အခန်း (၁၀၉၁-၁၀၉၂)
Vol. 93 Ch. 1091-1092
အခန်း ၁၀၉၁ - နဂါးလူသားမျိုးနွယ်၏ လျှို့ဝှက်ဘာသာစကား၊ ယုံကြည်မှုနှင့် အချိန်ကွာခြားချက်
“ကျုပ်က နဂါးလူသားမျိုးနွယ်ရဲ့ မျိုးနွယ်စုခေါင်းဆောင်ရွှမ်းချီပါ။ လေဟာနယ်တံခါးရဲ့ တစ်ဖက်ခြမ်း၊ ခင်ဗျားတို့ အခုတိုက်ခိုက်နေတဲ့ မသေမျိုးမျိုးနွယ်စုရဲ့ နောက်ကျောဘက်မှာ ကျုပ်တို့ ရှိနေပါတယ်။ နောက်ထပ် တစ်နာရီအကြာ၊ ဆိုလိုတာက ဒီလက်ကိုင်ဖုန်းမှာ ၁၀:၄၀ လို့ ပြတဲ့အချိန်မှာ ကျုပ်တို့ လေဟာနယ်တံခါးကို ဖြတ်ပြီး တိုက်စစ်ဖွင့်ပါမယ်။ ကျုပ်တို့က မသေမျိုးမျိုးနွယ်စုရဲ့ နောက်ကျောဘက်ကနေ တိုက်ခိုက်မှာဖြစ်ပြီး အဲ့ဒီအချိန်မှာ ခင်ဗျားတို့ဘက်ကလည်း မသေမျိုးတွေရဲ့ ခုခံစစ်ကြောင်းကို တစ်ပြိုင်နက်တည်း ထိုးဖောက်တိုက်ခိုက်ပေးဖို့ မျှော်လင့်ပါတယ်။”
အသံသွင်းခြင်းကို အဆုံးသတ်လိုက်ပြီးနောက် ရွှမ်းချီသည် အလွန်ထူးခြားဆန်းကြယ်သော အသံတစ်ခုကိုလည်း ပြုလုပ်လိုက်သည်။
တယ်လီပသီစွမ်းရည်ရှိသည့် ရှောင်းယီပင်လျှင် ထိုအသံထဲတွင် ပါဝင်သော အဓိပ္ပာယ်ကို နားမလည်နိုင်ခဲ့ပေ။
အသံသွင်းပြီးနောက် ရှောင်းယီသည် သူ့လက်ထဲရှိ လက်ကိုင်ဖုန်းကို စတင်အသုံးပြုလိုက်သည်။
စောစောက ကင်းထောက်ဒရုန်းမှ ပေးပို့လာသော အချက်အလက်များအရ မသေမျိုးမျိုးနွယ်စု၏ နောက်တန်းမှ တိုက်ပွဲရှေ့တန်းစစ်မျက်နှာသို့ ပျံသန်းရန် နာရီဝက်ခန့် ကြာမြင့်မည်ဖြစ်သည်။ ဆိုလိုသည်မှာ လေဟာနယ်တံခါးတစ်ဖက်ခြမ်းရှိ နဂါးလူသားမျိုးနွယ်အနေဖြင့် သူတို့ကို ယုံကြည်ခြင်း ရှိ၊ မရှိ ဆုံးဖြတ်ရန်နှင့် စစ်ကူလွှတ်ရန်အတွက် ပြင်ဆင်ချိန် နာရီဝက်သာ ရရှိမည်ဖြစ်သည်။
အချိန်က အမှန်တကယ်ပင် အနည်းငယ်ကပ်သီးကပ်သတ်နိုင်လှသည်။ တစ်ဖက်ခြမ်းမှ နဂါးလူသားမျိုးနွယ်များ ပြတ်သားပါစေရန်သာ ဆုတောင်းရပေတော့မည်။
သူသည် အသံသွင်းထားသော ဖိုင်ကို နာရီဝက်အကြာတွင် အလိုအလျောက် အထပ်ထပ်ပြောနေစေရန် သတ်မှတ်လိုက်ပြီးနောက် လက်ကိုင်ဖုန်းကို ကင်းထောက်ဒရုန်းပေါ်တွင် တင်ကာ လွှတ်တင်လိုက်တော့သည်။
သူသည် ကင်းထောက်ဒရုန်း၏ ပစ်မှတ်ကို စောစောက ကင်မရာထဲတွင် ဖမ်းယူရရှိခဲ့ပြီး နဂါးလူသားမျိုးနွယ်၏ ခေါင်းဆောင်ဖြစ်နိုင်ခြေ အရှိဆုံးသူထံသို့ သတ်မှတ်လိုက်ကာ ဒရုန်းကို စေလွှတ်လိုက်သည်။
ကင်းထောက်ဒရုန်းသည် လေဟာနယ်ဆီသို့ ချက်ချင်းပျံသန်းသွားပြီး မျက်စိရှေ့မှ ပျောက်ကွယ်သွားတော့သည်။
SSS အဆင့် ကင်းထောက်ဒရုန်းတစ်ခုအနေဖြင့် ၎င်းသည် ကင်းထောက်ရန် ပစ်မှတ်များကို အလိုအလျောက် ခွဲခြားသိမြင်နိုင်ပေသည်။ ပစ်မှတ်ကို ရှာတွေ့ပြီးနောက် ရှောင်းယီ သတ်မှတ်ထားသည့်အတိုင်း ၎င်းတို့၏ ရှေ့တွင် ဝဲပျံနေမည်ဖြစ်သည်။
ဤအစီအစဉ်သည် မည်သည့်ပြဿနာမျှ ရှိလိမ့်မည်မဟုတ်ပေ။
