆိုတာ သိကြတယ်မဟုတ်လား။)

စစ်မြေပြင်အသီးသီးတွင် တစ်ချိန်တည်း၌ တိုက်ပွဲများ အလွန်များပြားနေသောကြောင့် ဟန်ရှောင်းပင်လျှင် ၎င်းတို့အားလုံးကို မလိုက်ကြည့်နိုင်ခဲ့ပေ။ သူသည် ပထမနေ့တွင် ရွှေရောင်မဟာမိတ်အဖွဲ့၏ စွမ်းဆောင်ရည်ကိုသာ ကြည့်ရှုခဲ့ပြီး နဂါးတောင်ကုန်း တိုက်ပွဲ၌ ရွှေရောင်မဟာမိတ်အဖွဲ့ အောင်ပွဲခံသည်ကို မြင်သောအခါ အနီးကပ်အာရုံစိုက်ခြင်းကို ရပ်တန့်လိုက်သည်။ ကမ္ဘာ့ဆာဗာစစ်ပွဲ၏ အလုံးစုံအခြေအနေကို သိရှိရန် သူသည် နာရီအနည်းငယ်ကြာတိုင်း ဘန်ဟစ်ဒေါ့နှင့် ဂလက်ဆီတိုင်းမ်၏ အစီရင်ခံစာများကိုသာ ကြည့်ရှုခဲ့သည်။

ယေဘုယျအားဖြင့် ရွှေရောင်မဟာမိတ်အဖွဲ့က အကြီးမားဆုံး အားသာချက်ကို ရရှိထားသည်။ ဂလက်ဆီစီးပွားရေးမဟာမိတ်အဖွဲ့ကဲ့သို့သော ဂိုဏ်းမဟာမိတ်များသည် ပထမဆုံးနေ့တွင် ဆုံးရှုံးမှုကြီးကြီးမားမား ခံစားခဲ့ရသောကြောင့် သူတို့က ရှင်းလင်းစွာ ပိုမိုသတိထားလာကြသည်။

ရွှေရောင်မဟာမိတ်အဖွဲ့က ဦးဆောင်သော ဘလက်စတား စစ်တပ် အုပ်စုနှင့် စက်တင်ဘာ ညီလာခံက ဦးဆောင်သော စကြဝဠာ လူမှုအဖွဲ့အစည်း ၃ခု အုပ်စုတို့အတွက်မူ သူတို့သည် မည်သည့် အကြီးစားတိုက်ပွဲများကိုမျှ စီစဉ်ခြင်းမရှိဘဲ အသေးစား တစ်စိတ်တစ်ပိုင်း တိုက်ပွဲများကိုသာ ပြုလုပ်ခဲ့ကြသည်။ ထိုအစား၊ ပြန့်ကျဲနေသော ကြားနေအင်အားစုများသည် ယခုအချိန်အထိ အပြင်းအထန်ဆုံး တိုက်ခိုက်ခဲ့ကြသူများဖြစ်သည်။ ပြန့်ကျဲနေသော ကြားနေအင်အားစုများတွင် ကစားသမား အများဆုံးရှိသည်။ ဂိုဏ်းငယ်များစွာသည် မဟာမိတ်အဖွဲ့ငယ်များကို ဖွဲ့စည်းခဲ့ကြသည်။ သူတို့သည် အချင်းချင်း ပြင်းထန်စွာ တိုက်ခိုက်နေကြရုံသာမက အချို့သော ရဲတင်းသည့် ကစားသမားများသည် အသင်းများဖွဲ့စည်းကာ ဘလက်စတား စစ်တပ် အုပ်စု ကဲ့သို့သော အင်အားစုကြီးများ၏ အခြေစိုက်စခန်းများကိုပင် တိုက်ခိုက်ခဲ့ကြသည်။ သူတို့အများစုမှာ ရှုံးနိမ့်သွားသော်လည်း ရာခိုင်နှုန်းအနည်းငယ်သည် အဓိကအင်အားစုကြီး သုံးခုထံမှ အခြေစိုက်စခန်းအချို့ကို သိမ်းပိုက်နိုင်ခဲ့ကြသည်။

အလားတူ ပွဲများတွင် ပြန့်ကျဲနေသော ကစားသမားများကို ရှင်းလင်းခြင်းသည် ပုံမှန်အားဖြင့် ပထမဆုံးလုပ်ရမည့်အရာဖြစ်သည်။ သို့သော် ဤနေရာတွင် ၎င်းက ထိုသို့မဟုတ်ပေ။ စစ်ပွဲမှာ အလွန်ရက်စက်ကြမ်းကြုတ်ပြီး ကစားသမားများ အခြေခံအားဖြင့် ဂရုမစိုက်ကြသော ရှင်သန်နိုင်စွမ်း အကြိမ်ရေမှာ ယခုအခါ အရေးအကြီးဆုံး အရင်းအမြစ် ဖြစ်လာသည်။

အဓိကအင်အားစုကြီး သုံးခုတွင် သူတို့အလိုရှိသော မည်သည့် ပြန့်ကျဲနေသည့် အင်အားစုများကိုမဆို ဖယ်ရှားနိုင်စွမ်းရှိသော်လည်း ပျက်စီးဆုံးရှုံးမှုအချို့ကို မခံစားရဘဲ ထိုသို့လုပ်ရန်မှာ မဖြစ်နိုင်ပေ။ ကစားသမားများသည် အကြောက်အလန့်ကင်းပြီး ခုခံရန် ဘယ်တော့မှ လက်လျှော့မည်မဟုတ်ပေ။ အဓိကအင်အားစုကြီး သုံးခုပင်လျှင် ဆုံးရှုံးမှုအချို့ကို သေချာပေါက် ကြုံတွေ့ရမည်ဖြစ်သည်။ သူတို့အတွက် ဤပြန့်ကျဲနေသော ကစားသမားများအပေါ် အရေးကြီးသော ရှင်သန်နိုင်စွမ်း အကြိမ်ရေများကို အသုံးပြုခြင်းက လုံးဝ အလဟဿဖြစ်သည်။

ထို့ပြင် ပြန့်ကျဲနေသော ကစားသမားများကို အကြီးအကျယ် ရှင်းလင်းရန် ကြိုးပမ်းခြင်းက သူတို့ကို စည်းလုံးသွားစေပြီး ပြန်လည်တိုက်ခိုက်စေနိုင်ခြေ အများဆုံးဖြစ်သည်။ ထိုအချိန်ရောက်လျှင် သူတို့သည် သူတို့ကိုယ်သူတို့ ဒုက္ခရှာမိသလိုဖြစ်ပြီး ပြန့်ကျဲနေသော ကစားသမားများ၏ အပြင်းအထန် ရိုက်နှက်ခြင်းကို ခံရလိမ့်မည်။

စည်းမျဉ်းများက အချိန်ကန့်သတ်ချက်ကို မဖော်ပြထားသော်လည်း လူတိုင်းတွင် ခြောက်ရက်အတွင်း စစ်ပွဲ၏ရလဒ်များကို ဆုံးဖြတ်ရန် မပြောဘဲသိနေသော သဘောတူညီချက်တစ်ခု ရှိနေသည်။ သို့မဟုတ်ပါက ထိုအချိန်ရောက်လျှင် သူတို့၏ ရှင်သန်နိုင်စွမ်း အကြိမ်ရေသည် ပြန်လည်လန်းဆန်းလာမည်ဖြစ်ပြီး ၎င်းက ဂိုဏ်းမဟာမိတ်များအတွက် အလွန်ကုန်ကျစရိတ် များပြားပေလိမ့်မည်။

ကစားသမားများသည် နောက်တစ်ကြိမ် ပြန်လည်ရှင်သန်နိုင်သော်လည်း အချိန်ကြာလာသည်နှင့်အမျှ သူတို့၏ အရင်းအမြစ်များသည် သံသယဖြစ်ဖွယ်မရှိဘဲ ကုန်ဆုံးသွားမည်ဖြစ်သည်။ သူတို့သာ နောက်တစ်ကြိမ် ထပ်တိုက်ခိုက်ရမည်ဆိုလျှင် ဂိုဏ်းမဟာမိတ်များ၏ သိုလှောင်ရုံသည် ကြီးမားစွာ ထိခိုက်နစ်နာသွားမည်ဖြစ်သည်။ ထို့ပြင် သာမန်ကစားသမားများသည် သေဆုံးခြင်း ပြစ်ဒဏ်ကို အကြိမ်များစွာ ဖြတ်သန်းရန် ဆန္ဒရှိကြမည်မဟုတ်ပေ။

ဘလက်စတား နန်းတော်ရှိ သူ၏ သီးသန့် အလုပ်ရုံတွင် ဟန်ရှောင်းသည် အသစ်တည်ဆောက်ထားသော ဘုရင် ယန္တရားဝတ်စုံကို သိမ်းဆည်းလိုက်ပြီး ဖိုရမ်များကို ပေါ့ပေါ့ပါးပါး ဖွင့်ကာ ယနေ့အတွက် စစ်ပွဲအစီရင်ခံစာများကို ကြည့်ရှုလိုက်သည်။

'ရွှေရောင်မဟာမိတ်အဖွဲ့ ၈ နာရီ အစီရင်ခံစာ- အနိုင်ရနိုင်ခြေ ဆက်တိုက်တိုးလာခြင်း' - ဘန်ဟစ်ဒေါ့ ရေးသားသည်- "ရွှေရောင်မဟာမိတ်အဖွဲ့သည် လွန်ခဲ့သောရှစ်နာရီအတွင်း တိုက်ပွဲ ၄၁ ခု ဆင်နွှဲခဲ့ပြီး၊ ၄ ခုက သန်းအဆင့် တိုက်ပွဲများ၊ ၁၁ ခုက ငါးသိန်းအဆင့် တစ်စိတ်တစ်ပိုင်း တိုက်ပွဲများ၊ ၂၂ ခုက တစ်သိန်းအဆင့် တစ်စိတ်တစ်ပိုင်း တိုက်ပွဲများနှင့် ၄ ခုက အဖွဲ့ငယ် တိုက်ပွဲများဖြစ်သည်။ သန်းဆယ်ဂဏန်းအဆင့် တိုက်ပွဲများ မရှိပါ။ ၎င်းတို့အနက် ရွှေရောင်မဟာမိတ်အဖွဲ့သည် ၂၉ ပွဲ နိုင်ပြီး ၁၂ ပွဲ ရှုံးနိမ့်ခဲ့ရာ တိုက်ပွဲများ၏ ၇၀.၇၃% ကို အနိုင်ရရှိခဲ့ပြီး မနေ့ကနှင့် နှိုင်းယှဉ်ပါက ၃.၁၆% တိုးလာခဲ့သည်။ အလုံးစုံ ပျမ်းမျှသေဆုံးမှု အရေအတွက်မှာ ၂.၃၇၅ မှ ၂.၈၁၄ သို့ တိုးလာခဲ့သော်လည်း ပျမ်းမျှ ရှင်သန်မှု အမှတ်ပေးဇယား၏ ထိပ်ဆုံးတွင် ဆက်လက်ရပ်တည်နေပြီး ဒုတိယနေရာမှအဖွဲ့နှင့် သူတို့၏ အသာစီးရမှုကို ပိုမိုတိုးမြှင့်ထားသည်။ ယခု ကွာခြားချက်မှာ ဝ.၇၀၃ သို့ ရောက်ရှိနေပြီဖြစ်သည်။"

