အခန်း (၉၂၇-၉၂၈)
Vol. 76 Ch. 927-928
အခန်း ၉၂၇- ဧရာမ ကျောရိုးရှိပုတ်သင် (စပိုင်နိုဆောရပ်စ်) ကို သုတ်သင်ခြင်း
ဖုန်းဖြင့် အစီရင်ခံစာကို နားထောင်ပြီးနောက် ရှောင်းယီ မျက်မှောင်ကျုံ့သွားခဲ့သည်။ ထို့နောက် သူသည် မြို့ပြန် ကျောက်ကို အသုံးပြုပြီး မဟာမိတ်အဖွဲ့၏ အရှေ့ဘက်ကျွန်းသို့ ချက်ချင်း သွားလိုက်၏။
အရှေ့ဘက်ကျွန်း၏ တာဝန်ခံ ဖန်မင်လုံက ရှေ့သို့ထွက်၍ ကြိုဆိုလာခဲ့သည်။
“ကျွန်းပိုင်ရှင် ဒီတစ်ခါ ဧရာမသားရဲကြီးက ကျွန်းရဲ့ မြောက်ဘက်ခြမ်းမှာ ပေါ်လာတာပါ။”
“အရင်သွားကြည့်ရအောင်။”
ရှောင်းယီက လေးနက်သောလေသံဖြင့် ပြောပြီး ဖန်မင်လုံနောက်မှ လိုက်ကာ ကျွန်း၏ မြောက်ဘက်သို့ ဦးတည်သွားလိုက်သည်။
ထိုနေရာမှ ဆယ်ကီလိုမီတာခန့် အကွာတွင် ဧရာမ လှိုင်းလုံးဖြူကြီးတစ်ခုသည် အရှေ့ဘက်ကျွန်းဆီသို့ လျင်မြန်စွာ ချဉ်းကပ်လာနေခဲ့သည်။
“လေကြောင်းခံတပ်ကို အမိန့်ပေးလိုက်။ ရေပြင်နဲ့ နီးနီးကပ်ကပ် ချဉ်းကပ်ပြီး အမြောက်ကျည်တွေ ကြဲချဖို့ ပြင်ထား။ ပြီးတော့ ဘယ်အချိန်မဆို အပေါ်ကို ပြန်တက်နိုင်အောင် အသင့်ပြင်ထားကြ။”
ရှောင်းယီက အမိန့်ပေးလိုက်သည်။ အနည်းဆုံးတော့ သူ့ကို လာရောက်တိုက်ခိုက်နေသည့် သားရဲမှာ မည်သည့်အကောင်မျိုး ဖြစ်သည်ကို သိရန် လိုအပ်ပေသည်။
လေကြောင်းခံတပ်သည် အမြင့်ကို ဂရုတစိုက် လျှော့ချလိုက်ပြီးနောက် ရေအောက်ရှိ ဧရာမအရိပ်မည်းကြီးဆီသို့ အမြောက်ကျည်တစ်လုံး ကြဲချလိုက်လေသည်။
ဘုန်း
အမြောက်ကျည် ပေါက်ကွဲသွားပြီးနောက် ထိုအရိပ်မည်းကြီးသည် သူ၏ ခန္ဓာကိုယ်ကို ပြင်းထန်စွာ ရုန်းကန်လိုက်ရာ သုံးမီတာ၊ လေးမီတာခန့် မြင့်သော လှိုင်းလုံးကြီးများ ထကြွလာခဲ့၏။
ခဏအကြာတွင် မိကျောင်းနှင့် အလွန်ဆင်တူသော ခေါင်းကြီးတစ်ခု ရေပေါ်သို့ ထွက်ပေါ်လာတော့သည်။
“နောက်ထပ် ဧရာမမိကျောင်းကြီးတစ်ကောင်လား။”
ဖန်မင်လုံက ထိုခေါင်းကြီးကို ကြည့်ပြီး ထိတ်လန့်တကြား ရေရွတ်လိုက်၏။ ရှောင်းယီက ခေါင်းခါပြလိုက်သည်။
[ဧရာမ စပိုင်နိုဆောရပ်စ် (SSS အဆင့်): အလျား မီတာ ၄၀ ကျော်၊ အလေးချိန် ၃၉.၆ တန်။ ရေကူးခြင်းတွင် သိပ်မကျွမ်းကျင်သဖြင့် ရေထဲမှ ခုန်ထွက်လာမည်ကို စိုးရိမ်စရာမလိုပါ။]
“ဒါက ဧရာမ စပိုင်နိုဆောရပ်စ်ပဲ။ ဒိုင်နိုဆော အမျိုးအစားပေါ့။ နောက်ထပ် ခေါင်းခဲစရာ တစ်ခုပဲ။”
ရှောင်းယီက မျက်မှောင်ကျုံ့ရင်း ပြောလိုက်သည်။ ထို့နောက် သူ၏ဖုန်းကို ထုတ်ကာ လေကြောင်းခံတပ်ပေါ်ရှိ စစ်သည်များကို ဖုန်းခေါ်လိုက်လေသည်။
“ဒီအမြင့်ကိုပဲ ထိန်းထားပြီး မင်းတို့ အားရှိသမျှ အဲဒီအကောင်ကို ဗုံးကြဲလိုက်စမ်း။”
“ဟုတ်ကဲ့။”
