အလယ်ပိုင်းဒေသ သိုင်းလောက၏ ထိပ်သီးအင်အားစု ခုနစ်ခု

ဝါးတောလေးအား ချဲ့ထွင်ရေး လုပ်ငန်းစဉ်များက အရှိန်အဟုန်ပြင်းစွာဖြင့် လည်ပတ်နေလေ၏။

လီယွမ်သည် နေ့စဉ်ရက်ဆက် ဓားနတ်သမီးနှင့်အတူ ဓားသိုင်းများ လေ့ကျင့်နေခဲ့သည်။ ထို့ပြင် ရှောင်ချိုက်၊ ဝူမေ့တို့နှင့်အတူ သစ်သားတဲလေးတစ်လုံး ဆောက်လုပ်ရင်း အားလပ်ချိန်ရတိုင်း ကူကောင်အသစ်များကို ပေါင်းစပ်ဖန်တီးနေခဲ့ရာ သူ၏ ဘဝလေးမှာ အလွန်တရာ အေးချမ်းပျော်ရွှင်ဖွယ် ကောင်းနေတော့သည်။

သို့ဖြစ်သော်ငြားလည်း ဤသို့သော အေးချမ်းသည့် အချိန်ကာလများက ကြာရှည်ခံမည် မဟုတ်ကြောင်းကိုမူ သူ ကောင်းစွာ သဘောပေါက်ထားသည်။

တစ်နေ့တွင်ကား ဝါးတောလေးဆီသို့ ရင်းနှီးကျွမ်းဝင်ပြီးသား ဧည့်သည်တစ်ဦး ရောက်ရှိလာခဲ့ချေပြီ..

"သခင်မလေး လီ မတွေ့ရတာ ကြာပြီပဲနော်"

ရောက်ရှိလာသူမှာ အခြားသူမဟုတ်ဘဲ ချန်းလန်တပ်မတော်မှ လီရော့ချန်ပင် ဖြစ်နေလေ၏။

"ရက်အတော်ကြာ ကွဲကွာနေခဲ့ရတဲ့ အချိန်အတွင်းမှာ ရှင့်ရဲ့ ဝါးတောလေးက ပိုပိုပြီး ခမ်းနားလာပါလား.. အတိုင်းအတာကလည်း တော်တော်လေး ကြီးမားလာပြီး ကိုယ်ပိုင် ဂိုဏ်းခွဲလေးတစ်ခုတောင် ဖြစ်နေပြီပဲ"

လီရော့ချန်က ချိုမြစွာ ရယ်လိုက်ရင်း မှတ်ချက်ပြုလိုက်၏။

"ကျွန်တော်တို့က ကူကောင်တွေ အများကြီး မွေးမြူထားရတာဆိုတော့ ကျယ်ကျယ်ဝန်းဝန်း နေရာလေးတစ်ခု လိုအပ်တယ်လေ"

လီယွမ်က ပြုံးရွှင်စွာဖြင့် တုံ့ပြန်လိုက်၏။

"ဟိုနေ့က ကျွန်မကို ကယ်တင်ပေးခဲ့တဲ့အတွက် ကျေးဇူးအများကြီး တင်ပါတယ်ရှင်"

လီရော့ချန်က မျက်လွှာကို အောက်သို့ချကာ အလွန် ရိုသေလေးစားစွာဖြင့် ဦးညွှတ်ဂါရဝပြုလာသည်။

"ကိစ္စမရှိပါဘူး"

လီယွမ်က လက်ကို ဝှေ့ယမ်းပြလိုက်ရင်း အရေးမကြီးသည့်ဟန်ဖြင့် တုံ့ပြန်လိုက်၏။

"သခင်မလေး လီနဲ့ ကျွန်တော်က စီးပွားရေး လုပ်ဖော်ကိုင်ဖက်တွေ ဖြစ်နေတာ ကြာပြီလေ.. ခင်ဗျားရဲ့ အကူအညီသာ မပါခဲ့ရင် ကျွန်တော့်လို အညတရလေးက ချန်းလန်တပ်မတော် ဆိုတဲ့ လှေကြီးပေါ်ကို ဘယ်လိုလုပ် တက်နိုင်ပါ့မလဲ"

"ရှင်က သားရဲတွေကို မွေးမြူဖို့အတွက် နတ်ဆိုးတွေကို ခွဲစိတ်ရတာ ဝါသနာပါမှန်း သိလို့ သတ္တမအဆင့် နတ်ဆိုးရုပ်အလောင်းတစ်ခု ယူလာခဲ့တယ် "

