မမျှော်လင့်ထားသည့် ဧည့်သည်

အခန်း (၂၇၇) : မမျှော်လင့်ထားသည့် ဧည့်သည်

ပိုင်ဟန်က အလေးအနက် တိုက်ဖို့ ဆုံးဖြတ်လိုက်သည်နှင့် တိုက်ပွဲရေစီးကြောင်းက သူ့ဘက်ကို အားသာသွားသည်။ သူက ဝမ်ဝေ့ရှေ့မှောက်တွင် ချက်ချင်း ပေါ်ထွက်လာသည်။ ဤတစ်ကြိမ် ရွှေရောင်စုတ်တံက သာမန်အရွယ်အစားသို့ ကျုံ့သွားလေသည်။ သူက စုတ်တံကို ဝှေ့ယမ်းလိုက်သည့်အခါ မင်နက်ရည်များက ဓားချက်အဖြစ် ပြောင်းလဲသွားသည်။

ဝမ်ဝေ့က အချိန်မီတုံ့ပြန်နိုင်စွမ်း မရှိဘဲ မြေပေါ်သို့ လွင့်စင်သွားကာ ကီလိုမီတာထောင်ချီသည့် တုန်ခါလှိုင်းကြီးတစ်ခု ဖြစ်ပေါ်သွားစေသည်။

သို့သော်လည်း သူက ခန္ဓာကိုယ်တွင် ခြစ်ရာတစ်ချက် မရှိဘဲ အလျင်အမြန်ထလိုက်သည်။ သူက ဦးဆုံးတိုက်ခိုက်လိုသော်လည်း မဖြစ်နိုင်လိုက်ပေ။ ဝမ်ဝေ့ ထလိုက်သည်နှင့် သူ့ခြေထောက်က ယိမ်းယိုင်သွားကာ ခေါင်းကို ကိုင်ထားရင်း နာနာကျင်ကျင် ညည်းညူလိုက်ရသည်။

သူက သူ့အပေါ်ကျရောက်လာသည့် ရွှေရောင်စာလုံးများစွာနှင့် သင်္ကေတများစွာကို ကြည့်လိုက်သည်။ သူတို့၏ အသက်များတွင် သူ့စိတ်ဝိညာဉ်နှင့် စိတ်ဆန္ဒအား တိုက်ရိုက် တိုက်ခိုက်နိုင်သည့် ထူးဆန်းစွမ်းအားတစ်ခု ပါရှိနေဟန်ပေါ်သည်။

ဝမ်ဝေ့က သူ့စိတ်တွင် ထိုကျမ်းများဖြင့် ပြည့်နှက်လာကြောင်း ခံစားမိလိုက်ပြီး သူ့အတွေးများနှင့် မှတ်ဉာဏ်အားလုံးက ထိုကျမ်းများဖြင့် တဖြည်းဖြည်းချင်း အစားထိုးနေရာယူလာလေသည်။

သူသာ တစ်ခုခု မလုပ်ပါက ထိုကျမ်းများကိုသာ ရွတ်ဖတ်ဖို့ သိသည့် စိတ်မမှန်သည့် အရူးအဖြစ် ပြောင်းလဲသွားလိမ့်မည်မှန်း သိလေသည်။

ဒီပိုင်ဟန်က ထူးဆန်းတယ်။ သူက သူတော်စင်အဆင့်ပဲ ရှိသေးပေမဲ့ သူ့ဝိညာဉ်စွမ်းအားက မယုံနိုင်လောက်အောင် အားကြီးပြီးတော့ ငါတွေ့ဖူးသမျှ အစစ်အမှန် အုပ်ချုပ်သူတွေထက်တောင်မှပဲ ကျော်လွန်နေတယ်။ မဟုတ်သေးဘူး။ ငါ့အဖိုးထက်တောင်မှ ပိုအားကောင်းနေသေးတယ်။

ဝမ်ဝေ့က လျှာကို ကိုက်ကာ စိတ်ပြန်ထိန်းလိုက်သည်။ ထို့နောက် သူ့ဝိညာဉ်စွမ်းအားဖြင့် သူ့စိတ်ကို ခုခံကာကွယ်ထားလိုက်၏။ သို့သော်လည်း သူက ပြဿနာမှ မလွတ်မြောက်သေးပေ။

