ချစ်ခြင်းမေတ္တာ ပြည့်ဝတဲ့ မိသားစုလေး

ချီယန်ကို နှုတ်ဆက်ပြီးနောက် လီယွမ်သည် ဝါးတောလေးဆီသို့ ပြန်လာခဲ့သည်။

လင်းရှောင်ဓားဂိုဏ်းမှ ပါရမီရှင် သုံးဦးသည်လည်း (၁၂) ဂူစံအိမ်တွင် ရက်အနည်းငယ် ဆက်လက်နေထိုင်ကြပြီး နတ်ဆိုးများ၏ အခြေအနေကို လေ့လာကာ နတ်ဆိုးများကို သတ်ဖြတ်ပြီး ကြီးမြတ်သော လုပ်ရပ်များ လုပ်ဆောင်ရန် ကတိပြုထားကြသည်။

ညဇီးကွက်ဘုရင်၏ အစီအစဉ်က အလယ်ပိုင်းဒေသကို ငြိမ်းချမ်းစေပြီး နယ်စပ်ဒေသများတွင် ကမောက်ကမဖြစ်အောင် ဖန်တီးခဲ့ကတည်းက အလယ်ပိုင်းဒေသမှ သူရဲကောင်းများက နယ်စပ်ဒေသများဆီသို့ စွန့်စား သွားရောက်ခဲ့ကြပြီးနောက် "ဧကရာဇ်တွေက ရက်စက်ကြပေမယ့် ပြည်သူတွေကတော့ တရားမျှတကြပါတယ်" ဆိုသည့် စကားက နေရာအနှံ့ ရေပန်းစားသွားခဲ့သည်။

"ဧကရာဇ်တွေက ရက်စက်ကြတယ်...အဟား.. ဒီစကားက ငါ့ကို အတိအကျ ဖော်ပြနေတာပဲ.."

လီယွမ်က ကိုယ့်ကိုယ်ကိုယ် လှောင်သလို ရယ်လိုက်၏။

သူ့တွင် သူရဲကောင်းတစ်ယောက်လို အသေခံမည့် ရည်ရွယ်ချက် လုံးဝမရှိပေ။ သူက ကိုယ့်ကိုယ်ကိုယ် ကာကွယ်ရန် ပိုမိုနှစ်သက်ပြီး အစွမ်းထက်လာပါက လောကကြီးကို စိုးမိုးရန် အားနည်းနေချိန်တွင် တိတ်တဆိတ် စွမ်းအားများ စုဆောင်းရန်သာ ရည်ရွယ်ထားသည်။

လျှို့ဝှက်နေရာသို့ ရောက်ရှိလာချိန်။

လီယွမ်က မကြာသေးမီကမှ ရရှိထားသော ဒေါင်းနတ်သမီးနှင့် ရွှေနီရောင် ကျားသစ်နတ်ဆိုးတို့၏ ရုပ်အလောင်းများကို ထုတ်ယူလိုက်၏။ ၎င်းတို့မှာ သူ၏ ယခုအချိန်အထိ အဖိုးတန်ဆုံးသော စုဆောင်းမှုဖြစ်သည့် အပြည့်အစုံရှိသော နတ်ဆိုးတပိုင်း သူတော်စင် အဆင့် ရုပ်အလောင်း နှစ်ခု ဖြစ်၏။

"အလောင်းကောင်ရုပ်သေးအဖြစ် ဖန်တီးရမလား ဒါမှမဟုတ် ခွဲခြမ်းစိတ်ဖြာပြီး ကူကောင် မွေးမြူရမလား.."

