အခန်း (၅၄၅-၅၄၆)

အခန်း။ ၅၄၅

ကျိရုရွှယ်သည် ကျောက်လင်းကိုခေါ်ကာ ဟင်းလင်းပြင်တော်ဝင်မျိုးနွယ်ဝင်များ၏ ခန္ဓာကိုယ်အတွင်းမှ ပိုးကောင်အမြုတေများကို တူးဖော်နေစဉ် လုချွမ်းသည် သူ၏အဆင့်မြင့်ဇွန်ဘီစစ်တပ်ကို ဦးဆောင်၍ ထွက်ပြေးနေသော တော်ဝင်မျိုးနွယ်ဝင်များကို ပင်လယ်ပိုင်းပြည်နယ်မြို့တော်၏ ဆင်ခြေဖုံးအရပ်၌ နောက်ဆုံးတွင် ဝိုင်းရံပိတ်ဆို့နိုင်ခဲ့သည်။

ဝိုင်းရံမှုအတွင်း ထိတ်လန့်တုန်လှုပ်နေကြသော တော်ဝင်မျိုးနွယ်ဝင်များကို ကြည့်ကာ လုချွမ်း၏အကြည့်များမှာ ရေခဲကဲ့သို့ အေးစက်နေသည်။

နောက်တစ်စက္ကန့်တွင် သူ၏စိတ်အမိန့်ဖြင့် သိပ်သည်းလှသော ဇွန်ဘီများမှာ ရန်သူများထံသို့ အုပ်စုလိုက် တိုးဝင်သွားကြတော့သည်။

ဟိန်း...

ဤအခြေအနေကို ဟင်းလင်းပြင်တော်ဝင်မျိုးနွယ်ဝင်များက အသည်းအသန် ခုခံကြသည်။ သူတို့သည် မိမိတို့၏စွမ်းအားကို အဆုံးစွန်ထိညှစ်ထုတ်ကာ ဟင်းလင်းပြင်ဓားသွားများကို အဆက်မပြတ် ပစ်လွှတ်ပြီး တိုးဝင်လာသော အဆင့်ခုနစ် ဇွန်ဘီများကို အပိုင်းပိုင်းပြတ်သွားအောင် တိုက်ခိုက်ကြသည်။

ကံမကောင်းစွာဖြင့် ဇွန်ဘီများ၏ အရေအတွက်မှာ အလွန်အမင်း များပြားလွန်းလှသည်။ အဆင့်ခုနစ် ဇွန်ဘီ အကောင်နှစ်ဆယ်ကျော်ကို သတ်ဖြတ်ပြီးနောက် ထိုတော်ဝင်မျိုးနွယ်ဝင်များမှာ ဇွန်ဘီလှိုင်းလုံးကြီးအောက်တွင် နစ်မြုပ်သွားခဲ့ရသည်။

မကြာမီမှာပင် ဇွန်ဘီအုပ်ကြီးအတွင်းမှ စူးရှသော အော်ဟစ်သံများမှာ မပြတ်တမ်း ထွက်ပေါ်လာတော့သည်။

ဟစ်...

ထိုတော်ဝင်မျိုးနွယ်ဝင်များ အားလုံး အသတ်ခံရတော့မည့် ဆဲဆဲအချိန်တွင် နောက်ဆုံးကျန်ရှိနေသော အဆင့်ရှစ် တော်ဝင်မျိုးနွယ်ဝင်မှာ သူ၏နောက်ဆုံးအချိန်၌ နားကွဲမတတ် စူးရှကျယ်လောင်လှသော အော်ဟစ်သံကြီးကို အရပ်မျက်နှာအနှံ့ ပဲ့တင်ထပ်သွားအောင် ပြုလုပ်လိုက်သည်။

ထိုအသံဆုံးသည်နှင့် တပြိုင်နက် ၎င်းသည် ဘေးပတ်ဝန်းကျင်ရှိ ဇွန်ဘီများ၏ ရက်စက်စွာ သတ်ဖြတ်ခြင်းကို ခံလိုက်ရပြီး သွေးများမှာ နေရာအနှံ့ လွင့်စင်သွားကာ ၎င်း၏ခန္ဓာကိုယ်မှာလည်း ရုပ်သေးရုပ်ပျက်ကြီးတစ်ခုကဲ့သို့ လွင့်စင်ကျသွားခဲ့သည်။

ဤအချိန်တွင် ကောင်းကင်ယံတစ်ခုလုံး၌ လုချွမ်း၏ ဇွန်ဘီများမှလွဲ၍ ဘာမျှမရှိတော့ပေ။

ဂျိမ်း...

ထိုအခါ မထင်မှတ်ထားဘဲ ဝေးကွာသော တစ်နေရာမှ နားမခံသာသော ဟိန်းဟောက်သံများမှာ လှိုင်းလုံးကြီးများကဲ့သို့ တစ်ဟုန်ထိုး ထွက်ပေါ်လာသည်။ လုချွမ်းသည် မျက်မှောင်ကြုတ်ကာ အဝေးသို့ လှမ်းကြည့်လိုက်သည်။

ရှေ့မှ ပြည်နယ်မြို့တော်၏ မြို့တွင်းဧရိယာအတွင်းမှ ပိုးကောင်မျိုးနွယ်စုများမှာ ဤအရပ်မျက်နှာဆီသို့ အုပ်စုလိုက်ကြီး ပျံ့နှံ့တိုးဝင်လာနေသည်ကို သူ မြင်လိုက်ရသည်။ မြို့တစ်ခုလုံးမှာ အဆုံးမဲ့လှသော ပိုးကောင်မျိုးနွယ်စုများဖြင့် ပြည့်နှက်နေပြီး ရေလျှံနေသော မြစ်ရေများကဲ့သို့ ရှေ့သို့ တိုးဝင်လာနေကြသည်။

"ခုနက အဆင့်ရှစ် တော်ဝင်မျိုးနွယ်ဝင်ရဲ့ အော်သံကြောင့်ပဲ..."

