အခန်း (၃၁၆-၃၁၇)

အခန်း (၃၁၆) အမြစ်ပြတ် ရှင်းလင်းခြင်း

ချန်ဖေး၏ ဖိနပ်က နင်းချလိုက်သည်နှင့်အမျှ အော်ဟစ်သံ တစ်ခုက ချန်ဖေး၏ နားထဲတွင် ရုတ်တရက် ထွက်ပေါ်လာပြီးနောက် ကျောင်းတော် အုပ်ချုပ်သူ၏ အဆိပ်ပြင်းသော ကျိန်ဆဲသံများ ထွက်ပေါ်လာ၏။

ချန်ဖေး မတုန်မလှုပ် နေပြီး အပြစ်ပေးခြင်း မခံရဘဲ တစ်ခဏမျှ စောင့်ဆိုင်းနေလိုက်သည်။ ရှင်းလင်းစွာပင် ဤအပင်က မြို့တော်၏ စည်းမျဉ်းများ အောက်တွင် အကာအကွယ် မပေးထားပေ။

သိုင်းကျောင်းတော် အုပ်ချုပ်သူက စည်းမျဉ်းများကို အရင် ချိုးဖောက်ခဲ့လို့များလား...

ချန်ဖေးက သူ၏ ဖိနပ်အောက်ခြေကို ငုံ့ကြည့်လိုက်ရာ သူ၏ နှုတ်ခမ်းများတွင် အပြုံးတစ်ခု ပေါ်လာ၏။ သတ်ဖြတ်သူက အသတ်ခံရမည်။ ချန်ဖေးက သူ အဖြေရပြီးသည်နှင့် ထွက်သွားမည်ဟု ကတိပေးခဲ့သော်လည်း မထွက်သွားမီ ပန်းများနှင့် မြက်ပင်အချို့ကို နင်းချေမိခြင်းက ရည်ရွယ်ချက် မရှိဘဲ ဖြစ်သွားသည်။

ဝိညာဉ်သတ်ဖြတ်ခြင်း ကျင့်စဉ်...

စတင်လေ့လာခြင်း အဆင့် ဝိညာဉ်သတ်ဖြတ်ခြင်း ကျင့်စဉ်က အလွန် နှေးကွေးသော အရှိန်ဖြင့် အလုပ်လုပ်၏။ တိုက်ပွဲတွင် ဤအဆင့်က သေချာပေါက် သိပ်အလုပ်မဖြစ်ပေ။ အသုံးမပြုနိုင်မီ ပြိုင်ဘက်က အားနည်းချက်ကို အသုံးချ၍ တိုက်ခိုက်သွားနိုင်ချေ ရှိသည်။

သို့သော် ယခု မြက်ပင် တစ်ပင်ကို ဖိနှိပ်ခြင်းကတော့ လုံးဝ ပြဿနာ မရှိပေ။

ချန်ဖေး၏ ဖိနပ်အောက်တွင် တုန်ယင်နေသော မြက်ပင်က ဝိညာဉ်သတ်ဖြတ်ခြင်း ကျင့်စဉ်၏ အရှိန်အဝါကို ခံစားမိပုံရပြီး ရူးသွပ်စွာ စတင် ရုန်းကန်လာကာ ချန်ဖေး ကြားနေရသော ကျိန်ဆဲသံများက ပို၍ ကျယ်လောင်လာ၏။

စိတ်ပိုင်းဆိုင်ရာ ကျိန်ဆဲမှု အချို့ပင်လျှင် ချန်ဖေး၏ အသိစိတ်ပင်လယ် အတွင်း လွင့်မျောလာသည်။ သို့သော်လည်း ချန်ဖေးက ဤကျိန်ဆဲမှုများ အားလုံးကို နတ်ဘုရား သတ်ဖြတ်ခြင်းဓားထံသို့ လမ်းကြောင်းလွှဲလိုက်သဖြင့် ချန်ဖေး၏ စစ်မှန်သော စိတ်အပေါ် မည်သည့် သက်ရောက်မှုမျှ မရှိခဲ့ပေ။

"အာ..."

စူးရှသော အော်ဟစ်သံ တစ်ခုနှင့်အတူ မြက်ပင်က ချက်ချင်း ပျောက်ကွယ်သွားပြီး သန့်စင်သော ဝိညာဉ်ရေးရာ အနှစ်သာရ တစ်ခု ထွက်ပေါ်လာ၏။ ချန်ဖေး၏ ခန္ဓာကိုယ် အတွင်း၌ ဝိညာဉ်ရေးရာ အနှစ်သာရ၏ သန့်စင်မှုကို ခံစားမိပြီးနောက် ချန်ဖေးက တစ်ခဏမျှ စဉ်းစားကာ ချန်ယွမ်ဓား အတွင်းသို့ စီးဝင်စေလိုက်သည်။

ဤပြင်ပ ဝိညာဉ်ရေးရာ အနှစ်သာရကို စုပ်ယူပြီးနောက် ချန်ဖေး အနေဖြင့် သန့်စင်ရန် အချိန်ယူရဦးမည် ဖြစ်ပြီး ထိုလုပ်ငန်းစဉ်က သေချာပေါက် အချိန်တော်တော်ကြာ ယူရပေလိမ့်မည်။ ထိုသို့ဖြစ်ရာ လုံးဝ မစုပ်ယူခြင်းက ပိုကောင်းပေမည်။

အနည်းဆုံးတော့ လျင်မြန်သော သန့်စင်ရေး နည်းလမ်း တစ်ခုကို မတွေ့ရှိမီ အချိန်အထိ ချန်ဖေးက ဤဝိညာဉ်ရေးရာ အနှစ်သာရများကို အလောတကြီး စုပ်ယူမည် မဟုတ်ပေ။

ဤဝိညာဉ်ရေးရာ အနှစ်သာရများကို ဝိညာဉ်လက်နက်များထံ ပေးအပ်ခြင်းက အမှန်တကယ်တော့ ရွေးချယ်စရာကောင်း တစ်ခု ဖြစ်၏။ ဝိညာဉ်လက်နက်များကလည်း ဝိညာဉ်ရေးရာ အနှစ်သာရ၏ သန့်စင်မှုကို လိုအပ်သော်လည်း သိုင်းပညာရှင်များ သကဲ့သို့ သန့်စင်ရန် မလိုအပ်ပေ။

ဝိညာဉ်ရေးရာ အနှစ်သာရတွင် ရောနှောနေသော ထိုစိတ်ပိုင်းဆိုင်ရာ အပိုင်းအစများက ဝိညာဉ်လက်နက် အတွင်း ကြာရှည်စွာ မတည်မြဲနိုင်ဘဲ တဖြည်းဖြည်း ပျောက်ကွယ်သွားလိမ့်မည် ဖြစ်၏။

ချန်ဖေးက သိုင်းကျောင်းတော် အပေါက်ဝတွင် လျှပ်တစ်ပြက် ပေါ်လာသည်။ ရန်ကျုံးယန်က ချန်ဖေးကို အံ့အားသင့်မှုနှင့် ဝမ်းသာမှုတို့ဖြင့် ကြည့်လိုက်၏။ ချန်ဖေးက ဤမျှ တိုတောင်းသော အချိန်အတွင်း သိုင်းကျောင်းတော်ထဲမှ အမှန်တကယ် ပြန်ထွက်လာခဲ့ခြင်း ဖြစ်သည်။

ရန်ကျုံးယန်က သိုင်းကျောင်းတော်ကို နောက်ပြန်လှည့်ကြည့်လိုက်ပြီး ရုတ်တရက် အံ့အားသင့်သွား၏။ ယခင်က သူ သတိမထားမိခဲ့သော်လည်း ယခုအခါ တစ်ချိန်က တောက်ပပြီး လှပခဲ့သော သိုင်းကျောင်းတော်မှာ လုံးဝ ပျက်စီးယိုယွင်းနေပြီ ဖြစ်ကြောင်း သူ သဘောပေါက်သွားသည်။

ဘာဖြစ်သွားတာလဲ…

"ဒီဘက်ကို..."