ထိုအခိုက် လီရော့ချန်က အမိန့်ပေးလိုက်ရာ စစ်သည်များက ရုပ်အလောင်းတစ်ခုကို သယ်ဆောင်လာကြ၏။

ထိုအရာက လှပသော လူသားမျက်နှာ ပြေပြစ်ကျော့ရှင်းသော ခန္ဓာကိုယ်နှင့် အိပ်မက်ဆန်ဆန် အရောင်အသွေး စုံလင်လှသည့် အတောင်ပံများ ပါရှိသော လိပ်ပြာနတ်သမီး တစ်ကောင်၏ ရုပ်အလောင်းပင် ဖြစ်သည်။

"ဒါက တကယ့် ပစ္စည်းကောင်းပဲ"

လီယွမ်၏ မျက်လုံးများက အရောင်တလက်လက် တောက်သွားတော့သည်။ အိပ်မက်ပိုးကူကောင်ကို သန့်စင်ရာတွင် သူ အလိုအပ်ဆုံးအရာမှာ ပိုးကောင်၊ လိပ်ပြာ၊ ဖလံ ကဲ့သို့သော နတ်ဆိုးများ၏ အစိတ်အပိုင်းများပင် ဖြစ်၏။

အကြောင်းမူကား ဤသို့သော သတ္တဝါများသည် မွေးရာပါ အားနည်းတတ်ကြသဖြင့် နတ်ဆိုးများကြားတွင် ၎င်းတို့၏ အရေအတွက်မှာ ကျား၊ ကျားသစ်၊ ဝံပုလွေ၊ ခြင်္သေ့ စသည့် အခြားသော အုပ်စုများထက် အဆပေါင်းများစွာ နည်းပါးလှသောကြောင့်ပင်။

"သခင်မလေး လီ ဈေးနှုန်းလေးသာ ခေါ်လိုက်ပါ"

"ဒါက ရှင့်အတွက်ပါ.. ကျွန်မရဲ့ ကိုယ်ပိုင် ပစ္စည်းဖြစ်ပြီး ချန်းလန်တပ်မတော်ရဲ့ စာရင်းထဲမှာလည်း ပါမှာမဟုတ်ပါဘူး"

လီရော့ချန်က ကြည်လင်ပြတ်သားစွာ အသိပေးလိုက်၏။

"သခင်မလေး လီက သဘောထားကြီးတဲ့ သူရဲကောင်းမလေးဆိုတာ ကျွန်တော် သိပြီးသားပါ.. ဒါကြောင့် သခင်မလေး လီကို ပြန်ပြီး လက်ဆောင်တစ်ခု ပေးပါ့မယ်"

လီယွမ်က ပြုံးရွှင်စွာဖြင့် ပြောဆိုလိုက်၏။

စကားအဆုံးတွင် သူက အထူးပြုလုပ်ထားသော သတ္တုသေတ္တာလေးတစ်လုံးကို ထုတ်ယူကာ ဖွင့်ပြလိုက်၏။

သေတ္တာအတွင်း၌ ရှိနေသည်ကား တဖျတ်ဖျတ် တောက်လောင်နေသော မီးတောက်လေးတစ်ခု။

"ဒီရတနာကို ကောင်းကင်မီးတောက်လို့ ခေါ်တယ်.. ကောင်းကင်က နေမင်းကြီးရဲ့ စွမ်းအင်တွေကို စုပ်ယူစုစည်းထားတာဖြစ်ပြီး ရန်သူတွေကို တိုက်ခိုက်ဖို့ပဲဖြစ်ဖြစ် ရတနာလက်နက်တွေ ထုလုပ်ဖို့ပဲဖြစ်ဖြစ် အသုံးပြုလို့ ရတယ်"

"ရတနာလက်နက်တွေ ထုလုပ်ဖို့ အသုံးပြုလို့ ရတယ် ဟုတ်လား"

လီရော့ချန်မှာ အံ့အားသင့်သွားရတော့သည်။ ကောင်းကင်နှင့် မြေကြီးကြားမှ မွေးဖွားလာသော ဤကဲ့သို့ ထူးဆန်းသည့် မီးတောက်မျိုးမှာ အလွန်တရာ ရှားပါးလှပြီး သူမကိုယ်တိုင်ပင် အထူးတလည် လိုက်လံရှာဖွေနေခဲ့ရသော အရာပင် မဟုတ်ပါလော။