သူ့ခြေထောက်အောက်ရှိ မြက်ပင်များက ရွှေရောင်သဲအဖြစ် ပြောင်းလဲသွားပြီး သူ့အား ရစ်ပတ်လာလေသည်။ သူတို့က သူ့လက်များ၊ ခြေများ၊ ခေါင်းနှင့် ခန္ဓာကိုယ်ကို ထိန်းချုပ်လာသည်။ သူက တချို့သဲများသည် သူ့အရေပြား အပေါက်မှ ဝင်ရောက်ဖို့ ကြိုးစားနေကြောင်း သတိပြုမိလိုက်သည်။

ထို့အပြင် ထိုအရာများသည် သာမန်သဲများ မဟုတ်ဘဲ သူ့ မူလအဆီအနှစ်ကို အလျင်အမြန် ကုန်ဆုံးနိုင်စေပြီး သူ့ ခန္ဓာကိုယ်ကို အားနည်းအောင် လုပ်နိုင်သည့် စွမ်းအား ပါဝင်နေလေသည်။

ဒါက သူတော်စင်အဆင့်ကို သူတို့ပိုင်နက်အတွင်း တိုက်ခိုက်တယ်ဆိုတဲ့ ခံစားချက်မျိုးလား။ တစ်ကမ္ဘာလုံးက ငါ့ကို ဆန့်ကျင်နေသလိုပဲ။

ဝမ်ဝေ့က သူ့အရေပြားအထက်ရှိ ပင်ကိုစက်ကွင်းကို ချဲ့ထွင်လိုက်ပြီး သဲများကို တွန်းထုတ်လိုက်သည်။ ထို့နောက် သူက ခဲဖြူရောင်အလင်းအဖြစ် ပြောင်းလဲကာ ပိုင်ဟန်ဆီ နောက်တစ်ခေါက် ပြေးဝင်သွားလိုက်သည်။ ဤတစ်ကြိမ်တွင် သူ့အရှိန်က အလင်း၏ သုံးဆ ဖြစ်၏။

ကံဆိုးစွာဖြင့် ဤသည်က အသုံးမဝင်ပေ။ သူက သူ့ဦးတည်ချက် မရောက်ခင် ပိုင်ဟန်က သူ့နောက်တွင် ပေါ်လာကာ ကျောကို လက်ဝါးဖြင့် ရိုက်လိုက်သည်။ ထိုအခါ သူ့လက်ဝါးမှ ရွှေရောင်အလင်းတန်း ပေါ်ထွက်လာပြီးနောက် ဝမ်ဝေ့၏ ပင်ကိုစက်ကွင်းက ကျိုးပျက်သွားလေသည်။

ဝမ်ဝေ့က သွေးတစ်ပွက် အန်လိုက်ရပြီးနောက် လွင့်ထွက်သွားလေသည်။ ပိုပြီးဆိုးသည်က သဲများက သူ့ကို စတင်တိုက်ခိုက်လာပြန်သည်။ ဝမ်ဝေ့က အကြံကောင်းကို စဉ်းစားလိုက်ရင်း ခန္ဓာကိုယ်မှ အဖြူရောင်မီးတောက်တစ်ခု ထွက်ပေါ်လာပြီး သဲများဆီမှ ပိုင်ဟန်၏ စည်းမျဉ်းကို သန့်စင်ဖို့ ကြိုးစားလိုက်သည်။

သို့သော် ဝမ်ဝေ့က ကျရှုံးခဲ့ရသည်။ ကံကောင်းသည်က သူက သဲများကို ရပ်တန့်နိုင်ခဲ့သည်။ ထို့နောက် အသက်အနည်းငယ်ရှူကာ သူ့ခန္ဓာကိုယ်ကို စတင်စစ်ဆေးလိုက်၏။

ငါ့ကျောရိုးက ကျိုးသွားပြီးတော့ နောက်ကျောက ကြွက်သားတွေအကုန်လုံးလည်း ဖျက်ဆီးခံလိုက်ရတယ်။ အသည်း၊ ကျောက်ကပ်နဲ့ အဆုတ်ကလည်း မရှိတော့ဘူး။ ကံကောင်းတာက ငါ့နှလုံးနဲ့ သရက်ရွက်ကိုတော့ ကာကွယ်နိုင်လိုက်တယ်။