လုချွမ်းက စိတ်ထဲမှ ချက်ချင်း ခန့်မှန်းလိုက်သည်။

အမှန်စင်စစ် ပြည်နယ်မြို့တော်ကို သိမ်းပိုက်ထားသော ပိုးကောင်မျိုးနွယ် အမြောက်အမြားမှာ ထိုတော်ဝင်မျိုးနွယ်ဝင်များ၏ လက်အောက်ခံများသာ ဖြစ်ကြသည်။ တော်ဝင်မျိုးနွယ်စု၏ ခေါ်သံကို ကြားရသောအခါ ထိုပိုးကောင်များမှာ မလာဘဲ မနေရဲကြပေ။

"သေဖို့ လာကြတာပဲ"

ပိုးကောင်မျိုးနွယ်စုကြီးမှာ မြေပြင်ပေါ်၌ ပြေးလွှားသူကပြေး၊ ကောင်းကင်ယံ၌ ပျံသန်းသူကပျံနှင့် တစ်ပြင်လုံး မည်းမှောင်နေအောင် များပြားလှပြီး အရှိန်အဝါမှာ ကြောက်မက်ဖွယ်ကောင်းနေသော်လည်း လုချွမ်းမှာမူ အနည်းငယ်မျှပင် ထိတ်လန့်ခြင်းမရှိဘဲ သူ၏မျက်ဝန်းထဲ၌ အထင်အမြင်သေးသော အရိပ်အယောင်များသာ ကိန်းအောင်းနေသည်။

နောက်တစ်ခဏတွင် လုချွမ်း၏ အမိန့်မှာ ထွက်ပေါ်လာတော့သည်။

ဝုန်း...

နောက်ကွယ်မှ ဇွန်ဘီစစ်တပ်ကြီးသည် အဆင့်မြင့်ဇွန်ဘီများ၏ ဦးဆောင်မှုဖြင့် ရေလှိုင်းကြီးများကဲ့သို့ တိုးဝင်လာသော ပိုးကောင်မျိုးနွယ်စုများထံသို့ တဟုန်ထိုး ပြေးဝင်သွားကြသည်။

ဘုန်း...

လုချွမ်း၏ လက်အောက်ရှိ ဆင့်ကဲပြောင်းလဲထားသော ဇွန်ဘီ တစ်သန်းကျော်နှင့် ရင်ဆိုင်ရသောအခါ ဟိတ်ဟန်ကြီးလှသော ထိုပိုးကောင်မျိုးနွယ်စုများမှာ ရွှံ့ရုပ်များကဲ့သို့ပင် အလွယ်တကူ ချေမှုန်းခြင်း ခံလိုက်ရသည်။

မြေပြင်ပေါ်၌ ပြေးလွှားလာသော ပိုးကောင်များသည် အဆင့်ခုနစ် ပင်လယ်သားရဲ ဇွန်ဘီ အမြောက်အမြား၏ တိုက်မိပြီး ကြိတ်ခြေခြင်းကို ခံလိုက်ရသည်။ လမ်းတွင်ရှိသမျှ အရာအားလုံးကို ကြိတ်ခြေပစ်သော စက်ယန္တရားကြီးများကဲ့သို့ပင် သူတို့ရှေ့မှ အရာအားလုံးမှာ ဖုန်မှုန့်အဖြစ် ပြောင်းလဲသွားခဲ့ရသည်။

ကောင်းကင်ယံ၌ ပျံသန်းနေသော ပိုးကောင်များမှာ ပို၍ပင် ဆိုးရွားသေးသည်။ အစွမ်းထက်လှသော အဆင့်ရှစ် ဇွန်ဘီများနှင့် များပြားလှသော အဆင့်ခုနစ် ဇွန်ဘီများ၏ ရှေ့တွင် သူတို့မှာ ထိလိုက်ရုံနှင့် ပြိုလဲသွားကြပြီး အုပ်စုလိုက်ကြီး အောက်သို့ ပြုတ်ကျကုန်ကြသည်။

အဆင့်ရှစ် မီးလျှံဇွန်ဘီ နှစ်ကောင် လှုပ်ရှားလိုက်သည်နှင့် တပြိုင်နက် ကောင်းကင်ယံ၌ မီးပင်လယ်ကြီး တစ်ခုကို ဖန်တီးလိုက်ရာ ရှေ့သို့တိုးဝင်လာသော ပိုးကောင်များမှာ ပြင်းထန်လှသော မီးလျှံများအောက်တွင် မီးသွေးခဲများအဖြစ် ပြောင်းလဲသွားပြီး မည်းမှောင်သော မိုးရေများကဲ့သို့ မြေပြင်ပေါ်သို့ ဆက်တိုက် ပြုတ်ကျကုန်ကြတော့သည်။

တိုက်ပွဲသည် အချိန်အတော်ကြာသည်အထိ ဆက်လက်ဖြစ်ပွားနေခဲ့သည်။ မြေပြင်နှင့် ကောင်းကင်ယံရှိ ပိုးကောင်မျိုးနွယ်စုများသည် ပိုးအိမ်မြို့ကြီးကို အမာခံစခန်းအဖြစ် အသုံးချထားသဖြင့် သူတို့၏ တိုက်ခိုက်မှုမှာ အဆုံးမရှိသယောင် ထင်ရသည်။

