အခန်း (၈၉၁-၈၉၂)
Vol. 73 Ch. 891-892
အခန်း (၈၉၁) - ဗီဒီယိုဖိုင်ကြောင့် အမှောင်နတ်သူငယ်များ စစ်ထဲဝင်ရန် လှုံ့ဆော်ခံရခြင်း
အမှော်နတ်သူငယ်များ၏ ခက်ထန်မာနကြီးသော စရိုက်အရ လူသားတို့၏ လေ့ကျင့်ပေးမှုကို နာခံရန်မှာ အနည်းငယ် ခက်ခဲနိုင်ပေသည်။
ရှောင်းယီသည် ထိုအခြေအနေကို သိသော်လည်း ဤအချက်အလက်အပေါ် လျှော့ပေးမည်မဟုတ်ပေ။
အမှောင်နတ်သူငယ်များကို မဟာမိတ်အဖွဲ့၏ လုံခြုံရေးတပ်ဖွဲ့တွင် ပါဝင်ခွင့်ပြုရန် ဆုံးဖြတ်ပြီးကတည်းက စုစည်းထားသော ကွပ်ကဲမှုစနစ်တစ်ခု ရှိရမည်ဖြစ်သည်။ ၎င်းတို့အား စိတ်ကြိုက် လှုပ်ရှားခွင့်ပေးရန်မှာ မဖြစ်နိုင်ပေ။
“ဒါက နောက်ဆုံးစည်းပဲ။ ဘာလို့လဲဆိုတော့ မနာခံမှုတစ်ခုခု ဖြစ်လာရင် ငါတို့မဟာမိတ်အဖွဲ့အတွင်း လုံခြုံရေးပြဿနာတွေ တက်လာနိုင်လို့ပဲ။”
ရှောင်းယီက ရှင်းပြလိုက်သည်။
“အကယ်၍ မင်းတို့ ဒါကို မလုပ်နိုင်ဘူးဆိုရင် ကျွန်းပေါ်က တခြားတောအုပ်တွေထဲက သားရဲတိရစ္ဆာန်တွေကိုပဲ သွားရောက်အမဲလိုက်ရမယ်။”
ဆရာက ခေါင်းငြိမ့်လိုက်သည်။
“အင်း ငါ နားလည်ပြီ။ သူတို့နဲ့ ဆွေးနွေးကြည့်ပါဦးမယ်။”
“ကောင်းပြီ...။ ဆုံးဖြတ်ချက်ချပြီးတာနဲ့ ငါ့ကို အကြောင်းကြားဖို့ မမေ့ပါနဲ့။”
ရှောင်းယီက ပြုံးကာ ပြောလိုက်သည်။
“သေချာပေါက်ပဲပေါ့။ ကျွန်မမှာ လက်ကိုင်ဖုန်း ရှိနေပြီဆိုတော့ အမြန်ဆုံး အကြောင်းကြားပါ့မယ်။”
ဆာရာကလည်း ပြုံးကာ ပြန်ဖြေလိုက်သည်။
“အင်း ဒါဆို ဖုန်းချပြီ။”
ဖုန်းချပြီးနောက် ဟေးလ်သည် အံ့အားသင့်နေရာမှ သတိပြန်ဝင်လာပြီး မေးလိုက်သည်။
“စောစောက တကယ်ပဲ ကျွန်းပိုင်ရှင်လား။”
“ဒါပေါ့။ သူ့အသံကို နင် မမှတ်မိဘူးလား။”
ဆာရာက ပြန်မေးလိုက်၏။ ထိုအခါမှဟေးလ်က ခေါင်းငြိမ့်လိုက်သည်။
“မှတ်မိတာပေါ့။ ဒါပေမဲ့ ဒါက တကယ်ကို မယုံနိုင်စရာပဲ။”
ထို့နောက်ဆာရာသည် ရှောင်းယီ ပြောပြထားသည့်အတိုင်း လက်ကိုင်ဖုန်း၏ အလုပ်လုပ်ပုံကို ဟေးလ်အား အကျဉ်းချုပ် ရှင်းပြလိုက်၏။
ဟေးလ်သည် အဓိပ္ပာယ်ကို အပြည့်အဝ နားမလည်သော်လည်း အကြမ်းဖျင်းအားဖြင့်တော့ သဘောပေါက်သွားခဲ့သည်။
“ဒီပစ္စည်းက တကယ်ပဲ လူနှစ်ယောက်ကို ဒီလောက်အဝေးကြီးကနေ ဆက်သွယ်ပေးနိုင်တာလား။ တကယ်ကို အံ့သြဖို့ကောင်းတာပဲ။”
ဟေးလ်က စိတ်လှုပ်ရှားစွာ ရေရွတ်လိုက်သည်။
“အင်း။”
ဆာရာက ဆိုသည်။
“ကဲ နင်တို့ရဲ့ လက်ကိုင်ဖုန်းတွေကို ထုတ်လိုက်။ အခြေခံ အသုံးပြုပုံတွေကို ငါသင်ပေးမယ်။”
မကြာမီ ဆာရာ၏ အခန်းထဲတွင် အင်တာနက်စွဲလမ်းနေသော မိန်းကလေး သုံးဦး ပေါ်ပေါက်လာခဲ့ပြီး အသီးသီး မိမိတို့၏ဖုန်းများကို လေ့လာနေကြတော့လေသည်။
