အခန်း (၂၄၈၅-၂၄၈၆)

အပိုင်း(၂၄၈၅)

"..."

ဝေ့ဝူယင် စုမေ့၏ စကားကြောင့် အံ့ဩသွားခဲ့သည်။ သူ ဤထင်မြင်ချက်ကို မမျှော်လင့်ထားခဲ့ပေ။ ဘာကြောင့်လဲဟု မေးချင်စိတ်က လျှာဖျားတွင် တစ်ဆို့နေသော်လည်း သူ နှုတ်မှ ထုတ်မပြောခဲ့ပေ။

"ကောင်းပြီလေ..."

စုမေ့နှင့် ပတ်သက်လာလျှင် ဝေ့ဝူယင် အမြဲတမ်း ပြတ်သားလေ့ရှိသည်။ စုမေ့က မလုပ်နဲ့ ဆိုလျှင် ထိုအရာက တကယ်တမ်း မလုပ်သင့်သောကြောင့်သာ ဖြစ်ပေလိမ့်မည်။

စုမေ့သည် သူ၏ မျက်လုံးများကို မျက်တောင်မခတ်ဘဲ ဆက်လက် စိုက်ကြည့်နေခဲ့သည်။ သို့သော်လည်း ဝေ့ဝူယင်က မည်သည့် မေးခွန်းမှ ထပ်မမေးသောအခါ သူမ၏ နှလုံးသားထဲတွင် နွေးထွေးမှု တစ်ခုကို ခံစားလိုက်ရသည်။ ထို့ပြင် ခြွင်းချက်မရှိ ယုံကြည်မှု၏ စိတ်ခံစားချက်အထိအတွေ့ကိုလည်း ခံစားလိုက်ရသည်။ ၎င်းက သူမ၏ တင်းမာနေသော မျက်နှာအမူအရာကို အပြုံးတစ်ခုအဖြစ် အရည်ပျော်သွားစေသည်။ ထိုအရာအားလုံးက သူမ တစ်ဦးတည်းထံသို့သာ စုရုံးရောက်ရှိသွားသကဲ့သို့ပင်။

"ဘာကြောင့်လဲ ဆိုတာကိုတော့ ကျွန်မ ရှင်းမပြတတ်ဘူး... ရှင် စောင့်သင့်တယ်လို့ပဲ ခံစားနေရတယ်..."

စုမေ့က မည်သည့် သက်သေအထောက်အထားမှ မပါဘဲ ပြောလိုက်သည်။

"အေးပါ..."

ဝေ့ဝူယင်က ထပ်ပြောလိုက်သည်။

စုမေ့က မျက်တောင်ခတ်လိုက်ပြီး ကိုယ်ဟန်နေထားကို ဖြေလျှော့လိုက်ကာ သူမ၏ လက်နှစ်ဖက်ကို ငုံ့ကြည့်လိုက်သည်။

"အဲဒါကလေ..."

သန်မာသော လက်တစ်ဖက်က သူမ၏ လက်ထဲသို့ တိုးဝင်လာပြီး ညင်သာစွာ ဆုပ်ကိုင်ထားလိုက်သည်။ သူမ မော့ကြည့်လိုက်သောအခါ ကြင်နာမှုနှင့် နားလည်မှုများ အပြည့်ပါဝင်နေသော ဝေ့ဝူယင်၏ ငွေရောင် မျက်လုံးများကို တွေ့လိုက်ရ၏။

စုမေ့သည် မည်သို့ ရှင်းပြရမည်ကို မသေချာသော်လည်း သူမ၏ အမျိုးသားကို မည်သည့် ရှင်းပြချက်မှ ပေးစရာမလိုကြောင်းကို အပြည့်အဝ နားလည်သွားခဲ့သည်။ နောက်ဆုံးတွင် သူမသည် ဆိုဖာပေါ်တွင် သူ့ကို မှီထားရင်း တစ်ဦးနှင့်တစ်ဦး၏ အသက်ရှူသံများနှင့် နှလုံးခုန်သံများကို ခံစားပျော်မွေ့နေမိသည်။

သူတို့ နှစ်ဦးစလုံး မသိခဲ့ကြသည်ကား အခြားသော အချိန်လမ်းကြောင်း တစ်ခုတွင် လွန်ခဲ့သော နှစ်အနည်းငယ်က အနည်းငယ် သွေဖည်သွားခဲ့သည့် ဝေ့ဝူယင် တစ်ယောက် ရှိနေခဲ့ခြင်းပင်။ သူသည် ညစာစားပွဲသို့ အထက်တန်းစားများကို စုစည်းရာတွင် ကြီးမားသော အောင်မြင်မှု ရရှိပြီးနောက် ယွီစွန်းလီကို ပိုမိုမြင့်မားသော အဆင့်အတန်းများနှင့် များပြားလှသော ယဉ်ကျေးမှုများကို ထိတွေ့ခွင့်ရစေရန် အစွမ်းကုန် သန့်စင်ခြင်း ဂလက်ဆီ အတွင်းရှိ မူလအာရုဏ်ဦး နန်းတော် သို့ ခေါ်ဆောင်လာခဲ့သည်။

သူတို့၏ ပေါင်းစည်းခြင်းက ထူးကဲစွာ အံ့မခန်းဖြစ်ခဲ့ပြီး၊ လေ့လာစောင့်ကြည့်နိုင်စွမ်းထက် ကျော်လွန်သော အင်အားစုများကပါ ဂုဏ်ပြုခဲ့ကြသည်။ ထိုအရာက အလွန်တရာ အံ့ဩဖွယ်ကောင်းလွန်းလှသဖြင့် ဂလက်ဆီငယ် နှစ်ဆယ့်ငါးခု၊ ဂလက်ဆီကြီး ခြောက်ခုနှင့် ကန့်သတ် ဂလက်ဆီ နှစ်ခု အတွင်းရှိ အထွတ်အထိပ် တည်ရှိမှုများ၏ အကြည့်များအားလုံး ဆွဲဆောင်ခံခဲ့ရသည်။

ထိုအကြည့်များ တစ်ခုစီတိုင်းတွင် လောဘရမ္မက်များက ဝင်ရောက်လွှမ်းမိုးသွားခဲ့လေသည်။

...

"ရွှေ့ဆိုင်းလိုက်တာလား..."