ချန်ဖေးက ချန်ယွမ်ဓားကို ထမ်းပိုး အဖြစ် ပြန်လည် ပြောင်းလဲလိုက်ပြီး ရက်လုပ်ထားသော ခြင်းတောင်းများကို ဆွဲတင်ကာ သိုင်းကျောင်းတော် အုပ်ချုပ်သူ အရင်က ညွှန်ပြခဲ့သော လမ်းကြောင်းအတိုင်း ထွက်လာခဲ့၏။

လမ်းတစ်လျှောက်တွင် ချန်ဖေးကို မြင်သော လူများစွာက ယခုအခါ သူ့ကို မဆုံတွေ့ချင်သည့်အလား ခပ်ခွာခွာမှ နေကြသည်။ ချန်ဖေး၏ နှလုံးသား အနည်းငယ် လှုပ်ရှားသွား၏။

သိုင်းကျောင်းတော်ရှိ ထူးဆန်းသော ဖြစ်ရပ်များက ဤလူများ၏ နားထဲသို့ ရောက်ရှိသွားပုံရသည်။

သူ တစ်ယောက်တည်း သိုင်းကျောင်းတော်ကို ဖျက်ဆီးပစ်ခဲ့၍ လမ်းပေါ်ရှိ လူများက ချန်ဖေး ဘယ်လို လုပ်ခဲ့သလဲ ဆိုတာကို မသိကြသော်လည်း

သူတို့အတွက် ကြီးမားသော သတိပေးချက် တစ်ခု ဖြစ်စေသည်မှာ သေချာပေသည်။

အလွန်အမင်း မလိုအပ်ပါက ဤလူနှင့် ဝေးဝေးနေခြင်းက အကောင်းဆုံး ဟူသော သတိပေးချက်ဖြစ်သည်။

ချန်ဖေးက သူ၏ လက်ထဲရှိ ကြေးပြားကို ကိုင်ကြည့်လိုက်သည်။ ယခင်က သူ၏ အသိဉာဏ်က မှုန်ဝါးနေခဲ့သဖြင့် ချန်ဖေးက ပိုက်ဆံများကို လေ့လာကြည့်ရှုရန် သဘာဝကျကျ မတွေးခဲ့ဘဲ ပိုက်ဆံ ပိုရှာချင်သည့် မသိစိတ်သာ ရှိခဲ့၏။

သို့သော် ယခု အသိဉာဏ် ပြန်လည် ရောက်ရှိလာပြီ ဖြစ်ရာ ချန်ဖေးက ငွေကြေးများနှင့် ပတ်သက်၍ အလိုအလျောက် သိချင်စိတ် ဖြစ်လာသည်။

ဤမြို့တွင် အရာအားလုံးကို ငွေဖြင့် ကိုယ်စားပြုနိုင်ပုံရ၏။ သိုင်းကျောင်းတော် အုပ်ချုပ်သူ၏ အသက်စွမ်းအင် အများစုက ငွေအဖြစ် ပြောင်းလဲသွားပြီး ချန်ဖေး၏ ခြင်းတောင်းထဲသို့ ရောက်ရှိသွားသည်။

သစ်သီးနှင့် ဆေးကုသမှု အတွက် ပိုက်ဆံပေးခဲ့သူများမှာလည်း သူတို့ ပိုက်ဆံ ထုတ်ပေးပြီးနောက် သိသိသာသာ အားနည်းသွားကြ၏။

ချန်ဖေးက လက်ချောင်းများဖြင့် အနည်းငယ် အားစိုက်လိုက်ရာ ကြေးပြားက ရုတ်တရက် နှစ်ပိုင်း ကျိုးသွားသည်။ ထို့နောက် အက်ကွဲကြောင်းမှ ပျောက်ကွယ်သွားပြီး ချန်ဖေး၏ ခန္ဓာကိုယ် အတွင်းသို့ ဝင်ရောက်သွား၏။

စိတ်ပိုင်းဆိုင်ရာ အပိုင်းအစများ ကင်းမဲ့နေသော၊ အဆုံးစွန်ထိ သန့်စင်နေသော နက်နဲသည့် ယွမ်ချီစွမ်းအင်လေး တစ်ခု... ဤသည်မှာ အသန့်စင်ဆုံးသော အသက်စွမ်းအင်ပင် ဖြစ်သည်။

ချန်ဖေး၏ မျက်လုံးများ အနည်းငယ် တောက်ပသွား၏။ဝိညာဉ်သတ်ဖြတ်ခြင်းကျင့်စဉ်ဖြင့် စုပ်ယူရရှိသော ဝိညာဉ်အနှစ်သာရများနှင့် နှိုင်းယှဉ်ပါက ဤအရင်းအမြစ်မှရရှိသော စွမ်းအင်မှာ ဘေးထွက်ဆိုးကျိုး လုံးဝမရှိဘဲ တိုက်ရိုက်စုပ်ယူ အသုံးပြုနိုင်သည်။

ချန်ဖေးက မြို့ကို မော့ကြည့်လိုက်၏။ ဤနေရာရှိ စည်းမျဉ်းများက ဤအသက်စွမ်းအင်များကို လုံးဝ သန့်စင်ပေးခဲ့ကြောင်း ထင်ရှားလှသည်။

ချန်ဖေးက ခြင်းတောင်းထဲရှိ ကြေးပြား ရာပေါင်းများစွာကို ကြည့်လိုက်၏။ အကယ်၍ သူသာ အားလုံးကို စုပ်ယူမည် ဆိုပါက ချန်ဖေး၏ စိတ်စွမ်းအားက ရုတ်တရက် မြင့်တက်လာမည် ဖြစ်ပြီး ဒွာရသန့်စင်ခြင်း အစောပိုင်းအဆင့်၏ စိတ်စွမ်းအား အဟန့်အတားများကို မည်သည့် ပြဿနာမျှ မရှိဘဲ ဖြတ်ကျော်သွားနိုင်မည် ဖြစ်သည်။

တစ်နည်းအားဖြင့် ချန်ဖေးက ဒွာရသန့်စင်ခြင်း အလယ်အလတ်အဆင့်သို့ မတက်လှမ်းမီ စိတ်စွမ်းအား မလုံလောက်မည်ကို စိုးရိမ်စရာ မလိုတော့ပေ။ စိတ်စွမ်းအား ရုတ်တရက် မြင့်တက်လာခြင်းက ဒွာရများကို ကျင့်ကြံခြင်းကို သဘာဝကျကျ အရှိန်မြှင့်ပေးလိမ့်မည် ဖြစ်၏။

အရေးကြီးဆုံးမှာ ဒွာရသန့်စင်ခြင်း အစောပိုင်းအဆင့်မှ ဒွာရသန့်စင်ခြင်း အလယ်အလတ်အဆင့်သို့ တက်လှမ်းမည့် အတားအဆီးက ချန်ဖေး အတွက် များစွာ လျော့ကျသွားမည် ဖြစ်သည်။

လျောင်ဟန်ချင် ကဲ့သို့သော အခြား ဒွာရသန့်စင်ခြင်း အစောပိုင်းအဆင့် သိုင်းပညာရှင်များမှာ အဆင့်တက်ရန် အခွင့်အရေး မရှာဖွေမီ သူတို့၏ အခြေခံအုတ်မြစ်ကို အချိန်အတိုင်းအတာ တစ်ခုအထိ ပြုစုပျိုးထောင်ပြီး ခိုင်မာအောင် လုပ်ဆောင်ရမည် ဖြစ်ကာ သို့မဟုတ်ပါက သူတို့ အဆင့်တက်ရာတွင် ကျရှုံးနိုင်ချေ ရှိ၏။

သို့သော် ချန်ဖေး၏ အခြေအနေက သူတို့နှင့် နှိုင်းယှဉ်ပါက များစွာ လွယ်ကူနေမည်မှာ သေချာပြီး လုံလောက်သော စိတ်စွမ်းအား ရှိခြင်း၏ အကျိုးကျေးဇူးပင် ဖြစ်သည်။

ချန်ဖေးက ရန်ကျုံးယန်ကို ခေါ်၍ ရှေ့သို့ ဆက်လျှောက်လာခဲ့ရာ နောက်ဆုံးတွင် မြို့တံခါး တစ်ခု အရှေ့၌ ရပ်တန့်သွားကြ၏။

ချန်ဖေးက မြို့တံခါးကို မော့ကြည့်လိုက်ရာ အသက်ရှူကျပ်စေသော လေထု တစ်ခုက သူ့အပေါ်သို့ လွှမ်းခြုံလာသည်။ အသိစိတ်ပင်လယ် အတွင်းရှိ မြူခိုးများက ရုတ်တရက် များစွာ ပိုမို လှုပ်ရှားလာပြီး နတ်ဘုရား သတ်ဖြတ်ခြင်းဓားကို တင်းတင်းကျပ်ကျပ် ရစ်ပတ်ထား၏။

ချန်ဖေး၏ စိတ်ပိုင်းဆိုင်ရာ ပုံသဏ္ဌာန်ကို ရစ်ပတ်နေသော မြူခိုး အမြောက်အမြားပင် ရှိနေပြီး အခြေအနေကို သက်သာစေရန် သူ့ကို ခြေလှမ်း အနည်းငယ် နောက်ဆုတ်သွားရန် အတင်းအကျပ် ဖိအားပေးလိုက်သည်။

သိုင်းကျောင်းတော် အုပ်ချုပ်သူက ဤလမ်းကြောင်းကို မညွှန်ပြမီက ချန်ဖေးက ဤနေရာတွင် ရှိနေခဲ့ပြီး ဖြစ်၏။ သို့သော်လည်း ချန်ဖေး ဖြတ်သွားစဉ်က ထိုနေရာတွင် ဘာမှ မရှိခဲ့ဘဲ ခိုင်ခံ့သော နံရံတစ်ခုသာ ဖြစ်ခဲ့သည်။

သို့သော် ယခု ထိုနံရံက မြို့တံခါး တစ်ခု ဖြစ်လာခဲ့ပြီ ဖြစ်၏။

"ခင်ဗျား ဘာမြင်လဲ..." ချန်ဖေးက ရန်ကျုံးယန်ကို လှည့်ကြည့်၍ မေးလိုက်သည်။

"နံရံ တစ်ခု..."