“ဒါက အရမ်းအစွမ်းထက်တာပဲ။ ဗီဒီယိုတွေတောင် ကြည့်လို့ရတယ်။ ကြည့်စမ်း ဒါက ယီရန်ပင်း မဟာမိတ်အဖွဲ့ရဲ့ ပြင်ပတိုက်ပွဲ ဗီဒီယိုနဲ့တူတယ်။ ဗန်ပိုင်းယားတွေတောင် ပါတယ်လား။”
ဟေးလ်သည် ဗန်ပိုင်းယားများ ထိန်းချုပ်ထားသော မဟာမိတ်အဖွဲ့ကို တိုက်ခိုက်သည့် ဗီဒီယိုအား မတော်တဆ တွေ့ရှိသွားကာ အံ့အားသင့်စွာ ပြောလိုက်၏။
“ဘာ... ငါ့ကို ပေးကြည့်ဦး။”
ဆာရာ အမြန်တိုးကြည့်လိုက်သည်။ ဗီဒီယိုကို မြင်ပြီးနောက် သူမ အလေးအနက် စဉ်းစားခန်း ဝင်သွားခဲ့လေသည်။
ဖုန်းကို ခဏတာ ထပ်မံလေ့လာပြီးနောက် ဟေးလ်နှင့် အခြားနှစ်ဦးမှာ ပြန်လည်ထွက်ခွာသွားခဲ့ကြသည်။ ဆာရာသည် သူတို့ကို မတားတော့ဘဲ ကိုယ်တိုင်ပင် လိုက်လံပို့ဆောင်ပေးခဲ့သည်။
၎င်းတို့ ထွက်သွားပြီးနောက် ဆာရာသည် အနည်းငယ်စဉ်းစားကာ ကိုယ့်ကိုယ်ကိုယ် အကျယ်ချုပ်ချထားသော အကြီးအကဲများရှိရာသို့ ဦးတည်သွားလိုက်သည်။
“အကြီးအကဲတို့ ကျွန်မ ရင်ဆိုင်နေရတဲ့ အခြေအနေတစ်ခုအတွက် အကြံဉာဏ် လိုချင်ပါတယ်။”
ဆာရာက လိုရင်းကို တိုက်ရိုက်ပြောလိုက်၏။
“အခု မင်းက အမှောင်နတ်သူငယ်မျိုးနွယ်စုအတွက် ဆုံးဖြတ်ချက်အားလုံး ချနိုင်နေပြီပဲ။ ဘာလို့ ငါတို့ကို လာတိုင်ပင်နေသေးတာလဲ။”
အကြီးအကဲချုပ်က သူမကို နားမလည်နိုင်စွာ ကြည့်ရင်း မေးလိုက်သည်။
“ကျွန်မတို့ အမှောင်နတ်သူငယ်မျိုးနွယ်စုရဲ့ သွေးထဲမှာ တိုက်ခိုက်ရေးဗီဇတွေ အမြဲရှိနေခဲ့တာပါ။ အခုဘဝက အရမ်းအေးချမ်းလွန်းနေတယ်။ ကျွန်မတို့ တိုက်ပွဲတွေကနေ လှုံ့ဆော်မှုအချို့ လိုအပ်နေတယ်။”
ဆာရာက ရှင်းပြလိုက်သည်။
“ပြီးတော့ ဒီမှာရှိတဲ့ တစ်ခုတည်းသော တိုက်ပွဲက ပြင်ပတိုက်ပွဲတွေပဲ။ အဲ့ဒါကြောင့် ကျွန်မတို့ အမှောင်နတ်သူငယ်တွေအနေနဲ့ ယီရန်ပင်း မဟာမိတ်အဖွဲ့ရဲ့ ပြင်ပတိုက်ပွဲတွေမှာ ပါဝင်စေချင်တယ်။”
“ဒါက အတော်လေး ကောင်းတယ်မဟုတ်ဘူးလား။”
အကြီးအကဲချုပ်က ဇဝေဇဝါဖြင့် မေးလိုက်သည်။
“ဒါပေမဲ့ ကျွန်းပိုင်ရှင်က ပြောတယ်။ ကျွန်မတို့ဘက်က လူသားတွေရဲ့ လေ့ကျင့်ပေးမှုနဲ့ စုစည်းထားတဲ့ ကွပ်ကဲမှုကို လက်ခံရမယ်။ ကျွန်မတို့ မျိုးနွယ်စုဝင်တွေ ဒါကို လုပ်နိုင်ပါ့မလားလို့ စိုးရိမ်မိတယ်။”
ဆာရာက ဆိုသည်။
“လူသားတွေရဲ့ လေ့ကျင့်ပေးမှုကို လက်ခံရမယ် ဟုတ်လား။ ဟမ့်... သူတို့က ငါတို့ အမှောင်နတ်သူငယ်တွေရဲ့ ခန္ဓာကိုယ် တည်ဆောက်ပုံကို သိလို့လား။”
“အတိအကျပဲ။ အဲဒီ အထူးလက်နက်တွေသာ မရှိရင် သူတို့က ငါတို့ရဲ့ ပြိုင်ဘက်တောင် မဟုတ်ဘူး။ သူတို့မှာ ငါတို့ကို လေ့ကျင့်ပေးဖို့ ဘာအရည်အချင်း ရှိလို့လဲ။”
“ဒါက တကယ်ပဲ လူအများကို နားချဖို့ မလွယ်ဘူး။”