ယွီစွန်းလီက ပန်းချီကားများ၊ ပန်းပုရုပ်တုများနှင့် ဝါး၊ ပေလိပ်၊ ကျောက်စိမ်းများပေါ်တွင် ရေးထွင်းထားသော ကဗျာစာကြောင်းများ အစရှိသည့် အနုပညာပစ္စည်း အမျိုးမျိုးဖြင့် အလှဆင်ထားသော အနုပညာပြခန်းနှင့် တူသည့် အခန်းတစ်ခုအတွင်းရှိ ပိုးသား အိပ်ရာခင်းပေါ်တွင် ထိုင်ရင်း အသံထွက်၍ မေးလိုက်သည်။

သူမ၏ ညအိပ်ဝတ်စုံ အဖြူရောင်မှာ ရိုးရှင်းသော်လည်း သူမ၏ မိန်းမဆန်သော အချိုးအစားများကို ပြီးပြည့်စုံစွာ ပေါ်လွင်စေသည်။ ခါးတွင် တင်းကြပ်နေပြီး၊ ရင်သားများကို ပင့်တင်ထားကာ လပြည့်ဝန်း နှစ်စင်းကဲ့သို့ ရင်ခုန်ဖွယ် မြင်ကွင်းကို ဖန်တီးပေးထားသည်။ ယင်းက မြေကြီး၊ လူသားနှင့် ကောင်းကင်ဘုံတို့၏ အကြည့်များကိုပင် ဆွဲဆောင်နိုင်စွမ်းရှိသည်။ ထို့အပြင် သူမ၏ ခြေသလုံး အောက်ပိုင်း တစ်စိတ်တစ်ပိုင်းနှင့် အပြစ်အနာအဆာကင်းသော အသားအရည်ကိုလည်း ဖော်ပြနေ၏။ ခြေဗလာဖြစ်နေသော သူမ၏ ခြေချောင်းလေးများ တစ်ခုစီကို ဖြူလွှလွှ အရောင်လေး ဆိုးထားသည်။ သူမသည် အစွမ်းကုန် သန့်စင်မှုကို ဖြာထွက်နေသော ကာမဂုဏ် အလှတရား၏ ပြယုဂ်တစ်ခုပင် ဖြစ်သည်။

ယွီစွန်းလီသည် မရေရာသော ခံစားချက်များဖြင့် သူမ၏ နှုတ်ခမ်းကို စူလိုက်သည်။ ဝေ့ဝူယင်၏ အသံစာကို ဖတ်ပြီးနောက် သူမ၏ နှလုံးသားထဲတွင် ဟာလာဟင်းလင်း ခံစားချက် တစ်ခု စွဲကျန်ရစ်နေခဲ့သည်။ သူတို့၏ နှစ်နှစ်တာ ချိန်းတွေ့မှုသည် မကြာမီ အချိန်မတိုင်မီ ပြီးဆုံးတော့မည်ဖြစ်ပြီး အစွမ်းကုန် သန့်စင်ခြင်း ဂလက်ဆီ အတွင်း ပေါင်းစည်းခြင်းမှတစ်ဆင့် သူတို့၏ ဆက်ဆံရေးကို အပြီးသတ်တော့မည် ဖြစ်သည်။ သူမသည် အစပိုင်းတွင် အတွေ့အကြုံမရှိဘဲ ငြီးငွေ့ဖွယ်ကောင်းသူတစ်ယောက် ဖြစ်သွားမည်ကို စိုးရိမ်နေခဲ့သော်လည်း သူမအား ထောက်ပံ့ပေးသော ညီအစ်မများ၊ အထူးသဖြင့် ချောင်စွေ့ဖုန်း နှင့် လျူစုရင် တို့ထံမှ သိသာထင်ရှားသော ပြင်ဆင်မှုများ ပြုလုပ်ပြီးနောက် သူမကိုယ်သူမ အဆင်သင့်ဖြစ်နေပြီဟု ခံစားခဲ့ရသည်။

သို့သော်လည်း ဝေ့ဝူယင်က သူမအား တိကျသော ရက်စွဲတစ်ခု မပေးခဲ့ဘဲ၊ သူတို့ ဤကာလ အတွင်း လုပ်ဆောင်ဖြစ်မည် မဟုတ်ကြောင်းသာ ပြောကြားခဲ့သည်။ ဤအခြေအနေနှင့် ပတ်သက်၍ မည်သို့ ခံစားရမည်ကို သူမ မသိတော့ပေ။ တစ်ဖက်တွင်မူ သူက ဤအချိန်အခါကို လုပ်စရာရှိသည့် စာရင်းတစ်ခုလို သဘောမထားသည့်အတွက် သူမ ဝမ်းသာမိသည်။ မည်သို့ပင်ဆိုစေ မကြာသေးမီက ဝေ့ဝူယင်သည် အာရုဏ်ဦး အင်ပါယာ နှင့် သူ၏ ကိုယ်ပိုင် ကျင့်ကြံခြင်း အတွက် စဉ်ဆက်မပြတ် လှုပ်ရှားမှုများ ပြုလုပ်နေခဲ့ပြီး လှုပ်ရှားမှုတိုင်းတွင် ကမ္ဘာကြီးကို တုန်လှုပ်စေသော အောင်မြင်မှုများကို ရရှိနေခဲ့သည်။

ကြယ်ရောင်စုံ ကောင်းကင်ယံ တစ်လျှောက် သူတို့၏ ခရီးစဉ်များ အစောပိုင်းကာလက သူမသည် သူ၏ ချစ်ခြင်းမေတ္တာကို ရရှိရန် ထိုက်တန်ပါရဲ့လား သို့မဟုတ် လုံလောက်အောင် ဆွဲဆောင်မှု ရှိပါရဲ့လားဟု ခဏတာ သံသယ ဝင်မိခဲ့သည်။ သူ အားနည်းနေချိန်တွင် သူ့ကို တွေ့ဆုံခွင့်ရခဲ့ခြင်းမှာ သူမ ကံကောင်းခြင်းသက်သက်သာ ဖြစ်ကောင်းဖြစ်နိုင်သည်။

သို့သော် ထိုအတွေးများ သူမစိတ်ထဲတွင် ပေါ်ပေါက်လာသည့်အခါတိုင်း ဝေ့ဝူယင်သည် သူ၏ စကားများဖြင့်ရော၊ အပြုအမူများဖြင့်ပါ သံသယအားလုံးကို အကြိမ်ကြိမ် ချေမှုန်းပစ်ခဲ့သည်။ သူမကို သူ ကြည့်သော အကြည့်မျိုးသည် အခြားသူများ၏ အပြန်အလှန် ဆက်ဆံမှုများကို အပြင်လူတစ်ယောက်အနေဖြင့် စောင့်ကြည့်လေ့လာရာတွင် သူမ တစ်ခါမျှ မကြုံဖူးခဲ့သော အရာဖြစ်သည်။ အချို့သော တာအို လက်တွဲဖော်များပင်လျှင် ထိုကဲ့သို့ ပြင်းထန်သော ခံစားချက်များနှင့် နွေးထွေးမှုမျိုး ကင်းမဲ့နေတတ်သည်။

နောက်ဆုံး၌ သူမ သက်ပြင်း တစ်ချက်သာ ချလိုက်မိသည်။

"ဒါက ထူးချွန်တဲ့ ခင်ပွန်းတစ်ယောက် ရှိခြင်းရဲ့ အားနည်းချက်လား..."

