အခန်း (၁၈၁-၁၈၂)

အခန်း (၁၈၁) စစ်ကြောရေးခုံရုံး၏ လစာငွေ

စစ်ကြောရေးခုံရုံးတွင် လူအများအပြား မရှိချေ။ ရဲချီယန်ကို ထည့်တွက်လိုက်လျှင်ပင် စစ်ကြောရေးမှူး အရေအတွက်မှာ ငါးဆယ်ထက် မပိုပေ။

ဤလူများထဲမှ မည်သူကမျှ ၎င်းတို့၏ ရထားမောင်းနှင်သူ ဟူသော မူလအဆင့်အတန်းကို စွန့်လွှတ်ထားခြင်း မရှိကြပေ။ သူတို့အများစုမှာ တိုက်ခိုက်ရေး မော်ဂျူးများကို အထူးပြုအသုံးပြုသည့် ရထားမောင်းနှင်သူများ ဖြစ်ကြကာ တစ်ဦးချင်းစီတိုင်းက အင်မတန် အစွမ်းထက်မြက်ကြလေ၏။

တစ်နည်းဆိုရသော် စစ်ကြောရေးခုံရုံးသို့ ဝင်ရောက်နိုင်သူတိုင်းက မွေးရာပါ ကိုယ်ပိုင်အစွမ်းအစများ ရှိနေကြခြင်းပင် ဖြစ်သည်။ ခုံရုံးကြီးမှာ ဧရာမကျယ်ဝန်းလှသော်လည်း ဟာလာဟင်းလင်း ဖြစ်နေချေပြီ။ လူအများစုမှာ ဆော်လမွန် မြို့တော်တွင်ပင် မရှိကြဘဲ စစ်မှန်သော ရထားမောင်းနှင်သူများပီပီ အဆုံးအစမရှိသော လွင်တီးခေါင်ပြင်ကြီးထဲတွင် ခရီးဆက်နေကြလေတော့သည်။

ကျောက်ရှီး၏ စကားအရဆိုလျှင် ဆော်လမွန် မြို့တော်အတွက် သူမတစ်ယောက်တည်း ရှိနေခြင်းကပင် လုံလောက်နေပြီ ဖြစ်သည်။

"ဒါက ရှင်လစာထုတ်ရမယ့် နေရာပဲ။ အခုကစပြီး လစဉ် တစ်လတစ်ခါ လာထုတ်လို့ ရပြီ။ ကျွန်မ အရင်သွားပြီး ကိစ္စတချို့ ဖြေရှင်းလိုက်ဦးမယ်၊ ပြီးမှ မနက်ဖြန်ကျ ဆက်သွယ်လိုက်ပါ့မယ်။ အော်... ဒါနဲ့ အနောက်ဘက်မှာ စစ်ကြောရေးခုံရုံးအတွက် သီးသန့် ရထားဘူတာရုံ ရှိသေးတယ်၊ ရှင့်ရထားကို အဲဒီကို ပြောင်းရွှေ့ထားလို့ ရတယ်"

ကျောက်ရှီး ထွက်ခွာသွားပြီးနောက် ရဲချီယန်က ခန်းမအလယ်ရှိ ဝန်ဆောင်မှုကောင်တာဆီသို့ အကြည့်ရောက်သွားကာ တည့်တည့်မတ်မတ် လျှောက်သွားလိုက်လေ၏။ စကင်ဖတ်သည့် စက်ပေါ်သို့ သူ၏တံဆိပ်ကို တင်လိုက်သည်နှင့် မကြာမီမှာပင် စက်ပေါ်မှ အလင်းမျက်နှာပြင်တစ်ခု လင်းလက်လာခဲ့သည်။

[ကြိုဆိုပါသည် တတိယအဆင့် စစ်ကြောရေးမှူး၊ အမည် (ဖုံးကွယ်ထားသည်)]

[တတိယအဆင့် စစ်ကြောရေးမှူးအတွက် လက်ရှိ ရရှိနိုင်သော လစဉ်ခံစားခွင့်များ]

[ရထားဒင်္ဂါး - ၁၀ ပြား]

[စံသတ်မှတ်ချက် လက်နက်ကိရိယာ]

သူ၏အမည်မှာ ဖုံးကွယ်ထားလျက်ရှိရာ ကျောက်ရှီးက စစ်ကြောရေးခုံရုံး၏ စနစ်အတွင်းသို့ သူ၏အချက်အလက်များကို ထည့်သွင်းထားခြင်း မရှိသေးကြောင်း ထင်ရှားနေ၏။ ဤသည်ကလည်း ကောင်းပေသည်။ ပြဿနာအချို့ကို ရှောင်လွှဲနိုင်မည် မဟုတ်ပါလော။

ထုတ်ယူမည်ကို ရွေးချယ်လိုက်သည်နှင့် မှောင်မိုက်သော ရွှေရောင်ကနုတ်ပန်းများ ထွင်းထုထားသည့် အလွန်လှပသော အနက်ရောင် သစ်သားသေတ္တာတစ်လုံးက ရဲချီယန်ရှေ့၌ ပေါ်လာလေတော့သည်။ သစ်သားသေတ္တာကို ကောက်ကိုင်လိုက်ရာ လေးလံသော အလေးချိန်ကြောင့် အတွင်းရှိ ပစ္စည်းများမှာ သာမန်မဟုတ်ကြောင်း သိသာနေပေသည်။ သေတ္တာကို ဖွင့်လိုက်သည်နှင့် ရထားဒင်္ဂါးများဆီသို့ သူ၏အကြည့်က အရင်ဆုံး ရောက်သွားပြီးနောက်မှ အခြားသော လက်နက်ကိရိယာများကို သတိပြုမိသွား၏။

[စစ်ကြောရေးခုံရုံး အထက်တန်းလွှာ စံသတ်မှတ်ချက် ဓားတို (အဆင့် ၆)]

[စစ်ကြောရေးခုံရုံး အထက်တန်းလွှာ စံသတ်မှတ်ချက် အတွင်းခံ သံချပ်ကာ (အဆင့် ၆)]

[စစ်ကြောရေးခုံရုံး အထက်တန်းလွှာ စံသတ်မှတ်ချက် ကိုယ်ခံစွမ်းအား ဆေးရည် (အဆင့် ၆)]