အကြီးအကဲ အသီးသီးက သူတို့၏ အမြင်များကို ထုတ်ဖော်ပြောဆိုလိုက်ကြသည်။ ခြုံငုံကြည့်လျှင် လူသားများသည် ၎င်းတို့၏ အမှောင်နတ်သူငယ်မျိုးနွယ်စုကို လေ့ကျင့်ပေးရန် အရည်အချင်းမရှိဟု ယုံကြည်နေခဲ့ကြလေသည်။
ဆာရာက တည်ငြိမ်စွာ ပြောလိုက်သည်။
“ဒါပေမဲ့ သူတို့ရဲ့ ပြင်ပတိုက်ပွဲတွေမှာ ဗန်ပိုင်းယားတွေနဲ့ တွေ့ခဲ့ရတယ်။”
ထိုစကားကို ကြားသောအခါ အကြီးအကဲများအားလုံး အံ့အားသင့်စွာ အာမေဍိတ်သံများ ထွက်ပေါ်လာခဲ့ကြပြီး မတ်တတ်ထရပ်ကုန်ကြသည်။
“သူတို့ တကယ်ပဲ ဗန်ပိုင်းယားတွေနဲ့ တွေ့ခဲ့တာလား။”
အကြီးအကဲချုပ်က ထိတ်လန့်တုန်လှုပ်စွာ မေးလိုက်၏။
“ဟုတ်ပါတယ်။”
ထို့နောက် ဆာရာသည် စောစောက ဗီဒီယိုကို ရှာဖွေပြီး အကြီးအကဲများကို ပြသလိုက်လေသည်။
အကြီးအကဲများသည် ဆာရာ့လက်ထဲမှ ဖုန်းကို စိတ်ဝင်စားနေကြသော်လည်း ဗီဒီယိုထဲမှ ဗန်ပိုင်းယားများက သူတို့၏ အာရုံကို ပိုမိုဆွဲဆောင်နေခဲ့သည်။
“တကယ်ကို ဗန်ပိုင်းယားတွေ ရှိနေတာပဲ။ ဒါဆိုရင် ငါတို့ အဲဒီ ပြင်ပတိုက်ပွဲတွေမှာ သေချာပေါက် ပါဝင်ရမယ်။”
“မှန်တယ်၊ ငါတို့နဲ့ ဗန်ပိုင်းယားတွေက ပြန်လည်သင့်မြတ်လို့မရတဲ့ ရန်သူတွေပဲ။ ဗန်ပိုင်းယားတွေရဲ့ အသိုက်အကို ရှာဖို့ ရှောင်းယီနောက်ကို လိုက်ရမယ်။”
“အဲဒီလိုဆိုရင်တော့ ရှောင်းယီရဲ့ လိုအပ်ချက်တွေကို ငါတို့ လက်ခံရမှာပေါ့။”
ထိုအချိန်တွင် အကြီးအကဲချုပ်က ထပ်မံပြောကြားလိုက်သည်။
“ဗန်ပိုင်းယားတွေကို နှိမ်နင်းနိုင်သရွေ့တော့ ရှောင်းယီရဲ့ လိုအပ်ချက်တွေကို လက်ခံရတာ ဘာဖြစ်သလဲ။ သူတို့မှာ ငါတို့ကို လေ့ကျင့်ပေးဖို့ နည်းလမ်းမရှိရင်တောင် လေ့ကျင့်နေတဲ့ အချိန်မှာ သူတို့ ခက်ခဲတာကို သိသွားတဲ့အခါ သူတို့ဘာသာ နောက်ဆုတ်သွားလိမ့်မယ်။”
“အကြီးအကဲချုပ် ပြောတာ မှန်တယ်။”
အခြားအကြီးအကဲများကလည်း တညီတညွတ်တည်း ထောက်ခံလိုက်ကြသည်။
အနီးအနားတွင် အကျဉ်းချခံထားရသော ဟေအာကလည်း မနေနိုင်ဘဲ ဝင်ပြောလာခဲ့သည်။
“ဘုရင်မ ကျွန်မလည်း တိုက်ပွဲတွေမှာ ပါဝင်လို့ရမလား။”
တစ်နေ့ကုန် ဤနေရာတွင် ထိုင်နေရသည်မှာ တကယ်ကို ပျင်းစရာကောင်းလွန်းလှပေသည်။ ဤအတိုင်းသာ ဆက်သွားရပါက သူ တကယ်ပဲ ကိုယ့်ကိုယ်ကိုယ် သေကြောင်းကြံစည်မိတော့မည်ဟု ဟေအာ ခံစားနေရသည်။
ထိုအခါ ဆာရာက သူ့ကို တစ်ချက်ကြည့်ပြီး တည်ငြိမ်စွာ ပြောလိုက်သည်။
“နင် ငါ့အမိန့်ကို ထပ်ပြီး ဖောက်ဖျက်ရဲရင် နင် သေတဲ့အထိ အကျဉ်းချခံထားရလိမ့်မယ်။”
“ဟုတ်ကဲ့ ကျေးဇူးတင်ပါတယ် ဘုရင်မ။”
ဟေအာက စိတ်လှုပ်ရှားစွာ ပြောလိုက်သည်။
အကြီးအကဲများ ကန့်ကွက်ခြင်း မရှိတော့သည်ကို မြင်သောအခါ ဆာရာ မတ်တတ်ထရပ်လိုက်၏။
“ကောင်းပြီ ဒါဆို ဆုံးဖြတ်လိုက်ပြီ။ ကျွန်းပိုင်ရှင်နဲ့ ကျွန်မ ဆက်သွယ်လိုက်ပါ့မယ်။”