'ပျံသန်းနေသော ကျောက်ဆောင်ကမ်းပါး အမြန်အစီရင်ခံစာ' - ဂလက်ဆီတိုင်းမ် (တရုတ်ဇုန်) မှ- "ယနေ့တွင် ဟေးဝုဒ် တောင်ကြားရှိ ဂလက်ဆီစီးပွားရေးမဟာမိတ်အဖွဲ့နှင့် မြောက်ပိုင်းစစ်မျက်နှာ၏ အခြေစိုက်စခန်းသည် စက်တင်ဘာ ညီလာခံနှင့် ဒန်လန်းတို့၏ တိုက်ခိုက်ခြင်းကို ခံခဲ့ရသည်။ သူတို့၏ တယ်လီပို့ ခင်းကျင်းမှုများ အနှောင့်အယှက်ပေးခံရသောကြောင့် ဂလက်ဆီစီးပွားရေးမဟာမိတ်အဖွဲ့နှင့် မြောက်ပိုင်းစစ်မျက်နှာသည် အနီးကပ်ဆုံး တပ်ဖွဲ့များကို စစ်ကူအဖြစ် ဟေးဝုဒ် တောင်ကြား အခြေစိုက်စခန်းသို့ စေလွှတ်ခဲ့သည်။ သို့သော် သူတို့က ပျံသန်းနေသော ကျောက်ဆောင်ကမ်းပါးကို ဖြတ်သန်းသွားသောအခါ ရွှေရောင်မဟာမိတ်အဖွဲ့၏ ချုံခိုတိုက်ခိုက်မှုထဲသို့ ကျရောက်သွားပြီး ဆုံးရှုံးမှုအများအပြား ခံစားခဲ့ရသည်။ ယုံကြည်ရသော သတင်းရင်းမြစ်များအရ ရွှေရောင်မဟာမိတ်အဖွဲ့သည် ထိုနေရာသို့ အဖွဲ့တစ်ဖွဲ့ကို လျှို့ဝှက်စေလွှတ်ခဲ့ပြီး သူတို့ကို ဂိမ်းထဲမှ ထွက်(log off)ခိုင်းခဲ့သည်။ ပျံသန်းနေသော ကျောက်ဆောင်ကမ်းပါး တွင် ဂိမ်းထဲသို့ ဝင်(log in)ခြင်းအားဖြင့် သူတို့သည် ရန်သူများကို လုံးဝ အံ့အားသင့်သွားစေပြီး ကြီးမားသော အောင်ပွဲကို ရရှိခဲ့သည်။"

အလားတူ အစီရင်ခံစာများစွာ ရှိနေပြီး ဟန်ရှောင်းက မည်သည့် ဂိုဏ်းမဟာမိတ်များ ထုတ်ပယ်ခံရသည်ကို သိရန် ဖိုရမ်များမှ မထွက်ခွာမီ နာရီဝက်ခန့်အကြာ ပြုံးကာ အကြမ်းဖျင်း ဖတ်ရှုလိုက်သည်။

ဘီ ဘီ ဘီ။ ဤအချိန်တွင် သူ၏ ဆက်သွယ်ရေးစက်က မြည်လာခဲ့သည်။ ၎င်းမှာ အံ့သြစရာကောင်းစွာပင် ကြက်သွေးရောင်အင်ပါယာ စူးစမ်းရှာဖွေရေးတပ်၏ စစ်သေနာပတိ၊ ညီအစ်ကို တာရိုကော့ဗ် ဖြစ်နေသည်။

ဟန်ရှောင်းသည် ဆက်သွယ်ရေးကို လက်ခံလိုက်ပြီး အပြုံးဖြင့် မေးလိုက်သည်။ "ယိုးဟိုး၊ အဘိုးကြီး တာရို၊ ဘာကိစ္စလဲ။"

"သေမျိုးမဟုတ်သူတွေကြားက စစ်ပွဲကို မင်း အာရုံစိုက်နေခဲ့တာလား။" တာရိုကော့ဗ်၏ လေသံမှာ လေးနက်နေသည်။

"ဟီးဟီး၊ ငါ့ရဲ့ကွပ်ကဲမှုအောက်မှာ သေမျိုးမဟုတ်သူတွေ အများကြီးရှိတယ်။ ငါက ဘယ်လိုလုပ် အာရုံမစိုက်ဘဲ နေနိုင်မှာလဲ။ လုပ်ပါ၊ မင်းက ငါ့ကို ဒီလိုစမ်းသပ်ဖို့ လိုလို့လား။ ကြက်သွေးရောင်အင်ပါယာ အထက်လူကြီးတွေက မင်းကို လွှတ်လိုက်တာလား။"

တာရိုကော့ဗ်၏ ရည်ရွယ်ချက်များမှာ အဘယ်နည်းကို ဟန်ရှောင်း အကြမ်းဖျင်း ခန့်မှန်းမိသည်။

"ဟမ်း..." တာရိုကော့ဗ် ငြင်းဆိုခြင်းမရှိဘဲ ဖြည်းညှင်းစွာ ပြောလိုက်သည်။ "ငါ မေးချင်တာက သေမျိုးမဟုတ်သူတွေအကြောင်း မင်း တကယ်ဘယ်လောက်သိလဲ။"

"ပိုပြီး တိတိကျကျ ပြောပါဦး။"

"ကောင်းပြီလေ... ထောက်လှမ်းရေးဌာနနဲ့ အင်ပါယာ သိပ္ပံတက္ကသိုလ်က သေမျိုးမဟုတ်သူတွေကို လေ့လာစောင့်ကြည့်တာကို ဘယ်တော့မှ မရပ်တန့်ခဲ့ဘူး။ သေမျိုးမဟုတ်သူတွေရဲ့ အစောဆုံးအသုတ်တွေထဲက တစ်ခုက ရေပင်လယ်ဂြိုဟ်ပေါ်မှာ ပေါ်လာခဲ့ပြီး အဲဒီအထဲက အများစုကို မင်းက စုဆောင်းခဲ့တာပဲ။ မင်းမှာ သူတို့နဲ့ပတ်သက်ပြီး အရမ်းနက်ရှိုင်းတဲ့ နားလည်မှုရှိပုံရတယ်။ ငါတို့ သိချင်တာက သေမျိုးမဟုတ်သူတွေက ဘာလို့ မကြာခဏ ပျောက်ကွယ်သွားရတာလဲ။ သူတို့ ပျောက်ကွယ်သွားပြီး ပြန်ပေါ်လာတဲ့အခါတိုင်း ဘာလို့ သူတို့ရဲ့ခွန်အားတွေ အားလုံးက တိုးလာရတာလဲ။ သူတို့ရဲ့ ဒီခွန်အားတိုးတက်မှုမှာ ကန့်သတ်ချက်ရှိလား။ သူတို့ကို တကယ်ပဲ အပြည့်အဝ ထိန်းချုပ်လို့ရလား။"

မေးခွန်းကွင်းဆက်တစ်ခုက ဟန်ရှောင်းထံ ပစ်ပေါက်ခံလိုက်ရသည်။ သူ ချက်ချင်း ပြန်မဖြေခဲ့ပေ။ ကြက်သွေးရောင်အင်ပါယာ၏ သဘောထား အပြောင်းအလဲကို သူ ခံစားလိုက်ရသည်။

စကြဝဠာ လူမှုအဖွဲ့အစည်း ၃ခုသည် သေမျိုးမဟုတ်သူများကို အမြဲတမ်း လေ့လာနေခဲ့ပြီး ယခုအခါတွင် အပြင်ပန်းအားဖြင့် ဤကိစ္စနှင့်ပတ်သက်၍ 'ကျွမ်းကျင်သူ' တစ်ဦးဖြစ်သော သူ၏ထံသို့ နောက်ဆုံး၌ ရောက်လာခဲ့ပြီဖြစ်သည်။ ၎င်းမှာ ကမ္ဘာ့ဆာဗာစစ်ပွဲကြောင့်ဖြစ်ကြောင်း ရှင်းလင်းသည်။ ၎င်းက သူတို့ကို သေမျိုးမဟုတ်သူများအပေါ် ပို၍ပင် အလေးအနက်ထားလာစေခဲ့သည်။

'စကြဝဠာ၏ ကင်ဆာများ' ဟူသော အမည်ပြောင်သည် ဗားရှင်း၏ တစ်ဝက်ကျော်ကြာ တည်ရှိနေခဲ့သည်။ ကစားသမားများသည် နေရာတိုင်းရှိ မတူညီသော ပွဲများတွင် အမြဲတမ်း တက်ကြွစွာ ပါဝင်နေခဲ့ကြသည်။ မကြာမီက ဘလက်စတား ဖလား ရှိခဲ့သော်လည်း ၎င်းသည် ပြိုင်ပွဲတစ်ခုမျှသာဖြစ်သည်။ ဤတစ်ကြိမ်တွင်မူ အဖွဲ့အစည်းအသီးသီးသည် သေမျိုးမဟုတ်သူများသာ ပါဝင်သော အကြီးစား တိုက်ပွဲကြီးတစ်ခုကို နောက်ဆုံး၌ မျက်မြင်တွေ့ရှိခဲ့ရခြင်းမှာ ပထမဆုံးအကြိမ်ဖြစ်သည်။

သူတို့ အသုံးပြုသော လက်နက်များနှင့် သင်္ဘောစုများသည် ထူးခြားလှသည်မဟုတ်သလို၊ ဂလက်ဆီ တိုက်ပွဲများကဲ့သို့ ကြီးမားခမ်းနားမှုလည်း မရှိပေ။ တုန်လှုပ်ဖွယ်ကောင်းသည့် တစ်ခုတည်းသောအရာမှာ စူပါများ မည်မျှ ပြင်းထန်စွာ တိုက်ခိုက်ခဲ့ကြသနည်းဆိုသည်ပင်။ မတူညီသော အင်အားစုများမှ သေမျိုးမဟုတ်သူများသည် ယခင်ကလည်း တိုက်ခိုက်ခဲ့ဖူးသော်လည်း ဤတစ်ကြိမ်တွင်မူ များစွာ ပို၍ သွေးထွက်သံယိုဖြစ်ပြီး ပို၍ ရက်စက်ကြမ်းကြုတ်သည်။ အဆင့်မြင့် လူမှုအဖွဲ့အစည်းများသည် အံ့သြရုံသာရှိသော်လည်း ထိုအဖွဲ့အစည်းငယ်လေးများမှာမူ လန့်ဖျပ်သွားလုနီးပါးပင်။