ထိုသို့ ရေရွတ်ရင်း သူမ တောက်ပစွာ ပြုံးလိုက်မိသည်။ ထိုငွေရောင် မျက်လုံးများနှင့် အရပ်ရှည်ရှည် ပုံသဏ္ဍာန်က သူမစိတ်ထဲတွင် လက်ခနဲ ပေါ်လာပြီး၊ သူမ၏ နှလုံးသားကို လင်းလက်သွားစေကာ အလင်းရောင်များသာမက ရွှင်လန်းမှုများဖြင့်ပါ ပြည့်နှက်သွားစေသည်။ အကယ်၍ ခဏတာ ရွှေ့ဆိုင်းထားရလျှင်တောင်မှ၊ ဤနှစ်နှစ်အတွင်းတွင် သူတို့၏ ဆက်ဆံရေးကို အဆုံးသတ်နိုင်မည်ဖြစ်သည်။ ဤအချက်အပေါ် သူမတွင် မည်သည့် သံသယမျှ မရှိပေ။

မလိုအပ်ဘဲ အလောတကြီး ဖြစ်နေသူမှာ သူမပင်။ အသားကင်က အရည်ရွှမ်းလွန်းပြီး၊ ဝိုင်ကလည်း အရသာရှိလွန်းလှသဖြင့် မှာယူပြီးနောက် နှစ်မိနစ်ခန့် စောင့်ရသည်ကို ညည်းညူနေသော အမျိုးသမီးတစ်ဦးလို သူမ ခံစားရသည်။

အစွမ်းကုန် သန့်စင်ခြင်း ဂလက်ဆီ အတွင်း ဝေ့ဝူယင်က သူ၏ အစီအစဉ်များကို ဆက်လက် ချက်ပြုတ်နေခြင်းကို သူမ ပြဿနာမရှိပါချေ။

...

မူလအာရုဏ်ဦး နန်းတော်၊ အဂ္ဂိရတ် ခန်းမ...

ဝေ့ဝူယင်သည် မျက်မှောင်ကြုတ်လျက် စားပွဲတစ်ခုပေါ်တွင် ကိုင်းညွတ်၍ ရပ်နေသည်။ သူ၏ လက်မောင်းနှစ်ဖက်စလုံးက စားပွဲစွန်းများကို ဖိထားပြီး လက်ညှိုးနှင့် လက်ခလယ်များက ဘေးဘက်များကို ခေါက်နေခဲ့သည်။ ထို့ကြောင့်ပင်... သစ်သားသံများ စည်းချက်ကျကျ ပဲ့တင်ထပ် ထွက်ပေါ်နေလေသည်။

"ယွီစွန်းလီ အပေါ် မင်းရဲ့ ချုပ်တည်းမှု ဒါမှမဟုတ် စုမေ့ အပေါ် မင်းထားရှိတဲ့ ခြွင်းချက်မရှိ ယုံကြည်မှု... ဒီနှစ်ခုထဲက ဘယ်ဟာက ငါ့ကို ပိုပြီး အံ့ဩစေသလဲ ဆိုတာကိုတောင် မသိတော့ဘူး..."

ကောင်းကင်စစ်ဝိညာဉ် က ပြောလိုက်ရာ၊ ခေါက်နေသော စည်းချက်များ ပို၍ မြန်ဆန်သွားသည်။

"ကာမရာဂဆိုတာ အပြစ်တစ်ခုပဲ... ယုံကြည်မှုဆိုတာကတော့ မွန်မြတ်တဲ့ အရာတစ်ခုပေါ့..."

ဝေ့ဝူယင်က ပေါ့ပေါ့ပါးပါး ပြောလိုက်၏။ ဘယ်ဘက်လက်မောင်းကို တစ်ချက်ကြည့်လိုက်ပြီးနောက် စားပွဲပေါ်ရှိ အာရုဏ်ဦး ခြေချခြင်း မှော်သန့်စင် ဆေးအိုး ဆီသို့ အကြည့်လွှဲလိုက်သည်။ ထို့နောက် ဟင်းလင်းပြင် လက်စွပ် ထဲမှ ပုလင်းတစ်လုံးကို ထုတ်ယူရန် လက်ယမ်းလိုက်၏။

သာလွန်ခြင်းအဆင့် အရည်အသွေး ရှိသော လျှို့ဝှက်ကောင်းကင် အဆင့် ထုတ်ကုန်တစ်ခုကို ဖော်စပ်ပြီးနောက် အာရုဏ်ဦး ခြေချခြင်း မှော်သန့်စင် ဆေးအိုး သည် လျှို့ဝှက်ကောင်းကင် အဆင့် ရတနာတစ်ခုနှင့် မခြားတော့ပေ။ ပိုင်ရှု နှစ်ယောက်စလုံးသည်လည်း လျင်မြန်စွာ ကြီးထွားနေသော အခြေအနေတွင် ရှိနေသည်။ ထိုကြီးထွားမှုကို အဟန့်အတား မဖြစ်စေဘဲ ၎င်းတို့ကို အသုံးပြု၍ မရနိုင်ပေ။

သူ၏ ဒုတိယ မှော်သန့်စင် ဆေးအိုးမှာလည်း သာလွန်ခြင်းအဆင့် လျှို့ဝှက်လောက ဆေးဖော်စပ်ခြင်း အပိုင်းမှ အပြည့်အဝ ပြန်လည်သက်သာလာခြင်း မရှိသေးပေ။

"ဟုတ်လို့လား..."

