အခန်း (၁၀၆၅-၁၀၆၆)
Vol. 90 Ch. 1065-1066
အခန်း ၁၀၆၅ - လော့မိသားစု အညံ့ခံခြင်းနှင့် အုတ်မြစ်ကျောက် ဘီလီယံ ခြောက်ရာ ဆက်သခြင်း
ရှောင်းယီနှင့် ကျန်းယွင်ထျန်းတို့သည် အစောင့်များ၏ တုံ့ပြန်မှုကို ဂရုမစိုက်ဘဲ နန်းတော်အတွင်းရှိ လော့လင်တန်၏ စာကြည့်ဆောင်ဆီသို့ တန်းတန်းမတ်မတ် လျှောက်သွားခဲ့ကြသည်။
ရှောင်းယီနှင့် ကျန်းယွင်ထျန်းတို့ ရောက်ရှိလာကြောင်း သိသည်နှင့် လော့လင်တန်သည် သူတို့ကို ကြိုဆိုရန် ချက်ချင်း ထွက်လာခဲ့သည်။
“မဟာမိတ်ခေါင်းဆောင် ရှောင်း၊ နည်းပြကျန်း ... ဘာကိစ္စရှိလို့ ကြွလာကြတာလဲ။”
လော့လင်တန်က ရိုရိုသေသေ မေးလိုက်သည်။ ရှောင်းယီက ပွင့်ပွင့်လင်းလင်းပင် ပြန်ဖြေလိုက်သည်။
“နည်းပြကျန်း စစ်မေးလို့ ရလာတဲ့ သတင်းအချက်အလက်တွေကို ခင်ဗျားလည်း သိပြီးလောက်ပြီ ထင်တယ်။”
လော့လင်တွန်က ခေါင်းညိတ်ပြလိုက်သည်။
“ဟုတ်ကဲ့ ခုနတင်ပဲ လူတစ်ယောက်က လာပြီးသတင်းပို့သွားပါတယ်။”
“အင်း ... ကျုပ်မှာ နောက်ထပ်မေးစရာ တစ်ခုရှိသေးတယ်။ တခြား အင်အားစုတွေမှာကော အဲ့ဒီလို ဂိုဏ်းတွေ ရှိတတ်သလား။”
ရှောင်းယီက မေးလိုက်သည်။ လော့လင်တန်က မျက်မှောင်ကြုတ်လိုက်၏။
“ဒါကိုတော့ ကျုပ်လည်း သိပ်မသေချာဘူး။ ကျုပ်ရဲ့ ထောက်လှမ်းရေးအရာရှိတွေနဲ့ အတည်ပြုကြည့်ဖို့ လိုလိမ့်မယ်။”
“ကောင်းပြီ။ အမြန်ဆုံး အတည်ပြုပေးပါ။ ရလဒ်ထွက်တာနဲ့ ကျုပ်ကို ချက်ချင်း အသိပေးပါ။”
ရှောင်းယီက ညွှန်ကြားလိုက်သည်။
“နားလည်ပါပြီ။”
လော့လင်တွန်က ပြန်ဖြေလိုက်သည်။
ဒေသခံအင်အားစုများနှင့် မသေမျိုးမျိုးနွယ်စုတို့ ပူးပေါင်းကြံစည်သည့် အခြေအနေမျိုး ဖြစ်ပေါ်ခဲ့ပြီးပြီဖြစ်၍ ဤကောင်းကင်မိုးကြိုးမင်းဆက်သည် တစ်ခုတည်းသော ဖြစ်ရပ် ဖြစ်နိုင်ခြေ အလွန်နည်းပါးသည်။
အကယ်၍ အခြားသော ဒေသခံလူမျိုးများသည်လည်း မသေမျိုးများနှင့် ပူးပေါင်းနေကြပါက အခြေအနေမှာ ပို၍ ရှုပ်ထွေးသွားပေလိမ့်မည်။
လော့လင်တွန်အား စုံစမ်းခိုင်းခြင်းဖြင့် အခြားအင်အားစုများပါ ပါဝင်ပတ်သက်နေပါက ရှောင်းယီအနေဖြင့် လိုအပ်သော ပြင်ဆင်မှုများကို အချိန်မီ ပြုလုပ်နိုင်မည်ဖြစ်သည်။
လော့လင်တန်က အမိန့်များကို ချက်ချင်း ထုတ်ပြန်လိုက်ပြီးနောက် ရှောင်းယီသည်လည်း ပြန်ရန်အတွက် ထရပ်လိုက်သည်။
“မဟာမိတ်ခေါင်းဆောင် ရှောင်း ခဏလောက် နေပါဦး။”
လော့လင်တန်က သူ့ကို ဆွဲထားရန် လှမ်းခေါ်လိုက်သည်။ ရှောင်းယီက ခဏရပ်လိုက်ပြီး မေးလိုက်သည်။
“အရှင်မင်းကြီးလော့မှာ တခြား ပြောစရာရှိသေးလို့လား။”
“ရှိပါတယ်။”
လောလင်တွန်က ခိုင်မာစွာ ပြန်ဖြေလိုက်သည်။ ရှောင်းယီနှင့် ကျန်းယွင်ထျန်းတို့လည်း ပြန်ထိုင်လိုက်ကြသည်။
“ဘာကိစ္စများလဲ အရှင်မင်းကြီးလော့။”
ရှောင်းယီက မေးလိုက်သည်။
ထိုစဉ် လော့လင်တန်က မတ်တတ်ရပ်လိုက်ပြီး လေးနက်စွာ ကြေညာလိုက်သည်။
“ကျုပ် လော့လင်တန် ကောင်းကင်မိုးကြိုးမင်းဆက်ကို ကိုယ်စားပြုပြီး မဟာမိတ်ခေါင်းဆောင် ရှောင်းယီထံ အညံ့ခံကြောင်း ထုတ်ဖော်ပြောကြားလိုပါတယ်။ ယီရန်ပင်း မဟာမိတ်အဖွဲ့က ကျုပ်တို့ရဲ့ အညံ့ခံမှုကို လက်ခံပေးဖို့ မျှော်လင့်ပါတယ်။ ကျုပ်ရဲ့ ရိုးသားမှုကို ပြသတဲ့အနေနဲ့ မင်းဆက်မှာရှိသမျှ အုတ်မြစ်ကျောက် အားလုံးကို ဆက်သပါ့မယ်။”