လုချွမ်း၏ ဇွန်ဘီများက ပိုးကောင် မည်မျှပင် သတ်ဖြတ်ပါစေ ပြည်နယ်မြို့တော်၏ မြို့တွင်းဧရိယာမှ စစ်ကူများမှာ အဆက်မပြတ် ထွက်ပေါ်လာနေသည်။ ၎င်းကိုမြင်သောအခါ လုချွမ်းမှာ မျက်မှောင်ကြုတ်သွားမိသည်။

"ဒီပြည်နယ်မြို့တော်ထဲမှာ ပိုးကောင်တွေက မနည်းပါလား။ တစ်မြို့လုံးကိုတောင် သူတို့ သိမ်းပိုက်ထားတာများလား"

ကံကောင်းထောက်မစွာဖြင့် အဆုံးမရှိသယောင် ထင်ရသော ပိုးကောင်မျိုးနွယ်စုများ၏ တိုက်ခိုက်မှုမှာ မကြာမီမှာပင် အဆုံးသတ်သို့ ရောက်ရှိလာပြီး တိုက်ခိုက်သူ အရေအတွက်မှာလည်း တဖြည်းဖြည်း နည်းပါးသွားခဲ့သည်။

နောက်ဆုံးတွင် ဟင်းလင်းပြင်တော်ဝင်မျိုးနွယ်ဝင်များနှင့် မြို့ထဲမှ ပိုးကောင်မျိုးနွယ်စုများမှာ လုချွမ်း၏ ရက်စက်လှသော တိုက်ခိုက်မှုအောက်တွင် အမြစ်ပြတ် ချေမှုန်းခြင်း ခံလိုက်ရသည်။

ဤအချိန်တွင် အပေါ်မှ ငုံ့ကြည့်လိုက်ပါက မြေပြင်ပေါ်၌ တောင်ပုံရာပုံ ဖြစ်နေသော ပိုးကောင်အလောင်းများနှင့် လေထုထဲ၌ ပြင်းထန်လှသော အပုပ်နံ့များကို ရရှိနိုင်မည်ပင်။

တိုက်ပွဲပြီးဆုံးသွားသောအခါ လုချွမ်းသည် အဆင့်မြင့်ဇွန်ဘီများကို ဦးဆောင်ကာ မြေပြင်သို့ ဖြည်းညှင်းစွာ ဆင်းသက်လိုက်သည်။ ထိုအချိန်တွင် ဟင်းလင်းပြင်တော်ဝင်မျိုးနွယ်ဝင်များထံမှ ပိုးကောင်အမြုတေများကို တူးဖော်ပြီးစီးသွားသော ကျိရုရွှယ်နှင့် ကျောက်လင်းတို့မှာလည်း အလျင်အမြန် ရောက်ရှိလာကြသည်။

"ပိုးကောင်တွေ အများကြီးပဲ လုချွမ်း... နင် သူတို့ကို အကုန်လုံး သုတ်သင်လိုက်တာပဲ"

တောင်ကုန်းလေးများသဖွယ် ဖြစ်နေသော ပိုးကောင်အလောင်းများကို ကြည့်ကာ ကျောက်လင်းမှာ အံ့ဩလွန်းသဖြင့် ပါးစပ်ပင် မစေ့နိုင်တော့ပေ။

"ဒီပိုးကောင်တွေအားလုံးက ပြည်နယ်မြို့တော်ထဲကနေ တိုးထွက်လာကြတာ။ ဒီမြို့ကတော့ သူတို့လက်ထဲ ကျသွားပြီထင်တယ်"

လုချွမ်းက ပြန်ဖြေလိုက်သည်။

ထိုစဉ် ကျိရုရွှယ်သည် မြေပြင်ပေါ်ရှိ ဟင်းလင်းပြင်တော်ဝင်မျိုးနွယ်ဝင်များကို ကြည့်ကာ ပိုးကောင်အမြုတေများ စတင်တူးဖော်ရန် သွားလိုက်သဖြင့် ကျောက်လင်းကလည်း ကူညီရန် အမြန်လိုက်သွားသည်။

"ချီချီ... သမီး ဘာလုပ်နေတာလဲ"

လုချွမ်းမှာ အံ့အားသင့်သွားရသည်။

"ဒီတော်ဝင်မျိုးနွယ်တွေဆီကနေ အမြုတေတွေကို ဘယ်လိုထုတ်ယူရတာလဲ။ ပြီးတော့ အဲဒီအရာတွေက သားရဲတွေရဲ့ဟာနဲ့ ဘာလို့ ကွဲပြားနေရတာလဲ။ လက်သည်းခွံလောက်ပဲ ရှိပေမဲ့ ငွေရောင်အလင်းတန်းတွေ ဖြာထွက်နေတာပဲ"

"ဖေဖေ... ဒါတွေက ဟင်းလင်းပြင်တော်ဝင်မျိုးနွယ်တွေဆီကရတဲ့ ပိုးကောင်အမြုတေတွေ။

ဆင့်ကဲပြောင်းလဲသူတွေက ဒါကိုစားပြီး ဘေးထွက်ဆိုးကျိုးမရှိဘဲ ကျင့်စဉ်အဆင့်ကို မြှင့်

တင်လို့ရတယ်။ သမီးတို့အတွက်တော့ ဒါက ရှားပါးရတနာပဲ"

အမြုတေတစ်ခုကို တူးဖော်ပြီးနောက် ကျိရုရွှယ်က လုချွမ်းကို ရှင်းပြလိုက်သည်။

"ပိုးကောင်အမြုတေ ဟုတ်လား။ ဒီလောက် အစွမ်းထက်လိမ့်မယ်လို့ မထင်ထားမိဘူး။ ဒါဆိုရင် ငါ အမြုတေတွေကို စားသုံးသလိုမျိုးပဲပေါ့"

