အခန်း (၁၂၅-၁၂၆)

အခန်း (၁၂၅) - ရှေးဟောင်း ဘိုးဘေးများကိုပင် ဒုက္ခပေးခဲ့သော စာအုပ်

ချင်မင်ကလည်း ပြုံးကာ ပြောလိုက်သည်။

“ချင်းယွဲ့ ပြောပြဖူးပါတယ်။ ဒီလောက် မြန်မယ်လို့တော့ မထင်ထားဘူး”

“သူမကလွဲလို့ ဘယ်သူရှိဦးမှာလဲ”

မုန့်ရှင်းဟိုင်က သူ့ကို ကျင့်စဉ် အမြန်သွားစမ်းကြည့်ရန် တိုက်တွန်းလိုက်သည်။

ချင်မင်က ခေါင်းညိတ်လိုက်ပြီး “တခြားလူတွေလည်း ရှိသေးတယ်။ ထန်ရွှီမီ၊ ဟူထင်ဝမ်အစရှိတဲ့ အဓိက တပည့်တွေက ကျုပ်ကို နာမည်ကြီး ကျင့်စဉ်တစ်ခု ပေးဖို့ အကြွေးတင်နေတာ” ဟု ပြောလိုက်သည်။

ထိုလူများက စာကြည့်တိုက်တွင် နာမည်ကြီး ကောင်းကင်အလင်း စွမ်းအားတစ်ခုဖြစ်သည့် နတ်မျောက် စွမ်းအား၏ အပိုင်းအစကို တွေ့ရှိခဲ့ကြောင်း ပြောဖူးသည်။

ထိုလူများက ကတိတည်မည်လား၊ မတည်ဘူးလားဆိုသည်ကို မသိရပေ။ အကယ်၍ ကတိတည်မည်ဆိုလျှင်ပင် လီချင်းယွဲ့ထံသို့ အရင်ဆုံး ပို့ပေးမည်ဟု ခန့်မှန်းရသည်။

မုန့်ရှင်းဟိုင်က ပြောလိုက်သည်။

“မင်းကတော့ မဆိုးပါဘူး။ တစ်ခေါက်လောက် အပြင်ထွက်သွားတာ ရလိုက်တဲ့ အကျိုးအမြတ်က မနည်းဘူးပဲ”

ချင်မင်က ခေါင်းညိတ်လိုက်သည်။ ဤတစ်ကြိမ် ရရှိခဲ့သည့် အကျိုးအမြတ်များမှာ အလွန်များပြားသဖြင့် သူ စောစောကတည်းက ကျေနပ်နေခဲ့ပြီးဖြစ်သည်။

သူသည် အချိန်မဆွဲတော့ဘဲ လူတစ်ယောက်ကို သွားတွေ့ရန် မုန့်ရှင်းဟိုင်နှင့်အတူ လျင်မြန်စွာ ထွက်ခွာသွားသည်။

ရှေးဟောင်း ဧည့်ခန်းတွင် ကြေးညိုသစ်ပင်၊ ခြေသုံးချောင်း ကြေးအိုး အစရှိသည့် ရှေးဟောင်း ပစ္စည်းများ ရှိနေသည်။ အမွှေးတိုင်အိုးထဲတွင် စိတ်ငြိမ် အမွှေးတိုင်က ဖြည်းညှင်းစွာ လောင်ကျွမ်းနေပြီး မီးခိုးငွေ့များက ပိုးချည်မျှင်များကဲ့သို့ တက်လာနေသည်။

အဘိုးကြီးတစ်ဦးက ဤနေရာတွင် ထိုင်ကာ လက်ဖက်ရည် သောက်နေသည်။ အသက်အရွယ် ကြီးရင့်နေပြီး ဆံပင်များ ဖြူဖွေးနေသော်လည်း မျက်နှာမှာ နီရဲကာ ကျန်းမာရေး ကောင်းမွန်နေပုံရသည်။

မုန့်ရှင်းဟိုင်က သူ့ကို မြင်သောအခါ “ဦးလေးလီ” ဟု နှုတ်ဆက်လိုက်သည်။

ထိုအခြေအနေကို မြင်သောအခါ ချင်မင်သည် အလွန်သိတတ်စွာဖြင့် မျိုးဆက်တစ်ခု လျှော့ချလိုက်ပြီး ထိုအဘိုးလီကို နှုတ်ဆက်လိုက်သည်။

အဘိုးကြီး၏ မျက်လုံးများ အဖွင့်အပိတ်တွင် ရွှေရောင် မီးအိမ်နှစ်လုံးကဲ့သို့ တောက်ပနေပြီး စိတ်အားထက်သန်မှု အလွန် ပြည့်ဝနေသည်။ သူက ထရပ်ကာ ပြုံးပြီး ခေါင်းညိတ်လိုက်သည်။

“မဆိုးဘူး ကလေးကောင်းလေးပဲ ဒီတစ်ခေါက် ချင်းယွဲ့ကို နတ်ဘုရားရတနာ ချောချောမွေ့မွေ့ ရအောင် ကူညီပေးခဲ့တဲ့အတွက် မင်းကို ကျေးဇူးတင်ဖို့ ငါ တကူးတက လာခဲ့တာပါ”

ထိုသူမှာ လျှို့ဝှက် မိသားစုမှ လူတစ်ဦးဖြစ်ပြီး လီချင်းယွဲ့နှင့် အလွန် ရင်းနှီးသော ဆွေမျိုးတစ်ဦး ဖြစ်ပုံရသည်။

“တကယ်တော့ ကျုပ်လည်း အများကြီး မကူညီပေးနိုင်ခဲ့ပါဘူး။ ကျုပ် မရှိရင်လည်း အဆုံးမှာ ချင်းယွဲ့ကပဲ ပထမနေရာကို သေချာပေါက် ရမှာပါ”

ချင်မင်က နှိမ့်ချစွာ ပြောလိုက်သည်။

အဘိုးကြီးက ပြုံးလိုက်ပြီး ဤကိစ္စနှင့် ပတ်သက်၍ ထပ်မပြောတော့ဘဲ “ဒီတစ်ခေါက် ငါက သမိုင်းကြောင်း ကြီးမားသလို ကျင့်ကြံဖို့ အလွန်ခက်ခဲတဲ့ ထူးခြားတဲ့ ကျင့်စဉ်တစ်ခုကို ယူလာခဲ့တယ်” ဟု ပြောလိုက်သည်။

သူက စာရွက်သုံးရွက်ကို ထုတ်ယူကာ ပြောလိုက်သည်။

“မင်း အရင်ဖတ်ကြည့်။ ဖြည်းဖြည်းချင်း လေ့လာ၊ လောစရာ မလိုဘူး”

ချင်မင်သည် သူဤသို့ ပြောသည်ကို ကြားသောအခါ အနည်းငယ် သိချင်စိတ် ဖြစ်မိသွားသည်။ မည်သို့သော ကျင့်စဉ်ဖြစ်သနည်း။ ဂုဏ်သရေရှိသော အဘိုးကြီးတစ်ဦးကိုပင် ကိုယ်တိုင်ကိုယ်ကျ လာရောက်ပို့ဆောင်စေရသည်အထိ ဖြစ်နေသလော။

သူက လှမ်းယူလိုက်ပြီး အသစ်တဖန် ကူးယူထားခြင်း ဖြစ်ကြောင်း တွေ့လိုက်ရသည်။ အပေါ်မှ စာလုံးများတွင် မင်နံ့များ သင်းပျံ့နေဆဲပင် ဖြစ်သည်။

လီချင်းယွဲ့၏ အဘိုးဖြစ်သူက စကားစလိုက်သည်။

“ဒါက မူရင်းနဲ့ တစ်ထပ်တည်း တူတယ်။ လျှို့ဝှက်ချက် တစ်ခုခုကို ဖုံးကွယ်ထားတာမျိုး မဖြစ်ရအောင် စာလုံးတိုင်းရဲ့ အဆွဲအငင်တွေကိုတောင် အတုခိုးပြီး ကူးရေးထားတာ”

အဘိုးကြီးက ဤသို့ပြောသည်ကို ကြားသောအခါ ချင်မင် အံ့အားသင့်သွားသည်။ ဤသို့ အလေးအနက်ထား ဆက်ဆံခြင်းကို ကြည့်လျှင် ထိုကျင့်စဉ်မှာ တကယ်ကို ထူးခြားနေပုံရသည်။

ဤမျှနှင့် မပြီးသေးပေ။ လီချင်းယွဲ့၏ အဘိုးက ကြေးပြားသုံးချပ်ကို ထပ်မံ ထုတ်ယူလိုက်သည်။ ကြေးပြားတစ်ခုစီတွင် မှုန်ဝါးနေသော လူပုံသဏ္ဌာန်များ ပါရှိပြီး သေးငယ်သော မျဉ်းကြောင်းများစွာကို ရေးဆွဲထားသည်။

သူက ပြောပြသည်။

“ဒါက ကျမ်းစာရွက် သုံးရွက်နဲ့ သက်ဆိုင်တဲ့ ပုံသုံးပုံပဲ။ အချိုးအစား တူညီအောင် လုပ်ထားပြီး မှုန်ဝါးနေတဲ့ အခြေအနေတောင် အတူတူပဲ”

ချင်မင်က ခေါင်းညိတ်လိုက်သည်။ တစ်ဖက်လူက ဤကဲ့သို့ အသေးစိတ် အချက်အလက်များကို ဂရုစိုက်သဖြင့် သူလည်း မျက်နှာထား လေးနက်သွားသည်။

သူက စာရွက်ကို ကိုင်ကာ ကြေးပြားနှင့် နှိုင်းယှဉ်၍ သေချာစွာ လေ့လာဖတ်ရှုလိုက်သည်။

မကြာမီတွင် သူ မျက်မှောင်ကြုတ်သွားသည်။ ဤကျမ်းစာကို မည်သူ ရေးခဲ့သနည်း။ အလွန် ယေဘုယျဆန်လွန်းပြီး စာသားများထဲတွင် ခန္ဓာကိုယ်နှင့် စိတ်ဝိညာဉ်အကြောင်းကို ပြောထားကာ အလွန် ကျယ်ပြန့်ပြီး ရည်မှန်းချက် ကြီးမားလွန်းနေသည်။

“ကောင်းကင်နဲ့ မြေကြီး ကွယ်ပျောက်သွားတဲ့တိုင် အဆုံးသတ်ဆိုတာ မရှိဘူး...”