ရန်ကျုံးယန်က ချန်ဖေးကို အနည်းငယ် သံသယဖြင့် ကြည့်လိုက်၏။ ချန်ဖေးက သူ့ကို ဤနေရာသို့ ခေါ်လာပြီး အချိန်တော်တော်ကြာအောင် ဤနေရာတွင် ရပ်နေခဲ့သဖြင့် ရန်ကျုံးယန်ကို မေးခွန်းများဖြင့် ပြည့်နှက်သွားစေသည်။

နံရံ တစ်ခုကို ဘာလို့ ဆက်ကြည့်နေရတာလဲ…

ချန်ဖေး၏ မျက်မှောင်များ အနည်းငယ် တွန့်ကွေးသွား၏။ သူ တစ်ယောက်တည်းကသာ ဤမြို့တံခါးကို မြင်နိုင်ပြီး ရန်ကျုံးယန်က ယခင်က ချန်ဖေး ကဲ့သို့ပင် နံရံတစ်ခုကိုသာ မြင်နိုင်ကြောင်း ပေါ်လွင်နေသည်။

သိုင်းကျောင်းတော် အုပ်ချုပ်သူ၏ လမ်းညွှန်မှုကြောင့်လား သို့မဟုတ် ချန်ဖေး၏ အသိစိတ် ပြန်လည် ရောက်ရှိလာခြင်းကြောင့်လား သို့မဟုတ် နှစ်ခုစလုံးကြောင့်လား။

"မခုခံနဲ့..."

ချန်ဖေးက ကြေးပြား အနည်းငယ်ကို ချေမွလိုက်ပြီး ရန်ကျုံးယန်၏ နဖူးကို လက်ညှိုးဖြင့် ထောက်လိုက်၏။ ရန်ကျုံးယန် လန့်ဖြတ်သွားပြီး မသိစိတ်မှ ရှောင်တိမ်းရန် ကြိုးစားသော်လည်း ချန်ဖေးက ချက်ချင်း တားဆီးလိုက်သည်။သူ၏ စိတ်ထဲတွင် ရန်ကျုံးယန်က ချန်ဖေးကို ယုံကြည်၏။ သို့မဟုတ်ပါက သူက ချန်ဖေးနောက်သို့ ဤမျှ တစိုက်မတ်မတ် လိုက်ခဲ့မည် မဟုတ်ပေ။

အသက်စွမ်းအင် အဖြစ် ပြောင်းလဲသွားသော ငွေကြေးများက ထက်မြက်သော ဓားတစ်လက်ကဲ့သို့ ရန်ကျုံးယန်၏ အသိစိတ်ပင်လယ်ကို ထိုးဖောက်ဝင်ရောက်သွား၏။ အသိစိတ်ပင်လယ် အတွင်းရှိ မြူခိုးများက နှစ်ခြမ်းကွဲသွားပြီး ရန်ကျုံးယန်၏ စိတ်နှင့် ဝိညာဉ်က ချက်ချင်း နိုးကြားလာကာ သူ့ပတ်ဝန်းကျင်ရှိ အခြေအနေကို နားလည်သွားစေသည်။

"ဒီကို ပြန်ကြည့်ပါဦး... ထူးခြားတာ တစ်ခုခု ရှိလား..."

ရန်ကျုံးယန် စကားပြောချင်နေသည်ကို မြင်သောအခါ ချန်ဖေးက လက်ဝှေ့ယမ်းပြလိုက်၏။ ရန်ကျုံးယန် စကားပြောရပ်သွားပြီး ရှေ့သို့ ကြည့်ကာ မျက်လုံးများကို အနည်းငယ် ကျဉ်းမြောင်းလိုက်သည်။

ရန်ကျုံးယန်၏ စိတ်စွမ်းအားက အဆက်မပြတ် အတက်အကျ ဖြစ်နေသော်လည်း သူ၏ မျက်လုံးထဲတွင် ဤနေရာက နံရံတစ်ခု ဖြစ်နေဆဲပင်။ သို့သော် နံရံတွင် တစ်စုံတစ်ခု မှားယွင်းနေကြောင်း သူ၏ စိတ်က သူ့ကို ပြောနေသော်လည်း ပြဿနာက ဘာလဲဆိုတာကို သူ မသိနိုင်ချေ။

ရန်ကျုံးယန်၏ အမူအရာကို ကြည့်ရင်း ချန်ဖေး မျက်မှောင်ကြုတ်သွား၏။ နံရံတစ်ခု ဖြစ်နေတုန်းပဲလား။ တစ်နည်းအားဖြင့် မြို့ထဲမှ တစ်ယောက်ယောက်၏ လမ်းညွှန်မှု မရှိဘဲ ဤနေရာတွင် ပိတ်မိနေသော ပြင်ပလူများက ထွက်ပေါက်ကိုပင် ရှာတွေ့နိုင်မည် မဟုတ်ပေ။

သို့သော်လည်း ထွက်ပေါက်ကို ညွှန်ပြခြင်းက ဤနေရာရှိ စည်းမျဉ်းများကို ရှင်းလင်းစွာ ချိုးဖောက်ခြင်း ဖြစ်ပြီး သိုင်းကျောင်းတော် အုပ်ချုပ်သူ ကဲ့သို့ပင် မျှော်လင့်ချက် ရောင်ခြည်လေး တစ်ခုသာ ချန်ထားရစ်ခဲ့ပြီး ဖျက်ဆီးခံလိုက်ရလုနီးပါး ဖြစ်၏။

ထို့ကြောင့် သူတို့က ထူးခြားသော အခြေအနေသို့ ရောက်မသွားပါက မြို့ထဲရှိ လူများထံမှ လမ်းညွှန်မှု ရရှိရန် လုံးဝ မဖြစ်နိုင်သလောက်ပင် ဖြစ်သည်။

"ချန်ဖေး... ငါတို့ ကြာကြာ တောင့်ခံနိုင်မယ် မထင်ဘူး..."

ရန်ကျုံးယန်က ရုတ်တရက် ပြောလိုက်ရာ သူ၏ ယခင်က ရှင်းလင်းနေသော မျက်လုံးများက ထိုတိုတောင်းသော အခိုက်အတန့် အတွင်း မှုန်ဝါးလာပြန်၏။ ချန်ဖေးက အသိစိတ်ပင်လယ် အတွင်းရှိ မြူခိုးများကိုသာ ခွဲထုတ်ပေးခဲ့ခြင်း ဖြစ်ပြီး မဖယ်ရှားပေးခဲ့ပေ။

ချန်ဖေး ကိုယ်တိုင်က သူ၏ အသိစိတ်ပင်လယ် အတွင်းရှိ မြူခိုးများကို မဖယ်ရှားနိုင်ပေ။ သူက သူ၏ နတ်အာရုံခံစားမှုပညာဖြင့် တားဆီးထားနိုင်ရုံသာ ဖြစ်၏။

ပုံမှန်အားဖြင့် ဤနေရာတွင် ပိတ်မိနေသော ပြင်ပလူများ အနေဖြင့် အချိန်ကြာမြင့်စွာ သတိရှိနေစေရန် သူတို့၏ အသက်စွမ်းအင်များဖြင့် မြူခိုးများကို အဆက်မပြတ် ဆေးကြောပစ်ရမည် ဖြစ်သည်။ သို့မဟုတ်ပါက သူတို့၏ စိတ်စွမ်းအားက မြူခိုးများ၏ အတားအဆီးကို ဖြတ်တောက်နိုင်လောက်အောင် အားကောင်းရမည် ဖြစ်၏။

သို့သော် ထိုအဆင့်သို့ ရောက်ရှိရန် လူတစ်ယောက် အနေဖြင့် ဒွာရသန့်စင်ခြင်း အထွတ်အထိပ်အဆင့်၏ စိတ်စွမ်းအား လိုအပ်ပေလိမ့်မည်။ နောက်အခြေအနေတစ်ခုမှာ

ထူးခြားသော နတ်အာရုံခံစားမှုပညာကို ပိုင်ဆိုင်ထားသည့် ချန်ဖေး ကဲ့သို့သော သူများ ဖြစ်၏။

ဝိညာဉ်လက်နက်နှင့် ပတ်သက်၍မူ ဒွာရသန့်စင်ခြင်း အဆင့်ကို ကာကွယ်ပေးနိုင်သည့် စိတ်စွမ်းအား ဝိညာဉ်လက်နက်များက အလွန် ရှားပါးလှသည်။

"မစိုးရိမ်ပါနဲ့... ကျွန်တော့်ကို ဒီမှာ စောင့်နေပါ..."

