အခန်း (၂၆၇-၂၆၈)

အခန်း(၂၆၇)

ဤလောကသည် လိမ္မော်ရောင်နှင့် အနီရောင်တို့ လွှမ်းမိုးထားသော ကမ္ဘာတစ်ခုပင် ဖြစ်ချေသည်။

လေထု၏ အပူချိန်မှာ အလွန်တရာ မြင့်မားလှရာ ငြိမ်သက်စွာ ရပ်နေရုံမျှနှင့်ပင် ကိုယ်ပေါ်မှ ချွေးများမှာ အလိုအလျောက် စီးကျလာပေတော့မည်။

နင်းကျော့သည် သူ၏ အိပ်ရာကို သေသပ်စွာ ပြင်ဆင်လိုက်၏။

သူသည် အခန်းတွင်းကို တစ်ချက်ဝေ့ကြည့်ကာ အဆောင်လက်ဖွဲ့ အချို့ကို စနစ်တကျ ချထားပြီးနောက် သူ၏ ယာယီတည်းခိုရာ အခန်းတံခါးကို တွန်းဖွင့်၍ အပြင်သို့ ထွက်လာခဲ့သည်။

သူနှင့် ပြင်ဆင်ရေးအဖွဲ့ သုံးဖွဲ့မှ အဖွဲ့ဝင်များအားလုံးသည် ချော်ရည်နန်းတော်အတွင်းသို့ ရိက္ခာအလုံအလောက်ဖြင့် ဝင်ရောက်လာခဲ့ကြပြီးဖြစ်ရာ ရေရှည်နေထိုင်ရန်အတွက်လည်း ပြင်ဆင်ထားကြပြီး ဖြစ်လေသည်။

နင်းကျော့သည် မိမိအတွက် သတ်မှတ်ပေးထားသော အိမ်ကလေးထဲမှ ထွက်လာခဲ့သည်။

ခြံဝင်းလေးအတွင်း၌ နင်းမျိုးနွယ်စုမှ ကျင့်ကြံသူအချို့သည် ဝင်းအတွင်း သန့်ရှင်းရေး လုပ်နေကြ၏။

နင်းကျော့ကို မြင်လိုက်ရသည်နှင့် သူတို့အားလုံးသည် လေးစားကြည်ညိုသော အမူအရာများဖြင့် ဦးညွှတ်နှုတ်ဆက်ကြလေသည်။

လအနည်းငယ်ကြာ ပြင်းပြင်းထန်ထန် ကြိုးပမ်းအားထုတ်မှုများနှင့် အမျိုးမျိုးသော ဆောင်ရွက်ချက်များကြောင့် နင်းမျိုးနွယ်စု ပြင်ဆင်ရေးအဖွဲ့အတွင်း နင်းကျော့၏ ဂုဏ်သိက္ခာမှာ အထွတ်အထိပ်သို့ ရောက်ရှိနေပြီ ဖြစ်သည်။

နင်းကျော့က သူတို့ကို ပြုံးပြကာ ခေါင်းငြိမ့်ပြလိုက်ပြီးနောက် နှေးကွေးသည်ဟု ထင်ရသော်လည်း အမှန်တကယ်တွင် မြန်ဆန်လှသော ခြေလှမ်းများဖြင့် စခန်းအတွင်းမှ ထွက်ခွာခဲ့ချေသည်။

လတ်တလော ရရှိထားသော အမိန့်အရ သူသည် ကျူးရွှမ်းကျိနှင့် တွေ့ဆုံရန်အတွက် ဘေးဘက်ဆောင်တစ်ခုသို့ ချက်ချင်း သွားရောက်ရမည် ဖြစ်သည်။

လမ်းလျှောက်နေစဉ်အတွင်း သူသည် ခေါင်းကို အသာအယာမော့၍ ကောင်းကင်ယံကို ကြည့်လိုက်၏။

ကောင်းကင်ယံတစ်ခုလုံးကို မှိန်ဖျော့သော ရွှေရောင်အလင်းတန်းများ ဖြာထွက်နေသည့် ကြီးမားသော စက်လုံးပုံစံ အလင်းဒိုင်းတစ်ခုက ဖုံးအုပ်ထားသည်။

နင်းကျော့၏ အမြင်တွင် ထိုအလင်းဒိုင်း၏ အပြင်ဘက်၌ သောင်းကျန်းနေသော မိစ္ဆာသားရဲအုပ်ကြီးမှာ လှိုင်းတံပိုးများသဖွယ် တရစပ် တိုက်ခိုက်နေကြသည်ကို ဝေဝါးစွာ မြင်တွေ့နေရလေသည်။

အမျိုးမျိုးသော ပုံသဏ္ဌာန်နှင့် အရွယ်အစားရှိသည့် မိစ္ဆာသားရဲများသည် ချော်ရည်နန်းတော်၏ အစီအရင် အလင်းဒိုင်းကို အပြင်းအထန် ထိုးနှက်နေကြခြင်းပင်။

ထိုအလင်းဒိုင်းမှာလည်း လုံးဝလုံခြုံစိတ်ချရသည်တော့ မဟုတ်ပေ။ တိုက်ခိုက်မှုများ ပြင်းထန်လွန်းသော အချို့နေရာများတွင် အက်ကြောင်းများ ပေါ်ပေါက်နေပြီး ထိုထင်ရှားသော အက်ကြောင်းများကြားမှ မီးလျှံတန်းများမှာ အတွင်းသို့ စိမ့်ဝင်နေသည်။

မကြာမီတွင် ထိုလေထုထဲမှ မီးလျှံများသည် အခြေခံအုတ်မြစ်တည်ဆောက်ခြင်း အဆင့်ရှိသော မီးလျှံမြွေများအဖြစ်သို့ ပြောင်းလဲသွားကြတော့၏။

ထိုမီးလျှံမြွေများသည် တစီစီအသံပြုလျက် အောက်သို့ ထိုးဆင်းလာကြသော်လည်း မြေပြင်သို့ မကျရောက်မီမှာပင် စက်မှုရုပ်သေး အုပ်စုကြီးက ကြားဖြတ်တိုက်ခိုက်ကာ ဝေဟင်ထက်၌ပင် ပြင်းထန်သော တိုက်ပွဲကို ဆင်နွှဲကြလေသည်။

ထိုမြွေများ မြေပြင်သို့ ကျရောက်ချိန်တွင်မူ ဒဏ်ရာအပြင်းအထန် ရရှိနေပြီး အသက်ငင်နေကြပြီ ဖြစ်သည်။ ထိုအခါ မြေပြင်ပေါ်ရှိ စက်မှုရုပ်သေးများက ထပ်မံ ဝိုင်းအုံတိုက်ခိုက်ကြရာ ၎င်းတို့မှာ လုံးဝ ပျက်စီးသွားရတော့၏။

ထိုသို့သော အခြေအနေများက နင်းကျော့ကို စိတ်အေးသွားစေခြင်း မရှိပေ။

ယင်းနှင့် ဆန့်ကျင်ဘက်အနေဖြင့် ချော်ရည်နန်းတော်၏ ခုခံရေးစွမ်းအားမှာ တဖြည်းဖြည်း လျော့နည်းလာနေသည့် လားရာကို သူက ရိပ်မိနေပြီး ဖြစ်သည်။

သူကိုယ်တိုင် ဦးဆောင်ခဲ့သော တရစပ် ပစ်ခတ်မှုများက ထူးကဲစွာ ကြီးမားလှသော မိစ္ဆာသားရဲ ဒီရေလှိုင်းကြီးကို ဆွပေးလိုက်သကဲ့သို့ ဖြစ်သွားခဲ့ခြင်းပင်။

ချော်ရည်နန်းတော်မှာ အရေးနိမ့်နေပြီး အချိန်ကြာလာသည်နှင့်အမျှ အခြေအနေမှာ ပိုမို ဆိုးရွားလာနေလေသည်။

"အကိုစွန်း ဒီမသေမျိုးနန်းတော်ထဲကို ဝင်လာတာ တကယ်ကို အန္တရာယ်များလှတာပဲ။ သူ ဘယ်လိုနည်းနဲ့ အတွင်းထဲကို ရောက်အောင် လာခဲ့လဲဆိုတာ ငါမသိဘူး။"

"ဒီတစ်ခါလည်း သူက ဗုဒ္ဓနှလုံးသားဂိုဏ်းရဲ့ ရွှေအမြုတေအဆင့် မျိုးဆက်ခံတပည့်ဖြစ်တဲ့ ယန်ချန်ယွီကိုပဲ အားကိုးခဲ့တာလား။"

ယန်ချန်ယွီကို တွေးမိလိုက်သည်နှင့် နင်းကျော့၏ စိတ်ထဲ၌ စိုးရိမ်မှုအချို့ ဖြစ်ပေါ်လာရသည်။