လော့လင်တန်၏ စကားကို ကြားသောအခါ ရှောင်းယီသည် အနည်းငယ် အံ့အားသင့်သွားသော်လည်း လုံးဝ မျှော်လင့်မထားသည်တော့ မဟုတ်ပေ။ ဘေးတွင် ရပ်နေသော ကျန်းယွင်ထျန်းကမူ ဤသည်မှာ သဘာဝကျသော ဆုံးဖြတ်ချက်ဟုသာ တွေးလိုက်သည်။
“ကျုပ်ဆီမှာ အညံ့ခံတယ်ဆိုတာ ကောင်းကင်မိုးကြိုးမင်းဆက်အပေါ် ထိန်းချုပ်ခွင့် ဆုံးရှုံးသွားတာပဲ။ ခင်ဗျား လက်ရှိ ကိုင်စွဲထားတဲ့ အာဏာတွေကို တကယ်ပဲ စွန့်လွှတ်နိုင်လို့လား။”
ရှောင်းယီက ပြုံးကာ မေးလိုက်သည်။
လော့လင်တန်က ရှောင်းယီ၏ မေးခွန်းကို ကြိုတင်တွေးဆထားပုံရသည်။ သူက တွန့်ဆုတ်ခြင်းမရှိဘဲ ပြန်ဖြေလိုက်လေသည်။
“စွန့်လွှတ်နိုင်ပါတယ်။ တကယ်တော့ မုကျူး ပြောခဲ့တာ မှန်ပါတယ်။ ကျုပ် နန်းတက်ကတည်းက ကောင်းကင်မိုးကြိုးမင်းဆက်ရဲ့ အင်အားဟာ တစ်နေ့ထက်တစ်နေ့ ကျဆင်းလာခဲ့တယ်။ အတွင်းပိုင်းမှာ ကျန့်မုမိသားစုက အာဏာသိမ်းချင်နေသလို အပြင်ဘက်မှာလည်း တခြားပတ်ဝန်းကျင် အင်အားစုတွေက ကျုပ်တို့ကို စားကျက်လို ချောင်းနေကြတယ်။ ခေါင်းဆောင်ရှောင်းဆီ အညံ့ခံမှသာ ကောင်းကင်မိုးကြိုးမင်းဆက်ရဲ့ လက်ရှိ အကြပ်အတည်းကို ဖြေရှင်းနိုင်မှာပါ။”
“ဒါကြောင့် ခင်ဗျားက အညံ့ခံဖို့ ရွေးချယ်ခဲ့တာကိုး။ အပြင်မှာ ဝံပုလွေတွေ ဝိုင်းနေတာပဲ။”
ရှောင်းယီက ပြုံးပြီး ဆိုလိုက်သည်။
“ကျုပ်တို့က ဝံပုလွေတွေ ဝိုင်းခံထားရပေမဲ့ အခြေခံအုတ်မြစ်ကတော့ ခိုင်မာနေတုန်းပါပဲ။”
လော့လင်တန်က စိုးရိမ်တကြီးဖြင့် ပြောလိုက်သည်။
“ကျုပ်တို့ရဲ့ နိုင်ငံတော် ဘဏ္ဍာတိုက်ထဲမှာ အုတ်မြစ်ကျောက် ဘီလီယံ ခြောက်ရာ နီးပါး ရှိပါသေးတယ်။ အဲ့ဒါတွေကို အခုချက်ချင်း ခေါင်းဆောင်ရှောင်းဆီ လွှဲပေးနိုင်ပါတယ်။”
ရှောင်းယီက လက်ဝေ့ယမ်းလိုက်လိုက်၏။
“အုတ်မြစ်ကျောက်တွေကိုတော့ ခင်ဗျားဆီမှာပဲ လောလောဆယ် သိမ်းထားလိုက်ပါ။”
ထိုစကားကို ကြားသောအခါ လော့လင်တန်၏ မျက်နှာအမူအရာ ပျက်ယွင်းသွား၏။
သူက သူတို့၏ အညံ့ခံမှုကို ငြင်းပယ်တော့မည်လော။
စောစောက သူ၏သမီးတော် လော့ရယ်က အညံ့ခံရန် အကြံပေးစဉ်က သူ ပြတ်ပြတ်သားသား ငြင်းဆိုခဲ့သော်လည်း ယခုအခါ တစ်ဖက်လူက သူ၏ ကမ်းလှမ်းမှုကို တန်ဖိုးတောင် မထားသည်ကို တွေ့လိုက်ရခြင်းမှာ ရယ်စရာပင် ကောင်းနေတော့သည်။
လော့လင်တန်တစ်ယောက် စိတ်ပျက်လက်ပျက်ဖြင့် ခေါင်းခါလိုက်၏။
“ဒါပေမဲ့ ခင်ဗျားတို့ရဲ့ အညံ့ခံမှုကိုတော့ ကျုပ် လက်ခံတယ်။ အခုကစပြီး ကောင်းကင်မိုးကြိုးမင်းဆက်ကို ကျုပ်တို့ ယီရန်ပင်း မဟာမိတ်အဖွဲ့ကပဲ စီမံခန့်ခွဲတော့မယ်။”
ရှောင်းယီက ဆက်ပြောလိုက်လေသည်။ လော့လင်တန်က ရုတ်တရက် ခေါင်းမော့လိုက်၏။
“ခေါင်းဆောင်ရှောင်း သဘောတူလိုက်တာလား။”
“ကျုပ်က ဘာလို့ သဘောမတူရမှာလဲ။”
ရှောင်းယီက ပြန်မေးလိုက်သည်။
ဤမျှများပြားသော အုတ်မြစ်ကျောက်များသည် မဟာမိတ်ကျွန်း၏ ဧရိယာကို သိသိသာသာ ချဲ့ထွင်ပေးနိုင်မည်ဖြစ်ရာ ရှောင်းယီအနေဖြင့် ထိုသို့သော အခွင့်အရေးမျိုးကို လက်လွှတ်ခံမည်မဟုတ်ပေ။
လောလောဆယ်တွင် ဝံပုလွေနီ ပင်လယ်ဓားပြစခန်း၌ ကြီးမားသော သတ္တုသိုက်များကို တွေ့ရှိထားသော်လည်း ထိုသိုက်များသည် အဆုံးတွင် ဤနေရာရှိ ဒေသခံလူမျိုးများ၏ ကျွန်းပေါ်တွင် တည်ရှိနေခြင်းဖြစ်ပြီး တစ်နေ့တွင် ကုန်ခမ်းသွားမည်သာ ဖြစ်သည်။