“ခဏလေး ဘုရင်မ မင်းလက်ထဲက အဲဒီ စက်က ဘာလဲ။”
အကြီးအကဲချုပ်က မနေနိုင်ဘဲ မေးလိုက်ပြန်သည်။
“ဒါကို လက်ကိုင်ဖုန်းလို့ ခေါ်တယ်။”
ဆာရာက အနည်းငယ် ရှင်းပြလိုက်၏။
“အကြီးအကဲတို့ အရင်က ဖြစ်ပျက်ခဲ့တာတွေက အတိတ်မှာ ကျန်ခဲ့ပါပြီ။ အကယ်၍ ဒီအပြင်လူတွေအကြောင်းကို နားလည်ချင်တယ်ဆိုရင် အပြင်ကို ပိုထွက်ကြည့်သင့်တယ်။ မဟာမိတ်အဖွဲ့ထဲက လူသားတွေက တခြားမျိုးနွယ်စုတွေအပေါ် အရမ်း ဖော်ရွေကြတယ်။ ကျွန်မ သမန်းဝံပုလွေတွေ၊ ရေသူတွေနဲ့ လူပုတွေကိုတောင် တွေ့ခဲ့ရတယ်။ သူတို့က အပန်းဖြေစခန်းမှာ ခဏခဏ ပေါ်လာတတ်ကြတယ်။”
အကြီးအကဲ ကိုးဦးစလုံး အလွန်အံ့အားသင့်သွားခဲ့ကြသည်။ ထို့နောက် ထွက်ခွာသွားသော ဆာရာ့ကို ကြည့်ရင်း သူတို့ စဉ်းစားခန်းဝင်သွားခဲ့ကြလေသည်။
“အကြီးအကဲချုပ် ကျွန်မတို့ အပြင်ထွက်ပြီး သွားကြည့်သင့်လား။”
အကြီးအကဲချုပ်က အနည်းငယ် စဉ်းစားပြီးနောက် ပြောလိုက်၏။
“ကောင်းပြီ အပြင်ထွက်ပြီး သွားကြည့်ကြတာပေါ့။”
ဆာရာသည် အကြီးအကဲများ၏ အကျယ်ချုပ်ဧရိယာထဲမှ ထွက်လာခဲ့ပြီးနောက် သူမ၏ မျက်နှာတွင် အပြုံးတစ်ခု ပေါ်လာခဲ့လေသည်။
အကြီးအကဲများ ထိုဗီဒီယိုကို မြင်လိုက်ရသည်နှင့် အမှောင်နတ်သူငယ်များ မဟာမိတ်အဖွဲ့၏ လုံခြုံရေးတပ်ဖွဲ့တွင် ပါဝင်ရန် သေချာပေါက် သဘောတူမည်ကို သူမ သိထားပြီးဖြစ်သည်။
အမှန်စင်စစ် အမှောင်နတ်သူငယ်များသာမက အလင်းနတ်သူငယ်များပါ လုံခြုံရေးတပ်ဖွဲ့တွင် ပါဝင်ရန် သေချာပေါက် ရွေးချယ်လိမ့်မည်ဖြစ်ကြောင်း ဆာရာ သိနေ၏။
အကြောင်းမှာ ဗန်ပိုင်းယားများသည် နတ်သူငယ်မျိုးနွယ်စုတစ်ခုလုံး၏ ဘုံရန်သူ ဖြစ်သောကြောင့်ပင်။
ဤသို့တွေးရင်းဖြင့် ဆာရာသည် ရှောင်းယီထံသို့ ဖုန်းခေါ်ဆိုလိုက်တော့သည်။
“ဒီလောက် မြန်မြန် အဆင်ပြေသွားပြီလား။ သတင်းကောင်း ဖြစ်မယ်လို့ ငါထင်တယ် ဟုတ်လား။”
ရှောင်းယီက မေးလိုက်သည်။
“တကယ်ကို သတင်းကောင်းပဲ။ ငါတို့ နင့်ရဲ့ လိုအပ်ချက်တွေကို သဘောတူတယ်။ ဒါပေမဲ့ နင် ငါတို့ကို လေ့ကျင့်ပေးနိုင်စွမ်း မရှိဘူးဆိုရင်တော့ ငါတို့ ဒီလေ့ကျင့်မှုကို နာခံမှာမဟုတ်ဘူးနော်။”
ဆာရာက ပြုံးကာ ပြန်ပြောလိုက်၏။
“တစ်နည်းပြောရရင် မင်းတို့ကို လေ့ကျင့်ပေးဖို့ ငါတို့ဘက်က အစွမ်းအစ အချို့ ထုတ်ပြရမယ်ပေါ့ ဟုတ်လား။”
ရှောင်းယီ အနည်းငယ် အံ့အားသင့်သွားကာ မေးလိုက်သည်။
“အတိအကျပဲ။ ကဲ... နင် သတ္တိရှိရဲ့လား။”
ဆာရာက ရယ်မောရင်း ပြောလိုက်၏။
“ ‘ရှိရဲ့လား’ ဆိုတဲ့ စကားလုံးကို ဖယ်လိုက်စမ်းပါ။ ငါတို့ မလုပ်ရဲတာ ဘာမှမရှိဘူး။ မင်းရဲ့ အဖွဲ့ကိုသာ အဆင်သင့်ပြင်ထားလိုက်။ အချိန်တန်ရင် အစ်ကိုကျန်းကို မင်းဆီ ဆက်သွယ်ခိုင်းလိုက်မယ်။”
