အခန်း (၈၁၈-၈၂၀)

အခန်း ၈၁၈ - ယီယွင်၏ အဆင့်သတ်မှတ်ချက်

"ဂျူနီယာညီလေး ယီယွင် တကယ်ပဲ အောင်မြင်သွားမလား သိချင်မိတယ်" ဘိုင်ချန်သည် အမှန်တကယ်တော့ ယီယွင်ကို စိတ်ပူနေဆုံးသူ ဖြစ်သည်။ လူသစ်တစ်ယောက်အနေဖြင့် ဘိုင်ချန်သည် ယီယွင်ကိုလည်း သူ့လိုပင် ကျရှုံးစေလိုသည်။

လီယာသည်လည်း ယီယွင်ကို သတိထားမိသော်လည်း အာရုံအများကြီးမစိုက်ပေ။ ရန်ယွီနှင့် ကုလော့တို့၏ အဆင့်သတ်မှတ်ချက်များကြောင့် လီယာမှာ စိတ်ဓာတ်ကျနေခဲ့သည်။

ယီယွင် အရှက်ကွဲမည့်အဖြစ်ကို သူ စိတ်မဝင်စားအားပေ။ ယီယွင် ကျရှုံးခြင်းကြောင့် မီးလျှံတိမ်တိုက်ပြည်နယ်ကို ဖီးနစ်ဖာမီယားနားပြည်နယ်က လှောင်ပြောင်မည်ကိုလည်း သူ ဂရုမစိုက်နိုင်တော့ပေ။

ထိုစဉ် လော့ဖုန်းလင်က "ခုနစ်ရောင်ခြယ် ဖီးနစ်က လှုပ်ရှားနေပြီ" ဟု ပြောလိုက်သဖြင့် လီယာ အံ့အားသင့်ကာ လှည့်ကြည့်လိုက်သည်။

လှုပ်ရှားသွားတာလား

ကျင့်ကြံသူတစ်ဦး၏ အမြင်အာရုံမှာ အလွန်ကောင်းမွန်သဖြင့် ဖီးနစ်၏ အမြီးမွှေးများနှင့် ခြေသည်းတစ်ဖက် အနည်းငယ် တုန်ခါသွားသည်ကို လီယာ ချက်ချင်း မြင်လိုက်ရသည်။ လီယာ၏ မျက်နှာ ပျက်သွားသည်။

တုန်ခါသည်ဖြစ်စေ၊ ခတ်ထုတ်သည်ဖြစ်စေ အနည်းငယ် လှုပ်ရှားမှုရှိပါက ၎င်းမှာ "လှုပ်ရှားခြင်း" အဆင့်ပင် ဖြစ်သည်။

"သူက တကယ်ပဲ အသိအမှတ်ပြုမှု ရသွားတာလား ထားလိုက်ပါတော့... ဒါက ကံကောင်းတာသက်သက်ပဲ၊ ငါ ဘာလို့ သူ့ကို ဂရုစိုက်နေရမှာလဲ" လီယာက ယီယွင်ကို မကျေမနပ် ကြည့်လိုက်သည်။ ဤကလေးမှာ တကယ့်ကို ကံကောင်းလွန်းလှသည်။

သူနှင့် ယီယွင် အဆင့်တူနေခြင်းမှာ သူ့အတွက် အရှက်ရစရာပင်။ ဘိုင်ချန်လည်း သက်ပြင်းချလိုက်မိသည်။

ယီယွင်က တကယ်ပဲ အောင်မြင်သွားခဲ့ပြီ။

"အဆင့်သတ်မှတ်ချက် - လှုပ်ရှားခြင်း" ဟု အရှင်ကန်းမန်က ကြေညာလိုက်သည်။

ဘိုင်ချန်က ယီယွင်ကို ကြည့်ပြီး ခါးသီးစွာဖြင့် "ဂျူနီယာညီလေး ယီယွင်... ဂုဏ်ယူပါတယ်" ဟု ဆိုလိုက်သည်။

ယီယွင် စကားမပြောပေ။ အမှန်စင်စစ် ခုနစ်ရောင်ခြယ် ဖီးနစ်ကျောက်တိုင်ကို လှုပ်ရှားစေရန်မှာ သူ့အတွက် မလွယ်ကူခဲ့ပေ။ အခြားသူများမှာ မီးဓာတ်ဥပဒေသများဖြင့် အောင်မြင်ခဲ့သော်လည်း ယီယွင်၏ မီးဓာတ်မှာ သန့်စင်ယန် ဥပဒေသမှ ဆင်းသက်လာခြင်း ဖြစ်သဖြင့် သိပ်မထူးခြားပေ။

ထို့ကြောင့် သူသည် "သန့်စင်ယန် ဓားနန်းတော်" မှ ဓားဆန္ဒ အချို့ကို အသုံးပြုခဲ့ရသည်။

ခုနစ်ရောင်ခြယ် ဖီးနစ်ကျောက်တိုင်ကို ထွင်းထုခဲ့သူမှာ ဓားတစ်လက်ကို အသုံးပြုခဲ့ပုံရပြီး ကျောက်တိုင်တွင် ဓားဆန္ဒအချို့ ကျန်ရှိနေသဖြင့် ယီယွင်၏ ဓားဆန္ဒနှင့် တုံ့ပြန်မှု ဖြစ်ပေါ်ခဲ့ခြင်း ဖြစ်သည်။

၎င်းမှာ ဥပဒေသကို အသုံးပြုခြင်း မဟုတ်ဘဲ နည်းပရိယာယ်တစ်ခုကို အသုံးပြုခြင်းမျှသာ ဖြစ်သည်။ ထို့ကြောင့် ဓားဆန္ဒနှင့် မီးဓာတ်ပေါင်းစပ်မှုမှာ "လှုပ်ရှားခြင်း" အဆင့်အထိသာ ရောက်ရှိစေခဲ့သည်။ သို့သော်လည်း ယီယွင်မှာ ဤရလဒ်ကို ကျေနပ်နေပါသည်။

"ဂျူနီယာညီလေး... မင်းရဲ့ ကံက တကယ်ကောင်းတာပဲ" ဟု တစ်ယောက်က ငြူစူစွာ ပြောလိုက်သည်။ ဘိုင်ချန်လည်း "ကံဆိုတာလည်း စွမ်းအားတစ်မျိုးပါပဲ... နှမြောဖို့ကောင်းလိုက်တာ၊ ငါသာ အဲဒီကံလေး နည်းနည်းလောက် ရှိခဲ့ရင်..." ဟု မကျေမချမ်း ဆိုသည်။

