အခန်း (၃၃၆-၃၃၇)

အခန်း (၃၃၆) ဘဝ၏ ဆင်းရဲဒုက္ခရှစ်ပါး

ဝုန်း...။

ဓားအစီအရင်အတွင်းမှ အက်ကွဲသံတစ်သံ ထွက်ပေါ်လာသည်။ ချိုးယွမ်ကျန် ပြောင်းလဲသွားသည့် သွေးရောင်အလင်းတန်းသည် ချန်ဖေး၏ ဓားချက်အောက်တွင် အက်ကွဲပျက်စီးသွားပြီး သူ၏ အသွင်စစ်ကို ထုတ်ဖော်ပြသလိုက်၏။ ထိုအခိုက်၌ ချိုးယွမ်ကျန်က ချန်ဖေးကို ထိတ်လန့်တုန်လှုပ်ဖွယ် မျက်လုံးများဖြင့် စိုက်ကြည့်နေမိပြီး ဧရာမ အားအဟုန်ကြီးတစ်ခုက သူ့ကို နောက်သို့ လွင့်ထွက်သွားစေသည်။

သူ မည်မျှပင် နောက်ဆုတ်ရန် ကြိုးစားစေကာမူ ချိုးယွမ်ကျန်မှာ ဓားအစီအရင်အတွင်း ပိတ်မိနေပြီး ရှေ့ဆက်ရန်လမ်းမရှိသကဲ့သို့ နောက်ဆုတ်ရန်လည်း လမ်းမရှိတော့ပေ။

သူ့ကို အကြိမ်ပေါင်းများစွာ ကာကွယ်ပေးခဲ့သော သွေးရင်းမြစ် ကျင့်စဉ်၏ သွေးရောင်အလင်းတန်းသည် ချန်ဖေး၏ ဓားချက်ကြောင့် တစ်စစီ ဆုတ်ဖြဲခံလိုက်ရသည်။

ယခင်က ဤသွေးရင်းမြစ် ကျင့်စဉ်၏ အကာအကွယ်ဖြင့် သူသည် ဒွာရသန့်စင်ခြင်း အလယ်အလတ်အဆင့် ကျင့်ကြံသူ နှစ်ဦးကိုပင် ရင်ဆိုင်နိုင်ခဲ့ဖူး၏။ ဂိုဏ်းများမှ သိုင်းပညာရှင်များ ဝိုင်းဝန်းပိတ်ဆို့သည့်တိုင်အောင် သူက အထိအခိုက်မရှိ အောင်မြင်စွာ ဆုတ်ခွာနိုင်ခဲ့သည်။

သို့သော် ယခု ချန်ဖေး၏ ဓားချက်ကို ရင်ဆိုင်ရသောအခါ လုံးဝ ပြိုကွဲသွားခဲ့ပြီ ဖြစ်သည်။ တစ်ခဏမျှ ချိုးယွမ်ကျန်မှာ ဒွာရသန့်စင်ခြင်း နောက်ဆုံးအဆင့်ရှိ ထိပ်တန်းပညာရှင်တစ်ဦးကို ရင်ဆိုင်နေရသကဲ့သို့ ထင်ယောင်ထင်မှား ဖြစ်သွားမိသည်။

"အရှင်... ကျွန်တော်တို့ အေးအေးဆေးဆေး စကားပြောကြရအောင်... အေးအေးဆေးဆေး ပြောကြရအောင်..."

ချိုးယွမ်ကျန်က အသံကုန်ဟစ်၍ တောင်းပန်လိုက်သည်။ ယခုအချိန်တွင် ချိုးယွမ်ကျန်က ချန်ဖေး၏ အစစ်အမှန် ကျင့်ကြံခြင်းအဆင့်သည် ဒွာရသန့်စင်ခြင်း အလယ်အလတ်အဆင့် ဖြစ်ကြောင်း သိမြင်သွားခဲ့ပြီ ဖြစ်၏။ ချန်ဖေးက သူ၏ စွမ်းအားအစစ်အမှန်ကို အသုံးချလိုက်သည်နှင့် သူ၏ အဆင့်မှာ ဖုံးကွယ်ထား၍ မရနိုင်တော့ပေ။

ချိုးယွမ်ကျန်မှာ အလွန်တရာ ခါးသီးသွားမိသည်။ အကယ်၍ ချန်ဖေးသည် ဒွာရသန့်စင်ခြင်း အလယ်အလတ်အဆင့် ဖြစ်ကြောင်း သူကြိုသိခဲ့ပါက အစောပိုင်းက ထိုမျှ မာနထောင်လွှားနေမည် မဟုတ်ဘဲ နောက်ဆုံးတွင် နောက်ဆုတ်သွားခဲ့မည် ဖြစ်သည်။

မည်သို့ပင်ဆိုစေကာမူ ဖုန်းရှိုးဖူနှင့် အခြားသူများကို ကာကွယ်ပေးရန် ဒွာရသန့်စင်ခြင်း အလယ်အလတ်အဆင့်သည် လုံလောက်နေပြီ ဖြစ်ရာ ဆက်လက် အချိန်ဖြုန်းနေရန် အကြောင်းမရှိပေ။

ဤမျှ ငယ်ရွယ်သော မျက်နှာသွင်ပြင်ရှိသည့် ချန်ဖေးသည် ဒွာရသန့်စင်ခြင်း အစောပိုင်းအဆင့်တွင် ရှိနေခြင်းကပင် အလွန် အံ့မခန်း ဖြစ်နေပြီကို ဒွာရသန့်စင်ခြင်း အလယ်အလတ်အဆင့်သို့ ရောက်ရှိနေမည်ဟု မည်သူက တွေးတောမိမည်နည်း။ ဤသည်က မည်သူမျှ မထင်မှတ်ထားသော အရာဖြစ်သည်။

ဂိုဏ်းမှ တပည့်များသည် လေလွင့်ကျင့်ကြံသူများထက် အရင်းအမြစ် ပိုမိုကောင်းမွန်သည် ဆိုသော်ငြားလည်း အရင်းအမြစ် မည်မျှပင် ကောင်းမွန်စေကာမူ ဂိုဏ်းတစ်ခုလုံး၏ အရင်းအမြစ်အားလုံးကို လူတစ်ဦးတည်းအား ပေးအပ်ထားရန် မဖြစ်နိုင်ပေ။

ကျင့်ကြံခြင်း ဆိုသည်မှာ ဖြည်းဖြည်းချင်း အဆင့်ဆင့် တက်လှမ်းရခြင်း ဖြစ်သည်။

အဆင့်တက်လှမ်း၍ ဒွာရသန့်စင်ခြင်း အဆင့်သို့ ရောက်ရှိလာပြီးနောက် ဒွာရသန့်စင်ခြင်း အလယ်အလတ်အဆင့်သို့ ဆက်လက် ကျင့်ကြံရန်အတွက် အနည်းဆုံး ဆယ်စုနှစ်များစွာ အချိန်ယူရမည် ဖြစ်သည်။ ချန်ဖေးကဲ့သို့ ငယ်ရွယ်သော ဒွာရသန့်စင်ခြင်း အလယ်အလတ်အဆင့် ပညာရှင်မျိုး မရှိသင့်ပေ။

သို့သော် ယခု ထိုအကြောင်းအရာများကို ပြောနေခြင်းက အဓိပ္ပာယ် မရှိတော့ချေ။ အရေးအကြီးဆုံးအရာမှာ မိမိအသက်ကို ကယ်တင်ရန်သာ ဖြစ်သည်။

ချန်ဖေးက ပြန်လည်မဖြေကြားပေ။ သူက လျင်မြန်စွာ ရွေ့လျား၍ ချိုးယွမ်ကျန်၏ အရှေ့သို့ ရောက်ရှိလာပြီး ချန်ယွမ် ဓားဖြင့် ထိုးစိုက်လိုက်၏။

ဓားဆွဲထုတ်လိုက်သည့် အခိုက်အတန့်မှာပင် ဓား၏ ထက်မြက်မှုက ချိုးယွမ်ကျန်၏ အသိစိတ်ပင်လယ်အတွင်းသို့ စိမ့်ဝင်သွားသည်။

အစောပိုင်းက သွေးရင်းမြစ် ကျင့်စဉ်၏ အကာအကွယ် ရှိနေစဉ်ကပင် ချိုးယွမ်ကျန်မှာ ချန်ဖေး၏ ဓားချက်ကို မခုခံနိုင်ခဲ့ပေ။ ယခု သွေးရင်းမြစ် ကျင့်စဉ် ကျိုးပျက်သွားချိန်တွင် ဤဓားချက်ကို မည်သို့ ခုခံနိုင်မည်နည်း။

မခုခံနိုင်လျှင် သေရမည်သာ ဖြစ်သည်။

သေရမည်ဟူသော အတွေးကြောင့် ချိုးယွမ်ကျန်၏ မျက်လုံးများက ထိတ်လန့်တကြား ပြူးကျယ်သွားသည်။ သူ မသေချင်ပေ။ ဒွာရသန့်စင်ခြင်း အလယ်အလတ်အဆင့်သို့ ရောက်ရှိရန် သူသည် အခက်အခဲများစွာကို ဖြတ်ကျော်ခဲ့ရပြီး လေလွင့်ကျင့်ကြံသူများအကြားတွင် ဤအဆင့်သို့ ရောက်ရှိခြင်းက အလွန် ရှားပါးလှသည်။

ထို့ကြောင့်ပင် ချိုးယွမ်ကျန်၏ စရိုက်က တဖြည်းဖြည်း မာနထောင်လွှားလာခြင်း ဖြစ်သည်။ သာမန် လေလွင့်ကျင့်ကြံသူများသည် သူ၏ သားကောင်များသာ ဖြစ်လာမည်ဖြစ်ပြီး ဂိုဏ်းများမှ တပည့်များပင်လျှင် မြန်မြန်ဆန်ဆန် မထွက်ပြေးနိုင်ပါက သူ၏ သတ်ဖြတ်ခြင်းမှ လွတ်ကင်းနိုင်မည် မဟုတ်ပေ။

ဤမျှ လွတ်လပ်ပေါ့ပါးသော ဘဝမျိုးဖြစ်သည်။ ချိုးယွမ်ကျန်က မသေချင်သေးဘဲ ဤဘဝကို ဆက်လက် ခံစားလိုပြီး နောက်ဆုံးတွင် ဒွာရသန့်စင်ခြင်း နောက်ဆုံးအဆင့်ထိ တက်လှမ်းချင်သေးသည်။

"အား..."

