သူမရဲ့နောက်ခံက တကယ်ကို နက်ရှိုင်းတယ် ၂

"အာ"

ယိုယွင်ရှန်း ထိုအရာကို တွေးမိသောအခါ ပြင်းပြင်းထန်ထန်သက်ပြင်းချလိုက်လေသည်။

အစပိုင်းတွင် သူ တွေးထားသည်မှာ ၎င်းတို့သုံးဦးရှိနေသဖြင့် ကောင်းကင်ဘုံမသေမျိုးနယ်ပယ် မြွေနတ်ဆိုးတစ်ကောင်ကိုသတ်ဖြတ်ရန်မှာ ၎င်းတို့ လျင်မြန်စွာလှုပ်ရှားနေသရွေ့ကြီးမားသောပြဿနာ ဖြစ်လာမည်မဟုတ်ဟု ယူဆထားခဲ့ခြင်းဖြစ်သည်။

သို့သော်နှစ်ပေါင်းများစွာကြာအောင် စစ်သူကြီး ချင်းလွမ်ရယူရန် ကျရှုံးခဲ့သောခိုင်လုံသော အထောက်အထားသည် ၎င်းတို့၏လက်ထဲသို့ မမျှော်လင့်ဘဲရောက်လာလိမ့်မည်ဟု သူတို့လုံးဝ မထင်ထားခဲ့ကြချေ။

ဤသည်မှာ ယခုအခါ ပြင်းထန်သောပြဿနာတစ်ခုဖြစ်လာခဲ့ပြီ ဖြစ်လေ၏။

လက်ရှိတွင် သက်တံဖြူနတ်ဆိုးသုံးကောင် အနက် ပိုင်ယွီရှန်တစ်ကောင်တည်းသာ လှုပ်ရှားသေးသည်။ အကယ်၍ ၎င်းတို့ ယခုထက် ပိုမိုကြန့်ကြာနေမည်ဆိုပါက အခြားထိုက်ယီမသေမျိုး နှစ်ကောင်ကလည်း သတင်းကြားသည်နှင့်တစ်ပြိုင်နက်ရောက်ရှိလာနိုင်ပြီး ထိုအချိန်ရောက်လျှင် ဤမဟာအစီအရင်က မသေမျိုးစစ်သူကြီးကိုကယ်တင်ရန် လုံလောက်တော့မည် မဟုတ်ချေ။

"..."

ရှီယုံ သူ၏စိတ်ထဲတွင် အချိန်ကိုတိတ်တဆိတ် တွက်ချက်ရင်း နေရာရွှေ့ပြောင်းရေးအစီအရင်ကို တည်ငြိမ်စွာ ခင်းကျင်းနေခဲ့၏။

အကယ်၍ သူက စစ်သူကြီးချန်ချင်းတွင် သေမျိုးလောက၌မည်သို့သော ကျောထောက်နောက်ခံများ ရှိနေသည်ကိုမြင်တွေ့လိုပါက အကောင်းဆုံး အခြေအနေမှာ သူမအားအလွန်အမင်းအန္တရာယ်ရှိသောအခြေအနေတစ်ခုသို့ တွန်းပို့လိုက်ရုံသာရှိလေသည်။

သေခြင်းရှင်ခြင်း အခိုက်အတန့်မျိုးတွင်မှသာ စစ်မှန်သောအရာများကို မြင်တွေ့နိုင်မည် မဟုတ်လော။

ထို့ပြင် ဤမျှလောဘကြီးပြီး ကိုယ်ကျိုးရှာလိုသူ တစ်ဦးက သူမ၏လက်အောက်ငယ်သားများကို အရင် ဆုတ်ခွာခွင့်ပြုလိမ့်မည်ဟု ထင်နေသည်လော။

မနုံ့အပါနှင့်။

သူမ အပြစ်ရှိသလိုခံစားနေရကာ သူမ၏အခြား နည်းလမ်းများကို အခြားသူများမြင်တွေ့သွားမည်ကိုမလိုလားခြင်းသာ ဖြစ်နိုင်ချေအများဆုံးဖြစ်လိမ့်မည်။