"ဒီထဲမှာ ကံလည်း နည်းနည်း ပါတာပေါ့" ဟု ယီယွင်က ပြုံးကာ ပြောလိုက်သည်။

သူသည် ဤကျောက်တိုင်ရှေ့တွင် အချိန်အနည်းငယ်သာ ကုန်ဆုံးခဲ့ရသဖြင့် ကံပါသည်မှာ အမှန်ပင် ဖြစ်သည်။ လီယာကမူ "ကံဆိုတာ အမြဲတမ်း ရှိနေမှာမဟုတ်ဘူး" ဟု အေးစက်စွာ ပြောကာ အကြည့်လွှဲသွားသည်။

သို့သော် ထိုစဉ်မှာပင် လော့ဖုန်းလင်၏ ဝေခွဲမရသော အသံ ထွက်ပေါ်လာသည်။ "ဂျူနီယာမောင်လေး ယီယွင်ရဲ့ ကိုယ်ပေါ်မှာ အလင်းတိုင်က ဘာလို့ ရှိနေသေးတာလဲ"

ဟင်........

လီယာ ချက်ချင်း ပြန်လှည့်ကြည့်လိုက်သည်။

ယီယွင်မှာ အလင်းတိုင်အတွင်း လွှမ်းခြုံခံထားရဆဲ ဖြစ်သည်ကို မြင်ရသည့်အခါ သူ ဘာမှန်းမသိ ဖြစ်သွားသည်။ ထို့နောက် ကျောက်တိုင်တစ်ခုတွင် တုံ့ပြန်မှု ဖြစ်ပေါ်လာသည်။

"အသံကြားရတယ်"

လော့ဖုန်းလင်၏ မျက်လုံးလေးများ ဝိုင်းစက်သွားသည်။ လေပြေအေးလေး တစ်ချက် တိုက်ခတ်လာသကဲ့သို့ ခံစားလိုက်ရသည်။ ဖီးနစ်ဖာမီယားနားပြည်နယ်မှ လူများလည်း ယီယွင်၏ ကိုယ်ပေါ်မှ ထူးဆန်းသော ဖြစ်ရပ်ကို သတိထားမိသွားကြသည်။

"ကျောက်တိုင်တစ်ခု လှုပ်ရှားနေပြီ အဲဒါ... မြေကမ္ဘာနတ်ဘုရားသစ်ပင် ပဲ"

မီးလျှံတိမ်တိုက်ပြည်နယ် တပည့်များမှာ ယီယွင်သည် ထိုကျောက်တိုင်ရှေ့တွင် အချိန်အနည်းငယ် ရပ်နေခဲ့သည်ကို သတိရသွားကြသည်။ အားလုံးက သူ ရည်မှန်းချက် ကြီးလွန်းသည်ဟု ထင်ခဲ့ကြသော်လည်း ယခုအခါ ထိုကျောက်တိုင်၏ အသိအမှတ်ပြုမှုကို သူ ရရှိသွားခဲ့ပြီလော။

ရွှတ်... ရွှတ်...

သစ်ရွက်များ လှုပ်ခတ်သံနှင့်အတူ လူတိုင်းမှာ မြင့်မားသော သစ်ပင်ကြီးတစ်ပင်အောက်တွင် ရပ်နေသကဲ့သို့ ခံစားလိုက်ရသည်။ ထိုသစ်ပင်ကြီး၏ သစ်ရွက်များပေါ်ရှိ ဥပဒေသ ပုံစံများမှာ မျက်လုံးများကဲ့သို့ မှိတ်တုတ်မှိတ်တုတ် ဖြစ်လာသည်။

"ဒါက... မျက်လုံးဖွင့်ခြင်းလား မြေကမ္ဘာနတ်ဘုရားသစ်ပင်က မျက်လုံးဖွင့်လိုက်တာလား"

ကျင့်ကြံသူ အားလုံး အကြီးအကျယ် ထိတ်လန့်သွားကြသည်။

"လှုပ်ရှားခြင်း" အဆင့်ဆိုပါက ကံဟု ပြောနိုင်သော်လည်း "မျက်လုံးဖွင့်ခြင်း" မှာ ကံဖြင့် ရနိုင်သော အရာမဟုတ်ပေ။ ၎င်းမှာ မြေကမ္ဘာနတ်ဘုရားသစ်ပင် ဖြစ်သည်။

၎င်းမှာ နဂါးဧကရာဇ် သို့မဟုတ် ကုန့်ဖန်တို့ထက်ပင် ဥပဒေသ အသိအမြင် ပိုမို လိုအပ်သည်။ အစွမ်းထက်သော ကုလော့ပင်လျှင် ဤအဆင့်ရှိသော ကျောက်တိုင်တွင် "လှုပ်ရှားခြင်း" အဆင့်သာ ရခဲ့သည်။

ယီယွင်၏ ရလဒ်မှာ ရန်ယွီထက်ပင် သာလွန်သွားခဲ့ပြီ ဖြစ်သည်။ ရန်ယွီမှာ ယီယွင်ကို အထင်သေးခဲ့သော်လည်း ယခုအခါ ယီယွင်မှာ သူ့ထက်ပင် သာလွန်နေသကဲ့သို့ ရှိနေသည်။

ထိုစဉ် ယီယွင်၏ ခေါင်းပေါ်သို့ အလင်းတိုင်ထဲမှ အရာတစ်ခု လွင့်ပျံကျလာသည်။ ၎င်းမှာ ရိုးရိုးရှင်းရှင်း သစ်ရွက်ကလေး တစ်ရွက်သာ ဖြစ်သည်။ သို့သော် လူတိုင်းမှာ ထိုသစ်ရွက်ကလေးကို စူးစိုက်ကြည့်နေမိကြသည်။

ယီယွင် လက်ဖဝါးဖြန့်လိုက်သည့်အခါ သစ်ရွက်ကလေးမှာ သူ၏ လက်ထဲသို့ ကျလာသည်။ ထို့နောက် ၎င်းမှာ စိမ်းစိုရာမှ ဝါဖျော့သွားကာ အမှုန့်ဖြစ်ပြီး လေထဲတွင် လွင့်ပျံ့သွားတော့သည်။