ယခင်က စွန်းလင်ထုံသည် တိမ်တိုက်ကုန်သည်၏ ပစ္စည်းများကို ခိုးယူရန် သွားရောက်စဉ်ကလည်း လက်တွေ့ လုပ်ဆောင်မှုအတွင်း ယန်ချန်ယွီနှင့်ပင် ပူးပေါင်းခဲ့ဖူးလေသည်။

ယန်ချန်ယွီ၏ ထပ်တလဲလဲ ကူညီမှုမှာ နင်းကျော့၏ အမြင်တွင် စိတ်အနှောင့်အယှက်ဖြစ်စရာ ကိစ္စတစ်ခုပင် ဖြစ်ချေသည်။

စွန်းလင်ထုံ ပေးဆပ်ရမည့် တန်ဖိုးမှာ သူခန့်မှန်းထားသည်ထက် ပိုမို မြင့်မားနိုင်ကြောင်းကို နင်းကျော့က တစ်ဖန် ပြန်လည် တွေးတောနေမိသည်။

"နောက်ဆိုရင် အကိုစွန်းနဲ့ တွေ့ဖို့ အခွင့်အရေးရှာပြီး 'အကောင်းဆုံးသော တရားသည် ရေကဲ့သို့ ဖြစ်ခြင်း' ရတနာကို လျှို့ဝှက် ပေးအပ်ရမယ်။"

"ပြီးတော့ ဒီပူးပေါင်းမှုအတွက် အကိုစွန်းက ဘယ်လို တန်ဖိုးမျိုးကို အတိအကျ ပေးဆပ်ရမလဲဆိုတာ ယန်ချန်ယွီဆီကနေ စုံစမ်းလို့ ရမလားဆိုတာ ကြည့်ရဦးမယ်။"

"အဲ့ဒီ ခုနစ်ရောင်ခြည် မင်္ဂလာတိမ်တိုက်ကို အကိုစွန်းက ယန်ချန်ယွီကို မပေးချင်ဘူးလေ။ အဲ့ဒီပစ္စည်းကိုပဲ လက်ဆောင်အဖြစ် သုံးပြီး သူမဆီက သတင်းအချို့ ရအောင် နှိုက်ကြည့်ရမယ်။ ဒါမှလည်း အကိုစွန်း ခံစားနေရတဲ့ ဖိအားအချို့ကို ငါက လျှို့ဝှက် ကူညီပေးနိုင်မှာ။"

ချော်ရည်နန်းတော်၏ လမ်းမများပေါ်တွင် လျှောက်လှမ်းနေရင်း နင်းကျော့သည် လမ်းဘေးဝဲယာမှ မြင်ကွင်းများကြောင့် စိတ်ဝင်တစား ဖြစ်လာရပြီး မိမိ၏ အတွေးများကို ခဏတာ ဘေးဖယ်ထားလိုက်မိသည်။

ချော်ရည်နန်းတော်၏ အတွင်းပိုင်း၌ သူ အမှန်တကယ် လမ်းလျှောက်ခွင့်ရခြင်းမှာ ယခုပင် ပထမဆုံး အကြိမ် ဖြစ်၏။

သူ၏ အစီအစဉ်များထဲတွင် ဤမြင်ကွင်းမျိုးကို မရေမတွက်နိုင်အောင် စိတ်ကူးယဉ်ခဲ့ဖူးလေရာ ယနေ့တွင်မူ ထိုအိမ်မက်မှာ အမှန်တကယ် ဖြစ်လာခဲ့ပြီ ဖြစ်သည်။

ချော်ရည်နန်းတော်အတွင်း၌ ကြည့်လိုက်လေရာရာတွင် ရွှေရောင်တိုင်လုံးကြီးများနှင့် အနီရောင် အုတ်ခဲများကိုသာ မြင်တွေ့ရပေမည်။

ပတ်ဝန်းကျင်ရှိ ချော်ရည်များမှ အလင်းပြန်မှုအောက်တွင် ရွှေရောင်တိုင်များနှင့် အနီရောင်အုတ်ခဲများသည် တောက်ပသော အလင်းတန်းများ ထွက်ပေါ်နေပြီး လောင်မြိုက်နေသည့် မသေမျိုး အလင်းရောင်ကဲ့သို့ပင် ထင်မှတ်ရသည်။

မြင့်မားလှသော မျှော်စင်ကြီးများ၊ ခန့်ညားထည်ဝါသော ခန်းမဆောင်ကြီးများနှင့် လက်ရာမြောက်လှသော ဘေးဘက်ဆောင်များမှာ စနစ်တကျနှင့် ကျိုးကြောင်းဆီလျော်စွာ တည်ရှိနေကြ၏။

ခိုင်ခံ့လှသော ဗိသုကာလက်ရာများက ချော်ရည်နန်းတော်ကို ပိုမို ခန့်ညား၍ တည်ကြည်စွဲမက်ဖွယ် ဖြစ်စေသည်။

မီးနဂါးများနှင့် ဖီးနစ်ငှက် ရုပ်တုများမှာလည်း အသေးစိတ် ထွင်းထုထားသဖြင့် သက်ရှိများကဲ့သို့ပင် ထင်မှတ်ရပြီး နန်းတော်၏ ဂုဏ်ကျက်သရေကို ပိုမို တိုးမြင့်စေလေသည်။

ဗိသုကာဟန် နှစ်မျိုးမှာ ကွဲပြားသည်ဟု ထင်ရသော်လည်း ဤနေရာတွင်မူ တစ်သားတည်းကျစွာ ဟန်ချက်ညီညီ ပေါင်းစပ်နေကြသည်မှာ အံ့ဩဖွယ်ပင် ဖြစ်ချေသည်။

နင်းကျော့၏ ရှေ့နားတွင် တံတိုင်းတစ်ခုကို တဖြည်းဖြည်း မြင်လာရသည်။

ထိုတံတိုင်းမှာ အတော်ပင် ထူထဲလှပြီး အကွာအဝေးတစ်ခုစီတိုင်းတွင် ပြတင်းပေါက်များသဖွယ် ကြီးမားသော အင်းကွက်ကြီးများကို ရေးဆွဲထားလေသည်။

"ဒါဟာ ဆန်းလင်တံတိုင်းပဲ" ဟု နင်းကျော့က စိတ်ထဲမှ ရေရွတ်လိုက်၏။

သူသည် လမ်းလျှောက်နေရင်း လက်ကို ဆန့်ထုတ်ကာ ထိုမညီမညာဖြစ်နေသော တံတိုင်းကို ပွတ်သပ်ကြည့်လိုက်သည်။

လက်ချောင်းများမှတစ်ဆင့် ခံစားလိုက်ရသော ထိတွေ့မှုမှာ အလွန်ပင် ထင်ရှားလှပေသည်။

ဤသို့သော လေးနက်သည့် ခံစားချက်မျိုးမှာ သူ၏ ဝိညာဉ်ဖြင့် မသေမျိုးနန်းတော်အတွင်းသို့ ဝင်ရောက်စဉ်က ခံစားခဲ့ရဖူးခြင်း မရှိပေ။

ကွယ်လွန်သူ မိခင်ဖြစ်သူကို သတိရမိသည်နှင့် သူ၏ မျက်ဝန်းများမှာ တဖြည်းဖြည်း နီရဲလာရသည်။

"အမေ... အခုတော့ ကျွန်တော် ချော်ရည်နန်းတော်ကို အမှန်တကယ် ရောက်ရှိလာပါပြီ။"

နင်းကျော့သည် ဤအခိုက်အတန့်ကို ဆယ်စုနှစ်တစ်ခုကျော်ကြာ တောင့်တခဲ့ရသလို ဆယ်စုနှစ်တစ်ခုကျော်ကြာအောင်လည်း အစီအစဉ်များ ချမှတ်ခဲ့ရခြင်း ဖြစ်သည်။

မသေမျိုးနန်းတော်ကို ဖောက်ခွဲပြီး သူ၏ အစီအစဉ်ကို စတင်လိုက်ကတည်းက နောက်ပြန်လှည့်ရန် လမ်းမရှိတော့ပေ။

ဤအခြေအနေသို့ ရောက်ရှိရန်မှာ သူ့အတွက် လွယ်ကူလှသည်တော့ မဟုတ်။

သူ၏ ခရီးစဉ်တစ်လျှောက်တွင် သူသည် အစွမ်းကုန် ကြိုးစားခဲ့ရပြီး အခက်အခဲများစွာကို ကျော်ဖြတ်ကာ သေရေးရှင်ရေး အကျပ်အတည်းများကို ရင်ဆိုင်ရင်းနှင့် နောက်ဆုံးတွင် ဤလမ်းကို လျှောက်လှမ်းနိုင်ခဲ့ခြင်း ဖြစ်သည်။