ချင်မင်က ဤနေရာသို့ ဖတ်ရောက်သောအခါ လေပူတစ်ချက် မှုတ်ထုတ်လိုက်သည်။ သူသည် ကောင်းကင်အလင်း စွမ်းအားကို ကျင့်ကြံနေဆဲဖြစ်ပြီး ဘဝသစ် လမ်းကြောင်းပေါ်သို့ ယခုမှ ခြေချကာစသာ ရှိသေးသည်။ ဤကျမ်းစာရွက် သုံးရွက်က ထာဝရအသက်ရှင်ခြင်း အကြောင်းကို ပြောနေပြီ ဖြစ်သည်။

သိထားရမည်မှာ လျှို့ဝှက်နယ်မြေမှ အဘိုးကြီးများ၊ လျှို့ဝှက်ဂိုဏ်းများမှ ထိပ်တန်း သိုင်းပညာရှင်များပင်လျှင် မသေနိုင်ခြင်း မရှိဘဲ ဘဝ၏ အဆုံးသတ်သို့ ရောက်ရှိရမည့်နေ့ ရှိကြသည်။

ထို့အပြင် သူတို့၏ သက်တမ်းမှာလည်း အလွန်အမင်း များပြားလှသည်တော့ မဟုတ်ပေ။

အရေးအကြီးဆုံးမှာ ဤကျမ်းစာ သုံးရွက်မှာ အလကား စကားများ ဖြစ်နေသည်ဟု ချင်မင် ထင်နေခြင်းပင် ဖြစ်၏။

အဘယ်ကြောင့်ဆိုသော် အသေးစိတ် ကျင့်စဉ်ဟူ၍ လုံးဝ မရှိပေ။ စာရွက်ပေါ်ရှိ စကားလုံးများမှာ အလွန် ယေဘုယျဆန်ပြီး မှုန်ဝါးနေသော ပုံသုံးပုံနှင့် ပေါင်းစပ်လိုက်ပါက မည်သို့ပင် နားလည်အောင် ကြိုးစားသည်ဖြစ်စေ အဓိပ္ပာယ် ဖွင့်ဆိုနိုင်လေသည်။

အကယ်၍ ထိုသူမှာ လီချင်းယွဲ့၏ အဘိုးသာ မဟုတ်ပါက သူသည် နတ်ဆရာ သို့မဟုတ် လူလိမ်ဟု ချင်မင် သေချာပေါက် ထင်မိလိမ့်မည်။

လီချင်းယွဲ့၏ အဘိုးက လက်ဖက်ရည် သောက်ရင်း ပြောလိုက်သည်။

“ကိုယ့်ကိုယ်ကိုယ် ဖိအားမပေးပါနဲ့။ အချိန်တွေ အများကြီး ရှိပါတယ်။ ဒီကျမ်းစာက လူတော်တော်များများကို အခက်တွေ့စေခဲ့တယ်။ နားလည်သဘောပေါက်တဲ့ လူတွေတောင် ရရှိတဲ့ အရာတွေက တစ်ယောက်နဲ့ တစ်ယောက် မတူကြဘူး”

“တခြားလူတွေက ဘာတွေ နားလည်သဘောပေါက်ခဲ့ကြလဲ”

ချင်မင်က မေးလိုက်သည်။

လီချင်းယွဲ့၏ အဘိုးက ပြန်ဖြေသည်။

“တစ်ခုခုကို နားလည်သဘောပေါက်တဲ့ လူဆိုလို့ အလွန် ရှားပါးတယ်။ တစ်ခုခုကို နားလည်သဘောပေါက်သူတိုင်းက နာမည်ကျော်ကြားတဲ့ ပုဂ္ဂိုလ်တွေချည်းပါပဲ။ သူတို့ထဲက တချို့က အသက်ကြီးတဲ့ အရွယ်ရောက်တော့ သက်တမ်း အများကြီး တိုးလာပြီး သူတို့ရဲ့ ဘဝကို ထက်ဝက်လောက် အသက်ဆက်နိုင်ခဲ့တယ်။ တချို့က မူလက ထုံအပေမဲ့ ချက်ချင်းကို ဉာဏ်အလင်းပွင့်သွားတယ်။ တချို့က ပါရမီ သာမန်ပဲ ရှိပေမဲ့ ရုတ်တရက် အရိုးတည်ဆောက်ပုံ ပြောင်းလဲသွားတယ်။ တချို့က ခန္ဓာကိုယ် ခန်းခြောက်သွားပေမဲ့ စိတ်ဝိညာဉ်နဲ့ ဒုတိယဘဝကို ပြန်လည် အသက်ရှင်လာနိုင်ခဲ့တယ်”

သူက လွန်စွာ တောင့်တဟန်ဖြင့် အဝေးသို့ ငေးကြည့်နေမိသည်။

မုန့်ရှင်းဟိုင်က ဘေးမှနေ၍ ဖြည့်စွက် ပြောပြသည်။

“စောစောက ပြောခဲ့တဲ့ လူတွေအားလုံးက အရေးပါတဲ့ ပုဂ္ဂိုလ်တွေချည်းပဲ။ ဥပမာ... ချွန်းယန် နန်းတော်က ပြန်လည် ထွန်းကားရေး ဘိုးဘေး၊ ယင် နဲ့ ယန် စံအိမ်က ဂိုဏ်းချုပ်ဟောင်း၊ နောက်ပြီး ဝူရှင်း နန်းတော်က ဖန်တီးရှင် အစရှိတဲ့ လူတွေပေါ့”

ချင်မင်သည် ထိုစကားများကို ကြားသောအခါ ရုတ်တရက် အလွန် အံ့အားသင့်သွားသည်။ ဤကျမ်းစာ သုံးရွက်၏ နောက်ခံမှာ သူ ထင်ထားသည်ထက် ပို၍ ကြီးမားနေပြီး သမိုင်းတစ်လျှောက် နာမည်ကျော် ပုဂ္ဂိုလ်များနှင့်ပင် သက်ဆိုင်နေလေသည်။

“ကျုပ် သေချာ ပြန်ကြည့်လိုက်ပါဦးမယ်”

သူ၏ မျက်နှာထားက ယခင်ကထက် ပို၍ လေးနက်သွားပြီး ထိုအရာထဲသို့ တစ်ကိုယ်လုံး နှစ်မြှုပ်ကာ လျှို့ဝှက်ချက်များကို သေချာစွာ လေ့လာနေတော့သည်။

လီချင်းယွဲ့၏ အဘိုးက နှစ်သိမ့်ပေးလိုက်သည်။

“တကယ်ကို လောစရာ မလိုပါဘူး။ ငါ ဒီမှာ လဝက်လောက် နေဦးမှာမို့ အချိန် အလုံအလောက် ရှိတယ်။ မင်းရဲ့ ခန္ဓာကိုယ် ဒါမှမဟုတ် စိတ်ဝိညာဉ်က အနည်းငယ် ထူးခြားတဲ့ ခံစားချက်လေး ရလာပြီဆိုရင် အဲဒါက မင်းနဲ့ ဒီကျမ်းစာက ရေစက်ပါလို့ပဲ။ အကျိုးအမြတ် တစ်ခုခု ရနိုင်လိမ့်မယ်။ ဘာဖြစ်လို့လဲဆိုတော့ သမိုင်းတစ်လျှောက် နာမည်ကျော် ပုဂ္ဂိုလ်တွေ အားလုံးကလည်း ဒီအတိုင်းပဲလေ။ အစတုန်းကတော့ ထူးခြားတဲ့ ခံစားချက်လေး နည်းနည်းပဲ ရကြတာ။ နှစ်ရှည်လများ ကျင့်ကြံပြီး နားလည်အောင် ကြိုးစားလာမှသာ နောက်ဆုံးမှာ အရည်အသွေး ပြောင်းလဲခြင်း ဖြစ်လာတာ”

မုန့်ရှင်းဟိုင်က ဤကျမ်းစာ၏ သမိုင်းကြောင်းကို ပြောပြသည်။ ညအမှောင်ထု ကမ္ဘာ၏ နက်ရှိုင်းသော နေရာမှ ရရှိခဲ့ခြင်းဖြစ်ပြီး ကြီးမြတ်သော နယ်မြေသစ် ဖော်ထုတ်ရေးခေတ်တွင် မတော်တဆ တွေ့ရှိခဲ့ခြင်း ဖြစ်သည်။ သို့သော် လူအနည်းငယ်သာလျှင် အကျိုးအမြတ် ရရှိခဲ့ကြသည်။

ကျင့်ကြံမှု မြင့်မားသူများပင်လျှင် နားလည်နိုင်လိမ့်မည်ဟု မဆိုနိုင်ပေ။ ဥပမာအားဖြင့် ကောင်းကင် စွမ်းအား၏ ဘိုးဘေးပင် ဖြစ်သည်။ သူ၏ ကျင့်ကြံမှုက လောကတွင် ပြိုင်ဘက်ကင်းပြီး ခန္ဓာကိုယ် ခွန်အားမှာ ကောင်းကင်ကိုပင် ဆုတ်ဖြဲနိုင်လောက်အောင် အမြင့်ဆုံးသို့ ရောက်ရှိနေသည်။ သို့သော် သူသည် ဤစာအုပ်ကို သုံးနှစ်တိုင်တိုင် ဖတ်ရှုခဲ့သော်လည်း နားလည်မှု အနည်းငယ်မျှပင် မရရှိခဲ့သဖြင့် ဒေါသထွက်ကာ စာအုပ်ကို တိုက်ရိုက် ဆုတ်ဖြဲပစ်ရန်ပင် ကြိုးစားခဲ့သည်။

အကယ်၍သာ တားဆီးမည့်သူ မရှိခဲ့ပါက ထိုစာအုပ်၏ သတ္တုပစ္စည်းက အထူးပြုလုပ်ထားခြင်း ဖြစ်သော်လည်း ဆက်လက်တည်ရှိမည် မဟုတ်ပေ။

ချင်မင်သည် နာရီဝက်ခန့် ဖတ်ရှုပြီးနောက် သူ၏ မျက်ခုံးများ ပူလာပြီး အနည်းငယ် အောင့်လာသဖြင့် ရပ်တန့်ကာ အနားယူလိုက်သည်။

လီချင်းယွဲ့၏ အဘိုးက လက်ဖက်ရည်ပန်းကန်ကို ချလိုက်ပြီး ပြောလိုက်သည်။

“တစ်နည်းအားဖြင့် ပြောရရင် ဒါက မိခင်ကျမ်းစာတစ်အုပ်လိုပဲ။ တိကျတဲ့ ကျင့်စဉ်ကို မပေးနိုင်ပေမဲ့ မင်းကို ဉာဏ်အလင်းတွေ၊ အလားအလာတွေ အများကြီး ပေးနိုင်တယ်”

