အခန်း (၄၅-၄၆)

အခန်း (၄၅) - တစ္ဆေမျက်နှာ ရေခူဘုရင်

"ဒါ... ဒါက ဘာသားရဲကြီးလဲ"

သစ်ပင်အောက်တွင် ရုတ်တရက် ပေါ်လာသော ဧရာမသားရဲကြီးကို မြင်လိုက်ရသည့် ခဏ၌ ချူလုံ၏ မျက်နှာလေးမှာ ထိတ်လန့်မှုကြောင့် ဖြူဖျော့သွားတော့သည်။

လျူယန်၏ ရေခဲနှင့် မီးတောက် ဝံပုလွေနှစ်ခေါင်းမှာ အဆင့်မမြင့်သေးသော်လည်း ၎င်း၏ ပုံပန်းသဏ္ဍာန်နှင့် ထွက်ပေါ်နေသော အရှိန်အဝါမှာ အလွန်တရာ ကြောက်မက်ဖွယ်ကောင်းလှ၏။ မုရုံရွှယ် ပင်လျှင် တိုက်ခိုက်ရန် အသင့်ပြင်ကာ သူမ၏ လက်အင်္ကျီများကို လိပ်တင်လိုက်တော့သည်။

လျူယန်က သူမကို အမြန်ဆွဲတားကာ အသံတိုးတိုးဖြင့် ပြောလိုက်ရသည်။

"စိတ်မပူပါနဲ့... ဒါ ငါယဉ်ပါးအောင် လုပ်ထားတဲ့ သားရဲပဲ... ခဏနေရင် လရိပ်တောကြောင်ကို ငါတို့နဲ့အတူ ဝိုင်းတိုက်ဖို့ ထုတ်လိုက်တာ"

"ဒါ နင်ယဉ်ပါးအောင် လုပ်ထားတဲ့ သားရဲ ဟုတ်လား"

မုရုံရွှယ်မှာ အံ့ဩလွန်း၍ ပါးစပ်အဟောင်းသား ဖြစ်သွားရသည်။ မုရုံမိသားစုဝင် တစ်ဦးအနေဖြင့် သားရဲယဉ်ပါးအောင် လုပ်ခြင်းမှာ မည်မျှ ခက်ခဲကြောင်း သူမ ကောင်းကောင်းသိသည်။ အဆင့် (၁၀) ကျော်မှသာ အခွင့်အရေး အနည်းငယ် ရှိတတ်သည့် အလုပ်ကို လျူယန်က အဆင့် (၂) မှာတင် လုပ်ဆောင်နိုင်ခဲ့ခြင်းမှာ မယုံနိုင်စရာပင်။

လျူယန်က သူတို့၏ အစီအစဉ်ကို ရှင်းပြလိုက်သည်။

"ခဏနေရင် တောကြောင်နောက်ကို သူ့အသိုက်အထိ လိုက်သွားကြမယ်... ပြီးရင် သုံးယောက်ပေါင်းပြီး အမြန်ဆုံး အပြတ်ရှင်းရမယ်... တခြားသားရဲတွေ ရောက်မလာခင် အသံတိတ်ဖို့ လိုတယ်"

သို့သော် လျူယန် အစီအစဉ်အတိုင်း လုပ်ရန် ပြင်ဆင်နေစဉ်မှာပင် ဝံပုလွေကြီးမှာ လရိပ်တောကြောင်ရှိရာသို့ တန်းတန်းမတ်မတ် လျှောက်သွားတော့သည်။ လျူယန်မှာ ဝံပုလွေထံမှ ထူးဆန်းသော ခံစားချက်တစ်ခုကို ရရှိလိုက်၏။ တောကြောင်မှာလည်း ဝံပုလွေကို မြင်သောအခါ ရန်လိုခြင်း မရှိဘဲ ထူးဆန်းသော အသံလေးတစ်ခု ပြုလုပ်ကာ ရှေ့သို့ တိုးလာခဲ့သည်။