ယခုအခါ သူမသည် သတ္တမအဆင့် မဟာသခင်နယ်ပယ်သို့ တရားဝင် ဝင်ရောက်လာပြီဖြစ်ရာ ပင်မရတနာဓားတစ်လက် ထုလုပ်ရန် လိုအပ်နေပြီး ထိုသို့ထုလုပ်ရန်အတွက် ယခုလို မွေးရာပါ ထူးဆန်းသည့် မီးတောက်တစ်မျှင် လိုအပ်နေခြင်းပင်။

"ယူထားလိုက်ပါ"

လီယွမ်က သံဖြူသေတ္တာလေးကို ပိတ်ကာ လီရော့ချန်ထံသို့ ကမ်းပေးလိုက်၏။

"ရှင့်အပေါ် ကျေးဇူးတင်စရာတစ်ခု ထပ်တိုးသွားပြန်ပြီပဲ"

လီရော့ချန်က ကောင်းကင်မီးတောက်ကို တုံ့ဆိုင်းနေခြင်း အလျဉ်းမရှိဘဲ လက်ခံယူလိုက်ရင်း ဆက်လက်ပြောဆိုလာ၏။

"နောက်တစ်ခါ တောင်ပေါ်တက်လာရင် ကျေးဇူးဆပ်တဲ့အနေနဲ့ နတ်ဆိုးရုပ်အလောင်း နောက်ထပ် အနည်းငယ် ယူလာခဲ့ပေးပါ့မယ်"

"ကျေးဇူးတွေ ဘာတွေ ပြောမနေပါနဲ့.. နတ်ဆိုးရုပ်အလောင်းတွေ ပိုများလေ ပိုကောင်းလေပါပဲ"

ရင်းနှီးပြီးသား မိတ်ဆွေဟောင်းများနှင့် စီးပွားရေးအကြောင်း ပြောဆိုရာတွင် လီယွမ်က အားနာနေလေ့ မရှိပေ။

"သခင်မလေး လီ ကျွန်တော့်ဆီမှာ ကောင်းကင်မီးတောက်တွေ ထပ်ရှိသေးတယ်.. တပ်မတော်ထဲမှာ အဆင့်မြင့် နတ်ဆိုးရုပ်အလောင်းတွေ ရှိမယ်ဆိုရင် အပြည့်အစုံပဲဖြစ်ဖြစ် အပိုင်းအစတွေပဲဖြစ်ဖြစ် အကုန်လိုချင်ပါတယ်"

"ဘယ်လောက်များများရရ အကုန်ယူမယ်.. အဆင့်မြင့်လေ ပိုကောင်းလေပါပဲ"

"ကောင်းပါပြီရှင်"

လီရော့ချန်က ခေါင်းညိတ် လက်ခံလိုက်သည်။

"အခြားသော စစ်သူကြီးတွေဆီက ပိုလျှံနေတဲ့ နတ်ဆိုးရုပ်အလောင်းတွေကို ရအောင် ဆက်သွယ်ပေးပြီး ဒီကို ပို့ခိုင်းလိုက်ပါ့မယ်"

"သခင်မလေး လီ ဒုက္ခများသွားရပြီပဲ.. ကျေးဇူးအများကြီး တင်ပါတယ်"

လီယွမ်က လက်နှစ်ဖက်ကို ယှက်ကာ ရိုသေစွာဖြင့် နှုတ်ဆက်လိုက်၏။

"ဒီလောက်ထိ အားနာနေစရာ မလိုပါဘူး"

လီရော့ချန်က ပြုံးရွှင်စွာဖြင့် တုံ့ပြန်လာ၏။

"ခွန်လွန်တောင်မှာ ရှင် ပြသခဲ့တဲ့ သူရဲကောင်းဆန်တဲ့ စွမ်းဆောင်ရည်တွေကို ချန်းလန်တပ်မတော်က စစ်သည်တွေ အများကြီး ကိုယ်တိုင်ကိုယ်ကျ မြင်တွေ့ခဲ့ရတာလေ.. ရှင်လို ပါရမီရှင်မျိုးနဲ့ ပူးပေါင်းဆောင်ရွက်ရတာကို လူတိုင်းက ဝမ်းသာအားရ ဖြစ်နေကြမှာပါ"

