ပိုမို ကြောက်မက်ဖွယ်ကောင်းသော ကပ်ဘေးကြီး

ထန်ထျန်း ရှင်းပြနေစဉ် တစ်လျှောက်လုံးတွင် နေနတ်ဘုရားတို့ သုံးဦး၏ မျက်နှာများမှာ အဆက်မပြတ် ပြောင်းလဲနေတော့သည်။

အရင်ကမူ သူတို့သည် တိုက်ပွဲဖြစ်ပွားစဉ်က မြင်ကွင်းများနှင့် နတ်ဘုရားအချစ်တော် ကြောင်လေး က ကျွင်းချန်ချင်း၏ လက် ထဲသို့ တိုးဝင်သွားသည်ကိုသာ မြင်တွေ့ခဲ့ရခြင်း ဖြစ်ပြီး ၎င်းနောက်ကွယ်၌ ဤမျှလောက်များပြားသော လျှို့ဝှက်ချက်များ ရှိနေသည်ကို မသိခဲ့ကြပေ။

ကမ္ဘာ့အရှင်သည် ထိုစဉ်က ထာဝရအဆင့်သို့ အမှန်တကယ် တက်လှမ်းနိုင်ခဲ့သော်လည်း ပြန်လည် ဆင်းလာခဲ့သည်။

ထို့နောက် အချိန်မြစ် အတွင်း၌ အမည်မသိ ပုဂ္ဂိုလ်တစ်ဦးနှင့် နှစ်ပေါင်း တစ်သောင်းတိုင်တိုင် စစ်တုရင် ကစားခဲ့သည်။

ပြီးတော့... တစ်ပွဲမျှပင် မနိုင်ဘဲ ရှုံးနိမ့်ခဲ့သည်။

နောက်ပြီး နတ်ဘုရားအချစ်တော် ရှိနေခဲ့သည့် ထိုကမ္ဘာမှာလည်း ကမ္ဘာ့အရှင်နှင့် သဘာဝမိခင်တို့က ကျွင်းချန်ချင်းအတွက် သီးသန့် ဖန်တီးပေးထားခဲ့ခြင်း ဖြစ်သည်။

များပြားလှသော လျှို့ဝှက်ချက်များကြောင့် သူတို့၏ အတွေးများမှာလည်း ရှုပ်ထွေးသွားရပြီး ရှင်းလင်းသော လမ်းစတစ်ခုကို ရှာဖွေရန် ခက်ခဲနေတော့သည်။

ထန်ထျန်း ပြောပြပြီး၍ အတော်ကြာသည့်တိုင်အောင် သူတို့က မျက်မှောင်ကြုတ်ကာ စဉ်းစားနေကြဆဲ ဖြစ်သည်။

"ကမ္ဘာ့အရှင်ရဲ့ အကြောင်းကို ငါ အချို့တော့ သိထားတာ ရှိတယ်..."

နေနတ်ဘုရားက မျက်မှောင်ကြုတ်လျက် ပြောလိုက်သည်။ "အဲ့တုန်းက သူ ထာဝရအဆင့်ကို တက်လှမ်းဖို့ ကြိုးစားပြီးနောက်မှာ လူတွေရဲ့ အမြင်ထဲကနေ နှစ်ပေါင်း တစ်သောင်းလောက် ပျောက်ကွယ်သွားခဲ့တယ်"

"ဒါပေမဲ့ အဲဒီအချိန်တုန်းက လူတိုင်းက သူဟာ အဲဒီ နှစ်ပေါင်း တစ်သောင်းလုံးကို ထာဝရအဆင့် တက်လှမ်းဖို့အတွက် အသုံးချနေတယ်လို့ပဲ ထင်ခဲ့ကြတာ"

"သူ အချိန်မြစ် ထဲကို သွားခဲ့လိမ့်မယ်လို့ မထင်ထားခဲ့ဘူး"

ထို့နောက် လုံကျိုကျိုးကလည်း ဝင်ပြောသည်။ "ပြီးတော့ ကျွင်းချန်ချင်း ပြောတာက သူ ထာဝရအဆင့်ကို အောင်မြင်စွာ တက်လှမ်းနိုင်ခဲ့ပေမဲ့ ကိုယ်တိုင် ပြန်ဆင်းခဲ့တာတဲ့လား"