အရင်တိုက်ပွဲတွင် ဆင်နတ်ဆိုး တပိုင်း သူတော်စင် အဆင့်၏ ရုပ်သေးရုပ် ပျက်စီးသွားခဲ့ပြီး ဝူမေ့ပင်လျှင် ဒဏ်ရာရရှိခဲ့သည်။ ထို့ကြောင့် လီယွမ်၏ စိတ်ထဲတွင် ရုပ်သေးများ ဖန်တီးခြင်း၏ အရေးပါမှုက များစွာ လျော့ကျသွားတော့၏။

ဤကူလမ်းစဉ်က အားနည်းသူများကို အနိုင်ကျင့်ရန်နှင့် အရေအတွက်ဖြင့် တိုက်ခိုက်ရန်သာ အသုံးဝင်ပြီး အဆင့်မြင့် တိုက်ပွဲများတွင်တော့ အဆင့်မမီတော့ပေ။

ပင်မရုပ်အလောင်းကို သန့်စင်နေခြင်း မဟုတ်ပါက

စစ်မှန်သော ရုပ်အလောင်းကူကောင်နှင့် အလောင်းကောင်ရုပ်သေးတို့ကြား ကွာဟချက်က ဓားနတ်သမီးနှင့် နတ်ဆိုးရုပ်သေးတပ်ဖွဲ့တို့ကြား ကွာဟချက်ကဲ့သို့ အလွန်ကြီးမားလှပြီး နှိုင်းယှဉ်၍ပင် မရနိုင်ပေ။

"ခန္ဓာကိုယ်တစ်ခုကို သိမ်းထားပြီး နောက်တစ်ခုကို ခွဲခြမ်းလိုက်မယ်"

များစွာ စဉ်းစားပြီးနောက် လီယွမ်က ပိုမိုသန်မာသော ရုပ်ပိုင်းဆိုင်ရာ ခန္ဓာကိုယ်ရှိသည့် ရွှေနီရောင် ကျားသစ်နတ်ဆိုးကို ရုပ်သေးအဖြစ် ပြောင်းလဲကာ နတ်ဆိုးရုပ်သေးတပ်ဖွဲ့၏ တပ်မှူးအသစ်အဖြစ် ခန့်အပ်ရန် ဆုံးဖြတ်လိုက်၏။

ဒေါင်းနတ်သမီးကိုမူ အဖိုးတန်ပစ္စည်းများအဖြစ် ခွဲခြမ်းလိုက်ပြီး ကူကောင်များကို သန့်စင်ရာတွင် ပိုမိုအသုံးဝင်စေရန် ရည်ရွယ်လိုက်၏။

လီယွမ်က နတ်ဆိုးရုပ်အလောင်းများကို ခွဲခြမ်းစိတ်ဖြာရာတွင် အလွန် ကျွမ်းကျင်နေပြီ ဖြစ်၏။ ရှောင်ချိုက်၏ အကူအညီဖြင့် သူတို့နှစ်ဦးက ဒေါင်းနတ်ဆိုးမကို အစိတ်အပိုင်း ဒါဇင်ပေါင်းများစွာအဖြစ် လျင်မြန်စွာ ခွဲခြမ်းလိုက်ကြသည်။

ဒဏ်ရာသက်သာသွားပြီဖြစ်သော ဝူမေ့ကလည်း ရွှေနီရောင် ကျားသစ်နတ်ဆိုးကို ရုပ်သေးအဖြစ် စတင် ဖန်တီးနေပြီ ဖြစ်၏။

[ရောင်စုံဒေါင်းအမွှေးအတောင် ဒေါင်းနတ်ဆိုးမျိုးနွယ်စုတွင် အဖိုးတန်ဆုံးသော အမွှေးအတောင်ဖြစ်ပြီး မြင့်မြတ်သော အလင်းတန်းများကို ထုတ်လွှတ်နိုင်ကာ သက်ရှိများ၏ ခုခံကာကွယ်မှုစွမ်းရည်များကို လျှော့ချပေးနိုင်သည်။ အခြားမျိုးနွယ်စုများ အသုံးပြု၍ မရနိုင်ပါ..]