ထိုသိုက်များ ကုန်ခမ်းသွားပြီးနောက် နောက်ထပ် သတ္တုကြွယ်ဝသော ကျွန်းမျိုးနှင့် ထပ်မံကြုံတွေ့ရမည်ဟု မည်သူမျှ အာမမခံနိုင်ပေ။ မိမိကိုယ်ပိုင်ကျွန်း၏ သယံဇာတ အသစ်ပြန်လည်ဖြစ်ပေါ်မှုကို အားကိုးခြင်းကသာ ရေရှည်တည်တံ့နိုင်သော တစ်ခုတည်းသော နည်းလမ်းဖြစ်သည်။
ယခင်ကမ္ဘာတွင် တရုတ်ပြည်ကို တင်စားလေ့ရှိသော စကားစုမှာ ‘ကျယ်ပြောသော နယ်မြေနှင့် ကြွယ်ဝသော သယံဇာတ’ ဟူ၍ ဖြစ်သည်။
ဤစကားစုသည် ဤကမ္ဘာတွင်လည်း အလွန်အသုံးဝင်ပါသည်။ နယ်မြေကျယ်ပြောမှသာ သယံဇာတ ကြွယ်ဝနိုင်မည်ဖြစ်သည်။ အုတ်မြစ်ကျောက်ကျွန်း၏ ဧရိယာသည် လုံလောက်အောင် ကြီးမားနေသရွေ့ သယံဇာတ ပြန်လည်ထွက်ရှိနှုန်းမှာ မြန်ဆန်လာမည်ဖြစ်ပြီး အရင်းအမြစ်အသစ်များ ပေါ်ထွက်လာနိုင်ခြေမှာလည်း ပိုမိုများပြားလာမည် ဖြစ်သည်။
လော့လင်တန်မှာမူ ရှောင်းယီ၏ စကားကြောင့် ဇဝေဇဝါ ဖြစ်သွားရသည်။
“ဒါပေမဲ့ စောစောက ခေါင်းဆောင်ရှောင်း ပြောတာက ကျုပ်တို့ နိုင်ငံတော် ဘဏ္ဍာတိုက်ထဲက အုတ်မြစ်ကျောက်တွေကို မလိုချင်ဘူးလို့ ဆိုလိုက်တာ မဟုတ်ဘူးလား။”
“ဘယ်သူက မလိုချင်ဘူးလို့ ပြောလို့လဲ။ လောလောဆယ် ခင်ဗျားဆီမှာပဲ ခဏသိမ်းထားဦး။ ကျုပ် အလိုရှိတဲ့အခါကျမှ ပို့ပေးလိုက်လို့ ပြောတာလေ။”
ရှောင်းယီက ပြန်ဖြေလိုက်သည်။
“ဟမ်...။”
လော့လင်တန်သည် ရှောင်းယီ၏ အကွက်ကို နားမလည်နိုင်အောင် ဖြစ်သွားခဲ့၏။
“ကောင်းပြီ...အုတ်မြစ်ကျောက်တွေအကြောင်းကို နောက်မှ ထပ်ပြောတာပေါ့။ ခင်ဗျားဘက်က ဒီလောက်အထိ ရိုးသားမှုကို ပြသလာမှတော့ ကျုပ်ကလည်း မတုံ့ပြန်လို့ မဖြစ်ဘူး။ ကျုပ် ခင်ဗျားတို့အတွက် ကာဘိုင်ရိုင်ဖယ် တစ်သောင်းနဲ့ စက်သေနတ် တစ်ထောင် ပေးမယ်။ ပြီးတော့ လေတပ်သင်တန်း ဆင်းသွားတာနဲ့ တိုက်လေယာဉ် ငါးစင်းကိုလည်း ခင်ဗျားတို့မြို့တော်မှာ အမြဲတမ်း တပ်စွဲထားပေးမယ်။”
ရှောင်းယီက လက်ဝေ့ယမ်းကာ ပြောလိုက်သည်။
ရှောင်းယီက လက်နက်များစွာ ထောက်ပံ့ပေးမည်ဟု ကြားလိုက်ရသဖြင့် လော့လင်တန်မှာ ချက်ချင်းပင် စိတ်လှုပ်ရှားသွား၏။
“ကျေးဇူးတင်ပါတယ် မဟာမိတ်ခေါင်းဆောင် ရှောင်း။”
“အခုထိ မဟာမိတ်ခေါင်းဆောင် ရှောင်းလို့ ခေါ်နေတုန်းလား။”
ကျန်းယွင်ထျန်းက ပြုံးကာ ဝင်ပြောလိုက်သည်။
“ကျွန်းပိုင်ရှင်လို့ ပြောင်းခေါ်လိုက်လေ။”
“ဟုတ်ကဲ့ပါ နည်းပြကျန်း။”
လော့လင်တန်က ချက်ချင်း တုံ့ပြန်လိုက်သည်။
“ကျေးဇူးတင်ပါတယ် ကျွန်းပိုင်ရှင်။”
“ခင်ဗျားတို့ ကောင်းကင်မိုးကြိုးမင်းဆက်ရဲ့ အုတ်မြစ်ကျောက်တွေက အထက်တန်းစား မိသားစုတွေ ကြားထဲမှာ ပြန့်ကျဲနေတယ်လို့ ကြားတယ် ဟုတ်လား။”
ရှောင်းယီက ဆက်မေးလိုက်သည်။
သူတို့သည် အညံ့ခံလိုက်ပြီဖြစ်ရာ သူ၏ လက်အောက်ငယ်သားများအကြောင်းကို ပိုမို ဂရုစိုက်ရန် လိုအပ်လာပြီဖြစ်သည်။
လော့လင်တန်က ကူကယ်ရာမဲ့စွာဖြင့် ပြောလိုက်သည်။
“ဟုတ်ပါတယ်။ ကမ္ဘာကြီးကို တိုက်ခိုက်သိမ်းပိုက်တုန်းကတော့ အားလုံးက စည်းလုံးခဲ့ကြပေမဲ့ နယ်မြေကို ထိန်းသိမ်းတဲ့အခါကျတော့ လူတိုင်းက ကိုယ်ကျိုးအတွက် လျှို့ဝှက်အကြံအစည်တွေ ရှိလာကြတာပါပဲ။ ဟင်း...”
