အခန်း (၁၀၃-၁၀၄)
Vol. 11 Ch. 103-104
အခန်း ၁၀၃- မဟာဧကရာဇ်အဆင့် အမျိုးအစားခွဲခြားမှုနှင့် ပုံစံကွဲများ။
ကစဉ့်ကလျား မဟာဧကရာဇ်သည် ကျေနပ်စွာ ပြုံးလိုက်သည်။
သူသည် ထိုနေ့ရက် ရောက်လာမည့်အချိန်ကို စိတ်အားထက်သန်စွာ မျှော်လင့်နေမိသည်။ လင်းချန်၏ ပါရမီသည် တာအိုဘိုးဘေးနှင့် မိစ္ဆာဘိုးဘေးတို့ထက် အနည်းငယ်မျှ လျော့နည်းခြင်းမရှိပေ။ အမှန်တကယ်ဆိုလျှင် အတိုင်းအတာတစ်ခုအထိ သူတို့ထက်ပင် ပို၍ အစွမ်းထက်သေးသည်။ ဤကဲ့သို့ တောက်ပပြီး ပြိုင်ဘက်ကင်းသော ပါရမီရှင်တစ်ဦး သူတို့နှင့် ပူးပေါင်းလာသည်နှင့်အမျှ ထျန်းယီနန်းတော် ပျက်စီးမည့်နေ့သည်လည်း မဝေးတော့ပေ။
နောက်ပိုင်းအချိန်များတွင် လင်းချန်သည် တန်ခိုးစွမ်းအား များနှင့် နက်ရှိုင်းသော အမှန်တရား များအပေါ် နားလည်သဘောပေါက်မှုနှင့် ပတ်သက်သည့် မေးခွန်းများစွာကို မေးမြန်းခဲ့သည်။ လင်းချန်၏ မေးမြန်းမှုများအတွက် ကစဉ့်ကလျား မဟာဧကရာဇ်သည် ဘာမှချန်မထားဘဲ အသေးစိတ် ရှင်းလင်းစွာ ဖြေကြားပေးခဲ့သည်။
သူသည် လင်းချန် တင်ပြသမျှ ခက်ခဲသော မေးခွန်းများကို ဖြေဆိုပေးရုံတင်မကဘဲ ပြဿနာအသစ်များကိုပါ ထောက်ပြပေးခဲ့သဖြင့် လင်းချန်မှာ ဥပမာတစ်ခုမှတစ်ဆင့် အခြားအရာများစွာကိုပါ ဆက်စပ်တွေးခေါ် နားလည်နိုင်ခဲ့ပြီး သူ၏ သိမြင်မှုမှာ ပို၍ နက်ရှိုင်းလာခဲ့သည်။
မူလက သတ်မှတ်ထားသော မေးခွန်းသုံးခုမှာ မည်မျှအထိ ကျော်လွန်သွားသည်ကိုပင် မည်သူမျှ မသိတော့ပေ။ သို့သော် သူတို့နှစ်ဦးစလုံးမှာ ထိုအချက်ကို ဂရုမစိုက်ဘဲ တစ်ဦးက မေးခွန်းမေးမြန်းကာ နောက်တစ်ဦးက သံသယများကို ရှင်းလင်းပေးရင်း သူတို့ဘာသာ ဆက်လက် ဆွေးနွေးနေခဲ့ကြသည်။
မကြာမီမှာပင် တစ်နာရီ အချိန်ကာလမှာ ကုန်ဆုံးသွားခဲ့သည်။
လင်းချန်သည် သူ၏ မေးခွန်းများကို နှမြောတသစွာဖြင့် ရပ်တန့်လိုက်ရသည်။ သူ၏ သံသယများအားလုံးကို မေးမြန်းခဲ့ပြီးဖြစ်ကာ ကစဉ့်ကလျား မဟာဧကရာဇ်ထံမှ ပြည့်စုံသော အဖြေများကို ရရှိခဲ့သည်။ ထိုအဖြေများမှာ ဂိုဏ်းဂဏတစ်ခုတည်းကို ကိုယ်စားပြုသော အဖြေမျိုးမဟုတ်ဘဲ ကျင့်ကြံသူအားလုံးနှင့် သက်ဆိုင်သော အဖြေမျိုး ဖြစ်သည်။ ထိုအဖြေများထဲမှပင် သူရှာဖွေနေသောအရာကို သူ တွေ့ရှိခဲ့သည်။
မဟာဧကရာဇ် အဆင့်ရှိ ပညာရှင်များသည် တကယ်ပင် နာမည်နှင့်လိုက်အောင် အစွမ်းထက်လှသည်ဟု ဆိုရပေမည်။ သူတို့သည် သူ၏ ကျင့်ကြံခြင်း လမ်းကြောင်းကို မထိခိုက်စေဘဲ သူ၏ အခက်အခဲများကို ရှင်းလင်းစွာ လမ်းညွှန်ပေးနိုင်ခဲ့သည်။ ဤအချက်မှာ အခြားသော အစွမ်းထက် ပုဂ္ဂိုလ်များ လုံးဝ လိုက်မမီနိုင်သော အချက်ပင် ဖြစ်သည်။
ထိုစဉ် ကစဉ့်ကလျား မဟာဧကရာဇ်သည် တဖြည်းဖြည်း မှေးမှိန်လာသော ဟင်းလင်းပြင်ကို တစ်ချက် ကြည့်လိုက်ပြီးနောက် မတတ်သာသော အမူအရာဖြင့် လက်ကို ဖြန့်ပြလိုက်သည်။
