အခန်း (၃၇၇-၃၇၈)

အခန်း ၃၇၇ - အစီအစဉ် မကျသော စမ်းသပ်မှု

ဂိုဏ်းဂဏဆိုသည်မှာ လူများဖြင့် ဖွဲ့စည်းထားခြင်းဖြစ်သည်။

ဂုဏ်သိက္ခာရှိသော အဓိကဂိုဏ်းကြီးတစ်ခုတွင် တပည့်ထောင်ပေါင်းများစွာနှင့် အကြီးအကဲ ဒါဇင်ပေါင်းများစွာ ရှိနေခြင်းမှာ ပုံမှန်ပင်

ဖြစ်သည်။

ထို့ကြောင့် အမာခံနေရာများကို ရယူထားသော အကြီးအကဲများမှာပင် အများအပြား ရှိတတ်ကြသည်။

အရေးကြီးသော အခမ်းအနားတစ်ခုရှိလျှင် သက်ဆိုင်ရာဂိုဏ်းများမှ တက်ရောက်လာသူများသည် အမြဲတမ်း တစ်ဦးတည်း မဟုတ်ကြပေ။

ထို့ကြောင့် လင်ချွမ် နှင့် ကျန်တစ်ဦးမှာ ညာဘက်ရှိ အဓိကနေရာများတွင် ထိုင်နေသည်ကို မြင်သောအခါ၊ လူအများစုက သူတို့သည် သာမန်လူများမဟုတ်ကြောင်း ခန့်မှန်းမိကြသော်လည်း ဝူတန် သို့မဟုတ် ချွမ်ရွှယ်ဂိုဏ်းဟု မတွေးမိကြချေ။

ရှေ့ကဂိုဏ်းမှာ လင်ချွမ်ကို မသိကြသောကြောင့်ဖြစ်ပြီး၊ နောက်ကဂိုဏ်းမှာမူ သူတို့၏ ထည့်သွင်းစဉ်းစားမှုထဲတွင်ပင် မရှိသောကြောင့်ဖြစ်သည်။

အဆုံးတွင်တော့ သူတို့သည် နတ်ဆိုးဂိုဏ်းဝင်များသာ မဟုတ်ပါလား။

တရားသောလမ်းစဉ်ကို လိုက်နာသူများက သူတို့ကို အခမ်းအနားသို့ မည်သို့ ဖိတ်ကြားနိုင်ပါမည်နည်း။

လူအုပ်ကြီးမှာ အခြေအနေကို စောင့်ကြည့်နေစဉ် သို့မဟုတ် ဝေခွဲမရဖြစ်နေစဉ်မှာပင် အချို့က လင်ချွမ်နှင့် သူ၏အဖော်ကို နောက်ဆုံးတွင် မှတ်မိသွားကြသည်။

အတိအကျပြောရလျှင် လင်ယန်ရွှယ်ကို မှတ်မိသွားကြခြင်း

လင်ယန်ရွှယ်၏ ဘေးတွင် ထိုင်နေသော အခြားတစ်ယောက်မှာ မည်သူဖြစ်မည်ကို ခန့်မှန်းရန် မခက်ခဲပေ။

သူတို့ အသက်ရှူမှားသွားကြပြီးနောက် မျက်လုံးများထဲတွင် လှောင်ပြောင်လိုသော အရိပ်အယောင်များ ဖြတ်ပြေးသွားသည်။

"ကြည့်ကောင်းတော့မယ့် ပွဲပဲ"

အမှန်တကယ်ပင်၊ ထိုအခိုက်အတန့်မှာပင် ဆယ်ဆထက်မက ကြောက်မက်ဖွယ်ကောင်းသော အရှိန်အဝါတစ်ခု ရုတ်တရက် ပေါက်ကွဲထွက်လာသည်။

ထိပ်တန်းအဆင့်၏ လွှမ်းမိုးချုပ်ကိုင်ထားသော ဖိအားများမှာ ဗုဒ္ဓကျောင်းဆောင်ကြီးအတွင်းသို့ ပြိုဆင်းလာတော့သည်။

ဟန်ရှောင်း၏ မျက်နှာမှာ တစ်မဟုတ်ချင်း သေလုမတတ် ဖြူလျော်သွားသည်။

သူသည် မလဲအောင် ထိန်းထားနိုင်သော်လည်း နောက်သို့ ခြေလှမ်းအနည်းငယ် ဆုတ်သွားရကာ ခြေထောက်များမှာ ပျော့ခွေနေပြီဖြစ်​၏။

သူသည် ထိုလှပသော အမျိုးသမီးကို ထိတ်လန့်တကြား စိုက်ကြည့်ရင်း နှုတ်ခမ်းများမှ အသံမထွက်သော ဟိန်းဟောက်သံများ ထွက်ပေါ်လာသည်။

"ထိပ်တန်းအဆင့်လား သိုင်းဘုရင် ဒါ ဘယ်လိုလုပ် ဖြစ်နိုင်မှာလဲ"

"ဒီမိန်းမက တကယ်တော့ ဘယ်သူလဲ"

"သိုင်းလောကမှာ အော်မေ့ဂိုဏ်းတစ်ခုပဲ အမျိုးသမီးသီးသန့် မဟုတ်ဘူးလား"

"ဒီလူကတော့ အဲ့ဒီထဲက မဟုတ်တာ သေချာတယ်..."

"နေဦး... မဟုတ်ဘူး... နောက်ထပ် ဂိုဏ်းတစ်ခု ရှိသေးတယ်၊ အဲ့ဒါ နတ်ဆိုးဂိုဏ်းပဲ ထင်တယ်..."