ထိုစကားကို ကြားသောအခါ လုချွမ်း၏ အကြည့်မှာ အနည်းငယ် ပြောင်းလဲသွားပြီး စိတ်ထဲမှ စဉ်းစားနေမိသည်။ နှမြောစရာကောင်းသည်မှာ ဤတော်ဝင်မျိုးနွယ်ဝင် အရေအတွက်မှာ နည်းပါးနေသေးပြီး အမြုတေမှာလည်း တစ်ရာခန့်သာ ရှိသဖြင့် သိသာထင်ရှားသော ပြောင်းလဲမှု ဖြစ်စေရန် မလုံလောက်သေးပေ။ လုချွမ်းမှာ နှမြောတသစွာဖြင့် ခေါင်းခါလိုက်မိသည်။

မကြာမီမှာပင် ကျိရုရွှယ်နှင့် ကျောက်လင်းတို့သည် ဟင်းလင်းပြင်တော်ဝင်မျိုးနွယ်ဝင် အလောင်းများထံမှ အမြုတေအားလုံးကို တူးဖော်ပြီးစီးသွားသည်။

သူတို့နှစ်ယောက် ပြီးသွားသည်နှင့် လုချွမ်းသည် အဆင့်ခုနစ် ဇွန်ဘီ တစ်ရာကျော်ကို ချက်ချင်း ရွေးချယ်လိုက်ပြီး ဝါးမျိုဆင့်ကဲခြင်းအတွက် ဟင်းလင်းပြင်တော်ဝင်မျိုးနွယ်ဝင်များကို စားသုံးစေလိုက်သည်။

လုချွမ်းသည် ဟင်းလင်းပြင်တော်ဝင်မျိုးနွယ်ဝင်များ၏ စွမ်းရည်ကို မျက်စိကျနေခြင်းပင်။ ဟင်းလင်းပြင်စွမ်းအားကို ထိန်းချုပ်နိုင်သော ကြောက်မက်ဖွယ် စွမ်းရည်ကို ဇွန်ဘီများထံသို့ ကူးပြောင်းပေးနိုင်ပါက သူသည် ပုန်းကွယ်တိုက်ခိုက်နိုင်ပြီး ကူးပြောင်းခြင်းကို အဆက်မပြတ် လုပ်နိုင်သော ဟင်းလင်းပြင် ဇွန်ဘီစစ်တပ်ကို ပိုင်ဆိုင်ရမည်ပင်။

အချိန်အနည်းငယ် ကုန်ဆုံးသွားပြီးနောက် ဟင်းလင်းပြင်တော်ဝင်မျိုးနွယ်ဝင်များမှာ ဇွန်ဘီများ၏ ဝါးမျိုခြင်းကို ခံလိုက်ရပြီး ရွေးချယ်ထားသော ဇွန်ဘီတိုင်းမှာ ပြင်းထန်သော သွေးရောင်အလင်းတန်းများ တောက်ပလာကြသည်။ သွေးရောင်အလင်းများ ပျောက်ကွယ်သွားသောအခါ ပုံစံသစ် ဟင်းလင်းပြင် ဇွန်ဘီများထွက်ပေါ်လာတော့သည်။

လုချွမ်းသည် သူတို့ကို သေချာကြည့်လိုက်သည်။ ဤဇွန်ဘီများသည် ဟင်းလင်းပြင်တော်ဝင်မျိုးနွယ်ဝင်များနှင့် အလွန်ဆင်တူသော်လည်း ကြောက်မက်ဖွယ် ပိုးကောင်မျက်နှာများအစား လူသားမျက်နှာများကိုသာ ဆက်လက် ထိန်းသိမ်းထားကြသည်။ သို့သော် ခြေလက်များနှင့် ခန္ဓာကိုယ်မှာမူ ဟင်းလင်းပြင်တော်ဝင်မျိုးနွယ်များကဲ့သို့ ပြောင်းလဲသွားပြီး ငွေရောင် ဇီဝချပ်ဝတ်တန်ဆာများဖြင့် ဖုံးလွှမ်းထားကာ ကာကွယ်ရေးစွမ်းအားမှာ အထွတ်အထိပ်သို့ ရောက်ရှိနေသည်။

လုချွမ်း၏ ထိန်းချုပ်မှုအောက်တွင် ထိုဟင်းလင်းပြင် ဇွန်ဘီ တစ်ရာကျော်မှာ တန်းစီရပ်လိုက်ကြပြီး နောက်တစ်ခဏ၌ ငွေရောင်အလင်းများ လက်ခနဲ ဖြစ်သွားကာ သူတို့သည် အမွေဆက်ခံရရှိထားသော ဟင်းလင်းပြင်စွမ်းအားကို အသုံးပြု၍ နေရာအနှံ့သို့ တယ်လီပို့လုပ်ကာ ပျောက်ကွယ်သွားကြသည်။

၎င်းကိုမြင်သောအခါ လုချွမ်းက ကျေနပ်စွာ ပြုံးလိုက်သည်။

"လုချွမ်း... ငါ ချောင်းယန်အခြေစိုက်စခန်းရဲ့ လုံခြုံရေးကို စိုးရိမ်နေမိတယ်။ ငါ နင်တို့နဲ့အတူ ဆက်လိုက်လို့ မရတော့ဘူး ထင်တယ်"

ဘေးမှ ကြည့်နေသော ကျောက်လင်းသည် တစ်စုံတစ်ခုကို သတိရသွားဟန်ဖြင့် လုချွမ်းကို ပြောလိုက်သည်။