“ငါတို့ ဆုံတွေ့တဲ့ အချိန်က ကုန်ဆုံးတော့မယ် ထင်တယ်။ ငါက စိတ်ဆန္ဒ အမျှင်တန်းလေး တစ်ခုပဲဆိုတော့ ဒီပုံစံကို ကြာကြာ မထိန်းထားနိုင်ဘူး။”
“သိပ်မကြာခင်မှာပဲ ငါ့ရဲ့ အခြေအနေကို ပြန်လည် ပြုပြင်ဖို့အတွက် ဒီအတိုင်းအဆမဲ့တဲ့ ကြယ်တာရာမြစ်ထဲကို ငါ ပြန်ပြီး ပေါင်းစပ်ရတော့မယ်။”
“ဒါပေမဲ့ အဲ့ဒီမတိုင်ခင်မှာ အထက်လောကရဲ့ ထာဝရ တိုက်ကြီး မှာရှိတဲ့ ကျင့်စဉ်အဆင့်တွေ အကြောင်းကို မင်းကို အရင် ပြောပြထားသင့်တယ်။”
“ဒါမှ မင်း နောက်ပိုင်း အထက်လောကကို ဆင်းသက်သွားတဲ့အခါ ဘာမှမသိဘဲ အမှောင်ထဲ ရောက်မနေမှာ အစွမ်းအဆင့်တွေကိုလည်း နားလည်နေမှာ ဖြစ်တယ်။”
ဤစကားကို ကြားရသောအခါ လင်းချန်သည် စူးစမ်းလိုစိတ်များ ဖြစ်ပေါ်လာသည်။ သူသည် အမြန်ပင် ဂါရဝပြုလိုက်ပြီး သင်ကြားပေးရန် မျှော်လင့်နေသော အမူအရာ ဖြစ်သွားသည်။
“စီနီယာ... လမ်းညွှန်ပေးပါဦး။”
ထာဝရ တိုက်ကြီး၏ ကျင့်စဉ်အဆင့်များ။
၎င်းမှာ မဟာဧကရာဇ်ကို ကျော်လွန်သော ပိုမြင့်သည့် ကျင့်စဉ်အဆင့်များအကြောင်း ပြောပြမည်ကို ဆိုလိုခြင်းလော။ အမှန်အတိုင်း ပြောရလျှင် သူသည် ဤအချက်ကို အလွန်ပင် စိတ်ဝင်စားနေမိသည်။
ကစဉ့်ကလျား မဟာဧကရာဇ်က သူ၏ အတွေးများကို စုစည်းပြီး အေးအေးဆေးဆေး ပြောလိုက်သည်။
“ထာဝရ တိုက်ကြီးမှာရှိတဲ့ မဟာဧကရာဇ်အောက်က ကျင့်စဉ်အဆင့်တွေက ငါတို့ သုံးထောင်သော တာအိုပြည်နယ်က အဆင့်တွေနဲ့ အတူတူပါပဲ။ ဘာမှမကွာခြားဘူး။”
“သူတို့က ပိုပြီးတော့ အသေးစိတ် ခွဲခြားထားတာပဲ ရှိတယ်။ အဲ့ဒါက အသေးအဖွဲမို့လို့ သိပ်ပြီး အလေးအနက် စဉ်းစားနေစရာ မလိုပါဘူး။”
“ငါ အခု ပြောပြမှာက မဟာဧကရာဇ် အဆင့်အထက်မှာရှိတဲ့ ပိုမြင့်တဲ့ ကျင့်စဉ်နယ်ပယ်တွေ အကြောင်းပဲ။”
ဒါကို ကြားလိုက်ရချိန်တွင် လင်းချန်သည် စိတ်ဓာတ်များ တက်ကြွသွားပြီး ထင်တဲ့အတိုင်းပါပဲလား ဆိုသည့် အမူအရာ ဖြစ်သွားသည်။
အမှန်ပင်။မဟာဧကရာဇ် အထက်မှာ ဘယ်လို အဆင့်တွေ ရှိနေတာလဲ။ အဆင့် ဘယ်နှစ်ဆင့်တောင် ရှိတာလဲ။
လင်းချန်ကို ခေတ္တမျှ စဉ်းစားချိန်ပေးပြီးနောက် ကစဉ့်ကလျား မဟာဧကရာဇ်က ဆက်ပြောသည်။
“မဟာဧကရာဇ် အဆင့်ဆိုတာ မင်းထင်သလို အဆင့် ၁ ကနေ ၉ အထိ ခွဲခြားထားတာ မဟုတ်ဘူး။”
“တကယ်တော့ နားလည်သဘောပေါက်ထားတဲ့ နိယာမစွမ်းအား အမျိုးအစားပေါ် မူတည်ပြီး မဟာဧကရာဇ်တွေကို အပေါ်ယံနိယာမ မဟာဧကရာဇ် နဲ့ နက်ရှိုင်းနိယာမ မဟာဧကရာဇ် ဆိုပြီး ခွဲခြားထားတယ်။”
“အပေါ်ယံနိယာမ မဟာဧကရာဇ်တွေဆိုတာ အစွမ်းသိပ်မကြီးတဲ့ နိယာမစွမ်းအားတွေကို နားလည်ထားတဲ့သူတွေပဲ။ သူတို့ရဲ့ အစွမ်းက အဆင့်တူပေမဲ့ နက်ရှိုင်းနိယာမ မဟာဧကရာဇ်တွေထက် အများကြီး အားနည်းတယ်။”
“ဆန့်ကျင်ဘက် အနေနဲ့ နက်ရှိုင်းနိယာမ မဟာဧကရာဇ်တွေကတော့ အချိန်၊ ဟင်းလင်းပြင်။ ကံကြမ္မာလိုမျိုး အမြင့်ဆုံး နိယာမတွေကို နားလည်သဘောပေါက်ထားကြသူတွေပဲ။”