ထိုသို့တွေးပြီးနောက် ရှီယုံက မျက်ခုံးကိုအနည်းငယ်ပင့်လိုက်ပြီး အဝေးရှိဗလာဖြစ်နေသော ကောင်းကင်ဆီသို့ သူ၏အကြည့်များကို လွှဲလိုက်ရာ သူ၏မျက်လုံးများတွင် ဝမ်းမြောက်မှုအရိပ်အယောင်တစ်ခု လင်းလက်သွားလေ၏။

စစ်သူကြီးချင်းလွမ် ပေးအပ်သောတာဝန်မှာ ဤကဲ့သို့ လျင်မြန်စွာပြီးမြောက်သွားတော့မည် ဖြစ်လေသည်။

ထိုအချိန်ရောက်လျှင် သူက သူ၏ကိုယ်ပိုင် အကျိုးအမြတ်များကို သေချာပေါက်ရရှိပါလိမ့်မည်။

တစ်ချိန်တည်းမှာပင်။

ရှီယုံကြည့်နေသော ဘိဟိုင်၏အခြားတစ်ဖက်တွင် ပေတစ်ရာမြင့်သော လှိုင်းလုံးကြီးတစ်ခု ရုတ်တရက် ပန်းထွက်လာလေ၏။

ကျယ်လောင်သော မြည်ဟည်းသံများကြားတွင် ပျက်စီးနေသော ရွှေရောင်ခန္ဓာဓမ္မကိုယ်ထည်တစ်ခုက လှိုင်းလုံးများကြားတွင်အကြိမ်ပေါင်းများစွာ လိမ့်သွားပြီး ၎င်း၏လက်ထဲရှိ တံဆိပ်တုံးကြီးမှာလည်း တောက်ပမှုကင်းမဲ့နေကာ သူ၏ပတ်လည်ရှိ သန့်စင်သောချီများတဖြည်းဖြည်းမှေးမှိန်ပျောက်ကွယ်သွားခဲ့လေသည်။

"ပေါင်းစည်းခြင်းနယ်ပယ်အဆင့်။"

ပင်လယ်ပြင်အထက်တွင်ကြမ်းကြုတ်သော ပုံရိပ် ဆယ်ခုကျော်က အောက်ဘက်ရှိ ရွှေရောင်ခန္ဓာကိုယ်ကိုစူးစိုက်ကြည့်နေကြပြီး ၎င်းတို့၏မျက်လုံးများတွင် အံ့အားသင့်မှုအနည်းငယ် ရှိနေလေသည်။

မဟာနတ်ဆိုးတစ်ကောင်စီတိုင်း၏အရှိန်အဝါမှာ အားကောင်းလှပြီး ၎င်းတို့အထဲမှ မည်သူမျှ ကောင်းမွန်သော သဘောထားရှိသူများ မဟုတ်ကြပေ။ မသေမျိုးများကို သတ်ဖြတ်ရမည့် တာဝန်ကို ထမ်းဆောင်နေကြရင်း သူတို့၏သွေးများက စိတ်လှုပ်ရှားမှုဖြင့်ဆူပွက်နေကြသော်လည်း မည်သူတစ်ဦးတစ်ယောက်မျှနောက်ဆုတ်ခြင်း မရှိကြချေ။

ထိတ်လန့်ဖွယ်ကောင်းသော ပုံရိပ်များကို ဦးဆောင်လျက်ပါးလွှာသောပိတ်ဖြူစကို ဝတ်ဆင်ထားသည့် အမျိုးသမီးတစ်ဦးက လက်ကို နောက်ပစ်ကာ ရပ်နေလေသည်။

သူမ၏သွယ်လျသောခန္ဓာကိုယ်ကို မှေးမှိန်စွာမြင်တွေ့နေရသောအဝတ်အစားများကြောင့် သူမကိုပိုမိုပေါ်လွင်နေစေသည်။

သူမက လေထဲတွင် လွင့်မျောနေပြီးမျက်ခုံးများနှင့် မျက်လုံးများမှာ ဒေါသများပြည့်နှက်နေသော်လည်း အပြုံးတစ်ခုကို ဆင်မြန်းထားဆဲပင်။