အခန်း။ ၅၄၆

ကျောက်လင်းသည် အခြေစိုက်စခန်းမှ ခွင့်ယူပြီး ထွက်လာခဲ့သည်ဆိုသော်လည်း ယခုတစ်ခေါက်မှာ အချိန်အတော်ကြာသွားခဲ့ပြီ ဖြစ်သည်။ တစ်စုံတစ်ရာသော ကျူးကျော်မှုများကို ရင်ဆိုင်နေရချိန်တွင် ချောင်းယန်အခြေစိုက်စခန်းအနေဖြင့် ကြံ့ကြံ့ခံနိုင်ပါ့မလားဆိုသည်ကို သူမ မသိနိုင်ပေ။

ယခုအခါ သူမ ပြန်ရောက်လာပြီဖြစ်၍ ဤနေရာတွင် ဆက်လက်နေရန် အစီအစဉ်မရှိတော့ပေ။ ထို့အပြင် သူမ၏ စွမ်းအားအရဆိုလျှင် လုချွမ်းနှင့် ချီချီတို့နောက်သို့ လိုက်နေခြင်းမှာ ဘာမှ အသုံးမဝင်ဘဲ အဖော်လိုက်ပေးရုံသာ ရှိသဖြင့် စောစောစီးစီး ပြန်သွားခြင်းက ပို၍ ကောင်းပေလိမ့်မည်။

ကျောက်လင်း၏ စကားကို ကြားသောအခါ လုချွမ်းသည် ကျိရုရွှယ်နှင့် မသိမသာ အကြည့်ချင်း ဖလှယ်လိုက်မိပြီး အနည်းငယ် နှမြောတသသ ဖြစ်သွားသည်။

လုချွမ်းက ခေါင်းညိတ်ပြကာ ကျောက်လင်းကို ပြုံး၍ ပြောလိုက်သည်။

"ကျောက်လင်း... နင် အခြေစိုက်စခန်းအတွက် စိုးရိမ်နေတယ်ဆိုရင်လည်း အမြန်သာ ပြန်တော့။ ငါနဲ့ ချီချီလည်း မကြာခင်မှာ လီမြစ်အခြေစိုက်စခန်းကို ပြန်တော့မှာပါ။ တစ်ခုခုရှိရင် လီမြစ်အခြေစိုက်စခန်းမှာ ငါတို့ကို တိုက်ရိုက်လာရှာလို့ ရတယ်"

"အန်တီ ကျောက်လင်း... သမီးဆီကို ခဏခဏ လာလည်ရမယ်နော်"

ကျိရုရွှယ်က အနားသို့ တိုးသွားကာ ကျောက်လင်း၏ လက်ကို ကိုင်၍ လှုပ်ယမ်းရင်း ပြောလိုက်သည်။

"အေးပါ ချီချီရယ်... အန်တီ သမီးဆီကို မကြာခဏ လာလည်မှာပေါ့။ ကဲ... လုချွမ်း ငါ အရင် သွားတော့မယ်နော်"

ထိုစကားကို ကြားသောအခါ ကျောက်လင်းက ကျိရုရွှယ်၏ ခေါင်းကို အသာအယာ ပုတ်ပေးကာ ပြုံး၍ ပြန်ပြောလိုက်ပြီးနောက် လုချွမ်းကို နှုတ်ဆက်လိုက်သည်။

လုချွမ်းက ခေါင်းညိတ်ပြလိုက်သည်။ ထို့နောက် လုချွမ်းနှင့် ကျိရုရွှယ်တို့၏ စောင့်ကြည့်မှုအောက်တွင် ကျောက်လင်းသည် ကောင်းကင်ယံသို့ အလျင်အမြန် ပျံတက်သွားပြီး အနောက်ဘက် အရပ်မျက်နှာဆီသို့ ဦးတည်ကာ မိုးကုပ်စက်ဝိုင်းအတွင်း ပျောက်ကွယ်သွားတော့သည်။

"သွားကြစို့ ချီချီ... ငါတို့လည်း အိမ်ပြန်ဖို့ ပြင်ဆင်ရအောင်"

သူတို့ အပြင်ထွက်လာခဲ့သည်မှာ အတော်ပင် ကြာခဲ့ပြီဖြစ်ပြီး လမ်းတစ်လျှောက် စခန်းချ နေထိုင်ခဲ့ကြရသည်။ လုချွမ်းအနေဖြင့် အိမ်ဟု ဆိုနိုင်သော လီမြစ်အခြေစိုက်စခန်းကို စတင်၍ လွမ်းဆိတ်နေပြီ ဖြစ်သည်။

"ဟုတ်ကဲ့"

ကျိရုရွှယ်က ခေါင်းညိတ်ကာ သူမ တူးဖော်ထားသော ဟင်းလင်းပြင်တော်ဝင်မျိုးနွယ် ပိုးကောင်အမြုတေများကို ယူဆောင်၍ လုချွမ်းနောက်မှနေကာ မြေပြင်ပေါ်ရှိ နယ်လှည့်ကားရှိရာသို့ လျင်မြန်စွာ ပျံသန်းသွားကြတော့သည်။

ဝုန်း...

ထို့နောက် လုချွမ်း၏ အမိန့်ပေးမှုအောက်တွင် ဇွန်ဘီစစ်တပ်ကြီးသည် တစ်ဖန်ပြန်လည် စတင်လှုပ်ရှားကာ အနောက်ဘက်သို့ ချီတက်လာခဲ့သည်။

သို့သော်လည်း ဤခရီးစဉ်အတွင်း လုချွမ်းသည် အဆင့်မြင့်ဇွန်ဘီ အမြောက်အမြားကို စေလွှတ်၍ ပင်လယ်ပိုင်းပြည်နယ်အတွင်းရှိ မြို့များကို ပတ်ကြည့်စေကာ မြို့များကို သိမ်းပိုက်ထားသော တခြားကမ္ဘာသား အားလုံးကို ရှင်းလင်းစေခဲ့သည်။