ဆဌမအဆင့် ကူသခင်တစ်ယောက်က နတ်ဆိုး တပိုင်း သူတော်စင် အဆင့်ကို အဆင့်ကျော်လွန်၍ တိုက်ခိုက်နိုင်စွမ်း ရှိပေသည်။ ဤမျှကြီးမားသော ပါရမီစွမ်းရည်မျိုးက မည်သည့် ထိပ်သီးအင်အားစုတွင်မဆို အတောက်ပဆုံးသော ပါရမီရှင်များထဲမှ တစ်ဦး ဖြစ်လာစေမည်သာ ဖြစ်၏။ နောင်တစ်ချိန်တွင် ထိပ်သီးအင်အားစုတစ်ခု၏ ခေါင်းဆောင် ဖြစ်လာနိုင်ချေရှိသူ တစ်ဦးအား မည်သူကမျှ မိတ်ဆွေမဖွဲ့ဘဲ မနေနိုင်ကြပေ။

"ရှင့်ကို ပြောပြရမယ့် ကိစ္စတစ်ခု ကျန်သေးတယ်"

လီရော့ချန်၏ မျက်နှာအမူအရာက ရုတ်တရက် တည်သွားတော့သည်။

"နတ်ဆိုးတွေကြောင့် ဖြစ်လာမယ့် ပြဿနာတွေနဲ့ ပတ်သက်လို့များလား"

လီယွမ်က ချက်ချင်းပင် ခန့်မှန်းမိလိုက်၏။

"အင်း ဟုတ်တယ်"

လီရော့ချန်က ရှင်းပြလာ၏။

"ညဇီးကွက်ဘုရင်က အရပ်ရှစ်မျက်နှာက တပ်မှူးတွေကို အလယ်ပိုင်းဒေသက စစ်ပွဲတွေကို ကြီးကြပ်ဖို့ အမိန့်ပေးလိုက်ကတည်းက အလယ်ပိုင်းဒေသမှာ ရှိနေတဲ့ နတ်ဆိုးတွေဟာ နိုင်ငံထဲကနေ မောင်းထုတ်ခံရပြီး မြို့စားဘုရင်တွေနဲ့ မှူးမတ်တွေရဲ့ နယ်မြေတွေဆီကို ကျူးကျော်လာကြတော့တာပဲ"

"လက်ရှိ အခြေအနေကတော့ အလယ်ပိုင်းဒေသက သူတို့ရဲ့ ကိုယ်ပိုင် သာယာဝပြောရေးကိုပဲ ဂရုစိုက်ကြပြီး နယ်စပ်ဒေသတွေရဲ့ ကံကြမ္မာကိုတော့ လုံးဝ လစ်လျူရှုထားကြတာပဲ"

"နတ်ဆိုးတွေကလည်း ဒီအခွင့်အရေးကို အသုံးချပြီး အရင်ကထက်တောင် ပိုပြီး ရက်စက်ကြမ်းကြုတ်ပြီးတော့ သောင်းကျန်းနေကြတယ်.. မြို့စားဘုရင်တွေနဲ့ မှူးမတ်တွေ အားလုံးကလည်း ခုခံဖို့ ခက်ခဲလာကြပြီ.. ချန်းလန်တပ်မတော်ကလည်း ခုခံကာကွယ်မှုတွေကို လျှော့ချရုံက လွဲပြီး တခြား ရွေးချယ်စရာ မရှိတော့ဘူး"

"ရှင်လည်း တိုက်ခိုက်ဖို့ ပြင်ဆင်ထားဖို့ လိုလိမ့်မယ်နော်"

အမှတ် (၁၂) ဂူစံအိမ်မှာ တောင်တန်းများကြားတွင် တည်ရှိသော်လည်း နဝမနန်းတော်၏ အတွင်းစည်းကဲ့သို့ ခိုင်မာစွာ အမြစ်တွယ် မနေသဖြင့် တစ်ခါတစ်ရံတွင် ရေကြီးရေလျှံမှုများကဲ့သို့သော သဘာဝဘေးအန္တရာယ်များ၏ ရိုက်ခတ်မှုကို ခံရနိုင်ချေ ရှိနေသေးသည်။

"သတိပေးတဲ့အတွက် ကျေးဇူးတင်ပါတယ် သခင်မလေး လီ"