ပစ္စည်းသုံးခုစလုံးမှာ အဆင့် ၆ ဟူသော မြင့်မားသည့်အဆင့်သို့ ရောက်ရှိနေကြလေပြီ။

"ဘုရားရေ... ဒီသုံးခုကိုသာ ရောင်းလိုက်မယ်ဆိုရင် ရထားဒင်္ဂါး တော်တော်များများ ရနိုင်မှာပဲ မဟုတ်လား"

ပါးစပ်မှ ထိုသို့ ရေရွတ်လိုက်သော်လည်း ရဲချီယန်က ၎င်းတို့ကို ရောင်းချရန် ရည်ရွယ်ချက် အလျှင်းမရှိပေ။ အနည်းဆုံးတော့ ယခုလအတွင်း ရောင်းမည်မဟုတ်ချေ။

၎င်းတို့အပြင် သေတ္တာထဲတွင် ကတ်ပြားနှစ်ခုလည်း ပါဝင်နေသေး၏။

[မော်ဂျူး · စစ်ကြောစီရင်ခြင်း (တစ်ခါသုံး)]

[ဤကတ်ပြားကို အသုံးပြုပြီးနောက် မော်ဂျူး · စစ်ကြောစီရင်ခြင်းကို တစ်ကြိမ် အသုံးပြုနိုင်ပါသည်]

[မည်သည့် ပစ်မှတ်၏ အပြစ်ကိုမဆို စီရင်ချက်ချရန် စိတ်စွမ်းအားကို စားသုံးပါသည်။ အပြစ်မည်မျှရှိသည်ကို မူတည်၍ အချိန်အတိုင်းအတာ တစ်ခုအထိ ပစ်မှတ်အား ပိုမိုကြီးမားသော ထိခိုက်မှုများ ဖြစ်စေပါသည်]

[မော်ဂျူး · မင်းမှာ အပြစ်ရှိတယ် (တစ်ခါသုံး)]

[ဤကတ်ပြားကို အသုံးပြုပြီးနောက် တစ်ခါသုံး မော်ဂျူး · မင်းမှာ အပြစ်ရှိတယ် ကို တစ်ကြိမ် အသုံးပြုနိုင်ပါသည်]

[မည်သည့် ပစ်မှတ်ကိုမဆို စီရင်ချက်ချရန် စိတ်စွမ်းအားကို စားသုံးပါသည်။ ပစ်မှတ်တွင် အပြစ်ရှိသည်ဖြစ်စေ၊ မရှိသည်ဖြစ်စေ အပြစ်ကင်းစင်ခြင်း၏ အပြစ်ဟု အတင်းအကျပ် သတ်မှတ်ပေးမည် ဖြစ်ပါသည်]

"ဒီနှစ်ခုက... ငါ့ရဲ့ သေနတ်သံ တရားစီရင်ခြင်း မော်ဂျူးနဲ့ တော်တော်လေး လိုက်ဖက်နေသလို ခံစားရပါလား၊ ပြီးတော့ ဒါက..."

ရဲချီယန်က မင်းမှာ အပြစ်ရှိတယ် မော်ဂျူးကတ်ပြားကို ကောက်ကိုင်လိုက်ကာ ပြုံးလိုက်လေ၏။

"အပြစ်ကင်းစင်ခြင်းရဲ့ အပြစ်လို့ သတ်မှတ်ပေးမှာလား... ဟက်... စိတ်ဝင်စားစရာပဲ"

သေချာ စဉ်းစားကြည့်မည်ဆိုလျှင် အလွန်ဆိုးသွမ်းလှသော ရန်သူနှင့် ရင်ဆိုင်ရချိန်၌ ဤမော်ဂျူးနှစ်ခုကို အသုံးပြုကာ သေနတ်သံ တရားစီရင်ခြင်း၊ ရွှေရောင် အပြင်းအထန်တိုက်ခိုက်မှု ကတ်ပြားနှင့် မျက်ရည်နီ၏ ကာကွယ်ရေးစွမ်းအား လျှော့ချခြင်းတို့နှင့်သာ ပေါင်းစပ်လိုက်ပါက... ထိုတိုက်ခိုက်မှု တစ်ချက်တည်းက မည်မျှအထိ ကြောက်မက်ဖွယ်ကောင်းသော ထိခိုက်ပျက်စီးမှုကို ဖြစ်စေမည်နည်း။ တောက်တခေါက်ခေါက်နှင့် တွေးကြည့်ရုံမျှဖြင့်ပင် အင်မတန် အံ့မခန်း ဖြစ်နေလေပြီ။

"လူအများစုက စစ်ကြောရေးခုံရုံးကို ကြောက်ရွံ့နေကြတာ အံ့ဩစရာတော့ မဟုတ်ပါဘူးလေ။ ဒီအရာနှစ်ခု ပေါင်းစပ်လိုက်ရင် တကယ်ကို အစွမ်းထက်ပေမယ့် ကံမကောင်းတာက တစ်ကြိမ်ပဲ သုံးလို့ရတာပဲ... ဒါပေမဲ့..."

သူ့တွင် အဆင့်မြင့် အသွင်ကူးပြောင်းခြင်း စွမ်းရည် ရှိနေပေသည်။ အဆင့်မြင့် အသွင်ကူးပြောင်းပြီးသည့်နောက် ဤမော်ဂျူးနှစ်ခုက အမြဲတမ်း အသုံးပြုနိုင်မည့် ပစ္စည်းများ ဖြစ်လာနိုင်၊ မနိုင်ကို သူ စမ်းသပ်ကြည့်နိုင်လေ၏။

"ရထားဒင်္ဂါး ဆယ်ပြားဆိုတာက တကယ့်ကို ပမာဏအနည်းငယ်ပဲ ဖြစ်ပုံရတယ်။ ဒီပစ္စည်းတွေနဲ့ မော်ဂျူးကတ်ပြား နှစ်ခုကမှ အစစ်အမှန် လစာတွေပဲ မဟုတ်လား။ စစ်ကြောရေးခုံရုံးမှာ လူနည်းနေတာလည်း မဆန်းပါဘူးလေ၊ ဒီလစဉ် ခံစားခွင့်တွေက တကယ်ကို မိုက်လွန်းတယ်"