ထိုအချိန်တွင် ကျန်းယွင်ထျန်းသည်လည်း သူ၏တပ်ဖွဲ့များနှင့်အတူ ရောက်ရှိလာခဲ့ပြီဖြစ်သည်။ စစ်သားအားလုံးသည် ကာဘိုင်ရိုင်ဖယ်များ တပ်ဆင်ထားကြပြီး တပ်ဖွဲ့ထဲတွင် စက်သေနတ်တပ်စုတစ်ခုလည်း ပါဝင်ကာ တပ်ဖွဲ့၏ နောက်ဆုံးတွင်တော့ ဘားရက် စနိုက်ပါရိုင်ဖယ်များ ကိုင်ဆောင်ထားသည့် စနိုက်ပါသမား အချို့ရှိနေသည်။
လူသားများ၏ လက်ထဲတွင် လက်နက်အသစ် အမျိုးအစားအချို့ ထပ်မံပေါ်ပေါက်လာသည်ကို မြင်သောအခါ မျိုးနွယ်ခြားများက သူတို့၏ လက်နက်များကို စူးစမ်းလိုစိတ်ဖြင့် ကြည့်နေကြသည်။
ဤအပြင်လူများ ထုတ်လုပ်လိုက်သည့် လက်နက်များ၏ စွမ်းအားကို သူတို့ ယခင်က မျက်မြင်တွေ့ခဲ့ဖူးပြီးသားဖြစ်ရာ ၎င်းမှာ အမှန်တကယ်ပင် ကြောက်မက်ဖွယ်ကောင်းလှသည်။
အကယ်၍ အခွင့်အရေးရပါက သူတို့ကိုယ်တိုင်လည်း ထိုလက်နက်များကို စမ်းသပ်အသုံးပြုကြည့်လိုကြသည်။
သို့သော် လောလောဆယ်တွင် သူတို့မှာ ပူးပေါင်းဆောင်ရွက်သည့် ဆက်ဆံရေးသာရှိပြီး တစ်ဦးနှင့်တစ်ဦး ထိုမျှအထိ ရင်းနှီးကျွမ်းဝင်မှု မရှိသေးပေ။ မျိုးနွယ်ခြားများကလည်း မတောင်းဆိုသလို ရှောင်းယီဘက်ကလည်း သူတို့သဘောအလျောက် မကမ်းလှမ်းခဲ့ပေ။
ကင်းထောက်ဒရုန်းသည် လေဟာနယ်တံခါးကို ဖြတ်ကျော်ပြီးနောက် ၎င်း၏ ပျံသန်းမှုအမြင့်ကို ချက်ချင်းမြှင့်တင်လိုက်သည်။ ထိုအရိုးစုများသည် ယခုကဲ့သို့ စက်မှုပစ္စည်းများကို လုံးဝအာရုံခံနိုင်ပုံမရဘဲ ကင်းထောက်ဒရုန်း ရှိနေသည်ကို လုံးဝသတိမထားမိကြပေ။
ဒရုန်းသည် ရှေ့တန်းစစ်မျက်နှာဆီသို့ လျင်မြန်စွာ ပျံသန်းသွားခဲ့သည်။ မိနစ်နှစ်ဆယ်ကျော် ကြာပြီးနောက် ၎င်းသည် ပစ်မှတ်ထားသော နဂါးလူသားကို ရှာတွေ့သွားပြီး အမြင့်ကို စတင်နှိမ့်ချလိုက်သည်။
သို့သော် ထိုနဂါးလူသားမှာ အလွန်နိုးကြားလှပေသည်။ သူ၏ထံသို့ မည်းနက်ပြီး မပီပြင်သော အရာတစ်ခု ပျံသန်းလာသည်ကို မြင်သောအခါ သူသည် လက်ထဲရှိ လှံကို ချက်ချင်းဆွဲထုတ်လိုက်ပြီး လေထဲတွင် ပျံသန်းနေသော ကင်းထောက်ဒရုန်းကို သတိကြီးစွာဖြင့် စောင့်ကြည့်လိုက်သည်။
“ဒါက ဘာကြီးလဲ။”
“ငါလည်း မသိဘူး။ မသေမျိုးတွေဘက်က ပျံလာတာဆိုတော့ မသေမျိုးမျိုးနွယ်စုရဲ့ ဟာတစ်ခုခုပဲ ဖြစ်ရမယ်။ အားလုံး သတိထားကြ။”
“ငါ ဒါကို လှံနဲ့ထိုးချလိုက်မယ်...ကြည့်နေ။”
“မလုပ်နဲ့ဦး။ ဒီဟာက ဘာမှန်းမသိဘဲနဲ့ ဇွတ်အတိုက်ခိုက်တာ မကောင်းဘူး။”
နဂါးလူသားသည် ကင်းထောက်ဒရုန်းကို သတိကြီးစွာဖြင့် စောင့်ကြည့်နေ၏။ မကြာမီ အချိန်စေ့သွားသည်နှင့် ကင်းထောက်ဒရုန်းသည် ရွှမ်းချီ၏ အသံသွင်းထားမှုကို စတင်ဖွင့်ထုတ်လိုက်တော့သည်။
“ကျုပ်က နဂါးလူသားမျိုးနွယ်ရဲ့ မျိုးနွယ်စုခေါင်းဆောင် ရွှမ်းချီပါ။”
ရုတ်တရက် ထွက်ပေါ်လာသော အသံကြောင့် ဤနေရာရှိ နဂါးလူသားများမှာ ထိတ်လန့်သွားပြီး လက်ထဲမှ လှံများကိုပင် ပစ်ပေါက်မိလုနီးပါး ဖြစ်သွားခဲ့ကြသည်။
“ဒါ နဂါးလူသား ဘာသာစကားပဲ။”
တစ်ယောက်က ချက်ချင်း ပြောလိုက်သည်။
“ဟုတ်တယ်။ သူ ဘာပြောလဲဆိုတာ နားထောင်ကြည့်ရအောင်။”
“လေဟာနယ်ရဲ့ တစ်ဖက်ခြမ်း၊ ခင်ဗျားတို့ အခုတိုက်ခိုက်နေတဲ့ မသေမျိုးမျိုးနွယ်စုရဲ့ နောက်ကျောဘက်မှာ...”