"ဒါက တကယ်ကို ထူးဆန်းလွန်းတယ်"

"ကမ္ဘာ့အရှင်က ထာဝရအဆင့်အတွက် သူ့ဘဝတစ်ခုလုံးကို ပေးဆပ်ခဲ့တာလေ၊ ဒီလိုမျိုး လုပ်စရာ အကြောင်း မရှိဘူး"

ဆက်လက်၍ ဝူချန်းကျိကျွင်း ကလည်း စဉ်းစားလျက် ပြောလိုက်သည်။ "အဲ့တုန်းက ကမ္ဘာ့အရှင်က ကမ္ဘာကြီးရဲ့ အထွတ်အထိပ်မှာ ရပ်တည်နေတာ၊ ဒီနေ့အထိ ဘယ်သူမှ သူ့ကို မယှဉ်နိုင်သေးဘူး"

"ဘယ်သူက သူ့ကို နှစ်ပေါင်း တစ်သောင်းလုံးလုံး တစ်ပွဲမှ မနိုင်အောင် လုပ်နိုင်မှာလဲ"

ဤမေးခွန်းများကို သူတို့ လုံးဝ စဉ်းစား၍ မရနိုင်ကြပေ။

ထန်ထျန်းက ခေါင်းခါလိုက်ပြီး ပြောသည်။ "ငါလည်း စဉ်းစားလို့ မရဘူး"

"အမှန်တော့ ကျွင်းချန်ချင်း ကိုယ်တိုင်လည်း နားမလည်နိုင်လို့ စစ်တုရင် ကစားတယ့် နားနေဆောင် ကို သွားပြီး သဲလွန်စ ရှာခဲ့တာပဲ"

"ဒါပေမဲ့ ငါ့ရဲ့ ခွဲခြမ်းစိတ်ဖြာချက် အရဆိုရင် ဒီသံသယတွေ အားလုံးရဲ့ အဓိက အချက်က ကမ္ဘာ့အရှင်နဲ့ စစ်တုရင် ကစားခဲ့တဲ့ အမည်မသိ ပုဂ္ဂိုလ်ဆီမှာပဲ ရှိရမယ်"

"ကမ္ဘာ့အရှင်က ထာဝရအဆင့်ကို ရောက်ပြီးတဲ့နောက်မှာ ကြောက်မက်ဖွယ် အခြေအနေတစ်ခုခုကို မြင်ခဲ့လို့သာ ကိုယ်တိုင် ပြန်ဆင်းလာပြီး ထာဝရ လမ်းစဉ်ကို လုံးဝ စွန့်လွှတ်ခဲ့တာ ဖြစ်ရမယ်"

"နောက်ပြီး လွန်ခဲ့တဲ့ နှစ်ပေါင်း သန်းချီက သူ လောကထဲ ပြန်ဝင်လာတာ၊ ကျွင်းချန်ချင်းကို တမင် အနိုင်ယူ တာနဲ့ သဘာဝမိခင်နဲ့ ပူးပေါင်းပြီး အကွက်ချတာတွေကလည်း အဲဒီ အမည်မသိ ပုဂ္ဂိုလ်နဲ့ ပတ်သတ်နေ ရမယ်"

သူတို့ ခဏမျှ စဉ်းစားပြီးနောက် နောက်ဆုံးတွင် ထန်ထျန်း၏ စကားကို သဘောတူကာ ခေါင်းညိတ်လိုက်ကြသည်။

"ဒီလိုပဲ ဖြစ်ရမယ်"

နေနတ်ဘုရားက ပြောလိုက်သည်။ "ငါ ကမ္ဘာ့အရှင်ကို သိတယ်၊ သူက အရှုံးကို အလွယ်တကူ လက်ခံမယ့်သူ မဟုတ်ဘူး"

