အခန်း (၅၆၅-၅၆၆)

အခန်း (၅၆၅)။

‘အရိုးဖြူပညာရှင်’ ပေါ်ထွက်လာသည်နှင့် တစ်ပြိုင်နက်... ခန့်ညားထည်ဝါသော ပညာရှင် တစ်ဦးသည် လက်ထဲတွင် ခေါက်ယပ်တောင်ကို ကိုင်ဆောင်လျက် ‘အကန့်သတ်မဲ့ သမုဒ္ဒရာ’ ထက်တွင် လွင့်မျောနေ၏။ သူသည် စာမေးပွဲဖြေဆိုရန် သွားနေသော ပညာရှင် တစ်ဦးနှင့် အမှန်ပင် တူလှပေသည်။ သူ၏ရုပ်သွင်ကို ကြည့်ရုံမျှဖြင့် လွန်ခဲ့သော နှစ်ပေါင်း တစ်ထောင်က လူပေါင်း မရေမတွက်နိုင်အောင် သတ်ဖြတ်ခဲ့သည့် မိစ္ဆာလမ်းစဉ်မှ မိစ္ဆာခေါင်းဆောင်အိုကြီးတစ်ဦးဟု မည်သူမျှ ထင်မှတ်မိကြမည် မဟုတ်ပေ။ ထို့ပြင် သူသည် အသိပညာ ဗဟုသုတ ကြွယ်ဝသော ပညာရှင်တစ်ဦးနှင့် ပို၍ပင် တူနေသေးသည်။

သို့သော် ဟုန်ယွိကမူ တစ်ချက်ကြည့်ရုံဖြင့် ထိုသူ၏ မျက်ဝန်းများထဲတွင် ပုန်းကွယ်နေ သော လူသားဆန်မှု ကင်းမဲ့သည့် ရူးသွပ်မှုများကို မြင်လိုက်ရသည်။

ထို့ပြင် မိစ္ဆာဂိုဏ်း၏ ဂိုဏ်းချုပ် ‘အရိုးဖြူပညာရှင်’ ၏ ‘အတွေးစ’များမှာ အစွမ်းထက်လှပြီး ‘ဖန်ဆင်းရှင်’ တစ်ဦးနှင့်ပင် နှိုင်းယှဉ်နိုင်သည်။ သူသည် အစစ်အမှန် ‘ဖန်ဆင်းရှင်’ တစ်ဦး မဟုတ်သေးသော်လည်း သူ၏စွမ်းအားမှာ ‘ဖန်ဆင်းရှင်’ တစ်ဦးထက် မနိမ့်ကျပေ။ အမှန်တကယ်တော့ သူ၏ တာအိုပညာရပ်များ၊ ဆန်းကြယ်သော တာအိုပညာရပ်များနှင့် သူပိုင်ဆိုင်ထားသော နတ်ဘုရား လက်နက်များစွာသည် ‘ဖန်ဆင်းရှင်’ တစ်ဦးနှင့် ရင်ဆိုင် တိုက်ခိုက်ရန် လုံလောက်သည်။

မိစ္ဆာလမ်းစဉ်ကို လိုက်သူများသည် အလွန်တရာ ကောက်ကျစ်ပြီး လူသားမဆန်သော ပင်ကိုယ်စရိုက်များ ရှိကြသည်။ သို့သော် သူတို့၏ အတွေးစများတွင်မူ သူတို့၏ လူသား ဆန်မှုကို လုံးဝဉဿုံ စွန့်လွှတ်၍ မရဘဲ မိစ္ဆာများထဲက မိစ္ဆာများအဖြစ် အခြားအစွန်း တစ်ဖက်သို့ ရောက်သွားတတ်ကြသည်။ ထို့ပြင် သူတို့သည် အမှန်တရားလမ်းစဉ်၏ ပြင်းထန်သော နှိပ်ကွပ်ခြင်းကိုလည်း ခံခဲ့ရသည်။ ထို့ကြောင့် ‘ဖန်ဆင်းရှင်’ အဆင့်အထိ ကျင့်ကြံနိုင်သူမှာ အလွန်ပင် နည်းပါးလှပြီး မရှိသလောက်ပင် ဖြစ်သည်။ သို့သော် သူတို့၏ ကျင့်ကြံမှုနည်းလမ်းများမှာ အကန့်အသတ်မရှိဘဲ မည်သည့်အရာကိုမဆို ကျင့်ကြံရဲကြ သဖြင့် သာမန်ကျင့်ကြံသူများထက် ပို၍ ကြောက်မက်ဖွယ်ကောင်းလှသည်။

‘အမှောင်ဧကရာဇ် တာအိုသခင်’၊ ‘မူလဝိညာဉ်နတ်ဘုရား’ ၊ ‘မုန့်ရှန်းကျီ’ တို့ကဲ့သို့သော အထွတ်အထိပ် ပုဂ္ဂိုလ်ကြီးများကို ဖယ်ထားလျှင် ဤ ‘အရိုးဖြူပညာရှင်’ ၏ အရှိန်ဝါမှာ ဟုန်ယွိ မြင်ဖူးသမျှသော ‘မိုးကြိုးကပ်ဘေး အဆင့်ခြောက်’ အထွတ်အထိပ် ပညာရှင်များ ထဲတွင် အစွမ်းအထက်ဆုံး ဖြစ်သည်။

သူတို့အားလုံးမှာ ‘မိုးကြိုးကပ်ဘေး အဆင့်ခြောက်’ အထွတ်အထိပ်ချင်း တူညီသော်လည်း ကျိုးထိုက်ကျူ၊ ယုဝမ်မူနှင့် ယွမ်ရှန်းရှန်းတို့ နှစ်ဦးပေါင်းလျှင်ပင် ဤ ‘အရိုးဖြူပညာရှင်’ ကို ယှဉ်နိုင်မည် မဟုတ်ပေ။ အမှန်တကယ်ဆို ထိုကဲ့သို့သော ပညာရှင် သုံးလေးဦးပေါင်းလျှင် ပင် ပြိုင်ဘက်ဖြစ်မည် မဟုတ်။

တစ်ဖက်လူသည် သူ၏ စိတ်ဝိညာဉ်ကို ‘အရိုးမိစ္ဆာကျွန်း’ နှင့် ပေါင်းစပ်ကာ ခန္ဓာကိုယ် အသစ်တစ်ခုကို ဖန်တီးထားပြီး ဖြစ်သည်။ ဟုန်ယွိသည် ‘အရိုးမိစ္ဆာကျွန်း’ တစ်ခုလုံးမှာ အနှိုင်းမဲ့ နတ်ဘုရားလက်နက်တစ်ခု ဖြစ်ကြောင်း ချက်ချင်း သိလိုက်သည်။ ထိုမိစ္ဆာ လက်နက်ကို ဖန်တီးရန်အတွက် နှစ်ပေါင်းမည်မျှကြာအောင် သတ္တဝါများကို သတ်ဖြတ်ပြီး အရိုးတွင်းခြင်ဆီများကို ထုတ်ယူခဲ့ရသည်ကို မည်သူမျှ မသိနိုင်ပေ။

‘အရိုးဖြူပညာရှင်’ သည် ‘အမှောင်ဧကရာဇ် တာအိုသခင်’ ကဲ့သို့ပင် ‘အရိုးမိစ္ဆာကျွန်း’ ကို သူ၏ ကိုယ်ပိုင်ခန္ဓာကိုယ်အဖြစ် လုံးဝ ပေါင်းစပ်ထားပြီး ဖြစ်သည်။

အဆင့်ခြောက် မိုးကြိုးကပ်ဘေး ပညာရှင်များကြားတွင်ပင် ကြီးမားသော ခြားနားမှုများ ရှိကြသည်။ နတ်ဘုရား လက်နက်များ၊ တာအိုပညာရပ်များ၊ ‘အတွေးစ’ အရေအတွက်နှင့် ‘အတွေးစ’ များ၏ ခွန်အား စသည်ဖြင့် ကွဲပြားသော အချက်များ ရှိကြသည်။ ဥပမာအားဖြင့် ဟုန်ယွိသည် အဆင့်ခြောက် မိုးကြိုးကပ်ဘေးကို ဖြတ်ကျော်ထားပြီး ‘ဖန်ဆင်းရှင်’ တစ်ဦး မဟုတ်သော်လည်း မည်သည့် ‘ဖန်ဆင်းရှင်’ မှ သူ့ကို လျှော့မတွက်ရဲပေ။ သူတို့သည် ဟုန်ယွိကို ကြောက်စရာကောင်းသော ပြိုင်ဘက်တစ်ဦးအဖြစ် ဂရုတစိုက် ဆက်ဆံကြရ သည်။ ဟုန်ယွိ သူ၏စွမ်းအားများကို ထုတ်ဖော်ပြသသည့်အခါ ‘ဖန်ဆင်းရှင်’ များပင်လျှင် နောက်ဆုတ် သွားကြရသည်။

အဆင့်တူ မိုးကြိုးကပ်ဘေး ပညာရှင်များကြား၌ပင် ခြားနားမှုမှာ အလွန်ပင် ကြီးမားလှ သည်။

...