ရွှမ်းချီ၏ စကားများကို ကြားပြီးနောက် နဂါးလူသားများသည် ထိတ်လန့်တကြားဖြင့် တစ်ဦးကိုတစ်ဦး ကြည့်မိလိုက်ကြသည်။
“ဒါ အစစ်အမှန်လား။ ဘာလို့ ဒီလောက်တောင် ထူးဆန်းနေရတာလဲ။”
“ဟုတ်တယ်။ တစ်ဖက်လူက နဂါးလူသားဘာသာစကားကို သုံးနေတာမှန်ပေမဲ့ ငါတို့ ဒီလို စက်ပစ္စည်းမျိုးကို တစ်ခါမှ မမြင်ဖူးဘူး မဟုတ်လား။”
“ဒါက မသေမျိုးတွေဘက်က လာတာဆိုတော့ ငါတို့ မယုံတာ အကောင်းဆုံးပဲ။”
ထိုစဉ် နဂါးလူသားတပ်ဖွဲ့၏ ခေါင်းဆောင်က စကားပြောလာခဲ့သည်။
“မဟုတ်ဘူး။ သူပြောတာတွေက အမှန်ပဲ။ အားလုံး ပြင်ဆင်ကြ။ နောက် မိနစ်နှစ်ဆယ်အတွင်းမှာ ငါတို့ အင်အားအပြည့်နဲ့ စတင်တိုက်ခိုက်မယ်။”
ဘေးပတ်ဝန်းကျင်ရှိ နဂါးလူသားများသည် အနည်းငယ် မှင်တက်သွားပြီး နောက် တညီတညွတ်တည်း တုံ့ပြန်လိုက်ကြသည်။
“ဟုတ်ကဲ့။”
သူတို့၏ ခေါင်းဆောင်က အဘယ်ကြောင့် ဤမျှအထိ သေချာနေရသည်ကို မသိသော်လည်း ခေါင်းဆောင်၏ အမိန့်ကိုတော့ တသွေမတိမ်း လိုက်နာကြရမည်ဖြစ်သည်။
“နဂါးလူသားမျိုးနွယ်ရဲ့ လျှို့ဝှက်ဘာသာစကားကို မျိုးနွယ်စုခေါင်းဆောင်တွေပဲ သိတယ်။ ဒါကြောင့် ဒီသတင်းစကားက နဂါးလူသားမျိုးနွယ်စု ခေါင်းဆောင်တစ်ယောက်က ပြောတာ သေချာတယ်။ ဒါဟာ ငါတို့ မသေမျိုးတွေကို တိုက်ခိုက်ဖို့အတွက် လိုအပ်နေတဲ့ အခွင့်အရေး ဖြစ်ကောင်းဖြစ်နိုင်တယ်။”
နဂါးလူသားခေါင်းဆောင်သည် အဝေးရှိ အဆုံးမရှိသော မသေမျိုးတပ်မကြီးကို ကြည့်ရင်း ရေရွတ်လိုက်သည်။
ခေါင်းဆောင်၏ အမိန့်နှင့်အတူ နဂါးလူသားတစ်ဖွဲ့လုံး စတင်လှုပ်ရှားလိုက်ကြတော့လေသည်။
တစ်ချိန်တည်းမှာပင် မသေမျိုးမျိုးနွယ်စု၏ တပ်မတော်အတွင်း၌ ဝတ်ရုံနက်ခြုံထားသော ပိန်လှီသည့် ပုံရိပ်တစ်ခုသည် သူတို့ရှေ့မှ နဂါးလူသားများ၏ လှုပ်ရှားမှုကို သံသယဖြင့် ကြည့်နေခဲ့သည်။
“ဒီနဂါးလူသားတွေ ဘာလုပ်နေတာလဲ။ ငါတို့ကို အသေအကျေတိုက်ဖို့ ကြိုးစားနေတာလား။”
ဝတ်ရုံနက်နှင့် ပုံရိပ်မှာ အလွန်ပင် ဇဝေဇဝါ ဖြစ်နေခဲ့လေသည်။
ယီရန်ပင်း မဟာမိတ်အဖွဲ့၏ ပင်မကျွန်းကြီးပေါ်တွင်တော့ ကျန်းယွင်ထျန်းက သူ၏ လက်ကိုင်ဖုန်းကို ကြည့်ကာ ပြောလိုက်သည်။
“ကျွန်းပိုင်ရှင် ၁၀ မိနစ်လောက်ပဲ လိုတော့တယ်။ ငါတို့ တကယ်ပဲ ထိုးဖောက်တိုက်ခိုက်တော့မှာလား။”
ရှောင်းယီက နောက်လှည့်ကြည့်ကာ ရွှမ်းချီကို ကြည့်ပြီး ပြောလိုက်သည်။
“အဲ့ဒါကတော့ ခေါင်းဆောင်ရွှမ်းချီက ဟိုဘက်က နဂါးလူသားခေါင်းဆောင်ကို ဖျောင်းဖျနိုင်၊ မနိုင်ပေါ်မှာပဲ မူတည်တယ်။”
“စိတ်ချပါ ကျွန်းပိုင်ရှင်ရှောင်း တစ်ဖက်ကလူတွေက ကျုပ်တို့ တောင်းဆိုထားတဲ့အတိုင်း အချိန်မီ တိုက်စစ်ဖွင့်မှာ သေချာပါတယ်။”
ရွှမ်းချီက အလွန်အမင်း ယုံကြည်ချက်ရှိရှိဖြင့် ပြောလိုက်သည်။ ရှောင်းယီက ခေါင်းညိတ်လိုက်သည်။
“ဒါဆိုရင်တော့ ကျုပ်တို့ အချိန်အတိအကျမှာပဲ စတင်တိုက်ခိုက်မယ်။”
ကျန်းယွင်ထျန်းက မျက်မှောင်အနည်းငယ်ကြုတ်ကာ အသံတိုးတိုးဖြင့် ပြောလိုက်သည်။
“သူပို့လိုက်တဲ့ အချက်အလက်က တကယ်ပဲ စိတ်ချရလို့လား။”