ထိုကျမ်းစာအုပ်မှာ ခန္ဓာကိုယ် အသွင်ပြောင်း လမ်းစဉ်ကို လျှောက်လှမ်းသူများအတွက် လေ့လာရန် ပိုမို သင့်လျော်သည်ဟု ယူဆရသည်။ အဘယ်ကြောင့်ဆိုသော် သမိုင်းတစ်လျှောက် ထိုစာအုပ်ကို ဖတ်ရှုပြီး အကျိုးအမြတ် ရရှိခဲ့သူ အများစုမှာ ထိုလမ်းစဉ်မှ နာမည်ကျော်များ ဖြစ်သောကြောင့်ပင် ဖြစ်၏။

ချင်မင်က ကျမ်းစာရွက် သုံးရွက်ကို ခဏချထားသည်ကို မြင်သောအခါ မုန့်ရှင်းဟိုင်ကလည်း ပြောလိုက်သည်။

“လျှို့ဝှက်နယ်မြေက အားကောင်းတဲ့ အဘိုးကြီးတစ်ယောက်၊ လီချင်းရွှီရဲ့ ဆရာဆိုရင် လွန်ခဲ့တဲ့ နှစ်တစ်ရာကျော်က အရမ်းကို မာနကြီးပြီး ကိုယ့်ကိုယ်ကိုယ် ယုံကြည်မှု အလွန် ရှိခဲ့တယ်။ သူလည်း ဒီစာအုပ်ကို ငါးနှစ်လောက် လေ့လာခဲ့ဖူးတယ်။ ဒါပေမဲ့ နောက်ဆုံးတော့ ဘာမှ မရခဲ့ဘူး။ ကြားရသလောက်တော့ အဲဒီ အဘိုးကြီး မျက်နှာမည်းပြီး ဆူပုတ်သွားတာ ခြောက်လလောက်တောင် ကြာတယ်တဲ့”

ချင်မင် အံ့အားသင့်သွားသည်။ ဤစာအုပ်က အလွန် နာမည်ကြီးပုံရသည်။

လီချင်းယွဲ့၏ အဘိုးက ခေါင်းညိတ်လိုက်ပြီး “အင်း... လက်ရှိမှာတော့ ဒီစာအုပ်ရဲ့ မူရင်းက လျှို့ဝှက်နယ်မြေထဲမှာ ရှိတယ်။ သူတို့က သိမ်းဆည်း စောင့်ရှောက်ထားပေမဲ့ အဲဒီ စာကြည့်တိုက်ထဲမှာ ဖုန်တက်နေတာ နှစ်အတော်ကြာပြီ”

ဤသည်မှာ ရင်နာစရာ ကောင်းလှသည်။ ခန္ဓာကိုယ် အသွင်ပြောင်း လမ်းစဉ်အတွက် အသုံးဝင်သော စာအုပ်က လျှို့ဝှက်နယ်မြေမှ လူများ၏ လက်ထဲတွင် ရောက်ရှိနေခြင်းက လမ်းစဉ်နှစ်ခု၏ လက်ရှိ အခြေအနေ၊ အဆင့်အတန်းနှင့် ကွာဟချက်မှာ အလွန် ကြီးမားကြောင်း သက်သေပြနေသည်။

မုန့်ရှင်းဟိုင်က “လက်ရှိအချိန်မှာ လူသိရှင်ကြား မှတ်တမ်းတွေအရဆိုရင် လူအနည်းငယ်ကလွဲပြီး ဒီစာအုပ်ကို ဖတ်ရှုပြီး အကျိုးအမြတ် ရရှိခဲ့တဲ့သူ မရှိသလောက်ပါပဲ” ဟု ပြောလိုက်သည်။

“ကြည့်ရတာ တကယ်ပဲ ခက်ခဲပုံရတယ်။ ခေတ်တစ်ခေတ်မှာ လူအနည်းငယ်လောက်ပဲ နားလည်နိုင်တာကိုး”

ချင်မင်က ထပ်မံ ဖတ်ရှုလိုက်ရာ သူ၏ နဖူး ထပ်မံ ပူနွေးလာကြောင်း တွေ့လိုက်ရသည်။

သူ၏ စိတ်ထဲတွင် ရုတ်တရက် အတွေးတစ်ခု ဝင်လာသည်။ ဤသည်မှာ ထူးခြားသော ခံစားချက်ဟု ခေါ်ဆိုရမည်လား။

လီချင်းယွဲ့၏ အဘိုးက ခေါင်းညိတ်လိုက်ပြီး “အများကြီး ရှိနေပါပြီ။ လွန်ခဲ့တဲ့ အနှစ်တစ်ထောင်ကို ပြန်ကြည့်လိုက်ရင် ဒီစာအုပ်ကို နားလည်နိုင်တဲ့သူ ဘယ်နှစ်ယောက်များ ရှိလို့လဲ။ အတိအကျ ပြောရရင် တစ်အုပ်လုံးကို နားလည်နိုင်တဲ့သူ တစ်ယောက်မှ မရှိဘူး။ အားလုံးက ကျမ်းစာရဲ့ အစိတ်အပိုင်းလေးတွေကိုပဲ နားလည်ခဲ့ကြတာပါ”

ချင်မင်က မတတ်သာဘဲ ထပ်မံ ရပ်တန့်လိုက်ရသည်။ သူလည်း လက်ဖက်ရည် တစ်ငုံသောက်ကာ ထိုအခြေအနေကို အနည်းငယ် ခံစားကြည့်ပြီး သူ၏ ခန္ဓာကိုယ်တွင် ပုံမှန်မဟုတ်သော ပြောင်းလဲမှုများ ရှိမရှိ စစ်ဆေးကြည့်လိုက်သည်။

မုန့်ရှင်းဟိုင်က ပြောလိုက်သည်။

“လီ မိသားစုက ဒီတစ်ခေါက် လီချင်းရွှီကို နတ်ဘုရားရတနာ လုရာမှာ ကူညီပေးဖို့ ယင် နဲ့ ယန် စံအိမ်ရဲ့ အဓိက တပည့် လုကျိကို ရွှေရောင် ချပ်ဝတ် အစောင့်အရှောက် အနေနဲ့ ယာယီ ခေါ်ခဲ့တယ်။ လီ မိသားစုက ယင် နဲ့ ယန် စံအိမ်ကို အဖိုးတန် ပစ္စည်းတွေ အများကြီး ပေးခဲ့တဲ့အပြင် လုကျိကို လျှို့ဝှက်နယ်မြေမှာ သွားပြီး ဒီစာအုပ်ကို လေ့လာခွင့် ရအောင် သေချာ စီစဉ်ပေးမယ်လို့လည်း ကတိပေးခဲ့တယ်တဲ့”

ထိုစာအုပ်မှာ လျှို့ဝှက်နယ်မြေထဲတွင် ရှိနေသော်လည်း ချိတ်ပိတ်ထားခြင်း မရှိပေ။ အကယ်၍ တန်ဖိုးတစ်ခု ပေးဆပ်နိုင်ပါက သွားရောက် လေ့လာနိုင်လေသည်။

ဥပမာအားဖြင့် လျှို့ဝှက် ဂိုဏ်းကြီး ခြောက်ခု၏ စွမ်းအားကို ကျင့်ကြံထားသော ချွေချုံရီဆိုလျှင် ချွေ မိသားစုက သူ့ကို ထိုနေရာသို့ သွားရောက် လေ့လာနိုင်ရန် တက်ကြွစွာ စီစဉ်ပေးနေသည်။

လျှို့ဝှက်နယ်မြေ၏ အဓိက တပည့်ဖြစ်ပြီး အငြင်းပွားဖွယ် မရှိသော မျိုးစေ့အဆင့် ပုဂ္ဂိုလ် ချွေချုံဟယ်မှာမူ ဤစာအုပ်ကို လေ့လာခဲ့ပြီး ဖြစ်သည်။ အကျိုးအမြတ် ရရှိခဲ့သလား ဆိုသည်ကိုတော့ ပြင်ပလူများ မသိရှိနိုင်ပေ။

ချင်မင်မှာ ပြင်ပလူတစ်ဦး ဖြစ်သော်လည်း ယခုအကြိမ် ဤကျမ်းစာကို ဖတ်ရှုနိုင်ခြင်းမှာ သေချာပေါက် လီချင်းယွဲ့၏ တက်ကြွစွာ ကြိုးပမ်းပေးမှုကြောင့် ဖြစ်သည်။

ချင်မင် နားမလည်နိုင်ဘဲ ဖိအားများ ခံစားရမည်ကို မုန့်ရှင်းဟိုင် စိုးရိမ်သဖြင့် “ဒီကျမ်းစာကို လေ့လာရတာက ရေစက်ပါဖို့ အဓိကပဲ။ ဘာဖြစ်လို့လဲဆိုတော့ ကောင်းကင်ထောက် စွမ်းအားရဲ့ ဘိုးဘေးတောင်မှ ဒီစာအုပ်ကို ဘာခံစားချက်မှ မရလို့ ကျိန်ဆဲပြီး ပြတင်းပေါက်ကနေ ပစ်ချခဲ့သေးတာပဲ။ တကယ်လို့ အဆင်မပြေရင်လည်း တခြား ထူးခြားတဲ့ ကျင့်စဉ်တစ်ခုကို သွားလဲကြတာပေါ့” ဟု နှစ်သိမ့်ပေးလိုက်သည်။

“ဘိုးဘေးအဆင့် ပုဂ္ဂိုလ်တွေက ဒီလောက်တောင် သာမန်လူတွေနဲ့ တူတာလား”

ချင်မင် အံ့အားသင့်သွားသည်။

မုန့်ရှင်းဟိုင်က ပြောလိုက်သည်။

“မင်းက အဓိက အချက်ကို ဖမ်းမိပုံ မရဘူး။ ငါက မင်းကို စိတ်လျှော့ထားဖို့ ပြောနေတာ”

“ကျုပ် စိတ်လျှော့ထားပါတယ်။ မျက်ခုံးကြားမှာ နည်းနည်း ပူလာလို့ပါ”

“စိတ်လျှော့ထားရင် ရပြီ... ဟင်”

“မင်း ဘာပြောလိုက်တယ်”

ချက်ချင်းပင် မုန့်ရှင်းဟိုင်နှင့် လီချင်းယွဲ့၏ အဘိုးတို့ နှစ်ယောက်စလုံး လက်ဖက်ရည်ပန်းကန်များကို ချလိုက်ကြပြီး သူတို့၏ မျက်လုံးများတွင် တောက်ပသော အလင်းတန်းများ ပေါ်လာကာ သူ့ကို စိုက်ကြည့်နေကြသည်။

ချင်မင်က ပြောလိုက်သည်။

“ကနဦး ခံစားချက်လေး နည်းနည်းတော့ ရလာပြီ။ ဒါပေမဲ့ အရမ်း အားနည်းနေသေးတယ်။ ကျုပ် ထပ်ပြီး လေ့လာကြည့်ပါဦးမယ်”