လေကြောင်းခံတပ်ပေါ်ရှိ စစ်သည်များသည် စပိုင်နိုဆောရပ်စ်ပေါ်သို့ ဗုံးများ အဆက်မပြတ် ကြဲချတော့၏။ ရေမျက်နှာပြင်တွင် လှိုင်းလုံးများ ထကြွနေသော်လည်း စပိုင်နိုဆောရပ်စ်သည် အစပိုင်းတွင်သာ တုံ့ပြန်မှုပြပြီး နောက်ပိုင်းတွင် ဘာမှမဖြစ်သကဲ့သို့ ကျွန်းဆီသို့ ဆက်လက် ကူးခတ်လာခဲ့သည်။
ထိုအရာကိုမြင်သောအခါ ဖန်မင်လုံ စိုးရိမ်သွားခဲ့သည်။
“ကျွန်းပိုင်ရှင် စပိုင်နိုဆောရပ်စ်က ဘာလို့ ဘာမှမဖြစ်သလို တုံ့ပြန်မှု မပြတော့တာလဲ။”
ထိုအခါ ရှောင်းယီက တင်းမာနေသော မျက်နှာထားဖြင့် ပြန်ဖြေလိုက်သည်။
“အစက သူ ဒီလို အမြောက်ကျည် တိုက်ခိုက်မှုကို မကြုံဖူးလို့ အသံကြောင့် လန့်သွားခဲ့တာပဲ။ နောက်ပိုင်းကျတော့ ငါတို့ရဲ့ ကျည်ဆံတွေက သူ့ကို ထိခိုက်မှု အများကြီး မပေးနိုင်ဘူးဆိုတာ သိသွားလို့ သူ ဂရုမစိုက်တော့တာ။”
“ဒါဆို ဒီကောင်ရဲ့ ခံစစ်က တော်တော်ပြင်းထန်တာပဲ။ ဒီလောက် ဗုံးကြဲတာတောင် ဘာမှမဖြစ်ဘူးလား။”
ဖန်မင်လုံ အံ့သြသွားခဲ့သည်။
“သူ့ရဲ့ ခံစစ်အားကောင်းတာကလည်း တစ်ကြောင်းပေါ့။ နောက်တစ်ချက်က ငါတို့ရဲ့ အမြောက်ကျည်တွေက ရေထဲမှာ ပေါက်ကွဲရင် စွမ်းအားက အများကြီး လျော့ကျသွားလို့ပဲ။”
ရှောင်းယီက ရှင်းပြလိုက်သည်။ ဖန်မင်လုံ ခေါင်းငြိမ့်လိုက်မိသည်။
“ဒါဆို တော်ပီဒိုတွေ သုံးလိုက်ရတော့မလား။”
“ဒါပေါ့”
ရှောင်းယီက ပြန်ဖြေလိုက်သည်။
“ဒါပေမဲ့ အခွင့်အရေးကောင်းကို စောင့်ရမယ်။ အသားစိမ်းတွေ ပြင်ထားပြီးပြီလား။”
“ပြင်ထားတာ ကြာပါပြီ။ အခု ပင်လယ်ထဲ တိုက်ရိုက် ပစ်ချလိုက်ရတော့မလား။”
“မလုပ်နဲ့ဦး။ လေကြောင်းခံတပ်ကနေ အရင်ပစ်ချခိုင်းလိုက်။”
ရှောင်းယီက ခေါင်းခါရင်း ညွှန်ကြားလိုက်သည်။
“ဟုတ်ကဲ့”
ထို့နောက် လေကြောင်းခံတပ်သည် ကျွန်းအထိမ်းအမှတ်ကျောက်တိုင်မှတစ်ဆင့် အသစ်စက်စက် သတ်ထားသော နွားတစ်ကောင်ကို လဲလှယ်ရယူလိုက်ပြီး အောက်သို့ တိုက်ရိုက် ပစ်ချလိုက်၏။
သွေးနံ့ရသည်နှင့် စပိုင်နိုဆောရပ်စ်သည် ကျွန်းဆီသို့ ဦးတည်လာရာမှ ချက်ချင်းရပ်တန့်သွားပြီး သွေးများ အဆက်မပြတ် ထွက်နေသော နွားဆီသို့ ကူးခတ်သွားတော့သည်။
“ကျွန်းပိုင်ရှင် ဒီနည်းလမ်းကို သုံးပြီး စပိုင်နိုဆောရပ်စ်ကို အဝေးကို မျှားခေါ်သွားလို့ ရတာပဲ။”
နည်းလမ်းက အလုပ်ဖြစ်သွားသည်ကို မြင်ပြီးနောက် ဖန်မင်လုံက ပြောလိုက်သည်။ရှောင်းယီက ထပ်မံ၍ ခေါင်းခါပြန်သည်။
“ကမ္ဘာ့စည်းမျဉ်းတွေက ငါတို့ကို ဒီလောက် အလွယ်တကူ လွှတ်ပေးပါ့မလား။ ဒီလောက်ကြီးတဲ့ ခန္ဓာကိုယ်နဲ့ဆိုရင် သူ့ကို မျှားခေါ်ဖို့ အသား ဘယ်လောက်တောင် လိုမလဲဆိုတာ မသိနိုင်ဘူး။ မျှားခေါ်သွားနိုင်ရင်တောင် သူက ပြန်လာဦးမှာပဲ။ ကမ္ဘာ့စည်းမျဉ်းတွေက သူ့ကို လမ်းညွှန်ပေးလိမ့်မယ်။”
ဖန်မင်လုံ ခေါင်းငြိမ့်လိုက်မိသည်။
“ဒါဆို ဒီနည်းလမ်းက ကျွန်းကို တိုက်ခိုက်မယ့်အချိန်ကို နှောင့်နှေးအောင်ပဲ လုပ်နိုင်တာပေါ့။”