လျူယန်တို့ အံ့ဩနေစဉ်မှာပင် ထိုသားရဲနှစ်ကောင်မှာ ရန်ဖြစ်မည့်အစား အချင်းချင်း အလွန်တရာ ရင်းနှီးကျွမ်းဝင်စွာဖြင့် ပူးကပ်သွားကြပြီး အဝေးရှိ တိတ်ဆိတ်သော တောအုပ်အတွင်းသို့ အတူတူ ဝင်သွားကြတော့သည်။ လျူယန်မှာ ဝံပုလွေ၏ စိတ်ဆန္ဒကို ယခုမှပင် သဘောပေါက်သွားတော့သည်။

'ဒီကောင်... ဒါကို ဆိုလိုတာကိုး'

ချူလုံမှာ ဇဝေဇဝါဖြင့် မေးရှာသည်။

"အစ်ကိုလျူယန်... ဟိုတောကြောင်က ဘာလို့ ဝံပုလွေနောက် လိုက်သွားတာလဲ... သူတို့က သိနေကြတာလား"

မုရုံရွှယ်မှာမူ အခြေအနေကို ရိပ်မိသဖြင့် မျက်နှာလေး အနည်းငယ် နီမြန်းသွားကာ ခပ်ပြတ်ပြတ် ပြောလိုက်သည်။

"သူတို့ အခုပဲ ရင်းနှီးအောင် လုပ်ကြတော့မှာလေ"

"ဟင်း... ဟင်း..."

လျူယန်မှာ အနည်းငယ် အနေရခက်သွားရသည်။ သို့သော်လည်း ဤသည်မှာ သူတို့အတွက် အခွင့်ကောင်းပင်။ တောကြောင်နှင့် ဝံပုလွေတို့ အလုပ်ရှုပ်နေစဉ် သူတို့သည် တောကြောင်၏ အသိုက်သို့ အလွယ်တကူ သွားရောက်ကာ သိမ်းပိုက်နိုင်မည် မဟုတ်ပါလား။

သူတို့ သုံးဦးသည် သစ်ပင်ပေါ်မှ ဆင်းကာ 'ယင်' ရေကန်ဘေးတစ်လျှောက် အသံတိတ် လျှောက်လှမ်းလာခဲ့ကြသည်။ သားရဲအရေအတွက်မှာ နည်းပါးသွားသော်လည်း တစ္ဆေမျက်နှာ ရေခူများမှာမူ နေရာအနှံ့ ရှိနေဆဲပင်။ သူတို့ အတော်လေး ခရီးပေါက်လာချိန်တွင် ရေကန်ထဲမှ ပြင်းထန်သော အလင်းရောင်တစ်ခု ရုတ်တရက် ထွက်ပေါ်လာသည်။

လူနှစ်ပြန်စာခန့် ကြီးမားသော ရေခူကြီးတစ်ကောင် ပေါ်လာတော့သည်။ ၎င်း၏ တစ္ဆေမျက်နှာမှာ ကြည့်ရသူတိုင်းကို ကြက်သီးထစေကာ အလွန်တောက်ပသော အလင်းရောင်ဖြင့် လျူယန်တို့ သုံးဦးကို ဖော်ထုတ်လိုက်တော့သည်။

လျူယန်၏ မျက်နှာမှာ ထိတ်လန့်မှုတို့ဖြင့် ပြည့်သွားသည်။

"ဒါက တစ္ဆေမျက်နှာ ရေခူဘုရင်ပဲ.... အနည်းဆုံး အဆင့် ၁၅ ရှိတယ်... အဆိုးဆုံးက သူက လျှပ်စစ်၊ အဆိပ်နဲ့ ရေ... အဲဒီဓာတ်ကြီး သုံးပါးလုံးကို ပိုင်ဆိုင်ထားတဲ့ သားရဲပဲ"

ဓာတ်ကြီး သုံးပါး ပိုင်ဆိုင်ခြင်းမှာ အလွန်ပင် ရှားပါးလှသလို ကြောက်မက်ဖွယ်လည်း ကောင်းလှသည်။ ၎င်း၏ အစွမ်းမှာ သာမန်အဆင့် (၂၀) ရှိသော သားရဲထက်ပင် မနိမ့်ပေ။ ရေခူဘုရင်မှာ လျူယန်တို့ကို စိုက်ကြည့်ကာ နားကွဲလုမတတ် အသံနက်ကြီးဖြင့် အော်ဟစ်လိုက်တော့သည်။

