အခန်း (၃၇၅-၃၇၆)

အခန်း (၃၇၅) - လင်းကျင်း ဒေါသထွက်နေပြီ

လင်းကျင်း၏ မျက်မှောင်များမှာ ကြုံ့သွားခဲ့သည်။

သူသည် ထိုမိန်းကလေး၏ ခန္ဓာကိုယ်ထဲတွင် အပ်တစ်ချောင်း ချန်ထားခဲ့သည်မှာ မှန်သော်လည်း တစ်စုံတစ်ဦးက ၎င်းကို တမင်တကာ ထုတ်ယူရန် ကြိုးစားနေခြင်းကြောင့် ဖြစ်ပေါ်လာသော အရှိန်အဝါ အနှောင့်အယှက်များက လင်းကျင်းအား ထိုဘက်မှ အခြေအနေကို အကဲဖြတ်ရန် ခက်ခဲစေခဲ့သည်။ တစ်စုံတစ်ဦးက တုလျန်ရှီးကို ဦးအောင် သတ်လိုက်လိမ့်မည်ဟု မည်သူ ထင်ထားပါမည်နည်း။

၎င်းတင် မကသေးပေ။

လေထုထဲတွင် လတ်ဆတ်သော သွေးများ၏ ညှီစို့စို့ သံဓာတ်နံ့များ ဖုံးလွှမ်းနေသည်။ လင်းကျင်း အနားသို့ သွားကာ အလောင်းကို ဖုံးအုပ်ထားသော စောင်ကို မကြည့်လိုက်ရာ သေချာပေါက်ပင် တုလျန်ရှီး၏ ဝမ်းဗိုက်မှာ လှီးဖြတ်ခံထားရပြီး ကလီစာများမှာလည်း ဖယ်ရှားခံထားရသည်။ တစ်စုံတစ်ဦးက ခေါင်းရှစ်လုံးမြွေနဂါးကို ယူဆောင်သွားခဲ့ပြီ ဖြစ်၏။

လင်းကျင်းသည် သူ၏ အပ်ကို ပြန်လည်ရယူရန် လက်မြှောက်လိုက်သောအခါတွင်မူ ၎င်းမှာ ပုပ်စော်နံနေသော သွေးများဖြင့် ဖုံးလွှမ်းနေသည်ကို တွေ့လိုက်ရသည်။ ဤအရာမှာ သူ၏ အာရုံခံမှုကို နှောင့်ယှက်နေသော အရာ ဖြစ်ရပေမည်။

ခဏချင်းမှာပင် လင်းကျင်း၏ မျက်နှာထားမှာ မှောင်မှောင်မည်းမည်း ဖြစ်သွားခဲ့တော့သည်။

သူသည် ရန်သူကို အထင်သေးခဲ့မိသည်။

အကယ်၍သာ သူသည် ပိုမို သတိထားခဲ့ပါက ဤသနားစဖွယ် မိန်းကလေးမှာ သေဆုံးရမည် မဟုတ်ပေ။

သို့သော် ယခုအချိန်တွင် ဘာမှပြောနေ၍ မထူးတော့ပေ။

"တောက်... ရန်ချင်းရှီပဲ"

လင်းကျင်းသည် တုလျန်ရှီး၏ နုနယ်သော်လည်း ယခုအခါ သွေးမရှိတော့သဖြင့် ဖြူဖျော့နေသော မျက်နှာလေးကို ကြည့်ကာ အံကြိတ်၍ ရေရွတ်လိုက်မိသည်။

သူမ၏ မျက်နှာကို စောင်ဖြင့် ပြန်လည်ဖုံးအုပ်ပေးပြီးနောက် လင်းကျင်းသည် အခန်းထဲမှ တဖြည်းဖြည်း လျှောက်ထွက်လာခဲ့သည်။ ထို့နောက် ဘာမှမပြောဘဲ တိမ်တိုက်ပေါ်သို့ တက်ကာ အသင်းချုပ်ရှိရာသို့ တိုက်ရိုက် ဦးတည်လိုက်တော့သည်။

သူသည် ရန်ချင်းရှီနှင့် စာရင်းရှင်းရပေမည်။

ထိုရက်စက်ကြမ်းကြုတ်သော ကောင်။ ခေါင်းရှစ်လုံးမြွေနဂါးကို ယူချင်လျှင်ပင် သူမကို မသတ်ဘဲ လုပ်ဆောင်နိုင်သည် မဟုတ်ပါလား။ ထိုလူသည် စိတ်ပျက်ဒေါသထွက်မှုကြောင့်သာ သူမ၏ အသက်ကို နုတ်ယူသွားခဲ့ခြင်း ဖြစ်သည်။

လင်းကျင်းအနေဖြင့် ဤကဲ့သို့သော လူမျိုးများကို လုံးဝ သည်းမခံနိုင်ပေ။

သူသည် ရန်ချင်းရှီကို သေအောင် လုပ်ရုံတင်မကဘဲ သူ သေဆုံးပြီးနောက်တွင်လည်း သူ၏ ဂုဏ်သိက္ခာကိုပါ အဖတ်ဆယ်မရအောင် ဖျက်ဆီးပစ်ပေလိမ့်မည်။

လင်းကျင်းသည် ထိန်းမနိုင်သိမ်းမရ ဒေါသထွက်နေခဲ့သည်။

သူသည် အသင်းချုပ်သို့ အပြေးအလွှား ပြန်လာခဲ့ပြီး အချိန်ဆွဲမနေဘဲ ရန်ချင်းရှီ မည်သည့်နေရာတွင် ရှိသနည်းဟု မေးမြန်းရန် တာဝန်ကျ အကဲဖြတ်မှူးကို ရှာဖွေလိုက်သည်။

အသင်းချုပ်တွင် အကဲဖြတ်မှူးတိုင်း၏ မှတ်တမ်းများ ရှိသဖြင့် သူ ဘယ်မှာ နေထိုင်သည်ကို သူတို့ သေချာပေါက် သိကြသည်။

"ရန်ချင်းရှီ ဘယ်မှာ နေတာလဲ"

လင်းကျင်းသည် ထိုအကဲဖြတ်မှူး၏ ကော်လာကို ဆွဲကာ သူ၏ အလုပ်လုပ်ပုံ နှေးကွေးနေသည်ကို မြင်သောအခါ အော်ဟစ် မေးမြန်းလိုက်သည်။

