အခန်း (၂၇၃-၂၇၄)

အခန်း(၂၇၃)ရွှေအမြုတေအဆင့် ဘိုးဘေးများထံမှ အမြတ်ထုတ်ခြင်း

နင်းကျော့သည် ဆေးဝါးခန်းမအတွင်းမှ အပြင်သို့ လှမ်းထွက်လာခဲ့၏။

လမ်းခုလတ်တွင် ကောင်းကင်ယံမှ ရွှေအမြုတေအဆင့် ကျင့်ကြံသူ သုံးဦး ဆင်းသက်လာကြရာ ၎င်းတို့မှာ ကျူးရွှမ်းကျိ၊ နင်းကျိုဖန်နှင့် ကျိုးနုန်းယင်းတို့ ဖြစ်ကြသည်။

နင်းကျော့မှာမူ ရွှေအမြုတေအဆင့် အရှင်သခင်များ ရောက်ရှိလာမည်ကို ကြိုတင်တွေးဆထားပြီး ဖြစ်သဖြင့် အလျင်အမြန်ပင် ခါးညွှတ်၍ ဂါရဝပြုလိုက်လေသည်။

ကျိုးနုန်းယင်းက "ကလေး ... ဆေးဝါးခန်းမထဲမှာ ခုနက ဘာတွေ ဖြစ်ခဲ့တာလဲ" ဟု မေးမြန်း၏။

နင်းကျိုဖန်ကလည်း ထပ်ဆင့်၍ "ငါ မင်းကို အာရုံခံလို့ ခေတ္တပျောက်သွားတယ်၊ ဆေးဝါးခန်းမထဲမှာ ဘာတွေဖြစ်ခဲ့လဲဆိုတာ ငါ့ကို ပြောပြစမ်း" ဟု ဆိုသည်။

ကျူးရွှမ်းကျိမှာမူ တစ်ခွန်းမျှ မဆိုဘဲ နင်းကျော့ကို တိတ်ဆိတ်စွာ ကြည့်နေလေသည်။

နင်းကျော့သည် အံ့အားသင့်သွားဟန် အမူအရာ ပြုလိုက်ပြီးနောက် မိမိမှာ ဆေးဝါးခန်းမတွင် အခကြေးငွေ မြင့်မားသော တာဝန်တစ်ခုကို လက်ခံရရှိခဲ့ကြောင်းနှင့် ဒဏ်ရာပြင်းထန်သူများ ကုသဆောင်အတွင်းသို့ ဝင်ရောက်ခဲ့ကြောင်း ရွှေအမြုတေအဆင့် အရှင်သခင် သုံးဦးအား အလေးအနက် တင်ပြလိုက်၏။

"အဲဒီ အခန်းက အပြင်လောကနဲ့ အဆက်အသွယ် ပြတ်တောက်နေတဲ့ ထူးခြားတဲ့ နေရာတစ်ခု ဖြစ်နေလို့ ဖြစ်ပါလိမ့်မယ်" ဟု နင်းကျော့က ဆိုသည်။

ရွှေအမြုတေအဆင့် ကျင့်ကြံသူ သုံးဦးမှာ တစ်ဦးကိုတစ်ဦး အကြည့်ချင်း ဖလှယ်လိုက်ကြ၏။ နင်းကျော့၏ အဖြေမှာ ၎င်းတို့ အစောပိုင်းက တွေးတောဆွေးနွေးထားသည့် ခန့်မှန်းချက်များနှင့် ကိုက်ညီနေပေသည်။

နင်းကျော့သည် စိုးရိမ်ပူပန်နေသည့် မျက်နှာပေးဖြင့် "ဒဏ်ရာပြင်းထန်သူများ ကုသဆောင်ထဲ ဝင်လိုက်တာနဲ့ အကြီးအကဲတို့ရဲ့ အာရုံခံနိုင်စွမ်း သိသိသာသာ လျော့နည်းသွားတာလား ကျွန်တော့်ကို ပိုပြီးတော့ ကာကွယ်ပေးနိုင်မယ့် နည်းလမ်းလေးတွေများ ရှိဦးမလား" ဟု ဖြည့်စွက်ပြောကြားသည်။

နင်းကျော့က မိမိကိုယ်ကို စောင့်ကြည့်မည့် နည်းလမ်းများကို ထပ်မံတိုးမြှင့်ပေးရန် ဦးဆောင်၍ တောင်းဆိုလာခြင်းကြောင့် ကျူးရွှမ်းကျိ၏ မျက်လုံးများ အနည်းငယ် လှုပ်ခတ်သွားရ၏။

နင်းကျော့၏ ကြောက်ရွံ့တုန်လှုပ်နေသည့် ပုံစံကို မြင်သောအခါ နင်းမျိုးနွယ်စု၏ ဘိုးဘေးဖြစ်သူ နင်းကျိုဖန်က နှာခေါင်းရှုံ့လျက် "မင်းကို ကြည့်စမ်းပါဦး၊ ရည်မှန်းချက်ကလည်း သေးသိမ်လိုက်တာ" ဟု ဆိုလေသည်။

ထိုအခါ နင်းကျော့က ချက်ချင်းပင် ငိုညည်းသံဖြင့် "ဘိုးဘေးကြီးခင် ကျွန်တော့်မှာက မပြောပလောက်တဲ့ ဝိညာဉ်စွမ်းအား သန့်စင်ခြင်းအဆင့်လေးပဲ ရှိတာပါ၊ ကျွန်တော့်မှာသာ ဘိုးဘေးကြီးလို အစွမ်းမျိုး ရှိရင်ဖြင့် ဟောဒီလောကကြီးထဲမှာ ဘယ်အရာကိုမှ မကြောက်ဘဲ ရဲရဲဝံ့ဝံ့ လှည့်လည်သွားလာနေမှာပေါ့" ဟု ပြန်လည် တင်ပြသည်။