“မဟာဧကရာဇ် အဆင့်အတွင်းမှာ အဆင့်ခွဲခြားတာက ပထမအဆင့်ကနေ ကိုးမအဆင့်အထိ မဟုတ်တော့ဘဲ ကနဦးအောင်မြင်မှု၊အလယ်အလတ်အောင်မြင်မှု နဲ့ ပြီးပြည့်စုံခြင်း ဆိုပြီး ရှိတာ။”
“ဒါကလည်း နိယာမစွမ်းအားအပေါ် နားလည်သဘောပေါက်မှုအပေါ် အခြေခံပြီး ခွဲခြားတာပဲ။”
ဤသို့ ပြောပြီးနောက် ကစဉ့်ကလျား မဟာဧကရာဇ်က လင်းချန်ကို ကြည့်ကာ ပြုံးလိုက်သည်။
“တစ်နည်းအားဖြင့် ပြောရရင် မဟာဧကရာဇ် အဆင့်ရဲ့ ခွဲခြားမှုဟာ အဓိကအားဖြင့် နိယာမစွမ်းအားအပေါ် နားလည်သဘောပေါက်မှု အတိုင်းအတာပဲ ဖြစ်တယ်။”
“မဟာဧကရာဇ် တစ်ယောက်ရဲ့ ဝိညာဉ်စွမ်းအင်ကတော့ အကုန်အစင် မရှိတော့ဘဲ အကန့်အသတ်မရှိ ဖြစ်သွားပြီ။ အဲ့ဒီတော့ အားပြိုင်ကြတဲ့အခါ ဝိညာဉ်စွမ်းအင် ဘယ်သူပိုများလဲဆိုတာ မဟုတ်တော့ဘဲ နိယာမစွမ်းအား ဘယ်သူပို အစွမ်းထက်သလဲ ဆိုတာပဲ ဖြစ်တော့တယ်။”
အပေါ်ယံနိယာမ မဟာဧကရာဇ်။
နက်ရှိုင်းနိယာမမဟာဧကရာဇ်။
ဒါကို ကြားလိုက်ရချိန်တွင် လင်းချန် အနည်းငယ် မျက်မှောင်ကြုတ်သွားသည်။ ၎င်းမှာ အနည်းငယ် ရှုပ်ထွေးပုံရပြီး အရင်က ကျင့်စဉ်အဆင့် ခွဲခြားမှုတွေလောက် ရိုးရှင်းမှု မရှိပေ။ ထို့အပြင် သူမှတ်မိသလောက်ဆိုလျှင် ဧကရာဇ် အဆင့်သို့ တက်လှမ်းစဉ်ကပင် မူလစွမ်းအား အမျိုးမျိုးကို ပေါင်းစပ်ပြီး ကိုယ်ပိုင် နိယာမစွမ်းအားကို ဖန်တီးခဲ့ရသည် မဟုတ်လား။ ဘာကြောင့် မဟာဧကရာဇ် အဆင့်ကို ရောက်တဲ့အခါမှာ ထိုမူလနိယာမတွေကို ထပ်ပြီး နားလည်အောင် လုပ်ဖို့ လိုအပ်နေတာလဲ။
လင်းချန်၏ သံသယကို ရိပ်မိလိုက်သကဲ့သို့ ကစဉ့်ကလျား မဟာဧကရာဇ်က လင်းချန်၏ ပုခုံးကို ပုတ်ကာ ပြောသည်။
“ဧကရာဇ်တစ်ပိုင်း အဆင့်ကို တက်လှမ်းဖို့အတွက် မူလစွမ်းအား အမျိုးမျိုးကို ပေါင်းစပ်ပြီး ကိုယ်ပိုင် နိယာမစွမ်းအားကို ဖန်တီးဖို့ လိုအပ်တာ မှန်ပါတယ်။”
“ဒါပေမဲ့ အဲ့ဒီ နိယာမစွမ်းအားဟာ အခြေခံအားဖြင့် သုံးထောင်သော တာအိုကြီးများ ထဲက တစ်ခုခုအပေါ်မှာပဲ အခြေခံနေဆဲပဲ။ ပုံစံကွဲ တစ်မျိုးပဲ ဖြစ်သေးတယ်။”
“ငါ အခု ပြောပြခဲ့တာက ဒီကမ္ဘာမှာ မူလကတည်းက တည်ရှိနေတဲ့ နိယာမစွမ်းအားတွေကို စက်ရုပ်လိုမျိုး လိုက်ပြီး နားလည်ခိုင်းတာ မဟုတ်ဘူး။”
“အဲ့ဒါထက် ပေါင်းစပ်ပြီးနောက် ဖြစ်ပေါ်လာတဲ့ ပုံစံကွဲ ကွမ်ဇိုင်းနိယာမအပေါ် အခြေခံပြီး ပိုပြီးတော့ အစွမ်းထက်တဲ့ ပုံစံကွဲ မဟာဧကရာဇ် နိယာမစွမ်းအား ကို နားလည်သဘောပေါက်ဖို့ ပြောတာပါ။”
“ဘယ်လိုပဲ ပြောင်းလဲပြောင်းလဲ အနှစ်သာရကတော့ ကျန်နေဆဲပဲ။ နိယာမစွမ်းအားက ဘယ်လောက်ပဲ သန်မာလာပါစေ ဘယ်လောက်ပဲ ပုံစံပြောင်းသွားပါစေ အဲ့ဒါက အစောဦးက အခြေခံအကျဆုံး နိယာမတရားကနေပဲ မြစ်ဖျားခံလာတာ။”
ဤစကားများကို ကြားလိုက်ရချိန်တွင် လင်းချန်၏ မျက်နှာပေါ်တွင် နားလည်သဘောပေါက်သွားသော အမူအရာ ပေါ်လာသည်။