ချိုးယွမ်ကျန်က ရူးသွပ်စွာ ဟစ်အော်လိုက်ပြီး သူ၏ သွေးများ ဆူပွက်လာကာ မျက်စိတစ်မှိတ်အတွင်းမှာပင် သူ၏ ခန္ဓာကိုယ်မှ သွေးစီးကြောင်းများစွာ စီးကျလာသည်။

သွေးရင်းမြစ် ကျင့်စဉ်ကို ချိုးယွမ်ကျန်က မြို့ပျက်တစ်ခုအတွင်းမှ ရရှိခဲ့ခြင်း ဖြစ်ပြီး ဖန်တီးရှင်က အနက်ရှိုင်းဆုံးတွင် မြှုပ်နှံထားခဲ့သည်။ ဒဏ္ဍာရီများအရ ဤကျင့်စဉ်သည် တစ်ခေတ်တစ်ခါက ဂိုဏ်းတစ်ခု၏ အထွတ်အထိပ် လျှို့ဝှက်ကျင့်စဉ် ဖြစ်ခဲ့ပြီး အတုမရှိသော စွမ်းအားကို ပိုင်ဆိုင်ထားသည်ဟု ဆို၏။

သို့သော် သွေးရင်းမြစ် ကျင့်စဉ်တွင် အားနည်းချက် တစ်ခုရှိသည်။ အောင်မြင်စွာ ကျင့်ကြံနိုင်သူများသည် ခြောက်လတစ်ကြိမ် မိမိတို့၏ သွေးများ ဆူပွက်လာသည့် ခံစားချက်ကို တစ်နာရီကြာ ခံစားရမည် ဖြစ်သည်။ ဤသို့ ဆူပွက်နေစဉ်အတွင်း ကျင့်ကြံသူသည် အလွန်အမင်း နာကျင်မှုကို ခံစားရသည်။

မည်သို့ပင်ဖြစ်စေ ထိုနာကျင်မှုကို ကြံ့ကြံ့ခံနိုင်ပါက ကျင့်ကြံခြင်းအဆင့်မှာ အမှန်တကယ်ပင် တိုးတက်လာမည်ဖြစ်ပြီး ခန္ဓာကိုယ်တွင်းရှိ ယွမ်စွမ်းအင်များလည်း ပိုမို သန့်စင်လာမည် ဖြစ်သည်။

လေလွင့်ကျင့်ကြံသူများတွင် အရင်းအမြစ် အကန့်အသတ် ရှိသောကြောင့် ချိုးယွမ်ကျန်က သွေးရင်းမြစ် ကျင့်စဉ်၏ ဤထူးခြားချက်ကို အားကိုး၍ တဖြည်းဖြည်း ကျင့်ကြံခဲ့ရသည်။ သို့သော် ဤအဆက်မပြတ် နှိပ်စက်မှုက ကျင့်ကြံသူ၏ စရိုက်ကို မသိမသာပင် အလွန်အမင်း ဒေါသကြီးစေသည်။

ချိုးယွမ်ကျန်သည် သွေးများရွှဲနစ်နေသော ပုံရိပ်အဖြစ် ပြောင်းလဲသွားပြီး သူ၏ အနောက်မှနေ၍ မိစ္ဆာကောင်ကြီး တစ်ကောင်ကဲ့သို့ အမည်းရောင် အရိပ်ကြီးတစ်ခု ထွက်ပေါ်လာကာ ချန်ဖေးကို စိုက်ကြည့်လိုက်သည်။ ရေမတွက်နိုင်သော နာကြည်းမှုများက ချန်ဖေး၏ အသိစိတ်ပင်လယ်ထံသို့ လှိုင်းလုံးကြီးများအလား ဝင်ရောက်လာ၏။

ပဋိသန္ဓေတည်ခြင်း၊ အိုမင်းခြင်း၊ ဖျားနာခြင်း၊ သေဆုံးခြင်း၊ ချစ်ခင်ရသူများနှင့် ကွဲကွာရခြင်း၊ မုန်းတီးသူများနှင့် ဆုံတွေ့ရခြင်း၊ လိုချင်သောအရာကို မရရှိခြင်း၊ နောက်ဆုံးတွင် ခန္ဓာငါးပါးကြီးကို စွဲလမ်းရခြင်း ဟူသော ဘဝ၏ ဆင်းရဲဒုက္ခရှစ်ပါးက ချန်ဖေး၏ စိတ်ထဲတွင် အသံတိတ် ဟိန်းဟောက်နေပြီး အိပ်မက်ဆိုးတစ်ခု နိုးထလာသကဲ့သို့ ချန်ဖေးကို ချောက်နက်ကြီးထဲသို့ ဆွဲချရန် ကြိုးစားနေသည်။

နတ်ဘုရား သတ်ဖြတ်ခြင်းဓား။

ချန်ဖေး၏ အသိစိတ်ပင်လယ်အတွင်းမှ ဓားအလင်းတန်း တစ်ခုက ထင်ယောင်ထင်မှား အာရုံများအားလုံးကို ထက်ပိုင်းပိုင်း၍ အရှေ့သို့ တစ်ဟုန်ထိုး တိုးဝင်သွားပြီး ချိုးယွမ်ကျန် နောက်ကွယ်ရှိ အမည်းရောင် အရိပ်ကြီး၏ နဖူးတည့်တည့်သို့ ထိုးဖောက် ဝင်ရောက်သွားသည်။

ချိုးယွမ်ကျန်က နာကျင်စွာ အော်ဟစ်လိုက်ပြီး သူ၏ ခန္ဓာကိုယ်မှာ လိမ်ကောက် ကွေးညွှတ်သွားကာ သူ၏ နောက်ကွယ်မှ အရိပ်ကြီးမှာ ဟိန်းဟောက်သံ တစ်ချက်နှင့်အတူ ပြိုကွဲပျက်စီးသွားသည်။

"ရွှစ်..."

ချန်ယွမ် ဓားက ချိုးယွမ်ကျန်၏ ခန္ဓာကိုယ်ကို ထိုးဖောက်ဝင်ရောက်သွားပြီး ချိုးယွမ်ကျန်၏ ကိုယ်ပေါ်တွင် ကပ်တွယ်နေသော သွေးရောင်အလင်းတန်းမှာ လိမ်ကောက် ဆုတ်ဖြဲခံလိုက်ရကာ အစအနများအဖြစ် ပြောင်းလဲ၍ ပျောက်ကွယ်သွား၏။

ချိုးယွမ်ကျန်သည် သွေးရောင်အလင်းတန်းများကြားမှ ဓားချက်ကို ခုခံရန် အသည်းအသန် ကြိုးစားခဲ့သော်လည်း သူ၏ ယွမ်စွမ်းအင်များ ပြိုကွဲပျက်စီးသွားပြီး ဓားသွားက သူ့ထံသို့ တဖြည်းဖြည်း နီးကပ်လာသည်ကို အချည်းနှီး ကြည့်နေရုံသာ တတ်နိုင်တော့သည်။

"ပွင့်စမ်း..."

ချိုးယွမ်ကျန်၏ လက်ထဲရှိ ဝိညာဉ်ဓားက ပြင်းထန်စွာ တုန်ခါသွားပြီး စူးရှသော အလင်းတန်းတစ်ခု ပေါက်ကွဲထွက်လာသော်လည်း ဤအလင်းတန်းမှာ ချန်ယွမ် ဓား၏ လွှမ်းမိုးဖိနှိပ်မှုကို ချက်ချင်းပင် ခံလိုက်ရသည်။

"ဘုန်း..."

