စီနီယာအစ်မကျန်း၏ ထူးခြားသောဖြစ်စဉ်

ညနေဆည်းဆာအချိန်တွင် ချူလျန်သည် တောင်ကုန်းထိပ်သို့ ရောက်လာပြီး နေဝင်ဆည်းဆာနှင့် ညနေခင်းလေပြည်ကို ခံစားနေ၏။

သူသည် မြေပြင်ပေါ်တွင် ထိုင်ချလိုက်ကာ ကောင်းကင်အလင်းရောင်ကို မော့ကြည့်လိုက်လေသည်။

နေနှင့်လအလင်းရောင်တို့ အကူးအပြောင်းကြားမှ ဖြစ်ပေါ်လာသော ဝိညာဉ်အလင်းတစ်စက်ကို ခံစားရင်း သူက 'ဝိညာဉ်အလင်း သွေးသန့်စင်နည်းစနစ်' ၏ စက်ဝန်းလှည့်ပတ်မှုအတိုင်း အသက်ရှူသွင်းကာ ၎င်း၏ဝိညာဉ်စွမ်းအင်ကို ပေါင်းစပ်ရန် ကြိုးစားကြည့်၏။

လက်ထဲတွင် မည်သည့်မှော်ဝင်ပစ္စည်း သို့မဟုတ် တိုက်ပွဲဝင်ဝိညာဉ် ရှိနေပါစေ၊ မိမိကိုယ်ကိုယ် အစွမ်းထက်လာစေရန်က အရေးအကြီးဆုံး ဖြစ်ပေသည်။ အထူးသဖြင့် ခေါင်းကြီးအရုပ်လေးက အခြေခံကျင့်စဉ်များအတွက် အချိန်ကုန်သက်သာစေရန် ကူညီပေးထားရာ ထိုအချိန်များကို အသုံးချပြီး အခြားနေရာများတွင် ပိုမိုကြိုးစားရမည်သာ ဖြစ်သည်။

ဤသွေးသန့်စင်နည်းစနစ်က ရုပ်ခန္ဓာ၏ လျှို့ဝှက်ချက်များကို ဖော်ထုတ်ပေးနိုင်ပြီး အသုံးဝင်မှုများစွာ ရှိသောကြောင့် သေချာပေါက် အမိအရ ကျင့်ကြံရမည် ဖြစ်၏။

အခြားသော နယ်ပယ်များမှ ကျင့်ကြံခြင်းများနည်းတူ သွေးထဲရှိ ဝိညာဉ်စွမ်းအင်ကလည်း လေထဲမှ အလိုအလျောက် ဖြစ်တည်လာမည် မဟုတ်ချေ။ သွေးများကို ဝိညာဉ်စွမ်းအင် ဖြည့်တင်းပေးချင်ပါက အခြားနေရာမှ ရယူရပေမည်။

ယခင် 'နတ်ဘုရားသတ်ဖြတ်ခြင်း သွေးသန့်စင်မဟာပညာရပ်' ကဲ့သို့သော ကျင့်စဉ်မျိုးဆိုလျှင် အခြားသတ္တဝါများ၏ အသက်သွေးကြောမှ ဝိညာဉ်စွမ်းအင်ကို ရယူရခြင်းဖြစ်ပြီး ရိုးရှင်းမြန်ဆန်သော်လည်း စီနီယာအစ်ကိုယွမ်ကျိုး ပြောခဲ့သလိုပင် ဝဋ်ကြွေးကမ္မပြန်ခံရမည့် အားနည်းချက် ရှိသည်။

လက်ရှိ 'ဝိညာဉ်အလင်း သွေးသန့်စင်နည်းစနစ်' မှာမူ အနည်းငယ် နှေးကွေးသော်လည်း နေနှင့်လတို့၏ ဝိညာဉ်အလင်းကို ဖမ်းယူကာ သွေးထဲသို့ ပေါင်းစပ်ပေးရမည်ဖြစ်ပြီး အလွန်အမင်း သန့်စင်လှ၏။