"မသေမျိုးအရာရှိရဲ့နောက်ခံက အတော်လေး အားကောင်းပုံရတယ်။"

ပေါင်းစည်းခြင်းနယ်ပယ်အဆင့်ကျင့်ကြံခြင်းကိုဖြင့် အဆင့်ခြောက်အောက် မသေမျိုးတံဆိပ်တုံးကိုကိုင်ဆောင်နိုင်ရန်အတွက် ကြီးမားသောပမာဏတစ်ခုကိုကုန်ကျခံခဲ့ရမည်မှာ သေချာလှပေသည်။

သူမ၏အသံ မဆုံးမီမှာပင် ထိုအမျိုးသမီးက ရွှေရောင်ခန္ဒာကိုယ်၏ အရှေ့သို့ ဆင်းသက်သွားခဲ့လေ၏။

"ဒါပေမဲ့ မင်းရဲ့အကြီးအကဲတွေက အပြင်ထွက်ရင် သိုသိုသိပ်သိပ်နေဖို့ ဘယ်တော့မှမသတိပေးခဲ့ဘူးလား။"

"ဘာပဲဖြစ်ဖြစ် မင်းလိုတန်ဖိုးရှ်ိတဲ့သူ တစ်ယောက် ဒီလို သေသွားရတာနှမြောစရာကောင်းလို့ပါ"

"ငါတို့ရဲ့အသက်တွေကတော့ ဈေးပေါတယ်လို့ သတ်မှတ်ခံရတာကိုး။"

သူမ စကားပြောနေစဉ် အသံမှာ နူးညံ့နေသော်လည်း ရုတ်တရက် သူမ၏မျက်လုံးများတွင် ကြမ်းကြုတ်မှုများ တောက်ပလာပြီး သူမ၏ချွန်ထက်သော လက်ချောင်းများက ရွှေရောင်ခန္ဓာကိုယ်၏မေးရိုးထဲသို့ ပြင်းထန်စွာ ထိုးဖောက်ဝင်ရောက်သွားကာ ပေဆယ်ချီမြင့်မားသော ရွှေရောင်ခန္ဓာကိုယ်ကြီးကို သူမ၏သွယ်လျသော ခန္ဓာကိုယ်ဖြင့်ပင်လယ်ထဲမှ ဆွဲတင်လိုက်လေ၏။

"အသက်က ဈေးပေါတယ်လေ။ ဒါကြောင့် ဆုံးရှုံးရမှာကို မကြောက်ဘူး။"

"မင်းဂုဏ်ယူဝင့်ကြွားနေတဲ့ အရာတွေက ငါတို့ကို မခြောက်လှန့်နိုင်ဘူး"

သူမက ကြမ်းကြုတ်သောမျက်နှာအမူအရာဖြင့် လှောင်ပြုံးလိုက်လေသည်။

ပိုင်ယွီရှန်၏စူးရှသော စကားများကို နားထောင်ရင်း သူမ၏ပတ်လည်ရှိ မဟာနတ်ဆိုးများက စိတ်ကြွရူးသွပ်ဆေးထိုးသွင်းခံလိုက်ရသကဲ့သို့ မျက်လုံးများသွေးနီရောင်သန်းလာကြပြီး အရှေ့သို့ တစ်စုတစ်ရုံးတည်း တိုးဝင်လာကြ၏။

၎င်းမှာ ပြဿနာကိုဖြေရှင်းခြင်းထက် ဒေါသကို ဖွင့်ထုတ်ခြင်းနှင့် ပိုတူနေလေသည်။

သက်တံဖြူမသေမျိုးသုံးပါးက တစ်ချိန်က ကြီးမြတ်သောမသေမျိုးတစ်ပါးက သေမျိုးလောကတွင်စိုက်ပျိုးထားသည့် ရတနာသစ်ပင်တစ်ပင်ကိုခိုးယူခဲ့ဖူးပြီး ထိုလုပ်ရပ်ကို လုံးဝသဲလွန်စမကျန်အောင်လုပ်ဆောင်ခဲ့ပြီးနောက် ဘိဟိုင်တွင် ပုန်းအောင်းရန် ထွက်ပြေးလာခဲ့ကြခြင်းဖြစ်လေသည်။

