အခန်း (၅၄၃-၅၄၄)

အခန်း။ ၅၄၃

မျက်စိတစ်မှိတ်အတွင်းမှာပင် လေးရက်တာ အချိန်က ကုန်ဆုံးသွားခဲ့ပြီ ဖြစ်သည်။ တားဆီး၍မရနိုင်လောက်အောင် ပြင်းထန်လှသော ပိုးကောင်မျိုးနွယ်စု၏ ကျူးကျော်မှုအောက်တွင် လူသားတို့၏ အခြေစိုက်မြို့တော် ဆယ်ခုနီးပါးမှာ မြေလှန်ဖျက်ဆီးခြင်း ခံလိုက်ရသည်။

တစတစ တိုးပွားလာသော အခြားမျိုးနွယ်စုများနှင့် တားဆီး၍မရသော ပိုးကောင်မျိုးနွယ်စုဟူသည့် တောင်ကြီးနှစ်လုံးကို ရင်ဆိုင်ရာတွင် လူသားများဘက်မှ ခုခံမှုမှာ ပို၍ပို၍ အားနည်းလာနေသည်။

ထိုအချိန်တွင်

ဂျိမ်း...

အရှေ့ဘက်ပင်လယ်၏ ရေမျက်နှာပြင်ထက်တွင် လှိုင်းလုံးများမှာ ထကြွသောင်းကျန်းနေပြီး ကျယ်လောင်သော ဟိန်းသံကြီးများမှာ တစ်ခုပြီးတစ်ခု ထွက်ပေါ်လာသည်။

လုချွမ်း၏ ပင်လယ်သားရဲ ဇွန်ဘီစစ်တပ်မှာ ရေလှိုင်းကြီးများကဲ့သို့ အုပ်စုလိုက်ကြီး ကမ်းခြေဆီသို့ တိုးဝင်လာနေသည်။ လေးရက်တိုင်တိုင် ခရီးနှင်ခဲ့ပြီးနောက် လုချွမ်းနှင့် အဖွဲ့သားများသည် နောက်ဆုံးတွင် ကုန်းမြေပေါ်သို့ ပြန်လည်ရောက်ရှိလာခဲ့ပြီ ဖြစ်သည်။

ဗီဇပြောင်း လိပ်ဘီလူးကြီး၏ ကျောပေါ်မှနေ၍ သူတို့ သုံးယောက်မှာ လိပ်ကြီးနှင့်အတူ ကမ်းခြေသို့ တက်လှမ်းလိုက်ကြသည်။

"ဟူး... နောက်ဆုံးတော့ ပြန်ရောက်ပြီ။ ဒီကုန်းမြေက လေက တကယ်ကို လတ်ဆတ်တာပဲ။ ဟိုပင်လယ်နံ့ကြီးက ငါ့ကို ဆားနယ်ထားသလို ဖြစ်နေပြီ"

ကျောက်လင်းသည် လုချွမ်း၏ ဘေးတွင် စိတ်လှုပ်ရှားစွာ ရပ်နေပြီး အကြောဆန့်ကာ လေကို ဝဝလင်လင် ရှူသွင်းလိုက်ရင်း ညည်းတွားလိုက်သည်။

ထိုစကားကို ကြားသောအခါ လုချွမ်းက ပြုံးလိုက်မိသည်။ သူသည်လည်း ပင်လယ်ကြီးကို တော်တော်ပင် ငြီးငွေ့နေပြီ ဖြစ်သည်။ ပင်လယ်ပြင်မှာ မည်မျှပင် လှပသည်ဆိုစေဦးတော့ အချိန်အကြာကြီး ကြည့်ရဖန်များလာသောအခါ ဆွဲဆောင်မှု မရှိတော့ပေ။

ထိုအချိန်တွင် ကျိရုရွှယ်သည်လည်း ဖြည်းဖြည်းချင်း လျှောက်လာပြီး ရှေ့မှ ကုန်းမြေကြီးကို မျက်မှောင်ကြုတ်ကာ ငေးကြည့်နေသည်။ သူမ၏ မျက်ဝန်းထဲတွင် စိုးရိမ်ပူပန်မှုအချို့ ကိန်းအောင်းနေသည်။

အဘယ်ကြောင့်ရယ်မသိ ဤကုန်းမြေပေါ်သို့ ပြန်ရောက်လာသည်နှင့် သူမ၏ စိတ်ထဲတွင် မကောင်းသော အငြိုးအတေးတစ်ခုကို အလိုလို ခံစားနေရသည်။ သူတို့ မရှိခိုက်တွင် တစ်ခုခု ဖြစ်ပျက်ခဲ့ပုံပင်။ သို့သော်လည်း ပင်လယ်ထဲသို့ သွားခဲ့သဖြင့် ကုန်းမြေနှင့် အဆက်အသွယ် ပြတ်တောက်နေခဲ့ရာ လက်ရှိ အခြေအနေကို သိရှိနိုင်ရန်အတွက် စူးစမ်းရှာဖွေရန် လိုအပ်ပေဦးမည်။

ထို့နောက် သူတို့ သုံးယောက်မှာ လိပ်ကျောပေါ်မှ ဆင်းသက်ရန် မအောင့်နိုင်တော့ဘဲ ကုန်းမြေပေါ်သို့ ပျံသန်းဆင်းသက်လိုက်ကြသည်။ လုချွမ်းသည် အောက်သို့ငုံ့ကြည့်ပြီး ခြေဖဝါးအောက်ရှိ မြေပြင်ကို နင်းလိုက်ရင်း ကျေနပ်စွာ ပြုံးလိုက်မိသည်။