"ဒီလောက် နှစ်တွေအကြာကြီး သူက လောကကနေ ကွယ်ပျောက်နေပြီး ကျွင်းချန်ချင်း ပေါ်လာတဲ့ အခါမှ ပြန်ဆင်းလာတာက အဲဒီ အမည်မသိ ပုဂ္ဂိုလ်ကို အနိုင်ယူဖို့ အခွင့်အရေး တစ်ခုခု ရှာတွေ့လို့ပဲ ဖြစ်ရမယ်"

ထန်ထျန်းက ခေါင်းညိတ်လျက် ပြောသည်။ "ငါလည်း အဲဒီအတိုင်းပဲ ထင်တယ်"

"ဒါပေမဲ့ ဒီလိုဆိုရင် သူက အဲ့တုန်းက ဘာကြောင့် ကျွင်းချန်ချင်းကို အနိုင်ယူ ခဲ့တာလဲ"

"သူက တစ်ကမ္ဘာလုံးက လူသားဧကရာဇ်နန်းတော် ကို ဖျက်ဆီးလုနီးပါး ဖြစ်ခဲ့တာလေ"

နေနတ်ဘုရားက စားပွဲခုံကို လက်ချောင်းဖြင့် ခေါက်လျက် လေးနက်စွာ ပြောလိုက်သည်။ "တကယ်တော့ အဲဒီတုန်းက ကမ္ဘာ့အရှင်က ကျွင်းချန်ချင်းကို အလေးအနက် မတိုက်ခဲ့ဘူးလို့ ငါ အမြဲတမ်း သံသယ ရှိခဲ့တာ"

"သူ့မှာ ကျွင်းချန်ချင်းကို အပြတ်အသတ် သတ်ပစ်နိုင်တဲ့ ခွန်အား ရှိပေမဲ့ ချိပ်ပိတ်တဲ့ နည်းလမ်းကိုပဲ ရွေးချယ်ခဲ့တယ်"

"အကယ်၍ ကမ္ဘာ့အရှင် ပြန်လာရတဲ့ ရည်ရွယ်ချက်က ကမ္ဘာကြီးကို ကယ်တင်ဖို့ မဟုတ်ဘူး ဆိုရင်တော့ ဒါက အဓိပ္ပာယ်ရှိသွားပြီ"

"ဘာလို့လဲဆိုတော့ သူက ကျွင်းချန်ချင်းကို လိုအပ်နေသေးလို့ပဲ"

"သူနဲ့ သဘာဝမိခင်တို့ရဲ့ နောက်ဆုံး အစီအစဉ် ကလည်း အဲဒီ အမည်မသိ ပုဂ္ဂိုလ်ကို ရင်ဆိုင်ဖို့ ဆိုရင်တော့..."

"အဲဒီ အစီအစဉ် ပြီးပြည့်စုံမယ့် အချိန်က ကျွင်းချန်ချင်း ပြန်လည် ရှင်သန်လာမယ့် အချိန်၊ ဒါမှမဟုတ် နှစ်ပေါင်း သန်းချီ ကြာတဲ့ အခု အချိန်ပဲ ဖြစ်ရမယ်"

"ဒါကြောင့်..."

နေနတ်ဘုရားက ရုတ်တရက် ခေါင်းမော့ကာ ထန်ထျန်းကို ကြည့်လိုက်သည်။

"မင်း... မင်းကသာ အရေးအကြီးဆုံးသော တည်ရှိမှုပဲ"

ထန်ထျန်း မှင်တက်သွားသည်။

"ငါလား"

ဒါက သူ တစ်ခါမှ မတွေးဖူးသည့် ကိစ္စပင် ဖြစ်သည်။

နေနတ်ဘုရားက ပြောသည်။ "မင်းရဲ့ သရုပ်မှန် ကို မေ့သွားပြီလား"

"ကပ်ဘေးရိပ်သိမ်းသူ"

"ကမ္ဘာ့အရှင် ကိုယ်တိုင် ရွေးချယ်ထားတဲ့ ကပ်ဘေးရိပ်သိမ်းသူ"

"အကယ်၍ ကမ္ဘာ့အရှင် လုပ်ခဲ့သမျှက အဲဒီ အမည်မသိ ပုဂ္ဂိုလ်ကို ရင်ဆိုင်ဖို့ ဆိုရင်..."