ဤရတနာသစ်ပင်၏အသီးများကို အားကိုး၍ ၎င်းတို့ သုံးဦးစလုံးက အဆင့်ငါး ထိုက်ယီမသေမျိုးနယ်ပယ်သို့ အတူတကွတက်လှမ်းနိုင်ခဲ့ကြ၏။

ရတနာသစ်ပင်မှာ ညှိုးနွမ်းသွားပြီး အညှောက်များသာကျန်ရစ်ခဲ့ရာ ၎င်းတို့ကိုယုံကြည်ရသော လက်အောက်ငယ်သားအနည်းငယ်ထံ ခွဲဝေပေးပြီး နည်းလမ်းမျိုးစုံဖြင့် စိုက်ပျိုးစေခဲ့သည်။

ထို့အတူ လွန်ခဲ့သည့်ရက်အနည်းငယ်က ဤမသေမျိုးစစ်သူကြီးသတ်ဖြတ်လိုက်သည့် မြွေနတ်ဆိုးက သူတို့ထဲကတစ်ကောင်ဖြစ်ပြီး ထိုအညှောက်များထဲက တစ်ခုကိုမတော်တဆမြင်သွားခဲ့တာ ဖြစ်လေ၏။

အကယ်၍ ဤအရာကိုသာ မသေမျိုးခုံရုံးသို့ ပြန်လည် ယူဆောင်သွားပါက ကျယ်ပြောလှသော နတ်ဘုရားနယ်မြေတွင် ၎င်းတို့သုံးဦးအတွက် ရပ်တည်စရာနေရာ ရှိတော့မည် မဟုတ်ချေ။

နှစ်ပေါင်းများစွာကြိုးစားအားထုတ်ခဲ့မှုများမှာ မျက်စိတစ်မှိတ်အတွင်း ပျက်စီးသွားမည်ဖြစ်လေသည်။

ဤသေသင့်သောအရာကြောင့် အားလုံးဖြစ်ရခြင်းဖြစ်သည်။ နောက်ခံကောင်းရှိရုံဖြင့် စိတ်ကူးရှိတိုင်း လုပ်နိုင်သည်ဟုထင်နေခြင်းကြောင့်ဖြစ်လာရခြင်းဖြစ်သည်။

ဤသို့ဖြစ်လာပြီဖြစ်ရာ ယနေ့တွင် သေမျိုးလောက၌သူမ၏ရန်သူများအားကိုးနေသော ထင်ရှားကျော်ကြားလှသည့် နောက်ခံများဆိုသည်မှာ သေခြင်းရှင်ခြင်းကြားတိုက်ပွဲများမှတစ်ဆင့် ရုန်းကန်ထွက်ပေါ်လာခဲ့သော နတ်ဆိုးမျိုးနွယ်၏အမြင်တွင် ရယ်စရာကောင်းလောက်အောင် အဓိပ္ပာယ်မဲ့ကြောင်း သူ့ကိုမြင်တွေ့စေရပါလိမ့်မည်။

"..."

ချင်းဟွာသခင်မက တံဆိပ်တုံးကြီး အတွင်းရှိ နောက်ဆုံးကျန်ရှိနေသော စွမ်းအင်များကုန်ခမ်းသွားသည်ကို ခံစားလိုက်ရလေသည်။

အဆင့်ခြောက် မသေမျိုးတံဆိပ်တုံးတစ်ခုက သူမအား အလယ်အလတ်အဆင့် ကောင်းကင်ဘုံမသေမျိုးအဆင့် မသေမျိုးစွမ်းအားကိုသာ ထောက်ပံ့ပေးနိုင်ပြီး အစစ်အမှန် ထိုက်ယီမသေမျိုးတစ်ဦးကို ရင်ဆိုင်ရချိန်တွင် သူမအလွန်အားနည်းလွန်းနေလေသည်။