“ခင်ဗျားတို့ ကောင်းကင်မိုးကြိုးမင်းဆက်မှာ အုတ်မြစ်ကျောက် စုစုပေါင်း ဘယ်လောက်ရှိလဲ။”
ရှောင်းယီက စူးစမ်းစွာ မေးလိုက်သည်။
နိုင်ငံတော် ဘဏ္ဍာတိုက်ထဲက အုတ်မြစ်များအပါအဝင် ကျန့်မုမိသားစုဆီက အုတ်မြစ်ကျောက်များကိုပါ ပေါင်းလိုက်လျှင်ပက် ထရီလီယံ တစ်ခုထက် အများကြီး ကျော်လွန်နေပြီဖြစ်ရာ ၎င်းမှာ ယခင်က လူပုနိုင်ငံ၏ အုတ်မြစ်ကျောက် ပမာဏထက်ပင် ပိုများနေပြီဖြစ်သည်။
“စုစုပေါင်း နှစ်ထရီလီယံပါ။”
လော့လင်တန်က ပြန်ဖြေလိုက်သည်။
ထိုကိန်းဂဏန်းကို ကြားသောအခါ ရှောင်းယီ အံ့အားသင့်သွားရ၏။
“အဲ့ဒီလောက်တောင် များတာလား။”
“ဟုတ်ပါတယ်။ ကျုပ်တို့ မင်းဆက်ကို စတင်ထူထောင်ကတည်းက ဒီလောက်အထိ ရှိခဲ့တာပါ။”
လော့လင်တန်က အခိုင်အမာ ပြောလိုက်သည်။
“ဒါဆို တခြား အထက်တန်းစားမိသားစုတွေဆီမှာလည်း အတော်များများ ရှိနေသေးတာပဲ။”
ရှောင်းယီက အကြမ်းဖျင်း တွက်ချက်ကာ ပြောလိုက်သည်။
“ဟုတ်ပါတယ်။ ဒါပေမဲ့ ကျွန်းပိုင်ရှင် စိတ်ချပါ။ ကျုပ် အထက်တန်းစားမိသားစုတွေဆီက အုတ်မြစ်ကျောက်တွေ အကုန်လုံးကို သေချာပေါက် ပြန်စုစည်းပြီး ကျွန်းပိုင်ရှင်ဆီ အပ်နှံပါ့မယ်။”
လော့လင်တန်က ချက်ချင်း ကတိပေးလိုက်သည်။
ရှောင်းယီထောက်ပံ့ပေးမည့် အဆင့်မြင့်လက်နက်များဖြင့် ထိုမိသားစုများကို လိမ္မာလာအောင် လုပ်နိုင်မည်ဟု လော့လင်တန်က အပြည့်အဝ ယုံကြည်ပေသည်။
“အင်း... ဒီကိစ္စကိုတော့ လောလောဆယ် ခင်ဗျားဘာသာပဲ ကိုင်တွယ်လိုက်ပါ။”
ရှောင်းယီက ခေါင်းညိတ်ကာ ပြောပြီးနောက် စာကြည့်ဆောင်မှ ထွက်လာခဲ့လိုက်သည်။
လော့လင်တန်၏ စာကြည့်ဆောင်မှ ထွက်လာပြီးနောက် ကျန်းယွင်ထျန်းက ပြုံးကာ ပြောလိုက်သည်။
“ဒီလော့လင်တန်က တကယ်ပြတ်သားတဲ့လူပဲ။”
“အမှန်ပဲ...ကောင်းကင်မိုးကြိုးမင်းဆက်ကို ငါ့လက်အောက်ထဲ ထည့်ဖို့ စဉ်းစားထားပေမဲ့ သူတို့ဘက်က ဒီလောက်အထိ အလျင်အမြန် လာပြီး အညံ့ခံလိမ့်မယ်လို့တော့ မမျှော်လင့်ထားဘူး။”
ရှောင်းယီကလည်း ပြုံးကာ ပြန်ဖြေလိုက်သည်။
“ဒါဆိုရင်တော့ ငါတို့ နောက်ထပ် သတ္တုအရင်းအမြစ်အသစ်တွေ ရတော့မှာပဲ။”
ကျန်းယွင်ထျန်းက ဆိုသည်။ ကောင်းကင်မိုးကြိုးမင်းဆက်၏ သတ္တုသိုက်များသည် လန်ဖုန်စ အင်ပါယာလောက် မကြွယ်ဝသော်လည်း အတိုင်းအတာတစ်ခုအထိတော့ ရှိနေပါသေးသည်။
အခန်း ၁၀၆၆ - ဒေသခံလူမျိုးများနှင့် မသေမျိုးမျိုးနွယ်စုတို့ ပူးပေါင်းကြံစည်နိုင်ခြေ
“လောလောဆယ်တော့ ငါတို့မှာ သတ္တုအရင်းအမြစ် ပြတ်လပ်တာမျိုး မရှိသေးပါဘူး။ အခုက မသေမျိုးမျိုးနွယ်စုဘက်က တခြား ဘာလှည့်ကွက်တွေ ထပ်သုံးလာမလဲဆိုတာပေါ်မှာပဲ မူတည်တယ်။”
ရှောင်းယီက ပြန်ပြောလိုက်သည်။