လီချင်းယွဲ့၏ အဘိုးက ရုတ်တရက် မတ်တတ်ရပ်လိုက်သည်။ ထိုစာအုပ်က အရေးပါသော ပုဂ္ဂိုလ်မည်မျှကို အခက်တွေ့စေခဲ့သနည်း။ အခက်ခဲဆုံး ရှေးဟောင်းကျမ်းစာများထဲမှ တစ်ခုအဖြစ် သတ်မှတ်ခံထားရပြီး တကယ်ကို ရေစက် ဖြင့်သာ နားလည်နိုင်လေသည်။

တကယ်တော့ ကောင်းကင် စွမ်းအား၏ ဘိုးဘေးသာမက လျှို့ဝှက် ဂိုဏ်းကြီး ခြောက်ခု၏ ဘိုးဘေးများလည်း ခိုးကြောင်ခိုးဝှက် သွားရောက် လေ့လာ ခဲ့ဖူးသည်။ သို့သော် ရလဒ်မှာ မျက်လုံးနှစ်လုံး မှောင်မိုက်သွားခြင်းသာ ဖြစ်သည်။

သို့သော် ထိုဘိုးဘေးက မျက်နှာပူသဖြင့် သိရှိသူများကို ပြင်ပသို့ သတင်းမပေါက်ကြားစေရန် သတိပေးခဲ့သည်။ သို့မဟုတ်ပါက လျှို့ဝှက် ဂိုဏ်းကြီး ခြောက်ခု၏ ကောင်းကင်အလင်းဖြင့် အပိုင်းပိုင်း ခုတ်ထစ်ပစ်မည်ဟု ခြိမ်းခြောက်ခဲ့သည်။

လီချင်းယွဲ့၏ အဘိုးသည်လည်း ငယ်စဉ်က ကျမ်းစာရွက် သုံးရွက်ကို ဖတ်ဖူးသော်လည်း ဘာမျှ နားမလည်ခဲ့ပေ။ ယခုအခါ လူငယ်လေးတစ်ဦးက တစ်ခုခုကို နားလည်တော့မည့် အခြေအနေကို ကိုယ်တိုင် မျက်မြင်တွေ့လိုက်ရသဖြင့် မည်သို့ အံ့ဩတုန်လှုပ်ခြင်း မရှိဘဲ နေမည်နည်း။

ဤသည်မှာ ကောလာဟလများထဲမှ နာမည်ကျော်များနှင့် ရင်ပေါင်တန်းနိုင်ခြင်းပင် ဖြစ်လေသည်။

မုန့်ရှင်းဟိုင်၏ စိတ်နှလုံးများ လှုပ်ရှားနေသည်။ သူ အထင်ကြီးရသော ရှောင်ချင်မှာ အကြိမ်တိုင်းတွင် မျှော်လင့်ထားသည်ထက် ပိုမို စွမ်းဆောင်နိုင်ပုံရသည်။ ဦးလေးလီ၏ ရှေ့တွင် ဤကဲ့သို့ စွမ်းဆောင်ပြနိုင်ခြင်းက သူ့ကို ဂုဏ်ယူစရာ ဖြစ်စေသည်။

ယခုအကြိမ်တွင် ချင်မင် အခက်တွေ့လိမ့်မည်ဟု သူ ထင်ခဲ့သော်လည်း အမှန်တကယ်တွင် ချင်မင်သည် ယခင်ကအတိုင်း အစွမ်းထက်မြက်နေဆဲဖြစ်ကြောင်း သက်သေပြနေသည်။ အခက်ခဲဆုံး ရှေးဟောင်းကျမ်းစာများထဲမှ တစ်ခုကို ရင်ဆိုင်ရလျှင်ပင် အနှစ်သာရ အချို့ကို ထုတ်ယူနိုင်နေဆဲပင် ဖြစ်သည်။

ချင်မင်က ပြောလိုက်သည်။

“ဒီနေ့ စိတ်အခြေအနေ သိပ်မကောင်းဘူး။ ဒီစာအုပ်ကို လေ့လာရတာ အရမ်းပင်ပန်းတယ်။ နဖူးက အမြဲတမ်း ပူလာပြီး ကိုက်လာတယ်။ ကျုပ် ထပ်ပြီး လေ့လာကြည့်တော့ တစ်ခုခုကို ဖမ်းဆုပ်မိသွားသလို ခံစားရတယ်။ ဒီပုံသုံးပုံက ပိုပြီး ရှင်းလင်းလာသလိုပဲ၊ မတူတော့ဘူး”

“စိတ်အခြေအနေ မကောင်းတာတောင် ဒီရှေးဟောင်းကျမ်းစာရဲ့ အစိတ်အပိုင်း တစ်ချို့ကို နားလည်နိုင်တယ်ပေါ့”

လီချင်းယွဲ့၏ အဘိုးက သံသယဝင်သွားပြီး မုန့်ရှင်းဟိုင်ကို မေးချင်စိတ် ပေါ်လာသည်။ ဒီလူငယ်လေးက ပုံမှန်ဆိုရင်လည်း ဒီလိုပဲ စကားပြောတတ်တာလား။

သူ ကြားရသည်မှာ တကယ်ကို အဆင်မပြေလှပေ။ သူကိုယ်တိုင် ရေချိုးပြီး နံ့သာပေါင်းများ ထွန်းညှိကာ စိတ်ငြိမ်ငြိမ်ဖြင့် လေ့လာခဲ့သော်လည်း အချည်းနှီးသာ ဖြစ်ခဲ့သည်။ ဤသည်မှာ တကယ်ကို ဒေါသထွက်စရာ ကောင်းလှသည်။

လီချင်းရွှီ၏ ဆရာသာ သိသွားပါက၊ ထိုအဘိုးကြီးများသာ ချင်မင်၏ ဤစကားများကို ကြားသွားပါက ထွက်လာပြီး သူ့ကို ရိုက်သတ်ချင်ကြလိမ့်မည်ဟု လီချင်းယွဲ့၏ အဘိုးက ထင်မိသည်။

“သူက ပုံမှန်အားဖြင့် ကျမ်းစာတွေကို လေ့လာတဲ့နေရာမှာ တကယ်ကို မြန်ဆန်တယ်”

မုန့်ရှင်းဟိုင်က ချောင်းဟန့်ကာ ပြောလိုက်သည်။

“ကျုပ် ခန္ဓာကိုယ်လည်း တဖြည်းဖြည်း ပူလာသလို ခံစားရတယ်”

ချင်မင်က အသိပေးလိုက်သည်။ အတွေ့အကြုံ အသစ်တစ်ခု ထပ်မံ ရရှိလာပြန်ပြီ။

လီချင်းယွဲ့၏ အဘိုး ထိုင်မနေနိုင်တော့ပေ။ ထူးခြားသော ခံစားချက် နှစ်ခု ဆက်တိုက် ပေါ်လာခြင်းမှာ တစ်ခါမှ မကြားဖူးသော အခြေအနေပင် ဖြစ်သည်။

အခန်း ၁၂၆ တည်ထောင်သူ ဆရာကြီး အဆင့် စွမ်းဆောင်ရည်

ဧည့်ခန်းထဲတွင် အလွန် တိတ်ဆိတ်နေသည်။ မုန့်ရှင်းဟိုင် နှင့် လီချင်းယွန်းတို့သည် မတ်မတ်ထိုင်နေပြီး ထပ်မံ အသံမထွက်တော့ဘဲ အာရုံစူးစိုက်နေသော လူငယ်လေးကို အနှောင့်အယှက်ဖြစ်မည်ကို စိုးရိမ်နေကြသည်။

ခရမ်းရောင် ကြေးညို အမွှေးတိုင်အိုး ထဲတွင် လူတို့၏ စိတ်နှလုံးကို ကြည်လင်စေနိုင်သော စိတ်ငြိမ် အမွှေးတိုင် က ဖြည်းညင်းစွာ လောင်ကျွမ်းနေသည်။

ချင်မင် စာရွက်သုံးရွက်ကို ချထားလိုက်ပြီး ခြံဝင်းထဲသို့ ထွက်လာကာ အသက်ပြင်းပြင်း တစ်ချက်ရှူသွင်းလိုက်ပြီး ထူးခြားသော စည်းချက်ဖြင့် ပြန်လည် ထုတ်လွှတ်လိုက်ရာ သူ၏ မျက်လုံးများက ကြယ်ပွင့်များကဲ့သို့ တောက်ပနေသည်။ သူ နားလည်ထားသည့်အတိုင်း ကောင်းကင်အလင်း စွမ်းအား ကို အလွန်များပြားသော မျဉ်းကြောင်းငယ်လေးများအဖြစ် ပြောင်းလဲလိုက်ပြီး သွေးသားများထဲတွင် ဖြန့်ကျက်ကာ စာရွက်သုံးရွက်နှင့် သက်ဆိုင်သော ပုံသုံးပုံကို အတည်ပြု စမ်းသပ်နေသည်။

သူ၏ ကောင်းကင်အလင်း စွမ်းအားသည် လက်ရှိအဆင့်တွင် သူရပ်တည်နိုင်ရန် အခြေခံအုတ်မြစ်ဖြစ်သည်။ ပေါင်းစပ်သွားပြီးနောက် လျှို့ဝှက်နယ်မြေ မှ တပည့်များအတွက်မူ ရွှေရောင် နေမင်းကြီး ထွန်းလင်းတောက်ပနေသကဲ့သို့ ဖြစ်နေသည်။

ယခုအခါ ကောင်းကင်အလင်း စွမ်းအား သည် ရွှေရောင် မြစ်ငယ်လေးများအဖြစ် ပြောင်းလဲသွားပြီး သွေးသားများထဲတွင် စီးဆင်းနေကာ ပထမပုံတွင်ရှိသော ရှုပ်ထွေးလှသည့် ကွန်ရက်များနှင့် ကိုက်ညီနေသည်။

သူ၏ တစ်ကိုယ်လုံး နွေးထွေးသွားပြီး အလွန် သက်တောင့်သက်သာ ရှိသည်ဟု ခံစားလိုက်ရသည်။ ထိုအချိန်တွင် သူ၏ မျက်ခုံးကြားမှ အလင်းရောင်များ ထွက်ပေါ်လာပြီး ခန္ဓာကိုယ်က ပူနွေးလာကာ ခေါင်းမှ ခြေဖျားအထိ ကြည်လင်သန့်စင်နေပြီး ကောင်းကင်ဘုံသို့ တက်လှမ်းတော့မည့်အလား ထင်မှတ်ရသည်။

မုန့်ရှင်းဟိုင် နှင့် လီချင်းယွန်းတို့ အံ့အားသင့်ကာ ပါးစပ်အဟောင်းသား ဖြစ်သွားကြသည်။ ဒီအရာမှာ ထူးခြားသော ခံစားချက် ရှိရုံမျှမကဘဲ ကျင့်ကြံ၍ အောင်မြင်သွားခြင်းပင် ဖြစ်သည်။