နားကွဲမတတ် ပေါက်ကွဲသံကြီးက ကောင်းကင်ယံသို့ ထွက်ပေါ်လာသည်။ ချိုးယွမ်ကျန်က သွေးမြူများ တစ်ပွက် အန်ထုတ်လိုက်ပြီး သူ၏ ခန္ဓာကိုယ်မှာ နောက်သို့ လွင့်ထွက်သွားကာ ဓားအစီအရင်နှင့် ဝင်ဆောင့်မိသွား၏။ ထို့နောက် အရှိန်ပြင်းပြင်းဖြင့် ပြန်ကန်ထွက်လာပြီး မြေပြင်ပေါ်သို့ ပြုတ်ကျသွားသည်။ သူ၏ မျက်နှာမှာ ပြာနှမ်းနေပြီး အသက်ငင်နေပြီ ဖြစ်၏။

ဓားတစ်ချက်က သူ၏ ကာကွယ်မှုများကို ဖျက်ဆီးပစ်ခဲ့ပြီး နောက်ထပ် ဓားတစ်ချက်က သူ့ကို သေလုမြောပါး ဖြစ်သွားစေသည်။ ချိုးယွမ်ကျန်မှာ ချန်ဖေး၏ ဓားချက် နှစ်ချက်ဖြင့် ဤအခြေအနေသို့ ရောက်ရှိသွားခြင်း ဖြစ်သည်။

ဒွာရသန့်စင်ခြင်း နောက်ဆုံးအဆင့်ရှိ ထိပ်တန်းပညာရှင် တစ်ဦးကို ရန်စမိမှသာ ဤသို့သော အခြေအနေမျိုး ရောက်ရှိနိုင်မည်ဟု ချိုးယွမ်ကျန်က အမြဲတမ်း ယုံကြည်ထားခဲ့သည်။ ဒွာရသန့်စင်ခြင်း နောက်ဆုံးအဆင့်‌

ရှိသော ဂိုဏ်းတစ်ခုမှ သိုင်းပညာရှင်တစ်ဦးနှင့် ဆုံတွေ့လျှင်ပင် အနိုင်အရှုံးကို ဆုံးဖြတ်ရန် တိုက်ခိုက်ရဦးမည် ဖြစ်သည်။

သို့သော် ယခု ချိုးယွမ်ကျန် နားလည်သွားသည်မှာ အစစ်အမှန် ပါရမီရှင်တစ်ဦးနှင့် ဆုံတွေ့သောအခါ အရာခပ်သိမ်းက အလွန် ခန့်မှန်းရခက်ပြီး ကံကြမ္မာသည်လည်း အလွန်ပင် ရက်စက်တတ်ကြောင်းပင် ဖြစ်၏။ ဒွာရသန့်စင်ခြင်း အလယ်အလတ်အဆင့် ဖြစ်သော်ငြားလည်း သူ ထွက်ပြေးချင်သည့်တိုင်အောင် ထွက်ပြေး၍ မရခဲ့ဘဲ ပြိုင်ဘက်၏ တိုက်ကွက် နှစ်ကွက်တည်းဖြင့် သေလုနီးပါး ဖြစ်သွားခဲ့ရသည်။

ချိုးယွမ်ကျန်က ခေါင်းကို အားယူမော့ကြည့်လိုက်ရာ ချန်ဖေးက သူ၏ အရှေ့တွင် ရပ်နေသည်ကို တွေ့လိုက်ရသည်။ ချန်ယွမ် ဓားက ပုံရိပ်ယောင်အဖြစ် ပြောင်းလဲသွားပြီး သူ၏ မျက်ခုံးနှစ်ခုကြားသို့ ထိုးစိုက်လာ၏။

"မဟာမိုးကြိုး ဓားသိုင်း အကြောင်းကို ကျွန်တော် သိတယ်... မဟာမိုးကြိုး ဓားသိုင်းက ဘယ်မှာရှိလဲဆိုတာ ကျွန်တော် သိတယ်..."

ချိုးယွမ်ကျန်က သူ၏ အင်အားအကုန်သုံး၍ ရူးသွပ်စွာ အော်ဟစ်လိုက်သည်။ စက္ကန့်အနည်းငယ်မျှ နောက်ကျသွားပါက သူ၏ ခေါင်းပြတ်သွားမည်ကို ကြောက်ရွံ့နေခြင်း ဖြစ်၏။

ချန်ယွမ် ဓား၏ ဓားဖျားက ချိုးယွမ်ကျန်၏ မျက်ခုံးနှစ်ခုကြားတွင် ရပ်တန့်သွားသည်။ ချန်ဖေးက ချိုးယွမ်ကျန်ကို ကြည့်လိုက်ပြီး သူ၏ မျက်ခုံးများ အနည်းငယ် တွန့်ကွေးသွား၏။

"မဟာမိုးကြိုး ဓားသိုင်းလား..."

သူ့အရှေ့ရှိ ဓားသွားကို ကြည့်ရင်း ချိုးယွမ်ကျန်က ဓားဖျားနှင့် ပေအနည်းငယ် ကွာဝေးသွားသည်အထိ နောက်သို့ အသည်းအသန် တွားသွားဆုတ်ခွာလိုက်ပြီးနောက် မြေပြင်ပေါ်သို့ အားပျော့စွာ လဲကျသွားသည်။

"မဟာမိုးကြိုး ဓားသိုင်း အကြောင်းက ဘာလဲ..."

ချန်ဖေးက ချိုးယွမ်ကျန်ကို ငုံ့ကြည့်ရင်း မေးလိုက်သည်။

ယွမ်ချန်ဓားဂိုဏ်းတွင် ကျင့်စဉ်များ ပြည့်စုံမှုမရှိခြင်းသည် နတ်တိမ်မြို့ တစ်ဝိုက်တွင် လျှို့ဝှက်ချက် တစ်ခုမဟုတ်ပေ။ ထို့ကြောင့် လေလွင့်ကျင့်ကြံသူ တစ်ဦးက ဤအကြောင်းကို သိနေခြင်းမှာ အံ့သြစရာ မဟုတ်ချေ။

အကယ်၍ ချိုးယွမ်ကျန်က အခြားအကြောင်းအရာများကို ပြောမည်ဆိုပါက ချန်ဖေးက လုံးဝ စိတ်ဝင်စားမည် မဟုတ်သော်လည်း ယွမ်ချန်ဓားဂိုဏ်း၏ ကျင့်စဉ်များမှာမူ အမှန်တကယ် ကွဲပြားခြားနားသည်။

ကျုံးယွမ် ဓားသိုင်းသည် ပြီးပြည့်စုံခြင်း အဆင့်သို့ ရောက်ရှိနေပြီ ဖြစ်ပြီး ဘီလူးဝိညာဉ် ဓားသိုင်းနှင့် ကောင်းကင် ရှောင်တိမ်းခြင်း ကိုယ်ဖော့ပညာတို့မှာလည်း ပြီးပြည့်စုံခြင်း အဆင့်သို့ ရောက်ရှိရန် အချိန်အနည်းငယ်သာ လိုတော့သည်။

မကြာသေးမီက ချန်ဖေးသည် ကျင့်စဉ်များနှင့် ပတ်သက်၍ အခါအားလျော်စွာ စဉ်းစားတွေးတောနေခဲ့သည်။

အကယ်၍ ဂိုဏ်းအတွင်းရှိ ကျင့်စဉ်များအားလုံးကို ဖြည့်စွက်နိုင်ပါက ချန်ဖေးသည် ကျင့်စဉ်များအတွက် လုံးဝ ပူပန်ရန်မလိုဘဲ ဒွာရသန့်စင်ခြင်း အထွတ်အထိပ်အဆင့်အထိ ချောမွေ့စွာ ကျင့်ကြံနိုင်မည် ဖြစ်သည်။

ထို့အပြင် ကျင့်စဉ်ခွဲ ခုနစ်ခု ပေါင်းစပ်ထားသော ယွမ်ချန် ဓားကျမ်းစာသည် နတ်တိမ်ဓားဂိုဏ်း၏ အထင်ကရ အမွေအနှစ် လက်နက်ထက်ပင် ပိုမို သာလွန်ကောင်း သာလွန်နိုင်ပေသည်။

ကံမကောင်းစွာဖြင့် ချန်ဖေး ဂိုဏ်းသို့ မရောက်လာမီကပင် ယွမ်ချန် ဓားကျမ်းစာမှာ ပျက်စီးနေခဲ့ပြီ ဖြစ်သည်။

ယခု မဟာမိုးကြိုး ဓားသိုင်း အကြောင်းကို ရုတ်တရက် ကြားလိုက်ရသဖြင့် ချန်ဖေးက သဘာဝကျစွာပင် ကြားလိုစိတ် ပြင်းပြသွား၏။ အကယ်၍ ချိုးယွမ်ကျန်က လိမ်ညာနေခြင်း ဖြစ်ပါကလည်း ဓားတစ်ချက် ခုတ်ပိုင်းလိုက်ရုံသာ ဖြစ်ပြီး မည်သည့်အရာမှ နှောင့်နှေးသွားမည် မဟုတ်ပေ။

"မကြာသေးခင်က လူတစ်ယောက် ခင်ဗျားတို့ ဂိုဏ်းရဲ့ ကျင့်စဉ်ကို သုံးသွားတာ ကျွန်တော် တွေ့လိုက်တယ်... အဲဒါက ဒဏ္ဍာရီထဲက မဟာမိုးကြိုး ဓားသိုင်းနဲ့ အတော်လေးကို ဆင်တူတယ်..."