ထိုအခိုက်တွင် သူ၏ သူငယ်အိမ်များ ရုတ်တရက် ကျဉ်းမြောင်းသွားပြီး နောက်သို့ ခပ်သွက်သွက် ဆုတ်လိုက်သည်။

ထို့နောက် ရှောင်လင် မှ ဆရာတော်ကြီး သုံးပါးကို အော်ပြောလိုက်သည်။

"နတ်ဆိုးဂိုဏ်းက လူတွေ ဒီမှာ ဘာလာလုပ်နေတာလဲ"

စကားပြောနေစဉ်မှာပင် သူ၏ လက်မှာ ဘေးတွင် ချိတ်ထားသော လွှသွားပုံသဏ္ဍာန် ဓားကြီးဆီသို့ အလျင်အမြန် ရောက်သွားသည်။

ခမ်းမဆောင်အတွင်း ဆူညံပွက်လောရိုက်သွား​၏။

ဤအကြောင်းကို မသိသေးသော ကျွမ်းကျင်သူအချို့မှာ ချက်ချင်းပင် လက်နက်များကို ဆွဲထုတ်ကာ တိုက်ခိုက်မည့် အနေအထား ပြင်လိုက်ကြသည်။

ဤသည်ကို မြင်သောအခါ ကျဲ့ခုန်း၏ မျက်နှာတွင် ကူကယ်ရာမဲ့သော အမူအရာ ပေါ်လာသည်။

သူသည် ချန်မိန်ကို မျက်စိတစ်မှိတ် ပြလိုက်

သည်။

ချန်မိန်သည်လည်း ဟန်ရှောင်း​၏ လုပ်ရပ်ကြောင့် လန့်သွားသော်လည်း ချက်ချင်းပင် တုံ့ပြန်လိုက်သည်။

သူသည် ဝေဝါးသော အရိပ်တစ်ခုအဖြစ် ဟန်

ရှောင်း​၏ ဘေးတွင် ပေါ်လာသည်။

သူ၏ လက်ဝါးဖြင့် ဟန်ရှောင်း​၏ လက်ကောက်ဝတ်ကို အလျင်အမြန် ဖိချလိုက်သဖြင့် တစ်ဝက်ခန့် ထွက်နေသော ဓားကြီးမှာ နေရာတကျ ပြန်ဝင်သွားသည်။

"ဒါဟာ ရှောင်လင်ကျောင်းတော်ရဲ့ ခန်းမဆောင်ကြီးဖြစ်ပါတယ်"

"ဒကာတို့... အကြမ်းဖက်တာတွေကို ရှောင်ကြဉ်ကြပါ"

စကားပြောနေစဉ်မှာပင် သူတို့၏ နယ်ပယ်

အရှိန်အဝါကိုလည်း ထုတ်လွှတ်လိုက်သည်။

ခန်းမတစ်ခုလုံးကို လွှမ်းမိုးထားသော ဗုဒ္ဓဘာသာ အရှိန်အဝါကို ခံစားမိသောအခါ ကျွမ်းကျင်သူ အများအပြား၏ မျက်နှာထားများ အနည်းငယ် ပြောင်းလဲသွားသည်။

သူတို့အားလုံး လက်နက်များကို အိမ်ထဲပြန်

ထည့်ကာ စိတ်ပျက်လက်ပျက်ဖြင့် ပြန်ထိုင်

လိုက်ကြသည်။

ဟန်ရှောင်း တစ်ဦးတည်းသာ မကျေမနပ်ဖြစ်နေဆဲဖြစ်ပြီး မေးမြန်းလိုက်သည်။

"ဆရာတော်ကြီး ဒါက ဘာသဘောလဲ၊ ဘာလို့ နတ်ဆိုးဂိုဏ်းက လူတွေကို ဓမ္မဂိုဏ်းတွေရဲ့ ဆွေးနွေးပွဲထဲ ပေးဝင်ရတာလဲ"

"ဒီ ချွမ်ရွှယ်ဂိုဏ်းက မိစ္ဆာမနဲ့ အတူတူထိုင်ရတာဟာ ကျုပ်တို့ တရားသောလမ်းစဉ် သိုင်းသမားတွေရဲ့ ဂုဏ်သိက္ခာကို စော်ကားတာပဲ"

"အော်... ဟုတ်လား"

ချန်မိန်က ရှင်းပြရန် ပြင်နေစဉ်မှာပင် ခန်းမအတွင်း၌ နောက်ထပ် အသံတစ်ခု ထွက်ပေါ်လာသည်။

ထိုအသံတွင် မည်သည့်ဖိအား သို့မဟုတ် အရှိန်အဝါမှ မပါဝင်သော်လည်း လူတိုင်း၏ အာရုံကို ဆွဲဆောင်သွားသည်။

လင်ချွမ်ကို မှတ်မိသော လူအနည်းငယ်မှာ ရင်ထဲတွင် တုန်လှုပ်သွားပြီး နောက်တစ်ကြိမ် ထပ်မကြည့်ရဲတော့ဘဲ ခေါင်းကို အမြန်ငုံ့ထားလိုက်ကြ​၏။

ကျန်ရှိသော သူစိမ်းများမှာမူ ဇဝေဇဝါ ဖြစ်နေကြသည်။

"မင်းရဲ့ ဂုဏ်သိက္ခာနဲ့ မတန်ဘူးလို့ ခံစားနေရရင်လည်း ထွက်သွားလိုက်လေ"