ချန်ဖေးက လမ်းညွှန်မှု အချို့ ပေးပြီးနောက် မြို့တံခါးဆီသို့ လျှောက်သွားလိုက်၏။

အသိစိတ်ပင်လယ် အတွင်းရှိ မြူခိုးများက စတင် ဆူပွက်လာပြီး ချန်ဖေး၏ အမြင်အာရုံက စတင် မှုန်ဝါးလာသည်။ ခြင်းတောင်းထဲရှိ ကြေးပြားများက စတင် ပျောက်ကွယ်သွားပြီး အသက်စွမ်းအင်က ချန်ဖေး၏ စိတ်နှင့် ဝိညာဉ်ကို ကာကွယ်ပေးထား၏။

"ဘယ်သူလဲ..."

အကျယ်ကြီး အော်ဟစ်သံ တစ်ခုက ချန်ဖေး၏ နားထဲတွင် ရုတ်တရက် ထွက်ပေါ်လာပြီး ချန်ဖေးက လှည့်ကြည့်လိုက်သည်။

မြို့တံခါးဘေးတွင် ယခင်က မည်သူမျှ မရှိခဲ့သော်လည်း ရုံးတော်အမှုထမ်း အဝတ်အစား ဝတ်ဆင်ထားသော လူတစ်ယောက်က လေထဲမှ ရုတ်တရက် ပေါ်လာပြီး ထက်မြက်သော ဓားတစ်လက်ကို ကိုင်ဆောင်ကာ ချန်ဖေးကို အေးစက်သော မျက်လုံးများဖြင့် ကြည့်နေ၏။

"ဒီကနေ မြို့ပြင်ကို ထွက်သွားလို့ ရမလား..." ချန်ဖေးက ရုံးတော်အမှုထမ်းကို တည်ကြည်သော အသံဖြင့် မေးလိုက်သည်။

"မြို့စားမင်းရဲ့ အမိန့်အရ မြို့တံခါးတွေကို တစ်လကို တစ်ကြိမ် ဖွင့်မယ်... တခြားအချိန်တွေမှာ အဝင်ကို ခွင့်ပြုပေမဲ့ အထွက်ကို ခွင့်မပြုဘူး..." ရုံးတော်အမှုထမ်းက ချန်ဖေးကို တစ်ချက်ကြည့်၍ အကျယ်ကြီး အော်ပြောလိုက်၏။

“မြို့တံခါးတွေ နောက်တစ်ခါ ဘယ်တော့ ဖွင့်မှာလဲ…”

ချန်ဖေး၏ မျက်လုံးများ အနည်းငယ် တောက်ပသွား၏။ မြို့က တစ်လလျှင် တစ်ကြိမ်သာ ဖွင့်သည် ဆိုသည့် အချက်က ထွက်ခွာရန် ဖြစ်နိုင်သေးကြောင်းကို ညွှန်ပြနေသည်။ ဤမြို့က မျှော်လင့်ချက် ရောင်ခြည်လေး တစ်ခုကို ချန်ထားရစ်ခဲ့၏။ သေချာသည်မှာ အထူး နည်းလမ်း အချို့ မရှိပါက သူက ဤနေရာတွင် စုပ်ယူခံရခြင်း မရှိဘဲ တစ်ရက်ပင် အသက်ရှင်နိုင်မည် မဟုတ်ပေ။ ချန်ဖေး မြင်တွေ့ရချိန်တွင် နောက်ဆုံး ထွက်သက်တွင် ရှိနေပြီး နောက်တစ်နေ့ကို ကျော်လွန်ရန်မဖြစ်နိုင်ပုံ ပေါက်နေသော ကြွက်မိစ္ဆာ ကဲ့သို့ပင် အသက်ရှင်နိုင်မည် မဟုတ်ကြောင်း ရှင်းလင်းနေ၏။

ရုံးတော်အမှုထမ်းက ချန်ဖေး၏ မေးခွန်းကို ကြားသောအခါ သူ ပြန်မဖြေဘဲ သူ၏ မျက်လုံးများကိုသာ မှိတ်ထားလိုက်သည်။

ချန်ဖေး အနည်းငယ် မျက်မှောင်ကြုတ်လိုက်၏။ တိကျသော အချိန်ကာလ တစ်ခု မရှိဘဲ အဆက်မပြတ် စောင့်ဆိုင်းနေရခြင်းက အလွန် ခံစစ်ဆန်လွန်းလှသည်။ ထို့အပြင် မြို့ထဲတွင် မှောင်လာပြီ ဖြစ်ပြီး လမ်းပေါ်တွင် နေထိုင်ခြင်းက အခြား အန္တရာယ်များ ဖြစ်ပေါ်စေနိုင်ကြောင်း ချန်ဖေး မသိစိတ်မှ ခံစားမိ၏။

ချန်ဖေးက သူ၏ ရက်လုပ်ထားသော ခြင်းတောင်းကို တစ်ချက်ကြည့်လိုက်ပြီး ညာဘက်လက်ဖြင့် ညွှန်ပြလိုက်ရာ ကြေးပြား ဆယ်ပြားက လေထဲသို့ ပျံတက်သွားပြီး ရုံးတော်အမှုထမ်းထံ လွင့်ပျံသွားသည်။

ရုံးတော်အမှုထမ်းက သူ၏ မျက်လုံးများကို ပြူးကျယ်စွာ ဖွင့်လိုက်ပြီး ချန်ဖေးကို တစ်ချက်ကြည့်ကာ ကြေးပြား ဆယ်ပြားကို သူ၏ အင်္ကျီလက်စွပ်ထဲသို့ ထည့်လိုက်၏။

"မြို့တံခါးတွေက နောက်နှစ်ရက်အကြာ သန်းခေါင်ယံမှာ ပွင့်လိမ့်မယ်..." ဤသို့ ပြောပြီးနောက် ရုံးတော်အမှုထမ်းက သူ၏ မျက်လုံးများကို ပြန်မှိတ်လိုက်သည်။

ချန်ဖေးက လက်ယှက်၍ နှုတ်ဆက်လိုက်ပြီး မြို့တံခါး ဧရိယာမှ တဖြည်းဖြည်း ဆုတ်ခွာလာခဲ့၏။

ရန်ကျုံးယန်၏ မျက်လုံးများက ရှင်းလင်းမှုနှင့် မှုန်ဝါးမှုကြားတွင် အပြန်အလှန် ပြောင်းလဲနေသည်။ ရန်ကျုံးယန်၏ စိတ်ပိုင်းဆိုင်ရာ ကျင့်ကြံမှုက အမှန်တကယ်တော့ အတော်လေး မှတ်သားလောက်စရာ ကောင်းသော်လည်း အထူး နည်းလမ်းများ မရှိပါက သူက ဤမြူခိုးများ၏ အဆက်မပြတ် ဖိနှိပ်မှုကို လုံးဝ မခံနိုင်ချေ။

ချန်ဖေး ပေါ်လာသည်ကို မြင်သောအခါ ရန်ကျုံးယန်က အမြန် ရှေ့သို့ တိုးသွား၏။ အစောက ရန်ကျုံးယန်သည် ချန်ဖေး ရှေ့သို့ လျှောက်သွားသည်ကို ကြည့်နေခဲ့သော်လည်း ခြေလှမ်း အနည်းငယ် အကြာတွင် ချန်ဖေးက ပျောက်ကွယ်သွားခဲ့သည်။

"အချိန်နှောင်းနေပြီ... အရင်ဆုံး တည်းခိုစရာ နေရာတစ်ခု ရှာကြတာပေါ့..."

