အခန်း (၁၀၉-၁၁၀)

အခန်း။ ၁၀၉

ဆိတ်ငြိမ်သော တောင်ကြားတစ်ခုသို့ ရောက်ရှိသောအခါ ကုယွမ်သည် အနားယူရန် ထိုင်လိုက်ပြီး သူ၏ မျက်ဝန်းများမှာ စဉ်းစားခန်း ဝင်နေတော့သည်။

"ကြယ်စင်မြစ်ဓားဂိုဏ်းရဲ့ အမာခံတပည့် တွမ့်ချန်လား နောက်ပြီး ဂူနတ်ဘုရားဂိုဏ်းက ပေါင်

ချန်... ဒီနတ်ဘုရားဂိုဏ်းကြီးတွေက အထူးပုဂ္ဂိုလ်တွေတောင် ရှန်းယန်ခရိုင်ထဲကို ရောက်လာကြပြီပဲ။ ဆေးဘုရင်တောင်တန်းက ပညာရှင်တွေရော ရောက်လာကြပြီလား မသိဘူး"

"ထားလိုက်ပါတော့လေ... သူတို့ ရောက်လာတာဖြစ်ဖြစ် မရောက်လာတာပဲဖြစ်ဖြစ် ငါနဲ့တော့ သိပ်မဆိုင်ပါဘူး"

ကုယွမ်သည် ခေါင်းခါယမ်းကာ ဆက်မတွေးတော့ဘဲ သေတ္တာတစ်လုံးကို ထုတ်လိုက်သည်။

သေတ္တာကို ဖွင့်လိုက်သောအခါ ကြက်ဥအရွယ်အစားခန့်ရှိပြီး အပြစ်အနာအဆာကင်းသော ကျောက်စိမ်းကဲ့သို့ တောက်ပနေသည့် စိမ်းပြာရောင် ကျောက်စိမ်းဥလေးတစ်လုံး ပေါ်လာသည်။

၎င်းဥလေးဆီမှ ဖျော့တော့သော စိမ်းပြာရောင် အလင်းတန်းများ ဖြာထွက်နေသည်။

၎င်းမှာ စိမ်းပြာရောင်ရိပ် ဓားလိပ်ပြာဥပင်။

ပြီးခဲ့သော ဆယ်ရက်အတွင်း သူသည် တာအိုအနှစ်သာရအမှတ်လေးသောင်းကျော်ကို ပင်ပင်ပန်းပန်း စုဆောင်းခဲ့ပြီး ယခုအချိန်မှာတော့ ဤလိပ်ပြာဥကို အကောင်ဖောက်ရန် အချိန်ကျရောက်လာပြီ ဖြစ်သည်။

[သင်သည် စိမ်းပြာရောင်ရိပ် ဓားလိပ်ပြာဥ (ရွှေရောင်အဆင့်) ကို ရရှိထားသည်။ ၎င်းကို အကောင်ဖောက်ရန် တာအိုအနှစ်သာရအမှတ် ၁၃၀၀ အသုံးပြုလိုပါသလား]

[ဤဥ၏ အသက်ဓာတ်မှာ အားနည်းနေပြီး အဆီအနှစ် မလုံလောက်သဖြင့် အကောင်ဖောက်ရာတွင် ကျရှုံးရန် ၉၉ ရာခိုင်နှုန်း သေချာနေသည်။ အဆီအနှစ် ပြန်လည်ဖြည့်တင်းရန် တာအိုအနှစ်သာရအမှတ် ၃၉၀၀ အသုံးပြုရန် လိုအပ်သည်။

အတည်ပြုမလား ငြင်းမလား]

"အတည်ပြုမယ်"

ကုယွမ်၏ အကြည့်မှာ တည်ငြိမ်နေပြီး စိတ်ကို ပြတ်ပြတ်သားသား ဆုံးဖြတ်ထားပြီးသား ဖြစ်သည်။

ထို့နောက် ဝိညာဉ်အိမ်မွေးတိရစ္ဆာန်စနစ်ထဲမှ တာအိုအနှစ်သာရအမှတ် ၃၉၀၀ နုတ်ယူခြင်း ခံလိုက်ရသည်။

သူ့ရှေ့ရှိ လိပ်ပြာဥလေးမှာ စင်ကြယ်ပြီး တက်ကြွသော အဖြူရောင် အလင်းတန်းများဖြင့် ဖုံးလွှမ်းသွားတော့သည်။

ထိုအလင်းတန်းများက ဥအတွင်းသို့ ဆက်တိုက် စိမ့်ဝင်သွားရာ လိပ်ပြာဥအတွင်းရှိ အားနည်းနေသော အသက်ဓာတ်မှာ တဖြည်းဖြည်း သန်မာလာသည်ကို ကုယွမ် ဝေဝေဝါးဝါး ခံစားလိုက်ရသည်။

အဖြူရောင်အလင်းများ ကျောက်စိမ်းဥအတွင်းသို့ လုံးဝ ပေါင်းစပ်သွားသောအခါ စိမ်းပြာရောင် ကျောက်စိမ်းဥ မျက်နှာပြင်တွင် ကြွယ်ဝသော စိမ်းပြာရောင် အလင်းတန်းများ လှိုင်းထလာတော့သည်။

၎င်းမှာ ကျောက်စိမ်းကဲ့သို့ ချောမွေ့တောက်ပနေသော်လည်း ထက်မြက်သော အငွေ့အသက်များကို ဖုံးကွယ်ထားသည်။ မကြာမီမှာပင် စူးရှသော စွမ်းအင်အချို့ စိမ့်ထွက်လာတော့သည်။