တစ်နေ့တာအတွင်း ကျင့်ကြံရန် အကောင်းဆုံးအချိန်မှာ နေထွက်ချိန်မှ ပထမဆုံး နေရောင်ခြည်နှင့် နေဝင်ချိန်မှ ပထမဆုံး လရောင်တို့ပင် ဖြစ်လေသည်။

မျက်လုံးမှိတ်၍ အာရုံစူးစိုက်ကာ ဝိညာဉ်အာရုံကို ဖြန့်ကြက်ပြီး ကောင်းကင်နှင့်မြေကြီးကို ခံစားလိုက်၏။

မကြာမီမှာပင် ချူလျန်သည် ကောင်းကင်ယံထက်မှ အလွန်ကြီးမားကျယ်ပြန့်သော စွမ်းအားတစ်ခုနှင့် ထိုအလင်းတန်းကို ခံစားလိုက်ရတော့သည်။

ထိုအရာက လူသားများ ချဉ်းကပ်နိုင်သော စွမ်းအားမျိုး မဟုတ်ပေ။ သူသည် ထိုအလင်းရောင်ကို သူ၏ ဝိညာဉ်အာရုံပေါ်တွင် ရောင်ပြန်ဟပ်စေရန် ကြိုးစားရင်း အာဟာရဓာတ် အနည်းငယ်ကိုသာ ရယူနိုင်ပေသည်။

ထို့နောက် ကျင့်စဉ်ကို လှည့်ပတ်ကာ ထိုနတ်ဘုရားအလင်းတန်းမှ ရရှိလာသော ဝိညာဉ်စွမ်းအင်ကို သွေးများနှင့် ပေါင်းစပ်လိုက်၏။

သူ၏ မျက်နှာအမူအရာမှာ အလွန်အမင်း တည်ငြိမ်နေသော်လည်း ခန္ဓာကိုယ်ထဲတွင်မူ သွေးလေများ ဆူပွက်နေပြီး ပင်လယ်လှိုင်းတံပိုးများကဲ့သို့ တဖျန်းဖျန်း မြည်သံများ သဲ့သဲ့ထွက်ပေါ်နေလေသည်။

"ဟူး..."

အချိန်မည်မျှ ကြာသွားသည်မသိ၊ သူ မျက်လုံးပြန်ဖွင့်လာချိန်တွင် သက်ပြင်းရှည်ကြီးတစ်ခု ချလိုက်၏။

ဤသွေးသန့်စင်နည်းစနစ်ကို ကျင့်ကြံရသည့် လုပ်ငန်းစဉ်က တကယ်ကို နာကျင်စရာကောင်းလှသည်။ ဝိညာဉ်စွမ်းအင် အနည်းငယ်မျှ သွေးထဲသို့ ဝင်ရောက်သွားတိုင်း ခန္ဓာကိုယ်ကို အပ်တစ်ချောင်းဖြင့် ထိုးဖောက်ခံရသကဲ့သို့ ဖြစ်နေ၏။

ဖြစ်စဉ်တစ်လျှောက်လုံး ထိုအပ်က ခန္ဓာကိုယ်ထဲသို့ အဆက်မပြတ် ဝင်လိုက်ထွက်လိုက် ဖြစ်နေလေသည်။

ဤနာကျင်ရသော လုပ်ငန်းစဉ်ကြီး ရပ်တန့်သွားချိန်တွင် ချူလျန်သည် ချက်ချင်း သက်သာရာရသွားပြီး ခန္ဓာကိုယ်တစ်ခုလုံး ပေါ့ပါးလန်းဆန်းသွား၏။ နာကျင်မှု ရပ်တန့်သွား၍သာ မဟုတ်ဘဲ နာကျင်မှုအပြီးတွင် သူ၏ခန္ဓာကိုယ်ထဲသို့ သွက်လက်သော စွမ်းအင်တစ်ခု စီးဝင်လာသကဲ့သို့ ခံစားလိုက်ရသောကြောင့် ဖြစ်သည်။

ထို့အပြင် ၎င်းသည် ယခင်က တစ်ကြိမ်မျှ မထိတွေ့ဖူးသော နယ်ပယ်တစ်ခုလည်း ဖြစ်နေပေသည်။

'ဒီဟာက သွေးတွေကို ဝိညာဉ်စွမ်းအင် ဖြည့်သွင်းလိုက်ရတဲ့ ခံစားချက်ပဲလား...'

