အခန်း (၂၉၇-၂၉၈)

အခန်း (၂၉၇) - ပင်လယ်နီမိစ္ဆာဂိုဏ်း၏ နည်းစနစ်

ယဲ့ဘုရင်ခံအသစ် ဖြစ်လာတော့မည့် သွမ့်ချောင်ဖုန်းသည် သူ၏အိမ်တော်၌ စန့်ယင်ဂိုဏ်း၏ ချုံခိုတိုက်ခိုက်မှုအား ခံရပြီးနောက် သေလုမျောပါး ဖြစ်ခဲ့ရလေသည်။

ဤသတင်း ပျံ့နှံ့သွားသောအခါ ချက်ချင်းပင် ကြီးမားသော ဂယက်ရိုက်ခတ်မှုကြီးကို ဖြစ်ပေါ်စေခဲ့သည်။

ကုချင်းစီရင်စုနှင့် ဝမ်ရှန့်ပြည်နယ်တစ်ဝန်းလုံးရှိ အင်အားစုများသည် စန့်ယင်ဂိုဏ်းမှာ ဤမျှအထိ မောက်မာရဲလိမ့်မည်ဟု ထင်မှတ်မထားခဲ့ကြပေ။

ကံကောင်းထောက်မစွာဖြင့် ရလဒ်မှာ မဆိုးရွားခဲ့ချေ။ သွမ့်ချောင်ဖုန်းကိုယ်တိုင်မှာမူ မည်သည့်ဒဏ်ရာမျှ မရရှိခဲ့ဘဲ စန့်ယင်ဂိုဏ်းမှ လူများသာ ဖမ်းဆီးသတ်ဖြတ်ခံခဲ့ရလေသည်။

ဤကိစ္စသည် သွမ့်တော်ဝင်မိသားစု၏ အင်အားကို ပြင်ပလူများအား ပြသလိုက်ခြင်းလည်း ဖြစ်ပေသည်။

စန့်ယင်ဂိုဏ်း၏ လုပ်ကြံမှုသတင်းမှာ ပျံ့နှံ့သွားခဲ့သော်လည်း အိမ်တော်၏ တတိယသခင်လေး သွမ့်ချောင်ယွီသည် ရာထူးရရှိရန်အတွက် အစ်ကိုဖြစ်သူကိုပင် သတ်ဖြတ်ရန် စန့်ယင်ဂိုဏ်းနှင့် လျှို့ဝှက်စွာဆက်သွယ်ခဲ့ပုံ၊ စန့်ယင်ဂိုဏ်းသားများအား ကုချင်းစီရင်စုအတွင်းပိုင်းအထိ ဝင်ရောက်လာနိုင်ရန် မည်သို့ကူညီပေးခဲ့ပုံ စသည့် သတင်းများကိုမူ လျှို့ဝှက်ထားခဲ့ကြသည်။

အကယ်၍ ဤကိစ္စသာ ပျံ့နှံ့သွားပါက ယဲ့ဘုရင်ခံအိမ်တော်အပေါ် ဆိုးရွားသော သက်ရောက်မှုများ ရှိလာနိုင်ပြီး သွမ့်တော်ဝင်မိသားစုကိုပင် ထိခိုက်စေနိုင်ပေသည်။

ထို့ကြောင့် ဤအကြောင်းအား လူနည်းစုသာ သိရှိခဲ့ကြသည်။ ယဲ့ဘုရင်ခံအိမ်တော်၏ အဓိကလူယုံများမှလွဲ၍ အင်ပါယာမြို့တော်မှ ထိပ်တန်းပုဂ္ဂိုလ်ကြီးများလောက်သာ သိရှိကြလေသည်။

ဤကိစ္စ ငြိမ်သက်သွားပြီးနောက် အင်ပါယာမြို့တော်မှ လူများစေလွှတ်ကာ သွမ့်ချောင်ဖုန်း၏ အရိုက်အရာဆက်ခံခြင်း အခမ်းအနားအား ကိုယ်တိုင်ဦးစီး ကျင်းပပေးခဲ့လေသည်။

သွမ့်ယွင်ယိသည်လည်း တက်ရောက်ခဲ့ပေသည်။

ထိုအချိန်မှစ၍ သွမ့်ချောင်ဖုန်းသည် ကုချင်းစီရင်စု၏ ယဲ့ဘုရင်ခံအသစ် ဖြစ်လာခဲ့ချေပြီ။

သွမ့်ချောင်ဖုန်းတစ်ယောက် ယဲ့ဘုရင်ခံဖြစ်လာပြီးနောက် ရက်အနည်းငယ်အကြာတွင် သွမ့်ယွင်ယိသည် အင်ပါယာမြို့တော်သို့ ထွက်ခွာသွားခဲ့သည်။

ဤတစ်ကြိမ်တွင်မူ သူသည် အမှန်တကယ် ထွက်ခွာသွားခြင်းပင်။

သွမ့်ယွင်ယိသည် တာအိုနယ်ပယ် အဆင့်ကိုးသို့ ရောက်ရှိရန် ခြေတစ်လှမ်းသာ လိုတော့လေသည်။

ထို့ကြောင့် သူသည် အဆင့်သစ်တစ်ခုသို့ တက်လှမ်းနိုင်ရန် တော်ဝင်မိသားစု၏ တားမြစ်နယ်မြေအတွင်း ဝင်ရောက်ကာ ဆက်လက်ကျင့်ကြံလိုခြင်း ဖြစ်သည်။

သွမ့်ယွင်ယိ အိမ်တော်မှ ထွက်ခွာသွားပြီးနောက် အိမ်တော်တွင် တာအိုနယ်ပယ် အဆင့်ရှစ် ကျင့်ကြံသူတစ်ဦး၏ အကာအကွယ် မရှိတော့သဖြင့် အင်ပါယာနန်းတော်မှ သွမ့်ချောင်ဖုန်းအား ကာကွယ်ရန် တာအိုနယ်ပယ် အဆင့်ရှစ် သိုင်းပညာရှင်တစ်ဦးကို အထူးစေလွှတ်ပေးခဲ့လေသည်။

မည်သို့ပင်ဆိုစေကာမူ လုပ်ကြံမှုတစ်ခု ဖြစ်ပွားခဲ့ပြီးဖြစ်ရာ အင်ပါယာနန်းတော်သည် ဤကိစ္စအား အလေးအနက်ထားကာ ကိုင်တွယ်ခဲ့ခြင်း ဖြစ်ပေသည်။

လုပ်ကြံမှုဖြစ်ပွားပြီးနောက် ရွှီနင်သည် အရင်းအမြစ်မြောက်မြားစွာကို ရရှိခဲ့လေသည်။

ထိုနေ့၌ ရွှီနင်သည် သွမ့်ချောင်ဖုန်းအား ကယ်တင်ခဲ့ပြီးနောက် လိုက်လံတိုက်ခိုက်သူကိုပါ အရှင်ဖမ်းမိခဲ့သည်။ ထို့အပြင် ငါးစာအဖြစ် ဟန်ဆောင်ခဲ့သော စန့်ယင်ဂိုဏ်းမှ လူနှစ်ဦးကိုလည်း အရှင်ဖမ်းဆီးနိုင်ခဲ့လေသည်။

ဤကိစ္စမှာ ရွှီနင်အား နောက်ထပ် ကြီးမားသော ဂုဏ်ပြုမှုတစ်ခုကို ရရှိစေခဲ့သည်။

ဆုလာဘ်အနေဖြင့် သွမ့်ယွင်ယိမှ အင်ပါယာနန်းတော်သို့ လွှဲပြောင်းပေးခဲ့သော လျိုယိမှလွဲ၍ ကျန်လူများထံမှ ရရှိသော တိုက်ပွဲဝင်ပစ္စည်းများအားလုံးမှာ ရွှီနင်၏ ပိုင်ဆိုင်မှု ဖြစ်လာခဲ့သည်။

ထိုအထဲတွင် တာအိုလက်နက်များ၊ ဆေးပြားများ၊ ဝိညာဉ်ဆေးပင်များ၊ ထူးဆန်းသော ရှေးဟောင်းပစ္စည်းများ စသည်တို့ ပါဝင်လေသည်။

စုစုပေါင်း ရွှီနင်သည် စွမ်းအင်ယူနစ် သန်း ၂၀ နီးပါး တန်ဖိုးရှိသော အရင်းအမြစ်များကို ရရှိခဲ့လေသည်။

