ဝူချန်း၏ အတိတ်ဇာတ်ကြောင်း
Vol. 76 Ch. 797
မြင့်မြတ်သော ယဇ်ပလ္လင် အထက်တွင်...
ဝူချန်း ကျိကျွင်း၏ ပြောပြချက်အရ ထန်ထျန်းက သူမ၏ ကျင့်ကြံခြင်းနှင့် ကြီးပြင်းလာပုံ များကို အကြမ်းဖျင်း သိရှိသွားခဲ့သည်။
ဝူချန်း ကျိကျွင်း၊ ကျိကျွင်းအဆင့်သို့ ရောက်ရှိခဲ့သည့် အချိန်မှာ လုံကျိုကျိုးထက် နှစ်ပေါင်း တစ်သိန်းခန့် စောသည်။
သို့သော် သူတို့နှစ်ဦး၏ ကြီးထွားမှု လမ်းကြောင်းမှာမူ သိပ်မကွာခြားလှပေ။
နှစ်ဦးစလုံးမှာ ရုတ်တရက် ထွက်ပေါ်လာသူများ ဖြစ်ကြသလို အလွန်တိုတောင်းသော အချိန်အတွင်းမှာပင် ကမ္ဘာကြီး၏ အထွတ်အထိပ်သို့ ရောက်ရှိသွားခဲ့ကြသူများ ဖြစ်သည်။
သို့သော် ကွဲပြားခြားနားချက်မှာ ဝူချန်း ကျိကျွင်း၏ အတွေ့အကြုံများမှာ လုံကျိုကျိုးထက် ပိုမို ခက်ခဲကြမ်းတမ်းခဲ့ခြင်း ဖြစ်သည်။
သူမသည် တစ်ချိန်က အစွမ်းထက်သော အင်ပါယာတစ်ခု၏ အကြီးဆုံး မင်းသမီး ဖြစ်ခဲ့ဖူးသည်။
ထိုအင်ပါယာမှာ မျိုးဆက်အလိုက် ဧကရီများသာ အုပ်ချုပ်သော နိုင်ငံဖြစ်ရာ သူမက ဧကရီ အလောင်းအလျာ မင်းသမီး တစ်ဦးလည်း ဖြစ်ခဲ့သည်။
ဧကရီအလောင်းအလျာ တစ်ဦးအနေဖြင့် ဝူချန်းသည် ငယ်စဉ်ကတည်းက အလွန် တင်းကျပ်သော ပညာရေးကို သင်ကြားခဲ့ရပြီး ကျင့်ကြံခြင်း အပိုင်းမှာလည်း မည်သည့်အခါမျှ ပေါ့လျော့ခြင်း မရှိခဲ့ပေ။
ကံကောင်းသည်မှာ သူမက အလွန် ထက်မြတ်ပြီး ကျင့်ကြံခြင်း ပါရမီမှာလည်း အလွန် ကောင်းမွန်နေခြင်း ဖြစ်သည်။
ဆရာများ၏ ဂရုတစိုက် သင်ကြားမှုကြောင့် အရွယ်ရောက်လာသောအခါ ဝူချန်းက အသိပညာ ကြွယ်ဝပြီး ခွန်အားကြီးမားကာ စိတ်နှလုံး ဖြူစင်၍ ပြည်သူကို ချစ်မြတ်နိုးသော ဧကရီအလောင်းအလျာ တစ်ဦး ဖြစ်လာခဲ့သည်။
ထိုအင်ပါယာမှာ နှစ်ပေါင်း ထောင်ချီ တည်တံ့ခဲ့ပြီးဖြစ်ရာ ထိုစဉ်က ဝူချန်းသည် ပြည်သူများ၏ ချစ်ခင်အားကိုးမှုကို အခံရဆုံးနှင့် ဧကရီဖြစ်ရန် အလားအလာ အရှိဆုံးသူ ဖြစ်ခဲ့သည်။
အကယ်၍ ဤအတိုင်းသာ ဆက်သွားမည်ဆိုလျှင် အင်ပါယာ၏ သမိုင်းတစ်လျှောက် အငြိမ်းချမ်းဆုံးနှင့် အစည်ကားဆုံး ခေတ်ကာလမှာ ဝူချန်း၏ လက်ထက်တွင် ပေါ်ပေါက်လာပေလိမ့်မည်။
သို့သော် ဤကမ္ဘာပေါ်ရှိ ကိစ္စများမှာ ထင်ထားသလောက် ဘယ်သောအခါမှ မလှပခဲ့ပေ။