"ကျွန်တော်က နင်းမျိုးနွယ်စုရဲ့ သွေးသားတစ်ယောက်ပဲလေ၊ ဘိုးဘေးကြီးအနေနဲ့ ကျွန်တော့်ကို ပိုပြီး စိတ်ချရတဲ့ ကာကွယ်မှုတွေ ပေးသင့်တာပေါ့"

"လက်ရှိ အခြေအနေကို ကျွန်တော် ဘယ်လိုလုပ် နားမလည်ဘဲ နေပါ့မလဲ"

"ဓာတ်ငါးပါး အမြောက်မျှော်စင်ကို ထိန်းချုပ်ပြီး မီးလျှံတောင်ကို ဗုံးကြဲနေတဲ့ မိစ္ဆာက အရမ်းကို ရက်စက်ကြမ်းကြုတ်လွန်းတာပဲ"

"ပိုပြီး ကြောက်ဖို့ကောင်းတာက အဲဒီလူက ဘယ်သူလဲဆိုတာ အခုထိ ကျွန်တော်တို့ မသိရသေးတာပဲ"

"ကျွန်တော်တို့ ပြင်ဆင်ရေးအဖွဲ့ထဲက စမ်းသပ်ခံတပည့်တွေက ရာထူးအသီးသီးကို အလွယ်တကူ ယှဉ်ပြိုင်ယူနိုင်ကြတယ်"

"အကျိုးပြုမှုတွေကို အကြီးအကျယ် ရယူနေတဲ့ ကျွန်တော်တို့ဟာ တကယ့်မိစ္ဆာအတွက်တော့ ပစ်မှတ်အစစ်အမှန်တွေ ဖြစ်လာမှာပေါ့၊ အဲဒီလူက ကျွန်တော်တို့ကို ဒုက္ခပေးဖို့ ကြိုးစားမှာ အသေအချာပဲ"

"ဒါပေမဲ့ အခုထက်ထိတော့ ရွှေအမြုတေအဆင့် ဘိုးဘေးတို့ရဲ့ ကာကွယ်မှုကြောင့် သူ အခွင့်အရေး မရသေးတာပါ"

"ဒီနေ့ ဆေးဝါးခန်းမကို လာပြီး ကုသဆောင်ထဲ တစ်ယောက်တည်း ဝင်သွားခဲ့တာဟာ ကျားတွင်းထဲကို သိသိကြီးနဲ့ ဆင်းသွားခဲ့တာပါပဲ"

"ဒါကို ဘယ်လိုလုပ် အသက်ဘေး ကြောက်တာလို့ ခေါ်နိုင်မှာလဲ၊ ဒါဟာ သေခြင်းတရားကို ရင်ဆိုင်ရဲတဲ့ သတ္တိမျိုးပဲ မဟုတ်လား"

ထိုစကားများကြောင့် ရွှေအမြုတေအဆင့် ကျင့်ကြံသူ သုံးဦးမှာ ခေတ္တမျှ ဆွံ့အသွားကြရသည်။

နင်းကျိုဖန်က တစ်ဖန် နှာခေါင်းရှုံ့ပြန်ကာ "မင်းကတော့ တော်တော်လေး လျှာအရိုးမရှိ တတ်နိုင်တဲ့ ကောင်လေးပဲ"

"ဆေးဝါးခန်းမထဲက ရာထူးတွေကို စမ်းသပ်ခံတပည့်တွေပဲ ယှဉ်ပြိုင်ခွင့်ရှိတာကို ဘာလို့ ထည့်မပြောတာလဲ"

"တကယ့်မိစ္ဆာက ရွှေအမြုတေအဆင့် ကျင့်ကြံသူ ဖြစ်နေဦးတော့၊ ဆေးဝါးခန်းမနားကို သူ ကပ်လို့တောင် မရဘူး"

"မင်း အဲဒီထဲမှာ ဘေးကင်းနေတာပဲ"

"ဒါကြောင့်လည်း မင်းကို အာရုံခံလို့ မရတော့တဲ့အချိန်မှာ ငါတို့တွေ ချက်ချင်း အရေးတယူ မလုပ်ခဲ့တာပေါ့"

"ဒါကို မင်းက ဘယ်လိုလုပ် သေခြင်းတရားကို ရင်ဆိုင်ရဲတဲ့ သတ္တိလို့ ပြောနိုင်ရတာလဲ"

နင်းကျော့သည် တည်ကြည်လေးနက်သော မျက်နှာပေးဖြင့် စကားလုံးများကို သေချာရွေးချယ်ကာ တင်ပြလိုက်၏။

"အကြီးအကဲတို့ ၊ ကျွန်တော့်အမြင်ကတော့ ဒီလိုပါ"

"လက်ရှိမှာတော့ ဆေးဝါးခန်းမထဲက ရာထူးတွေကို စမ်းသပ်ခံတပည့်တွေပဲ ရနိုင်တယ်လို့ ကျွန်တော်တို့ သိထားကြတာပေါ့"

"ဒါပေမဲ့ ဒါဟာ လုံးဝမှန်ကန်တဲ့ အဖြေလားဆိုတာ ဘယ်သူမှ မသေချာနိုင်ပါဘူး"

"အခုလောလောဆယ် အထောက်အထား အားလုံးက အဲဒီအချက်ကိုပဲ ညွှန်ပြနေတာ မှန်ပါတယ်"

"ဒါပေမဲ့ ပြင်ပလူတစ်ယောက်ကလည်း ဆေးဝါးခန်းမထဲကို ဝင်ရောက်နိုင်မယ့် နည်းလမ်းတစ်ခုခုကို ရှာတွေ့ထားတာမျိုး ဖြစ်နိုင်တာပဲလေ"