ရှောင်းယီက ယုံကြည်မှုအပြည့်ဖြင့် ပြောလိုက်သည်။
အခန်း ၈၉၂ - ချာလီ ပေါ်လာခြင်း၊ မဟာမိတ်အဖွဲ့ဝင်များကို သွေးစုပ်ဖုတ်ကောင်အဖြစ် ပြောင်းလဲခြင်း
ဆာရာ အနည်းငယ် အံ့အားသင့်ခဲ့သွားသည်။ သူမ၏ နားလည်မှုအရ လူသားများသည် လျင်မြန်မှုနှင့် ပတ်သက်လျှင် နတ်သူငယ်များကို လုံးဝယှဉ်နိုင်မည် မဟုတ်ပေ။
လေးအတတ်နှင့် ပတ်သက်၍မူ ဆာရာက ပို၍ပင် ယုံကြည်မှု ရှိသေး၏။ သူမ၏ နတ်သူငယ်များမှာ မွေးရာပါ လေးသမားများ ဖြစ်ကြသည်။
ဤရှောင်းယီက မည်သည့်နေရာမှ ထိုကဲ့သို့ ယုံကြည်မှုများ ရရှိနေသနည်း။
အံ့အားသင့်သွားခဲ့သော်လည်း ဆာရာက ပြန်ဖြေလိုက်သည်။
“ကောင်းပါပြီ၊ ဒါဆိုရင် နင့်ရဲ့ နည်းပြက ငါတို့ နတ်သူငယ်မျိုးနွယ် စစ်သည်တွေကို ဘယ်လိုအနိုင်ယူမလဲဆိုတာ ငါ စောင့်ကြည့်နေမယ်။”
“ကောင်းပြီ။ အချိန်ကျရင် လာကြည့်လို့ရတယ်။”
ရှောင်းယီက ပြန်ဖြေပြီးနောက် ဖုန်းချလိုက်တော့သည်။
ခဏမျှ စဉ်းစားပြီးနောက် ရှောင်းယီသည် ကျန်းယွင်ထျန်းအား ဖုန်းဆက်လိုက်၏။
“အစ်ကိုကျန်း အမှောင်နတ်သူငယ်မျိုးနွယ်စုက သဘောတူလိုက်ပြီ။ ဒါပေမဲ့ သူတို့အားလုံးက ပြဿနာရှာတတ်တဲ့သူတွေပဲ။ သူတို့ကို နည်းနည်းလောက် ယဉ်ပါးအောင် လုပ်ဖို့ လိုလိမ့်မယ်လို့ ငါ ထင်တယ်။”
ရှောင်းယီက ပြောလိုက်သည်။ ကျန်းယွင်ထျန်းက ပြုံးလိုက်သည်။
“ပြဿနာရှာတဲ့သူတွေလား။ ငါက အဲ့လိုမျိုး ပြဿနာရှာတဲ့သူတွေကို တကယ်မကြောက်ဘူး။ သူတို့ကို လာခဲ့ဖို့သာ ပြောလိုက်။”
“ဒါပေမဲ့ သူတို့မှာ မွေးရာပါ အားသာချက်တွေ ရှိတယ်။ မင်းအနေနဲ့ ရူးသွပ်ဆေး တချို့တော့ ပြင်ဆင်ထားသင့်တယ်။ သူတို့ကို မဖြစ်မနေ အနိုင်ယူရမယ်။ မဟုတ်ရင် နောက်ပိုင်းမှာ စီမံခန့်ခွဲရ ခက်သွားလိမ့်မယ်။”
ရှောင်းယီက သတိပေးလိုက်သည်။
“စိတ်ချပါ ကျွန်းပိုင်ရှင်။ ငါကိုသာ လွှဲထားလိုက်ပါ။ ငါ အားလုံး စီစဉ်လိုက်မယ်။”
ကျန်းယွင်ထျန်းက တုံ့ပြန်လိုက်သည်။ ရှောင်းယီက ကျေနပ်စွာ ခေါင်းငြိမ့်ပြလိုက်သည်။
ဤအချိန်တွင် ရှောင်းယီ ရှာဖွေတွေ့ရှိခဲ့သော တိုက်သစ်ကြီးသည် ပင်လယ်ရေအောက်သို့ တစ်ဝက်ခန့် နစ်မြုပ်နေပြီ ဖြစ်ပြီး တိုက်ကြီးပေါ်ရှိ အဖွဲ့အစည်းအသီးသီးသည်လည်း ၎င်းတို့၏ ကိုယ်ပိုင် ဦးတည်ရာများကို ရှာဖွေတွေ့ရှိထားကြပြီ ဖြစ်သည်။
ယခုအချိန်တွင် သူတို့ တိုက်ကြီးပေါ်၌ ဆက်ရှိနေရသည့် တစ်ခုတည်းသော အကြောင်းရင်းမှာ ထိုနေရာရှိ သယံဇာတများကို အပြည့်အဝ မထုတ်ယူရသေးခြင်းကြောင့် ဖြစ်ပြီး ဤနောက်ဆုံးအချိန်ကာလအတွင်း အပြိုင်အဆိုင် တူးဖော်နေကြခြင်း ဖြစ်သည်။
ယခင်က ရှောင်းယီကို လိုက်လံတိုက်ခိုက်ခဲ့သော သွေးစုပ်ဖုတ်ကောင် ချာလီသည်လည်း ထိုအထဲတွင် ပါဝင်ပေသည်။