စင်ကြယ်ပြီး ထက်မြက်လှသော ဓားဆန္ဒတစ်ခု ဥအတွင်း၌ ကိန်းအောင်းနေသကဲ့သို့ပင်။ ထိုဓားဆန္ဒမှာ အလွန်ပင် စင်ကြယ်စူးရှလှသဖြင့် လောကကြီး၏ အတားအဆီးအားလုံးကို ဖြတ်တောက်နိုင်စွမ်း ရှိပုံပင်။

ထိုဓားဆန္ဒ၏ နက်နဲမှုကြောင့် ကုယွမ်သည် တစ်စုံတစ်ခုကို ထိုးထွင်းသိမြင်သွားကာ သူကျင့်ကြံထားသော အသက်နှုတ်ဓားကျမ်းကို လှုံ့ဆော်ပေးသကဲ့သို့ ဖြစ်သွားသည်။ စိတ်ကူးစိတ်သန်းများ ပွင့်လင်းလာပြီး ဓားကျမ်း၏ အနှစ်သာရများမှာ သူ၏ စိတ်ထဲတွင် ပိုမိုကြည်လင်လာကာ တဖြည်းဖြည်း စီးဆင်းလာတော့သည်။

သူ၏ အသက်နှုတ်ဓားကျမ်းအပေါ် နားလည်မှုနှင့် အမြင်များမှာ ပိုမိုနက်ရှိုင်းလာသည်ကို ကုယွမ် ခံစားနေရသည်။

ကျောက်စိမ်းဥအတွင်းရှိ စိမ်းပြာရောင်ရိပ် ဓားလိပ်ပြာသည် ရှေးဟောင်းထူးဆန်းသော ပိုးမွှားတစ်မျိုးဖြစ်သည့် စိမ်းပြာရောင်ကျောက်စိမ်း ဓားလိပ်ပြာ၏ မျိုးဆက်ဖြစ်သည်မှာ အမှန်ပင်။ ဥဘဝမှာတင် ဤမျှလောက်သော ဝိညာဉ်အာရုံ တုံ့ပြန်မှုမျိုး ရှိနေခြင်းပင်။

ယခု ဤလိပ်ပြာဥလေး၏ အခြေအနေမှာ အစောပိုင်းက ဥအတွင်းရှိ အသက်ဓာတ်မှာ လေအဝှေ့တွင် ငြိမ်းလုနီးပါးဖြစ်နေသော ဖယောင်းတိုင်မီးကဲ့သို့ ဖြစ်နေခဲ့လျှင် ယခုမူ မီးဖိုတစ်ခုကဲ့သို့ အားကောင်းမောင်းသန် ဖြစ်နေပြီဖြစ်သည်။

ဥခွံအောက်တွင် သက်ရှိတစ်ခုမှာ ရှင်သန်ကြီးထွားနေပြီး အချိန်မရွေး ဥခွံကို ခွဲထွက်ကာ ဘဝသစ်တစ်ခုကို စတင်ရန် အဆင်သင့် ဖြစ်နေတော့သည်။

[ဥ၏ အဆီအနှစ်ကို ဖြည့်တင်းပြီးပါပြီ။ အကောင်ဖောက်လိုပါသလား]

"ဖောက်မယ်"

ကုယွမ်သည် သူ၏ စိတ်ထဲမှ ထပ်မံ အတည်ပြုလိုက်သည်။

တာအိုအနှစ်သာရအမှတ် ၁၃၀၀ ထပ်မံ နုတ်ယူခံရပြီးနောက် နောက်တစ်စက္ကန့်တွင် သူ၏ လက်ထဲရှိ လိပ်ပြာဥမှ အလင်းရောင်မှာ ရုတ်တရက် မှိန်သွားပြီး စိမ်းပြာရောင် အလင်းများမှာ အတွင်းဘက်သို့ ပြန်လည် ကျုံ့ဝင်သွားတော့သည်။

ကွဲ...

ရုတ်တရက် ကျောက်စိမ်းဥ မျက်နှာပြင်ပေါ်တွင် အက်ကြောင်းလေးတစ်ခု ပေါ်လာသည်။

ကွဲ... ဂျောက်... ဂျောက်...

အက်ကြောင်းမှာ ပိုမိုကျယ်ပြန့်လာပြီး အခြားသော အက်ကြောင်းများစွာလည်း ထပ်မံ ပေါ်ထွက်လာကာ ဥတစ်လုံးလုံးသို့ ပျံ့နှံ့သွားတော့သည်။ အက်ကွဲသံများလည်း တဂျောက်ဂျောက် ထွက်ပေါ်လာသည်။

ချက်ချင်းဆိုသလိုပင် ကျောက်စိမ်းဥ မျက်နှာပြင်မှာ ကွဲအက်သွားပြီး အထဲမှ စိမ်းပြာရောင် ကျောက်စိမ်းရောင်ရှိသော ဖိုင့်ဖိုင့်ထွားထွား ပိုးကောင်လေးတစ်ကောင် တွားသွားကာ ထွက်လာတော့သည်။

ဤစိမ်းပြာရောင် ပိုးကောင်လေးမှာ လက်မခန့် အထူရှိပြီး ဝဝဖိုင့်ဖိုင့်နှင့် ခူကောင်တစ်ကောင်နှင့် တူသော်လည်း တစ်ကိုယ်လုံးမှာ ကြည်လင်တောက်ပနေသည်။ ၎င်း၏ ကိုယ်ပေါ်တွင် အနက်ရောင်နှင့် မီးခိုးရောင် ရောယှက်နေသော အစင်းကြောင်းလေးအချို့ ပါရှိကာ ချစ်စရာကောင်းသော အမူအရာလေးကို ဆောင်နေတော့သည်။