“ဟဲဟဲ... ဟဲဟဲ... လွန်ခဲ့တဲ့ နှစ်ပေါင်း တစ်ထောင်က အမှန်တရားလမ်းစဉ်နဲ့ မိစ္ဆာလမ်းစဉ် တိုက်ပွဲကြီးပြီးရင် ပညာရှင်အားလုံး ရှင်းလင်းခံလိုက်ရလို့ မဟာကမ္ဘာကြီးမှာ ကျင့်ကြံသူ တွေ မရှိတော့ဘူးလို့ ငါထင်နေတာ။ အခု ဒီလောက် အစွမ်းထက်တဲ့ ပညာရှင်တစ်ယောက် ကို တွေ့ရလိမ့်မယ်လို့ မထင်ထားဘူး။ ဒါပေမဲ့ မင်းက နတ်ဘုရားလက်နက်တွေ လာရှာ ရင်းနဲ့ ကမ္ဘာဦး မူလနဝမချောက်နက် နတ်ဘုရားနယ်မြေရဲ့ ‘အကန့်သတ်မဲ့ သမုဒ္ဒရာ’ ထဲမှာ အသက်ပေးလိုက်ရတော့မယ်။ မင်းက ‘ဗုဒ္ဓလက်ဝါး’ ကို ကျင့်ထားတာ မဟုတ်လား။ အဲဒီတုန်းက ‘ဒိုင်ဇင်ဘုရားကျောင်း’ က ‘တာ့ကျိဘုန်းတော်ကြီ’ ဟာ ‘ဗုဒ္ဓဓမ္မခန္ဓာ’ ကို တတ်မြောက်ထားပြီး ‘ဖန်ဆင်းရှင်’ အဆင့်ရောက်ဖို့ ခြေတစ်လှမ်းပဲ လိုတော့တာ။ ဒါတောင် သူက ငါ့လက်ထဲမှာ သေသွားခဲ့တာပဲ။ မဟာကမ္ဘာကြီးမှာတော့ ‘ဗုဒ္ဓလက်ဝါး’ က နယ်မြေတစ်ခုကို စိုးမိုးဖို့ လုံလောက်လိမ့်မယ်။ ဒါပေမဲ့ ဒီမှာတော့ မင်း သေဖို့ပဲ ပြင်ထား လိုက်တော့။ ငါ့ရဲ့ ‘ကောင်းကင်မိစ္ဆာဝိညာဉ် အရိုးဓား’ ကို မင်း ယူနိုင်မယ်လို့ ထင်နေတာ လား။”

‘အရိုးဖြူပညာရှင်’ ပေါ်လာပြီးနောက် သူသည် ချက်ချင်း တိုက်ခိုက်ခြင်း မပြုသေးပေ။ သူသည် ဟုန်ယွိကို ကြည့်ကာ သူ၏လက်ထဲမှ ခေါက်ယပ်တောင်ကို ဖွင့်လိုက်သည်။ သူသည် ယပ်တောင်ကို ခဏမျှ ခတ်လိုက်ပြီး အရာအားလုံးမှာ သူ၏ ထိန်းချုပ်မှုအောက် တွင် ရှိနေသကဲ့သို့ အေးအေးဆေးဆေး ပြောဆိုနေသည်။

သို့သော် ဤနှစ်ပေါင်းထောင်ချီ မိစ္ဆာအိုကြီးသည် သူ၏ အငွေ့အသက်ကို တဖြည်းဖြည်း မြှင့်တင်နေကြောင်း ဟုန်ယွိ ခံစားမိသည်။ တစ်ဖက်လူ စကားပြောနေစဉ်မှာပင် သူသည် စတင် လှုပ်ရှားနေပြီ ဖြစ်သည်။

အဘယ်ကြောင့်ဆိုသော် သူ အသံထွက်လိုက်တိုင်း သူ၏လက်ထဲမှ ‘ကောင်းကင်မိစ္ဆာ ဝိညာဉ် အရိုးဓား’ သည် ပို၍ ပြင်းထန်စွာ တုန်ခါလာသောကြောင့် ဖြစ်သည်။ ၎င်း၏ စွမ်းအားမှာ တဖြည်းဖြည်း တိုးမြင့်လာနေသည်။ ၎င်းအတွင်းရှိ မရေမတွက်နိုင်သော နာကျည်းဝိညာဉ်များမှာလည်း ပွက်ပွက်ဆူနေသည်။ ဟုန်ယွိသည် လူပေါင်းထောင်ချီ၏ ကျိန်စာတိုက်ခြင်းကို ခံနေရသကဲ့သို့ ရုတ်တရက် ခံစားလိုက်ရသည်။ သူသည် လူပေါင်း ထောင်ချီ၏ ရှုတ်ချခြင်းကို ခံနေရသော လူဆိုးကြီးတစ်ဦး ဖြစ်နေသကဲ့သို့ပင်။ မရေမတွက် နိုင်သော ‘အတွေးစ’ များမှာ သူ၏အရိုးများကို ဝါးစားပြီး သွေးကို သောက်လိုနေကြသည်။

“နာကျည်းဝိညာဉ်”

ဟုန်ယွိ၏ မျက်နှာအမူအရာ အနည်းငယ် ပြောင်းလဲသွားပြီး ဤစကားလုံးကို ပြောလိုက် သည်။

နာကျည်းဝိညာဉ်ဆိုသည်မှာ အစွမ်းထက်လှသော ‘အတွေးစ’ တစ်ခုလည်း ဖြစ်သည်။ ၎င်းမှာ အစွန်းရောက်သော ယုံကြည်ခြင်းစွမ်းအင် ‘အတွေးစ’ ထက်ပင် ပို၍ အစွမ်းထက် သည်။ ၎င်းသည် လူတစ်ဦးကို သေသည်အထိ၊ နှစ်ပေါင်းထောင်ချီသည်အထိ မုန်းတီးနေ နိုင်စွမ်း ရှိသည်။

ဤ ‘ကောင်းကင်မိစ္ဆာဝိညာဉ် အရိုးဓား’ အတွင်းတွင် ပြင်းထန်လှသော နာကျည်းဝိညာဉ် များ ကိန်းအောင်းနေ၏။ ၎င်းမှာ အသတ်ခံခဲ့ရသော လူပေါင်းများစွာ၏ နာကျည်းမှုများ ဖြစ်သည်။

“တာ့ကျိဘုန်းတော်ကြီး၊ တာ့ကျိဘုန်းတော်ကြီးက ဒီ ‘အရိုးဖြူပညာရှင်’ လက်ထဲမှာ သေသွားခဲ့တာပဲ။ ဒီဘုန်းတော်ကြီးနဲ့ ငါတို့ အစစ်အမှန် ခုနှစ်စဉ်ကြယ်ဂိုဏ်းရဲ့ ဂိုဏ်းချုပ်ကို ‘အမှန်တရားလမ်းစဉ်ရဲ့ တပည့်ခုနစ်ဦး’ ထဲက တစ်ဦးအဖြစ် လူသိများကြတာ။”

ဟုန်ယွိ၏ မျက်ခုံးနှစ်ခုကြားရှိ ‘သူတော်စင်ပေါင်းစုံခန်းမ’ ထဲတွင် ရှိနေသော ပိုင်ဇိယွဲ့မှာ ထိတ်လန့်သွားခဲ့သည်။

“အမှန်တရားလမ်းစဉ်ရဲ့ တပည့်ခုနစ်ဦး’ ဆိုတာ ဘာလဲ။” ကြင်ယာတော်ယွမ်က မေးလိုက်သည်။

“‘အမှန်တရားလမ်းစဉ်ရဲ့ တပည့်ခုနစ်ဦး’ ဆိုတာ ‘အမှန်တရားလမ်းစဉ်’ ဂိုဏ်းတွေထဲမှာ ‘ဖန်ဆင်းရှင်’ အဆင့်နဲ့ အနီးစပ်ဆုံး ပညာရှင်တွေကို ပြောတာ။ သူတို့ထဲက တချို့ဆိုရင် ‘ဖန်ဆင်းရှင်’ အဆင့် ကျင့်ကြံမှုတောင် ရှိနေကြပြီ။ ‘ဒိုင်ဇင်ဘုရားကျောင်းတော်’ က ‘တာ့ကျိဘုန်းတော်ကြီး’ နဲ့ အစစ်အမှန် ခုနှစ်စဉ်ကြယ်ဂိုဏ်းက ‘ယွမ်ထျန်းကန်း’ တို့ နှစ်ဦး စလုံးဟာ အဲဒီခုနစ်ဦးထဲမှာ ပါဝင်ခဲ့ကြတာ။” ပိုင်ဇိယွဲ့က သူ၏ လက်ချောင်းများကို အနည်းငယ် လှုပ်ရှားရင်း ပြောလိုက်သည်။