"ဟက်...ငါက ဒီမှာ နေချင်နေတယ်လို့ မင်းတကယ် ထင်နေတာလား"

ဟန်ရှောင်းက လှောင်ပြောင်ပြီး လင်ချွမ်ကို လက်ညှိုးထိုးကာ ပြင်းထန်သော စကားများ ပြောရန် ပြင်လိုက်သည်။

သို့သော် ထိုအခိုက်အတန့်မှာပင် သူ၏စိတ်ထဲတွင် ထူးဆန်းသော မလုံခြုံမှုတစ်ခု ဖြတ်ပြေးသွားသည်။

သူသည် လက်မောင်းကို အနည်းငယ် မြှောက်

လိုက်ပြီးမှ ပြန်ချလိုက်သည်။

ဤသည်ကို မြင်သောအခါ လင်ချွမ်က နှာခေါင်းရှုံ့ကာ ပြောလိုက်သည်။

"ဒါဆိုရင်လည်း လစ်လိုက်တော့"

ဤစကားများသည် လင်ချွမ်​၏ တုံ့ပြန်မှု ဖြစ်ကောင်းဖြစ်ပေမည်။

နတ်ဆိုးဂိုဏ်းအပေါ် အကောင်းမမြင်ကြသူ အနည်းငယ်မှာ ချက်ချင်းပင် မျက်နှာပျက်သွားပြီး အတူတူထွက်ခွာရန် မတ်တတ်ရပ်လိုက်ကြသည်။

"ဒါ မင်းဘာသာမင်း ဖြစ်အောင်လုပ်တာနော်၊ ငါ့အပြစ်မဟုတ်ဘူး" ဟု ဟန်ရှောင်းက တွေးကာ ဝမ်းသာသွားသည်။

ထို့နောက် သူသည် လှည့်ထွက်သွားသည်။

ထိုအခိုက်မှာပင် နောက်ကျောဘက်မှ ထူးဆန်းသော အရှိန်အဝါတစ်ခု စတင်

ထွက်ပေါ်လာသည်။

၎င်းသည် ခဏမျှသာ ပေါ်လာပြီး လေထဲတွင် ပျောက်ကွယ်သွားသည်။

သို့သော် ခန်းမအတွင်းရှိ လူတိုင်း ထိုအခိုက်အတန့်တွင် ၎င်း၏ တည်ရှိမှုကို ခံစားလိုက်ရသည်။

သူတို့၏ မျက်နှာများ ဖြူလျော်သွားကြသည်။

တစ်စက္ကန့်ပင် မပြည့်သော ထိုအရှိန်အဝါက သူတို့ကို အသက်ရှူကျပ်သွားစေသည်။

၎င်းသည် လူတစ်ယောက်၏ တည်ရှိမှုအတွင်းပိုင်းမှ လုံးဝဥဿုံ ဖိနှိပ်လိုက်ခြင်းပင်။

၎င်းမှာ သာလွန်သော ကျင့်စဉ်အဆင့်ရှိသူတစ်ဦးထံမှ ကြောက်မက်ဖွယ်ကောင်းသော ချေမှုန်းနိုင်သည့် အားအင်ဖြစ်သည်။

ချက်ချင်းပင်၊ မတ်တတ်ရပ်လိုက်သော လူအနည်းငယ်မှာ ခြေထောက်များ ပျော့ခွေသွားပြီး ပြန်ထိုင်ကျသွားကာ ဦးနှောက်ထဲတွင် ဘာမှမတွေးနိုင်တော့ဘဲ ဗလာဖြစ်သွားသည်။

ဟန်ရှောင်းမှာမူ နေရာတွင်ပင် တောင့်တင်းသွားပြီး ချွေးစေးများ မျက်နှာပေါ်တွင် စီးကျလာ​၏။

ဤအချိန်တွင် သူသည် ထိုင်ရမလို ထရမလိုဖြင့် ဗျာများနေပြီး အနည်းငယ်မျှပင် မလှုပ်ရဲတော့ပေ။

သူတို့သည် အထင်အမြင်လွဲမှားမှုတစ်ခု ဖြစ်ပေါ်ပြီး နေရာတင် အချေမှုန်းခံရမည်ကို အလွန်ကြောက်လန့်နေကြသည်။

ရှောင်လင်၏ ဗုဒ္ဓသုံးပါးလည်း ထိုနည်းတူပင်။

သူတို့၏ ကျင့်စဉ်အဆင့်မှာ မြင့်တက်လာပြီး နယ်ပယ်အဆင့်သို့ ရောက်နေပြီ ဖြစ်သော်လည်း၊ မြင့်လေလေ ကြောက်ရွံ့မှုကို ပိုခံစားရလေလေဖြစ်သည်။

သူတို့၏ လက်ရှိအင်အားဖြင့် လောကတွင် ပြိုင်ဘက်ရှာရန် ခဲယဉ်းလှ​၏။

သုံးဦးပေါင်းလိုက်လျှင် ထိပ်တန်းကျွမ်းကျင်သူပင် သူတို့ကို ယှဉ်နိုင်မည် မဟုတ်ပေ။

သို့သော် ထိုခဏတာအတွင်းမှာပင် သူတို့သည် အစွန်းကုန် ကြောက်ရွံ့မှုကို ခံစားလိုက်ရသည်။

ထိုနေရာတွင် ထိုင်နေသူမှာ လူသားတစ်ယောက်မဟုတ်ဘဲ နတ်ဘုရားတစ်ပါးကဲ့သို့ပင်။

သူတို့ အချင်းချင်း ကြည့်လိုက်ကြပြီး ပိန်ပိန်ပါးပါး ဆရာတော်မှာ ခါးသီးစွာ ပြုံးလိုက်သည်။