နောက်ဆုတ်ရန် လမ်းမရှိတော့သဖြင့် လျူယန်က ချက်ချင်းပင် တိုက်ပွဲဗျူဟာကို ချလိုက်သည်။

"မုရုံရွှယ် နင်က ရှေ့ကနေ ခုခံပေး... ငါက နောက်ကနေ မြားနဲ့ ပစ်မယ်... ချူလုံ... နင်ကတော့ ကုသပေးတာနဲ့ အထောက်အပံ့ပေးတာကို လုပ်... မုရုံရွှယ် ဒဏ်ရာမရအောင် အထူးဂရုစိုက်ပေးပါ"

မုရုံရွှယ်မှာ အဆင့် (၅) သာ ရှိသော်လည်း သူမတွင် S-အဆင့် ပါရမီဖြစ်သော [သောင်းကျန်းသူအသွင်] ရှိနေသည်။ သူမသည် မကြောက်မရွံ့ဘဲ ရှေ့သို့ ပြေးထွက်သွားကာ အော်ဟစ်လိုက်သည်။

"အာဏာရှင် ခန္ဓာ - ဒုတိယအဆင့်"

သူမ၏ ခန္ဓာကိုယ်မှ ပြင်းထန်သော အရှိန်အဝါများ ထွက်ပေါ်လာကာ ရေခူဘုရင်၏ တိုက်ခိုက်မှုကို ရင်ဆိုင်ရန် အသင့်ဖြစ်သွားလေသည်။

အခန်း (၄၆) - တိုက်ပွဲအတွင်း အဖွဲ့လိုက် ပူးပေါင်းဆောင်ရွက်ခြင်း

'ယင်' ရေကန်ဘေးတွင် လျူယန်နှင့် ကျန်နှစ်ဦးမှာ တစ္ဆေမျက်နှာ ရေခူဘုရင်ကို ရင်ဆိုင်ရန် တည်ကြည်လေးနက်စွာ ပြင်ဆင်နေကြသည်။

ကံကောင်းသည်မှာ ပတ်ဝန်းကျင်တွင် ရေခူငယ်လေးများနှင့် အခြားသားရဲများ သိပ်မရှိခြင်းပင်။ ဤရေခူဘုရင်ကို အမြန်သတ်ပြီး ထွက်ခွာနိုင်ပါက အခြားသားရဲများ၏ ဝိုင်းရံမှုကို ခံရမည်မဟုတ်ပေ။ အနီးအနားတွင် ပုန်းအောင်းနေကြသော နိုးထသူများမှာလည်း ဤမြင်ကွင်းကို ကြည့်ကာ လျူယန်တို့အဖွဲ့ သေချာပေါက် သေရတော့မည်ဟု ထင်ကြေးပေးနေကြသော်လည်း အသံတစ်ချက်ပင် မထွက်ရဲကြချေ။

ထိုစဉ် လျူယန်သည် သူ၏ B-အဆင့် စွမ်းရည်ဖြစ်သော [မြူမှောင်] ကို ဦးဦးဖျားဖျား အသက်သွင်းလိုက်သည်။

ချက်ချင်းပင် ထူထပ်သော မြူခိုးများ ဖုံးလွှမ်းသွားကာ သူတို့သုံးဦးနှင့် ရေမှိုဘုရင်ကို ဝါးမြိုသွားတော့သည်။ မြူမှောင်၏ အာနိသင်ကြောင့် ရေခူဘုရင်မှာ ချက်ချင်းပင် တုံ့ဆိုင်းသွားပြီး လှုပ်ရှားမှုများ အလွန်အမင်း နှေးကွေးသွားတော့သည်။ ထို့အပြင် ဤမြူခိုးများသည် တိုက်ပွဲ၏ ဆူညံသံနှင့် မြင်ကွင်းကို ဖုံးကွယ်ပေးထားသဖြင့် အခြားသားရဲများ သတိမထားမိနိုင်တော့ပေ။