ပြီးတော့ စည်းမျဉ်းစွမ်းအားက ငါ့ခန္ဓာကိုယ်ထဲမှာ ရှိနေသေးတော့ ကုသဖို့ အတားအဆီး ဖြစ်နေတယ် …

ထိုစဉ် ဝမ်ဝေ့၏ မျက်ဝန်းအတွင်း သင်္ကေတတချို့ ဖြတ်ပြေးသွားပြီးနောက် အလျင်အမြန် ပျောက်ကွယ်သွားလေသည်။ သူက သူ့ပင်ကိုစွမ်းရည်တစ်ခုကို အသက်သွင်းလိုက်၏။ သဘာဝလွန်အဆင့်နှင့် မတူဘဲ အံ့ဖွယ်ခန္ဓာအဆင့်တွင် ပင်ကိုစွမ်းရည်ကို အသက်သွင်းခြင်းက အမှတ်အသားများ ပေါ်ထွက်လာစေမည် မဟုတ်တော့ပေ။

ဝမ်ဝေ့၏ အံ့ဖွယ်ပင်လယ်အတွင်း အနက်ရောင်နှင့် အဖြူရောင် စက်ဝန်းတစ်ခု ပေါ်ထွက်လာပြီး သူ့ မူလအဆီအနှစ် တစ်ဝက်ကို စုပ်ယူသွားလေသည်။ ထို့နောက်ဆိုသလို သူ့ဒဏ်ရာအားလုံးက ချက်ချင်းဆိုသလို ပြန်ကောင်းသွားလေသည်။

ကျိုးနေသော ကျောရိုးမကြီးဖြစ်စေကာမူ၊ ပျက်စီးနေသော ကြွက်သားများနှင့် ပျောက်ပျက်သွားသော အတွင်းအင်္ဂါများ ဖြစ်စေကာမူ အကုန်လုံး ပြန်ကောင်းသွားလေသည်။

သို့သော်လည်း ဝမ်ဝေ့က ပြန်လည်၍ မတ်မတ်ရပ်နိုင်သည့်အခါ ပိုင်ဟန်က တိုက်ခိုက်လာပြန်သည်။

ဝမ်ဝေ့က မော့ကြည့်လိုက်သည့်အခါ ပိုင်ဟန်က ကောင်းကင်တွင် သတ်ဖြတ်ခြင်းဟူသော စာလုံးကို ရေးသားထားသည်။ ထိုစာလုံးဆီမှ ဧရာမရွှေရောင်လှံကြီးက သူ့ဆီ ပြိုင်ဘက်ကင်းအရှိန်ဖြင့် တိုးဝင်လာနေသည်။

သူ့အတွက် အချိန်များစွာ မရှိသည်ကို သတိပြုမိကာ သူက ပင်ကိုစက်ကွင်းကို ပြန်လည်စုစည်းလိုက်ပြီးနောက် နောက်ထပ် မိုးမြေကြားရှိ ဝိညာဉ်ချီနှင့် မူလအဆီအနှစ်များဖြင့် ပြုလုပ်ထားသော နောက်ထပ်ဒိုင်းကာတစ်ခုဖြင့် ဝန်းရံလိုက်သည်။

ထို့အပြင် သူက ထိုဒိုင်းကာများအပြင် သန့်စင်ရေးမီးတောက်နှင့် ကောင်းကင်ဖျက်ဆီးရေးမီးတောက်တို့ဖြင့် လုပ်ထားသော နှစ်လွှာကိုပါ ထပ်၍ ကာရံလိုက်သည်။

ထိုကာကွယ်ရေးများ ပြုလုပ်ထားသော်လည်း ဝမ်ဝေ့က လွင့်ထွက်သွားလေသည်။ ထိုဖြစ်စဉ်အတွင်း သူက အံကြိတ်ကာ ဘယ်လက်ကို လှုပ်ရှားလိုက်လေသည်။

သိပ်မကြာခင် ပိုင်ဟန်၏ ဦးခေါင်းထက်တွင် ထိုးဖောက်မြင်ရသော ခန္ဓာကိုယ်တစ်ခု ပေါ်ထွက်လာသည်။ ပိုင်ဟန်က အမူအရာပျက်ယွင်းသွားကာ သူ့ကမ္ဘာဦးစိတ်ဝိညာဉ်က သူ့ခန္ဓာကိုယ်မှ အတင်းအကြပ် ဆွဲထုတ်ခံလိုက်ရကြောင်း သတိထားမိလိုက်လေသည်။