ကျန်းဟယ်ထံမှ ချေးငှားထားသော အရင်းအမြစ်များအား ပြန်ဆပ်ပြီးနောက်၌ပင် ရွှီနင်၌ စွမ်းအင်ယူနစ် ၂၁ သန်း ကျန်ရှိနေသေးသည်။

ရွှီနင်အနေဖြင့် တာအိုနယ်ပယ်၏ မူလအစနယ်ပယ်သို့ အဆင့်တက်ရန် စွမ်းအင်ယူနစ် ၉ သန်းခန့်သာ လိုအပ်တော့ပေသည်။

မူလအစနယ်ပယ်ဆိုသည်မှာ တာအိုနယ်ပယ်၏ အလှည့်အပြောင်းတစ်ခု ဖြစ်လေသည်။ ရွှီနင်သာ အဆင့်တက်သွားပါက သူ၏စွမ်းအားများသည် ယခုထက် ပိုမိုမြင့်မားလာမည်မှာ အသေအချာပင်။

သွမ့်ယွင်ယိတစ်ယောက် အင်ပါယာမြို့တော်သို့ ထွက်ခွာသွားပြီး သိပ်မကြာမီမှာပင် ရွှီနင်သည် သွမ့်ချောင်ဖုန်း၊ ကျန်းဟယ်နှင့် အခြားသူများကို နှုတ်ဆက်ရတော့မည် ဖြစ်သည်။

ယခင်စီစဉ်ထားချက်များအရ ရွှီနင်သည် ပင်လယ်နီမိစ္ဆာဂိုဏ်းသို့ ဝင်ရောက်ပြီး မျိုးစေ့အဆင့်အတန်းကို ရယူရမည် ဖြစ်လေသည်။

“ရွှီနင်... ဂရုစိုက်သွားဦး”

သူတို့နှစ်ဖက် ခွဲခွာသည့်အခါတွင် ယဲ့ဘုရင်ခံအသစ် သွမ့်ချောင်ဖုန်းမှာ ရွှီနင်အား လိုက်လံပို့ဆောင်ပေးခဲ့လေသည်။

သွမ့်ချောင်ဖုန်းနှင့် ရွှီနင်တို့သည် အသက်အန္တရာယ်ကြုံရသည့် အကျပ်အတည်းများစွာကို အတူတကွ ဖြတ်သန်းခဲ့ဖူးကြလေသည်။

ဤမိတ်ဆွေနှစ်ဦး၏ ဆက်ဆံရေးမှာ အလွန်နက်ရှိုင်းနေပြီဖြစ်ပြီး အနာဂတ်တွင်လည်း တစ်ဦး၏ အဆင့်အတန်းကို တစ်ဦးက အသုံးချကာ အကျိုးစီးပွားများ ဆက်နွှယ်နေကြဦးမည် ဖြစ်သည်။

“စိတ်မပူပါနဲ့ ယဲ့ဘုရင်ခံ”

ဤအချိန်တွင် ရွှီနင်သည် သွမ့်ချောင်ဖုန်းအား ခေါ်ဝေါ်သည့် အသုံးအနှုန်းကို ပြောင်းလဲလိုက်လေပြီ။

“ရွှီနင်... ပင်လယ်နီမိစ္ဆာဂိုဏ်းမှာ ပြဿနာတစ်ခုခုကြုံလာရင် ယဲ့ဘုရင်ခံအိမ်တော်ရဲ့ နာမည်ကိုသာ သုံးလိုက်ပါ။ တစ်ခုခု လိုအပ်လာရင်လည်း ငါ့ဆီ အချိန်မရွေး လာခဲ့လို့ရတယ်”

သွမ့်ချောင်ဖုန်းက ပြောလိုက်သည်။

“ကောင်းပါပြီ”

ရွှီနင် ခေါင်းညိတ်ပြလိုက်သည်။

“အစ်ကိုကျန်း... ကောင်းကောင်း အနားယူပါ။ နောက်တစ်ကြိမ် ကျွန်တော်တို့ ပြန်တွေ့တဲ့အခါ ခင်ဗျား တာအိုနယ်ပယ် အဆင့်ခုနစ်ကို ရောက်နေမယ်လို့ မျှော်လင့်ပါတယ်”

ရွှီနင်က ခေါင်းလှည့်ကာ ကျန်းဟယ်ကို ပြောလိုက်သည်။

ကျန်းဟယ်သည် ယခင်တိုက်ပွဲကြောင့် ထိခိုက်ဒဏ်ရာအတော်များများ ရရှိခဲ့ပြီး အပြည့်အဝ ပြန်လည်ကောင်းမွန်လာခြင်း မရှိသေးပေ။

“ငါ အကောင်းဆုံး ကြိုးစားပါ့မယ်”

ကျန်းဟယ်က ပြုံးပြလိုက်သည်။

ရွှီနင် ဆက်မနေတော့ဘဲ သွမ့်ချောင်ဖုန်းပေးသော တာအိုနယ်ပယ် အလယ်အလတ်အဆင့်၏ အထွတ်အထိပ်ကိုရောက်နေသော သားရဲတစ်ကောင်အား စီးနင်းကာ ဝေးကွာသော မိုးကုတ်စက်ဝိုင်းဆီသို့ ပျံသန်းထွက်ခွာသွားတော့သည်။

ရွှီနင်သည် အစစ်အမှန် ပျံသန်းနိုင်စွမ်း မရှိသေးပေ။ ပျံသန်းနိုင်သော သားရဲ၏ အကူအညီဖြင့်သာ သူ၏ အမြန်နှုန်းမှာ ပိုမိုမြန်ဆန်နိုင်မည် ဖြစ်သည်။

သွမ့်ချောင်ဖုန်းသည် ရွှီနင် ပျောက်ကွယ်သွားရာ မိုးကုတ်စက်ဝိုင်းဆီသို့ လှမ်းကြည့်နေမိသည်။ သူသည် ထိုနေရာ၌ အချိန်အတော်ကြာ ရပ်နေပြီးမှ ကျန်းဟယ်နှင့်အတူ အိမ်တော်သို့ ပြန်လာခဲ့လေသည်။

ရွှီနင်သည် ယခင်သဘောတူညီချက်အရ ပင်လယ်နီမိစ္ဆာဂိုဏ်းသို့ လာရောက်ခေါ်ဆောင်ရန် ကုဆုန်းယင့်ထံသို့ သတင်းမပို့ခဲ့ပေ။ ထိုအစား သူကသာ ကုဆုန်းယင့်အား ကိုယ်တိုင် သွားရောက်ရှာဖွေခဲ့သည်။

အကြောင်းရင်းမှာ ခရီးတစ်ဝက်တွင် သူသည် ယန့်လုဂိုဏ်းသို့ ပြန်သွားရန် လိုအပ်နေသောကြောင့် ဖြစ်သည်။

ယန့်လုဂိုဏ်းတွင် ခေတ္တနေထိုင်ပြီး လိုအပ်သည်များ စီစဉ်ပြီးနောက် ရွှီနင် ထပ်မံထွက်ခွာလာခဲ့သည်။

ဖုန်းလင်စီရင်စုသို့ ရောက်ရှိပြီး ကုဆုန်းယင့်အား ရှာတွေ့ချိန်တွင် ကုဆုန်းယင့်မှာ အလွန်ဝမ်းသာနေတော့သည်။

ရွှီနင်သည် ပင်လယ်နီမိစ္ဆာဂိုဏ်းသို့ ဝင်ရောက်ရန် သဘောတူလိုက်ပြီဖြစ်ရာ သူ့အား ထောက်ခံပေးသူအနေဖြင့် ကုဆုန်းယင့်သည်လည်း ဂိုဏ်းမှ ဆုလာဘ်များ ရရှိမည် ဖြစ်ပေသည်။

ထို့ကြောင့် ကုဆုန်းယင့်သည် အလုပ်အကိုင်အားလုံးကို စွန့်လွှတ်ကာ ရွှီနင်နှင့်အတူ ပင်လယ်နီမိစ္ဆာဂိုဏ်းသို့ ချက်ချင်း အပြေးအလွှား ထွက်လာခဲ့လေသည်။

ပင်လယ်နီမိစ္ဆာဂိုဏ်း၏ တည်နေရာမှာ အင်ပါယာမြို့တော်နှင့် အလွန်နီးကပ်လှသည်။

ပင်လယ်နီမိစ္ဆာသခင်နှင့် သွမ့်တော်ဝင်မိသားစုမှ သိုင်းအရှင်သခင်တို့၏ ဆက်ဆံရေးအား သိရှိထားပြီးဖြစ်ရာ ရွှီနင်အနေဖြင့် ထူးဆန်းသည်ဟု မခံစားရပေ။