ချန်ဖေးက ကောင်းကင်ကို မော့ကြည့်လိုက်ရာ ကောင်းကင်က မီးခိုးရောင် ဖြစ်နေပြီး ညနေစောင်းနေပြီ ဖြစ်၏။

အခန်း (၃၁၇) လေဟာနယ် ဓားအလင်းတန်း

ချန်ဖေးက ရန်ကျုံးယန်ကို ခေါ်၍ ဆေးခန်းမသို့ တိုက်ရိုက် ပြန်သွားခဲ့၏။ ချန်ဖေး မြို့ထဲ၌ နိုးလာချိန်တွင် သူက လမ်းပေါ်တွင် ရောက်နေပြီး ရွေးချယ်စရာ အိမ်မရှိပေ။

ဆန့်ကျင်ဘက် အနေဖြင့် ရန်ကျုံးယန်က ဆေးခန်းမတွင် ပေါ်လာပြီး ထိုနေရာတွင် ပုံမှန်အားဖြင့် အိပ်ဆောင်များ သို့မဟုတ် အလားတူ အဆောက်အအုံများ ရှိတတ်၏။

ချန်ဖေးနှင့် ရန်ကျုံးယန် ပြန်လာသည်ကို မြင်သောအခါ ဆေးခန်းမရှိ လူများ အားလုံးက အနည်းငယ် တွေဝေသွားကြပြီး အထူးသဖြင့် သူတို့က ညအိပ် တည်းခိုချင်ကြောင်း ပွင့်ပွင့်လင်းလင်း ပြောလာသောအခါတွင် ပို၍ တွေဝေသွားကြသည်။

"သူက ဒီမှာ ဆေးကုဖူးတယ်... ကျွန်တော်လည်း ကုဖူးတယ်... လိုအပ်မယ်ဆိုရင် ကျွန်တော်က နောက်ရက် အနည်းငယ် အတွက်တောင် ဒီမှာ ဆေးကုပေးလို့ ရပါတယ်..."

ချန်ဖေးက သူ့ရှေ့ရှိ အုပ်ချုပ်သူကို ကြည့်ကာ တည်ကြည်စွာ ပြောလိုက်၏။ "ဒါကြောင့် ခင်ဗျားတို့ တည်းခိုစရာ စီစဉ်ပေးဖို့ လိုတယ်..."

"ဆေးခန်းမက တည်းခိုစရာ မပေးဘူး..." ဆေးခန်းမ အုပ်ချုပ်သူက မျက်နှာသေဖြင့် ပြောလိုက်သည်။

"မပေးဘူးလား..." ချန်ဖေး၏ အသံက အနည်းငယ် မြင့်တက်သွား၏။

"မပေးဘူး..." အုပ်ချုပ်သူက ပြတ်သားစွာ ပြောလိုက်သည်။

"အဲ့ဒါဆို ခင်ဗျားတို့ ဘယ်မှာ နေလဲ..." ချန်ဖေးက ဆေးခန်းမရှိ အခြား အစေခံများကို လက်ညှိုးထိုးပြလိုက်၏။ ထိုနေရာတွင် လူအတော်များများ ရှိပြီး တစ်ချက် ကြည့်လိုက်ရုံဖြင့် အနည်းဆုံး ဆယ်ယောက်ကျော် ရှိသည်။

"ငါတို့ ဘယ်မှာ နေလဲဆိုတာ မင်းနဲ့ ဘာဆိုင်လို့လဲ..." ဆေးခန်းမ အုပ်ချုပ်သူက ရုတ်တရက် အေးစက်သွားပြီး သူ၏ မျက်လုံးများက ချန်ဖေးကို ကျောချမ်းဖွယ် အကြည့်ဖြင့် စိုက်ကြည့်နေ၏။

"သစ်သီး ယူမလား..."

ချန်ဖေးက ညာဘက်လက်ကို တစ်ချက် ဝှေ့ယမ်းလိုက်ရာ ပန်းသီး တစ်လုံးက သူ့လက်ထဲသို့ ရောက်လာပြီး အုပ်ချုပ်သူထံ ကမ်းပေးလိုက်သည်။

ဆေးခန်းမ အုပ်ချုပ်သူက အဆက်မပြတ် မျက်မှောင်ကြုတ်နေပြီး ချန်ဖေး၏ မေးခွန်းကို လုံးဝ လျစ်လျူရှုထား၏။ ချန်ဖေး၏ ထူးဆန်းမှုကို သူ သိထားပြီး ဖြစ်သည်။ ဤသစ်သီးကို စားခြင်းက မည်သည့် အကျိုးကျေးဇူးမျှ ရရှိစေမည် မဟုတ်ဘဲ ငွေကြေး ဆုံးရှုံးမှုကိုသာ ဖြစ်ပေါ်စေနိုင်ဖွယ် ရှိသည်။

"ခင်ဗျား သိလား... အစောက မြို့ထဲမှာ သိုင်းကျောင်းတော် တစ်ခု ရှိတယ်... အဲဒီကျောင်းတော် ပြိုကျသွားတာသိလား..." ချန်ဖေးက သစ်သီးကို ခြင်းတောင်းထဲ ပြန်ထည့်လိုက်ပြီး ဆေးခန်းမ အုပ်ချုပ်သူကို ကြည့်ကာ ရုတ်တရက် တိုးတိုးလေး ပြောလိုက်၏။

"မင်း ငါ့ကို ခြိမ်းခြောက်နေတာလား..."

ဆေးခန်းမ အုပ်ချုပ်သူက မျက်လုံးများကို ပြူးကျယ်လိုက်ရာ ကျောချမ်းဖွယ် အရှိန်အဝါ တစ်ခုက လေထဲသို့ ရုတ်တရက် ပြည့်နှက်သွား၏။

ဘေးတွင် ရပ်နေသော ရန်ကျုံးယန်က အလိုအလျောက် တုန်ယင်သွားပြီး ဆေးခန်းမ အုပ်ချုပ်သူကို ထိတ်လန့်သော အကြည့်ဖြင့် ကြည့်လိုက်သည်။ အစောက ပြန်လာရာ လမ်းတွင် ရန်ကျုံးယန်၏ အသိဉာဏ်က တစ်ဖန် ဖိနှိပ်ခံလိုက်ရပြီး သူက မည်သူမည်ဝါ ဖြစ်ကြောင်းကို ထပ်မံ မေ့လျော့သွားခဲ့၏။

တစ်ခုတည်းသော အရာမှာ ချန်ဖေး အပေါ် သူ့၏ ယုံကြည်မှုက ပိုမို အားကောင်းလာခြင်း ဖြစ်သည်။

"ဟုတ်တယ်... ငါ မင်းကို ခြိမ်းခြောက်နေတာ... ငါ ဒီနေရာကိုလည်း အဲဒီနည်းလမ်းအတိုင်း ဖျက်ဆီးပစ်နိုင်မလား ဆိုတာ ခန့်မှန်းကြည့်လေ..."

ချန်ဖေးက ဆေးခန်းမ အုပ်ချုပ်သူ၏ မျက်လုံးများကို တည့်တည့် စိုက်ကြည့်လိုက်ပြီးနောက် ရက်လုပ်ထားသော ခြင်းတောင်းကို ညင်သာစွာ ပုတ်လိုက်၏။ အတွင်းမှ တချွင်ချွင် အသံတစ်ခု ထွက်ပေါ်လာပြီး ကြေးပြား ရာပေါင်းများစွာ အနည်းဆုံး ရှိနေကြောင်း ညွှန်ပြနေသည်။

"ငါ့ခြင်းတောင်းထဲက ပိုက်ဆံတွေ ဘယ်က ရလာတယ်လို့ မင်း ထင်လဲ..." ချန်ဖေးက တိုးညှင်းသော အသံဖြင့် မေးလိုက်၏။

ဆေးခန်းမ အုပ်ချုပ်သူ၏ မျက်လုံးများထဲရှိ အဆိပ်အတောက်များက သူ၏ မျက်လုံးပေါက်များကို ဖောက်ထွက်လာတော့မည့်အလား ဖြစ်နေသော်လည်း ချန်ဖေးက မည်သည့် ကြောက်ရွံ့မှုမျှ မပြသခဲ့ပေ။

အချိန်ကုန်လွန်လာသည်နှင့်အမျှ ချန်ဖေး၏ အမူအရာက တဖြည်းဖြည်း အေးစက်လာပြီး လျစ်လျူရှုထားသော ဆေးခန်းမ အုပ်ချုပ်သူက အကြောင်းပြချက် မရှိဘဲ အနည်းငယ် မသက်မသာ ဖြစ်လာ၏။