ဝိညာဉ်စွမ်းအား သန့်စင်ခြင်းအဆင့်မျှသာ ရှိသော်လည်း သူသည် မီးလျှံတောင် မသေမျိုးမြို့တော်အတွင်းရှိ အင်အားစုအမျိုးမျိုးကြားတွင် လှည့်ပတ်သွားလာနေခဲ့ရပြီး ကျူးရွှမ်းကျိဆီမှ လာသော ကြီးမားလှသည့် ဖိအားများကိုလည်း ခံခဲ့ရပေသည်။

ထိုကာလအတွင်း သူသည် နည်းလမ်းမျိုးစုံကို အသုံးပြု၍ အကျပ်အတည်း တစ်ခုချင်းစီကို ခက်ခက်ခဲခဲ ကျော်ဖြတ်ခဲ့ရ၏။

တစ်ခါတစ်ရံတွင် ဆယ်စုနှစ်တစ်ခုကျော် ပြင်ဆင်လာခဲ့မှုများကို အားကိုးခဲ့ရပြီး အချို့အချိန်များတွင်မူ ကံတရား၏ ကူညီမှုကို ရရှိခဲ့သည်။

ဤလုပ်ငန်းစဉ်အတွင်း ခြေလှမ်းတစ်ချက် မှားလိုက်သည်နှင့် မြေမြှုပ်ရန် နေရာပင်မရှိဘဲ သေဆုံးသွားနိုင်သည် မဟုတ်လော။

မသေမျိုးနန်းတော်ကို စူးစမ်းရှာဖွေသူ အများစုမှာ ယခုကဲ့သို့ မီးလျှံနတ်ဆိုး သားရဲများနှင့် တိုက်ခိုက်ရချိန်မှသာ အသက်ကို ရင်းကြရခြင်း ဖြစ်သည်။

သို့သော် နင်းကျော့မှာမူ အစကတည်းက သူ၏ အသက်ကို လောင်းကြေးထပ်ထားခဲ့ရပြီး ဖြစ်ချေသည်။

"ဖြစ်နိုင်ရင်တော့ ငါ ဒီလိုမျိုး မလုပ်ချင်ပါဘူး။"

နင်းကျော့သည် ကောင်းကင်ယံရှိ မှိန်ဖျော့သော ရွှေရောင်စက်လုံးဒိုင်းကို တစ်ဖန် ပြန်လည် ကြည့်လိုက်၏။

ဒိုင်း၏ အပြင်ဘက်တွင် သောင်းကျန်းနေသော မိစ္ဆာသားရဲ အုပ်ကြီးကို ကြည့်ရင်း သူက တွေးနေမိသည်မှာ "ငါ့မှာ ရွေးချယ်စရာ မရှိခဲ့ဘူး။ အခြေအနေတွေက ဖိအားပေးလာတာကြောင့် ဝိုင်းကို နည်းနည်းတော့ ဖျက်လိုက်ရတာပေါ့။"

အမှန်စင်စစ် သူက အင်အားကို ထိန်းချုပ်ထားခဲ့ရာ ဝိုင်းတစ်ခုလုံးမှာတော့ ပျက်မသွားခဲ့ပေ။

ဤတစ်ကြိမ်တွင် သူက မိစ္ဆာသားရဲများကို အသုံးပြု၍ လူတိုင်း အစွမ်းကုန် ကြိုးစားရမည့် အခြေအနေတစ်ခုကို ဖန်တီးခဲ့ခြင်းပင်။

ဤနည်းအားဖြင့် သူ့အပေါ် ကျရောက်နေသော ဖိအားများကိုလည်း များစွာ လျှော့ချနိုင်ခဲ့သည်။

နင်းကျော့က ဤအဆင့်ကို အောင်မြင်စွာ လုပ်ဆောင်နိုင်ခဲ့သည်နှင့် အခြေအနေတစ်ခုလုံးမှာ နောက်ပြန်လှည့်၍ မရတော့ပေ။

ချော်ရည်နန်းတော်အတွက်ရော သူ့အတွက်ပါ အတူတူပင် ဖြစ်ချေသည်။

သူသည် ကျောက်ဆောင်ပေါ်ရှိ အသိုက်ထဲမှ ပထမဆုံးအကြိမ် ပျံသန်းရန် ကြိုးစားနေသည့် ငှက်ငယ်ကလေးနှင့် တူလှသည်။

ထိုငှက်ငယ်မှာ ကောင်းကင်ယံသို့ မြင့်မားစွာ ပျံတက်နိုင်မည် သို့မဟုတ်လျှင်မူ မြေပြင်သို့ ပြုတ်ကျကာ သေဆုံးရပေလိမ့်မည်။

ကျယ်ဝန်းလှသော လမ်းမကြီးအတိုင်း လျှောက်လာရင်း နင်းကျော့သည် နောက်ဆုံးတွင် ဘေးဘက်ဆောင်တစ်ခုသို့ ရောက်ရှိလာခဲ့သည်။

"မင်း ရောက်လာပြီလား။" တံခါးခေါက်သံကို ကြားလိုက်ရသည်နှင့် ခန်းမအတွင်းရှိ လူများက တံခါးဘက်သို့ လှည့်ကြည့်လိုက်ကြ၏။

ကျူးရွှမ်းကျိက "ဝင်ခဲ့ပါ" ဟု ပြောလိုက်သည်။

ခဏအကြာတွင် နင်းကျော့က တံခါးကို ဖွင့်ကာ အတွင်းသို့ ဝင်လာခဲ့၏။

ဘေးဘက်ဆောင်အတွင်း၌ လူအချို့ ရောက်နှင့်နေကြပြီ ဖြစ်ရာ နင်းကျော့မှာ နောက်ဆုံးမှ ရောက်လာသူ ဖြစ်သည်။

ကျူးရွှမ်းကျိအပြင် ကျန်းကျန့်၊ ကျိုးကျဲရှန်နှင့် ကျိုးကျူတို့လည်း ထိုနေရာတွင် ရှိနေကြလေသည်။

"အကြီးအကဲကျူး" ဟု ဝတ်ရုံဖြူနှင့် လူငယ်လေး နင်းကျော့က ကျူးရွှမ်းကျိကို ဦးစွာ နှုတ်ဆက်လိုက်ပြီးနောက် အခြားသူများကိုလည်း "အားနာပါတယ်၊ ကျွန်တော် နောက်ကျသွားတယ်" ဟု တောင်းပန်လိုက်၏။

ကျိုးမျိုးနွယ်စုနှင့် ကျန်းမျိုးနွယ်စုမှ ပါရမီရှင် ကျင့်ကြံသူ သုံးဦးစလုံးက သူ့ကို ပြုံးရွှင်စွာ နှုတ်ဆက်ကြသည်။

"ငါတို့လည်း ရောက်တာ မကြာသေးပါဘူး။"

"မင်း နောက်မကျပါဘူး၊ အချိန်မီပါပဲ။"

ယခုအချိန်တွင် နင်းကျော့မှာ နင်းမျိုးနွယ်စုအတွင်း၌သာမက အခြားသော မျိုးနွယ်စုကြီး နှစ်ခုမှ လူငယ်ပါရမီရှင်များ၏ လေးစားမှုကိုလည်း ရရှိထားပြီး ဖြစ်လေသည်။

ရွှေအမြုတေအဆင့်ရှိသော ကျူးရွှမ်းကျိပင်လျှင် နင်းကျော့ကို အထူးတလည် အသိအမှတ်ပြုထားခြင်းပင်။

နင်းကျော့သည် ထိုပါရမီရှင် သုံးဦး၏ ခေါင်းပေါ်ကို မသိမသာ အကဲခတ်ကြည့်လိုက်၏။

ဤကာလအတွင်း သူတို့၏ ခေါင်းပေါ်ရှိ 'ဝိညာဉ်ခေါ်ယူခြင်းပညာရပ်' ၏ ချည်မျှင်တန်းမှာ ယခင်ကထက် ပိုမို ထူထဲကာ ခိုင်မာလာသည်ကို သူက တွေ့ရှိလိုက်ရသည်။

"သူတို့ ငါ့အပေါ် အသိအမှတ်ပြုမှုတွေ ပိုပြီး နက်ရှိုင်းလာပုံရတယ်။"

နင်းကျော့သည် ကျူးရွှမ်းကျိကို တစ်ချက်ကြည့်ကာ စိတ်ထဲမှ သက်ပြင်းချလိုက်မိသည်မှာ "သူ့ရဲ့ ခေါင်းပေါ်မှာသာ ဝိညာဉ်ချည်မျှင်ကို စိုက်ထူနိုင်မယ်ဆိုရင် ငါ့အတွက် အားသာချက်က တကယ်ကို ကြီးမားမှာပဲ။"