“ငါတို့ ရောက်ပြီ”

ရွှီနင်နှင့် ကုဆုန်းယင့်တို့ နှစ်ဦးလုံးသည် ပျံသန်းနိုင်သည့်သားရဲကို အတူတူစီးနင်းလာခဲ့ကြသည်။

ပင်လယ်နီမိစ္ဆာဂိုဏ်းသည် ရေကန်များ ဝန်းရံထားသော ကုန်းတွင်းပိုင်းကျွန်းတစ်ခုပေါ်တွင် တည်ရှိလေသည်။

“ငါတို့ ဒီလိုမျိုး သားရဲစီးပြီး ဝင်သွားကြမှာလား”

ရွှီနင်က မေးလိုက်သည်။

“ဟုတ်တယ်”

ကုဆုန်းယင့်က ပြန်ဖြေသည်။

“ပင်လယ်နီမိစ္ဆာဂိုဏ်းက တကယ်တော့ အရမ်းကို လွတ်လပ်တယ်။ မင်းအနေနဲ့ သားရဲတွေကို ထိန်းချုပ်ပြီး ဂိုဏ်းထဲမှာ လွတ်လွတ်လပ်လပ် ပျံသန်းနိုင်တယ်။ အဲဒီအတွက် ကန့်သတ်ချက်တွေ မရှိဘူး”

“ပင်လယ်နီမိစ္ဆာဂိုဏ်းက ဂိုဏ်းကြီးတစ်ခုဖြစ်ပေမယ့် စီမံခန့်ခွဲမှုက မတင်းကျပ်ဘူး။ ပုံမှန် အရင်းအမြစ်တွေ ထောက်ပံ့ပေးတာနဲ့ ပညာသင်ပေးတာကလွဲရင် ဂိုဏ်းသားတွေနဲ့ သိပ်ပြီး အဆက်အသွယ် မရှိလှဘူး”

“ဂိုဏ်းသားအတော်များများက ပင်လယ်နီမိစ္ဆာဂိုဏ်းရဲ့ အရင်းအမြစ်တွေကို ခံစားနေကြပေမယ့် အပြင်ဘက်မှာ အချိန်အကြာကြီး လှည့်လည်သွားလာနေတတ်ကြတယ်”

ကုဆုန်းယင့်သည် ပင်လယ်နီမိစ္ဆာဂိုဏ်း၏ အခြေအနေအား ရှင်းပြနေခြင်း ဖြစ်သည်။

“အားလုံးက အပြင်ဘက်မှာ လှည့်လည်သွားလာနေကြတယ် ဟုတ်လား။ သူတို့က ဂိုဏ်းရဲ့ အကျိုးကျေးဇူးတွေကို ခံစားပြီး ဘာမှ ပြန်လည်ပေးဆပ်တာမျိုး မရှိဘူးလား”

ရွှီနင်က ထပ်မေးလိုက်သည်။

“ဂိုဏ်းက ဘာအကျိုးအမြတ်မှ ပြန်မလိုချင်ပါဘူး”

ဤသို့ပြောလိုက်ချိန်တွင် ကုဆုန်းယင့်၏ လေသံ၌ ဂုဏ်ယူသည့်အရိပ်အယောင်တစ်ခု ပါဝင်နေလေသည်။

ရွှီနင်သည် ပင်လယ်နီမိစ္ဆာသခင်၏ နောက်ခံသမိုင်းကြောင်းကို ပြန်လည်အမှတ်ရသွားလေသည်။

အမှန်တကယ်ပင် ထိုသူသည် ပင်လယ်နီမိစ္ဆာဂိုဏ်းအား တည်ထောင်ခဲ့ရခြင်း၏ အကြောင်းရင်းမှာ ဂိုဏ်းအား ချဲ့ထွင်ရန်မဟုတ်ဘဲ သူ၏ပညာရပ်များကို လက်ဆင့်ကမ်းပေးရန်အတွက်သာ ဖြစ်ပေသည်။

“ဒါပေမဲ့ ဒီလိုဆိုရင် ဂိုဏ်းသားတွေက ဂိုဏ်းကို ဘာမှ ပြန်မပေးဘူးဆိုတော့ ဒီလောက်ကြီးမားတဲ့ ဂိုဏ်းကြီးက အရင်းအမြစ်တွေကို ဘယ်ကရနေတာလဲ”

ပင်လယ်နီမိစ္ဆာသခင်၏ နောက်ကွယ်တွင် သွမ့်တော်ဝင်မိသားစု ရှိနေလျှင်ပင် သွမ့်တော်ဝင်မိသားစု၏ အရင်းအမြစ်များကို ပင်လယ်နီမိစ္ဆာဂိုဏ်းသို့ ထောက်ပံ့ပေးမည်မဟုတ်ဟု ရွှီနင် ယူဆထားမိသည်။

“တစ်စိတ်တစ်ပိုင်းကတော့ သိုင်းပညာအရင်းအမြစ်တွေကို ဖလှယ်ရာကနေ ရတာပါ။ ပြင်ပတာဝန်ခံတစ်ယောက်အနေနဲ့ ငါက အဲဒီအတွက် တာဝန်ယူရတယ်”

ကုဆုန်းယင့်က ခေါင်းခါပြလိုက်သည်။

“တခြားဂိုဏ်းရဲ့ အရင်းအမြစ်တွေအတွက်ကတော့ ဂိုဏ်းချုပ်နဲ့ အကြီးအကဲတွေက တာဝန်ယူရတယ်”

“သြော်... အဲဒီလိုကိုး”

ရွှီနင်က တိတ်ဆိတ်စွာ ခေါင်းညိတ်လိုက်လေသည်။

ထို့နောက် သူတို့သည် ပျံသန်းနိုင်သည့် သားရဲအား စီးနင်းကာ ကျွန်းပေါ်သို့ ဝင်ရောက်လာကြသည်။

“ဒါက ဘယ်လိုလုပ် ဂိုဏ်းတစ်ခု ဖြစ်နေရတာလဲ”

ရွှီနင်သည် ကောင်းကင်ပေါ်မှ ငုံ့ကြည့်လိုက်လေသည်။

ကျယ်ဝန်းလှသော ဤကျွန်းပေါ်ရှိ အဆောက်အအုံများအား ရွာလေးများကဲ့သို့ စီစဉ်ထားပြီး လူများ နေထိုင်လျက်ရှိသည်။

ဤကျွန်းပေါ်တွင် အစွမ်းထက်သော သိုင်းပညာရှင်များသာမက သာမန်လူများလည်း ရှိနေကြောင်း ရွှီနင် တွေ့ရှိလိုက်ရသည်။

ဤလူနေမှုပုံစံအား ကြည့်ရသည်မှာ ဤနေရာသည် ဂိုဏ်းတစ်ခုနှင့် မတူဘဲ ကြီးမားသော လူနေအခြေချစခန်းတစ်ခုနှင့် ပိုတူနေပေသည်။

“မတူဘူးမလား”

ကုဆုန်းယင့်က ပြောလိုက်သည်။

“ပင်လယ်နီမိစ္ဆာဂိုဏ်းရဲ့ ဂိုဏ်းသားတွေက လှည့်လည်သွားလာနိုင်ပြီး ဂိုဏ်းကို ပြန်မလာလည်း ရတယ်။ အလားတူပဲ သူတို့ရဲ့ ဇနီးသည်နဲ့ ကလေးတွေကို ကျွန်းပေါ်မှာ နေထိုင်ဖို့ ခေါ်လာခွင့်ရှိတယ်။ ပင်လယ်နီမိစ္ဆာဂိုဏ်းမှာ ဂိုဏ်းသား သောင်းနဲ့ချီ ရှိပေမယ့် ဒီကျွန်းပေါ်က လူဦးရေက နှစ်သိန်းကျော် ရှိတယ်။ ဒါ့အပြင် ဂိုဏ်းသားအများစုက ကျွန်းရဲ့အပြင်ဘက်မှာ ရှိနေကြတော့ ဒီလူတွေအားလုံးက ဂိုဏ်းသားတွေရဲ့ ဆွေမျိုးတွေချည်းပဲ”

“စိတ်ဝင်စားစရာပဲ”

ရွှီနင်က ပြုံးလိုက်သည်။

မိစ္ဆာဂိုဏ်းဟု ခေါ်သော်လည်း ဂိုဏ်း၏ အတွင်းပိုင်းမှာ လူ့လောက၏ အငွေ့အသက်များဖြင့် ပြည့်နှက်နေပေသည်။