"ဒါဆိုရင် ထန်ထျန်း၊ နှစ်ပေါင်း သန်းချီ ကြာပြီးမှ ပေါ်လာတဲ့ မင်းကသာ အဓိက အကျဆုံးပဲ"

နေနတ်ဘုရား၏ စကားမှာ ခိုင်မာ ပြတ်သားလှသည်။

အခြား နှစ်ဦးမှာလည်း လေးနက်စွာ ခေါင်းညိတ်လိုက်ကြသည်။

ထန်ထျန်းမှာမူ အနည်းငယ် ကြောင်အမ်းအမ်း ဖြစ်နေသည်။

သူက ဤဘက်ကို တကယ်ပင် မစဉ်းစားခဲ့ဖူးပေ။

သို့သော် သူကိုယ်တိုင်မှာ အမှန်တကယ်ပင် ထူးခြားသော တည်ရှိမှု တစ်ခု ဖြစ်နေသည်။

"ဒါပေမဲ့ ငါ... ငါ ဘာလုပ်ရမလဲ ဆိုတာ မသိဘူးလေ"

"ဒါမှမဟုတ် ငါ့မှာ ဒီကိစ္စနဲ့ ပတ်သက်တဲ့ အရိပ်အယောင် တစ်ခုမှ မရှိခဲ့ဘူး"

"ကပ်ဘေးရိပ်သိမ်းသူ ဆိုတဲ့ သရုပ်မှန် တောင်မှ မင်းတို့ဆီကနေ ကြားဖူးတာပါ"

ထန်ထျန်းက ပြောလိုက်သည်။

နေနတ်ဘုရားက နားထင်ကို နှိပ်နယ်လျက် ပြောသည်။ "မလောပါနဲ့၊ ငါ့ကို ထပ်ပြီး စဉ်းစားခွင့် ပေးဦး"

"ကပ်ဘေးရိပ်သိမ်းသူ... တကယ်တမ်း ဘယ်လို ကပ်ဘေးမျိုးကို ရင်ဆိုင်ရမှာလဲ"

"ကမ္ဘာ့အရှင်နဲ့ ကျွင်းချန်ချင်းက တစ်ဖွဲ့တည်း ဆိုရင်၊ သူက အဲ့တုန်းက ကျွင်းချန်ချင်းကို ဖြေရှင်းနိုင်တဲ့ ခွန်အား ရှိခဲ့တာပဲ"

"ဒါကြောင့် ကျွင်းချန်ချင်းရဲ့ ဒီ ကပ်ဘေးက သူ့မျက်လုံးထဲမှာ ကပ်ဘေးလို့တောင် မသတ်မှတ်နိုင်ဘူး"

"ဒါဆိုရင် မင်း ရင်ဆိုင်ရမယ့် ကပ်ဘေးအစစ်အမှန်က ကျွင်းချန်ချင်း မဟုတ်တာ ကျိန်းသေတယ်"

"ဒါကြောင့် မင်း ရင်ဆိုင်ရမှာက ကျွင်းချန်ချင်းထက် ပိုပြီး ကြောက်စရာကောင်းတဲ့၊ ကမ္ဘာ့အရှင်တောင်မှ မခုခံနိုင်တဲ့ အမည်မသိ ကြောက်မက်ဖွယ် ကပ်ဘေးကြီးပဲ ဖြစ်ရမယ်"