သေတ္တာကို သိမ်းဆည်းလိုက်ပြီးနောက် ရဲချီယန်က ထွက်ခွာရန် ပြင်ဆင်လိုက်သည်။ စစ်ကြောရေးခုံရုံးရှိ အခြားလူများနှင့် သူ မပတ်သက်ချင်ပေ။ ဗဟိုဓာတ်လှေကားမှတစ်ဆင့် ပထမထပ်သို့ ပြန်ဆင်းလာခဲ့၏။ ယခုတစ်ကြိမ်တွင်မူ မှောင်မိုက်နေသော အလယ်ထပ် ကြားခံနယ်မြေကြီးက ပေါ်မလာတော့ဘဲ သူ ယခင်က မြင်တွေ့ခဲ့ရသည်များမှာ အတုအယောင်တစ်ခုအလား ဖြစ်နေချေပြီ။

သို့သော် ၎င်းက လုံးဝ အတုအယောင် မဟုတ်ကြောင်း သူ သေချာသိနေသည်။ ဆော်လမွန် မြို့တော်၏ ကြားခံအလွှာများတွင် ပြဿနာတစ်ခုခု ရှိနေပေသည်။

"ငါ ကျောက်ရှီးကို ပြောပြသင့်လား"

ရဲချီယန်က အနည်းငယ် တုံ့ဆိုင်းသွားပြီးနောက် ထိုအတွေးကို လက်လျှော့လိုက်လေ၏။

ကျောက်ရှီးသည် တရားသူကြီးချုပ် ဖြစ်သည်နှင့်အညီ ထိုမှောင်မိုက်နေသော ကြားခံအလွှာအကြောင်းကို သိရှိပြီး ဖြစ်နိုင်ပေသည်။ ရုတ်တရက် ပျောက်ကွယ်သွားခြင်းမှာလည်း ဆော်လမွန် မြို့တော်၏ လျှို့ဝှက်ချက်တစ်ခု ဖြစ်နိုင်ပြီး ယင်းကို အလောတကြီး ထုတ်ပြောလိုက်ပါက သူ့အတွက် ပြဿနာများသာ ဖြစ်လာစေနိုင်၏။

ပထမထပ်သို့ ပြန်ရောက်ပြီးနောက် တည်းခိုရန်အတွက် သန့်ရှင်းသပ်ရပ်သော ရေပူစမ်းဟိုတယ်တစ်ခုကို သူ အလွယ်တကူ ရှာဖွေလိုက်သည်။ ထိုအချိန်ကျမှသာ အချိန်အတော်ကြာ စောင့်ဆိုင်းနေခဲ့သော ချင်ချန်နှင့် ရဲချီယန်တို့ နောက်ဆုံးတွင် အဆက်အသွယ် ရသွားလေတော့သည်။

ဒင်... ဒင်...

ထာဝရ ညဉ့်ယံ မြို့တော်။

မြို့တော်ကြီးက ၎င်း၏အမည်နှင့် လိုက်ဖက်လှပေသည်။ ဤမြို့၏ ကောင်းကင်ယံက နေရောင်ခြည်ကို မည်သည့်အခါမျှ မမြင်တွေ့ရချေ။

သယ်ဆောင်ရလွယ်ကူသည့် စနစ်ပါဝင်သော ကွန်ပျူတာရှေ့တွင် ချင်ချန်က အချိန်အတော်ကြာအောင် ခေါက်တုံ့ခေါက်ပြန် လမ်းလျှောက်ကာ စောင့်ဆိုင်းနေခဲ့သည်။ အသိပေးချက် အသံကို ကြားလိုက်ရသည်နှင့် သူက ချက်ချင်း ပြေးသွားကာ ကျန်မဟာမိတ်အဖွဲ့ဝင်များ၏ စိုးရိမ်တကြီး စောင့်ကြည့်နေမှုအောက်တွင် ချက်ဘောက်စ် မျက်နှာပြင်ကို ဖွင့်လိုက်လေ၏။

ရဲချီယန် - [ဒါက မင်းလိုချင်တဲ့ ဟာလား]

မဟာမိတ်အဖွဲ့ ဖိတ်စာကတ်၏ ဓာတ်ပုံတစ်ပုံကို ပေးပို့လာခဲ့သည်။

ချင်ချန်၏ မျက်နှာထက်တွင် ဝမ်းသာပျော်ရွှင်မှုများ ချက်ချင်း ပေါ်လွင်လာကာ ကီးဘုတ်ပေါ်တွင် အမြန် စာရိုက်၍ အကြောင်းပြန်လိုက်၏။

[ဟုတ်တယ်... ဟုတ်တယ်... အဲဒါပဲ။ အစ်ကိုကြီးရဲ... ကူညီပေးတဲ့အတွက် ကျေးဇူးတင်ပါတယ်။ ကျွန်တော်တို့ ဆော်လမွန် မြို့တော်ကို ရောက်တာနဲ့ ခိုင်းစရာရှိတာ မှန်သမျှကို အစွမ်းကုန် လုပ်ပေးပါ့မယ်]

[အရောင်းအဝယ် လုပ်ကြရအောင်]

ရဲချီယန်က ချင်ချန်၏ စကားများကြောင့် စိတ်လှုပ်ရှားသွားခြင်း မရှိပေ။ ဤသည်က အပေးအယူ အရောင်းအဝယ်တစ်ခုသာ ဖြစ်ပြီး ကျေးဇူးကြွေး တင်နေခြင်းမျိုး မဟုတ်ချေ။

သူက ရထားဒင်္ဂါးများကို ရရှိမည်ဖြစ်ပြီး အခြားတစ်ဖက်က ဆော်လမွန် မြို့တော်သို့ လာရောက်နိုင်မည် ဖြစ်သည်။ မည်သူကမျှ တစ်ဖက်လူအပေါ် အကြွေးတင်နေခြင်း မရှိပေ။ တကယ်တမ်း ကျေးဇူးတင်ရမည်ဆိုလျှင် ချင်ချန်က စစ်ကြောရေးခုံရုံးအပေါ် ကျေးဇူးကြွေး တင်နေခြင်းသာ ဖြစ်၏။

မည်သို့ပင်ဆိုစေကာမူ ကျောက်ရှီးသာ မရှိလျှင် ဤဖိတ်စာကတ်ကို မည်သည့်နေရာမှ သွားယူရမည်ကို သူ တကယ်ပင် သိမည်မဟုတ်ချေ။ ချင်ချန်က စနစ်ထဲသို့ ရထားဒင်္ဂါး ခုနစ်ဆယ်ကို အနည်းငယ် နှမြောတွန့်တိုစွာဖြင့် ထည့်သွင်းလိုက်လေသည်။