လီယွမ်က လက်သီးဆုပ်ကာ အရိုအသေပေးလိုက်၏။

"ညဇီးကွက်ဘုရင်က မြို့စားဘုရင်တွေရဲ့ အင်အားကို အတိုင်းအတာတစ်ခုအထိ အားနည်းသွားအောင် လုပ်ပြီး တော်ဝင်မိသားစုရဲ့ ထိန်းချုပ်မှုအောက်ကို ပြန်ရောက်လာတဲ့အထိ လက်လျှော့မှာ မဟုတ်ဘူး"

"ဒီနယ်စပ်က ပရမ်းပတာ အခြေအနေကြီး ဘယ်လောက်ကြာကြာ ဆက်ဖြစ်နေမလဲဆိုတာ ဘယ်သူမှ မသိနိုင်ဘူးလေ"

"ဒါပေမဲ့..."

"သတင်းကောင်းလေး တချို့လည်း ရှိပါသေးတယ်"

ထိုနေရာသို့ အရောက်တွင် လီရော့ချန်က စကားကို ခေတ္တရပ်ကာ လီယွမ်အား စိုက်ကြည့်လိုက်၏။

"အလယ်ပိုင်းဒေသမှာ မိုးထိအောင် မြင့်မားတဲ့ တောင်ထွတ်တစ်ခု၊ ခမ်းနားကြီးကျယ်တဲ့ စံအိမ်တစ်ခု၊ ပြိုင်ဘက်ကင်း ဂိုဏ်းကြီးနှစ်ခုနဲ့၊ လောကီနယ်ပယ်ထဲကို ဝင်ရောက်ပြီး သေမျိုး ကမ္ဘာကို ဖြတ်တောက်နိုင်တဲ့ တောင်တန်းသုံးခု ရှိတယ်ဆိုတဲ့ စကားကို ရှင် ကြားဖူးမှာပေါ့နော်"

"ကြားတော့ ကြားဖူးပါတယ်.. ဒါပေမဲ့ အဲဒီအကြောင်းကို သေသေချာချာတော့ မသိဘူး"

လီယွမ် သိထားသည်မှာ ထိုအရာက အလယ်ပိုင်းဒေသ သိုင်းလောကကို စိုးမိုးထားသည့် ထိပ်သီးအင်အားစု ခုနစ်ခုကို ရည်ညွှန်းသော စကားစုတစ်ခု ဖြစ်ကြောင်းသာ။ လူအများ၏ အပြောအရဆိုလျှင် အလယ်ပိုင်းဒေသရှိ ထိပ်သီးအင်အားစု ခုနစ်ခုစလုံးသည် နဝမနန်းတော်နှင့် ရင်ပေါင်တန်းနိုင်စွမ်း ရှိကြသည်ဟု ဆိုကြ၏။ ၎င်းမှာ အနည်းငယ် ပုံကြီးချဲ့လွန်းသည်ဟု သူ ခံစားမိသည်။

နဝမဂူစံအိမ်တော်တွင် အနည်းဆုံး အဋ္ဌမအဆင့် ကူသခင် နှစ်ဆယ်ကျော်မျှ ရှိပြီး ကူလမ်းစဉ်၏ အထွတ်အထိပ်ကို ကိုယ်စားပြုကာ ကူသခင် မျိုးဆက်များထဲမှ အစွမ်းအထက်ဆုံးသူ ရာခိုင်နှုန်း (၉၀) ခန့် စုဝေးရာ နေရာဖြစ်သည်။ အလယ်ပိုင်းဒေသ သိုင်းလောကရှိ ထိပ်သီးအင်အားစု ခုနစ်ခုထဲမှ မည်သည့်အဖွဲ့အစည်းကိုမဆို သီးခြားစီ ယှဉ်ပြိုင်မည်ဆိုလျှင် နဝမဂူစံအိမ်တော်ကို ယှဉ်နိုင်မည် မဟုတ်ပေ။

"ရှင်ကတော့ တကယ်ကို... လောကရေးရာတွေကို ဘာမှ ဂရုမစိုက်ဘဲ ကိုယ့်ရဲ့ ကျင့်ကြံခြင်းအပေါ်မှာပဲ သည်းကြီးမည်းကြီး အာရုံစိုက်နေတာပဲကိုး"