မြေကမ္ဘာနတ်ဘုရားသစ်ပင်က ယီယွင်အတွက် သစ်ရွက်တစ်ရွက် ကြွေကျပေးခဲ့သည်လား ယီယွင် ဘာတွေလုပ်ခဲ့လို့ ဤကဲ့သို့သော အခွင့်အရေးကို ရရှိခဲ့ခြင်းနည်း။

ထိုအချိန်တွင် အရှင်ကန်းမန်သည် မတ်တပ်ရပ်လိုက်ပြီး ယီယွင်ကို နက်နဲသော အကြည့်ဖြင့် ကြည့်ကာ ပြောလိုက်သည်။

"အဆင့်သတ်မှတ်ချက် - ဆောင်းခိုရာမှ နိုးထခြင်း "

ဟိန်းထွက်လာသော အသံကြောင့် အားလုံးမှာ ထိတ်လန့်တကြား သတိဝင်လာကြသည်။

ဆောင်းခိုရာမှ... ဆောင်းခိုရာမှ နိုးထခြင်း တဲ့လား

အခန်း ၈၁၉ - သန့်စင်ယန်၏ အရောင်အဝါ

သတိပြန်ဝင်လာကြသော လူအုပ်ကြီးသည် သူတို့၏ နားကိုပင် မယုံကြည်နိုင် ဖြစ်နေကြသည်။

ဆောင်းခိုရာမှ နိုးထခြင်း ၎င်းမှာ ရိုးရိုးကျောက်တိုင် မဟုတ်ဘဲ မြေကမ္ဘာနတ်ဘုရားသစ်ပင် ကျောက်တိုင်မှ ရရှိခြင်း ဖြစ်သည်။

လူဟူသည်မှာ ထူးဆန်းသော သတ္တဝါများ ဖြစ်ကြသည်။ ရန်ယွီ သို့မဟုတ် ကုလော့ကဲ့သို့ အစကတည်းက အလွန်အစွမ်းထက်သည်ဟု သတ်မှတ်ထားသူများက ထူးခြားသော ရလဒ်များ ပြသပါက အံ့သြရုံမှတစ်ပါး မည်သူမျှ သံသယ မဝင်ကြပေ။ သူတို့ကို အိုင်ဒေါ များကဲ့သို့ ကြည့်ကာ ထိုသို့ စွမ်းဆောင်နိုင်ခြင်းမှာ သဘာဝကျသည်ဟု လက်ခံတတ်ကြသည်။

သို့သော် လူတိုင်းက မိမိတို့ထက် နိမ့်ကျသည်ဟု ထင်ထားသော လူတစ်ယောက်က ထိုသို့ စွမ်းဆောင်ပြလာပါက လက်ခံရန် အလွန် ခက်ခဲသွားတတ်ကြသည်။ "မျက်လုံးဖွင့်ခြင်း" အဆင့်ပင် သူတို့အတွက် မယုံနိုင်စရာ ဖြစ်နေပြီ ဖြစ်သော်လည်း ယခုမူ... ဆောင်းခိုရာမှ နိုးထခြင်း အဆင့်ပင် ဖြစ်နေပြီ။

"မဖြစ်နိုင်ဘူး" အရှင်ကန်းမန်၏ စကားဆုံးသည်နှင့် လီယာက မအောင့်နိုင်ဘဲ အော်ဟစ်လိုက်မိသည်။

"မင်းက ငါ့ကို သံသယရှိတာလား ဒါမှမဟုတ် ငါတို့ လော့မျိုးနွယ်စုရဲ့ ဖေးနတ်ဘုရား ကျောက်တိုင် ၁၂ တိုင်ကို သံသယရှိတာလား" အရှင်ကန်းမန်က လီယာကို အေးစက်စွာ ကြည့်လိုက်သည်။

အရှင်ကန်းမန်၏ ကိုယ်ပေါ်မှ အရှိန်အဝါများမှာ ကြောက်မက်ဖွယ် ကောင်းလှသဖြင့် လီယာမှာ ချက်ချင်းပင် မျက်နှာဖြူလျော်သွားပြီး "မဟုတ်... မဟုတ်ပါဘူး" ဟု တုန်တုန်ယင်ယင် ပြန်ပြောလိုက်ရသည်။

ဖေးနတ်ဘုရား ကျောက်တိုင် ၁၂ တိုင်တွင် ရှေးဟောင်း နတ်ဘုရားများ၏ အငွေ့အသက်များ ကိန်းဝပ်နေသဖြင့် လိမ်ညာရန်မှာ လုံးဝ မဖြစ်နိုင်ပေ။ အမှန်တရားမှာ သူတို့ရှေ့တွင် ရှိနေပြီဖြစ်သည်။ ယီယွင်သည် မြေကမ္ဘာနတ်ဘုရားသစ်ပင်ထံမှ ဆောင်းခိုရာမှ နိုးထခြင်း အဆင့်ကို အမှန်တကယ် ရရှိခဲ့ခြင်း ဖြစ်သည်။

ရန်ယွီ၏ ချောမောသော မျက်နှာမှာ တည်ငြိမ်မှု မရှိတော့ဘဲ အလွန်ပင် ရုပ်ဆိုးသွားတော့သည်။ ခုနစ်ရောင်ခြယ် ဖီးနစ်ကျောက်တိုင်တွင် အဆင့်နိမ့်ခဲ့သော်လည်း မြေကမ္ဘာနတ်ဘုရားသစ်ပင်၏ ရလဒ်တစ်ခုတည်းနှင့်ပင် ယီယွင်၏ စွမ်းဆောင်ရည်မှာ ရန်ယွီထက် သာလွန်သွားခဲ့ပြီ ဖြစ်သည်။

လော့ထျန်ကလည်း မထင်မှတ်ထားသော အမူအရာဖြင့် "မီးလျှံတိမ်တိုက်ပြည်နယ်က တပည့်တစ်ယောက်က ဒီလောက် စွမ်းဆောင်နိုင်မယ်လို့ မထင်ထားဘူး။ ဒါပေမဲ့... ကျောက်တိုင် ၁၂ တိုင်ရဲ့ စစ်ဆေးမှုဆိုတာ အဆုံးသတ် ခွန်အားကို တိုင်းတာတာ မဟုတ်ပါဘူး။