[ပုံစံပြောင်းအရောင်စုံ မျက်လုံးများ အလွန်နည်းပါးသော ဒေါင်းနတ်ဆိုးမျိုးနွယ်စုများသာ ဖွံ့ဖြိုးနိုင်သော ထူးခြားသည့် မျက်လုံးတစ်မျိုးဖြစ်ပြီး ကောင်းကင်ဝိညာဉ် အမွှေးအတောင်ဝတ်ရုံကို ပုံဖော်နိုင်စွမ်း ရှိသည်။]

[ဒေါင်းရိုင်းကျောက်...]

လီယွမ်က သူ၏ စိတ်အာရုံကို စူးစိုက်ကာ ပစ္စည်းများအားလုံး၏ လုပ်ဆောင်ချက်များနှင့် သဘာဝများကို ခွဲခြားသိမြင်လိုက်ပြီး ၎င်းတို့ကို နှစ်ပိုင်းခွဲလိုက်၏။

တစ်ပိုင်းကို ချီစွမ်းအင်ရရှိရန် ကြိုးစားရာတွင် အသုံးပြုပြီး ထိုမှတစ်ဆင့် ရှားပါးကူကောင်များနှင့် ထူးခြားကူကောင်များကို ဖန်တီးရန် ရည်ရွယ်ထားသလို၊ သဘာဝတူညီသော အခြားတစ်ပိုင်းကိုမူ အိပ်မက်ပိုးကောင်ကဲ့သို့ ရှားပါးကူကောင်၏ အရင်းအမြစ်များကို မွေးမြူရန် အသုံးပြုမည် ဖြစ်၏။

[ မူလပစ္စည်းများကို ရွေးချယ်ပါ.. ]

[ ပဉ္စမအဆင့် ရွှမ်ငှက်ပိုးကောင် (၃) ကောင် ဒေါင်းသွေးနှင့် နီရဲသော နတ်ဆိုးအမွှေးအတောင်တို့ကို ပေါင်းထည့်ပါ.. ]

[ ဖန်တီးနေသည်... ]

[ သင်သည် ဆဌမအဆင့် ရွှမ်ငှက်၊ အရောင်သုံးမျိုးရှိသော ငှက်ကူကောင်ကို ရရှိပါပြီ.. ]

"ထပ်စမ်းမယ်"

[ မူလပစ္စည်းများကို ရွေးချယ်ပါ.. ]

[ ပဉ္စမအဆင့် အသွင်ပြောင်းကူကောင် ဓားစိတ်ဆန္ဒပိုးကောင် (၃) ကောင်၊ ဒေါင်းအရိုးနှင့် ဝိညာဉ်အနှစ်သာရတို့ကို ပေါင်းထည့်ပါ.. ]

[ ဖန်တီးနေသည်... ]

[ သင်သည် ဆဌမအဆင့် ရှားပါးကူကောင် အမည်းရောင် ဓားအရိုးကူကောင်ကို ရရှိပါပြီ.. ]

"ရှားပါးကူကောင်လား.."

လီယွမ်က အမည်းရောင်အိုးကို ဖွင့်ကြည့်လိုက်ရာ ရှည်လျားမည်းနက်ပြီး အရိုးစုနှင့်တူသော ပိုးကောင်တစ်ကောင် တွားသွားနေသည်ကို တွေ့လိုက်ရပြီး ၎င်း၏ အသွင်အပြင်မှာ အလွန် ကြောက်မက်ဖွယ် ကောင်းနေသည်။

"အရမ်း ရုပ်ဆိုးတာပဲ.."

"ဒါပေမဲ့... ဒါက ထူးခြားကူကောင်ကို ဖန်တီးဖို့ နောက်ထပ် အခွင့်အရေးတစ်ခုပဲ.."