ဪ... ဒါကြောင့်ကိုး။ သူ အရင်က ထိုအချက်ကို မစဉ်းစားမိခဲ့ပေ။ ဤသို့ ရှင်းပြလိုက်မှသာ သူ အရာအားလုံးကို ပြည့်ပြည့်စုံစုံ နားလည်သွားခဲ့သည်။
သူ သိချင်နေသည်မှာ သူ၏ နောင်တစ်ချိန်တွင် ပေါင်းစပ်မည့် နိယာမအသစ်သည် အခြေခံအကျဆုံးဖြစ်သော မည်သည့် နိယာမတရားကနေ မြစ်ဖျားခံလာမည်နည်း ဆိုသည်ကိုပင်။
ကစဉ့်ကလျား လား။ သို့မဟုတ် ဓားတာအို လား။ ဒါမှမဟုတ် လက်သီးတာအိုလား။
အခန်း ၁၀၄- မဟာဧကရာဇ်အဆင့်လွန် နယ်ပယ်များ။
သူ၏ လက်ရှိအဆင့်တွင် သူနားလည်သဘောပေါက်ထားသော နက်ရှိုင်းသော အမှန်တရား စွမ်းအားများထဲတွင် အစွမ်းအထက်ဆုံးမှာ ‘အရာခပ်သိမ်း တစ်ခုတည်းသို့ ပြန်လည်ရောက်ရှိခြင်း’ ဟုခေါ်သော ကစဉ့်ကလျား နက်ရှိုင်းမှုပင် ဖြစ်သည်။
သူ၏ နားလည်သဘောပေါက်မှု ပိုမိုနက်ရှိုင်းလာသည်နှင့်အမျှ နက်ရှိုင်းသော အမှန်တရား စွမ်းအားများအားလုံးသည် အသွင်ပြောင်းလဲသွားပြီး မူလစွမ်းအားများ ဖြစ်လာလိမ့်မည်။ သူသည် နောက်ပိုင်းတွင် ဧကရာဇ် အဆင့်သို့ တက်လှမ်းသောအခါ ထိုမူလစွမ်းအားများသည် တစ်ခုနှင့်တစ်ခု ပေါင်းစပ်သွားနိုင်ပြီး သူတစ်ဦးတည်းအတွက်သာ သီးသန့်ဖြစ်သော နိယာမစွမ်းအားအသစ်တစ်ခု ဖြစ်လာမည်ဖြစ်သည်။
လင်းချန်က ကစဉ့်ကလျားစွမ်းအားသည်ပင် ထိပ်ဆုံးမှ ဆက်လက် လွှမ်းမိုးထားလိမ့်မည်ဟု ခန့်မှန်းထားသည်။ အကြောင်းမှာ ကစဉ့်ကလျားသည် အရာခပ်သိမ်းကို လွှမ်းခြုံထားပြီး ကမ္ဘာကြီး၏ အခြေခံအုတ်မြစ် အရာအားလုံး၏ မြစ်ဖျားခံရာ ဖြစ်သောကြောင့်ပင်။
အခြားသော နက်ရှိုင်းသော အမှန်တရား စွမ်းအားများ ပေါင်းစပ်သွားပြီးနောက် ၎င်းတို့သည် ကစဉ့်ကလျားစွမ်းအားကို ပိုမိုသန်မာလာစေရန် အာဟာရဖြစ်စေပြီး ၎င်းကို ပို၍ပင် ခန့်ညားထည်ဝါစေလိမ့်မည်။ ၎င်းမှာ ယခုအခါ သူတိုက်ပွဲအတွင်း ခေတ္တပေါင်းစပ်အသုံးပြုနေသော အမည်မသိ ပေါင်းစပ်နက်ရှိုင်းမှု ကဲ့သို့ပင်ခန့်မှန်းရခက်ခဲပြီး ဖမ်းဆုပ်ရခက်ပေလိမ့်မည်။
ကစဉ့်ကလျား မဟာဧကရာဇ်သည် သူ၏ တဖြည်းဖြည်း ဝေဝါးလာသော လက်ကိုမြှောက်ကာ လင်းချန်၏ ပုခုံးကို ပုတ်ပြီး ပြုံးလိုက်သည်။
“လင်းချန်... ကြိုးကြိုးစားစား ကျင့်ကြံပါ။ ငါ့ရဲ့ ပင်မခန္ဓာကိုယ်နဲ့ မကြာခင် ဆုံတွေ့နိုင်အောင် ကြိုးစားပါ။”
“နောက်ပြီးတော့... မဟာဧကရာဇ် အထွတ်အထိပ် အဆင့်ကို ကျော်လွန်ပြီး တည်ရှိနေတဲ့ ကျင့်စဉ်နယ်ပယ်တွေ အကြောင်းကို ငါ မင်းကို ပြောပြမယ်။”
ဒါကို ကြားလိုက်ရချိန်တွင် လင်းချန်၏ စိတ်အာရုံမှာ ချက်ချင်း ပြန်လည် စုစည်းသွားပြီး မျှော်လင့်ချက် အပြည့်ရှိသော အမူအရာ ဖြစ်သွားသည်။ အဓိက အပိုင်းက နောက်ဆုံးတော့ ရောက်လာပြီလား။
မဟာဧကရာဇ် အဆင့်လွန် နယ်ပယ်များ။
သူတို့၏ တာအိုပြည်နယ်သုံးထောင်များတွင် မဟာဧကရာဇ် အဆင့်မှာ အသန်မာဆုံး အဆင့်ဟု လူသိများသည်။ လေဟာနယ်ကို ဖောက်ထွင်းပြီးမှ ရောက်ရှိနိုင်သော ထာဝရ တိုက်ကြီး သို့မဟုတ် အထက်လောက တွင်သာ ပို၍ အစွမ်းထက်သော တည်ရှိမှုများ ရှိနိုင်သည်ဟု သူတို့ ခန့်မှန်းခဲ့ကြခြင်း ဖြစ်သည်။
