အခန်း (၃၇၀-၃၇၂)

အခန်း (၃၇၀) - ဝမ်ကွေ့ရှင်း၏ စွမ်းရည်ကြောင့် အားလုံး တုန်လှုပ်သွားခြင်း (၃)

ထို့နောက် သူမသည် သူမ၏ ဒုတိယမြောက် စွမ်းရည်အကြောင်းကို စတင်ပြောပြတော့သည်။

ဤဒုတိယစွမ်းရည်မှာ သူမ၏ အဆိုးရွားဆုံးသော စွမ်းရည်ဖြစ်ပြီး စူးစမ်းရှာဖွေသူ အဖွဲ့ဝင်အားလုံးကို ဆွံ့အသွားစေခဲ့သည်။

သူမ၏ ဖော်ပြချက်အရ သူမ၏ တစ်ကိုယ်လုံးကို စိတ်ပိုင်းဆိုင်ရာ အဆိပ်အတောက် တစ်မျိုးဖြင့် ဖုံးလွှမ်းထားပြီး၊ သူမ ထိတွေ့လိုက်သော မည်သည့်လက်နက် ကိရိယာမဆို ထိုစိတ်ပိုင်းဆိုင်ရာ အဆိပ်၏ ကူးစက်ခြင်းကို တဖြည်းဖြည်း ခံရမည်ဖြစ်သည်။

ဤစိတ်ပိုင်းဆိုင်ရာ အဆိပ်လွှာသည် ထိတွေ့မှုမှတစ်ဆင့် ပြန့်နှံ့သွားကာ တစ်ဖက်လူကို တိုက်ရိုက်ကူးစက်စေပြီးနောက်...

အဆိပ်အပြည့်အဝ စိမ့်ဝင်သွားသည်နှင့် တစ်ပြိုင်နက် ထိုသူမှာ သူမ၏ ရုပ်သေးရုပ် ဖြစ်သွားတော့သည်။

သူမ၏ အမိန့်ပေးသမျှကို လုံးဝနာခံရမည့် အခြေအနေသို့ ရောက်ရှိသွားခြင်းပင်။

"ရှူးးး.."

ရွှီရှင်း ချက်ချင်းပင် အသက်ရှူမှားသွားရသည်။

ဧကရီ ဆိုတာ ဒါကို ဆိုလိုတာလား။

တစ်ဖက်လူရဲ့ စိတ်ကို လွှမ်းမိုးပြီး ထိန်းချုပ်တာပေါ့။

သို့သော် ဤအရာမှာ အလွန်ဆုံး အချက်မဟုတ်သေးပေ။

အဆိုးရွားဆုံး အချက်မှာရုပ်သေးရုပ်အဖြစ် ထိန်းချုပ်ခံထားရသော သတ္တဝါများ၏ ခန္ဓာကိုယ်မှ ထွက်သော အရည်များတွင်လည်း ဤအဆိပ်အတောက်များ ပါဝင်နေခြင်း ဖြစ်သည်။

အကယ်၍ အခြားသတ္တဝါတစ်ကောင်က ၎င်းကို တိုက်ခိုက်၍ ဒဏ်ရာရစေခဲ့ပါက၊ ၎င်း၏ ကိုယ်ရည်များသည် တိုက်ခိုက်သူနှင့် ထိတွေ့မိကာ ထိုသတ္တဝါကိုပါ ထပ်မံကူးစက်သွားစေပြီး သူမ၏ ထိန်းချုပ်မှုအောက်က ရုပ်သေးရုပ် ဖြစ်သွားစေပြန်သည်။

ရွှီရှင်း ထိုမြင်ကွင်းကို စိတ်ကူးကြည့်လိုက်ရင်း ရုတ်တရက် အသက်ဝဝ ရှူလိုက်မိသည်။

မဆန်းတော့ချေ၊ သူမ ဘာလို့ မိစ္ဆာကောင်တွေရဲ့ အရေအတွက်ကို ဂရုမစိုက်ဘူးလို့ ပြောခဲ့တာလဲဆိုတာ မဆန်းတော့ချေ။

အရေအတွက် များလေလေ၊ သူမအတွက် ပိုလွယ်လေလေ ဖြစ်နေတာကိုး။

ကူးစက်ခံထားရတဲ့ သားရဲတစ်ကောင်က တခြားသားရဲတွေကို သွားတိုက်ခိုက်လိုက်ရုံနဲ့တင်၊ သိပ်မကြာခင်မှာ သားရဲအုပ်စုတစ်ခုလုံးဟာ စိတ်ပိုင်းဆိုင်ရာ အဆိပ်တွေ ကူးစက်ခံရပြီး သူမရဲ့ ရုပ်သေးရုပ်တွေ ဖြစ်ကုန်တော့မှာ မဟုတ်ပါလား။

ချင်ယွမ်လုံ : "ဒါကြောင့်ကိုး ဒါကြောင့် နင်က ငါတို့ကို အရင်က အထိမခံခဲ့တာပဲ။ လက်ဆွဲနှုတ်ဆက်ဖို့တောင် ငြင်းခဲ့တာက ဒါကြောင့်လား"

ဝမ်ကွေ့ရှင်း : "နင်တို့ကို ရုပ်သေးရုပ်တွေ မဖြစ်စေချင်လို့ပါ"

ချင်ယွမ်ဟု: "ငါပြောသားပဲ၊ မင်းက တိုက်ခိုက်ရင်လည်း တစ်ချက်တည်းနဲ့ သေအောင်ကန်တာ ဒါမှမဟုတ် ဘာမှမလုပ်တာက ငါတို့ မင်းရဲ့စွမ်းရည်ကို သိသွားမှာ စိုးလို့ပဲ"

ကျိချောင်းယန် : "ဒီအဆိပ်က ပြိုင်ဘက်ကို အမြဲတမ်း ထိန်းချုပ်ထားနိုင်တာလား"