ကျောက်စိမ်းဥခွံထဲမှ တိုးထွက်လာပြီးနောက် အကောင်လေးသည် ကုယွမ့်ကို တစ်ချက်ကလေးမျှ လှည့်မကြည့်ဘဲ ဥခွံကိုသာ ဂျွတ်... ဂျွတ်... နှင့် မြိန်ရေယှက်ရေ ကိုက်စားနေတော့သည်။

ကျောက်စိမ်းဥထဲမှ ထွက်လာသည်မှာ စိမ်းပြာရောင်ရိပ် ဓားလိပ်ပြာ မဟုတ်ဘဲ စိမ်းပြာရောင် ပိုးကောင်လေးတစ်ကောင် ဖြစ်နေသည်ကို ကုယွမ် မအံ့ဩမိပေ။

လိပ်ပြာဆိုသည်မှာ အကောင်ကြီးဘဝဖြစ်ပြီး ယခု သူ၏ရှေ့မှ ပိုးကောင်လေးမှာမူ လိပ်ပြာအဖြစ် မပြောင်းလဲမီ ကြီးထွားမှုအဆင့်ဖြစ်သည့် ခူကောင်ဘဝပင်။

ခူကောင်လေးသည် အတိုင်းအတာတစ်ခုအထိ ကြီးထွားလာပြီးမှ ပိုးအိမ်ဖွဲ့ကာ ထို့နောက်မှသာ လိပ်ပြာအဖြစ် အသွင်ပြောင်းလဲမည် ဖြစ်သည်။

စိမ်းပြာရောင်ရိပ် ဓားလိပ်ပြာသည် ရှေးဟောင်းထူးဆန်းသည့် စိမ်းပြာရောင်ကျောက်စိမ်း ဓားလိပ်ပြာ၏ မျိုးဆက်ဖြစ်သော်လည်း သူသည်လည်း ဤသဘာဝဖြစ်စဉ်ကိုမူ ဖြတ်သန်းရမည်သာ ဖြစ်သည်။

[စိမ်းပြာရောင်ရိပ် ဓားလိပ်ပြာ အကောင်ဖောက်ခြင်း အောင်မြင်သည်]

[စိမ်းပြာရောင်ရိပ် ဓားလိပ်ပြာ (ရွှေရောင်အဆင့်)]

[ဖော်ပြချက် - ထိုသတ္တဝါသည် ရှေးဟောင်းထူးဆန်းပိုးမွှား စိမ်းပြာရောင်ကျောက်စိမ်း ဓားလိပ်ပြာ၏ မျိုးဆက်ဖြစ်ပြီး လောကတွင် ရှားပါးလှသော ဝိညာဉ်လိပ်ပြာမျိုးနွယ်ဖြစ်ကာ မွေးရာပါ ထက်မြက်သော ဓားတာအို နတ်ဘုရားအတတ်ပညာများကို ပိုင်ဆိုင်သည်။

အတောင်ပံကို တစ်ချက်ခတ်ရုံဖြင့် စူးရှသော စိမ်းပြာရောင်ကျောက်စိမ်း ဓားအရှိန်အဝါများကို ထုတ်လွှတ်နိုင်ပြီး ဓားတစ်လက်ဖြင့် အတတ်ပေါင်းစုံကို ဖြိုခွင်းနိုင်ခြင်းဟူသော ကြောက်မက်ဖွယ် စွမ်းရည်ရှိသည်။

လောလောဆယ်တွင် ပိုးလောင်းအဆင့်သာ ရှိသေးသော်လည်း ဓားအလင်းတန်းများကို မှုတ်ထုတ်နိုင်ပြီး ထူးခြားသော နတ်ဘုရားအတတ်ပညာများကို ပိုင်ဆိုင်ထားဆဲပင်။

စိမ်းပြာရောင်ကျောက်စိမ်း ဓားလိပ်ပြာအဖြစ်သို့ ဆင့်ကဲပြောင်းလဲရန်မှာ ၎င်းသည် အကောင်ကြီးဘဝသို့ ရောက်ရှိရန် လိုအပ်ပြီး တာအိုအနှစ်သာရအမှတ် ၁၆၀,၀၀၀ အသုံးပြုရမည် ဖြစ်သည်]

[အခြေအနေ - ပုံမှန်]

[အဆင့် - ကြီးထွားမှုအဆင့် (၁%)]

...

"တာအိုအနှစ်သာရအမှတ် - ၁၆၀၀၀၀.."

သူ့ရှေ့မှာ ဥခွံကို တဂျွတ်ဂျွတ် ကိုက်စားနေသည့် ဓားလိပ်ပြာ ပိုးလောင်းလေးကို ကြည့်ရင်း ကုယွမ်တစ်ယောက် စကားလုံးမရှိလောက်အောင် အံ့ဩသွားရသည်။

စိမ်းပြာရောင်ရိပ် ဓားလိပ်ပြာကို အဆင့်မြှင့်တင်ရန်အတွက် တာအိုအနှစ်သာရအမှတ် ၁၆၀၀၀၀ ဆိုသည်မှာ တကယ့်ကို မယုံနိုင်စရာ ပမာဏကြီးပင်။

“နှမြောစရာပဲ... ဒါက ငါ့ရဲ့ ဝိညာဉ်အိမ်မွေးတိရစ္ဆာန် မဟုတ်သေးလို့ပဲ။ မဟုတ်ရင် ငါ သူ့ရဲ့ ပါရမီကို ရနေလောက်ပြီ”

ကုယွမ်က ဓားလိပ်ပြာလေးကို ကြည့်ရင်း ရင်ထဲ၌ စိတ်အားထက်သန်နေမိသည်။

“မင်း... ဒီလောက်မြန်မြန် အကောင်ဖောက်နိုင်လိမ့်မယ်လို့ ငါ မထင်ထားဘူး”

