အခန်း (၉၅-၉၆)

အခန်း။ ၉၅

သို့သော်လည်း ဤအမျိုးသမီးကတော့ ထိုသို့လုပ်ဆောင်နိုင်ခဲ့သည်။

ကုယွမ်သည် သူ၏ခေါင်းကို အသာအယာခါယမ်းလိုက်ပြီး ယဉ်ကျေးစွာပင် ပြန်ဖြေလိုက်သည်။

"နတ်သမီး... တစ်ခုခု မှားနေပြီထင်တယ်ဗျ။ ကျွန်တော်က သားရဲတစ်သောင်းနန်းတော်က တပည့်မဟုတ်သလို အဲဒီအမည်ကိုလည်း တစ်ခါမှ မကြားဖူးပါဘူး"

"သားရဲတစ်သောင်းနန်းတော်က တပည့်မဟုတ်ဘူးမလား"

ချင်ဟုန်ရှောင်က သူမ၏ မျက်ခုံးအစုံကို အသာအယာ တွန့်လိုက်ရင်း "ဒါဆိုရင် မင်းက ဒီအသက်သခင်သားရဲတွေကို မွေးမြူတဲ့ လျှို့ဝှက်အတတ်ပညာမှာ ဘာလို့ ဒီလောက်အထိ ကျွမ်းကျင်နေရတာလဲ"

"အသက်သခင်သားရဲ"

ကုယွမ်၏ ရင်ခုန်သံမှာ တစ်ချက်မျှ ဆတ်ခနဲ ဖြစ်သွားသည်။ ဤအမျိုးသမီးသည် သူနှင့် ပါးစပ်ကြီးတို့ကြားရှိ နက်ရှိုင်းသော ပတ်သက်မှုကို မြင်တွေ့သွားပြီဖြစ်ကြောင်း သူ သိလိုက်ပြီဖြစ်သည်။ သူသည် တိတ်ဆိတ်စွာပင် ရှိနေပြီး မည်သို့ပြန်လည်တုံ့ပြန်ရမည်ကို ဦးနှောက်ကို အမြန်ဆုံး အလုပ်ပေးကာ စဉ်းစားနေတော့သည်။

စကားများများပြောလျှင် အမှားများများပါတတ်ပြီး စကားနည်းနည်းပြောလျှင် အမှားနည်းနည်းသာ ပါတတ်သည်။ စကားတစ်ခွန်းကို ပြောထွက်လိုက်သည်နှင့် ပြန်ရုပ်သိမ်း၍ မရနိုင်တော့သလို ကိုယ့်၏ အားနည်းချက်ကိုလည်း ဖော်ပြရာရောက်သွားနိုင်သည်။

ချင်ဟုန်ရှောင်သည် ကုယွမ်၏ နိုးကြားမှုနှင့် သတိထားနေပုံကို အကဲခတ်မိသွားပြီး အေးဆေးစွာပင် ပြောလိုက်သည်။

"စိတ်ချပါ... မင်းလို ကျင့်ကြံမှုအဆင့် နိမ့်ပါးတဲ့သူတစ်ယောက်က ဘာလို့ ဒီလောက်များတဲ့ ပိုးမွှားသားရဲတွေနဲ့ မိစ္ဆာသားရဲတွေကို ယဉ်ပါးအောင် လုပ်နိုင်ရတာလဲဆိုတာကို ငါ သိချင်ရုံသက်သက်ပါ။ မင်းရဲ့ လျှို့ဝှက်ချက်တွေကို စပ်စုဖို့ ငါ့မှာ စိတ်မရှိပါဘူး။ မင်း မဖြေချင်ဘူးဆိုရင်လည်း မပြောလဲ ရပါတယ်"

သူမ ပြောနေစဉ်အတွင်းမှာပင် သူမ၏ အကြည့်မှာ မျိုဟပ်မြွေ၊ သံကျောကုန်းကင်းခြေများနှင့် ရတနာရှာကြွက်တို့ဆီသို့ ဝေ့ဝဲသွားရာ သူမ၏ လှပသော မျက်ဝန်းအစုံတွင် စိတ်ဝင်စားမှု အရိပ်အယောင်အချို့ ဖြတ်ပြေးသွားသည်။

သူမ၏ ထူးကဲလှသော အကဲခတ်ဉာဏ်ဖြင့် သံကျောကုန်းကင်းခြေများမှလွဲ၍ ကြွက်ငယ်နှင့် မျိုဟပ်မြွေတို့မှာ မကြာသေးမီကမှ သွေးမျိုးဆက် အသွင်ပြောင်းလဲမှု ဖြစ်ပေါ်ထားသည်ကို သတိပြုမိလိုက်သည်။

ဤကဲ့သို့သော သွေးမျိုးဆက် အသွင်ပြောင်းလဲမှုမျိုးမှာ မိစ္ဆာသားရဲများတွင် ဖြစ်ခဲလှပြီး များသောအားဖြင့် သာမန်သားရဲများက ကံကောင်းထောက်မစွာဖြင့် ကောင်းကင်နှင့် မြေကမ္ဘာ၏ ရတနာပစ္စည်းများကို စားသုံးမိရာမှ တိုက်တိုက်ဆိုင်ဆိုင် ပြောင်းလဲသွားတတ်ကြခြင်းပင်။

သို့သော်လည်း သူမက တစ်ချက်မျှ ကြည့်လိုက်ရုံဖြင့် ထိုသားရဲငယ် သုံးကောင်မှာ ကြောက်မက်ဖွယ်ကောင်းသော သားရဲကြီးတစ်ကောင်နှင့် ရင်ဆိုင်လိုက်ရသကဲ့သို့ တုန်တုန်ရင်ရင်ဖြင့် တစ်ကောင်နှင့်တစ်ကောင် ပူးကပ်နေကြကာ လှုပ်ပင်မလှုပ်ရဲတော့ပေ။