“မှန်တယ်။ ဒါက ငါတို့အတွက် အချိန်ဆွဲပေးလိုက်တာပဲ။”
ထိုအချိန်တွင် လေကြောင်းခံတပ်ပေါ်ရှိ စစ်သည်များသည် စပိုင်နိုဆောရပ်စ်က သူတို့ပစ်ချပေးလိုက်သော နွားကို အရိုးပင် မကျန် တစ်လုတ်တည်း ဝါးမြိုလိုက်သည်ကို တွေ့လိုက်ရလေသည်။
လေကြောင်းခံတပ်မှ တပ်စုခေါင်းဆောင်က ချက်ချင်းပြောလိုက်သည်။
“နွားဗိုက်ထဲကို အမြောက်ကျည် ဒါဇင်ပေါင်းများစွာ ထည့်လိုက်စမ်း။”
“ဟုတ်ကဲ့။”
စစ်သည်များသည် သူတို့တွင်ရှိသော အမြောက်ကျည်အားလုံးကို နောက်ထပ် နွားတစ်ကောင်၏ ဗိုက်ထဲသို့ ထိုးထည့်လိုက်ပြီး အောက်သို့ကျမည့် အချိန်ကို တွက်ဆကာ ယမ်းကြိုးများကို မီးရှို့လိုက်ကြတော့သည်။
“တစ်၊ နှစ်၊ သုံး...ပစ်ချလိုက်တော့။”
သူတို့သည် ဗိုက်ထဲတွင် အမြောက်ကျည် ၆၈ လုံး ပါဝင်သော နွားကို မချီ၍ လေကြောင်းခံတပ်ပေါ်မှ ပစ်ချလိုက်၏။
အောက်ဘက်ရှိ စပိုင်နိုဆောရပ်စ်မှာ အစာကျွေးသည်ကို ကျင့်သားရသွားပုံရသည်။ သူသည် ခေါင်းကိုမော့ကာ ပါးစပ်ကို ဟပေးလိုက်ပြီး နွားကို အမိအရ ဖမ်းစားလိုက်တော့သည်။
တစ်ချက်မျှ ဝါးလိုက်သည်နှင့် နွားဗိုက်ထဲရှိ အမြောက်ကျည်များမှာ ဘုန်းခနဲ မြည်အောင် ပေါက်ကွဲသွားရာ ကောင်းကင်ယံတစ်ခုလုံး တုန်ဟီးသွားတော့သည်။
စပိုင်နိုဆောရပ်စ်၏ ရှည်လျားသော နှာတံကြီးမှာ အပိုင်းပိုင်း ပြတ်ထွက်သွား၏။
ကံမကောင်းသည်မှာ ပေါက်ကွဲမှုသည် ဦးနှောက်ကို မထိမှန်ခဲ့သဖြင့် စပိုင်နိုဆောရပ်စ်မှာ မသေသေးပေ။ သူသည် ပင်လယ်ထဲတွင် နာကျင်စွာ အော်ဟစ်ရင်း ပြင်းထန်စွာ ရုန်းကန်နေတော့သည်။
ကမ်းခြေရှိ ရှောင်းယီမှာ အနည်းငယ် မှင်တက်သွားခဲ့၏။ ထို့နောက် လေကြောင်းခံတပ် တပ်စုခေါင်းဆောင်ကို ချက်ချင်း ဖုန်းဆက်ကာ ဆူပူတော့လေသည်။
“မင်းကို ဘယ်သူက ကိုယ့်သဘောနဲ့ကိုယ် လုပ်ခွင့်ပေးလို့လဲ။”
တပ်စုခေါင်းဆောင်မှာ ချက်ချင်း သတိဆွဲလိုက်ပြီး ပြန်ဖြေလိုက်သည်။
“ကျွန်းပိုင်ရှင် ကျုပ် မှားသွားပါတယ်။ စပိုင်နိုဆောရပ်စ်က ကျုပ်တို့ ချပေးတဲ့အစာကို မဆိုင်းမတွ ဝါးစားတာကို မြင်တော့ နွားဗိုက်ထဲ အမြောက်ကျည်တွေ ထည့်ပြီး ဖောက်ခွဲလိုက်ရင် ကောင်းမယ်လို့ ထင်မိလို့ပါ။”
“မင်း အမှားကို မင်းသိရင် ပြီးတာပဲ။”
ရှောင်းယီက ပြောသည်။
“ပြန်ရောက်ရင် ကိုယ့်ကိုယ်ကိုယ် ပြန်လည်သုံးသပ်တဲ့စာရေးပြီး နည်းပြကျန်းဆီ အပ်လိုက်။ ဒီကိစ္စကို သေချာ ပြန်သုံးသပ်ပါ။”
“ဟုတ်ကဲ့။”
တပ်စုခေါင်းဆောင်က အသံကျယ်ကျယ်ဖြင့် တုံပြန်လိုက်သည်။
ဤတစ်ကြိမ်တွင် သူတို့၏ အစီအစဉ် အောင်မြင်ပြီး စပိုင်နိုဆောရပ်စ်အား ပြင်းထန်စွာ ဒဏ်ရာရသွားစေခဲ့သော်လည်း ၎င်းမှာ မှန်ကန်သော လုပ်ရပ်ဟု မဆိုလိုပေ။ အကယ်၍သာ မအောင်မြင်ဘဲ စပိုင်နိုဆောရပ်စ်က သတိထားမိသွားလျှင် ရေအောက်ဒုံးကျည်ဖြင့်ပင် တစ်ချက်တည်း သတ်ပစ်ရန် ခက်ခဲသွားပေလိမ့်မည်။