အရောင်းအဝယ် ပြီးမြောက်သွားသည်နှင့် ဆော်လမွန် မြို့တော်၏ မဟာမိတ်အဖွဲ့ ဖိတ်စာကတ်လေးက သူ့လက်ထဲသို့ ကျဆင်းလာခဲ့၏။

"နောက်ဆုံးတော့ ငါတို့ သွားလို့ရပြီ... မြန်မြန်၊ အားလုံးပဲ ရထားပေါ် ပြန်တက်ကြ... ငါတို့ အခုပဲ ထွက်ခွာကြမယ်"

သူ၏ မဟာမိတ်အဖွဲ့ထဲရှိ လူဒါဇင်ပေါင်းများစွာက အနောက်ဘက်ရှိ ပလက်ဖောင်း အကျယ်ကြီးဆီသို့ အမြန် ပြေးသွားကြလေသည်။ ရထား ဒါဇင်ပေါင်းများစွာကို သပ်ရပ်စွာ စီစဉ်ထားပြီး သံလမ်း မလုံလောက်မှုကြောင့် အများစုမှာ သံလမ်းတစ်ခုတည်းပေါ်တွင် ရှိနေကြ၏။

ချင်ချန်က ကွန်ပျူတာကို ပိတ်လိုက်ပြီး ဖိတ်စာကတ်ကို ကိုင်ဆောင်ကာ အရှေ့ဆုံးသို့ ရောက်လာခဲ့သည်။ သူက အသက်ပြင်းပြင်း တစ်ချက်ရှူလိုက်ကာ သေးငယ်သော မဟာမိတ်အဖွဲ့ ဌာနချုပ်လေးကို နောက်ဆုံးအကြိမ်အဖြစ် ငေးကြည့်လိုက်ပြီးနောက် သွားကိုတင်းတင်းကြိတ်ကာ ဖိတ်စာကတ်ကို ကောင်းကင်ယံသို့ ပစ်တင်လိုက်လေတော့သည်။

ကတ်ပြားက လေထဲတွင် တစ်စစီ ပျက်စီးသွားကာ အလင်းမှုန်လေးများအဖြစ် ပြောင်းလဲသွားပြီး လူတိုင်း၏အပေါ်သို့ ပြန့်ကျဲကျဆင်းလာခဲ့၏။ ထို့နောက် ကြေညာသံ ထွက်ပေါ်လာခဲ့သည်။

[မဟာမိတ်အဖွဲ့ - ငါးရာ]

[အဆင့် - ၄]

[ချိတ်ဆက်ထားသော မြို့တော်ကို ပြောင်းလဲမည်]

[ချိတ်ဆက်မည့် ပစ်မှတ်]

[ဆော်လမွန် မြို့တော်]

[မကြာမီ ထွက်ခွာပါမည်]

[ပြောင်းလဲပြီးနောက် ထာဝရ ညဉ့်ယံ မြို့တော်မှ သင့်အား ထပ်မံကြိုဆိုတော့မည် မဟုတ်ပါ]

[အတည်ပြုပါသလား]

"အတည်ပြုတယ်"

ရဲချီယန်ကမူ ချင်ချန် ဘာလုပ်နေသလဲဆိုတာကို သိရှိခြင်း မရှိပေ။ သူ့လက်ထဲတွင် ရထားဒင်္ဂါးများ တစ်ဖန် ပြန်လည်ပေါများလာပြီ ဖြစ်ကြောင်းကိုသာ သူ သိလေ၏။

"ကျောက်ရှီးဆီက တစ်ရာ့နှစ်ဆယ်၊ လစာက ဆယ်ပြား၊ ချင်ချန်ဆီက ခုနစ်ဆယ်... လူတွေဆီက ပိုက်ဆံရှာရတာက ပိုပြီး အကျိုးအမြတ် များနေတုန်းပဲ။ ဒီနည်းလမ်းက ရတနာသေတ္တာတွေ ဖွင့်ရတာထက် အများကြီး ပိုမြန်တယ်"

ဒင်္ဂါးပြား နှစ်ရာ... တစ်ရက်ပင် မပြည့်သေးသည့် အချိန်အတွင်း များပြားလှသော ပမာဏကို ရှာဖွေနိုင်ခဲ့ခြင်း ဖြစ်သည်။ ထိုအရာက သူ့ရထားကို ထပ်မံ၍ အဆင့်မြှင့်တင်ချင်စိတ် ပေါ်လာစေခဲ့၏။

သို့သော် ထိုသို့ မပြုလုပ်မီ GT-EX စိတ်စွမ်းအား စက်ရုပ် တည်ဆောက်ရန် လိုအပ်သော ကုန်ကြမ်းများကို သူ ဝယ်ယူချင်သေးသည်။ GT စီးရီး၏ နောက်ဆုံးရလဒ်က မည်သို့သော အရာဖြစ်လာမည်ကို ရဲချီယန် အလွန်တရာ စူးစမ်းချင်နေမိလေတော့သည်။

အခန်း (၁၈၂) မွန်ရိုးဂျီနာ၏ ယဇ်ပူဇော်ခြင်း ကတ်ပြား

"သိပ်ဈေးကြီးတာပဲ"

ရဲချီယန်က GT-EX စိတ်စွမ်းအား စက်ရုပ်၏ နောက်ဆုံးထွက်ကုန်ကို အထင်သေးမိခဲ့ပြီဟု ခံစားလိုက်ရလေ၏။ ပို၍ တိတိကျကျဆိုရလျှင် အဆင့်မြင့် အီလက်ထရွန်းနစ် အစိတ်အပိုင်းများ၏ ဈေးနှုန်းကို သူ လျှော့တွက်မိခဲ့ခြင်း ဖြစ်ပေသည်။ မူလက လိုအပ်သည့် ကုန်ကြမ်းအားလုံးကို ရထားဒင်္ဂါး ခြောက်ဆယ်ကျော်ခန့်ဖြင့် ဝယ်ယူနိုင်မည်ဟု သူ ထင်မှတ်ထားခဲ့၏။ အခြားအရာများက ပြဿနာမရှိလှဘဲ သူ စုဆောင်းထားသည့် သယံဇာတများက လုံလောက်သလောက် ရှိနေချေပြီ။