တံဆိပ်တုံးကြီးကို ဆုံးရှုံးသွားပြီးနောက် သူမ၏ကျန်ရှိနေသော ပေါင်းစည်းခြင်းနယ်ပယ်အဆင့်ကျင့်ကြံခြင်းက သူမအားချုပ်နှောင်နေစဉ်အတွင်း ရှီယန်က အတင်းအဓမ္မကျွေးခဲ့သော မသေမျိုးဆေးလုံးများမှ ရရှိထားခြင်းသာဖြစ်လေသည်။

သူမ မျက်လုံးများကို ဖွင့်ရန်ကြိုးစားလိုက်သော်လည်း သူမ၏အသိစိတ်များ တဖြည်းဖြည်း ဝေဝါးလာလေ၏။

ပိုင်ယွီရှန်က နောက်တစ်ကြိမ်အားစိုက်လိုက်ပြီး သူမ၏ခန္ဓာကိုယ် တစ်ခုလုံးကို အပြင်သို့လွှင့်ပစ်လိုက်သည်ကိုသာ သူမ ခံစားနိုင်တော့ပြီး တစ်ဖက်လူ၏အေးစက်သော အသံက သူမ၏နားထဲတွင် ပဲ့တင်ထပ်နေခဲ့၏။

"ခွဲဝေပြီး စားလိုက်ကြ"

နတ်ဆိုးများကြားတွင် နောက်လိုက်များမျှသာဖြစ်သော်လည်း ဤနေရာတွင် စုရုံးနေသော သက်ရှိတိုင်းက အသူရာပင်လယ်မှ ထင်ရှားသော ပုဂ္ဂိုလ်များဖြစ်ကြလေသည်။

၎င်းတို့၏အဆင့်အတန်းများမှာ သာမန် နတ်ဆိုးများနှင့် ကွဲပြားသွားခဲ့သည်မှာ ကြာမြင့်ပြီဖြစ်ပြီး သူတို့၏ကြမ်းကြုတ်သော အသွင်အပြင်များကို ရှားရှားပါးပါးသာထုတ်ဖော်ပြသလေ့ရှိကြ၏။

သို့သော် မသေမျိုးစစ်သူကြီး တစ်ဦးအား ကိုယ်တိုင်ကိုယ်ကျစားသုံးရမည့် သွေးဆောင်မှုနှင့် ရင်ဆိုင်ရချိန်တွင် သူတို့၏အသက်ရှူသံများ မလွဲမသွေ ပြင်းထန်လာလေသည်။

တစ်ဖက်လူကို စားသုံးခြင်းမှရရှိမည့် အကျိုးအမြတ်များနှင့် နှိုင်းယှဉ်ပါက ထိုစိတ်လှုပ်ရှားမှုခံစားချက်က ၎င်းတို့ကို အမှန်တကယ် စိတ်လှုပ်ရှားစေခဲ့ခြင်းဖြစ်လေသည်။

ယခုအခါ သုတ်သင်ရမည့်သူများအဖြစ် သတ်မှတ်ခံထားရပြီဖြစ်ရာ ၎င်းတို့၏နာမည်ဆိုးဖြင့် ကျော်ကြားပြီးသား ဂုဏ်သတင်းများတွင် နောက်ထပ်ရဲရင့်ပြီး အရောင်အသွေးစုံလင်သော မှတ်တမ်းတစ်ခုကို အဘယ်ကြောင့် မထည့်သွင်းရမည်နည်း။

"ဟက်"

ချင်းဟွာသခင်မက နံစော်နေသောအနံ့ဆိုးများကို ရှူရှိုက်မိနေပြီဖြစ်ပြီး သူမ၏ဝေဝါးနေသော အမြင်အာရုံတွင် အနက်ရောင်အရိပ်များစွာပြည့်နှက်လာလေသည်။

တစ်ကြိမ်သေဆုံးပြီးဖြစ်သော နတ်ဆိုးဝိညာဉ်တစ်ခုအနေဖြင့် သေခြင်းတရားကို မကြောက်ရွံ့သင့်ဟု သူမတွေးမိသော်လည်း နတ်ဆိုးအုပ်ကြီး ခုန်အုပ်လာသောအခါ ဓမ္မကိုယ်ထည်အတွင်းရှိ သူမ၏ အားနည်းသောခန္ဓာကိုယ်လေးကိုမနေနိုင်ဘဲ ကွေးထားလိုက်မိလေသည်။