ရွာတွင် မွေးဖွားခဲ့သော ရွှီနင်သည် ဤပတ်ဝန်းကျင်အပေါ် အမြင်ကောင်းရှိနေလေသည်။

တာအိုနယ်ပယ်၏ အဆင့်မြင့်ပိုင်းသို့ ရောက်ရှိသွားပါက သူ၏ မိသားစုကို ဤနေရာသို့ ခေါ်ဆောင်လာနိုင်ကြောင်း ရွှီနင် တွေးတောမိလိုက်သည်။

သူ၏မိသားစုသည် ဤပတ်ဝန်းကျင်မျိုးနှင့် သေချာပေါက် ယဉ်ပါးသွားနိုင်ပေလိမ့်မည်။

“ညီအစ်ကိုရွှီ... အကြီးအကဲဝေ့ကို သွားရှာကြရအောင်။ သူက မျိုးစေ့အဆင့် ဂိုဏ်းသားတွေ ဝင်ခွင့်အတွက် တာဝန်ယူရသူလေ”

ကုဆုန်းယင့်သည် ရွှီနင်အား ရွာတစ်ရွာသို့ ခေါ်ဆောင်သွားလေသည်။

ရွာထဲတွင် ယောကျ်ား၊ မိန်းမ၊ သက်ကြီးရွယ်အိုများနှင့် ကလေးငယ်များ ရှိနေကြပြီး အားလုံးမှာ ကိုယ့်အလုပ်နှင့်ကိုယ် အလုပ်ရှုပ်နေကြသည်။

ရွှီနင်နှင့် ကုဆုန်းယင့်တို့၏ ပျံသန်းနိုင်သည့် သားရဲ ဆင်းသက်လာသည်ကို မြင်သောအခါ သူတို့သည် တစ်ချက်သာ ကြည့်လိုက်ပြီး လျစ်လျူရှုထားလိုက်ကြသည်။

သိသာထင်ရှားစွာပင် သူတို့သည် ဤမြင်ကွင်းနှင့် ယဉ်ပါးနေကြပြီ ဖြစ်သည်။

ပျံသန်းနိုင်သည့်သားရဲအား စောင့်နေရန် အမိန့်ပေးပြီးနောက် ကုဆုန်းယင့်သည် ရွှီနင်အား လယ်သမားအိမ်တစ်လုံးသို့ ခေါ်ဆောင်သွားလေသည်။

“အကြီးအကဲဝေ့ အထဲမှာ ရှိတယ်။ သူက ဝေ့မိသားစုရဲ့ ခေါင်းဆောင်ပဲ”

ကုဆုန်းယင့်က ရွှီနင်ကို သတိပေးလိုက်သည်။

လယ်သမားအိမ်ထဲသို့ ဝင်သွားပြီးနောက် ဦးထုပ်ဆောင်းထားသော လယ်သမားအဘိုးအိုတစ်ဦးကို တွေ့လိုက်ရသည်။ သူသည် ပေါက်ပြားတစ်လက်ကို ကိုင်ဆောင်ကာ မြေကြီးအား တူးဆွနေလေသည်။

ရွှီနင် တစ်ချက်ကြည့်လိုက်ရာ မြေကြီးထဲတွင် ဝိညာဉ်ဆေးပင်များ သို့မဟုတ် ဝိညာဉ်အပင်များ စိုက်ပျိုးထားခြင်းမဟုတ်ဘဲ သာမန်ဟင်းသီးဟင်းရွက်များကိုသာ စိုက်ပျိုးထားကြောင်း သတိပြုမိလိုက်သည်။

“အကြီးအကဲဝေ့”

ကုဆုန်းယင့်က လယ်သမားအဘိုးအိုကို ရိုသေစွာ အရိုအသေပေးလိုက်သည်။

လယ်သမားအဘိုးအိုက ခေါင်းမော့ကြည့်လိုက်ရာ သူ၏ အရေးအကြောင်းများ ပြည့်နှက်နေသော မျက်နှာကို မြင်လိုက်ရသည်။

သူသည် တာအိုနယ်ပယ် သိုင်းပညာရှင်တစ်ဦးနှင့် လုံးဝ မတူညီပေ။

“မင်းက ဘယ်သူလဲ”

လယ်သမားအဘိုးအိုက ကုဆုန်းယင့်အား တစ်ချက်ကြည့်လိုက်သည်။

ပင်လယ်နီမိစ္ဆာဂိုဏ်းတွင် လူများလွန်းလှသဖြင့် ကုဆုန်းယင့်ကဲ့သို့သော သာမန်လူတစ်ဦးအား မှတ်မိပုံမရချေ။

“ကျွန်တော်က ဖုန်းလင်စီရင်စုကို တာဝန်ပေးခံထားရတဲ့ ပြင်ပတာဝန်ခံ ကုဆုန်းယင့်ပါ”

ကုဆုန်းယင့်က အနည်းငယ်မျှ တွန့်ဆုတ်မနေဘဲ သူလာရောက်ရသည့် အကြောင်းရင်းကို အမြန်ရှင်းပြလိုက်သည်။

“ကျွန်တော် ဒီကို မျိုးစေ့တံဆိပ်ပြားပိုင်ရှင် ဂိုဏ်းသားတစ်ယောက်ကို လာထောက်ခံပေးတာပါ”

“မျိုးစေ့တံဆိပ်ပြားပိုင်ရှင် ဂိုဏ်းသား ဟုတ်လား”

လယ်သမားအဘိုးအိုက ပေါက်ပြားကို ပစ်ချကာ ဦးထုပ်ကို ချွတ်လိုက်သည်။

“ဂါရဝပြုပါတယ် အကြီးအကဲဝေ့”

ရွှီနင်က အရိုအသေပေးလိုက်သည်။

ဤသာမန်ရုပ်ရည်ရှိသော အကြီးအကဲဝေ့သည် တာအိုနယ်ပယ် အဆင့်ရှစ် သိုင်းပညာရှင်တစ်ဦးဖြစ်ကြောင်း သူ အာရုံခံမိလိုက်သည်။

“တံဆိပ်ပြားက ဘယ်မှာလဲ”

လယ်သမားအဘိုးအိုက မေးလိုက်သည်။

ထို့နောက် ရွှီနင်သည် ချောက်နက်ကြီးမြောက်ပိုင်းရှိ ပင်လယ်နီမိစ္ဆာသခင်၏ လျှို့ဝှက်နယ်မြေမှ ရရှိခဲ့သော အနက်ရောင်ပုတီးစေ့အား ထုတ်ယူကာ လယ်သမားအဘိုးအိုထံသို့ ကမ်းပေးလိုက်သည်။

လယ်သမားအဘိုးအိုက ယူကြည့်လိုက်ပြီး ခေါင်းညိတ်လိုက်သည်။

“ဟုတ်တယ်... ဒါ မျိုးစေ့တံဆိပ်ပြားပဲ”

“ဒီမျိုးစေ့တံဆိပ်ပြားက ပြင်ပက ရလာတာ ဖြစ်ရမယ်”

လယ်သမားအဘိုးအိုသည် မျိုးစေ့တံဆိပ်ပြားအား ရွှီနင်ထံ ပြန်မပေးဘဲ သိမ်းဆည်းလိုက်လေသည်။

“ဟုတ်ပါတယ်... ကျွန်တော်က ချောက်နက်ကြီးမြောက်ပိုင်းကပါ”

ရွှီနင်က ပြန်ဖြေလိုက်သည်။

“ဒါကို ယူထားလိုက်”

လယ်သမားအဘိုးအိုက ရွှီနင်အား အနက်ရောင်သံမဏိတံဆိပ်ပြားတစ်ခု ပေးလိုက်သည်။

ရွှီနင် ယူကြည့်လိုက်သောအခါ ထိုအနက်ရောင်သံမဏိတံဆိပ်ပြားပေါ်တွင် မည်သည့်အမှတ်အသားမျှ မရှိသည်ကို တွေ့လိုက်ရလေသည်။

အခန်း (၂၉၈) - တန်းဟိုင်မျှော်စင်အား ဖြတ်ကျော်ခြင်း

“လူသစ်တစ်ယောက်အနေနဲ့ မင်းလက်ထဲက ဒီတံဆိပ်ပြားနဲ့ တန်းဟိုင်မျှော်စင်ကို သွားရမယ်”

လယ်သမားအဘိုးအိုဖြစ်သော အကြီးအကဲဝေ့က ရွှီနင်ကို ပြောလိုက်သည်။

“တန်းဟိုင်မျှော်စင်ဟုတ်လား”

ရွှီနင်က မျက်ခုံးပင့်လိုက်သည်။

“တန်းဟိုင်မျှော်စင်က ကျွန်းရဲ့ အလယ်ဗဟိုမှာ ရှိတယ်။ ဒီတံဆိပ်ပြားနဲ့ဆိုရင် မင်း ဝင်ခွင့်ရလိမ့်မယ်”

အကြီးအကဲဝေ့က ဆက်ပြောလေသည်။

“အထဲရောက်သွားရင် အမြင့်ဆုံးအထပ်တွေကို ရောက်အောင် ကြိုးစားပြီး တက်သွားလိုက်။ ပိုမြင့်တဲ့နေရာကို ရောက်လေ မင်းရဲ့အကဲဖြတ်မှုရလဒ်က ပိုကောင်းလေပဲ။ အဲဒါက မင်းအတွက် အကျိုးရှိလိမ့်မယ်။”

“ဒီလိုကိုး...”