အမြဲတမ်း သတ္တိအရှိဆုံးဖြစ်ပြီး ပေါ့ပေါ့ပါးပါး နေတတ်သည့် သံကျောကုန်းကင်းခြေများပင်လျှင် တုန်ရီလျက် ခွေနေပြီး သူ၏ သံချိတ်ကဲ့သို့ ခြေလက်များကို ဘယ်နားထားရမှန်း မသိဖြစ်နေရှာသည်။

ကုယွမ်သည် အသက်ကို ပြင်းပြင်းတစ်ချက် ရှူလိုက်ပြီး လက်အုပ်ချီ၍ ရိုသေစွာဖြင့် "နတ်သမီးရဲ့ နားလည်ပေးမှုအတွက် ကျေးဇူးတင်ပါတယ်" ဟု ပြောလိုက်သည်။

"တကယ်တော့ ဒါက မပြောပြနိုင်စရာ မရှိပါဘူး။ ကျွန်တော်က ငယ်ငယ်ကတည်းက ပိုးမွှားသားရဲတွေကို ပြုစုပျိုးထောင်တဲ့နေရာမှာ ထူးခြားတဲ့ ပါရမီ ပါလာခဲ့တာပါ။ နောက်ပိုင်းမှာ ကံကောင်းတဲ့ အခွင့်အရေးအချို့နဲ့ ကြုံခဲ့ရလို့ ဒီမိစ္ဆာပိုးမွှားတွေနဲ့ ထူးဆန်းတဲ့သားရဲတွေကို ယဉ်ပါးအောင် လုပ်နိုင်ခဲ့တာပါ"

"ဪ... အဲဒီလိုလား..."

ချင်ဟုန်ရှောင်သည် ကုယွမ်၏ အတွေးများကို ထိုးဖောက်မြင်နေပုံရသော်လည်း ထပ်မံ၍ အတင်းအကျပ် မမေးမြန်းတော့ပေ။ သူမ၏ သဘာဝမှာ မူလကပင် အေးစက်တည်ငြိမ်ပြီး လောကီရေးရာ ကိစ္စအသေးအမွှားလေးများကြောင့် စိတ်လှုပ်ရှားတုန်လှုပ်လေ့ မရှိသူဖြစ်သည်။

ကုယွမ်က သူမအပေါ် အလွန်အမင်း သတိထားနေသည်ကို သတိပြုမိသော်လည်း သူမ စိတ်မဆိုးခဲ့ပေ။ လူတိုင်းတွင် ကိုယ်ပိုင်လျှို့ဝှက်ချက် ရှိစမြဲဖြစ်ရာ ကုယွမ်၏ သတိကြီးစွာ ထားရှိမှုမှာ အလွန်ပင် ကျိုးကြောင်းဆီလျော်သည်။

အမှန်စင်စစ် ယနေ့တွင် သူမ၏ စိတ်ကို အနှောင့်အယှက်ပေးနေသော ကိစ္စအချို့သာ မရှိခဲ့လျှင် ဤနေရာသို့ သူမ လာဖြစ်မည် မဟုတ်ပေ။ သို့သော်လည်း မမျှော်လင့်ဘဲ အတော်ပင် စိတ်ဝင်စားစရာကောင်းသော မြင်ကွင်းတစ်ခုကို သူမ တွေ့ရှိခဲ့ရသည်။

တစ်စုံတစ်ယောက်သည် ကောင်းကင်မိစ္ဆာတာအိုလုယူခြင်းအတတ်ကို အသုံးပြု၍ ခန္ဓာကိုယ်ကို အသွင်ပြောင်းလဲခဲ့သည်ကို သူမ တွေ့ခဲ့ရသလို ထို့နောက်တွင်တော့ ဤလူငယ်လေး၏ အံ့သြဖွယ်ကောင်းသော သားရဲယဉ်ပါးစေသည့် အတတ်ပညာကြောင့် ပါးစပ်ကြီးမှာ ၎င်း၏ မျိုးနွယ်စု အတားအဆီးကို ကျော်လွှားကာ မျိုဟပ်မြွေအဖြစ် ပြောင်းလဲသွားသည်ကို မြင်တွေ့ခဲ့ရခြင်းပင်။

ဤလုပ်ရပ်မှာ မျောက်တစ်ကောင်ကို လူအဖြစ် ပြောင်းလဲပေးလိုက်ခြင်း သို့မဟုတ် ဝိညာဉ်မြွေတစ်ကောင်ကို နဂါးတစ်ကောင်အဖြစ် ပြောင်းလဲပေးလိုက်ခြင်းနှင့်ပင် နှိုင်းယှဉ်၍ ရသည်။ သူမကိုယ်တိုင်လည်း ဤကဲ့သို့ လုပ်ဆောင်နိုင်သည်မှာ အမှန်ပင်။

သို့သော် ထိုလူငယ်လေးမှာ ထူးခြားသော တစ်စုံတစ်ခုကို ပိုင်ဆိုင်ထားသည်မှာ သေချာလှသည်။ ထို့ပြင် ကုယွမ်သည် ဤသားရဲငယ်လေးများကို အသက်သခင်သားရဲများအဖြစ် မွေးမြူထားပြီး ၎င်းတို့၏ မွေးရာပါ နတ်ဘုရားအတတ်များကို ကျင့်ကြံမှုအတွက် အသုံးချနိုင်ခြင်းမှာ သားရဲတစ်သောင်းနန်းတော်၏ မျိုးရိုးနှင့် အတော်ပင် ဆင်တူနေသည်။

ဤလူငယ်မှာ သားရဲတစ်သောင်းနန်းတော်မှ ပါရမီရှင်တစ်ဦး ဖြစ်နိုင်သည်ဟု သံသယဝင်မိသဖြင့် သူမကိုယ်တိုင် ထွက်ပေါ်လာကာ အကဲခတ်ကြည့်မိခြင်းပင်။