ချန်ဖေးက သိုင်းကျောင်းတော်ကို ဘယ်လို ဖြိုချလိုက်သလဲ ဆိုတာကို ဘယ်သူမှ အတိအကျ မသိကြသော်လည်း ဆေးခန်းမ အုပ်ချုပ်သူက ချန်ဖေးက ထိုလူနာများကို ကစားနေသည်ကို မျက်မြင်ကိုယ်တွေ့ မြင်ခဲ့ရသည်။

ဤအချက် နှစ်ချက်ကို ပေါင်းစပ်လိုက်သောအခါ ချန်ဖေးက ချဲ့ကားပြောဆိုနေခြင်း မဟုတ်ကြောင်း ထင်ရှားပေသည်။

အကယ်၍ ချန်ဖေးကို ကျေနပ်လောက်သော အဖြေတစ်ခု မပေးပါက သူက ဆေးခန်းမကို အမှန်တကယ် ဖြိုချပစ်နိုင်ချေ ရှိ၏။

ဤရလဒ်ကို စဉ်းစားလိုက်သောအခါ ဆေးခန်းမ အုပ်ချုပ်သူက သူ၏ အရှိန်အဝါကို ပြန်ရုပ်သိမ်းလိုက်ရတော့သည်။ တည်းခိုစရာ ပေးရုံလေးပါပဲ... ဒီလောက် ကြီးမားတဲ့ အန္တရာယ်ကို ယူဖို့ မလိုပါဘူး။

"တစ်ညကို ကြေးပြား ဆယ်ပြား..." ဆေးခန်းမ အုပ်ချုပ်သူက မှုန်ကုပ်ကုပ်ဖြင့် ပြောလိုက်၏။

"တစ်ပြား..." ချန်ဖေး ခေါင်းခါ၍ ပြတ်သားစွာ ငြင်းဆိုလိုက်သည်။

ဆေးခန်းမ အုပ်ချုပ်သူ၏ မျက်လုံးများက အံ့အားသင့်မှုကြောင့် ပြူးကျယ်သွား၏။ ဤသည်က ထက်ဝက် ဖြတ်ချလိုက်ခြင်း မဟုတ်ဘဲ ခြေကျင်းဝတ်အထိ ဖြတ်ချလိုက်ခြင်းပင်။ ဒေါသလှိုင်းလုံး တစ်ခုက သူ၏ ခေါင်းထဲသို့ ပြေးဝင်လာသော်လည်း သူက ထိန်းချုပ်လိုက်ရသည်။

"ကောင်းပြီ... တစ်ပြား..." ဆေးခန်းမ အုပ်ချုပ်သူက သွားကြိတ်၍ ပြောလိုက်ရာ ချွန်ထက်သော သွားများက သတ္တု တစ်ခုနှင့်အတူ ထိခိုက်မိသွားသော အသံထွက်ပေါ်လာ၏။

ဆယ့်ငါးမိနစ် အကြာတွင် ချန်ဖေးက ဆေးခန်းမ နောက်ဘက်ရှိ အိပ်ဆောင်သို့ ပြောင်းရွှေ့သွားပြီး အပြင်ဘက်ရှိ ကောင်းကင်က ပုံမှန်မဟုတ်သော အရှိန်ဖြင့် မှောင်မိုက်လာသည်။

ညရောက်လာပြီ။

အိမ်ထဲတွင် တစ္ဆေစိမ်း အလင်းရောင် တစ်ခု လင်းလက်နေပြီး နံရံပေါ်တွင် ချန်ဖေးနှင့် ရန်ကျုံးယန်တို့၏ အရိပ်များက သွားဖြဲနေသော မိစ္ဆာများကဲ့သို့ ဆန့်ထွက်လာကာ ကျုံ့ဝင်သွားကြ၏။

ရန်ကျုံးယန်က ကုတင်ပေါ်တွင် အိပ်ပျော်သွားသည်။ သူ၏ ဝိညာဉ်ရေးရာ ဉာဏ်ပညာများ မှုန်ဝါးသွားပြီးနောက် ရန်ကျုံးယန်က သာမန် လူတစ်ယောက်ကဲ့သို့ ပြုမူလာပြီး သူ၌ ကြီးမားသော စွမ်းအားများ ရှိနေကြောင်းကို လုံးဝ မေ့လျော့သွားခဲ့၏။

စိတ်စွမ်းအားနှင့် မြူခိုးများ ကြားရှိ အဆက်မပြတ် ရုန်းကန်မှုကြောင့် သူက အလွန်အမင်း ပင်ပန်းနွမ်းနယ်လာပြီး အချိန်တိုအတွင်းမှာပင် အိပ်မောကျသွားသည်။

ချန်ဖေးက တစ်ဖက်တွင် တင်ပျဉ်ခွေ ထိုင်၍ ခြင်းတောင်းထဲရှိ ကြေးပြားများကို ကြည့်နေ၏။ ချန်ဖေး၏ အကြည့်အောက်တွင် ကြေးပြားများက တစ်ပြားပြီး တစ်ပြား လွင့်မျောလာကြသည်။ ချန်ဖေးက ဤကြေးပြားများကို ကြည့်၍ တစ်ခဏမျှ စဉ်းစားပြီးနောက် ကြေးပြားများက တစ်ပြားပြီး တစ်ပြား အက်ကွဲသွား၏။

သန့်စင်သော အသက်စွမ်းအင်များ လွင့်ပျံလာပြီး ချန်ဖေးက ညင်သာစွာ ရှူရှိုက်လိုက်ရာ စွမ်းအား အငွေ့အသက်များက သူ၏ ခန္ဓာကိုယ် အတွင်းသို့ စုပ်ယူခံလိုက်ရသည်။

ချန်ဖေး၏ ယခင်က ထိန်းချုပ်ထားသော စိတ်ပိုင်းဆိုင်ရာ အခြေအနေက ရုတ်တရက် တက်ကြွလာပြီး ဝိညာဉ်ကြိုးမျှင် ကျင့်စဉ်က အသက်ဝင်လာကာ ဤအသက်စွမ်းအင်များကို သူ၏ စိတ်ထဲသို့ ပေါင်းစပ်ပေးလိုက်၏။

ရေကဲ့သို့ ချောမွေ့စွာဖြင့် ချန်ဖေးက ဤအသက်စွမ်းအင်များကို မည်သည့် ခုခံမှုမျှ မခံစားရဘဲ သန့်စင်လိုက်ပြီး ဤစွမ်းအားများကို သူ၏ ကိုယ်ပိုင် စွမ်းအား အဖြစ်သို့ ချောမွေ့စွာ ပြောင်းလဲလိုက်သည်။

အချိန်တိုအတွင်းမှာပင် ချန်ဖေးက စိတ်စွမ်းအား မြင့်တက်လာခြင်းကို စတင် ခံစားလာရ၏။

အရည်အသွေးမြင့် ဝိညာဉ်ပစ္စည်း အချို့ကို သန့်စင်ပြီးနောက် ချန်ဖေး၏ စိတ်စွမ်းအားက ဒွာရ သုံးဆယ်ကို ထိန်းချုပ်နိုင်သည့် အဆင့်သို့ ရောက်ရှိနေပြီ ဖြစ်သည်။ ယခု စိတ်စွမ်းအား မြင့်တက်လာခြင်းနှင့်အတူ သူက ချက်ချင်းပင် ဒွာရ သုံးဆယ့်တစ်ပေါက်ကို ထိန်းချုပ်နိုင်သည့် အဆင့်သို့ ရောက်ရှိသွား၏။ အနည်းငယ်မျှ ရပ်တန့်ခြင်း သို့မဟုတ် နှေးကွေးခြင်း မရှိဘဲ ကြေးပြားများ ဆက်လက် အက်ကွဲနေသည်နှင့်အမျှ ချန်ဖေး၏ စိတ်စွမ်းအားက သူ၏ လျင်မြန်သော တိုးတက်မှုကို ဆက်လက် ထိန်းသိမ်းထားသည်။

သုံးဆယ့်နှစ်... သုံးဆယ့်သုံး... သုံးဆယ့်လေး... တစ်နာရီပင် မပြည့်မီ အချိန်အတွင်း ချန်ဖေး၏ စိတ်စွမ်းအားက ဒွာရ သုံးဆယ့်ခြောက်ပေါက်ကို ထိန်းချုပ်နိုင်သည့် အမှတ်သို့ ရောက်ရှိသွား၏။