သူက ဘေးပတ်လည်ကို ကြည့်သည့်အချိန် သူ့ဝိညာဉ်ထံ ကြိုးတစ်ချောင်း တွယ်ငြိနေပြီး ကြိုးအဆုံးသတ်က ဝမ်ဝေ့၏ လက်ထဲတွင် ရှိနေကြောင်း မြင်လိုက်ရသည်။ သူက စည်းမျဉ်းစွမ်းအားကို ရွေ့လျားစေကာ ထိုကြိုးမျှင်ကို ဖြတ်တောက်ဖို့ ကြိုးစားလိုက်သည်။ သို့သော်လည်း သူက မလုပ်နိုင်ပေ။

ထို့ကြောင့် သူက ကမ္ဘာဦးစိတ်ဝိညာဉ်ကို ထိန်းချုပ်ကာ ဝမ်ဝေ့အား ဆောင့်ဆွဲလိုက်သည်။ အဆုံးသတ်တွင် သူကသာ တစ်ဖက်လူဆီ အဆွဲခံလိုက်ရ၍ ကမ္ဘာဦးစိတ်ဝိညာဉ်ကို လက်လွှတ်လိုက်ရသည်။

ပိုင်ဟန်က ဝမ်ဝေ့အား နက်နက်နဲနဲ ကြည့်လိုက်သည်။ ငါးမိနစ် ကျော်လွန်သွားသော်လည်း သူက သူ့ကို မသတ်နိုင်သေးပေ။ ဤလူငယ်မျိုးဆက်က သူ ထင်ထားသည်ထက် ခြိမ်းခြောက်မှု ပိုမိုကြီးမားကြောင်း သတိထားမိကာ အားလုံးကို အဆုံးသတ်ဖို့ ဆုံးဖြတ်လိုက်သည်။

သူက ပိုင်နက်ကို ထိန်းချုပ်ကာ လက်ဟန်တစ်ခု ဖွဲ့စည်းလိုက်ပြီး ဝမ်ဝေ့အား ရိုက်လွှတ်လိုက်သည်။

ဝမ်ဝေ့က ဖွဲ့စည်းလာသော စည်းမျဉ်းစွမ်းအားကို ကြည့်ကာ ကူကယ်ရာမဲ့နေမိသည်။ သူ့ခန္ဓာကိုယ်နှင့် ဝိညာဉ်က ချက်ချင်းဆိုသလို အမြစ်ဖြတ် သုတ်သင်ခံလိုက်ရသည်။

ထိုရလဒ်ကို ကြည့်ပြီး ပိုင်ဟန်က စိတ်သက်သာရာရစွာ သက်ပြင်းချကာ ရေရွတ်လိုက်သည် “ ငါက သူ့ကို သတ်ဖို့ အထွတ်အထိပ်တစ်ပိုင်းအဆင့် စွမ်းအားတောင် ထုတ်သုံးလိုက်ရတာပဲ။ ဘယ်လောက်တောင် ရှက်ဖို့ ကောင်းလိုက်လဲ”

“ မဟုတ်သေးဘူး ”

ပိုင်ဟန်၏ နောက်တွင် အသံတစ်သံ ထွက်ပေါ်လာသည်။ ထိုစဉ် သူက ဘေးဖက် ရှောင်ထွက်လိုက်သော်လည်း အနည်းငယ် နောက်ကျသွားလေသည်။ သူ့ကျောဖက်မှ အဖြူရောင် ကြိုးမျှင်တစ်ချောင်း ပေါ်ထွက်လာပြီး သူ့ညာဖက်လက်အား ဖြတ်တောက်လိုက်လေ၏။

ပိုင်ဟန်က ပြတ်တောက်သွားသည့် လက်အား မျက်မှောင်ကြုတ်လျက် ကြည့်လိုက်မိသည်။ သူက သူ့ပြန်လည်ကောင်းမွန်နိုင်စွမ်းသည် အတားအဆီး ဖြစ်နေကြောင်း ခံစားမိလိုက်သည်။ အတိအကျဆိုရလျှင် သူ့လက်၏ ကံကြမ္မာကို သူ့ခန္ဓာကိုယ်မှ ဖြတ်တောက်လိုက်သလိုမျိုး ဖြစ်၏။