နူးညံ့ပြီး မိန်းမဆန်သော အသံတစ်သံ ကုယွမ့်ဘေးမှ ထွက်ပေါ်လာသည်။ သူ ခေါင်းလှည့်ကြည့်လိုက်သောအခါ ဘယ်အချိန်ကတည်းက ရောက်ရှိနေမှန်းမသိသည့် အလွန်လှပသော ပုံရိပ်တစ်ခုကို သူ့ဘေးတွင် တွေ့လိုက်ရသည်။

၎င်းမှာ ပြီးခဲ့သည့်တစ်ခေါက်က တွေ့ဆုံခဲ့သည့် ချင်အမည်ရှိသော အမျိုးသမီးပင်။

“အော်... နတ်မိမယ်ချင်ပါလား”

ထိုအမျိုးသမီးကတော့ တကယ့်ကို ထူးဆန်းကာ ဓားလိပ်ပြာလေး အကောင်ဖောက်သည်နှင့် ချက်ချင်း ရောက်ရှိလာတော့သည်။

ကုယွမ်က ယဉ်ယဉ်ကျေးကျေးပင် ခေါင်းညိတ်နှုတ်ဆက်လိုက်ကာ “ကျွန်တော် တာဝန်ကျေခဲ့ပါတယ်။ ကံကောင်းလို့ပဲ ပြောရမလားပါပဲ”

ချင်ဟုန်ရှောင်က လက်ယပ်ခေါ်လိုက်သည့်အခါ ဥခွံများကို စားသောက်ပြီး ပိုမိုထွားကျိုင်းလာသော စိမ်းပြာရောင် ပိုးကောင်လေးမှာ သူမ၏ လက်ဝါးထဲသို့ ကျဆင်းသွားသည်။

သူမ၏ လက်ထဲမှ ပိုးကောင်လေးဆီမှ တက်ကြွသော အသက်ဓာတ်နှင့် သိမ်မွေ့သော်လည်း စင်ကြယ်လှသည့် ဓားဆန္ဒကို ခံစားလိုက်ရသည့်အခါ သူမ တကယ့်ကို အံ့ဩသွားရသည်။

သူမက ကုယွမ့်ကို လေးလေးနက်နက် ကြည့်ပြီး ပြောလိုက်သည်။

“အမှန်အတိုင်း ပြောရရင်... မင်း ဒါကို အကောင်ဖောက်နိုင်ခဲ့တာကို ငါ တကယ် အံ့ဩမိတယ်”

ချင်ဟုန်ရှောင် တကယ်ပင် အံ့ဩမိခြင်းဖြစ်သည်။

တာအိုလောကမှ သူမ၏ ရင်းနှီးသော မိတ်ဆွေများပင်လျှင် ဤဥကို အကောင်ဖောက်ရန် နည်းလမ်းမရှိဘူးဟု ပြောခဲ့ကြခြင်းပင်။

ကုယွမ့်ကို ပေးအပ်ခဲ့စဉ်ကလည်း မျှော်လင့်ချက် သိပ်မထားဘဲ တကယ်လို့များ အောင်မြင်ခဲ့လျှင် အံ့ဩစရာလေး ဖြစ်မည်ဟူသော စိတ်ဖြင့် ပေးခဲ့ခြင်းဖြစ်သည်။

"အခုတော့ တာအိုလောကထဲကို ခြေတစ်ဖက်တောင် မချရသေးတဲ့ ဒီသာမန်လူသားလေးက အောင်မြင်အောင် လုပ်ပြသွားတာပဲလား။ ဒါက ကုယွမ်ရဲ့ ဝိညာဉ်သားရဲ ပြုစုပျိုးထောင်တဲ့ပညာက ငါ့သူငယ်ချင်းတွေထက်တောင် သာလွန်နေပြီလို့ ဆိုလိုတာလား..."

ခဏအကြာတွင် ချင်ဟုန်ရှောင်က သူမ၏ ဖြူဖွေးနုနယ်သော လက်ဝါးပေါ်၌ ကြက်ဥအရွယ်အစားရှိသည့် စိမ်းပြာရောင် ကျောက်စိမ်းဥနောက်တစ်လုံးကို ထုတ်ပြလိုက်သည်။

“ငါတို့ အရင်က သဘောတူထားတဲ့အတိုင်းပဲ... မင်း ငါ့အတွက် ဥကို အကောင်ဖောက်ပေးခဲ့တဲ့အတွက် ဒီဥက အခု မင်းပိုင်ပြီ”

သူမ ပြောလိုက်သည်နှင့် အဆိုပါ ကျောက်စိမ်းဥလေးမှာ မမြင်ရသော လက်တစ်ဖက်က မလာသကဲ့သို့ ကုယွမ့်လက်ထဲသို့ ညင်သာစွာ ကျဆင်းလာသည်။

ကုယွမ် အာရုံခံကြည့်လိုက်သောအခါ ဤဥမှာ အရင်ဥနှင့် သိပ်မထူးခြားကြောင်း သိလိုက်ရသည်။ အသက်ဓာတ် အားနည်းနေသော်လည်း အဆီအနှစ် ပြန်လည်ဖြည့်တင်းပေးလိုက်လျှင် အကောင်ဖောက်နိုင်မည်မှာ သေချာလှသည်။

“ကျေးဇူးတင်ပါတယ် နတ်မိမယ်ချင်”