ယခုမူ ကစဉ့်ကလျား မဟာဧကရာဇ်ကိုယ်တိုင်က သူတို့၏ ခန့်မှန်းချက်ကို အတည်ပြုပေးလိုက်ပြီ ဖြစ်သည်။ မဟာဧကရာဇ်အဆင့်ကို ကျော်လွန်၍ ပိုမြင့်သော နယ်ပယ်များ အမှန်တကယ် ရှိနေပါသည်။
ကစဉ့်ကလျား မဟာဧကရာဇ်က သူ၏ အတွေးများကို အနည်းငယ် စုစည်းပြီးနောက် အတိုင်းအဆမဲ့သော ကြယ်တာရာမြစ် လောကကြီးအတွင်း သူ၏ တည်ငြိမ်သော အသံ ထွက်ပေါ်လာသည်။
“မဟာဧကရာဇ်အဆင့် ကျော်လွန်ရင် ကောင်ကင်ဘုံဧကရာဇ် အဆင့် ရှိတယ်။ ကောင်းကင်ဘုံဧကရာဇ် အဆင့်က နိယာမတွေကို နားလည်သဘောပေါက်ရုံတင် မဟုတ်တော့ဘဲ... ကမ္ဘာကြီးကို စတင် ဖန်တီးရတာပဲ။”
“တစ်ဦးချင်းစီရဲ့ စိတ်ဝိညာဉ်အတွင်းမှာ ကိုယ်ပိုင် ကမ္ဘာတစ်ခုကို ဖွင့်လှစ်တာပဲ။”
“ဒါမှမဟုတ် နောက်တစ်မျိုး ပြောရရင် စိတ်ဝိညာဉ်ကို စစ်မှန်တဲ့ ကမ္ဘာတစ်ခုအဖြစ် အသွင်ပြောင်းလဲလိုက်တာပဲ။”
ဤစကားများကို ကြားရသောအခါ လင်းချန်၏ ရင်ထဲတွင် အံ့အားသင့်မှုများ လှိုင်းထသကဲ့သို့ ဖြစ်သွားသည်။ မဟာဧကရာဇ်ပြီးနောက် ‘ကောင်းကင်ဘုံဧကရာဇ်။အဆင့်သည် မွေးရာပါ ပါလာသော စိတ်ဝိညာဉ်ကို ပြည့်စုံပြီး စစ်မှန်သော အတွင်းလောကတစ်ခုအဖြစ် အသွင်ပြောင်းရန် လိုအပ်သည်လား။
မယုံနိုင်စရာပင်။
၎င်းမှာ တကယ်ကို မယုံကြည်နိုင်လောက်သော တက်လှမ်းမှု နည်းလမ်းပင် ဖြစ်သည်။ ထိုကဲ့သို့သော အဆင့်တစ်ခုအကြောင်း ကြားလိုက်ရုံဖြင့်ပင် ၎င်း၏ ကြီးမားလှသော စွမ်းအားကို သူ ခံစားလိုက်ရသည်။
လင်းချန်၏ စိတ်လှုပ်ရှားမှုကို ရိပ်မိလိုက်သကဲ့သို့ ကစဉ့်ကလျား မဟာဧကရာဇ်က ပြုံးလိုက်သည်။ ဤသည်မှာ သဘာဝကျသော တုံ့ပြန်မှုပင်။ သူကိုယ်တိုင်လည်း ထိုအကြောင်းကို စသိခဲ့စဉ်က လင်းချန်ထက်ပင် ပို၍ စိတ်လှုပ်ရှားခဲ့သည်။ ကျင့်ကြံခြင်း၏ နောက်ပိုင်းအဆင့်များတွင် မိမိကိုယ်တိုင်က ကမ္ဘာကြီးများကို ဖန်တီးသူများ ဖြစ်လာကြလိမ့်မည်ဟု မည်သူက ထင်ထားပါမည်နည်း။
၎င်းမှာ သေးငယ်သော ကမ္ဘာတစ်ခု ဖန်တီးရုံမျှ မဟုတ်ဘဲ ပြည့်စုံသော နိယာမတရားများ ရှိသည့် စစ်မှန်သော ကမ္ဘာတစ်ခုကို ဖန်တီးခြင်း ဖြစ်သည်။
ကစဉ့်ကလျား မဟာဧကရာဇ်က ခေတ္တမျှ ရပ်လိုက်ပြီးမှ ဆက်ပြောသည်။
“ကောင်းကင်ဘုံဧကရာဇ် အဆင့်ရဲ့ သီးခြား အဆင့်ခွဲတွေနဲ့ အခြားသော အချက်အလက်တွေကိုတော့... ငါတို့မှာ အချိန်သိပ်မရှိတော့လို့ ငါ အသေးစိတ် မပြောတော့ဘူး။”
“မင်း ငါ့ရဲ့ ပင်မခန္ဓာကိုယ်နဲ့ တွေ့တဲ့အခါ သူက အသေးစိတ် ရှင်းပြလိမ့်မယ်။”
“ပြီးတော့ ကောင်းကင်ဘုံဧကရာဇ် အဆင့်ကို ကျော်လွန်ရင် နောက်ထပ် အဓိက အဆင့်တွေ ရှိသေးတယ်။ အဲ့ဒါတွေကတော့ ရှေးဟောင်းဧကရာဇ်၊ မြင့်မြတ်သောဧကရာဇ် နဲ့ နတ်ဘုရားဧကရာဇ် တို့ပဲ။”
“ပြီးတော့ ကျင့်ကြံခြင်းရဲ့ သီအိုရီအရ အဆုံးမှတ် အသန်မာဆုံး အဆင့်လို့ သိထားကြတာကတော့... ကစဉ့်ကလျားနယ်ပယ် ပဲ။”