ရွှီနင် ခေါင်းညိတ်လိုက်သည်။

“ကျေးဇူးတင်ပါတယ် အကြီးအကဲဝေ့”

“ပင်လယ်နီမိစ္ဆာဂိုဏ်းရဲ့ မျိုးစေ့တွေက ဘာအဓိပ္ပါယ်လဲဆိုတာကို မင်းသိမှာပါနော်”

အကြီးအကဲဝေ့က မေးလိုက်လေသည်။

“ကျွန်တော် ရှင်းရှင်းလင်းလင်း သိပါတယ်”

ရွှီနင် ပြန်ဖြေလိုက်သည်။

“ပင်လယ်နီမိစ္ဆာဂိုဏ်းရဲ့ မျိုးစေ့တွေဆိုတာ တစ်ဂိုဏ်းလုံးရဲ့ အဓိကအကျဆုံး ပါရမီရှင်တွေပဲ။ နောက်လာမယ့် သုံးနှစ်ကနေ ဆယ်နှစ်အတွင်းမှာ မင်းတို့ထဲက တစ်ယောက်က ပင်လယ်နီမိစ္ဆာဂိုဏ်းရဲ့ ဂိုဏ်းချုပ်သစ်နဲ့ အကြီးအကဲတွေအဖြစ် သေချာပေါက် ရွေးချယ်ခံရပြီး ဒီဂိုဏ်းကြီးရဲ့ ထောက်တိုင်အသစ်တွေ ဖြစ်လာကြလိမ့်မယ်။”

အကြီးအကဲဝေ့က ပြောလိုက်လေသည်။

“မင်းက အခုမှ ရောက်လာတယ်ဆိုပေမဲ့ အစွမ်းကုန်ယှဉ်ပြိုင်ဖို့ ပြင်ဆင်ထားရမယ်။ မင်းရဲ့ ကျင့်စဉ်အဆင့် နိမ့်နေလို့ဆိုပြီး တခြားမျိုးစေ့တွေနဲ့ ယှဉ်ပြိုင်ရမယ့်အရေးကို အရှုံးမပေးလိုက်နဲ့ဦး။”

သူ၏ကျင့်စဉ်အဆင့် နိမ့်ပါးသည်ဟု အပြောခံရခြင်းမှာ ဤသည်က ရွှီနင်အတွက် ပထမဆုံးအကြိမ်ပင် ဖြစ်သည်။ သို့သော် သူသည် ဤကိစ္စအား သိပ်ပြီး ဂရုမစိုက်လှပေ။

စွမ်းအင်လုံလောက်စွာ ရှိနေသရွေ့ ကျင့်စဉ်အဆင့်ကို မြှင့်တင်ရန်မှာ ရွှီနင်အတွက် ခက်ခဲသောကိစ္စ မဟုတ်ပါချေ။

“သတိပေးတဲ့အတွက် ကျေးဇူးတင်ပါတယ် အကြီးအကဲဝေ့။”

ရွှီနင်က နောက်တစ်ကြိမ် ထပ်မံကျေးဇူးတင်စကား ဆိုလိုက်သည်။

“ကုဆုန်းယင့်...”

အကြီးအကဲဝေ့သည် ကုဆုန်းယင့်ကို တစ်ချက် ကြည့်လိုက်လေသည်။

“အကြီးအကဲဝေ့”

ကုဆုန်းယင့်မှာ ရိုသေလေးစားစွာဖြင့် အလျင်အမြန် ထူးလိုက်လေသည်။

“မျိုးစေ့တစ်ယောက်ကို ကြိုဆိုတဲ့နေရာမှာ မင်းက ကောင်းကောင်းကူညီပေးခဲ့တယ်။ နောက်ဆိုရင် မင်းက ပြင်ပတာဝန်ခံ လုပ်စရာမလိုတော့ဘူး။ ကျွန်းရဲ့ အတွင်းပိုင်းတာဝန်ခံ ဖြစ်လာလိမ့်မယ်။ အတိအကျ စီစဉ်ပေးမှုတွေနဲ့ တခြားအရင်းအမြစ်တွေအတွက်ကတော့ ဂိုဏ်းက စီစဉ်ပေးလာတဲ့အထိ စောင့်နေလိုက်။”

အကြီးအကဲဝေ့၏ စကားများကြောင့် ကုဆုန်းယင့်၏ မျက်နှာပေါ်တွင် အပြုံးပန်းများ ဝေဆာသွားတော့သည်။

“ကျေးဇူးတင်ပါတယ် အကြီးအကဲဝေ့”

ကုဆုန်းယင့်တစ်ယောက် ရွှီနင်အ ကြိုဆိုရန် တက်ကြွစွာ ဆောင်ရွက်ခဲ့ခြင်း၏ အဓိကအကြောင်းရင်းတစ်ခုမှာ ဂိုဏ်းမှ ချီးမြှင့်မည့် ဤဆုလာဘ်ကို ရရှိလို၍ပင် ဖြစ်ပေသည်။

သူ့၌ ထူးချွန်သော ပါရမီမရှိသလို ယခုလက်ရှိအဆင့်သို့ ရောက်ရှိလာစေရန်အတွက်လည်း ဆင်းရဲဒုက္ခများစွာကို ခံခဲ့ရခြင်း ဖြစ်သည်။

ယခုအခါ သူသည် အတွင်းပိုင်းတာဝန်ခံ ဖြစ်လာပြီဖြစ်ရာ ဂိုဏ်းအတွင်းတွင် သူ၏ အဆင့်အတန်းမှာ မြင့်မားလာခြင်းနှင့် အတူတူပင်။

ဤသို့ အဆင့်အတန်း မြင့်မားလာခြင်းဖြင့် သူသည် အရင်းအမြစ်များနှင့် အခွင့်အလမ်းများကို ပိုမိုရရှိနိုင်ပေလိမ့်မည်။

“ကောင်းပြီ၊ တန်းဟိုင်မျှော်စင်ကို သွားကြတော့။”

အကြီးအကဲဝေ့သည် ရွှီနင်အား လက်ဝှေ့ယမ်းပြလိုက်ပြီးနောက် သူ၏ ပေါက်တူးကို ပြန်လည်ကောက်ယူလိုက်လေသည်။

“ဟုတ်ကဲ့ပါဗျာ။”

ရွှီနင်နှင့် ကုဆုန်းယင့်တို့သည် ခြံဝင်းငယ်လေးထဲမှ ယှဉ်တွဲထွက်လာခဲ့ကြသည်။

“ညီအစ်ကိုရွှီ... အာ.. ညီလေးရွှီ၊ မင်းကျေးဇူးကြောင့် ငါလည်း အကျိုးအမြတ်တွေ ရခဲ့ပြီ။”

ကုဆုန်းယင့်မှာ အလွန်တရာ ပျော်ရွှင်နေလေသည်။

“အခု ငါက ဂိုဏ်းရဲ့ အတွင်းပိုင်းတာဝန်ခံ ဖြစ်လာပြီဆိုတော့ ဂိုဏ်းရဲ့ကျွန်းပေါ်မှာ အချိန်အကြာကြီး နေခွင့်ရပြီ။ မင်းမှာ ခိုင်းစရာရှိရင် အချိန်မရွေး ခေါ်ခိုင်းလို့ရတယ်နော်။”

ကုဆုန်းယင့်သည် ရွှီနင်နှင့် တစ်စတစ်စ ပိုမိုရင်းနှီးလာစေရန် ကြိုးစားနေလေသည်။

သူသည် ရွှီနင်၏ လမ်းပြအဖြစ် ဆောင်ရွက်ခဲ့ရခြင်းမှာ ဂိုဏ်းမှ ဆုလာဘ်အား ရရှိလိုခြင်းကြောင့် ဖြစ်သလို အခြားအကြောင်းရင်းတစ်ခုမှာလည်း ရွှီနင်နှင့် ရင်းနှီးကျွမ်းဝင်လို၍ ဖြစ်ပေသည်။