ထိုအကဲဖြတ်မှူးမှာ လင်းကျင်း၏ ကြမ်းတမ်းမှုကြောင့် ထိတ်လန့်သွားခဲ့ရ၏။

ထိုအကဲဖြတ်မှူးမှာ လင်းကျင်းထက် အသက်ကြီးသော်လည်း လင်းကျင်း၏ အရှိန်အဝါအောက်တွင် လုံးဝ ဖိနှိပ်ခံထားရသည်။ အသက်ကိုပင် ပြင်းပြင်းမရှူရဲဘဲ သူက ပြန်ဖြေလိုက်သည်။

"ဟို... ဆ..ဆရာ... ကျေးဇူးပြုပြီး ဒီလို မလုပ်ပါနဲ့... ကျွန်တော် ရှာပေးပါ့မယ်... ဘာလို့လဲဆိုတော့ ကျွန်တော်ကိုယ်တိုင်လည်း မမှတ်မိလို့ပါ"

"မြန်မြန်လုပ်"

လင်းကျင်းသည် ထိုလူကို နောက်သို့ တွန်းလွှတ်လိုက်၏။ သို့သော် လွတ်မြောက်သွားသည်နှင့် တစ်ပြိုင်နက် ထိုအကဲဖြတ်မှူးသည် သူတို့၏ လုပ်ငန်းခွင်တွင် တစ်စုံတစ်ဦးက ပြဿနာရှာနေကြောင်း သတိပေးချက် ထုတ်ပြန်လိုက်တော့သည်။

သူသည် အဆုတ်ကွဲမတတ် အော်ဟစ်နေရုံတင်မကဘဲ တတ်နိုင်သမျှ အမြန်ဆုံးလည်း ပြေးလွှားနေခဲ့သည်။

ညသန်းခေါင်ယံဖြစ်သော်လည်း သူ၏ အော်ဟစ်သံက လူတိုင်းကို ချက်ချင်း သတိပြုမိသွားစေခဲ့၏။

ပြင်ပတွင် ကင်းလှည့်နေသော မြို့စောင့်တပ်အဖွဲ့ တစ်ဖွဲ့ ရှိနေသဖြင့် ထိုအော်ဟစ်သံကို ကြားသောအခါ သူတို့သည် အတွင်းသို့ ပြေးဝင်လာကြသည်။ အသင်းချုပ်အတွင်းရှိ အစောင့်များမှာလည်း ကျူးကျော်သူကို ရှာဖွေရန် ထိုနေရာသို့ ရောက်ရှိလာကြသည်။ အကဲဖြတ်မှူး အများအပြားမှာလည်း ဇဝေဇဝါ ဖြစ်နေသော မျက်နှာထားများဖြင့် သူတို့၏ ဝတ်ရုံများကို ဝတ်ဆင်ကာ ထွက်လာကြတော့သည်။

"ဘာတွေ ဖြစ်နေတာလဲ"

"အပြင်မှာ ဘာတွေ ဖြစ်နေတာလဲ... ဘာလို့ ဒီလောက်တောင် အော်နေကြတာလဲ"

"သူခိုးများ ရောက်နေတာလား"

ဆွေးနွေးသံများစွာ ထွက်ပေါ်လာခဲ့သည်။ လူအများအပြား ရုတ်တရက် ပေါ်ထွက်လာသည်ကို မြင်သောအခါ ထိုအကဲဖြတ်မှူးမှာ ပို၍ သတ္တိရှိလာပြီး ပို၍ပင် ကျယ်လောင်စွာ အော်ဟစ်လေတော့သည်။

"အားလုံးပဲ... မြန်မြန်လုပ်ကြ... ဒီမှာ ရိုင်းစိုင်းတဲ့ သူခိုးတစ်ယောက် ရှိနေတယ်... သူက အဆင့် (၃) သားရဲအကဲဖြတ်မှူးအသွင် ဟန်ဆောင်နေတာ... သူ့ကို ချက်ချင်း ဖမ်းကြ"

မရပ်မနား အော်ဟစ်နေမှုကြောင့် သူ၏ အသံမှာ တိမ်ဝင်သွားခဲ့သည်။

လင်းကျင်းသည် ထိုလူက ဤကဲ့သို့ တုံ့ပြန်လိမ့်မည်ဟု မထင်ထားသော်လည်း ဤတုံ့ပြန်မှုမှာ သိသိသာသာပင် ပုံမှန်မဟုတ်ပေ။

တစ်ခုခု မှားယွင်းနေရမည်။

မြို့စောင့်တပ်များ ရောက်ရှိလာပြီးနောက် သူတို့၏ တပ်မှူးက အခြေအနေကို မေးမြန်းလိုက်သည်။ အကဲဖြတ်မှူး၏ ပြောပြချက်ကို ကြားပြီးနောက် သူသည် လင်းကျင်းထံသို့ သံသယရှိသော အကြည့်ဖြင့် လှည့်ကြည့်လိုက်၏။

"မင်းက တကယ်ပဲ သားရဲအကဲဖြတ်မှူးလား... အသင်းချုပ်မှာရှိတဲ့ အကဲဖြတ်မှူးတွေက မင်းကို ဘာလို့ မသိကြတာလဲ"

သူ စကားပြောနေစဉ်မှာပင် အစောင့်မှာ တိုက်ခိုက်ရေး အနေအထားသို့ ပြင်လိုက်ပြီး အခြားသော မြို့စောင့်တပ်များမှာလည်း လင်းကျင်းကို အလျင်အမြန် ဝိုင်းရံလိုက်ကြသည်။

စောစောက အကဲဖြတ်မှူးမှာ မြို့စောင့်တပ်များ နောက်ကွယ်တွင် ပုန်းအောင်းကာ လင်းကျင်းအား ခိုးကြည့်နေခဲ့၏။

ယခုအခါ အသင်းချုပ်အတွင်းရှိ အခြားသော အကဲဖြတ်မှူးများလည်း ရောက်ရှိလာကြပြီ ဖြစ်သည်။ သူတို့ထဲတွင် ယမန်နေ့ညက လင်းကျင်း၏ အရည်အချင်းကို မြင်တွေ့ခဲ့ရသော အကဲဖြတ်မှူးဝမ်လည်း ပါဝင်သည်။ အကဲဖြတ်မှူးဝမ်သည် ယနေ့ညတွင် အသင်းချုပ်၌ အကဲဖြတ်ခြင်း အစီရင်ခံစာများ စီစဉ်ရန် တာဝန်ကျနေသဖြင့် မပြန်ရသေးခြင်း ဖြစ်သည်။ သူ ရောက်လာသည်နှင့် လင်းကျင်း ကျူးကျော်ဝင်ရောက်လာကြောင်း သတိပေးခဲ့သော အဆင့် (၁) အကဲဖြတ်မှူးမှာ အခြေအနေကို တိုင်တန်းရန် သူ့ထံသို့ ချဉ်းကပ်လာခဲ့သည်။