သူမ၏သခင် ပေးသနားထားသော မသေမျိုးတံဆိပ်တုံးနှင့် အဆင့်အတန်းတို့၏ပိုမိုကြီးမားသောစွမ်းဆောင်ရည်များကို အသုံးချရန် သူမ အချိန်မရခဲ့ချေ။

အခြား နတ်ဆိုးဝိညာဉ် တစ်ခုခုသာဆိုလျှင် ပို၍ ကောင်းမွန်စွာစွမ်းဆောင်နိုင်မည်လောဟု တွေးတောမိလေသည်။

ထိုအချိန်မှာပင် ချင်းဟွာက သူမ၏မျက်စိရှေ့ရှိ အရိပ်များအားလုံးအေးခဲသွားသည်ကို တွေ့လိုက်ရ၏။

ထူထဲပြီးမာကျောသော နေရာတစ်ခုကို ဝင်တိုက်မိသွားသကဲ့သို့ဖြစ်နေလေသည်။

အဆုံးမဲ့ပင်လယ်ကြီးကြားတွင် လှိုင်းပုတ်သံများ ငြိမ်သက်သွားပြီး သဘာဝတရားတစ်ခုလုံး တိတ်ဆိတ်သွားခဲ့၏။

ခမ်းနားထည်ဝါသော ရွှေရောင်ပုံရိပ်တစ်ခုက အထက် မိုးပြာကောင်းကင်နှင့်အတူ ပင်လယ်ပြင်ပေါ်တွင်ရပ်နေပြီး ရွှေရောင်ခန္ဓာဓမ္မကိုယ်ထည်ကို လက်ထဲတွင် တိတ်ဆိတ်စွာကိုင်ဆောင်ထားလေသည်။

သူကသူ၏လက်ဖဝါးထဲရှိ သေးငယ်သော ပုံရိပ်လေးကို တည်ငြိမ်စွာငုံ့ကြည့်လိုက်ပြီး သူမ ပြင်းထန်စွာဒဏ်ရာမရထားကြောင်း အတည်ပြုပြီးနောက် သူ၏လက်ချောင်းများကို ဖြည်းညှင်းစွာ စုစည်းလိုက်ကာ သူ၏အရှေ့ရှိ များပြားလှသော ပုံရိပ်များဆီသို့အကြည့်များကို ပို့လွှတ်လိုက်လေသည်။

ရုတ်တရက်ထွက်ပေါ်လာသော ဤပုဂ္ဂိုလ်က မည်သူမည်ဝါဖြစ်ကြောင်း မကြေညာခဲ့ချေ။

သို့သော် လေထဲတွင်လွင့်မျောနေသော နတ်ဆိုးအုပ်ကြီးမှာ နာကျင်မှုကြောင့် မျက်နှာများတွန့်လိမ်သွားကြပြီး လှုံ့ဆော်မှုများကြောင့် ၎င်းတို့၏နှလုံးသားထဲတွင် တောက်လောင်လာခဲ့သော မကောင်းဆိုးဝါးမီးတောက်များမှာ ဤတောင့်တင်းပြီးခမ်းနားထည်ဝါသော ရွှေရောင်ပုံရိပ်ကို ရင်ဆိုင်ရချိန်တွင် ရေခဲရေဖြင့်ပက်လောင်းခံလိုက်ရသကဲ့သို့ ငြိမ်းအေးသွားလေသည်။

"ဗောဓိဂိုဏ်းက အာဟတ်ပဲ"

သူတို့ သရဲတစ္ဆေမြင်လိုက်ရသကဲ့သို့ပင်။ ဗောဓိဂိုဏ်းနှင့် မသေမျိုးသုံးပါးဂိုဏ်းတို့သည် ၎င်းတို့၏နယ်မြေများကို အမြဲတစေရှင်းလင်းစွာ ပိုင်းခြားထားလေ့ရှိပြီး တစ်ဦးနှင့်တစ်ဦး မည်သည့်အခါမျှကျူးကျော်ဝင်ရောက်လေ့မရှိကြချေ။