ဗီဇပြောင်း လိပ်ဘီလူးကြီး၏ ကျောမှာ အလွန်ပင် တည်ငြိမ်သည်ဆိုသော်လည်း ခိုင်မာကျယ်ပြန့်လှသော မြေပြင်နှင့် နှိုင်းယှဉ်ပါက မြေပြင်ကသာ ပို၍ စိတ်ချရသည်။

ပင်လယ်ထဲတွင် လွင့်မျောနေခဲ့ရသဖြင့် မြေပြင်ကို နင်းမိသည်နှင့် ကျောက်လင်းက အနားယူရန် အော်ဟစ်တော့သည်။ ထိုအချက်ကို လုချွမ်းက ငြင်းဆိုခြင်း မပြုဘဲ ကျောက်လင်းနှင့် ကျိရုရွှယ်တို့ကို အရင် တဲထိုးခိုင်းလိုက်ပြီး သူကမူ အရပ်မျက်နှာအနှံ့ ပျံ့နှံ့နေသော ဇွန်ဘီစစ်တပ်ကို အလျင်အမြန် ပြန်လည် စုစည်းလိုက်သည်။

မကြာမီမှာပင်

ဝုန်း...

ပတ်ဝန်းကျင် တောရိုင်းမြေများဆီမှ နားကွဲမတတ် ခြေသံကြီးများ ထွက်ပေါ်လာပြီး မြေပြင်မှာလည်း အဆက်မပြတ် တုန်ခါနေသည်။ ခဏချင်းအတွင်းမှာပင် အဝေးတစ်နေရာ၌ ဇွန်ဘီစစ်တပ် အမြောက်အမြား ပေါ်ထွက်လာပြီး လုချွမ်းရှိရာသို့ လျင်မြန်စွာ စုရုံးလာကြသည်။

မကြာခင်မှာပင် လုချွမ်း၏ ဇွန်ဘီစစ်တပ်ကြီးမှာ သူ၏ အနားသို့ ရောက်ရှိလာသည်။ မူလကရှိနေသော ပင်လယ်သားရဲ ဇွန်ဘီများနှင့် အဆင့်မြင့် ဇွန်ဘီများမှာ ဇွန်ဘီစစ်တပ်ကြီးအတွင်းသို့ လျင်မြန်စွာ ပေါင်းစည်းသွားကြသည်။

ခွဲခွာနေခဲ့ရသော ဇွန်ဘီစစ်တပ်ကြီးကို ကြည့်ရင်း လုချွမ်း၏ မျက်လုံးများမှာ အနည်းငယ် လှုပ်ရှားသွားသည်။ ယခုလေးတင် အာရုံခံကြည့်လိုက်ရာ သူ မရှိသည့် အတောအတွင်း ဇွန်ဘီစစ်တပ်မှာ သိသိသာသာ တိုးပွားလာပြီး အကောင်ရေ တစ်သိန်းကျော်ခန့် ပိုများလာသည်ကို တွေ့လိုက်ရသည်။

"ပင်လယ်ပိုင်းမှာ ရှိနေတဲ့ တောရိုင်းထဲက ဇွန်ဘီတွေကို ဒီကို ခေါ်လာခဲ့ကြတာ ထင်တယ်"

ထိုသို့တွေးမိရင်း လုချွမ်းက မပြုံးဘဲ မနေနိုင်တော့ပေ။ သူ၏ ပင်လယ်ခရီးစဉ်မှ မထင်မှတ်ထားသော အကျိုးအမြတ်များ ရရှိလိမ့်မည်ဟု မမျှော်လင့်ထားခဲ့ပေ။

ထို့နောက် လုချွမ်းသည် ဇွန်ဘီစစ်တပ်ကို ပတ်ဝန်းကျင်တွင် လှည့်လည်စေလိုက်ပြီး သူကမူ ကွင်းပြင်တစ်ခုတွင် နေရာယူကာ ယာဉ်တန်းထဲမှ ဆန်အချို့ကို ထုတ်ယူ၍ မနက်စာအတွက် ဆန်ပြုတ်အနည်းငယ် ပြင်ဆင်လိုက်သည်။

ဤရက်ပိုင်းအတွင်း ခရီးသွားနေရသဖြင့် အခြေအနေများ မပြေလည်ဘဲ ဖုတ်ထားသော ပင်လယ်သားရဲအသားများကိုသာ စားခဲ့ရသဖြင့် အလွန် ငြီးငွေ့နေပြီ ဖြစ်သည်။ ခံတွင်းလိုက်စေရန်အတွက် ပေါ့ပေါ့ပါးပါး အစားအစာအချို့ကို သူတို့ အရေးတကြီး လိုအပ်နေပြီ ဖြစ်သည်။

နာရီဝက်ခန့်ကြာပြီးနောက် ဝဝလင်လင် စားသောက်ပြီးသောအခါ ကျောက်လင်းသည် ချီချီလေးနှင့်အတူ အနားယူရန် တဲအတွင်းသို့ ပြန်ဝင်သွားခဲ့သည်။

လုချွမ်းကမူ ဝိညာဉ်လက်နက်ဖြစ်သော ကောင်းကင်မျိုကရားကို ယူဆောင်ကာ ယာဉ်တန်းဘေးသို့ သွားပြီး ပစ္စည်းကိရိယာအားလုံးကို ၎င်းအတွင်းသို့ သိမ်းဆည်းလိုက်သည်။

ကောင်းကင်မျိုကရား ရှိနေပြီဖြစ်သဖြင့် သူတို့၏ ရိက္ခာများနှင့် အသုံးအဆောင်ပစ္စည်းများကို ဤမျှရှည်လျားသော ယာဉ်တန်းကြီးဖြင့် သယ်ဆောင်ရန် မလိုတော့ပေ။

နောင်တွင် ကားမောင်းရန် လိုအပ်လာလျှင်ပင် ယာဉ်တန်းထဲမှ ကားအနည်းငယ်ရှိရုံဖြင့် လုံလောက်ပြီဖြစ်သည်။

မသိလိုက်ဘဲနှင့်ပင် တစ်နေ့တာ၏ ထက်ဝက်ခန့် အချိန်ကုန်ဆုံးသွားခဲ့ပြီး လုချွမ်းသည် ဇွန်ဘီစစ်တပ်ကို ထိန်းချုပ်ကာ မူလလမ်းကြောင်းအတိုင်း ပြန်လည်ထွက်ခွာခဲ့သည်။

ဂျိမ်း...