ကံမကောင်းသည်မှာ သူ၏ လက်ရှိ ကျင့်ကြံမှုအဆင့်ဖြင့် 'ဝိညာဉ်ခေါ်ယူခြင်းပညာရပ်' ၏ အစွမ်းကို အပြည့်အဝ ပိုင်ဆိုင်ထားလျှင်ပင် ထိုသို့ လုပ်ဆောင်နိုင်ရန် မဖြစ်နိုင်သေးပေ။

"ဖြစ်နိုင်တာကတော့ အခြေခံအုတ်မြစ်တည်ဆောက်ခြင်း အဆင့်ကို ရောက်ပြီးမှသာ ရွှေအမြုတေအဆင့် ကျင့်ကြံသူတစ်ယောက်ရဲ့ ခေါင်းပေါ်မှာ ဝိညာဉ်ချည်မျှင်ကို စိုက်ထူနိုင်လိမ့်မယ်" ဟု နင်းကျော့က လျှို့ဝှက် ခန့်မှန်းနေမိသည်။

ကျူးရွှမ်းကျိက လိုရင်းကိုသာ တိုက်ရိုက်ပြောလိုက်၏။ "လူစုံပြီဆိုရင်တော့ ကတိကဝတ် စာချုပ်မှာ လက်မှတ်ထိုးတာ စကြတာပေါ့။"

သူက စာချုပ်တွင် ပါဝင်သည့် အကြောင်းအရာများကို အကျဉ်းချုံး ရှင်းပြလိုက်သည်။

ကျန်းကျန့်နှင့် ကျိုးကျူတို့မှာ ထိုအကြောင်းနှင့် ပတ်သက်၍ ထူးထူးခြားခြား ခံစားရခြင်း မရှိသော်လည်း ကျိုးကျဲရှန်နှင့် နင်းကျော့တို့မှာမူ မျက်မှောင် အနည်းငယ် ကြုတ်လိုက်မိကြ၏။

ကျိုးကျဲရှန်တွင် သံသယများ ရှိနေသော်လည်း ထုတ်မပြောရဲသဖြင့် နင်းကျော့ဘက်သို့ လှည့်ကြည့်လိုက်သည်။

နင်းကျော့က လက်နှစ်ဖက်ကို ဆုပ်ကိုင်၍ ဂါရဝပြုကာ "အကြီးအကဲကျူး.. ခဏလောက် ခွင့်ပြုပါဦး၊ ကျွန်တော့်မှာ စိုးရိမ်စရာ အချို့ ရှိနေလို့ပါ။"

"အကယ်၍ ဒီစာချုပ်က ကျွန်တော်တို့ရဲ့ ပြင်ဆင်ရေးအဖွဲ့တွေနဲ့ မြို့စားမင်းရဲ့ အဖွဲ့ကိုပဲ ထိန်းချုပ်ထားဖို့ ဆိုရင်တော့ ဒါဟာ တရားမျှတမှုကို အမှန်တကယ် အာမခံနိုင်မှာ ဖြစ်သလို အချိန်တိုအတွင်းမှာ ချော်ရည်နန်းတော်ရဲ့ ရာထူးနေရာတွေကို ယှဉ်ပြိုင်ဖို့အတွက် ကျွန်တော်တို့ရဲ့ အင်အားနဲ့ အချိန်ကို အပြည့်အဝ အသုံးချနိုင်မှာ ဖြစ်ပါတယ်။"

"ဒါပေမဲ့ ကျွန်တော်တို့ အဖွဲ့လေးဖွဲ့အပြင် အခြားလူများစွာဟာလည်း ချော်ရည်နန်းတော်ကို စူးစမ်းနေကြပြီး အမွေအနှစ် ရတနာတွေကို ယှဉ်ပြိုင်နေကြတာပါ။"

"အဲ့ဒီလူတွေအတွက်ရော ဘယ်လို အစီအစဉ် ရှိလဲ။"

"အကယ်၍ လူမသိ သူမသိ ပါရမီရှင်တစ်ယောက် ပေါ်ထွက်လာပြီး ဒီအမွေအနှစ်ကို ရရှိသွားလို့ ကျွန်တော်တို့ရဲ့ အောင်မြင်မှုတွေကို ကျော်တက်သွားရင် ဘယ်လိုလုပ်မလဲ။"

"ကျွန်တော်တို့ အဖွဲ့လေးဖွဲ့က မသေမျိုးနန်းတော်ထဲကို ဝိညာဉ်နဲ့ မဝင်ရောက်နိုင်ဘူးဆိုရင် အဲ့ဒီလို လူမျိုးတွေအတွက် အခွင့်အရေး ပေးလိုက်သလို ဖြစ်မနေဘူးလား။"

"ဒါကြောင့် ချော်ရည်နန်းတော်အတွင်းမှာ ရှိတဲ့ စမ်းသပ်မှုတွေကို စောင့်ကြည့်ဖို့ လူအချို့ ထားရှိသင့်တယ်လို့ ကျွန်တော် ယုံကြည်ပါတယ်။ ဒါမှလည်း အဲ့ဒီလို လူမသိ သူမသိတဲ့ ပြိုင်ဘက်တွေ ပေါ်မလာအောင် တားဆီးနိုင်မှာပါ။"

ကျူးရွှမ်းကျိက အသာအယာ ခေါင်းငြိမ့်လိုက်ပြီး "မင်း ပြောတဲ့ အခြေအနေတွေကို ငါတို့ စဉ်းစားပြီးသားပါ" ဟု ဆိုသည်။

ထိုသို့ ပြောရင်း သူသည် လိပ်စာမူတစ်ခုကို ထုတ်ယူလိုက်၏။

ယင်းမှာ ထင်ရှားလှသော နန်းတွင်း အမိန့်ပြန်တမ်း လိပ်စာမူတစ်ခုပင် ဖြစ်ချေသည်။

ကျူးရွှမ်းကျိက ထိုလိပ်စာမူကို နင်းကျော့ထံသို့ ဦးစွာ ပေးအပ်လိုက်သည်။

နင်းကျော့က ၎င်းကို ဖွင့်ကြည့်လိုက်ရာ ထိုလိပ်စာမူတွင် အကြောင်းအရာ အမြောက်အမြား ပါဝင်နေသည်ကို တွေ့ရ၏။

ထိုစာသားများထဲတွင် အင်အားစု လေးခုကြား ချုပ်ဆိုမည့် စာချုပ်၏ အသေးစိတ် အချက်အလက်များကို ရေးသားထားပြီး နင်းကျော့၏ စိုးရိမ်မှုများကိုလည်း ပြည့်စုံစွာ ဖြေရှင်းပေးထားလေသည်။

အင်အားစု လေးခုစလုံးသည် ပြင်ဆင်ရေးအဖွဲ့ဝင် တစ်ဦးစီကို စေလွှတ်၍ ချော်ရည်နန်းတော်အတွင်းရှိ မြို့သူမြို့သားများ၏ စူးစမ်းရှာဖွေမှုများကို စောင့်ကြည့်မှတ်တမ်းတင်ရမည် ဖြစ်သည်။

အကယ်၍ ထူးခြားသော ပြိုင်ဘက်တစ်ဦး ပေါ်ထွက်လာပါက အင်အားစု လေးခုစလုံးက ချက်ချင်း တုံ့ပြန်ဆောင်ရွက်ကြရမည် ဖြစ်၏။

ထို့အပြင် ထိုလိပ်စာမူတွင် စာချုပ်၏ သက်တမ်းနှင့် လမ်းခုလတ်တွင် ပေါ်ပေါက်လာနိုင်သည့် အရေးပေါ် အခြေအနေများကို မည်သို့ ကိုင်တွယ်ရမည် ဆိုသည်ကိုလည်း အသေးစိတ် ဖော်ပြထားလေတော့သတည်း။

အခန်း(၂၆၈)

"ကျွန်တော့်မှာ ထပ်ပြီး သိချင်တာ မရှိတော့ပါဘူး။" နင်းကျော့သည် အမိန့်ပြန်တမ်းလိပ်ကို ပြန်လည်စစ်ဆေးပြီးနောက် ကျိုးကျဲရှန်ထံသို့ ကမ်းပေးလိုက်ချေသည်။

ကျိုးကျဲရှန်သည် ထိုအလိပ်ကို အတော်ကြာအောင် သေချာစွာ ကြည့်ရှုပြီးမှ ဖြည်းညှင်းစွာ ခေါင်းညိတ်ပြကာ အခြားသူများထံသို့ လက်ဆင့်ကမ်းပေးလေသည်။

ကျန်းကျန့်နှင့် ကျိုးကျူတို့သည်လည်း တစ်ယောက်ပြီးတစ်ယောက် ကြည့်ရှုကြပြီးနောက် သဘောတူကြောင်း ခေါင်းညိတ်ပြကြကုန်၏။

ထို့နောက် လူတိုင်းသည် အမိန့်ပြန်တမ်း ပဋိညာဉ်စာချုပ်ပေါ်တွင် အလှည့်ကျ လက်မှတ်ရေးထိုးကြလေသည်။