ဤကဲ့သို့ ကိစ္စမျိုးကို အထက်သို့ အနည်းဆုံး တင်ပြသင့်ပြီး သို့မှသာ ရှောင်းယီတို့က အရံအစီအစဉ်များ ကြိုတင်ပြင်ဆင်ထားနိုင်မည် ဖြစ်သည်။ စစ်မြေပြင်တွင် အထက်၏ ခွင့်ပြုချက်မရှိဘဲ ဆုံးဖြတ်ချက်ချခြင်းမှာ အလွန် အန္တရာယ်များပေသည်။
နှာတံပြတ်ထွက်သွားသော စပိုင်နိုဆောရပ်စ်ကို ကြည့်ရင်း ရှောင်းယီက ချက်ချင်း အမိန့်ပေးလိုက်သည်။
“စပိုင်နိုဆောရပ်စ်ရဲ့ ဒဏ်ရာကို ရေအောက်ဒုံးကျည်တွေ အကုန်ပစ်စမ်း။ လေကြောင်းခံတပ်ကလည်း သူ့ခေါင်းပေါ်ကို အမြောက်ကျည်တွေ ဆက်ကြဲချပြီး ဒုံးကျည်ပစ်တဲ့အဖွဲ့ကို လမ်းညွှန်ပေးလိုက်။”
စပိုင်နိုဆောရပ်စ်မှာ ပြင်းထန်စွာ ရုန်းကန်နေ၏။ ကမ်းခြေမှဖြစ်စေ၊ သင်္ဘောပေါ်မှဖြစ်စေ ဒဏ်ရာ၏ တည်နေရာအတိအကျကို မြင်ရရန်မှာ မလွယ်ကူပေ။ သို့သော် လေပေါ်မှ လူများမှာမူ ပို၍ ရှင်းလင်းစွာ မြင်ရပေသည်။
လေကြောင်းခံတပ်၏ လမ်းညွှန်မှုအောက်တွင် ရေအောက်ဒုံးကျည် စုစုပေါင်း ၁၀ စင်းသည် စပိုင်နိုဆောရပ်စ်ဆီသို့ ဦးတည်လာခဲ့၏။ ပြင်းထန်သော နာကျင်မှုကို ခံစားနေရသော သားရဲကြီးမှာ ဒုံးကျည်များ ချဉ်းကပ်လာသည်ကိုပင် သတိမပြုမိခဲ့ပေ။
ဘုန်း...ဘုန်း...ဘုန်း
ဒုံကျည်သုံးစင်းမှာ စပိုင်နိုဆောရပ်စ်၏ ဒဏ်ရာကို တိုက်ရိုက် ထိမှန်သွားခဲ့၏။ ဤတစ်ကြိမ်တွင်မူ သူ၏ ဦးခေါင်းတစ်ခုလုံး အပိုင်းပိုင်း ပြတ်ထွက်သွားတော့သည်။
စပိုင်နိုဆောရပ်စ်သည် ချက်ချင်း ငြိမ်သက်သွားသော်လည်း သူရုန်းကန်ခဲ့သော ပင်လယ်ပြင်မှာမူ အချိန်အတော်ကြာအောင် လှုပ်ခတ်နေဆဲပင်။
စနစ်ကို အသုံးပြု၍ စပိုင်နိုဆောရပ်စ် သေဆုံးသွားကြောင်း အတည်ပြုပြီးနောက် ရှောင်းယီက အမိန့်ပေးလိုက်သည်။
“စပိုင်နိုဆောရပ်စ်ရဲ့ အလောင်းကို ပြန်ဆွဲလာခဲ့။”
“ဟုတ်ကဲ့။”
အားလုံးက ပြန်ဖြေလိုက်သည်။ သူတို့သည် တဖြည်းဖြည်း နစ်မြုပ်နေသော အလောင်းကို ဆယ်ယူရန် သင်္ဘောဖြင့် ထွက်ခွာသွားကြတော့သည်။
ထိုအချိန်တွင် လေကြောင်းခံတပ်မှ တပ်စုခေါင်းဆောင်သည် ပြတ်ထွက်နေသော စပိုင်နိုဆောရပ်စ်၏ နှာတံမှာ မျက်စိနှင့် မြင်နိုင်သည့်အရှိန်ဖြင့် ပိန်လိမ်ခြောက်ကပ်သွားသည်ကို သတိပြုမိလိုက်၏။ အချို့နေရာများတွင် ဖြူဖွေးသော အရိုးများပင် ပေါ်ထွက်နေပြီ ဖြစ်သည်။
“ကျွန်းပိုင်ရှင် ရေထဲမှာ တစ်ခုခု မှားနေပုံရတယ်။ စပိုင်နိုဆောရပ်စ်ရဲ့ နှာတံက အရိုးအဖြစ် ပြောင်းလဲနေပြီ။”
တပ်စုခေါင်းဆောင်က ရှောင်းယီထံသို့ ချက်ချင်း အစီရင်ခံလိုက်လေသည်။
အခန်း ၉၂၈- ရေအောက်မိုင်း ပုံစံခွက် ရရှိခြင်းနှင့် ဧရာမသားရဲများ တိုက်ခိုက်မှု စည်းမျဉ်း
တပ်စုခေါင်းဆောင်၏ အစီရင်ခံစာကို ကြားလိုက်ရပြီးနောက် ရှောင်းယီမှာ ခဏတာ မှင်တက်သွားခဲ့ပြီး ချက်ချင်း အမိန့်ပေးလိုက်၏။
