မဟာပျက်သုဉ်း မြို့ဟောင်းသို့ ရောက်ရှိခြင်း
Vol. 76 Ch. 792
ကျယ်ပြောလှသော အနန္တစကြာဝဠာကြီးက အတိုင်းအဆမရှိ ကျယ်ဝန်းလှသည်။
ဘီလီယံ မကသော နှစ်ကာလများအတွင်း မရေမတွက်နိုင်သော ဖျက်ဆီးမှုများကို ကြုံတွေ့ခဲ့ရသော်လည်း ၎င်း၏ နယ်ပယ်မှာမူ တဖြည်းဖြည်းနှင့် အပြင်ဘက်သို့ ဆက်လက် တိုးချဲ့လျက်ရှိသည်။
ဤသည်မှာ ကမ္ဘာတစ်ခု၏ ဝိသေသလက္ခဏာပင် ဖြစ်သည်။
အဘယ်ကြောင့်ဆိုသော် ၎င်းက ဟင်းလင်းပြင် ၏ နက်ရှိုင်းသောနေရာတွင် အမြဲ အမြစ်တွယ်နေပြီး ဟင်းလင်းပြင်ထဲမှ စွမ်းအားများကို မပြတ်မတောက် စုပ်ယူနေသောကြောင့် ဖြစ်သည်။
ဤဖြစ်စဉ်မှာ မည်သည့်အခါမျှ ရပ်တန့်သွားခြင်း မရှိပေ။
သို့သော် ဤကမ္ဘာကြီးက မည်မျှပင် ကျယ်ဝန်းပါစေ၊ ၎င်းတွင် မူလ အရင်းအမြစ်တစ်ခု ရှိစမြဲ ဖြစ်သည်။
ထိုအရင်းအမြစ်ကို မူလ အစပြုရာမြေ ဟု ခေါ်ကြပြီး အနန္တစကြာဝဠာ တွင် ဘိုးဘေးနယ်မြေ ဟုလည်း လူသိများသည်။
လောကရှိ စွမ်းအားအားလုံးက ထိုဘိုးဘေး နယ်မြေမှ ဆင်းသက်လာကာ ကမ္ဘာ့အရပ်ရပ်သို့ မပြတ်မတောက် စီးဆင်းသွားကြခြင်း ဖြစ်သည်။
မဟာပျက်သုဉ်း မြို့ဟောင်း မှာမူ ထိုဘိုးဘေး နယ်မြေပေါ်တွင် တည်ဆောက်ထားခြင်း ဖြစ်သည်။
မူလက မဟာပျက်သုဉ်း မြို့ဟောင်းသည် အနန္တစကြာဝဠာ ၏ ဗဟိုချက်တွင် တည်ရှိခဲ့ခြင်း ဖြစ်သည်။
သို့သော် နှစ်ကာလရှည်ကြာစွာ ဖျက်ဆီးမှုများ ကြောင့် ၎င်း၏ တည်နေရာမှာ များစွာ လွဲချော်သွားခဲ့ရသည်။
အထူးသဖြင့် ကမ္ဘာ့အရှင် ကြောင့် ဖြစ်ပေါ်ခဲ့သော ကြီးမားသော လှုပ်ခတ်မှုကြီးနောက်ပိုင်းတွင် အနန္တစကြာဝဠာ မှာ လုံးဝ ပြိုကွဲပျက်စီးသွားခဲ့ပြီး တစ်ချိန်က ကမ္ဘာ့ဗဟိုချက်တွင် ရှိခဲ့သော မဟာပျက်သုဉ်း မြို့ဟောင်းမှာလည်း အစိတ်စိတ်အမွှာမွှာ ကွဲထွက်ကာ အဆုံးမဲ့ ဟင်းလင်းပြင်ထဲတွင် လွင့်မျောသွားခဲ့ရသည်။
သို့သော် ဘိုးဘေး နယ်မြေ ဖြစ်သည့်အားလျော်စွာ ၎င်းနှင့် ကမ္ဘာကြီးအကြား ဆက်သွယ်မှုမှာမူ မည်သည့်အခါမျှ ပြတ်တောက်သွားခြင်း မရှိပေ။
ထိုသို့သော ဆက်သွယ်မှုများကြောင့် လူတို့က ၎င်းတည်ရှိရာနေရာကို အလွယ်တကူပင် ရှာဖွေနိုင်ကြဆဲ ဖြစ်သည်။