ကောင်းကင်စစ်ဝိညာဉ်က အမေးသဘောဖြင့် ပြောလိုက်သည်။ ဝေ့ဝူယင်နှင့် ငြင်းခုံလိုစိတ် သူမတွင် မရှိပေ။ သူမ၏ အာရုံစိုက်မှု အားလုံးသည် ဝေ့ဝူယင် ထုတ်ယူလိုက်သော ထိုပုလင်းပေါ်တွင်သာ ရှိနေသည်။ ဝေ့ဝူယင်၏ လုပ်ရပ်များကို ရှေ့တန်းမှ မြင်တွေ့ခဲ့ရသူ တစ်ဦးအနေဖြင့် ထိုလူငယ်၏ အတွေးများကို တိုင်းတာရန် သို့မဟုတ် ကြိုတင်ခန့်မှန်းရန် ခက်ခဲကြောင်း သူမ လက်ခံထားသည်မှာ ကြာပြီဖြစ်သည်။ ထို့ပြင် သူသည် နားလည်ရခက်ပြီး ခန့်မှန်း၍မရသော ဖော်ပြ၍မရသည့် အခြေအနေတစ်ခုတွင် ရှိနေသည်ကိုလည်း သိထား၏။

ပကတိ အမှန်တရားများကို သူမ နားလည်ထားသည်။ ဝေ့ဝူယင်သည် လျှို့ဝှက် ကြယ်တာရာ အဆင့် ကျင့်ကြံသူ တစ်ဦးသာ ဖြစ်ပြီး တည်ရှိမှု အသိဉာဏ် နှစ်ပေါင်း နှစ်ရာပင် မပြည့်သေးသော လူငယ်တစ်ဦး ဖြစ်သည်။ သို့သော်လည်း ဤလူငယ်သည် သူမ မျှော်လင့်ထားသမျှ အရာအားလုံးနှင့် ခြားနားစွာပင် အထွတ်အထိပ် တည်ရှိမှုများ ၏ ကစားပွဲကို ကစားနေခြင်း ဖြစ်သည်။

ထို့အပြင် သူမသည် သူ၏ အသိစိတ် ပင်လယ် အတွင်း၌ နေထိုင်ပြီး ဧဒင် ၏ ကြယ်တာရာ ပုံသဏ္ဍာန်နှင့် လျှို့ဝှက် အမြုတေ တို့တွင် ဖြစ်ပေါ်နေသော အပြောင်းအလဲများကို အသေအချာ သိရှိနေသည်။ သူ မျက်လုံး ဝိညာဉ်အစီအရင် အသစ်တစ်ခုကို ဖန်တီးပြီးနောက်၊ လွန်ကဲလွန်းနေပြီဖြစ်သော ဧဒင် ၏ အမြင့်ဆုံး အခြေခံ ကန့်သတ်ချက်များသည် ထပ်မံ၍ ကျယ်ပြန့်လာခဲ့ပြန်သည်။ ဤ ကြယ်တာရာ ဝိညာဉ်များ လေးခုသည် အချင်းချင်း နက်ရှိုင်းစွာ ဆက်နွယ်နေသော်လည်း လွတ်လပ်စွာ လှုပ်ရှားနိုင်စွမ်းရှိသည်ကို ထည့်သွင်းစဉ်းစားပါက၊ ၎င်းတို့၏ အခြေခံအုတ်မြစ်များသည် သူတို့၏ ပူးပေါင်းအားထုတ်မှုများဖြင့် အမြဲတမ်း ညီမျှနေမည် ဖြစ်သည်။

အကယ်၍ ဧဒင် သည် ဤအပြောင်းအလဲများကို ကြုံတွေ့နေရပါက သူ၏ ထျန်းတျန် အတွင်းရှိ ကြယ်တာရာ ဝိညာဉ်များ နှစ်ခုနှင့် သူ၏ နှလုံးသား အတွင်းရှိ ကြယ်တာရာ ဝိညာဉ် တို့သည်လည်း ထိုနည်းတူပင် ဖြစ်လိမ့်မည်။ ဝေ့ဝူယင် ပိုင်ဆိုင်ထားသော စွမ်းအားကို သူမ ခန့်မှန်း၍မရနိုင်ပေ။ ထို့ပြင် အဓိက အာဏာများ ကို သူ လွတ်လပ်စွာ အသုံးပြုနိုင်သည် ဟူသောအချက်ကပင် စိတ်ကူးမယဉ်နိုင်လောက်အောင် ဖြစ်နေပြီး အကျိုးသင့်အကြောင်းသင့်ပင် မဖြစ်တော့ပေ။

ယခင်က အစစ်အမှန် သူတော်စင် တစ်ပါးဖြစ်သော ပါခက် သည် သူမ၏ ဝိညာဉ်အင်အား မလုံလောက်မှုကြောင့် သတ္တု ဥပဒေသ ၏ အဓိက အာဏာ ကို အသုံးပြုရန်အတွက် သူမ၏ ခန္ဓာကိုယ်၊ သွေးနှင့် ဝိညာဉ်ထဲသို့ ပေါင်းသွင်းခဲ့ရသည်။ ထိုလုပ်ရပ်က သူမ၏ ဝိညာဉ်နှင့် ခန္ဓာကိုယ်ကို ပြိုလဲပျက်စီးသွားစေခဲ့၏။ အကယ်၍သာ ဝေ့ဝူယင် ၏ ကြိုးပမ်းအားထုတ်မှုများသာ မရှိခဲ့ပါက သူမသည် သတ္တု ဥပဒေသ များ၏ ရုပ်ပိုင်းဆိုင်ရာ ပြယုဂ်တစ်ခုဖြစ်သော ထာဝရ သတ္တုရုပ်တု တစ်ခုအဖြစ် ပြောင်းလဲသွားသည်မှာ ကြာပြီဖြစ်သည်။

***

အပိုင်း(၂၄၈၆)

ပါခက်ကိစ္စ အသာထား...။ ကောင်းကင် စစ်ဝိညာဉ် လောလောဆယ် စိတ်ဝင်စားနေသည်မှာ ဝေ့ဝူယင်၏ လက်ထဲရှိ ပုလင်း ဖြစ်သည်။ ယင်းမှာ သာလွန်ခြင်းအဆင့် အမိန့်တော် ဆေးရည် ပင် ဖြစ်၏။

ဂလု...