“ပြတ်ထွက်သွားတဲ့ နှာတံပိုင်းကိုလည်း သိမ်းဆည်းလာခဲ့။”
ထိုအချိန်တွင် ကျန်းယွင်ထျန်းမှာလည်း နိုးနေပြီ ဖြစ်သည်။ မဟာမိတ် အရှေ့ဘက်ကျွန်း၏ အခြေအနေကို ကြားသိရပြီးနောက် သူသည် ချက်ချင်းပင် အပြေးအလွှား ရောက်ရှိလာခဲ့သည်။
“ကျွန်းပိုင်ရှင် အခြေအနေ ဘယ်လိုလဲ။”
ကျန်းယွင်ထျန်းသည် ရှောင်းယီကို ရှာတွေ့သည်နှင့် ရှေ့တက်ကာ မေးလိုက်၏။
“ကံကောင်းတာက ဒီသားရဲကြီးတွေက သိပ်ပြီး ဉာဏ်မကောင်းကြဘူး။ အဲ့ဒါကြောင့် အားလုံးကို ရှင်းလင်းပြီးပြီ။”
ရှောင်းယီက ပြန်ဖြေလိုက်သည်။ ထိုအခါမှ ကျန်းယွင်ထျန်းလည်း သက်ပြင်းချနိုင်သွားတော့သည်။
ယခုအခါ မသေမျိုးမျိုးနွယ်စုများမှာ မဟာမိတ်အဖွဲ့အတွက် ကြီးမားသော ခြိမ်းခြောက်မှု မဟုတ်တော့သော်လည်း ဤကဲ့သို့သော ဧရာမသားရဲကြီးများကို သေချာမကိုင်တွယ်နိုင်ပါက အမှန်တကယ်ပင် ကပ်ဘေးတစ်ခု ဖြစ်လာပေလိမ့်မည်။
“ဘာလို့ ဒီသားရဲကြီးတွေ ထပ်ပေါ်လာရတာလဲ။”
ကျန်းယွင်ထျန်းက သံသယဖြင့် မေးလိုက်သည်။
“ငါတို့ မဟာမိတ်အဖွဲ့ထဲက တစ်ယောက်ယောက် SSS အဆင့်ကို တက်လှမ်းသွားလို့များလား။”
“မဖြစ်နိုင်ဘူး။ ဒါက ငါ့ကြောင့်ပဲ ဖြစ်လိမ့်မယ်လို့ ငါထင်တယ်။”
ရှောင်းယီက လေးနက်သော လေသံဖြင့် ပြောလိုက်သည်။
“ဘာလဲ... မင်းပြောချင်တာက မဟာမိတ်အဖွဲ့ထဲမှာ SSS အဆင့် တစ်ယောက်ရှိနေသရွေ့ ဒီသားရဲကြီးတွေက အချိန်မှန်မှန် ရောက်လာနေဦးမှာလား။”
ကျန်းယွင်ထျန်း မျက်မှောင်ကျုံ့ကာ မေးလိုက်သည်။
“အဲဒီလို ဖြစ်နိုင်ခြေ အများကြီးရှိတယ်။”
ရှောင်းယီက သက်ပြင်းရှည်ကြီး ချရင်း ပြန်ဖြေလိုက်သည်။
“ဒါဆိုရင်တော့ တော်တော် ဒုက္ခများတော့မှာပဲ။”
ကျန်းယွင်ထျန်း ခေါင်းခဲသွားခဲ့သည်။ မသေမျိုးများ၏ကိစ္စပင် မပြီးသေးပေ။ ယခု ဤသားရဲကြီးများကပါ လာရှုပ်နေကြပြန်ပြီ။
ထိုအချိန်တွင် လေကြောင်းခံတပ်သည် အရှေ့ဘက်ကျွန်းသို့ ပြန်လည် ဆိုက်ကပ်လာခဲ့၏။ သင်္ဘောပေါ်မှ တပ်စုခေါင်းဆောင်သည် သူတို့နားသို့ ချက်ချင်း လျှောက်လာပြီး ပြောလာခဲ့သည်။
“အစီရင်ခံပါတယ် နည်းပြ...။ ကျုပ် စောစောက အထက်ကို မတင်ပြဘဲ ကိုယ့်သဘောနဲ့ကိုယ် လုပ်ဆောင်ခဲ့မိပါတယ်။ ကျုပ်ကို အပြစ်ပေးပါ။”
ကျန်းယွင်ထျန်းမှာ အနည်ငယ် ကြောင်အသွားခဲ့ပြီး ရှောင်းယီကို နားမလည်ဟန်ဖြင့် ကြည့်လိုက်သည်။ ရှောင်းယီက စောစောက ဖြစ်ပျက်ခဲ့သည်များကို အကျဉ်းချုံးကာ ရှင်းပြလိုက်၏။
“အပြစ်ပေးဖို့ မလိုပါဘူး။ ကိုယ့်ကိုယ်ကိုယ် ပြန်လည်သုံးသပ်စာ ရေးပြီး တင်လိုက်ရင် ရပြီ။”
တပ်စုခေါင်းဆောင်က ကျန်းယွင်ထျန်းကို ကြည့်လိုက်ရာ ကျန်းယွင်ထျန်းက အလွန်တည်ကြည်သော မျက်နှာဖြင့် ပြောလိုက်သည်။