'ချမ်းသာ' လာပြီးနောက် လီယွမ်က ထူးခြားကူကောင်တစ်ခု ရရှိရန် မျှော်လင့်ချက်ဖြင့် ပိုလျှံနေသော ရှားပါးကူကောင်များအားလုံးကို ပြန်လည်ပေါင်းစပ်ဖန်တီးရန် ရွေးချယ်လေ့ရှိသည်။

သို့သော် ချွင်းချက်မရှိဘဲ အားလုံး ကျရှုံးခဲ့သည်။

သူ လက်ရှိပိုင်ဆိုင်ထားသော ထူးခြားကူကောင်ကြီး နှစ်ကောင်ဖြစ်သည့် ပြန်လည်ရှင်သန်ခြင်းကူကောင်နှင့် မျက်နှာတစ်ထောင်ကူကောင်တို့ နှစ်ခုစလုံးမှာ ကံကြမ္မာနှင့် ပတ်သက်နေသည်။ ကောင်းကင်ဘုံကို ဆန့်ကျင်သော ထူးခြားကူကောင်များကို ရှားပါးပြီး အဖိုးတန်သော ရတနာများကို အသုံးပြု၍ ဖန်တီးထားခြင်း ဖြစ်၏။

"နောက်တစ်ခါ ထပ်စမ်းမယ်"

လီယွမ်က အသက်ပြင်းပြင်း တစ်ချက်ရှူလိုက်၏။

[ မူလပစ္စည်းများကို ရွေးချယ်ပါ.. ]

[ ရှားပါးကူကောင် အမည်းရောင် ဓားအရိုးကူကောင်၊ ရှားပါးကူကောင် အတောင်လေးဖက်ရွှေပုစဉ်းရင်ကွဲ၊ ရှားပါးကူကောင် အသက်စွမ်းအင်ကူကောင်၊ သတ္တမအဆင့် ဒေါင်းနတ်ဆိုးမ၏ သလင်းကျောက်အမြုတေ၊ ပုံစံပြောင်းအရောင်စုံ မျက်လုံးများနှင့် နတ်ဆိုးနှလုံးသွေးတို့ကို ပေါင်းထည့်ပါ.. ]

[ ဖန်တီးနေသည်... ]

အမည်းရောင်အိုးက တုန်ခါသွားပြီး သွေးရောင်အလင်းတန်းများ အမြောက်အမြား ထွက်ပေါ်လာသည်။

[ သင်သည် ရှားပါးကူကောင် သွေးဘီးကူကောင်ကို ရရှိပါပြီ.. ]

[ သွေးဘီးကူကောင်၊ အလွန် ရှားပါးလှသော ကပ်ပါးကူကောင်များထဲမှ တစ်ခု။ ၎င်းကို ဖန်တီးရခြင်း၏ တန်ဖိုးမှာ မျက်စိကွယ်ခြင်း ဖြစ်၏။ ပင်မကူသခင်များအနေဖြင့် အမြင်အာရုံမှလွဲ၍ လူစွမ်းအားရှင် အာရုံခံစားမှုများ အားလုံးကို ရရှိမည်ဖြစ်ပြီး အခြားသူများ၏ စွမ်းရည်များကို သွေးဖြင့် ကူးယူနိုင်စွမ်းနှင့် ကိုယ့်ကိုယ်ကိုယ် ကာကွယ်ရန် သွေးမိစ္ဆာများကို ဆင့်ခေါ်နိုင်စွမ်းတို့ ရရှိမည် ဖြစ်၏။ ]

"ဟင်"

လီယွမ်က အံ့အားသင့်သွားသည်။

"ဒါက ရှောင်ကျောက်ရဲ့ သွေးမျက်လုံးကူကောင်နဲ့ ဘာဖြစ်လို့ ဒီလောက်တောင် တူနေရတာလဲ စွမ်းရည်တွေကလည်း လုံးဝနီးပါး အတူတူပဲ.."