ဝမ်ကွေ့ရှင်း : "မရပါဘူး။ မဟုတ်ရင် ဒါကို အဆိပ်လို့ ခေါ်မှာ မဟုတ်ဘူးလေ။ အဆိပ်အပြည့်အဝ စိမ့်ဝင်သွားတဲ့ သတ္တဝါတွေဟာ သိပ်မကြာခင်မှာပဲ အားအင်ကုန်ခမ်းသွားတတ်တယ်။ သူတို့ရဲ့ စွမ်းအားတွေ ကုန်သွားတဲ့အခါ အဆိပ်ရဲ့ တိုက်စားမှုကို မခံနိုင်တော့ဘဲ သေဆုံးသွားကြတာပဲ။ ဒါ့အပြင် အားကုန်ပြီး သေသွားတဲ့ သတ္တဝါတွေဟာ ရုပ်ကြွင်းခြောက်ကြီးတွေ ဖြစ်သွားတတ်သလို၊ အပင်တွေဆိုရင်လည်း လုံးဝ ညှိုးနွမ်းသွားတာမျိုးပါ။ အဲဒါကြောင့် များသောအားဖြင့်တော့ သူတို့ အားမကုန်ခင်မှာပဲ ကုန်ကြမ်းအချို့ ကျန်ရစ်အောင် ကိုယ့်ကိုယ်ကိုယ် သတ်သေခိုင်းလိုက်လေ့ ရှိတယ်"

စူးစမ်းရှာဖွေသူ အဖွဲ့ဝင်အားလုံး တိတ်ဆိတ်သွားကြသည်။

ရွှီရှင်းသည် သူ၏ နဖူးပေါ်မှ အေးစိမ့်သော ချွေးများကို သုတ်လိုက်မိ၏။

ဤအမျိုးသမီးမှာ အမှန်တကယ်ပင် အသန်မာဆုံး တိုက်ခိုက်ရေးသမား ဖြစ်ပေသည်။

သားရဲအုပ်စုကို အဆိပ်ဖြင့် ထိန်းချုပ်နိုင်ရုံတင်မကဘဲ အုပ်စုအတွင်းသို့ပါ တိုက်ရိုက် ကူးစက်ပြန့်နှံ့စေနိုင်သည် မဟုတ်ပါလား။

ကူးစက်ခံရသော သားရဲများကို သားရဲအုပ်စုအား ပြန်လည်တိုက်ခိုက်ခိုင်းမည်၊ သားရဲအုပ်စုက ပြန်လည်ခုခံလိုက်သည်နှင့် သူတို့ပါ အဆိပ်ကူးကာ ရုပ်သေးရုပ် ဖြစ်ကုန်ကြမည်။

ဒါ့အပြင် သူမ၏ ကိုယ်လက်ကြံ့ခိုင်မှုကလည်း အလွန်သန်မာလှပေသည်။

သားရဲအုပ်စုကို အဝေးကနေ ထိန်းချုပ်နေနိုင်စေကာမူ၊ ရန်သူက သူမအား လာရောက်တိုက်ခိုက်မည်ကို မကြောက်သည့်အပြင် သားရဲအုပ်စုထဲသို့ပင် ကိုယ်တိုင် တိုက်ရိုက် ခြေချနိုင်စွမ်း ရှိပေသည်။

မှန်ပါသည်၊ သူမ၏ စွမ်းရည်မှာ အနိုင်မတိုက်နိုင်သော အရာတော့ မဟုတ်ပေ။

အကယ်၍ ပြိုင်ဘက်က အဝေးမှနေ၍ တိုက်ခိုက်နိုင်မည်ဆိုလျှင်၊ သူမ၏ စိတ်ပိုင်းဆိုင်ရာ အဆိပ် ကူးစက်ခံထားရသော သတ္တဝါများကို သူတို့၏ သွေးများနှင့် မထိတွေ့ဘဲ တိုက်ရိုက် သတ်ဖြတ်နိုင်မည်ဆိုလျှင်တော့ သက်ရောက်မှု ရှိမည်မဟုတ်ပေ။

သို့သော် ပြဿနာတစ်ခု ရှိသည်။

ပထမဦးစွာ ပြိုင်ဘက်အနေဖြင့် သူမ၏ စွမ်းရည်အကြောင်းကို သိထားရမည် ဖြစ်သလို၊ သိထားလျှင်တောင်မှ ဘယ်သားရဲက သူမ၏ ထိန်းချုပ်မှုအောက်မှာ ရှိနေသလဲဆိုသည်ကို မည်သူက သိနိုင်မည်နည်း။

ဤစွမ်းရည်မှာ အုပ်စုလိုက် တိုက်ပွဲများတွင် လုံးဝကို အဖြေရှာမရနိုင်သော စွမ်းရည်ပင် ဖြစ်၏။

စိတ်ပိုင်းဆိုင်ရာ အဆိပ်က တစ်ဦးချင်းစီအပေါ် မည်မျှအထိ အစွမ်းထက်သလဲဆိုသည်ကိုတော့ မည်သူမျှ မသိကြပါပေ။

သူမ ပြောပြချက်အရ အဆိပ်အပြည့်အဝ စိမ့်ဝင်မှသာ ထိန်းချုပ်နိုင်မည်ဟု ဆိုသော်လည်း၊ ထိုသို့ အပြည့်အဝ စိမ့်ဝင်ရန် မည်မျှကြာမည်ကိုတော့ မသိရသေးပါပေ။

သုံးထပ် သစ်ပင်အိမ်အတွင်း၌ ဝမ်ကွေ့ရှင်းသည် ဆိုဖာပေါ်တွင် ထိုင်ရင်း အခြားသူများ၏ တုံ့ပြန်မှုကို စိုးရိမ်တကြီး စောင့်ကြည့်နေရှာသည်။

အုပ်စုထဲတွင် မည်သူမျှ စကားမပြောကြသည်ကို မြင်ရသောအခါ ဝမ်ကွေ့ရှင်း၏ မျက်ဝန်းများမှာ အနည်းငယ် မှေးမှိန်သွားရ၏။

သူမသည် နှုတ်ခမ်းကို တင်းတင်းစေ့ထားရင်း စိတ်ပျက်လက်ပျက်ဖြင့် ရေရွတ်လိုက်သည်။

"ငါ သိသားပဲ ငါ့စွမ်းရည်တွေအကြောင်းကို မပြောခဲ့သင့်ဘူး"

သေချာပါသည်၊ ဤလူများသည် သူမ၏ စွမ်းရည်ကို ကြောက်ရွံ့သွားကြပြီး သူမနှင့် ရင်းရင်းနှီးနှီး မပေါင်းချင်ကြတော့ဟု သူမ ထင်နေခြင်းပင်။