“စိတ်မပူပါနဲ့။ ပြဿနာမရှိဘူး။”
ရှောင်းယီက ပြုံးကာ ပြန်ဖြေလိုက်သည်။
အနီးတွင် ရပ်နေသော ရွှမ်းချီသည် ကျန်းယွင်ထျန်း၏ စကားကို နားမလည်သော်လည်း ကျန်းယွင်ထျန်း၏ စိုးရိမ်မှုကိုတော့ ရိပ်မိသည်။
“ခင်ဗျားတို့ စိတ်ချပါ။ တိုက်ခိုက်ရမယ့် အချိန်ရောက်ရင် ကျုပ်တို့ နဂါးလူသားမျိုးနွယ်က အရင်ဆုံး စတင်ထိုးဖောက်ပါမယ်။ ခင်ဗျားတို့က ကျုပ်တို့ နောက်ကနေ လိုက်ခဲ့ရုံပါပဲ။”
ရွှမ်းချီက ယုံကြည်မှုအပြည့်ဖြင့် ပြောလိုက်သည်။
ကျန်းယွင်ထျန်းက မျက်ခုံးပင့်လိုက်သော်လည်း ငြင်းဆန်ခြင်းမပြုပေ။ ယခုကဲ့သို့ အန္တရာယ်များသော ကိစ္စရပ်တွင် စွန့်စားမနေခြင်းက ပိုကောင်းသည်။
၁၀ မိနစ်မှာ လျင်မြန်စွာ ကုန်ဆုံးသွားပြီး ရွှမ်းချီသည် လေဟာနယ်တံခါးရှိရာသို့ စတင်တိုက်စစ်ဖွင့်ရန် ပြင်ဆင်လိုက်၏။
“နေဦး။”
ရှောင်းယီက ရွှမ်းချီကို တားလိုက်သည်။ ရွှမ်းချီက ရှောင်းယီကို နားမလည်နိုင်သလို ကြည့်လိုက်ရာ ရှောင်းယီက ရှင်းပြလိုက်သည်။
“ကျုပ်တို့ အချိန်ကွာခြားချက်တစ်ခုကို သုံးဖို့လိုတယ်။ ဟိုဘက်က နဂါးလူသားမျိုးနွယ်က မသေမျိုးတွေရဲ့ ပစ်ခတ်မှုအားလုံးကို ဆွဲဆောင်ထားတဲ့ အချိန်ကျမှ ကျုပ်တို့ဘက်က ထိုးဖောက်ဝင်ရောက်မယ်ဆိုရင် ရန်သူကို အငိုက်မိမိနဲ့ တိုက်ခိုက်နိုင်လိမ့်မယ်။”
အကျိုးအကြောင်းပြချက်မှာ ရိုးရှင်းပြီး နားလည်လွယ်သော်လည်း ရွှမ်းချီက မျက်မှောင်ကြုတ်ကာ ပြောလိုက်သည်။
“အဲ့ဒီလိုလုပ်ရင် ဟိုဘက် နဂါးလူသားတွေဘက်က အကျအဆုံး တော်တော်များသွားလိမ့်မယ်။”
ရှောင်းယီက ပြုံးလိုက်သည်။
“မစိုးရိမ်ပါနဲ့။ ခင်ဗျားတို့ နဂါးလူသားမျိုးနွယ်ရဲ့ လျှို့ဝှက်နည်းစနစ်က ၅ မိနစ်ထက်မက ခံနိုင်ရည်ရှိတယ် မဟုတ်လား။”
ရွှမ်းချီ အံ့အားသင့်သွားပြီးနောက် ခေါင်းညိတ်လိုက်သည်။
“အဲ့ဒါတော့ အမှန်ပဲ။ ဒါဆို ကျုပ်တို့ ဘယ်အချိန်မှာ ထိုးဖောက်မလဲ။”
“နောက်ထပ် ၅ မိနစ်နေရင်...။”
ရှောင်းယီက ပြန်ဖြေလိုက်သည်။
ထိုအချိန်တွင် လေဟာနယ်တံခါး၏ အခြားတစ်ဖက်ခြမ်းရှိ နဂါးလူသားတပ်ဖွဲ့မှာ အင်အားအပြည့်ဖြင့် စတင်တိုက်ခိုက်နေပြီဖြစ်သည်။
နဂါးလူသားအားလုံးသည် ၎င်းတို့၏ လျှို့ဝှက်နည်းစနစ်ကို အသုံးပြုကာ မသေမျိုးမျိုးနွယ်စု၏ တပ်စခန်းများဆီသို့ အရှိန်အဟုန်ဖြင့် ပြေးဝင်လာနေကြပြီဖြစ်သည်။
မသေမျိုးတပ်မတော်အတွင်းရှိ ဝတ်ရုံနက်နှင့် ပုံရိပ်က မျက်မှောင်ကြုတ်လိုက်သည်။
“သူတို့ ဘာဖြစ်နေတာလဲဆိုတာ ငါမသိပေမဲ့ သူတို့ရဲ့ တိုက်ခိုက်မှုကို ငါတို့ တားဆီးရမယ်။ သူတို့ကို ပိတ်ဆို့ဖို့ တပ်ဖွဲ့အားလုံးကို ဖြန့်ကျက်လိုက်။”
သူက အမိန့်ပေးလိုက်သည်။
“အမိန့်တော်အတိုင်းပါ အရှင်။ ဒါပေမဲ့ လေဟာနယ်တံခါးတစ်ဘက်ခြမ်းမှာ ခုခံရေးတပ်သားတွေ ချန်ထားဖို့ လိုဦးမလား။”
ဘေးနားရှိ အရိုးစုစစ်သည်တစ်ဦးက မြေပြင်ပေါ် ဒူးထောက်လျက် မေးမြန်းလိုက်သည်။
အခန်း ၁၀၉၂- လေဟာနယ်တံခါးထဲသို့ ထိုးဖောက်ဝင်ရောက်ခြင်း၊ ဆုံမှတ်နှင့် ကောင်းကင်ဘုံရွေးချယ်ထားသောကမ္ဘာ