"နောက်ပြီးတော့ ချော်ရည်နန်းတော်ကို တည်ဆောက်ခဲ့တဲ့ ဘိုးဘေးဆရာကြီး သုံးဦးဟာ ကြင်နာသနားတတ်တဲ့သူတွေအဖြစ် ကျော်ကြားခဲ့တာပဲ၊ သူတို့လို စိတ်ထားမွန်မြတ်တဲ့သူတွေက ကိုယ့်လူမျိုးကိုပဲ အကျိုးခံစားခွင့်ပေးပြီး တခြားသူတွေအတွက် လမ်းစမချန်ထားခဲ့ဘူးဆိုတာ မဖြစ်နိုင်ပါဘူး"

"ဒါကြောင့် တကယ့်မိစ္ဆာမှာ ဆေးဝါးခန်းမထဲကို ခိုးဝင်ပြီး ကျွန်တော့်ကို ရန်မူနိုင်မယ့် လျှို့ဝှက်နည်းလမ်း တစ်ခုခု ရှိနေနိုင်တာပဲ"

နင်းကျော့သည် မိမိထံတွင် ပေါ်ပေါက်ခဲ့သော ဟာကွက်ကို ဖုံးကွယ်ရန်အတွက် ဤစကားကို တမင်တကာ ပြောဆိုခဲ့ခြင်း ဖြစ်သည်။

၎င်းသည် ဓာတ်ငါးပါး အမြောက်တပ်၏ အရာရှိတစ်ဦးအနေဖြင့် မီးလျှံတောင်ကို ဗုံးကြဲတိုက်ခိုက်ရန် အမြောက်များကို အစွမ်းကုန် အသုံးပြုခဲ့ပေသည်။

ဤလုပ်ရပ်မှာ ဟာကွက်တစ်ခုပင် ဖြစ်၏။

အကြောင်းမှာ ယခုအချိန်အထိ ဓာတ်ငါးပါး အမြောက်မျှော်စင်သို့ မည်သူမျှ ဝင်ရောက်နိုင်ခြင်း မရှိသေးသောကြောင့် ဖြစ်သည်။

ထို့အတူ အမိန့်ပေးစင်မြင့်သို့ ဝင်ရောက်၍ တာဝန်ယူနိုင်သူလည်း မရှိသေးချေ။

ယခုအချိန်အထိ ကျူးရွှမ်းကျိနှင့် အခြားသူများသည် 'စမ်းသပ်ခံတပည့်များသာ ဓာတ်ငါးပါး အမြောက်မျှော်စင်တွင် တာဝန်ယူခွင့်ရှိသည်' ဟူသော အချက်ကို အတည်မပြုနိုင်သေးပေ။

၎င်းတို့အနေဖြင့် ဤအချက်ကိုသာ အတည်ပြုနိုင်ခဲ့ပါက တကယ့်မိစ္ဆာ၏ မည်သူမည်ဝါဖြစ်ကြောင်းကို စမ်းသပ်ခံတပည့်များထဲ၌သာ ရှာဖွေတော့မည် ဖြစ်သည်။

ဤသည်မှာ နင်းကျော့အတွက် အလွန်ပင် အန္တရာယ်ရှိသော အခြေအနေ ဖြစ်ပေလိမ့်မည်။

ထို့ကြောင့် ၎င်းတို့ အတည်မပြုနိုင်မီမှာပင် နင်းကျော့က မိမိ၏ ခန့်မှန်းချက်များဖြင့် ကျူးရွှမ်းကျိနှင့် အခြားသူများကို လမ်းမှားသို့ ပို့ဆောင်ရန်နှင့် နောင်တွင် မိမိအပေါ် သံသယမဝင်စေရန် ကြိုတင်ကာကွယ်လိုက်ခြင်း ဖြစ်၏။

ဤသည်မှာ ကြိုတင်ပြင်ဆင်မှုပင် ဖြစ်သည်။

ရွှေအမြုတေအဆင့် ကျင့်ကြံသူ သုံးဦးစလုံးမှာ သူ၏ ဆန်းစစ်ချက်ကို နားထောင်ပြီးနောက် မည်သူမျှ ချက်ချင်း တုံ့ပြန်ငြင်းဆိုခြင်း မပြုနိုင်ကြချေ။

နဂါးလိပ် မီးလျှံဝိညာဉ်ထံမှ အတည်ပြုချက် မရရှိသေးသရွေ့ ၎င်းတို့လည်း မသေချာနိုင်သည်မှာ အမှန်ပင် ဖြစ်သည်။

ကျူးရွှမ်းကျိကိုယ်တိုင်ပင် မသေမျိုးနန်းတော်အတွင်းသို့ အကြိမ်ကြိမ် ဝင်ရောက်ခဲ့သော်လည်း နဂါးလိပ် မီးလျှံဝိညာဉ်နှင့် ဆက်သွယ်ရန် ကြိုးပမ်းမှုတိုင်းမှာ အရာမထင်ခဲ့ပေ။

ထိုသို့သော အခြေအနေမျိုးတွင် နင်းကျော့က မိမိ၏ အသက်ကို ရင်းခဲ့သည်ဟု ဆိုခြင်းမှာ လက်ခံနိုင်စရာ ဖြစ်နေသည်။

ကျိုးနုန်းယင်းက ရုတ်တရက် ရယ်မောလိုက်ပြီး နင်းကျိုဖန်အား လှမ်း၍ ပြောလိုက်၏။

"အစ်ကိုနင်း ... တကယ်ပါပဲ၊ မင်းတို့ နင်းမျိုးနွယ်စုကတော့ ပါရမီရှင်တစ်ယောက် ထွက်ပေါ်လာပြီပဲ၊ တကယ့်ကို အားကျဖို့ ကောင်းလိုက်တာ"