သူမကလည်း ဒီလိုမျိုး ဖြစ်ချင်နေခဲ့တာမှ မဟုတ်တာပဲလေ။

အခန်း ၃၇၀ ပြီး။

အပိုင်း (၃၇၁) - အရာအားလုံး အဆင်သင့်ဖြစ်ပြီ။ ကပ်ပါးညောင်ပင်

စူးစမ်းရှာဖွေသူ အဖွဲ့ဝင်များထဲမှ မည်သူမျှ ထိုကဲ့သို့သော အတွေးမျိုး မရှိကြပါပေ။

သို့သော် လုံးဝ မကြောက်ကြဘူးဟု ပြောလျှင်လည်း အနည်းငယ် လွန်ရာရောက်ပေလိမ့်မည်။

ဘာပဲဖြစ်ဖြစ် တစ်ကိုယ်လုံး အဆိပ်တွေနှင့် ပြည့်နေပြီး စိတ်ကို စိတ်ကြိုက် ထိန်းချုပ်နိုင်သူတစ်ယောက်နှင့်တော့ လူတိုင်းက အနည်းငယ် အကွာအဝေးတစ်ခု ထားချင်ကြသည်မှာ ဓမ္မတာပင် မဟုတ်ပါလား။

သို့သော် သူမက အားလုံးကို ပွင့်ပွင့်လင်းလင်း ဖွင့်ဟပြောပြခဲ့ပြီးပြီဖြစ်ရာ ကိစ္စမရှိတော့ပါပေ။

ဤနေရာတွင် ရှိနေသူများထဲတွင် မည်သူမျှ သာမန်လူ မဟုတ်ကြသည် မဟုတ်ပါလား။

"အရင်က ချင်ယွမ်လုံတို့ ညီအစ်ကိုကို အထိမခံတာ၊ လက်ဆွဲနှုတ်ဆက်ဖို့တောင် ငြင်းခဲ့တာက... နင်ကိုယ်တိုင်လည်း ဒီ စိတ်ပိုင်းဆိုင်ရာ အဆိပ် ထွက်လာတာကို မထိန်းချုပ်နိုင်လို့လား" ဟု ရွှီရှင်းက ဝင်မေးလိုက်သည်။

ဝမ်ကွေ့ရှင်းသည် ပါးစပ်အဟောင်းသားနှင့် ရွှီရှင်းကို ကြည့်ကာ ခေတ္တမျှ တုံ့ဆိုင်းနေပြီးမှ အမှန်အတိုင်း ဝန်ခံလိုက်သည်။

"...ဟုတ်ပါတယ်၊ အခုလောလောဆယ် ကျွန်မ မတတ်နိုင်သေးဘူး။ ကျွန်မရဲ့ တစ်ကိုယ်လုံးမှာ ဒီအဆိပ်တွေ ပြည့်နေတာမို့လို့၊ အဆိပ်ထုတ်တာ ဒါမှမဟုတ် ပြန်ရုပ်သိမ်းတာကို ထိန်းချုပ်လို့မရသေးဘူး"

လီဝမ်ရှီး : "ဟူး... ဒါဆိုရင် တခြားသူတွေနဲ့ ထိတွေ့ဆက်ဆံလို့ မရတော့ဘူးပေါ့..."

ကျိချောင်းယန် : "ခုနက ချင်ယွမ်လုံ ပြောတာတော့ နင်က တခြားနယ်မြေက ရှင်ကျန်သူတွေကို အထိမခံဘူး၊ ဒါမှမဟုတ် တစ်ချက်တည်းနဲ့ သတ်ပစ်လိုက်တယ်ဆိုပဲ။ မင်းရဲ့ စွမ်းရည်က ရှင်ကျန်သူတွေအပေါ်မှာလည်း တကယ်ပဲ သက်ရောက်မှု ရှိတာလား"

"...အင်း၊ သက်ရောက်မှု ရှိပါတယ်" ဟု ဝမ်ကွေ့ရှင်းက ပြန်ဖြေသည်။

"ကျွန်မ အရင်က ပြောပြဖူးသလိုပါပဲ၊ ကာကွယ်ရေးဇုန်တွေ စတင်ချိတ်ဆက်တဲ့ ပထမဆုံးနေ့မှာပဲ အဲဒီရှင်ကျန်သူနဲ့ ဆုံခဲ့တာ။ သူက မသမာတဲ့ စိတ်နဲ့ ကျွန်မကို သစ်ပင်အိမ်ထဲ ဖိတ်ခေါ်ခဲ့တဲ့သူလေ။ သူက ကျွန်မ ဒီကမ္ဘာကို ရောက်လာပြီးနောက်ပိုင်း ပထမဆုံး ဆုံဖူးတဲ့ လူသားပဲ"

ရွှီရှင်း ဤဖြစ်ရပ်ကို သေချာပေါက် မှတ်မိနေပါသည်။

ဝမ်ကွေ့ရှင်းသည် သူတို့ထဲတွင် လူသတ်ခဲ့ဖူးကြောင်း ပထမဆုံး ဝန်ခံခဲ့သူဖြစ်သဖြင့် သူ့ကို အမှတ်ရစရာ ဖြစ်စေခဲ့ခြင်းပင်။

"အဲဒီလူက စကားတွေကို ရိုင်းရိုင်းစိုင်းစိုင်း ပြောပြီး ကျွန်မကို လက်ဆွဲဖို့ ကြိုးစားခဲ့တာ။ အဲဒီတုန်းက ကျွန်မကလည်း ဒါဟာ စမ်းသပ်ဖို့ အခွင့်အရေးကောင်းပဲလို့ တွေးလိုက်မိတယ်။ ဒါနဲ့ သူ့ကို ကျွန်မလက်ကို ဆွဲခွင့်ပြုလိုက်တာ... သူ ချက်ချင်းပဲ ကူးစက်ခံလိုက်ရတာပဲ"

လက်ကလေး ဆွဲလိုက်ရုံနဲ့တင် ရှင်ကျန်သူတစ်ယောက်ကို ကူးစက်စေနိုင်တာလား။

"ကူးစက်ဖို့ ဘယ်လောက်ကြာလဲ။ အချိန်အများကြီး ပေးရလား"

ရွှီရှင်းက ထပ်မံ စုံစမ်းလိုက်သည်။

အခြားသူများ သူမကို ကြောက်ရွံ့မှု လျော့နည်းသွားစေရန် ဝမ်ကွေ့ရှင်းက စိတ်ရှည်လက်ရှည် ရှင်းပြပေးရှာသည်။