ဟန်ရှောင်းက လင်ချွမ်ဆီသို့ မသွားမီ သူတို့တွင် တားဆီးရန် အခွင့်အရေးများစွာ ရှိခဲ့သည်။

တစ်ဖက်လူကို လွှတ်ထားပေးရခြင်း၏ အကြောင်းရင်းမှာ စမ်းသပ်မှုလေးတစ်ခု လုပ်လိုသောကြောင့်သာ ဖြစ်သည်။

သူတို့ သုံးဦးစလုံး လင်ချွမ်နှင့် တိုက်ခိုက်ဖူးသဖြင့် သူမည်မျှ ကြောက်စရာကောင်းကြောင်း ကောင်းကောင်းသိသည်။

ထို့ကြောင့် စမ်းသပ်မှု၏ ပစ်မှတ်မှာ လင်ချွမ်

မဟုတ်ဘဲ လင်ယန်ရွှယ် ဖြစ်သည်။

ချွမ်ရွှယ်ဂိုဏ်း၏ လက်ရှိခေါင်းဆောင်ဖြစ်သလို ဂိုဏ်းကြီးတစ်ခုမှ ကျွမ်းကျင်သူများဖြစ်သည့်အားလျော်စွာ စမ်းသပ်လိုသော ဆန္ဒရှိကြသည်။

သိုင်းလောက၏ ထိပ်တန်းပညာရှင်များအနေဖြင့် အနောက်တိုင်း ကျွမ်းကျင်သူများအကြောင်းကိုလည်း ကြာမြင့်စွာကတည်းက သိရှိထားကြသည်။

ထို့အတူ လင်ယန်ရွှယ်သည်လည်း ဒဏ်ရာအပြင်းအထန် ရရှိထားကြောင်း သိကြ​၏။

သို့သော် ယခုကြည့်ရသည်မှာ အခြေအနေမှာ သူတို့ ထင်ထားသည်နှင့် ကွဲပြားနေပုံရသည်။

တစ်ဖက်လူ၏ ဒဏ်ရာများမှာ ပျောက်ကင်းသွားသည်မှာ ကြာပြီဖြစ်သလို၊ သူ၏ အထွတ်အထိပ် အခြေအနေသို့ပင် ပြန်ရောက်နေပြီ ဖြစ်ပုံရသည်။

ပြန်တွေးကြည့်လျှင် ဤစမ်းသပ်မှုမှာ အတော်ပင် အစီအစဉ်မကျလှပေ။

ကျဲ့ခုန်းက သက်ပြင်းရှည်ကြီး ချလိုက်သည်။

ယခင်က ဖြစ်ပျက်ခဲ့သည်များကို ကြည့်ပြီး လောကကြီးတွင် အရာရာသည် အဖြူနှင့် အမည်း သီးသန့်မဟုတ်ကြောင်း သူ နားလည်လာခဲ့သည်။

တစ်ဖက်တွင် ချွမ်ရွှယ်ဂိုဏ်းသည်လည်း သိုင်းဂိုဏ်းတစ်ခုဖြစ်သည်။

အခြားတစ်ဖက်တွင်မူ လင်ချွမ်နှင့် လင်ယန်ရွှယ်တို့၏ ဆက်ဆံရေးကိုလည်း သူ ကောင်းကောင်းသိသည်။

ဆွေးနွေးရန် ရှိသည့်ကိစ္စမှာလည်း သူတို့၏ ဝါသနာနှင့် သက်ဆိုင်နေသည်။

ထို့ကြောင့် ရှေးရိုးစွဲလူအချို့က နတ်ဆိုးဂိုဏ်းကို ပြင်းပြင်းထန်ထန် ငြင်းပယ်ကြသည်မှာ အမှန်

ပင်။

သို့သော် သူ၏ ခိုင်မာသော အကြောင်းပြချက်များဖြင့် ဆွေးနွေးပြီးနောက်တွင် ဖိတ်စာကို နောက်ဆုံး၌ ပေးပို့ခဲ့ခြင်းဖြစ်သည်။

ထို့အတူ လက်ရှိအခြေအနေမှာလည်း သူ မျှော်လင့်ထားသည့်အတိုင်းပင်။

သူတို့ကို မစမ်းသပ်ရန် ကြိုတင်သတိပေးခဲ့သော်လည်း အဆုံးတွင်တော့ သူကိုယ်တိုင်ပင် ပြဿနာကို လိုက်ရှင်းနေရပြန်သည်။

သက်ပြင်းဖွဖွချရင်း ကျဲ့ခုန်းက လင်ချွမ်ဆီသို့ လျှောက်သွားပြီး တိုးတိုးလေး ပြောလိုက်သည်။

"အကြီးအကဲလင်...ဒါက အထင်လွဲတာလေးပါ"

"သူတို့ကိုယ်စား ကိုယ်တော်ကပဲ တောင်းပန်ပါတယ်"

"ဒီကိစ္စကို ဒီမှာတင်ပဲ အဆုံးသတ်လိုက်

ရအောင်ဗျာ"

အခန်း ၃၇၈ - အင်အားစုအသီးသီး၏ တွေ့ဆုံပွဲ

“အကြီးအကဲ လင်"

“ဘယ် အကြီးအကဲ လင် လဲ"