အစအဆုံး ပေါင်းလိုက်လျှင် အချိန်မည်မျှပင် ကြာသေးသနည်း။ သူတို့နှစ်ယောက် ထိုအချက်ကို တွေးမိသောအခါ ကြက်သေ သေသွားကြသည်။

"လူတိုင်းရဲ့ နားလည်သဘောပေါက်မှုက မတူညီကြဘူး။ သူက လုံးဝ အသစ်ဖြစ်တဲ့ လည်ပတ်မှု လမ်းကြောင်းတစ်ခုကို ဖန်တီးလိုက်တာလား"

လီချင်းယွန်း က အလွန် အာရုံစူးစိုက်နေသော လူငယ်လေးကို အနှောင့်အယှက်ဖြစ်မည် စိုးသဖြင့် တိုက်ရိုက် အသံမထွက်ရဲဘဲ လျှို့ဝှက်စွာ အသံပို့လိုက်သည်။

ကြေးပြားပေါ်ရှိ ထွင်းထုထားသော ပုံများတွင် မျဉ်းကြောင်းများက ကြက်သီးထဖွယ် ကောင်းလောက်အောင် များပြားနေပြီး မည်သို့ စတင်ရမည်ကို လုံးဝ မသိနိုင်အောင် ဖြစ်စေကြောင်း သူ ကောင်းကောင်း သိထားသည်။ လေ့လာသူတိုင်းက သူတို့၏ ကိုယ်ပိုင် လည်ပတ်မှု လမ်းကြောင်းကိုသာ နားလည်သဘောပေါက်ကြမည် ဖြစ်သည်။

သူ အလွန် မျှော်လင့်နေမိပြီး အိုမင်းနေသော မျက်လုံးများတွင် တောက်ပသော အရောင်အဝါများ ထွက်ပေါ်လာသည်။ လူငယ်လေး တစ်ယောက် လမ်းကြောင်းသစ် ဖောက်လုပ်နေသည်ကို ကိုယ်တိုင် မျက်မြင်တွေ့ရှိရမည်ဟု မထင်ထားခဲ့ပေ။

"သမိုင်းမှာ တည်ထောင်သူ ဆရာကြီးတွေတောင် ဘာမှမလုပ်နိုင်ခဲ့တဲ့ ကျမ်းစာကို သူက တော်တော်လေး နက်နက်ရှိုင်းရှိုင်း နားလည်သွားပြီး လမ်းသစ်ဖောက်နေပါလား"

မုန့်ရှင်းဟိုင် က ခေါင်းတိတ်တဆိတ် ညိတ်လိုက်ပြီး သူ အထင်ကြီးထားသော လူပီသပေသည်ဟု စိတ်ထဲမှ ချီးကျူးလိုက်သည်။

ထို့နောက် ချင်မင် သည် အသိစိတ် ဝိညာဉ်အလင်း ကို သေးငယ်သော မျဉ်းကြောင်းလေးများအဖြစ် ပြောင်းလဲလိုက်ပြီး သွေးသားများထဲတွင် သွားလာစေကာ ရှုပ်ထွေးလှသော ကွန်ရက်တစ်ခုကို တည်ဆောက်လိုက်သည်။

မကြာမီ သူ မျက်မှောင်ကြုတ်သွားသည်။ အရင်ကလောက် ချောမွေ့မှုနှင့် သက်တောင့်သက်သာ ရှိမှုမျိုး မရှိတော့ပေ။

တောင်တန်းမြစ်သွယ် ဝိညာဉ်အသိုက်အမြုံ ထဲတွင် သူ၏ စိတ်စွမ်းအင် အရည်အသွေး ပြောင်းလဲသွားရုံသာမက လီချင်းယွဲ့ သင်ပေးခဲ့သော မန္တန်တစ်ခုကိုလည်း ကျင့်ကြံခဲ့သဖြင့် အသိစိတ် ဝိညာဉ်အလင်း မွေးဖွားလာခဲ့သည်။ သို့သော် အများစုက ခန္ဓာကိုယ်ကို ပြန်လည် အားဖြည့်ပေးခဲ့ပြီး အနည်းငယ်သာ ကျန်ရစ်ကာ မျှတမှုကို ထိန်းသိမ်းထားသည်။

ပြီးခဲ့သည့် နှစ်ရက်အတွင်း လျှို့ဝှက်ဂိုဏ်း၏ စာအုပ်ပါးလေးထဲမှ ကျင့်စဉ်ကို ကျင့်ကြံခဲ့သောကြောင့် သူ၏ ခန္ဓာကိုယ်ထဲတွင် သန့်စင်သော အလင်းရောင်များ မွေးဖွားလာခဲ့ပြီး ဆင်တူသော အခြေအနေမျိုး ဖြစ်ပေါ်ခဲ့သည်။ ထိုအလင်းရောင်များက ခန္ဓာကိုယ်ကို ပြန်လည် အားဖြည့်ပေးခဲ့ပြီး နောက်ဆုံးတွင် အနည်းငယ်သာ ကျန်ရစ်ကာ မျှတမှုကို ထိန်းသိမ်းထားသည်။

သန့်စင်သော အလင်းရောင် ဆိုသည်မှာ လျှို့ဝှက်ဂိုဏ်း သားများ ပြောလေ့ရှိသော နတ်ဘုရားဉာဏ်ပညာပင် ဖြစ်သည်။ ကျင့်ကြံမှုနှင့်အတူ အရည်အသွေး ပြောင်းလဲလာပြီး စဉ်ဆက်မပြတ် စုဆောင်း မြှင့်တင်နိုင်သည်။

အသိစိတ် ဝိညာဉ်အလင်း နှင့် နတ်ဘုရားဉာဏ်ပညာ တို့ကို အသုံးပြု၍ သွေးသားများထဲတွင် ရှုပ်ထွေးသော မျဉ်းကြောင်းများကို အသီးသီး တည်ဆောက်ပြီး သဘာဝအတိုင်း ရှေ့သို့ ဖြန့်ကျက်သောအခါ ကြီးမားသော တားဆီးမှုများကို တွေ့ရကြောင်း ချင်မင် သတိထားမိလိုက်သည်။

ထို့အပြင် ယခင်ကကဲ့သို့ ပေါ့ပါးပြီး ကြည်လင်သော ခံစားချက်မျိုး မရှိတော့ဘဲ အလွန် နေရခက်နေသည်။ ဒီအချက်က ကျမ်းစာ၏ အစစ်အမှန် အဓိပ္ပာယ်နှင့် ဆန့်ကျင်နေသည်။

"ဘဝသစ်ရရှိခြင်း လမ်းကြောင်းကို လျှောက်လှမ်းတဲ့ သူတွေနဲ့ပဲ တကယ် သင့်တော်တာလား"

ချင်မင် တစ်ကိုယ်တည်း ရေရွတ်လိုက်ပြီး နေရာတွင် ငြိမ်သက်စွာ ရပ်ရင်း ကျမ်းစာနှင့် ထွင်းထုထားသော ပုံသုံးပုံကို တိတ်ဆိတ်စွာ စဉ်းစားနေမိသည်။

ထို့နောက် သူသည် ကောင်းကင်အလင်း စွမ်းအား ၊ အသိစိတ် ဝိညာဉ်အလင်း နှင့် နတ်ဘုရားဉာဏ်ပညာ သုံးခုကို ကြိုးတစ်ချောင်းအဖြစ် ကျစ်လစ်စွာ ပေါင်းစပ်လိုက်ပြီး သွေးသားများထဲတွင် ပျံ့နှံ့စေကာ လျှို့ဝှက်ဆန်းကြယ်သော ကွန်ရက်တစ်ခုကို တည်ဆောက်၍ ဖြန့်ကျက်လိုက်သည်။

ထိုအခါ ချင်မင်၏ ခန္ဓာကိုယ်သည် ချက်ချင်း ပေါ့ပါးသွားပြီး စိတ်ထဲတွင် ကြည်လင်သွားသည်။ လောကီ အညစ်အကြေးများ ဖယ်ရှားခံလိုက်ရပြီး စိတ်နှလုံးမှ ဖုန်မှုန့်များ သုတ်သင်ခံလိုက်ရသကဲ့သို့ ဖြစ်သွားသည်။ ခန္ဓာကိုယ်မှ စိတ်ဝိညာဉ်အထိ ရှေးဟောင်း မှတ်တမ်းများတွင် ဖော်ပြထားသော အလင်းပွင့်ခြင်း နှင့် ပြည့်စုံခြင်း ခံစားချက်မျိုးကို ရရှိသွားသည်။

"ဒါက ကိုယ့်ကိုယ်ကိုယ် ပြန်လည် အားဖြည့်ပေးနေတာနဲ့ တူတယ်"

သူ သေချာစွာ ခံစားကြည့်ပြီးနောက် ဒီကျမ်းစာ၏ အစစ်အမှန် အသုံးဝင်မှုကို သဘောပေါက်သွားသည်။ ရေရှည် ကျင့်ကြံမည်ဆိုပါက အရိုးအကြောများကို ပြောင်းလဲစေနိုင်ပြီး အသက်စွမ်းအင်ကို မြှင့်တင်ပေးကာ စိတ်ဝိညာဉ်နှင့် ခွန်အားများကို အာဟာရ ဖြည့်တင်းပေးနိုင်သည်။

ဒီအခြေအနေမျိုးတွင် စိတ်နှလုံးက ကြည်လင်နေပြီး အသိစိတ်က ရှင်းလင်းနေကာ သဘော ပေါက်မြောက်မှု စွမ်းဆောင်ရည် မြင့်တက်လာသည်။ သူကိုယ်တိုင်လည်း ဝမ်းမြောက်မှုနှင့် ကျေနပ်မှုကို ခံစားရပြီး တစ်ခဏချင်း တရားအလင်းပွင့်သွားသကဲ့သို့ ဖြစ်နေသည်။

ဒီအရာများသည် လီချင်းယွန်း ပြောခဲ့ဖူးသော နာမည်ကြီး ပုဂ္ဂိုလ်များ ကျင့်ကြံ၍ ရရှိလာသည့် ထူးခြားချက်များပင် မဟုတ်ပါလား ဟု ချင်မင် ရုတ်တရက် သဘောပေါက်သွားသည်။

သူသည် ထိုအရာအားလုံးကို ထိတွေ့နိုင်ခဲ့ပြီ ဖြစ်သည်။ စာရွက်သုံးရွက်ပေါ်ရှိ အကြောင်းအရာများနှင့် ကြေးပြားပေါ်ရှိ ထွင်းထုထားသော ပုံများသည် ဒီကျမ်းစာ၏ အဓိက အနှစ်ချုပ် ဖြစ်သင့်ကြောင်းကို သူ နားလည်သွားပြီ ဖြစ်သည်။