ခဏမျှ တိတ်ဆိတ်သွားပြီးနောက် သူမ၏လက်ထဲတွင် စိမ်းပြာရောင် ကျောက်စိမ်းဥတစ်လုံး ပေါ်လာတော့သည်။

ဤစိမ်းပြာရောင် ကျောက်စိမ်းဥမှာ ကြက်ဥတစ်လုံးခန့် အရွယ်အစားရှိပြီး ဘဲဥပုံသဏ္ဌာန် ရှိသည်။ အပြစ်အနာအဆာကင်းသော ကျောက်စိမ်းဖြင့် ထုဆစ်ထားသကဲ့သို့ ရှိနေပြီး နူးညံ့သော ဝိညာဉ်အလင်းတန်းများ ထွက်ပေါ်နေ၏။ ၎င်း၏ မျက်နှာပြင်ပေါ်တွင် ထူးဆန်းသော ဒီဇိုင်းတစ်ခုအလား ရှိနေသည့် နက်မှောင်သော မီးခိုးရောင် အစင်းကြောင်းလေးများကလည်း စီခြယ်ထားသည်။

ရတနာရှာဖွေခြင်းအတတ်ကို ပိုင်ဆိုင်ထားသော ကုယွမ်၏ မျက်လုံးထဲတွင်မူ ဤကျောက်စိမ်းဥမှ ထွက်ပေါ်နေသော ဝိညာဉ်အလင်းမှာ အလွန်တရာ တောက်ပလွန်းလှသည်။ ကျောက်စိမ်းရောင် အလင်းတန်းမှာ စူးရှတောက်ပနေရုံသာမက ၎င်း၏အတွင်း၌ ထက်မြက်ပြီး ကြမ်းတမ်းလှသော အသိစိတ်တစ်ခုလည်း ကိန်းအောင်းနေ၏။

တစ်ချက်မျှ ကြည့်လိုက်ရုံဖြင့် ကုယွမ်သည် သူ၏မျက်လုံးများမှာ စူးခနဲ နာကျင်သွားသဖြင့် မျက်ရည်များပင် ထွက်လုနီးပါး ဖြစ်သွားသည်။ သူသည် အကြည့်ကို အမြန်ဆုံး လွှဲဖယ်လိုက်ရပြီး ဆက်၍ မကြည့်ရဲတော့ပေ။

သို့သော်လည်း သူ၏ စိတ်ထဲတွင်တော့ အံ့သြမှုများဖြင့် ပြည့်နှက်နေတော့သည်။

ဒါက တကယ်တော့ ဘာပစ္စည်းများပါလိမ့်။

တိုက်ရိုက်ကြည့်ရန်ပင် မစွမ်းသာချင်တော့ပေ။

"ဒါက လျှို့ဝှက်နယ်မြေတစ်ခုကနေ တွေ့ရှိခဲ့တဲ့ ရှေးဦးခေတ် ထူးဆန်းတဲ့ ပိုးမွှားတစ်ကောင်ရဲ့ ဥပဲ။ ကံမကောင်းတာက အချိန်အတော်ကြာသွားတာရယ် ထိန်းသိမ်းမှု မမှန်ကန်တာရယ်ကြောင့် သူ့ရဲ့ ရှင်သန်နိုင်စွမ်းက အတော်လေး အားနည်းသွားပြီ။ ပေါက်ဖွားဖို့အတွက် တော်တော်လေး ခက်ခဲလိမ့်မယ်"

ချင်ဟုန်ရှောင်က အကျဉ်းချုံး ရှင်းပြပြီးနောက် ထိုဥကို ကုယွမ်၏ လက်ထဲသို့ လှမ်းပစ်

ပေးလိုက်ကာ ပြောလိုက်သည်။

"မင်းက ပိုးမွှားသားရဲတွေကို ပြုစုပျိုးထောင်တဲ့နေရာမှာ ထူးခြားတဲ့ ပါရမီရှိတယ်ဆိုတော့... ဒီကျောက်စိမ်းဥကို မင်း ပေါက်ဖွားအောင် လုပ်နိုင်မလား"

[တာအိုအနှစ်သာရအမှတ် +၈၂၀]

စိမ်းပြာရောင် ကျောက်စိမ်းဥမှာ ကုယွမ်၏လက်ထဲသို့ ကျရောက်လာသည်နှင့် တစ်ပြိုင်နက် ကြီးမားသော လက်ဆောင်တစ်ခုကို ပေးအပ်လိုက်သည်။

ကုယွမ်သည် ချက်ချင်းပင် လေးလံမှုကို ခံစားလိုက်ရသည်။ ဤကျောက်စိမ်းဥငယ်လေးမှာ အံ့သြဖွယ်ကောင်းလောက်အောင် ပေါင်ချိန်အတော်လေး လေးလံနေခြင်းပင်။ ကျောက်စိမ်းဥမှာ ကိုင်လိုက်လျှင် နွေးထွေးနေပြီး ၎င်း၏ မျက်နှာပြင်မှာ နွေးထွေးသော ကျောက်စိမ်းကဲ့သို့ ချောမွေ့ကာ နူးညံ့နေသည်။

သေချာစွာ အာရုံခံကြည့်ပါက ၎င်း၏အတွင်း၌ ဖျော့တော့သော်လည်း စင်ကြယ်လှသော သက်ရှိချီစွမ်းအင်တစ်ခု စတင်အခြေတည်နေသည်ကို ခံစားသိရှိနိုင်သည်။

"ဒါက..."