ဤသည်မှာ ဒွာရသန့်စင်ခြင်း အစောပိုင်းအဆင့် သာလျှင် ရရှိနိုင်သော စိတ်စွမ်းအား ပြင်းအား ဖြစ်သည်။ ဒွာရသန့်စင်ခြင်း အဆင့် အများစုက ဤစိတ်စွမ်းအား အဆင့်ကို အချိန်နှင့်အမျှ စုဆောင်းရမည် ဖြစ်၏။

ဂိုဏ်းအနည်းငယ်ကသာ သူတို့၏ တပည့်များကို နတ်ဘုရား ဆေးလုံးများဖြင့် ဆုချီးမြှင့်လေ့ရှိကြသည်။

နတ်တိမ်ဓားဂိုဏ်း ကဲ့သို့သော အင်အားကြီး ဂိုဏ်းတစ်ခု သို့မဟုတ် လျောင်ဟန်ချင် ပင်လျှင် စိတ်စွမ်းအား အတွက် လက်ရှိ အနေအထားသို့ ရောက်ရှိရန် အနှစ်နှစ်ဆယ်ကျော် အချိန်ယူခဲ့ရ၏။

ဤသန့်စင်ခြင်း လုပ်ငန်းစဉ်က မပြီးဆုံးသေးပေ။ အချိန်ကုန်လွန်လာသည်နှင့်အမျှ ခေတ္တ ရပ်တန့်ပြီးနောက် စိတ်စွမ်းအားက ဒွာရ သုံးဆယ့်ခုနစ်ပေါက်ကို ထိန်းချုပ်နိုင်သည့် အမှတ်သို့ ဖောက်ထွက်သွားသည်။

ဤအဆင့်တွင် ချန်ဖေး၏ စိတ်စွမ်းအားက အနည်းငယ် သန့်စင်သွားသကဲ့သို့ ဖြစ်ပြီး ပိုမို သန့်စင်ကာ လျင်မြန်လာ၏။

သေချာသည်မှာ ဤသည်က အစစ်အမှန် အသွင်ပြောင်းလဲမှု မဟုတ်သေးပေ။

ချန်ဖေး၏.ဒွာရ ကျင့်ကြံမှုက ဒွာရသန့်စင်ခြင်း အလယ်အလတ်အဆင့်သို့ ရောက်ရှိမှသာလျှင် စိတ်စွမ်းအားက ခန္ဓာကိုယ်နှင့်အတူ အသွင်ပြောင်းလဲသွားမည် ဖြစ်၏။

သို့တိုင်အောင် ချန်ဖေး၏ လက်ရှိ အကျိုးအမြတ်များက အတော်လေး များပြားနေပြီး ဤအမြတ်အစွန်းက ပြီးဆုံးရန် ဝေးနေသေးသည်။ သူက ကြေးပြားများ၏ ထက်ဝက်ကိုသာ အသုံးပြုရသေးပြီး ချန်ဖေး၏ သန့်စင်မှုက ဆက်လက် ဖြစ်ပေါ်နေ၏။

သုံးဆယ့်ရှစ်... သုံးဆယ့်ကိုး... လေးဆယ်... ပြီးတော့ လေးဆယ့်တစ်ပေါက်ကို ထိန်းချုပ်နိုင်ပြီ။

အချိန်ကုန်လွန်လာသည်နှင့်အမျှ စိတ်စွမ်းအား တိုးတက်မှုက နှေးကွေးလာသည်။ ချန်ဖေးတွင် ကြေးပြား တစ်ရာခန့် ကျန်ရှိနေသောအခါ သူက တဖြည်းဖြည်း ရပ်တန့်လိုက်၏။ စိတ်စွမ်းအား၏ ချောမွေ့စွာ စီးဆင်းမှုကို ခံစားရင်း ချန်ဖေးက လေချဉ်တစ်ချက် မှုတ်ထုတ်လိုက်ပြီး မျက်လုံးများကို ဖြည်းညင်းစွာ ဖွင့်လိုက်သည်။

စိတ်စွမ်းအားက ရုတ်တရက် မြင့်တက်သွားပြီး ပေါ့ပါးတဲ့ ခံစားချက်က ပြန်ရောက်လာသည်။ ချန်ဖေး၏ အာရုံခံနိုင်စွမ်း အတွင်း၌ သူက နဂါးဆင်နှိမ်နင်းခြင်းကို အဆက်မပြတ် အသက်သွင်းပြီး ဤထူးခြားမှုကို တဖြည်းဖြည်း ဖိနှိပ်ကာ နောက်ဆုံးတွင် လုံးဝ ဖယ်ရှားပစ်လိုက်၏။

သူ၏ ထိန်းချုပ်မှု အောက်တွင် ဒွာရ လေးဆယ့်တစ်ပေါက် ရှိနေပြီး နတ်ဘုရား သတ်ဖြတ်ခြင်းဓားက မြူခိုးများကို ဖယ်ရှားပေးထားသဖြင့် ချန်ဖေး၏ စစ်မှန်သော စိတ်စွမ်းအားကို ဖိနှိပ်ထားရန် မလိုအပ်တော့ချေ။

အကယ်၍ ချန်ဖေး၏ စိတ်စွမ်းအားက ဆက်လက် ကြီးထွားနေမည် ဆိုပါက ချန်ဖေး အပေါ် မြူခိုးများ၏ လွှမ်းမိုးမှုက လုံးဝ လျစ်လျူရှုနိုင်သည့်အထိ လျော့ကျသွားမည် ဖြစ်၏။

အကယ်၍ ကျင့်ကြံမှုက ဒွာရပေါင်းစည်းခြင်း အဆင့်သို့ ရောက်ရှိနိုင်မည် ဆိုပါက ယခုလို စည်းမျဉ်း မျိုးစုံဖြင့် ကန့်သတ်ခံရမည့်အစား ဤတစ္ဆေမြို့တော်ကို တိုက်ရိုက် ဆွဲဖြဲပစ်နိုင်ပေလိမ့်မည်။

ချန်ဖေးတွင် ကြေးပြား တစ်ရာခန့် ကျန်ရှိနေသေးသော်လည်း အားလုံးကို မသန့်စင်ဘဲ အရေးပေါ် အခြေအနေများ အတွက် သိမ်းဆည်းထားလိုက်၏။ မည်သို့ပင်ဖြစ်စေ မြို့တံခါးများက နောက်နှစ်ရက်အကြာ သန်းခေါင်ယံ အချိန်အထိ ပွင့်မည် မဟုတ်ဘဲ ထိုနှစ်ရက် အတွင်း ဘာတွေ ဖြစ်လာမလဲ ဆိုတာကို မည်သူမျှ ခန့်မှန်း၍ မရနိုင်ချေ။

"ဟင်..."

ချန်ဖေးက မြင့်တက်လာသော စိတ်စွမ်းအားကြောင့် ဖြစ်ပေါ်လာသည့် သိမ်မွေ့သော အပြောင်းအလဲများကို အာရုံခံနေစဉ် သူက ရုတ်တရက် မော့ကြည့်လိုက်ပြီး အိမ်အပြင်ဘက်မှ အသံများကို နားစွင့်ရန် နားရွက်များကို လှုပ်ခါလိုက်၏။

"ဒေါက်... ဒေါက်... ဒေါက်..."

အိမ်အပြင်ဘက်မှ သို့မဟုတ် ပို၍ တိကျစွာ ပြောရလျှင် ပင်မလမ်းမကြီးပေါ်မှ ခြေသံ သဲ့သဲ့လေးကို ကြားလိုက်ရသည်။

ညကျလာသည်နှင့်အမျှ မီဝမ်မြို့ တစ်ခုလုံး တိတ်ဆိတ်သွား၏။ အပြင်ဘက် ပင်မလမ်းမကြီးပေါ်တွင် ဖြစ်စေ၊ ဆေးခန်းမ အတွင်းတွင် ဖြစ်စေ လူသား ဖြစ်စေ၊ တစ္ဆေ ဖြစ်စေ လူတိုင်းက အဆောက်အအုံများ အတွင်း၌ ပုန်းအောင်းနေကြသည်။

ထို့ကြောင့် ရုတ်တရက် ထွက်ပေါ်လာသော ခြေသံများက အထူး ရှင်းလင်းနေ၏။

"အပူချိန် ကျလာနေတယ်..."