သို့သော် ရှန်းရွှီဘိုးဘေး၏တာအိုနယ်မြေ အတွင်းသို့ အာဟတ်တစ်ပါးရုတ်တရက် ရောက်ရှိလာသည်လော။

"ပြေးကြ"

မဟာနတ်ဆိုးတစ်ကောင်က ဟိန်းဟောက်လိုက်ရာ များပြားလှသောပုံရိပ်များက လေးကြိုးသံကြောင့် လန့်ဖြန့်သွားသောငှက်များအလား အရပ်မျက်နှာ အနှံ့အပြားသို့ ပြန့်ကျဲထွက်ပြေးသွားကြလေ၏။

အာဟတ်က လိုက်လံဖမ်းဆီးခြင်းမပြုသလို သူ၏ အကြည့်များတွင် အနည်းငယ်မျှပင်တုန်လှုပ်မှု မရှိခဲ့ချေ။

နောက်တစ်ခဏတွင် နဂါးနှင့်ကျား ဝိညာဉ်များက သူ၏ကြံ့ခိုင်သောခန္ဓာကိုယ်မှ ပေါက်ကွဲထွက်ပေါ်လာလေသည်။ အဆုံးမရှိသော နာကြည်းချက်များနှင့် သတ်ဖြတ်လိုသည့် ရည်ရွယ်ချက်များကို သယ်ဆောင်ထားသကဲ့သို့ဖြစ်နေသော ဤဝိညာဉ်ပုံရိပ်များက အာဟတ်၏ခန္ဓာကိုယ်မှ ချုပ်နှောင်မှုများကိုရုန်းထွက်လာခဲ့ပြီး မျက်စိတစ်မှိတ်အတွင်းမှာပင် ပတ်ဝန်းကျင်ရှိ ပင်လယ်ပြင်ကအေးခဲသွားမတတ် အေးစက်သွားလေသည်။

နဂါး၏မြည်ဟည်းသံနှင့် ကျား၏ဟိန်းဟောက်သံတို့မှာ နက်ရှိုင်းသောမိုးခြိမ်းသံများအလား ပဲ့တင်ထပ်သွားလေ၏။

ဝုန်း

နေနှင့် ကောင်းကင်ကို ဖုံးကွယ်ထားသော အရိပ်ကြီးတစ်ခုက ကောင်းကင်ကိုလျင်မြန်စွာ ဖုံးအုပ်သွားပြီး ၎င်း၏ဧရာမ ပါးစပ်ကြီးကို ဟလိုက်ရာ မျက်တောင်တစ်ခတ်အတွင်း မိုးပြာကောင်းကင်မှာ လွတ်ဟာသွားလေတော့သည်။

ထွက်ပြေးရန် ပြန့်ကျဲသွားခဲ့သော ထိုပုံရိပ်များက တစ်ခါမျှပေါ်မလာခဲ့သကဲ့သို့ပင် ဖြစ်သွားလေ၏။

...

ဘိဟိုင်ကိုရောင်ပြန်ဟပ်နေသော ဆည်းဆာအလင်းရောင်အကြွင်းအကျန်များအကြား ရွှေရောင်အလင်းတန်းမိုးရေစက်များပြန့်ကျဲကျဆင်းလာသည်ကို စောင့်ကြည့်နေရင်းပိုင်ယွီရှန်က တံတွေးကို ခက်ခဲစွာမျိုချလိုက်လေ၏။

ဤမသေမျိုးစစ်သူကြီးတွင် ကြီးမားခိုင်မာသော နောက်ခံတစ်ခုရှိရမည်ကို သူမ သိထားသော်လည်း သူမအား ကာကွယ်ပေးမည့် အာဟတ်တစ်ပါး ရှိနေလိမ့်မည်ဟု သူမတစ်ခါမျှ မထင်မှတ်ထားခဲ့ချေ။