ကုယွမ် ခဏမျှ တုံ့ဆိုင်းသွားပြီး စကားပြောရန် ပြင်လိုက်စဉ်မှာပင် သတင်းအချက်အလက်

အချို့ ထွက်ပေါ်လာတော့သည်။

[သင်သည် စိမ်းပြာရိပ် ဓားလိပ်ပြာဥ ရွှေရောင်အဆင့် ကို ရရှိပါသည်။ ၎င်းကို ပေါက်ဖွားစေရန် တာအိုအနှစ်သာရအမှတ် ၁၃၀၀ အသုံးပြုလိုပါသလား]

[ဤဥ၏ ရှင်သန်နိုင်စွမ်းမှာ အားနည်းပြီး အဆီအနှစ် မလုံလောက်သောကြောင့် ပေါက်ဖွားရန် ပျက်ကွက်နိုင်ခြေ ၉၉ ရာခိုင်နှုန်း ရှိပါသည်။ အဆီအနှစ် ပြန်လည်ဖြည့်တင်းရန် တာအိုအနှစ်သာရအမှတ် ၃၉၀၀ အသုံးပြုမည်လား အတည်ပြု/ငြင်းပယ်]

[မှတ်ချက် - တာအိုအနှစ်သာရအမှတ် မလုံလောက်ပါက ပေါက်ဖွားမှု ပျက်ကွက်နိုင်သဖြင့် သေချာစွာ ဆုံးဖြတ်ပါ]

...

စိမ်းပြာရိပ် ဓားလိပ်ပြာဥမှာ ရွှေရောင်အဆင့်ပင်။

ကုယွမ်မှာ အံ့အားသင့်သွားရသည်။ သူ အပင်ပန်းခံ ပြုစုပျိုးထောင်ထားသည့် သားရဲအဖော် လေးကောင်ထဲတွင် ယခုအချိန်အထိ အနီရောင်အဆင့် သုံးကောင်သာ ရှိသေးရာ ဤစိမ်းပြာရိပ် ဓားလိပ်ပြာနှင့် ယှဉ်လျှင် သိသိသာသာ ကွာခြားနေသည်။

သို့သော်လည်း ကုယွမ်သည် စိမ်းပြာရိပ် ဓားလိပ်ပြာ၏ ကျော်ကြားမှုကို ကြားဖူးထားသည်။ ရှေးဦးခေတ်ကာလများတွင် ရွှေဝါးမြိုနတ်ဘုရားပုရွက်ဆိတ်၊ ခြောက်တောင်ပံရွှေပိုးကောင်၊ တစ်ဆယ့်နှစ်တောင်ပံ ကောင်းကင်ကင်းခြေများ၊ သွေးနီရောင်ခြင်၊ ကောင်းကင်မျိုဖားနှင့် စိမ်းပြာကျောက်စိမ်းဓားလိပ်ပြာကဲ့သို့သော ထူးဆန်းသည့် ပိုးမွှားများ ရှိခဲ့သည်ဟု ဆိုကြသည်။

ထိုထူးဆန်းသော ပိုးမွှားတစ်ကောင်စီတွင် ကြောက်မက်ဖွယ်ကောင်းပြီး နားမလည်နိုင်သော စွမ်းရည်များ ရှိကြသည်။ ဥပမာအားဖြင့် ရွှေဝါးမြိုနတ်ဘုရားပုရွက်ဆိတ်မှာ လုံးဝဖျက်ဆီး၍မရဘဲ အလွန်မာကျောကာ မည်သည့်အရာကိုမဆို ကိုက်ဖြတ်ဝါးမြိုနိုင်သည်ဟု ပြောကြသည်။ နတ်ဘုရားရွှေရတနာများ သို့မဟုတ် မည်သည့် နတ်ဘုရားအတတ်နှင့် မှော်ပညာများကမျှ ဤပုရွက်ဆိတ်၏ အကိုက်အခဲကို မခံနိုင်ပေ။

ရှေးဦးခေတ်က နတ်မင်းတစ်ပါးသည် ဤကြောက်မက်ဖွယ်ကောင်းသော ပိုးမွှားများကို သွားရောက်ရန်စမိရာ နောက်ပိုင်းတွင် ရွှေဝါးမြိုနတ်ဘုရားပုရွက်ဆိတ် ထောင်ပေါင်းများစွာ၏ ဝိုင်းဝန်းကိုက်ခဲခြင်းကို ခံရပြီး ၎င်း၏ ရုပ်အလောင်းနှင့် ဝိညာဉ်ရတနာများပါမကျန် အကုန်အစင် ဝါးမြိုခြင်း ခံခဲ့ရသည်ဟု ဆိုစမှတ်ပြုကြသည်။ သူတို့၏ ရာဇဝတ်ဘေးမှာ စိတ်ကူးကြည့်ရန်ပင် မဖြစ်နိုင်လောက်အောင်ပင်။

အခန်း။ ၉၆

ရွှေဝါးမြိုနတ်ဘုရားပုရွက်ဆိတ်ကပင် ဤမျှအစွမ်းထက်လျှင် အခြားသော ထူးဆန်းသည့် ပိုးမွှားများကိုလည်း လျှော့တွက်၍ မရသည်မှာ သေချာသည်။

ခြောက်တောင်ပံရွှေပိုးကောင်သည် အလွန်အမင်း အဆိပ်ပြင်းလှသည်။ နဂါးတံခါးနယ်ပယ်မှသည် မူလဝိညာဉ်စစ်မှန်သော နတ်မင်းအဆင့်များပင် ၎င်း၏အဆိပ်ကြောင့် သေဆုံးနိုင်သည်ဟု ပြောကြ၏။

တစ်ဆယ့်နှစ်တောင်ပံ ကောင်းကင်ကင်းခြေများမှာမူ နဂါးများကို အစာအဖြစ် စားသုံးပြီး ၎င်းမှုတ်ထုတ်လိုက်သော ကိုးရောင်ခြည်ဆိုးယုတ်သောအလင်းမှာ ဝိညာဉ်ကို တိုက်ခိုက်သည့် နတ်ဘုရားအတတ်ဖြစ်ရာ ယင်ဝိညာဉ်နှင့် မူလဝိညာဉ်တို့ကိုပင် အရည်ပျော်စေနိုင်သည်။

သွေးနီရောင်ခြင်နှင့် ကောင်းကင်မျိုဖားတို့မှာလည်း ကိုယ်စီထူးခြားသော စွမ်းရည်များ ရှိကြသည်။