နောက်ဆုံးတွင် ဤအဖိုးတန်ပစ္စည်းကို လက်ဝယ်ရရှိလိုက်ပြီ ဖြစ်သောကြောင့် ကုယွမ်မှာ ဝမ်းသာအားရဖြင့် ကျေးဇူးတင်စကား ပြောလိုက်မိသည်။

စိမ်းပြာရောင်ရိပ် ဓားလိပ်ပြာဥဆိုသည်မှာ တကယ့်ကို အဖိုးတန်သည့်အရာဖြစ်ရာ သူမ ကတိတည်ပါ့မလားဟု သံသယဝင်ခဲ့မိသည်ကို ယခုတော့ အားနာမိသွားတော့သည်။

အခန်း။ ၁၁၀

“ရပါတယ် ဒါက မင်းရသင့်ရထိုက်တဲ့ အရာပဲ”

သူမ အကြာကြီး စောင့်မျှော်ခဲ့ရသည့် စိမ်းပြာရောင်ရိပ် ဓားလိပ်ပြာဥလေး နောက်ဆုံးတွင် အောင်အောင်မြင်မြင် အကောင်ပေါက်သွားသောကြောင့် ချင်ဟုန်ရှောင်မှာ အလွန်ဝမ်းမြောက်နေပြီး သူမရှေ့မှ ကုယွမ့်ကိုတောင် အရင်ကထက် ပို၍ အမြင်ကြည်နေမိသည်။ သူမက ကုယွမ်၏ ခါးတွင် ချိတ်ထားသည့် အမှတ်အသား သံပြားလေးကို တစ်ချက်ကြည့်

လိုက်ပြီး သူမ၏ မျက်ဝန်းထဲ၌ သိချင်စိတ် အနည်းငယ် ပေါ်လာသည်။

“မင်းက ဆေးဘုရင်တောင်တန်းရဲ့ တပည့်တစ်ယောက်လား”

ကုယွမ်က ခေါင်းခါပြလိုက်သည်။

“မဟုတ်ပါဘူး နတ်မိမယ်... ကျွန်တော်က ကျောက်စိမ်းအိုးမျှော်စင်ရဲ့ ဆေးဖက်ဝင်အပင် ရှာဖွေသူတစ်ယောက်ပါ”

ချင်ဟုန်ရှောင်က ခပ်ဖွဖွ ခေါင်းညိတ်ပြပြီး ဓားလိပ်ပြာ ပိုးလောင်းလေးကို ဝိညာဉ်သားရဲအိတ်ထဲ ထည့်လိုက်သည်။ ထို့နောက် နီမြန်းသည့် သစ်သားဖြင့် ပြုလုပ်ထားသော မက်

မွန်သား အဆောင်ပြားတစ်ခုကို ထုတ်ယူကာ ကုယွမ့်ကို ပေးလိုက်သည်။

“မင်းရဲ့ ဝိညာဉ်ပိုးမွှား ပြုစုပျိုးထောင်တဲ့ ပါရမီက တကယ်ကို ချီးကျူးစရာပဲ။ အနာဂတ်မှာ ငါ မင်းရဲ့ အကူအညီ လိုအပ်တာမျိုး ရှိလာနိုင်တယ်။ ဒါက လန်ခေါတောင်ရဲ့ အမှတ်အသားဖြစ်သလို ဆက်သွယ်ရေး အဆောင်လည်း ဖြစ်တယ်။ အရေးကြီးတဲ့ ကိစ္စတစ်ခုခု ကြုံလာရင် ဒါနဲ့ ငါ့ကို ဆက်သွယ်လို့ ရတယ်”

သေလုနီးပါး ဖြစ်နေသည့် ဓားလိပ်ပြာဥကို အောင်မြင်အောင် အကောင်ဖောက်ပြနိုင်ခဲ့သည့် ကုယွမ်၏ ထူးခြားသော အစွမ်းကို သူမ ကိုယ်တိုင် မြင်တွေ့ခဲ့ရခြင်းပင်။

ထို့ကြောင့် နောင်တစ်ချိန်တွင် အလားတူ ကိစ္စမျိုး ကြုံလာခဲ့လျှင် ကုယွမ့်ကို အကူအညီ တောင်းနိုင်ရန်အတွက် ဆက်သွယ်ရေး အဆောင်ပြားတစ်ခု ပေးထားရန် ဆုံးဖြတ်လိုက်ခြင်းပင်။

“ကျေးဇူးတင်ပါတယ် နတ်မိမယ်”

လန်ခေါတောင်...

ကုယွမ်က အဆောင်ပြားကို သေသေချာချာ သိမ်းဆည်းလိုက်ပြီး ထိုအမည်ကို စိတ်ထဲ၌ မှတ်သားထားလိုက်သည်။ ဤအဆောင်ပြားကြောင့် သူသည် လန်ခေါတောင်နှင့် အဆက်အသွယ် အနည်းငယ် ရရှိသွားပြီ ဖြစ်သည်။

တကယ်လို့ ဆေးဘုရင်တောင်တန်းကို ဝင်ပြီး တာအိုကျင့်စဉ် သင်ယူရန် အဆင်မပြေခဲ့လျှင် လန်ခေါတောင်မှတစ်ဆင့် နည်းလမ်းရှာရန် ကြိုးစားလို့ ရနိုင်သည်ဟု တွေးမိသော်လည်း သူသည် လန်ခေါတောင်ဆိုသည့် နာမည်ကို တစ်ခါမျှ မကြားဖူးခဲ့ပေ။

ဒါကြောင့် ကုယွမ်က သိချင်စိတ်ဖြင့်ပင် မေးလိုက်သည်။

“ခွင့်လွှတ်ပါ နတ်မိမယ်... လန်ခေါတောင်ဆိုတာ ဆေးဘုရင်တောင်တန်းလိုမျိုး နတ်ဘုရားဂိုဏ်းကြီး တစ်ခုလားခင်ဗျာ”