ကျဲခုန်း၏ စကားကို ကြားလိုက်ရချိန်တွင် ရောက်ရှိနေသူအားလုံး အံ့အားသင့်သွားကြသည်။

လူအများမှာ ဇဝေဇဝါဖြစ်နေကြပြီး ဤအမျိုးသားနှင့် အမျိုးသမီးမှာ မည်သူမည်ဝါဖြစ်ကြောင်း အဖြေရှာမရ ဖြစ်နေကြသည်။

သို့သော် မည်သို့ပင်ဖြစ်စေ၊ တစ်ယောက်ပြီးတစ်ယောက် ထွက်ပေါ်လာသော ထိုထိတ်လန့်ဖွယ် ကောင်းလှသည့် အရှိန်အဝါနှစ်ခုကိုမူ အားလုံး ခံစားလိုက်ရ​၏။

ဤအချိန်တွင် လင်ချွမ် နှင့် သူ၏ အဖော်ကို မည်သူမျှ လျှော့မတွက်ရဲကြတော့ပေ။

အခြေအနေများ ပြန်လည်တည်ငြိမ်သွားသောအခါ တစ်စုံတစ်ယောက်က ထိုမေးခွန်း၏ အဖြေကို လျင်မြန်စွာပင် ထုတ်ဖော်လိုက်သည်။

“သူက ဝူတန်က အစွမ်းထက်တဲ့ ပုဂ္ဂိုလ်ပဲ"

"ချန်အာကော နဲ့ ရင်ဘောင်တန်းနိုင်တဲ့ အကြီးအကဲတစ်ယောက်ပေါ့"

“ဟိုး... အမလေး...သူပါလား"

“မဖြစ်နိုင်တာ၊ အဲဒီလူက ဝူတန်က မဟုတ်ဘူးလား"

"ဘာလို့ နတ်ဆိုးဂိုဏ်းက အမျိုးသမီးနဲ့ အတူရှိနေရတာလဲ...”

ဆွေးနွေးငြင်းခုံသံများ ဆူညံနေစဉ်အတွင်း မသင့်တော်သော အသံတစ်ခု ထွက်ပေါ်လာပုံရသည်။

ထိုခဏချင်းမှာပင် ခေါင်းတွင် အဝတ်စပတ်ထားသော အမျိုးသားတစ်ဦးက သူ၏ အဖော်ဖြစ်

သူ၏ ပါးစပ်ကို အမြန်ပိတ်လိုက်သည်။

သူသည် လူအုပ်ကို အားနာသလို ပြုံးပြလိုက်ပြီးနောက် သူ၏အဖော်ကို အသံနှိမ့်၍ ပြောလိုက်

သည်။

“မင်း ရူးနေလား၊ လူတွေရှေ့မှာ ဒါမျိုးပြောတာဟာ ကိုယ့်ကိုယ်ကိုယ် သတ်သေတာနဲ့ အတူတူပဲ"

"မင်းက အသက်မရှင်ချင်တော့ရင်တောင် ငါ့ကို ဆွဲမထည့်ပါနဲ့"

ဤစကားများသည် လင်ယန်ရွှယ်၏ နားထဲသို့ သဘာဝအတိုင်း ရောက်ရှိသွားသော်လည်း သူမက ပုခုံးတွန့်ရုံသာ ပြုလုပ်ပြီး ဘာမှ ပြန်မပြောခဲ့ပေ။

၎င်းကို မြင်သောအခါ လင်ချွမ်က ဖြည်းညှင်းစွာ ခေါင်းညိတ်ပြလိုက်သည်။

ထိုအခါမှသာ ခန်းမအတွင်း ကြွင်းကျန်နေသော ထိတ်လန့်ဖွယ် အရှိန်အဝါများ လုံးဝဥဿုံ ပျောက်ကွယ်သွားတော့သည်။

ဖိအားအောက်တွင် တုန်ရင်နေသော အချို့သူများမှာလည်း နောက်ဆုံးတွင် သက်ပြင်းချနိုင်ကြတော့သည်။

ဂိုဏ်းအသီးသီးမှ ပညာရှင်များအားလုံး ရောက်ရှိလာရန် နာရီဝက်ခန့် ကြာမြင့်ခဲ့ပြီ။

လင်ချွမ်သည် ဝူတန်ဂိုဏ်း၏ ကိုယ်စားလှယ်

အဖြစ် အမိန့်အရ ရောက်ရှိလာသော ဝူတန်

ဝတ်ပြုဆောင် အကြီးအကဲ လျှို့ရန် နှင့်လည်း တွေ့ဆုံခဲ့သည်။

လျှို့ရန်သည် လင်ချွမ်က မိမိကို အနည်းငယ် ခေါင်းညိတ်ပြသည်ကို မြင်သောအခါ အံ့အားသင့်သွားပြီး လျင်မြန်စွာပင် ပြန်လည် ဂါရဝပြုလိုက်သည်။

သူ ခံစားခဲ့ရသော တင်းမာမှုများမှာ ထိုအချိန်တွင် လုံးဝ ပျောက်ကွယ်သွားခဲ့သည်။

နောက်ဆုံးတွင် ဂိုဏ်းအသီးသီးမှ ကိုယ်စားလှယ်များ နေရာယူပြီးနောက် ကျဲခုန်းသည် ပင်မထိုင်ခုံသို့ ပြန်လာကာ လူအုပ်ကို စကားပြောကြားခဲ့​၏။

“ခင်ဗျားတို့အားလုံး ဒီကိုမလာခင် စာကိုဖတ်ပြီးပြီလို့ ကိုယ်တော်ယုံကြည်ပါတယ်"