"သာမန်သားရဲတွေဆိုရင် ထိတွေ့လိုက်တာနဲ့ ချက်ချင်း ကူးစက်တာပါ။ ဗီဇပြောင်းသတ္တဝါတွေဆိုရင်တော့ နှစ်စက္ကန့်လောက် ကြာတတ်တယ်။ ဒါပေမဲ့ ရှင်ကျန်သူတစ်ယောက်ဆိုရင်တော့သူက အော်ဟစ်ပြီး ကျွန်မလက်ကို လွှတ်လိုက်ပြီးတဲ့နောက်မှာ မြေပြင်ပေါ်မှာ လူးလိမ့်ပြီး တစ်မိနစ်ကျော်လောက် ရုန်းကန်နေခဲ့ရတယ်။ အဲဒီနောက်မှ စိတ်ပိုင်းဆိုင်ရာ အဆိပ်က သူ့ကို လုံးဝဝါးမျိုသွားပြီး အမိန့်ပေးသမျှ နာခံရတဲ့ ရုပ်သေးရုပ် ဖြစ်သွားတာပါ"

သူမ၏ ရှင်းပြချက်အရ တစ်မိနစ်ကျော် ကြာသည်ဟု ဆိုသော်လည်း၊ တကယ်တမ်း ထိတွေ့ခဲ့သည့် အချိန်မှာ လက်ဆွဲနှုတ်ဆက်လိုက်သည့် ခဏလေးသာ ဖြစ်ပေသည်။

သူမကတော့ တကယ့်ကို တစ်ကိုယ်လုံး အဆိပ်တွေနဲ့ပါလား။

လက်ဆွဲလိုက်ရုံနဲ့တင် ကူးစက်သွားတာ ဖြစ်သလို၊ ဒါက သူမက တမင်တကာ ကူးစက်အောင် လုပ်တာတောင် မဟုတ်ပါပေ။

အကယ်၍ သူမက ကူးစက်အောင် မလုပ်ချင်ဘူးဆိုဦးတော့၊ မတော်တဆ တစ်စုံတစ်ယောက်ကို ထိမိလိုက်ရင်ပင်။

သူမရဲ့ စွမ်းအားက ဧကရီ ထက် စုန်းမ တစ်ယောက်နဲ့ ပိုတူနေသလိုပင်။

ကံကောင်းသည်မှာ ဤအဖွဲ့ထဲက လူတိုင်းမှာ ထူးခြားသော ကိုယ်ပိုင်စွမ်းရည်များ ရှိကြသူများဖြစ်သဖြင့် ထူးခြားဆန်းပြားသော စွမ်းအားများအပေါ် နားလည်ပေးနိုင်ကြခြင်းပင် ဖြစ်သည်။

မဟုတ်ပါက သူမကို သေချာပေါက် ဝေးဝေးက ရှောင်ကြပေလိမ့်မည်။

အနည်းငယ်မျှ သတိမထားမိဘူးဟု ပြောလျှင် လိမ်ရာရောက်ပါလိမ့်မည်။

ထိတွေ့ရုံနှင့် ကိုယ့်ကို ထိန်းချုပ်နိုင်သူတစ်ယောက်နှင့် ဆိုလျှင်တော့ မည်သူမဆို သတိထားမိကြမည် မဟုတ်ပါလား။

ကျောက်ရှောင်ချွမ်း : "...ဒီကူးစက်မှုက ပြန်ပြင်လို့ မရဘူးလားဗျာ။ အကယ်၍ မတော်တဆ ထိမိရင် ဘယ်လိုလုပ်မလဲ..."

ဝမ်ကွေ့ရှင်းက အမြန်ပင် ပြန်ရှင်းပြသည်။

"ပြင်လို့ရပါတယ်၊ ပြင်လို့ရပါတယ်။ ငါက ဒီစိတ်ပိုင်းဆိုင်ရာ အဆိပ်အတွက် ဖြေဆေး ဖန်တီးလို့ ရပါတယ်။ အဆိပ်အပြည့်အဝ စိမ့်ဝင်သွားရင်တောင်မှ၊ အသက်မကုန်ခင်မှာ ဖြေဆေး သောက်လိုက်မယ်ဆိုရင် အဆင်ပြေပါတယ်။ ဒါ့အပြင် ဖေးအစ်မရဲ့ ဆေးလုံးတွေကလည်း ငါ့ရဲ့ အဆိပ်ကို ခုခံနိုင်ကောင်း ခုခံနိုင်မှာပါ။ ဒါကြောင့် အားလုံး အရမ်းကြီး မကြောက်ကြပါနဲ့။ မတော်တဆ ထိမိရင်တောင် ဖြေဆေး ရှိပါတယ်"

ထိုသို့ ပြောပြီးနောက် သူမသည် အဖွဲ့ဝင်အားလုံးထံသို့ ဖြေဆေးတစ်ခုစီ လွှဲပေးလိုက်တော့သည်။

ရွှီရှင်း လဲလှယ်မှုကို လက်ခံလိုက်ရာ ရေပြာရောင် သလင်းကျောက်လေးတစ်ခု သူ၏လက်ထဲတွင် ပေါ်လာခဲ့၏။

[ဧကရီ၏ မျက်ရည် (အပြာရောငါအဆင့်): ခန္ဓာကိုယ်အတွင်းရှိ စိတ်ပိုင်းဆိုင်ရာ အဆိပ်အတောက်များကို ဖယ်ရှားပေးနိုင်ပြီး ဧကရီ၏ စိတ်ထိန်းချုပ်မှုကို ပြေပျောက်စေသည်။ စိတ်ပိုင်းဆိုင်ရာ အဆိပ်သည် စိတ်ဝိညာဉ်နှင့် အသက်စွမ်းအားကို ကြီးမားစွာ ထိခိုက်စေသဖြင့် အဆိပ်အပြည့်အဝ မစိမ့်ဝင်မီ သောက်သုံးခြင်းက အကောင်းဆုံးဖြစ်သည်။]

လီဝမ်ရှီး : "ကွေ့ရှင်းအစ်မ... ဒါက တကယ်ပဲ အစ်မရဲ့ မျက်ရည်တွေလား"

ဝမ်ကွေ့ရှင်း : "မဟုတ်ပါဘူး၊ အဲဒါက နာမည်ပေးထားတာပါ။ တကယ်တော့ အပြာရောင်အဆင့် သွေးတိတ်ဆေးပင်တွေနဲ့ လုပ်ထားတာပါ"

