ထာဝရသမိုင်းကြောင်း
Vol. 80 Ch. 838
လင်းယွင်တောင်တန်းတွင်ရှိစဉ်က ထန်ထျန်းသည် ကျွင်းချန်ချင်း၏ နှုတ်စကားမှတစ်ဆင့် သူ့ကိုယ်သူ ကပ်ဘေးရိပ်သိမ်းသူ ဟု ပထမဆုံးအကြိမ် သိရှိခဲ့ရသည်။
ကမ္ဘာ့အရှင်ကိုယ်တိုင် ရွေးချယ်ထားသည့် ကပ်ဘေးရိပ်သိမ်းသူ။
နောက်ပိုင်းတွင် နေနတ်ဘုရား၊ လုံကျိုကျိုးနှင့် ကျန်ရှိသူအားလုံးကလည်း ဤအချက်ကို အကြွင်းမဲ့ ယုံကြည်ခဲ့ကြသည်။
အမှန်စင်စစ် အစပိုင်းတွင် ထန်ထျန်းက ဤနာမည် ကို အနည်းငယ် ငြင်းဆန်ခဲ့မိသည်။
အကြောင်းမှာ ထိုစဉ်က သူသည် စကြာဝဠာအပေါ် တာဝန်ယူလိုစိတ် ပြင်းပြင်းထန်ထန် မရှိခဲ့ဘဲ သူ့ကိုယ်သူနှင့် သူ့ဘေးနားရှိလူများကို ကာကွယ်နိုင်ရန်သာ အဓိက စဉ်းစားခဲ့သောကြောင့်ပင်။
ဤအချက်မှာ လူအများ မျှော်လင့်ထားသည့် ကပ်ဘေးရိပ်သိမ်းသူ၏ ပုံစံနှင့် လုံးဝ မကိုက်ညီပေ။
သို့သော် နောက်ပိုင်း ဖြစ်ပျက်လာသည့် အခြေအနေများနှင့်အတူ လူပေါင်းများစွာက ဤစကြာဝဠာကြီးအတွက် အရာအားလုံးကို စတေးပြီး ရှေ့ဆင့်နောက်ဆင့် ပေးဆပ်သွားကြသည်ကို မြင်တွေ့ရသောအခါ သူသည်လည်း စကြာဝဠာအပေါ် ပိုမိုတွယ်တာလာပြီး ကပ်ဘေးရိပ်သိမ်းသူဟူသော နာမည် ကို တဖြည်းဖြည်း လက်ခံလာခဲ့သည်။
သို့သော် ယခုအခါတွင်မူ ကမ္ဘာ့အရှင်က သူက အခြားသရုပ်မှန် ၊ ပိုမိုလေးလံပြီး စိတ်ကူးယဉ်ဆန်လှသည့် သရုပ်မှန် တစ်ခုဖြစ်ကြောင်း ပြောလာခဲ့သည်။
ကယ်တင်ရှင်
ထန်ထျန်း ဘာပြောရမှန်းပင် မသိတော့ပေ။
အရည်အချင်းပြည့်မီသည့် ကပ်ဘေးရိပ်သိမ်းသူတစ်ယောက် ဖြစ်ဖို့တောင် သူ့ကိုယ်သူ မနည်းကြိုးစားနေရသည်ဟု ခံစားနေရချိန်တွင် ကယ်တင်ရှင်ဆိုသည်မှာ...
သူ၏ ကိုယ်ကျင့်တရားစံနှုန်းက ဤသရုပ်မှန် ကို ထမ်းဆောင်ရန် အရည်အချင်းရှိမရှိကို ခေတ္တဖယ်ထားဦးတော့၊ သူသာ ကယ်တင်ရှင်ဖြစ်ချင်သည်ဆိုလျှင်ပင် လိုအပ်ချက်များမှာ ကောင်းကင်နှင့် မြေကြီးကဲ့သို့ ကွာခြားနေဦးမည်မှာ အမှန်ပင်
၎င်းမှာ ကျွင်းချန်ချင်းကို ဖြေရှင်းရုံမျှနှင့် မပြီးဘဲ မျှော်လင့်ချက် ကုန်ဆုံးနေပြီဖြစ်သော ဤစကြာဝဠာကြီးကိုပါ ကယ်တင်ရမည် မဟုတ်ပါလား။
ဤကိစ္စကို ကမ္ဘာ့အရှင်၊ နေနတ်ဘုရား၊ စကြာဝဠာဆန္ဒနှင့် အစွမ်းထက်သူအားလုံး စုပေါင်းပြီး နှစ်သန်းပေါင်း ထောင်ချီ၊ သောင်းချီ ကြိုးစားခဲ့ကြသော်လည်း မအောင်မြင်ခဲ့ကြပေ။
သူတစ်ယောက်တည်းနှင့် တကယ်ရော လုပ်နိုင်ပါ့မလား။
ထို့အပြင် ကမ္ဘာ့အရှင်က "နှိမ့်ချစွာ"၊ "ဝပ်တွားခယ ဆုတောင်းခြင်း" ဟူသော စကားလုံးများကိုပင် သုံးနှုန်းသွားခဲ့သည်။
သူက မည်သူ့ထံတွင် ဝပ်တွားခယ ဆုတောင်းခဲ့သနည်း။
"မင်း..."