ဝေ့ဝူယင် သည် သူ၏ အသိစိတ် ပင်လယ် ထဲမှ တံတွေးမျိုချသံကို ကြားလိုက်ရသည်ဟု အသေအချာ ကျိန်တွယ်ပြောဆိုနိုင်ပေသည်။ ထိုအရာက သူ၏ နှုတ်ခမ်းများကို အပြုံးတစ်ခုအဖြစ် ကွေးညွတ်သွားစေခဲ့သည်။ စားပွဲပေါ်ရှိ ပုလင်းမှာ အမိန့်တော် ဆေးရည် ဖြစ်ပြီး သန့်စင်သော ကံကြမ္မာ ဟင်းလင်းပြင် ကို နာမည်တွင်စေခဲ့သည့် ကံကြမ္မာ ရတနာ လေးပါးထဲမှ တစ်ခုဖြစ်သည်။

အမိန့်တော် ဆေးရည်သည် သူတော်စင် တစ်ပါး၏ အစစ်အမှန် အမိန့်တော်ကို ဖန်တီးပေးနိုင်သည်။ ထို့အပြင် မည်သည့် ကောင်းကင် ဥပဒေသ ကို ရွေးချယ်နိုင်သည်ဟူသော ကန့်သတ်ချက်မျိုးလည်း မရှိပေ။ မည်သည့် ကောင်းကင် ဥပဒေသ မဆို ဖြစ်နိုင်ပေသည်။

ဝေ့ဝူယင် သည် စစ်ပွဲတစ်ပွဲ စတင်ရန်နှင့် ထိုစစ်ပွဲကို အနိုင်ယူရန် ရည်ရွယ်ထားကြောင်း ရဲရင့်စွာ ကြေညာလိုက်ချိန်တွင် ကောင်းကင်စစ်ဝိညာဉ် သည် ဝမ်းသာအံ့ဩဖြစ်ခဲ့ရသည်။ အဘယ်ကြောင့်ဆိုသော် ဝေ့ဝူယင်က သူမ၏ တိုးတက်မှုအပေါ် ဂရုစိုက်သောကြောင့် ဖြစ်သည်။ သို့သော်လည်း တစ်ချိန်တည်းမှာပင် သူက သူ့ကိုယ်သူ အလွန်အမင်း အထင်ကြီးနေမည်ကိုလည်း သူမ သေလောက်အောင် ကြောက်ရွံ့နေခဲ့မိသည်။ အထူးသဖြင့် သူမတွင် အလွန် ကန့်သတ်ထားသော အချိန်ကာလ တစ်ခုသာ ရှိနေသောကြောင့်ပင်။

သူမက စစ်ပွဲတစ်ပွဲကို မစတင်ဘဲ ဤအရာကို ကျော်လွှားနိုင်မည့် နည်းလမ်းများ ရှိကြောင်းပင် ပြောပြခဲ့ဖူးသည်။ သို့သော် ဝေ့ဝူယင် အနေဖြင့် အဂ္ဂိရတ် ပညာမှတစ်ဆင့် ထိုသို့ လုပ်ဆောင်နိုင်လိမ့်မည်ဟု သူမ ယုံကြည်မှု အလွန်နည်းပါးခဲ့သည်။ တစ်ခုတည်းသော နည်းလမ်းမှာ ကောင်းကင်ရှန့်ထို အဂ္ဂိရတ်ပညာရှင် တစ်ဦး ဖြစ်လာရန်သာ ဖြစ်သည်။ သို့သော်လည်း သူမ၏ အသွင်ပြောင်းလဲခြင်း လိုအပ်ချက်များကို ဖြည့်ဆည်းရန် နောက်ဆုံးရက်မှာ လျင်မြန်စွာ နီးကပ်လာပြီဖြစ်ရာ၊ သူမ၏ အမြင်တွင် သူ ထိုအရာကို အောင်မြင်ရန် မည်သို့မျှ မဖြစ်နိုင်ပေ။

မည်သို့ပင်ဆိုစေ ဤလူငယ်သည် သူမ၏ မျှော်လင့်ချက်တိုင်းကို ချေဖျက်ခဲ့ပြီး၊ အဂ္ဂိရတ် လမ်းကြောင်းပေါ်တွင် တားဆီး၍မရသော အရှိန်အဟုန်၊ မြန်နှုန်းတို့ဖြင့် ဆက်တိုက် တက်လှမ်းလာခဲ့သည်။ သူသည် ကောင်းကင်ရှန့်ထို အဂ္ဂိရတ်ပညာရှင် အဆင့်အတန်းကို ရရှိခဲ့ရုံသာမက အတုမဲ့ ဖန်တီးခြင်း အဂ္ဂိရတ် ကြယ်တာရာများ ကိုပါ ရယူနိုင်ခဲ့သည်။

ထို့အပြင်... ဤအရာသည် သာမန် အမိန့်တော် ဆေးရည် တစ်ခုတည်း မဟုတ်ပေ။ သာလွန်ခြင်းအဆင့် အရည်အသွေး ရှိသည့် အမိန့်တော် ဆေးရည် တစ်ခု ဖြစ်နေသည်။

ဤအမိန့်တော် ဆေးရည်က မည်ကဲ့သို့သော အဂ္ဂိရတ် အကျိုးသက်ရောက်မှုမျိုး ယူဆောင်လာပေးမည်ကို နားလည်ရန်ပင် သူမ မစွမ်းဆောင်နိုင်ခဲ့ပေ။ ထို့အပြင် ဝေ့ဝူယင် ကိုယ်တိုင် ဤအရာကို သိရှိခြင်း ရှိ၊ မရှိကိုလည်း သူမ မသေချာပေ။

သူမ၏ အတွေးများကို သိရှိနေသည့်အလား ဝေ့ဝူယင်က အမိန့်တော် ဆေးရည် ကို တည်ငြိမ်စွာ စောင့်ကြည့်ရင်း ပြောလိုက်သည်။

"ဘာတွေဖြစ်လာမလဲ ဆိုတာ ငါ မသိဘူး..."