ချီရွှယ်ဖေး : "အခုမှပဲ သဘောပေါက်တော့တယ်။ မနေ့က ငါ့ဆီမှာ အပြာရောင်အဆင့် သွေးတိတ်ဆေးပင်တွေ အများကြီး လာတောင်းတာက ဒီဖြေဆေး လုပ်ဖို့ကိုး"

ဝမ်ကွေ့ရှင်း : "မနေ့က ချင်ယွမ်လုံတို့နဲ့ အပြင်မှာ ဆုံခဲ့ကြတာ မဟုတ်လား။ မတော်တဆ ထိမိတာမျိုး ဖြစ်လာရင် အဆင်သင့်ဖြစ်အောင် ကြိုပြင်ထားရတာပါ။ ကဲ... အားလုံးပဲ၊ ကျွန်မရဲ့ ဖြေဆေးကိုလည်း ပေးထားပြီးပြီဆိုတော့ ကျွန်မကိုတော့ ဝိုင်းပြီး မဖယ်ကျဉ်ကြနဲ့ဦးနော်"

ဝမ်လေ့ : "ဖြေဆေးရှိမှတော့ ဘာကြောက်စရာ ရှိလဲဗျာ။ ဒါနဲ့ တစ်ခုမေးပါရစေ၊ ထိန်းချုပ်ခံလိုက်ရတဲ့ အချိန်မှာ ကိုယ့်ရဲ့ အသိစိတ်ကရော ကျန်သေးလား"

ဝမ်ကွေ့ရှင်း : "မကျန်လောက်ဘူး ထင်တယ်၊ ငါလည်း သေချာမသိဘူး။ ဒီဖြေဆေးကို တခြားသူတွေအပေါ်မှာ မစမ်းဖူးသေးလို့ပါ"

ချင်ယွမ်လုံ : "ဟားဟား၊ မနေ့ညက ငါနဲ့ ယွမ်ဟုတောင် ပြောနေကြသေးတာ။ မင်းက ငါတို့ကို အရမ်းသတိထားပြီး အထိမခံတာကြောင့် ယောက်ျားလေးတွေကို ကြောက်တဲ့ရောဂါ ရှိနေတာလားလို့တောင် ထင်မိသေးတယ်"

ဝမ်ကွေ့ရှင်း : "ဘာ ငါက ယောက်ျားတွေကို ကြောက်စရာလား"

ချင်ယွမ်လုံ : "ကဲ အားလုံးပဲ စိတ်ချကြပါ။ သူမရဲ့ စွမ်းရည်က အန္တရာယ်များတယ်ဆိုပေမဲ့ သူမနဲ့ ဆက်ဆံရတာကတော့ ပြဿနာမရှိပါဘူး။ ကြောက်နေစရာ မလိုပါဘူး။ သူမကိုယ်တိုင်ကလည်း အရမ်းသတိထားတတ်သူဆိုတော့ နှစ်ဖက်စလုံးက ဂရုစိုက်ရင် အဆင်ပြေမှာပါ"

ဝမ်ကွေ့ရှင်း : "ဝါး... နောက်ဆုံးတော့ ကျွန်မဘက်ကနေ ပြောပေးမယ့်သူ ပေါ်လာပြီ။ တကယ်ကို ဝမ်းသာလိုက်တာ"

ချင်ယွမ်လုံ: "ဝမ်းသာတယ်ဆိုရင်လည်း မနက်ဖြန် သားရဲလှိုင်းကျရင်တော့ အစွမ်းကုန် ကူညီပေးပါဦး"

ဝမ်ကွေ့ရှင်း : "အလိုလေး... ငါ့ကို ခိုင်းဖတ်အဖြစ်ပဲ သတ်မှတ်ထားတာလား"

လီဝမ်ရှီး : "ဒါပေမဲ့ ကွေ့ရှင်းအစ်မ သနားပါတယ်၊ တခြားသူတွေကို အထိမခံရဘူးဆိုတော့..."

ချီရွှယ်ဖေး : "ဒီစွမ်းရည်က နောင်ကျရင် ပိုပြီး အားကောင်းလာမှာပါ။ အဲဒီအချိန်ကျရင်တော့ စိတ်ကြိုက် ထိန်းချုပ်လို့ ရလာနိုင်ပါတယ်"

ဝမ်ကွေ့ရှင်း : "အဲဒီလိုပဲ မျှော်လင့်ရတာပေါ့..."

သူမ၏ စွမ်းရည်အပေါ် မည်သူမျှ ကဲ့ရဲ့ရှုံ့ချခြင်း မရှိသည်ကို မြင်ရသောအခါ ဝမ်ကွေ့ရှင်းသည် သက်ပြင်းလေးတစ်ချက် ချလိုက်ကာ စိတ်အေးသွားရှာလေတော့၏။

အခန်း ၃၇၁ ပြီး။

အခန်း (၃၇၂) - အရာအားလုံး အဆင်သင့်ဖြစ်ပြီ။ ကပ်ပါးညောင်ပင် (၂)

သူမ ဤစွမ်းရည်ကို စတင်ရရှိစဉ်က သူမကိုယ်တိုင်ပင် မှင်သက်သွားခဲ့ရသည်။

ထိုစဉ်က သူမသည် အနည်းငယ် ဘဝင်မြင့်နေခဲ့မိသည်။

ငယ်စဉ်ကတည်းက ကိုယ်ခံပညာ လေ့ကျင့်လာသူပီပီ စွမ်းအားကို ဆာလောင်မွတ်သိပ်ပြီး အရှုံးမပေးလိုသော စိတ်ဓာတ် ပြင်းထန်သူဖြစ်ရာ ဧကရီ ဆိုသော ဘွဲ့ထူးနှင့် စွမ်းရည်ကို ရရှိလိုက်သောအခါ သူမကိုယ်သူမ ကြီးကျယ်သော ကံကြမ္မာတစ်ခုကို ပိုင်ဆိုင်ထားသူဟုပင် ထင်မှတ်ခဲ့မိ၏။

သို့သော်လည်း တောအုပ်အတွင်း အမဲလိုက်ပွဲများတွင် ရွှီရှင်းနှင့် ကျိချောင်းယန်တို့က သူမကို သင်ခန်းစာ ပေးခဲ့ကြသည်။