ဤလုပ်ငန်းစဉ်အတွင်း လူသားအခြေစိုက်စခန်း အချို့မှာ တခြားကမ္ဘာသားများ၏ ဖောက်ထွင်းတိုက်ခိုက်ခြင်းကို ခံထားရပြီး ဖြစ်သည်ကိုလည်း လုချွမ်း တွေ့ရှိခဲ့ရသည်။

ထို့အပြင် တခြားကမ္ဘာသားများ၏ အရေအတွက်မှာလည်း သိသိသာသာ တိုးပွားလာခဲ့သည်။ ယခင်ကဆိုလျှင် အများဆုံး အကောင်ရေ တစ်သောင်းခန့်သာ တွေ့ရတတ်သော်လည်း ယခုတစ်ခေါက်တွင် လုချွမ်းသည် အကောင်ရေ ငါးသောင်းထက်ကျော်သော အုပ်စုများကို အကြိမ်ကြိမ် တွေ့ခဲ့ရပြီး တစ်နေရာတွင်မူ အကောင်ရေ တစ်သိန်းကျော်ရှိသော ခွေးလူသားအုပ်စုကြီးကိုပင် တွေ့ရှိခဲ့ရရာ အရေအတွက်မှာ ထိတ်လန့်စရာ ကောင်းလှသည်။

ဤပုံမှန်မဟုတ်သော အခြေအနေကြောင့် လုချွမ်းမှာ ချက်ချင်းပင် သတိဝီရိယ မြင့်တက်လာခဲ့သည်။

နောက်တစ်နေ့တွင် နယ်လှည့်ကားပေါ်၌ လုချွမ်းတို့ ရောက်ရှိနေကြပြီး ဇွန်ဘီစစ်တပ်မှာလည်း ပင်လယ်ပိုင်းပြည်နယ်အတွင်းရှိ ပိုးကောင်မျိုးနွယ်နှင့် တခြားကမ္ဘာသားများကို ရှင်းလင်းပြီးနောက် ပြည်နယ်၏ အစွန်းပိုင်းသို့ ရောက်ရှိကာ ထွက်ခွာရန် ပြင်ဆင်နေကြပြီ ဖြစ်သည်။

"ဖေဖေ... ဖေဖေ့ရဲ့ ယူဆချက်အရဆိုရင် တခြားကမ္ဘာသားတွေ အကြီးအကျယ် ကျူးကျော်မယ့်အချိန်က ရောက်လာပြီထင်တယ်။ သူတို့တွေက ဒီကမ္ဘာကို ကျူးကျော်ဖို့ ပိုပြီး အားစိုက်လာကြပြီ"

လုချွမ်း၏ ပြောပြချက်ကို ကြားပြီးနောက် ကျိရုရွှယ်က တည်ကြည်လေးနက်သော မျက်နှာထားဖြင့် ပြောလိုက်သည်။

"သမီး ထင်တာကတော့ အခုချိန်မှာ ပင်လယ်ပိုင်းပြည်နယ်တင် မဟုတ်ဘဲ အခြားပြည်နယ်တွေမှာလည်း တခြားကမ္ဘာသားတွေ အမြောက်အမြား ရောက်နေလောက်ပြီ ဖေဖေ"

သူမ၏ ရင်ထဲတွင် အလွန်ဆိုးရွားသော အတိတ်နိမိတ်တစ်ခုကို ခံစားနေရပြီဖြစ်သည်။ ပထမဦးစွာ ဟင်းလင်းပြင် တော်ဝင်မျိုးနွယ်ဝင်များ ပေါ်ပေါက်လာခြင်းနှင့် ယခုအခါ တခြားကမ္ဘာသားများ အင်တိုက်အားတိုက် ကျူးကျော်လာခြင်းတို့မှာ...

"အကြီးအကျယ် ကျူးကျော်တာ ဟုတ်လား။ ဟက်... သူတို့အရေအတွက်က ပိုများမလား ငါ့ရဲ့ ဇွန်ဘီတွေက ပိုများမလားဆိုတာ ကြည့်ကြသေးတာပေါ့။ လိုအပ်ရင်တော့ ဒီတခြားကမ္ဘာသားတွေကို အလောင်းချင်းထပ်ပြီး သေအောင်သတ်ပစ်မယ်"

ထိုစကားကို ကြားသောအခါ လုချွမ်းသည် အနည်းငယ်မျှ စိုးရိမ်ပူပန်ခြင်းမရှိဘဲ အေးစက်စွာ ပြုံးလိုက်သည်။

ဤတခြားကမ္ဘာသားများ၏ အင်အားမှာ သူ၏ ဇွန်ဘီစစ်တပ်နှင့် ယှဉ်လျှင် သိသိသာသာ အားနည်းလွန်းလှသည်။ သူတို့ အရေအတွက် သောင်းနှင့်ချီ ရှိနေပါစေဦးတော့ သူ၏ ဇွန်ဘီစစ်တပ်နှင့် ရင်ဆိုင်ရပါက တခဏချင်းအတွင်း ဝါးမျိုချေမှုန်းခြင်း ခံရမည်သာ ဖြစ်သည်။

ကျူးကျော်လာသော တခြားကမ္ဘာသား အမျိုးမျိုးကို စုစည်းလိုက်မှသာ သူ၏အတွက် စိန်ခေါ်မှုတစ်ခု ဖြစ်လာနိုင်ပေလိမ့်မည်။ အကယ်၍ ပြည်နယ်တိုင်းရှိ တခြားကမ္ဘာသားများသည် ပင်လယ်ပိုင်းပြည်နယ်ကဲ့သို့ များပြားနေပြီး အားလုံးကို တစ်စုတစ်ဝေးတည်း ပေါင်းစည်းလိုက်ပါက စုစုပေါင်း အရေအတွက်မှာ သန်းနှင့်ချီ ရှိကောင်းရှိနိုင်သည်။