"ဆွေးနွေးပွဲ ဆိုတာ ဘာလဲဆိုတာကိုလည်း သိကြမှာပါ"

"ဒါပေမဲ့ ဒီကိစ္စဟာ နန်းတွင်းကို ဆန့်ကျင်ဖို့ မဟုတ်ပါဘူး၊ ကိုယ်တော်တို့ရဲ့ ဖြောင့်မတ်တဲ့ ဂုဏ်သိက္ခာအပေါ် ကျရောက်နေတဲ့ အကျပ်အတည်းကို ဖြေရှင်းဖို့ပဲ ဖြစ်ပါတယ်"

"ဆွေးနွေးပွဲကို အဓိကဂိုဏ်းကြီးအချို့ရဲ့ ခေါင်းဆောင်တွေ ဆွေးနွေးပြီးနောက်မှာ ခေါ်ယူခဲ့တာ ဖြစ်ပါတယ်"

ဤနေရာတွင် သူက လက်ဟန်ပြလိုက်ရာ ရဟန်းငယ်အချို့ ရှေ့သို့တက်လာပြီး လင်ဗန်းများကိုယ်စီ သယ်ဆောင်လာကြသည်။

လင်ဗန်းပေါ်တွင် စာရွက်စာတမ်းပုံများ ပါရှိသည်။

သူသည် စာရွက်စာတမ်းအားလုံးကို လူတိုင်းထံ ဝေငှပေးလိုက်ပြီးနောက် မျက်စိမှိတ်ကာ အနားယူရင်း သူတို့ဖတ်ရှုပြီးသည်ကို စောင့်ဆိုင်းနေခဲ့သည်။

ထိုစာထဲတွင် မကြာသေးမီက နန်းတွင်း၏ လှုပ်ရှားမှုများနှင့် လွန်ခဲ့သော ရက်အနည်းငယ်က သတင်းအချက်အလက်များ ပါဝင်သည်။

တစ်ချိန်က အင်အားကြီးခဲ့သော လင်ခုန်း နှင့် ဖေးယွမ် ဂိုဏ်းတို့သည် ယခုအခါ သိုင်းလောကမှ ပျောက်ကွယ်သွားခဲ့ပြီ။

စုန်ရှန်းဂိုဏ်းကဲ့သို့ပင် နန်းတွင်းစစ်တပ်သည် လင်ခုန်းတောင်တံခါးသို့ ရောက်ရှိလာခဲ့သည်။

ပြစ်မှုများစွာကို စွပ်စွဲပြီးနောက် ၎င်းတို့ကို လူစုခွဲရန် ဖိအားပေးခဲ့သည်။

လင်ခုန်းဂိုဏ်းက ပြတ်ပြတ်သားသား ငြင်းဆန်ပြီး ခုခံရန် ရွေးချယ်ခဲ့သည်။

ထို့နောက် ဂိုဏ်းအတွင်းရှိ ထိပ်သီးပညာရှင်များအားလုံး အသတ်ခံခဲ့ရပြီး လူစုခွဲခြင်းမှတစ်ပါး အခြားရွေးချယ်စရာ မရှိတော့ပေ။

ဖေးယွမ်ဂိုဏ်းမှာမူ ပို၍ ထူးဆန်း​၏။

တစ်ညတည်းနှင့် ဂိုဏ်းတစ်ခုလုံး လူသူကင်းမဲ့သွားခဲ့သည်။

နန်းတွင်းတွင် တာဝန်ရှိကြောင်း ခိုင်လုံသော သက်သေမရှိသော်လည်း ၎င်းတို့သည် အဓိက သံသယဖြစ်ဖွယ်ရာ ဖြစ်နေသည်။

ထို့အပြင် မြောက်ပိုင်းမြို့ကြီးနှစ်မြို့ရှိ အချို့သော မိသားစုများနှင့် သိုင်းဂိုဏ်းများသည်လည်း တစ်ကျော့ပြန် ပဋိပက္ခဖြစ်ပွားခဲ့သည်။

အခြေအနေမှာ ယခင်တစ်ခေါက်နှင့် အတူတူပင်။

မိနစ်ပိုင်းအတွင်း ခန်းမတစ်ခုလုံး ဆူညံသွားသည်။

မကြာသေးမီက ဖြစ်ပျက်ခဲ့သည်များကို သိရှိသူမှာ ပညာရှင်အနည်းငယ်သာ ရှိသည်မှာ ထင်ရှားသည်။

ဤကိစ္စရပ်များသည် ၎င်းတို့၏ ဂိုဏ်းအသီးသီး၏ အကျိုးစီးပွားကို ထိခိုက်နေပြီဖြစ်ကြောင်း သူတို့ မသိရှိခဲ့ကြပေ။

ယခု နန်းတွင်းက ကိုယ်တိုင်ကိုယ်ကျ ဝင်ရောက်စွက်ဖက်လာပြီဖြစ်ရာ ၎င်းတို့၏ဂိုဏ်းများသည်လည်း ရလဒ်အနေဖြင့် ပျက်စီးသွားနိုင်ခြေ ရှိနေသည်။

ရာစုနှစ်နှင့်ချီသော အခြေခံအုတ်မြစ်များသည် ခဏချင်းအတွင်း ပျောက်ကွယ်သွားနိုင်သည်။

ချက်ချင်းပင် လူအများက ဒေါသတကြီး ဖြစ်လာကြ​၏။

ထိပ်သီး ပညာရှင်အများအပြားကလည်း ပါဝင်

ကူညီရန် ဆန္ဒရှိကြောင်း ဖော်ပြကြသည်။

“လူကြီးမင်းတို့... ဒါဟာ ကိုယ်တော်တို့ရဲ့ ကနဦး အတွေးလည်း ဖြစ်ပါတယ်"