သူ နားလည်သဘောပေါက်ပြီး အောင်မြင်စွာ ကျင့်ကြံနိုင်ခဲ့ပြီဖြစ်ကြောင်း ချင်မင် သိလိုက်သည်။

"ဒီကျင့်စဉ်မှာ အကျိုးကျေးဇူးတွေ အများကြီး ရှိတယ်။ ဒါကို ဆက်တိုက် ကျင့်ကြံတာက ကံကြမ္မာကို တဖြည်းဖြည်း ပြောင်းလဲနေတာနဲ့ တူတယ်။ ဒါပေမယ့် ထာဝရ အသက်ရှင်ခြင်းနဲ့တော့ အများကြီး ကွာဝေးနေသေးတယ်" ဟု သူ စဉ်းစားနေမိသည်။

သူ ခေါင်းမော့ကြည့်လိုက်သောအခါ မုန့်ရှင်းဟိုင် နှင့် လီချင်းယွန်း တို့ နှစ်ယောက်စလုံး၏ မျက်လုံးများတွင် မီးဝင်းဝင်းတောက်သကဲ့သို့ ရှိနေပြီး သူ့ကို ကြည့်နေကြကြောင်း တွေ့လိုက်ရသည်။

"မင်း နားလည်သွားပြီလား"

"မင်း လမ်းကြောင်းသစ် တစ်ခုကို ဖောက်လုပ်နိုင်ခဲ့ပြီလား"

သူတို့နှစ်ယောက် အလွန် စိတ်လှုပ်ရှားစွာဖြင့် စိတ်အားထက်သန်စွာ မေးလိုက်ကြသည်။

ကာယကံရှင်ထက်ပင် သူတို့က ပို၍ ဂရုစိုက်နေကြောင်း သိသာထင်ရှားလှသည်။

ချင်မင် ခေါင်းညိတ်ကာ "အခက်အခဲ သိပ်မကြီးမားဘူးလို့ ကျွန်တော် ထင်တယ်" ဟု ပြန်ဖြေသည်။

သူ အမှန်တိုင်း ပြောခြင်းဖြစ်သည်။ အဘယ်ကြောင့်ဆိုသော် ဒီကျမ်းစာသည် သူ့ကို နေ့တစ်ဝက်ပင် အချိန်မဆွဲနိုင်ခဲ့သောကြောင့် ဖြစ်သည်။

ပိုးသားစာလိပ် တစ်အုပ်ကို သူ ဆယ်နှစ်ကျော်ကြာ ကျင့်ကြံခဲ့ရပြီး သေလုမြောပါး ဘေးအန္တရာယ် တစ်ခုကို ကြုံတွေ့ပြီးမှသာ အခြေခံအဆင့်သို့ ရောက်ရှိကာ ထိုမှတစ်ဆင့် ဘဝသစ်ရရှိခြင်း လမ်းကြောင်း ပေါ်သို့ တရားဝင် ခြေချနိုင်ခဲ့ခြင်း ဖြစ်ကြောင်း သိထားရမည်။

ချင်မင်၏ စိတ်ထဲတွင် ပိုးသားစာလိပ်ထက် ပို၍ ကျင့်ကြံရန် ခက်ခဲသော ကျင့်စဉ် မရှိတော့ပေ။

သို့သော် မုန့်ရှင်းဟိုင် နှင့် လီချင်းယွန်း တို့က ထိုအကြောင်းများကို မသိကြသဖြင့် သဘာဝကျစွာပင် စိတ်ထဲတွင် ခံစားချက်များ ရှုပ်ထွေးနေကြသည်။

အထူးသဖြင့် နောက်တစ်ယောက်ဖြစ်သူ လီချင်းယွန်းသည် သူ၏ ဘဝကိုပင် သံသယဝင်လာပြီး သူ့ကိုယ်သူပင် ဝမ်းနည်းမိလာသည်။ လီချင်းယွန်းသည် တစ်ချိန်က စိတ်ဝင်တစား လေ့လာခဲ့ပြီး နှစ်ပေါင်းများစွာ တံခါးပိတ်ကျင့်ကြံ ခဲ့သော်လည်း လူငယ်လေး တစ်ယောက်၏ တစ်ခဏချင်း တရားအလင်းပွင့်မှုလောက်ပင် မစွမ်းဆောင်နိုင်ခဲ့ပေ။

ချင်မင် က စကားစလိုက်သည်။

"ခင်ဗျားတို့ ဒီစာအုပ်ကို အရမ်း ဂရုစိုက်နေကြတာလား။ တကယ်ကို ထူးခြားတယ်။ ပါရမီကို မြှင့်တင်ပေးနိုင်ပြီး သက်တမ်းကိုလည်း ရှည်စေတယ်။ ကျုပ် ခင်ဗျားတို့ကို သင်ပေးနိုင်တယ်"

"ဒါက..."

လီချင်းယွန်း အနည်းငယ် တွေဝေသွားသည်။ သူက အသက်အရွယ် ကြီးရင့်နေပြီ ဖြစ်ကာ ကျင့်ကြံမှု အဆင့်ကလည်း မြင့်မားနေပြီ ဖြစ်ရာ လူငယ်လေး တစ်ယောက်၏ အလင်းပွင့်မှု ရလဒ်ကို အချောင်နှိုက်ရန် မျက်နှာပူနေမိသည်။

မုန့်ရှင်းဟိုင်ကတော့ ပို၍ ပွင့်လင်းလွတ်လပ်သူဖြစ်ရာ ချက်ချင်းပင် လိုက်သင်ယူလေသည်။

လီချင်းယွန်းလည်း နှုတ်ခမ်းကိုက်လိုက်ပြီး အရှက်ကို ဘေးဖယ်ထားလိုက်သည်။

သို့သော် မကြာမီ သူတို့နှစ်ယောက် မျက်လုံးပြူးသွားကြသည်။ ချင်မင် ဖောက်လုပ်ထားသော လမ်းကြောင်းသစ်ကို လည်ပတ်နိုင်စွမ်း မရှိကြပေ။ အတင်းအဓမ္မ တွန်းအားပေးလိုက်သောအခါ ခန္ဓာကိုယ်ထဲတွင် သွေးပိတ်သွားမတတ် ဖြစ်သွားကြသည်။

"ဒါ ဘာကြီးလဲ"

ချင်မင်လည်း အံ့သြသွားသည်။ ထို့နောက် သူ့နောက်သို့ လိုက်လုပ်စေပြီး သူ တည်ဆောက်ထားသော လမ်းကြောင်းကို ကြည့်ရှုရန် သူတို့၏ အသိစိတ် ဝိညာဉ်အလင်းကိုပင် ထုတ်လွှတ်ခွင့် ပြုလိုက်သည်။

သူတို့နှစ်ယောက် လိုက်လံ အတုခိုးသော်လည်း အသုံးမဝင်ပေ။ လုံးဝ လည်ပတ်၍ မရပေ။

လီချင်းယွန်းသည် ကျင့်ကြံမှု စွမ်းအား မြင့်မားသူဖြစ်ရာ နောက်ဆုံးတွင် ချင်မင် ကောင်းကင်အလင်း စွမ်းအားကို လည်ပတ်တိုင်း ထိုရှုပ်ထွေးလှသော မျဉ်းကြောင်းများက အချိန်နှင့်အမျှ ပြောင်းလဲ ချိန်ညှိနေကြောင်းကို သတိပြုမိသွားသည်။

"မင်း ဘယ်လို ထိန်းချုပ်ထားတာလဲ"

သူက မနေနိုင်ဘဲ မေးလိုက်သည်။

ချင်မင်က ရှင်းပြလိုက်သည်။

"ဒီကျမ်းစာက တကယ်တော့ အတွင်းအား ဖြည့်တင်းခြင်း အကြောင်းကို ပြောထားတာ..."

"အတွင်းအား ဖြည့်တင်းခြင်း" ဆိုသော စကားတစ်ခွန်းက လီချင်းယွန်း နှင့် မုန့်ရှင်းဟိုင် တို့ကို လဲကျမတတ် ဖြစ်သွားစေသည်။ ဒီအရာမှာ ထာဝရ အသက်ရှင်ခြင်း နှင့် ပတ်သက်သော ရှေးဟောင်း ကျမ်းစာ တစ်အုပ် ဖြစ်ပြီး ညအမှောင် ကမ္ဘာ၏ နက်ရှိုင်းသော နေရာမှ ထွက်ပေါ်လာကာ အလွန် ကြီးကျယ်ခမ်းနားသော နောက်ခံ ရှိသည်။

သို့သော် ဒီလူငယ်လေးက ၎င်းကို လမ်းဘေးတွင် ပျံ့နှံ့နေသော သာမန် ကိုယ်ခံပညာ တစ်ခုကဲ့သို့ သဘောထားနေသည်လား ဟု သူတို့ တွေးမိသွားကြသည်။

ချင်မင်က ရှင်းပြသည်။

"ဒီကျင့်စဉ်က တကယ်ကို ထူးခြားတယ်။ နှစ်ပေါင်းများစွာ ဆက်တိုက် ကျင့်ကြံသွားရင် အရိုးအကြောတွေကို ပြောင်းလဲစေနိုင်ပြီး ခန္ဓာကိုယ်နဲ့ စိတ်ဝိညာဉ်ကို ပြန်လည် အားဖြည့်ပေးနိုင်တယ်။ နောက်ဆုံးကျရင် အရည်အသွေး ပြောင်းလဲမှုကို ဖြစ်ပေါ်စေလိမ့်မယ်"

ဒီအရာမှာ ကံကြမ္မာကို ပြောင်းလဲစေသော နည်းလမ်းဖြစ်ပြီး လျှို့ဝှက်ကျမ်းစာ တစ်အုပ် ဖြစ်ကြောင်း သူတို့နှစ်ယောက် ခေါင်းညိတ်ကာ အသိအမှတ်ပြုလိုက်ကြသည်။

ချင်မင် ဆက်ပြောသည်။

"ဒါက ခင်ဗျားတို့ ထင်ထားတာနဲ့ မတူနိုင်ဘူး။ ထာဝရ အသက်မရှင်နိုင်ဘူး။ ယေဘုယျပြောရရင် ဒါက တကယ်တော့ ကိုယ့်ကိုယ်ကိုယ် အတွင်းအား ဖြည့်တင်းတဲ့ ကျင့်စဉ် တစ်ခုပါပဲ"

သူတို့နှစ်ယောက်၏ အကြည့်များ ထပ်မံ ပြောင်းလဲသွားပြန်သည်။ အတွင်းအား ဖြည့်တင်းခြင်း ဆိုသော စကားလုံး နှစ်လုံးက အမှန်တကယ်ပင် အနည်းငယ် လှုံ့ဆော်မှု ဖြစ်စေသည်။