သိပ်သည်းလှသော ဇွန်ဘီစစ်တပ်ကြီးသည် တဖြည်းဖြည်း ချီတက်လာပြီး လုချွမ်း စိတ်ကြိုက်ရွေးချယ်ထားသော ကွင်းပြင်သွား မော်တော်ယာဉ် သုံးစီးမှာလည်း စစ်တပ်၏ နောက်တွင် ပုံမှန်အတိုင်း လိုက်ပါလာသည်။

မထင်မှတ်ဘဲ ထွက်ခွာပြီး နာရီဝက်ခန့်အကြာတွင် ကားနောက်ခန်း၌ ထိုင်နေသော ကျောက်လင်းသည် ကောင်းကင်၏ ဘယ်ဘက်ခြမ်းကို ရုတ်တရက် လက်ညှိုးထိုးပြကာ အော်ဟစ်လိုက်သည်။

"ဟေး... လုချွမ်း ဟိုမှာကြည့်စပ် ကောင်းကင်မှာ အဲဒါ ဘာကြီးလဲ။ ငါ့ကို မကောင်းတဲ့ ခံစားချက်ကြီး ပေးနေတယ်"

ထိုစကားကြောင့် လုချွမ်းနှင့် ကျောက်စိမ်းလိပ်ပေါ်မှ ကျင့်စဉ်ကို လေ့လာနေသော ကျိရုရွှယ်တို့မှာ ပြိုင်တူ လှမ်းကြည့်လိုက်ကြသည်။

ယာဉ်တန်း၏ ဘယ်ဘက်ကောင်းကင်ယံတွင် ဘဲဥပုံသဏ္ဌာန် သွေးရောင်လွှမ်းနေသော ဟင်းလင်းပြင်ဟာကွက်တစ်ခု ချိတ်ဆွဲထားသလို ရှိနေသည်။ ၎င်းသည် နိမိတ်မကောင်းသော အရှိန်အဝါများကို ထုတ်လွှတ်နေပြီး ကမ္ဘာမြေကို ငုံ့ကြည့်နေသည့် မိစ္ဆာမျက်လုံးတစ်လုံးနှင့် ဆင်တူနေသည်။

"အဲဒါ ဘာကြီးလဲ"

လုချွမ်းသည် ကောင်းကင်မှ သွေးရောင်ဟင်းလင်းပြင်ကို ကြည့်ကာ ဇဝေဇဝါဖြင့် မျက်မှောင်ကြုတ်လိုက်မိသည်။

"လုချွမ်း... ဒါက အာကာသအက်ကြောင်းနဲ့ မတူဘူးလား။ ဒါပေမဲ့ ပုံမှန် အာကာသအက်ကြောင်းတွေက ပုံသဏ္ဌာန်မမှန်ဘူး။ ဒါကတော့ ထူးခြားနေတယ်"

ကျောက်လင်းက ခန့်မှန်းလိုက်သည်။

လုချွမ်းကမူ မသေချာသဖြင့် ခေါင်းခါပြလိုက်သည်။ အမှန်စင်စစ် ကောင်းကင်တွင် ဤကဲ့သို့ အာကာသအက်ကြောင်းမျိုး ပေါ်လာသည်ကို သူ တစ်ခါမျှ မကြားဖူးခဲ့ပေ။ သူသည် အက်ကြောင်းများစွာနှင့် ကြုံဖူးသော်လည်း ဤကဲ့သို့သော အရာမျိုးကိုမူ မတွေ့ဖူးခဲ့ချေ။

သို့သော်လည်း ကျောက်လင်းနှင့် လုချွမ်းတို့ သတိမပြုမိလိုက်သည်မှာ ကျိရုရွှယ်၏ မျက်နှာမှာ ထိုသွေးရောင်ဟင်းလင်းပြင်ကို မြင်သည်နှင့် သိသိသာသာ ပြောင်းလဲသွားခြင်းပင်။

"ဟင်းလင်းပြင်တံခါး"

"ဒါက ဟင်းလင်းပြင် ပိုးကောင်မျိုးနွယ်ထဲက တော်ဝင်မျိုးနွယ်တွေ ဖွင့်လှစ်ထားတဲ့ အထူးလမ်းကြောင်းပဲ။ တော်ဝင်မျိုးနွယ်ဝင် တစ်ယောက်ယောက် ရောက်လာတော့မယ်ဆိုတဲ့ အဓိပ္ပာယ်ပဲ"

ကျိရုရွှယ်၏ အမူအရာမှာ အလွန်လေးနက်သွားတော့သည်။ ဟင်းလင်းပြင် ပိုးကောင်မျိုးနွယ်အတွင်းရှိ တော်ဝင်မျိုးနွယ်ဝင်တိုင်းသည် ဟင်းလင်းပြင်စွမ်းအားကို အသုံးချနိုင်ပြီး တစ်ဦးချင်း တိုက်ခိုက်ရေးစွမ်းရည်မှာလည်း အလွန်မြင့်မားကြသည်။