အဘယ်ကြောင့်ဆိုသော် အကဲဖြတ်မှူးဝမ်မှာ အဆင့် (၂) အကဲဖြတ်မှူးတစ်ဦးဖြစ်ပြီး မြို့စောင့်ကင်းလှည့်တပ်ဖွဲ့ တပ်မှူးနှင့်လည်း ရင်းနှီးသောကြောင့် ဖြစ်၏။

ထိုတပ်မှူးက အကဲဖြတ်မှူးဝမ်ကို အလေးပြုလိုက်သည်။

"အကဲဖြတ်မှူးဝမ်... ဒီအကဲဖြတ်မှူး အော်ဟစ်နေတာကို ကြားလို့ ကျွန်တော်တို့ ရောက်လာတာပါ... ခင်ဗျားက ဒီမှာ ဝါရင့်အကဲဖြတ်မှူးတစ်ယောက်ဆိုတော့ ဒီလူကို သိသလား"

တပ်မှူးက လင်းကျင်းကို ညွှန်ပြလိုက်သည်။

အကဲဖြတ်မှူးဝမ်မှာ ထိုနေရာတွင် လင်းကျင်းကို တွေ့လိုက်ရသဖြင့် မှင်တက်သွားခဲ့ရသည်။ သူသည် လင်းကျင်းထံသို့ အပြေးအလွှား သွားရောက်ကာ သူ့ကို အရိုအသေ ပေးလိုက်၏။

"အကဲဖြတ်မှူးလင်း... ခင်ဗျား ဘာလို့ ဒီကို ရောက်နေတာလဲ... အရေးကြီးတဲ့ ကိစ္စတစ်ခုခု ရှိလို့လား"

သူ၏ လေသံမှာ အောက်လက်ငယ်သားတစ်ဦးက မိမိ၏ အထက်လူကြီးကို ပြောဆိုနေသည့်အလား လေးစားမှုများဖြင့် ပြည့်နှက်နေသည်။ အကဲဖြတ်မှူးဝမ်မှာ လင်းကျင်းထက် အသက်ကြီးသော်လည်း ယမန်နေ့ညက ဖြစ်ပျက်ခဲ့သည်များမှာ အလွန်ပင် ထင်ရှားလှသဖြင့် ဤလူငယ်လေးအပေါ် လေးစားမှုကလွဲ၍ အခြား ဘာမှမရှိပေ။

လင်းကျင်းသည် လက်ရှိတွင် စိတ်အခြေအနေ မကောင်းလှပေ။ ရန်ချင်းရှီ၏ နည်းလမ်းများ မည်မျှအထိ ရက်စက်ကြမ်းကြုတ်ကြောင်း သိလိုက်ရကတည်းက သူ၏ စိတ်အခြေအနေမှာ တော်တော်လေး ဆိုးရွားနေခဲ့ပြီ ဖြစ်သည်။ သို့သော် သူ့ကို ပို၍ စိတ်တိုစေခဲ့သည်မှာ ထိုအဆင့် (၁) အကဲဖြတ်မှူးက တမင်တကာ အဆုတ်ကွဲမတတ် အော်ဟစ်နေခဲ့ခြင်းပင်။

လင်းကျင်းသည် ထိုလူ ဘယ်သူဖြစ်သည်ကို မသိသော်လည်း သူ၏ တုံ့ပြန်မှုမှာ ကြိုတင် ညွှန်ကြားချက်တစ်ခုခုကြောင့် ဖြစ်ရပေမည်။

ဘယ်သူက ခိုင်းတာလဲ။

ရန်ချင်းရှီ ဖြစ်ရန် အလားအလာ အလွန်များလှပေသည်။

"ရန်ချင်းရှီ... ထွက်လာခဲ့... ခင်ဗျား ဘယ်မှာ ပုန်းနေနေ၊ အပြင်ကို ထွက်လာခဲ့"

လင်းကျင်း၏ အသံမှာ ဟိန်းထွက်သွားခဲ့သည်။ သူသည် တကယ့်ကို ဒေါသထွက်နေခဲ့ပြီ ဖြစ်၏။ အကယ်၍ ရန်ချင်းရှီက လင်းကျင်းအား အချိန်ဆွဲထားရန်အတွက် ဤအကဲဖြတ်မှူးအား ဆူညံပွက်လောရိုက်အောင် လုပ်ခိုင်းထားခြင်း ဖြစ်ပါက ရန်ချင်းရှီမှာ ပတ်ဝန်းကျင် တစ်နေရာရာတွင် ရှိနေသေးသည်ဟု အဓိပ္ပာယ်ရပေသည်။

လင်းကျင်းသည် ရန်ချင်းရှီကို ခွင့်မလွှတ်ရန် ဆုံးဖြတ်ထားပြီး ဖြစ်သည်။ မည်သည့် ညှာတာမှုမျှ ပေးလိမ့်မည် မဟုတ်ပေ။

သူ၏ အသံမှာ အလွန်ပင် ကျယ်လောင်လှသဖြင့် အသင်းချုပ်၏ ထောင့်တိုင်းသို့ ရောက်ရှိသွားခဲ့သည်။

ရန်ချင်းရှီက ဘယ်သူလဲ။

ဤနေရာတွင် အဆင့် (၃) သားရဲအကဲဖြတ်မှူး လက်တစ်ဆုပ်စာခန့်သာ ရှိသဖြင့် သူသည် တော်တော်လေး နာမည်ကြီးသည်မှာ မဆန်းပေ။ မည်သူမျှ သူ့ကို နာမည်တပ်ပြီး ဤကဲ့သို့ ရိုင်းစိုင်းစွာ ခေါ်ရဲမည် မဟုတ်ပေ၊ သို့သော် ယခုမူ တစ်စုံတစ်ဦးက သူ့အား အပြင်သို့ ထွက်လာရန် အမိန့်ပေးနေခဲ့ပြီ ဖြစ်သည်။ ရုတ်တရက် ဖြစ်ပျက်သွားသော အခြေအနေများကြောင့် လူတိုင်းမှာ သိသိသာသာပင် ထိတ်လန့်သွားကြတော့သည်။

အကဲဖြတ်မှူးဝမ်လည်း အလားတူပင်။ လင်းကျင်း၏ အသံကို ကြားလိုက်ရသောအခါ သူ၏ မျက်နှာထားမှာ ချက်ချင်း ပြောင်းလဲသွားခဲ့၏။

"အကဲဖြတ်မှူးလင်း... ဘာ... ဘာတွေ ဖြစ်နေတာလဲ"