အချိန်ကြာလာသည်နှင့်အမျှ ယခင် ဧကရီဟောင်းမှာ နန်းစွန့်ရန် ပြင်ဆင်လာသည်။
ဝူချန်းသည်လည်း လူအများ၏ သောင်းသောင်းဖျဖျ ကြိုဆိုမှုများကြားတွင် နန်းတက်ရန် အဆင်သင့် ဖြစ်နေခဲ့ပြီ ဖြစ်သည်။
သို့သော် ထိုသို့ ကြိုဆိုနေကြသော အသံများကြားမှာပင် အဆုံးမဲ့ သတ်ဖြတ်ခြင်း အငွေ့အသက်များ ပါဝင်သော မြားတစ်စင်းက သူမ၏ နှလုံးသားကို ဖောက်ထွက်သွားခဲ့သည်။
ထို့နောက်တွင်မူ နန်းလုရန် ကြံစည်နေသော စစ်တပ်များစွာက အရပ်မျက်နှာ အသီးသီးမှ ပြေးဝင်လာကြတော့သည်။
“အဲဒီမြားကို ပစ်ခဲ့တဲ့သူက ကျွန်မ အလေးစားရဆုံး စီနီယာအစ်မ တစ်ယောက်ပဲ”
“စစ်တပ်ကို ဦးဆောင်ပြီး သတ်ဖြတ်လာတဲ့သူက ကျွန်မ အချစ်ရဆုံး ညီမလေး တစ်ယောက်ပဲ”
“မေတ္တာတရားနဲ့ ကရုဏာတရားတွေက ဒီကမ္ဘာပေါ်က ပဋိပက္ခ အားလုံးကို ဖြေရှင်းနိုင်မယ်လို့ ကျွန်မ ထင်ခဲ့တာ၊ ဒါပေမဲ့ နောက်ဆုံးမှာတော့ ကျွန်မကို နောက် ကျော ကနေ ဓားနဲ့ထိုးခဲ့တဲ့ ရန်သူတွေက ကျွန်မ အချစ်ရဆုံး ဆွေးမျိုးသားချင်းတွေ ဖြစ်နေခဲ့တယ်”
ဝူချန်း ကျိကျွင်းက ပြောပြသည်။
ထန်ထျန်းက တိတ်ဆိတ်စွာဖြင့် “မေတ္တာတရားနဲ့ ကရုဏာတရားတွေက ဒီကမ္ဘာပေါ်မှာ အလှပဆုံး တွေ ထဲက တစ်ခုပါ”
“ဒါပေမဲ့ အဲဒီအရာတွေက အာဏာလုပွဲတွေကြားထဲ ရောက်သွားပြီဆိုရင်တော့ ခင်ဗျားရဲ့ အကြီးမားဆုံး အားနည်းချက် ဖြစ်သွားမှာပဲ”
“ခင်ဗျားက တော်ဝင်မိသားစုမှာ ကြီးပြင်းလာတာဆိုတော့ ဒီသဘောတရားကို နားလည်သင့်တာပေါ့”
ဝူချန်း ကျိကျွင်းက ခေါင်းခါပြ၏။
“ကျွန်မရဲ့ ဆရာတွေက အဲဒါတွေကို မသင်ပေးခဲ့ဘူး၊ သူတို့က ကျွန်မကို သာမန်ပြည်သူတွေရဲ့ စိတ်ထဲမှာ အပြည့်စုံဆုံးဖြစ်တဲ့ ဧကရီတစ်ပါး ဖြစ်အောင်ပဲ ပျိုးထောင်ပေးခဲ့တာ”
“တကယ်တော့ နန်းမတက်ခင်ကတည်းက သူတို့ ပုန်ကန်မယ့် အရိပ်အယောင်တွေကို ကျွန်မ သတိထားမိပါတယ်၊ ဒါပေမဲ့ ချစ်ခြင်းမေတ္တာကြောင့်ပဲ သူတို့ကို အခွင့်အရေး ပေးခဲ့မိတာ”
“အဲဒီ ချစ်ခြင်းမေတ္တာကြောင့်ပဲ နန်းတက်ပွဲ အခမ်းအနားမှာ ကျွန်မ သေလုနီးပါး ဖြစ်ခဲ့ရတယ်”
ဝူချန်း ကျိကျွင်းက ဆက်လက် ပြောပြနေသည်။
ပုန်ကန်သူများ၏ ရုတ်တရက် တိုက်ခိုက်မှုကြောင့် ဝူချန်းက ချက်ချင်းပင် ဒဏ်ရာပြင်းထန်သွားခဲ့ပြီး တစ်ပွဲလုံး ရုန်းရင်းဆန်ခတ် ဖြစ်သွားခဲ့သည်။