နေနတ်ဘုရား၏ ခွဲခြမ်းစိတ်ဖြာမှုကို ကြားသောအခါ ထန်ထျန်း မျက်လုံးများ ပြူးသွားရသည်။

ပိုပြီး ကြောက်စရာကောင်းတဲ့ အမည်မသိ ကပ်ဘေးကြီး လား

နောက်မနေပါနဲ့၊ သူက ကျွင်းချန်ချင်းရဲ့ ကိစ္စကိုတောင် မဖြေရှင်းရသေးဘူးလေ

အခု သူ့ကို ပိုပြီး အစွမ်းထက် တဲ့ အရာကြီးနဲ့ ရင်ဆိုင်ခိုင်းနေတာလား။

သို့သော် နေနတ်ဘုရား၏ စကားများက အခြားသော ကိစ္စအချို့ကို သတိရစေသည်။

ကြောင်လေးနှင့် ကျွင်းချန်ချင်း တို့ကလည်း အရင်က ပြောခဲ့ဖူးပုံရသည်။

ကမ္ဘာ့အရှင်နှင့် သဘာဝမိခင်တို့၏ အစီအစဉ် က ဘာလဲဆိုတာ သူတို့ မသိကြသော်လည်း ထိုကိစ္စမှာ အလွန် ခက်ခဲလှပြီး အောင်မြင်ဖို့ ဖြစ်နိုင်ခြေ မရှိသလောက် နည်းပါးကြောင်း သိထားကြသည်။

အကယ်၍ ထိုသို့သာ ဆိုလျှင်...

ထို ကပ်ဘေးကြီးမှာ တကယ်ပင် ပေါ်မလာသေးတာလည်း ဖြစ်နိုင်သည်

ဒါကို တွေးမိသောအခါ ထန်ထျန်းမှာ ကြက်သီးမွေးညှင်းများ ထလာရသည်။

"ငါ့ကို လာမခြောက်ပါနဲ့"

"ဒီကမ္ဘာကြီးရဲ့ နောက်ကွယ်မှာ သရဲတစ်ကောင် ပုန်းနေသလိုမျိုး ခံစားနေရပြီ"

သူက ပြောလိုက်သည်။

နေနတ်ဘုရားက အနည်းငယ် ခေါင်းခါပြသည်။ "ဒါက ရှိနေတဲ့ သတင်းအချက်အလက်တွေအရ ခွဲခြမ်းစိတ်ဖြာကြည့်တာပါ"

"အဓိကက ကမ္ဘာ့အရှင်ရဲ့ အစီအစဉ် က ဘယ်လိုမျိုးလဲ ဆိုတာ ငါတို့ မသိတာပဲ"

"ဒါပေမဲ့ ငါ ခံစားရတာတော့... သာမန် အားဖြင့် မှားမှာ မဟုတ်ဘူး"

ထန်ထျန်း တိတ်ဆိတ်သွားသည်။ "ကြည့်ရတာ ဒီရှု့ထောင့်က စပြီး စုံစမ်းဖို့ လိုအပ်နေပြီ"

"ဒီ အမည်မသိ ကပ်ဘေးကြီးနဲ့ ယှဉ်ရင် ကျွင်းချန်ချင်းကတောင် သိပ်ပြီး အရေးမကြီးတော့သလိုပဲ"

"ကမ္ဘာ့အရှင်ရဲ့ နောက်ဆုံး အစီအစဉ် ကို သိနိုင်မယ့် နည်းလမ်း ဘာရှိလဲ"

နေနတ်ဘုရားက ခဏစဉ်းစားပြီး ပြောလိုက်သည်။ "ကမ္ဘာ့အရှင်ရဲ့ အစီအစဉ် ကို သူကိုယ်တိုင်နဲ့ သဘာဝမိခင်ပဲ သိနိုင်မယ်"

"ဒါပေမဲ့ သူတို့ နှစ်ယောက်စလုံးက ပျောက်ကွယ်သွားပြီ ဆိုတော့ စုံစမ်းဖို့က တကယ် ခက်ခဲတယ်"

"ဒီလျှို့ဝှက်ချက်ကို ဒီနှစ်တွေအတွင်း လူအများကြီး စုံစမ်းခဲ့ကြတယ်၊ ငါလည်း ပါတာပေါ့၊ ဒါပေမဲ့ ဘာမှ မသိရဘူး"

"ဒါပေမဲ့ ခုနလေးတင်ပဲ ငါ နေရာ နှစ်ခုကို ရုတ်တရက် သတိရသွားတယ်၊ အဲဒီမှာ သဲလွန်စ အချို့ ရှာတွေ့နိုင်ကောင်းရဲ့"

ထန်ထျန်း မျက်ခုံးပင့်သွားသည်။ "ဘယ်နေရာလဲ"