လင်းကျင်း အသက်ကို ပြင်းပြင်းရှူလိုက်ပြီး ပတ်ဝန်းကျင်ကို ဝေ့ကြည့်လိုက်သည်။

"ရန်ချင်းရှီက မိစ္ဆာအကဲဖြတ်မှူးတွေနဲ့ ပူးပေါင်းပြီး ကြီးလေးတဲ့ ပြစ်မှုတွေကို ကျူးလွန်ခဲ့တယ်... အကယ်၍ သူ ဒီမှာ ရှိနေရင် သူ့ကို ချက်ချင်း ထုတ်ပေးဖို့ ငါ တောင်းဆိုတယ်... သူ့ကို ဖုံးကွယ်ထားရဲတဲ့သူ ဘယ်သူ့ကိုမဆို ငါ ညှာတာမှာ မဟုတ်ဘူး"

လင်းကျင်းမှာ အလွန်ပင် ဒေါသထွက်နေခဲ့ပြီ ဖြစ်သည်။

ယခုအချိန်တွင် သူ့ကို တားဆီးရန် ကြိုးစားသော မည်သူ့ကိုမဆို သူ လျှော့ပေးမည် မဟုတ်ပေ။ မြို့စောင့်တပ်များ ဖြစ်လျှင်တောင်မှ ဖြစ်၏။

လင်းကျင်းသည် မြို့စောင့်တပ်များကို စိုက်ကြည့်လိုက်သည်။ ချက်ချင်းဆိုသလိုပင် သူတို့၏ သားရဲများဖြစ်သော တစ်ဆယ်ကျော်သော သားရဲများအားလုံးမှာ ဝပ်တွားသွားကြပြီး ကြောက်ရွံ့စွာဖြင့် ညည်းညူနေကြတော့သည်။

မြို့စောင့်တပ်များမှာ ဤဖြစ်ရပ်ကြောင့် ထိတ်လန့်သွားကြသည်။ သူတို့ တစ်ယောက်ချင်းစီမှာ ထိတ်လန့်တုန်လှုပ်မှုများ ဖြစ်ပေါ်လာခဲ့၏။ တစ်ချိန်တည်းမှာပင် သူတို့၏ တပ်မှူးမှာ ထိုစကားကို အသေအချာ ကြားလိုက်ရသည်။

လင်းကျင်း။

ချက်ချင်းဆိုသလိုပင် တပ်မှူးသည် ဤနာမည်ကို မှတ်မိသွားခဲ့သည်။ သူ၏ အထက်လူကြီးဖြစ်သော ဗိုလ်ချုပ်တစ်ဦးက သူ့အား တစ်ခါက ပြောပြဖူးသည်မှာ အကယ်၍ အကဲဖြတ်မှူး လင်းကျင်းနှင့် တွေ့ဆုံခဲ့ပါက မည်သည့် အဆင်အခြင်မဲ့သော ဆုံးဖြတ်ချက်မျိုးကိုမျှ မလုပ်ဆောင်ရန် ဖြစ်သည်။ ထိုစဉ်က ဗိုလ်ချုပ်သည် နောက်ပြောင်နေသည့်ပုံ မပေါက်ခဲ့ပေ။

ယခုမူ တပ်မှူးသည် ထိုစကားများကို ပြန်လည် သတိရသွားခဲ့ပြီဖြစ်ရာ ဤလင်းကျင်းမှာ ဗိုလ်ချုပ်ပြောသောသူ ဖြစ်ကြောင်း သူ အပြည့်အဝ ယုံကြည်သွားခဲ့သည်။

သူတို့ သူ့ကို ရန်မစသင့်ပေ။

လင်းကျင်း၏ အရှိန်အဝါမှာ အလွန်ပင် လွှမ်းမိုးနိုင်စွမ်း ရှိလှသည်။ သူသည် အမြဲတမ်း စိတ်သဘောထား ကောင်းမွန်သူဖြစ်သဖြင့် လူအများစုမှာ လင်းကျင်းအား စကားပြောရလွယ်ကူပြီး ဖော်ရွေသောသူအဖြစ် သတ်မှတ်ထားကြသည်။

ယခုအခါ သူ၏ အစွယ်များကို နောက်ဆုံးတွင် ထုတ်ပြရန် ဆုံးဖြတ်လိုက်သောအခါတွင်မူ လူတိုင်းမှာ ထိတ်လန့်တုန်လှုပ်သွားကြတော့သည်။

အတွေးတစ်ခု ရုတ်တရက် ပေါ်လာပြီး လင်းကျင်းသည် မြို့စောင့်တပ်မှူးထံသို့ လှည့်ကြည့်လိုက်၏။

"မြို့တံခါးမှာရှိတဲ့ စစ်သည်တွေကို မြို့ကို ချက်ချင်း ပိတ်ထားဖို့ အကြောင်းကြားလိုက်.... မြို့တော်ထဲကနေ ဘယ်သူ့ကိုမျှ ထွက်ခွာခွင့် မပြုနဲ့... ဒါက စစ်သေနာပတိလုဘင်ရဲ့ အမိန့်လို့ ပြောလိုက်"

လင်းကျင်းသည် တော်ဝင်စစ်တပ်တွင် မည်သည့် ရာထူးမျှ မရှိသဖြင့် သူ၏ အမိန့်မှာ ထိရောက်မည် မဟုတ်ပေ။ သို့သော် သူသည် ယခုအခါ အမှန်တကယ် အကျပ်အတည်းဖြစ်နေသဖြင့် အမိန့်တစ်ခု ထုတ်ပြန်ရန် ဆုံးဖြတ်လိုက်ခြင်း ဖြစ်သည်။

လုဘင်၏ နာမည်ကို အသုံးပြုလိုက်ခြင်း ဖြစ်၏။

အကယ်၍ လုဘင်က ၎င်းကို နောက်ပိုင်းတွင် သိသွားလျှင်တောင်မှ သူသည် လင်းကျင်းကို အပြစ်တင်လိမ့်မည်ဟု လင်းကျင်း မထင်ပေ။

မည်သို့ပင်ဖြစ်စေ လင်းကျင်းသည် ယနေ့တွင် ရန်ချင်းရှီကို ဘာပဲဖြစ်ဖြစ် လုံးဝ လွှတ်ပေးမည် မဟုတ်ပေ။