နောက်ပိုင်းကာလများတွင် မဟာပျက်သုဉ်း မြို့ဟောင်းက လူတို့ပြောစမှတ်ပြုကြသော မြင့်မြတ်နယ်မြေကြီး ငါးခု ထဲမှ တစ်ခု ဖြစ်လာခဲ့သည်။
သို့သော် လင်းယွင်တောင်တန်း နှင့် မတူသည်မှာ မဟာပျက်သုဉ်း မြို့ဟောင်းက ပိုမိုအရေးပါသော အဆင့်အတန်းရှိသော်လည်း ၎င်းတွင် "သဘာဝမျက်ရည်" ကဲ့သို့သော အဆင့်မြင့် ကျင့်ကြံရေး ပစ္စည်းများ သို့မဟုတ် ကျင့်ကြံသူတစ်ဦးကို ကျိကျွင်းအဆင့်သို့ ရောက်အောင် ကူညီပေးနိုင်သော "သဘာဝ အကြွင်းအကျန်" ကဲ့သို့သော နတ်ဘုရား ရတနာ များ မရှိပေ။
ပေးဆပ်ရမှုနှင့် ရရှိလာမည့် အကျိုးအမြတ်မှာ မျှတမှု မရှိသောကြောင့် မဟာပျက်သုဉ်း မြို့ဟောင်းသို့ သွားရောက်သော ကျင့်ကြံသူ အရေအတွက်မှာ အလွန်ပင် နည်းပါးသွားခဲ့သည်။
အချို့သော ကျိကျွင်းများသာ တစ်ခါတစ်ရံ သွားရောက်လေ့ရှိကြပြီး ၎င်းမှာလည်း တစ်ချိန်က အနန္တစကြာဝဠာ ၏ ဗဟိုချက်ကို လေ့လာကြည့်ရှုရန်အတွက်သာ ဖြစ်သည်။
ထန်ထျန်းနှင့် နေနတ်ဘုရားတို့အဖွဲ့က နေနတ်ဘုရား နန်းတော်မှ ထွက်လာပြီးနောက် မဟာပျက်သုဉ်း မြို့ဟောင်းသို့ တိုက်ရိုက် ဦးတည်ခဲ့ကြသည်။
လူတိုင်း မှာ ကျိကျွင်းအဆင့်နှင့် အထက်များ ဖြစ်ကြသဖြင့် ဟင်းလင်းပြင်ကို ဖြတ်ကျော်ရသော ခရီးမှာ ပြဿနာ မဟုတ်ပေ။
မကြာမီတွင် ၎င်းတို့က မဟာပျက်သုဉ်း မြို့ဟောင်း ရှိရာနေရာသို့ ရောက်ရှိလာကြသည်။
အဝေးမှ ကြည့်လိုက်ရုံဖြင့် ထန်ထျန်းက မူလ၏ အော်ရာ များကို ခံစားလိုက်ရသည်။
ထိုအော်ရာ မှာ အလွန်နူးညံ့ပြီး မြင့်မြတ်လှသဖြင့် လင်းယွင်တောင်တန်းနှင့် လူသားဧကရာဇ် နန်းတော်တို့ထက်စာလျှင် ဤနေရာကသာ "မြင့်မြတ်နယ်မြေ " ဟူသော အမည်နှင့် ပိုမိုလိုက်ဖက်လှသည်။
သို့သော် မဟာပျက်သုဉ်း မြို့ဟောင်း၏ အပေါ်ယံကောင်းကင်သို့ ရောက်ရှိသွားသောအခါ ဤနေရာ၏ အတွင်းပိုင်း အခြေအနေမှာ အဝေးမှ မြင်ရသကဲ့သို့ ငြိမ်းချမ်းခြင်း မရှိသည်ကို ထန်ထျန်း တွေ့လိုက်ရသည်။
ဤနေရာတွင် အမှန်တကယ်ပင် ကြီးမားသော မြို့ကြီးတစ်မြို့ ရှိနေခဲ့သည်။
သို့သော် ထိုမြို့ကြီးမှာ ယခုအခါ ပျက်စီးယိုယွင်းနေပြီ ဖြစ်သည်။
နေရာအနှံ့တွင် ပြိုကျနေသော အပျက်အစီးများမှာ မည်မျှကြာအောင် တည်ရှိနေခဲ့မှန်း မသိနိုင်တော့ချေ။