နင်းကျိုဖန်က အလျင်အမြန်ပင် နှိမ့်ချစွာ ပြန်လည် တုံ့ပြန်လိုက်သည်။ "မဖြစ်နိုင်တာပဲ၊မင်းတို့ရဲ့ မြင့်မြတ်တဲ့ ကျိုးကျဲရှန်တို့၊ ကျိုးကျူတို့နဲ့ ယှဉ်ရင်တော့ နင်းကျော့က အများကြီး လိုပါသေးတယ်"

"သူက အခြေအနေကို သိတတ်သလိုရှိပေမဲ့ မင်းတို့ မယုံလိုက်ပါနဲ့၊ သူက သတ္တိရှိသလို ဟန်ဆောင်နေတာပါ၊ တကယ်တော့ သူက လောဘကြီးပြီး ဆုလာဘ်ကိုပဲ လိုချင်နေတာ"

နင်းကျော့၏ မျက်လုံးများမှာ အရောင်တောက်သွားပြီး ချက်ချင်းပင် ဖားချော့သည့် အပြုံးမျိုးဖြင့် "ဟီးဟီး ... ဘိုးဘေးကြီး၊ ကျွန်တော်က ကျွန်တော့်အတွက်ပဲ လုပ်နေတာ မဟုတ်ပါဘူး" ဟု ဆိုလေတော့သည်။

အခန်း (၂၇၄)- ရွှေအမြုတေအဆင့် ဘိုးဘေးများထံမှ အမြတ်ထုတ်ခြင်း (အပိုင်း ၂)

“ကျွန်တော်မျိုးက မျိုးနွယ်စုအတွက် အကျိုးပြုနေတာပါ”

“ကြည့်ပါဦး၊ အခု ကျွန်တော်မျိုးက အရမ်းအန္တရာယ်များတဲ့ အခြေအနေကို ရောက်နေတာ၊ ကာကွယ်ဖို့အတွက် တစ်ခုခု ထပ်မပေးသင့်ဘူးလား”

“ကျွန်တော်တို့ မျိုးနွယ်စုရဲ့ မျိုးဆက်သစ်လေး တစ်ယောက်ကို ဟိုယုတ်မာတဲ့ ရာဇဝတ်ကောင် လက်ထဲမှာ အနှိပ်စက်ခံရမှာကို အကြီးအကဲတို့က ရက်ရက်စက်စက် ကြည့်နေနိုင်ကြလို့လား”

နင်းကျိုဖန်သည် နင်းကျော့ကို လက်ညှိုးထိုးကာ ရယ်မောရင်း ဆူပူလိုက်လေသည်။ “သူ့ကို ကြည့်ကြစမ်းပါဦး။ ဒါ ငါတို့ နင်းမျိုးနွယ်စုရဲ့ ထူးချွန်တဲ့ မျိုးဆက်ပဲ။ ငါ အမြင်မမှားခဲ့ဘူးဆိုတာ သေချာသွားပြီ”

ထိုစကားကို ကြားသောအခါ ကျိုးနုန်းယင်းနှင့် ကျူးရွှမ်းကျိတို့လည်း ရယ်မောလိုက်ကြသဖြင့် တင်းမာနေသော အခြေအနေမှာ ရုတ်ခြည်း ပေါ့ပါးသွားတော့သည်။

နင်းကျိုဖန်က ဆက်၍ “ပြီးခဲ့တဲ့ အခေါက်ကလည်း မင်းကို ကာကွယ်ဖို့ အဆောင်လက်ဖွဲ့တွေ အများကြီး ပေးထားပြီးပြီလေ၊ အဲဒါတွေကိုလည်း ငါ ပြန်မသိမ်းသေးပါဘူး”

“ဒီတစ်ခါကော ဘာလိုချင်သေးလို့လဲ”

“မင်း မျိုးနွယ်စုအတွက် အကျိုးပြုနေတာကိုတော့ ဟုတ်ပါတယ်။ ဒါပေမဲ့ မျိုးနွယ်စုက မင်းရဲ့ အကျိုးဆောင်မှုတွေကို နောက်မှ သေချာအသိအမှတ်ပြုမှာပါ။ မင်းကို ချန်ထားမှာ မဟုတ်ပါဘူး”

နင်းကျော့က ချက်ချင်းပင် ပြန်ပြောလိုက်သည်။ “တကယ်တော့ ကျွန်တော်မျိုး မျိုးနွယ်စုခွဲ ထွက်ချင်လို့ပါ ဘိုးဘေးကြီး၊ ကျွန်တော်မျိုးကို မျိုးနွယ်စုခွဲအဖြစ် ခွဲထုတ်ပေးလို့ ရမလား”

“ဟို အကျိုးဆောင်မှု အသိအမှတ်ပြုတာတွေ၊ ဆုလာဘ်တွေ ဆိုတာကိုတော့ ကျွန်တော်မျိုး သိပ်ပြီး မျှော်လင့်မနေတော့ပါဘူး။ မျိုးနွယ်စု အဓိကအကိုင်းအခက်က ကျွန်တော်မျိုးကို အပြစ်ရှာပြီး အမှုမဆင်ရင်ပဲ တော်လှလှပါပြီ”

နင်းကျိုဖန်၏ မျက်နှာမှာ ချက်ချင်းပင် ဒေါသရိပ်များ ယှက်သန်းသွားသည်။ “မင်း... ဘယ်လောက်တောင် ရဲတင်းလိုက်လဲ”

သူက ဆူပူကြိမ်းမောင်းရန် ပြင်လိုက်သော်လည်း ကျိုးနုန်းယင်းက ရုတ်တရက် အားရပါးရ ရယ်မောကာ ကြားဖြတ်လိုက်လေသည်။