သူ၏ စကားမဆုံးမီမှာပင် အရိုးဖြူပညာရှင်က သူ၏ ယပ်တောင်ကို ဝုန်းခနဲ ပိတ်လိုက် သည်။ သူ၏မျက်ဝန်းများမှာ လူသေတစ်ဦးကဲ့သို့ ပြာနှမ်းသွားပြီး သက်ရှိအငွေ့အသက်များ လုံးဝ ပျောက်ကွယ်သွားသည်။ တစ်ချိန်တည်းမှာပင် သူ၏ စကားသံများမှာလည်း အသက်မဲ့သွားတော့သည်။

“အခုခေတ် ကျင့်ကြံသူတွေက အရမ်း နုနယ်လွန်းတာပဲ၊ ငါ့ရဲ့ ကောင်းကင်မိစ္ဆာဝိညာဉ် အရိုးဓားမှာ နောက်ထပ် နာမည်တစ်ခု ရှိသေးတာကိုတောင် မသိကြဘူး။ ကလေး... ဒီဓားမှာ နောက်ထပ် နာမည်တစ်ခု ရှိသေးတယ်။ အဲဒါက ‘နာကျည်းဝိညာဉ်ဓား’ လို့ ခေါ်တယ်။ ဒီဓားကို ကိုင်ဆောင်သူ ဘယ်သူမဆို သူတို့ရဲ့ ဝိညာဉ်ဟာ မရေမတွက်နိုင်တဲ့ နာကျည်းမူတွေကြားမှာ ပိတ်မိနေပြီး အသူရာချောက်ထဲ ကျသွားလိမ့်မယ်။ ဘယ်သူမှ လွတ်အောင် မရုန်းနိုင်ဘူး။ ‘ဖန်ဆင်းရှင်’ တစ်ဦးတောင် လွတ်မှာ မဟုတ်ဘူး။ ငါ ဒီလက်နက်ကို သန့်စင်ခဲ့တာဟာ ဒဏ္ဍာရီလာ ‘ဖန်ဟွမ်အသက်ဝိညာဉ်ဓား’ ကို ခုခံဖို့ အတွက်ပဲ။ ဒဏ္ဍာရီတွေအရ ‘ဖန်ဟွမ်အသက်ဝိညာဉ်ဓား’ ဟာ ပညာ၊ ကရုဏာ၊ သတ္တိနဲ့ ဖြောင့်မတ်ခြင်း ကိုယ်စားပြုတယ်တဲ့။ ဒါပေမဲ့ အဲဒါတွေအားလုံးဟာ ‘နာကျည်းမှု’ ကိုတော့ မခုခံနိုင်ဘူး။”

ဤနေရာတွင် ‘အရိုးဖြူပညာရှင်’ သည် ဘာမှ ထပ်မပြောတော့ဘဲ သူ၏လက်ကို မြှောက်လိုက်သည်။

“နာကျည်းမှု ဝိညာဉ်ချေမှုန်းခြင်း။”

ဖူး…

‘ကောင်းကင်မိစ္ဆာဝိညာဉ် အရိုးဓား’ ပေါ်ရှိ ပြင်းထန်သော နာကျည်းဝိညာဉ်များသည် ချက်ချင်း ပေါက်ကွဲထွက်လာခဲ့သည်။

သောင်းနှင့်ချီသော နာကျည်းဝိညာဉ်များသည် ဟုန်ယွိကို လုံးဝ ရစ်ပတ်သွားခဲ့သည်။ ဤနာကျည်းဝိညာဉ်များသည် သာမန် ကျင့်ကြံသူများ၏ ‘အတွေးစ’များနှင့် မတူပေ။ ၎င်းတို့မှာ အလွန်မှောင်မိုက်ပြီး ကျယ်ပြောလှကာ ပုံပျက်ပန်းပျက်ဖြစ်နေသော လူအများ ၏ မျက်နှာများအဖြစ် အဆက်မပြတ် ပေါ်ထွက်နေသည်။ လူသားတို့၏ မုန်းတီးမှုအရှိဆုံး စိတ်ခံစားချက်များအားလုံး ၎င်းအတွင်းမှ ထွက်ပေါ်နေသည်။

ကျင့်ကြံသူတစ်ဦး၏ ‘အတွေးစ’ များသည် ဤနာကျည်းဝိညာဉ်များ၏ စိတ်ခံစားချက်များ စွန်းထင် ခံရသည်နှင့်တစ်ပြိုင်နက် ၎င်းတို့မှာ ချက်ချင်း သက်ရောက်မှုရှိပြီး သူတို့၏ စိတ်ဝိညာဉ်မှာ ပျက်စီးသွားလိမ့်မည်။

‘ကောင်းကင်မိစ္ဆာဝိညာဉ် အရိုးဓား’ မှ နာကျည်းဝိညာဉ်များ ပေါက်ကွဲထွက်လာသည့် ခဏ တွင် ‘အရိုးဖြူပညာရှင်’ ၏ နှုတ်ခမ်းထောင့်တွင် ယုတ်မာသော အပြုံးတစ်ခု ပေါ်လာသည်။ ဟုန်ယွိသည် ဤဓားအောက်တွင် သေတော့မည်ဟု သူ ခံစားလိုက်ရပုံရသည်။

ဤသည်မှာ မရေမတွက်နိုင်သော တိုက်ပွဲများမှ ရရှိလာသော သူ၏ ပြင်းထန်သည့် ယုံကြည်ချက် ဖြစ်သည်။ သို့သော်လည်း နောက်တစ်ခဏတွင် ‘အရိုးဖြူပညာရှင်’ ၏ ယုံကြည်ချက်မှာ ချက်ချင်းပင် တုန်လှုပ်သွားခဲ့သည်။

...

“အရိုးဖြူပညာရှင်... ခင်ဗျားက ‘အမှောင်ဧကရာဇ် တာအိုသခင်’ ကို မမီသေးပါဘူး။ အစစ်မှန် စွမ်းအားဆိုတာ ဘာလဲ၊ ခင်ဗျားသိအောင် ကျုပ် ပြပေးမယ်။” ဟုန်ယွိ၏ အသံမှာ နာကျည်းဝိညာဉ်များကြားမှ ထွက်ပေါ်လာသည်။ သူ၏ အသံမှာ အနည်းငယ်မျှပင် တုန်လှုပ်ခြင်း မရှိပေ။

“အမြင့်မြတ်ဆုံးက ကောင်းကင်ဘုံပဲ။ ထာဝရဆိုတာ အစွန်းရောက်ခြင်းပဲ။ ငါ့ရဲ့ ထိုက်ကျိ နတ်ဘုရားမိုးကြိုးကို မြည်းစမ်းကြည့်စမ်း။”

ဟုန်ယွိက ခပ်တိုးတိုး အော်ဟစ်လိုက်ပြီး သူ၏ လက်ငါးချောင်းကို ကုပ်ဆွဲကာ လက်ဝါးဖြင့် ဖိချလိုက်သည်။ သူ၏ လက်ချောင်းငါးချောင်းမှာ ချိတ်တစ်ခုအဖြစ် ပြောင်းလဲသွားပြီး သူ၏ လက်ဝါးထဲမှ မိုးကြိုးနှင့်လျှပ်စီးများ ချက်ချင်း ထွက်ပေါ်လာသည်။ တစ်ချိန်တည်းမှာပင် မိုးကြိုးလျှပ်စီးများသည် တဖြည်းဖြည်း စုစည်းသွားပြီး ‘ထိုက်ကျိမိုးကြိုးရေကန်’ အတွင်းရှိ မှော်ဝင်အစီအရင်နှင့် ပေါင်းစပ်သွားသည်။ ‘ထိုက်ကျိမိုးကြိုးရေကန်’ ၏ ပုံရိပ် ပေါ်လာပြီး နောက် မိုးကြိုးလျှပ်စီးများမှာလည်း ထက်ဝက် ကွဲထွက်သွားကာ လျှပ်တပြက်ဝင်္ကပါ၏ ပြောင်းလဲနေသော ပုံရိပ်ကို ဖော်ဆောင်လိုက်သည်။ ၎င်းတို့နှစ်ခု ပေါင်းစပ်သွားသည့်အခါ မကြုံစဖူးသော ထိုက်ကျိနတ်ဘုရားမိုးကြိုးအဖြစ် ပြောင်းလဲသွားခဲ့သည်။

ထိုက်ကျိနတ်ဘုရားမိုးကြိုး ပေါ်လာသည်နှင့်တစ်ပြိုင်နက် ကြီးမားလှသော စွမ်းအားများ ထွက်ပေါ်လာသည်။ နာကျည်းဝိညာဉ်များသည် ထိုက်ကျိနတ်ဘုရားမိုးကြိုးနှင့် ထိတွေ့ လိုက်သည်နှင့် ချက်ချင်းပင် လွင့်စင်သွားပြီး လေထဲတွင် ပေါက်ကွဲသွားခဲ့သည်။

နာကျည်းဝိညာဉ်များကို ရှင်းလင်းပြီးနောက် ဟုန်ယွိသည် ၎င်းတို့ကို ကြည့်ပင် မကြည့်တော့ဘဲ သူ၏လက်ထဲမှ ထိုက်ကျိနတ်ဘုရားမိုးကြိုးကို ‘အရိုးဖြူပညာရှင်’ ဆီသို့ တွန်းလွှတ်လိုက်သည်။