ကံကောင်းသည်မှာ ဤနေရာက သဘာဝအရ ထူးခြားနေ၍သာဖြစ်ပြီး မဟုတ်ပါက ဖုန်မှုန့်များအောက်တွင် နစ်မြုပ်နေလောက်ပြီ ဖြစ်သည်။
မြို့ထဲတွင် မည်သည့် သက်ရှိသတ္တဝါမျှ မရှိချေ။
တစ်ခါတစ်ရံ လာရောက်လေ့ရှိသော ကျိကျွင်းများသည်လည်း ကျွင်းချန်ချင်း၏ ကိစ္စများကြောင့် အစောကတည်းက ထွက်သွားကြပြီ ဖြစ်သည်။ အချို့မှာ လူသားဧကရာဇ် နန်းတော်ထံ ခိုလှုံသွားကြသလို အချို့မှာ နေနတ်ဘုရား၏ တိုက်ခိုက်ရေးစစ်တပ်ထဲသို့ ဝင်လာကြကာ အချို့မှာမူ ဆိတ်ငြိမ်သော နေရာတစ်ခုတွင် သွားရောက် ပုန်းအောင်းနေကြပြီ ဖြစ်သည်။
ယခု ရောက်ရှိလာသော ထန်ထျန်းတို့အဖွဲ့သည်သာ ဤနေရာ၏ သက်ရှိများ ဖြစ်ကြသည်။
“ဒီလောက် အရေးကြီးတဲ့ နေရာကို လူလွှတ်ပြီး စောင့်ခိုင်းဖို့ မလိုဘူးလား”
ထန်ထျန်းက နားမလည်နိုင်စွာ မေးလိုက်သည်။
နေနတ်ဘုရားက ပြန်ဖြေသည်။ “မလိုဘူး”
“သက်ရှိအများစုအတွက်တော့ မဟာပျက်သုဉ်း မြို့ဟောင်း မှာ အသုံးချလို့ရတဲ့ အရင်းအမြစ် ဘာမှမရှိတော့ဘူး၊ ပြီးတော့ သူတို့မှာ ဒီနေရာကို ဖျက်ဆီးနိုင်စွမ်းလည်း မရှိကြဘူး”
“ဒီနေရာက အရင်းအမြစ်တွေကို အသုံးချနိုင်တဲ့ ပုဂ္ဂိုလ်မျိုးကိုကျတော့လည်း ဘယ်သူမှ တားလို့မရဘူးလေ"
"ဒါကြောင့် စောင့်ကြပ်နေတာက အဓိပ္ပာယ် မရှိဘူး”
ထန်ထျန်းက “သြော်... ဒီလိုကိုး” ဟု ဆိုလိုက်သည်။
ထို့နောက် သူက ဆက်၍ “ကြည့်ရတာ ဟိုးအရင်က ဒီနေရာက အရမ်း စည်ကားခဲ့ပုံပဲနော်"
" ဘယ်လိုဖြစ်လို့ ဒီလောက်တောင် ပျက်စီးသွားရတာလဲ”
ဤမေးခွန်းကို ကြားသောအခါ နေနတ်ဘုရားက အေးစက်စွာ ပြုံးလိုက်သည်။
“စည်ကားရုံတင် မဟုတ်ဘူး၊ အရမ်းကို စည်ကားခဲ့တာ”
“နှစ်ကာလ အတော်ကြာအောင် မဟာပျက်သုဉ်း မြို့ဟောင်းက အနန္တစကြာဝဠာ ရဲ့ တစ်ခုတည်းသော ဗဟိုချက် ဖြစ်ခဲ့ပြီး မရေမတွက်နိုင်တဲ့ သန်မာ သူတွေ စုဝေးရာ သက်ရှိအားလုံးရဲ့ မြင့်မြတ်နယ်မြေ ဖြစ်ခဲ့တာ”
“ဒါပေမဲ့ ကံဆိုးစွာနဲ့ပဲ နောက်ပိုင်းမှာ အဲဒီကောင် ပေါ်လာခဲ့တယ်”
“သူက မဟာပျက်သုဉ်း မြို့ဟောင်း ထဲကို တစ်ကိုယ်တည်း ဝင်လာပြီး မြို့ထဲက အစွမ်းထက်သူတွေ အားလုံးကို တစ်ယောက်တည်း ရင်ဆိုင်ခဲ့တယ်၊ ပြီးတော့ ကမ္ဘာ့မူလ ကို ခိုးယူသွားခဲ့တယ်”