ကျူးရွှမ်းကျိသည် ထိုအမိန့်ပြန်တမ်းကို ပြန်လည်သိမ်းဆည်းလိုက်ပြီးနောက် အရပ်မျက်နှာအသီးသီးမှ ရောက်ရှိလာသော ပြင်ဆင်ရေးအဖွဲ့ဝင်များအားလုံး တစ်ဦးမကျန် စနစ်တကျ လက်မှတ်ရေးထိုးနိုင်ရန် စီစဉ်ရပေဦးမည်။

ဤလုပ်ငန်းစဉ်ကို သူကိုယ်တိုင်ပင် အနီးကပ် ကြီးကြပ်ကွပ်ကဲခြင်း ဖြစ်သည်။ သူ၏ ရွှေမျက်စိ ပါရမီနှင့် နတ်ဘုရားမုဆိုး နည်းနာများကို အသုံးပြု၍ မသမာမှုများ မပေါ်ပေါက်စေရန် အစွမ်းကုန် တားဆီးကာကွယ်ထားခြင်းပင် ဖြစ်ချေသည်။

ထို့နောက် ကျူးရွှမ်းကျိက ညွှန်ကြားချက် ပေးလေသည် - "မင်းတို့ လေးယောက်က ပြင်ဆင်ရေးအဖွဲ့တွေရဲ့ ခေါင်းဆောင်တွေ ဖြစ်လာမှာပါ။ နောက်ဆိုရင် ချော်ရည်နန်းတော်ထဲက ရာထူးနေရာ အသီးသီးကို ရရှိဖို့အတွက် တက်တက်ကြွကြွ ကြိုးစားကြရမယ်။"

"ဖြစ်နိုင်မယ်ဆိုရင် ဓာတ်ငါးပါး အမြောက်မျှော်စင်ကို သိမ်းပိုက်နိုင်အောင် ကြိုးစားကြပါ။ မီးလျှံတောင်တန်း ထိပ်ဖျားကို ဗုံးကြဲတိုက်ခိုက်ပြီး မိစ္ဆာသားရဲ ဒီရေလှိုင်းတွေ ဖြစ်ပေါ်လာအောင် ဖန်တီးခဲ့တဲ့ တကယ့် တရားခံကတော့ အခုထိ လွတ်မြောက်နေတုန်းပဲ။"

"မင်းတို့ထဲက တစ်ယောက်ယောက်ကသာ ဆက်စပ်တဲ့ သဲလွန်စတွေကို ရှာဖွေတွေ့ရှိမယ်ဆိုရင် ငါက ထိုက်ထိုက်တန်တန် ဆုချမှာပါ"

နင်းကျော့ကလည်း မိမိတို့၏ ဇာတိမြေကို ကာကွယ်ရင်း မကောင်းမှုများ ပြန့်ပွားမသွားစေရန် ထိုဘက်သို့ အစွမ်းကုန် ကြိုးစားဆောင်ရွက်သွားမည် ဖြစ်ကြောင်း ချက်ချင်းပင် အလေးအနက် တုံ့ပြန်ပြောကြားလိုက်၏။

ထို့နောက် နင်းကျော့က တစ်ဆက်တည်း တင်ပြသည်မှာ - "ကျွန်တော့် မျိုးနွယ်စုထဲမှာ နင်းရှောင်ဟွေ့လို့ အမည်ရတဲ့ ပါရမီရှင် ကျင့်ကြံသူတစ်ယောက် ရှိတယ်။ သူမက ဒီကို စောစောစီးစီး ရောက်နှင့်နေပြီး မသေမျိုးနန်းတော်ထဲကို ဝင်ရောက်ကာ အကျိုးပြုမှုတွေလည်း ရရှိထားပြီးပါပြီ။"

"ရာထူးနေရာတွေ ရရှိဖို့ ယှဉ်ပြိုင်တဲ့နေရာမှာ သူမမှာ အတွေ့အကြုံတွေ အများကြီး ရှိနေမှာ အသေအချာပါပဲ။ သူမရဲ့ အတွေ့အကြုံတွေကို ကျွန်တော်တို့နဲ့ မျှဝေခိုင်းရင် မကောင်းဘူးလား"

ကျူးရွှမ်းကျိက ခေါင်းခါပြလျက် - "လောလောဆယ် သူမက အရေးကြီးတဲ့ တာဝန်တစ်ခု ထမ်းဆောင်နေရတာမို့ သွားပြီး မနှောင့်ယှက်နဲ့ဦး။"

"ပြီးတော့ သူမမှာ အောင်မြင်ခဲ့တဲ့ အတွေ့အကြုံတချို့ ရှိနေတယ် ဆိုပေမဲ့လည်း နောက်ထပ် လုပ်ဆောင်ရမယ့် ကိစ္စတွေအတွက်တော့ သိပ်ပြီး အထောက်အကူ ဖြစ်လိမ့်မယ်လို့ ငါမထင်ဘူး။"

"ရှေ့ဆက်ရမယ့် ကိစ္စတွေကတော့ မင်းတို့ရဲ့ ကိုယ်ပိုင် ကြိုးစားအားထုတ်မှုပေါ်မှာပဲ မူတည်လိမ့်မယ်။"

ကျူးရွှမ်းကျိသည် ညွှန်ကြားစရာ ရှိသည်များကို မှာကြားပြီးနောက် လူစုခွဲခွင့် ပေးလိုက်လေသည်။

နင်းကျော့နှင့် အခြားသူများသည် ဘေးဆောင်ခန်းမထဲမှ ထွက်လာပြီးနောက် အတူတကွ ပြန်လာခဲ့ကြကုန်၏။

လမ်းတွင် ကျိုးကျဲရှန်က စကားစလိုက်သည် - "ကျွန်တော်တို့အားလုံးက စမ်းသပ်ခံ တပည့်တွေ ဖြစ်ကြတာမို့ အပြင်လူတွေထက်စာရင် တာဝန်တွေကို ပိုပြီး အများကြီး လက်လှမ်းမီနိုင်ကြတာပဲ။"

"ဒါပေမဲ့ လုပ်စရာတွေက အရမ်းများနေတော့ ဘယ်ဟာကို အရင်ရွေးရမလဲဆိုတာ ဝေခွဲမရဖြစ်ရတဲ့ အခက်အခဲနဲ့လည်း ရင်ဆိုင်နေရတယ်။"

"ကျွန်တော့်အမြင်အရတော့ အချိန်၊ အင်အားနဲ့ ကုန်ကျစရိတ် အနည်းဆုံး သုံးပြီး အကျိုးအမြတ် အများဆုံး ရနိုင်မယ့် အကောင်းဆုံး နည်းလမ်းတစ်ခု ရှိရမယ်လို့ ယူဆမိတယ်"

နင်းကျော့ကလည်း ကျိုးကျဲရှန်၏ အမြင်ကို သဘောတူကြောင်း ခေါင်းညိတ်ပြကာ - "နင်းရှောင်ဟွေ့ရဲ့ အောင်မြင်ခဲ့တဲ့ အတွေ့အကြုံတွေကို မျှဝေခိုင်းဖို့ အကြီးအကဲကျူးကို ကျွန်တော် ဖျောင်းဖျလို့ မရခဲ့ဘူး။ ဒါက ကျွန်တော်တို့အတွက် အားနည်းချက်တစ်ခုပဲ။"

"ကျွန်တော်တို့က ဒီကို အခုမှ ရောက်လာတာဆိုတော့ သတင်းအချက်အလက်တွေနဲ့ နားလည်မှုတွေ သိပ်မရှိသေးဘူး။"

"ဒါကြောင့် ကျွန်တော်တို့ရဲ့ ပထမဆုံး အဆင့်အနေနဲ့ ကွန်ရက်ကို ကျယ်ကျယ်ပြန့်ပြန့် ဖြန့်ထားသင့်တယ်။ တာဝန်အမျိုးမျိုးကို စုံစုံလင်လင် ယူထားပြီး အဘက်ဘက်ကနေ စူးစမ်းထောက်လှမ်းမှုတွေ အကြီးအကျယ် လုပ်ကြရမယ်။"

"အဲဒီ ထောက်လှမ်းရရှိတဲ့ ရလဒ်တွေကို စုစည်းပြီးမှ အကောင်းဆုံး တာဝန်ရွေးချယ်မှု အစီအစဉ်ကို ရေးဆွဲကြတာပေါ့။ နောက်ဆုံးကျမှ အဲဒီအစီအစဉ်အတိုင်း အကောင်အထည်ဖော်ကြမယ်။"

"အကိုကျိုး၊ ဘယ်လိုထင်သလဲ။"