သို့သော် ကံကောင်းသည်မှာ နန်းတွင်း အစောင့်တပ်၏ ခွန်အားကလည်း အလွန်ကြီးမားသလို ဝူချန်း ကိုယ်တိုင်ကလည်း ထူးချွန်သူ ဖြစ်သဖြင့် နောက်ဆုံးတွင် နိုင်ငံတော် တံဆိပ်တုံး ကို အသုံးပြုကာ ပုန်ကန်နေသော စီနီယာအစ်မနှင့် ညီမလေး တို့ကို အတင်းအကျပ် နှိမ်နင်းနိုင်ခဲ့သည်။
သို့သော် ဆက်လက် စုံစမ်းစစ်ဆေးကြည့်သောအခါ ဝူချန်းက အင်ပါယာတစ်ခုလုံးမှာ အပြင်ပန်း မြင်ရသလို အေးချမ်းမနေသည်ကို တွေ့လိုက်ရသည်။
မမြင်ရသော ကမ္ဘာတွင် လှိုင်းတံပိုးများက ပြင်းထန်စွာ ရိုက်ခတ်နေခဲ့ပြီ ဖြစ်သည်။
ပုန်ကန်သူများမှာ သူမ၏ စီနီယာအစ်မနှင့် ညီမလေး တို့သာမကဘဲ အရေအတွက်မှာလည်း အလွန်များပြားကာ ခွန်အားကလည်း အလွန်ကြီးမားနေသည်။
အင်ပါယာကြီးမှာ ပြိုလဲလုနီးပါး ဖြစ်နေခဲ့ပြီ ဖြစ်သည်။
သို့သော် ဝူချန်းက လက်မလျှော့ခဲ့ပေ။ သူမ၏ ကိုယ်ပိုင် ခွန်အားနှင့် လူချစ်လူခင် ပေါများသော စရိုက်ကြောင့် ပြိုလဲတော့မည့် အဆောက်အဦးကြီးကို ပြန်လည် ထိန်းမတ်နိုင်ခဲ့ပြီး ပုန်ကန်သူ အများစုကိုလည်း အမြစ်ပြတ် ရှင်းလင်းနိုင်ခဲ့သည်။
သို့သော် ဝူချန်း သက်ပြင်းချနိုင်ပြီး အင်ပါယာကို တရားဝင် စတင် ဖွံ့ဖြိုးအောင် လုပ်တော့မည့် အချိန်မှာပင်...
သူမ၏ နောက် ကျော ကို တစ်စုံတစ်ယောက်က အာဏာစက် အရှိန်အဝါဖြင့် ထိုးဖောက်သွားခဲ့သည်။
ထိုသူမှာ သူမ၏ မိခင် အရင်းဖြစ်သော ဧကရီဟောင်းပင် ဖြစ်သည်။
ထိုအချိန်ကျမှ ဝူချန်းက အရာအားလုံးမှာ သူမ၏ မိခင် ဖြစ်သူက ချုပ်ကိုင်ထားခြင်း ဖြစ်သည်ကို သိလိုက်ရသည်။
ပုန်ကန်မှုဟု ခေါ်သောအရာ၊ နန်းလုပွဲဟု ခေါ်သောအရာနှင့် သူမကိုယ်တိုင်ပင်လျှင် မိခင်ဖြစ်သူ၏ လက်ထဲမှ အာဏာကစားပွဲ တစ်ခုသာ ဖြစ်သည်။
သူမက ဝူချန်း၏ လက်ကို အသုံးပြုကာ သူမ ကိုင်တွယ်ရ ခက်ခဲသော အတိုက်အခံများကို ရှင်းလင်းခိုင်းခဲ့ခြင်းသာ ဖြစ်သည်။
ယခုအခါ အရာအားလုံး အေးချမ်းသွားပြီဖြစ်ရာ ဝူချန်း၏ လက်ထဲမှ အာဏာကို ပြန်လည် သိမ်းယူရန် အချိန်တန်ပြီ ဖြစ်သည်။