ဤကဲ့သို့သော ဆက်ဆံရေးမျိုးက... ဗောဓိသတ္တတစ်ပါးသာလျှင် ရရှိနိုင်သော အရာမျိုးဖြစ်လေသည်။

တိမ်တိုက်များနှင့် မြူခိုးများ နောက်ကွယ်တွင်။

ယဲ့ကျင်းက မှင်တက်စွာစိုက်ကြည့်နေမိလေသည်။ အစ်ကိုရှန်းတွင် ဗောဓိဂိုဏ်းနှင့် ဆက်သွယ်မှုများ ရှိကြောင်း သူမ သိထားသော်လည်း ဤဆက်သွယ်မှုများမှာ အလွန်အမင်းနက်ရှိုင်းလွန်းမနေဘူးလောဟု တွေးတောမိလေသည်။

အကယ်၍ တစ်ဖက်လူက လောကခရီးသည်တစ်ဦး ဖြစ်မည်ဆိုပါက တစ်မျိုးပင်။

သို့သော် အာဟတ်တစ်ပါးက နတ်ဆိုးသုတ်သင်ရေးဌာနသို့ ဝင်ရောက်လာသည်လော။

"အစ်မ"

"မမေးသင့်တာတွေ မမေးနဲ့"

ယဲ့လန်က လက်များကို အောက်ချလျက် ရပ်နေလေသည်။ အမှန်တကယ်တော့ သူမကိုယ်တိုင်လည်း ဤအရာကို မည်သို့ ရှင်းပြရမည်ကို မသိချေ။

ထို့ပြင် ပြီးခဲ့သည့်အကြိမ်က ရှန်းယီ စီးတော်ယာဉ်နှစ်ကောင်ကို သတ်ဖြတ်ခဲ့သည်ကို သူမ မြင်တွေ့ခဲ့ရစဉ်က သူကမသေမျိုးခုံရုံးအပေါ် အငြိုးအတေး ရှိနေသည်ဟု သူမယူဆထားခဲ့သော်လည်း ယခု အခြေအနေကဘာလဲဟု တွေးမိလေသည်။

ယဲ့လန်က ရွှေရောင်အာဟတ်ပုံရိပ်၏ ဆုပ်ကိုင်ထားသောညာဘက်လက်ဖဝါးဆီသို့ အကြည့်များကို လွှဲလိုက်လေသည်။

သူမ အထင်မမှားပါက ရှန်းယီ အလျင်စလို သွားရောက်ကယ်တင်ခဲ့သူမှာ မသေမျိုးစစ်သူကြီး တစ်ဦးဖြစ်သင့်သည် မဟုတ်လော။

ထပ်မံစဉ်းစားကြည့်ပါက ဘိဟိုင်တွင် တပ်စွဲထားသော ကောင်းကင်ဘုံစစ်သည်များနှင့် စစ်သူကြီးများက စစ်သူကြီး ချင်းလွမ်၏လက်အောက်ငယ်သားများ ဖြစ်ဖွယ်ရှိလေသည်။

ရှန်းယီက တစ်ဖက်လူ၏စီးတော်ယာဉ်ကို ကိုယ်တိုင်ကိုယ်ကျသတ်ဖြတ်ခဲ့ပြီး ယခုအခါ ထိုလက်အောက်ငယ်သား၏စစ်သည် သို့မဟုတ် စစ်သူကြီးကို သွားရောက် ကယ်တင်နေလေ၏။

ယဲ့လန် အသက်ကိုပြင်းပြင်းရှူလိုက်လေသည်။ ဤလူငယ်လေးနှင့် ပိုမို ရင်းနှီးလာသည်နှင့်အမျှ သူ၏ပတ်ဝန်းကျင်ရှိ လျှို့ဝှက်ချက်များကို သူမ ဖြေရှင်းနိုင်လိမ့်မည်ဟု သူမထင်မှတ်ထားခဲ့လေသည်။

သို့သော် အဘယ်ကြောင့် သူမပိုမြင်ရလေ ပို၍ ရှုပ်ထွေးလာလေဖြစ်နေရသနည်း။