သူသည် ယခင်မျိုးဆက် အသက်ရှင်ကျန်ရစ်သူ၏ ကျွန်းအနီးသို့ ရောက်သည်အထိ ရှောင်းယီနောက် လိုက်လံတိုက်ခိုက်ခဲ့စဉ်က ထိုနေရာအား တိုက်ကြီး၏ “းတားမြစ်နယ်မြေဖြစ်ကြောင်း သတိရမိသွားကာ ချက်ချင်းပင် ကြောက်လန့်ပြီး ဆုတ်ခွာသွားခဲ့ရသည်။
ရက်အနည်းငယ် ကြာပြီးနောက်တွင်လည်း ချာလီသည် အလျှော့မပေးလိုသေးသဖြင့် စစ်သည်အဖွဲ့တစ်ဖွဲ့ကို ခေါ်ဆောင်ကာ တားမြစ်နယ်မြေ၏ အစွန်အဖျားသို့ ပြန်လာခဲ့၏။
သို့သော် ဤတစ်ကြိမ်တွင် ချာလီမှာ မှင်တက်သွားခဲ့ရလေသည်။ တားမြစ်နယ်မြေသည် ဧရာမ ရေကန်ကြီးတစ်ခု ဖြစ်နေခဲ့ချေပြီ။
“တားမြစ်နယ်မြေက ဘယ်ရောက်သွားတာလဲ။”
ချာလီသည် မိမိမျက်လုံးကိုယ်တိုင်ပင် မယုံနိုင် ဖြစ်သွားခဲ့၏။ သူနှင့်အတူ ပါလာသော စစ်သည်များမှာလည်း ဆွံ့အသွားခဲ့ကြသည်။ တိုက်ကြီးပေါ်ရှိ တားမြစ်နယ်မြေကို လူတိုင်း သိကြသော်လည်း ယခုအခါ ၎င်းမှာ ပျောက်ကွယ်သွားပြီလော။
တစ်ချိန်တည်းမှာပင် အဖွဲ့အစည်းအတော်များများသည်လည်း တားမြစ်နယ်မြေ ပျောက်ကွယ်သွားသည်ကို တွေ့ရှိသွားခဲ့ကြပြီး စတင်သံသယဝင်လာကြတော့သည်။
“ပင်လယ်ရေက တားမြစ်နယ်မြေကို အရင်ဆုံး လွှမ်းမိုးသွားတာလား။”
“ဒါပေမဲ့ တားမြစ်နယ်မြေ ပျောက်ကွယ်သွားတာက မကောင်းတဲ့အချက်တော့ မဟုတ်ပါဘူး။ အနည်းဆုံးတော့ အထဲက အဆင့်မြင့် သားရဲတိရစ္ဆာန်တွေ ထွက်လာမှာကို စိုးရိမ်စရာ မလိုတော့ဘူးပေါ့။”
“မှန်တယ်။ ဒါပေမဲ့ အပြင်လူတွေ ရောက်လာကတည်းက ဒီတိုက်ကြီးပေါ်မှာ ထူးဆန်းတဲ့အရာတွေ အကုန်ဖြစ်ပျက်နေခဲ့တာ။ အဲ့ဒီအပြင်လူတွေကမှ တကယ့်ကို ဂြိုဟ်ဆိုးတွေပဲ။”
“ဟားဟားဟား အဲဒီလိုတော့ ပြောလို့မရဘူး။ အနည်းဆုံးတော့ သူတို့က ငါတို့ဆီကို နတ်ဘုရားရဲ့ မျက်နှာသာပေးမှုတွေကို ယူဆောင်လာပေးခဲ့တယ်လေ။ အခုဆို ငါတို့မှာလည်း ကျွန်းအထိမ်းအမှတ်ကျောက်တိုင်တွေ ရှိနေပြီ။ ဒါက ငါတို့အတွက် အကြီးမားဆုံး အကျိုးအမြတ်ပဲ။”
“မမှားဘူး။ ကြည့်ရတာ ငါတို့က ဒီအပြင်လူတွေကို ကျေးဇူးတင်တောင် ရဦးမယ်ထင်တယ်။”
တားမြစ်နယ်မြေ ပျောက်ကွယ်သွားသည်ကို မြင်သောအခါ ချာလီသည် အခြားသူများထက် ပို၍ တွေးတောနေမိ၏။
“အဲဒီနေ့က ယီရန်ပင်း တားမြစ်နယ်မြေထဲ ဝင်သွားတာကို ငါ မြင်လိုက်တယ်။ အခု တားမြစ်နယ်မြေက ပျောက်သွားပြီဆိုတော့ ဒါက အဲ့ဒီအပြင်လူနဲ့ ပတ်သက်နေမလား။”
ချာလီတစ်ယောက် မျက်မှောင်ကျုံ့ကာ စဉ်းစားလိုက်မိသည်။
“တားမြစ်နယ်မြေထဲမှာ တခြား လျှို့ဝှက်ချက်တွေ ရှိနေတာလား။”
အကယ်၍ သူ၏ အတွေးသာ မှန်ကန်ပါက ထိုအပြင်လူသည် တားမြစ်နယ်မြေ၏ အနက်ရှိုင်းဆုံးနေရာသို့ ရောက်ရှိသွားခဲ့သည်မှာ သေချာပေသည်။