“သတ္တုတွေကို အလုံးအရင်းနဲ့ ဝါးမြိုပစ်မယ့် အသုံးအဆောင် အသစ်တွေကို ကျွန်းပိုင်ရှင် ဘယ်လောက်အထိ ထပ်ရဦးမလဲဆိုတာပေါ်မှာလည်း မူတည်သေးတယ်လေ။”
ကျန်းယွင်ထျန်းက ပြောလိုက်သည်။ ရှောင်းယီ အနည်းငယ် ကြောင်သွားပြီးမှ ရယ်မောကာ ပြန်ဖြေလိုက်သည်။
“အဲ့ဒါလည်း ဟုတ်တာပဲ။”
အကယ်၍ ရှောင်းယီသာ စနစ်ဆီမှာ လက်မှတ်ထိုးဝင်ပြီး သတ္တု အမြောက်အမြား အသုံးပြုရမည့် လက်နက်ကိရိယာများကို ရရှိလာပါက လက်ရှိ သတ္တုသိုလှောင်မှုများမှာ ကြာရှည်ခံလိမ့်မည် မဟုတ်ပေ။
“ဒီကိစ္စတွေ အကုန်ပြီးသွားရင် မင်းလည်း ပြန်လာခဲ့တော့။ ဆက်သွယ်ရေးအရာရှိအဖြစ် လက်အောက်ငယ်သား တစ်ယောက်ယောက်ကိုပဲ ဒီမှာ ထားခဲ့လိုက်။”
ရှောင်းယီက အနည်းငယ် စဉ်းစားပြီးနောက် ပြောလိုက်သည်။
“ငါတို့ လေတပ်ကို အမြန်ဆုံး အကောင်အထည်ဖော်ရမယ်။”
“ဟုတ်ကဲ့။”
ကျန်းယွင်ထျန်းက ပြန်ဖြေလိုက်သည်။
“ဒါပေမဲ့ တိုက်လေယာဉ်တွေချည်းပဲ ရှိနေတာက နည်းနည်း ပျင်းစရာမကောင်းဘူးလား။ တိုက်ခိုက်ရေး ရဟတ်ယာဉ် (Armed Helicopters) တို့ ဘာတို့ကော မရနိုင်ဘူးလား။”
ရှောင်းယီက သူ့ကို စိုက်ကြည့်လိုက်၏။
“မင်းက အိပ်မက်ယောင်နေတာပဲ။ တိုက်လေယာဉ်တွေ ရှိနေတာတောင် အတော်လေး ဟုတ်နေပြီ။”
“ဟီးဟီး ... ဒါကို ရည်မှန်းချက်ကြီးတယ်လို့ ခေါ်တယ်ကွ။ ကောင်းတာတွေ ရှိလာရင် ပိုကောင်းတာကို လိုချင်ကြတာပဲ မဟုတ်ဘူးလား။”
ကျန်းယွင်ထျန်းက ပြန်ပြောလိုက်သည်။ ရှောင်းယီ မျက်လုံးလှန်ပြလိုက်၏။
“ငါ အရင်ပြန်နှင့်မယ်။ မင်းလည်း ဒီမှာ အစီအစဉ်တွေ ချပြီးရင် ပြန်လာခဲ့။ ပြီးတော့ လော့လင်တန်ကို ဆက်သွယ်ရလွယ်အောင် မိုဘိုင်းဖုန်းတစ်လုံး ပေးခဲ့လိုက်ဦး။”
“ဟုတ်ကဲ့။”
ကျန်းယွင်ထျန်းက အလေးပြုရင်း ပြန်ဖြေလိုက်သည်။
ထို့နောက် ရှောင်းယီသည် အစီအရင်မှတစ်ဆင့် ကောင်းကင်မိုးကြိုးမင်းဆက်မှ တိုက်ရိုက်ထွက်ခွာလာပြီး ယီရန်ပင်း မဟာမိတ်အဖွဲ့သို့ ပြန်ရောက်လာခဲ့သည်။
အခန်းထဲသို့ ပြန်ရောက်သောအခါ ရှောင်းယီသည် သူ၏ မိုဘိုင်းဖုန်းမှတစ်ဆင့် ချတ်ဆော့ဖ်ဝဲကို ဖွင့်လိုက်သည်။ ဆုဝမ် ကြားဖြတ်ဖမ်းယူထားသော အရေးကြီးသည့် သတင်းအချက်အလက်အချို့ကို ဖတ်ရှုပြီးနောက် သူသည် ယီထျန်း ဂရုချတ်ထဲသို့ ဝင်လိုက်သည်။
“နောက်ထပ် တစ်ရက်တော့ အသက်ဆက်နိုင်ခဲ့ပြန်ပြီ။ မနက်ဖြန်ကျရင် အခြေအနေတွေ ပိုကောင်းလာပါစေလို့ မျှော်လင့်ရတာပဲ။”
“တစ်ယောက်ယောက် အဲ့ဒီလို တွေးလိုက်ပြီဆိုရင် မသေမျိုးတွေက ပြဿနာ ရှာတော့မှာပဲ။ ငါကတော့ လက်ရှိအတိုင်းပဲ အေးအေးဆေးဆေး ရှိနေတာကို ပိုသဘောကျတယ်။”
“ဟုတ်တယ်။ တိုက်ခိုက်မှုနှုန်းသာ အခုထက် ပိုပြင်းထန်လာရင် ငါတို့ မဟာမိတ်အဖွဲ့တော့ တကယ် ဒုက္ခရောက်လိမ့်မယ်။”