“အရိုးစု ငါးသောင်းလောက် ချန်ထားခဲ့ပြီး စောင့်ခိုင်းရင် လုံလောက်ပြီ။ ဟိုဘက်ခြမ်းက လူသားတွေနဲ့ မျိုးနွယ်ခြားတွေက ငါတို့ဆီကို အတင်းထိုးဖောက်ဝင်ရောက်လာဖို့ သတ္တိရှိမှာ မဟုတ်ဘူး။”
ဝတ်ရုံနက်ထဲမှ လှောင်ပြောင်သံတစ်ခု ထွက်ပေါ်လာခဲ့သည်။
“ဟုတ်ကဲ့ပါ။”
အရိုးစုစစ်တပ်တစ်ခုလုံးသည် ရှေ့တန်းစစ်မျက်နှာသို့ အပြင်းအထန် ချီတက်သွားကြသဖြင့် ရှေ့တန်းရှိ နဂါးလူသားမျိုးနွယ်စုများမှာ ချက်ချင်းပင် ကြီးမားသော ဖိအားကို ခံစားလိုက်ရသည်။
“ခေါင်းဆောင်... ဟိုဘက်ခြမ်းက နဂါးလူသားတွေက ဝိုင်းပြီးတော့ မသေမျိုးမျိုးနွယ်စုတွေကို တိုက်ခိုက်မယ်ဆိုတာ သေချာရဲ့လား။”
“ခဏလောက် တောင့်ခံထားစမ်း။ သူတို့ သဘောတူထားတဲ့အတိုင်း သေချာပေါက် တိုက်ခိုက်လိမ့်မယ်။”
ခေါင်းဆောင်ဖြစ်သူက သူ၏ရှေ့ရှိ အရိုးစုကို ရိုက်ခွဲပစ်ရင်း ဟစ်အော်ပြောဆိုလိုက်သည်။
ပတ်ဝန်းကျင်ရှိ နဂါးလူသားများသည်လည်း တွန့်ဆုတ်မနေတော့ဘဲ သူတို့ရှေ့ရှိ အရိုးစုစစ်တပ်ကို ဆက်လက်သတ်ဖြတ်လိုက်ကြတော့သည်။
ငါးမိနစ်အချိန်သည် လျင်မြန်စွာ ကုန်ဆုံးသွားပြီးနောက် ရှောင်းယီက အမိန့်ပေးလိုက်သည်။
“တိုက်စစ်ဖွင့်။”
စိတ်မရှည်ဖြစ်နေသော ရွှမ်းချီသည် သူ၏မျိုးနွယ်စုဝင်များကို ဦးဆောင်ကာ လေဟာနယ်တံခါးဆီသို့ ချက်ချင်း ပြေးဝင်သွားတော့သည်။
ထိုအချိန်တွင် လေဟာနယ်တံခါးအတွင်းမှ မသေမျိုးမျိုးနွယ်စုဝင်အချို့ တစ်ခါတစ်ရံ ထွက်ပေါ်လာနေဆဲဖြစ်သော်လည်း ရွှမ်းချီနှင့် အခြားနဂါးလူသားများ၏ တိုက်ခိုက်မှုကြောင့် လုံးဝတကွဲတပြား ဖြစ်သွားခဲ့ကြသည်။
သူတို့နောက်တွင် နာဂမျိုးနွယ်စုနှင့် နတ်သူငယ်မျိုးနွယ်စုများက ကပ်လျက်လိုက်ပါလာပြီး ကျန်းယွင်ထျန်းနှင့် သူ၏တပ်ဖွဲ့မှာ နောက်ဆုံးမှ လိုက်ပါလာကြသည်။
မကြာမီတွင် သူတို့သည် လေဟာနယ်တံခါးအတွင်းသို့ ပြေးဝင်သွားကြပြီး ၁၀ မီတာခန့် လမ်းလျှောက်လိုက်ရသကဲ့သို့ ခံစားရပြီးနောက် အခြားတစ်ဖက်သို့ ရောက်ရှိသွားခဲ့ကြသည်။
ဤဘက်ခြမ်း၏ လေထုမှာ အနည်းငယ် မှောင်မှောက်ပြီး ခြောက်ကပ်နေသကဲ့သို့ ခံစားရ၏။
သို့သော် ကျန်းယွင်ထျန်းနှင့် သူ၏တပ်ဖွဲ့သည် ထိုမှောင်မှောက်နေသော ကမ္ဘာကို အသေအချာ ကြည့်ရှုရန် အချိန်မရှိပေ။ အကြောင်းမှာ သူတို့ရှေ့တွင် အရိုးစုပင်လယ်ကြီး ရှိနေသောကြောင့် ချက်ချင်းပင် တိုက်ပွဲဝင်လိုက်ကြရသည်။
ရွှမ်းချီနှင့် အခြားသူများသည် အရိုးစုများ၏ ဝိုင်းရံခြင်းကို လုံးဝခံထားရပြီး ဖြစ်သည်။
“အခုချက်ချင်း ဒီနေရာမှာ ကာကွယ်ရေးစခန်း တည်ဆောက်ကြ။ လွတ်လပ်စွာ ပစ်ခတ်ခွင့်ပေးတယ်။”
ကျန်းယွင်ထျန်းက အော်ဟစ်လိုက်သည်။
စစ်သည်အချို့သည် ချက်ချင်းပင် ကတုတ်ကျင်းများ တူးကြပြီး စက်သေနတ်တပ်စုကမူ သူတို့၏ စက်သေနတ်များကို တပ်ဆင်ပြီးသားဖြစ်ကာ သူတို့ရှေ့ရှိ မသေမျိုးမျိုးနွယ်စုကို တစ်ဖက်သတ် သတ်ဖြတ်ခြင်းအား စတင်လိုက်တော့သည်။
“ဒပ် ဒပ် ဒပ် ဒပ်...”