စိမ်းပြာကျောက်စိမ်းဓားလိပ်ပြာမှာမူ ရှေးဦးခေတ်၏ အလားတူကျော်ကြားသော ထူးဆန်းသည့် ပိုးမွှားဖြစ်ပြီး မွေးရာပါ ဓားတာအို မဟာနတ်ဘုရားအတတ်များကို ပိုင်ဆိုင်ထားသည်။ ၎င်း၏ တောင်ပံများကို ခတ်လိုက်ရုံဖြင့် အရာအားလုံးကို အမှုန့်ခြေဖျက်နိုင်သော စိမ်းပြာကျောက်စိမ်းဓားချီစွမ်းအင်များကို ထုတ်လွှတ်နိုင်ပြီး ဓားတစ်လက်ဖြင့် အတတ်ပေါင်းသောင်းခြောက်ထောင်ကို ဖြိုခွင်းခြင်းဟူသည့် ဂုဏ်သတင်းနှင့်အညီပင်။

ယခု ဤစိမ်းပြာရိပ် ဓားလိပ်ပြာမှာ ထိုစိမ်းပြာကျောက်စိမ်းဓားလိပ်ပြာ၏ မျိုးဆက်ပင်။ ၎င်း၏အစွမ်းမှာ မူလမျိုးရိုးထက် များစွာနိမ့်ပါးသော်လည်း သာမန်ကျင့်ကြံသူများအတွက်မူ ကြောက်မက်ဖွယ်ကောင်းသော သတ္တဝါတစ်ကောင် ဖြစ်နေဆဲပင်။

သို့သော်လည်း ဤအမျိုးသမီးက ထိုဥကို ပေါက်ဖွားအောင် မလုပ်နိုင်သည်မှာ မဆန်းပေ။ ဤစိမ်းပြာရိပ် ဓားလိပ်ပြာဥတွင် မူလအဆီအနှစ်များ ကုန်ခမ်းနေပြီး ရှင်သန်နိုင်စွမ်း အလွန်အားနည်းနေသဖြင့် ပေါက်ဖွားနိုင်ရန်မှာ အမှန်တကယ်ပင် ခဲယဉ်းလှသည်။

"နတ်သမီးက ကျွန်တော့်ကို ဒီစိမ်းပြာရိပ် ဓားလိပ်ပြာဥကို ပေါက်ဖွားပေးစေချင်တာလား"

ကုယွမ်သည် ကျောက်စိမ်းဥကို ကိုင်ထားရင်း ရင်ခုန်သံများ မြန်လာသည်။ ဤဥမှာ တကယ့်ရတနာတစ်ပါး ဖြစ်သည်ကို ဝန်ခံရမည်။ အကယ်၍ ၎င်းကို ပေါက်ဖွားစေပြီး သေချာစွာ ပြုစုပျိုးထောင်နိုင်လျှင် အနာဂတ်တွင် အားကိုးရမည့် လက်ရုံးတစ်ခု ဖြစ်လာပေလိမ့်မည်။ ကုယွမ်အတွက်မူ အားကိုးရမည့် လက်ရုံးရုံတင်မကဘဲ စိမ်းပြာရိပ် ဓားလိပ်ပြာ၏ မွေးရာပါ နတ်ဘုရားအတတ်ကိုပါ ရရှိနိုင်မည်ပင်။

၎င်း၏ မွေးရာပါအတတ်မှာ အတိအကျ ဘာလဲဆိုသည်ကို ကုယွမ် မသိသော်လည်း ဓားတာအိုနှင့် ပတ်သက်နေမည်မှာ သေချာသလောက်ရှိသည်။ လက်ရှိတွင်လည်း ကုယွမ်သည် ဓားသိုင်းပညာကိုပင် လေ့ကျင့်နေသည် ဖြစ်သည်။

ရတနာရှာဖွေခြင်းအတတ်နှင့် ဝိညာဉ်ဝါးမြိုခြင်းပါရမီတို့ကပင် ကုယွမ်ကို ကြီးမားသော အကျိုးကျေးဇူးများ ပေးထားခဲ့ရာ စိမ်းပြာရိပ် ဓားလိပ်ပြာ၏ မွေးရာပါအတတ်မှာလည်း ၎င်းတို့ထက်မနည်း သန်မာနေမည်မှာ မြေကြီးလက်ခတ်မလွဲပင်။

ကံမကောင်းသည်မှာ ဤဥမှာ သူနှင့်မဆိုင်ဘဲ ရှေ့မှ နက်နဲလှသော အမျိုးသမီးနှင့်သာ ဆိုင်နေခြင်းပင်။ ကုယွမ်အနေဖြင့် လိုချင်တပ်မက်စိတ် ရှိသော်လည်း မတရားရယူရန် မဝံ့ရဲပေ။

"မင်းက ဒီဥရဲ့ မျိုးရိုးကိုတောင် သိတာပဲ။ ဟုတ်တယ် ဒါက စိမ်းပြာရိပ် ဓားလိပ်ပြာဥပဲ"

ချင်ဟုန်ရှောင်မှာ အနည်းငယ် အံ့အားသင့်သွားပြီးနောက် တိုးညင်းစွာ ပြောလိုက်သည်။

"တကယ်လို့ မင်းသာ ဒီဥကို ပေါက်ဖွားအောင် လုပ်နိုင်မယ်ဆိုရင် မင်းငြင်းလို့မရနိုင်တဲ့ အကျိုးကျေးဇူးတချို့ ငါပေးမယ်"

သူမ ပြောပြောဆိုဆိုနှင့် မက်မွန်သီးတစ်လုံးကို ထုတ်ယူကာ ကုယွမ်ထံသို့ ပစ်ပေးလိုက်သည်။

"ဒီဝိညာဉ်မက်မွန်သီးကိုတော့ စရန်ငွေအဖြစ် အရင်ယူထားလိုက်ဦး"