ထိုအချိန်ကျမှ ဝူချန်းက သူမ၏ ဆရာများက ဘာကြောင့် ဧကရီတစ်ပါး တတ်အပ်သော အာဏာကိုင်တွယ်မှု အတတ်ပညာ ကို မသင်ပေးခဲ့ဘဲ သူမကို မေတ္တာတရားနှင့် ပြည့်စုံသယောင်ရှိသော်လည်း အလွန် အန္တရာယ်များ လှသော ဧကရီအလောင်းအလျာ တစ်ဦး ဖြစ်အောင်ပဲ ပျိုးထောင်ပေးခဲ့သည်ကို နားလည်သွားတော့သည်။
အစကတည်းက သူမသည် မိခင်ဖြစ်သူ၏ လက်ထဲမှ ပစ္စည်း တစ်ခုမျှသာ ဖြစ်သည်။
အရာအားလုံးကို သိသွားပြီးနောက် ဝူချန်းက မည်သည့် ခုခံမှုမျှ မပြုလုပ်ခဲ့ဘဲ နောက်ဆုံးတွင် မိခင်ဖြစ်သူက သူမကို အေးစက်လှသော အကျဉ်းထောင်ထဲသို့ ပစ်ထည့်လိုက်သည်။
အချစ်ရဆုံးသူများ၏ သစ္စာဖောက်မှုနှင့် စွန့်ခွာမှုများကြောင့် ဝူချန်း၏ နှလုံးသားမှာလည်း လုံးဝ သေဆုံးသွားခဲ့ရသည်။
သို့သော် ထိုအချိန်မှာပင် ဖြူစင်သော လရောင်တစ်စွန်းတစ်စက အကျဉ်းထောင်၏ ပြတင်းပေါက် သေးသေးလေးမှတစ်ဆင့် ဝူချန်း၏ မျက်နှာပေါ်သို့ ကျရောက်လာခဲ့သည်။
“အဲဒီနောက်ရော ဘာဖြစ်လဲ”
“အဲဒီ အင်ပါယာကြီးက ဘာဖြစ်သွားလဲ”
ထန်ထျန်းက မေးလိုက်သည်။
ဝူချန်း ကျိကျွင်းက ခေါင်းခါပြပြီး ပြော၏။ “မသိဘူး”
“လရောင်ရဲ့ လမ်းညွှန်မှုနဲ့အတူ ကျွန်မ အဲဒီနေရာကနေ ထွက်လာခဲ့တယ်၊ ဘယ်တော့မှလည်း ပြန်မသွားတော့ဘူး”
“နှစ်ပေါင်း သောင်းနဲ့ချီ ကြာသွားတဲ့နောက်မှာတော့ အဲဒီနေရာက မရှိတော့ပါဘူး”
“ကြားဖူးတာကတော့ နောက်ဆုံး ဧကရီရဲ့ ရက်စက်ကြမ်းကြုတ်မှုကြောင့် ပြည်တွင်းမှာ ပြိုကွဲ မှုတွေ ဖြစ်ပြီး အင်ပါယာတစ်ခုလုံး ပျက်စီးသွားခဲ့တယ်တဲ့”
ထန်ထျန်းက တိတ်ဆိတ်သွားမိသည်။
ခေတ်အဆက်ဆက် ထွန်းကားခြင်းနှင့် ပျက်သုဉ်းခြင်းမှာ အင်ပါယာတိုင်း ရှောင်လွှဲ၍ မရသော ကိစ္စပင် ဖြစ်သည်။
ထို့ကြောင့် ကျင့်ကြံရေးလောကတွင် အင်အားစုများထဲ၌ အင်ပါယာများ၏ သက်တမ်းမှာ အတိုဆုံး ဖြစ်ပြီး နောက်တွင် ဂိုဏ်းများ၊ သက်တမ်း အရှည်ဆုံးမှာမူ မိသားစု အင်အားစုများ ဖြစ်ကြသည်။
ဤအကြောင်းများမှာ အလွန် ရှုပ်ထွေးလှပေသည်။
“နောက်ပိုင်း ကိစ္စတွေကို ပြောပြပါဦး”
“အဓိကကတော့ ခင်ဗျားနဲ့ လနတ်သမီး ကြားက ကိစ္စတွေကို ပြောပြပါ”
ထန်ထျန်းက ပြော၏ ။
ဝူချန်း ကျိကျွင်းက ခေါင်းငြိမ့်ပြပြီး ဆက်လက် ပြောပြသည်။
သို့သော် နောက်ပိုင်း ကိစ္စများမှာမူ ထူးခြားသော အချက်အလက်များ မရှိပေ။