အခန်း (၃၇၆) - အခြေအနေများမှာ အမှန်တကယ်ပင် စိုးရိမ်စရာ ဖြစ်လာခဲ့ပြီ

ရန်ချင်းရှီအနေဖြင့် သေချာပေါက် ထွက်ပြေးရန် ကြိုးစားပေလိမ့်မည်ဟု လင်းကျင်း ယူဆထားသည်။ ၎င်းမှာ အကျိုးအကြောင်း အရှိဆုံး လုပ်ဆောင်ချက်ပင် ဖြစ်၏၊ အထူးသဖြင့် ထိုမိစ္ဆာအကဲဖြတ်မှူး တစ်စုံတစ်ခု ဖြစ်သွားပြီးနောက်ပိုင်းတွင် ဖြစ်သည်။ သူ ဤနေရာတွင် ကြာကြာနေလေလေ၊ သူ၏ အကြံအစည်များ ပေါ်သွားနိုင်ခြေမှာ ပို၍ မြင့်မားလေလေ ဖြစ်ပေသည်။ အကယ်၍သာ သူသည် ထွက်ပြေးရန် ရည်ရွယ်ချက် မရှိခဲ့ပါက တုလျန်ရှီး၏ ခန္ဓာကိုယ်ထဲမှ ရှစ်ခေါင်းမြွေဟောက်ကို ထုတ်ယူသွားလိမ့်မည် မဟုတ်ပေ။

သူသည် ထိုသို့ လုပ်ဆောင်ခဲ့ပြီဖြစ်ရာ သူသည် ခရီးထွက်ရန် ပြင်ဆင်နေပြီဖြစ်ကြောင်း ထင်ရှားလှပေသည်။

ဤကောက်ချက်ကို ရရှိပြီးနောက် လင်းကျင်းသည် မြို့အတွင်းရှိ တံခါးအားလုံးကို ချက်ချင်း ပိတ်ထားရန် အမိန့်ထုတ်ပြန်ခဲ့ခြင်း ဖြစ်သည်။

တပ်မှူးမှာလည်း မျှော်လင့်မထားသော ဤအမိန့်ကြောင့် ခဏတာ မှင်တက်သွားခဲ့ရသည်။

မြို့တံခါးများကို ပိတ်ခြင်းမှာ နောက်ပြောင်ရမည့် ကိစ္စမဟုတ်ပေ။ သူကဲ့သို့သော ကင်းလှည့်တပ်မှူးလေး တစ်ဦးအနေဖြင့် ဤကဲ့သို့ ဆုံးဖြတ်ချက်ချရန် အခွင့်အာဏာ မရှိပေ။ သို့သော် ဗိုလ်ချုပ်လုဘင်၏ နာမည်မှာ စစ်သည်တော်တစ်ဦး၏ နားထဲတွင် မိုးကြိုးသံကဲ့သို့ပင် ကျယ်လောင်လှပေသည်။

၎င်းအပြင် သူ၏ အထက်လူကြီးကလည်း လင်းကျင်း၏ နာမည်ကို ပြောပြဖူးသဖြင့် တပ်မှူးမှာ သူ၏ ညွှန်ကြားချက်ကို လျစ်လျူမရှုရဲပေ။ သူသည် သူ၏ အောက်လက်ငယ်သားများကို မြို့၏ ထွက်ပေါက်လေးခုလုံးရှိ အစောင့်များထံသို့ သတင်းပို့ရန် အလျင်အမြန် စေလွှတ်လိုက်တော့သည်။

မြို့စောင့်တပ်များ ထွက်ခွာသွားသည်ကို ကြည့်ရင်း လင်းကျင်းသည် နောက်မကျသေးပါစေနှင့်ဟု စိတ်ထဲမှ ဆုတောင်းနေမိသည်။

သူ၏ ခန့်မှန်းချက်အရ ရန်ချင်းရှီမှာ မြို့ထဲမှ ထွက်ခွာသွားနိုင်ခြင်း မရှိသေးပေ။

သူသည် ထိုမျှအထိ မြန်ဆန်နိုင်စရာ အကြောင်းမရှိပေ။ ထို့ပြင် လင်းကျင်း၏ တုံ့ပြန်မှုမှာလည်း ရန်ချင်းရှီ မျှော်လင့်ထားသည်ထက် ပိုမို မြန်ဆန်နေရမည်ဖြစ်ရာ လင်းကျင်းအနေဖြင့် ထိုလူကို ပိတ်ဆို့နိုင်လိမ့်မည်ဟု ယုံကြည်ချက် ရှိနေသည်။

လင်းကျင်းအနေဖြင့် သူ့ကို ဤနေရာတွင် မတားဆီးနိုင်ခဲ့လျှင်ပင် ရန်ချင်းရှီကို ဘယ်တော့မှ ခွင့်လွှတ်လိမ့်မည် မဟုတ်ပေ။

ယခုအခါ လင်းကျင်းသည် ဤလူကို ပစ်မှတ်ထားလိုက်ပြီဖြစ်ရာ သူ့ကို မဖမ်းမိမချင်း လင်းကျင်းအနေဖြင့် အနားယူလိမ့်မည် မဟုတ်ပေ။

ဤရုန်းရင်းဆန်ခတ်မှုမှာ အသင်းချုပ် ဝင်ပေါက်တည့်တည့်တွင် ဖြစ်ပွားခဲ့ခြင်း ဖြစ်သဖြင့် ကြီးမားသော ပွက်လောရိုက်မှုကြီး ဖြစ်ပေါ်လာမည်မှာ သေချာလှပေသည်။ အိမ်တွင် အေးဆေးစွာ အိပ်မောကျနေသော တာဝန်မရှိသည့် သားရဲအကဲဖြတ်မှူးများပင်လျှင် ရုတ်တရက် နိုးလာကြပြီး ထိုနေရာသို့ စုရုံးလာကြတော့သည်။ အစိုးရ အရာရှိများပင်လျှင် ရောက်ရှိလာကြပြီ ဖြစ်၏။

လင်းကျင်း၏ စောစောက အော်ဟစ်သံမှာ မြို့တော်တစ်ခုလုံးကို မနှိုးနိုင်ခဲ့လျှင်ပင် အနည်းဆုံးတော့ ဤလမ်းမတစ်ခုလုံးမှာ ကြားနိုင်ပေသည်။

လူအများအပြား စုရုံးလာသည်နှင့်အမျှ တစ်စုံတစ်ခုသော ကိစ္စကြီးကြီးမားမား ဖြစ်တော့မည်ဟု အချို့က ခန့်မှန်းနေကြသည်။