ချိုးယွမ်ကျန်က သတိထား၍ ပြောလိုက်သည်။

ယခုအခိုက်အတန့်တွင် သူ အသက်ရှင်မည်လား၊ သေရမည်လား ဆိုသည်မှာ ချန်ဖေး၏ ဆန္ဒအပေါ်တွင်သာ လုံးဝ မူတည်နေသည်။ ချိုးယွမ်ကျန်က သူ၏ ခန္ဓာကိုယ်အတွင်းမှ အလွန်အမင်း နာကျင်မှုကို ဖိနှိပ်ထားပြီး အသက်ပြင်းပြင်းပင် မရှူရဲချေ။

"မဟာမိုးကြိုး ဓားသိုင်းကို ကျင့်ကြံပြီးရင် ဘယ်အဆင့်ကို ရောက်သွားလဲဆိုတာ မင်း သိလား..."

ချန်ဖေးက တိုးဖွဖွ ရယ်မောလိုက်သည်။ ထိုရယ်သံကို ချိုးယွမ်ကျန်က ကြက်သီးမွေးညင်း ထစေသော အသံအဖြစ် ခံစားလိုက်ရ၏။ ရှင်းလင်းစွာပင် ချန်ဖေးက ချိုးယွမ်ကျန်၏ စကားများကို လုံးလုံးလျားလျား မယုံကြည်ပေ။

ချိုးယွမ်ကျန်၏ နဖူးတွင် အေးစက်သော ချွေးများ ချက်ချင်း ဖုံးလွှမ်းသွားသည်။ ချန်ဖေး၏ ပိုမို အေးစက်လာသော အကြည့်ကို မြင်သောအခါ ချိုးယွမ်ကျန်မှာ ပို၍ပင် တုန်ယင်လာ၏။ တစ်ခဏမျှ တုံ့ဆိုင်းနေပြီးနောက် သူက တိုးညှင်းသော အသံဖြင့် ပြောလိုက်သည်။

"သူက ကျွန်တော့်ရဲ့ အရင်းနှီးဆုံး သူငယ်ချင်းပါ... သူက မဟာမိုးကြိုး ဓားသိုင်းကို ရရှိသွားခဲ့တာပါ..."

ချိုးယွမ်ကျန်က ချန်ဖေးကို လှမ်းကြည့်လိုက်ပြီး ချန်ဖေး၏ အမူအရာ ပြောင်းလဲမသွားသည်ကို မြင်သောအခါ အလျင်အမြန် ဆက်ပြောလိုက်၏။

"ပြီးပြည့်စုံတဲ့ မဟာမိုးကြိုး ဓားသိုင်းက ဒွာရ ရှစ်ဆယ့်ငါးခု ပွင့်တဲ့အထိ ကျင့်ကြံလို့ ရပါတယ်..."

ချန်ဖေး၏ မျက်ခုံးများက အလိုအလျောက် တွန့်ကွေးသွားသည်။ သူက တိုက်ခိုက်ရန် ပြင်ဆင်နေခဲ့ပြီ ဖြစ်သော်လည်း သူ့ကိုယ်သူ ပြန်လည် ထိန်းချုပ်လိုက်၏။ အကြောင်းမှာ ချိုးယွမ်ကျန် ပြောသည်မှာ မှန်ကန်နေသောကြောင့် ဖြစ်သည်။

ယွမ်ချန်ဓားဂိုဏ်း၏ မှတ်တမ်းများအရ ပြီးပြည့်စုံသော မဟာမိုးကြိုး ဓားသိုင်းသည် အမှန်တကယ်ပင် ဒွာရ ၈၅ ခုကို ဖွင့်လှစ်နိုင်ပြီး ဤသည်က ကျုံးယွမ် ဓားသိုင်းနှင့် ဘီလူးဝိညာဉ် ဓားသိုင်းတို့ ဖွင့်လှစ်နိုင်သော ဒွာရများထက် ၅ ခု ပိုများသည်။

သို့သော် မဟာမိုးကြိုး ဓားသိုင်း၏ ကျင့်စဉ်သည် အပြင်ဘက်မှ လေလွင့်ကျင့်ကြံသူ တစ်ဦးလက်ထဲသို့ မည်သို့မည်ပုံ ရောက်ရှိသွားသနည်း။

ရုတ်တရက် ချန်ဖေး၏ ခေါင်းထဲတွင် အကြံဉာဏ် တစ်ခု လင်းလက်သွား၏။

လွန်ခဲ့သော နှစ်နှစ်အတွင်းက ချန်ဖေးသည် ကျင့်စဉ်ကို ပြန်လည်ပြုပြင်ရန်အတွက် ဂိုဏ်း၏ စာကြည့်တိုက်အတွင်းရှိ ရှေးဟောင်း စာအုပ်စာတမ်းများစွာကို ဖတ်ရှုခဲ့သည်။ ထိုစာအုပ်များအနက်မှ တစ်အုပ်တွင် မှတ်တမ်းတစ်ခုကို သူ တွေ့ရှိခဲ့သည်။

လွန်ခဲ့သော ရာစုနှစ်ပေါင်းများစွာက ယွမ်ချန်ဓားဂိုဏ်းတွင် ပြည်တွင်းရေး အရှုပ်အထွေးများ ဖြစ်ပွားခဲ့ပြီး ဂိုဏ်းခွဲ အချို့မှာ ပြင်းထန်စွာ တိုက်ခိုက်မှုများပင် ပြုလုပ်ခဲ့ကြသည်။ နောင်တွင် ဂိုဏ်းခွဲခေါင်းဆောင် အချို့က တပည့်များနှင့်အတူ ယွမ်ချန်ဓားဂိုဏ်းမှ ထွက်ခွာသွားခဲ့ကြသည်။

လူများ ထွက်ခွာသွားခဲ့သော်လည်း ဂိုဏ်းက ထိုဂိုဏ်းခွဲများ၏ ကျင့်စဉ် မိတ္တူများကို သိမ်းဆည်းထားခဲ့သည်။ နောင်တွင် ယွမ်ချန်ဓားဂိုဏ်းက ထွက်ခွာသွားသော ဂိုဏ်းခွဲများကို ပြန်လည် ရှာဖွေစေခဲ့သည်။

ချန်ဖေးက ဂိုဏ်း၏ သမိုင်းကြောင်းကို ပုံပြင်တစ်ပုဒ်ကဲ့သို့ သဘောထားခဲ့သည်။

အဘယ်ကြောင့်ဆိုသော် ရာစုနှစ်ပေါင်းများစွာ ကတည်းက ဖြစ်ပျက်ခဲ့သော အကြောင်းအရာများ ဖြစ်သောကြောင့်ပင်။ ဂိုဏ်း၏ မှတ်တမ်းများ ပျက်စီးသွားသောကြောင့် လျှို့ဝှက်ကျမ်းစာ အချို့ကို ပြန်လည်ရယူနိုင်ရန် မျှော်လင့်ချက်ဖြင့် ထွက်ခွာသွားသော ဂိုဏ်းခွဲများ၏ ကျန်ရစ်သူများကို ရှာဖွေရန် ကြိုးပမ်းခဲ့ဖူးသည်။

သို့သော် ထွက်ခွာသွားသော ဂိုဏ်းခွဲများသည် ယွမ်ချန်ဓားဂိုဏ်းထက်ပင် ပိုမို စောစီးစွာ ကျဆင်းသွားခဲ့ကြ၏။ မည်သည့်အချိန်က ပျောက်ကွယ်သွားခဲ့ကြောင်း မည်သူမျှ မသိကြဘဲ ရှာဖွေရန် နည်းလမ်းလည်း မရှိတော့ပေ။

ယခုမူ လေလွင့်ကျင့်ကြံသူများသည် ထွက်ခွာသွားသူများ ချန်ရစ်ခဲ့သော ကျင့်စဉ်များကို ရှာဖွေတွေ့ရှိခဲ့ကြပြီလော။ ဤသည်က လျှို့ဝှက်ကျမ်းစာ ဖြစ်နေမည်လား။

"ကျွန်တော် ပြောတာတွေ အားလုံးက အမှန်ပါ... ကျွန်တော် အရှင့်ကို ကျွန်တော့် သူငယ်ချင်းဆီ ခေါ်သွားပေးပါ့မယ်... အရှင် ကျွန်တော့် အသက်ကို ချမ်းသာပေးဖို့ပဲ တောင်းပန်ပါတယ်..."

ချိုးယွမ်ကျန်က တိုးညှင်းသော အသံဖြင့် တောင်းပန်လိုက်သည်။ အသက်ရှင်သန်ရန်အတွက် ချိုးယွမ်ကျန်သည် သူ၏ သူငယ်ချင်းကိုပင် ဂရုမစိုက်နိုင်တော့ပေ။

"မင်းကိုယ်မင်း အချုပ်အနှောင် ခံလိုက်..."

ချန်ဖေးက ချိုးယွမ်ကျန်ကို ကြည့်ရင်း ပြောလိုက်သည်။

"ဟုတ်ကဲ့ပါ..."