ဤအဆင့်မြင့် အီလက်ထရွန်းနစ် အစိတ်အပိုင်းများသာလျှင် ကုန်သွယ်ရေး ပလက်ဖောင်းပေါ်တွင် ဝယ်ယူနိုင်သော်ငြား ဈေးနှုန်းက အလွန်တရာ အပြောင်းအလဲများလွန်းလှသည်။ နောက်ဆုံးတွင် အဆင့်မြင့် အီလက်ထရွန်းနစ် အစိတ်အပိုင်း ငါးရာလုံးကို ဝယ်ယူရန်အတွက် ရထားဒင်္ဂါး တစ်ရာတိတိ အကုန်အကျခံလိုက်ရလေတော့သည်။ စိတ်စွမ်းအားတုံးနှင့် အခြားသော ကုန်ကြမ်းများကိုပါ ပေါင်းထည့်လိုက်ပါက GT-EX စိတ်စွမ်းအား စက်ရုပ် တည်ဆောက်ရန် ကုန်ကျစရိတ်မှာ ရထားကို အဆင့်မြှင့်တင်ပြီးနောက် ရွေးချယ်ရသည့် အဆင့်မြှင့်တင်ရေး ရွေးချယ်စရာများထက်ပင် ပို၍ ဈေးကြီးနေသေး၏။

"အမဲလိုက် စက်ယန္တရားနဂါး ပုံစံကြမ်းက ထပ်ပွားလို့မရတာ အံ့ဩစရာတော့ မဟုတ်ဘူးပဲ။ အားလုံးက စက်ယန္တရားတွေ ဖြစ်ပေမယ့် အမဲလိုက် စက်ယန္တရားနဂါးအတွက် လိုအပ်တဲ့ ကုန်ကြမ်းတွေက ဒါနဲ့ယှဉ်လိုက်ရင် သမုဒ္ဒရာထဲက ရေတစ်စက်လောက်ပဲ ရှိတာကိုး"

ဝယ်ယူထားသော အဆင့်မြင့် အီလက်ထရွန်းနစ် အစိတ်အပိုင်းများအားလုံးကို ရဲချီယန်က အလွတ်ဖြစ်နေသော သိုလှောင်ခန်း ရထားတွဲများထဲသို့ ထည့်သွင်းထားလိုက်သည်။ ရထားပေါ်သို့ ပြန်ရောက်သည်နှင့် တစ်ပြိုင်နက် ထုတ်လုပ်ရေးကို စတင်နိုင်မည် ဖြစ်ပေသည်။

"မနက်ဖြန်တော့ အရာအားလုံး ချောချောမွေ့မွေ့ ဖြစ်သွားမှာပါလေ"

ဒင်... ဒင်...

ညဉ့်ယံသို့ ရောက်ရှိလာခဲ့ပြီ။ ဤတစ်ကြိမ်တွင် သီးသန့် ရေပူစမ်းတစ်ခုကို ရှာတွေ့ထားသော ရဲချီယန်က သူ၏ နားဘေးမှ အသိပေးချက် အသံတစ်ခုကို သဲ့သဲ့မျှ ကြားလိုက်ရလေ၏။ ရေစိမ်နေသည်မှာ ကြာလွန်းသွားသောကြောင့် သူ၏ ဦးနှောက်က မူးဝေနေခြင်းလည်း ဖြစ်နိုင်ပေသည်။ စနစ်၏ အလင်းမျက်နှာပြင်ကို အလွတ်သဘော ဖွင့်လိုက်ကာ မျက်လုံးများကို ပွတ်သပ်လိုက်ပြီးနောက် အမည်ကို ရှင်းလင်းစွာ မြင်တွေ့လိုက်ရသောအခါ ချက်ဘောက်စ်ကို ဖွင့်ကြည့်လိုက်သည်။

ကျောက်လင် - [အစ်ကိုချီယန်... ရော့... ဒါက ပြီးခဲ့တဲ့တစ်ခေါက် ကျွန်မကို ကယ်တင်ပေးခဲ့တဲ့အတွက် ကျေးဇူးဆပ်တာပါ]

ကျောက်လင် ဖြစ်နေသည်။ သူမက ပြီးခဲ့သည့်တစ်ခေါက် စပါးကျီဆယ်ခု မြို့တော်တွင် ဖြစ်ပျက်ခဲ့သည်များကို မှတ်မိနေသေးကြောင်း ထင်ရှား၏။ သူ၏ အကောင့်ထဲသို့ ရထားဒင်္ဂါး ရှစ်ပြား ဝင်ရောက်လာခဲ့လေသည်။ သူမ၏ ကံကောင်းခြင်းများက အတော်လေး စုဆောင်းမိနေပြီ ဖြစ်ရာ ထိုအရာကပင် နောက်ဆုံးမှတ်တိုင်၌ ရတနာသေတ္တာ တစ်လုံးကို ရှာဖွေတွေ့ရှိနိုင်စေခဲ့ခြင်း ဖြစ်ပေမည်။

[မင်းကို နှစ်ပြား ပြန်ပေးမယ်]

ယခင်က ကျောက်အန်းနှင့် အခြားသူများထံမှ အခကြေးငွေ ကောက်ခံစဉ်က ကျောက်လင်လည်း ပေးချေခဲ့ရသည်။ အခြားသူများက ပေးချေပြီး သူမက မပေးလျှင် သံသယနှင့် မကျေနပ်မှုများကိုသာ ဖြစ်ပေါ်စေမည် မဟုတ်ပါလော။

[အော်... ဒါနဲ့ အစ်ကို အားရင် ဆော်လမွန် မြို့တော်ကို လာခဲ့လို့ရတယ်။ စစ်ကြောရေးခုံရုံးမှာ ထုတ်ယူလို့ရတဲ့ လစဉ်လစာ ရှိတယ်၊ ဒါပေမဲ့ အစ်ကို့အဆင့်နဲ့ ဘယ်လောက်ထုတ်လို့ရမလဲဆိုတာတော့ ကျွန်မ မသိဘူး]

[တကယ်လား။ ဒါဆို မနက်ဖြန် ငါ လာခဲ့မယ်လေ]

မနက်ဖြန်ဟုတ်လား။ ရဲချီယန် အနည်းငယ် အသိဝင်သွားကာ ခေတ္တမျှ စဉ်းစားခန်း ဝင်လိုက်၏။

[မနက်ဖြန်တော့ အဆင်မပြေလောက်ဘူး]

[ဟုတ်ကဲ့ နားလည်ပါပြီ။ ဒါဆို နောက်မှပဲ လာခဲ့ပါတော့မယ်]