“ဒါက ဘယ်လိုလုပ် ဖြစ်နိုင်မှာလဲ။ အဲဒီအပြင်လူရဲ့ အင်အားက အဲလောက် မကြီးမားသင့်ဘူး မဟုတ်လား။”
ချာလီက သူ့ဘာသာ တွေးတောနေမိ၏။
သူကိုယ်တိုင်လည်း တားမြစ်နယ်မြေအတွင်းသို့ ဝင်ရောက်ရန် ကြိုးစားခဲ့ဖူးပေသည်။ သို့သော်လည်း မီတာ နှစ်ရာပင် မပြည့်မီ အတွင်းရှိ ကြောက်မက်ဖွယ် သားရဲများ၏ တိုက်ထုတ်ခြင်းကို ခံခဲ့ရသည်။ ထိုအပြင်လူ၏ ခွန်အားသည် သူ့ထက် အနည်းငယ် အားနည်းသင့်သည်ဖြစ်ရာ တားမြစ်နယ်မြေ၏ အတွင်းပိုင်းအထိ မဝင်ရောက်နိုင်သင့်ပေ။
“ဒါမှမဟုတ် တားမြစ်နယ်မြေက အပြင်လူတွေကို မျက်နှာသာပေးထားတာလား။”
ချာလီက နောက်ဆုံးတွင် ဖြစ်နိုင်ခြေတစ်ခုကို စဉ်းစားမိခဲ့လေသည်။
“သေစမ်း...အပြင်လူတွေရဲ့ အားသာချက်က တကယ့်ကို ကြီးမားလွန်းတယ်။”
ထိုသို့တွေးရင်းဖြင့် ချာလီသည် သူ၏လူများကို ခေါ်ဆောင်ကာ ထွက်ခွာသွားတော့သည်။ သူသည် ယခုအခါ ဟွာရှားမှ ဆင်းသက်လာသော မဟာမိတ်အဖွဲ့ (၇) ဖွဲ့ ကို ထိန်းချုပ်ထားပြီး ဖြစ်သည်။ ထိုမဟာမိတ်အဖွဲ့ ခေါင်းဆောင်အားလုံးမှာ သူ၏ “ပွေ့ဖက်ခြင်း” (အယုံသွင်းခြင်း) ကို ခံယူခဲ့ရပြီး မြင့်မြတ်သော သွေးမျိုးနွယ်စုအဖြစ် ပြောင်းလဲသွားကြပြီ ဖြစ်သည်။
ချာလီသည် တိုက်ကြီးပေါ်၌ ကိုယ်တိုင်လှည့်လည်နေရသည့် အကြောင်းရင်းမှာ “ပွေ့ဖက်” ရန်အတွက် အပြင်လူများကို ပိုမိုရှာဖွေရန် ဖြစ်သည်။
သွေးစုပ်ဖုတ်ကောင်များတွင် ကြီးမားသော အားသာချက်တစ်ခု ရှိပေသည်။ ၎င်းမှာ “ပွေ့ဖက်ခြင်း” အားဖြင့် အဖွဲ့ဝင်အသစ်များကို တိုးပွားစေနိုင်ခြင်းပင်။ ၎င်းသည် ကူးစက်ရောဂါတစ်ခုကဲ့သို့ပင် ဖြစ်ပြီး နောက်လိုက်အုပ်စုကြီးကို ချက်ချင်း ရရှိစေနိုင်သည်။
ချာလီတွင် ယခုအခါ မဟာမိတ် (၇) ဖွဲ့နှင့် ကျွန်းပေါင်း အနည်းဆုံး (၆၃) ကျွန်းကို ပိုင်ဆိုင်ထားပြီဖြစ်ရာ ၎င်းမှာ ကြီးမားသော အင်အားစုတစ်ခု ဖြစ်နေခဲ့ ချေပြီ။ သို့သော် သူသည် ယင်းကို အားမရသေးဘဲ သူ၏ ဩဇာအာဏာကို ချဲ့ထွင်ရန်အတွက် အပြင်လူအဖွဲ့များကို ဆက်လက် ရှာဖွေနေဆဲပင်။
ချာလီသည် သူ၏အဖွဲ့နှင့်အတူ ဦးတည်ရာတစ်ခုကို ကျပန်းရွေးချယ်ကာ သွားလာနေရင်း မကြာမီမှာပင် အဖွဲ့တစ်ဖွဲ့ကို တွေ့ရှိသွားခဲ့တော့သည်။
“မြို့စားမင်း ရှေ့မှာ အဖွဲ့တစ်ဖွဲ့ ရှိပါတယ်။ သူတို့ရဲ့ အသုံးအဆောင်တွေကို ကြည့်ရရင် ယီရန်ပင်း မဟာမိတ်အဖွဲ့က ဖြစ်ပုံရပါတယ်။”
စစ်သည်တစ်ဦးက အစီရင်ခံလိုက်သည်။
ယီရန်ပင်း မဟာမိတ်အဖွဲ့၏ ကျော်ကြားမှုမှာ ကြီးထွားလာသည်နှင့်အမျှ အဖွဲ့အစည်းအားလုံးနီးပါးက ၎င်းတို့ကို အထူးစုံစမ်း စစ်ဆေးလာခဲ့ကြ၏။ ဧကရာဇ်နိုင်ငံကြီး ၄ ခုပင်လျှင် ယီရန်ပင်း၏ လက်ချက်ဖြင့် နှစ်ကြိမ်တိုင်တိုင် ရှုံးနိမ့်ခဲ့ရသဖြင့် ယီရန်ပင်းကို ပို၍ သတိထားလာခဲ့ကြသည်။