ချန်ဖေး၏ စကားကို ကြားသောအခါ ချိုးယွမ်ကျန်မှာ စိတ်သက်သာရာ ရသွား၏။ ဤသည်က သူ ချက်ချင်း သေရဦးမည် မဟုတ်ကြောင်း ဆိုလိုပေသည်။

ချိုးယွမ်ကျန်က အားယူ၍ မတ်တတ်ရပ်လိုက်ပြီး သူ၏ လက်ချောင်းများက ခန္ဓာကိုယ်ပေါ်ရှိ ဒွာရများကို ဖိနှိပ်လိုက်ရာ ယွမ်စွမ်းအင်များ စီးဆင်းမှု ရပ်တန့်သွားပြီး သူ၏ အသက်ရှူသံများမှာ ရပ်တန့်နေသော ရေကဲ့သို့ တောင့်တင်းသွားသည်။

ချန်ဖေးက ချိုးယွမ်ကျန်၏ အရှေ့သို့ ရောက်ရှိလာပြီး သူ၏ ညာလက်ကို ဓားလက်ညှိုးအဖြစ် ဖန်တီးကာ ချိုးယွမ်ကျန်၏ မျက်ခုံးနှစ်ခုကြားသို့ ထောက်လိုက်သည်။ ပြင်းထန်သော စိတ်စွမ်းအားတစ်ခုက ချိုးယွမ်ကျန်၏ ခန္ဓာကိုယ်တစ်ခုလုံးသို့ ချက်ချင်း လွှမ်းခြုံသွား၏။

"မင်းကိုယ်မင်း အချုပ်အနှောင် ခံမယ်ပြောပြီး ဉာဏ်များရဲသေးတယ်ပေါ့လေ..."

"အမှား..."

ဘုန်း...။

ချိုးယွမ်ကျန်၏ ခန္ဓာကိုယ်က အနည်းငယ် တုန်ခါသွားပြီး သူ၏ မျက်နှာမှာ နာကျင်မှုကြောင့် ရှုံ့မဲ့သွားသည်။

ယွမ်ချီစွမ်းအင်များမှ လှိုင်းဂယက်များ ထွက်ပေါ်လာပြီး လက်ညှိုးတစ်ချက်တည်းဖြင့် ချန်ဖေးက ချိုးယွမ်ကျန်၏ ဒွာရ ဆယ့်ငါးခုကို ဖောက်ခွဲပစ်လိုက်၏။ ချိုးယွမ်ကျန်၏ ကျင့်ကြံခြင်းအဆင့်မှာ ချက်ချင်း ကျဆင်းသွားပြီး ဒွာရသန့်စင်ခြင်း အစောပိုင်းအဆင့်သို့ ရောက်ရှိသွားသည်။

အခန်း (၃၃၇) နာကြည်းချက်

ချိုးယွမ်ကျန်၏ ခြေထောက်များ ခွေယိုင်သွားပြီး မြေပြင်ပေါ်သို့ ခေါင်းငိုက်စိုက်ကျကာ လဲကျသွားသည်။ ချန်ဖေး မမြင်နိုင်သည့် သူ့၏ မျက်ဝန်းအစုံ၌ နာကြည်းမှု၊ မကျေနပ်မှုများဖြင့် ပြည့်နှက်နေ၏။

ဒွာရ ဆယ့်ငါးခု ပျက်စီးသွားခြင်းသည် ကျင့်ကြံခြင်းအဆင့် ကျဆင်းသွားခြင်း သက်သက်မျှသာ မဟုတ်ပေ။

အကြီးမားဆုံး ပြဿနာမှာ ဤဒွာရများကို မည်သို့ ပြန်လည်ပြုပြင်၍ ကျင့်ကြံခြင်းကို မည်သို့ ပြန်လည်ရယူမည်နည်း ဆိုသည်ပင် ဖြစ်သည်။

ဤဒွာရများကို ပြန်လည်ပြုပြင်ပေးမည့် ကျင့်ကြံသူ တစ်ဦး မရှိပါက ချိုးယွမ်ကျန်၏ ကျင့်ကြံခြင်းအဆင့်သည် သူ၏ တစ်သက်တာလုံး ဒွာရသန့်စင်ခြင်း အစောပိုင်းအဆင့်တွင်သာ ရှိနေမည် ဖြစ်သည်။

ဒွာရသန့်စင်ခြင်း အလယ်အလတ်အဆင့်သို့ မနည်း ရောက်ရှိခဲ့ရပြီးမှ ယခုကဲ့သို့ ရုတ်တရက် အဆင့်ကျဆင်းသွားရခြင်းက ချိုးယွမ်ကျန်အတွက် နာကြည်းမှုနှင့် မကျေနပ်မှုများကို ဖြစ်ပေါ်စေမည်မှာ အသေအချာပင်။

"ဒါ ပထမဆုံးအကြိမ်ပဲ... နောက်တစ်ကြိမ်ဆိုရင်တော့ ရိုးရိုးရှင်းရှင်း ဒွာရကိုဖျက်စီးတာလောက်နဲ့ ပြီးမှာ မဟုတ်ဘူး..."

ချန်ဖေးက အသံဩဩဖြင့် ပြောလိုက်၏။

ချန်ဖေး၏ စိတ်စွမ်းအားသည် ချိုးယွမ်ကျန်ထက် များစွာ သာလွန်သည့်အပြင် သူသည် အနုစိတ်လှသော ဝိညာဉ်ကြိုးမျှင် ကျင့်စဉ်ကိုလည်း ပိုင်ဆိုင်ထားသည်။ ချိုးယွမ်ကျန်၏ သိုသိုသိပ်သိပ် လုပ်ဆောင်ထားသည်ဆိုသော လှည့်ကွက်များမှာ ချန်ဖေး၏ အရှေ့တွင် ဖုံးကွယ်ထားရန်ပင် မထိုက်တန်ဘဲ ချက်ချင်း ရှာဖွေတွေ့ရှိသွားခဲ့သည်။

ဤဒွာရသန့်စင်ခြင်း အလယ်အလတ်အဆင့်ရှိ လေလွင့်ကျင့်ကြံသူများကို အညံ့ခံလာစေရန် အလွန် ခက်ခဲလှသည်။ ပြင်းထန်သော အစီအမံများကို သုံးမှသာ အလုပ်ဖြစ်မည် ဖြစ်၏။

"နားလည်ပါပြီ..."

ချိုးယွမ်ကျန်က ခေါင်းငုံ့လျက် ပြောလိုက်သည်။

"မင်း ဒီမှာ ခဏနေခဲ့... ငါ ပြန်လာခဲ့မယ်..."

ချန်ဖေးက သူ၏ ညာဖက်ခြေထောက်ဖြင့် မြေပြင်ကို ဖွဖွလေး နင်းလိုက်ရာ အစီအရင်တစ်ခု ထွက်ပေါ်လာပြီး ချိုးယွမ်ကျန်နှင့် ချိတ်ဆက်သွားကာ ချိုးယွမ်ကျန်ကို ထိုနေရာတွင်ပင် အချုပ်အနှောင် ပြုလုပ်လိုက်သည်။

နဂါးဆင် အစီအရင်သည် အစီအရင် ပစ္စည်းကိရိယာများ မလိုအပ်ဘဲ လွယ်ကူစွာ တည်ဆောက်နိုင်သည်။ စွမ်းအားမှာ မပြင်းထန်သော်လည်း လက်ရှိ အခြေအနေအတွက်မူ လုံလောက်နေပြီ ဖြစ်၏။

ချိုးယွမ်ကျန်၏ အသိစိတ်ပင်လယ်နှင့် ပတ်သက်၍မူ ချန်ဖေးက မည်သည့် အမှတ်အသားမှ အထူးတလည် ချန်ရစ်မထားခဲ့ပေ။ မိစ္ဆာသားရဲများနှင့် နှိုင်းယှဉ်ပါက သိုင်းပညာရှင်များ၏ စိတ်စွမ်းအားသည် ယုံမှားသံသယမရှိ ပိုမို တက်ကြွလှုပ်ရှားသည်။

အကယ်၍ ချန်ဖေးက ချိုးယွမ်ကျန်၏ အသိစိတ်ပင်လယ်အတွင်း၌ နတ်ဘုရား သတ်ဖြတ်ခြင်းဓား၏ ဓားအမှတ်အသားကို ချန်ရစ်ထားခဲ့ပါက ချိုးယွမ်ကျန်သည် ဖြည်းဖြည်းချင်း ဖျက်ဆီးပစ်နိုင်ပေသည်။ မည်သို့ပင်ဖြစ်စေ အခြေခံအားဖြင့် နှစ်ဦးစလုံးသည် ဒွာရသန့်စင်ခြင်း အလယ်အလတ်အဆင့် ဖြစ်သောကြောင့် အဆင့်တူများသာ ဖြစ်ကြ၏။

ချန်ဖေး၏ စိတ်စွမ်းအားသည် ချိုးယွမ်ကျန်ထက် ပိုမို အားကောင်းသော်လည်း လုံးဝ လွှမ်းမိုးထားနိုင်ခြင်းတော့ မရှိချေ။ ထို့အပြင် အခြားသူ၏ အသိစိတ်ပင်လယ်အတွင်း မိမိ၏ စိတ်စွမ်းအားကို သတိလက်လွတ် ချန်ရစ်ထားခဲ့ခြင်းက အခြားသော အန္တရာယ်များကိုလည်း ဖြစ်ပေါ်စေနိုင်သည်။

"ဟုတ်ကဲ့ပါ..."