သို့သော်လည်း လုချွမ်း၏ အမြင်တွင်မူ ဤအရာမှာ ဖြစ်နိုင်ခြေ အလွန်နည်းပါးလှသည်။ အဘယ်ကြောင့်ဆိုသော် ဟင်းလင်းပြင် အက်ကြောင်းများသည် နေရာအနှံ့အပြားတွင် ကွဲပြားစွာ တည်ရှိနေပြီး တခြားကမ္ဘာသားများသည် သတ်မှတ်ထားသော အက်ကြောင်းများမှသာ ထွက်ပေါ်လာနိုင်သောကြောင့် လျင်မြန်စွာ စုရုံးရန်မှာ မလွယ်ကူပေ။

ထို့အပြင် တခြားကမ္ဘာသားများမှာလည်း အမျိုးအစား ကွဲပြားလွန်းလှသည်။ အချို့မှာ လူသားနှင့် မျောက်ကဲ့သို့ပင် ကွာခြားလွန်းလှရာ သူတို့အားလုံး ညီညွတ်စွာ ပေါင်းစည်းလိမ့်မည်ဟု မျှော်လင့်ခြင်းမှာ စိတ်ကူးယဉ်မှုသက်သက်သာ ဖြစ်သည်။ သူတို့ အချင်းချင်း ပြန်မတိုက်ကြလျှင်ပင် ကံကောင်းလှပြီဖြစ်သည်။

ထို့ကြောင့် တခြားကမ္ဘာသားများ မည်မျှပင် များပြားနေပါစေ လုချွမ်းမှာ လုံးဝ ကြောက်ရွံ့ခြင်းမရှိပေ။ ၎င်းတို့ကို တစ်စုချင်းစီ ခွဲထုတ်၍ အလွယ်တကူ အနိုင်ယူနိုင်စွမ်း ရှိသည်။

ဤအချိန်တွင် ဇွန်ဘီစစ်တပ်ကြီးမှာ ပင်လယ်ပိုင်းပြည်နယ်အတွင်းမှ အောင်မြင်စွာ ထွက်ခွာလာနိုင်ခဲ့ပြီဖြစ်သည်။ လုချွမ်းသည် သူ၏မြေပုံကိုထုတ်၍ အနီးအနားရှိ လူသားအခြေစိုက်စခန်းများနှင့် မြို့ပြဧရိယာများ၏ တည်နေရာများကို စတင်စစ်ဆေးလိုက်သည်။

ထို့နောက် သူသည် အဆင့်မြင့် ဇွန်ဘီများကို အုပ်စုများခွဲ၍ တခြားကမ္ဘာသား အမျိုးမျိုးကို သုတ်သင်ရန်နှင့် အရေအတွက်ကို လျှော့ချရန် ချက်ချင်းစေလွှတ်လိုက်သည်။ လမ်းတစ်လျှောက်တွင် လုချွမ်းသည် လူသားအခြေစိုက်စခန်း အမြောက်အမြားကို ကယ်တင်နိုင်ခဲ့သည်။

ကျန်းရွှေအခြေစိုက်စခန်း။

မြို့ရိုးမြင့်ကြီးပေါ်တွင် အခြေစိုက်စခန်းခေါင်းဆောင်သည် နွမ်းလျဖျော့တော့နေသော ပုံစံဖြင့် လူနှစ်ဦး၏ တွဲကူမှုကို ခံယူနေရသည်။ တဖြည်းဖြည်း ထွက်ခွာသွားသော ဇွန်ဘီစစ်တပ်ကြီးကို ကြည့်ရင်း သူက အံ့ဩတသစွာဖြင့် ရေရွတ်လိုက်သည်။

"ဒီဇွန်ဘီဘုရင်က လူသားတစ်ယောက် မဟုတ်တော့ဘူးဆိုပေမဲ့ သူ့ရဲ့ ဉာဏ်ပညာကတော့ လူသားတွေကိုတောင် ယှဉ်နိုင်လိမ့်မယ်ထင်တယ် နောက်ပြီး သူက တကယ်ကို အားကိုးထိုက်တာပဲ။ ငါတို့ အခြေစိုက်စခန်းကို ဒီလောက်အထိ ကူညီပေးလိမ့်မယ်လို့ လုံးဝကို မထင်ထားခဲ့ဘူး"

"ဇွန်ဘီဘုရင်က တကယ်ကို ယုံကြည်ရတာပဲ။ သူတို့နဲ့ ပူးပေါင်းခဲ့တာက မှန်ကန်တဲ့ ဆုံးဖြတ်ချက် ဖြစ်ခဲ့တာပဲ"

ဘေးမှ ဖြူဖျော့နေသော အဆင့်မြင့်အရာရှိတစ်ဦးက အသက်ရှူမဝသလို ခေါင်းညိတ်ကာ ပြောလိုက်သည်။

ဘေးပတ်ဝန်းကျင်ရှိ အခြားသူများကလည်း ထိုစကားကိုပင် ထပ်တူထပ်မျှ ခံစားနေကြရသည်။ ဇွန်ဘီဘုရင်၏ အကူအညီသာ မပါဝင်ပါက သူတို့၏ ကံကြမ္မာမှာ ကောင်းလာစရာ အကြောင်းမရှိပေ။

အဘယ်ကြောင့်ဆိုသော် လွန်ခဲ့သော သုံးရက်ခန့်က ကျန်းရွှေ အခြေစိုက်စခန်းသည် ပုတ်သင်ညိုလူသား သောင်းနှင့်ချီ၏ ဖောက်ထွင်းတိုက်ခိုက်ခြင်းကို ခံခဲ့ရသည်။ အခြေစိုက်စခန်း ကျဆုံးသွားသောအခါ သူတို့အားလုံးမှာ သုံ့ပန်းများ ဖြစ်ခဲ့ကြရသည်။