လီရော့ချန်မှာ မှင်သက်သွားရတော့သည်။

အလယ်ပိုင်းဒေသက ထိပ်သီးအင်အားစု ခုနစ်ခုအကြောင်းကို ကြားရုံသာ ကြားဖူးသည့်သူများ ရှိနေနိုင်သေးသလော။ တောင်ပိုင်းနယ်စပ်ဒေသရှိ ကလေးသူငယ် အများစုပင်လျှင် ထိုအကြောင်းကို အလွန် ရင်းနှီးကျွမ်းဝင်နေကြပြီ ဖြစ်ကြောင်း သူ သိထားသင့်သည် မဟုတ်ပါလော။

သူမက ဆက်လက် ရှင်းပြလာသည်။

"မိုးထိအောင် မြင့်မားတဲ့ တောင်ထွတ်ဆိုတာက 'ကောင်းကင်ဘုံအလွန် ကောင်းကင်ဘုံ' လို့ ခေါ်တဲ့ လျှို့ဝှက်ဆန်းကြယ်တဲ့ ဂိုဏ်းတစ်ခုကို ရည်ညွှန်းတာပါ.. ဖြောင့်မတ်ခြင်းနဲ့ ကောက်ကျစ်ခြင်း သဘောတရား နှစ်မျိုးစလုံး ပေါင်းစပ်နေပြီး သိုင်းပညာရှင် အမြောက်အမြား ခိုအောင်းနေတဲ့ နေရာတစ်ခုပေါ့"

"ခမ်းနားကြီးကျယ်တဲ့ စံအိမ်ဆိုတာက ဆူရှင်းစံအိမ်ကို ပြောတာ အဲဒီနေရာက ဘာသာဗေဒကို လေ့လာလိုက်စားကြတဲ့ ပညာရှင်တစ်စု စုဝေးရာ နေရာဖြစ်ပြီး ခေတ်ပြိုင် ကွန်ဖြူးရှပ်ဝါဒရဲ့ အထွတ်အထိပ် နေရာတစ်ခုပဲ"

"ပြိုင်ဘက်ကင်း ဂိုဏ်းကြီးနှစ်ခုဆိုတာကတော့ လင်းရှောင်ဓားဂိုဏ်းနဲ့ သန့်စင်ခြင်းတစ်ရာဂိုဏ်းကို ရည်ညွှန်းတာပါ"

"ပထမတစ်ခုကတော့ လက်ရှိခေတ်ရဲ့ အထွတ်အထိပ် ဓားသမားတွေ ရှိတဲ့နေရာဖြစ်ပြီး၊ ဒုတိယတစ်ခုကတော့ ရတနာလက်နက်တွေ ထုလုပ်တာနဲ့ ခန္ဓာကိုယ် ကြံ့ခိုင်အောင် လေ့ကျင့်တဲ့ နေရာမှာ ပြိုင်ဘက်ကင်း အစွမ်းထက်ကြတယ်"

"တောင်တန်းသုံးခု ဆိုတာကတော့ ဓားလမ်းစဉ်ရဲ့ နောက်ထပ် အထွတ်အထိပ်တစ်ခုဖြစ်ပြီး လူတွေကို ကယ်တင်စောင့်ရှောက်ပေးတဲ့ ကြင်နာသနားတတ်တဲ့ ရှုရှန်းတောင်၊ ပြီးတော့ တာအိုလမ်းစဉ်ရဲ့ နဂါးကျားတောင်နဲ့ ချင်းချန်တောင်တို့ကို ပြောတာပါ"

"ဒီအင်အားစု သုံးခုစလုံးက စိတ်နှလုံးကို ကျင့်ကြံဖို့အတွက်ပဲ အာရုံစိုက်ကြပြီး လောက ရေးရာ အကျိုးအမြတ်တွေမှာ ဝင်မပါကြဘူး"

"ငြိမ်းချမ်းသာယာတဲ့ ခေတ်ကာလတွေမှာဆိုရင် သူတို့က လောကကြီးကနေ အဝေးကို ရှောင်ခွာပြီး ကျင့်ကြံခြင်းမှာပဲ မြှုပ်နှံထားတတ်ကြတယ်.. ဖရိုဖရဲဖြစ်တဲ့ အချိန်တွေ ရောက်လာပြီဆိုရင်တော့ မကောင်းမှုတွေကို ဖယ်ရှားပြီး ပုန်ကန်မှုတွေကို နှိမ်နင်းဖို့အတွက် တောင်ပေါ်ကနေ ဆင်းလာတတ်ကြတယ်"