ကျိုးကျဲရှန်က သဘောကျစွာ ရယ်မောလိုက်ပြီး နင်းကျော့၏ ပခုံးကို ပုတ်ကာ - "ထက်မြက်တဲ့ လူတွေနဲ့ စကားပြောရတာ တကယ်ကို လွယ်ကူတာပဲ။"

နင်းကျော့၏ အကြံဉာဏ်မှာ သူ၏ စိတ်ကူးနှင့် ထပ်တူကျနေခြင်း ဖြစ်ပေသည်။

နင်းကျော့နှင့် ကျိုးကျဲရှန်တို့ နှစ်ဦးစလုံး သဘောတူသည်ကို မြင်ရသောအခါ ကျိုးကျဲရှန်၏ နောက်သို့ အမြဲတစေ လိုက်ပါလေ့ရှိသော ကျိုးကျူမှာလည်း ကန့်ကွက်စရာ မရှိတော့ပေ။

သူတို့အားလုံး ကျန်းကျန့်ဘက်သို့ လှည့်ကြည့်လိုက်ကြ၏။

သူတို့၏ ဆွေးနွေးမှုကို တိတ်တဆိတ် နားထောင်နေသော ကျန်းကျန့်သည်လည်း ပူးပေါင်းဆောင်ရွက်ရန် ဆုံးဖြတ်ပြီးသား ဖြစ်သည်။

ဤနေရာသို့ မလာမီကပင် ကျန်းမျိုးနွယ်စု ခေါင်းဆောင်က ကျိုးမျိုးနွယ်စု၊ နင်းမျိုးနွယ်စုတို့နှင့် ရင်းနှီးသော ဆက်ဆံရေးကို ထိန်းသိမ်းထားရန် သူ့အား သီးသန့် မှာကြားထားခဲ့သည်။

ယခုအခါ အခြေအနေများက အရင်လို မဟုတ်တော့ပေ။

ဝိညာဉ်ရိုက်စူးလက်နက်ကြောင့် ထျန်းချင်နန်းတော်မှ ရွှေအမြုတေအဆင့် တပည့်ရင်းတစ်ဦး မှားယွင်း သတ်ဖြတ်ခံခဲ့ရသည့် ကိစ္စကြောင့် ကျန်းမျိုးနွယ်စုသည် ကြီးမားသော အကြပ်အတည်းနှင့် ရင်ဆိုင်နေရသည်။

ထိုကဲ့သို့ အခြေအနေမျိုးတွင် ကျန်းမျိုးနွယ်စုအနေဖြင့် ပြင်ပမဟာမိတ်များ၏ အကူအညီကို အလွန်အမင်း လိုအပ်နေခြင်းပင် ဖြစ်ချေသည်။

ထို့အပြင် ကျိုးကျဲရှန်နှင့် နင်းကျော့တို့ ရေးဆွဲထားသော အစီအစဉ်သည် အမှန်တကယ်ပင် အကောင်းဆုံး ဖြစ်သည်ဟု ကျန်းကျန့်က စိတ်ထဲမှ အကြွင်းမဲ့ ယုံကြည်နေမိသည်။

ထို့ကြောင့် ဝေခွဲမနေတော့ဘဲ သူက တိုက်ရိုက်ပင် သဘောတူလိုက်၏။

သို့သော် ကျန်းကျန့်က မုန့်ချုံ၏ အကြောင်းကိုလည်း ထည့်သွင်းပြောကြားသည် - "အခု အဘက်ဘက်က ပူးပေါင်းဆောင်ရွက်နေကြပြီဆိုတော့ မုန့်ချုံကိုလည်း တစ်ခါတည်း ဆွဲခေါ်သင့်တယ် မဟုတ်ဘူးလား။"

ဤအကြံပြုချက်ကြောင့် ကျိုးကျဲရှန်နှင့် နင်းကျော့တို့ တစ်ဦးကိုတစ်ဦး ကြည့်လိုက်ကြကုန်၏။

ဤတစ်ကြိမ်တွင်မူ နင်းကျော့က နှုတ်ဆိတ်နေခဲ့သည်။

ကျိုးကျဲရှန်က စကားဆိုသည် - "လောလောဆယ် မြို့စားမင်းဂေဟာက ပြင်ဆင်ရေးအဖွဲ့နဲ့ သွားပြီး ဆက်သွယ်ဖို့ မသင့်တော်သေးဘူး ထင်တယ်။"

"မင်း သတိထားမိလား။ ကတိကဝတ် စာချုပ်အရ လေးဖွဲ့လုံး လက်မှတ်ထိုးရမှာ ဖြစ်ပေမဲ့ အခုတစ်ခေါက် သခင်လေး ကျူးရွှမ်းကျိက ငါတို့ သုံးမျိုးနွယ်စုကိုပဲ ခေါ်တွေ့တာလေ။ သူ ဘာလို့ မုန့်ချုံကို မခေါ်ခဲ့တာလဲ။"

"ဒါကို ကြည့်ခြင်းအားဖြင့် သခင်လေး ကျူးရွှမ်းကျိရဲ့ စိတ်နေစိတ်ထားက ဘယ်ဘက်ကို ယိုင်နေလဲဆိုတာ ရှင်းနေတာပဲ မဟုတ်ဘူးလား။"

ကျန်းကျန့်သည် ရုတ်တရက် သဘောပေါက်သွားပြီး ကျိုးကျဲရှန်ကို လက်အုပ်ချီကာ အလျင်အမြန် ကျေးဇူးတင်စကား ဆိုလေသည်။

ထို့နောက် သူတို့တစ်စုသည် လမ်းဆုံတစ်ခုသို့ ရောက်သောအခါ တစ်ဦးနှင့်တစ်ဦး နှုတ်ဆက်ကာ ခွဲခွာသွားကြကုန်၏။

နင်း၊ ကျိုး၊ ကျန်း မျိုးနွယ်စုတို့၏ နေအိမ်များသည် တစ်ခုနှင့်တစ်ခု သိပ်ပြီး မဝေးလှပေ။

နင်းကျော့သည် ထွက်ခွာသွားသော ကျန်းကျန့်တို့၏ ကျောပြင်ကို ကြည့်ရင်း နက်နက်နဲနဲ တွေးတောနေမိသည်။

သူသည် လက်ရှိ အခြေအနေကို သုံးသပ်နေခြင်း ဖြစ်သည် - "မူလကတော့ ဒီသုံးမျိုးနွယ်စုကို ကျူးရွှမ်းကျိကပဲ ဦးဆောင်နေတာ။ ဒါပေမဲ့ ရွှေအမြုတေအဆင့် ပဋိပက္ခဖြစ်ပြီးတဲ့နောက် ကျန်းမျိုးနွယ်စုက ဒုက္ခရောက်သွားတော့ နင်းနဲ့ ကျိုး မျိုးနွယ်စုတွေက ကျူးရွှမ်းကျိကို အကဲခတ်နေကြတာပဲ။"

"အခြေအနေတွေက သိသိသာသာ ပြောင်းလဲသွားပြီ။ အရင်ကထက်စာရင် အခု သုံးမျိုးနွယ်စုက ပိုပြီး စည်းလုံးသွားကြပြီလို့ ပြောလို့ရတယ်။"

"နဂါးလိပ် မီးလျှံဝိညာဉ်၊ နဂါးလိပ် မီးလျှံဝိညာဉ်။" နင်းကျော့က စိတ်ထဲမှနေ၍ တိတ်တဆိတ် ခေါ်ယူလိုက်၏။

ချော်ရည်နန်းတော်၊ ခန်းမဆောင်ကြီး။

နဂါးလိပ် မီးလျှံဝိညာဉ်သည် နင်းကျော့ကို တိတ်တဆိတ် စောင့်ကြည့်နေခဲ့ခြင်း ဖြစ်ပြီး သူက မိမိအမည်ကို ခေါ်လိုက်သောအခါ စိတ်ထဲမှ မခံမရပ်နိုင် ဖြစ်သွားရသည်။

နင်းကျော့အကြောင်းကို ပိုပြီး သိလာလေလေ၊ အမှန်တရားကို ပိုပြီး မြင်လာလေလေ၊ ၎င်းသည် နင်းကျော့ကို ပို၍ပင် သတိထားမိလာလေလေ ဖြစ်ချေသည်။

နင်းကျော့ကဲ့သို့ ပါးနပ်ပြီး အကွက်စေ့လှသော၊ ဟန်ဆောင်ကောင်းလှသော မိစ္ဆာကောင်လေးမျိုးနှင့် မဆက်ဆံလိုသော်လည်း နင်းရှောင်ဟွေ့၏ ခြိမ်းခြောက်မှုက ပို၍ ကြီးထွားလာနေသည်ကို ထည့်သွင်းစဉ်းစားရပေမည်။

နောက်ဆုံးတွင်မူ နဂါးလိပ် မီးလျှံဝိညာဉ်သည် စိတ်ကို တင်းထားပြီး အားနည်းဟန်ဆောင်ကာ နင်းကျော့ကို ပြန်လည် ထူးလိုက်လေသည်။