သူတို့သည် မွေးဖွားလာကတည်းက အဆင့်ခြောက် တိုက်ခိုက်ရေးစွမ်းအား ပါရှိလာကြပြီး အများစုမှာ အဆင့်ခုနစ်နှင့် အဆင့်ရှစ်အထိ ရှိတတ်ကာ အရေအတွက်မှာလည်း မနည်းလှပေ။

"ဖေဖေ... အဲဒါ ပိုးကောင်မျိုးနွယ်ရဲ့ တော်ဝင်မျိုးနွယ်တွေ သုံးတဲ့ လမ်းကြောင်းပဲ။ သူတို့ ရောက်လာတော့မယ်ဆိုတာ သေချာတယ်။ အဲဒီတော်ဝင်မျိုးနွယ်ဝင်တွေက ဟင်းလင်းပြင်

စွမ်းအားကို ပိုင်ဆိုင်ထားတာဆိုတော့ ရင်ဆိုင်ရတာ အလွန်ခက်ခဲလိမ့်မယ်။ သမီးတို့ သတိထားရမယ်"

လုချွမ်းနှင့် ကျောက်လင်းတို့ ဘာမှမသိသေးသည်ကို မြင်သောအခါ ကျိရုရွှယ်က အလျင်အမြန် ရှင်းပြလိုက်သည်။ တော်ဝင်မျိုးနွယ်များအကြောင်း မသိဘဲ ရင်ဆိုင်မိပါက အထိနာသွားနိုင်သည်။

"ပိုးကောင်မျိုးနွယ်ရဲ့ တော်ဝင်မျိုးနွယ်ဝင် ဟုတ်လား"

လုချွမ်း၏ မျက်မှောင်များမှာ ပို၍ တွန့်ချိုးသွားသည်။

"အဲဒီအရပ်မျက်နှာက ပင်လယ်ပိုင်း ပြည်နယ်မြို့တော်ရှိတဲ့ နေရာပဲ။ သွားကြည့်ကြတာပေါ့ အဲဒီ ပိုးကောင်တော်ဝင်မျိုးနွယ်က ရှိနေသေးတယ်ဆိုရင် အမြစ်ပြတ် သတ်ပစ်ရမယ်"

မြေပုံကို ထုတ်ကြည့်ပြီးနောက် လုချွမ်းသည် တည်နေရာကို ချက်ချင်း အတည်ပြုကာ အေးစက်စွာ ပြောလိုက်သည်။

တော်ဝင်မျိုးနွယ်ဖြစ်နေတော့ ဘာဖြစ်လဲ။

သူ၏ ဇွန်ဘီစစ်တပ်ကြီး ရှေ့မှောက်တွင်မူ သူတို့လည်း အရာရောက်လိမ့်မည် မဟုတ်ပေ။

ထို့နောက် ဇွန်ဘီစစ်တပ်ကြီးသည် လမ်းကြောင်းပြောင်းကာ ပင်လယ်ပိုင်း ပြည်နယ်မြို့တော်ဆီသို့ အရှိန်အဟုန်ဖြင့် ချီတက်သွားကြတော့သည်။ ပြည်နယ်မြို့တော်မှာ ပိုးကောင်မျိုးနွယ်စု အမြောက်အမြား၏ သိမ်းပိုက်ခြင်းကို ခံထားရသည်မှာ ကြာပြီဖြစ်ပြီး ဧရာမ ပိုးအိမ်မြို့ကြီးတစ်မြို့အဖြစ် ပြောင်းလဲနေကာ မြို့အထက်တွင် ပိုးကောင်များစွာ ဟိုဟိုဒီဒီ ပျံသန်းနေကြသည်။

ပြည်နယ်မြို့တော်၏ အပြင်ဘက်သို့ ရောက်သောအခါ လုချွမ်း၏ ဇွန်ဘီစစ်တပ်မှာ သူ၏ အမိန့်အရ ရပ်တန့်လိုက်သည်။ ထို့နောက် သူတို့ သုံးယောက်မှာ ကားပေါ်မှ ဆင်းကာ ကုန်းမြင့်တစ်ခုပေါ်တွင် ရပ်၍ ရှေ့မှ မြို့တော်ကြီးကို အကဲခတ်လိုက်ကြသည်။

သို့သော်လည်း သေသေချာချာ မကြည့်ရသေးခင်မှာပင် သူတို့ရှေ့ ကောင်းကင်ယံ၌ အလင်းတန်းများစွာ ရုတ်တရက် ပေါ်ထွက်လာပြီး လုချွမ်းတို့အဖွဲ့ရှိရာသို့ မျက်စိတစ်မှိတ်အတွင်း ရောက်ရှိလာတော့သည်။

လုချွမ်းသည် မျက်လုံးများကို ကျဉ်းမြောင်းလိုက်သည်။ ထိုတိုက်ခိုက်မှုမှာ အခြားမဟုတ်ဘဲ အလွန်ထက်မြက်လှသော ဟင်းလင်းပြင်ဓားသွားများပင်။

အခန်း။ ၅၄၄

ထိုဟင်းလင်းပြင်ဓားသွားများသည် အလွန်လျင်မြန်ပြီး မည်သည့်အသံမျှ မထွက်ဘဲ တိုးဝင်လာသည်ကိုသာ မြင်လိုက်ရသည်။ မျက်စိတစ်မှိတ်အတွင်းမှာပင် ၎င်းတို့မှာ ရှေ့သို့ ရောက်ရှိလာတော့သည်။