သူ၏ ညာဘက်လက်ညှိုးကို ဖြည်းညင်းစွာ ပြတ်ရှရာပေးလိုက်ပြီး သွေးတစ်စက် ချလိုက်၏။

ထိုသွေးစက်အနီရောင်ထဲတွင် ရွှေရောင်အနည်းငယ် ရောယှက်နေသည်ကို တွေ့လိုက်ရသည်။ မြေပြင်ပေါ်သို့ ကျသွားပြီးနောက် အနည်းငယ် လိမ့်သွားကာ မြေကြီးထဲသို့ စိမ့်ဝင်သွားပြီး 'ရှဲ' ဟူသော အသံတစ်သံ ထွက်ပေါ်လာလေသည်။

အလွန် ပူလောင်နေပုံရ၏။

ပထမဆုံးအကြိမ် ကျင့်ကြံရုံဖြင့် သိသာထင်ရှားသော ကွာခြားချက်ကို မြင်တွေ့နိုင်ခြင်းကပင် လွယ်ကူလှသည် မဟုတ်ချေ။ အချိန်ကြာမြင့်စွာ ဇွဲရှိရှိ ကျင့်ကြံသွားမည်ဆိုပါက ထိုနေ့က မြေကမ္ဘာတမန်တော်၏ အဆင့်သို့ ရောက်ရှိနိုင်မည်ဟု ယုံကြည်ရပြီး ထိုအချိန်ရောက်လျှင် သွေးတစ်လုတ် ထွေးထုတ်လိုက်ရုံဖြင့် စိတ်ကြိုက်ပုံစံ ပြောင်းလဲနိုင်ပေလိမ့်မည်။

ဤသည်ကလည်း အဆုံးသတ် မဟုတ်သေးပေ။

ဒဏ္ဍာရီများအရ 'သွေးတစ်စက်ဖြင့် ပြန်လည်မွေးဖွားခြင်း' ဟုခေါ်သော အင်မော်တယ်နည်းစနစ်တစ်ခု ရှိလေသည်။

လူတစ်ယောက် သေဆုံးသွားလျှင်တောင်မှ သွေးတစ်စက် ကျန်နေသေးသရွေ့ ဝိညာဉ်မပျောက်ကွယ်ဘဲ ပြန်လည်မွေးဖွားလာနိုင်ခြင်း ဖြစ်၏။ ဝိညာဉ်တစ်ခုလုံးကို အပ်နှင်းထားနိုင်သော ထိုသွေးတစ်စက်တွင် မည်မျှ ကြောက်မက်ဖွယ်ကောင်းသော ဝိညာဉ်စွမ်းအင်များ ပါဝင်နေမည်ကိုမူ မသိနိုင်ချေ။

ဤအချိန်တွင် မိုးချုပ်နေပြီ ဖြစ်သည်။

ဆက်ကျင့်ကြံလျှင်လည်း တိုးတက်မှုက အတော်လေး နှေးကွေးနေမည်ဖြစ်ရာ ချူလျန်သည် ထရပ်ကာ ပြန်ရန် ပြင်လိုက်၏။ သို့သော် မတ်တတ်ရပ်လိုက်သည်နှင့် တစ်ပြိုင်နက် အဝေးရှိ တောင်ထွတ်တစ်ခု၏ ထိပ်မှ တောက်ပသော ရောင်စုံအလင်းတန်းများက သူ၏အာရုံကို ဖမ်းစားသွားလေသည်။

ထိုနေရာတွင် ပင်လယ်လှိုင်းတံပိုးများသဖွယ် ဖြူလွလွ မြူခိုးများ ရစ်သိုင်းနေ၏။ ထိုလှိုင်းတံပိုးများအထက်တွင် ရွှေဖြူရောင် လုံးဝန်းသောအလင်းတန်းတစ်ခုက အထက်အောက် ပေါလောပေါ်နေလေသည်။

ပင်လယ်ပြင်ထက်မှ လမင်းကြီး ထွက်ပေါ်လာသကဲ့သို့ပင်။

ချူလျန်သည် ကြည့်ရင်း အနည်းငယ် အံ့သြသွား၏။

ဤသည်ကား...။

ချီပင်လယ် နက်နဲအမြုတေ။

...