"သခင်လေး၊ အခုတော့ တကယ့် မသေမျိုးနန်းတော်ထဲကို နောက်ဆုံးတော့ ရောက်လာနိုင်ခဲ့ပြီပေါ့။"

နင်းကျော့က မျက်မှောင်ကြုတ်လျက် - "နဂါးလိပ် မီးလျှံဝိညာဉ်၊ မင်းရဲ့ အခြေအနေက ပိုပြီး ဆိုးလာသလိုပဲလား။"

နဂါးလိပ် မီးလျှံဝိညာဉ်က သဘောတူသည် - "ဟုတ်ပါတယ် သခင်လေး။"

"ဒီ ချော်ရည်နန်းတော်နဲ့ ကျွန်တော်က တစ်သားတည်းပါပဲ။ ဒါက ကျွန်တော့်ရဲ့ ခန္ဓာကိုယ်လို ဖြစ်နေတာ။ အခု ကျွန်တော်က မိစ္ဆာသားရဲ ဒီရေလှိုင်းတွေရဲ့ တိုက်ခိုက်မှုကို အဆက်မပြတ် ခံနေရတာဆိုတော့ နန်းတော် ထိခိုက်ပျက်စီးလေလေ၊ ကျွန်တော်လည်း လိုက်ပြီး အားနည်းသွားလေလေပါပဲ။"

"နောက်ဆိုရင် ကျွန်တော်တို့ အဆက်အသွယ်က ဘယ်အချိန်မဆို ပြတ်တောက်သွားနိုင်ပါတယ်။"

နင်းကျော့ကို အချိန်အတော်ကြာ စောင့်ကြည့်နေခဲ့ရသဖြင့် နဂါးလိပ် မီးလျှံဝိညာဉ်သည်လည်း ပို၍ ပါးနပ်လာပုံ ရပေသည်။

ဤစကားပြောဆိုမှုတွင် နောက်နောင် အဆက်အသွယ် ပြတ်တောက်သွားနိုင်သည်ကို သွယ်ဝိုက်သောနည်းဖြင့် လမ်းခင်းထားခြင်း ဖြစ်၏။

ဆက်လက်၍ နဂါးလိပ် မီးလျှံဝိညာဉ်သည် နင်းရှောင်ဟွေ့၏ ခြိမ်းခြောက်မှုကို ပြောကြားပြီး သူမကို အရေးယူရန် နင်းကျော့အား တိုက်တွန်းလေသည်။

"ဒီကိစ္စကို ငါနားလည်ပါတယ်။" နင်းကျော့က မျက်မှောင်ကြုတ်လိုက်ပြီး အနည်းငယ် အခက်တွေ့နေသည့် ပုံစံမျိုး ပြလိုက်၏။

"မင်း သိထားရမှာက နင်းရှောင်ဟွေ့ကို အရေးယူဖို့ဆိုတာ မလွယ်ဘူး။ ငါက အခွင့်အရေးတစ်ခု၊ သင့်တော်တဲ့ အချိန်တစ်ခုကို စောင့်ရမှာ။"

"ဒါပေမဲ့ လောလောဆယ်မှာတော့ အဲဒီလို အခွင့်အရေးတွေက အရမ်းကို ရှားပါးနေတယ်။"

နင်းကျော့က နဂါးလိပ် မီးလျှံဝိညာဉ်ကို အကျဉ်းချုပ် ရှင်းပြလိုက်သည်။

အကြောင်းမှာ ကျူးရွှမ်းကျိနှင့် အခြားသော ရွှေအမြုတေအဆင့် ကျင့်ကြံသူများသည် နင်းကျော့တို့ကဲ့သို့ပင် ချော်ရည်နန်းတော်ထဲတွင် ခေတ္တ တပ်စွဲထားကြပြီး အပြင်ဘက်မှ မိစ္ဆာသားရဲ ဒီရေလှိုင်းများကို တက်ကြွစွာ တိုက်ခိုက်နေကြခြင်းကြောင့် ဖြစ်ပေသည်။

ဤအချိန်မျိုးတွင် နင်းကျော့သာ နင်းရှောင်ဟွေ့ကို တစ်ခုခု လုပ်ရန် ကြိုးစားပါက ရွှေအမြုတေအဆင့် ကျင့်ကြံသူများ၏ မျက်စိအောက်တွင် ကခုန်နေသကဲ့သို့ ဖြစ်နေမည်ဖြစ်ရာ အလွန်ပင် အန္တရာယ်ကြီးလှပေသည်။

အစောပိုင်းက ဘေးဆောင်ခန်းမထဲတွင် နင်းကျော့သည် ကျူးရွှမ်းကျိကို တိုက်ရိုက်ပင် စမ်းသပ်ခဲ့သေးသည်။

နင်းရှောင်ဟွေ့ကို ခေါ်ယူပြီး သူမ၏ အောင်မြင်ခဲ့သော အတွေ့အကြုံများကို မျှဝေခိုင်းရန် တောင်းဆိုခဲ့ခြင်းမှာ အမှန်စင်စစ်အားဖြင့် ကျူးရွှမ်းကျိက နင်းရှောင်ဟွေ့ကို မည်မျှအထိ အရေးထားသနည်း ဆိုသည်ကို စူးစမ်းခဲ့ခြင်းပင် ဖြစ်၏။

စမ်းသပ်မှု၏ ရလဒ်မှာ ကျူးရွှမ်းကျိသည် မည်သူ့ကိုမျှ နင်းရှောင်ဟွေ့နှင့် ဆက်သွယ်ခွင့် မပြုခြင်းပင် ဖြစ်ချေသည်။ ပို၍ တိတိကျကျ ပြောရလျှင် သူသည် မည်သူ့ကိုမျှ ရာဇဝင်မှတ်တမ်းဆောင်သို့ ဝင်ရောက်ခွင့် မပေးခြင်း ဖြစ်သည်။

သူသည် နင်းရှောင်ဟွေ့ကို အခြားသူများနှင့်ပါ ဝေးဝေးတွင် ထားရှိပြီး နေ့စဉ် ပြောဆိုဆက်ဆံရန် အခွင့်အရေးကိုပင် မပေးခဲ့ပေ။

ကျူးရွှမ်းကျိသည် ရာဇဝင်မှတ်တမ်းဆောင်နှင့် နင်းရှောင်ဟွေ့ကို အလွန်အမင်း တန်ဖိုးထားကြောင်း နင်းကျော့ ကောင်းစွာ သိထားသည်။

ထိုကဲ့သို့ အခြေအနေမျိုးတွင် သူသာ နင်းရှောင်ဟွေ့ကို မဆင်မခြင် အရေးယူမိပါက ကျူးရွှမ်းကျိ၏ အသေးစိတ် စုံစမ်းစစ်ဆေးမှုကို ခံရနိုင်ခြေ အလွန်ပင် များပြားလှပေသည်။

တစ်ဖက်တွင်လည်း နင်းကျော့၌ ကိုယ်ပိုင် အစီအစဉ်များ ရှိနေသည်။

သူသည် ရာဇဝင်မှတ်တမ်းဆောင်တွင် ရာထူးနေရာတစ်ခု ရယူလိုပြီး တစ်ချိန်တည်းမှာပင် နင်းရှောင်ဟွေ့ကိုလည်း ဖယ်ရှားပစ်ရန် မျှော်လင့်ထားခြင်း ဖြစ်၏။

ဤနည်းအားဖြင့် သူသည် ရာဇဝင်မှတ်တမ်းဆောင်၌ မှတ်တမ်းတင်ထားသော တန်ဖိုးရှိသည့် သတင်းအချက်အလက်များကို ရရှိနိုင်မည် ဖြစ်ပေသည်။

ထို့အပြင် ထိုရာထူးကို အသုံးပြု၍ ကျူးရွှမ်းကျိကို အလွယ်တကူ လမ်းလွဲသွားစေနိုင်ပြီး ကျူးရွှမ်းကျိ၏ ထူးခြားလှသော ရွှေအမြုတေအဆင့် တိုက်ခိုက်ရေး စွမ်းအားကိုလည်း သွယ်ဝိုက်သောနည်းဖြင့် အသုံးချနိုင်မည် ဖြစ်သည်။

သူသာ ဤအချက်ကို အောင်မြင်အောင် လုပ်ဆောင်နိုင်ပါက မိမိအတွက် အကျိုးအမြတ် အရှိဆုံး ဖြစ်ပေလိမ့်မည်။

ကြိုတင် ကြံစည်ထားသည့်အတိုင်း နင်းကျော့က နဂါးလိပ် မီးလျှံဝိညာဉ်ကို ပြောလိုက်သည် - "ဒီအကြောင်းတွေ ပြောနေတာ တော်ပြီ။"