ဖြူနီရောင်သန်းနေသော မက်မွန်သီးမှာ လက်သီးဆုပ်ထက် အနည်းငယ် ပိုကြီးပြီး ပန်းရောင်သမ်းကာ စွဲမက်ဖွယ်ကောင်းသော အမွှေးနံ့များ ထွက်ပေါ်နေသည်။ ကုယွမ်၏ မျက်လုံးထဲတွင်မူ ဤမက်မွန်သီးမှ ထွက်ပေါ်နေသော ဝိညာဉ်အလင်းမှာ အလွန်ပင် တောက်ပလှသည်။ အနည်းဆုံးတော့ သူအရင်က တူးခဲ့သော ဝိညာဉ်ဂျင်ဆင်းထက် များစွာ သာလွန်နေသည်။

နတ်သမီးဆိုတာ မဆိုးဘူးပဲ။ ဒီလိုပစ္စည်းကောင်းမျိုးကို အလွယ်တကူ ထုတ်ပေးနိုင်တယ်။

နတ်သမီးအစ်မကြီးရယ်... ကျွန်တော် ပင်ပင်ပန်းပန်း မလုပ်ချင်တော့ပါဘူးဟုပင် ပြောလိုက်ချင်တော့သည်။

ကုယွမ် စိတ်ထဲမှ သက်ပြင်းချလိုက်မိသည်။ စရန်ငွေမျှသာရှိသေးသည့် ဤဝိညာဉ်မက်မွန်သီးသည်ပင် အဆင့် ၇ သို့မဟုတ် ၈ ရှိသော ဝိညာဉ်ဆေးဝါးနှင့် နှိုင်းယှဉ်နိုင်သည်။ အကယ်၍ သူ ဥကိုသာ ပေါက်ဖွားပေးနိုင်လျှင် သူမပေးမည့် ဆုလာဘ်မှာ ဤမက်မွန်သီးထက် များစွာ သာလွန်နေမည်မှာ သေချာသည်။

သို့သော်လည်း ဥကို ပေါက်ဖွားရန်အတွက် ကုယွမ်အနေဖြင့် အနည်းဆုံး တာအိုအနှစ်သာရအမှတ် ၅၀၀၀ ခန့် အသုံးပြုရပေလိမ့်မည်။ ရင်းနှီးရမည့် တန်ဖိုးမှာ မသေးလှပေ။

"ဒါ့အပြင်... စိမ်းပြာရိပ် ဓားလိပ်ပြာထက် ပိုပြီး ဆွဲဆောင်မှုရှိတဲ့ ဆုလာဘ်မျိုးက ဘာရှိနိုင်ဦးမှာလဲ"

"ကျွန်တော် ကြိုးစားကြည့်ပါ့မယ်"

ကုယွမ်က ရဲရဲဝံ့ဝံ့ပင် ပြောလိုက်သည်။

"ဒါပေမဲ့ ကျွန်တော် တကယ်ပဲ ဒီဥကို ပေါက်ဖွားအောင် လုပ်နိုင်ခဲ့ရင် နတ်သမီးပေးမယ့် ဆုလာဘ်ကို စိမ်းပြာရိပ် ဓားလိပ်ပြာဥ တစ်လုံးနဲ့ပဲ လဲလို့ရမလား"

"ရတာပေါ့"

ချင်ဟုန်ရှောင်က သူ့ကို တစ်ချက်ကြည့်လိုက်သည်။ ဤလူငယ်လေး ဘာကြောင့် ဤမျှ ယုံကြည်မှုရှိနေသလဲဆိုသည်ကို သူမ နားမလည်နိုင်ပေ။ သူမ၏ သူငယ်ချင်းတစ်ဦးဖြစ်သော ဂူတာအို ပညာရှင်တစ်ဦးကမူ သူမရရှိထားသော ဤကျောက်စိမ်းဥ အတော်များများမှာ သေနေပြီဖြစ်ကြောင်း၊ အသက်ရှိသည့် အနည်းငယ်မှာလည်း ရှင်သန်နိုင်စွမ်း အလွန်အားနည်းကာ အဆီအနှစ်များ မလုံလောက်ကြောင်း ပြောဖူးသည်။ ၎င်းကို ကုစားရန်မှာ နတ်ဘုရားအဆီအနှစ်ထဲတွင် စိမ်ထားမှသာ ရနိုင်မည်ဖြစ်သော်လည်း နတ်ဘုရားအဆီအနှစ်မှာ ဤလိပ်ပြာဥထက်ပင် ပို၍ရှားပါးလှရာ သူမ ဘယ်မှာမှ ရှာလို့မတွေ့ပေ။

ဘာပဲဖြစ်ဖြစ် ယုံကြည်မှုရှိခြင်းမှာ ကောင်းသောလက္ခဏာပင်။ သူမသည် စိမ်းပြာရိပ် ဓားလိပ်ပြာဥကို ဤကောင်လေးထံတွင် ထားခဲ့ခြင်းမှာ အမှန်တကယ်တော့ အများကြီး မျှော်လင့်ထားခြင်းမျိုး မဟုတ်ဘဲ စမ်းသပ်ကြည့်စေချင်ရုံမျှသာ ဖြစ်သည်။ အကယ်၍ မအောင်မြင်ခဲ့လျှင်လည်း သူမအတွက် ထူးဆန်းနေမည် မဟုတ်ပေ။ သို့သော် တကယ်တမ်း ပေါက်ဖွားလာခဲ့လျှင်မူ သူမအတွက် အလွန်ပင် ဝမ်းမြောက်စရာ ဖြစ်ပေလိမ့်မည်။

"ကောင်းပါပြီ"

ကုယွမ် စိတ်ဓာတ်များ တက်ကြွသွားသော်လည်း မေးခွန်းတစ်ခုကို သတိရသွားသည်။

"အကယ်၍ ကျွန်တော်သာ ဥကို ပေါက်ဖွားပေးနိုင်ခဲ့ရင် နတ်သမီးဆီကို ဘယ်လို အကြောင်းကြားရမလဲ"