ဒါဆို စကြဝဠာ၏ ကင်ဆာများ ကြားက စစ်ပွဲဆိုတာ ဒီလိုမျိုးကိုး။ ဒီလူတွေရဲ့ ကြမ်းတမ်းမှုကို ငါတို့ အထင်သေးမိတုန်းပဲ။

အတိတ်က သေမျိုးမဟုတ်သူများ ပြသခဲ့သော ထူးခြားချက်များကို စဉ်းစားမိသောအခါ အင်ပါယာသည် သူတို့၏လေ့လာမှုများကို ဖြည်းဖြည်းချင်းလုပ်ဆောင်ရန် အားလပ်ချိန် မရှိတော့သောကြောင့် ပိုမိုအသေးစိတ်သော သတင်းအချက်အလက်များကို ရရှိရန် မျှော်လင့်ကာ ဟန်ရှောင်းထံသို့ ချဉ်းကပ်လာခဲ့သည်။

"သူတို့ကို ငါ အဲဒီလောက် သေချာမသိပါဘူး။ ငါသိတာကို မင်းတို့လည်း သိပြီးလောက်ပါပြီ..."

သေချာသည်မှာ ဟန်ရှောင်းသည် အမှန်တရားအားလုံးကို ပြောပြမည်မဟုတ်ပေ။ သူသည် အကြောင်းအရာအချို့ကို ပေါ့ပေါ့ပါးပါး ပြောလိုက်သည်။ အများစုမှာ အခြားသူများလည်း ရရှိနိုင်သော သတင်းအချက်အလက်များဖြစ်ပြီး ရှားပါးသော သို့မဟုတ် အသစ်အဆန်း တစ်ခုမျှမရှိပေ။

"ဒါ မင်းသိသမျှ အကုန်ပဲလား။" တာရိုကော့ဗ်က မယုံကြည်သေးပေ။

"ဘာရှိဦးမှာလဲ။ အခြားသူတွေထက် အရင် ငါက ပုံစံအချို့ကို ရှာတွေ့နိုင်ခဲ့ရုံပါ။ ငါက သေမျိုးမဟုတ်သူမှ မဟုတ်တာ။ အရာအားလုံးကို ငါက ဘယ်လိုလုပ် သိနိုင်မှာလဲ။" ဟန်ရှောင်း နောက်ပြောင်လိုက်သည်။

"မင်းပြောတာမှန်ပါတယ်..." တာရိုကော့ဗ် ခေါင်းညိတ်လိုက်သည်။

တကယ်တော့ ကြက်သွေးရောင်အင်ပါယာသည် ဆယ်စုနှစ်များစွာကတည်းက ဘလက်စတားကို သေမျိုးမဟုတ်သူတစ်ဦးဟု သံသယရှိခဲ့သည်။

သို့သော် မည်သူကမျှ သူ့ကို မသတ်နိုင်ခဲ့သောကြောင့် အမှန်တရားကို သိရန် လမ်းစမရှိခဲ့ပေ။

ထို့နောက် ဘလက်စတားသည် သေမျိုးမဟုတ်သူများကဲ့သို့ အချိန်အပိုင်းအခြားအလိုက် ပျောက်ကွယ်သွားခြင်း မရှိသောကြောင့် အင်ပါယာက ဤသံသယကို စွန့်လွှတ်လိုက်ခြင်းဖြစ်သည်။

တာရိုကော့ဗ် ထွက်သွားပြီးနောက် ဟန်ရှောင်းသည် သူ၏မျက်နှာပေါ်ရှိ အပြုံးကို ဖယ်ရှားလိုက်ပြီး လေးနက်သွားသည်။

သူ အင်တာဖေ့စ်ကိုဖွင့်ကာ အတွေ့အကြုံ မီတာကို ကြည့်လိုက်ပြီး ခန့်မှန်းချက်တစ်ခု ပြုလုပ်လိုက်သည်။

"အတွေ့အကြုံအမှတ် ရိတ်သိမ်းတဲ့ ဒီနှုန်းအရဆိုရင် ဒီတိုက်ပွဲ ပြီးသွားတဲ့အခါ ပရိုလိဂ် မစခင် အဆင့် ၃၄၀ အတန်းအစားရာထူးတက်ခြင်းကို ပြီးမြောက်ဖို့ ငါ့မှာ အတွေ့အကြုံ လုံလောက်တာထက်တောင် ပိုနေလိမ့်မယ်... ဟမ်း၊ ဒီတစ်ကြိမ်မှာ ဆင့်ကဲပြောင်းလဲခြင်း ကုဗတုံးကို ငါ ထပ်သုံးလို့ရတယ်။"

ဟန်ရှောင်း အနည်းငယ် မျက်မှောင်ကြုတ်လိုက်သည်။

ကစားသမားများ၏ ခွန်အား တိုးလာသည်နှင့်အမျှ စကြဝဠာ၏ အခြေအနေမှာ ပို၍ပို၍ ပရမ်းပတာ ဖြစ်လာမည်ဖြစ်သည်။ သူသည် တတ်နိုင်သမျှ မြန်မြန် ပိုမိုသန်မာလာခြင်းအားဖြင့်သာ အပြောင်းအလဲအမျိုးမျိုးကို ဖြေရှင်းနိုင်မည်ဖြစ်သည်။ ထိုအချိန်ရောက်လျှင် အဆင့်မြင့် လူမှုအဖွဲ့အစည်းများက မည်သို့ပင် တုံ့ပြန်စေကာမူ သူက ၎င်းကို ဖြေရှင်းနိုင်မည်ဖြစ်သည်။

အကန့်အသတ်မဲ့ ဘဏ္ဍာရေးအုပ်စုမှ ကစားသမားများသည်လည်း ကမ္ဘာ့ဆာဗာစစ်ပွဲ၏ အစိတ်အပိုင်းတစ်ခုဖြစ်သည်။ သူတို့သည် ပြန့်ကျဲနေသော အင်အားစုများအကြားရှိ အင်အားစုကြီးများထဲမှ တစ်ခုဖြစ်သည်။

ဆိုရိုကင်သည်လည်း ဤတိုက်ပွဲကို အာရုံစိုက်နေသော်လည်း လေ့လာစောင့်ကြည့်ရန်သာ မဟုတ်ပေ- သူ့တွင် အခြားအစီအစဉ်များ ရှိနေသည်။

"ဒါက သေမျိုးမဟုတ်သူတွေကို ဆွဲဆောင်ဖို့ အခွင့်အရေးကောင်းတစ်ခုလို့ ထင်ရတယ်..." ဆိုရိုကင်၏ မျက်လုံးများ လင်းလက်သွားခဲ့သည်။

သူသည် သေမျိုးမဟုတ်သူများကို စုဆောင်းရန် အမြဲတမ်း စိတ်အားထက်သန်နေခဲ့သည်။ သူသည် ကစားသမားများနှင့် ပတ်သက်၍ အမှန်တရားကို မသိသော်လည်း ဟန်ရှောင်း လျှောက်လှမ်းခဲ့သော လမ်းကြောင်းက သူ့ကို အကြံဉာဏ်အချို့ ပေးခဲ့သည်။

ဆိုရိုကင်သည် ဘလက်စတား စစ်တပ်၏ သမိုင်းကြောင်းကို အထူးသဖြင့် သေမျိုးမဟုတ်သူများကို ဆွဲဆောင်ရန် ဘလက်စတား စစ်တပ် အသုံးပြုခဲ့သော နည်းလမ်းများကို ဂရုတစိုက် လေ့လာခဲ့သည်။ အတိတ်က ဖြစ်ပျက်ခဲ့သည်များကို ကောက်ချက်ချခြင်းအားဖြင့် သူသည် ပုံစံများစွာကို ရှာတွေ့ခဲ့သည်။

ယခုအချိန်တွင် ဆိုရိုကင်သည် ဘလက်စတား၏ နည်းလမ်းများကို သူ ကျွမ်းကျင်နေပြီဟု ခံစားခဲ့ရသည်။

"ဒီလောက်များပြားတဲ့ သေမျိုးမဟုတ်သူတွေကြားက ဒီစစ်ပွဲဟာ သေမျိုးမဟုတ်သူတွေကြားမှာ အကန့်အသတ်မဲ့ ဘဏ္ဍာရေးအုပ်စု နာမည်ကောင်းရဖို့ အခွင့်အရေးကောင်းတစ်ခုပဲ။ အကန့်အသတ်မဲ့ ဘဏ္ဍာရေးအုပ်စုရဲ့ သေမျိုးမဟုတ်သူတွေက နောက်ဆုံးမှာ အနိုင်ရခဲ့ရင် အဲဒါက သေမျိုးမဟုတ်သူတွေကို ပိုပြီး ဆွဲဆောင်နိုင်လိမ့်မယ်..."