“ဒီကိစ္စက အရမ်းအရေးကြီးတယ်။ မင်းရဲ့ အမှားကို မင်းသိလိမ့်မယ်လို့ ငါ မျှော်လင့်တယ်။ သွားတော့။ ပြန်လည်သုံးသပ်စာ ရေးလိုက်။”
“ဟုတ်ကဲ့။”
တပ်စုခေါင်းဆောင်က ပြန်ဖြေပြီး ချက်ချင်း ထွက်ခွာသွားခဲ့သည်။
“သူ အဲဒီစာ ရေးပြီးရင်တော့ သူ့ကို ဂုဏ်ပြုချီးကျူးပေးလိုက်ပါ။ သူက ကိုယ့်သဘောနဲ့ကိုယ် လုပ်ခဲ့တယ် ဆိုပေမဲ့ အခြေအနေပေါ် မူတည်ပြီး လိုက်လျောညီထွေ လုပ်ဆောင်တတ်တာက မဆိုးဘူးလို့ ပြောလို့ရတယ်။”
ရှောင်းယီက ညွှန်ကြားလိုက်သည်။
“အင်း ငါ နားလည်ပြီ။”
ကျန်းယွင်ထျန်းက ပြန်ဖြေလိုက်သည်။
ထိုအချိန်တွင် ပြတ်ထွက်နေသော နှာတံပိုင်းကို ကမ်းခြေသို့ ယူဆောင်လာခဲ့ရာ ၎င်းမှာ အရိုးများသာ ကျန်တော့သည်ကို တွေ့လိုက်ရလေသည်။ စပိုင်နိုဆောရပ်စ်၏ ခန္ဓာကိုယ်ကြီးမှာလည်း တဖြည်းဖြည်း ပိန်လိမ်ခြောက်ကပ်လာခဲ့သည်။
“ဒါက မသေမျိုးတွေ ယူလာတဲ့ ဘက်တီးရီးယားများလား။”
ရှောင်းယီ သံသယဝင်သွားမိ၏။
“သေခြင်းတရားစွမ်းအင်တွေ ကျူးကျော်ခံထားရသလိုပဲ။ ဒါပေမဲ့ ဒီဘက်တီးရီးယားက အပင်တွေကိုပဲ ကူးစက်တာ မဟုတ်ဘူးလား။ တိရစ္ဆာန်တွေကို မကူးစက်ဘူး ထင်တာပဲ။”
ကျန်းယွင်ထျန်းက မျက်မှောင်ကျုံ့ကာ မေးလိုက်သည်။
“ငါ အရင်က ပြောတာ မတိကျတာ ဖြစ်လိမ့်မယ်။ ဒီဘက်တီးရီးယားက အသက်ရှင်နေတဲ့ တိရစ္ဆာန်တွေကို မကူးစက်နိုင်ဘူးလို့ ပြောရင် ပိုမှန်မယ် ထင်တယ်။”
ရှောင်းယီက ပြန်ဖြေလိုက်သည်။
“အဲဒါဆိုရင် တိရစ္ဆာန်တွေ သေသွားတာနဲ့ ဒီဘက်တီးရီးယားတွေက အလောင်းထဲက အာဟာရဓာတ်တွေကို စုပ်ယူနိုင်တာပေါ့။”
ကျန်းယွင်ထျန်းက ဆိုသည်။
“အဲဒီလို ဖြစ်ဖို့ များတယ်။”
ရှောင်းယီ ခေါင်းငြိမ့်လိုက်သည်။
“ဒါပေမဲ့ အခု ဘာလုပ်ကြမလဲ။ စပိုင်နိုဆောရပ်စ်ရဲ့ အလောင်းက အဲ့ဒီဘက်တီးရီးယားတွေ ကူးစက်ခံနေရပြီ။”
အသားစိုင်များ တဖြည်းဖြည်း သေးသိမ်သွားသည်ကို ကြည့်ပြီး ကျန်းယွင်ထျန်းက စိုးရိမ်တကြား အော်ဟစ်လိုက်သည်။
“လူတိုင်း မီးတုတ်တွေထွန်းပြီး စပိုင်နိုဆောရပ်စ်ကို မီးရှို့ကြစမ်း။ ဘက်တီးရီးယား ကူးစက်တဲ့ လက္ခဏာ ရှိနေသရွေ့ ဆက်ပြီး ရှို့ထား။”
ရှောင်းယီက အမိန့်ပေးလိုက်သည်။
“ဟုတ်ကဲ့။”
စပိုင်နိုဆောရပ်စ်ကို ဝိုင်းရံထားသော စစ်သည်များသည် ခြောက်ကပ်သွားသော နေရာများကို မီးတုတ်များဖြင့် ချက်ချင်း မီးရှို့ကြတော့သည်။
“အစီရင်ခံပါတယ်။ စပိုင်နိုဆောရပ်စ် တစ်ကိုယ်လုံးမှာ အဲဒီဘက်တီးရီးယားတွေ ပျံ့နှံ့နေပါပြီ။ တချို့က ခန္ဓာကိုယ်ထဲအထိ ရောက်နေပါပြီ။ ကျွန်တော်တို့ မီးရှို့တာက အသုံးမဝင်တော့ပါဘူး။”
စစ်သည်တစ်ဦးက ပြေးလာပြီး အစီရင်ခံလာခဲ့သည်။
ရှောင်းယီ မျက်မှောင်ကျုံ့သွားပြီး စာချုပ်စွမ်းအားကို အသုံးပြုကာ ရွှမ်းဝူတို့ကို လှမ်းခေါ်လိုက်၏။