ချိုးယွမ်ကျန်က ခေါင်းညိတ်ပြလိုက်သည်။

ချန်ဖေးက ချိုးယွမ်ကျန်ကို တစ်ချက်ကြည့်လိုက်ပြီး သူ၏ ညာလက်ကို အနည်းငယ် လှုပ်ရှားကာ ချိုးယွမ်ကျန်၏ ကိုယ်ပေါ်ရှိ ဝိညာဉ်ဓား အပါအဝင် အရာအားလုံးကို ယူဆောင်လိုက်သည်။

ထို့နောက် ချန်ဖေးက လျင်မြန်စွာ ရွေ့လျား၍ ယွမ်ချန်ဓားဂိုဏ်းရှိရာသို့ ဦးတည်ထွက်ခွာသွား၏။ လမ်းတစ်ဝက်တွင် သူက ထိုပစ္စည်းများကို အာကာသ အကွက်အတွင်းသို့ ပစ်ထည့်လိုက်သည်။

ဂိုဏ်းနှင့် ဆယ်မိုင်ခန့်အကွာသို့ ရောက်သောအခါ ချန်ဖေးက အဝေးမှ ဖုန်းရှိုးဖူနှင့် သူ၏ အဖွဲ့ကို လှမ်းမြင်လိုက်ရသည်။

ချန်ဖေးက သူ၏ တည်ရှိမှုကို ဖုံးကွယ်ရန် မကြိုးစားခဲ့သဖြင့် ဖုန်းရှိုးဖူနှင့် အခြားသူများက သူ လာနေသည်ကို အလျင်အမြန် သတိပြုမိသွားကြပြီး ခြေလှမ်းများကို ရပ်တန့်လိုက်ကြသည်။

"ဟိုလူရော ဘယ်မှာလဲ..."

ချန်ဖေး အထိအခိုက်မရှိ ပြန်လာသည်ကို မြင်သောအခါ ကန်းယန်လင်က အံ့ဩတကြီး မေးလိုက်သည်။

အစောပိုင်းက ဖုန်းရှိုးဖူက သူတို့ကို ဦးဆောင်၍ အရင် ထွက်ပြေးခဲ့စဉ်က ကန်းယန်လင်၏ စိတ်ထဲတွင် သံသယများ ပြည့်နှက်နေခဲ့၏။ ချန်ဖေးသည် မည်မျှပင် ပါရမီပါစေကာမူ သူသည် နောက်ဆုံးတွင် အလွန် ငယ်ရွယ်လွန်းသေးသည်။

ဒွာရသန့်စင်ခြင်း အဆင့်သို့ ရောက်ရှိနေသည်မှာ နှစ်ပေါင်းများစွာ မကြာသေးသည်မှာ သေချာသည်။

ဤအခြေအနေမျိုးတွင် ချိုးယွမ်ကျန်ကို တားဆီးရန် တစ်ယောက်ယောက် ကျန်ရစ်ခဲ့ရမည်ဟု ချန်ဖေးက အကြံပြုသောအခါ ဖုန်းရှိုးဖူက အမှန်တကယ်ပင် သဘောတူခဲ့သည်။ ထိုအချိန်က ကန်းယန်လင်မှာ မေးမြန်းရန် အချိန်မရခဲ့ပေ။

ယခု ချန်ဖေးက လုံးဝ အထိအခိုက်မရှိ ပြန်လာပြီး ချိုးယွမ်ကျန်ကလည်း လိုက်မလာသည်ကို မြင်သောအခါ ကန်းယန်လင်၏ သံသယများက ပို၍ ကြီးမားလာ၏။ အတိအကျ ဘာတွေ ဖြစ်ခဲ့တာလဲ။

"ကျွန်တော် သူ့ကို ခဏလောက် တားထားပြီး အခွင့်အရေးရတုန်း ထွက်ပြေးလာတာပါ..."

ချန်ဖေး ပြောနေစဉ်မှာပင် သူ၏ ခန္ဓာကိုယ်အတွင်းမှ ပုံရိပ်ယောင်တစ်ခု ထွက်ပေါ်လာပြီး တဖြည်းဖြည်း ချန်ဖေး၏ ပုံသဏ္ဌာန်အဖြစ် ပြောင်းလဲသွားသည်။ ထို့နောက် ချန်ဖေးကို နှစ်ပတ်ခန့် ပတ်၍ ချန်ဖေး၏ ခန္ဓာကိုယ်အတွင်းသို့ ပြန်လည် ဝင်ရောက်သွား၏။

ကန်းယွင်ဖေးက ချန်ဖေးကို မျက်လုံးပြူး၍ ကြည့်နေမိသည်။ ဤသည်က မည်သို့သော ကျင့်စဉ်မျိုးနည်း။ ထိုတစ္ဆေသဖွယ် ပုံရိပ်ယောင်၏ အရှိန်အဝါသည် ချန်ဖေးနှင့် လုံးဝ ထပ်တူကျနေ၏။ အကယ်၍ သူသာ ကိုယ်တိုင် မျက်မြင်မတွေ့ခဲ့ရပါက အစစ်အမှန် လူတစ်ယောက်ဟုပင် ထင်မှတ်သွားမိပေလိမ့်မည်။

"ကောင်းကင် ရှောင်တိမ်းခြင်း ကိုယ်ဖော့ပညာလား..."

ယွမ်ချန်ဓားဂိုဏ်း၏ ဤကျင့်စဉ်သည် ဂိုဏ်းသားတိုင်းအတွက် မရှိမဖြစ် လိုအပ်သော ဒွာရသန့်စင်ခြင်းအဆင့် ကျွမ်းကျင်မှု တစ်ခုဖြစ်ကြောင်း ကန်းယန်လင် သိထား၏။ သို့သော် ချန်ဖေး ယခုလေးတင် ပြသသွားသော ကျင့်စဉ်မှာ အလွန်ကောင်းမွန်လွန်းနေသည်။

"ကျွန်တော် ကောင်းကင် ရှောင်တိမ်းခြင်း ကိုယ်ဖော့ပညာမှာ နည်းနည်း တိုးတက်လာခဲ့လို့ပါ... သူ ကျွန်တော့်ကို မဖမ်းနိုင်တော့ လက်လျှော့သွားတာနေမှာပါ..."

ချန်ဖေးက ပြုံး၍ ပြောလိုက်သည်။

"မင်း သင်ယူထားတဲ့ အရာလား..."

ကန်းယန်လင်၏ မျက်ခုံးများက အနည်းငယ် တွန့်ကွေးသွားသည်။ ဤကျင့်စဉ်သည် ကံကောင်း၍ တတ်မြောက်သွားခြင်း သက်သက်သာ ဖြစ်နေမည်လား။

ကန်းယန်လင်က ဖုန်းရှိုးဖူကို ကြည့်လိုက်ရာ ဖုန်းရှိုးဖူ၏ အမူအရာမှာ တည်ငြိမ်နေပြီး ဤအခြေအနေကို မျှော်လင့်ထားပြီးသား ဖြစ်ပုံရသည်။

ဖုန်းရှိုးဖူက မျှော်လင့်ထားပြီးသား ဖြစ်သော်လည်း ဤအခိုက်အတန့်တွင် သူ၏ စိတ်ထဲ၌မူ ဤမျှ တည်ငြိမ်နေခြင်း မဟုတ်ပေ။

ဖုန်းရှိုးဖူသည် ချန်ဖေး၏ တိုက်ခိုက်ရေး စွမ်းရည်များကို တစ်ကြိမ် မြင်ဖူးခဲ့သော်လည်း ဒွာရသန့်စင်ခြင်း အလယ်အလတ်အဆင့်ကို ရင်ဆိုင်ရချိန်တွင် ချန်ဖေးက အထိအခိုက်မရှိ လွတ်မြောက်လာနိုင်လိမ့်မည်ဟု ဘယ်သောအခါမှ မထင်မှတ်ထားခဲ့ပေ။

ချန်ဖေး ဤမျှ တိုးတက်လာကြောင်းကို သူ ကြိုသိခဲ့မည်ဆိုပါက အစောပိုင်းက ထိုမျှ စိုးရိမ်နေမည် မဟုတ်ချေ။

ကောလင်းရှန်းက အနောက်မှနေ၍ ချန်ဖေးကို လေးစားအားကျစွာ ကြည့်နေမိသည်။ ကောလင်းရှန်း ကြားခဲ့ရသော ချန်ဖေးနှင့် ပတ်သက်သည့် နောက်ဆုံးသတင်းမှာ ချန်ဖေးက နတ်တိမ်ဓားဂိုဏ်းမှ ရှန်းထူချန်ကို အနိုင်ယူခဲ့ခြင်း ဖြစ်သည်။

ထိုအချိန်က ကောလင်းရှန်းက ချန်ဖေးသည် ဒွာရသန့်စင်ခြင်း အဆင့်သို့ တက်လှမ်းပြီးနောက်တွင်ပင် သူ၏ ပါရမီများက လျော့ကျမသွားကြောင်း တွေးထင်ခဲ့မိသည်။ နတ်တိမ်ဓားဂိုဏ်းမှ ခေတ်ပြိုင် တပည့်များပင်လျှင် ချန်ဖေးကို မကျော်လွန်နိုင်ခဲ့ပေ။

ယခု ပြန်လည် စဉ်းစားကြည့်သောအခါ သူ၏ ပါရမီများ လျော့ကျမသွားရုံသာမက လုံးလုံးလျားလျား လျှော့တွက်ခံထားရခြင်း ဖြစ်ကြောင်း သိလိုက်ရသည်။ အကယ်၍ ရှန်းထူချန်သာ ဒွာရသန့်စင်ခြင်း အလယ်အလတ်အဆင့်ကို ရင်ဆိုင်ရပါက ထွက်ပြေးရန် အခွင့်အရေးပင် မရလိုက်ဘဲ နေရာမှာတင် ရိုက်သတ်ခံရမည်မှာ သေချာသည်။

"ဂိုဏ်းကို အရင်ပြန်ကြတာပေါ့..."