သို့သော်လည်း လုချွမ်းနှင့် အခြားသူများမှာ ချက်ချင်းပင် တုံ့ပြန်နိုင်ခဲ့ကြသည်။ ကျိရုရွှယ်မှာ အေးစက်သော အကြည့်ဖြင့် တခဏအတွင်းမှာပင် လှုပ်ရှားလိုက်သည်။

ပြင်းထန်လှသော စိတ်စွမ်းအားများ တဟုန်ထိုး ထွက်ပေါ်လာပြီး သူတို့ သုံးယောက်၏ ရှေ့တွင် ဖောက်ထွင်း၍မရသော ခိုင်မာသည့် စိတ်စွမ်းအား တံတိုင်းကြီးတစ်ခုကို တည်ဆောက်လိုက်သည်။

ဘုန်း... ဘုန်း... ဘုန်း...

ချက်ချင်းဆိုသလိုပင် တိုက်ခိုက်လာသော ဟင်းလင်းပြင်ဓားသွားများအားလုံးသည် စိတ်စွမ်းအား အကာအကွယ်တံတိုင်းကို ထိမှန်သွားပြီး ပေါက်ကွဲသံများ ဆက်တိုက်ထွက်ပေါ်လာကာ တံတိုင်းတစ်ခုလုံးကို တုန်ခါသွားစေသည်။

သို့သော်လည်း ထိုတံတိုင်း၏ ကာကွယ်ရေးစွမ်းအားမှာ အံ့ဩစရာကောင်းလောက်အောင် သန်မာပြီး တည်ငြိမ်လှသည်။ ဆက်တိုက် တုန်ခါနေသော်လည်း ထိုဓားသွားများမှာ တံတိုင်းကို ဖောက်ထွက်နိုင်ခြင်း မရှိခဲ့ပေ။

ထိုတိုက်ခိုက်မှုကို အောင်မြင်စွာ တားဆီးနိုင်ပြီးနောက် လုချွမ်းနှင့် အဖော်များသည် ရှေ့မှ ကောင်းကင်ယံသို့ လှမ်းကြည့်လိုက်ကြသည်။ သူတို့ရှေ့ရှိ ဟင်းလင်းပြင်အတွင်း ပုံရိပ်များ တစ်ခုပြီးတစ်ခု ပေါ်ထွက်လာသည်။

၎င်းတို့မှာ လူသားများနှင့် အလွန်ဆင်တူသော ပိုးကောင်သဏ္ဌာန် သက်ရှိများပင်။ ၎င်းတို့တွင် ခြေလက်များနှင့် ဦးခေါင်းများ ရှိသော်လည်း ပိုးကောင်များ၏ ဝိသေသလက္ခဏာများမှာ အလွန်ပင် ထင်ရှားနေပြီး ပိုးကောင်မျိုးနွယ်နှင့် လူသားတို့ ပေါင်းစပ်ထားသော မျိုးစပ်သတ္တဝါများကဲ့သို့ ရှိနေကြသည်။

ထိုထူးဆန်းသော ပိုးကောင်များသည် ခြေဆုံးခေါင်းဆုံး ငွေရောင် ဇီဝချပ်ဝတ်တန်ဆာများဖြင့် ဖုံးလွှမ်းထားပြီး ခြေလက်များမှာ ပိုးကောင်များ၏ ခြေလက်များကဲ့သို့ ရှိနေကာ မျက်နှာမှာမူ ကြောက်မက်ဖွယ်ကောင်းသော ပိုးကောင်မျက်နှာမျိုး ဖြစ်သည်။

အေးစက်သော ပိုးကောင်မျက်လုံးတစ်စုံမှနေ၍ သတ်ဖြတ်လိုသော အရှိန်အဝါများ ထွက်ပေါ်နေသည်။

"ဟင်းလင်းပြင် တော်ဝင်မျိုးနွယ်"

ကျိရုရွှယ်သည် ထိုတိုက်ခိုက်သူများကို စိုက်ကြည့်ရင်း အေးစက်သော လေသံဖြင့် ပြောလိုက်သည်။ တစ်ချိန်တည်းမှာပင် ကျိရုရွှယ်၏ ခန္ဓာကိုယ်မှ အရှိန်အဝါမှာ အထွတ်အထိပ်သို့ မြင့်တက်လာပြီး သတ်ဖြတ်လိုသော စိတ်ဆန္ဒများ အဆက်မပြတ် ထွက်ပေါ်လာတော့သည်။

ဟင်းလင်းပြင် ပိုးကောင်မျိုးနွယ်၏ တော်ဝင်မျိုးနွယ်စုများအနေဖြင့် ဤကောင်များသည် အခြားသော ပိုးကောင်မျိုးနွယ်စုများကို ထိန်းချုပ်နိုင်စွမ်း ရှိကြသည်။

ကျိရုရွှယ်၏ အမြင်တွင်မူ ဟင်းလင်းပြင် တော်ဝင်မျိုးနွယ်တစ်ကောင်ကို သတ်ရခြင်းမှာ သာမန်ပိုးကောင်မျိုးနွယ် အုပ်စုလိုက်ကို သတ်ရသည်ထက် ပို၍ တန်ဖိုးရှိသည်။ ယခု ဤနေရာတွင် ဟင်းလင်းပြင် တော်ဝင်မျိုးနွယ်စု တစ်စုနှင့် ကံကောင်းထောက်မစွာ ဆုံတွေ့ရသဖြင့် သူမသည် မည်သို့မျှ အလွတ်ပေးမည် မဟုတ်ပေ။

"ဒါက ဟင်းလင်းပြင် တော်ဝင်မျိုးနွယ် ဆိုတာလား"