ကျိုးနုန်းယင်း၏ စိုးရိမ်ပူပန်မှုများမှာ ဝမ်းသာမှုအဖြစ်သို့ ပြောင်းလဲသွားချေပြီ။

စောစောပိုင်းက နင်းကျော့၏ ထူးချွန်မှုကို မြင်လိုက်ရသဖြင့် သူသည် များစွာ စိုးရိမ်နေခဲ့ခြင်း ဖြစ်သည်။

နင်းမျိုးနွယ်စု၏ အင်အားမှာ ကျိုးမျိုးနွယ်စုကို မယှဉ်နိုင်သော်လည်း နင်းကျော့ကဲ့သို့သော မျိုးဆက်သစ်မှာ မကြာသေးမီကပင် အလွန်ထင်ပေါ်လာခဲ့ပြီး ကျိုးကျူနှင့် ကျိုးကျဲရှန်တို့ထက်ပင် သာလွန်ထူးချွန်နေသည် မဟုတ်လော။

ထိုအချက်က ကျိုးနုန်းယင်းကို အနည်းငယ် ခြိမ်းခြောက်မှုဖြစ်စေသဖြင့် သူ၏ စိတ်ထဲတွင် သိပ်ပြီး မကြည်မလင် ဖြစ်နေခဲ့ရသည်။

သို့သော် ယခုအခါ နင်းကျော့ကိုယ်တိုင်က နင်းမျိုးနွယ်စုအတွင်းရှိ အားနည်းချက်များကို ထုတ်ဖော်ပြောဆိုနေပြီး မျိုးနွယ်စုခွဲနှင့် အဓိကအကိုင်းအခက်ကြားရှိ ပဋိပက္ခများကို ပွင့်ပွင့်လင်းလင်း ပြောနေသည်ကို မြင်လိုက်ရသောအခါ၊

နောင်တစ်ချိန်တွင် နင်းကျော့နှင့် အဓိကမျိုးနွယ်စုတို့ အဖုအထစ်ဖြစ်ကြမည့် မြင်ကွင်းကို ကျိုးနုန်းယင်း မမျှော်လင့်ဘဲ မနေနိုင်တော့ချေ။

ကျိုးနုန်းယင်းသည် ခဏမျှ ရယ်မောပြီးနောက် သူ၏ သိုလှောင်မှုခါးပတ်ထဲမှ မှော်ရတနာတစ်ခုကို ထုတ်ယူကာ နင်းကျော့ထံ တိုက်ရိုက် ဝေ့ပစ်ပေးလိုက်သည်။

၎င်းမှာ လက်ကိုင်ပုဝါ တစ်ထည်ပင် ဖြစ်သည်။

ထိုလက်ကိုင်ပုဝါပေါ်တွင် ရှုပ်ထွေး၍ အစီအစဉ်မရှိသော အင်းကွက်များစွာ ရေးထိုးထားသည်။

သို့သော် အမှန်စင်စစ်တွင် ယင်းမှာ အစီအစဉ်မရှိဟုသာ ထင်ရခြင်း ဖြစ်သည်။

ကျိုးနုန်းယင်းက “ဒါက ‘ပတ်ချာလည် ပြောင်းပြန်လှန် အစီအရင်ချပ်’ ပဲ။

အရေးကြုံလာရင် ဒါကို ပစ်ထုတ်လိုက်ရုံနဲ့ အသက်ရှင်ဖို့အတွက် အရေးကြီးတဲ့ အခွင့်အရေးတစ်ခုကို ဖန်တီးပေးနိုင်လိမ့်မယ်” ဟု ရှင်းပြလိုက်သည်။

၎င်းကို လက်ခံရရှိပြီးနောက် နင်းကျော့မှာ အလွန်ဝမ်းသာသွားပြီး အလျင်အမြန် ကျေးဇူးတင်စကား ဆိုလိုက်တော့သည်။

နင်းကျိုဖန်၏ မျက်လုံးများထဲတွင် စူးရှသော အလင်းတန်းတစ်ခု ဝင်းခနဲ ဖြစ်သွားသည်။

ကျိုးနုန်းယင်းသည် သူ့ကို မျက်နှာပျက်အောင် လုပ်နေမှန်း သူသိသော်လည်း အပြင်ပန်းတွင်မူ ကျိုးနုန်းယင်းကို ကျေးဇူးတင်ကြောင်း ပြောလိုက်ရလေသည်။

ကျူးရွှမ်းကျိက ခပ်ပြုံးပြုံးဖြင့် မြေပြင်ပေါ်သို့ ဆင်းသက်လာကာ နင်းကျော့၏ အနီးသို့ လျှောက်လာခဲ့သည်။

“မင်းက တကယ်ကို အကျိုးပြုခဲ့တဲ့ လူယုံတော်ပါပဲ”

“မကြာသေးမီက ပြင်ဆင်ရေးအဖွဲ့ဝင်တွေ တိုးတက်မှု အများကြီးရှိလာတာက မင်းရဲ့ အတွေ့အကြုံတွေကို သူတို့ကို သဘောထားကြီးကြီးနဲ့ မျှဝေပေးခဲ့လို့ပဲ”

“ဒါကြောင့် မင်းကို ငါ စစ်ဆေးကြည့်ပါရစေဦး”

နင်းကျော့သည် ကျူးရွှမ်းကျိ၏ သံသယကို ကောင်းကောင်းသိသဖြင့် စိတ်ထဲမှ နှာခေါင်လှောင်လိုက်သော်လည်း အပြင်ပန်းတွင်မူ အလွန်ဝမ်းသာသည့်ဟန်ဖြင့် ကျူးရွှမ်းကျိ စစ်ဆေးသည်ကို တက်ကြွစွာ ပူးပေါင်းဆောင်ရွက်ပေးလိုက်သည်။