"စီနီယာအစ်မကျန်းလား"

တစ်ချိန်တည်းမှာပင် ရှုတောင်ဂိုဏ်း၏ အခြားသော တောင်ထွတ်များတွင်လည်း အုတ်အော်သောင်းနင်း ဖြစ်သွားကြသည်။ ယခုလို ညအချိန်တွင် တိမ်ပင်လယ်ထက်၌ မြင့်မားစွာ ချိတ်ဆွဲထားသော ထိုထူးခြားသည့် ဖြစ်စဉ်ကြီးက အလွန်တရာ မျက်စိကျိန်းလောက်အောင် တောက်ပနေသည်။

အကန့်သတ်မဲ့နန်းတော်ရှေ့ရှိ ရင်ပြင်ပေါ်တွင် ပွဲကြည့်ရန် ထွက်လာကြသော ရှုတောင်တပည့် အများအပြား စုရုံးနေကြ၏။

"စီနီယာအစ်မကျန်း ဖြစ်ရမယ်။ ဒီထူးခြားတဲ့ဖြစ်စဉ်က... စတုတ္ထအဆင့်ရဲ့ ပြီးပြည့်စုံတဲ့ စက်ဝန်းလှည့်ပတ်မှုဆိုတာ သေချာတယ်"

တစ်စုံတစ်ယောက်က အံ့သြတကြီး အော်ပြောလိုက်သည်။

"သေချာပေါက်ပဲ"

နောက်တစ်ယောက်က ထောက်ခံလိုက်၏။

"ဟိုဘက်က ပီလော့တောင်ထွတ်ရဲ့ သစ်ပင်အိုကြီးရဲ့ အထက်မှာလေ။ စီနီယာအစ်မကျန်းကလွဲပြီး ဘယ်သူက စတုတ္ထအဆင့်မှာတင် ပြီးပြည့်စုံတဲ့ စက်ဝန်းလှည့်ပတ်မှုကို လုပ်နိုင်မှာလဲ"

"စတုတ္ထအဆင့်ရဲ့ ပြီးပြည့်စုံတဲ့ စက်ဝန်းလှည့်ပတ်မှုတဲ့။ ပဉ္စမအဆင့်နဲ့ အဝေးကြီး ဝေးတော့မှာ မဟုတ်ဘူး။ မကြာခင် ရောက်လာတော့မယ့် ရှုတောင်ဂိုဏ်းထိပ်သီးအစည်းအဝေးမှာ စီနီယာအစ်မကျန်းက ပထမနေရာကို ကြိုတင်ယူထားပြီးပြီပဲ"

"ငါတို့ရဲ့ ကျန်းကျန်းလေးက တကယ်ကို ကြိုးစားလွန်းတာပဲ"

အခြားတစ်ယောက်က စိတ်လှုပ်ရှားစွာဖြင့် ပြောလိုက်ပြန်သည်။ "ငါ သူ့ကို ပိုချစ်သွားပြီ"

သေချာပေါက် ဝမ်းနည်းသွားသူများလည်း ရှိလေသည်။

"ဒီလိုဆိုတော့ ငါတို့ကြားက ကွာဟချက်က ပိုကြီးသွားပြီပေါ့။ သူ့ကို လိုက်ဖို့က ပိုပြီး မျှော်လင့်ချက် မရှိတော့ဘူး"

"မင်းက အရင်ကတည်းက အိပ်မက်မက်နေတာပါကွာ"

တစ်စုံတစ်ယောက်က စိတ်ပျက်အောင် ပြောလိုက်၏။

"..."