ပုံမှန်အားဖြင့် အကန့်အသတ်မဲ့ ဘဏ္ဍာရေးအုပ်စုမှ သေမျိုးမဟုတ်သူများသည် အသာစီးမရရှိကြပေ။ သူတို့ အနိုင်ရရှိစေရန်အတွက် သူက ဝင်ရောက်စွက်ဖက်ရမည်ဖြစ်သည်။ မည်သို့ပင်ဖြစ်စေ အခြားသော အဆင့် အေ အထက်ဆင့်များကဲ့သို့ သူ၏ နာမည်ဂုဏ်သတင်းကြောင့် သူ ချုပ်ချယ်ခံမထားရပေ။ အဆင့် အေ အထက်ဆင့် တစ်ဦးဖြစ်သော သူက အဆင့် ဘီ စူပါများကြားရှိ စစ်ပွဲတစ်ခုကို အရှက်မရှိ ဝင်ရောက်စွက်ဖက်သည်ဆိုသော သတင်း ထွက်သွားလျှင်တောင်မှ သူ၏ နာမည်ဂုဏ်သတင်းမှာ ထိခိုက်မည်မဟုတ်ပေ၊ အကြောင်းမှာ အစကတည်းက သူ့တွင် နာမည်ဂုဏ်သတင်း မရှိသောကြောင့်ဖြစ်သည်။ အဆင့် အေ အထက်ဆင့် တစ်ဦးအနေဖြင့် သူ၏ အပြည့်အဝခွန်အားကို အသုံးမပြုဘဲနှင့်ပင် သူသည် ဤအဆင့်ရှိ တိုက်ပွဲများ၏ ရလဒ်များကို ဆုံးဖြတ်နိုင်စွမ်းရှိသည်။ ထို့ပြင် သူ၏ နည်းလမ်းများသည် အလွန်လျှို့ဝှက်လှသည်။ ဤ အဆင့် ဘီ သေမျိုးမဟုတ်သူများသည် ၎င်းတို့ကို ရှာဖွေတွေ့ရှိနိုင်မည်မဟုတ်ဟု သူ ယုံကြည်ထားသည်။

"ဒါက စမ်းကြည့်သင့်ပုံရတယ်။ ငါ ဒါကို လုပ်ရမယ်..." ဆိုရိုကင်သည် သူ၏စိတ်ကို ဆုံးဖြတ်လိုက်သည်။

သူ၏ ခန့်မှန်းချက်မှာ တကယ်တမ်း အဓိပ္ပာယ်ရှိလှသည်။ သို့သော် ဖိုရမ်များကို သူ မမြင်နိုင်သောကြောင့် အရေးအကြီးဆုံး သတင်းအချက်အလက်များကို သူ လွတ်ကင်းနေခဲ့သည်... ကစားသမားများ တိုက်ခိုက်နေကြသည်ကို သူ လုံးဝမသိခဲ့သလို၊ ပို၍အရေးကြီးသည်မှာ စည်းမျဉ်းများက ကွန်ပျူတာဇာတ်ကောင် များကို ဝင်ရောက်စွက်ဖက်ခြင်းမှ တားမြစ်ထားသည်ဟူသောအချက်ကို သူ လုံးဝမသိရှိခဲ့ခြင်းပင်ဖြစ်သည်။

အကန့်အသတ်မဲ့ ဘဏ္ဍာရေးအုပ်စုမှ ကစားသမားများသည် စည်းမျဉ်းများကို မချိုးဖောက်ရဲကြပေ။ သူတို့သည် အရင်းအမြစ် တန်ချိန်များစွာကို ရင်းနှီးမြှုပ်နှံထားပြီး သူတို့ရရှိထားသော ရလဒ်ကောင်းများကို ထိန်းသိမ်းရန် ကြိုးစားကာ အလုပ်ကြိုးစားနေကြသည်။

သူတို့ ဘယ်သောအခါမှ မျှော်လင့်ထားမည်မဟုတ်သောအရာမှာ သူတို့၏ကိုယ်ပိုင် အဖွဲ့အစည်းခေါင်းဆောင်က သူတို့ကို ချက်ချင်း ပြိုင်ပွဲမှ ထုတ်ပယ်ခံရစေရန် ပြင်ဆင်နေခြင်းပင်ဖြစ်သည်။

စာစဉ် (၆၈)၊ အခန်း (၁၁၈၇) ပြီးပါပြီ။

လင်းဆက်

+++++

အခန်း (၁၁၈၈) ဇာတ်ညွှန်းက အဲဒီလိုရေးထားတာ မဟုတ်ဘူးလေ

ရွှေတောင် အတွင်းတွင် တောင်ကို ဖောက်၍ အခြေစိုက်စခန်းကြီးတစ်ခု တည်ဆောက်ထားပြီး ၎င်းပတ်လည် ကောင်းကင်ယံတွင် စစ်သင်္ဘောများနှင့် ယန္တရားအစောင့်အဖွဲ့တစ်ဖွဲ့ ဝဲပျံနေကာ ဧရိယာကို တင်းကြပ်စွာ စောင့်ကြပ်နေကြသည်။

ဤသည်မှာ အကန့်အသတ်မဲ့ ဘဏ္ဍာရေးအုပ်စု ပိုင်ဆိုင်သော အကြီးဆုံး ဂိုဏ်းမဟာမိတ်အဖွဲ့ဖြစ်သည့် ကမ္ဘာပျက်ကပ် ဖောင်ဒေးရှင်း၏ ပင်မအခြေစိုက်စခန်းဖြစ်သည်။ တောင်၏ ခြောက်ဆယ်မှ ခုနစ်ဆယ်ရာခိုင်နှုန်းခန့်ကို ယန္တရား ကာကွယ်ရေး အဆောက်အအုံများအဖြစ် ပြောင်းလဲထားပြီး ဤပင်မအခြေစိုက်စခန်းကို မှီခိုကာ ဆက်တိုက်ချဲ့ထွင်ရန်အတွက် ပတ်ဝန်းကျင်ရှိ ဧရိယာငယ်များကိုလည်း ရှင်းလင်းထားခဲ့သည်။ တိုက်ပွဲ၏ တတိယနေ့ အလယ်ပိုင်းတွင် ရွှေတောင် အခြေစိုက်စခန်းသည် လေအမဲလိုက် တောင်ကြားရှိ ဟက်စ် လက်နက်ကိုင်တပ်ဖွဲ့ ကို အောင်နိုင်ရန်အတွက် အထူးတပ်ဖွဲ့ သုံးခုကို စေလွှတ်ခဲ့သည်။ သူတို့သည် ဧရိယာကို သိမ်းပိုက်ထားသော အခြား ဂိုဏ်းမဟာမိတ်ကြီးတစ်ခု ဖြစ်သည်။ သူတို့နှစ်ဖွဲ့သည် ဒေသတွင်း အာဏာစက်အတွက် တိုက်ခိုက်နေခဲ့ကြသည်။

ဟက်စ် လက်နက်ကိုင်တပ်ဖွဲ့ သည် သူတို့၏ ရန်သူများ တိုက်ခိုက်လာမည်ကို ကြာမြင့်စွာကတည်းက ထောက်လှမ်းမိသောကြောင့် သူတို့၏ တပ်ဖွဲ့များကို ရုပ်သိမ်းခဲ့သည်။ နှစ်ဖက်စလုံးသည် လေအမဲလိုက် တောင်ကြား အပြင်ဘက်တွင် ပြင်းထန်စွာ တိုက်ခိုက်ခဲ့ကြပြီး မည်သည့်ဘက်ကမှ နောက်ဆုတ်ရန် ဆန္ဒမရှိကြပေ။

နှစ်ဖက်ကြားရှိ ပြင်းထန်သောတိုက်ပွဲ ဖြစ်ပွားနေချိန်တွင်ပင် ပြောင်းပြန် ခရူးဆိတ် ဟုခေါ်သော အခြားဂိုဏ်းမဟာမိတ်တစ်ခုက ရွှေတောင် အခြေစိုက်စခန်းအပေါ်သို့ ရုတ်တရက် ဝင်ရောက်စီးနင်းခဲ့သည်။

သူတို့သည် ဤအရာအတွက် အချိန်အကြာကြီး စီစဉ်ခဲ့ပြီး ဧရိယာကို ချုံခိုတိုက်ခိုက်ရန် သူတို့၏တပ်ဖွဲ့များကို တစ်ရက်ခွဲကြိုတင်၍ ပုန်းအောင်းတပ်စွဲထားခဲ့သည်။ သူတို့သည် ထိုဧရိယာတွင် လျှို့ဝှက် ပြန်လည်ရှင်သန်ရေး ပွိုင့်တစ်ခုကိုပင် တည်ဆောက်ထားခဲ့သည်။ နှစ်ဖက်စလုံး၏ အဓိကတပ်ဖွဲ့များ တိုက်ပွဲဝင်နေသည့် အခွင့်အရေးကို အသုံးပြု၍ သူတို့သည် အခြားသူ၏ အခြေစိုက်စခန်းကို ခိုးယူရန် ရည်ရွယ်ကာ နှိုင်းယှဉ်ချက်အရ ဟာလာဟင်းလင်းဖြစ်နေသော ကမ္ဘာပျက်ကပ် ဖောင်ဒေးရှင်း၏ အခြေစိုက်စခန်းကို တိုက်ခိုက်ခဲ့ကြသည်။

ကမ္ဘာပျက်ကပ် ဖောင်ဒေးရှင်းသည် စစ်မျက်နှာနှစ်ခုတွင် တိုက်ခိုက်နေရသည့် အားနည်းချက် ရှိနေသည်။ တကယ်တော့ သူတို့သည် လေအမဲလိုက် တောင်ကြား ကို အောင်နိုင်ရန် ကြိုးပမ်းနေသော တပ်များကို ရုပ်သိမ်းရန် ရည်ရွယ်ထားခဲ့သည်။ သို့သော် ဟက်စ် လက်နက်ကိုင်တပ်ဖွဲ့ သည် ပြောင်းပြန် ခရူးဆိတ် ၏ ပေါ်လာမှုကို ကြိုတင်မျှော်လင့်ထားပုံရပြီး ကမ္ဘာပျက်ကပ် ဖောင်ဒေးရှင်း၏ အဓိကတပ်ဖွဲ့ကို ရစ်ပတ်ထားကာ သူတို့ထံမှ ခွဲထွက်ခွင့်မပေးခဲ့ပေ။

ဤအချိန်တွင် ရွှေတောင် ရှိ အခြေစိုက်စခန်းသည် အခြားသော ပြင်းထန်သည့် စစ်မြေပြင်တစ်ခုအဖြစ် ပြောင်းလဲသွားခဲ့သည်။ အမြောက်စစ်သင်္ဘောများနှင့် တိုက်ခိုက်ရေးယန္တရား အများအပြားသည် လေထဲတွင် တိုက်ခိုက်နေကြပြီး ကောင်းကင်ယံတွင် မီးရှူးမီးပန်းများ အဆက်မပြတ် ပေါ်ထွက်နေကာ မြေပြင်တွင်လည်း တောင်ကုန်းများနှင့် လွင်ပြင်များ၌ တိုက်ခိုက်နေကြသော ကစားသမားများဖြင့် ပြည့်နှက်နေသည်။

ကမ္ဘာပျက်ကပ် ဖောင်ဒေးရှင်းသည် ဤအချိန်တွင် သူတို့၏ အထူးတပ်ဖွဲ့များအားလုံးကို အခြေခံအားဖြင့် စေလွှတ်ထားပြီး သူတို့၏ အခြေစိုက်စခန်းကို စောင့်ကြပ်ရန် သူတို့၏ ထိပ်တန်းအဖွဲ့ဝင် အများအပြား မရှိတော့ပေ။ အခြေစိုက်စခန်းရှိ အဖွဲ့ဝင်အများစုမှာ သူတို့၏ အပြင်ဘက်အဖွဲ့ဝင်များသာဖြစ်ပြီး ပြောင်းပြန် ခရူးဆိတ် မှ ထိပ်တန်းအဖွဲ့ဝင်များ၏ တိုက်ခိုက်မှုနှင့် ရင်ဆိုင်ရသောအခါ သူတို့သည် အခြေစိုက်စခန်းမှ တည်ငြိမ်စွာ နောက်ဆုတ်ရန်သာ တတ်နိုင်တော့သည်။