အသက်အရွယ် ငယ်တာကလည်း အမှတ်ပိုရစေနိုင်တဲ့ အချက်တစ်ခုပဲ" ဟု ဆိုလိုက်သည်။

လော့ထျန် ပြောသည်မှာ အမှန်တရား တစ်ဝက် ပါဝင်သော်လည်း ကျင့်ကြံချိန် ကြာမြင့်လေ ဥပဒေသ အသိအမြင် ပိုမို နက်နဲလေ ဖြစ်သဖြင့် နှစ်ပေါင်း ၆၀ ကျင့်ကြံထားသူမှာ လူသစ်ထက် ပိုမို သာလွန်နေရမည် ဖြစ်သည်။

"စီနီယာအစ်ကို လော့ထျန်... ဒါဆို စီနီယာက ဒီအဆင့်ကို ကျော်ဖြတ်နိုင်မှာလား" ဟု ဖီးနစ်ဖာမီယားနားပြည်နယ်မှ တပည့်များက မေးလိုက်ကြသည်။

လော့ထျန်က ခေါင်းခါလိုက်ပြီး "ကျောက်တိုင် သုံးတိုင်ဆိုတာကတော့ အပိုတွေပါ။ ငါကတော့ ကျောက်တိုင် နှစ်တိုင်ကိုပဲ ရွေးမယ်။ တစ်တိုင်က မျက်လုံးဖွင့်ခြင်းနဲ့ နောက်တစ်တိုင်က ဆောင်းခိုရာမှ နိုးထခြင်း... အဲဒါကိုတော့ ငါ အာမခံနိုင်ပါတယ်" ဟု ဝင့်ကြွားစွာ ပြောလိုက်သည်။

သို့သော် သူ အာမခံသော ဆောင်းခိုရာမှ နိုးထခြင်းမှာ မြေကမ္ဘာနတ်ဘုရားသစ်ပင်ထက် သာလွန်နိုင်ပါ့မလား။

လော့ထျန်က ဆက်လက်၍ "သူက ယွမ်ဖွင့်အဆင့် လူသစ်လေးပဲ ရှိသေးတာ၊ သူ့ကို ကျော်ဖြတ်ဖို့ဆိုတာ လွယ်လွယ်လေးပါ" ဟု ပြောနေစဉ်မှာပင် တစ်စုံတစ်ဦးက ရုတ်တရက် အော်ပြောလိုက်သည်။

"ဟိုမှာ... ဂျူနီယာညီလေး ယီယွင်ရဲ့ ကိုယ်ပေါ်က အလင်းတိုင်က ဘာလို့ ပျောက်မသွားသေးတာလဲ"

"ဟုတ်တယ်... ပိုတောင် လင်းလာသလိုပဲ"

လူတိုင်းမှာ ဆူညံသွားကြပြီး လော့ထျန်မှာလည်း စကားစရပ်သွားကာ လည်ပင်းညှစ်ခံထားရသော ကြက်ဖတစ်ကောင်ကဲ့သို့ အသံတိတ်သွားတော့သည်။ သူသည် သရဲသရဲစီးခံရသကဲ့သို့ ယီယွင်ကို စူးစိုက်ကြည့်နေမိသည်။ အခြေအနေက ဘာလို့ မပြီးဆုံးသေးတာလဲ။

"ဝုန်း"

ပိုမို ပြင်းထန်သော ရွှေရောင် အလင်းတန်းကြီး တစ်ခု ကောင်းကင်ယံမှ ကျဆင်းလာသည်။ ၎င်းမှာ ကိုးလွှာသောကောင်းကင်မှ တောက်ပသော နေမင်းကြီးက ယီယွင်ကို တိုက်ရိုက် အလင်းပေးနေသကဲ့သို့ပင်။ ယီယွင်မှာ ရွှေရောင် အလင်းတန်းများအောက်တွင် နတ်ဘုရားတစ်ပါးကဲ့သို့ ခန့်ညားနေသည်။

ရန်ယွီမှာ သူ၏ ဦးနှောက်ကို ပြင်းထန်စွာ အထိုးခံလိုက်ရသကဲ့သို့ ခံစားလိုက်ရပြီး နားထဲတွင် တစီစီ မြည်လာသည်။ အရှင်ကန်းမန်ပင်လျှင် ယီယွင်ကို ကြည့်သော အကြည့်မှာ ပြောင်းလဲသွားခဲ့ပြီ ဖြစ်သည်။

နောက်ထပ်... ရှိနေသေးတာလား

မီးလျှံတိမ်တိုက်ပြည်နယ်မှ တပည့်တစ်ဦးက တိုးတိုးလေး ပြောလိုက်သည်။ "စဉ်းစားကြည့်ဦး... ယီယွင်က သန့်စင်ယန် ကျောက်တိုင်ရှေ့မှာလည်း အကြာကြီး ရပ်နေခဲ့တာ မဟုတ်လား အဲဒါဆိုရင်..."

သူ စကားမဆုံးမီမှာပင် လူတိုင်း၏ မျက်နှာများမှာ ပြောမပြတတ်အောင် ရှုပ်ထွေးသွားကြသည်။ ယီယွင်က မြေကမ္ဘာနတ်ဘုရားသစ်ပင်ကနေ ဆောင်းခိုရာမှ နိုးထခြင်း အဆင့် ရခဲ့ပြီ။ သန့်စင်ယန် ကျောက်တိုင်ထံမှလည်း အသိအမှတ်ပြုမှု ရဦးမှာလား။

သန့်စင်ယန် ဆိုသည်မှာ ကမ္ဘာကြီး စတင်ဖြစ်ပေါ်စ အချိန်ကတည်းက ရှိခဲ့ခြင်းဖြစ်ပြီး ၎င်းကို နားလည်ရန်မှာ အလွန် ကြောက်စရာကောင်းလောက်အောင် ခက်ခဲလှသည်။

"မြေကမ္ဘာနတ်ဘုရားသစ်ပင်က အသိအမှတ်ပြုမှု ရဖို့အတွက် ယီယွင်က နည်းပရိယာယ်လေးတွေ သုံးကောင်း သုံးနိုင်ပါလိမ့်မယ်။ ဒါပေမဲ့ သန့်စင်ယန် ကျောက်တိုင်ရှေ့မှာတော့ ဘယ်လောက်ပဲ မီးဓာတ်ဥပဒေသတွေ နက်နဲပါစေ၊ ကနဦး သန့်စင်ယန် ဥပဒေသတွေရှေ့မှာတော့ သိပ်ကို အားနည်းလွန်းပါတယ်။