ယခုအခါ ဤနေရာ၌ အဆင့် (၂) သားရဲအကဲဖြတ်မှူး တစ်ဆယ်ကျော် စုရုံးနေကြပြီ ဖြစ်သည်။ သူတို့ထဲမှ အချို့မှာ လင်းကျင်းကို သိကြသော်လည်း အချို့မှာမူ မသိကြပေ။ သို့သော် လင်းကျင်းမှာ သူ၏ အရှိန်အဝါကို ဖုံးကွယ်မထားပေ။ သူ၏ ရည်ရွယ်ချက်မှာ လူအများ အာရုံစိုက်လာစေရန်ဖြစ်ရာ လျှို့ဝှက်နေခြင်းမှာ အကျိုးမရှိနိုင်ပေ။

သူ၏ 'သားရဲခြောက်လှန်နိုင်စွမ်း' ကိုလည်း အစွမ်းကုန် ထုတ်ဖော်လိုက်သည်။ ထိုနေရာတွင် ရှိနေသော သားရဲတိုင်းမှာ ညည်းညူသံပင် မပြုရဲတော့ဘဲ အသည်းအသန် ကြောက်လန့်နေကြတော့သည်။ အကဲဖြတ်မှူး အများအပြားမှာလည်း ဘာဖြစ်နေသနည်းဆိုသည်ကို သိလိုက်ရသောအခါ အလွန်ပင် အံ့အားသင့်သွားကြရသည်။

နဂိုက လင်းကျင်းအပေါ် အထင်အမြင်သေးနေသော အကဲဖြတ်မှူးများမှာလည်း အခြေအနေကို နားလည်သွားကြပြီး ပါးစပ်ပိတ်ထားလိုက်ကြတော့သည်။

ထို့နောက် အကဲဖြတ်မှူးတန်ရွှင်း ရောက်ရှိလာခဲ့သည်။

တန်ရွှင်းအပြင် အသင်းချုပ်မှ အခြားသော အဆင့် (၃) အကဲဖြတ်မှူး နှစ်ဦးလည်း ရောက်ရှိလာကြသည်။

သူတို့ထဲမှ တစ်ဦးမှာ လင်းကျင်းနှင့် တွေ့ဖူးပြီးသား ဖြစ်သည်။ သူမှာ မေပယ်မြို့တွင် လင်းကျင်းအား အကဲဖြတ်စစ်ဆေးပေးခဲ့ပြီး သူ့ကို ကျောက်စိမ်းနဂါးနိုင်ငံ၏ အငယ်ဆုံးသော အဆင့် (၂) သားရဲအကဲဖြတ်မှူးအဖြစ် ကြေညာပေးခဲ့သူ 'ယွီမန့်ထန်' ပင် ဖြစ်သည်။ အခြားတစ်ဦးမှာတော့ 'ချူချန်းဟဲ' ဖြစ်သည်။ တန်ရွှင်းကဲ့သို့ပင် သူသည်လည်း နိုင်ငံတွင် ဂုဏ်သတင်းနှင့် ရာထူးကြီးမားသော ဝါရင့်အကဲဖြတ်မှူးတစ်ဦး ဖြစ်၏။

ယွီမန့်ထန်သည် ရောက်ရှိလာသည်နှင့် တစ်ပြိုင်နက် လင်းကျင်းကို မှတ်မိသွားခဲ့သည်။ သူ မည်သို့ မမှတ်မိဘဲ နေပါမည်နည်း။ ဘာပဲဖြစ်ဖြစ် ထိုလူငယ်လေးမှာ သူ၏ ဂုဏ်သတင်းကို လုယူသွားခဲ့သူ မဟုတ်ပါလား။ ဤအကြောင်းကြောင့်ပင် ယွီမန့်ထန်သည် လင်းကျင်းအပေါ် အနည်းငယ် မနာလို ဖြစ်နေခဲ့ခြင်း ဖြစ်သည်။ သို့သော်လည်း လင်းကျင်းမှာ မည်မျှအထိ ပါရမီ ထူးချွန်ကြောင်းကိုမူ သူကိုယ်တိုင်ပင် အသိအမှတ်ပြုထားရသည်။

လင်းကျင်း၏ အရှိန်အဝါကို ခံစားလိုက်ရသည်နှင့် တစ်ပြိုင်နက် သူ၏ မျက်စိသူငယ်အိမ်များမှာ ကျုံ့သွားခဲ့ပြီး သူ၏ စကားများကို ပါးနပ်စွာပင် ပြန်လည် မျိုသိပ်လိုက်တော့သည်။

"အကဲဖြတ်မှူးလင်း... ဒါက ဘာ..."

လင်းကျင်းနှင့် အရင်းနှီးဆုံး ဖြစ်သဖြင့် တန်ရွှင်းကသာ လင်းကျင်းထံသို့ ချဉ်းကပ်ကာ မေးမြန်းလိုက်သည်။

လင်းကျင်းသည် တန်ရွှင်းကို လေးစားမှုရှိသဖြင့် အရိုအသေပေးပြီးနောက် ဖြစ်ပျက်သမျှ ကိစ္စရပ်အားလုံးကို စတင် ရှင်းပြလေတော့သည်။

မည်သည့် အချက်အလက်ကိုမျှ ချန်လှပ်မထားခဲ့ပေ။

ပတ်ဝန်းကျင်ရှိ လူအားလုံးမှာ သူတို့ ကြားလိုက်ရသောအရာများကြောင့် အံ့အားသင့်ကာ အသက်ရှူမှားသွားကြရသည်။

လင်းကျင်းသည် စောစောက အော်ဟစ်နေသော အကဲဖြတ်မှူးကို ညွှန်ပြကာ ဆိုလိုက်၏။

"ဒီလူက ကျုပ်ကို တမင်တကာ အချိန်ဆွဲထားဖို့ ကြိုးစားနေတာ... ကျုပ်အမြင်မှာတော့ သူက ရန်ချင်းရှီနဲ့ ပတ်သက်မှု ရှိနေရမယ်"

တန်ရွှင်းက ကြည့်လိုက်ပြီး ခေါင်းညိတ်လိုက်သည်။

"မှန်တယ်၊ သူက အကဲဖြတ်မှူးရန်ရဲ့ တပည့်တစ်ယောက်ပဲ... 'ကျန်းယွမ်'... ဒီကို လာစမ်း... မင်းကို ငါ မေးမယ်၊ အကဲဖြတ်မှူးရန်က မင်းကို အရင်က တစ်ခုခု ညွှန်ကြားထားတာ ရှိသလား"

ထိုအဆင့် (၁) သားရဲအကဲဖြတ်မှူးမှာ ထိတ်လန့်တုန်လှုပ်သွားခဲ့သည်။

လူတိုင်းက သူ့ကို ကြည့်နေကြပြီး လင်းကျင်း၏ စောစောက ရှင်းပြချက်များကိုလည်း သူ သေချာပေါက် ကြားလိုက်ရသည်။