လှိမ့်တက်လာသော မိုးကြိုးလုံးကြီးမှာ အရာအားလုံးကို ကြိတ်ခြေမည့် အရှိန်အဟုန်ဖြင့် ရှေ့သို့ ပေါက်ကွဲထွက်သွားလေသည်။

“ဟင်…”

အရိုးဖြူပညာရှင် ထိတ်လန့်သွားသည်။ ဟုန်ယွိထံမှ ဤမျှ ပြင်းထန်သော စွမ်းအားများ ရုတ်တရက် ပေါ်ထွက်လာလိမ့်မည်ဟု သူ လုံးဝ မမျှော်လင့်ထားပေ။ ထို့ပြင် ဤကဲ့သို့သော မိုးကြိုးတာအို ပညာရပ်မျိုးကိုလည်း သူ တစ်ခါမျှ မမြင်ဖူးပေ။

မိုးကြိုးလုံးကြီးသည် အလွန်မြန်သော အရှိန်ဖြင့် ဟင်းလင်းပြင်ကို ဖြတ်ကျော်ကာ သူ၏ ရှေ့သို့ ချက်ချင်း ရောက်ရှိလာသည်။ မိုးကြိုးလုံးကြီး သူ့ကို မထိမှန်မီမှာပင် ပြင်းထန်လှ သော မိုးကြိုးအလင်းတန်းများကြောင့် သူ၏ ခန္ဓာကိုယ်အတွင်းမှ တကျွတ်ကျွတ် မြည်သံ များ ထွက်ပေါ်လာသည်။ ၎င်းမှာ အရိုးများ ကျိုးကြေသွားသည့် အသံပင် ဖြစ်သည်။

“အရိုးအရည်ဖျော် ဝိညာဉ်ယပ်တောင်။”

အရိုးဖြူပညာရှင်က တွန့်ဆုတ်မနေဘဲ သူ၏ လက်ထဲမှ ယပ်တောင်ကို ဖြန့်ကာ ထိုက်ကျိ မိုးကြိုးလုံးကြီးဆီသို့ ယမ်းခါလိုက်သည်။ ဤယပ်တောင်မှာ ကြီးမားသော စွမ်းအားရှိနေပြီး တစ်ချက်ခတ်လိုက်ရုံနှင့် အရိုးဖြူ အစစ်မှန်စွမ်းအင် မျှင်တန်းပေါင်း တစ်ထောင် ထွက်ပေါ် လာသည်။

သို့သော် ထိုက်ကျိ နတ်ဘုရားမိုးကြိုးမှာမူ အရာအားလုံးကို ဖျက်ဆီးနိုင်စွမ်း ရှိသည်။ ၎င်းသည် လေထဲတွင် လှိမ့်တက်သွားစဉ် နှင်းလုံးကြီးတစ်ခုကဲ့သို့ တစ်ဖြည်းဖြည်း ကြီးမား လာပြီး အဆက်မပြတ် လည်ပတ်နေသည်။ ဟင်းလင်းပြင်အတွင်းမှ မိုးကြိုးနှင့် လျှပ်စီး တန်းများစွာသည် ထိုမိုးကြိုးလုံးကြီးပေါ်သို့ စုစည်းရောက်ရှိလာကြသည်။

၎င်းသည် ‘ထိုက်ကျိ မိုးကြိုးကန်’ ကဲ့သို့ပင် ဟင်းလင်းပြင်ကို ဖြတ်ကျော်၍ မိုးကြိုးကပ်ဘေး အတွင်းမှ မိုးကြိုးစွမ်းအားများကို စုစည်းပေးနေခြင်း ဖြစ်သည်။

အရိုးဖြူ အစစ်မှန် စွမ်းအားနှင့် မိုးကြိုးလုံးကြီး တိုက်မိသည့်အခါ ‘ဖန်ရှန်းတာအိုဂိုဏ်း’ ၏ ယမ်းတိုက်ကြီး ပေါက်ကွဲသွားသကဲ့သို့ တဒိုင်းဒိုင်းနှင့် ပေါက်ကွဲသံများမှာ ဆက်တိုက် ထွက်ပေါ်လာတော့သည်။

“အရိုးဖြူ မိုးကြိုးဖြိုခွင်း၊ အဆုံးမဲ့ အစစ်မှန် စွမ်းအား။”

‘အရိုးဖြူပညာရှင်’ က ကျယ်လောင်စွာ အော်ဟစ်လိုက်သည်။ သူသည် အရိုးဖြူ အစစ်မှန် စွမ်းအားများကို အဆက်မပြတ် ထုတ်ဖော်နေသဖြင့် သူ၏ အဝတ်အစားများမှာ လေထဲ တွင် လွင့်မျောနေသည်။ ပို၍ ထူထပ်လာသော အရိုးဖြူ အစစ်မှန် စွမ်းအားများသည် လေထုအတွင်း ပြည့်နှက်သွားပြီး ထူထဲသော အရိုးတံတိုင်းကြီး၊ အရိုးတောင်ကြီး တစ်ခု အဖြစ် ပြောင်းလဲသွားသည်။

ဟုန်ယွိ၏ မိုးကြိုးမှာ ဤမျှ အစွမ်းထက်လိမ့်မည်ဟု သူ မထင်ထားပေ။ ၎င်းကို ထုတ်လွှတ် ပြီးနောက် မဟာကမ္ဘာကြီးမှ မိုးကြိုးစွမ်းအားများကို အဆက်မပြတ် စုပ်ယူနေနိုင်သည်။ ထို့ပြင် ၎င်းသည် မိုးကြိုးကပ်ဘေး အဆင့်ခုနစ်၏ စွမ်းအားလည်း ဖြစ်သည်။

၎င်းမှာ ပို၍ပို၍ ကြီးမားလာသော နှင်းလုံးကြီးနှင့် တူနေသည်။ ဤသည်မှာ မယုံကြည်နိုင် စရာပင်။

“ထိုက်ကျိ မိုးကြိုးရေကန်၊ ထာဝရ အတိုင်းအဆမဲ့၊ ဟင်းလင်းပြင်ကို ဖြတ်ကျော်ပြီး မိုးကြိုးကို စုစည်းစမ်း။”

ထူထပ်လှသော အရိုးဖြူစွမ်းအင်များက အရိုးတောင်ကြီးနှင့် အရိုးနံရံကြီးအဖြစ် ပြောင်းလဲ ကာ ထိုက်ကျိ နတ်ဘုရားမိုးကြိုးကို တားဆီးထားသည်ကို မြင်သောအခါ ဟုန်ယွိက အော်ဟစ်လိုက်ပြီး ‘ထိုက်ကျိ မိုးကြိုးရေကန်’ ၏ စွမ်းအားအားလုံးကို ထုတ်သုံးလိုက်သည်။

ချက်ချင်းပင် သောင်းနှင့်ချီသော မိုးကြိုးတန်းများသည် ဟင်းလင်းပြင်ကို ဖောက်ထွက်ကာ ဤထိုက်ကျိ မိုးကြိုးလုံးကြီးအတွင်းသို့ စုစည်းဝင်ရောက်သွားသည်။ ထိုက်ကျိ မိုးကြိုးလုံး ကြီးမှာ တောင်တစ်လုံးခန့်အထိ ကြီးမားသွားခဲ့ပြီ ဖြစ်သည်။

“မိုးကြိုး၊ အဋ္ဌဂံပုံရိပ်ကားချပ်”

ဤစကားလုံးများမှာ ဟုန်ယွိ၏ ပါးစပ်မှ ထွက်ပေါ်လာသည်။ တောင်တစ်လုံးခန့် ကြီးမား သော မိုးကြိုးလုံးမှာ ပေါက်ကွဲသွားပြီး အရိုးဖြူစွမ်းအားများကို ဖျက်ဆီးကာ ‘အရိုးဖြူ ပညာရှင်’ ၏ ခန္ဓာကိုယ်ပေါ်တွင် ပေါက်ကွဲသွားခဲ့သည်။

ဒိုင်း… ဒိုင်း ...

ထိုက်ကျိ နတ်ဘုရားမိုးကြိုးမှာ လုံးဝဥဿုံ ပေါက်ကွဲသွားသည်။ ဤပြင်းထန်လှသော တုန်ခါမှုအောက်တွင် အရိုးဖြူ အစစ်မှန် စွမ်းအားများမှာ စုတ်ပြဲနေသော အဝတ်စများပမာ ပြန့်ကျဲသွားပြီး အရိုးဖြူပညာရှင်၏ လက်ထဲမှ ‘အရိုးရည်ဖျော်ယပ်တောင်’ မှာလည်း ချက်ချင်း ကြေမွပျက်စီးသွားခဲ့သည်။

ဂျွတ်…

‘အရိုးဖြူပညာရှင်’ ၏ ခန္ဓာကိုယ်မှာလည်း ပျက်စီးသွားပြီး အတွေးစ ၁၀၀,၀၀၀ ကျော် အဖြစ် ပြောင်းလဲသွားခဲ့သည်။ သူသည် ဒေါသတကြီး ဟိန်းဟောက်လိုက်ပြီး လေထဲသို့ ပျံတက်သွားသည်။

“ကောင်းကင်မိစ္ဆာကလေးငယ်... သွေးအရိပ်မိစ္ဆာ...”