တီးတိုးပြောဆိုနေကြသံများက တပည့်များသာမက တောင်ထွတ်သခင်များနှင့် ကောင်းကင်တက်လှမ်းတောင်ထွတ်မှ ရှုတောင်ဂိုဏ်း၏ ထိပ်ပိုင်းခေါင်းဆောင်များအထိပင် ဤမြင်ကွင်းကို သတိထားမိသွားကြပြီး ငေးကြည့်ရင်း တွေးတောနေကြတော့သည်။

ပြီးပြည့်စုံသော စက်ဝန်းလှည့်ပတ်မှု…။

၎င်းက ကျင့်စဉ်ကို ကျင့်ကြံရာတွင် အမြင့်ဆုံးအဆင့်သို့ ရောက်ရှိသွားခြင်းကို ကိုယ်စားပြုပြီး အလွန် ရှားပါးလှသည်။

စတုတ္ထအဆင့်ရှိ ပြီးပြည့်စုံသော စက်ဝန်းလှည့်ပတ်မှုသည် ရှုတောင်ဂိုဏ်း၏ နှစ်ထောင်ပေါင်းများစွာ သမိုင်းတစ်လျှောက်တွင် လူနှစ်ယောက်သာ ပေါ်ပေါက်ခဲ့ဖူး၏။

ထိုလူနှစ်ယောက်စလုံးသည် သူတို့၏ ခေတ်ကာလများတွင် ကျော်ကြားလှသော ပြိုင်ဘက်ကင်း ပါရမီရှင်များ ဖြစ်ခဲ့ကြသည်။

ယခုမူ ကျဆင်းနေသော ဤရှုတောင်ခေတ်တွင် တတိယမြောက်လူတစ်ယောက် ထပ်မံပေါ်ပေါက်လာခဲ့ပြီ ဖြစ်သည်။

"နဂါးစစ်စစ် ရောက်လာတဲ့ ကံကြမ္မာက တကယ်တော့ သူမအပေါ်မှာ ကျရောက်နေတာလား"

"စီနီယာအစ်မကျန်းက ငါ့ရဲ့ စက္ကူကြိုးကြာငှက်ကို စာမပြန်တာ မဆန်းပါဘူး။ တကယ်တော့ တံခါးပိတ် ကျင့်ကြံနေတာကိုး"

ထိုလူမှာ ချူလျန် ဖြစ်၏။

သူက ငွေဓားတောင်ထွတ်မှနေ၍ တစ်ဖက်သို့ လှမ်းကြည့်လိုက်ရာ ထိုနေရာသည် ပီလော့တောင်ထွတ်ဖြစ်ကြောင်း အလိုအလျောက်သိလိုက်ပြီး ကျန်းယွဲ့ပိုင်က စတုတ္ထအဆင့်၏ ပြီးပြည့်စုံသော စက်ဝန်းလှည့်ပတ်မှုကို ဖြစ်ပေါ်စေခဲ့ခြင်းဖြစ်မှန်း တစ်ချက်တည်းနှင့် ခန့်မှန်းမိသွားလေသည်။

အခြားသူများနှင့်မတူဘဲ ချူလျန်သည် ပြီးပြည့်စုံသော စက်ဝန်းလှည့်ပတ်မှုကို ကြုံတွေ့ဖူးသူ ဖြစ်သည်။

ထို့ကြောင့် ၎င်းက မည်မျှခက်ခဲကြောင်း သူ သိပေသည်။

အကယ်၍ ရွှဲ့လင်းရွှယ်၏ အစွမ်းထက်သော အထောက်အကူပြု တေးဂီတသာ မပါဝင်ခဲ့ပါက သူသည် တစ်သက်လုံး ပြီးပြည့်စုံသော စက်ဝန်းလှည့်ပတ်မှု၏ အစွန်းအဖျားကိုပင် ထိတွေ့နိုင်မည် မဟုတ်ချေ။

သို့သော် ကျန်းယွဲ့ပိုင်ကမူ သူမဘာသာ လုပ်ဆောင်နိုင်ခဲ့သည်။

တကယ်ကို အစွမ်းထက်လှပေသည်။

၎င်းတွင် အင်မော်တယ်ဝိညာဉ်ခန္ဓာကိုယ်၏ အကူအညီကလည်း မပါမဖြစ် ဖြစ်ပေလိမ့်မည်။

လွန်ခဲ့သော အချိန်အတန်ကြာက ချူလျန်သည် မိသားစုကြီးသုံးခုနှင့် ဆက်သွယ်ခဲ့ဖူးရာ ၎င်းအကြောင်းကို အထူးတလည် လေ့လာခဲ့ဖူး၏။