“မင်း နားလည်မှု လွဲနေပြီ”

ချင်ဟုန်ရှောင်က သူ့ကို တစ်ချက်ကြည့်ပြီး တည်ငြိမ်စွာ ပြောလိုက်သည်။

“လန်ခေါတောင်က နတ်ဘုရားဂိုဏ်း မဟုတ်ပါဘူး။ အဲဒါက ယွမ်မုန့်တောင်တန်းရဲ့ အနက်ရှိုင်းဆုံးနေရာမှာ ရှိတဲ့ ငါ့ရဲ့ ကျင့်ကြံရေးဂူဗိမာန်ပါ။ ငါကိုယ်တိုင်ကလည်း ဂိုဏ်းကြီးတွေက တပည့်မဟုတ်ဘဲ လေလွင့်ကျင့်ကြံသူတစ်ယောက်ပဲ”

ကျင့်ကြံရေး ဂူဗိမာန်... ယွမ်မုန့်တောင်တန်းရဲ့ အနက်ရှိုင်းဆုံး နေရာမှာလား။

ကုယွမ် ရင်ထဲ ထိတ်ခနဲ ဖြစ်သွားပြီး သူ့ရှေ့မှ နတ်မိမယ်ချင်မှာ တကယ့်ကို မရိုးရှင်းသူတစ်ဦး ဖြစ်ကြောင်း ပိုမိုသဘောပေါက်လိုက်သည်။

ယွမ်မုန့်တောင်တန်းသည် တောင်ပိုင်းနယ်ခြား ခြောက်ခရိုင်လုံးကို လွှမ်းခြုံထားသည့် အလွန်ကျယ်ပြောလှသော နေရာဖြစ်ပြီး အဖိုးတန် ဆေးပင်များ၊ ရှားပါးသတ္တုရိုင်းများနှင့် ရတနာများ ပေါများသလို အန္တရာယ်များဖြင့်လည်း ပြည့်နှက်နေသည်။

“ဒီတောတောင်ရဲ့ အနက်ရှိုင်းဆုံးနေရာတွေမှာဆိုရင် ကောင်းကင်ဘုံလူသားနယ်ပယ်တို့၊ သူတော်စင်အဆင့်တို့နဲ့ ယှဉ်နိုင်တဲ့ ဝိညာဉ်သားရဲကြီးတွေနဲ့ မိစ္ဆာဘုရင်တွေတောင် ရှိနေတတ်တာ။

ဆေးဘုရင်တောင်တန်းနဲ့ ဂူနတ်ဘုရားဂိုဏ်းလို ဂိုဏ်းကြီးတွေတောင်မှ ဝိညာဉ်စွမ်းအင်ပေါများတဲ့ နေရာတွေမှာပဲ ဂိုဏ်းအခြေစိုက်ရဲကြတာလေ။ အခုလို အန္တရာယ်အပြည့်နဲ့ နေရာမျိုးမှာ ဂူဗိမာန်ဆောက်ပြီး အေးအေးဆေးဆေး နေနိုင်တယ်ဆိုရင်တော့... ဒီ နတ်မိမယ်ချင်မှာ တကယ့်ကို ကြီးမားတဲ့ နောက်ခံအစွမ်း ရှိနေတာ သေချာပြီ။

၉၉ ရာခိုင်နှုန်း သေချာတာကတော့... သူမက နက်နဲတဲ့နယ်ပယ်ထဲက လေလွင့်ကျင့်ကြံသူတစ်ယောက်ပဲ”

ထိုအရာကို တွေးမိသည်နှင့် ကုယွမ်သည် လက်ဝှေ့ယမ်း ဂါရဝပြုလိုက်ကာ “ကျွန်တော် မသိနားမလည်တာကို ခွင့်လွှတ်ပါ စီနီယာ... အော်... ကျွန်တော့်မှာ သိချင်တာလေး တစ်ခုရှိလို့ လမ်းညွှန်ပေးနိုင်မလား ခင်ဗျာ”

“ငါ့ကို စီနီယာလို့ ခေါ်တာ မကြိုက်ဘူး”

ချင်ဟုန်ရှောင်၏ လေသံက အေးစက်စက်နိုင်လှသည်။

“ပြောပါ... မင်း ဘာသိချင်တာလဲ”

ကြည့်ရသည်မှာ ဘယ်လောက်ပင် အစွမ်းထက်သည့် အမျိုးသမီးဖြစ်စေ အသက်ကြီးသလို အခေါ်ခံရခြင်းကိုမူ မကြိုက်ပုံပင်။

ကုယွမ်က ချက်ချင်းပင် အခေါ်အဝေါ်ကို ပြောင်းလဲလိုက်သည်။

“အမှန်အတိုင်း ပြောရရင် ကျွန်တော်က သာမန်နောက်ခံက လာတဲ့သူဖြစ်ပြီး အခုဆိုရင် ကောင်းကင်ဘုံလူသားနယ်ပယ်နဲ့ မဝေးတော့ပါဘူး။ ဒါပေမဲ့ စစ်မှန်တဲ့ တာအိုကျင့်စဉ် မရှိတဲ့အတွက် ဆေးဘုရင်တောင်တန်းကို ဝင်ဖို့ ရည်ရွယ်ထားပါတယ်။ ဒါပေမဲ့ ဆေးဘုရင်တောင်တန်းအကြောင်း ကျွန်တော် သိပ်မသိလို့ နတ်မိမယ်ဆီကနေ အကြံပေးချက်လေး သိချင်ပါတယ်”