ငါ့အမြင်အရတော့ သူ အသိအမှတ်ပြုမှု ရခဲ့ရင်တောင် လှုပ်ရှားခြင်း အဆင့်လောက်ပဲ ရှိမှာပါ" ဟု ကျင့်ကြံသူတစ်ဦးက ခန့်မှန်းလိုက်သည်။

"လှုပ်ရှားခြင်း အဆင့်ရရင်တောင် ကြောက်စရာ ကောင်းနေပြီ"

လူအများစုမှာ ဤရလဒ်ကိုသာ မျှော်လင့်နေကြသည်။ ယီယွင်သည် အဆင့်နိမ့်နယ်မြေမှ လာသူဖြစ်ပြီး ဤစစ်ဆေးမှုတွင် ပါဝင်ခွင့်ရခြင်းမှာ ဖင်းနန်မင်းသား၏ ကျေးဇူးကြောင့်ဟု သူတို့က ထင်မှတ်ထားခဲ့ကြခြင်း ဖြစ်သည်။ ယခု မျက်မှောက် အမှန်တရားက သူတို့၏ ထင်မြင်ယူဆချက်ကို ပြောင်းပြန်လှန်ပစ်နေပြီ ဖြစ်သည်။

ရန်ယွီသည်လည်း စကားမပြောနိုင်တော့ပေ။ မြင့်မြတ်သော သွေးပါသည့် "ကောင်းကင်ဖေး"တစ်ဦး ဖြစ်သော သူသည် အဆင့်နိမ့်နယ်မြေမှ လူသားတစ်ယောက်၏ ကျော်ဖြတ်ခြင်းကို ခံရမည်ဆိုသည်မှာ လုံးဝ လက်ခံနိုင်စရာ မရှိပေ။

လူတိုင်းတွင် အတွေးမျိုးစုံ ရှိနေကြသော်လည်း သန့်စင်ယန် ကျောက်တိုင်မှာမူ သူတို့၏ အတွေးများကြောင့် ပြောင်းလဲသွားမည် မဟုတ်ပေ။

ရုတ်တရက် သန့်စင်ယန် ကျောက်တိုင်မှ သေးငယ်သော မီးတောက်လေးတစ်ခု စတင် တောက်ပလာသည်။ ထိုမီးတောက်လေးကို မြင်လိုက်ရသည့်အခါ လူတိုင်းမှာ ဤကမ္ဘာပေါ်တွင် ကျန်ရှိနေသော တစ်ခုတည်းသော အလင်းရောင်မှာ ထိုမီးတောက်သာ ဖြစ်သည်ဟု ခံစားလိုက်ရသည်။

ပတ်ဝန်းကျင်မှ အလင်းရောင်များ၊ ကောင်းကင်မှ ကြယ်ရောင်များပင်လျှင် ထိုမီးတောက်ရှေ့တွင် မှေးမှိန်သွားကြသည်။

ပထမဆုံးသော ဖေးနတ်ဘုရား ကျောက်တိုင်... သန့်စင်ယန် လှုပ်ရှားသွားခဲ့ပြီ...

အခန်း ၈၂၀ - ဟင်းလင်းပြင် ကမ္ဘာ

သန့်စင်ယန် နတ်ဘုရားကျောက်တိုင်ပေါ်ရှိ မီးတောက်လေးသည် ပေါ်ပေါက်လာပြီးနောက် တောမီးကဲ့သို့ တဟုန်ထိုး ပျံ့နှံ့တောက်လောင်လာတော့သည်။

၎င်းမှာ ပေါက်ကွဲထွက်လာသည့်အခါ ကန်းမန်၏ ကိုယ်ပေါ်တွင် ခွေပတ်ထားသည့် မြွေဟောက်ကြီးပင်လျှင် ခေါင်းကို အမြင့်သို့ မော့မြှင့်လိုက်ရသည်။

ကန်းမန်သည် သန့်စင်ယန်ကို အံ့အားသင့်မှုများဖြင့် စိုက်ကြည့်နေမိသည်။

အလင်းရောင်ဝန်းမှာ ပိုမိုကျယ်ပြန့်လာပြီးနောက် ကျယ်လောင်သော မြည်ဟည်းသံနှင့်အတူ အလင်းတန်းအလွှာတစ်ခုမှာ အပြင်ဘက်သို့ ရုတ်တရက် ပေါက်ကွဲထွက်လာခဲ့သည်။

လူတိုင်းမှာ မနေနိုင်ဘဲ နောက်သို့ တစ်လှမ်းဆုတ်လိုက်ကြရသည်။ ၎င်းမှာ ပုံရိပ်ယောင်တစ်ခုသာဖြစ်ကြောင်း သိကြသော်လည်း အဆုံးမရှိသော အပူရှိန်က သူတို့ထံသို့ ဖြာထွက်လာသကဲ့သို့ ခံစားလိုက်ကြရသည်။

၎င်းကို ထိတွေ့ရုံမျှနှင့် မည်သည့် အကာအကွယ်ယွမ်ချီ မဆို အသုံးမဝင်တော့ဘဲ ချက်ချင်းပင် ပြာဖြစ်သွားစေလိမ့်မည်ဟု ခံစားနေရသည်။ ကောင်းကင်နှင့် မြေကြီးပင်လျှင် ထိုကြောက်မက်ဖွယ်အပူရှိန်ကို မခံနိုင်ပါက သူတို့က ဆိုဖွယ်ရာမရှိပေ။

၎င်းမှာ ယီယွင်၏ အစွမ်းမဟုတ်ဘဲ သန့်စင်ယန် နတ်ဘုရားကျောက်တိုင်အတွင်း ကိန်းဝပ်နေသော ဖေးနတ်ဘုရား၏ ကျေးဇူးတော်သာ ဖြစ်သည်။ ယီယွင်မှာမူ ၎င်းကို နှိုးဆော်ခဲ့သူသာ ဖြစ်သည်။

သို့သော် သူတို့ကို အမှန်တကယ် တုန်လှုပ်သွားစေသည်မှာ ကောင်းကင်နှင့် မြေကြီး၏ အစွမ်းကြောင့်မဟုတ်ဘဲ ကန်းမန်၏ စကားသံကြောင့်ဖြစ်သည်။

"ဆောင်းခိုရာမှ နိုးထခြင်း"