ရှမိသားစု၏ နတ်မီးတောက်ကံကြမ္မာမှာ အသန့်စင်ဆုံးဖြစ်ပြီး မီးဓာတ်ကို အားဖြည့်ပေးကာ အတိုင်းအတာတစ်ခုအထိ ပြင်းထန်လာသည်နှင့် ထူးခြားဆန်းကြယ်သည့် စွမ်းရည်တစ်ခု ဖြစ်လာသည်။

ကျီမိသားစု၏ ရွှမ်ယွမ်မျက်လုံးများမှာမူ အရှုပ်ထွေးဆုံးဖြစ်ပြီး ကွဲပြားသော မျက်လုံးအရောင် ခုနစ်မျိုးရှိရုံသာမက မျက်လုံးအရောင်တစ်ခုစီတွင် အခြေခံစွမ်းရည်များ ရှိပြီး ကျင့်ကြံမှုအဆင့် မြင့်မားလာသည်နှင့်အမျှ နောက်ဆက်တွဲ တိုးတက်မှုများလည်း ရှိလေသည်။

ကျန်းမိသားစု၏ အင်မော်တယ်ဝိညာဉ်ခန္ဓာကိုယ်မှာမူ အဆန်းကြယ်ဆုံး ဖြစ်ပေသည်။

ယနေ့တိုင် အင်မော်တယ်ဝိညာဉ်ခန္ဓာကိုယ်၏ စွမ်းရည်အားလုံးကို မည်သူမျှ မသိရှိကြသေးပေ။ လက်ရှိ သိထားရသလောက်ဆိုလျှင် ဝိညာဉ်သားရဲများနှင့် ရင်းနှီးမှု၊ ဓာတ်ကြီးများနှင့် ရင်းနှီးမှု၊ မဟာတာအိုနှင့် ရင်းနှီးမှု စသည်တို့ ပါဝင်သည်။

အချုပ်အားဖြင့်ဆိုရလျှင် ကောင်းကင်နှင့်မြေကြီး၏ ဝိညာဉ်စွမ်းအင်များ၏ နှစ်သက်မြတ်နိုးမှုကို ခံရခြင်းပင် ဖြစ်၏။

မှော်ပညာရပ်များကိုဖြစ်စေ၊ ကျင့်စဉ်များကိုဖြစ်စေ ကျင့်ကြံရာတွင် တစ်ဝက်လုပ်ရုံဖြင့် နှစ်ဆအကျိုးရကာ ဆယ်ဆ၊ အဆတစ်ရာပင် ဖြစ်နိုင်ပေသည်။ သွေးလေများထဲတွင် အင်မော်တယ်ဝိညာဉ် အငွေ့အသက်များ စီးဆင်းနေပြီး အဆုံးမရှိသော အသုံးဝင်မှုများ ရှိလေသည်။

အားနည်းချက်မှာမူ မိစ္ဆာများနှင့် မကောင်းဆိုးဝါးများ၏ တပ်မက်မှုကို ခံရတတ်ပြီး ကြီးပြင်းလာသည့် လုပ်ငန်းစဉ်တစ်လျှောက်တွင် အန္တရာယ်များပြားလှခြင်းပင် ဖြစ်သည်။

အင်မော်တယ်ဝိညာဉ်ခန္ဓာကိုယ်သည် အရှားပါးဆုံးဖြစ်သောကြောင့် အစွမ်းအထက်ဆုံး ဖြစ်သင့်သည်ဟူသော အဆိုတစ်ခုလည်း ရှိပေသည်။

ရှေးခေတ်ကာလများမှစ၍ မျိုးဆက်တစ်ခုစီတိုင်းတွင် ရွှမ်ယွမ်မျက်လုံး ဆယ်ယောက်၊ နတ်မီးတောက်ကံကြမ္မာ ငါးယောက် မွေးဖွားလာခဲ့လျှင် အင်မော်တယ်ဝိညာဉ်ခန္ဓာကိုယ် တစ်ယောက် သို့မဟုတ် နှစ်ယောက်သာ ရှိတတ်ပေသည်။