ချန်ဖေးက ပြတင်းပေါက် မှန်များပေါ်တွင် နှင်းခဲများ စုဖွဲ့လာသည်ကို ကြည့်နေ၏။ အခန်း အပူချိန်က အံ့မခန်း အရှိန်ဖြင့် ကျဆင်းနေသည်။ တဖျပ်ဖျပ် လင်းနေသော ကျောချမ်းဖွယ် တစ္ဆေစိမ်း ဖယောင်းတိုင်မီးက တစ်ခဏအကြာတွင် ငြိမ်းသွား၏။

အခန်း တစ်ခုလုံး မျက်တောင်တစ်ခတ် အတွင်းမှာပင် အမှောင်ထုထဲသို့ ကျရောက်သွားသည်။

"ဒေါက်... ဒေါက်... ဒေါက်..."

လမ်းပေါ်ရှိ ခြေသံများက တဖြည်းဖြည်း ရှင်းလင်းလာပြီး လူမရေမတွက်နိုင်အောင် အတူတကွ လျှောက်လာနေသကဲ့သို့ ဖြစ်နေသော်လည်း အနီးကပ် သေချာ နားထောင်ကြည့်သောအခါ အသံတစ်သံတည်းသာ ပဲ့တင်ထပ်နေ၏။

ခြေသံများ၏ ပဲ့တင်သံက လူတစ်ယောက်၏ နှလုံးသားကို ထုနှက်နေသကဲ့သို့ ခံစားရပြီး ခြေလှမ်း တစ်လှမ်းစီက ရင်ဘတ်ကို ကျပ်သွားစေကာ ဤဖိနှိပ်ထားသော စိတ်ပျက်မှုနှင့် စိတ်အနှောင့်အယှက် ဖြစ်မှုများကို ဖြေဖျောက်ရန် အကျယ်ကြီး အော်ဟစ်ချင်စိတ် ပေါ်လာစေသည်။

ရန်ကျုံးယန်က သူ၏ အိပ်စက်နေချိန်၌

ဂနာမငြိမ်စွာ ဟိုဘက်ဒီဘက် လူးလှိမ့်လာပြီး တစ်စုံတစ်ခုက သူ့ကို တဖြည်းဖြည်း ရစ်ပတ်လာနေသကဲ့သို့ ဖြစ်နေ၏။

ချန်ဖေး မျက်လုံးများကို ကျဉ်းမြောင်းလိုက်ပြီး အပြင်ဘက်သို့ ဖောက်ထွက် မြင်နိုင်ရန် ကြိုးစားနေသည့်အလား နံရံကို စိုက်ကြည့်နေသည်။ ထူးခြားသော အရှိန်အဝါ တစ်ခုက တစ်စုံတစ်ခု၏ ဆွဲငင်မှုကြောင့် သူတို့ထံသို့ တည့်မတ်စွာ ချဉ်းကပ်လာ၏။

ကုတင်ပေါ်တွင် ရန်ကျုံးယန်၏ ခန္ဓာကိုယ်က မသိစိတ်မှ ကွေးကွေးလေး ဖြစ်သွားပြီး သူ၏ နှုတ်ခမ်းများက ခရမ်းရောင် သန်းလာကာ သူ၏ ခန္ဓာကိုယ် အတွင်းရှိ ယွမ်စွမ်းအင်က ချိတ်ပိတ်ခံထားရပုံရပြီး မည်သည့် အတက်အကျမျှ မရှိဘဲ ရန်ကျုံးယန်ကို အနည်းငယ်မျှပင် ကာကွယ်မှု မပေးနိုင်ချေ။

ချန်ဖေး မျက်မှောင်ကြုတ်လိုက်၏။ အမှောင်ထုထဲရှိ မီဝမ်မြို့က အမှန်တကယ်ပင် ကြောက်မက်ဖွယ် ကောင်းလှ၍ အိမ်ထဲမှာ ပုန်းနေရင်တောင် ဤထိတ်လန့်မှုကနေ မလွတ်မြောက်နိုင်ဘူး ဆိုတဲ့ အဓိပ္ပာယ်လား။

"ဝှီး..."

အပြင်ဘက်တွင် ရုတ်တရက် တိုက်ခတ်လာသော လေပြင်း တစ်ချက်က ပြတင်းပေါက် တစ်ခုလုံးကို လှုပ်ခါသွားစေရာ တကျွိကျွိ အသံများ ထွက်ပေါ်လာ၏။ ထိုအခိုက်အတန့်တွင် ချီစွမ်းအင် အငွေ့အသက် တစ်ခုက အပြင်ဘက်တွင် ရပ်နေသည်။ ချန်ဖေးက ထိုချီစွမ်းအင် အငွေ့အသက်က အိမ်ကို စောင့်ကြည့်နေကြောင်း ခံစားသိရှိနိုင်၏။

သို့မဟုတ် ပို၍ တိကျစွာ ပြောရလျှင် အခန်းထဲရှိ လူများကို စိုက်ကြည့်နေခြင်း ဖြစ်သည်။

"ရှူး..."

နတ်အာရုံခံစားမှု အတွင်း၌သာ ပဲ့တင်ထပ်နေပုံရသော စူးရှသည့် လေချွန်သံ တစ်ခုက ချန်ဖေး အပေါ်သို့ လွှမ်းခြုံသွားရာ သူ၏ နဖူးပေါ်ရှိ သွေးကြောများကို ထောင်တက်လာစေ၏။

ချန်ဖေး၏ မျက်လုံးများ ပွင့်လာသည်။ သူ ပတ်ဝန်းကျင်ကို ကြည့်လိုက်ရာ ညအချိန် တစ်ချိန်ချိန်တွင် သူ၏ ပတ်ဝန်းကျင်က ပြောင်းလဲသွားကြောင်း သဘောပေါက်လိုက်၏။ ချန်ဖေးက အိမ်ထဲတွင် မရှိတော့ဘဲ ထူထပ်သော မြူခိုးများသာ ကျန်ရစ်တော့သည်။

"ချန်ဖေး..."

အဝေးမှ ခေါ်သံတစ်ခု ထွက်ပေါ်လာပြီး အလွန် နွေးထွေးကာ ရင်းနှီးနေပြီး နှစ်ပေါင်းများစွာ မတွေ့ရသော သူငယ်ချင်း တစ်ယောက်ကဲ့သို့ပင်။ ရိုးရှင်းသော ခေါ်သံ တစ်ခု ဖြစ်သော်လည်း ချန်ဖေး အတွက် မရေမတွက်နိုင်သော မှတ်ဉာဏ်များကို ချက်ချင်း ပြန်လည် နိုးကြားလာစေ၏။

"ချန်ဖေး..."

မြူခိုးများ အတွင်းမှ ပုံရိပ်တစ်ခု ပေါ်လာပြီး သူတို့ထံသို့ ဖြည်းဖြည်းချင်း လျှောက်လာသည်။ ချန်ဖေး၏ အာရုံစိုက်မှုက ဤပုံရိပ်ထံသို့ အလိုအလျောက် အပြည့်အဝ ဆွဲငင်ခံလိုက်ရပြီး ပုံရိပ်က မကြာမီ ပေါ်လာလိမ့်မည်ဟု မျှော်လင့်ချက်များဖြင့် ပြည့်နှက်နေသကဲ့သို့ ဖြစ်နေ၏။

နတ်ဘုရားသတ်ဖြတ်ခြင်းဓား….

နတ်ဘုရားသတ်ဖြတ်ခြင်းဓား….

နတ်ဘုရားသတ်ဖြတ်ခြင်းဓား….

ပုံရိပ်၏ လက်နှင့် ခြေထောက်များက မြူခိုးများ အတွင်းမှ ထွက်ပေါ်လာချိန်မှာပင် အရိပ်ရောင်ပြန် နတ်ဘုရားသတ်ဖြတ်ခြင်းဓား သုံးချက် ဆက်တိုက် လေဟာနယ်ကို ဖြတ်သန်း လင်းလက်သွားပြီး ပုံရိပ်၏ ခန္ဓာကိုယ်ကို ဖောက်ထွင်းသွား၏။

"ရှူး..."

စူးရှပြီး နားကွဲမတတ် လေချွန်သံက ထပ်မံ ထွက်ပေါ်လာသည်။ ချန်ဖေး မျက်လုံးများကို ထပ်မံ ဖွင့်လိုက်ရာ အခန်းထဲသို့ ပြန်ရောက်နေပြီ ဖြစ်၏။ ယခုလေးတင် ဖြစ်ပျက်ခဲ့သမျှ အားလုံးက ပုံရိပ်ယောင် တစ်ခုကဲ့သို့ပင်။

ချန်ဖေးက ရန်ကျုံးယန်ကို လှည့်ကြည့်လိုက်ရာ သူ၏ အသက်စွမ်းအင်များက ၃၀ ရာခိုင်နှုန်းကျော် ပျောက်ကွယ်သွားပြီ ဖြစ်၏။