'မိစ္ဆာအကဲဖြတ်မှူးတွေနဲ့ ပူးပေါင်းကြံစည်ခြင်း'

'ယုတ်မာတဲ့ ပြစ်မှုတွေ ကျူးလွန်ခြင်း'

ဤအရာတိုင်းမှာ ခွင့်မလွှတ်နိုင်သော ပြစ်မှုများ ဖြစ်သည်။ ယခုအခါ တန်ရွှင်းကပါ ဤကိစ္စကို စုံစမ်းနေပြီဖြစ်ရာ သူသည် အသည်းအသန် ကြောက်လန့်သွားပြီး မျက်နှာတွင် သွေးမရှိတော့သကဲ့သို့ ဖြူဖျော့သွားခဲ့သည်။ သူသည် မြေပြင်ပေါ်တွင် ချက်ချင်း ဒူးထောက်လိုက်ပြီး သူ သိသမျှ အရာအားလုံးကို ပြောပြလေတော့သည်။

၎င်းမှာ လင်းကျင်း၏ ရှင်းပြချက်နှင့် အနည်းနှင့်အများ ကိုက်ညီနေခဲ့သည်။ ရန်ချင်းရှီသည် သူ၏ တပည့်အား လင်းကျင်းဟု အမည်ရသော အကဲဖြတ်မှူးတစ်ဦး မကြာမီ ရောက်ရှိလာလိမ့်မည်ဟု အလောတကြီး အသိပေးခဲ့ခြင်း ဖြစ်သည်။ ထို့နောက် ရန်ချင်းရှီက သူ၏ တပည့်အား လင်းကျင်းကို အချိန်ဆွဲထားနိုင်မည့် နည်းလမ်းကို ရှာဖွေရန် ညွှန်ကြားခဲ့သည်။

"အကဲဖြတ်မှူးတန်... ကျွန်တော်... ကျွန်တော် တကယ် မသိခဲ့ပါဘူး... ဆရာရန်က ဒီလိုတွေ လုပ်နေတယ်ဆိုတာ ကျွန်တော် တကယ် မသိခဲ့တာပါ..."

ထိုအကဲဖြတ်မှူးမှာ တုန်ရီနေသော လေသံဖြင့် ရှင်းပြနေခဲ့၏။

အစပိုင်းတွင် လူအများအပြားမှာ လင်းကျင်း၏ ရှင်းပြချက်ကို သံသယဝင်နေခဲ့ကြသော်လည်း ယခုမူ သူ၏ ဇာတ်လမ်းမှာ ပိုမို ယုံကြည်စိတ်ချရသော အခြေအနေသို့ ရောက်ရှိသွားခဲ့ပြီ ဖြစ်သည်။

"အကဲဖြတ်မှူးရန်က ရာထူးကြီးမားတဲ့သူ၊ အသင်းချုပ်ရဲ့ အဆင့် (၃) သားရဲအကဲဖြတ်မှူး တစ်ယောက်ပဲ... သူက မိစ္ဆာအကဲဖြတ်မှူးတွေနဲ့ ဘယ်လိုလုပ် ပူးပေါင်းနိုင်မှာလဲ... ကျုပ်တော့ မယုံဘူး"

ယွီမန့်ထန်က ဆိုလိုက်၏။

ယွီမန့်ထန်သည် လင်းကျင်းကို တမင်တကာ ပြဿနာရှာရန် ကြိုးစားနေခြင်း မဟုတ်ပေ။ သူသည် ရန်ချင်းရှီနှင့် အလွန် ရင်းနှီးသဖြင့် ထိုသို့ မယုံကြည်နိုင်ခြင်း ဖြစ်သည်။

လင်းကျင်း ပြုံးလိုက်၏။

"အားလုံးကို ချက်ချင်း ယုံခိုင်းနေတာ မဟုတ်ပါဘူး... လောလောဆယ်တော့ ဒါကို ကျုပ်ဘက်က ပြောပြတဲ့ ဇာတ်လမ်းတစ်ပုဒ်လို့ပဲ သဘောထားလိုက်ပါ... ကျုပ်ရဲ့ စကားတွေ မှန်၊ မမှန် ဆိုတာကို ဆုံးဖြတ်ဖို့က တော်တော်လေး လွယ်ကူတယ် မဟုတ်လား... ရန်ချင်းရှီကို ဒီကို ခေါ်လာပြီး သူ့ကိုယ်သူ ကာကွယ်ခွင့် ပေးလိုက်ပါ... အဲဒီအခါကျရင် အမှန်တရားကို လူတိုင်း သိလာလိမ့်မယ်"

ဤစကားကြောင့် ယွီမန့်ထန်မှာ ဘာဆက်ပြောရမှန်း မသိတော့ပေ။

အခြားသော အဆင့် (၃) အကဲဖြတ်မှူးဖြစ်သူ ချူချန်းဟဲက စကားဆိုလာသည်။

"ကျုပ်လည်း သိပ်မယုံကြည်နိုင်ပေမဲ့ အကဲဖြတ်မှူးလင်း ပြောတာ မှန်တယ်... သူကိုယ်တိုင် ရှင်းပြပြီးမှသာ ဘယ်သူက အမှန်အတိုင်း ပြောနေလဲဆိုတာ ကျုပ်တို့ ဆုံးဖြတ်နိုင်မှာ... အဲဒီအခါကျရင်တော့ အမှန်တရားက ပေါ်ပေါက်လာမှာပဲ"

လင်းကျင်း ချူချန်းဟဲကို ကြည့်လိုက်သည်။ ဤအကဲဖြတ်မှူးမှာ အကျိုးအကြောင်း သိမြင်သူတစ်ဦး ဖြစ်သည်မှာ ထင်ရှားလှသဖြင့် လင်းကျင်းက သူ့အား အရိုအသေ ပေးလိုက်၏။

"အကဲဖြတ်မှူးရန်မှာ သူ့ရဲ့ ကိုယ်ပိုင် ဆွေးနွေးခန်း ရှိတယ်... သူ့ကို သွားရှာဖို့ တစ်ယောက်ယောက်ကို လွှတ်လိုက်ပါ"

တန်ရွှင်းက ညွှန်ကြားလိုက်သည်။ သူသည် ဤနေရာရှိ မည်သူ့ထက်မဆို လင်းကျင်းကို ပိုမို နားလည်ထားသူ ဖြစ်၏။