လျူယန်၏ နယ်ပယ်ထိန်းချုပ်မှုစွမ်းရည်ကို မြင်လိုက်ရသောအခါ မုရုံရွှယ်နှင့် ချူလုံတို့မှာ အံ့အားသင့်သွားကြသည်။

လျူယန်သည် သူ၏ [သားရဲတစ်သောင်းလေး] ကို ထုတ်ယူကာ မြားတင်လိုက်သည်။ သူသည် A-အဆင့် စွမ်းရည်ဖြစ်သော [နှင်းခဲထိန်းချုပ်ခြင်း] ကို အသုံးပြု၍ မြားပေါ်တွင် ရေခဲဓာတ်များ ဖုံးအုပ်လိုက်၏။ မီးဓာတ်မှာ ပို၍ပြင်းထန်သော်လည်း အလင်းရောင် အလွန်တောက်ပသဖြင့် ရန်သူကို ဆွဲဆောင်နိုင်သောကြောင့် သူက ရေခဲဓာတ်ကိုသာ ရွေးချယ်လိုက်ခြင်း ဖြစ်သည်။

သူသည် မြားများကို ဆက်တိုက်ပစ်ခတ်လိုက်ရာ ဘေးနားရှိ ရေခူငယ်လေးများမှာ ချက်ချင်းပင် အသက်ပျောက်ကုန်ကြသည်။ ထို့နောက် မြားအချို့မှာ ရေခူဘုရင်၏ ကိုယ်ထည်ကို တည့်တည့်မှန်သွားကာ ၎င်းကို ပိုမိုနှေးကွေးသွားစေတော့သည်။ သို့သော် အဆင့် (၁၅) ရှိသော ဘုရင်ဖြစ်သည့်အားလျော်စွာ မြားအနည်းငယ်နှင့်တော့ မလဲပေ။

မုရုံရွှယ်မှာ အနည်းငယ် အံ့ဩနေမိသည်။ သူမက ကာကွယ်သူ အဖြစ် ရှေ့က ခုခံရန် ပြင်ထားသော်လည်း လျူယန်၏ မြူမှောင်နှင့် ရေခဲဓာတ်ကြောင့် ရေခူဘုရင်မှာ သူမအနားသို့ပင် မကပ်နိုင်ဘဲ ရှိနေသည်။ သူမသည် [အာဏာရှင် ခန္ဓာ] ဒုတိယအဆင့်ကို အသက်သွင်းထားပြီး အေးဆေးစွာပင် စောင့်နေလိုက်ရတော့သည်။

လျူယန်က မလောပေ။ သူသည် [ခွန်အားမြှင့်တင်ခြင်း] ကို သုံးကာ သူ၏ ခွန်အားကို (၃) ဆ တိုးမြှင့်လိုက်သည်။ ထို့နောက် လေးကြိုးကို လမင်းသဏ္ဍာန် ပြည့်အောင် ဆွဲလိုက်ပြီး နှင်းခဲဓာတ်အပြင် B-အဆင့် [အဆိပ်ထိန်းချုပ်ခြင်း] ကိုပါ မြားပေါ်တွင် တင်လိုက်ပြန်သည်။

[ဆက်တိုက်ပစ်ခတ်ခြင်း]

မြားများမှာ ရေခူဘုရင်၏ ဒဏ်ရာဟောင်းကိုပင် ထပ်ခါထပ်ခါ ထွင်းဖောက်သွားကြသည်။ ရေခဲနှင့် အဆိပ်ဓာတ်များ ပြန့်နှံ့သွားရာ ရေခူဘုရင်မှာ အပြင်းအထန် ဒဏ်ရာရသွားတော့သည်။