အနာဂတ်တွင် ရွှီနင်၏ အဆင့်အတန်း မြင့်မားလာသောအခါ သူသည်လည်း အကျိုးအမြတ် ခံစားရမည်သာ။

“ဒါဆိုရင်တော့ အစ်ကိုကုကို အလုပ်ရှုပ်စေရတော့မယ်။”

ရွှီနင်က ကျေးဇူးတင်စကား ဆိုလိုက်သည်။

ယခုအခါ သူသည် လူသစ်တစ်ယောက် ဖြစ်နေ၍ ဂိုဏ်း၏ အခြေအနေအရပ်ရပ်အား ရင်းနှီးကျွမ်းဝင်မှု မရှိသေးပေ။

ကုဆုန်းယင့်၏ အကူအညီဖြင့်ဆိုပါက ပို၍ အဆင်ပြေချောမွေ့သွားပေလိမ့်မည်။

“အလုပ်မရှုပ်ပါဘူးကွာ... လုံးဝ အလုပ်မရှုပ်ပါဘူး။”

ကုဆုန်းယင့်က တဟဲဟဲ ရယ်မောလိုက်လေသည်။

ယခုအချိန်တွင် သူသည် ရွှီနင်အား အလုံးစုံ အားကိုးအားထားပြုနေပြီ ဖြစ်သည်။

ရုတ်တရက် ကုဆုန်းယင့်တစ်ယောက် သူ၏ဝမ်းကွဲညီဖြစ်သူ တင်းပိုင်အား သတိရသွားလေသည်။

တင်းပိုင်သာ ယွမ်ရှန်းဂိုဏ်းနှင့် ပြဿနာရှာရန် အစပြုခဲ့ခြင်း မရှိပါက သူသည်လည်း ရွှီနင်နှင့် ဤမျှ ရင်းနှီးလာနိုင်စရာ အကြောင်းမရှိပေ။

“ညီလေးရွှီ... ကျွန်းပေါ်မှာ မင်းနေဖို့ထိုင်ဖို့နဲ့ ဂိုဏ်းထဲဝင်တဲ့အခါ လုပ်ရမယ့် အသေးအဖွဲကိစ္စတွေကို ငါတာဝန်ယူပြီး စီစဉ်ပေးထားပါ့မယ်။ မင်းကတော့ အရင်ဆုံး တန်းဟိုင်မျှော်စင်ကိုသွားပြီး အရေးကြီးတဲ့ကိစ္စတွေကိုသာ ဖြေရှင်းလိုက်ပါ”

ကုဆုန်းယင့်က ပြောလိုက်သည်။

“ကျေးဇူးပါပဲ အစ်ကိုကု”

ထို့နောက် ရွှီနင်သည် ပျံသန်းနိုင်သော မိစ္ဆာသားရဲတစ်ကောင်အား စီးနင်းကာ ကျွန်း၏အလယ်ဗဟိုရှိ တန်းဟိုင်မျှော်စင်ဆီသို့ ထွက်ခွာသွားလေတော့သည်။

လေထဲတွင် မိစ္ဆာသားရဲအား စီးနင်းပျံသန်းနေစဉ် ရွှီနင်သည် အဆင့်မြင့် တာအိုနယ်ပယ် သိုင်းပညာရှင်တစ်ဦးနှင့် အခြားပျံသန်းနိုင်သော မိစ္ဆာသားရဲများကိုလည်း ဆုံတွေ့ခဲ့ရလေသည်။

‘ဟိုဟာက တန်းဟိုင်မျှော်စင်လား...’

ကုဆုန်းယင့် လမ်းညွှန်လိုက်သည့်အတိုင်း လိုက်ကြည့်လိုက်ရာ ရွှီနင်သည် ကျွန်း၏အလယ်ဗဟိုရှိ နောက်ထပ်ကျွန်းငယ်လေးတစ်ခုကို မြင်တွေ့လိုက်ရသည်။

ထိုကျွန်းငယ်လေးပေါ်တွင် မည်းနက်ကာ မြင့်မားလျက်ရှိသော အဆောက်အအုံကြီးတစ်ခု ရှိနေလေသည်။

သူသည် သေသေချာချာ ရေတွက်ကြည့်လိုက်ရာ စုစုပေါင်း တစ်ဆယ့်နှစ်ထပ် ရှိကြောင်း သိလိုက်ရသည်။

ကောင်းကင်ယံမှ ငုံ့ကြည့်လိုက်သောအခါ တန်းဟိုင်မျှော်စင်ရှိရာ ကျွန်းငယ်လေးပေါ်တွင် လူသူတစ်ယောက်မျှ မရှိချေ။

ကျွန်းအပြင်ဘက်ရှိ ရေကန်အား ဖြတ်သန်းသွားကြသူများရှိသော်လည်း မည်သူကမျှ အနားသို့ ချဉ်းမကပ်ရဲကြပေ။

ဤတန်းဟိုင်မျှော်စင်အား ပင်လယ်နီမိစ္ဆာဂိုဏ်း၏ အထူးသီးသန့်နယ်မြေတစ်ခုအဖြစ် သတ်မှတ်ထားကြောင်း သိသာထင်ရှားလှပေသည်။

သာမန်အခြေအနေမျိုးတွင် အခြားသူများအား ဤနေရာသို့ လာရောက်ခွင့် ပိတ်ပင်ထားလေသည်။

“ဆင်းမယ်”

ရွှီနင်သည် မိစ္ဆာသားရဲအားစီးကာ ရေကန်အနီးတွင် ရပ်တန့်လိုက်သည်။

လုံခြုံရေးအရ ရွှီနင်သည် ကျွန်းငယ်လေးဆီသို့ တစ်ယောက်တည်း သွားရန် ဆုံးဖြတ်လိုက်သည်။

သူသည် ရေကန်ကို ဖြတ်ကျော်ကာ ကျွန်းငယ်လေးဆီသို့ အပြေးအလွှား သွားလိုက်လေသည်။

ဖြတ်သွားဖြတ်လာလူများမှာ ရွှီနင်အား မြင်လိုက်ရသောအခါ အများစုမှာ ရပ်တန့်သွားကြသည်။

“နောက်ထပ် မျိုးစေ့တစ်ယောက် ရောက်လာပြန်ပြီ။”

“ဒီမျိုးစေ့ကရော ဘယ်လောက်အမြင့်အထိ တက်နိုင်မလဲ မသိဘူးနော်။”

“ဆဋ္ဌမအထပ်ကိုတော့ ကျော်နိုင်မှာ မဟုတ်ဘူး။ ဒီမျိုးစေ့ရဲ့ အင်အားက အဆင့်မြင့် တာအိုနယ်ပယ်ကို ရောက်နေတဲ့ပုံ မပေါ်ဘူး”

ထိုသို့ ရပ်တန့်ကြည့်ရှုနေသူအချို့မှာ ပင်လယ်နီမိစ္ဆာဂိုဏ်း၏ တပည့်များဖြစ်ကြပြီး အချို့မှာမူ ဤနေရာရှိ တပည့်များ၏ ဆွေမျိုးများ ဖြစ်ကြလေသည်။

သူတို့၏ ကျင့်စဉ်အဆင့်များမှာ ကွဲပြားနေကြသော်လည်း အားလုံးက ပွဲကြည့်ရန် စုဝေးရောက်ရှိလာကြကာ စိတ်အားထက်သန်စွာဖြင့် စကားပြောဆိုနေကြသည်။

ရွှီနင်သည် ရေကန်ကို ဖြတ်လျှောက်ကာ ကျွန်းငယ်လေးပေါ်သို့ ရောက်ရှိသွားတော့သည်။

‘လမ်းပြမရှိဘူးလား...’

ရွှီနင်တစ်ယောက် ပတ်ဝန်းကျင်အား ဝေ့ကြည့်လိုက်ရာ တန်းဟိုင်မျှော်စင်တွင် တာဝန်ချထားသော အကြီးအကဲများ၊ တပည့်များ သို့မဟုတ် အစောင့်အကြပ် တစ်ဦးတစ်ယောက်မျှ မရှိသည်ကို တွေ့လိုက်ရသည်။ တန်းဟိုင်မျှော်စင်ထဲသို့ မည်သို့ ဝင်ရမည်ကို သူ မသိချေ။

ရုတ်တရက် ရွှီနင်၏ ခေါင်းအထက်ရှိ လေထုမှာ မည်းမှောင်သွားသကဲ့သို့ ခံစားလိုက်ရသည်။

မည်သည့်အချိန်မှစ၍ ရောက်နေမှန်းမသိသော အနက်ရောင် ငှက်ကြီးတစ်ကောင် ထွက်ပေါ်လာပြီး ရွှီနင်၏ ခေါင်းပေါ်တွင် ဝဲပျံနေလေသည်။

အနက်ရောင်ငှက်ကြီးသည် တောင်ပံများကို ခတ်ကာ ရွှီနင်၏ အရှေ့သို့ ဆင်းသက်လာသည်။

‘ဒီငှက်မည်းကြီးက ရင်းနှီးနေသလိုပဲ...’