ထူးခြားကူကောင်ကို မရရှိခဲ့သော်လည်း မမျှော်လင့်ထားသော အံ့အားသင့်စရာတစ်ခုကိုတော့ ရရှိခဲ့သည်။

သွေးဘီးကူကောင်က သွေးမျက်လုံးကူကောင်ထက် ပိုမိုသာလွန်သော ကူကောင်ဖြစ်ကြောင်း ထင်ရှားနေသည်။ နှစ်ခုစလုံးက ရှားပါးကူကောင်များ ဖြစ်ကြသော်လည်း ယခင်အရာက နောက်အရာကို အပြည့်အဝ အစားထိုးနိုင်သည်။

ဧရာမဝိညာဉ်ကူကောင်နှင့် ဧရာမကူကောင်တို့ကြား ဆက်နွှယ်မှုကဲ့သို့ပင် ဖြစ်၏။

"ရှောင်ကျောက်အတွက်ဆိုရင်တော့ အတိုင်းထက်အလွန်ပဲ ဒါပေမဲ့..."

ရှောင်ကျောက်က သွေးမျက်လုံးကူကောင်ကို ပေါင်းစပ်ဖန်တီးထားပြီးဖြစ်ရာ အစားထိုးရန် ခက်ခဲသည်။ တစ်ခုတည်းသော ရွေးချယ်စရာမှာ သွေးမျက်လုံးကူကောင်အား သွေးဘီးကူကောင်ကို ဝါးမျိုခွင့်ပေးရန်ဖြစ်ပြီး ၎င်းက သွေးမျက်လုံးကူကောင်ကို အသွင်ပြောင်းကာ ဆင့်ကဲပြောင်းလဲစေနိုင်ပေလိမ့်မည်။

လီယွမ်က သွေးဘီးကူကောင်ကို ဂရုတစိုက် သိမ်းဆည်းလိုက်ပြီး ဆက်လက် ပေါင်းစပ်ဖန်တီးနေသည်။

မျက်စိတစ်မှိတ်အတွင်းမှာပင် နောက်ထပ် သုံးရက် ကုန်လွန်သွားခဲ့လေပြီ။

ဒေါင်းနတ်ဆိုး၏ ရုပ်အလောင်းမှာ ပြာအဖြစ် လောင်ကျွမ်းသွားပြီး ဘာမှ မကျန်ရစ်တော့သလို သိသာထင်ရှားသော အကျိုးအမြတ်လည်း ထပ်မံ မရရှိခဲ့တော့ပေ။

"ကံကောင်းလို့ ရှောင်ကျောက်ကို ကူညီနိုင်ခဲ့တာ မဟုတ်ရင် ရှုံးသွားမှာပဲ.."

လီယွမ်တွင် ယုံကြည်စိတ်ချရသူ အများအပြား မရှိပေ။ လက်ရှိတွင် ပင်မကူကောင်များအပြင် ရှောင်ကျောက်က တစ်ဦးတည်းသော သူဖြစ်ရာ သူမကို တတ်နိုင်သမျှ ကူညီပေးမည်သာ ဖြစ်၏။

"ဪ... ဟုတ်သားပဲ.."

သူ့ထံတွင် အခြားအရာတစ်ခု ရှိသေးကြောင်းကို သူ ရုတ်တရက် သတိရသွားသည်။

အလွန် အဖိုးတန်သော နတ်ဘုရားပစ္စည်း တစ်ခု။

၎င်း၏ တန်ဖိုးက အင်မော်တယ်မြက်ပင် သို့မဟုတ် အိပ်မက်သစ်ပင်ကဲ့သို့သော ကမ္ဘာ့အဖိုးတန်ဆုံး ရတနာများနှင့် မယှဉ်နိုင်သော်လည်း တန်ဖိုး သိပ်မလျော့လှပေ။

၎င်းမှာ အဒေါ်ဖြစ်သူ အန်းမူယောင် ပေးခဲ့သော ချီလင်ပုလဲပင် ဖြစ်၏။

လီယွမ်က နှစ်တစ်ထောင် ရေခဲချီလင်သစ်သားဖြင့် ပြုလုပ်ထားသော သစ်သားသေတ္တာကို ထုတ်ယူလိုက်ရာ အတွင်း၌ ချီလင်ပုလဲကို မြှုပ်နှံထားသည်။

"အရာခပ်သိမ်းရဲ့ သွေးမျိုးဆက်တွေကို အားကောင်းစေပြီး စိတ်ဝိညာဉ်ကို မြှင့်တင်ပေးနိုင်သလို ဆွေးမြည့်နေတဲ့ အရာတွေကိုတောင် အံ့မခန်း အရာတွေအဖြစ် ပြောင်းလဲပေးနိုင်စွမ်း ရှိတယ်.."