ပုတ်သင်ညိုလူသားများသည် သူတို့ကို ချက်ချင်း မသတ်ဖြတ်ဘဲ ကျွန်ပြုခိုင်းစေခဲ့ကြသည်။ လွန်ခဲ့သော နှစ်ရက်အတွင်း သူတို့သည် အတင်းအကြပ် အလုပ်ခိုင်းစေခြင်း ခံခဲ့ရပြီး အမှားအယွင်း အနည်းငယ်ရှိရုံဖြင့် ရက်စက်စွာ အရိုက်အနှက် ခံခဲ့ရသည်။

ပို၍ ဆိုးရွားသည်မှာ ပုတ်သင်ညိုလူသားများ ဗိုက်ဆာလာတိုင်း လူသားများထဲမှ အချို့ကို ကျပန်းရွေးထုတ်ကာ အရှင်လတ်လတ် ဝါးမျိုစားသောက်ရန် ဆွဲထုတ်သွားခြင်းပင်။ ကံကောင်းထောက်မစွာဖြင့် ဇွန်ဘီဘုရင်က သူတို့ကို ထိုလက်ထဲမှ ကယ်တင်ပေးခဲ့ခြင်းဖြစ်ပြီး မဟုတ်ပါက နောက်ဆုံးတွင် သူတို့အားလုံးမှာ ပုတ်သင်ညိုလူသားများ၏ ဝမ်းဗိုက်အတွင်းသို့ ရောက်ရှိသွားကြမည်သာ ဖြစ်သည်။

"မြန်မြန်... အချိန်ကို အသုံးချပြီး အခြေစိုက်စခန်းမှာ ကျန်ရှိတဲ့ လူဦးရေကို စာရင်းလုပ်ကြ။ နောက်ပြီး ဆက်သွယ်ရေး ကိရိယာတွေကို အမြန်ရှာပြီး အင်ပါယာ မြို့တော်ကို ငါတို့ ကယ်တင်ခြင်း ခံရတဲ့အကြောင်း သတင်းပို့ရမယ်။ ဇွန်ဘီဘုရင် ကူညီခဲ့တာကိုလည်း အထူးတလည် ထည့်ပြောလိုက်ကြ"

အခြေစိုက်စခန်းခေါင်းဆောင်သည် ရုတ်တရက် သတိရသွားဟန်ဖြင့် လက်အောက်ငယ်သားများကို အလျင်အမြန် အမိန့်ပေးလိုက်သည်။

"ဟုတ်ကဲ့"

တစ်ချိန်တည်းမှာပင် ဇွန်ဘီစစ်တပ်ကြီးမှာ ကျန်းပြည်နယ်ဆီသို့ တဟုန်ထိုး ချီတက်နေသည်။ နယ်လှည့်ကားပေါ်တွင် လုချွမ်းနှင့် ကျိရုရွှယ်တို့၏ မျက်နှာများမှာမူ များစွာ ညှိုးငယ်နေကြသည်။

လမ်းတစ်လျှောက်တွင် လူသားအခြေစိုက်စခန်း အမြောက်အမြားသည် တခြားကမ္ဘာသားများနှင့် ပိုးကောင်မျိုးနွယ်စုများ၏ ဖောက်ထွင်းဖျက်ဆီးခြင်းကို ခံထားရသည်ကို သူတို့ မြင်တွေ့ခဲ့ရသည်။

တခြားကမ္ဘာသားများ တိုက်ခိုက်ခြင်း ခံရသော အခြေစိုက်စခန်းများတွင် အသက်ရှင်ကျန်ရစ်သူ အများအပြား ရှိနေသေးသဖြင့် လုချွမ်းက တိုက်ရိုက် ကယ်တင်ပေးနိုင်ခဲ့သည်။

သို့သော်လည်း ပိုးကောင်မျိုးနွယ်စုများ၏ ဖျက်ဆီးခြင်း ခံရသော မြို့များမှာမူ အလွန်ပင် ရင်နာစရာ ကောင်းလှသည်။ ထိုနေရာများမှာ ပိုးကောင်မျိုးနွယ်စုများ၏ ဝါးမျိုခြင်းကို အကုန်အစင် ခံလိုက်ရပြီး မြေပြင်ပေါ်၌ အရိုးစု အကြွင်းအကျန်များသာ ဖုံးလွှမ်းလျက် ကျန်ရစ်တော့သည်။

"ဖေဖေ... တခြားကမ္ဘာသားတွေ ဒီလောက် အကြီးအကျယ် ကျူးကျော်လာတာကို လူသားတွေက မတွန်းလှန်နိုင်တော့ဘူး ထင်တယ်"

နောက်ခန်းတွင် ထိုင်နေသော ကျိရုရွှယ်က ဝမ်းနည်းစွာ ပြောလိုက်သည်။

"ဟုတ်တယ် ချီချီ ဒါပေမဲ့ မစိုးရိမ်ပါနဲ့ ဖေဖေ လီမြစ်အခြေစိုက်စခန်းကို ပြန်ရောက်တာနဲ့ စစ်တပ်ကို အပြင်ဘက်ကို စေလွှတ်ပြီး အဲဒီတခြားကမ္ဘာသားတွေနဲ့ ပိုးကောင်မျိုးနွယ်စု အားလုံးကို အမြစ်ပြတ် သုတ်သင်ပစ်မယ်"

လုချွမ်းက ခေါင်းညိတ်ကာ သန္နိဋ္ဌာန်ချထားဟန်ဖြင့် ပြောလိုက်သည်။