ချောက်နက်ကြီးမြောက်ပိုင်းရှိ ပင်လယ်နီမိစ္ဆာသခင်၏ အမွေအနှစ်လျှို့ဝှက်နယ်မြေတွင် ရှိနေစဉ်က ဤကဲ့သို့သော အနက်ရောင်ငှက်ကြီးကို မြင်တွေ့ခဲ့ဖူးကြောင်း ရွှီနင် ရုတ်တရက် သတိရသွားသည်။

၎င်းမှာ ရွှီနင်အား ပင်လယ်နီဆေးကျမ်းကို လွှဲပြောင်းပေးအပ်ခဲ့ပြီး မျိုးစေ့တံဆိပ်ပြားကို ပေးအပ်ခဲ့သော ငှက်မည်းကြီးပင် ဖြစ်လေသည်။

သို့သော် ထိုစဉ်က ငှက်မည်းကြီးမှာ လက်ဖဝါးနှစ်ဖက်စာ အရွယ်အစားသာ ရှိခဲ့သော်လည်း ယခု သူ့ရှေ့မှောက်ရှိ ငှက်မည်းကြီးမှာမူ နှစ်မီတာနီးပါးခန့် မြင့်မားနေလေသည်။

“အယ်...”

ရွှီနင် စကားမပြောနိုင်မီမှာပင် ငှက်မည်းကြီးသည် လူသားတစ်ဦးကဲ့သို့ အံ့ဩသွားသော အမူအရာကို ပြသလိုက်သည်။

၎င်းက ရွှီနင်ကို အကဲခတ်သည့်အလား ဟိုဟိုဒီဒီ ကြည့်လိုက်သည်။

ထို့နောက် ၎င်း၏ ခြေသည်းနှစ်ဖက်ဖြင့် ဆင်းသက်ကာ ရွှီနင်အား ပတ်လည်လှည့်၍ အကြိမ်အနည်းငယ် လေ့လာလိုက်ရာ ၎င်း၏လှုပ်ရှားမှုများမှာ အတော်လေး ရယ်စရာကောင်းနေပေသည်။

“မင်းက ချောက်နက်ကြီးမြောက်ပိုင်းဆီကနေ ပင်လယ်နီဆေးကျမ်းကို ရခဲ့တဲ့ ကောင်လေး မဟုတ်လား”

ငှက်မည်းကြီးက မယုံကြည်နိုင်စွာဖြင့် မေးလိုက်လေသည်။

“ဗျာ...”

ရွှီနင် ထိုစကားကို ကြားသောအခါ ဤငှက်မည်းကြီးမှာ ချောက်နက်ကြီးမြောက်ပိုင်းမှ ငှက်မည်းကြီးနှင့် ဆက်စပ်မှုရှိနေကြောင်း ရုတ်တရက် သဘောပေါက်သွားတော့သည်။

“ဟုတ်ပါတယ် စီနီယာ။ ကျွန်တော်က လွန်ခဲ့တဲ့ သုံးနှစ်က ချောက်နက်ကြီးမြောက်ပိုင်းမှာ ပင်လယ်နီဆေးကျမ်းရဲ့ အမွေအနှစ်ကို ရရှိခဲ့တာပါ။”

ရွှီနင်က ပြန်ဖြေလိုက်သည်။

“မင်းရဲ့ တိုးတက်နှုန်းက တကယ်ကို မြန်ဆန်လှပါလားကွာ။ အဲဒီတုန်းက မင်းက ဟင်းလင်းပြင်နယ်ပယ် အထွတ်အထိပ်မှာပဲ ရှိသေးတာကို ငါမှတ်မိတယ်။ အခုတော့ မင်းက တာအိုနယ်ပယ် ဆဋ္ဌမအဆင့်ကို ရောက်နေပြီပဲ။”

ဤငှက်မည်းကြီး၏ မျက်နှာအမူအရာနှင့် လေသံမှာ ချောက်နက်ကြီးမြောက်ပိုင်းရှိ အမွေအနှစ်နယ်မြေထဲမှ ငှက်မည်းကြီးနှင့် အတိအကျ တူညီနေလေသည်။

ငှက်မည်းကြီးက စုပ်သပ်လိုက်ပြီး ၎င်း၏ အနက်ရောင်တောင်ပံများကို ဆန့်ထုတ်ကာ ရွှီနင်၏ ပခုံးကို ပုတ်လိုက်သည်။

“မဆိုးဘူး... မဆိုးဘူး။ မင်းက တကယ်ကို ငါရှာတွေ့ခဲ့တဲ့ မျိုးစေ့ကောင်းလေးပဲ”

ရွှီနင် နားမလည်ဖြစ်နေသည်ကို ငှက်မည်းကြီးက သတိပြုမိသွားသောအခါ ၎င်း၏တောင်ပံဖြင့် ရင်ဘတ်ကိုပုတ်ကာ ရွှီနင်အား ရှင်းပြလိုက်သည်။

“ငါက မင်းကို ဘာလို့ဒီလောက် သိနေရတာလဲဆိုပြီး အံ့ဩမနေနဲ့။ ချောက်နက်ကြီးမြောက်ပိုင်းမှာ မင်းမြင်ခဲ့ရတာက ငါ့ရဲ့ ကိုယ်ပွားလေ။”

“ကိုယ်ပွားဟုတ်လား။”

ထိုကဲ့သို့သော စွမ်းရည်မျိုးကို ရွှီနင် ပထမဆုံးအကြိမ် ကြားဖူးခြင်းပင် ဖြစ်သည်။

‘ဒါက ဒီမိစ္ဆာသားရဲရဲ့ သွေးမျိုးဆက်စွမ်းအင်များလား...’

ရွှီနင် စိတ်ထဲမှ တွေးလိုက်မိသည်။

လူသားသိုင်းပညာရှင်တစ်ဦးသည် တာအိုနယ်ပယ်၏ နဝမအဆင့်သို့ ရောက်ရှိပြီးနောက်၌ပင် ကိုယ်ပွားဖန်တီးနိုင်သည့် စွမ်းရည်မျိုး ရှိသည်ဟု သူ တစ်ခါမျှ မကြားဖူးခဲ့ပေ။

ငှက်မည်းကြီးသည် ရွှီနင်၏ အတွေးများကို ကြားလိုက်ရသကဲ့သို့ပင်။ ၎င်းက ဂုဏ်ယူဝင့်ကြွားစွာ ခေါင်းမော့လိုက်သည်။

“ငါ့ရဲ့ ကိုယ်ပွားဖန်တီးနိုင်စွမ်းက ထူးခြားတယ်။ အထွတ်အထိပ် မိစ္ဆာသားရဲတွေတောင် ငါ့လောက် စွမ်းရည်မရှိကြဘူး။”

“စီနီယာက တကယ်ကို အံ့မခန်းပါပဲ။”

ငှက်မည်းကြီး ဂုဏ်ယူဝင့်ကြွားနေသည်ကို မြင်သောအခါ ရွှီနင်က အလိုက်တသိပင် ချီးကျူးလိုက်သည်။ ငှက်မည်းကြီးမှာလည်း ဤအခြေအနေကို သဘောကျနေပုံရသည်။

တစ်ချိန်တည်းမှာပင် ရွှီနင်သည် ဤကဲ့သို့ စွမ်းရည်မျိုးရှိသော မိစ္ဆာသားရဲများ၏ အမည်ကို သူ၏ မှတ်ဉာဏ်ထဲ၌ ရှာဖွေကြည့်လိုက်သည်။

သို့သော် ရွှီနင်မှာ မည်သည့်အဖြေကိုမျှ မရရှိခဲ့ပေ။

ရွှီနင် ယဲ့ဘုရင်ခံအိမ်တော်တွင် ရှိနေစဉ်အတွင်း အိမ်တော်ရှိ စာအုပ်များစွာကို ဖတ်ရှုခဲ့ပြီး ရှားပါးမိစ္ဆာသားရဲများနှင့် ပတ်သက်သည့် ဗဟုသုတများစွာကို ရရှိခဲ့သည်။

သို့သော် ထိုမျှသိထားသော်ငြားလည်း ရွှီနင်သည် ဤငှက်မည်းကြီးနှင့် ပတ်သက်၍ ဘာမှမသိရှိခဲ့ပေ။

ဤငှက်မည်းကြီးမှာ မျိုးဗီဇပြောင်းလဲနေသော မိစ္ဆာသားရဲ တစ်မျိုးမျိုးဖြစ်ရမည်ဟု ရွှီနင် ကောက်ချက်ချလိုက်သည်။

“အေးဟုတ်ပြီ... မင်းက တန်းဟိုင်မျှော်စင်ကို စိန်ခေါ်ဖို့ ရောက်လာတာကိုး...”