ကန်းမန်သည် ယီယွင်ကို ကြည့်သည့်အမြင် လုံးဝပြောင်းလဲသွားလျက် သူ့ဘာသာ တိုးတိုးလေး ရေရွတ်လိုက်သည်။

ခုနစ်ရောင်ခြယ် ဖီးနစ် - လှုပ်ရှားခြင်း ။

မြေကမ္ဘာနတ်ဘုရားသစ်ပင် - ဆောင်းခိုရာမှ နိုးထခြင်း။

သန့်စင်ယန် - ဆောင်းခိုရာမှ နိုးထခြင်း။

နတ်ဘုရားကျောက်တိုင် သုံးတိုင်၏ အသိအမှတ်ပြုမှုကို ရရှိခဲ့ပြီး ၎င်းတို့အနက် နှစ်တိုင်မှာ အလွန်ခက်ခဲသောအရာများ ဖြစ်သည်။ ထိုအလွန်ခက်ခဲသော ကျောက်တိုင်နှစ်တိုင်တွင်မှ ယီယွင်သည် ဆောင်းခိုရာမှ နိုးထခြင်း အဆင့်ကို ရရှိခဲ့ခြင်း ဖြစ်သည်။

တစ်ရက်အတွင်း ကျောက်တိုင် သုံးတိုင်၏ အသိအမှတ်ပြုမှုကို ရရှိရန်အတွက် သူသည် အခြားသူများရရှိသည့် အချိန်၏ သုံးပုံတစ်ပုံစီကိုသာ အသုံးပြုခဲ့ရခြင်း ဖြစ်သည်။

ဤအခိုက်အတန့်တွင် အသက်မဲ့သည့် ရုပ်အလောင်းကဲ့သို့ဖြစ်သော ကုလော့၏ မျက်စိသူငယ်အိမ်ပင်လျှင် အပ်ဖျားခန့်အထိ ကျုံ့ဝင်သွားခဲ့သည်။

ကံကောင်းခြင်းကြောင့် သို့မဟုတ် မီးဓာတ်ဥပဒေသတွင် ကျွမ်းကျင်ခြင်းကြောင့်ဟူသော ယခင်က ထင်ကြေးပေးမှုများမှာ ရိုက်ခတ်လာသော အလင်းတန်းကြီးက သူတို့၏ ပါးကို ခပ်ပြင်းပြင်း ပြန်လည်ရိုက်နှက်လိုက်သကဲ့သို့ ဖြစ်သွားစေသည်။

လော့ထျန်သည် အချိန်အတော်ကြာ တိတ်ဆိတ်နေပြီးနောက် တိတ်တဆိတ်ပင် လှည့်ထွက်သွားခဲ့သည်။ အမှန်စင်စစ် သူသည် ထိုနေရာမှ လှည့်ထွက်သွားချင်နေမိခြင်း ဖြစ်သည်။

ယီယွင်၏ အဆင့်များကို သိလိုက်ရပြီးနောက် သူပြောခဲ့သည့် စကားများကို ပြန်စဉ်းစားမိသည့်အခါ ဤနေရာတွင် ဆက်နေရသည်မှာ ဆူးပုံပေါ် ထိုင်နေရသကဲ့သို့ ခံစားနေရသည်။

အထူးသဖြင့် သူသည် စီနီယာတပည့်တစ်ဦး၏ ဂုဏ်ပုဒ်ဖြင့် ယီယွင်၏ စွမ်းဆောင်ရည်အပေါ် ဝေဖန်ခဲ့မိသေးသည်။ ရလဒ်ကို မြင်လိုက်ရသည့်အခါ လော့ထျန်၏ မျက်နှာမှာ ပူထူနေတော့သည်။

ဤအခိုက်အတန့်တွင် မီးလျှံတိမ်တိုက်ပြည်နယ်မှ တပည့်တစ်ဦးတစ်ယောက်မျှ လော့ထျန် ယခင်က ပြောခဲ့သည်များကို ဂရုမစိုက်တော့ပေ။ ယီယွင်က ပေးလိုက်သည့် ကြီးမားသော တုန်လှုပ်မှုနှင့် ယှဉ်လျှင် လော့ထျန်၏ စကားများမှာ ဘာမှမဟုတ်တော့ပေ။

"ဆောင်းခိုရာမှ နိုးထခြင်း နှစ်ခုနဲ့ လှုပ်ရှားခြင်း တစ်ခု။ မင်း တော်တော်လေး ကောင်းပါတယ်။ ယီယွင် ဟုတ်လား မင်းနာမည်ကို ငါ မှတ်ထားလိုက်မယ်" ဟု ကန်းမန်က ယီယွင်ကို ကြည့်ကာ လေးနက်သော အသံဖြင့် ပြောလိုက်သည်။

ကန်းမန်၏ စကားကို ကြားသည့်အခါ ရန်ယွီသည် လက်သီးကို ချက်ချင်း တင်းတင်းဆုပ်လိုက်မိသည်။ ကန်းမန်၏ အဆင့်အတန်းမှာ သူတို့ကို လေ့ကျင့်ရေးအတွက် လိုက်ပါပို့ဆောင်ပေးရုံမျှထက် များစွာ သာလွန်သည်။ ရန်ယွီ၏ စွမ်းဆောင်ရည်မှာ မဆိုးသော်လည်း ကန်းမန်က သူ့ကို အပိုစကား တစ်ခွန်းမျှ မပြောခဲ့ပေ။ ယခုမူ ယီယွင်သည် ကန်းမန်၏ မျက်နှာသာပေးမှုကို ရရှိသွားခဲ့ပြီ။

ရန်ယွီသည် ထျန်းရှီ၏ အရင်းအမြစ်များ မရှိဘဲနှင့်လည်း သူ သာလွန်နိုင်ကြောင်း သက်သေပြရန် ထျန်းရှီနောက်သို့ လိုက်ရန် ရည်ရွယ်ထားခဲ့သည်။ ရန်ယွီသည် သူ၏ စွမ်းဆောင်ရည်အပေါ် ကျေနပ်နေခဲ့သော်လည်း ယခုအခါ ယီယွင်နှင့် ယှဉ်လိုက်သည့်အခါ သူသည် များစွာ နိမ့်ကျနေခဲ့သည်။

သူသည် ထျန်းရှီနှင့် ကုလော့ကို မမီခဲ့သည့်အပြင် ယခုအခါ မြေကမ္ဘာမီးလျှံခန်းမမှ လူသစ်တပည့်တစ်ဦးကိုပင် မမီတော့ပေ။