ထိုစကားကို သူမ မျှော်လင့်ထားပြီးသားပင်။ အထူးသဖြင့် ဆွဲဆောင်မှု ရှိလွန်းနေသည့်တိုင် ဝေ့ဝူယင် က ၎င်းကို ဆက်မလုပ်ဘဲ ရွှေ့ဆိုင်းထားသည်ကို ထည့်သွင်းစဉ်းစားလိုက်သောအခါ ပို၍ပင် သေချာသွားသည်။

သာလွန်ခြင်းအဆင့် အရည်အသွေးသည် အလွန်တရာ ခန့်မှန်းရခက်ပြီး ၎င်းကို ဖန်တီးသူကိုယ်တိုင်ပင်လျှင် ၎င်း၏ အကျိုးသက်ရောက်မှုများကို အလွယ်တကူ ခန့်မှန်းနိုင်လိမ့်မည် မဟုတ်ပေ။ ဝေ့ဝူယင်၏ အတုမဲ့ ဖန်တီးခြင်း အဂ္ဂိရတ် ကြယ်တာရာများ သည် အဂ္ဂိရတ် ကြယ်တာရာများ ၏ စတုတ္ထအဆင့်ဖြစ်သည့် သန့်စင်သော ဉာဏ်အလင်း အဂ္ဂိရတ် ကြယ်တာရာများ နှင့် တန်းတူဖြစ်နေသော်လည်း သူ ဘာတစ်ခုကိုမျှ ဖော်ထုတ်နားလည်နိုင်ခြင်း မရှိခဲ့ပေ။ ထိုအဆင့်သည် ထူးချွန်သော ကောင်းကင်ရှန့်ထို အဂ္ဂိရတ်ပညာရှင် များ သို့မဟုတ် ဝိညာဉ် ရှန့်ထို အဂ္ဂိရတ်ပညာရှင် များသာ ပိုင်ဆိုင်သော အဆင့်တစ်ခု ဖြစ်သည်။

...

တစ်ချိန်တည်း၌... အဓိက ခန်းမထဲရှိ ဖီးနစ်ရုပ်တု တစ်ခုနှင့် တိုင်တစ်ခု၏ အရိပ်သည် မသိမသာလေး အနည်းငယ် လှုပ်ခတ်သွားခဲ့၏။

"ဘာကိစ္စရှိလို့လဲ..."

စုမေ့က မေးလိုက်၏။ အရိပ်သည် အနည်းငယ် လိမ်ကောက်သွား၏။ လူများ၊ သားရဲများ၊ သစ်ပင်၊ ချုံပုတ်နှင့် တောင်တန်းများကဲ့သို့သော အရာဝတ္ထုများ၏ အရိပ်သဏ္ဌာန်များ ရောယှက်နေသော အမည်းရောင် အရာတစ်ခုသည် တဖြည်းဖြည်း ထွက်ပေါ်လာခဲ့သည်။ ၎င်းတို့ အားလုံးသည် တစ်ခုတည်းသော အလုံးစုံအဖြစ် အချင်းချင်း ရောနှောပေါင်းစပ်နေကြသည်။

ထို့နောက်... ၎င်းသည် နားလည်နိုင်စွမ်းမရှိသော စကားလုံး အချို့ကို ပြောဆိုလာခဲ့သည်။ ယင်းမှာ ရှင်းလင်းစွာပင် လျှို့ဝှက် ကုဒ် ဘာသာစကား တစ်ခု ဖြစ်နေ၏။

စုမေ့က ခေါင်းညိတ်ပြလိုက်၏။

"စုရီ နဲ့ ကောင်းကင် အပိုင်းအစ ကို ဆက်ပြီး စောင့်ကြည့်ထားပါ..."

ထို့နောက် အရိပ်သဏ္ဌာန်များသည် ပြန်လည် ပေါင်းစည်းတော့မည့် ဆဲဆဲတွင် ရပ်တန့်သွားခဲ့သည်။ ပြီးနောက် တိုတောင်းပြီး နားလည်နိုင်စွမ်းမရှိသော စကားလုံး အချို့ ထပ်မံ ထွက်ပေါ်လာပြန်သည်။

စုမေ့ မျက်မှောင်ကြုတ်သွားခဲ့၏။

"ရှေးဟောင်း စာကြည့်တိုက် ဟုတ်လား... ငါ စုံစမ်းကြည့်လိုက်မယ်..."

အရိပ်သဏ္ဌာန်များသည် နှစ်ဘက်မြင် တည်ရှိမှုတစ်ခု အဖြစ်သို့ ပြန်လည် ပေါင်းစည်းသွားခဲ့သည်။ အရိပ် ထွက်ခွာသွားသည်၊ သို့မဟုတ် မထွက်ခွာသေးသည်ကို မသိနိုင်ပေ။ သို့သော်လည်း မည်သည့် ပုံမှန်မဟုတ်သော အခြေအနေမျိုးမျှ မတွေ့ရတော့ပေ။

စုမေ့သည် သူမ၏ ပေလိပ်များကို ယူဆောင်ကာ အာရုဏ်ဦး မိုးကုပ်စက်ဝိုင်း မျှော်စင် ၏ ထိန်းချုပ်ရေး ဌာနချုပ်သို့ ပြန်သွားခဲ့သည်။ သူမသည် အာရုဏ်ဦး အဂ္ဂိရတ် မျိုးဆက် ၏ အထူး ထုတ်ကုန်များအတွက် ဖြန့်ချိရေး၊ သယ်ယူပို့ဆောင်ရေးနှင့် စျေးနှုန်းသတ်မှတ်ရေး ကိစ္စရပ်များကို ကိုင်တွယ်ဖြေရှင်းနေခဲ့သည်။ အာရုဏ်ဦး မိုးကုပ်စက်ဝိုင်း မျှော်စင်သည် နှစ်စဉ် ထောက်ပံ့မှုများကို ရယူရန် ရည်ရွယ်ထားသော အမှာစာ အများအပြားကို လက်ခံရရှိနေပြီ ဖြစ်သည်။ အထူးသဖြင့် မိတ်ဆက်ပြသထားသော ထုတ်ကုန်များထဲမှ တစ်ခုဖြစ်သည့် အာရုဏ်ဦး ကောင်းကင်မူလ ဆေးအနှစ် အတွက် ဖြစ်သည်။

သို့သော်လည်း ရှေးဟောင်း စာကြည့်တိုက် က စုမေ့၏ စိတ်ထဲတွင် လွှမ်းမိုးနေခဲ့သည်။ ဤ ရှေးဟောင်း ဒဏ္ဍာရီများနှင့် နက်နဲလှသော ဗဟုသုတများရှိသည့် စာကြည့်တိုက်သည် လာမည့်နှစ်များအတွင်း ပြန်လည် ပေါ်ထွက်လာနိုင်ချေ ရှိနေသည်။ နေရာကမူ သူတို့၏ နောက်ထပ် ခရီးစဉ်ဖြစ်သော ရတနာတောင်ကြား ဂလက်ဆီ တွင် ဖြစ်လိမ့်မည်ဟု ကောလာဟလများ ထွက်ပေါ်နေခဲ့၏။

...