သူမ၏ ကိုယ်ပိုင်နယ်မြေအတွင်းမှာပင် သူမထက် ပိုမိုမြင့်မားသော ရမှတ်များကို ရယူသွားကြသလို၊ ပွဲတိုင်းတွင်လည်း ထိုနှစ်ဦး၏ အရိပ်အောက်မှာသာ ရှိနေခဲ့ရသဖြင့် သူမသည် မိမိ၏ စွမ်းရည်များကို ပြန်လည် ဆန်းစစ်ကြည့်လာခဲ့ရသည်။

သူမသည် မိမိ၏ စွမ်းရည်ကိုပင် အနည်းငယ် အထင်သေးမိသွားခဲ့သေးသည်။

ဒါပေမဲ့ အခုကြည့်ရတာတော့ သူမက တကယ်ကို သန်မာနေဆဲပင်။

"ဒါနဲ့... ဖြေဆေးအပြင် တခြားတစ်ခုလည်း ငါ ဖန်တီးလို့ ရသေးတယ်"

ဝမ်ကွေ့ရှင်းသည် စူးစမ်းရှာဖွေသူ ချန်နယ်တွင် ဖန်တီးမှုပုံစံငယ်တစ်ခုကို တင်ပေးလိုက်၏။

[စိတ်ပိုင်းဆိုင်ရာ အဆိပ် (ခရမ်းရောင်အဆင့်): ရန်သူယူနစ်များကို ကူးစက်စေနိုင်သော အဆိပ်ဖြစ်ပြီး အပြည့်အဝ ကူးစက်သွားပါက ထိန်းချုပ်နိုင်မည်ဖြစ်သည်။ အဆင့်မြင့် ဗီဇပြောင်းသတ္တဝါ၏ သွေး ၁ ကီလိုဂရမ် လိုအပ်သည်။]

ရွှီရှင်း ဤပုံစံငယ်ကို မြင်လိုက်ရသောအခါ တုန်လှုပ်သွားရသည်။

ဤအဆိပ်ကို ဖန်တီး၍ ရနေခြင်းပင်။

သို့သော် လိုအပ်သော ကုန်ကြမ်းများမှာမူ...။

အရင်က ဝမ်လေ့တို့ လိုအပ်သော ကုန်ကြမ်းများမှာ ခရမ်းရောင်အဆင့်များ ဖြစ်သော်လည်း ရရှိရန် ခက်ခဲရုံမျှသာရှိပြီး အလွန်အမင်း ရှားပါးလှသည်တော့ မဟုတ်ပါပေ။

ဥပမာ - ခရမ်းရောင်အဆင့် သားရဲသားရေကို ရွှီရှင်းအနေဖြင့် အဆင့်နိမ့် ဗီဇပြောင်းသတ္တဝါများ၏ အလောင်းများမှတစ်ဆင့် ခွာယူနိုင်ခဲ့ဖူးသည်။

သို့သော် ဤစိတ်ပိုင်းဆိုင်ရာ အဆိပ်မှာမူ အဆင့်မြင့် ဗီဇပြောင်းသတ္တဝါ ၏ သွေးကို လိုအပ်နေခြင်း ဖြစ်၏။

အဆင့်မြင့် ဗီဇပြောင်းသတ္တဝါ..။

ဤစကားလုံးကို သူ နောက်ဆုံးကြားခဲ့ရသည်မှာ ချန်ယင်း မိသားစုနှင့် စကားပြောစဉ်က ဖြစ်သည်။

ချန်ယင်းက သူ၏ ဗီဇပြောင်းသားစာချုပ်ကို အဆင့်မြင့် ဗီဇပြောင်းသတ္တဝါ၏ သွေးကို မှင်အဖြစ်သုံး၍ ရေးဆွဲထားခြင်းဖြစ်ကြောင်း ပြောပြခဲ့ဖူးသည်။

ဒါ့အပြင် ချန်ယင်းက သူကိုယ်တိုင်ပင်လျှင် အဆင့်မြင့် ဗီဇပြောင်းသတ္တဝါများကို ယှဉ်နိုင်စွမ်းမရှိဘဲ ၎င်းတို့၏ တိုက်ခိုက်မှုအောက်တွင် မိမိကိုယ်ကိုယ် ကာကွယ်ရန် သို့မဟုတ် ထွက်ပြေးရန်သာ တတ်နိုင်ပြီး ဘေးကလူတွေကိုတောင် မကြည့်ရှုနိုင်ကြောင်း အသေအချာ ပြောခဲ့၏။

ဒါဟာ အဆင့်မြင့် ဗီဇပြောင်းသတ္တဝါတွေရဲ့ ဧရာမ စွမ်းအားကို ဖော်ပြနေခြင်းပင်။

မနက်ဖြန် ကျရောက်တော့မယ့် သားရဲလှိုင်းအကြောင်းကို တွေးမိရင်း ရွှီရှင်း စိုးရိမ်စိတ် တစ်ချက် ဝင်သွားသည်။

မနက်ဖြန်မှာ အဆင့်မြင့် ဗီဇပြောင်းသတ္တဝါတွေ ပေါ်လာမလား။

ဝမ်ကွေ့ရှင်း : "ကဲ... ငါ့စွမ်းရည်တွေကိုတော့ ဝေမျှပြီးပြီ။ ရွှီရှင်း၊ ကျိချောင်းယန်... နင်တို့အလှည့်ပဲ။ ငါ့ကို အမြဲကျော်တက်နေတဲ့ နင်တို့ရဲ့ စွမ်းရည်တွေက ဘာတွေလဲဆိုတာ တကယ်ကို သိချင်နေပြီ"

လီဝမ်ရှီး : "ကျွန်မကတော့ ကွေ့ရှင်းအစ်မရဲ့ စွမ်းရည်တွေက ပိုသန်မာတယ်လို့ ခံစားရတယ်..."