"ဒါပေမဲ့ ဖေးနတ်ဘုရားကျောက်တိုင် ၁၂ တိုင်ဆိုတာ ဥပဒေသ အသိအမြင်ကို စမ်းသပ်တာပဲ ရှိသေးတယ်။ ကျင့်ကြံသူတစ်ယောက်အတွက် အသိအမြင် ရှိရုံနဲ့တင် မလုံလောက်ဘူး၊ ဘာလို့လဲဆိုတော့ ကျင့်ကြံသူမှာ လုံလောက်တဲ့ ခွန်အားလည်း ရှိဖို့ လိုအပ်လို့ပဲ" ဟု ကန်းမန်က ဆိုလိုရင်းများစွာ ပါဝင်သော စကားကို ပြောလိုက်သည်။ ယီယွင်၏ စွမ်းဆောင်ရည်မှာ အမှန်တကယ် အံ့မခန်းဖြစ်ပြီး သူ၏ ကျင့်ကြံမှုအဆင့်နှင့် အသက်အရွယ်အရဆိုလျှင် အလွန်ပင် တောက်ပသည်ဟု ဖော်ပြနိုင်သည်။ သို့သော် ကန်းမန်သည် ယီယွင်ကို မျက်နှာသာပေးလေလေ ယီယွင် စိတ်ကြီးမဝင်သွားစေရန် ထိုစကားများဖြင့် အထူး သတိပေးလိုလေ ဖြစ်နေသည်။

"ဟုတ်တယ်၊ ယီယွင်က လက်ရှိမှာတော့ အသာစီး ရနေတာပဲ ရှိသေးတယ်။ အခုတော့ ငါ့မှာ အခြားသော ကဏ္ဍတွေဖြစ်တဲ့ ငါ့ရဲ့ ခန္ဓာကိုယ်လိုမျိုးမှာ ကြီးမားတဲ့ အားသာချက်တွေ ရှိနေသေးတယ်"

ရန်ယွီ၏ မျက်လုံးအောက်ခြေတွင် ထက်မြက်မှုတစ်ခု လက်ခနဲ ပေါ်လာသည်။ ခန္ဓာကိုယ် ခွန်အားနှင့် ပတ်သက်လာလျှင် လူသားမျိုးနွယ်သည် ဖေးမျိုးနွယ်ကို မမီပေ။ ထို့ပြင် ယီယွင်၏ ကျင့်ကြံမှုသက်တမ်းမှာ တိုတောင်းသေးသဖြင့် သူသည် စစ်မှန်သော ပါရမီရှင်ဖြစ်လျှင်ပင် လော့နတ်ဘုရားခန်းမ စမ်းသပ်မှုများသည် သူ၏ စင်မြင့်မဟုတ်သေးပေ။

လော့နတ်ဘုရားခန်းမ စမ်းသပ်မှုများတွင် ထူးချွန်သော တပည့်များသည် အဖွဲ့အစည်းအသီးသီး၏ အာရုံစိုက်မှုကို ရရှိနိုင်သည့်အပြင် စမ်းသပ်မှု အောင်မြင်သူများသည်လည်း များပြားသော ဆုလာဘ်များကို ရရှိကြလိမ့်မည်။ ထိုဆုလာဘ်များသည် သူတို့၏ ခွန်အားကို တိုးမြှင့်ရာတွင် များစွာ အထောက်အကူပြုသည်။

ဆယ်စုနှစ်တစ်ခုကြာမည့် လော့နတ်ဘုရားခန်းမ စမ်းသပ်မှုများ မစတင်မီတွင် သူတို့သည် ထိုကဲ့သို့သော လေ့ကျင့်ရေး အတွေ့အကြုံများကို အသုံးပြု၍ ရှေ့သို့ တစ်လှမ်းတိုးရန်နှင့် ထိုလေ့ကျင့်ရေးကာလအတွင်း အခွင့်အလမ်းများကို ရယူရန် လိုအပ်သည်။

ထို့နောက် အခြားသော မီးလျှံတိမ်တိုက်ပြည်နယ် တပည့်များပေါ်တွင် အလင်းတိုင်များ ပေါ်လာသည်။ သို့သော် ရန်ယွီ၊ ကုလော့နှင့် ယီယွင်တို့၏ အဆင့်များနောက်ပိုင်းတွင် မည်သူမျှ ကျန်ရှိသော တပည့်များအပေါ် အာရုံမစိုက်ကြတော့ပေ။

သူတို့ကိုယ်တိုင်ပင်လျှင် စိတ်ဝင်စားမှု လျော့နည်းသွားကြသည်။ ယခင်က တပည့်တိုင်းသည် နတ်ဘုရားကျောက်တိုင်များ၏ အသိအမှတ်ပြုမှုကို ရရှိရန် စိတ်လှုပ်ရှားစွာ မျှော်လင့်ခဲ့ကြသည်။

သို့သော် ယခုမူ ထိုစိုးရိမ်မှုများမှာ ပျောက်ကွယ်သွားခဲ့ပြီ။ သူတို့ အောင်မြင်ခဲ့လျှင်ပင် ၎င်းမှာ လှုပ်ရှားခြင်း အဆင့်မျှသာ ဖြစ်သဖြင့် ယီယွင်နှင့် နှိုင်းယှဉ်စရာ အကြောင်းမရှိပေ။

ကျန်ရှိသော တပည့်များသည်လည်း နတ်ဘုရားကျောက်တိုင် ၁၂ တိုင်၏ အဆင့်များကို လျင်မြန်စွာ ရရှိခဲ့ကြသည်။

အဆင့်သတ်မှတ်ချက်များက သူတို့ကို အတော်လေး စိတ်ဓာတ်ကျစေခဲ့သည်။

ကန်းမန်သည် ပြုံးယောင်သန်းနေသော မျက်နှာဖြင့် တပည့်များကို ကြည့်လိုက်သည်။

မီးလျှံတိမ်တိုက်ပြည်နယ် တပည့်များသည် အမျိုးမျိုးသော အမူအရာများ ဖြစ်နေကြသည်။ အဆင့်သတ်မှတ်ပြီးနောက် လူတိုင်းနီးပါးသည် သူတို့ စတင်ဝင်ရောက်လာချိန်ကနှင့် မတူညီသော အမူအရာများ ဖြစ်နေကြသည်။