ဖုန်းရှိုးဖူက ပြုံး၍ ပြောလိုက်၏။

"ဟုတ်ပါတယ်... ဟုတ်ပါတယ်... အရင် ပြန်ကြတာပေါ့..."

ကန်းယန်လင်က ခေါင်းညိတ်လိုက်သည်။

ချိုးယွမ်ကျန်မှာ ယာယီ ဆုတ်ခွာသွားပြီ ဖြစ်သော်လည်း သူက ရုတ်တရက် ပြန်လည်ပေါ်လာမည်လား ဆိုသည်ကို ပြောရခက်ပေသည်။

မိမိထက် အစွမ်းထက်ပြီး မိမိကို စောင့်ကြည့်နေသူ တစ်ဦးကို ရင်ဆိုင်ရချိန်တွင် ကန်းယန်လင်မှာ အနည်းငယ်မျှပင် ပေါ့ဆရဲခြင်း မရှိပေ။

မည်သို့ပင်ဆိုစေကာမူ သူ တစ်ယောက်တည်း မဟုတ်ပေ။ အကယ်၍ သူ တစ်ယောက်တည်းသာ ဖြစ်ပါက သေသွားရုံသာ ဖြစ်၏။ သို့သော် သူ၏ ဘေးတွင် ဇနီးနှင့် သားသမီးများ ရှိနေပြီး ကန်းယန်လင်က သူ၏ တာဝန်များကို ထမ်းဆောင်ရမည် ဖြစ်သည်။

ခဏအကြာတွင် သူတို့အဖွဲ့သည် ယွမ်ချန်ဓားဂိုဏ်း၏ ဂိတ်တံခါးများဆီသို့ ပြန်လည်ရောက်ရှိလာကြသည်။ ကန်းယန်လင်၏ ဇနီးနှင့် သားသမီးများကို နေရာချပေးပြီးနောက် ဖုန်းရှိုးဖူက ကန်းယန်လင်ကို ဂိုဏ်းချုပ် ချွီချင်းရှန်းနှင့် တွေ့ဆုံရန် ခေါ်ဆောင်သွား၏။

ချန်ဖေးက ဘေးတွင်ရပ်၍ ကန်းယန်လင်က ယွမ်ချန်ဓားဂိုဏ်း၏ ဧည့်သည်တော် အကြီးအကဲ တစ်ဦး ဖြစ်လာသည့် လုပ်ငန်းစဉ်ကို စောင့်ကြည့်နေခဲ့သည်။

ယွမ်ချန်ဓားဂိုဏ်းတွင် ဧည့်သည်တော် အကြီးအကဲများ မဝင်ရောက်လာသည်မှာ ကြာပြီဖြစ်သည်။ အကြောင်းရင်းမှာ ရိုးရှင်းလှ၏။ သူတို့သည် ဒွာရသန့်စင်ခြင်းအဆင့် ပညာရှင်များကို ဆွဲဆောင်ရန်အတွက် ကောင်းမွန်သော အခြေအနေများ မပေးစွမ်းနိုင်သောကြောင့် ဖြစ်သည်။

အကယ်၍ လေလွင့်ကျင့်ကြံသူများက ဧည့်သည်တော် အကြီးအကဲများ ဖြစ်လာရန် စိတ်ဝင်စားပါက ပထမဆုံး ရွေးချယ်မှုမှာ နတ်တိမ်ဓားဂိုဏ်းသာ ဖြစ်မည်မှာ သေချာသည်။ အဘယ်ကြောင့်ဆိုသော် နတ်တိမ်ဓားဂိုဏ်း၏ ကျင့်စဉ်များနှင့် လစဉ် အရင်းအမြစ်များသည် အခြားသော ဂိုဏ်းများထက် များစွာ သာလွန်သောကြောင့် ဖြစ်၏။

အကယ်၍ ထိုသို့သာ ဖြစ်ပါက ယွမ်ချန်ဓားဂိုဏ်းကို အဘယ်ကြောင့် ရွေးချယ်မည်နည်း။

ထို့ကြောင့် ချွီချင်းရှန်းသည် ကန်းယန်လင် ရောက်ရှိလာခြင်းအတွက် အလွန် ဝမ်းသာနေခဲ့သည်။ ဤသည်က ဂိုဏ်း၏ အင်အား ထပ်မံ တိုးတက်လာခြင်းကို ဆိုလိုသောကြောင့် ဖြစ်၏။

မည်သို့ပင်ဆိုစေကာမူ မကြာသေးမီက ယွမ်ချန်ဓားဂိုဏ်းသည် လျှို့ဝှက်နယ်မြေ ခရီးစဉ်ကြောင့် ဒွာရသန့်စင်ခြင်းအဆင့် အကြီးအကဲ သုံးဦး ဆုံးရှုံးခဲ့ရပြီး ချွီချင်းရှန်းကို အလွန် စိတ်ပူပန်စေခဲ့သည်။

နာရီဝက်ခန့် အကြာတွင် ဖုန်းရှိုးဖူက ကန်းယန်လင်နှင့်အတူ ထွက်ခွာသွားပြီး ချန်ဖေးက ကျန်ရစ်ခဲ့သည်။ "ဂိုဏ်းချုပ်... ကျွန်တော် ဂိုဏ်းကနေ ခဏလောက် ထွက်သွားဖို့ လိုတယ်..."

ချန်ဖေးက ချွီချင်းရှန်းကို ကြည့်၍ ပြောလိုက်၏။

ချန်ဖေးသည် လက်ရှိတွင် ဂိုဏ်းအတွင်းရှိ လေညင်းနားဆင် ခန်းမ၏ ခေါင်းဆောင် ဖြစ်သည်။ လေညင်းနားဆင် ခန်းမမှာ အမည်ခံသာ ရှိသော်လည်း ချန်ဖေးသည် ဂိုဏ်းအတွင်းရှိ ဒွာရသန့်စင်ခြင်းအဆင့် ပညာရှင် တစ်ဦး ဖြစ်နေဆဲပင်။ သူက များသောအားဖြင့် နတ်တိမ်မြို့တွင်သာ နေထိုင်သဖြင့် သဘာဝကျစွာပင် သတင်းပေးပို့နေရန် မလိုအပ်ပေ။

သို့သော် ခရီးဝေး သွားမည်ဆိုပါက ကြိုတင် အသိပေးရန် အရေးကြီးသည်။ အထူးသဖြင့် လက်ရှိ တင်းမာနေသော အခြေအနေမျိုးတွင် ဂိုဏ်းအနေဖြင့် ဒွာရသန့်စင်ခြင်းအဆင့် ပညာရှင် တစ်ဦးချင်းစီ၏ ပုံမှန် တည်နေရာများကို သိရှိထားရန် လိုအပ်သည်။

"ဘယ်လောက်လောက် ကြာမလဲ..."

ချွီချင်းရှန်းက အသေးစိတ် မမေးမြန်းပေ။ လူတိုင်းတွင် ကိုယ်ပိုင် ကိစ္စများ ရှိကြပြီး အထက်လူကြီးကို အရာအားလုံး ပြောပြရန် မဖြစ်နိုင်ပေ။

"ဆယ်ရက်ကနေ တစ်လလောက်အထိ ကြာနိုင်ပါတယ်..."

ချန်ဖေးက တစ်ခဏမျှ စဉ်းစားပြီး ပြန်ဖြေလိုက်၏။

"ကောင်းပြီ... အပြင်ရောက်ရင် သတိထားသွား..."

ချွီချင်းရှန်းက ခေါင်းညိတ်၍ အကြံပေးစကား ပြောကြားလိုက်သည်။

"ဟုတ်ကဲ့ပါ..."

"ဒါနဲ့... ယွမ်ချန် ဓားကျမ်းစာ ကျင့်ကြံတာရော ဘယ်လိုနေလဲ..."