ထို့နောက် ကျူးရွှမ်းကျိသည် သူ၏ လက်ဝါးကို နင်းကျော့၏ ကျောပေါ်တွင် တင်ကာ ကျင့်စဉ်တစ်ခုကို လှုပ်ရှားလိုက်ပြီး တစ်ချိန်တည်းမှာပင် သူ၏ မျက်လုံးများတွင် မှိန်ဖျော့သော ရွှေရောင်အလင်းများ ဝင်းခနဲ ဖြစ်သွားသည်။

သေချာစွာ စစ်ဆေးပြီးနောက်တွင်မူ သူ၏ စောင့်ကြည့်မှု နည်းလမ်းများကို ဖျက်ဆီးထားခြင်း မရှိကြောင်း ကျူးရွှမ်းကျိ အတည်ပြုနိုင်ခဲ့သည်။

ထိုအခါမှသာ သူသည် စိတ်အေးသွားတော့သည်။

နင်းကျော့က ကျူးရွှမ်းကျိကို မျှော်လင့်တကြီး ကြည့်ကာ “အကြီးအကဲကျူး၊ အမှန်တရားကို စုံစမ်းစစ်ဆေးဖို့နဲ့ တကယ့် တရားခံရဲ့ သဲလွန်စတွေကို ရှာဖွေဖို့ဆိုတာ ကျွန်တော်မျိုးတို့ရဲ့ ရှောင်လွှဲလို့မရတဲ့ တာဝန်ပါပဲ။ အသက်နဲ့ရင်းပြီး အစွမ်းကုန် ကြိုးစားနေပါတယ်”

“လက်ရှိ အခြေအနေအရ ကျွန်တော်မျိုး အသက်ဘေးကို ဂရုမစိုက်ဘဲ ဆေးဝါးခန်းမကို သွားရောက် စုံစမ်းခဲ့ရသလောက်တော့ တကယ့်တရားခံက ဆေးဝါးခန်းမထဲမှာ ရှိမနေပါဘူး”

ခဏမျှ တုံ့ဆိုင်းသွားပြီးနောက် နင်းကျော့က လေသံပြောင်းကာ “ဒါပေမဲ့ ဆေးဝါးခန်းမကို ယာယီပဲ စိတ်ချရဦးမယ်လို့ ကျွန်တော်မျိုး ထင်ပါတယ်”

“အခုချိန်မှာ မိစ္ဆာသားရဲတွေ သောင်းကျန်းနေတော့ ဟိုယုတ်မာတဲ့ လူက အကျိုးပြုမှုတွေရဖို့ မိစ္ဆာသားရဲ အမြောက်အမြားကို သတ်ဖြတ်ရုံပါပဲ။ ဒါက အရင်ကထက် အများကြီး ပိုလွယ်ပြီး ပိုမြန်နေပါတယ်”

“တကယ်လို့ သူက ဆေးဝါးခန်းမကို ဝင်ရောက်ဖို့အတွက် တစ်ခုခုကို အသုံးချနိုင်သွားပြီဆိုရင်တော့ ကျွန်တော်တို့ ဒုက္ခရောက်မှာ အမှန်ပါပဲ”

“ဒါပေမဲ့ ချော်ရည်နန်းတော်က ဘယ်လောက်တောင် အရေးကြီးတယ်ဆိုတာကို တွေးမိတိုင်း၊ ပြီးတော့ မျိုးနွယ်စုအတွက် အကျိုးပြုနိုင်ဖို့နဲ့ တမ်းတခြင်းပြည်အတွက် ထွန်းတောက်နိုင်ဖို့ အခွင့်အရေးရနေတာကို တွေးမိတိုင်း ကျွန်တော်မျိုးရဲ့ စိတ်ထဲမှာ တက်ကြွမှုတွေ ပြည့်လျှံလာပြီး သွေးတွေတောင် ဆူပွက်လာသလို ခံစားရပါတယ်၊ ကျွန်တော်မျိုး...”

“တော်ပြီ၊ တော်ပြီ” ကျူးရွှမ်းကျိက လက်ယမ်းကာ မတတ်သာသည့် အမူအရာဖြင့် နင်းကျော့၏ စကားကို ဖြတ်ပြောလိုက်သည်။

“မင်း ဘာပြောချင်လဲဆိုတာ ငါသိပါတယ်။ မင်းရဲ့ ဆိုလိုရင်းကိုလည်း ငါ နားလည်တယ်”

“ရော့၊ ဒါကို မင်းရဲ့ မကြာသေးမီက ကြိုးစားမှုတွေအတွက် ဆုလာဘ်အဖြစ် ယူထားလိုက်”

ပြောပြောဆိုဆိုနှင့်ပင် သူက ပစ္စည်းတစ်ခုကို ပစ်ပေးလိုက်သည်။

နင်းကျော့က အလျင်အမြန် ဖမ်းယူလိုက်ပြီး သေချာကြည့်လိုက်သောအခါ ၎င်းမှာ ကျောက်စိမ်းတုံး တစ်တုံး ဖြစ်နေသည်ကို တွေ့လိုက်ရသည်။

ထိုကျောက်စိမ်းတုံးမှာ လုံးဝ ကြည်လင်နေပြီး အတော်အတန် လေးလံလှကာ မည်သည့် အညစ်အကြေးမျှ မရှိသော ဖန်သားအစစ်ဖြင့် ပြုလုပ်ထားသည့်နှယ်ပင်။

နင်းကျော့မှာ အံ့အားသင့်သွားပြီး “ဒါက အထွတ်အထိပ်အဆင့် ကျောက်စိမ်းတုံးပဲ” ဟု တိုးတိုးလေး ရေရွတ်လိုက်မိသည်။