ဤမိစ္ဆာနှစ်ဦး၏ အမည်များကို ‘အရိုးဖြူပညာရှင်’ ၏ ပါးစပ်မှတစ်ဆင့် မိုင်ပေါင်းသောင်းချီ ဝေးကွာသော နေရာများဆီသို့ ပေးပို့လိုက်သည်။

အခန်း (၅၆၆)။

“တကယ့် မိစ္ဆာအိုကြီးပဲ။ ထိုက်ကျိမိုးကြိုးရေကန်ရဲ့ စွမ်းအားနဲ့တောင် သူ့ကို အပြတ် မရှင်နိုင်ခဲ့ဘူး။ နှစ်ပေါင်းထောင်ချီ ကျော်ကြားခဲ့တဲ့ မိစ္ဆာအိုကြီးဆိုတာ တကယ်ပဲ နာမည်နဲ့ လိုက်ဖက်ပါပေတယ်။ သူ ခုနက ထွက်ပြေးသွားတာ တကယ်ကို မြန်လွန်းတယ်။ ဒါက ဒဏ္ဍာရီလာ ‘အရိုးပြောင်းလဲ ဝိညာဉ်အလင်းရှောင်တိမ်း’ ပညာရပ်လား မသိဘူး။ ဟုန်ယွိ သည် သူ၏ ထိုက်ကျိနတ်ဘုရားမိုးကြိုးက ‘အရိုးဖြူပညာရှင်’ ၏ ရတနာတစ်ခုဖြစ်သော ‘အရိုးရည်ဖျော်ယပ်တောင်’ ကိုသာ ဖျက်ဆီးနိုင်ခဲ့ပြီး တစ်ဖက်လူမှာမူ နောက်ဆုံးအချိန် တွင် လွတ်မြောက်သွားသည်ကို မြင်သောအခါ မျက်မှောင်ကြုတ်လိုက်မိသည်။

ထိုက်ကျိမိုးကြိုးရေကန်သည် အလုံးစုံ ပြည့်စုံခြင်း မရှိသေးသော်လည်း အလွန်အစွမ်းထက် လှသည်။ ၎င်း၏ စွမ်းအားမှာ ‘နေလစကြာဝဠာဆေးပေါင်းအိုး’ ထက်ပင် မနိမ့်ကျပေ။

ထိုက်ကျိနတ်ဘုရားမိုးကြိုးသည် ‘ကမ္ဘာဦးအစစွမ်းအင်’ လောက် အစွမ်းထက်ခြင်း မရှိသော်လည်း အားသာချက်မှာ ဟင်းလင်းပြင်ကို ဖြတ်ကျော်ကာ မိုးကြိုးများကို ဆုပ်ယူ နိုင်ပြီး၊ တစ်ဖြည်းဖြည်း ပိုမိုကြီးမားလာစေခြင်းပင် ဖြစ်သည်။ ၎င်းသည် တာအိုပညာရပ် တစ်ခုထက် သာလွန်ကာ၊ အဆုံးမဲ့သော စွမ်းအားများကို အစဉ်ထာဝရ ထုတ်လွှတ်နိုင်သည့် မဟာအစီအရင်တစ်ခုနှင့် ပို၍ တူသည်။

ဤသည်မှာ မိုးကြိုးရေကန်၏ စွမ်းအားပင် ဖြစ်သည်။

ဟုန်ယွိ ထိုက်ကျိမိုးကြိုးရေကန်ကို ဖန်တီးခဲ့ခြင်းမှာ ဟုန်ရွှန်ကျိ၊ ယန်ဖန်းနှင့် တော်ဝင်ချန် အင်ပါယာ၏ စုဆောင်းထားသော ကြွယ်ဝမှုများကို တန်းတူယှဉ်ပြိုင်နိုင်ရန် ဖြစ်သည်။ အဘယ်ကြောင့်ဆိုသော် မိုးကြိုးရေကန်သည် အဆုံးမဲ့သော စွမ်းအားများကို ရရှိနိုင်ပြီး မည်သည့်အခါမျှ ကုန်ခမ်းသွားခြင်း မရှိသောကြောင့် ဖြစ်သည်။

ဤမျှကြီးမားသော စွမ်းအားကပင် ‘အရိုးဖြူပညာရှင်’ ကို တစ်ချက်တည်းဖြင့် မသတ်နိုင်ခဲ့ ခြင်းမှာ ဤမိစ္ဆာအိုကြီး မည်မျှအစွမ်းထက်ကြောင်း ဖော်ပြနေသည်။

သို့သော် ‘အရိုးဖြူပညာရှင်’ လွတ်မြောက်သွားသော်လည်း သူ၏ ‘ကောင်းကင်မိစ္ဆာဝိညာဉ် အရိုးဓား’ ကိုမူ လုံးဝ လက်လွှတ်လိုက်ရပြီ ဖြစ်သည်။ ဟုန်ယွိသည် လက်တစ်ချက် ဝှေ့ယမ်းလိုက်ရုံဖြင့် ထိုဓားကို သူ၏ လက်ဝါးထဲသို့ ပြန်လည် သိမ်းဆည်းလိုက်သည်။

“နားကျည်းဝိညာဉ်တွေ ငြိမ်ဝပ်စမ်း၊ သူတော်စင်အပေါင်းတို့ ဖိနှိပ်စမ်း။”

ဟုန်ယွိသည် ထိုဓားကို သိမ်းဆည်းပြီးနောက် နောက်ထပ် ကမ္ဘာဦးဖန်ဆင်းခြင်းကျမ်းစာ တစ်စောင်ဖြင့် ရစ်ပတ်ကာ သူ၏ မျက်ခုံးနှစ်ခုကြားရှိ သူတော်စင်ခန်းမအတွင်းသို့ ပေးပို့လိုက်သည်။

မကြာမီမှာပင် သူ၏မျက်လုံးများ လှုပ်ရှားသွားပြီး ‘သုံးပွင့်ဆိုင် အရိုးဖြူနတ်ဆိုးမိစ္ဆာ’ သုံးခုမှာ ‘အရိုးဖြူပညာရှင်’ နှင့်အတူ လိုက်ပါထွက်ပြေးရန် ပြင်နေသည်ကို မြင်လိုက်ရ သည်။

ဟုန်ယွိသည် အထွတ်အထိပ် သိုင်းသူတော်စင် တစ်ဦးထက် မနိမ့်ကျသော ဤအရိုးစု သုံးခု ကို မည်သို့ လွတ်မြောက်ခွင့် ပေးမည်နည်း။ သူ၏ လက်ချောင်းဖြင့် အသာအယာ ကွေးလိုက်ရာ သူ၏လက်ထဲမှ သန့်စင်သော သူတော်စင် စွမ်းအင်များ ထွက်ပေါ်လာပြီး ထိုအရိုးစု သုံးခုဆီသို့ တိုက်ရိုက် ရောက်ရှိသွားသည်။

အူး... ဝူး... ဝူး...

ထိုအရိုးစု သုံးခုသည် စွမ်းအားများ ထိမှန်လိုက်သည်နှင့် သတ်ကွင်းသို့ ဆွဲခေါ်ခံရသော နွားများကဲ့သို့ ပြင်းထန်စွာ ရုန်းကန်ကြသည်။ သူတို့၏ မျက်လုံးတွင်းများရှိ ခရမ်းရင့်ရောင် မီးတောက်များမှာလည်း တဖျတ်ဖျတ် တုန်ခါနေပြီး ခရမ်းရောင် အလင်းတန်းကြီးနှစ်ခု ထွက်ပေါ်လာသည်။

“ဟွန့်… မင်းတို့က ရုန်းချင်သေးတာလား။”

ဟုန်ယွိသည် ဘာကိုမျှ ဂရုမစိုက်ဘဲ ဟင်းလင်းပြင်ကို ဖြတ်ကာ လက်သီးဖြင့် ထိုးချလိုက် သည်။ ရွှေရောင်အလင်းတန်းတစ်ခုသည် ဟင်းလင်းပြင်ကို ဖောက်ထွက်သွားပြီး အရိုးစု သုံးခု၏ ရင်ဘတ်ပေါ်သို့ ကျရောက်သွားသည်။ သူသည် သုံးကြိမ် ဆက်တိုက် ထိုးနှက်လိုက် သည်။

ဒိုင်း… ဒိုင်း…. ဒိုင်း….