သို့သော်။

အင်မော်တယ်ဝိညာဉ်ခန္ဓာကိုယ် ဖြစ်နေလျှင်တောင်မှ လူတိုင်းက ပြီးပြည့်စုံသော စက်ဝန်းလှည့်ပတ်မှုကို လုပ်ဆောင်နိုင်စွမ်း မရှိကြပေ။

စီနီယာအစ်မကျန်းကမူ လုပ်ဆောင်နိုင်ခဲ့ရာ ခန္ဓာကိုယ်အခြေအနေကို ဘေးဖယ်ထားလျှင်တောင် သူမ၏ ပါရမီက ထူးချွန်ပြောင်မြောက်ဆဲဖြစ်ပြီး တစ်ကြိမ်တစ်ခါမျှ ပျင်းရိခဲ့ခြင်း မရှိကြောင်း ဖော်ပြနေပေသည်။

ဤသည်က အတိအကျပင်။

ကိုယ့်ထက် ထူးချွန်တဲ့သူက ကိုယ့်ထက် ပိုလှ... အဲလေ၊ ကိုယ့်ထက် ပိုကြိုးစားနေတယ်ဆိုတာမျိုးပင် ဖြစ်၏။

ချူလျန်သည် လက်သီးကို ဖွဖွဆုပ်လိုက်မိပြီး တစ်စုံတစ်ရာကို နားလည်သဘောပေါက်သွားပုံ ရလေသည်။

တကယ်တမ်း သူ မသိခဲ့သည်မှာ ကျန်းယွဲ့ပိုင်သည် ယခင်က ကျင့်ကြံမှုအပေါ် ရောင့်ရဲတင်းတိမ်နေခဲ့သော်လည်း ချူလျန်၏ အံ့မခန်း တိုးတက်လာမှုကို မြင်တွေ့ပြီးနောက်မှသာ အန္တရာယ်ရှိနေပြီဟု ခံစားခဲ့ရခြင်း ဖြစ်သည်။

ထို့ကြောင့်ပင် ယခုလို တံခါးပိတ်ကျင့်ကြံကာ ကျင့်စဉ်များကို လေ့လာစူးစမ်းခဲ့ပြီး ရှေ့ဆက်တိုးလာကာ ယနေ့၏ ဟိုးလေးတကျော် ဖြစ်ရပ်ကြီးကို ဖန်တီးနိုင်ခဲ့ခြင်း ဖြစ်၏။

သူ့အတွက်ကြောင့်သာ ပျင်းရိရန် မဝံ့ရဲခဲ့ခြင်းဖြစ်သည်ဟု ဆိုရပေမည်။

"ဒါကို ကောင်းကင်ဘုံက ကြိုးစားသူကို မျက်နှာသာပေးတယ်လို့ ခေါ်တာပေါ့..."

ချူလျန်က သူ့ဘာသာသူ ရေရွတ်လိုက်၏။

"ငါတို့ ကျင့်ကြံသူတွေရဲ့ လမ်းခရီးက ရှည်လျားပြီး တိုးတက်မှုတွေက အဆုံးအစမရှိဘူး။ အချိန်တိုင်း သတိထားပြီး တစ်စက္ကန့်လေးတောင် အလွတ်မပေးဖို့ မှတ်ထားရမယ်။ စီနီယာအစ်မကျန်းတောင် ဒီလောက် ကြိုးစားနေတာ၊ ငါလည်း သေချာပေါက် နှစ်ဆပိုကြိုးစားမှ ရတော့မယ်"

ပြင်းပြသော တိုက်ပွဲဝင်စိတ်ဓာတ်များက ရင်ဘတ်ထဲတွင် ချက်ချင်း ပြည့်လျှံလာတော့သည်။

"ခေါင်းကြီးအရုပ်လေးရေ... သေမတတ် လှည့်ပေးလိုက်စမ်းကွာ"