ငှက်မည်းကြီးသည် ၎င်း၏ခေါင်းကို ပုတ်လိုက်ပြီး အဓိကအကြောင်းအရာဆီသို့ ပြန်လှည့်လာခဲ့သည်။

“တံဆိပ်ပြားကို ငါ့ပေး။”

ငှက်မည်းကြီးက ပြောလိုက်သည်။

ရွှီနင်သည် ဘာမှရေးမှတ်ထားခြင်း မရှိသော အမှတ်အသားပြားကို ငှက်မည်းကြီးထံ ကမ်းပေးလိုက်သည်။

“နာမည်ဘယ်လိုခေါ်လဲ။

ငှက်မည်းကြီးက မေးလိုက်သည်။

“ရွှီနင်ပါ”

ရွှီနင်က ပြောလိုက်သည်။

“ဘယ်လိုရေးတာလဲ။”

ငှက်မည်းကြီးက ထပ်မေးလိုက်ပြန်သည်။

ရွှီနင်မှာ အမှန်အတိုင်း ဖြေကြားလိုက်လေသည်။

ထို့နောက် ငှက်မည်းကြီးသည် ၎င်း၏ သွေးမျိုးဆက်စွမ်းအင်ကို အသက်သွင်းလိုက်ရာ ရွှီနင်၏ အမည်မှာ တံဆိပ်ပြားပေါ်တွင် ပေါ်လာတော့သည်။

‘ဒီငှက်မည်းကြီးက လူတစ်ယောက်ရဲ့ အချက်အလက်တွေကို မှတ်တမ်းတင်ပေးတဲ့သူပဲ...’

ရွှီနင် တွေးလိုက်မိသည်။

“ကောင်းပြီ... ဝင်သွားလို့ရပြီ။”

ငှက်မည်းကြီးသည် တံဆိပ်ပြားအား ရွှီနင်ထံသို့ ချက်ချင်း ပြန်မပေးပေ။

“မင်းပြန်ထွက်လာတဲ့အခါ ဒီတံဆိပ်ပြားကို ပြန်ပေးမယ်။”

“ဟုတ်ကဲ့ပါဗျာ။”

ရွှီနင်သည် တန်းဟိုင်မျှော်စင်ဆီသို့ လျှောက်သွားလိုက်သည်။

ကျွီ…

သူလျှောက်သွားသည်နှင့် တန်းဟိုင်မျှော်စင်၏ တံခါးမှာ ပွင့်ဟသွားလေသည်။

အတွင်းဘက်တွင်မူ မှောင်မိုက်နေပြီး ရွှီနင်ပင်လျှင် အထဲတွင် မည်သည့်အရာရှိနေမှန်း မမြင်နိုင်ချေ။

“မင်းရဲ့ အင်အားနဲ့ဆို ဆဋ္ဌမအထပ်ကို ကျော်ဖြတ်ဖို့က မခက်ခဲပါဘူး။ ဒါပေမဲ့ သတ္တမအထပ်ကို ရောက်တဲ့အခါကျရင်တော့ အခက်အခဲတွေက ပိုများလာလိမ့်မယ်။ အောင်မြင်အောင် အစွမ်းကုန် ကြိုးစားလိုက်”

ရွှီနင်အပေါ် အမြင်ကြည်လင်နေ၍လားမသိ၊ ရွှီနင် တန်းဟိုင်မျှော်စင်ထဲသို့မဝင်မီ ငှက်မည်းကြီးက ကြင်နာစွာ သတိပေးလိုက်လေသည်။

“ကျေးဇူးတင်ပါတယ် စီနီယာ။”

ရွှီနင် အထဲသို့ ဝင်သွားလိုက်သည်။

ဝုန်း…

တန်းဟိုင်မျှော်စင်၏ တံခါးကြီးများ ပိတ်သွားတော့သည်။

‘ဒီကောင်လေးရဲ့ တိုးတက်နှုန်းက တကယ်ကို မြန်လွန်းတယ်။ သုံးနှစ်အတွင်းမှာ ဟင်းလင်းပြင်နယ်ပယ်ကနေ အမြုတေ‌ပြောင်းလဲခြင်းနယ်ပယ်ကို ရောက်လာတာဆိုတော့ ဒီလိုအမြန်နှုန်းမျိုးက ဘယ်မျိုးစေ့နဲ့မှ ယှဉ်လို့မရနိုင်ဘူး... သူက တကယ်ပဲ မိစ္ဆာသခင်နေရာအတွက် ယှဉ်ပြိုင်နိုင်စွမ်း ရှိလောက်တယ်...’

ငှက်မည်းကြီးက တိုးတိုးလေး ရေရွတ်လိုက်သည်။

ထိုအချိန်တွင် ရွှီနင်သည် တန်းဟိုင်မျှော်စင်အတွင်းသို့ ရောက်ရှိနေပြီ ဖြစ်သည်။

တန်းဟိုင်မျှော်စင်၏ တံခါးများ ပိတ်သွားသောအခါ အတွင်းပိုင်းရှိ အမှောင်ထုများမှာ ပျောက်ကွယ်သွားပြီး အရာအားလုံးကို ရှင်းလင်းစွာ မြင်တွေ့နိုင်လာသည်။ ရွှီနင်၏ အရှေ့တွင် ရှင်းလင်းနေသော အထပ်တစ်ခု ရှိနေလေသည်။

ဤအထပ်မှာ စတုရန်းမီတာ တစ်ထောင်ကျော် ကျယ်ဝန်းပြီး အမြင့်မှာ မီတာနှစ်ဆယ်ခန့် ရှိလေသည်။

ဝှစ်...

ရွှီနင် ပတ်ဝန်းကျင်ကို ဝေ့ကြည့်လိုက်သည်နှင့် သူ၏ အရှေ့တွင် ပုံရိပ်တစ်ခု ထွက်ပေါ်လာတော့သည်။

၎င်းမှာ ဓားရှည်တစ်လက်ကို ကိုင်ဆောင်ထားသော အနက်ရောင် သတ္တုလူသား ရုပ်သေးရုပ်တစ်ရုပ် ဖြစ်သည်။ ၎င်း၏ ခန္ဓာကိုယ်မှ မည်သည့်အငွေ့အသက်မျှ ထွက်ပေါ်လာခြင်း မရှိပေ။

ချွင်... ချွင်...

လူသားရုပ်သေးရုပ်သည် ၎င်း၏ မျက်လုံးများကို ကစားလိုက်သည်။

အစိမ်းရင့်ရောင် ပုံဆောင်ခဲမျက်လုံးများက ရွှီနင်ကို စိုက်ကြည့်နေလေသည်။

ဝှစ်…

ရုပ်သေးရုပ်သည် ရုတ်တရက် ခုန်ထွက်လာပြီး ရွှီနင်ရှိရာသို့ ပြေးဝင်လာလေတော့သည်။

‘ဒါက တန်းဟိုင်မျှော်စင်ရဲ့ အကဲဖြတ်မှုလား...’

ရွှီနင်မှာမူ လုံးဝ ထိတ်လန့်သွားခြင်း မရှိပေ။

သူ့အမြင်တွင်မူ ဤရုပ်သေးရုပ်၏ အမြန်နှုန်းမှာ အလွန်အမင်း နှေးကွေးနေလေသည်။

ရွှစ်…

ရွှီနင်က ကြယ်တာရာချီ လှိုင်းလုံးတစ်ခုဖြင့် တိုက်ခိုက်လိုက်သည်။

ချက်ချင်းပင် ရုပ်သေးရုပ်မှာ အလယ်မှ နှစ်ပိုင်းပြတ်သွားပြီး မြေပြင်ပေါ်သို့ ပြုတ်ကျသွားကာ ငြိမ်သက်သွားတော့သည်။