အခြေစိုက်စခန်း၏ ပင်မအမိန့်ပေးခန်းသို့ အဆင်မပြေသော စစ်ပွဲအစီရင်ခံစာများ ရေကြီးသကဲ့သို့ ပြန်လည်ရောက်ရှိလာသောကြောင့် ကမ္ဘာပျက်ကပ် ဖောင်ဒေးရှင်း၏ ခေါင်းဆောင် စစ်စီဖပ်စ် မှာ ဝိုင်းရံခံထားရသလို ခံစားလိုက်ရသည်။

"ဟက်စ် လက်နက်ကိုင်တပ်ဖွဲ့ က ငါတို့ကို ရုတ်တရက် ရန်စတာ အံ့သြစရာမရှိဘူး။ ငါတို့ကို သူတို့ရဲ့ ထောင်ချောက်ထဲ ကျသွားအောင် သွေးဆောင်ဖို့ချည်းပဲ။ သူတို့က တကယ့်ကို နတ်ဆိုးတွေပဲ။"

စစ်စီဖပ်စ်သည် ဟက်စ် လက်နက်ကိုင်တပ်ဖွဲ့ ကို တိုက်ခိုက်ရန် အဖွဲ့ကို ဦးဆောင်ခဲ့သော သူ၏ ဒုတိယဥက္ကဋ္ဌကို ဂိုဏ်းချန်နယ်မှတစ်ဆင့် အလျင်အမြန် ဆက်သွယ်လိုက်သည်။

"ငါတို့ကို စစ်ကူပေးဖို့ မြန်မြန်ပြန်လာခဲ့။ ဒီက အဘိုးကြီးက သူတို့ကို အကြာကြီး တောင့်ခံထားနိုင်မှာ မဟုတ်ဘူး။"

"သူဌေး၊ ငါတို့ လုံးဝ နောက်ဆုတ်လို့ မရဘူး။ ဟက်စ် လက်နက်ကိုင်တပ်ဖွဲ့ က ငါတို့ကို အရမ်းကပ်ပြီး လိုက်နေတယ်။ ငါတို့အားလုံး မသေသရွေ့ ပြန်လာဖို့ လမ်းစမရှိဘူး။ ငါတို့ အဓိကတပ်ဖွဲ့ရဲ့ ပျမ်းမျှသေဆုံးမှု အရေအတွက်က ၅.၁၄ ကို ရောက်နေပြီ။ ငါတို့ နောက်တစ်မှတ် ထပ်တက်သွားရင် ငါတို့ ပိုပြီး အထိနာသွားလိမ့်မယ်။ အခုအချိန်မှာ ငါတို့ ပြန်သွားနိုင်ရင်တောင်မှ ငါတို့ရဲ့ သင်္ဘောတွေနဲ့ လက်နက်တွေကို ရန်သူက သိမ်းပိုက်သွားလိမ့်မယ်။"

"ငါတို့ ဒီအဆင့်ကို ရောက်နေပြီပဲ။ နည်းနည်းလောက် ရှုံးသွားရင်လည်း တတ်နိုင်တာ မဟုတ်ဘူး။ ငါတို့ရဲ့ အခြေစိုက်စခန်းကို ကာကွယ်ဖို့က ပိုအရေးကြီးတယ်။"

"ငါတို့ မလုပ်နိုင်ဘူး။ ရန်သူက ကြိုတင်ပြင်ဆင်မှုတွေ လုပ်ထားပြီးပြီ။ ငါတို့အားလုံးက သေဆုံးခြင်းကနေတစ်ဆင့် ပြန်လာဖို့ ကြိုးစားရင် သူတို့က ပြောင်းပြန် ခရူးဆိတ် နဲ့ လက်တွဲပြီး ငါတို့ရဲ့ ပင်မအခြေစိုက်စခန်းကို တိုက်ခိုက်ဖို့ အရှိန်အဟုန်ကို သေချာပေါက် တွန်းတင်လိမ့်မယ်။"

၎င်းကိုကြားသောအခါ စစ်စီဖပ်စ်သည် သူ၏ခေါင်းကို အသည်းအသန် ကုတ်လိုက်သည်။

သူတို့ အငိုက်မိသွားသောကြောင့် ယခုအခြေအနေမှာ နှစ်ယောက်တစ်ယောက် ဖြစ်နေပြီး ကမ္ဘာပျက်ကပ် ဖောင်ဒေးရှင်း တစ်ခုတည်းဖြင့် ၎င်းကို မကိုင်တွယ်နိုင်ပေ။ အကန့်အသတ်မဲ့ ဘဏ္ဍာရေးအုပ်စု၏ စစ်မျက်နှာတွင်ရှိသော အခြား ဂိုဏ်းမဟာမိတ်များထံမှ အကူအညီတောင်းခံရန်သာ သူ တတ်နိုင်တော့သည်။

"ငါတို့ရဲ့ စစ်ကူတွေ အချိန်မီ ရောက်လာဖို့ မျှော်လင့်ပါတယ်။ ဒီတစ်ကြိမ်တော့ ငါ တကယ်ပဲ ကြီးမားတဲ့ ဆုံးရှုံးမှုကို ခံစားလိုက်ရပြီ..."

လေးလံသော နှလုံးသားဖြင့် သူသည် အချိန်နှင့်တစ်ပြေးညီ စစ်မြေပြင် ပုံရိပ်ယောင်ပေါ်သို့ သူ၏မျက်လုံးများကို ပြန်လည်အာရုံစိုက်လိုက်သော်လည်း နေရာမှာပင် ရေခဲသွားခဲ့သည်။

"ဒါ... ဒါက ဘယ်လိုအခြေအနေလဲ။"

သူ၏ အဖွဲ့ဝင်များနှင့် တပ်မှူးများကို လှည့်ကြည့်လိုက်ရာ လူတိုင်းက သရဲတစ္ဆေကို တွေ့လိုက်ရသကဲ့သို့ တူညီသော တုန်လှုပ်ဖွယ် မျက်နှာအမူအရာ ရှိနေသည်ကို သူ တွေ့လိုက်ရသည်။

ရွှေတောင် အခြေစိုက်စခန်း အပြင်ဘက်ရှိ ရှေ့တန်းစစ်မျက်နှာကို ပြသနေသော စောင့်ကြည့်ရေး စခရင်တွင် ပြောင်းပြန် ခရူးဆိတ်၏ အဖွဲ့တစ်ဖွဲ့သည် ကာကွယ်ရေးမျဉ်းကို ချိုးဖောက်ပြီး သူတို့၏ တပ်များထဲသို့ ဝင်တိုက်သွားသည်။

"သူတို့ကို တစ်ချက်တည်း သတ်လိုက်။"

အသေခံတပ်ဖွဲ့သည် သူတို့အားလုံးကို စုပေါင်း၍ ပေါက်ကွဲပစ်ရန် အသင့်ပြင်ကာ သူတို့၏ စွမ်းရည်အားလုံးကို ပြင်ဆင်လိုက်ကြသည်။

ဤအချိန်တွင် သူတို့၏ လှုပ်ရှားမှုအားလုံး ရပ်တန့်သွားပြီး အနှောင့်အယှက်ခံလိုက်ရသောကြောင့် သူတို့၏ ခန္ဓာကိုယ်ပေါ်ရှိ အလင်းရောင်များ ပျောက်ကွယ်သွားသည်။

၎င်းက အသေခံတပ်ဖွဲ့အပေါ်တွင်သာ သက်ရောက်မှုရှိသည်မဟုတ်ဘဲ ပြောင်းပြန် ခရူးဆိတ် ကစားသမားအားလုံးတွင် သူတို့အတွက် ရပ်တန့်ခလုတ်ကို တစ်ပြိုင်နက်တည်း နှိပ်လိုက်သကဲ့သို့ တူညီသော တုံ့ပြန်မှု ရှိနေခဲ့သည်။ သူတို့၏ လုပ်ရပ်များအားလုံး ရပ်တန့်သွားကာ တပ်များကို ချက်ချင်း အဆက်အသွယ်ပြတ်တောက်သွားစေပြီး လူစာရင်းကို ပြဲသွားစေခဲ့သည်။

ဤကစားသမားများ၏ အင်တာဖေ့စ်ပေါ်တွင် တူညီသော အသိပေးချက်တစ်ခု ပေါ်လာခဲ့သည်။

ဆိုရိုကင် (ပုံရိပ်ဖော်ခြင်း) သည် သင့်အပေါ်သို့ [စိတ်ပိုင်းဆိုင်ရာ တုန်လှုပ်မှု] ကို အသုံးပြုခဲ့သည်။

အကဲဖြတ်ခြင်း လုပ်ဆောင်နေပါသည်... အကဲဖြတ်ခြင်း အောင်မြင်ပါသည်။ သင်သည် လောလောဆယ် သင့်ခန္ဓာကိုယ်ကို ထိန်းချုပ်၍မရနိုင်ပါ။

သင့်ကျွမ်းကျင်မှုများသည် အတင်းအကျပ် အနှောင့်အယှက်ပေးခံရပြီး သင်သည် [တောင့်တင်းမှု] အခြေအနေဖြင့် ဒုက္ခရောက်နေပါသည်။

ထိုခဏမှာပင် အခြေအနေသည် ဇာတ်ကွက်အလှည့်အပြောင်းတစ်ခုကို ဖြတ်သန်းသွားသည်။ မူလက အောင်ပွဲ၏ အလင်းရောင်ကို စတင်မြင်တွေ့နေရသော ပြောင်းပြန် ခရူးဆိတ်သည် ချောက်ကမ်းပါးထဲသို့ ရုတ်တရက် ထိုးဆင်းသွားပြီး သူတို့၏ စိတ်ပိုင်းဆိုင်ရာ အခြေအနေများ ကြီးမားသော တုန်လှုပ်မှုကို ခံစားလိုက်ရသည်။