“အဲ့ဒီလောက်ထိတော့ မဖြစ်နိုင်လောက်ဘူး။ နေဦး ... ငါတို့ မဟာမိတ်အဖွဲ့ထဲက တစ်ယောက်က ဒေသခံလူမျိုးတွေရဲ့ ရေတပ်စုကို တွေ့လိုက်ရတယ်လို့ ပြောနေတယ်။”
“မင်းတို့ဆီမှာ ဒေသခံလူမျိုး ကူညီသူတွေ ရှိတာ တော်တော်အားကျဖို့ ကောင်းတာပဲ။ ငါတို့ဆီမှာရော ဘယ်တော့မှ ဒေသခံရေတပ်ကို တွေ့ရမှာလဲ။”
ဤသည်ကို မြင်သောအခါ ရှောင်းယီသည် ပြဿနာတစ်ခုကို ချက်ချင်း သတိပြုမိသွားပြီး ဂရုချတ်ထဲတွင် ပြောလိုက်သည်။
“သတိထားကြဦး။ အခုအချိန်မှာ ဒေသခံအင်အားစုတွေထဲမှာ ဒေသခံလူမျိုးတွေချည်းပဲ ရှိနေတာ မဟုတ်နိုင်တော့ဘူး။”
ရှောင်းယီ၏ မက်ဆေ့ချ်ကို မြင်သောအခါ အဖွဲ့ထဲရှိလူများ အံ့အားသင့်သွားကြတော့သည်။
အုပ်စုပိုင်ရှင် အနေဖြင့် ရှောင်းယီ၏ အမည်မှာ အခြားသူများနှင့်မတူဘဲ ထင်ရှားနေသဖြင့် သူ မက်ဆေ့ချ်ပို့လိုက်သည်နှင့် လူတိုင်းက ချက်ချင်း သတိထားမိကြခြင်းဖြစ်သည်။
“သူဌေးက ထပ်ပြောလိုက်ပြန်ပြီ။ ဒါက ဘာကို ဆိုလိုတာလဲ။”
“ဟုတ်တယ်။ ဒေသခံအင်အားစုထဲမှာ ဒေသခံလူမျိုးတွေချည်းပဲ မဟုတ်ရင် တခြား ဘာရှိဦးမှာလဲ။”
“သူဌေး ... မြန်မြန်ပြောပြပါဦး။ တခြား ဘာတွေ ရှိနိုင်သေးလို့လဲ။”
ရှောင်းယီက ဆက်ပြောလိုက်သည်။
“မသေမျိုးမျိုးနွယ်စုတွေလည်း ဖြစ်နိုင်တယ်။”
“ဘာတွေလဲကွာ...။ ဒေသခံလူမျိုးတွေက မသေမျိုးတွေ ဖြစ်နိုင်တယ် ဟုတ်လား။ အဲ့ဒါက ဘာကို ဆိုလိုတာလဲ။”
“ဟုတ်တယ်။ ဒေသခံလူမျိုးတွေက ဘယ်လိုလုပ်ပြီး မသေမျိုးတွေ ဖြစ်နိုင်မှာလဲ။”
“စကားမများကြနဲ့ဦး။ သူဌေး ပြောတာကို အရင်နားထောင်ရအောင်။ မင်းတို့ ဒီလိုတွေ ဝိုင်းမေးနေရင် သူဌေး ဘာမှ ပြောလို့ရတော့မှာ မဟုတ်ဘူး။”
ထိုစဉ် ရှောင်းယီက ဆက်လက် ရှင်းပြလိုက်သည်။
“ငါတို့ ဒေသခံအင်အားစုတစ်ခုနဲ့ ဆက်သွယ်မိခဲ့တယ်။ အဲ့ဒီမှာ ဒေသခံလူမျိုး တချို့က မသေမျိုးမျိုးနွယ်စုတွေနဲ့ ဆက်သွယ်နိုင်တာကို တွေ့ခဲ့ရတယ်။ အဲ့ဒါကြောင့် အဲ့ဒီ ဒေသခံလူမျိုးတွေသာ ကိုယ်ကျင့်တရား မရှိဘူးဆိုရင် သူတို့နှစ်ဦး ပူးပေါင်းကြံစည်ဖို့က အရမ်း လွယ်ကူသွားပြီ။”
“သေစမ်း...။ အဲ့ဒါမျိုးက တကယ် ဖြစ်နိုင်လို့လား။ ဒေသခံလူမျိုးတွေနဲ့ မသေမျိုးတွေကြားက ပဋိပက္ခက လုံးဝ ဖြေရှင်းလို့ မရနိုင်တဲ့ အရာလို့ပဲ ငါ ထင်ထားခဲ့တာ။”
“တစ်နည်းအားဖြင့် ပြောရရင် ဒေသခံလူမျိုးတွေက ငါတို့နဲ့ပဲ မဟာမိတ်ဖွဲ့နိုင်တာ မဟုတ်ဘဲ မသေမျိုးတွေနဲ့လည်း မဟာမိတ်ဖွဲ့နိုင်တယ်ပေါ့။”
“အခြေအနေတွေက တော်တော်ရှုပ်ထွေးကုန်ပြီ။ မသေမျိုးမျိုးနွယ်စု တစ်ခုတည်းနဲ့တင် ငါတို့မှာ အလူးအလဲ ခံစားနေရတာ။ အခု သောက်ကျင့်မကောင်းမရှိတဲ့ ဒေသခံလူမျိုးတွေပါ ထပ်ပေါင်းလာမယ်ဆိုရင် ငါတို့ ဘယ်လို အသက်ဆက်ရတော့မှာလဲ။”