“ကစဉ့်ကလျားနယ်ပယ် ပညာရှင်တွေဟာ သုံးထောင်သော တာအိုပြည်နယ်က မဟာဧကရာဇ် ပညာရှင်တွေနဲ့ နှိုင်းယှဉ်လို့ ရတယ်။ သူတို့ထဲက တစ်ယောက်တည်းကတောင် ထာဝရ တိုက်ကြီး တစ်ခုလုံးကို လွှမ်းမိုးနိုင်တယ်။ တကယ်ကို ထိပ်တန်း အသန်မာဆုံး တည်ရှိမှုတွေပဲ။”
စကားဆုံးသွားပြီးနောက် ကစဉ့်ကလျား မဟာဧကရာဇ်က ထပ်မံ စကားမပြောတော့ဘဲ လင်းချန်ကို ထိုအချက်အလက်များကို ကိုယ်တိုင် ပြန်လည် စဉ်းစားရန် အချိန်ပေးလိုက်သည်။
သူ့နားထဲသို့ ဝင်လာသော စကားလုံးများကြောင့် လင်းချန်၏ စိတ်လှုပ်ရှားမှုမှာ အချိန်အတော်ကြာအောင် ငြိမ်သက်မသွားခဲ့ပေ။
မဟာဧကရာဇ်။
ကောင်းကင်ဘုံဧကရာဇ်။
ရှေးဟောင်းဧကရာဇ်။
မြင့်မြတ်သောဧကရာဇ်။
နတ်ဘုရားဧကရာဇ်။
ကစဉ့်ကလျားနယ်ပယ်။
ဤအဆင့်များသည် မဟာဧကရာဇ်အဆင့်ကို ကျော်လွန်သော အစွမ်းထက်သည့် နယ်ပယ်များလား။ မူလက သူသည် မဟာဧကရာဇ်အဆင့်ပြီးနောက် အလွန်ဆုံးရှိလှ နောက်ထပ် အဆင့် တစ်ဆင့် သို့မဟုတ် နှစ်ဆင့်လောက်သာ ရှိမည်ဟု ထင်ခဲ့သည်။ ယခုမူ မမျှော်လင့်ဘဲ မဟာဧကရာဇ်အဆင့်ပြီးနောက် နောက်ထပ် အဓိက အဆင့် ငါးဆင့်တောင် ရှိနေပါသည်လား။
သူ၏ ယခင်အတွေးမှာ မှန်ကန်ပုံရသည်။ မဟာဧကရာဇ်မှာ ကျင့်ကြံခြင်း၏ အဆုံးသတ် မဟုတ်ဘဲ နောက်ထပ် အစပြုရာ နေရာတစ်ခုသာ ဖြစ်သည်။ သူလျှောက်လှမ်းရမည့် လမ်းမှာ အလွန်ပင် ရှည်လျားနေပါသေးသည်။
“ဟူး...”
လင်းချန်က အသက်ကို ခပ်ပြင်းပြင်း တစ်ချက်မှုတ်ထုတ်လိုက်ပြီး ရင်ထဲက ခံစားချက်များကို ထိန်းချုပ်လိုက်သည်။ သူသည် ဘေးရှိ ကစဉ့်ကလျား မဟာဧကရာဇ်ကို ရိုရိုသေသေ ဂါရဝပြုလိုက်သည်။
“ကျွန်တော့်ရဲ့ သံသယတွေကို ရှင်းပြပေးတဲ့အတွက် စီနီယာ့ကို ကျေးဇူးတင်ပါတယ်။”
မဟာဧကရာဇ်အဆင့်လွန် ဤနယ်ပယ်များအကြောင်း သိပြီးနောက်တွင် သူသည် ပိုမိုမြင့်မားသော ပန်းတိုင်များ ရရှိသွားသဖြင့် စိတ်ဓာတ်တက်ကြွမှုများဖြင့် ပြည့်နှက်သွားသည်။
ဒါကို ကြားတော့ ကစဉ့်ကလျား မဟာဧကရာဇ်က ပြုံးပြီး လက်ကို ခါယမ်းပြသည်။
“ကျေးဇူးတင်စရာ မလိုပါဘူး။ ဒီကိစ္စတွေက ထာဝရ တိုက်ကြီး မှာဆိုရင် အနည်းငယ် အစွမ်းရှိတဲ့သူတိုင်း သိနေကြတဲ့ အရာတွေပါ။”
“အခု ငါက မင်း နောင်တစ်ချိန်မှာ သေချာပေါက် သိလာမယ့် အရာတွေကို ကြိုပြောပြရုံပါပဲ။”
“ကဲ... မင်းသိချင်တာတွေကို ငါ အကုန်ပြောပြပြီးပြီ။ အခုတော့ မင်း ပြန်လို့ ရပါပြီ။”
“ကျန်နေတဲ့ အချိန်လေးမှာ ငါ့ရဲ့ အခြေအနေကို ပြန်လည် ပြုပြင်ရမယ်။ ပြီးရင် ပင်မခန္ဓာကိုယ်နဲ့ ဆက်သွယ်ပြီး မင်းရဲ့ တည်ရှိမှုကို အကြောင်းကြားပေးရမယ်။”
ဤအချိန်တွင် သူ၏ ခန္ဓာကိုယ်မှာ အလင်းပေါက်နေပြီး အခြားတစ်ဖက်မှ မြင်ကွင်းကိုပင် မြင်နေရပြီ ဖြစ်သည်။ အကယ်၍ သူသည် အတိုင်းအဆမဲ့သော ကြယ်တာရာမြစ် လောကအတွင်းသို့ မြန်မြန်ဝင်ရောက်ပြီး အခြေအနေကို ပြန်မပြုပြင်နိုင်ပါက သူသည် တကယ်ပင် ပျောက်ကွယ်သွားပေလိမ့်မည်။ သူသည် ပြီးမြောက်အောင် လုပ်ရမည့် တာဝန်ရှိသေးသဖြင့် အကြောင်းမဲ့ ပျောက်ကွယ်သွား၍ မဖြစ်ပေ။