ကျယ်လောင်သော ပေါက်ကွဲသံ သုံးခုနှင့်အတူ အရိုးများ ကျိုးပဲ့သံများ ထွက်ပေါ်လာသည်။ မိုးကြိုးဒဏ်ကိုပင် ခံနိုင်ရည်ရှိသော ဤ ‘အရိုးဖြူနတ်ဆိုးမိစ္ဆာ’ များမှာ ဟုန်ယွိ၏ လက်သီး ချက်ကြောင့် ပေါက်ကွဲသွားပြီး အရိုးဖြူ ဝိညာဉ်စွမ်းအင်လုံးများအဖြစ် ပြောင်းလဲသွား သည်။ ဟုန်ယွိက လက်တစ်ဖက်ဖြင့် ဖမ်းဆွဲလိုက်ရာ ထိုစွမ်းအင်လုံး သုံးလုံးမှာ သူ၏ လက်ဝါးထဲသို့ စုစည်းသွားပြီး ဖြူဖွယ်သော ‘မျိုးစေ့မှော်သင်္ကေတ’ သုံးခုအဖြစ် ပြောင်းလဲ သွားသည်။

ဤ ‘မျိုးစေ့မှော်သင်္ကေတ’ သုံးခုမှာ ‘အရိုးဖြူနတ်ဆိုးမိစ္ဆာ’ များ၏ မူလအသွင်သဏ္ဌာန်ပင် ဖြစ်သည်။ ဟုန်ယွိသည် ၎င်းတို့ကို အပိုင်းပိုင်းဖြစ်အောင် ထိုးနှက်ခဲ့ပြီး သူ၏ အစွမ်းထက် သော မှော်စွမ်းအားဖြင့် မူလအခြေအနေသို့ ပြန်လည် ပြောင်းလဲစေခဲ့သည်။ ဤသည်မှာ ‘အရိုးဖြူပညာရှင်’ ၏ ဝိညာဉ် အမှတ်အသားကို တိုက်ရိုက် ဖျက်ဆီးလိုက်ခြင်းပင် ဖြစ်သည်။

သူသည် ထိုမျိုးစေ့မှော်သင်္ကေတ သုံးခုကို သူ၏ မျက်ခုံးနှစ်ခုကြားရှိ သူတော်စင်ခန်းမသို့ ပေါ့ပေါ့ပါးပါးပင် ပစ်ထည့်လိုက်သည်။

“ဒီမိစ္ဆာအိုကြီးက သူ့အပေါင်းအဖော်တွေကို ခေါ်နေတာပဲ။ သူ့ကို ဘယ်လိုသတ်ရမလဲဆို တာ ငါ မသိသေးဘူး။ သူ့ရဲ့နည်းလမ်းတွေက အမြဲပြောင်းလဲနေပြီး သူ့မှာ နတ်ဘုရား လက်နက်တွေ ဘယ်လောက်တောင် ရှိနေဦးမလဲ မသိဘူး။”

ဟုန်ယွိသည် ဤအရာအားလုံးကို လျှပ်တပြက်အတွင်း အပြီးသတ်လိုက်ခြင်း ဖြစ်သည်။ ‘ကောင်းကင်မိစ္ဆာဝိညာဉ် အရိုးဓား’ နှင့် ‘သုံးပွင့်ဆိုင် အရိုးဖြူနတ်ဆိုးမိစ္ဆာ’ တို့ကို သိမ်းဆည်းပြီးနောက်... မိုင်ပေါင်းတစ်ထောင်ခန့် ဝေးကွာသော နေရာမှ သူ၏ အဖော်များ ကို လှမ်းခေါ်နေသော ‘အရိုးဖြူပညာရှင်’ ၏ အသံကို ကြားလိုက်ရသည်။

ဤနတ်ဘုရားလက်နက် နှစ်ခုမှာ ကျိုးထိုက်ကျူ၏ ‘အဝီစိပလ္လင်’ နှင့် ‘နတ်ဘုရား လွန်းယာဉ်ပျံ’ တို့ထက် မနိမ့်ကျဘဲ ပို၍ပင် သာလွန်နိုင်သော်လည်း သူသည် ပြိုင်ဘက်ကို လုံးဝ မသတ်ဖြတ်နိုင်သလို စိတ်ဝိညာဉ်ကို မဖမ်းဆီးနိုင်ခြင်းမှာ သူ၏ နည်းစနစ်များတွင် အားနည်းချက် အနည်းငယ် ရှိနေသေးသည်ဟု ဟုန်ယွိ ယူဆမိသည်။

ဟုန်ယွိသည် အရိုးဖြူပညာရှိကို တစ်ခဏအတွင်း အမှုန့်ဖြစ်အောင် ချေမှုန်းနိုင်လိမ့်မည်ဟု မူလက ထင်မှတ်ထားခဲ့ခြင်း ဖြစ်သည်။ သို့သော် ယခုမူ သူ၏ စိတ်ထဲတွင် တိုက်ပွဲအတွက် အထူးသတိထား ပြင်ဆင်လိုက်ရသလို ထိုမိစ္ဆာအိုကြီးများ၏ နည်းစနစ်များကိုလည်း အံ့ဩမိသွားသည်။

“နှမြောစရာပဲ၊ ဒီမိစ္ဆာအိုကြီးကို တစ်ချက်တည်းနဲ့ မသတ်နိုင်ခဲ့ဘူး။ တကယ်လို့ ငါ့စွမ်းအင် ကို အပြည့်အဝသုံးပြီး တစ်ချက်တည်း တိုက်ခိုက်ခဲ့ရင် အောင်မြင်နိုင်လောက်တယ်။ ဒီတစ်ခါတော့ ငါ့ခန့်မှန်းချက် မှားသွားပြီး ဒီမိစ္ဆာအိုကြီးရဲ့ စွမ်းအားကို လျှော့တွက်မိသွား တယ်။”

ဟုန်ယွိက သက်ပြင်းချလိုက်ပြီး အလင်းတန်းတစ်ခုအဖြစ် ပြောင်းလဲကာ ထွက်ပြေးနေ သော ‘အရိုးဖြူပညာရှင်’ နောက်သို့ လိုက်လံ ဖမ်းဆီးတော့သည်။

တစ်ချိန်တည်းမှာပင် သူက လှမ်းအော်လိုက်သည်။ “အရိုးဖြူပညာရှင်... ခင်ဗျား မပြေးဘဲ အဲဒီမှာ ရပ်နေစမ်း။ တကယ်လို့ ခင်ဗျားသာ ကျုပ်တိုက်ကွက်တစ်ကွက်ကို မသေဘဲ ခုခံနိုင်ရင် ကျုပ် ခင်ဗျားကို အသက်ချမ်းသာပေးမယ်။”

သူ၏အသံမှာ ဟိန်းထွက်သွားပြီး ‘အရိုးဖြူပညာရှင်’ ၏ သူ့အဖော်တွေကို ခေါ်သံထက်ပင် ပို၍ ကျယ်လောင်သည်။

...

ထိုအချိန်တွင် ‘အရိုးဖြူပညာရှင်’ မှာ ပို၍ပင် ထိတ်လန့်တုန်လှုပ်နေပြီ။

သူသည် ထင်ရှားကျော်ကြားသော မိစ္ဆာလမ်းစဉ်၏ ဂိုဏ်းချုပ်တစ်ဦးဖြစ်ပြီး နှစ်ပေါင်း တစ်ထောင်တိုင်တိုင် အမည်ကျော်ကြားခဲ့သူ ဖြစ်သည်။ အမှန်တရားလမ်းစဉ်နှင့် မိစ္ဆာ လမ်းစဉ် တိုက်ပွဲကြီးမှ အသက်ရှင် လွတ်မြောက်လာခဲ့သူလည်း ဖြစ်သည်။ သူသည် ဤမိစ္ဆာခန္ဓာကိုယ်ဖြင့် ‘ဖန်ဆင်းရှင်’ တစ်ဦး ဖြစ်လာလိမ့်မည်ဟု ထင်ထားခဲ့သော်လည်း... သူ့ကို အလွယ်တကူ အနိုင်ယူနိုင်ရုံသာမက သူ၏ အဖိုးတန် မိစ္ဆာနတ်ဘုရားလက်နက် နှစ်ခုကိုပါ အလွယ်တကူ သိမ်းယူနိုင်သော လူငယ်တစ်ဦးနှင့် တွေ့ရလိမ့်မည်ဟု မည်သည့် အခါမျှ မတွေးခဲ့ဖူးပေ။

“ဒီလူက ဘယ်သူလဲ။ ဘာလို့ ဒီလောက် ကြောက်စရာကောင်းနေတာလဲ။ မဖြစ်နိုင်တာ... အမှန်တရား လမ်းစဉ်နှင့် မိစ္ဆာလမ်းစဉ် တိုက်ပွဲကြီးပြီးနောက် မဟာကမ္ဘာကြီးမှာ တာအို ပညာရပ်တွေရဲ့ အနှစ်သာရတွေ အကုန်ပျောက်ကွယ်သွားပြီပဲ။ ဘယ်လိုလုပ် ဒီလို ပညာရှင်မျိုး ရှိနေရတာလဲ။”

‘အရိုးဖြူပညာရှင်’ ၏ အတွေးစများမှာ ခဏတာ ဇဝေဇဝါ ဖြစ်သွားခဲ့သည်။ ၎င်းမှာ ပုရွက်ဆိတ်တစ်ကောင်ကို နင်းသတ်ရန် ပြင်ဆင်နေသော ဆင်ကြီးတစ်ကောင်သည် ထိုပုရွက်ဆိတ်မှာ ရှေးဟောင်း နဂါးကြီးတစ်ကောင်အဖြစ် ရုတ်တရက် ပြောင်းလဲသွား သည်ကို တွေ့လိုက်ရသကဲ့သို့ပင်။