မနက်ဖြန် မည်သည့်အတွက်ကြောင့် အဆင်မပြေသည်ကို သူမ မမေးမြန်းခဲ့ချေ။ ရဲချီယန်က ဤသို့ပြောလာပြီဆိုလျှင် မနက်ဖြန် ဆော်လမွန် မြို့တော်တွင် တစ်ခုခု ဖြစ်ပျက်တော့မည်မှာ သေချာနေပေသည်။ စကားပြောခြင်း အဆုံးသတ်သွားခဲ့သည်။ ရဲချီယန်က သူ၏ ခန္ဓာကိုယ်ကို ရေထဲသို့ တစ်ဖန် ပြန်လည်နှစ်မြှုပ်လိုက်၏။ ဤခံစားချက်မျိုးကို သူ သဘောကျလှပေသည်။

————

ဆော်လမွန် မြို့တော်၊ ဒုတိယအလွှာရှိ အမြင့်ဆုံး အဆောက်အအုံ၏ အပေါ်ဆုံးထပ်။

မွန်ရိုးဂျီနာက သူမ၏ ပင်ပန်းနွမ်းနယ်နေသော ခန္ဓာကိုယ်ကို ဆွဲယူကာ သူဌေးကုလားထိုင်ပေါ်တွင် ထိုင်ချလိုက်ပြီး လက်ထဲရှိ ယဇ်ပူဇော်ခြင်း ကတ်ပြားတစ်ခုကို ငေးမောကြည့်ရှုနေလေ၏။

"တကယ်ပဲ အချိန်အများကြီး ယူခဲ့ရတာပဲ။ ဘယ်လောက်တောင် ကြာသွားတာလဲ။ သုံးလတောင်လား"

သူမက ပလက်ဖောင်းတစ်ခုပေါ်တွင် သုံးလတိတိ နေထိုင်ခဲ့ရခြင်း ဖြစ်သည်။ သို့သော် လွင်တီးခေါင်ပြင်သို့ ပြန်ရောက်လာချိန်၌မူ တစ်ရက် သို့မဟုတ် နှစ်ရက်မျှသာ အချိန်ကုန်လွန်သွားခဲ့လေသည်။ ဤသုံးလတာ ကာလအတွင်း သူမသည် မသေးငယ်လှသော ပြဿနာများနှင့် ရင်ဆိုင်ခဲ့ရပေသည်။ တစ်စုံတစ်ယောက်ကသာ သူမကို ကူညီမပေးခဲ့လျှင် ဤယဇ်ပူဇော်ခြင်း ကတ်ပြားကို ရရှိရန် တကယ်ပင် ခက်ခဲလွန်းလှမည် ဖြစ်၏။ အဘယ်ကြောင့်ဆိုသော် ကတ်ပြား အစီအစဉ်တစ်ခုကို ရရှိရန် ယင်းကို ရှာဖွေတွေ့ရှိရုံမျှဖြင့် မလုံလောက်ဘဲ ချိတ်ပိတ်ထားမှုကို ဖွင့်ရန် သော့ကို ရှာဖွေရာတွင်လည်း အချိန်များစွာ အကုန်ခံရသောကြောင့်ပင်။

သော့ကို ရှာဖွေရန်အတွက် သုံးလတိတိ အချိန်ကုန်လွန်ခဲ့ရလေသည်။

"ခန္ဓာကိုယ်သေးသေးကွေးကွေးနဲ့ စစ်ကြောရေးမှူးချုပ်လေးကို သေချာ ကျေးဇူးတင်ရမှာပဲ... ဟီးဟီး"

"ထာဝရ ညဉ့်ယံ မြို့တော်က ဆော်လမွန် မြို့တော်ကို တိုက်ခိုက်တော့မယ်တဲ့လား။ တကယ်ကို ထူးဆန်းတာပဲ... သူတို့က ဘယ်ကနေ ယုံကြည်မှုတွေ ရနေကြတာလဲ"

"ဒါပေမဲ့ အဲဒီ စစ်ကြောရေးမှူးချုပ်ဆီမှာ တကယ်ကို အစွမ်းထက်တဲ့ မော်ဂျူးတစ်ခု ရှိနေတာပဲ။ သူမက လွင်တီးခေါင်ပြင်နဲ့ အချိန်စီးဆင်းမှု ကွဲပြားနေတဲ့ ပလက်ဖောင်းတွေကြားက အချိန်စီးဆင်းမှုကို အတင်းအကျပ် ပေါင်းစည်းပေးနိုင်ပြီး ဆက်သွယ်နိုင်တယ်။ သူမသာ မရှိခဲ့ရင် ငါ ဒီထက်ပိုပြီး အချိန်အကြာကြီး ရှာနေရဦးမှာ သေချာတယ်"

မွန်ရိုးဂျီနာက လက်ထဲရှိ ယဇ်ပူဇော်ခြင်း ကတ်ပြားကို စိုက်ကြည့်ရင်း အတွေးလွန်နေလေတော့သည်။

"နှစ်ခုပဲ လိုတော့တယ်"

မှော်တောင်ဝှေးကို ညင်သာစွာ လှည့်လိုက်၏။ သူမလက်ထဲရှိ ကတ်ပြားအပါအဝင် စုစုပေါင်း ယဇ်ပူဇော်ခြင်း ကတ်ပြား ရှစ်ခုက သူမ၏ ပတ်လည်တွင် လှည့်ပတ်နေကြလေသည်။ အကြောင်းအကျိုး ဆက်စပ်မှု ကတ်ပြားကို သူမ ဖြုတ်ယူလိုက်သည်။ ယင်းအပေါ်ရှိ သံကြိုးများက သဲ့သဲ့မျှ တောက်ပနေ၏။

"မောင်လေးရဲ... သူက ကံကြမ္မာကြွေးကို ပြန်ဆပ်ဖို့ လိုနေပြီး အများကြီး ကျန်နေသေးတာပဲ... အဲဒါကို ငါက ဘယ်လို ဆက်ပြီး ပြန်ဆပ်ရပါ့မလဲ။ ဒီကံကြမ္မာ ယဇ်ပူဇော်ခြင်းကိုသာ အောင်မြင်စွာ လုပ်ဆောင်နိုင်ခဲ့ရင် နောက်ထပ် ယဇ်ပူဇော်ခြင်း ကတ်ပြားရဲ့ တည်နေရာကိုတောင် ငါ ရနိုင်လောက်တယ်... ဟီးဟီး"

[ယဇ်ပူဇော်ခြင်း ကတ်ပြား · ကံကြမ္မာကြွေး ဆပ်ခြင်း] [ကံကြမ္မာ · အကြွေးဆပ်ခြင်း] [ယဇ်ပူဇော်ခြင်း · ပြန်လည်ပေးဆပ်ခြင်းနှင့် လက်ခံရယူခြင်း]

ဒေါက်... ဒေါက်...