ထိုစဉ် ရေခူဘုရင်၏ ကိုယ်ထည်မှ လျှပ်စစ်များ လက်လာပြီး လျူယန်တို့ထံသို့ လျှပ်စီးကြောင်းများ ပစ်လွှတ်လိုက်သည်။ မြူများကြားထဲတွင်ပင် ၎င်းက ပစ်မှတ်ကို တိကျစွာ ချိန်ရွယ်နိုင်ခြင်းမှာ ထူးဆန်းလှ၏။ လျူယန်သည် B-အဆင့် [လျှပ်တပြက်ခြေလှမ်း] ကို သုံးကာ လျှပ်စီးများကို အလွယ်တကူ ရှောင်တိမ်းလိုက်သလို ချူလုံကိုပါ ဆွဲထုတ်ပေးလိုက်သည်။

မုရုံရွှယ်ကမူ ရှောင်ရန် အစီအစဉ်မရှိဘဲ လျှပ်စီးကို ထိပ်တိုက်ရင်ဆိုင်လိုက်သည်။ သူမ၏ အာဏာရှင်ခန္ဓာကြောင့် လျှပ်စစ်ဒဏ်မှာ သူမကို များစွာ မထိခိုက်စေပေ။

သို့သော် ရေခူဘုရင်သည် တစ်ကောင်မှ သုံးကောင်၊ သုံးကောင်မှ ကိုးကောင်အထိ ကိုယ်ပွားများ ခွဲထုတ်လိုက်ပြန်သည်။ လျူယန် သိလိုက်သည်။ ဤအတိုင်း အချိန်ဆွဲ၍ မဖြစ်တော့ပေ။ ကိုယ်ပွားများလေ လျှပ်စစ်တိုက်ကွက်များ ပိုများလာလေဖြစ်ရာ မုရုံရွှယ်နှင့် ချူလုံတို့မှာ အန္တရာယ်ရှိလာနိုင်သည်။

လျူယန်သည် [အမြန်ပစ်ခတ်ခြင်း] ကို သုံးကာ အဆိပ်နှင့် ရေခဲမြားများကို ကိုယ်ပွားများဆီသို့ တရစပ် ပစ်ခတ်လိုက်သည်။ ရေခူဘုရင်၏ ကိုယ်ပွားများမှာ ဒဏ်ရာအပြင်းအထန် ရကုန်ကြပြီး တိုက်ကွက်များလည်း ရပ်တန့်သွားတော့သည်။

"အခုပဲ... အပြတ်ရှင်းလိုက်တော့"

လျူယန်က အော်ဟစ်လိုက်သည်။

မုရုံရွှယ်သည် အနီးဆုံးရှိ ကိုယ်ပွားထံ ပြေးဝင်ကာ ပြင်းထန်သော လက်သီးချက်များဖြင့် ထိုးနှက်လိုက်ရာ ၎င်းမှာ မြေပေါ်သို့ ခွေကျသွားတော့သည်။ သူမ ကျန်သည့် ကိုယ်ပွားများကို ကြည့်လိုက်ချိန်တွင်မူ ၎င်းတို့အားလုံးမှာ လျူယန်၏ မြားချက်များဖြင့် အသက်ပျောက်နေကြပြီ ဖြစ်သည်။

ကိုးကောင်သော ကိုယ်ပွားများမှာ အလင်းတန်းတစ်ခုအဖြစ် ပြန်လည်ပေါင်းစည်းသွားပြီး ရေခူဘုရင်၏ ဧရာမ အလောင်းကြီးအဖြစ် မြေပေါ်သို့ ဘုတ်ခနဲ ကျလာတော့သည်။

ချူလုံက သက်ပြင်းချကာ မုရုံရွှယ်ထံ ပြေးသွားပြီး S-အဆင့် [မြင့်မြတ်သောကုသခြင်း] ကို အသုံးပြုပေးလိုက်ရာ မုရုံရွှယ်၏ ဒဏ်ရာအနည်းငယ်မှာ ချက်ချင်းပင် ပျောက်ကင်းသွားတော့သည်။ မုရုံရွှယ်မှာမူ တိုက်ပွဲမှာ သူမ အားရပါးရ မတိုက်ရသေးခင်မှာပင် ပြီးဆုံးသွားသဖြင့် အနည်းငယ် မကျေမနပ် ဖြစ်နေရှာတော့သည်။