အခြားအဖွဲ့အစည်းများသည် ယီရန်ပင်း မဟာမိတ်အဖွဲ့ကို တိုက်ရိုက် မတိုက်ခိုက်ဖူးသော်လည်း တိုက်ကြီးပေါ်တွင် ယီရန်ပင်း၏ အဖွဲ့ငယ်လေးများနှင့် တွေ့ဆုံတိုက်ခိုက်မိတိုင်း အရှုံးနှင့် ရင်ဆိုင်ခဲ့ရသည်ချည်းပင်။ ထို့ကြောင့် သူတို့သည် ယီရန်ပင်းနှင့် ပတ်သက်သည့် အချက်အလက်များကို အလွန်အလေးအနက်ထားကာ စုဆောင်းထားခဲ့ကြ၏။
“ယီရန်ပင်း မဟာမိတ်အဖွဲ့ ဟုတ်လား။ အကောင်းသားပဲ။ ငါလည်း ယီရန်ပင်းကို တားမြစ်ကျွန်းအကြောင်း မေးဖို့ ရှာနေတာ။”
ချာလီက လှောင်ပြုံးဖြင့် ပြောလိုက်သည်။
“သွားကြ သူတို့ကို ဖမ်းလိုက်။”
ချာလီနှင့် သူ၏လူများ ပေါ်လာသည်နှင့် ယီရန်ပင်း မဟာမိတ်အဖွဲ့က ချက်ချင်း သတိပြုမိသွားခဲ့လေသည်။
“အဲဒီမှာ ရပ်လိုက်စမ်း။ မင်းတို့က ဘယ်သူတွေလဲ။”
“ငါတို့က မင်းတို့ရဲ့ အသက်ကို လာယူတဲ့သူတွေပဲ။”
ချာလီက ပြောပြောဆိုဆိုနှင့်ပင် သူ၏ခန္ဓာကိုယ်မှာ ထိုနေရာမှ ပျောက်ကွယ်သွားခဲ့သည်။
ယီရန်ပင်း မဟာမိတ်အဖွဲ့၏ တုံ့ပြန်မှုမှာလည်း မနှေးလှပေ။ သူတို့သည် ရှေ့တည့်တည့်သို့ ချက်ချင်း သေနတ်များဖြင့် ပစ်ခတ်တော့သည်။
ဒိုင်း ဒိုင်း ဒိုင်း
သို့သော် သူတို့၏ တိုက်ခိုက်မှုများမှာ လွဲချော်ကုန်၏။ သူတို့ တုံ့ပြန်နိုင်ချိန်တွင်မူ ချာလီသည် ထိုအဖွဲ့ငယ်လေး၏ တစ်ဦးတည်းသော အပြင်လူ အဖွဲ့ဝင်ကို ဖမ်းဆီးထားပြီး ဖြစ်သည်။
ထိုလူမှာ အပြင်းအထန် ရုန်းကန်ရင်း အော်ဟစ်နေ၏။
“ငါ့ကိုလွှတ်စမ်း။ ငါတို့က ယီရန်ပင်း မဟာမိတ်အဖွဲ့ဝင်တွေပဲ။ ငါ့ကို တစ်ခုခုလုပ်ရင် ငါတို့ရဲ့ ကျွန်းပိုင်ရှင်က မင်းကို အလွတ်ပေးမှာ မဟုတ်ဘူး။”
“ဟုတ်လား။”
ချာလီက နှာခေါင်းရှုံ့လိုက်သည်။
“ငါလည်း ယီရန်ပင်းကို ရှာနေတာ။ သူက ငါ့ကို အလွတ်မပေးမှာ မဟုတ်ဘူး။ ငါကသာ သူ့ကို အလွတ်မပေးမှာ။”
ထိုလူမှာ ခေတ္တမျှ ဆွံ့အသွားပြီးနောက် ကျယ်လောင်စွာ ရယ်မောတော့လေသည်။
“မင်းက ငါတို့ ကျွန်းပိုင်ရှင်ကို ဒုက္ခပေးမလို့ဟုတ်လား။ ငါ မင်းကို အကြံပေးပါရစေ။ ငါတို့ ကျွန်းပိုင်ရှင်ကို မနှောင့်ယှက်တာ မင်းအတွက် အကောင်းဆုံး ဖြစ်လိမ့်မယ်။”
ချာလီက လှောင်ရယ်လိုက်၏။
“ဟုတ်လား။ ဒါဆိုရင် ငါ့ကိုယ်စား မင်း အရင်သွားနှင့်လိုက်တော့။”
ထိုလူမှာ ကြောင်အသွား၏။ ချာလီ ဆိုလိုသည့်အရာကို သူ နားမလည်မီမှာပင် သူ၏ လည်ပင်း၌ စူးရှသော နာကျင်မှုကို ခံစားလိုက်ရတော့လေသည်။
ချာလီသည် ထိုလူ၏ လည်ပင်းကို ကိုက်ချလိုက်၏။ ထိုလူသည် မိမိ၏ သွေးများ အလျင်အမြန် ဆုတ်ယုတ်သွားသလို ခံစားလိုက်ရပြီး မျက်လုံးများမှာလည်း တဖြည်းဖြည်း ပြာဝေလာတော့လေသည်။