ထိုစဉ် မိမိတို့ မဟာမိတ်အဖွဲ့တွင် ဒေသခံရေတပ်သင်္ဘောများကို ထပ်မံတွေ့ရှိရသည်ဟု စောစောက သတင်းပို့ခဲ့သူမှာ ဂရုချတ်ထဲသို့ ရုတ်တရက် မက်ဆေ့ချ် ထပ်ပို့လာခဲ့သည်။
“သေစမ်း...ဒါက တကယ်ပဲ ဒေသခံလူမျိုးတွေနဲ့ မသေမျိုးတွေ ပေါင်းထားတဲ့ ပူးပေါင်းတပ်ဖွဲ့ပဲ။”
“သူဌေးကတော့ တကယ့်ကို နတ်ဘုရားလို ကြိုသိနေတာပဲ။ ဒါပေမဲ့ ရှေ့ဖြစ်ဟောရင် ကောင်းတဲ့အရာလေးတွေပဲ ဟောပေးလို့ မရဘူးလား။”
“ဒါဆိုရင် ငါတို့နဲ့ အရင်က မဟာမိတ်ဖွဲ့ထားတဲ့ ဒေသခံအင်အားစုတွေကတော့ သူတို့နဲ့ သွားမပေါင်းလောက်ပါဘူးနော်။”
“ဒါက အကျိုးအမြတ်ပေါ်မှာပဲ မူတည်တယ်။ အကျိုးအမြတ်ကသာ လုံလောက်အောင် ကြီးမားမယ်ဆိုရင် ဘယ်သူမှ အာမမခံနိုင်ဘူး။”
“မင်းတို့ ပြောနေတာနဲ့ ငါတော့ တော်တော်ရင်တုန်လာပြီ။ ငါတို့ဆီမှာ ဒေသခံမဟာမိတ်တပ်ဖွဲ့တွေရဲ့ အကာအကွယ်ကိုပဲ အပြည့်အဝ အားကိုးထားရတဲ့ ကျွန်းခွဲ တစ်ခုရှိတယ်။”
“သတိထားတာ အကောင်းဆုံးပဲ။ မဟုတ်ရင် မင်း ဘယ်လိုသေသွားမှန်းတောင် သိလိုက်မှာ မဟုတ်ဘူး။”
“ချီးဘဲ...။ ငါ အခုချက်ချင်း သွားစစ်ဆေးကြည့်တော့မယ်။ မင်းတို့ တွေးပူနေတာတွေ မဖြစ်ပါစေလို့ပဲ ဆုတောင်းရမှာပဲ။”
“ဟေ့လူတွေ ... မသေမျိုးတွေ သေနတ်ကိုင်ထားတာ မင်းတို့ မြင်ဖူးကြလား။”
ဒေသခံတပ်နှင့် မသေမျိုးပူးပေါင်းတပ်ကို ရင်ဆိုင်နေရသူက ထပ်မံပြောကြားလာခဲ့သည်။
“ဘာ...။ မသေမျိုးတွေက သေနတ်သုံးနိုင်တယ် ဟုတ်လား။ အဲ့ဒီအရိုးစုတွေ လက်နက်ကိုင်ပြီး ပစ်နေတာကို စိတ်ကူးကြည့်ဖို့တောင် ခက်တယ်။”
“ငါ သိချင်တာက သူတို့ ဘယ်လို ချိန်ပြီးပစ်တာလဲ။ ခံစားချက်အတိုင်းပဲ ရမ်းပစ်တာလား။”
“ငါက ပိုတောင် သိချင်သေးတယ်။ သေနတ်ရဲ့ နောက်ကန်အားကို သူတို့ ဘယ်လို ထိန်းတာလဲ။ အရိုးနဲ့ တိုက်ရိုက် ထိထားတာလား။ အဲ့ဒီလို မာတဲ့ဟာ အချင်းချင်း ထိနေရင် သေနတ်ရဲ့ နောက်ကန်အားကြောင့် သူတို့ အရိုးစုတွေ ကြေမွသွားမှာ မကြောက်ဘူးလား။”
“အားလုံးပဲ ... သိချင်တာတွေကို ခဏဘေးဖယ်ထားကြပါဦး။ အဲ့ဒီ ဒေသခံနဲ့ မသေမျိုး ပူးပေါင်းတပ်တွေကို ဘယ်လို ရင်ဆိုင်ရမလဲဆိုတာပဲ အရင်စဉ်းစားကြရအောင်။”
“ဘယ်လို ရင်ဆိုင်ရမှာလဲ။ အခု ရင်ဆိုင်နေတဲ့အတိုင်းပဲ ပေါ့။ ဘယ်သူပဲဖြစ်ဖြစ် အားလုံးက ရန်သူတွေပဲ။ အမြောက်နဲ့ ထုမယ်၊ သေနတ်နဲ့ ပစ်မယ်။ ဟုတ်သားပဲ ... အခု ငါတို့မှာ ရေနွေးငွေ့သုံး တော်ပီဒိုတွေလည်း သုံးလို့ရနေပြီလေ။”
“မှန်တယ်...သူဌေးက ရေနွေးငွေ့သုံး တော်ပီဒိုတွေ ရောင်းပေးနေပြီဆိုတော့ ဒေသခံသင်္ဘောတွေနဲ့ လာနေတဲ့ အဲ့ဒီ မသေမျိုးတွေကို ပင်လယ်ထဲမှာတင် တိုက်ရိုက် နှစ်ပစ်လို့ ရတာပဲ။”