တံခါးအပြင်ဘက်မှ ခေါက်သံတစ်ခု ထွက်ပေါ်လာခဲ့သည်။ ထို့နောက် အပြာရောင်သန်းနေသော အသားအရေပိုင်ရှင် မိန်းကလေးတစ်ဦး ဝင်ရောက်လာ၏။

"ဘာကိစ္စရှိလို့လဲ အန်နီလေး"

မိန်းကလေးက မျက်တောင်တဖျပ်ဖျပ် ခတ်လိုက်ကာ စီးဆင်းနေသော ထူးဆန်းသည့် အက္ခရာများဖြင့် ချိတ်ပိတ်ထားသော စာရွက်စာတမ်းတစ်ခုကို သူမရှေ့၌ ချထားပေးလိုက်လေသည်။

"အစ်မ... ဒါက အစ်မ မရှိတုန်းက တစ်ယောက်ယောက် လာပို့သွားတဲ့ ပစ္စည်းပါ"

အန်နီက စကားပြောဆိုပြီးသည်နှင့် လှည့်ထွက်သွားလေ၏။ မွန်ရိုးဂျီနာက စာရွက်စာတမ်းကို ကောက်ကိုင်လိုက်ကာ သူမ၏ မှော်တောင်ဝှေးကို တစ်ချက် ဝှေ့ယမ်းလိုက်သည်နှင့် အက္ခရာ ချိတ်ပိတ်မှုက ပျောက်ကွယ်သွားလေတော့သည်။ ယင်းအပေါ်ရှိ စာသားများကလည်း ဤအချိန်တွင် ပေါ်လာခဲ့၏။

[ဆော်လမွန် မြို့တော် စစ်ဆေးရေးရုံးနှင့် ဆော်လမွန် မြို့တော်ဝန်တို့သည် ထာဝရ ညဉ့်ယံ မြို့တော်က ဆော်လမွန် မြို့တော်ကို စစ်ပွဲဆင်နွှဲချိန်တွင် စစ်ကြောရေးမှူးချုပ် ကျောက်ရှီးအပေါ် ကျိန်စာတိုက်ကာ ကျရှုံးစေရန် သဘောတူညီမှု ရရှိသွားခဲ့ကြပြီ။ ကျိန်စာတိုက်မည့်သူမှာ ကျိန်စာကတ်ပြား အစီအစဉ် ပိုင်ရှင် ကင်မလင်း ဂါလို ဖြစ်သည်] [ဒါက နောက်ဆုံး သတင်းစကားပဲ။ မင်းရဲ့ ယဇ်ပူဇော်ခြင်းက ပြီးမြောက်သွားခဲ့ပြီ။ ဒီသတင်းစကားက အဲဒီ ယဇ်ပူဇော်မှုအတွက် ကုန်ကျစရိတ်ကို ပြန်ဆပ်ဖို့ ငါ့အတွက် လုံလောက်သွားပါပြီ။ အခုကစပြီး ဆော်လမွန် မြို့တော်အတွင်းက ဘယ်သတင်းစကားကိုမှ ထပ်ပြီး ပို့ပေးတော့မှာ မဟုတ်ဘူး။ ဒီအချိန်ကစပြီး ငါတို့ကြားမှာ ဘာပတ်သက်မှုမှ မရှိတော့ဘူး]

"......"

"ဒါက တကယ်ပဲ..." မွန်ရိုးဂျီနာ၏ လက်ချောင်းများက စားပွဲပေါ်သို့ ခပ်ဖွဖွ ပုတ်နေလေသည်။

"အဲဒီ စစ်ကြောရေးမှူးချုပ်လေးကို ငါ ပြောပြသင့်လား။ ဒါပေမဲ့... သူမက ယုံပါ့မလား။ လေးစားရတဲ့ မြို့တော်ဝန်ကိုယ်တိုင်က သစ္စာဖောက်လိမ့်မယ်လို့လေ"

အချိန်အတော်ကြာ စဉ်းစားခန်း ဝင်ပြီးနောက် မွန်ရိုးဂျီနာက သူမလက်ထဲတွင် အသစ်ရရှိထားသော ယဇ်ပူဇော်ခြင်း ကတ်ပြားကို ကိုင်ဆောင်ထားလျက် လေဟာနယ်ထဲသို့ လက်ချောင်းဖြင့် ခပ်ဖွဖွ တစ်ချက် ပုတ်လိုက်လေ၏။

[ယဇ်ပူဇော်ခြင်း ကတ်ပြား · လူသား၏ အတိတ်] [အတိတ် · အခြားသူများ၏ အတိတ်အတွက် တန်ဖိုးတစ်ခုဖြင့် လဲလှယ်ခြင်း] [ယဇ်ပူဇော်ခြင်း · အတိတ်ကို သင်၏ အကြည့်နှင့် လဲလှယ်ခြင်း]

သူမက ရထားဒင်္ဂါး ဆယ့်ငါးပြားကို ထုတ်ယူလိုက်သည်။ ယဇ်ပူဇော်ခြင်း ကတ်ပြား၏ စွမ်းအားအောက်တွင် ထိုရထားဒင်္ဂါးများက အလင်းမှုန်လေးများအဖြစ်သို့ ပြောင်းလဲသွား၏။ ချက်ချင်းပင် အလင်းမှုန်များက အလင်းမျက်နှာပြင်တစ်ခုအဖြစ် ပြောင်းလဲသွားကာ သူမက ယင်းအပေါ်တွင် စာတစ်ကြောင်း ရိုက်ထည့်လိုက်လေတော့သည်။

[ဆော်လမွန် မြို့တော်၏ စစ်ကြောရေးမှူးချုပ် ကျောက်ရှီး]

"ဒီနေ့ သူမ ဘာတွေလုပ်ခဲ့လဲဆိုတာ ကြည့်ရအောင်။ ကွက်တိပဲ... ဒီကတ်ပြား အစီအစဉ် အသစ်ကို ငါ စမ်းသပ်ကြည့်လို့ ရတာပေါ့"