အမှန်တကယ်ပင် သူသည် လင်းကျင်းအား ဤမျှအထိ ဒေါသထွက်နေသည်ကို တစ်ခါမျှ မမြင်ဖူးပေ။

၎င်းကို ထားရစ်ခဲ့လျှင်ပင် ဤကိစ္စမှာ ကြီးလေးသော ကိစ္စရပ်တစ်ခု ဖြစ်သည်။ အဆင့် (၃) သားရဲအကဲဖြတ်မှူး တစ်ဦးအနေဖြင့် မိစ္ဆာအကဲဖြတ်မှူးများနှင့် ပူးပေါင်းခြင်းမှာ စွပ်စွဲချက်တစ်ခုသက်သက် ဖြစ်နေလျှင်ပင် သူတို့၏ ဂုဏ်သတင်းကို ကြီးမားစွာ ထိခိုက်စေနိုင်ပေသည်။ ထို့ကြောင့် သူတို့သည် ဘာပဲဖြစ်ဖြစ် ဤကိစ္စကို အဆုံးထိ စုံစမ်းရန်အတွက် အကဲဖြတ်မှူးရန်ကို ရှာဖွေရပေမည်။

ပုဂ္ဂိုလ်ရေးအရတော့ ၎င်းမှာ နားလည်မှုလွဲခြင်းသာ ဖြစ်ပါစေဟု သူ မျှော်လင့်နေမိသည်။

ရန်ချင်းရှီကို သွားရောက် ရှာဖွေသောသူမှာ မကြာမီမှာပင် ပြန်လည် ရောက်ရှိလာခဲ့သည်။

"အကဲဖြတ်မှူးရန်က သူ့ရဲ့ ဆွေးနွေးခန်းမှာ မရှိပါဘူး၊ ပြီးတော့..."

ထိုလူမှာ စကားပြောရန် တွန့်ဆုတ်နေပုံရသည်။

တန်ရွှင်း ဒေါသတကြီးဖြင့် ဟောက်လိုက်၏။

"ပြီးတော့ ဘာဖြစ်လဲ... ပြောစမ်း"

"ဟုတ်... ဟုတ်ကဲ့... အကဲဖြတ်မှူးရန်ရဲ့ ဆွေးနွေးခန်းထဲမှာ စိုက်ထားတဲ့ ဝိညာဉ်ဆေးပင်တွေ အားလုံးကို အမြစ်ကနေ နှုတ်ယူသွားကြပါပြီ"

"ဘာ"

တန်ရွှင်း၏ မျက်လုံးများမှာ ပြူးကျယ်သွားခဲ့သည်။

အခြားသူများမှာ သတိမပြုမိနိုင်သော်လည်း တန်ရွှင်းကတော့ ထိုဝိညာဉ်ဆေးပင်များမှာ မည်မျှအထိ တန်ဖိုးကြီးကြောင်း ကောင်းကောင်း သိထားသည်။ ဘာပဲဖြစ်ဖြစ် သူကိုယ်တိုင်မှာလည်း ထိုအပင်များကို ပြုစုပျိုးထောင်ရန်အတွက် ရန်ချင်းရှီနှင့်အတူ ပူးပေါင်း လုပ်ဆောင်ခဲ့ဖူးသည် မဟုတ်ပါလား။

ထိုဝိညာဉ်ဆေးပင်များကို ဘယ်သူက ယူသွားနိုင်မည်နည်း။

၎င်းမှာ ရန်ချင်းရှီကိုယ်တိုင်သာ ဖြစ်ရပေမည်။ ဘာပဲဖြစ်ဖြစ် ထိုအပင်များပေါ်တွင် ထူးခြားသော တားမြစ်မန္တန်တစ်ခုကို ချမှတ်ထားသဖြင့် ရန်ချင်းရှီကလွဲ၍ မည်သူမျှ ၎င်းတို့ကို ယူဆောင်နိုင်ခြင်း မရှိပေ။

အကယ်၍ ၎င်းမှာ ရန်ချင်းရှီ အမှန်တကယ် ဖြစ်ပါက လင်းကျင်း၏ ယူဆချက်ဖြစ်သော သူသည် လက်ရှိတွင် ထွက်ပြေးနေသည်ဟူသော အချက်မှာ ပိုမို ခိုင်မာလာခဲ့ပြီ ဖြစ်သည်။ မဟုတ်ပါက ရန်ချင်းရှီသည် အကြောင်းပြချက်မရှိဘဲ ထိုတန်ဖိုးမဖြတ်နိုင်သော ဝိညာဉ်ဆေးပင်များကို အမြစ်ကနေ နှုတ်ယူသွားလိမ့်မည် မဟုတ်ပေ။

ဤအချိန်တွင် လင်းကျင်းသည် သူ၏ ယူဆချက်မှာ မှန်ကန်ကြောင်း လုံးဝနီးပါး သေချာသွားခဲ့ပြီ ဖြစ်သည်။ သူသည် စိတ်ပူနေနိုင်သော်လည်း မိမိကိုယ်ကိုယ် ထိန်းချုပ်နိုင်စွမ်း မဆုံးရှုံးစေရန် ကြိုးစားနေခဲ့၏။ ရန်ချင်းရှီမှာ မြို့တံတိုင်းများအတွင်း၌ ရှိနေသေးသည်ဟု သူ အခိုင်အမာ ယုံကြည်နေဆဲ ဖြစ်သည်။

အကယ်၍ လိုအပ်လာပါက လင်းကျင်းသည် ဧကရာဇ် ဟယ်ရွှမ်နှင့် တွေ့ဆုံရန် နန်းတော်အတွင်းသို့သာ ဝင်ရောက်ရပေလိမ့်မည်။ ဧကရာဇ်မင်းသည်ပင်လျှင် သူ၏ တောင်းဆိုချက်ကို ငြင်းပယ်လိမ့်မည် မဟုတ်ဟု သူ သေချာပေါက် ယုံကြည်နေခဲ့သည်။

သူ အတွေးများနေစဉ်မှာပင် ရှေ့ဘက် လမ်းမကြီးပေါ်မှ မြင်းခွာသံများကို ကြားလိုက်ရသည်။ မြို့စောင့်တပ် ရာပေါင်းများစွာမှာ မကြာမီမှာပင် ထိုနေရာသို့ ရောက်ရှိလာကြသဖြင့် လူတိုင်းမှာ ထိတ်လန့်သွားကြရသည်။ ဤနေရာရှိ လူများမှာ တစ်ဦးချင်း တိုက်ခိုက်ရာတွင် အစွမ်းထက်နိုင်သော်လည်း ဤကဲ့သို့ စနစ်တကျရှိသော စစ်သည်တော် အုပ်စုကြီးကို ရင်ဆိုင်ရန်မှာမူ မဖြစ်နိုင်သော ကိစ္စပင် ဖြစ်၏။