ဤအချိန်တွင် သူတို့၏ ခေါင်းထဲ၌ ကျိန်ဆဲသံများသာ ပဲ့တင်ထပ်နေ၏။

မင်းတို့က အဆင့် အေ အထက်ဆင့် ကိုတောင် ခေါ်လိုက်သေးတယ်လား။

ဒါက လိမ်လည်မှုပဲ။

အကန့်အသတ်မဲ့ ဘဏ္ဍာရေးအုပ်စု က ဂိုဏ်းတွေက ဒီလောက်တောင် ရှုံးမဲမဲတဲ့သူတွေလား။

တိုတောင်းသော [တောင့်တင်းမှု] အခြေအနေက ရေစီးကြောင်းကို ချက်ချင်း ပြောင်းလဲသွားစေခဲ့သည်။ ကမ္ဘာပျက်ကပ် ဖောင်ဒေးရှင်း ကစားသမားများသည် ရပ်တန့်မနေဘဲ ပြောင်းပြန် ခရူးဆိတ်မှ ကစားသမားအများအပြားကို ရှင်းလင်းရန် ပေါက်ကွဲမှုများကို ဆက်တိုက်ဖန်တီးလိုက်ပြီး သူတို့၏ စစ်မျက်နှာကို ပြန်လည်ရယူကြသည်။

ကမ္ဘာပျက်ကပ် ဖောင်ဒေးရှင်း ကစားသမားများသည်လည်း တုန်လှုပ်နေခဲ့ကြပြီး ၎င်းမှာ ပြောင်းပြန် ခရူးဆိတ် ကစားသမားများ ရုတ်တရက် ရပ်တန့်သွားခြင်းကြောင့်မဟုတ်ဘဲ သူတို့၏ အင်တာဖေ့စ်များပေါ်တွင် သူတို့ရရှိခဲ့သော အသိပေးချက်တစ်ခုကြောင့်ဖြစ်သည်။

ဆိုရိုကင် (ပုံရိပ်) သည် သင့်အပေါ်သို့ [ဝိညာဉ်ရေးရာ လှုံ့ဆော်မှု] ကို အသုံးပြုခဲ့သည်။

သင်သည် [လှုံ့ဆော်မှု] အခြေအနေသို့ ဝင်ရောက်သွားပါပြီ။ ပင်ကိုယ်အရည်အသွေးများ အားလုံး +၁၀%။

ဆိုရိုကင် (ပုံရိပ်) သည် သင့်အပေါ်သို့ [တိုက်ပွဲ စိတ်လှုပ်ရှားမှု] ကို အသုံးပြုခဲ့သည်။ ပျက်စီးဆုံးရှုံးမှု +၁၈%၊ ကာကွယ်ရေး +၁၂%။

"ဘာတွေဖြစ်နေတာလဲ။"

"အပိုဆုတွေက ဘယ်ကရောက်လာတာလဲ။ တစ်ယောက်ယောက်က ဇာတ်ကောင် ဆင့်ခေါ်ခြင်း ကတ် ကို သုံးလိုက်တာလား။"

"အဲဒါ မမှန်ဘူး။ ဇာတ်ကောင် ဆင့်ခေါ်ခြင်း ကတ် ကို သုံးရင်တောင်မှ အသုံးပြုသူရဲ့ နာမည်က ပြောင်းမှာမဟုတ်ဘူးလေ။"

ရှေ့တန်းရှိ တပ်များသည် ၎င်းကို နားမလည်နိုင်သော်လည်း ဤသည်မှာ စဉ်းစားရမည့်အချိန် မဟုတ်ပေ။ ထို့ကြောင့် သူသည် ရန်သူကို သတ်ရန် အလျင်အမြန် တိုက်ခိုက်ခဲ့ကြသည်။

မကြာမီမှာပင် ပြောင်းပြန် ခရူးဆိတ် မှ တပ်အများစုမှာ သေဆုံးသွားခဲ့ကြသည်။ လူတိုင်းက ဤသည်မှာ မျှော်လင့်ချက်မဲ့နေသော အခြေအနေဖြစ်သည်ဟု ထင်ခဲ့ကြသော်လည်း ခြိမ်းခြောက်မှုကို ဤကဲ့သို့သော နည်းလမ်းဖြင့် ဖြေရှင်းနိုင်မည်ဟု မမျှော်လင့်ထားခဲ့ပေ။

စစ်စီဖပ်စ်သည် သတိမဝင်လာသေးပေ။ ဤအချိန်တွင် သူ၏ ဒုတိယဥက္ကဋ္ဌထံမှ ဖုန်းခေါ်ဆိုမှုတစ်ခု ရောက်လာပြီး သူ၏လေသံမှာ အံ့သြနေပုံရသည်။ "ဥက္ကဋ္ဌ။ ငါတို့ ဟက်စ် လက်နက်ကိုင်တပ်ဖွဲ့ကို အနိုင်ရလိုက်ပြီ။ ဘာလို့လဲတော့ ငါမသိဘူး၊ ဒါပေမဲ့ သူတို့ရဲ့ လှုပ်ရှားမှုတွေက ရုတ်တရက် ရပ်တန့်သွားတယ်။"

"မဖြစ်နိုင်ဘူးမလား။" စစ်စီဖပ်စ် သည် တပ်မှူးအသီးသီးကို အလျင်အမြန်မေးမြန်းလိုက်ပြီးမှသာ ဘာဖြစ်သွားသည်ကို သိလိုက်ရသည်။ သူ တွေဝေသွားခဲ့သည်။ ဒါက ဘယ်လိုအခြေအနေလဲ။ ဆိုရိုကင် ရောက်လာတာလား။ ဒါပေမဲ့ ငါတို့ သူ့ကို မခေါ်ခဲ့ပါဘူး။ သူက ဘာလို့ ပျော်ပွဲရွှင်ပွဲထဲ လာဝင်ရတာလဲ။

သူက ငါတို့ အန္တရာယ်ဖြစ်နေတာကို မြင်ပြီး ကိုယ်တိုင်ဦးဆောင်ပြီး လာကူညီတာများလား။

စစ်စီဖပ်စ်၏ မျက်လုံးများ ပြူးကျယ်သွားသည်။ အောင်မြင်သော တန်ပြန်တိုက်ခိုက်မှုတစ်ခု ပြုလုပ်ရခြင်း၏ ပျော်ရွှင်မှုကို ကိုယ်စားပြုသော မည်သည့်အရာမျှ သူ၏မျက်နှာပေါ်တွင် မရှိပေ။

ပုံမှန်အချိန်များတွင်ဆိုလျှင် သူတို့ စိတ်ထိခိုက်သွားနိုင်သော်လည်း ယခုအချိန်တွင်မူ...

ဒါက မင်းနဲ့ ဘာဆိုင်လို့လဲ။ မင်းရဲ့ အလွန်အမင်း စိုးရိမ်ပူပန်မှုက ငါတို့အားလုံးရဲ့ သေဆုံးမှုဖြစ်လာလိမ့်မယ်။

နောက်တစ်နေ့...

"သံခွာတွေကို ကြည့်လိုက်၊

"မြောက်မြားစွာသော တောင်တွေနဲ့ မြစ်တွေပေါ်မှာ နင်းဖြတ်သွားတယ်၊

"ငါက လေရဲ့ အစွန်းမှာ ရပ်နေတယ်၊

"နေနဲ့ လရဲ့ လည်ပတ်မှုကို တင်းကျပ်စွာ ကိုင်ထားတယ်။"

ဟန်ရှောင်းသည် ရေချိုးခန်းထဲမှ ထွက်လာစဉ် သီချင်းညည်းနေခဲ့သည်။

ခါးတွင် တဘက်တစ်ထည်သာ ပတ်ထားပြီး ကျစ်လစ်ခိုင်မာသော သူ၏ ခန္ဓာကိုယ်အပေါ်ပိုင်းကို ဖော်ထုတ်ထားကာ သူ၏ရင်ဘတ်ပေါ်ရှိ မှော်ပတ်လမ်းသည် တောက်ပနေသော အပြာရင့်ရောင် တက်တူးတစ်ခုနှင့်တူပြီး အသက်ရှူလိုက်တိုင်း လင်းလက်နေသည်။

ထိပ်သီး အဆင့် အေ အထက်ဆင့် တစ်ဦးသည် အနားယူခြင်းကို အခြေခံအားဖြင့် စွန့်လွှတ်နိုင်သော်လည်း ဟန်ရှောင်းသည် အလုပ်နှင့် အနားယူခြင်း ပေါင်းစပ်မှုကို အမြဲတမ်း အရေးထားခဲ့သည်။ လွန်ခဲ့သည့်ရက်အနည်းငယ်အတွင်း သူသည် ဘုရင် ယန္တရားဝတ်စုံ ခုနစ်စုံမှ ရှစ်စုံအထိ ဖန်တီးခဲ့သောကြောင့် ယနေ့တွင် မည်သည့် တပ်ဆင်မှုမျှ မလုပ်တော့ရန် သူ ဆုံးဖြတ်ခဲ့သည်။ ရေငွေ့ပျံသွားစေရန် သူ၏ ခန္ဓာကိုယ်အပူချိန်ကို ချိန်ညှိမည့်အစား သူသည် ဖိုရမ်များကို ကြည့်ရှုရန် အနားမယူမီ သူ၏ခန္ဓာကိုယ်ကို ခြောက်သွေ့အောင် သုတ်လိုက်ရုံသာဖြစ်သည်။ သူ ဖိုရမ်ကဏ္ဍသို့ ဝင်ရောက်လိုက်သည်နှင့် သူ၏မျက်နှာအမူအရာမှာ ထူးဆန်းသွား၏။ "ကမ္ဘာပျက်ကပ် ဖောင်ဒေးရှင်း က စည်းမျဉ်းတွေကို ချိုးဖောက်ပြီး အဆင့် အေ အထက်ဆင့် အကူအညီပေးမယ့်သူတွေကို ဖိတ်ခေါ်ခဲ့တယ်လား။ သူတို့က အကန့်အသတ်မဲ့ ဘဏ္ဍာရေးအုပ်စုရဲ့ ဂိုဏ်းမဟာမိတ်တွေရဲ့ အစိတ်အပိုင်းတစ်ခု မဟုတ်ဘူးလား။"

ဟန်ရှောင်းသည် ပို့စ်ထဲသို့ ဝင်ကြည့်လိုက်ရာ မှတ်ချက်များမှာ သန်းဆယ်ဂဏန်းအထိ ရှိနေသည်ကို မြင်လိုက်ရသည်။

ပို့စ်၏ အကြောင်းအရာမှာ အခြေခံအားဖြင့် ဟက်စ် လက်နက်ကိုင်တပ်ဖွဲ့ နှင့် ပြောင်းပြန် ခရူးဆိတ် တို့က ကမ္ဘာပျက်ကပ် ဖောင်ဒေးရှင်းကို ပြစ်တင်ရှုတ်ချနေခြင်းဖြစ်သည်။ တစ်ရက်ကြာ အချဉ်ဖောက်ပြီးနောက် ဤအဖြစ်အပျက်သည် ကစားသမား အသိုင်းအဝိုင်းအတွင်း မုန်တိုင်းတစ်ခု ဖြစ်ပေါ်စေခဲ့သည်။ မရေမတွက်နိုင်သော ကစားသမားများသည် ဒေါသထွက်နေကြပြီး ကမ္ဘာပျက်ကပ် ဖောင်ဒေးရှင်းသည် သူတို့၏ စည်းမျဉ်းများကို ချိုးဖောက်သည်ဟု စွပ်စွဲခဲ့ကြသည်။