ကျူးရွှမ်းကျိက “မူလကတော့ ဒီကျောက်စိမ်းတုံးထဲမှာ ရေခဲဓာတ်ဆိုင်ရာ သဘာဝ ဝိညာဉ်စွမ်းအားတွေ ပြည့်နေတာ၊ ဒါပေမဲ့ ငါက အကုန် သုံးပစ်လိုက်ပြီ” ဟု ရှင်းပြသည်။

“ဒါပေမဲ့ ဒါက တန်ဖိုးကြီးနေတုန်းပါပဲ”

“ဘာလို့လဲဆိုတော့ အထွတ်အထိပ်အဆင့် ကျောက်စိမ်းတုံး မှန်သမျှက ဝိညာဉ်စွမ်းအားတွေကို သူ့အလိုလို ပြန်ပြီး စုပ်ယူဖြည့်တင်းနိုင်လို့ပဲ”

“ဒါပေမဲ့ ရေခဲဓာတ်ဆိုင်ရာ အထွတ်အထိပ် ဝိညာဉ်ကျောက်တုံးကတော့ ရေခဲဓာတ် ဝိညာဉ်စွမ်းအားကိုပဲ ပြန်ဖြည့်နိုင်လိမ့်မယ်”

“မင်း စက်မှုပညာရပ်တွေကို ဝါသနာပါတာ ငါသိပါတယ်။ ဒီအထွတ်အထိပ်အဆင့် ကျောက်စိမ်းတုံးက သဘာဝအတိုင်း ရရှိတဲ့ ဝိညာဉ်စွမ်းအား သိုလှောင်ကန် ဖြစ်တာကြောင့် မင်းအတွက် အသုံးတည့်မှာပါ”

“ဒါပေမဲ့ မင်းက ရေခဲဓာတ် ဝိညာဉ်စွမ်းအားတွေ ဖြည့်ချင်တယ်ဆိုရင်တော့ မီးလျှံတောင်တန်းလို၊ ချော်ရည်နန်းတော်လို နေရာမျိုးမှာ အတော်လေးတော့ အားထုတ်ရလိမ့်မယ်”

နင်းကျော့သည် ကျေးဇူးတင်စကားများကို ထပ်ကာထပ်ကာ ပြောရင်း လက်တစ်ဖက်တွင် အထွတ်အထိပ်အဆင့် ကျောက်စိမ်းတုံးကို ကိုင်ကာ၊ ကျန်လက်တစ်ဖက်တွင် အစီအရင် လက်ကိုင်ပုဝါကို ကိုင်ထားရင်း နင်းကျိုဖန်ကို မျှော်လင့်တကြီး ကြည့်လိုက်သည်။

သူ ဘာမှ မပြောသော်လည်း သူ၏ မျက်လုံးများက အဖြေပေးနေချေပြီ။

ကျိုးနုန်းယင်းနှင့် ကျူးရွှမ်းကျိတို့ကလည်း နင်းကျိုဖန်ကို ကြည့်လိုက်ကြသည်။

နင်းကျိုဖန်သည် ချောင်းတစ်ချက်ဟန့်ကာ တည်ငြိမ်သော မျက်နှာထားဖြင့် “မင်းက အကျိုးဆောင်မှု အသိအမှတ်ပြုတာတွေနဲ့ ဆုလာဘ်တွေအတွက် စိုးရိမ်နေတယ်ဆိုရင်တော့ ငါ ပြောလိုက်မယ်။ ဒီတစ်ခါ အကျိုးဆောင်မှုတွေနဲ့ ဆုလာဘ်တွေကို ငါကိုယ်တိုင် စီစဉ်ပေးမယ်။ အခု မင်း ကျေနပ်ပြီလား”

နင်းကျော့သည် ချက်ချင်းပင် ကျေနပ်ကြောင်း ပြောကာ စကားဆက်ရန် ပြင်လိုက်သော်လည်း၊

နင်းကျိုဖန်သည် လှည့်ထွက်ကာ ထိုနေရာမှ ပျံသန်းထွက်ခွာသွားခဲ့ပြီ ဖြစ်သည်။

ကျူးရွှမ်းကျိနှင့် ကျိုးနုန်းယင်းတို့သည်လည်း ခပ်ပြုံးပြုံးဖြင့် နောက်မှ ပျံသန်းလိုက်ပါသွားကြတော့သည်။

ရွှေအမြုတေအဆင့် ကျင့်ကြံသူ သုံးဦးသည် နင်းကျော့၏ အမြင်အာရုံမှ ပျောက်ကွယ်သွားသောအခါမှသာ သူသည် သက်ပြင်းတစ်ချက်ကို ခပ်ဖွဖွ ချလိုက်နိုင်တော့သည်။

ဤကဲ့သို့သော မြင်ကွင်းမျိုး ဖြစ်လာလိမ့်မည်ဟု သူ ကြိုတင်တွေးဆထားပြီးသား ဖြစ်သည်။

စွန်းလင်ထုံ၏ သတိပေးချက်မှာ အလွန်ပင် ယုတ္တိရှိပေသည်။

တကယ်လို့ စောစောပိုင်းက သူသည် ‘အကောင်းဆုံးသော တရားသည် ရေကဲ့သို့ ဖြစ်ခြင်း’ ရတနာ သုံးစက်ကို ဒဏ်ရာပြင်းထန်သူများ ကုသဆောင်တွင် အသုံးပြုခဲ့မည်ဆိုပါက၊ ထိုရွှေအမြုတေအဆင့် ကျင့်ကြံသူ သုံးဦးသည် သူ့အပေါ်တွင် စောင့်ကြည့်မှု နည်းလမ်းသစ်များကို ချက်ချင်းပင် ထပ်မံလုပ်ဆောင်ကြပေလိမ့်မည်။