ချီရွှယ်ဖေး : "အမျိုးအစားချင်း မတူဘူးလေ။ နင်တို့ သတိထားမိလား၊ ငါတို့ဘက်မှာက အကုန်လုံး အထောက်အကူပြု စွမ်းရည်တွေချည်းပဲ။ သူတို့ဘက်မှာကျတော့ မိမိကိုယ်ကိုယ် မြှင့်တင်ပေးတဲ့ စွမ်းရည်တွေဖြစ်သလို၊ သူတို့ရဲ့ စွမ်းရည်အချို့ကို တခြားသူတွေဆီ ဝေမျှပေးနိုင်တဲ့ အထူးကိရိယာတွေကိုလည်း ဖန်တီးနိုင်ကြတယ်"

ကျိချောင်းယန် : "အတိအကျပဲ၊ ငါလည်း အဲဒါကို စဉ်းစားနေတာ"

ကြည့်ရသည်မှာ အားလုံးက သူနှင့် အယူအဆ တူနေကြပုံရသည်။

ရွှီရှင်းက သူ၏စွမ်းရည်များကို ဖွင့်ပြောရန် ပြင်ဆင်နေစဉ် ကျိချောင်းယန်က အရင်ဦးဆုံး စကားပြောလာခဲ့သည်။

သူ၏ နိမိတ်ဖတ်သူ စွမ်းရည်ကို ထုတ်ဖော်လိုက်ရာ တစ်ဖက်နယ်မြေရှိ လူများအားလုံး ချက်ချင်းပင် အံ့သြသွားကြတော့သည်။

"ချောင်းယန်အစ်ကိုကြီးကတော့ နာမည်နဲ့လိုက်အောင် တကယ်ကို တော်တာပဲဗျာ။ အနာဂတ် ဘေးအန္တရာယ်တွေကို ကြိုတင်ဟောကိန်းထုတ်နိုင်တာလား။ တကယ့်ကို စွမ်းအားကြီးတာပဲ"

ကျောက်ရှောင်ချွမ်းက မချီးကျူးဘဲ မနေနိုင်တော့ပေ။

ဝမ်ကွေ့ရှင်း : "မဆန်းတော့ပါဘူး၊ ရှင်က ဘာလို့ တခြားသူတွေ မသိတဲ့အရာတွေကို အမြဲကြိုသိနေရတာလဲဆိုတာ... ဒါက သတင်းအချက်အလက် အသာစီးရမှုပဲ"

ချင်ယွမ်ဟု : "နိမိတ်ဖတ်သူလား။ တကယ့်ကို ဆန်းကြယ်လှချေလား..."

ထို့နောက် ရွှီရှင်းကလည်း သူ၏ စွမ်းရည်များကို ထုတ်ဖော်ပြသလိုက်သည်။

သူသည် ဖန်တီးရှင် အခွင့်အာဏာ ဆိုသော စကားလုံးကိုတော့ ချန်လှပ်ထားခဲ့ပြီး လက်ရှိ သူပိုင်ဆိုင်ထားသော စွမ်းရည်သုံးခုဖြစ်သည့် ခွဲခြားစိတ်ဖြာခြင်း ၊ မြေပုံစွမ်းရည် နှင့် အဂ္ဂိရတ်ပညာ တို့ကိုသာ ပြောပြလိုက်၏။

ဝမ်လေ့ : "စွမ်းရည် သုံးခုတောင်လား။ဘုရားရေ ရှင်းအစ်ကိုကြီးကတော့ တကယ်ပဲ ကံအကောင်းဆုံး ရွေးချယ်ခံရသူများလား"

ချီရွှယ်ဖေး : "ငါ သိထားပြီးသားဆိုပေမဲ့၊ ထပ်ကြားရတာတောင် တကယ့်ကို အိမ်မက်လိုပဲ..."

ဝမ်ကွေ့ရှင်း : "စွမ်းရည် သုံးခုတောင်ရှိတာပဲ... ဒါပေမဲ့ နင်တို့ဘက်ကလူတွေက တကယ်ပဲ အထောက်အကူပြု အမျိုးအစားတွေချည်းပဲနော်"

လီဝမ်ရှီး : "ရွှီရှင်းရဲ့ စွမ်းရည်တွေကြောင့်သာ ငါတို့ လေးယောက်က အခုဆို အိမ်နီးနားချင်းတွေလို ဖြစ်နေပြီး စိတ်ကြိုက် သွားလည်လို့ ရနေတာလေ၊ ဟိဟိ"

ဝမ်ကွေ့ရှင်း : "ငါလည်း နင်တို့ဆီ လာလည်ချင်လိုက်တာ..."

ဤသို့ဖြင့် စူးစမ်းရှာဖွေသူ အဖွဲ့ဝင် ကိုးဦးစလုံးသည် သူတို့၏ စွမ်းရည်များကို အပြန်အလှန် ထုတ်ဖော်ပြသပြီးသွားကြပြီ ဖြစ်သည်။

အခြား ငါးဦး၏ စွမ်းရည်များကို သိရှိသွားရသဖြင့် ရွှီရှင်း စိတ်အေးသွားရ၏။

တည်နေရာ လမ်းညွှန်ချက် မရှိဘဲ တစ်ဦးနှင့်တစ်ဦး အမှန်တကယ် ပူးပေါင်းဆောင်ရွက်နိုင်ပါ့မလားဟု သူ အနည်းငယ် စိုးရိမ်နေခဲ့မိသည်။

အကယ်၍ အန္တရာယ်ကြုံလာပါက မှားယွင်းမှုဖြစ်နိုင်ခြေ မှာ အလွန်နည်းပါးလွန်းလှပေသည်။

ယခုကြည့်ရသည်မှာ သူတို့၏ တစ်ဦးချင်း စွမ်းရည်များမှာ အတော်လေး သိသိသာသာ အားကောင်းကြသဖြင့် ပူပန်စရာ သိပ်မရှိတော့ပါပေ။

ဒါ့အပြင် ပြဿနာတစ်ခုခု ရှိလာခဲ့လျှင်တောင် သူတို့ဘက်မှာ အလွန်စွမ်းအားကြီးတဲ့ ဧကရီ ရှိနေတာကြောင့် သူ သူတို့အတွက် စိုးရိမ်ပေးနေစရာ မလိုတော့ပေ။

အရာအားလုံး အဆင်သင့်ဖြစ်နေပြီဖြစ်ရာ မနက်ဖြန် ကျရောက်တော့မည့် ဘေးအန္တရာယ်ကိုသာ စောင့်ဆိုင်းရန် ကျန်တော့သည်။

ပြင်ဆင်မှုအားလုံး ပြည့်စုံနေသဖြင့် ဘာပြဿနာမှ ရှိမည်မဟုတ်ချေ။

စိတ်အေးသွားသဖြင့် ရွှီရှင်းသည် ဆိုဖာပေါ်တွင် မှီချလိုက်ရင်း မျက်နှာကျက်ကို မော့ကြည့်လိုက်မိသည်။

ဪ... ဟုတ်သားပဲ၊ ကျိချောင်းယန်ဆီ သွားပြီး သူ့ရဲ့ ပင်မသစ်ပင်အိမ်နဲ့ မချိတ်ထားတဲ့ ညောင်ပင်ကို ပြောင်းရွှေ့စိုက်လို့ ရမလားဆိုတာ သွားကြည့်ရဦးမယ်။