သို့သော် ၎င်းမှာ လော့နတ်ဘုရားခန်းမ စမ်းသပ်မှုများကို ပြုလုပ်ရခြင်း၏ ရည်ရွယ်ချက်များအနက် တစ်ခုပင် ဖြစ်သည်။ လော့မျိုးနွယ်စုသည် ပါရမီရှင် ကျင့်ကြံသူများ အစဉ်မပြတ် ထွက်ပေါ်လာခြင်းအားဖြင့် ကာလရှည်ကြာ ရပ်တည်နိုင်ခဲ့ခြင်း ဖြစ်သည်။

ကောင်းကင်အထိ မြင့်မားသော အမြင်ရှိသည့် ထိုထူးချွန်သူများကို အတူတကွ စုဝေးစေခြင်းမှာ သူတို့၏ အားနည်းချက်များကို သူတို့ဘာသာ သိမြင်စေပြီး သူတို့၏ စွမ်းဆောင်ရည်ကို ပိုမို မြှင့်တင်ပေးနိုင်မည့် တစ်ခုတည်းသော နည်းလမ်းဖြစ်သည်။

စိတ်ဓာတ်ကျသွားပြီး ပြန်မနလန်နိုင်တော့သော တပည့်များမှာမူ စိုးရိမ်စရာမရှိဘဲ ဖယ်ထုတ်ခြင်း ခံရမည် ဖြစ်သည်။ လော့မျိုးနွယ်စုသည် ထိုကဲ့သို့သော ကျင့်ကြံသူများကို မလိုအပ်ပေ။

"ရှေးဟောင်းဖေး အဆောက်အအုံထဲမှာ မင်းတို့အတွက် အခွင့်အလမ်းတွေ အများကြီး ပြင်ဆင်ထားတယ်လို့ ငါ အရင်က ပြောခဲ့တယ်။ အဲဒါကို ရနိုင်ဖို့က မင်းတို့ရဲ့ ကိုယ်ပိုင်အရည်အချင်းပေါ်မှာပဲ မူတည်တယ်" ဟု ကန်းမန်က ပြောလိုက်သည်။

ချက်ချင်းပင် နတ်ဘုရားကျောက်တိုင် ၁၂ တိုင်၏ အသိအမှတ်ပြုမှုကို ရရှိခဲ့သော တပည့်အားလုံး စိတ်ဓာတ်များ တက်ကြွလာကြသည်။ နတ်ဘုရားကျောက်တိုင် ၁၂ တိုင်က သူတို့၏ ဥပဒေသ အသိအမြင်နှင့် ကန့်သတ်ချက်များကို ရှင်းလင်းစွာ သိရှိစေခဲ့သည်။

၎င်းက သူတို့၏ စိတ်ကို ထိုအပေါ်၌သာ အာရုံရောက်စေပြီး သူတို့ကို စောင့်ကြိုနေသည့် အခွင့်အလမ်းများ ရှိနေသေးကြောင်းကိုပင် မေ့လုနီးပါး ဖြစ်စေခဲ့သည်။

"နတ်ဘုရားကျောက်တိုင် ၁၂ တိုင်ဟာ ဥပဒေသတွေကို ကိုယ်စားပြုတယ်။ အဲဒါတွေက နက်နဲပြီး ခက်ခဲတယ်။ အဲဒီက အခွင့်အလမ်းတွေကို ရဖို့ဆိုတာ မလွယ်ကူတဲ့ ကိစ္စပဲ" ကန်းမန်က တပည့်များကို ကြည့်ကာ နှေးကွေးစွာ ပြောလိုက်သည် "၎င်းတို့ရဲ့ ကျေးဇူးတော် အရိပ်အယောင်လေးပဲ ရှိနေတာဆိုပေမယ့် ရှေးဟောင်းဖေးကျောက်တိုင်တွေမှာ ကိုယ်ပိုင် အသိစိတ်ရှိကြတယ်။

အရင်က တည်ဆောက်ခဲ့သူတွေဟာ သူတို့ရဲ့ အမွေအနှစ်တွေကို ချန်ထားရစ်ခဲ့ပြီး ရှေးဟောင်းဖေးကျောက်တိုင်တွေရဲ့ ဟင်းလင်းပြင်ကမ္ဘာထဲမှာ ချိပ်ပိတ်ခဲ့ကြတယ်။ မင်းတို့ ရရှိခဲ့တဲ့ အသိအမှတ်ပြုမှုအပေါ် မူတည်ပြီး အခွင့်အလမ်းအမျိုးမျိုးကို ပေးအပ်သွားလိမ့်မယ်"

နတ်ဘုရားကျောက်တိုင် ၁၂ တိုင်အနက် မည်သည့်ကျောက်တိုင်၏ အသိအမှတ်ပြုမှုကိုမဆို ရရှိခဲ့သူများသည် ကျောက်တိုင် ၁၂ တိုင်၏ ဟင်းလင်းပြင်ကမ္ဘာထဲသို့ ဝင်ရောက်ခွင့် ရရှိကြမည် ဖြစ်သည်။

ကန်းမန် စကားပြောနေစဉ်မှာပင် အသိအမှတ်ပြုမှု ရရှိခဲ့ကြသူ အားလုံးမှာ မှိန်ပျပျ အလင်းတန်းတစ်ခုဖြင့် ဖုံးလွှမ်းသွားခဲ့သည်။

ထို့နောက် မြေပြင်မှ အလွန်ကြီးမားသော ဖေးသားရဲကြီးတစ်ကောင် နိုးထလာသကဲ့သို့ နိမ့်ပါးသော မြည်ဟည်းသံကြီး ပေါ်ထွက်လာခဲ့သည်။

ရှေးဦးတည်ရှိမှုတစ်ခုက စိုက်ကြည့်နေသကဲ့သို့သော ခံစားချက်က လူအုပ်ကြီးကို လွှမ်းခြုံသွားပြီး မြေပြင်မှာ ညင်သာစွာ တုန်ခါလာသဖြင့် ကျင့်ကြံသူများကို ကြောက်ရွံ့တုန်လှုပ်သွားစေသည်။

တစ်ချိန်တည်းမှာပင် သူတို့၌ ပြင်းထန်သော မျှော်လင့်ချက်များလည်း ပေါ်ပေါက်လာခဲ့သည်။

တံခါးကြီး ပွင့်တော့မည် ဖြစ်သည်။