"ဒီကျောက်စိမ်းဥပေါ်မှာ ငါ့ရဲ့အမှတ်အသားတစ်ခု ခတ်နှိပ်ထားပြီးသားပါ။ အကယ်၍ ဥပေါက်လာပြီဆိုရင် ငါအလိုအလျောက် သိပါလိမ့်မယ်"

ချင်ဟုန်ရှောင်က တိုးညင်းစွာ ပြောလိုက်ပြီးနောက် "ဒါနဲ့... ငါ့ရဲ့မျိုးရိုးက ချင်ပါ" ဟု ထပ်လောင်းပြောကြားခဲ့သည်။

"ဪ... နတ်သမီးချင်ကိုး။ ကျွန်တော့်နာမည်ကတော့ ကုယွမ်ပါ"

ကုယွမ်က သူ့ကိုယ်သူ အကျဉ်းချုံး မိတ်ဆက်လိုက်ပြီး သိချင်ဟန်ဆောင်ကာ "နတ်သမီး ပြောသွားတဲ့ သားရဲတစ်သောင်းနန်းတော်ဆိုတာ ဘယ်လိုအင်အားစုမျိုးလဲဗျ" ဟု မေးလိုက်သည်။

ချင်ဟုန်ရှောင်က ဖုံးကွယ်ထားခြင်းမရှိဘဲ ရှင်းပြလိုက်သည်။

"သားရဲတစ်သောင်းနန်းတော်ဆိုတာ ဆေးဘုရင်တောင်၊ ကြယ်စင်မြစ်ဓားဂိုဏ်းနဲ့ ဂူနတ်ဘုရားဂိုဏ်းတို့လိုပဲ တောင်ပိုင်းနယ်စပ်ရဲ့ အဓိကကျင့်ကြံရေးဂိုဏ်းကြီးတွေထဲက တစ်ခုပဲ။ သူတို့ရဲ့အဓိကအလုပ်က ဝိညာဉ်သားရဲတွေနဲ့ မိစ္ဆာသားရဲအမျိုးမျိုးကို မွေးမြူတာပဲ။ အဲဒီနန်းတော်ရဲ့ အမွေအနှစ်တွေက မင်းနဲ့နည်းနည်းဆင်တူတယ်။ ဝိညာဉ်သားရဲတွေကို ယဉ်ပါးအောင်လုပ်ပြီး အသက်သခင်သားရဲတွေရဲ့ မွေးရာပါနတ်ဘုရားအတတ်တွေကို အသုံးချပြီး ကျင့်ကြံမှုကို အထောက်အကူပြုစေတာမျိုးပေါ့"

"ဒါပေမဲ့ သားရဲတစ်သောင်းနန်းတော်ရဲ့ နယ်မြေက ဒီကနေ မိုင်ပေါင်းသောင်းနဲ့ချီဝေးတဲ့ လျိုကျိုးမှာ ရှိတာ။ အကယ်၍ မင်း သားရဲတစ်သောင်းနန်းတော်က တပည့်တွေနဲ့တွေ့ရင် မင်းရဲ့စွမ်းရည်ကို ထုတ်မပြတာ အကောင်းဆုံးပဲ။ မဟုတ်ရင် ဒုက္ခအကြီးအကျယ် တွေ့နိုင်တယ်"

အသက်သခင်သားရဲတွေရဲ့ မွေးရာပါနတ်ဘုရားအတတ်တွေကို ကျင့်ကြံမှုမှာ အသုံးချလို့ရတယ် ဟုတ်လား။

ကုယွမ်သည် ထိုစကားကို ကြားရသောအခါ စိတ်လှုပ်ရှားသွားသည်။ ဤအမျိုးသမီးမှာ သူ၏စွမ်းရည်အစစ်အမှန်ကို ထိုးဖောက်မမြင်နိုင်ဘဲ သူသည် သားရဲများ၏ နတ်ဘုရားအတတ်ကို အသုံးချရုံသာ ရှိသေးသည်ဟု ထင်မြင်နေပုံပင်။

အမှန်စင်စစ် သူသည် သားရဲများ၏ ပါရမီစွမ်းရည်များကိုပါ ရရှိထားခြင်းဖြစ်သည်ကို သူမမသိနိုင်ပေ။ ဤအချက်နှစ်ခုမှာ ကောင်းကင်နှင့် မြေကြီးကဲ့သို့ ကွာခြားလှသည်။

နောက်ဆုံးစကားကို ကြားသောအခါ ကုယွမ်သည် ကြောချမ်းသွားပြီး "သတိပေးတဲ့အတွက် ကျေးဇူးတင်ပါတယ် နတ်သမီးချင်" ဟု ဦးညွတ်နှုတ်ဆက်လိုက်သည်။

"ကောင်းပြီ... ငါသွားတော့မယ်။ ကိုယ့်ကိုယ်ကိုယ် ဂရုစိုက်ပါ"

ချင်ဟုန်ရှောင်က ထပ်မပြောတော့ဘဲ ကိုယ်ကိုလှည့်လိုက်သည်နှင့် သူမ ပျောက်ကွယ်သွားတော့ရာ သင်းပျံ့သောရနံ့လေးတစ်ခုသာ ကျန်ရစ်ခဲ့တော့သည်။

နက်နဲလှသော အမျိုးသမီး ထွက်ခွာသွားသည်ကို ကြည့်ရင်း ကုယွမ်သည် သက်ပြင်းတစ်ချက်ကို အသာအယာ ချလိုက်မိသည်။ ဤအမျိုးသမီးမှာ သူ့အပေါ် ရန်လိုခြင်းမရှိသည့်အပြင် ဆုလာဘ်များကိုပင် ကြိုတင်ပေးအပ်ခဲ့သော်လည်း သူမ၏ကျင့်ကြံမှုနှင့် အစွမ်းမှာ အလွန်ပင် နက်နဲလွန်းလှသဖြင့် သူ၏စိတ်ထဲတွင် မသက်မသာ ဖြစ်နေရခြင်းပင်။