"ဒါက အရမ်းလွန်သွားပြီ။ ငါတို့က တကယ်နိုင်တော့မှာ။ ကမ္ဘာပျက်ကပ် ဖောင်ဒေးရှင်း က အဖွဲ့အစည်းခေါင်းဆောင်ကို ငှားရမ်းပြီး ပြန်လည်နာလန်ထူဖို့ ဒီနည်းလမ်းကို သုံးတဲ့အထိ ဒီလောက် ရှုံးမဲမဲလိမ့်မယ်လို့ ငါ မမျှော်လင့်ထားခဲ့ဘူး။ ဒါက ရှင်းရှင်းလင်းလင်းကို လိမ်လည်တာပဲ။"

"သက်သေအဖြစ် ဗီဒီယိုတွေနဲ့ စခရင်ရှော့တွေ တစ်ပုံကြီးရှိတယ်။ မင်း ဒါကို ဘယ်လိုရှင်းပြမလဲဆိုတာ ကြည့်ကြတာပေါ့။"

"မှန်တယ်။ မနေ့က တစ်ယောက်ယောက်က ဒီကိစ္စကို ဖြေရှင်းဖို့တောင် ကြိုးစားခဲ့ပြီး ဒါက ဇာတ်ကောင် ဆင့်ခေါ်ခြင်းကတ်ရဲ့ အကျိုးသက်ရောက်မှုလို့ ပြောသေးတယ်။ ငါ့ဖင်ပဲ။ ဘယ်တုန်းက ဇာတ်ကောင် ဆင့်ခေါ်ခြင်းကတ်က အသုံးပြုသူရဲ့ နာမည်ကို ပြောင်းလဲနိုင်သွားတာလဲ။"

"တရားမျှတမှုကို ထိခိုက်စေတဲ့ ဒီလိုလုပ်ရပ်မျိုးတွေကို ပြင်းပြင်းထန်ထန် အပြစ်ပေးရမယ်။ စစ်ပွဲမှာ ပါဝင်မယ့် ကမ္ဘာပျက်ကပ် ဖောင်ဒေးရှင်း ရဲ့ အရည်အချင်းကို ပယ်ဖျက်ဖို့ ငါ အဆိုပြုတယ်။ မင်းတို့က အရှုံးကို လက်မခံနိုင်ရင် မကစားနဲ့လေ။"

ဖိုရမ်သည် အခြေခံအားဖြင့် စိတ်အနှောင့်အယှက်ဖြစ်ဖွယ် ပို့စ်များဖြင့် ပြည့်နှက်နေသည်။ ဟန်ရှောင်းသည် ၎င်းကို အကြမ်းဖျင်းဖတ်ရှုလိုက်ရာ ကမ္ဘာပျက်ကပ် ဖောင်ဒေးရှင်း၏ ကြေညာချက်ကိုလည်း မြင်လိုက်ရသည်။

"ငါက ကမ္ဘာပျက်ကပ် ဖောင်ဒေးရှင်း ဂိုဏ်းမဟာမိတ်အဖွဲ့ရဲ့ ဥက္ကဋ္ဌပါ။ အခြေအနေက မြင်ရသလို မဟုတ်ပါဘူး။ ဆိုရိုကင်ကို ကူညီဖို့ ငါတို့ မတောင်းဆိုခဲ့ပါဘူး။ သူက သူ့ဘာသာသူ လုပ်ခဲ့တာပါ။ ဒါက ငါတို့နဲ့ ဘာမှမဆိုင်ပါဘူး။ တွေးကြည့်ကြပါ သူငယ်ချင်းတို့။ စည်းမျဉ်းတွေကို ချိုးဖောက်ခြင်းရဲ့ အကျိုးဆက်တွေကို ငါတို့ ရှင်းရှင်းလင်းလင်း သိထားပြီးသားပဲ၊ ဒါဆို ငါတို့က ဘာလို့ သူတို့ကို တမင်တကာ ဆန့်ကျင်ရမှာလဲ။"

စစ်စီဖပ်စ်၏ ပို့စ်သည် ဒေါသထွက်နေသော ကစားသမားအုပ်စုနှင့် ရင်ဆိုင်ရချိန်တွင် ပုံးတစ်လုံးထဲရှိ ရေတစ်ပေါက်နှင့် တူသည်။ ၎င်းက ယုံကြည်ရုံသာမကဘဲ သူသည် တန်ပြန် လှောင်ပြောင်မှုကိုပင် ခံခဲ့ရသည်။

"ဟီးဟီး၊ ဒီပုံပြင်ကို ဆက်ဖန်တီးနေလိုက်။"

"ဒါဆို နောက်ဆုံးတော့ မင်းက အရင် ကူညီဖို့ အဆင့် အေ အထက်ဆင့် ကို ဖိတ်ခေါ်ပြီး နောက်မှ တောင်းပန်ကာ မင်းရဲ့အပြစ်တွေအားလုံးကို ခွင့်လွှတ်လို့ရတာပေါ့။ ဒီနေ့တော့ တစ်ခုခု သင်ယူလိုက်ရပြီ။"

"ဘာလဲ၊ မင်းတို့ဘက်မှာပဲ အဆင့် အေ အထက်ဆင့် ရှိတယ်လို့ ထင်နေတာလား။ မင်းက ဘယ်သူ့ကို အထင်သေးနေတာလဲ။"

"မင်း ဒီဂိမ်းကို ကစားချင်လား။ လူတွေ၊ တစ်ယောက်ယောက်သွားပြီး ဘိုးဘေး ဘလက်စတားကို လာဖို့ သွားဖိတ်လိုက်။"

ကစားသမားအများအပြားက ဤကြေညာချက်ကို လက်မခံခဲ့ကြသော်လည်း အကန့်အသတ်မဲ့ ဘဏ္ဍာရေးအုပ်စုဘက်မှ ကစားသမားများကမူ ၎င်းကို အတိုင်းအတာတစ်ခုအထိ ယုံကြည်ခဲ့ကြသည်။ ရုတ်တရက် တုံ့ပြန်မှုများ ရောနှောသွား၏။

"မဖြစ်နိုင်ဘူးမလား။ ခွေးအိုကြီး ဆိုရိုကင် က တကယ်ပဲ အဲဒီလောက် စပ်စုတာလား။"

"ဒါက အချိန်ကိုက်ဗုံး တစ်လုံးနဲ့ တူတယ်။ ငါတို့အလှည့်ရောက်ရင် ပါဝင်ခွင့်တွေ ပယ်ဖျက်ခံရမှာ မဟုတ်ဘူးလား။"

"ငါ အခု သိမ်သိမ်မွေ့မွေ့လေး မေးမယ်နော်။ အဖွဲ့အစည်း ပြောင်းလို့ ရနိုင်သေးလား..."

"အဆင့် ၁၈၀ စိတ်စွမ်းအားရှင်၊ ငါ့ရဲ့ အဓိက အတန်းအစား ကျွမ်းကျင်မှုတွေအားလုံးက အဆင့် ၇ နဲ့ အထက်ရှိတယ်။ ငါ့ကို လက်ခံမယ့် ဂိုဏ်းတစ်ခုကို တောင်းပန်ပါတယ်။"

ဆိုရိုကင်၏ လုပ်ရပ်များသည် အကန့်အသတ်မဲ့ ဘဏ္ဍာရေးအုပ်စု မှ ကစားသမားများအားလုံးကို လုံးဝ ထိတ်လန့်သွားစေသည်။ စစ်ပွဲတွင် ဆက်လက်ပါဝင်ရန်အတွက် ကစားသမားများသည် စခန်းများကိုပင် ပြောင်းလဲလိုကြသည်။ အချိန်မရွေး သူတို့ကို ပြန်လည်ထိခိုက်စေနိုင်သော ဤအဖွဲ့အစည်းတွင် သူတို့ ဆက်မနေရဲတော့ပေ။

ပို့စ်ကို ဖတ်ပြီးနောက် ဟန်ရှောင်းသည် ဘာတွေဖြစ်နေသည်ကို နောက်ဆုံးတွင် သိရှိသွား၏။

"ဂိုဏ်းတွေက လိမ်နေတာ မဖြစ်နိုင်ဘူး၊ ဒါကြောင့် ဒါက ဆိုရိုကင်ရဲ့ ကိုယ်ပိုင် အစပျိုးမှုနဲ့ လုပ်ခဲ့တာ ဖြစ်နိုင်တယ်။ သူ့ရဲ့ ရည်ရွယ်ချက်ကတော့... အင်း၊ သူက ကစားသမားတွေကို စုဆောင်းဖို့ အမြဲတမ်း စိတ်အားထက်သန်နေတာဆိုတော့ သူက ငါ့ကိုကြည့်ပြီး စည်းမျဉ်းအချို့ကို အကျဉ်းချုံးပြီး သူ့ရဲ့အဖွဲ့အစည်းကို ဆွဲဆောင်မှု ဘယ်လိုမြှင့်တင်မလဲဆိုတာ စဉ်းစားခဲ့တာဖြစ်မယ်။"

ရုပ်ပုံတစ်ခုလုံးကို သိရှိပြီးနောက် ဟန်ရှောင်းသည် အော်ဟစ်မရယ်မောမီ ဆိုရိုကင်၏ ယုတ္တိဗေဒကို ခန့်မှန်းလိုက်သည်။

"ဒါဆို အဲဒီလိုမျိုးကိုး... အရူးက သူ့ရဲ့လုပ်ရပ်တွေကို လုံးဝ ဖုံးကွယ်ထားတယ်လို့ တကယ်ထင်နေတာပဲ၊ တခြားသူတွေက ဒါဟာ အကန့်အသတ်မဲ့ ဘဏ္ဍာရေးအုပ်စု ကစားသမားတွေရဲ့ ပေါက်ကွဲနိုင်တဲ့ စွမ်းရည်တစ်ခုလို့ ဒါမှမဟုတ် အထူး ဝိညာဉ်ရေးရာ လက်နက် တစ်ခုခုကို သုံးတယ်လို့ ထင်အောင် အရန် စိတ်ပိုင်းဆိုင်ရာ စွမ်းရည်အချို့ကို သုံးလိုက်ရုံပဲလေ။ ပုံမှန်အားဖြင့်ဆိုရင် သူတို့က အဲဒါကို သူ့ဆီ ဆက်စပ်လို့မရနိုင်ဘူး... ဒါပေမဲ့ တိုက်ခိုက်ရေး သတင်းအချက်အလက်က မင်းကို သစ္စာဖောက်ပြီးနေပြီ လူလိမ်လေး။"