ချန်ဖေးက အရိုအသေပေး၍ ထွက်ခွာတော့မည့် အချိန်တွင် ချွီချင်းရှန်းက ရုတ်တရက် မေးလိုက်သည်။

ချန်ဖေးက ယွမ်ချန် ဓားကျမ်းစာကို ပြန်လည်ရယူခဲ့သည်မှာ တစ်နှစ်နီးပါး ရှိနေပြီ ဖြစ်သည်။ ချွီချင်းရှန်း၏ ကျင့်ကြံခြင်း အမြန်နှုန်းမှာ အတော်လေး ကောင်းမွန်၏။

မည်သို့ပင်ဆိုစေကာမူ သူသည် ဒွာရသန့်စင်ခြင်း နောက်ဆုံးအဆင့်ရှိ အစွမ်းထက် ပညာရှင် တစ်ဦး ဖြစ်သည်။ စိတ်စွမ်းအားဖြစ်စေ၊ သိုင်းပညာ အတွေ့အကြုံဖြစ်စေ သူသည် သာမန် ဒွာရသန့်စင်ခြင်းအဆင့်များထက် များစွာ သာလွန်သည်။

ချန်ဖေး၏ အမြဲတမ်း ပြသနေကျ ပါရမီများအရ သူ၏ ကျင့်ကြံခြင်း အမြန်နှုန်းမှာ အမှန်တကယ်ပင် အံ့မခန်း ဖြစ်နေမည်ကို ချွီချင်းရှန်းက စူးစမ်းချင်နေရုံသာ ဖြစ်၏။

ထို့အပြင် ချွီချင်းရှန်းက ကျင့်ကြံခြင်းနှင့် ပတ်သက်၍ ချန်ဖေး၏ မေးခွန်းများကို ဖြေကြားပေးနိုင်သည်။

ဂိုဏ်းအတွင်းရှိ အကြီးအကဲများစွာသည် ယခုအခါ ယွမ်ချန် ဓားကျမ်းစာကိုလည်း လေ့လာနေကြပြီ ဖြစ်သည်။ အများစုမှာ အဓိက ကျင့်စဉ်ကိုပင် မကျွမ်းကျင်ကြသေးသော်လည်း အကယ်၍ သူတို့သာ ယွမ်ချန် ဓားကျမ်းစာ၏ ဒုတိယအဆင့်ကို သင်ယူနိုင်ပြီး အခြား ကျင့်စဉ်တစ်ခုကိုပါ လေ့လာနိုင်ပါက တိုက်ခိုက်ရေးစွမ်းအားမှာ သိသိသာသာ တိုးတက်လာမည် ဖြစ်သည်။

ထို့ကြောင့် အကြီးအကဲများစွာက ယွမ်ချန် ဓားကျမ်းစာနှင့် ပတ်သက်၍ မေးခွန်းများ ရှိပါက ချွီချင်းရှန်းထံသို့ လာရောက်လေ့ရှိပြီး ချွီချင်းရှန်းကလည်း သူတို့ကို တတ်နိုင်သမျှ လမ်းညွှန်မှုများ ပေးလေ့ရှိသည်။

"အခြေအနေတွေက အတော်လေး ချောချောမွေ့မွေ့ ရှိပါတယ်..."

ချန်ဖေးက တစ်ခဏမျှ စဉ်းစားပြီးနောက် လွန်ခဲ့သော လအနည်းငယ်ကပင် ယွမ်ချန် ဓားကျမ်းစာ၏ ဒုတိယအဆင့် ကျင့်ကြံမှုကို ပြီးပြည့်စုံခြင်း အဆင့်ထိ အောင်မြင်ခဲ့ကြောင်း မပြောပြတော့ဘဲ ပြန်ဖြေလိုက်၏။

"အင်း... မင်းမှာ မေးစရာရှိရင် ငါ့ကို လာမေးလို့ ရတယ်... ပြီးတော့ ဘီလူးဝိညာဉ် ဓားသိုင်း ကျင့်ကြံတဲ့နေရာမှာ အခက်အခဲရှိရင်လည်း တခြား အကြီးအကဲတွေကို သွားမေးလို့ ရတယ်..."

ချွီချင်းရှန်းက ပြုံး၍ မည်သည့် သံသယမှ မရှိဘဲ ပြောလိုက်သည်။

တစ်ချိန်တည်းတွင် ကျင့်စဉ်များစွာကို သင်ယူခြင်းသည် သိုင်းပညာရှင် တစ်ဦး၏ နားလည်သဘောပေါက်နိုင်စွမ်းနှင့် စွမ်းအင်အတွက် ကြီးမားသော စမ်းသပ်မှု တစ်ခုဖြစ်သည်။

လွန်ခဲ့သော အချိန်များစွာက ယွမ်ချန်ဓားဂိုဏ်းတွင် ယွမ်ချန် ဓားကျမ်းစာ ဟူသော ကျင့်စဉ် တစ်ခုတည်းသာ ရှိခဲ့ပြီး ကျင့်စဉ် ခုနစ်ခုအဖြစ် ခွဲခြားထားခြင်း မရှိခဲ့ပေ။ သို့သော် နောင်တွင် ဂိုဏ်းက ယွမ်ချန် ဓားကျမ်းစာသည် ကျွမ်းကျင်ရန် အလွန် ခက်ခဲလွန်းကြောင်းနှင့် လူအများစုမှာ လေ့ကျင့်ရာတွင် အလွန်တရာ တိုးတက်မှု နှေးကွေးကြောင်း တွေ့ရှိခဲ့ရသည်။

ပင်မ တောင်ထွတ်၏ အာဏာကို သေချာစေရန်အတွက် ယွမ်ချန် ဓားကျမ်းစာကို ကျင့်စဉ် ခုနစ်ခုအဖြစ် ခွဲထုတ်လိုက်ခြင်း ဖြစ်သည်။ ကျင့်စဉ်များ၏ စွမ်းအား လျော့ကျသွားသော်လည်း လေ့ကျင့်ရသည့် အခက်အခဲမှာလည်း လျော့နည်းသွားသည်။

အကယ်၍ လူတစ်ဦးတွင် လုံလောက်သော ပါရမီများ ရှိပါက အခြားသော ကျင့်စဉ်များကို ကျင့်ကြံနိုင်ပြီး တစ်ခုချင်းစီကို သန့်စင်နိုင်သည်။ ဤချဉ်းကပ်မှုက ယွမ်ချန်ဓားဂိုဏ်းကို တဖြည်းဖြည်း ကြီးပွားတိုးတက်လာစေခဲ့ပြီး နောက်ဆုံးတွင် ဂိုဏ်းကို ပျက်သုဉ်းလုနီးပါး ဖြစ်စေခဲ့သော ကပ်ဘေးကြီးနှင့် ဆုံတွေ့ခဲ့ရခြင်း ဖြစ်သည်။

"ဂိုဏ်းချုပ်ရဲ့ ဂရုစိုက်မှုအတွက် ကျေးဇူးတင်ပါတယ်..."

ချန်ဖေးက အနည်းငယ် ပြုံး၍ လက်ယှက် ဂါရဝပြုနှုတ်ဆက်ကာ ထွက်ခွာသွား၏။ ချွီချင်းရှန်းက ချန်ဖေး ထွက်ခွာသွားသော ကျောပြင်ကို အနည်းငယ် ပြုံး၍ ကြည့်နေခဲ့သည်။ ချွီချင်းရှန်း၏ အမြင်တွင် ချန်ဖေးသည် အနာဂတ်၌ ယွမ်ချန်ဓားဂိုဏ်း၏ မဏ္ဍိုင်ကြီး တစ်ခု ဖြစ်လာမည်မှာ သေချာပေသည်။

ဆယ်စုနှစ်များစွာ ကြာနိုင်သော်လည်း ဤသည်က ဒွာရသန့်စင်ခြင်း အဆင့်တိုင်းအတွက် မရှိမဖြစ် လိုအပ်သော ကျင့်ကြံမှု ကာလတစ်ခု ဖြစ်ပြီး အလျင်စလို လုပ်၍မရပေ။

ဆယ်မိုင်ပေါင်းများစွာ အကွာတွင်။

မြေပြင်ပေါ်၌ မလှုပ်မယှက် ထိုင်နေသော ချိုးယွမ်ကျန်သည် ခေါင်းကို တဖြည်းဖြည်း မော့လာခဲ့သည်။ ချန်ဖေး အမှန်တကယ် ထွက်သွားပြီ ဖြစ်ကြောင်း သေချာစေရန် ပတ်ဝန်းကျင်ကို ဝေ့ကြည့်လိုက်ပြီးနောက် သူ၏ မျက်လုံးများထဲတွင် ဖုံးကွယ်ထားသော နာကြည်းချက်များက နောက်ဆုံးတွင် ပေါ်ထွက်လာတော့သည်။

ပင်ပန်းဆင်းရဲစွာ ကျင့်ကြံခဲ့ရသော အဆင့်သည် တစ်ခဏအတွင်းမှာပင် ပျက်စီးသွားခဲ့ပြီ ဖြစ်သည်။ ယခု သူသည် ပြင်းထန်စွာ ဒဏ်ရာရနေပြီး အကျဉ်းသား တစ်ယောက်ကဲ့သို့ တစ်နေရာတည်းတွင် ပိတ်မိနေကာ ထွက်ခွာ၍ မရနိုင်တော့ပေ။

သူ ကျင့်ကြံလာခဲ့သည့် တစ်လျှောက်လုံးတွင် ဤမျှလောက် ဒဏ်ရာရခြင်း၊ နာကျင်ရခြင်းမျိုး ဘယ်သောအခါမှ မခံစားခဲ့ရဖူးဘဲ ယခုမူ တစ်ရက်တည်းဖြင့် အရာအားလုံးကို ခံစားလိုက်ရပြီ ဖြစ်၏။

ချိုးယွမ်ကျန်က မည်သို့ တည်ငြိမ်စွာ နေနိုင်ပြီး ဤအရာကို လက်ခံနိုင်မည်နည်း။

ချိုးယွမ်ကျန်က အသက်ပြင်းပြင်း အကြိမ်အနည်းငယ် ရှူလိုက်ပြီး မတ်တတ်ရပ်ရန် ပြင်လိုက်စဉ် ပတ်ဝန်းကျင်ရှိ အစီအရင်က အနည်းငယ် လင်းလက်လာသည်။ ဧရာမ အားအဟုန်ကြီးတစ်ခုက သူ၏ ခန္ဓာကိုယ်အတွင်းသို့ စီးဝင်လာပြီး ချိုးယွမ်ကျန်ကို ပြန်ထိုင်ကျသွားစေသည်။