နင်းကျော့သည် အစီအရင် လက်ကိုင်ပုဝါနှင့် အထွတ်အထိပ်အဆင့် ကျောက်စိမ်းတုံးကို သူ၏ သိုလှောင်မှုခါးပတ်ထဲသို့ သိမ်းဆည်းလိုက်သည်။

အခါတိုင်းတွင် သူသည် ရွှေအမြုတေအဆင့် ဘိုးဘေးများထံမှ အကျိုးအမြတ်အချို့ကို အမြဲတမ်း ရရှိတတ်သည်ဟု ဆိုရပေမည်။

ထိုသို့ဖြစ်ရခြင်း၏ အကြောင်းရင်းကို သူ ကောင်းစွာ နားလည်ထားသည်။

“ငါ ပြသခဲ့တဲ့ အလားအလာနဲ့ စွမ်းဆောင်ရည်တွေကြောင့် အနာဂတ်ရဲ့ မီးလျှံတောင် မသေမျိုးမြို့တော်မှာ ငါဟာ နေရာတစ်နေရာ ရလာလိမ့်မယ်လို့ ရွှေအမြုတေအဆင့် ဘိုးဘေးတွေက ယုံကြည်နေကြတာပဲ”

“ငါ့ကို ရင်းနှီးမြှုပ်နှံချင်တာပဲဖြစ်ဖြစ်၊ နင်းမျိုးနွယ်စုအတွင်း ပဋိပက္ခတွေဖြစ်အောင် သွေးထိုးပေးပြီး မျိုးနွယ်စုကို နှိမ်ချချင်တာပဲဖြစ်ဖြစ်၊ သူတို့အားလုံးက ငါ့ကို အခုလို အညှောက်ပေါက်ခါစ အခြေအနေမှာတင် ဆွဲဆောင်ထားချင်ကြတာပဲ”

“ဘာပဲဖြစ်ဖြစ် ဒီအခြေအနေမှာ ငါ့ကို ဆွဲဆောင်ရတာက ကုန်ကျစရိတ် အသက်သာဆုံးပဲ မဟုတ်လား။ ငါ အခြေခံအုတ်မြစ်တည်ဆောက်ခြင်း အဆင့်ကို ရောက်သွားပြီဆိုရင်တော့ အခြေအနေတွေက တမျိုးပြောင်းသွားမှာပဲ”

နင်းကျော့သည် သူ၏ နေအိမ်သို့ ပြန်လာခဲ့သည်။

မမျှော်လင့်ဘဲ သူ၏ အိပ်ရာခေါင်းရင်းတွင် ကျောက်စိမ်းပြား တစ်ပြားကို ထပ်မံတွေ့ရှိလိုက်ရသည်။

ယင်းကို စစ်ဆေးဖတ်ရှုကြည့်လိုက်သောအခါ ထိုကျောက်စိမ်းပြားမှာ နင်းကျိုဖန်ထံမှ လာခြင်းဖြစ်ကြောင်း သိလိုက်ရသည်။

ထိုကျောက်စိမ်းပြားထဲတွင် နင်းကျိုဖန်က နင်းကျော့အတွက် သီးသန့် စာသားတစ်ခု ချန်ထားခဲ့သည်။

၎င်းမှာ နင်းမျိုးနွယ်စု၏ အဆောင်လက်ဖွဲ့များအပေါ် သူ၏ ကိုယ်ပိုင်မှတ်စုများဖြစ်ပြီး၊ နင်းကျော့အား တိတ်တဆိတ် ဖတ်ရှုလေ့လာရန်နှင့် မလိုအပ်သော စကားများကို မပြောရန် မှာကြားထားခြင်းပင် ဖြစ်သည်။

နင်းကျိုဖန်၏ ဆိုလိုရင်းကို နင်းကျော့ နားလည်လိုက်သည်။

တစ်ဖက်တွင်မူ သူသည် ကျူးရွှမ်းကျိနှင့် ကျိုးနုန်းယင်းတို့၏ ရှေ့တွင် သူ၏ သိက္ခာကို ထိန်းသိမ်းခဲ့ရသဖြင့် နင်းကျော့ကို တိုက်ရိုက် ဆုမချနိုင်ခဲ့သောကြောင့် ဤကျောက်စိမ်းပြားဖြင့် ပြန်လည်ပေးဆပ်ခြင်း ဖြစ်သည်။

အခြားတစ်ဖက်တွင်မူ နင်းကျော့သည် ဤအခြေအနေကို အခွင့်ကောင်းယူကာ ဤကျောက်စိမ်းပြားအကြောင်းကို လူသိရှင်ကြား ကြွားဝါပြီး နင်းမျိုးနွယ်စုအတွင်း သူ၏ ဂုဏ်သိက္ခာကို မြှင့်တင်မည်ကိုလည်း သူ စိုးရိမ်နေခြင်း ဖြစ်သည်။

နင်းကျိုဖန်၏ စိုးရိမ်မှုမှာလည်း မမှားပေ။

တကယ်လို့ နင်းကျိုဖန်က ထိုကဲ့သို့ သီးသန့် မှာကြားထားခြင်း မရှိခဲ့ပါက နင်းကျော့သည် အမှန်တကယ်ပင် ထိုသို့ လုပ်ဆောင်ရန် ရည်ရွယ်ထားခဲ့ခြင်း ဖြစ်သည်။

နင်းကျော့သည် ထိုကျောက်စိမ်းပြားကို သိမ်းဆည်းလိုက်သည်။

ယင်းမှာ အလွန်တန်ဖိုးရှိသော ပစ္စည်းဖြစ်သော်လည်း လက်ရှိတွင်မူ သူ့၌ ယင်းကို လေ့လာရန် အချိန်ရော စွမ်းအင်ပါ မရှိသေးချေ။