လုပ်ဆောင်ချက်အချို့ ပြီးဆုံးပြီးနောက် အလင်းမျက်နှာပြင်ပေါ်တွင် မြင်ကွင်းတစ်ခု ပေါ်လာခဲ့သည်။

"ဟင်"

မျက်နှာပြင်ပေါ်တွင် ဂါဝန်ဝတ်ဆင်ထားသော ကျောက်ရှီးက နေ့ခင်းဘက်တွင် အရုပ်များ ဝယ်ယူနေသည့် ဗီဒီယိုတစ်ခု ပေါ်နေ၏။ သို့သော် ထိုအချက်က အဓိက မဟုတ်ပေ။

အဓိက အာရုံစိုက်ရမည့်အရာမှာ ကျောက်ရှီး၏ ဘေးနားရှိ ဝေဝါးနေသော ပုံရိပ်တစ်ခု ဖြစ်ပေသည်။ ထိုသူ၏ အသွင်အပြင်ကို လုံးဝ ခွဲခြား၍မရနိုင်သည့်အပြင် မွန်ရိုးဂျီနာ၏ နှလုံးသားထဲတွင်ပင် "ဒီလူကို စိုက်ကြည့်ဖို့ ငါက ဘယ်လိုလုပ်ပြီး ထိုက်တန်မှာလဲ" ဟူသော ထူးဆန်းသည့် အတွေးတစ်ခုကို ဖြစ်ပေါ်စေခဲ့၏။ ဤပုံရိပ်က မွန်ရိုးဂျီနာ၏ အာရုံစိုက်မှုကို အပြည့်အဝ ဖမ်းစားသွားလေတော့သည်။

အခြားသူတစ်ယောက်သာဆိုလျှင် ထိုသူက မည်သူဖြစ်ကြောင်းကို မည်သည့်အခါမျှ ခန့်မှန်းနိုင်မည် မဟုတ်ချေ။ သို့သော်လည်း တစ်ချိန်က ထိုအရာကို ပိုင်ဆိုင်ခဲ့ဖူးသော မွန်ရိုးဂျီနာက ယဇ်ပူဇော်ခြင်း ကတ်ပြား၏ စွမ်းအားအောက်တွင်ပင် ဖုံးကွယ်ထားနိုင်သည့် အရာမှာ တစ်ခုတည်းသာ ရှိကြောင်းကို ကောင်းစွာ သိရှိနေပေသည်။

"နတ်ဆိုး ကတ်ပြား · မာနတရား လား။ ဟင်... မောင်လေးရဲ လား။ သူက ဘယ်လိုလုပ်ပြီး ကျောက်ရှီးနဲ့ ပတ်သက်သွားရတာလဲ။ ပြီးတော့... ဒီစစ်ကြောရေးမှူးချုပ်က တကယ်ကြီး အရုပ်တွေကို သဘောကျတာလား"

"ထူးဆန်းလိုက်တာ"

သူမ ဆက်လက် မကြည့်ရှုရသေးမီမှာပင် သူမထံသို့ သတင်းစကားတစ်ခု ရောက်ရှိလာခဲ့၏။ ပေးပို့သူမှာ ကျူရှင်းထူ ဖြစ်ပေသည်။

"ကျွတ်..."

[ဂျီနာ... ထာဝရ ညဉ့်ယံ မြို့တော်မှာ အရမ်းကို စိတ်ဝင်စားစရာကောင်းတဲ့ ကိစ္စတစ်ခု ဖြစ်လာလိမ့်မယ်လို့ ကံကြမ္မာက ငါ့ကို ပြောပြနေတယ်။ ဒီကိစ္စက ကျိန်စာတစ်ခုနဲ့ ပတ်သက်နေတယ်၊ ဒါကြောင့် မနက်ဖြန်ကျရင် ငါတို့အဖွဲ့ရဲ့ လှုပ်ရှားမှုတစ်ခု လုပ်ကြမယ်၊ မင်း မဖြစ်မနေ တက်ရောက်ရမယ်နော်]

"ဘယ်လောက်တောင် ရွံစရာကောင်းလိုက်လဲ" မှော်တောင်ဝှေးကို ဆုပ်ကိုင်ထားသော မွန်ရိုးဂျီနာ၏ လက်က ပို၍ တင်းကျပ်လာကာ သူမ၏ မျက်လုံးများထဲတွင် အေးစက်မှုများ ပြည့်နှက်နေလေ၏။

[ဒါက ငါနဲ့ ဘာမှမဆိုင်ဘူး]

[အဆင်ပြေပါတယ်။ မင်း သေချာပေါက် ပါဝင်ပတ်သက်ရမှာပါ]

[နင်က သေဖို့ ကောင်းတဲ့သူပဲ]

[ဟီးဟီး... ချီးကျူးတဲ့အတွက် ကျေးဇူးပါပဲ]

နက္ခတ်ဗေဒင် မျှော်စင်ထဲတွင်မူ ကျူရှင်းထူက အလင်းမျက်နှာပြင်ကို အပြုံးလေးဖြင့် ပုတ်လိုက်လေသည်။ သူမက ပွင့်လင်းမြင်သာသော ပုလင်းထဲတွင် သိမ်းဆည်းထားသည့် အမည်းရောင် ကံဆိုးခြင်းများက တစ်စထက်တစ်စ ကြီးထွားလာနေကြောင်းကို လုံးဝ သတိမထားမိခဲ့ချေ။

ကံဆိုးခြင်း - ထိန်းသိမ်းထားခြင်း မရှိပါ။ ယင်းကို ဖယ်ရှားပစ်လိုက်လျှင်ပင် ကြီးထွားမှု ရပ်တန့်သွားမည်ဟု မဆိုလိုပေ။ မည်သူကမျှ သတိမထားမိခဲ့သလို သတိထားမိရန်လည်း မဖြစ်နိုင်ချေ။

ပွင့်လင်းမြင်သာသော ပုလင်းပေါ်တွင် သေးငယ်သော အက်ကြောင်းလေးတစ်ခု ပေါ်လာခဲ့သည်။ ယင်းအထဲမှ သဲ့သဲ့မျှသော အမည်းရောင် အငွေ့အသက်တစ်ခု ထွက်ပေါ်လာလေတော့သည်။