"အဲဒါကြောင့်မို့လို့ပဲ တောင်တန်းသုံးခုက လောကီနယ်ပယ်ထဲ ဝင်ရောက်ပြီး သေမျိူး ကမ္ဘာကို ဖြတ်တောက်တယ်ဆိုတဲ့ စကား ရှိလာတာပေါ့"

လီရော့ချန်က အရာအားလုံးကို စိတ်ရှည်လက်ရှည်ဖြင့် ရှင်းပြနေလေ၏။

လီယွမ်က ထိုအခါမှ သဘောပေါက်သွားကာ မေးလိုက်၏။

"ဒါဆို သခင်မလေး လီ စောစောက ပြောခဲ့တဲ့ သတင်းကောင်းဆိုတာ သူတို့နဲ့ ပတ်သက်နေတာပေါ့"

"ဟုတ်တယ်"

လီရော့ချန်က သက်ပြင်းချလိုက်ရင်း တုံ့ပြန်လိုက်၏။

"ဧကရာဇ်တွေက ရက်စက်ကြပေမယ့် ပြည်သူတွေကတော့ တရားမျှတကြပါတယ်"

"ညဇီးကွက်ဘုရင်က တားမြစ်မိန့် ထုတ်ပြန်ထားပေမယ့်လည်း ရှူးရှန်းတောင်၊ ချင်းချန်တောင်နဲ့ နဂါးကျားတောင်တို့က သိုင်းလောကကို ဖိတ်ခေါ်စာ ထုတ်ပြန်ပြီး သူရဲကောင်းတွေကို စုစည်းကာ နယ်စပ်ဒေသတွေဆီ သွားရောက်ပြီး နတ်ဆိုးတွေ၊ မိစ္ဆာတွေကို သတ်ဖြတ်ဖို့ စီစဉ်နေကြတုန်းပဲ"

"ဒါ့အပြင် လင်းရှောင်ဓားဂိုဏ်းကလည်း တောင်ပိုင်းနယ်စပ်ဆီကို လူတွေ စေလွှတ်လိုက်တယ်လို့ ကြားရတယ်.. ဒါပေမဲ့ သူတို့က နတ်ဆိုးတွေ၊ မိစ္ဆာတွေကို သတ်ဖြတ်ဖို့ လာတာတော့ မဟုတ်ဘူးနဲ့ တူတယ်"

လီယွမ်မှာ အလွန်တရာ အံ့အားသင့်သွားရတော့သည်။

'နေပါဦး'

'လင်းရှောင်ဓားဂိုဏ်း ဒီနာမည်က ဘာဖြစ်လို့ ဒီလောက်တောင် ရင်းနှီးနေရတာလဲ'

သူ ရုတ်တရက် သတိရသွားလေ၏။

ဓားနတ်သမီး၏ အတွေးများနှင့် ပထမဆုံးအကြိမ် ပေါင်းစည်းမိစဉ်က သူ မြင်တွေ့ခဲ့ရသော မြင်ကွင်းများ ။ လွန်ခဲ့သော နှစ်ပေါင်း သုံးထောင်က ဓားနတ်သမီး မွေးဖွားရာ ဇာတိမြေသည် အခြားမဟုတ်ဘဲ လင်းရှောင်ဓားဂိုဏ်းပင် ဖြစ်ချေသည်။

‘လင်းရှောင်ဓားဂိုဏ်းက နတ်ဆိုးတွေ၊ မိစ္ဆာတွေကို သတ်ဖြတ်ဖို့ လာတာ မဟုတ်ဘူးဆိုရင် သူတို့ရဲ့ ရည်ရွယ်ချက်က ဘာများလဲ’

'အကြောင်းရင်းက ရှင်းလင်းနေပြီ’

'ဒါပေမဲ့ ဒါလည်း မမှန်သေးပါဘူး..'

လီယွမ်က ခေတ္တမျှ စဉ်းစားလိုက်ပြီးနောက် တိတ်တဆိတ် ရေရွတ်လိုက်မိသည်။

'ငါက ဘာလို့ ထိတ်လန့်နေရမှာလဲ တကယ်တမ်း သေချာစဉ်းစားကြည့်မယ်ဆိုရင် သူတို့ကတောင် ငါ့ကို ဘိုးဘေးကြီးလို့ ခေါ်သင့်တာ'