“အဲဒီတိုက်ပွဲက ဘိုးဘေး နယ်မြေ အပြင်ဘက်က ဟင်းလင်းပြင် အားလုံးကို ဖျက်ဆီး ပစ်ခဲ့ပြီး ဘိုးဘေး နယ်မြေကိုလည်း အနန္တစကြာဝဠာ မြေပုံထဲကနေ ကွဲထွက်သွားစေခဲ့တာ၊ ဒီနေ့အထိ ဟင်းလင်းပြင်ထဲမှာ လွင့်မျောနေရတုန်းပဲ”
ထန်ထျန်းက နှာခေါင်းကို မသိမသာ ပွတ်လိုက်မိသည်။
နေနတ်ဘုရားကို သူ ပြောပြချင်သည်မှာ ဤအခြေအနေမျိုးကို "ခိုးယူသည်" ဟု မခေါ်ဘဲ သူ၏ အရည်အချင်းဖြင့် ဗြောင်ကျကျ လာယူသွားခြင်း ဖြစ်သည်ဟုပင်။
သို့သော် ယခုလို အချိန်မျိုးတွင် နေနတ်ဘုရား၏ ဒေါသကို ဆွပေးမည့်ကိစ္စမျိုးကို သူ မလုပ်သည်မှာ သေချာပါသည်။
နေနတ်ဘုရား ပြောနေသော "အဲဒီကောင်" ဆိုသည်မှာလည်း မေးနေစရာမလိုအောင် ကမ္ဘာ့အရှင် ပင် ဖြစ်ပေလိမ့်မည်။
တကယ့်ကို ကြောက်စရာကောင်းလောက်အောင် သန်မာသူပင်။
“ကဲ... ဆင်းသွားကြရအောင်”
နေနတ်ဘုရားက ပြောလိုက်သည်။
ခဏအကြာတွင် အားလုံးက မြို့ဟောင်းအတွင်းသို့ ဝင်ရောက်လာကြပြီး ကျယ်ဝန်းလှသော ကျင့်ကြံရေးကွင်းပြင် တစ်ခုသို့ ရောက်ရှိလာကြသည်။
နေနတ်ဘုရား ပြောပြချက်အရ ဤနေရာ၏ မူလအမည်မှာ ထျန်းတိ ကျင့်ကြံရေးကွင်းပြင် ဟု ခေါ်သည်။
၎င်းက အနန္တစကြာဝဠာ တွင် အကောင်းဆုံးသော ကျင့်ကြံရေးကွင်းပြင် ဖြစ်ပြီး သန်မာ သူအားလုံး ဤမြို့သို့ စုဝေးရခြင်း၏ အဓိက အကြောင်းရင်းတစ်ခုလည်း ဖြစ်သည်။
သို့သော် ကမ္ဘာ့အရှင်နှင့် ဖြစ်ပွားခဲ့သော တိုက်ပွဲကြီးအပြီးတွင် ဤကျင့်ကြံရေးကွင်းပြင် မှာ ၎င်း၏ မူလစွမ်းအားများ ဆုံးရှုံးသွားခဲ့ပြီး သာမန် ရင်ပြင်တစ်ခုအဖြစ်သို့ ပြောင်းလဲသွားခဲ့သည်။
သို့သော်ငြားလည်း ဤနေရာမှာ မြို့၏ ဗဟိုချက်ဖြစ်နေဆဲ ဖြစ်ပြီး အကယ်၍ ကျွင်းချန်ချင်းက သူ၏ အထွတ်အထိပ် စွမ်းအားကို ပြန်လည် ရယူလိုပါက ဤနေရာသို့ သေချာပေါက် ရောက်လာပေလိမ့်မည်။
ထို့ကြောင့် နေနတ်ဘုရားက ဤနေရာတွင်ပင် ကျွင်းချန်ချင်း ရောက်လာမည့်အချိန်ကို စောင့်ဆိုင်းရန် ဆုံးဖြတ်လိုက်ခြင်း ဖြစ်သည်။
“ကျင့်ကြံရေးကွင်းပြင် ထဲမှာ အရင်က သုံးခဲ့တဲ့ ကျင့်ကြံခြင်းအခန်း တွေ ရှိသေးတယ်၊ မင်းတို့ အဆင်ပြေတဲ့နေရာမှာ နားနေကြပါ၊ ဒါပေမဲ့ အရမ်းတော့ မဝေးစေနဲ့”