"ရှောင်လင်ဟာ ဗုဒ္ဓဘာသာဂိုဏ်းဖြစ်ပြီး လောကီရေးရာတွေနဲ့ ဝေးကွာပေမဲ့ လူသားတွေရဲ့ ဒုက္ခကိုတော့ မမြင်လိုပါဘူး"

သို့သော် ဤအချိန်တွင် ကျဲ့ခုန်းက ဖြည်းညှင်းစွာ ခေါင်းခါလိုက်သည်။

“ဒါပေမဲ့ စုံစမ်းစစ်ဆေးမှုတွေ လုပ်ပြီးတဲ့နောက်မှာတော့ ဒါဟာ ဒီလိုမဟုတ်ဘူးဆိုတာ ကိုယ်တော်တို့ တွေ့ရှိခဲ့ရပါတယ်"

"ဖေးယွမ်ဂိုဏ်း ပျက်စီးသွားတာဟာ လူထုကို ရှုပ်ထွေးအောင်လုပ်ဖို့ ရည်ရွယ်တဲ့ တခြားအဖွဲ့အစည်းတစ်ခုရဲ့ လက်ချက်ဖြစ်ဖို့ များပါတယ်"

"ကိုယ်တော် မမှားဘူးဆိုရင်၊ ဒါကိုလုပ်တဲ့သူဟာ လင်ကျိုနန်းတော်ရနဲ့ ရှန်းဝူဂိုဏ်းကြားက ပဋိပက္ခကို လှုံ့ဆော်ခဲ့တဲ့ တရားခံပဲ ဖြစ်ရမယ်"

၎င်းကို ကြားလိုက်ရသောအခါ လူတိုင်း၏ မျက်နှာအမူအရာ ချက်ချင်း ပြောင်းလဲသွားသည်။

သူတို့အားလုံးမှာ လုပ်ကြံဖန်တီးမှုရှိနိုင်သည်ဟု ချက်ချင်း သံသယဝင်ကာ ထိတ်လန့်သွားကြသည်။

လင်ချွမ်က အနည်းငယ် မျက်မှောင်ကြုတ်လိုက်ပြီး အခြေအနေ၏ နက်ရှိုင်းမှုကို သဘောပေါက်သွားသည်။

အမှောင်ထဲမှ မသိရသောအင်အားစုတစ်ခုက ရေနောက်အောင် ပြုလုပ်နေပြီး လျှို့ဝှက်ချက်များကို ဖုံးကွယ်ထားပုံရ​၏။

ဉာဏ်ပညာရှိသူ အနည်းငယ်က လုပ်ကြံဖန်တီးမှု၏ အရိပ်အယောင်များကို သိရှိခဲ့သော်လည်း ၎င်းတို့သည် တိတ်တဆိတ် ဖယ်ရှားခံခဲ့ရသည် သို့မဟုတ် ပျောက်ကွယ်သွားခဲ့သည်။

မြောက်ပိုင်းဒေသ၏ ဘုရင်ခံကဲ့သို့ပင်။

ဤသည်ကို တွေးမိသောအခါ လင်ချွမ်က မနေနိုင်ဘဲ ပြောလိုက်သည်။

“လူကြီးမင်းတို့၊ မြောက်ပိုင်းနယ်ခြား ဘုရင်ခံနဲ့ ပတ်သက်တဲ့ ကိစ္စကို ခင်ဗျားတို့ သိကြပါသလား"

၎င်းကို ကြားလိုက်ရသောအခါ လူတိုင်း၏ မျက်နှာပေါ်တွင် စဉ်းစားစရာ အမူအရာများ ဖြတ်ပြေးသွားသည်။

ရောက်ရှိနေသူတိုင်းနီးပါး ဤကိစ္စကို ကြားဖူးကြပြီး အချို့မှာ ကိုယ်တိုင်ပင် စုံစမ်းခဲ့ကြသည်။

သို့သော် လင်ချွမ်က ယခုအချိန်တွင် ထုတ်ပြောလာပြီဖြစ်ရာ သူ၌ ကိုယ်ပိုင်အစီအစဉ် ရှိရမည်။

၎င်းသည် ယခင်ကိစ္စနှင့် ဆက်စပ်နေနိုင်ခြေ အလွန်များသည်။

၎င်းကို မြင်သောအခါ ကျဲ့ခုန်းက မေးခွန်းထုတ်လိုက်သည်။

"အကြီးအကဲ လင်မှာ ဘယ်လို ထိုးထွင်းသိမြင်တဲ့ အမြင်မျိုး ရှိနေလဲဆိုတာ သိပါရစေ"

“မြောက်ပိုင်းဒေသ ဘုရင်ခံဟာ ဒီကိစ္စကို စုံစမ်းစစ်ဆေးခဲ့ပြီးနောက် ပျောက်ကွယ်သွားခဲ့တယ်"

"ဒီနေ့အထိ သူ့ကို ရှာမတွေ့သေးဘူး၊ ဒီကိစ္စမှာ လုပ်ကြံဖန်တီးမှုရဲ့ အစအနတွေ ရှိနေပြီး ဖေးယွမ်ဂိုဏ်းနဲ့လည်း ဆက်စပ်နေရမယ်"