အရိုးစိုင် အပိုင်းအစများမှာ သူတို့ရှေ့တွင် လွင့်စင်နေပြီး အပေါ့စားစက်သေနတ်များ၏ အင်အားကြောင့် ရွှမ်းချီနှင့် နဂါးလူသားများအပေါ် ကျရောက်နေသော ဖိအားများမှာ သိသိသာသာ လျော့နည်းသွားခဲ့သည်။
မကြာမီတွင် သူတို့သည် အရိုးစုများ၏ ဝိုင်းရံမှုအတွင်းမှ ကျန်းယွင်ထျန်းတို့ တည်ဆောက်ထားသော ခံစစ်စခန်းဆီသို့ ပြန်လည်ဆုတ်ခွာနိုင်ခဲ့ကြသည်။
“ဟူး...။”
ရွှမ်းချီသည် သူအသုံးပြုထားသော လျှို့ဝှက်ပညာရပ်အခြေအနေကို ရပ်တန့်လိုက်ပြီး ကျန်းယွင်ထျန်း၏ လက်ထဲရှိ စက်သေနတ်ကို ကြည့်ကာ မှတ်ချက်ပေးလိုက်သည်။
“ခင်ဗျားတို့ရဲ့ လက်နက်တွေက တကယ် အစွမ်းထက်တာပဲ။”
သူတို့၏ ထိခိုက်မှုမရှိသော အခြေအနေမှာ အမြဲတမ်း အကန့်အသတ်ရှိသော်လည်း ကျန်းယွင်ထျန်း၏ လက်ထဲမှ လက်နက်များမှာမူ ဆက်တိုက် တိုက်ခိုက်နိုင်စွမ်း ရှိသည်။
စခန်းအခြေအနေ တည်ငြိမ်သွားသည်ကို မြင်သောအခါ ရှောင်းယီက အမိန့်ပေးလိုက်သည်။
“မဟာမိတ်အဖွဲ့ထဲက အားနေတဲ့ တပ်ဖွဲ့တွေကို ချက်ချင်း စစ်ကူလာဖို့ အမိန့်ပေးလိုက်။”
“ဟုတ်ကဲ့။”
ကျန်းယွင်ထျန်းက ချက်ချင်း အမိန့်ထုတ်ပြန်လိုက်သည်။
ထိုအချိန်တွင် မသေမျိုးမျိုးနွယ်စုများသည်လည်း လေဟာနယ်တံခါးတွင် ထူးခြားမှုဖြစ်နေသည်ကို သတိပြုမိသွားပြီး ဝတ်ရုံနက်ဝတ်ထားသူက ထိတ်လန့်တကြားဖြင့် ပြောလိုက်သည်။
“သူတို့က တကယ်ပဲ ဒီဘက်ကို ထိုးဖောက်ဝင်လာရဲတယ်လား။ ပြီးတော့ တကယ်လည်း ရောက်လာကြတယ်။ သူတို့ကို လေဟာနယ်တံခါးထဲ ပြန်ရောက်သွားအောင် တပ်ဖွဲ့တွေကို အခုချက်ချင်း စေလွှတ်လိုက်စမ်း။”
“ဟုတ်ကဲ့။”
သို့သော် ရှောင်းယီသည် ဤဘက်သို့ ရောက်လာပြီးမှတော့ လွယ်လွယ်နှင့် ပြန်သွားရန် အစီအစဉ်မရှိပေ။
ကျန်းယွင်ထျန်း၏ အမိန့်အရ ယီရန်ပင်းမဟာမိတ်အဖွဲ့မှ စစ်သည် ငါးသောင်းကို စစ်ကူအဖြစ် အမြန်ဆုံး စေလွှတ်ခဲ့ပြီး အမြောက်များကိုပင် သယ်ဆောင်လာခဲ့ကြသည်။
ဝတ်ရုံနက်သမားက ရှောင်းယီနှင့် အခြားသူများကို ပြန်မောင်းထုတ်ရန် ရှေ့တန်းမှ တပ်ဖွဲ့များကို စုစည်းလိုက်ချိန်တွင် သူတို့ကို ဆီးကြိုနေသည်မှာ ကောင်းကင်အနှံ့ ပျံသန်းလာသော အမြောက်ဆန်များပင် ဖြစ်သည်။
“ဘုန်း...ဘုန်း... ဘုန်း...”
မသေမျိုးမျိုးနွယ်စု၏ တပ်ဖွဲ့များမှာ ချက်ချင်းပင် အကျအဆုံး များပြားသွားတော့သည်။
မသေမျိုးမျိုးနွယ်စုနှင့် တိုက်ခိုက်နေသော နဂါးလူသားမျိုးနွယ်စုများသည်လည်း ဖိအားများ ချက်ချင်းလျော့နည်းသွားသည်ကို ခံစားလိုက်ရသည်။
“သူတို့က တကယ်ပဲ ရန်သူ့နောက်ကျောဘက်ကနေ ပေါ်လာတာပဲ။”
တိုက်ပွဲဝင်နေသော နဂါးလူသားစစ်သည်များက အံ့အားသင့်စွာ ပြောဆိုလိုက်ကြသည်။
ခေါင်းဆောင်၏ မျက်လုံးများမှာ တောက်ပသွားပြီး ချက်ချင်းပင် အသံကျယ်ကျယ်ဖြင့် ဟစ်အော်လိုက်၏။
“တိုက်စစ်ဖွင့်ကြစမ်း...။ ဒီအခွင့်အရေးကို အမိအရဆုပ်ကိုင်ပြီး သူတို့ကို ပြန်မောင်းထုတ်ရမယ်။”
“တိုက်...တိုက်...တိုက်...”