ထိုစဉ် သူသည် ဟုန်ယွိ၏ သက်ပြင်းချသံနှင့် ဟိန်းဟောက်သံကို ကြားလိုက်ရသည်။

ဖူး…

အရိုးဖြူပညာရှိသည် ဒေါသကြောင့် သွေးဖြူများပင် အန်ထွက်မတတ် ဖြစ်သွားခဲ့သည်။

“ငါ့ကို တစ်ကွက်တည်းနဲ့ သတ်မယ်တဲ့လား၊ မင်းက ငါ့ကို တို့ဖူးတုံးများ အောက်မေ့နေ လား။ ဒါမှမဟုတ် မင်းကိုယ်မင်း ရှေးဟောင်း ယန်နတ်ဘုရားတစ်ပါလို့ ထင်နေတာလား။ ဒါမှမဟုတ် ဧကရာဇ်ချန်ရှန်း ပြန်လည်ရှင်သန်လာတာလား၊ ‘ဧကရာဇ်ဖန်’ ပြန်လည် မွေးဖွားလာတာလား၊ ‘အလယ်ခေတ်’ ပညာရှင် သူတော်စင်တွေတောင် ငါ့ကို တစ်ကွက် တည်းနဲ့ သတ်နိုင်တယ်လို့ မပြောရဲဘူး။” ဤမိစ္ဆာအိုကြီး ‘အရိုးဖြူပညာရှင်’ မှာ သူ၏ မိစ္ဆာနှလုံးသားကိုပင် ထိန်းချုပ်နိုင်စွမ်း မရှိတော့ဘဲ ဒေါသများ ပေါက်ကွဲနေသည်။

ဤဒေါသမှာ သေးငယ်သော အရာမဟုတ်ပေ။

သို့သော် သူသည် အစွမ်းကုန် ထွက်ပြေးနေသော်လည်း နောက်ဘက်မှ အရှိန်အဟုန်ဖြင့် တိုးဝင်လာသော ပြင်းထန်သော အငွေ့အသက်ကို ခံစားနေရဆဲ ဖြစ်သည်။ ၎င်းမှာ ပို၍ ပို၍ နီးကပ်လာသည်။ မျက်စိတစ်မှိတ်အတွင်းမှာပင် ပြင်းထန်လှသော စွမ်းအားလှိုင်းကြီးတစ်ခု သည် သူ့နောက်ကျောသို့ ရိုက်ခတ်လာသည်။ သူ၏ နှလုံးသားမှာ အေးစက်သွားခဲ့သည်။ ဤအချိန်၌ ဟုန်ယွိ၏ မှော်ပညာများသည် မည်မျှပင် နက်နဲကျယ်ပြောလှသည်ကို သူ ကောင်းကောင်းကြီး သိမြင်လိုက်ရလေပြီ။

ဟုန်ယွိသည် ရှေးဟောင်း ယန်နတ်ဘုရား ပညာရှင်တစ်ဦး ပြန်လည်ရှင်သန်လာခြင်း ဖြစ်မည်ဟုပင် သူ သံယယဝင်မိသည်။ သို့မဟုတ်လျှင် သူ၏ တာအိုပညာရပ်များဖြင့် ဤကဲ့သို့ ပြန်လည်တိုက်ခိုက်နိုင်စွမ်းပင် မရှိဘဲ အရှက်တကွဲ ဖြစ်နေစရာ အကြောင်း မရှိပေ။

သို့သော် သူ အဖြေကို ခန့်မှန်းရန် အချိန်မရလိုက်ပေ။ အဘယ်ကြောင့်ဆိုသော် ဟုန်ယွိ သည် ခြေတစ်လှမ်းဖြင့် မိုင်ပေါင်းများစွာကို ဖြတ်ကျော်ကာ သူ၏ နောက်ဘက်သို့ ချက်ချင်း ရောက်ရှိလာပြီး လက်ဝါးဖြင့် ရိုက်ချလိုက်သောကြောင့် ဖြစ်သည်။

လက်ဝါးစွမ်းအားမှာ ဟိန်းထွက်လာပြီး ဗုဒ္ဓလက်ဝါး၏ အစွမ်းထက်ဆုံး တံဆိပ်တော်သုံးခု ဖြစ်သော မဟာတံဆိပ်၊ လွတ်မြောက်ခြင်းတံဆိပ်နှင့် ပါရမီတံဆိပ်တော်တို့ပင် ဖြစ်သည်။

စ္စုပ္ပန်ကို စိုးမိုးထားသော ဧရာမစွမ်းအားကြီးသည် ကမ္ဘာဦး မူလနဝမချောက်နက် နတ်ဘုရားနယ်မြေ၏ ပဉ္စမမြောက်အဆင့် ‘အကန့်သတ်မဲ့သမုဒ္ဒရာ’ ထက်သို့ ထပ်မံ ကျရောက်လာခဲ့ပြန်သည်။

...

“အရိုးဖြူကျမ်း... ဝိညာဉ်ဝါးမျိုခြင်း တာအိုသစ်သီး။”

ရှောင်လွှဲ၍မရသော တိုက်ခိုက်မှုနှင့် ရင်ဆိုင်ရသည့်အခါ ‘အရိုးဖြူပညာရှင်’ သည် သူ၏ မိစ္ဆာနှလုံးသားကို အသက်သွင်းရန်မှတစ်ပါး အခြားရွေးချယ်စရာ မရှိတော့ပေ။ အသက်နှင့်လဲ၍ တိုက်ခိုက်မည်ဟူသော ကြောက်မက်ဖွယ် အတွေးတစ်ခုသည် သူ၏ နှလုံးသားထဲတွင် ပေါ်ပေါက်လာပြီး... သူက လှည့်ကြည့်ကာ ပြင်းထန်လှသော အရိုးဖြူ စွမ်းအင်များကို စုစည်းလိုက်တော့သည်။

ဟိန်းဟောက်သံနှင့်အတူ မူလက ဖြူဖွေးနေသော စွမ်းအားများသည် ခရမ်းညိုရောင် မိစ္ဆာအသွင်သို့ ပြောင်းလဲသွားပြီး၊ ထူးဆန်းလှသော ပုံသဏ္ဌာန်ရှိကာ ချွန်ထက်သော အရိုးဆူးများဖြင့် ဖုံးလွှမ်းနေသည့် သစ်သီးတစ်လုံးအဖြစ် ဖြစ်ပေါ်လာသည်။

ဤသစ်သီးမှာ မိစ္ဆာလမ်းစဉ် တာအိုပညာရပ်များထဲတွင် ကမ္ဘာကြီးကို တုန်လှုပ်စေနိုင်သော အောင်မြင်မှုတစ်ခု ဖြစ်သည်။ ၎င်းမှာ မိစ္ဆာလမ်းစဉ်၏ ကြီးမြတ်သော ‘တာအိုသစ်သီး’ ဆယ်ခုထဲမှ တစ်ခုဖြစ်သော ‘ဝိညာဉ်ဝါးမျိုးခြင်း တာအိုသစ်သီး’ ဖြစ်သည်။ ၎င်းမှာ ‘ကောင်းကင်မိစ္ဆာ တာအိုသစ်သီး’ ထက်ပင် ပို၍ နက်နဲလှသည်။

‘ဝိညာဉ်ဝါးမျိုးခြင်း တာအိုသစ်သီး’ ကို ‘အရိုးဖြူပညာရှင်’ က ပစ်လွှတ်လိုက်ရာ ‘ဗုဒ္ဓလက်ဝါး’ ၏ တံဆိပ်တော်သုံးခုနှင့် အတိအကျ တိုက်မိသွားခဲ့သည်။

ဒိုင်း…

အမှန်နှင့်အမှား၊ အဖြူနှင့်အမည်း တာအိုပညာရပ် နှစ်ခုသည် ပင်လယ်ပြင်ထက်တွင် ထိပ်တိုက် ဆုံမိကြသည်။ အမှန်တရားလမ်းစဉ်နှင့် မိစ္ဆာလမ်းစဉ်တို့၏ တိုက်ပွဲကြောင့် ပင်လယ်ရေများသည် ပေပေါင်းများစွာ မြင့်တက်လာခဲ့ပြီး ပင်လယ်တွင်းရှိ ငါး၊ ပုစွန်များနှင့် မိစ္ဆာသတ္တဝါများမှာလည်း တုန်ခါမှုကြောင့် သေဆုံးကုန်ကြသည်။

ဟုန်ယွိသည် မိစ္ဆာနဂါးများနှင့် ပင်လယ်သတ္တဝါများ၏ အလောင်းများ၊ အသားစများနှင့် အင်္ဂါအစိတ်အပိုင်းများမှာ ပင်လယ်ရေများနှင့်အတူ လေထဲတွင် လွင့်ပျံနေသည်ကို မြင်လိုက်ရသည်။