ပိုင်ဟန်က အလျင်အမြန် တွက်ချက်ပြီးသည့်နောက်တွင် ထိုလက်အား ပြန်လည်ကောင်းမွန်လာဖို့အတွက် နှစ်ထောင်ချီ မဟုတ်လျှင်ပင် နှစ်ရာချီ ကြာမြင့်လိမ့်မည်မှန်း သတိပြုမိလိုက်သည်။ အကယ်၍ သူက အထွတ်အထိပ် နယ်ပယ်အဆင့်သို့ တက်လှမ်းနိုင်ခဲ့လျှင် အချိန်က လျော့ကျသွားလိမ့်မည်။

ဒီကလေးသာ စည်းမျဉ်းစွမ်းအားအနည်းငယ် ရှိနေရင် ဒီလက်က လုံးဝဖြတ်တောက်ခံလိုက်ရတော့မှာပဲ။ ငါ့အဖေလိုမျိုး အဆင့် တစ်ယောက်ယောက်သာ ဝင်ပါရင် ငါ ဒီလက်ကို ဘယ်တော့မှ ပြန်ကောင်းအောင် လုပ်နိုင်တော့မှာ မဟုတ်ဘူး

ငါ သူ့ကို ဘယ်လောက်ပဲ အထင်ကြီးမိမိ ငါ သူ့ရဲ့ စွမ်းဆောင်ရည်တွေကို လျှော့တွက်မိသေးတာပဲ

“ ငါ သိချင်မိသား” ပိုင်ဟန်က ပြောလိုက်သည် “ မင်းသေတာကို မြင်လိုက်ရဲ့သားနဲ့ ဘယ်လိုလုပ် အသက်ရှင်နေတာလဲ”

ဝမ်ဝေ့က ပြုံးရုံမျှ ပြုံးလိုက်သည်။ သူက သူ့အရိုးကိုယ်ပွား စွမ်းရည်အကြောင်း ပြောပြမည် မဟုတ်ပေ။ သူ့တွင် အသက်အနည်းငယ် ရှိထားသည်မှာ လူနည်းနည်းသိလေလေ ပိုကောင်းလေလေဖြစ်၏။

ထိုစဉ် ဝမ်ဝေ့က သူ့ချောင်းမြောင်းလုပ်ကြံသည့် တိုက်ကွက် ရှုံးနိမ့်သွားပြီးနောက်တွင် သူ့ဘာသူ တွေးလိုက်မိသည်။

ငါ့စွမ်းအားက သာမန်အထွတ်အထိပ် သူတော်စင်အဆင့်ကို တိုက်နိုင်တဲ့ အလယ်အလတ်အဆင့် သူတော်စင်နဲ့ လက်ရည်တူပေမဲ့ ကောင်းကင်ရွေးချယ်ခံ အထွတ်အထိပ် သူတော်စင်အဆင့်လောက်ထိ မမှီသေးဘူးပဲ။ ဘာပဲဖြစ်ဖြစ် သူတို့ကလည်း ငါ့ကို အလွယ်တကူ သတ်လို့မရပါဘူး

“ ကောင်းပြီ စမ်းသပ်မှုက ပြီးသွားပြီ”

“ မင်းက ဘာပြောချင်တာလဲ” ပိုင်ဟန်က ခံစားချက် ဆိုးဆိုးရွားရွားတစ်ခု ရလာမိသည်။

“ တိုက်ပွဲအစကတည်းက ကျုပ်က အန္တရာယ်ခံစားမိတယ်လို့ ပြောတယ်မလား။ ကျုပ်က ဘာမှမပြင်ဆင်ထားဘဲ နေမယ်ထင်လား”

ပိုင်ဟန်က အပေါ်ကို မော့ကြည့်သွားပြီးသည့်နောက် မျက်နှာထား ပြောင်းလဲသွားလေသည်။ သူက ယန်းချန်သည် ဓမ္မခန္ဓာကိုယ်ဖြင့် ဓားတစ်ချောင်း ကိုင်ဆောင်လာသည်ကို မြင်လိုက်ရသည်။

ယန်းချန်က တုံ့ဆိုင်းခြင်းမရှိဘဲ ဓားကို ဝှေ့ယမ်းလိုက်သည့်အခါ ဓမ္မခန္ဓာကိုယ်လည်း နောက်မှ လိုက်ပါလာသည်။