"နဂါးလိပ် မီးလျှံဝိညာဉ်၊ ငါ့အတွက် အကောင်းဆုံး အစီအစဉ်တစ်ခုကို ဆွဲပေးစမ်း။ ဒီများပြားလှတဲ့ တာဝန်တွေထဲက ငါနဲ့ အကိုက်ညီဆုံး တာဝန်တွေကို ရွေးချယ်ပေး။ ဒီအစီအစဉ်အတိုင်း လုပ်ရင် ငါက ပိုပြီး မြန်မြန်ဆန်ဆန်နဲ့ သက်သက်သာသာ အကျိုးပြုမှုတွေ ရနိုင်ရမယ်။"

နဂါးလိပ် မီးလျှံဝိညာဉ်သည် ၎င်း၏ ပလ္လင်ပေါ်တွင် လူးလွန့်နေမိပြီး နင်းကျော့၏ တောင်းဆိုချက်ကို ငြင်းပယ်ချင်နေမိသည်။

သို့သော်လည်း မတတ်နိုင်ပေ၊ အကြောင်းမှာ နင်းရှောင်ဟွေ့၏ ခြိမ်းခြောက်မှုက ၎င်း၏ အထက်တွင် ထက်မြက်လှသော ဓားတစ်လက်ကဲ့သို့ အမြဲတစေ ဝဲပျံနေခြင်းကြောင့် ဖြစ်၏။

၎င်း၏ အခြေအနေအရ နင်းရှောင်ဟွေ့ကို ကိုယ်တိုင် ရင်ဆိုင်နိုင်စွမ်း မရှိသဖြင့် နင်းကျော့ကိုသာ အားကိုးနေရပေသည်။

ထို့ကြောင့် ၎င်းသည် နင်းကျော့၏ တောင်းဆိုချက်ကို အကောင်းဆုံး ဖြည့်ဆည်းပေးရန် ဆုံးဖြတ်လိုက်ရချေသည်။

မကြာမီပင် နင်းကျော့သည် သတင်းစကားတစ်ခု လက်ခံရရှိလေသည်။

သူသည် ထိုအချက်အလက်များကို သေချာစွာ စစ်ဆေးကြည့်ရှုသည်။ ထိုအချက်အလက်များတွင် သူ လုပ်ဆောင်ရမည့် အဓိက တာဝန်များကို ဖော်ပြထားပြီး တာဝန်များနှင့် ပတ်သက်သော အသေးစိတ် အချက်အလက်များစွာကိုလည်း မှတ်တမ်းတင်ထား၏။

ဤသတင်းအချက်အလက်မျိုးမှာ မိမိ၏ အကျိုးပြုမှု တံဆိပ်ပြား တစ်ခုတည်းနှင့်တော့ မည်သို့မျှ မရရှိနိုင်သည့် အရာများ ဖြစ်ပေသည်။

အကျိုးပြုမှု တံဆိပ်ပြားအကြောင်း ပြောရလျှင် မသေမျိုးနန်းတော်ထဲသို့ ဝင်ရောက်လာသော ကျင့်ကြံသူတိုင်းကို ရတနာအလင်းတန်းက ခေါ်ဆောင်လာသည့်အချိန်တွင် တစ်ခုစီ ပေးအပ်ထားခြင်း ဖြစ်သည်။

မသေမျိုးနန်းတော်၏ အပြင်ဘက်တွင် ထိုတံဆိပ်ပြား ပျောက်ဆုံးသွားခဲ့လျှင်ပင် ကျင့်ကြံသူက နောက်တစ်ကြိမ် ပြန်လည် ဝင်ရောက်လာသည့်အခါ အသစ်တစ်ခု ပြန်လည် ရရှိနိုင်ပေသည်။

သို့သော်လည်း ဤအသစ်လဲလှယ်မှုမှာ အလကားတော့ မဟုတ်ပေ၊ ချော်ရည်နန်းတော်တွင် ကျင့်ကြံသူ စုဆောင်းထားသော အကျိုးပြုမှုများထဲမှ အချို့ကို နုတ်ယူသွားမည် ဖြစ်ချေသည်။

တစ်ကြိမ်မျှ ပြန်လည် စစ်ဆေးကြည့်ပြီးနောက် နင်းကျော့သည် ထိုအစီအစဉ်မှာ အလွန်ပင် ကောင်းမွန်ပြီး အသေးစိတ် ကျလှသော်လည်း အများပြည်သူနှင့်တော့ မကိုက်ညီကြောင်း တွေ့ရှိလိုက်ရသည်။

သူ လုပ်ဆောင်ရမည့် တာဝန်အများစုမှာ သူ၏ လက်ရှိ ရာထူးနေရာ သုံးခုမှ ဆင်းသက်လာခြင်း ဖြစ်၏။

နင်းကျော့သည် အစောပိုင်းက စမ်းသပ်မှု သုံးခုကို အောင်မြင်ထားခဲ့သဖြင့် ယခုအခါ ဆေးဝါးခန်းမ သခင်၊ အမြောက်မျှော်စင် သခင်နှင့် အမိန့်ပေးစင်မြင့် ခေါင်းဆောင် ရာထူးများကို ရရှိထားခြင်းပင် ဖြစ်သည်။

ဤရာထူးများသည် ဒုတိယအဆင့် ရာထူးများ ဖြစ်ကြပြီး အကျိုးအမြတ် အလွန်များပြားသော တာဝန်များနှင့်လည်း ဆက်စပ်နေပေသည်။

အခြားသော ပြင်ဆင်ရေးအဖွဲ့ဝင်များမှာမူ သူတို့၏ အကျိုးပြုမှု တံဆိပ်ပြားများဖြင့် ဤတာဝန်များကို လုံးဝ မြင်တွေ့နိုင်စွမ်း မရှိကြပေ။

ဒုတိယအကြိမ် ပြန်လည် စစ်ဆေးပြီးနောက် နင်းကျော့သည် နောက်ကွယ်မှ ပုံစံများကို ရှာဖွေတွေ့ရှိလိုက်၏။

သူ၏ တာဝန်များကို အကြမ်းဖျင်းအားဖြင့် အဆင့်သုံးဆင့် ခွဲခြားထားခြင်း ဖြစ်သည်။

ပထမအဆင့်မှာ အဓိကအားဖြင့် သူ၏ ဆေးဝါးခန်းမ သခင် ရာထူးမှ လာခြင်း ဖြစ်သည်။ နင်းကျော့သည် စက်မှုပစ္စည်း အချို့ကို ပြုပြင်ရမည် ဖြစ်၏။

ဤစက်မှုပစ္စည်းများမှာ စက်မှုရုပ်သေးများသာမကဘဲ အမျိုးမျိုးသော စက်မှုအဆောက်အအုံများလည်း ပါဝင်ပေသည်။

ဒုတိယအဆင့် တာဝန်များမှာ အမိန့်ပေးစင်မြင့် ခေါင်းဆောင် ရာထူးမှ လာခြင်း ဖြစ်သည်။

ဤရာထူးကို ရရှိပြီးနောက် နင်းကျော့သည် အစီအရင်များကို စုစည်းနိုင်ပြီး စက်မှုရုပ်သေး အမြောက်အမြားကို စစ်မြေပြင်သို့ စေလွှတ်ရန် အတိုင်းအတာတစ်ခုအထိ အမိန့်ပေး စေခိုင်းနိုင်မည် ဖြစ်ပေသည်။

တတိယအဆင့်မှာမူ သူသည် အမြောက်မျှော်စင် သခင်အနေဖြင့် ပါဝင်ဆောင်ရွက်ရခြင်း ဖြစ်၏။

သတင်းအချက်အလက်များကို စစ်ဆေးကြည့်ရင်း နင်းကျော့သည် ဇဝေဇဝါ ဖြစ်လာကာ နဂါးလိပ် မီးလျှံဝိညာဉ်ကို မေးလိုက်သည် - "အမြောက်မျှော်စင် သခင်နဲ့ ဆက်စပ်နေတဲ့ တာဝန်တွေမှာ အနိမ့်ဆုံး စံနှုန်းတွေ ရှိနေတာကို ငါတွေ့ရတယ်။ အဲဒီ အနိမ့်ဆုံး စံနှုန်းကို မပြည့်မီရင် ငါ့ရဲ့ အကျိုးပြုမှုတွေကို နုတ်ယူမယ်လို့ ဆိုထားတယ်။ ဒါက ဘာကြောင့်လဲ။"

နဂါးလိပ် မီးလျှံဝိညာဉ်သည် မျက်နှာပျက်သွားပြီး နင်းကျော့ကို အဖြေမပေးချင်တော့ပေ။ ၎င်းသည် ယခုအချိန်တွင်ပင် ထွက်ပြေးပစ်လိုက်ရမလားဟု တွေးတောနေမိလေတော့သတည်း။