"ငါ အရမ်း ဗိုက်ပြည့်နေပြီပဲ... အံ့ဩစရာကောင်းလောက်အောင် ဗိုက်ပြည့်နေတာ..."

အိုရီ က ရွှင်လန်းတက်ကြွသော အသံဖြင့် အော်ဟစ်လိုက်သည်။

ဝေ့ဝူယင်သည် တင်ပျဉ်ချိတ် ထိုင်နေရင်း သူ၏ လက်နှစ်ဖက်ကို ဆန့်တန်းလိုက်သည်။ အပြင်ဘက်သို့ ထွက်ပေါ်နေသော ကြယ်တာရာ ဝိညာဉ်များ လေးခုသည် သူ့ပတ်လည်တွင် တက်ကြွစွာ လွင့်မျောနေကြသည်။ အထွတ်အထိပ် အဆင့် ထုတ်ကုန်များစွာကို အပြည့်အဝ ချေဖျက်ပြီးနောက် တောက်ပသော ဝိညာဉ်အလင်းတန်းများကို ဖြာထွက်နေကြ၏။ ၎င်းတို့သည် အခြေခံများကို ကန့်သတ်ချက်များအထိ ထပ်မံ မြှင့်တင်နိုင်ခဲ့ပြီး၊ ဝေ့ဝူယင်၏ အလုံးစုံ စွမ်းအားကို နောက်တစ်ကြိမ် ခုန်ပျံကျော်လွှား တိုးတက်သွားစေခဲ့သည်။

သံသရာ မျက်လုံး က သူတို့၏ အခြေခံ ကန့်သတ်ချက်များကို ၁၀ ရာခိုင်နှုန်းမှ ၁၂ ရာခိုင်နှုန်းအထိ တိုးချဲ့ပေးခဲ့သည်ဟု တွက်ချက်မိသောအခါ သူ အံ့အားသင့်သွားခဲ့ရသည်။ ၎င်းသည် ကြီးမားလှသော ကောင်းချီးတစ်ခု ဖြစ်သည်။ သူ၏ ရှိနှင့်ပြီးသား အံ့မခန်း အခြေခံနှင့် နှိုင်းယှဉ်ပါက ဖော်ပြ၍ မရနိုင်လောက်အောင် ကြီးမားကျယ်ပြန့်လှပေသည်။ ဤအရာက သူ၏ မွေးရာပါ ရုပ်ပိုင်းဆိုင်ရာ၊ စိတ်ပိုင်းဆိုင်ရာနှင့် အမတေ စွမ်းအင်များကို တိုက်ရိုက် တိုးတက်စေရုံသာမက သူ၏ သွေးမျိုးဆက် စွမ်းအင်နှင့် သံသရာ ဝိညာဉ်အင်အား ကိုလည်း ကဏ္ဍပေါင်းစုံတွင် ပေါက်ကွဲထွက်မတတ် တိုးပွားလာစေခဲ့သည်။

ဝိညာဉ်အင်အား အစားထိုးအဖြစ် အသုံးပြုနိုင်သော သူ၏ သံသရာ ဝိညာဉ်အင်အား က ပိုမို အားကောင်းလာသည်ဆိုသည်မှာ သံသယဖြစ်ဖွယ် မရှိတော့ပေ။ ဤသည်မှာ မျှော်လင့်ထားပြီးသား ဖြစ်သော်လည်း သူ သက်ပြင်းမချဘဲ မနေနိုင်ခဲ့ပေ။ ဝိညာဉ် လေးခုက တစ်ခုထက် ပိုကောင်းသည် မဟုတ်ပါလား။

ဤသို့ တွေးမိသောအခါ သူ အသံထွက်၍ မရယ်မောဘဲ မနေနိုင်တော့ပေ။ လေးခုက တစ်ခုထက် ပိုကောင်းသကဲ့သို့ ဝိညာဉ် ခုနစ်ခုက လေးခုထက် ပိုကောင်းပေလိမ့်မည်။

အရှိန်မြှင့် ဇုံအတွင်းမှ ထွက်ခွာလာပြီးနောက် ဝေ့ဝူယင်သည် သူ၏ မွေးရာပါ စွမ်းအင် အသီးသီးကို လှည့်ပတ်လိုက်သည်။ သူ၏ လျှို့ဝှက် အမြုတေများ တစ်ခုစီတိုင်းတွင် လျှို့ဝှက် အင်အား များ ပြည့်ဝနေကြောင်း သေချာစေခဲ့သည်။ ထို့နောက် ကောင်းကင်ဘုံ နတ်မျက်လုံးများ၏ ဝိညာဉ်အစီအရင် ငါးခုစလုံးကို လှည့်ပတ်လိုက်၏။ ထို့နောက် အဓိက အာဏာ တစ်ခုစီတိုင်းကို အသေအချာ စစ်ဆေးလိုက်သည်။

ဝေ့ဝူယင်သည် သူ၏ အခြေအနေမှာ အထွတ်အထိပ်သို့ ရောက်ရှိနေပြီဟု သူ ယုံကြည်မှု ရှိနေသည်။ သူက ဟင်းလင်းပြင် လက်စွပ် မှတစ်ဆင့် ဆက်သွယ်မှုများ ပေးပို့ကာ ဝင်ရောက်လာသော အသံလွှင့်ချက် အားလုံးကို ထပ်မံ စစ်ဆေးလိုက်၏။

၎င်းတို့ထဲမှ တစ်ခုမှာ ဟုန်ရွှမ်နူ ထံမှ ဖြစ်သည်။ သူမက ရိုသေလေးစားစွာ ပြောဆိုထားပြီး တွေ့ဆုံရန် တောင်းဆိုထားသည်။ လောလောဆယ်တွင် ထိုကိစ္စကို ကိုင်တွယ်ဖြေရှင်းရန် သူ သိပ်စိတ်မဝင်စားသေးပေ။

သူက အသက် နှစ်ရာ မပြည့်သေးသော လျှို့ဝှက် ကြယ်တာရာ အဆင့် ကျင့်ကြံသူ တစ်ဦးဖြစ်ကြောင်း ရာခိုင်နှုန်းပြည့် သေချာနေသော တုန်းဖန်ယွဲ့ ကမူ ကိုင်တွယ်ရ အနည်းငယ် ခက်ခဲနေသည်။ မိုးကုပ်စက်ဝိုင်း သန့်စင်ခြင်း မျှော်စင် နှင့် သူမ ချုပ်ဆိုထားသော ဒဏ္ဍာရီလာ စာချုပ်ကို သူက အကုန်အကျခံ ဖြေရှင်းပေးရန် သူမက အလိုရှိနေသည်။

ထိုအတွက် ကုန်ကျစရိတ်က... ရူးသွပ်လောက်စရာပင်...