ချင်ဟုန်ရှောင် အနည်းငယ် အံ့ဩသွားမိသည်။ ကုယွမ်က ဒီလိုမေးလာလိမ့်မည်ဟု သူမ မထင်ထားခဲ့ပေ။ ခေတ္တမျှ စဉ်းစားပြီးနောက် သူမ သိရှိသည်များကို မျှဝေပေးလိုက်သည်။

“ဆေးဘုရင်တောင်တန်းဆိုတာ ချင်ကျိုးမှာ အကြီးဆုံး တာအိုဂိုဏ်းတစ်ခုပဲ။ သူတို့က ဆေးပင်စိုက်ပျိုးတာနဲ့ ဆေးဖော်စပ်တဲ့ ပညာမှာ အထူးကျွမ်းကျင်ပြီး တောင်ပိုင်းနယ်ခြား ခြောက်ခရိုင်လုံးမှာ သူတို့ရဲ့ လုပ်ငန်းတွေ ရှိတယ်။ မင်းရှိနေတဲ့ ကျောက်စိမ်းအိုးမျှော်စင်ဆိုတာလည်း သူတို့ရဲ့ လုပ်ငန်းခွဲတစ်ခုပဲ”

“ဆေးဘုရင်တောင်တန်းရဲ့ ကျင့်စဉ်တွေက များသောအားဖြင့် သစ်သားဓာတ်နဲ့ မီးဓာတ်တွေပဲ။ သူတို့ရဲ့ အမာခံကျမ်းစာတွေဖြစ်တဲ့ ဆေးဘုရင်ကျမ်း၊ ခရမ်းရောင်နေမင်း ဆေးလုံးကျမ်းတို့က ထိပ်တန်းအဆင့် တာအိုကျမ်းစာတွေပဲ။ အဲဒီကျမ်းတွေကနေတစ်ဆင့် အဆင့်မြင့် နတ်ဘုရားအဆင့်အထိ ရောက်နိုင်တယ်လို့ ပြောကြတယ်။ လောကမှာ အမြင့်ဆုံး ကျင့်စဉ်တွေ မဟုတ်ပေမဲ့ တကယ့်ကို ရှားပါးတဲ့ အမွေအနှစ်တွေပဲ”

ထိုအရာကို ပြောရင်း ချင်ဟုန်ရှောင်က ကုယွမ့်ကို တစ်ချက်ကြည့်လိုက်သည်။

“ဒါပေမဲ့ မင်းရဲ့ ကိုယ်ခံစွမ်းအားက ရေဓာတ်ဘက်ကို ပိုနွယ်နေတာဆိုတော့ ဒီအမာခံကျမ်းစာတွေက မင်းနဲ့ သင့်တော်မှာ မဟုတ်ဘူး”

ကုယွမ်က စိတ်ပျက်လက်ပျက် ပြုံးလိုက်ကာ “နတ်မိမယ်ကလည်း ကျွန်တော့်ကို အထင်ကြီးလွန်းနေပါပြီ။ ကျွန်တော်လိုလူက အဲဒီလို အမာခံကျမ်းစာတွေကို ဘယ်လိုလုပ် ရနိုင်မှာလဲဗျာ။ ကျွန်တော့်အတွက် သင့်တော်တဲ့ တာအိုကျင့်စဉ်တစ်ခု ရပြီး ခိုင်မာတဲ့ တာအိုအခြေခံတစ်ခု တည်ဆောက်နိုင်ရင်တင် လုံလောက်ပါပြီ”

ချင်ဟုန်ရှောင်က ခေါင်းညိတ်ပြသည်။

“ဆေးဘုရင်တောင်တန်းဆိုတာ နှစ်ပေါင်းထောင်ချီ သမိုင်းရှိတဲ့ ဂိုဏ်းကြီးတစ်ခုပဲ။ သူတို့ရဲ့ စာကြည့်တိုက်မှာ ရေဓာတ်ဆိုင်ရာ တာအိုကျမ်းစာတွေ အများကြီး ရှိမှာ သေချာပါတယ်။ ဒါကြောင့် မင်း အဲဒီကို ဝင်ဖို့ စဉ်းစားတာကလည်း မှန်ကန်တဲ့ ရွေးချယ်မှုပါပဲ”

ကုယွမ်က စဉ်းစားခန်းဝင်နေသည်ကို မြင်သောအခါ သူမက ဆက်ပြောလိုက်သည်။

"တကယ်တော့ နဂါးနီနတ်ဘုရားနန်းတော် ပေါ်ထွက်လာတာနဲ့အမျှ ဆေးဘုရင်တောင်တန်းက အကြီးအကဲအဆင့် ပုဂ္ဂိုလ်တွေ တောင်ပေါ်က ဆင်းလာကြမှာ သေချာတယ်။ ဘာလို့လဲဆိုတော့ နန်းတော်ထဲမှာ မီးဓာတ်ပါတဲ့ ဝိညာဉ်ဆေးပင်တွေ၊ တာအိုကျမ်းစာတွေနဲ့ မှော်လက်နက်တွေ အများကြီးရှိနေလို့ပဲ။ အဲဒါတွေက ဆေးဘုရင်တောင်တန်းက လူတွေအတွက် အများကြီး အသုံးဝင်တယ်။ အဲဒါက မင်းအတွက် အခွင့်အရေးပဲ"