ဤစကားများကို ကြားရသောအခါ လင်းချန်သည် အခြားသော မေးခွန်းများ မေးချင်သေးသော်လည်း မေးခွင့်မရှိတော့သဖြင့် လက်လျှော့လိုက်ရသည်။ သူသည် ကစဉ့်ကလျား မဟာဧကရာဇ်၏ ပင်မခန္ဓာကိုယ် အဆင့်နှင့် ဘိုးဘေး လင်းတုံ၊ တာအိုဘိုးဘေး၊ မိစ္ဆာဘိုးဘေးတို့၏ ကျင့်စဉ်အဆင့်များကို မေးမြန်းချင်ခဲ့သည်။ သို့သော် ပြန်စဉ်းစားကြည့်လျှင် ဤအရာများကို ယခုသိရလည်း အပိုပင် ဖြစ်သည်။
သူကိုယ်တိုင် အထက်လောကသို့ ဆင်းသက်ပြီး ထာဝရ တိုက်ကြီး သို့ ရောက်ရှိသွားချိန်မှသာ ရှာဖွေစူးစမ်းခြင်းက ပိုကောင်းပေလိမ့်မည်။ ထိုသို့ဆိုလျှင် သူ့အတွက် စူးစမ်းရှာဖွေမှု အတွေ့အကြုံကိုလည်း ရရှိစေမည်ဖြစ်သည်။
လင်းချန်က အသက်ပြင်းပြင်း တစ်ချက်ရှူလိုက်ပြီး ကစဉ့်ကလျား မဟာဧကရာဇ်ကို လေးလေးနက်နက် ကြည့်ကာ ဂါရဝပြုလိုက်သည်။
“ဒါဆိုရင် စီနီယာ... ကျွန်တော် နှုတ်ဆက်ပါတယ်။ မကြာခင်မှာ ပြန်တွေ့ကြတာပေါ့။”
ကစဉ့်ကလျား မဟာဧကရာဇ်က ပြုံးပြီး လက်ဝှေ့ယမ်းပြသည်။
“မကြာခင်မှာ... ပြန်တွေ့ကြမယ်။”
သူ လက်ဝှေ့ယမ်းလိုက်သည်နှင့် လင်းချန်၏ ပုံရိပ်မှာ ထိုနေရာမှ ပျောက်ကွယ်သွားလေသည်။
လက်ကို ပြန်ချလိုက်ရင်း ကစဉ့်ကလျား မဟာဧကရာဇ်က သူ၏ အပြုံးကို ရုပ်သိမ်းလိုက်ပြီး သူ၏ စိတ်ဆန္ဒကို စုစည်းလိုက်သည်။ နောက်တစ်ခဏတွင် သူ၏ ဝေဝါးနေသော ခန္ဓာကိုယ်မှာ ကြယ်မှုန်လေးများအဖြစ် ပြောင်းလဲသွားပြီး အတိုင်းအဆမဲ့သော ကြယ်တာရာမြစ် လောကအတွင်းသို့ ပေါင်းစပ်သွားလေသည်။ သူပြောခဲ့သကဲ့သို့ပင် သူ၏ အခြေအနေကို ပြန်လည် ပြုပြင်ရန်နှင့် ပင်မခန္ဓာကိုယ်နှင့် ဆက်သွယ်ရန် လိုအပ်သည်။
ဟင်းလင်းပြင်ထဲရှိ အနက်ရောင် ဟင်းလင်းပြင်လမ်းကြောင်းတစ်ခုသာ တည်ရှိနေသော နေရာတွင် ရှောင်ဖန်၏ ပုံရိပ်မှာ တိတ်ဆိတ်စွာ ရပ်နေသည်။ လင်းချန် စမ်းသပ်မှုနေရာအတွင်းသို့ ဝင်သွားသည်မှာ အချိန်အတော်ကြာခဲ့ပြီ ဖြစ်သည်။
ပြင်ပတွင်လည်း နတ်ဘုရားမျှော်စင် ပျောက်ကွယ်သွားမည့် အချိန်မှာ ကုန်ဆုံးလုနီးပါး ဖြစ်နေပြီဖြစ်သည်။ ထူးချွန်သူ ပါရမီရှင်များမှာလည်း တစ်ဦးပြီးတစ်ဦး ပြန်လည်ရောက်ရှိလာကြပြီး နောက်ထပ် အခွင့်အရေးကို စောင့်ဆိုင်းနေကြပြီဟု သူ သတင်းရရှိထားသည်။
ယခု စမ်းသပ်မှုကို ဖြတ်သန်းနေသော လင်းချန်တစ်ယောက် ဘယ်လိုအခြေအနေ ရှိနေမလဲဆိုသည်ကို သူ မသိပေ။ စောစောက သူသည် ကစဉ့်ကလျား သန့်စင်မြေရှိ ကျန်ရှိနေသော ကျွမ်းကျင်သူ အားလုံးထံသို့ သတင်းပို့ထားပြီး ဖြစ်သည်။ ယခုအခါ ထိုပညာရှင်များအားလုံးသည် အစည်းအဝေးခန်းမ၌ လင်းချန် ရောက်ရှိလာမည့်အချိန်ကို စောင့်နေကြပြီး လင်းချန် အရင်က ပြောခဲ့သော တာအိုပြည်နယ်သုံးထောင်၏ ပျက်စီးနေသော နိယာမများကို ပြန်လည်ပြုပြင်ခြင်အကြောင်းကို ရှင်းပြသည်ကို ကြားချင်နေကြသည်။