"ဒီလိုရှုထောင့်ကနေ ကြည့်ရင် အဲဒီအဖွဲ့အစည်းရဲ့ ရည်ရွယ်ချက်ဟာ မင်!မင်းဆက်အတွင်းက အင်အားစုအသီးသီးကြားမှာ တိုက်ပွဲတွေဖြစ်အောင် လှုံ့ဆော်ဖို့ပဲ ဖြစ်ရမယ်"

ခေတ္တရပ်ပြီးနောက် လင်ချွမ်က ဆက်ပြောသည်။

“အထူးသဖြင့် ဂိုဏ်းတွေနဲ့ အထက်တန်းစား မိသားစုတွေကြား၊ ပြီးတော့ နန်းတွင်းနဲ့ သိုင်းလောကကြားမှာပေါ့"

"အကယ်၍ ကျွန်တော်တို့က လုပ်ကြံဖန်တီးသူတွေအကြောင်း ပြောမယ်ဆိုရင်၊ ဘယ်သူက အကျိုးအမြတ် အများဆုံးရမလဲဆိုတာက အစွပ်စွဲခံရဆုံး ဖြစ်မှာပဲ"

“ဒါကတော့...”

၎င်းကို ကြားသောအခါ လူတိုင်း တွန့်ဆုတ်သွားကြသည်။

သံသယဝင်စရာ လူမရှိခြင်းကြောင့် မဟုတ်ဘဲ၊ ဖြစ်နိုင်ခြေများ လွန်းနေခြင်းကြောင့် ဖြစ်သည်။

မင်မင်းဆက်အတွင်းရှိ အင်အားစုများသည် တစ်သားတည်း မဟုတ်ကြပေ။

အစဉ်အလာကို ထောက်ခံပြီး လောကီရေးရာနှင့် ကင်းကွာနေသော ဂိုဏ်းကြီးများအပြင် နန်းတွင်းကို ပုန်ကန်နေသူများစွာလည်း ရှိသည်။

မင်မင်းဆက်၏ ပြင်ပတွင်လည်း အလားတူ အင်အားစုများစွာ ရှိနေသေးသည်။

ဥပမာအားဖြင့်၊ ဂျပန်ဓားပြများ နှင့် ယွမ်မင်းဆက်၏ အကြွင်းအကျန်များသည် ဤဒေသကို စိတ်ဝင်စားနေကြ​၏။

သို့သော် ၎င်းတို့သည် အမြဲတမ်း လျှို့ဝှက်စွာ လှုပ်ရှားလေ့ရှိပြီး သဲလွန်စ ချန်ထားခဲ့ခဲကာ ၎င်းတို့၏ ပုန်းခိုရာနေရာများကို ရှာဖွေရန် ခက်ခဲလှသည်။

ထိုင်နေသူများထဲမှ ရသေ့ကဲ့သို့ အမူအရာရှိသော သက်ကြီးရွယ်အိုတစ်ဦး ထရပ်လိုက်သည်။

သူက ကျဲ့ခုန်းကို ရိုသေစွာ ဂါရဝပြုပြီးနောက် လင်ချွမ်ကို မေးလိုက်သည်။

“ဒါဆို မင်းရဲ့အမြင်အရ ဘယ်အုပ်စုက မသင်္ကာစရာ အဖြစ်ဆုံးလဲ"

လင်ချွမ် ခေတ္တစဉ်းစားပြီး ညင်သာစွာ ပြောလိုက်သည်။

“ကျွန်တော့်အမြင်အရတော့ ဂျပန်ဓားပြတွေ ဖြစ်ဖို့ အခွင့်အလမ်း အများဆုံးပဲ"

"ဒါပေမဲ့ ယွမ်မင်းဆက်ရဲ့ အကြွင်းအကျန်တွေ ဖြစ်နိုင်ခြေကိုလည်း ဖယ်ထုတ်လို့ မရဘူး၊ ကျွန်တော် သူတို့အကြောင်းကို အရမ်းနည်းနည်းပဲ သိလို့ပါ"

“မှန်ပါတယ်၊ ဂျပန်ဓားပြတွေဟာ ကိုယ်တော်တို့ရဲ့ မင်မင်းဆက်ကို အမြဲတမ်း မက်မောနေခဲ့ကြတာပဲ"

"သူတို့ကတောင်...”

လူအုပ်က ထိုခံစားချက်ကို ထောက်ခံနေကြစဉ်၊ လူအများအပြားက ယခင် ရေတပ်တိုက်ပွဲအကြောင်းကို ပြန်ပြောလာကြသည်။

၎င်းသည် လူအုပ်၏ ဒေါသကို ချက်ချင်း လှုံ့ဆော်ပေးလိုက်သည်။

အကြောင်းမှာ ဂိုဏ်းအသီးသီးမှ သိုင်းပညာရှင်များသည် ထိုတိုက်ပွဲတွင် အထိအခိုက် အကျဆုံးများစွာ ရှိခဲ့သောကြောင့် ဖြစ်သည်။

ယခု ၎င်းကို ပြန်ပြောလိုက်ခြင်းက လူများကို ဒေါသတကြီး စိုက်ကြည့်လာစေသည်မှာ သဘာဝပင်။

ထိုခဏ၌၊ လူတိုင်း၏ စကားဝိုင်းကို ခိုးနားထောင်နေသကဲ့သို့ အသံတစ်ခု ရုတ်တရက် ထွက်ပေါ်လာသည်။

“အဲဒါကို ဆက်မတွေးနေနဲ့တော့"

"ဘာဖြစ်လို့လဲဆိုတော့ မင်းတို့ရဲ့ အဖိုးကြီးက ဒီကို ရောက်နေပြီမလို့ပဲ"