“သားရဲဘုရင်၊ ရွှမ်းဝူ မင်းတို့ အားလုံး မြန်မြန် လာခဲ့ကြ။ မဟုတ်ရင် စားစရာ ဘာမှကျန်တော့မှာ မဟုတ်ဘူး။”
ချက်ချင်းပင် ရှောင်းယီ၏ အိမ်မွေးတိရစ္ဆာန် အားလုံးသည် အရှေ့ဘက်ကျွန်းသို့ တည်နေရာကူးပြောင်းကာ ရောက်ရှိလာခဲ့ကြလေသည်။ ဧရာမ စပိုင်နိုဆောရပ်စ်၏ အလောင်းကြီးကို မြင်သည်နှင့် အားလုံးက ဝိုင်းအုံကာ စားသောက်ကြတော့သည်။
ထိုထဲ၌ ပင်လယ်ထဲမှ တက်လာသော ဧရာမ လိပ်နဂါးကြီး ရွှမ်းဝူလည်း ပါဝင်ပေသည်။ မဟာမိတ်အဖွဲ့မှ စစ်သည်များသည် ရွှမ်းဝူ၏ ပုံပန်းသဏ္ဍာန် အပြည့်အစုံကို မြင်တွေ့ရခဲ၏။ ယခုမှသာ အားလုံးကို ရှင်းလင်းစွာ မြင်တွေ့ကြရခြင်း ဖြစ်သည်။
“ကျွန်းပိုင်ရှင်ရဲ့ အိမ်မွေးတိရစ္ဆာန်က တကယ့်ကို အကြီးကြီးတွေပဲ။”
“ဟုတ်တယ်။ သူ့နာမည်က ရွှမ်းဝူတဲ့။ ကျွန်းပိုင်ရှင်ရဲ့ အရင်ကမ္ဘာက ဒဏ္ဍာရီလာ သားရဲတစ်ကောင်လို့ ပြောကြတယ်။”
“တကယ်ကို ထူးခြားတာပဲ။ ချင်းလုံလည်း အတူတူပဲလို့ ပြောတယ်။ ဟိုမှာကြည့်... အကောင်သေးသေးလေးက ကင်မီးရား (Chimera) နဲ့တောင် တူသလိုပဲ။”
“အဲဒီတစ်ကောင်ကို ချီလင်လို့ ခေါ်တယ်လို့ ကြားတယ်။ အဲဒါလည်း ကျွန်းပိုင်ရှင်ရဲ့ အရင်ကမ္ဘာက ဒဏ္ဍာရီလာ သားရဲပဲတဲ့။”
ရှောင်လင်သည် အရသာအရှိဆုံး အသားနေရာကို ရှာဖွေစားသောက်နေပြီး အခြားသော တိရစ္ဆာန်များမှာမူ သူနှင့် ယှဉ်ပြိုင်ရန် မဝံ့ရဲကြပေ။ ခဏကြာအောင် စားသောက်ပြီးနောက် ရှောင်လင်မှာ ထရပ်လိုက်၏။ သူက သေးငယ်လွန်းသဖြင့် အများကြီး စားနိုင်ပုံမရပေ။ ကိုယ်ကို သန့်ရှင်းရေးလုပ်ပြီးနောက် ရှောင်းယီထံသို့ လျှောက်သွားလိုက်လေသည်။
“ဗိုက်ဝသွားပြီလား။”
ရှောင်းယီက ပြုံးကာ မေးလိုက်၏။ရှောင်လင်သည် လှပသော ခြေလှမ်းများဖြင့် လျှောက်လာပြီး တိုးတိုးလေး ပြန်ဖြေလိုက်သည်။
“ဝသွားပါပြီ။ ဒါပေမဲ့ ဒီအသားက အရင်တစ်ခါကလောက် အရသာမရှိဘူး။”
ဂုဏ်ယူပါတယ်။ အရသာကွာတာကိုတောင် သူက သိနေသေးတယ်။
“တကယ့်ကို အစားကြူးတဲ့ကောင်လေးပဲ။”
ရှောင်းယီ ခေါင်းခါရင်း ရေရွတ်လိုက်မိသည်။ ထို့နောက် သူသည် ယနေ့အတွက် လက်မှတ်ထိုးဝင်ရသေးသည်ကို ရုတ်တရက် သတိရသွားပြီး စိတ်ထဲမှ လက်မှတ်ထိုးဝင်လိုက်သည်။
“လက်မှတ်ထိုးဝင်ခြင်း အောင်မြင်ပါသည်။ ရရှိသောဆုလာဘ်- အလိုအလျောက် ပေါက်ကွဲသော ရေအောက်မိုင်း ပုံစံခွက် (SS အဆင့်) ၁။”
“နောက်ဆုံးတော့ ရေအောက်မိုင်း ပုံစံခွက် ရခဲ့ပြီကွ။”
ရှောင်းယီ အော်ဟစ်လိုက်မိသည်။
ယခင်က အသက်ရှင်ကျန်ရစ်သူ တစ်ဦးသာ ရေအောက်မိုင်း ပုံစံခွက်ကို ရရှိခဲ့ပြီး ၎င်းမှာ ရွှမ်းယွမ်ဝူဝေ့ထံသို့ ရောက်ရှိသွားခဲ့၏။ နောက်ပိုင်းတွင် ရွှမ်းယွမ် မဟာမိတ်အဖွဲ့ကို ရှောင်းယီ သိမ်းပိုက်လိုက်သောအခါ ထိုမိုင်းပုံစံခွက်မှာ သူ၏လက်ထဲသို့ ရောက်ရှိလာခဲ့သည်။ သို့သော် ထိုပုံစံခွက်မှာ အဆင့်နိမ့်လွန်းသဖြင့် ယခုကဲ့သို့ အဆင့်မြင့်လာသော သင်္ဘောများကို ရင်ဆိုင်ရာတွင် ထိရောက်မှု မရှိသလောက် ဖြစ်နေပြီဖြစ်သည်။