"ဒါကို ဘယ်သူ့ကို ပေးရမလဲ.."

လီယွမ်က အတော်လေး ဝေခွဲမရ ဖြစ်နေသည်။

"ကျွီလင်၊ ရှောင်ချိုက်၊ ဝူမေ့... ဘယ်သူ လိုချင်လဲ"

သူက ပင်မကူကောင်များကို ကိုယ်တိုင် ရွေးချယ်ခိုင်းရန် ဆုံးဖြတ်လိုက်ပြီး လိုအပ်ချက် အကြီးမားဆုံးသူများကို ဦးစားပေးမည် ဖြစ်၏။

"ကျွီ ကျွီ"

"ရွှီး"

ဒီတစ်ကြိမ်မှာတော့ ရှောင်ချိုက်နှင့် ဝူမေ့ နှစ်ကောင်စလုံးက သူတို့၏ ဆန္ဒကို ဖော်ပြကြပြီး ပါဝင်ရန် အလွန် စိတ်အားထက်သန်နေကြသည်။

"ယောက်ျားတွေက တိုက်ခိုက်ရမယ်" ဟုသာ အော်ဟစ်တတ်သော ဧရာမဝိညာဉ်ကူကောင်ပင်လျှင် သွေးဆောင်ခံလိုက်ရ၏။

"ဒါက..."

လီယွမ်မှာ ချက်ချင်း ဒုက္ခရောက်သွားသည်။ အားလုံးကို တရားမျှတစွာ ဆက်ဆံနိုင်စွမ်းကို ထပ်မံ စမ်းသပ်ရမည့် အချိန်ရောက်လာလေပြီ။

"ဘယ်သူ့ကို ပေးရမလဲ.."

စစ်တိုက်လိုသော ဧရာမကူကောင်၊ ပိုင်စိုးပိုင်နင်းနိုင်သော ရှောင်ချိုက်နှင့် တွယ်ကပ်တတ်ပြီး ချစ်စရာကောင်းသော ဝူမေ့... တစ်ကောင်ချင်းစီက အခြားတစ်ကောင်ထက် ပိုမိုပြင်းထန်သော စိတ်ဆန္ဒများ ရှိနေကြရာ ရွေးချယ်ရန် အလွန် ခက်ခဲလှ၏။

"ဒါက သံယောဇဉ်တွေကို ထိခိုက်စေတယ်.."

လီယွမ်က သူ၏ အကျပ်ရိုက်မှုဖြင့် ရုန်းကန်နေရချိန်တွင် မလှမ်းမကမ်းရှိ သစ်ပင်ဖျားတွင် ထိုင်ကာ လိပ်ပြာများကို ကြည့်နေသော ဓားနတ်သမီးကို လှမ်းမြင်လိုက်ရသည်။

ဓားနတ်သမီးက အသင့်တော်ဆုံး သူ ဟု လီယွမ် ခံစားလိုက်ရသည်။

ပင်မကူကောင်များထဲတွင် စိတ်ဝိညာဉ် တိုးတက်မှု အလိုအပ်ဆုံးမှာ ဧရာမဝိညာဉ်ကူကောင် မဟုတ်သလို ရှောင်ချိုက်နှင့် ဝူမေ့လည်း မဟုတ်ပေ။ အသိစိတ် အကြွင်းအကျန် အနည်းငယ်သာ ရှိသော ဓားနတ်သမီးပင် ဖြစ်၏။