အထူးသဖြင့် သူမက သူ၏ အင်ပါယာ သို့ ဝင်ရောက်ရန်သာ အရိပ်အမြွက် ပြောဆိုထားပြီး၊ သစ္စာစောင့်သိမှုအတွက် စာချုပ် ထပ်မံချုပ်ဆိုရန် ဆန္ဒမရှိသောကြောင့် ဤကိစ္စကို ပြန်လည်စဉ်းစားရန် သူ ဆုံးဖြတ်လိုက်သည်။

အခြား ပြဿနာ တစ်ခုမှာ ကောင်းကင်သူတော်စင် မျှော်စင် ခုနစ်ခု ဖြစ်သည်။ မည်သို့ပင်ဆိုစေ သူသည် ကောင်းကင်ရှန့်ထို အဂ္ဂိရတ်ပညာရှင် နှစ်ဦး၏ သေဆုံးမှုကို အမိန့်ပေးခဲ့ကြောင်း ပွင့်ပွင့်လင်းလင်း ကြေညာခဲ့ပြီး ဖြစ်သည်။ အံ့သြစရာကောင်းသည်မှာ သူ ပေးဆောင်ရမည့် ဒဏ်ကြေးပမာဏက ရှက်ဖွယ်ကောင်းလောက်အောင် လျော့ကျသွားခဲ့ခြင်း ဖြစ်သည်။

မိုးကုပ်စက်ဝိုင်း ခေါင်းဆောင်များ၏ အမြင်တွင် ကောင်းကင်ရှန့်ထို ဖခင်လေး ရော၊ ကောင်းကင်ရှန့်ထို အမှောင်ထုပါ ကောင်းကင်ရှန့်ထို အဂ္ဂိရတ်ပညာရှင်များ အဖြစ် အစွမ်းကုန် သန့်စင်ခြင်း ဂလက်ဆီ ၏ အဓိက အဂ္ဂိရတ် တာအို တွင် တရားဝင် ပါဝင်ခြင်း မရှိကြပေ။ ယင်းအစား သူတို့ကို ပါရမီ မရှိသော သို့မဟုတ် ပါရမီ ကြီးကြီးမားမား မရှိသော အဆင့်မြင့် ချီးမြှောက်ခံ လောကရှန့်ထို အဂ္ဂိရတ်ပညာရှင်များ အဖြစ်သာ သတ်မှတ်ထားသည်။

လောကရှန့်ထို အဂ္ဂိရတ်ပညာရှင်များ နှင့် နှိုင်းယှဉ်လျှင် မိမိ၏ လက်ရှိ အဆင့်အတန်းကြောင့် သေးငယ်သော ဒဏ်ကြေးတစ်ခုကိုသာ ဝေ့ဝူယင် ပေးဆောင်ခဲ့ရသည်။ ဤဒဏ်ကြေးကို မိုးကုပ်စက်ဝိုင်း ခေါင်းဆောင်များ က တောင်းပန်ခြင်း တစ်ခုအနေဖြင့် ကောင်းကင်သူတော်စင် မျှော်စင် ခုနစ်ခု ထံသို့ ပေးအပ်ခဲ့သည်။

ထိုလုပ်ရပ်က လုံးဝ မလိုအပ်ပေ။ ၎င်းမှာ မထီမဲ့မြင်ပြုခြင်း၏ ပြယုဂ်တစ်ခု ဖြစ်ပြီး၊ အစစ်အမှန် ကောင်းကင်ရှန့်ထို အဂ္ဂိရတ်ပညာရှင်များ နှင့် ယှဉ်လျှင် သူတို့၏ တန်ဖိုးက မည်မျှရှိသည်ကို တစ်ဦးချင်းစီအား ပြောပြကာ ဂလက်ဆီ အတိုင်းအတာဖြင့် အရှက်ခွဲရန် မိုးကုပ်စက်ဝိုင်း ခေါင်းဆောင်များ က အလိုရှိနေသကဲ့သို့ပင်။ ၎င်းမှာ စက်ဆုပ်ဖွယ်ကောင်းလောက်အောင် ရိုင်းစိုင်းလွန်းလှသဖြင့် ဝေ့ဝူယင်သည် သူတို့အတွက် သနားစိတ်ဝင်ကာ ခဏတာ တိတ်ဆိတ်စွာ ငြိမ်သက်နေခဲ့မိသည်။

သို့သော် ဤအရာက သူ့အတွက် အံ့မခန်း အခွင့်အရေး တစ်ခုကိုလည်း ဖန်တီးပေးခဲ့သည်။

အစွမ်းကုန် သန့်စင်ခြင်း ဂလက်ဆီ ၏ အမြင့်ဆုံး မိုးကုပ်စက်ဝိုင်း မျှော်စင်များ က သူတို့ကို အလိုမရှိဘူး ဆိုလျှင်တောင် အာရုဏ်ဦး အင်ပါယာ နှင့် အာရုဏ်ဦး မိုးကုပ်စက်ဝိုင်း မျှော်စင် ကတော့ ထိုမျှလောက် ဇီဇာမကြောင်ပေ။

အနာဂတ် အစီအစဉ်များနှင့် အစည်းအဝေးများအတွက် ဝိညာဉ် ဆက်သွယ်မှုများကို ပေးပို့ပြီးနောက် ဝေ့ဝူယင်သည် သာလွန်ခြင်းအဆင့် အမိန့်တော် ဆေးရည် ကို ထုတ်ယူလိုက်သည်။ သူ၏ အရှေ့တွင် ဟင်းလင်းပြင် တံခါးပေါက် တစ်ခုက အသံတိတ် ထွက်ပေါ်လာ၏။ ဟင်းလင်းပြင် တံခါးပေါက် များ တည်ဆောက်ခြင်းသည် သူ့အတွက် အားစိုက်စရာ မလိုတော့ပေ။ ခြေလှမ်း အနည်းငယ် လှမ်းပြီးနောက် သူသည် အစွမ်းကုန် သန့်စင်ခြင်း ဂလက်ဆီ မှ ထွက်ခွာသွားခဲ့တော့သည်။

***