‘အရိုးဖြူပညာရှင်’ မှာ နောက်တစ်ကြိမ် လွင့်ထွက်သွားခဲ့ပြန်သည်။ အတွေးစ ၁၀၀,၀၀၀ ကျော်မှာလည်း လုံးဝ ဖရိုဖရဲ ဖြစ်သွားခဲ့သည်။ ‘ဝိညာဉ်ဝါးမျိုခြင်း တာအိုသစ်သီး’ မှာ တစ်ချက်တည်းဖြင့် ကြေမွသွားပြီး ပြင်းထန်သော အရိုးဖြူစွမ်းအားများအဖြစ် ပြောင်းလဲ သွားသည်။ ထိုပေါက်ကွဲသွားသော စွမ်းအားများသည် ‘အရိုးမိစ္ဆာကျွန်း’ အဖြစ် ထပ်မံ ပြောင်းလဲသွားခဲ့သည်။

ဟုန်ယွိသည် ‘သူတော်စင်ပေါင်းစုံခန်းမ’ ၏ ထူထပ်သော မှော်စွမ်းအားများကို အသုံးပြု၍ ထိပ်တိုက် တိုက်ခိုက်လိုက်ရာ ‘အရိုးဖြူပညာရှင်’ ၏ အတွေးစများကို ‘အရိုးမိစ္ဆာကျွန်း’ ထံ မှ အတင်းအဓမ္မ ခွာထုတ်ပစ်လိုက်နိုင်သည်။

“ဝိညာဉ်ဝါးမျိုခြင်း တာအိုသစ်သီး’ က လိုအပ်ချက် ရှိနေသေးတာပဲ။ ဒါပေမဲ့ ခင်ဗျားက မိစ္ဆာလမ်းစဉ်ရဲ့ တာအိုသစ်သီး ဆယ်ခုစလုံးကို သန့်စင်ပြီး ‘ဖန်ဆင်းရှင်’ တစ်ဦး ဖြစ်လာရင် တောင် ကျုပ်ကို ယှဉ်နိုင်မှာ မဟုတ်ဘူး၊ ဒီအရိုးကျွန်းကိုတော့ ကျုပ် အရင် ယူထားလိုက် မယ်။” ဟုန်ယွိက ဘာမှ ထပ်မစဉ်းစားတော့ပေ။ သူ၏ ခန္ဓာကိုယ်တစ်ခုလုံးမှာ အနှိုင်းမဲ့ ရှိန်ဝါများဖြင့် လေထဲတွင် လွင့်မျောနေပြီး ‘အရိုးမိစ္ဆာကျွန်း’ ကို သိမ်းဆည်းရန် ပြင်လိုက် သည်။

ဒဏ္ဍာရီအရ မိစ္ဆာလမ်းစဉ်တွင် ကြီးမြတ်သော ‘တာအိုသစ်သီး’ ဆယ်ခု ရှိသည်ဟု ဆိုကြ သည်။ အကယ်၍ တစ်ယောက်ယောက်က မိစ္ဆာဂိုဏ်းအားလုံးကို ပေါင်းစည်းနိုင်ပြီး ဤသစ်သီးဆယ်မျိုးလုံးကို သန့်စင်နိုင်ခဲ့လျှင်၊ အစွန်းရောက် မိစ္ဆာလမ်းစဉ်မှတစ်ဆင့် ဖန်ဆင်းရှင် ဖြစ်လာနိုင်သည်။

‘ဝိညာဉ်ဝါးမျိုခြင်း တာအိုသစ်သီး’ နှင့် ‘ကောင်းကင်မိစ္ဆာ တာအိုသစ်သီး’ တို့မှာ ထိုဆယ်မျိုးထဲတွင် ပါဝင်သည်။ အခြား ရှစ်မျိုးမှာ ‘ကောင်းကင်မိစ္ဆာဂိုဏ်း’ ၊ ‘သွေးရိပ်ဂိုဏ်း’ နှင့် အခြားဂိုဏ်းများ၏ ဂိုဏ်းစောင့်ကျမ်းစာများထဲတွင် ရှိနေကြသည်။

ရှေးခေတ်ကတည်းက မည်သူတစ်ဦးတစ်ယောက်မျှ မိစ္ဆာဂိုဏ်းအားလုံးကို စည်းလုံးစေပြီး ထိုသစ်သီးဆယ်ခုစလုံးကို မစုစည်းနိုင်ခဲ့ကြပေ။ မိစ္ဆာလမ်းစဉ်၏ ‘ဖန်ဆင်းရှင်’ တစ်ဦး ဖြစ်လာခြင်းမှာ မိစ္ဆာလမ်းစဉ်၏ တပည့်တစ်ဦး ဖြစ်လာခြင်းနှင့် တူညီပေသည်။

ဟုန်ယွိသည် မိစ္ဆာဂိုဏ်းများကို စည်းလုံးရန် ဆန္ဒမရှိသော်လည်း ထိုသစ်သီး ဆယ်ခုစလုံး ကို စုစည်းလိုက်လျှင် မည်သို့ဖြစ်လာမည်ကို သိလိုသည်။ ၎င်းမှာ သူ၏ ကျင့်ကြံမှုအတွက် ကြီးမားသော အထောက်အပံ့ ဖြစ်ပေလိမ့်မည်။

သူသည် ‘ကောင်းကင်နတ်ဆိုး တာအိုသစ်သီး’ သန့်စင်နည်းကို ရရှိထားပြီး ဖြစ်သည်။ ယခု သူသည် ‘အရိုးဖြူပညာရှင်’ ကို ဖမ်းဆီးပြီး ‘သူရဲကောင်းမှတ်တမ်း’ ထဲတွင် သန့်စင်လိုက် လျှင် ‘ဝိညာဉ်ဝါးမျိုးခြင်း တာအိုသစ်သီး’ စုစည်းနည်းကိုလည်း သဘာဝအတိုင်း ရရှိပေလိမ့် မည်။ (‘ကောင်းကင်နတ်ဆိုး တာအိုသစ်သီး’ မှာ မိစ္ဆာမျောက်ဝံကြီးပါ့ထံမှ ရရှိခဲ့တာ ဖြစ်နိုင်ပြီး ချန်ယင်းရှာကို ပေးခဲ့သည်။)

ဟုန်ယွိ၏ ခန္ဓာကိုယ်မှ ကြီးမားလှသော မှော်စွမ်းအားများ ပေါက်ကွဲထွက်လာပြီး ‘အရိုးမိစ္ဆာ ကျွန်း’ ကို ခဏချင်းအတွင်း ရစ်ပတ်လိုက်သည်။ သူသည် ၎င်းကို ရက်ရက်စက်စက် သန့်စင်လိုက်ပြီး ကျုံ့ဝင်စေကာ ‘သူတော်စင်ပေါင်းစုံခန်းမ’ ထဲသို့ အတင်းကြပ် ဆွဲသွင်းလိုက်သည်။

တစ်ချိန်တည်းမှာပင် ဟုန်ယွိက လက်တစ်ချက် ဝှေ့ယမ်းလိုက်ပြီး ထိုက်ကျိနတ်ဘုရား မိုးကြိုး တစ်စင်းကို ပစ်လွှတ်လိုက်သည်။

မျက်စိတစ်မှိတ်အတွင်းမှာပင် မိုးကြိုးလုံးမှာ မိုးကြိုးတောင်ကြီးတစ်ခုအဖြစ် ပြောင်းလဲ သွားပြီး ‘အရိုးဖြူပညာရှင်’ ဆီသို့ တဟုန်ထိုး တိုက်ခိုက်သွားခဲ့သည်။

“ကျုပ် ခင်ဗျားကို တစ်ကွက်တည်းနဲ့ သတ်မယ်လို့ ပြောရင် သတ်မှာပဲ။” ဟုန်ယွိက ဝင့်ကြွားစွာ ဆိုလိုက်သည်။ “ခင်ဗျားမှာ စွမ်းရည်ရှိရင် ထိပ်တိုက် ရင်ဆိုင်ကြည့်စမ်း။”

ထိုအချိန်မှာပင် ဝေးလံသော အရပ်မှ တုန်လှုပ်ချောက်ချားဖွယ်ကောင်းသော သွေးနီရောင် သက်တံကြီးတစ်ခုသည် ကောင်းကင်သို့ ပျံတက်လာပြီး သွေးရောင်အသီးတစ်လုံးအဖြစ် ပြောင်းလဲကာ မိုးကြိုးတောင်ကြီးနှင့် အပြင်းအထန် တိုက်မိခဲ့သည်။ တစ်ချိန်တည်းမှာပင် အလွန်တောက်ပသော မိစ္ဆာအငွေ့အသက်တစ်ခုမှာလည်း တိုးဝင်လာပြီး ၎င်းမှာလည်း ‘တာအိုသစ်သီး’ တစ်ခုအဖြစ် ပြောင်းလဲသွားခဲ့သည်။

“သွေးနတ်ဘုရား တာအိုသစ်သီး။”

“ကောင်းကင်မိစ္ဆာ တာအိုသစ်သီး။”

နောက်ထပ် မိစ္ဆာအိုကြီး နှစ်ဦး ပေါ်လာပြန်ပြီ။