နဂါးလူသားအားလုံးက တညီတညွတ်တည်း ကြွေးကြော်လိုက်ကြသည်။
ရှေ့တန်းမှ နဂါးလူသားများ၏ စိတ်ဓာတ် တက်ကြွနေမှုနှင့် နောက်ကျောဘက်မှ တိုက်စစ်မှာ ရှေ့တန်းထက်ပင် ပိုမိုပြင်းထန်နေသည်ကို မြင်သောအခါ ဝတ်ရုံနက်သမားက ခေါင်းကို အသာအယာခါယမ်းရင်း “ငါတို့ ဆုတ်ခွာမယ်” ဟု ပြောလိုက်သည်။
“ဟုတ်ကဲ့...။”
ဒီရေအလား များပြားလှသော အရိုးစုများမှာ နောက်သို့ စတင်ဆုတ်ခွာသွားကြတော့သည်။
“သူတို့က ဒီအတိုင်း အလွယ်တကူ ဆုတ်ခွာသွားတာလား။”
ရှောင်းယီသည် အဝေးသို့ ဆုတ်ခွာသွားသော အရိုးစုစစ်တပ်ကို ကြည့်ကာ ဇဝေဇဝါဖြင့် မေးလိုက်သည်။
“အခုထိ ဘယ်အချိန်မှာ ရှေ့တိုးရမယ်၊ ဘယ်အချိန်မှာ နောက်ဆုတ်ရမယ်ဆိုတာ သိတဲ့ အရိုးစုမျိုး ငါမတွေ့ဖူးသေးဘူး။”
“လေဟာနယ်တံခါးကို ဖြတ်ပြီး တိုက်ခိုက်လာတဲ့ အရိုးစုတွေမှာ စစ်သေနာပတိ မရှိလို့ ဖြစ်လိမ့်မယ်။ အခု ဒီအရိုးစုစစ်တပ်မှာတော့ စစ်သေနာပတိ တစ်ယောက်ယောက် သေချာပေါက်ရှိနေပြီ။”
ကျန်းယွင်ထျန်းက ရှောင်းယီ၏ရှေ့တွင် လက်ပ်တော့ကို ချပေးရင်း ဝတ်ရုံနက်ခြုံထားသော ပုံရိပ်တစ်ခုကို ညွှန်ပြလိုက်သည်။
ရှောင်းးယီက ခေါင်းညိတ်လိုက်၏။
“မဟာမိတ်အဖွဲ့ထဲက ဆောက်လုပ်ရေးအဖွဲ့ကို ရှာလိုက်။ လေဟာနယ်တံခါးရှိတဲ့နေရာမှာ တံတိုင်းတစ်ခု တည်ဆောက်ပြီး ဒါကို ငါတို့ရဲ့ အမာခံစခန်းတစ်ခုအဖြစ် အသုံးပြုမယ်။”
သူက အမိန့်ပေးလိုက်သည်။
“ဟုတ်ကဲ့။”
ကျန်းယွင်ထျန်းက ပြန်ဖြေလိုက်သည်။
အရိုးစုစစ်တပ် ဆုတ်ခွာသွားပြီးနောက် ရှေ့တန်းမှ နဂါးလူသားများသည် ရှောင်းယီတို့ရှိရာ နေရာသို့ မကြာမီ ရောက်ရှိလာခဲ့ကြလေသည်။
သူတို့နှင့် ရုပ်ချင်းဆင်တူသော အမျိုးအနွယ်ကို ကြည့်ပြီး ရွှမ်းချီက ရှေ့သို့တက်ကာ မိတ်ဆက်လိုက်သည်။
“ကျုပ်က နဂါးလူသားမျိုးနွယ်စုရဲ့ အကြီးအကဲ ရွှမ်းချီပါ။”
“ကျုပ်က နဂါးလူသားမျိုးနွယ်စုရဲ့ အကြီးအကဲ ထျန်းဝူပါ။”
တစ်ဖက်မှ ခေါင်းဆောင်က ရှေ့ထွက်လာပြီး သူ့ကိုယ်သူ မိတ်ဆက်လိုက်သည်။။ရွှမ်းချီက ခေါင်းညိတ်ပြပြီး ရှောင်းယီကို ချက်ချင်းပင် ညွှန်ပြကာ မိတ်ဆက်ပေးလိုက်သည်။
“ဒါက ယီရန်ပင်းမဟာမိတ်အဖွဲ့ရဲ့ ခေါင်းဆောင် ရှောင်းယီပါ။”
ထိုအခါ ထျန်းဝူက ရှောင်းယီကို ကြည့်ပြီး မေးလိုက်သည်။
“မင်းက ပြင်ပကမ္ဘာကလာတဲ့သူလား။”
“ဟုတ်ပါတယ်။”
ရှောင်းယီက ပြန်ဖြေပြီး မေးလိုက်သည်။
“ဒီနေရာက ဘယ်နေရာလဲ။”
“မသေမျိုးမျိုးနွယ်စုကို ခုခံနေတဲ့ ကောင်းကင်ဘုံရွေးချယ်ထားသောကမ္ဘာရဲ့ ရှေ့တန်းစစ်မျက်နှာပဲ။”
ထျန်းဝူက ပြန်ဖြေလိုက်သည်။
“ကောင်းကင်ဘုံရွေးချယ်ထားသောကမ္ဘာလား...။”
ရှောင်းယီသည် ထိုဝေါဟာရသစ်ကို ကြားလိုက်ရသဖြင့် ခေတ္တမျှ မှင်တက်သွားပြီး ထပ်မေးလိုက်သည်။
“ကောင်းကင်ဘုံရွေးချယ်ထားသောကမ္ဘာဆိုတာ ဘယ်မှာလဲ။”
“မင်းတို့က ဒီကမ္ဘာကလူတွေ မဟုတ်ဘူးလား။”
ထျန်းဝူက ဇဝေဇဝါဖြင့် မေးလိုက်ပြီးနောက် ရွှမ်းချီကို ကြည့်လိုက်သည်။
ရှောင်းယီက ပြင်ပကမ္ဘာကလာသူဖြစ်သဖြင့် ဤကမ္ဘာက မဟုတ်သည်မှာ နားလည်နိုင်သော်လည်း ရွှမ်းချီမှာမူ ဤကမ္ဘာက ဖြစ်သင့်သည်မဟုတ်ပါလော။
ရွှမ်းချီက ချက်ချင်းပင် ပြန်ဖြေလိုက်သည်။
“ကျုပ်တို့က ကောင်းကင်ဘုံရွေးချယ်ထားသောကမ္ဘာကပါ။”