ထိုအတွေး ပေါ်လာသည်နှင့်ပင် ငြိမ်သက်နေသော အနက်ရောင် ဟင်းလင်းပြင်လမ်းကြောင်းမှာ ရုတ်တရက် တုန်ခါလာလေသည်။
“ဟွမ် ဟွမ် ဟွမ်။”
တုန်ခါသံကြောင့် ရှောင်ဖန်၏ အာရုံစိုက်မှုကို ရရှိသွားပြီး သူသည် သေချာ ကြည့်လိုက်သည်။ အနက်ရောင် ဟင်းလင်းပြင်လမ်းကြောင်း တုန်ခါနေစဉ်အတွင်း လူရိပ်တစ်ခုမှာ ၎င်းအတွင်းမှ ဖြည်းဖြည်းချင်း လမ်းလျှောက် ထွက်ပေါ်လာသည်ကို သူတွေ့လိုက်ရသည်။
ထိုလူရိပ်ကို မြင်လိုက်ရသောအခါ ရှောင်ဖန်၏ မျက်နှာပေါ်တွင် မသိစိတ်မှ ပြုံးလိုက်မိသည်။
“မိတ်ဆွေ လင်းချန်... ဘယ်လိုလဲ။ အဆင်ပြေရဲ့လား။”
လင်းချန်က သူ၏ ခန္ဓာကိုယ်ကို ဆန့်ထုတ်လိုက်ပြီး ရှောင်ဖန်၏ မေးခွန်းကို ကြားသောအခါ ပြုံးလိုက်သည်။
“ကျွန်တော် သွားဖို့ ရွေးချယ်ခဲ့မှတော့ ဘယ်လိုလုပ် ရှုံးနိမ့်ပြီး ပြန်လာပါ့မလဲ။”
“ရလဒ်ကတော့ တကယ်ကို ကောင်းမွန်ပါတယ်။ ကျွန်တော် စီနီယာ ကစဉ့်ကလျား မဟာဧကရာဇ်နဲ့ တွေ့ခဲ့ပြီး သူနဲ့ စကားတွေ တော်တော်များများ ပြောခဲ့ရတယ်။”
သူက ဘိုးဘေး ကစဉ့်ကလျား မဟာဧကရာဇ်နဲ့ တွေ့ခဲ့တယ်လား။
ဒါကို ကြားလိုက်ရချိန်တွင် ရှောင်ဖန်၏ မျက်နှာမှာ အားကျမှုများဖြင့် ပြည့်နှက်သွားသည်။ တကယ်ကို နှမြောစရာပင်။ ထိုစဉ်က သူသည် ဘိုးဘေး ကစဉ့်ကလျား မဟာဧကရာဇ်နှင့် တွေ့ရန် အနည်းငယ်သာ လိုတော့သည့် နောက်ဆုံး အဟန့်အတားသို့ ရောက်ခဲ့ခြင်း ဖြစ်သည်။ ထိုစဉ်က ဘိုးဘေး၏ ပုံရိပ်ယောင်ကို မြင်ခဲ့ရသော်လည်း ၎င်းမှာ မည်သည့် အသိစိတ်မျှ မရှိသော ရုပ်သေးရုပ်မျှသာ ဖြစ်သည်။ လင်းချန် ပြောပြသော ကြည်နူးစရာကောင်းသော စကားဝိုင်း မျိုးကို သူ တစ်ခါမျှ မကြုံတွေ့ခဲ့ဖူးပေ။
ရှောင်ဖန်၏ ဘေးသို့ လမ်းလျှောက်လာရင်း လင်းချန်က ပြုံးပြလိုက်သည်။
“မြင့်မြတ်နယ်မြေ ပညာရှင်တွေကော ဘယ်မှာလဲ။ သူတို့ကို လာဖို့ အကြောင်းကြားခိုင်းထားတယ် မဟုတ်လား။”
ရှောင်ဖန်က သတိပြန်ဝင်လာပြီး ပြန်ဖြေသည်။
“သူတို့အားလုံး အခု အစည်းအဝေးခန်းမမှာ စောင့်နေကြတယ်။ မင်းရဲ့ ရှေးဟောင်းလင်းမိသားစုက အကြီးအကဲတွေလည်း ပါတာပေါ့။”
လင်းချန်က နားလည်ကြောင်း ခေါင်းညိတ်လိုက်ပြီး ရှောင်ဖန်၏ ပုခုံးကို ပုတ်လိုက်သည်။
“ဒါဆိုရင် အချိန်မဆွဲတော့ဘူး။ အစည်းအဝေးခန်းမကို အခုပဲ သွားကြရအောင်။ လူတိုင်း သိထားဖို့ လိုအပ်တဲ့ ကိစ္စတချို့ ရှိသေးတယ်။”
ရှောင်ဖန်က လေးနက်စွာ ခေါင်းညိတ်လိုက်ပြီး လက်ကို ဝှေ့ယမ်းကာ ဟင်းလင်းပြင်ထဲတွင် အပေါက်ကြီးတစ်ခု ဖောက်လိုက်ပြီး ၎င်းအတွင်းသို့ အရင် ဝင်သွားလေသည်။
အမှန်ပင်။ သူတို့အားလုံးမှာ တာအိုပြည်နယ်သုံးထောင်၏ ပျက်စီးနေသော နိယာမတရားများကို မည်သို့ ပြန်ပြုပြင်ရမည်နည်းနှင့် သူတို့ ဘာတွေ လုပ်ဆောင်ရမည်နည်း ဆိုသည်ကို သိချင်လွန်း၍ မစောင့်နိုင်တော့ပေ။