“ဒီနေရာကို ခဏလောက်တော့ ငါတို့ရဲ့ အခြေစိုက်စခန်းအဖြစ် သုံးရမယ်”
နေနတ်ဘုရားက ပြောသည်။
ထို့နောက် သူက ထန်ထျန်း၊ ချီလင်မိန်းကလေးနှင့် လုံကျိုကျိုးတို့ကဲ့သို့သော ဝူရှန့်ကျိကျွင်းများကို ခေါ်ဆောင်ကာ ကွင်းပြင် ၏ အလယ်ဗဟိုသို့ သွားခဲ့သည်။
မြင့်မားသော ယဇ်ပလ္လင်ကြီးတစ်ခု ထန်ထျန်း၏ ရှေ့တွင် ပေါ်လာသည်။
ခဏအကြာတွင် လူအနည်းငယ်က ယဇ်ပလ္လင်၏ ထိပ်ဆုံးတွင် ရပ်နေကြ၏။
နေနတ်ဘုရားက လက်နှစ်ဖက်ကို နောက်ပစ်ကာ အဆုံးမဲ့ ဟင်းလင်းပြင်ကြီးကို ကြည့်ပြီး ခေတ္တမျှ ငြိမ်သက်နေပြီးမှ သက်ပြင်းတစ်ချက် ချလိုက်သည်။
“ဒီနေရာက မူလ လက်နက် ငါးပါးက ကမ္ဘာကြီးကို စတင် ဖန်တီးခဲ့တဲ့ နေရာပဲ”
“ပြီးတော့ အနန္တစကြာဝဠာ ရဲ့ အစပြုရာမြေလည်း ဖြစ်တယ်”
နေနတ်ဘုရားက ပြော၏ ။
ထန်ထျန်းက ခေါင်းငြိမ့်လိုက်သည်။ ဤယဇ်ပလ္လင်၏ ထူးခြားမှုကို သူ သတိပြုမိသည်မှာ ကြာပြီ ဖြစ်သည်။
ယဇ်ပလ္လင်၏ အရပ်မျက်နှာ ငါးခုတွင် ကြီးမားသော ရုပ်တုကြီး ငါးခု ရှိနေသည်။
ရုပ်တုများမှာ အလွန် ပျက်စီးနေပြီ ဖြစ်သော်လည်း မူလ လက်နက် ငါးပါး၏ ပုံစံများ ဖြစ်သည်ကို မှန်းဆနိုင်သည်။
ထို့ပြင် ဤနေရာရှိ အော်ရာ များက ထန်ထျန်းအတွက် ရင်းနှီးသော ခံစားချက်မျိုး ပေးစွမ်းနေသည်။
သူ၏ "ဂျင်ဂိုကမ္ဘာ" ထဲတွင် ကြောင်လေးက သူ၏ ခန္ဓာကိုယ်ကို သုံးပြီး မူလတိုက်ကြီးကို စတင် တည်ဆောက်စဉ်ကလည်း ဤကဲ့သို့သော အော်ရာ မျိုး ရှိခဲ့သည်။
ကြောင်လေး နေထိုင်သော "လျူလီကမ္ဘာ" တွင်လည်း အလွန်ဆင်တူသော အော်ရာ မျိုး ရှိနေခဲ့သည်။
ထန်ထျန်းက ရုတ်တရက် အချို့အချက်များကို သဘောပေါက်သွားသည်။
ဖြစ်နိုင်သည်မှာ ဤသည်မှာပင် မူလ ဘိုးဘေး နယ်မြေ၏ အနှစ်သာရပင် ဖြစ်ပေလိမ့်မည်။
ဂျင်ဂိုကမ္ဘာက အလွန် ပြည့်စုံသော ကမ္ဘာတစ်ခုဖြစ်ပြီး ၎င်း၏ စတင်ရာသည်လည်း ဂျင်ဂိုကမ္ဘာ၏ ဘိုးဘေး နယ်မြေပင် ဖြစ်သည်။
“ငါတို့ ဒီမှာပဲ စောင့်ကြရအောင်”
နေနတ်ဘုရားက လှည့်ကြည့်ကာ ပြောလိုက်သည်။ “ကျွင်းချန်ချင်း ဘယ်အချိန် ရောက်လာမလဲဆိုတာ မသိရပေမဲ့ သူ ပထမဆုံး ရောက်လာမယ့်နေရာကတော့ ဒီနေရာပဲ”
“ထန်ထျန်း...”
“နောက်ပိုင်းကတော့ မင်းအပေါ်မှာပဲ မူတည်တော့တယ်”