ယခုရရှိလာသော SS အဆင့် ရေအောက်မိုင်းမှာမူ အချိန်ကိုက် ရရှိလာသော အဖိုးတန် လက်နက်တစ်ခု ဖြစ်ပေလိမ့်မည်။
ရှောင်းယီသည် အနီးဆုံးရှိ ကျွန်းအထိမ်းအမှတ်ကျောက်တိုင်သို့ သွားကာ မိုင်းနှစ်လုံးကို ပြုလုပ်လိုက်၏။ ထို့နောက် အဆင့်မြင့် စူပါပေါင်းစပ်ခြင်းစက်ကို အသုံးပြု၍ SSS အဆင့်သို့ ပေါင်းစပ်ရန် ကြိုးစားကြည့်လိုက်သည်။
ထိုအခါ စနစ်မှ အကြောင်းကြားစာ တက်လာခဲ့လေသည်။
“ပေါင်းစပ်၍ မရနိုင်ပါ။ ဤမိုင်းအမျိုးအစားသည် SS အဆင့်အထိသာ ရရှိနိုင်ပါသည်။”
ရှောင်းယီ အနည်းငယ် စိတ်ပျက်သွားသော်လည်း လက်လျှော့လိုက်ရသည်။
“ဒီ SS အဆင့်ရဲ့ စွမ်းအားက ဟိုသားရဲကြီးတွေကို အထိနာအောင် လုပ်နိုင်လိမ့်မယ်လို့ မျှော်လင့်ရတာပဲ။”
သူစိတ်ထဲမှ ရေရွတ်လိုက်မိ၏။ ယခုအခါ ရှောင်းယီ၏ အကြီးမားဆုံး စိုးရိမ်ပူပန်မှုမှာ ဧရာမသားရဲကြီးများ ဖြစ်သည်။ အခြားသော ဒေသခံ အင်အားစုများအတွက်မူ သူ စိုးရိမ်ခြင်း မရှိတော့ပေ။ အင်ပါယာကြီးလေးခု ပူးပေါင်းလျှင်ပင် ယခင်က သူ၏ ပြိုင်ဘက် မဟုတ်ခဲ့ချေ။ ယခုအခါ ကမ္ဘာ့စစ်မြေပြင်သို့ ရောက်ရှိနေသဖြင့် ထိုဒေသခံများမှာလည်း မသေမျိုးများ၏ တိုက်ခိုက်မှုကို ရင်ဆိုင်နေရပေလိမ့်မည်။ ထို့ကြောင့် သူတို့သည် ရှောင်းယီကို လာရောက်တိုက်ခိုက်ရန် အချိန်ရှိလိမ့်မည် မဟုတ်ပေ။
ထို့နောက် ရှောင်းယီသည် ကျန်းယွင်ထျန်းကို ခေါ်ကာ ပြောလိုက်သည်။
“အခု ငါတို့ဆီမှာ SS အဆင့် ရေအောက်မိုင်းတွေ ရှိနေပြီ။ ငါတို့ကျွန်းရဲ့ ပတ်ပတ်လည်မှာ အဲဒါတွေကို ချထားဖို့ စီစဉ်လိုက်ပါ။ သင်္ဘောတွေအားလုံးကိုလည်း သတ်မှတ်ထားတဲ့ လမ်းကြောင်းအတိုင်းပဲ သွားဖို့ သေချာ သတိပေးထားလိုက်ဦး။ ဒီမိုင်းတွေရဲ့ စွမ်းအားက အရမ်းကြီးတယ်။”
“ဟုတ်ကဲ့။”
ကျန်းယွင်ထျန်း၏ မျက်လုံးများမှာ အရောင်တောက်သွားခဲ့သည်။
ဤအဆင့်မြင့် ရေအောက်မိုင်းများရှိပါက ပင်လယ်ပြင်မှ လာရောက် ကျူးကျော်သူများကို ကာကွယ်ရာ၌ ပို၍ လွယ်ကူသွားပေလိမ့်မည်။ ကျန်းယွင်ထျန်းသည် လူအင်အား စုဆောင်း၍ မိုင်းများအား စတင်ကာ နေရာချတော့သည်။
ရှောင်းယီသည် စပိုင်နိုဆောရပ်စ်၏ ပြတ်ထွက်နေသော နှာတံပိုင်းကို ဗီလာသို့ ပြန်ယူလာကာ ဓာတ်ခွဲခန်းထဲသို့ ထည့်ပေးလိုက်ပြီး အခြေအနေကို စစ်ဆေးခိုင်းလိုက်သည်။ ထို့နောက် သူ၏ အိပ်ခန်းသို့ ပြန်လာကာ စဉ်းစားခန်း ဝင်သွားခဲ့လေသည်။
နောက်ဆုံးတစ်ခေါက် ဧရာမသားရဲကြီး ရောက်လာခဲ့သည်မှာ ၈၇ ရက်မြောက်နေ့တွင် ဖြစ်သည်။ ယနေ့မှာ ၉၄ ရက်မြောက်နေ့ ဖြစ်၍ အတိအကျ တစ်ပတ် ကြာမြင့်ခဲ့ပြီ ဖြစ်သည်။
ဒါက သားရဲတွေ ရောက်လာတတ်တဲ့ ကြားကာလများ ဖြစ်နေမလား။