လုချွမ်းသည် ထိုတော်ဝင်မျိုးနွယ်ဝင်များကို စေ့စေ့စပ်စပ် အကဲခတ်နေသည်။ ဤဟင်းလင်းပြင် တော်ဝင်မျိုးနွယ်ဝင် အုပ်စုမှာ အကောင်ရေ တစ်ရာထက်မနည်းရှိပြီး ၎င်းတို့ထဲမှ ငါးကောင်မှာ အဆင့်ရှစ် အရှိန်အဝါများ ထွက်ပေါ်နေကာ ကျန်ရှိသော အကောင်များမှာလည်း အဆင့်ခုနစ်သို့ ရောက်ရှိနေကြသဖြင့် အင်အားကြီးမားသော အုပ်စုတစ်စု ဖြစ်နေသည်။

ယခုလေးတင် ထိုတော်ဝင်မျိုးနွယ်ဝင်များ၏ တိုက်ခိုက်မှုကို လုချွမ်း ကိုယ်တိုင် မြင်တွေ့ခဲ့ရပြီး ဖြစ်သည်။ သူတို့၏ ဟင်းလင်းပြင်ဓားသွားများမှာ သာမန် အဆင့်ခုနစ် ဆင့်ကဲပြောင်းလဲသူများ ခုခံနိုင်သည့် အရာမျိုး မဟုတ်ပေ။

"တောက်... အဆင့်ရှစ်တွေ ဒီလောက်တောင် များနေတာလား။ ဒီပိုးကောင်မျိုးနွယ်တွေက တကယ်ကို သန်မာလွန်းနေပြီ"

ရှေ့မှ ဟင်းလင်းပြင် တော်ဝင်မျိုးနွယ်ဝင်များ၏ အရှိန်အဝါကို ခံစားမိသောအခါ ကျောက်လင်းမှာ ရင်ထဲတွင် တုန်လှုပ်သွားပြီး တိုးတိုးလေး ညည်းတွားလိုက်မိသည်။ သူမ၏ အဆင့်ခုနစ် စွမ်းအားလေးနှင့်ဆိုလျှင် ထိုတော်ဝင်မျိုးနွယ်ဝင်များ၏ ရှေ့တွင် ဘာမှမဟုတ်ပေ။

ဟစ်...

ထိုအချိန်တွင် ဦးဆောင်လာသော အဆင့်ရှစ် ဟင်းလင်းပြင် တော်ဝင်မျိုးနွယ်ဝင်က လုချွမ်းတို့အဖွဲ့ကို ကြည့်ကာ နားမခံသာသော အသံတစ်ခု ပြုလုပ်လိုက်သည်။

ထိုပိုးကောင်မျိုးနွယ်များ ဘာပြောနေသည်ကို မသိရသော်လည်း ရန်သူ့ဘက်မှ ထွက်ပေါ်လာသော ပြင်းထန်သည့် သတ်ဖြတ်လိုသော စိတ်ဆန္ဒများကို ခံစားနေရသဖြင့် သူတို့ သုံးယောက်မှာ ခန့်မှန်းနိုင်ကြသည်။

"လုချွမ်း... ဒီသားရဲတွေက တိုက်ခိုက်ဖို့ ပြင်နေကြပြီ"

ကျောက်လင်းက စိုးရိမ်တကြီး သတိပေးလိုက်သည်။

"ငါ သိတယ်... ကျောက်လင်း နင် အရင် နောက်ဆုတ်နေလိုက်ဦး။ နင် အခုလောလောဆယ် ဒီတိုက်ပွဲထဲ ဝင်ဖို့ မလိုသေးဘူး"

လုချွမ်းက ခေါင်းညိတ်ပြလိုက်သည်။

ကျောက်လင်း၏ စွမ်းအားကို ထည့်တွက်ကာ သူမကို ခေတ္တ အနားယူနေရန် လုချွမ်းက ဆုံးဖြတ်လိုက်ခြင်းပင်။ အဆင့်ခုနစ်မှာ တိုက်ပွဲဝင်နိုင်သည်ဆိုသော်လည်း လုချွမ်းအနေဖြင့် သူကိုယ်တိုင် ကိုင်တွယ်နိုင်မည်ဟု ယုံကြည်ထားသဖြင့် ကျောက်လင်းကို အန္တရာယ်မဖြစ်စေချင်ပေ။

"ဒါဆိုရင် လုချွမ်း... နင်နဲ့ ချီချီ သတိထားကြဦးနော်"

ထိုစကားကို ကြားသောအခါ ကျောက်လင်းသည်လည်း မိမိကိုယ်ကိုယ် ကောင်းကောင်းသိသဖြင့် ဇွတ်မတိုးတော့ဘဲ တည်ကြည်စွာ ခေါင်းညိတ်ပြကာ အလျင်အမြန် နောက်ဆုတ်ပေးလိုက်သည်။

သူမ၏ စွမ်းအားဖြင့်ဆိုလျှင် အဆင့်ခုနစ် ဟင်းလင်းပြင် တော်ဝင်မျိုးနွယ်ဝင်များကို ရင်ဆိုင်နိုင်သည်မှာ အမှန်ပင်။ သို့သော်လည်း လုချွမ်း၏ လက်အောက်တွင် အဆင့်ခုနစ် ဇွန်ဘီများမှာ မရေမတွက်နိုင်အောင် ရှိနေသဖြင့် သူမ တစ်ယောက် မပါဝင်ခြင်းက ဘာမှ ထိခိုက်မှု မရှိပေ။