လူတစ်ယောက်သည် ယုန်တစ်ကောင်နှင့် အတူရှိနေရခြင်းနှင့် ကျားတစ်ကောင်နှင့် အတူရှိနေရခြင်းမှာ လုံးဝကွဲပြားခြားနားသည်။ ကျားကြီးမှာ ဗိုက်ဝနေ၍ အိပ်ပျော်နေပြီး ရန်လိုခြင်းမရှိစေကာမူ ၎င်း၏တည်ရှိမှုကပင် လူကို စိတ်မသက်မသာ ဖြစ်စေနိုင်သည်။ ဤအမျိုးသမီးမှာ ကျားတစ်ကောင်ထက်ပင် ပို၍ကြောက်မက်ဖွယ်ကောင်းသော တည်ရှိမှုမျိုး ဖြစ်နေသည်။

"ကျိကျိ... ကျိကျိကျိ"

မျိုးရိုးအမည် ချင်ဟု ခေါ်သော အမျိုးသမီး ထွက်သွားသည်နှင့် တစ်ပြိုင်နက် နားကိုအုပ်ကာ ငြိမ်နေသော အားဟွမ်မှာ ချက်ချင်းပင် မတ်တတ်ရပ်လာတော့သည်။ ၎င်း၏သေးငယ်သော ကိုယ်လုံးလေးမှာ မတ်တတ်ရပ်လျက် ရှေ့လက်နှစ်ဖက်ကို နောက်ပစ်ကာ ဗိုက်ကိုပူထုတ်ပြီး ခွေနေသော အားဝူနှင့် ပါးစပ်ကြီးတို့ကို ကျိကျိတက် အော်ဟစ်နေတော့သည်။ ၎င်းတို့နှစ်ကောင်မှာ သတ္တိနည်းလွန်းသည်ဟု လှောင်ပြောင်နေဟန် တူသော်လည်း ခုနက ၎င်းကိုယ်တိုင်၏ စွမ်းဆောင်ရည်မှာလည်း ထိုနှစ်ကောင်ထက် မသာခဲ့သည်ကို မေ့နေပုံပင်။

အားဝူမှာမူ ဉာဏ်ရည်နိမ့်ပါးသောကြောင့် အားဟွမ်၏လှောင်ပြောင်မှုကို ဂရုမစိုက်ဘဲ ကိုယ်ကိုဆန့်ကာ ၎င်း၏အာရုံခံအင်တင်နာများကိုသာ သန့်ရှင်းရေးလုပ်နေသည်။

ပါးစပ်ကြီးကတော့ ထိုကောင်လေးမှာ အတော်ပင် ဆူညံသည်ဟု ထင်မြင်ကာ စိတ်မရှည်စွာဖြင့် အားဟွမ်ကို အမြီးနှင့် ရိုက်ထုတ်လိုက်သည်။ အမှန်စင်စစ် ၎င်းမှာ အဆင့်တက်ထားသဖြင့် ယုံကြည်မှုများ အလွန်အမင်း တက်ကြွနေခြင်းပင်။ ၎င်း၏သခင်ဖြစ်သော ကုယွမ်မှလွဲ၍ ကျန်သည့်မည်သူ့ကိုမျှ ဂရုမစိုက်ချင်တော့ပေ။

ဤအမြီးနှင့်ရိုက်ချက်မှာ ပျားအုံကို တုတ်နှင့်ထိုးလိုက်သကဲ့သို့ပင်။ အားဟွမ်မှာ အလွန်ဒေါသထွက်သွားပြီး ချက်ချင်းပင် ပြန်လည်တိုက်ခိုက်ရန် ခုန်အုပ်လိုက်တော့သည်။

ကျိ…

သို့သော်လည်း ၎င်း၏တိုတောင်းပြီး ထက်မြက်လှသော လက်သည်းများမှာ ပါးစပ်ကြီး၏ခန္ဓာကိုယ်ပေါ်သို့ ကျရောက်သွားသော်လည်း မီးပွင့်သွားရုံမျှသာ ရှိပြီး ခြစ်ရာတစ်ခုပင် မကျန်ခဲ့ပေ။ ပါးစပ်ကြီး၏မျက်လုံးများတွင် ဝင့်ကြွားသော အရိပ်အယောင်များ ပေါ်လာပြီး အမြီးနှင့် ထပ်မံရိုက်ထုတ်လိုက်ပြန်သည်။

လတ်တလော အသွင်ပြောင်းလဲထားသဖြင့် ၎င်း၏ဉာဏ်ရည်မှာ မြင့်မားလာရုံသာမက ကာကွယ်ရေးနှင့် အရှိန်မှာလည်း သိသိသာသာ တိုးတက်လာခဲ့သည်။ အတိတ်ကာလက အားဟွမ်သည် ၎င်းကို ခဏခဏ စနောက်လေ့ရှိရာ ယခုတွင်မူ လက်စားချေရန် အခွင့်အရေး ရသွားခြင်းပင်။

"ကျိကျိ... ကျိကျိကျိ"

အားဟွမ်မှာ အလွန်အမင်း ဒေါသထွက်နေသော်လည်း ၎င်း၏ပါရမီမှာ ရတနာရှာဖွေခြင်းတွင်သာ ရှိနေပြီး တိုက်ခိုက်ရေးမှာ အားနည်းလှသဖြင့် ပါးစပ်ကြီးကို လုံးဝမယှဉ်နိုင်ပေ။

အကြိမ်ကြိမ် အလဲထိုးခံရပြီးနောက်တွင်တော့ မခံမရပ်နိုင်ဖြစ်ကာ ကုယွမ်၏ဘောင်းဘီစကို ဆွဲလျက် တရားမျှတမှု ရှာပေးရန် ကျိကျိတက် အော်ဟစ်ကာ တောင်းဆိုနေတော့သည်။