"ဒါပေမဲ့ မင်းမှတ်ထားရမှာက ဆေးဘုရင်တောင်တန်းမှာ အုပ်စုကြီး နှစ်စုရှိတယ်။ အဲဒါကတော့ မျိုးရိုးမြင့် မိသားစုအုပ်စုနဲ့ ဂိုဏ်းသားအုပ်စုပဲ။ သူတို့က တစ်ယောက်နဲ့တစ်ယောက် အမြဲလိုလို အားပြိုင်နေကြတာ။ မင်းရဲ့ လက်ရှိအခြေအနေအရ မျိုးရိုးမြင့် မိသားစုတွေဆီကနေ အသိအမှတ်ပြုခံရဖို့ ခက်လိမ့်မယ်။ ဒါကြောင့် ဂိုဏ်းသားအုပ်စုဘက်ကနေတစ်ဆင့် ဝင်ပေါက်ရှာတာက မင်းအတွက် အကောင်းဆုံးဖြစ်လိမ့်မယ်"

ကုယွမ်သည် ဤစကားများကို စိတ်ထဲတွင် အမြဲမှတ်ထားရန် ဆုံးဖြတ်လိုက်ပြီး လေးလေးစားစား ဂါရဝပြုလိုက်သည်။

"လမ်းညွှန်ပေးတဲ့အတွက် ကျေးဇူးတင်ပါတယ် နတ်မိမယ်။ နောင်တစ်ချိန်မှာ ကျွန်တော့်ရဲ့ အကူအညီ လိုအပ်တာရှိရင်လည်း ဘယ်တော့မှ ငြင်းမှာမဟုတ်ပါဘူး"

ချင်ဟုန်ရှောင် ပြောပြခဲ့သည့် အချက်အလက်များက ကုယွမ့်အတွက် တကယ့်ကို အရေးကြီးသည်။ အကယ်၍ သူသာ ဂိုဏ်းအတွင်းရေး အခြေအနေကို မသိဘဲ ဆေးဘုရင်တောင်တန်းမှာ တပည့်သွားလုပ်မည်ဆိုလျှင် ဘယ်သူကမှ သူ့ကို လှည့်ကြည့်မည် မဟုတ်ပေ။

ယခုမူ နတ်မိမယ်ချင် ပေးခဲ့သည့် သတင်းများနှင့် ယခင်က အဘိုးအိုချန် အရိပ်အမြွက် ပြောခဲ့သည်များကို ပေါင်းစပ်လိုက်လျှင် ကုယွမ့်စိတ်ထဲတွင် အစီအစဉ်အချို့ ရှိလာခဲ့ပြီ ဖြစ်သည်။

ကုယွမ့်ကို လမ်းညွှန်ပေးပြီးနောက် ချင်ဟုန်ရှောင်သည်လည်း ဓားလိပ်ပြာ ပိုးလောင်းလေးကို ပြုစုရန်အတွက် ချက်ချင်းပင် ထွက်ခွာသွားတော့သည်။

ကုယွမ်သည်လည်း ထိုနေရာတွင် ကြာကြာမနေတော့ဘဲ ပိုင်လျန်မြို့ရှိ သူ၏ နေအိမ်သို့ ပြန်လာခဲ့သည်။

မိဘများနှင့် ခေတ္တမျှ စကားပြောပြီးနောက် သူသည် နောက်ဖေးခြံထဲသို့ သွားကာ အခုလေးတင် ရရှိထားသည့် စိမ်းပြာရောင်ရိပ် ဓားလိပ်ပြာဥကို ထုတ်လိုက်သည်။

[သင်သည် စိမ်းပြာရောင်ရိပ် ဓားလိပ်ပြာဥ (ရွှေရောင်အဆင့်) ကို ရရှိထားသည်။ ၎င်းကို အကောင်ဖောက်ရန် တာအိုအနှစ်သာရအမှတ် ၁၃၀၀ အသုံးပြုလိုပါသလား]

[ဤဥ၏ အသက်ဓာတ်မှာ အားနည်းနေပြီး အဆီအနှစ် မလုံလောက်သဖြင့် အကောင်ဖောက်ရာတွင် ကျရှုံးရန် ၉၀ ရာခိုင်နှုန်းကျော် သေချာနေသည်။ အဆီအနှစ် ပြန်လည်ဖြည့်တင်းရန် တာအိုအနှစ်သာရအမှတ် ၃၆၀၀ အသုံးပြုရန် လိုအပ်သည်။

အတည်ပြုမလား ငြင်းမလား]

ဝိညာဉ်အိမ်မွေးတိရစ္ဆာန်စနစ်မှ အသိပေးချက် ပေါ်လာသည်။ ချင်ဟုန်ရှောင်အတွက် အကောင်ဖောက်ပေးစဉ်ကနှင့် အနည်းငယ်သာ ကွာခြားသည်။ ယခုဥက အဆီအနှစ်ဖြည့်ရန် အမှတ် ပိုနည်းနေသည်မှာ ဥတစ်လုံးနှင့် တစ်လုံး အခြေအနေ အနည်းငယ် ကွဲပြားခြင်းကြောင့် ဖြစ်ပေလိမ့်မည်။

ကုယွမ်သည် တွေဝေမနေဘဲ ချက်ချင်းပင် ရွေးချယ်လိုက်သည်။

"အဆီအနှစ် ဖြည့်တင်းတာကို အတည်ပြုမယ်"

သူ့စကားလည်း ဆုံးရော ကျောက်စိမ်းဥ မျက်နှာပြင်သည် စင်ကြယ်ပြီး အသက်ဓာတ် ပြည့်ဝသော အဖြူရောင် အလင်းတန်းများဖြင့် ဖုံးလွှမ်းသွားတော့သည်။ အစောပိုင်းက မြင်တွေ့ခဲ့ရသည့် မြင်ကွင်းမျိုး ကုယွမ့်မျက်စိရှေ့တွင် တစ်ဖန် ပြန်လည် ပေါ်ပေါက်လာခဲ့ပြန်သည်။