ကျောက်လင်း နောက်ဆုတ်သွားပြီးနောက် လုချွမ်းသည် အောက်ရှိ စစ်တပ်အတွင်းမှ အဆင့်

ရှစ်နှင့် အဆင့်ခုနစ် ဇွန်ဘီများကို ချက်ချင်း ခေါ်ယူလိုက်သည်။

မျက်စိတစ်မှိတ်အတွင်းမှာပင် လုချွမ်းနှင့် ကျိရုရွှယ်တို့၏ နောက်ကွယ်တွင် အဆင့်မြင့် ဇွန်ဘီများမှာ သိပ်သည်းစွာ စုရုံးလာကြရာ ဟင်းလင်းပြင် တော်ဝင်မျိုးနွယ်စုများ၏ ခြိမ်းခြောက်မှုမှာ သူတို့၏ အတွက်အချက် မှားယွင်းသွားစေခဲ့သည်။

ဟိန်း...

လုချွမ်းတို့ဘက်တွင် အရေအတွက်နှင့် အင်အား ပိုသာနေသည်ကို မြင်သော်လည်း ဦးဆောင်လာသော အဆင့်ရှစ် ဟင်းလင်းပြင် တော်ဝင်မျိုးနွယ်ဝင်က နောက်ဆုတ်သွားခြင်း မရှိဘဲ ပို၍ ကျယ်လောင်စွာ ဟိန်းဟောက်လိုက်သည်။

ချက်ချင်းဆိုသလိုပင် ရပ်နေခဲ့ကြသော ဟင်းလင်းပြင် တော်ဝင်မျိုးနွယ်ဝင် အားလုံးသည် လုချွမ်းနှင့် ကျိရုရွှယ်ရှိရာသို့ တဟုန်ထိုး ပြေးဝင် တိုက်ခိုက်ကြတော့သည်။

ရှပ်... ရှပ်... ရှပ်...

ရုတ်တရက်ဆိုသလို ထိုတော်ဝင်မျိုးနွယ်ဝင်များသည် ကောင်းကင်ယံတွင် လျှပ်တပြက် လှုပ်ရှားလာကြသည်။ ငွေရောင် ဝိညာဉ်အလင်းတန်းများမှာ ဝေဝါးသွားပြီး မမြင်နိုင်သော ဟင်းလင်းပြင်စွမ်းအားများ ပေါက်ကွဲထွက်လာကာ ဟင်းလင်းပြင်ဓားသွားများအဖြစ် ပြောင်းလဲသွားတော့သည်။

လုချွမ်းသည်လည်း ကျိရုရွှယ်နှင့် အဆင့်မြင့် ဇွန်ဘီများကို ဦးဆောင်ကာ ရင်ဆိုင်တိုက်ခိုက်လိုက်သည်။

ဝုန်း... ဝုန်း...

နှစ်ဖက်အင်အားစုများမှာ တခဏချင်းအတွင်း ထိပ်တိုက်တွေ့ကြတော့သည်။ ဟင်းလင်းပြင်ဓားသွားများ တိုးဝင်လာသောအခါ ကျိရုရွှယ်က စိတ်စွမ်းအား အကာအကွယ်တံတိုင်းကို ထပ်မံ ဖန်တီး၍ ချေဖျက်လိုက်ပြီးနောက် အနီးကပ် တိုက်ပွဲကို စတင်လိုက်ကြသည်။

လုချွမ်းနှင့် ကျိရုရွှယ်တို့သည် အဆင့်ရှစ် ဇွန်ဘီ အချို့ကို ခေါ်ဆောင်ကာ ဦးဆောင်လာသော အဆင့်ရှစ် ဟင်းလင်းပြင် တော်ဝင်မျိုးနွယ်ဝင် ငါးကောင်ကို ရင်ဆိုင်ကြသည်။

ထိုအဆင့်ရှစ် တော်ဝင်မျိုးနွယ်ဝင်များမှာ အလွန်အစွမ်းထက်ကြပြီး သူတို့၏ လှုပ်ရှားမှုတိုင်းတွင် ပြတ်ရှလှသော ဟင်းလင်းပြင်စွမ်းအားများ ပါဝင်နေသည်။ ထို့အပြင် သူတို့သည် တစ်

နေရာမှ တစ်နေရာသို့ အဆက်မပြတ် ကူးပြောင်းနိုင်စွမ်းရှိကြသဖြင့် အလွန်ပင် လျင်မြန်လှရာ လုချွမ်းအတွက်ပင် သူတို့ကို အလျင်အမြန် အနိုင်ယူရန် ခက်ခဲနေသည်။

ဘုန်း... ဘုန်း...

တိုက်ပွဲမှာ ပို၍ ပြင်းထန်လာပြီး တိုက်ခိုက်သံများမှာ အဆက်မပြတ် ထွက်ပေါ်နေသည်။ လုချွမ်းတို့ဘက်တွင် အခြေအနေမှာ အားပြိုင်နေရသော်လည်း အဆင့်ခုနစ် ဇွန်ဘီများနှင့် အဆင့်ခုနစ် တော်ဝင်မျိုးနွယ်ဝင်များ၏ တိုက်ပွဲမှာမူ တစ်ဖက်သတ် ဆန်နေသည်။

အဆင့်ခုနစ် ဇွန်ဘီ အမြောက်အမြား၏ ဝိုင်းရံမှုအောက်တွင် အကောင်ရေ တစ်ရာနီးပါးရှိသော အဆင့်ခုနစ် တော်ဝင်မျိုးနွယ်ဝင်များမှာ လောင်ကျွမ်းနေသော လှည်းပေါ်သို့ ရေတစ်ခွက် လောင်းလိုက်သကဲ့သို့ပင်။