“မလွယ်ဘူး...အဲ့ဒီ ပူးပေါင်းတပ်တွေက အခု တိုက်ခိုက်နေတဲ့ မသေမျိုးတွေနဲ့ ဘယ်လို ပေါင်းလုပ်ရမလဲဆိုတာ ကောင်းကောင်း သိနေကြတယ်။ ငါတို့ မဟာမိတ်အဖွဲ့ တောင့်ခံနိုင်ဖို့တောင် ခဲယဉ်းနေပြီ။”
“ဟူး... မှောင်တောင် မမှောင်သေးဘူး။ မသေမျိုးတွေက ပြဿနာ စရှာနေပြီလား။”
“ဒီညတော့ ငါတို့ ကောင်းကောင်း အိပ်ရမှာ မဟုတ်ဘူးဆိုတာ ကြိုမြင်နေရပြီ။”
“အိပ်ဖို့ စဉ်းစားမနေနဲ့။ ဒေသခံလူမျိုးတွေ လာမလားဆိုတာကိုပဲ သေသေချာချာ စောင့်ကြည့်ထားကြ။”
“သေစမ်း... ငါ့ဘက်မှာလည်း ဒေသခံရေတပ်စု တစ်စု ပေါ်လာပြီ။ သူတို့က တဖြည်းဖြည်း နီးကပ်လာနေတယ်။ ငါတို့ ဘာလုပ်သင့်လဲ။”
“ဘာလုပ်ရမှာလဲ။ တိုက်ရမှာပေါ့။”
“စိတ်လိုက်မာန်ပါ မလုပ်နဲ့ဦး။ သူတို့က မိတ်ဆွေတပ်တွေ ဖြစ်နေရင်ကော။”
“ဒီအချိန်မှာ ဘယ်လိုမှ ခွဲခြားလို့ မရနိုင်ဘူး။ အကယ်၍ သူတို့က မသေမျိုးတွေကို ကျွန်းပေါ် ခေါ်လာရင် ဘယ်လိုလုပ်မလဲ။ အဲ့ဒါဆိုရင်တော့ အကုန် ပြီးသွားပြီပဲ။”
“သူတို့ မသေမျိုးတွေကို ကျွန်းပေါ်ခေါ်လာရင်တောင် ငါတို့ ကိုင်တွယ်လို့ ရသေးတယ်။ ဒါပေမဲ့ သူတို့က လေဟာနယ်တံခါးကိုသာ အသက်သွင်းလိုက်ရင်တော့ ကျွန်းခွဲတစ်ခုတည်းတင်မကဘူး တစ်ကျွန်းလုံး ပျက်စီးသွားလိမ့်မယ်။”
“တောက်... တော်ပြီ။ ဘာစကားမှ ထပ်မပြောနဲ့တော့။ ငါတော့ ဘယ်ဒေသခံလူမျိုးကိုမှ ငါ့ကျွန်းပေါ် အတက်မခံနိုင်ဘူး။”
ဂရုချတ်အတွင်းရှိ ထိတ်လန့်တုန်လှုပ်မှုများကို ကြည့်ရင်း ရှောင်းယီသည် ကူကယ်ရာမဲ့စွာ ခေါင်းခါလိုက်မိ၏။ ဤကိစ္စနှင့် ပတ်သက်၍ သူလည်း ဘာမှ အများကြီး မပြောနိုင်ပေ။ မြေပြင်အခြေအနေပေါ် မူတည်၍သာ ဆုံးဖြတ်ရမည် ဖြစ်သည်။
ထိုစဉ် သူ၏ မိုဘိုင်းဖုန်းမှ ရုတ်တရက် အသံမြည်လာခဲ့လေသည်။ ရှောင်းယီ ကြည့်လိုက်သောအခါ နံပါတ်အသစ်တစ်ခုမှ အသံမက်ဆေ့ချ်တစ်ခု ဖြစ်နေသည်။
“ကျွန်းပိုင်ရှင် ကျုပ် လော့လင်တန်ပါ။ ဒါ ကျုပ်ရဲ့ ဖုန်းနံပါတ်ပါ။”
လော့လင်တန်က မိမိကိုယ်ကို မိတ်ဆက်လိုက်သည်။
“ညွှန်ကြားစရာရှိရင် ကျုပ်ကို တိုက်ရိုက် ဖုန်းခေါ်လို့ ရပါတယ်။”
“ကောင်းပြီ၊ ကျုပ် သိပြီ။”
ရှောင်းယီက ပြန်ဖြေလိုက်သည်။
“အလားတူပဲ၊ ခင်ဗျားဘက်မှာလည်း တစ်ခုခု လိုအပ်တာရှိရင် ဒီဖုန်းနဲ့ပဲ ကျုပ်ဆီ တိုက်ရိုက် ဆက်သွယ်နိုင်တယ်။”
“ဟုတ်ကဲ့ပါ။ ကျေးဇူးတင်ပါတယ် ကျွန်းပိုင်ရှင်။”
လော့လင်တန်နှင့် စကားပြောပြီးနောက် ရှောင်းယီသည် အနည်းငယ် စဉ်းစားကာ အန်းယွဲ့ထံ ဖုန်းခေါ်လိုက်သည်။
“ဦးလေးအန်း... ကောင်းကင်မိုးကြိုးမင်းဆက်က ကျုပ်တို့ မဟာမိတ်အဖွဲ့ဆီမှာ အညံ့ခံလိုက်ပြီ။ သူတို့ကို ကျုပ်တို့ရဲ့ အဆင့်မြင့် အတွေးအခေါ်တွေနဲ့ နည်းပညာတွေကို မျှဝေပေးလိုက်ပါ။ သူတို့လည်း အမြန်ဆုံး ဖွံ့ဖြိုးတိုးတက်လာအောင်လို့။”
“ကောင်းပြီ ပြဿနာမရှိဘူး။”