ချင်မင် က စဉ်းစားရင်း ပြောလိုက်သည်။

"ရှေးခေတ်က လူတွေ ရှာဖွေခဲ့တဲ့ လမ်းကြောင်းက ကျွန်တော်တို့နဲ့ မတူညီတာ ဖြစ်နိုင်တယ်။ သူတို့က သက်တမ်းရှည်ဖို့နဲ့ ခန္ဓာကိုယ် ဖွဲ့စည်းပုံကို ပြောင်းလဲဖို့လောက်ပဲ ရည်ရွယ်ခဲ့ကြတယ်။ ဒါကြောင့် တစ်အုပ်လုံးက အရမ်းကို အေးချမ်းပြီး ချင်ထျန်း စွမ်းအား နဲ့ လျူယွီ စွမ်းအားတို့ရဲ့ စွမ်းအားကို အများကြီး မမီဘူး။ သူ့ရဲ့ အနှစ်ချုပ်ကို ကြည့်ရရင် ဒါက ကျန်းမာရေး စောင့်ရှောက်မှု စာအုပ် တစ်အုပ်ပဲ"

"မင်း ဆိုလိုတာက မင်းက အစိတ်အပိုင်း တစ်ခုကိုပဲ နားလည်သွားတာ မဟုတ်ဘဲ အကုန်လုံးကို သေချာ နားလည်ပြီး အကုန် ကျင့်ကြံနိုင်သွားပြီ ဆိုတဲ့ သဘောလား"

လီချင်းယွန်းက မေးလိုက်သည်။

ချင်မင် ခေါင်းညိတ်ကာ "ဒီကျမ်းစာရွက် သုံးရွက်နဲ့ သက်ဆိုင်တဲ့ ကြေးပြားပေါ်က ထွင်းထုထားတဲ့ ပုံတွေရဲ့ အစစ်အမှန် အဓိပ္ပာယ်ကို ကျွန်တော် နားလည်သွားပြီလို့ ထင်တယ်" ဟု ပြန်ဖြေသည်။

"မင်း ဘယ်လို လမ်းကြောင်းတွေကို ဖောက်လုပ်ပြီး လည်ပတ်နိုင်ခဲ့သလဲ ဆိုတာ ငါ့ကို ပြောပြပါဦး"

လီချင်းယွန်းက အရှက်ကို ဂရုမစိုက်တော့ဘဲ ချက်ချင်းပင် တောင်းဆို မေးမြန်းလိုက်သည်။ သူ အမှန်တကယ်ပင် အနည်းငယ် မယုံကြည်နိုင်သေးပေ။

ချင်မင် စကားစလိုက်သည်။

"ဒီကျမ်းစာက ယင် နဲ့ ယန် ရဲ့ ပြောင်းလဲမှုကို ဆုပ်ကိုင်ပြီး ဝိညာဉ်ရေးရာ အနှစ်သာရတွေကို ရှူရှိုက်ကာ အသိစိတ် နဲ့ နတ်ဘုရားဉာဏ်ပညာ ကို ကောင်းကင်အလင်း စွမ်းအားထဲ ပေါင်းထည့်ပြီး သွေးသားတွေထဲမှာ စိုက်ပျိုးရမယ်။ အချင်းချင်း ယင် နဲ့ ယန် အဖြစ် အပြန်အလှန် ဖြစ်တည်ပြီး ကောင်းကင်နဲ့ မြေကြီး နဲ့ ကိုက်ညီရမယ်..."

ထို့နောက် သူက ထပ်မံ ဖြည့်စွက်ပြောကြားလိုက်သည်။

"အသိစိတ် ဝိညာဉ်အလင်း နဲ့ နတ်ဘုရားဉာဏ်ပညာ မရှိရင်လည်း ကောင်းကင်အလင်း စွမ်းအား တစ်ခုတည်းနဲ့ လုံလောက်တယ်"

ထို့နောက် သူက လက်တွေ့ ပြသလိုက်ပြီး သဘာဝအတိုင်း လွှတ်ထားကာ ကောင်းကင်နှင့် မြေကြီး ကိုက်ညီသွားပြီးနောက် ကောင်းကင်အလင်း စွမ်းအားက သဘာဝအတိုင်း ပျံ့နှံ့သွားမည် ဖြစ်ကြောင်း၊ ဖြတ်သန်းသွားသော နေရာများက လည်ပတ်မှု လမ်းကြောင်းများ ဖြစ်လာပြီး သက်တောင့်သက်သာ ရှိကာ ပေါ့ပါး ကြည်လင်ပြီး ပြည့်စုံမှု ခံစားချက်ကိုပါ ရရှိမည်ဖြစ်ကြောင်း သူတို့ကို ပြောပြလိုက်သည်။

လီချင်းယွန်း မှင်တက်သွားပြီး အတော်ကြာမှ စကားပြောထွက်သည်။

"မင်းက အရမ်းကို စိတ်ကူးယဉ်ဆန်လွန်းတယ်။ လုံးဝကို ကောင်းကင်အလင်း စွမ်းအားကို သူ့ဘာသာသူ ရွေးချယ်ခွင့် ပေးလိုက်တာပဲ။ ပြီးတော့မှ မင်းက လမ်းကြောင်းကို မှတ်ထားပြီး ငါတို့ကို ပြောပြတာလား"

မုန့်ရှင်းဟိုင် က သက်ပြင်းချရင်း ပြောသည်။

"ဒါက ဘယ်လိုလုပ် လမ်းကြောင်းသစ် ဖောက်လုပ်တာ ဖြစ်မှာလဲ။ လွတ်လပ်တဲ့ စိတ်နှလုံး လမ်းကြောင်း နဲ့ ပိုတူနေတယ်"

သူတို့နှစ်ယောက် မျက်လုံးပြူးသွားကြသည်။ လူတိုင်း၏ ကောင်းကင်အလင်း စွမ်းအား က မတူညီကြသဖြင့် စီးဆင်းသွားသော လမ်းကြောင်းများကလည်း ကွာခြားမည် ဖြစ်ရာ ဒီအရာကို မည်သို့ အတုခိုးရမည်နည်း ဟု တွေးမိကြသည်။

"ဒီရှေးဟောင်း ကျမ်းစာက အရမ်း လျှို့ဝှက်ဆန်းကြယ်ပြီး နားလည်ရ အရမ်း ခက်ခဲလွန်းတယ်။ တခြားသူဆီက သင်ယူလို့တောင် မရပါလား"

အဘိုးအို လီချင်းယွန်းက ကောင်းကင်ကို မော့ကြည့်ကာ သက်ပြင်းချလိုက်သည်။ သူ ဘာမှမတတ်နိုင်တော့ဘဲ အနည်းငယ် အထီးကျန်သွားသည်။ သူ ယခုလေးတင် မြင်တွေ့ခဲ့ရသော မျှော်လင့်ချက်လေးက ချက်ချင်း ငြိမ်းသတ်ခံလိုက်ရသဖြင့် တကယ်ကို စိတ်ပျက်စရာ ကောင်းလှသည်။

ချင်မင်က ပြောသည်။

"ဒါက လျှို့ဝှက်ဆန်းကြယ်တာ မဟုတ်ပါဘူး။ ဘယ်နေရာက ခက်ခဲလို့လဲ။ ခင်ဗျားတို့လည်း စိတ်သွားတိုင်း လမ်းကြောင်း ဖောက်လုပ်နိုင်ပြီး လွတ်လပ်တဲ့ စိတ်နှလုံး လမ်းကြောင်း ကို စမ်းသပ်ကြည့်နိုင်တယ်"

"မင်း ဘာမှ မပြောနဲ့တော့။ ငါ့ကို တိတ်တိတ်လေး နေခွင့်ပေးပါ"

လီချင်းယွန်းက လူကိုပင် ပိတ်ရိုက်ချင်စိတ် ပေါက်သွားသည်။ ဘာက လွတ်လပ်တဲ့ စိတ်နှလုံး လမ်းကြောင်း လဲ။ ဘယ်သူက အလွယ်တကူ စမ်းသပ်ရဲမှာလဲ။ တစ်ခုခု မှားယွင်းသွားလျှင် မိမိကိုယ်ကို ပြင်းထန်စွာ ဒဏ်ရာရစေလိမ့်မည်။

ချင်မင် စဉ်းစားကြည့်မိသည်။ ပိုးသားစာလိပ် ပေါ်မှ ကျင့်စဉ်ဖြင့် ကျင့်ကြံထားသော ကောင်းကင်အလင်း စွမ်းအားက သူနှင့် အလွန် ကိုက်ညီနေသောကြောင့် ဖြစ်နိုင်သည်။ ထို့ကြောင့် သူက ထက်မြက်စွာ ထိန်းချုပ်နိုင်ပြီး မိမိကိုယ်ကို ပေါ့ပါး ကြည်လင်စေသော လမ်းကြောင်းများဆီသို့ တွန်းအားပေးကာ စိတ်အလိုကျ လုပ်ဆောင်နိုင်ခြင်း ဖြစ်ပေမည်။

အကယ်၍ ထိုသို့သာဆိုလျှင် သူ တခြားသူများကို ကူညီပေးနိုင်မည် မဟုတ်ပေ။

ချင်မင်က ပြောသည်။

"ဒီကျင့်စဉ်က တကယ်ကို အံ့မခန်းပဲ။ သူက ပါရမီကို မြှင့်တင်ပေးနိုင်ပြီး သက်တမ်းကို ရှည်စေနိုင်တယ်။ တန်ဖိုးမဖြတ်နိုင်တဲ့ ရတနာ စာအုပ် တစ်အုပ်လို့ သတ်မှတ်လို့ ရတယ်။ ဒါပေမယ့် ရှေးဟောင်း ကျင့်စဉ်တွေကို အရမ်းကြီး အထင်ကြီးနေဖို့ မလိုပါဘူး။ ကျွန်တော် ထင်တာတော့ တိုက်ခိုက်မှု အပိုင်းကို ကြည့်မယ်ဆိုရင် ချင်ထျန်း စွမ်းအားကို အများကြီး မမီလောက်ဘူး"

"အနှစ်ချုပ် အပြင် နောက်ပိုင်းမှာ တိကျတဲ့ ကျင့်စဉ်တချို့ ရှိသေးတယ်။ မင်းအတွက် အရမ်း အသုံးဝင်လိမ့်မယ်။ ဒါက ထူးဆန်းတဲ့ ကျင့်စဉ်တွေထက် တန်ဖိုး ပိုကြီးတယ်"

လီချင်းယွန်း ထွက်ခွာသွားသည်။ မထွက်ခွာမီ ချင်မင်ကို ကြည့်သော သူ၏ မျက်နှာအမူအရာက အလွန် ရှုပ်ထွေးနေသည်။