ခွန်းလွန်တောင်သို့ ခရီးသွားပြီးနောက် ဓားနတ်သမီး၏ စိတ်ဝိညာဉ်က တိုးတက်လာခဲ့သည်။

၎င်းက ကူအင်မော်တယ် သတ်မှတ်ထားသော ဝိညာဉ်ပြန်လည်ရောက်ရှိရန် 'နှစ်သုံးရာ' အချိန်ကို လျှော့ချနိုင်ကြောင်း သက်သေပြနေသည်။

"ဓားနတ်သမီး... မင်းပဲ ယူလိုက်တော့"

လီယွမ်က ရလဒ်ကို သတ်မှတ်လိုက်၏။

တစ်စုံတစ်ခုကို ခံစားမိသကဲ့သို့ သစ်ပင်ဖျားတွင် ထိုင်နေသော ဓားနတ်သမီးက ခေါင်းကို လှည့်ကာ လီယွမ်အား 'ဉာဏ်ပညာ' များ ပြည့်နှက်နေသော မျက်လုံးများဖြင့် တွေတွေလေး စိုက်ကြည့်နေသည်။

"ကျွီ ကျွီ"

"ရွှီး"

ဝူမေ့နှင့် ရှောင်ချိုက်တို့က မကျေမနပ်ဖြစ်ကာ ခုန်ပေါက်နေကြသည်။

ဧရာမဝိညာဉ်ကူကောင်ကမူ ခေါင်းမာခြင်းမရှိဘဲ အနောက်သို့ ဆုတ်သွားကာ တိတ်ဆိတ်နေသည်။

"ရှောင်ချိုက်... ဝူမေ့... မင်းတို့ကို တစ်ခုခု ပြောပြရဦးမယ်"

လီယွမ်က သူ၏ စိတ်ခံစားမှုများကို စတင် ပန်ကြားလိုက်၏။

"ဓားနတ်သမီးက ငါတို့ မိသားစုထဲကို ရောက်လာကတည်းက တစ်ခါမှ ဆင့်ကဲမပြောင်းလဲဖူးသေးဘူး.. ဒါကြောင့် ဒီအခွင့်အရေးကို သူ့ကို ပေးလိုက်ရင်ရော ဘယ်လိုလဲ"

"အဲဒါအပြင်..."

လီယွမ်က သူတို့နှင့် ဆင်ခြင်တုံတရားဖြင့် စကားပြောဆိုလာသည်။

"ရှောင်ချိုက်... မင်းက ဉာဏ်ကောင်းတယ်၊ လှပတယ်၊ ရတနာတွေ ရှာဖွေရာမှာလည်း ကျွမ်းကျင်တယ်.. ဝူမေ့... မင်းက ချစ်စရာကောင်းတယ်၊ စွမ်းဆောင်ရည်ရှိတယ်၊ ဘက်စုံတော်တယ်.. မင်းတို့ နှစ်ကောင်စလုံးက ငါ့အနားမှာ တစ်နေ့လုံး ကပ်နေလို့ ရတယ်.. ပြီးတော့ ဓားနတ်သမီးကို ကြည့်လိုက်ဦး သူ အဲဒီလို လုပ်နိုင်လို့လား.."

"နည်းနည်း ကြည့်ကောင်းတာနဲ့ တိုက်ခိုက်တာ နည်းနည်း ကျွမ်းကျင်တာကလွဲရင် သူ့မှာ ဘာရှိသေးလို့လဲ"

"သူက နတ်သမီးလေးတစ်ပါးနဲ့ တူပေမယ့် တကယ်တော့ အရူးမလေးတစ်ယောက်ပါ.. ငါတို့က ချစ်ခြင်းမေတ္တာတွေနဲ့ ပြည့်ဝနေတဲ့ မိသားစုလေးဆိုတော့ အရူးမလေး တစ်ယောက်နဲ့ ပြဿနာမရှာသင့်ဘူးလေ သူ့ကို ဂရုစိုက်သင့်တယ် မဟုတ်ဘူးလား.."

"ငါပြောတာ မှန်တယ်မလား.."