ပိုင်ဟန်က သူ့ပိုင်နက်ကို ဒိုင်းကာအဖြစ် အာရုံစုစည်းလိုက်သည်။ ထိုအခါ ပေါက်ကွဲမှုကြီးတစ်ခု ဖြစ်ပွားသွားပြီး အစီအရင်တစ်ခုလုံးကို တုန်ခါသွားစေသည်။

“ အင်း” ယန်းချန်က ထိုးဖောက်မြင်နေရသည့် ပိုင်ဟန်အားကြည့်ကာ ရေရွတ်လိုက်သည် “ သူက သူ့ကမ္ဘာဦးစိတ်ဝိညာဉ်ကို ကာကွယ်ပေးထားတဲ့ အထွတ်အထိပ်အဆင့် တာအိုသက်သေပြ ပစ္စည်းရှိတာပဲ။ ဒါပေမဲ့ တိုက်ကွက် ဘယ်လောက် ခံနိုင်ရည်ရှိလဲ ကြည့်ရတာပေါ့”

ထို့နောက် ယန်းချန်က နောက်ထပ် တစ်ချက်  ထပ်မံတိုက်ခိုက်လိုက်လေသည်။

ပိုင်ဟန်၏ ကြည်လင်ထိုးဖောက်မြင်နေရသည့် ခန္ဓာကိုယ်က စတင်၍ ဖြည်းဖြည်းချင်း ပျောက်ကွယ်လာသည်။ သူ့တွင် ရွေးချယ်စရာ အနည်းငယ်သာ ကျန်ရှိတော့သည်ကို သိ၍ အလျင်အမြန် ဆုံးဖြတ်လိုက်သည်။ ပိုင်ဟန်က အထွတ်အထိပ် နယ်ပယ်အဆင့် နားလည်နိုင်စွမ်းကို အသုံးပြုကာ အထွတ်အထိပ်နယ်ပယ်အဆင့်သို့ တက်လှမ်းရန် အတင်းအကြပ် ကြိုးပမ်းလိုက်သည်။

ထို့နောက် အစီအရင်၏ ဝေဟင်အထက် တိမ်တိုက်များ စတင်ပေါ်ထွက်လာသည်။ သို့သော်လည်း ပိုင်ဟန်က သွေးတစ်ပွက် အန်လိုက်ရပြီး အချိန်ခဏမျှသာ ကြာမြင့်လိုက်လေသည်။ ထို့နောက် သူက ပို၍ပင် အားနည်းသွား၏။

ယန်းချန်အတွက်မူ သူက သူ့တိုက်ကွက်များအပေါ် အာရုံစိုက်ထားသည်။ ၉ကြိမ်မြောက် တိုက်ကွက်အပြီးတွင် ပိုင်ဟန်၏ တာအိုသက်သေပြ ပစ္စည်းက ဖျက်ဆီးခံလိုက်ရသည်။ ထိုအခြေအနေကို အခွင့်ကောင်းယူကာ ယန်းချန်က သတ်ဖို့ ပြင်လိုက်သည်။

ပိုင်ဟန်က အားကောင်းကောင်း တိုက်ကွက် သူ့ဆီ ရောက်ရှိလာနေသည်ကို ကြည့်နေရင်း စိတ်ထဲတွင် သက်ပြင်းချလိုက်မိသည်။ ထို့နောက် သူ့ဘဝ၏ မှတ်ဉာဏ်များက သူ့စိတ်ထဲ ပေါ်ပေါက်လာကာ သူ့ဘဝ၏ မှတ်ဉာဏ်များနှင့် နောင်တတရားအားလုံးကို ပြန်လည်စဉ်းစားမိလိုက်သည်။

ပိုင်ဟန် အသတ်မခံရခင် သူ့ခန္ဓာကိုယ်မှ ရွှေရောင် အလင်းတန်းတစ်ခု ထွက်လာကာ တိုက်ကွက်ကို တားဆီးလိုက်၏။ ထို့နောက် ထိုရွှေရောင်အလင်းက ဖြည်းဖြည်းချင်း ကွန်ဖြူးရှပ်ပုံစံ ဝတ်ဆင်ထားပြီး မုတ်ဆိတ်အရှည်ကြီးရှိသည့် လူလတ်အရွယ်အမျိုးသားအဖြစ်သို့ ပြောင်းလဲသွားလေသည်။

“ အ … အဖေလား”