"စီနီယာလီ က ဘာလို့ အဲဒီလို မျက်နှာထား ဖြစ်နေရတာလဲ"

ချင်မင် က တဖြည်းဖြည်း ပျောက်ကွယ်သွားသော သူ၏ ကျောပြင်ကို ကြည့်ရင်း နားမလည်နိုင်အောင် ဖြစ်နေသည်။

"အံ့အားသင့်သွားတာလေ"

မုန့်ရှင်းဟိုင်က ရယ်မောလိုက်သည်။

ထို့နောက် သူက အပြုံးကို ရုပ်သိမ်းလိုက်ပြီး ပြောသည်။

"မလာခင်တုန်းက သူက မင်းကို ချင်းယွဲ့ ရဲ့ အနာဂတ် ကျောက်စိမ်း ချပ်ဝတ် အစောင့်အရှောက် ၊ နတ်ဘုရား ချပ်ဝတ် အစောင့်အရှောက် ၊ အနာဂတ်ရဲ့ ပထမဆုံး အစောင့်အရှောက် အဖြစ် သတ်မှတ်ထားတာ။ ဘာပဲဖြစ်ဖြစ် မင်းရဲ့ ထူးခြားမှုကို သူ ကြားဖူးထားတယ်လေ။ ဒါပေမယ့် ဒီကို ရောက်လာပြီးတဲ့နောက် မင်းရဲ့ စွမ်းဆောင်ရည်က သူ ခန့်မှန်းထားတာထက် အများကြီး သာလွန်နေတယ်။ အသွင်ပြောင်းခြင်း လမ်းကြောင်းပေါ်က တချို့သော တည်ထောင်သူ ဆရာကြီး အဆင့် ပုဂ္ဂိုလ်တွေရဲ့ လူငယ်ဘဝ စွမ်းဆောင်ရည်တွေထက် မညံ့ဘူး။ ဥပမာအားဖြင့် ဝူရှင်းနန်းတော် ၊ ယင်ယန်ကျောင်းတော် ၊ ချွန်းယန်နန်းတော်တို့ရဲ့ တည်ထောင်သူ ဆရာကြီးတွေတောင် အဲဒီကျမ်းစာရဲ့ အစိတ်အပိုင်း တစ်ခုကိုပဲ နားလည်ခဲ့ကြတာ"

ချင်မင်၏ မျက်နှာ အနည်းငယ် ပြောင်းလဲသွားသည်။ သူ ပြင်းပြင်းထန်ထန် ကျင့်ကြံခဲ့ရခြင်းမှာ အခြားသူများ၏ နောက်လိုက် ဖြစ်ရန် လုံးဝ မဟုတ်ကြောင်း သူ ကတိပြုထားခဲ့ဖူးသည်။

မုန့်ရှင်းဟိုင် က ပြောသည်။

"စိတ်မလောပါနဲ့။ သူ့မှာ မကောင်းတဲ့ ရည်ရွယ်ချက် မရှိပါဘူး။ အသွင်ပြောင်းခြင်း ဆိုတဲ့ ဒီလမ်းကြောင်းက တကယ်ကို မျှော်လင့်ချက် မရှိဘူးလို့ သူ ထင်နေရုံပါ။ ချင်ထျန်း ၊ လျူယွီ တို့လို တည်ထောင်သူ ဆရာကြီး အဆင့် ပုဂ္ဂိုလ်တွေတောင် အချိန်ကို အားကိုးပြီးမှ ကျင့်ကြံမှု အဆင့်ကို တဖြည်းဖြည်း မြှင့်တင်နိုင်ခဲ့ကြတာ။ ဒီလမ်းကြောင်းက သွားရတာ မလွယ်ဘူး။ နောက်ပိုင်းရောက်လေ ပိုခက်ခဲလေပဲ"

ထို့နောက် မုန့်ရှင်းဟိုင် က ရယ်မောလိုက်ပြီး ပြောသည်။

"မင်းရဲ့ အခု အခြေအနေက သူ့ကို လုံးဝ ထိတ်လန့်သွားစေတယ်။ လူငယ် တည်ထောင်သူ ဆရာကြီး တစ်ယောက် ခြေငြိမ်ငြိမ် နေနေသလိုမျိုး ဖြစ်နေတယ်..."

ထို့နောက် သူက သက်ပြင်းချရင်း ပြောသည်။

"ဒီနေ့ မင်းရဲ့ စွမ်းဆောင်ရည်က ငါ့ကိုလည်း တော်တော်လေး အံ့အားသင့်စေတယ်"

ချင်မင် ခေါင်းခါကာ ပြောသည်။

"ကျုပ်ရဲ့ ဒီလောက်လေး အောင်မြင်မှုက ဘာမှ မဟုတ်သေးပါဘူး။ နတ်ဘုရားနဲ့ နီးစပ်တဲ့ ပစ္စည်းတွေကို လုယူကြတဲ့ အချိန်မှာ အဓိက တပည့်တွေ တိုက်ခိုက်ကြတော့ ကျုပ် လုံးဝ မပါဝင်နိုင်ခဲ့ဘူး။ ရွယ်တူတွေ ဖြစ်ပေမယ့် ကျုပ်က အောက်ခြေလူ တစ်ယောက်လို ဘေးကနေပဲ ရပ်ကြည့်နေခဲ့ရတယ်။ အဲဒီနောက် ညစာစားပွဲမှာ လျှို့ဝှက်နယ်မြေ က တပည့်တွေနဲ့ လျှို့ဝှက်ဂိုဏ်း က လာတဲ့ သူတွေထဲမှာ ဘယ်သူက ပါရမီရှင် မဟုတ်လို့လဲ။

ကျင့်ကြံမှု အဆင့်တွေက အရမ်းကို မြင့်မားကြတယ်။ သူတို့က ကျုပ်ထက် အများကြီး မကြီးကြဘူး။ တချို့ဆိုရင် အရမ်းမြင့်မားတဲ့ အဆင့်ကြီးတွေကိုတောင် ရောက်နေကြပြီ။ နတ်ဘုရားနဲ့ နီးစပ်တဲ့ မျိုးစေ့တွေလို့ သတ်မှတ်ခံထားရတယ်။ တခြားသူတွေကို မပြောနဲ့ဦး။ ခန္ဓာကိုယ် ဝင်ရောက်စီးနင်းတာ နှစ်ကြိမ် ကျရှုံးခဲ့တဲ့ ချွေချုံဟယ်ကို သေချာ စဉ်းစားကြည့်ရင် အရမ်းကို ကြောက်စရာကောင်းတယ်။ သူက ကျုပ်နဲ့ ရွယ်တူပဲ။ အခု ဘယ်အဆင့်မှာ ရှိနေပြီလဲ။ သူ ရှုံးနိမ့်သွားတာက ချင်းယွဲ့ ရဲ့ ဝိညာဉ်မျက်လုံး နဲ့ မတော်တဆ ဆုံတွေ့ပြီး မထင်မှတ်ဘဲ ရှာဖွေတွေ့ရှိခံလိုက်ရလို့ပါ"

မုန့်ရှင်းဟိုင် က သူ့ကို ကြည့်ကာ ပြောသည်။

"မင်းက ကိုယ့်ကိုယ်ကိုယ် အောက်ခြေလူလို့ ခေါ်တယ်ပေါ့။ မင်းက လမ်းကြောင်းပေါ် ရောက်တာ နောက်ကျရုံလေးပါ။ ကိုယ့်ကိုယ်ကိုယ် နှိမ့်ချနေစရာ မလိုပါဘူး။ မင်း အနှေးနဲ့အမြန် တည်ထောင်သူ ဆရာကြီး လမ်းကြောင်း ကို လျှောက်လှမ်းနိုင်မှာပါ"

ချင်မင်က ပြောသည်။

"နောက်ကျနေတာက အမှန်တရားပဲလေ။ တချို့လူတွေက ကျုပ်ထက် အသက်အများကြီး ငယ်တဲ့အချိန်မှာတောင် ကျုပ်ရဲ့ အခု အဆင့်ထက် မြင့်နေကြတယ်။ ကျုပ် ကြိုးကြိုးစားစား လုပ်ဖို့ လိုအပ်ပါသေးတယ်"

မုန့်ရှင်းဟိုင် က ပြောသည်။

"မင်းရဲ့ အကြည့်တွေက တခြား လမ်းကြောင်းတွေဆီ ရောက်နေတာပဲ။ တခြား လမ်းကြောင်းပေါ်က ပြိုင်ဘက်တွေနဲ့ နှိုင်းယှဉ်နေတာလား"

ချင်မင် ခေါင်းညိတ်ကာ ပြန်ဖြေသည်။

"ဟုတ်ပါတယ် တခြား လမ်းကြောင်းတွေက ခန့်မှန်းလို့ မရအောင် နက်ရှိုင်းတယ် လျှို့ဝှက်နယ်မြေ က ကျုပ်တို့ လမ်းကြောင်းမှာ အရမ်း အရေးကြီးတဲ့ ကျမ်းစာအုပ် တစ်အုပ်ကို အဲဒီမှာ ဖြစ်သလို ချထားတယ်။ တန်ဖိုးတစ်ခု ပေးဆပ်လိုက်တာနဲ့ ပြင်ပလူတွေက သွားကြည့်လို့ ရတယ်။ ဆိုလိုတာက သူတို့က သိပ်ဂရုမစိုက်ဘူး။ သူတို့ရဲ့ ကိုယ်ပိုင် အရင်းအမြစ်တွေက ကျုပ်တို့ စိတ်ကူးထားတာထက် အများကြီး သာလွန်နေတယ်"

ကြီးကျယ်သော တည်ထောင်ခြင်း ခေတ်ကာလတွင် လျှို့ဝှက်နယ်မြေမှ လူများသည် ညအမှောင် ကမ္ဘာ ၏ နက်ရှိုင်းသော နေရာတွင် ပို၍ ကြီးမားသော အကျိုးအမြတ်များ ရရှိခဲ့မည်မှာ သေချာကြောင်း ချင်မင် တွေးမိသည်။

ဒီအရာများကို မုန့်ရှင်းဟိုင် သိထားသည်။ အမှန်တကယ်ပင် အမှန်တရား ဖြစ်သည်။

ထို့နောက် သူက အရေးကြီးသော အဆင့်သို့ ရောက်ရှိနေပြီဖြစ်သော စာမေးပွဲကြီးကို တွေးမိပြီး မေးလိုက်သည်။

"မင်း ဘယ်ကို သွားမယ်ဆိုတာ စဉ်းစားပြီးပြီလား။ မင်းအပေါ် ငါ အရမ်း ယုံကြည်မှု ရှိတယ်။ မင်း တည်ထောင်သူ ဆရာကြီး လမ်းကြောင်း ပေါ် လျှောက်လှမ်းတာကို စောင့်ကြည့်နေမယ်"