သူ ကျိချောင်းယန်ထံသို့ မက်ဆေ့ခ်ျ ပို့လိုက်ပြီးနောက် သစ်ပင်အိမ်ပေါ်မှ ဆင်းလာခဲ့သည်။

သတ်မှတ်ထားသော တည်နေရာသို့ ရောက်သည်နှင့် ကျိချောင်းယန်၏ သစ်ပင်အိမ်ဆီသို့ နေရာကူးပြောင်းရေးတံခါးကို အသက်သွင်းလိုက်၏။

ချာချာလည်သွားသော ခံစားချက်နှင့်အတူ သူ မြေပြင်ပေါ်သို့ အခိုင်အမာ ခြေချလိုက်နိုင်ပြီး သူ၏ အကြည့်များမှာ ရှေ့ရှိ စိမ်းလန်းစိုပြည်နေသော ညောင်ပင်ကြီးထံသို့ ချက်ချင်း ကျရောက်သွားတော့သည်။

ဤညောင်ပင်မှာ ဂူထဲတွင်တွေ့ခဲ့သော ညောင်ပင်နှစ်ပင်နှင့် တစ်ပုံစံတည်း ဖြစ်ပြီး အပြာရောင်အဆင့် နှစ်ထပ် သစ်ပင်အိမ်အသေးစားလေးအဖြစ် ကျိချောင်းယန်၏ ပင်မသစ်ပင်အိမ်နှင့် မီတာ ငါးဆယ်ခန့်အကွာတွင် တစ်ပင်တည်း ထီးထီးကြီး ပေါက်နေခြင်း ဖြစ်၏။

သူ အနားသို့ လျှောက်သွားပြီး ညောင်ပင်ကို လက်ဖြင့် လှမ်းကိုင်လိုက်သည်။

[ကပ်ပါးညောင်ပင် (အပြာရောင်အဆင့်): သစ်ပင်အိမ်၏ အတွင်းခန်းနေရာကို တိုးချဲ့ပေးနိုင်ပြီး သစ်ပင်အိမ် အမြစ်များ၏ စွမ်းဆောင်ရည်ကို မြှင့်တင်ပေးနိုင်သော ကပ်ပါးညောင်ပင် ဖြစ်သည်။

ကပ်ပါးညောင်ပင်၏ ကြီးထွားနှုန်းမှာ အလွန်လျင်မြန်ပြီး ဆက်တိုက် ကြီးထွားနေမည် ဖြစ်သည်။

သစ်ပင်အိမ်နှင့် တစ်ခါ ချိတ်ဆက်မိသွားသည်နှင့် ၎င်းသည် အပြင်ဘက်သို့ အမြဲတမ်း တိုးထွက် ကြီးထွားလာမည်ဖြစ်ကာ သစ်ပင်အိမ်၏ အတွင်းခန်းနေရာကို တဖြည်းဖြည်း ကျယ်ပြန့်စေသလို၊ သစ်ပင်အိမ်၏ ကာကွယ်ရေး ဧရိယာကိုလည်း တဖြည်းဖြည်း တိုးချဲ့ပေးသွားမည် ဖြစ်သည်။

ပင်မသစ်ပင်အိမ်နှင့် မချိတ်ဆက်ထားသော ကပ်ပါးညောင်ပင်များသည် ကြီးထွားမှု ပြည့်စုံသွားပါက ဆက်လက် ကြီးထွားမည် မဟုတ်တော့ဘဲ၊ ၎င်းတို့ကို တူးဖော်၍ ပြောင်းရွှေ့စိုက်ပျိုးနိုင်သည်။]

ရွှီရှင်း၏ မျက်လုံးများ ရုတ်တရက် ဝင်းလက်သွားသည်။

တူးဖော်ပြီး ပြောင်းရွှေ့စိုက်လို့ ရတာပဲ။

ကျိချောင်းယန်သည် ရွှီရှင်း၏ မက်ဆေ့ခ်ျကို လက်ခံရရှိထားသဖြင့် သူ၏ သစ်ပင်အိမ်ပေါ်မှ ဆင်းလာကာ ရွှီရှင်းဘေးသို့ လျှောက်လာပြီး "ဘယ်လိုလဲ ပြောင်းစိုက်လို့ ရလား" ဟု မေးလိုက်၏။

ရွှီရှင်း ပြုံးပြလိုက်သည်။

"ရတာပေါ့၊ ပင်မသစ်ပင်အိမ်နဲ့ မချိတ်ထားသရွေ့တော့ ပြောင်းစိုက်လို့ ရတယ်"

တူးဖော်လိုက်ပြီးလျှင် ညောင်ပင်မျိုးစေ့ တစ်ခုကို သေချာပေါက် ရရှိမည် ဖြစ်သည်။

အကယ်၍ အောင်မြင်စွာ ပြောင်းစိုက်နိုင်မည်ဆိုလျှင် နောက်ထပ် မျိုးစေ့တစ်ခု ထပ်ရသလိုပင်။

ကျိချောင်းယန် ခေါင်းညိတ်လိုက်၏။

"အဲဒါ ကောင်းတာပေါ့။ ဒီနေ့ ငါ အပြင်ထွက်ပြီး စူးစမ်းရင်းနဲ့ ငါ့ရဲ့ လက်ရှိ သစ်ပင်အိမ် ကာကွယ်ရေး ဧရိယာကို တိုင်းထွာကြည့်ခဲ့တာ၊ အခုဆိုရင် ၁၂ ကီလိုမီတာအထိ ရှိနေပြီ"

ဟင်။

ဤညောင်ပင်မှာ မြေပေါ်တွင် ပင်မသစ်ပင်အိမ်နှင့် မချိတ်ဆက်ထားစေကာမူ၊ မြေအောက်ရှိ သစ်ပင်အိမ် အမြစ်များ၏ စွမ်းဆောင်ရည်ကို မြှင့်တင်ပေးနိုင်တာလား။

အကယ်၍သာ ညောင်ပင် နှစ်ပင် စိုက်လိုက်မယ်ဆိုရင် ကာကွယ်ရေး ဧရိယာက နောက်ထပ် ၃ ကီလိုမီတာလောက် ထပ်တိုးသွားမှာလား။

အခန်း ၃၇၂ ပြီး။