ရှောင်းယီမှာ အနည်းငယ် အံ့အားသင့်သွားပြီး နားမလည်နိုင်စွာ မေးလိုက်သည်။
“ခင်ဗျားပြောချင်တာက ကျုပ်တို့ အခုရောက်နေတဲ့ကမ္ဘာက ကောင်းကင်ဘုံရွေးချယ်ထားသောကမ္ဘာလို့ ပြောချင်တာလား။”
“ဟုတ်တယ်။”
ရွှမ်းချီက ရှင်းပြလိုက်သည်။
“ခင်ဗျား ကျုပ်တို့ကမ္ဘာရဲ့နာမည်ကို သိတယ်လို့ ကျုပ်ထင်နေတာ။ ဘာလို့လဲဆိုတော့ ကောင်းကင်ဘုံရဲ့ ရွေးချယ်ခံရသူတွေ ဒီကမ္ဘာကို တစ်ခါတစ်ရံ ဆင်းသက်လာတတ်ကြလို့ ကျုပ်တို့အားလုံးက ဒါကို ကောင်းကင်ဘုံရွေးချယ်ထားသောကမ္ဘာလို့ ခေါ်ကြတာ။”
“ကောင်းကင်ဘုံရဲ့ ရွေးချယ်ခံရသူတွေ ဟုတ်လား။”
ရှောင်းယီက ပြုံးစိစိဖြင့် ပြောလိုက်သည်။
“တကယ်တော့ ကျုပ်တို့က ရွေးချယ်ခံရသူတွေ မဟုတ်ပါဘူး။ တစ်စုံတစ်ယောက်က ဒီကမ္ဘာထဲကို ပစ်ချလိုက်တဲ့ အသက်ရှင်ကျန်ရစ်ဖို့အတွက် ကြိုးစားနေရတဲ့သူတွေပါ။”
နဂါးလူသားနှစ်ဦးဖြစ်သော ရွှမ်းချီနှင့် ထျန်းဝူတို့မှာ ရှောင်းယီကို နားမလည်နိုင်စွာ ကြည့်လိုက်ကြသည်။
ရှောင်းယီက လက်ဝေ့ယမ်းလိုက်၏။
“ဒါတွေက အရေးမကြီးတော့ပါဘူး။ ခင်ဗျားပြောချင်တာက ကျုပ်တို့က အရင်ကမ္ဘာထဲမှာပဲ ရှိနေသေးတာလို့ ပြောတာလား။”
“အကြီးအကဲ ထျန်းဝူပြောတဲ့ ကောင်းကင်ဘုံရွေးချယ်ထားသောကမ္ဘာက ကျုပ်သိတဲ့ကမ္ဘာနဲ့ အတူတူပဲဆိုရင်တော့ ကျုပ်တို့က အရင်ကမ္ဘာထဲမှာပဲ ရှိနေပါသေးတယ်။”
ရွှမ်းချီက ထျန်းဝူကို ကြည့်လိုက်သည်။ ထျန်းဝူက ခေါင်းညိတ်လိုက်သည်။
“ဒါက ကမ္ဘာတစ်ခုတည်း ဖြစ်ရမယ်။”
“ဖြစ်ရမယ် ဟုတ်လား”
ရှောင်းယီက နောက်လှည့်ကြည့်သည်။
“အစ်ကိုကျန်း ကျွန်းအထိမ်းအမှတ်ကျောက်တိုင် တစ်ခုလောက် ဒီကို ယူလာဖို့ လူလွှတ်လိုက်ပါဦး။”
သူ ဘယ်နေရာမှာ ရှိနေသလဲဆိုသည်ကို သိရန်မှာ ကျွန်းအထိမ်းအမှတ်ကျောက်တိုင်ရှိ မြေပုံက အတိကျဆုံး ဖြစ်သည်။
သူသည် စောစောကပင် ဖုန်းကို စစ်ဆေးပြီးဖြစ်ရာ လိုင်းမမိပေ။ ဆိုလိုသည်မှာ သူသည် ယီရန်ပင်းမဟာမိတ်အဖွဲ့နှင့် အနည်းဆုံး ကီလိုမီတာ တစ်သိန်းခန့် ဝေးကွာနေပြီဖြစ်သည်။
“ဟုတ်ကဲ့။”
ကျန်းယွင်ထျန်းက ပြန်ဖြေလိုက်သည်။
မကြာမီတွင် ကျွန်းအထိမ်းအမှတ်ကျောက်တိုင်တစ်ခုကို သယ်ဆောင်လာခဲ့သည်။ ရှောင်းယီသည် ကျွန်းအထိမ်းအမှတ်ကျောက်တိုင်ဆီသို့ သွားပြီး မြေပုံကို ချက်ချင်းဖွင့်လိုက်ရာ သူ၏ အထီးကျန်နေသော အစက်ကလေးတစ်ခုတည်းကိုသာ တွေ့ရှိရတော့သည်။
သူ မြေပုံကို ချုံ့ကြည့်လိုက်ရာ နောက်ဆုံးတွင် သူ၏ မဟာမိတ်ကျွန်း တည်ရှိရာနေရာကို ရှာတွေ့သွားခဲ့သည်။
“ဒီလောက်တောင် ဝေးတာလား။”
မြေပုံပေါ်ရှိ အကွာအဝေးကို ကြည့်ပြီး ရှောင်းယီ၏ မျက်လုံးများ ပြူးကျယ်သွား၏။ ၎င်းသည် ကီလိုမီတာ တစ်သန်းတိတိ ဝေးကွာနေခြင်းပင်။
ဘေးနားရှိ ကျန်းယွင်ထျန်းမှာလည်း ထပ်တူထပ်မျှ အံ့အားသင့်သွားခဲ့လေသည်။
“ဒီကမ္ဘာကြီးက တကယ်ကို ကြီးလွန်းတာပဲ။ ဘယ်လောက်တောင် ကြီးသလဲဆိုရင် ငါ လိုက်တောင် မကြည့်ချင်တော့ဘူး။”
ရှောင်းယီက ခေါင်းအသာညိတ်လိုက်သည်။
“ငါတို့က ကမ္ဘာတစ်ခုတည်းမှာပဲ ရှိနေသေးတာ အမှန်ပဲ။ ဒါပေမဲ့ အကွာအဝေးက အရမ်းဝေးလွန်းနေတယ်။”
ထိုအခါ ထျန်းဝူက ဝင်ပြောလိုက်သည်။
“ဒါက ကမ္ဘာတစ်ခုတည်းဆိုရင်တော့ ဒီမသေမျိုးမျိုးနွယ်စုတွေက ငါတို့ရဲ့ နောက်ကျောဘက်ကို ဖြိုခွဲဖို့ ကြိုးစားနေတာ သေချာနေပြီ။”