ဝူချန်းသည် မူလကပင် ထက်မြတ်သူဖြစ်ပြီး ကျင့်ကြံခြင်း ပါရမီလည်း ထူးချွန်သူ ဖြစ်ရာ လနတ်သမီး၏ လမ်းညွှန်မှုအောက်တွင် သူမက ကျင့်ကြံရေးလောကထဲသို့ တရားဝင် ခြေစုံပစ် ဝင်ရောက်ခဲ့ပြီး တစ်ဟုန်ထိုး တိုးတက်လာခဲ့သည်။
ထို့ပြင် လနတ်သမီးသည် နေနတ်ဘုရားက လုံကျိုကျိုးအပေါ် တင်းကျပ်သော တောင်းဆိုမှုများ ရှိသလိုမျိုး မဟုတ်ဘဲ ဝူချန်း ကျိကျွင်း၏ မည်သည့် ဆုံးဖြတ်ချက်ကိုမျှ ဝင်ရောက် စွက်ဖက်ခြင်း မရှိခဲ့သလို သူမကို တာဝန်များ ပေးအပ်ခြင်းလည်း မရှိခဲ့ပေ။
လနတ်သမီးက ဝူချန်းကို သဘောကျရုံသက်သက်ဖြင့် သူမကို လမ်းညွှန်ပြသပေးခဲ့သည့် ပုံစံမျိုးသာ ဖြစ်သည်။
ပြောပြချက်အားလုံးကို နားထောင်ပြီးနောက် ထန်ထျန်းက ကျွင်းချန်ချင်းနှင့် ပတ်သက်သည့် ကိစ္စ သို့မဟုတ် ကမ္ဘာကြီးကို သစ္စာဖောက်သည့် ကိစ္စ တစ်စုံတစ်ရာကိုမျှ ရှာမတွေ့ခဲ့ပေ။
ဝူချန်း ကျိကျွင်း၏ အမည်ကဲ့သို့ပင် သူမက အလွန် ဖြူစင်သန့်ရှင်းနေသည်။
အားလုံးကို နားထောင်ပြီးနောက် ထန်ထျန်းက ပြောလိုက်သည်။ “ဒီအခြေအနေတွေကို ကျွန်တော် နေနတ်ဘုရားကို အရှိအတိုင်း ပြောပြပေးပါ့မယ်”
“ခင်ဗျားလည်း... လူသားဧကရာဇ် နန်းတော်ကို ဝိုင်းတိုက်တဲ့အချိန်မှာ သူမကို ရည်ရွယ်ချက်ရှိရှိ ဖယ်ထုတ်ထားခဲ့တဲ့အတွက် သူ့ကို အပြစ်မတင်ပါနဲ့”
“လနတ်သမီး ကိစ္စနဲ့ ပတ်သက်ပြီး သူက ကျွန်တော်တို့အားလုံးထက် ပိုပြီး စိတ်နာကျင်နေရတာပါ”
ဝူချန်း ကျိကျွင်းက ခေါင်းငြိမ့်ပြလိုက်သည်။
“ကျွန်မ သူ့ကို နားလည်ပါတယ်”
“ရှင့်တို့ရဲ့ စိုးရိမ်ပူပန်မှုတွေကိုလည်း နားလည်ပါတယ်”
“အကယ်၍ ကျွန်မက ဒီမှာနေဖို့ မသင့်တော်ဘူးဆိုရင် အချိန်မရွေး ထွက်သွားလို့ ရပါတယ်”
“အကယ်၍ ကျွန်မကို ယုံကြည်နေသေးပြီး တစ်ခုခု ခိုင်းစရာ ရှိတယ်ဆိုရင်လည်း အချိန်မရွေး ပြောနိုင်ပါတယ်”
သူမက အသံတိုးတိုးဖြင့် ပြောလိုက်သည်။
ထန်ထျန်းက အသိအမှတ်ပြုသည့် အနေဖြင့် အင်းဟု ဆိုလိုက်သည်။
ဝူချန်း ကျိကျွင်း၏ အတွေ့အကြုံများအရ သူမတွင် မည်သည့် ပြဿနာမျှ မရှိဟု သူ ယူဆမိသည်။
သို့သော် အသေးစိတ်ကို မည်သို့ စီစဉ်မည်နည်း ဆိုသည်မှာ နေနတ်ဘုရား ပြန်လာမှသာ ဆွေးနွေးရမည် ဖြစ်သည်။
ယခုအချိန်က သူ တစ်ဦးတည်း ဆုံးဖြတ်ရမည့် ကိစ္စ မဟုတ်ပေ။