သူတို့၏ ဟင်းလင်းပြင်ဓားသွားများမှာ အဆင့်ခုနစ် ဇွန်ဘီများကို တစ်ပိုင်းစီ ပြတ်သွားအောင် တိုက်ခိုက်နိုင်သည်ဆိုသော်လည်း ဇွန်ဘီများ၏ အရေအတွက်ကို မယှဉ်နိုင်ပေ။

ဇွန်ဘီများ၏ ဝိုင်းရံပိတ်ဆို့မှုကို ခံရသောအခါ ဟင်းလင်းပြင် တော်ဝင်မျိုးနွယ်ဝင်များမှာ လျင်မြန်စွာ ကျဆုံးလာကြပြီး မကြာမီမှာပင် အများစုမှာ သေဆုံးခြင်း သို့မဟုတ် ဒဏ်ရာရခြင်းများ ဖြစ်ကုန်ကြသည်။

မကြာခင်မှာပင် လုချွမ်းသည် အဆင့်ခုနစ် ဇွန်ဘီများကို အဆင့်ရှစ် တိုက်ပွဲအတွင်းသို့ ဝင်ရောက် ကူညီစေလိုက်သည်။

ဝုန်း... ဝုန်း... ဝုန်း...

လုချွမ်း၏ မပျက်စီးနိုင်သော ခန္ဓာမှာ ကောင်းကင်ယံတွင် သောင်းကျန်းနေပြီး အဆင့်ရှစ် ဟင်းလင်းပြင် တော်ဝင်မျိုးနွယ်ဝင် တစ်ကောင်ကို အသာစီးရယူကာ ၎င်း၏ ငွေရောင် ဇီဝချပ်ဝတ်တန်ဆာကို အပိုင်းပိုင်းဖြစ်အောင် ထိုးနှက်လိုက်သည်။

ထိုအချိန်တွင် အဆင့်ခုနစ် ဇွန်ဘီ ဒါဇင်ပေါင်းများစွာက ထိုအဆင့်ရှစ် တော်ဝင်မျိုးနွယ်ဝင်ကို ဝိုင်းအုံ ဝါးမျိုလိုက်ကြတော့သည်။

နာကျင်စွာ အော်ဟစ်သံများနှင့်အတူ အဆင့်ရှစ် ဟင်းလင်းပြင် တော်ဝင်မျိုးနွယ်ဝင် သုံးကောင်မှာ လုချွမ်းတို့၏ လက်ချက်ဖြင့် နေရာတင် ပွဲချင်းပြီး သေဆုံးသွားခဲ့ရသည်။

ဟစ်...

ဒဏ်ရာ အပြင်းအထန် ရနေသော ကျန်ရှိသည့် အဆင့်ရှစ် တော်ဝင်မျိုးနွယ်ဝင် နှစ်ကောင်မှာ ထိတ်လန့်တကြား အော်ဟစ်လိုက်ကြသည်။ နောက်တစ်ခဏတွင် ထိုနှစ်ကောင်နှင့် အသက်

ရှင်ကျန်ရစ်သော အဆင့်ခုနစ် တော်ဝင်မျိုးနွယ်ဝင်များသည် ကူးပြောင်းခြင်းစွမ်းရည်ကို အသုံးပြုကာ ထွက်ပြေးကြရာ မျက်စိတစ်မှိတ်အတွင်းမှာပင် တစ်ကီလိုမီတာခန့် ဝေးရာသို့ ရောက်ရှိသွားကြသည်။

"ဟင်း... ထွက်ပြေးချင်တာလား။ လိုက်ကြ"

လုချွမ်းက အေးစက်စွာ နှာခေါင်းရှုံ့လိုက်ပြီး ချက်ချင်း အမိန့်ပေးလိုက်သည်။ တခဏအတွင်းမှာပင် အဆင့်မြင့် ဇွန်ဘီ စစ်တပ်ကြီးသည် ထွက်ပြေးနေသော ဟင်းလင်းပြင် တော်ဝင်မျိုးနွယ်ဝင်များကို အလျင်အမြန် ဝိုင်းရံပိတ်ဆို့လိုက်ကြတော့သည်။

သူမ၏ ဖေဖေသည် ဇွန်ဘီများကို ဦးဆောင်ကာ လိုက်လံတိုက်ခိုက်နေသည်ကို ကြည့်ရင်း ကျိရုရွှယ်မှာမူ လိုက်မသွားဘဲ သေဆုံးနေသော ဟင်းလင်းပြင် တော်ဝင်မျိုးနွယ်ဝင်များကိုသာ မျက်လုံးများ တောက်ပစွာဖြင့် ကြည့်နေမိသည်။

ထိုဟင်းလင်းပြင် တော်ဝင်မျိုးနွယ်ဝင်များ၏ ခန္ဓာကိုယ်အတွင်း၌ ပိုးကောင်အမြုတေများ ရှိနေသည်။ သူမ၏ ယခင်ဘဝတွင် ထိုအမြုတေများမှာ ဆင့်ကဲပြောင်းလဲသူများအတွက် အလွန်တန်ဖိုးကြီးလှသော ရတနာများဖြစ်ပြီး တွေ့ရခဲလှသည်။

အဘယ်ကြောင့်ဆိုသော် ထိုအမြုတေများကို ဆင့်ကဲပြောင်းလဲသူများက တိုက်ရိုက် စားသုံးနိုင်ပြီး ဘေးထွက်ဆိုးကျိုး လုံးဝမရှိဘဲ သူတို့၏ အဆင့်ကို လျင်မြန်စွာ မြှင့်တင်ပေးနိုင်သောကြောင့်ပင်။