ဟန်ရှောင်း ရယ်မောလိုက်သည်။ ဆိုရိုလေး၊ အာ ဆိုရိုလေး၊ မင်းကိုမင်း ဒုက္ခရှာလိုက်တာပဲ။ မင်းက မှားယွင်းတဲ့နည်းလမ်းကို သုံးတဲ့အခါ မင်းအဖွဲ့အစည်းရဲ့ ဂုဏ်သိက္ခာကို မြှင့်တင်မယ့်အစား တန်ပြန်အကျိုးသက်ရောက်မှုကို ဖြစ်စေပြီး ကစားသမားတွေကြားမှာ နာမည်ဆိုးရစေလိမ့်မယ်။

ဤအရာနှင့်ပတ်သက်၍ အဆိုးရွားဆုံးအပိုင်းမှာ သနားစရာကောင်းသော ထိုလူသည် ဖိုရမ်များကိုပင် မဝင်ရောက်နိုင်သောကြောင့် သူသည် အမှောင်ထဲတွင် ရှိနေဆဲဖြစ်ပြီး ကစားသမားများ၏ ပြင်းပြင်းထန်ထန် ဆဲဆိုခြင်းခံနေရသည်ကို လုံးဝမသိရှိခြင်းပင်ဖြစ်သည်။

ဒါက သတင်းအချက်အလက်ရဲ့ အားသာချက်ပဲ...

ဆိုရိုကင်၏ ခြယ်လှယ်မှုသည် အကန့်အသတ်မဲ့ ဘဏ္ဍာရေးအုပ်စု ၏ ကစားသမားအချို့ကို ထွက်ခွာသွားစေမည်မှာ သံသယဖြစ်ဖွယ်မရှိပေ။ ထိုအချိန်တွင် ကစားသမားများ အေးစက်ပြီး အထီးကျန်နေချိန်၌ သူသည် သူ့ကို သူ၏အဖွဲ့အစည်းထဲသို့ ကြိုဆိုကာ ဖက်ထားရန် သူ၏ နွေးထွေးသော ရင်ခွင်ကို အသုံးပြုလိမ့်မည်။

ဆိုလေး၊ ဒီတစ်ကြိမ် မင်းရဲ့ ကစားသမားတွေကို လုယူတာ ငါမဟုတ်ဘူး။ မင်းက အဲဒါတွေကို ငါ့ဆီ ကိုယ်တိုင်ပေးခဲ့တာနော်...

ဟန်ရှောင်း တဟားဟား ရယ်လိုက်သည်။

အိမ်မှာ ထိုင်နေရင်း တစ်ခုခု ရနေတဲ့ ဒီခံစားချက်က တော်တော်လေး သက်တောင့်သက်သာ ရှိတာပဲ။

မနေ့က သူ၏ ဝင်ရောက်စွက်ဖက်မှုနောက်ပိုင်း ဆိုရိုကင်သည် နောက်ဆက်တွဲ ဖြစ်ပေါ်တိုးတက်မှုများကို အာရုံစိုက်နေခဲ့သော်လည်း သူမျှော်လင့်ထားသော အခြေအနေကို မတွေ့ရသောအခါ တွေဝေသွားခြင်းမှလွဲ၍ မတတ်နိုင်ခဲ့ပေ။

သူ၏ ယုတ္တိဗေဒအပေါ် အခြေခံ၍ ကမ္ဘာပျက်ကပ် ဖောင်ဒေးရှင်း သည် သူ၏အကူအညီဖြင့် အောင်မြင်သော တန်ပြန်တိုက်ခိုက်မှုတစ်ခုကို စတင်နိုင်ခဲ့သည်။ အခြားသော သေမျိုးမဟုတ်သူများသည် ယခုအခါ အကန့်အသတ်မဲ့ ဘဏ္ဍာရေးအုပ်စု ၏ ခွန်အားကို အံ့သြနေကြလိမ့်မည်ဖြစ်သည်။ သို့ဆိုလျှင် သူတို့သည် အဘယ်ကြောင့် မည်သည့်တုံ့ပြန်မှုမျှ မပြသကြသနည်း။

နောက်တစ်နေ့ရောက်မှသာ ကမ္ဘာပျက်ကပ် ဖောင်ဒေးရှင်း၏ တုံ့ပြန်မှုကို သူ မြင်တွေ့ခဲ့ရသည်။ ၎င်းသည် သူမျှော်လင့်ထားသလို သူတို့၏ အောင်ပွဲကို လိုက်လံရှာဖွေခြင်းမဟုတ်ဘဲ သူတို့၏ အခြေစိုက်စခန်းကို စွန့်လွှတ်ကာ စစ်သင်္ဘောပေါ်မှ ဂြိုဟ်ကို စွန့်ခွာသွားခြင်းဖြစ်သည်။

"ထူးဆန်းတယ်၊ ဒါ ဘယ်လိုတုံ့ပြန်မှုလဲ။"

သူ၏ ရုံးခန်းထဲတွင် ဆိုရိုကင်သည် ရှေ့တန်းစစ်မျက်နှာများကို ဖုံးအုပ်ထားသော သတင်းမီဒီယာများ၏ တိုက်ရိုက်ထုတ်လွှင့်မှုကို စိုက်ကြည့်နေပြီး မျက်မှောင်ကြုတ်လိုက်သည်။

သူ တွေဝေနေချိန်တွင်ပင် ဆိုရိုကင်သည် သူ၏ကိုယ်ပိုင် AI ထံမှ သတိပေးချက်တစ်ခုကို ရရှိခဲ့သည်။ တစ်ချက်ကြည့်လိုက်ရုံဖြင့် သူ၏ ရင်ကို တုန်သွားစေသည်။

အသိပေးချက် အစီရင်ခံစာသည် သေမျိုးမဟုတ်သူများထံမှ နုတ်ထွက်စာများဖြင့် ပြည့်နှက်နေပြီး ဤအရေအတွက်မှာ လျင်မြန်စွာ တိုးလာနေသည်ကို သူ မြင်လိုက်ရသည်။

"ဘာတွေဖြစ်နေတာလဲ။ သူတို့က ဘာလို့ အကန့်အသတ်မဲ့ ဘဏ္ဍာရေးအုပ်စု ကနေ နုတ်ထွက်နေကြတာလဲ။"

ဆိုရိုကင်တွင် ကြက်သေသေသွားသော မျက်နှာအမူအရာရှိနေပြီး တစ်ခုခုကို တွေးမိလိုက်သကဲ့သို့ သူသည် တိုက်ရိုက်ထုတ်လွှင့်မှုဆီသို့ အလျင်အမြန် ပြန်လှည့်ကြည့်လိုက်သည်။

အကန့်အသတ်မဲ့ ဘဏ္ဍာရေးအုပ်စုမှ သေမျိုးမဟုတ်သူများ အသုတ်လိုက် အခြေစိုက်စခန်းမှ ထွက်ပြေးကာ လူစုကွဲသွားသည်ကို သူ မြင်လိုက်ရသည်။ အချို့က ကြားနေအင်အားစုများထံသို့ သွားကြပြီး အချို့ကမူ ဘလက်စတား စစ်တပ် အပါအဝင် အဓိကအင်အားစုကြီး သုံးခုထံသို့ ပြေးသွားကြသည်။ နေရာမှာပင် အဖွဲ့အစည်းများကို ပြောင်းလဲရန် ကစားသမားများ၏ လုပ်ဆောင်ချက်အပေါ်တွင် ကန့်သတ်ချက်မရှိပေ၊ ထို့ကြောင့် တစ်ရက်တွင် တစ်စုံတစ်ဦးကို ရိုက်နှက်နေပြီး နောက်တစ်နေ့တွင် အသင်းဖော်များအဖြစ် ပြောင်းလဲသွားနိုင်သည်။ ၎င်းအားလုံးကို စည်းမျဉ်းများတွင် ခွင့်ပြုထားသည်။ အကန့်အသတ်မဲ့ ဘဏ္ဍာရေးအုပ်စု သည် ဂလက်ဆီ လုပ်ငန်းစုတစ်ခုဖြစ်သောကြောင့် အစကတည်းက အဖွဲ့အစည်း စည်းလုံးညီညွတ်မှုကို မရှာဖွေခဲ့ပေ။ ပါဝင်ခဲ့ကြသူများသည် မြင့်မားသော လူမှုဖူလုံရေးများကို ပေးစွမ်းသောကြောင့်သာ ပါဝင်ခဲ့ကြခြင်းဖြစ်ရာ သူတို့အတွက် အဖွဲ့အစည်းပြောင်းလဲရန် မည်သည့် ဝန်လေးမှုမျှ မရှိပေ။ ယခုအခါ ပထမဆုံး ကမ္ဘာ့ဆာဗာစစ်ပွဲကို ဂလက်ဆီ မှတ်တမ်းများတွင် မှတ်တမ်းတင်ရန် သတ်မှတ်ထားပြီးဖြစ်ရာ သူတို့ ဤအခွင့်အရေးကို လက်လွတ်ခံလိုက်လျှင် သူတို့အတွက် မည်သည့်ဆုလာဘ်မျှ ကျန်ရှိတော့မည်မဟုတ်ပေ။ ပြိုင်ပွဲမှ ထုတ်ပယ်မခံရစေရန်အတွက် အကန့်အသတ်မဲ့ ဘဏ္ဍာရေးအုပ်စု သည် သူတို့၏ အဖွဲ့အစည်းကို သစ္စာဖောက်ရန် မတုံ့ဆိုင်းခဲ့ကြပေ။

"ဒါက..."

၎င်းကိုမြင်သောအခါ ဆိုရိုကင် အနည်းငယ် ခေါင်းမူးသွား၏။

ငါ့ရဲ့နည်းလမ်းတွေက ဘလက်စတားရဲ့ နည်းလမ်းတွေနဲ့ အတူတူပဲဆိုတာ ထင်ရှားတယ်၊ ဒါဆို ငါက ဘာလို့ ဆန့်ကျင်ဘက် အကျိုးသက်ရောက်မှုကို ရခဲ့တာလဲ။

အဲဒါ မမှန်ဘူး။ ဇာတ်ညွှန်းက အဲဒီလိုရေးထားတာ မဟုတ်ဘူးလေ။

စာစဉ် (၆၈)၊ အခန်း (၁၁၈၈) ပြီးပါပြီ။

လင်းဆက်

+++++