"ငါ နားမလည်ဘူး"
"အခု ငါက တကယ်ပဲ အားမနည်း ဘူးဆိုပေမဲ့ ကယ်တင်ရှင်ဆိုတဲ့ အဆင့်နဲ့တော့..."
"အလှမ်းဝေးလွန်းနေသေးတယ် မဟုတ်လား"
အတော်ကြာ တိတ်ဆိတ်သွားပြီးနောက် ထန်ထျန်းက ပြောလိုက်သည်။
ကမ္ဘာ့အရှင်က ခပ်ဖွဖွ ခေါင်းညိတ်လိုက်၏။
"မင်းက ငါ ကြိုတင်မျှော်လင့်ထားတာနဲ့တော့ အနည်းငယ် ကွာခြားနေတာ အမှန်ပဲ"
"ဒါပေမဲ့ မင်း ပေါ်လာတာက ငါ့ရဲ့ ဆုတောင်းကို သူက တုံ့ပြန်လိုက်တယ်ဆိုတာကို သက်သေပြနေတာပဲ"
"ဒါဆိုရင်တော့ မင်းမှာ ဒီကိစ္စကို လုပ်နိုင်တဲ့ အရည်အချင်း အသေအချာ ရှိနေပါလိမ့်မယ်"
ထန်ထျန်း ကြောင်အသွားသည်။
ကယ်တင်ရှင်ရဲ့ အရည်အချင်း လား
ဘယ်မှာလဲ
သူ ဘာလို့ တစ်ခါမှ သတိမထားမိခဲ့တာလဲ။
သူ့၏ အကြီးမားဆုံး အားကိုးရာဖြစ်သည့် စနစ်နှစ်ခု မှာပင် ကမ္ဘာ့အရှင် ဖန်တီးထားသည့်အရာများ မဟုတ်ပါလား။
သို့မဟုတ် အခြားကမ္ဘာမှ လာသည့် သူ၏ ဝိညာဉ်ကို အားကိုးရမည်လော။
မဖြစ်နိုင်တာ။
ထိုကမ္ဘာတွင် သူက သာမန်လူတစ်ယောက်မျှသာ ဖြစ်ခဲ့သည်။
"မင်းက တကယ်ပဲ ဘယ်သူ့ဆီမှာ ဆုတောင်းခဲ့တာလဲ"
"အချိန်မြစ် ထဲမှာ မင်းနဲ့ စစ်တုရင် ကစားနေတဲ့သူလား"
"ထာဝရရဲ့ အထက်မှာ တကယ်ပဲ ဘာရှိနေတာလဲ"
အပြန်ပြန်အလှန်လှန် စဉ်းစားကြည့်ပြီးနောက် ဤမေးခွန်းမှာ အရေးကြီးဆုံးဖြစ်ကြောင်း ထန်ထျန်း ခံစားမိလိုက်သည်။
ထာဝရအဆင့်သို့ ရောက်ရှိပြီးနောက် ကမ္ဘာ့အရှင်က အဘယ်အရာကို မြင်တွေ့ခဲ့သနည်း။
ဤမေးခွန်းနှင့် ပတ်သက်၍ ကမ္ဘာ့အရှင်က နောက်တစ်ကြိမ် အတော်ကြာ တိတ်ဆိတ်သွားပြန်သည်။
အတော်ကြာမှ သူက ဖြည်းဖြည်းချင်း ပြောလာ၏။
"ဒီမေးခွန်းက ဟိုးရှေးရှေးတုန်းက အကြောင်းအရာတွေကို ပြန်ကောက်ရပါလိမ့်မယ်"
"ပထမဆုံး သက်ရှိက ဖန်ဆင်းရှင်အမွေအနှစ် တွေကို ထိတွေ့မိတဲ့အခါ ထာဝရတည်ရှိမှုကို စတင် သတိပြုမိခဲ့ကြတယ်"
"ဘာလို့လဲဆိုတော့ ဖန်ဆင်းရှင်အမွေအနှစ် ငါးပါးဟာ သူတို့ကိုယ်တိုင်က ထာဝရ ဖြစ်တည်နေလို့ပဲ"
"အဲ့ဒီအချိန်ကစပြီး ထာဝရဆိုတာ ကျင့်ကြံသူအားလုံးရဲ့ အမြင့်ဆုံး ပန်းတိုင် ဖြစ်လာခဲ့တယ်"
ကမ္ဘာ့အရှင်၏ ပြောပြချက်အရ ထန်ထျန်းက ရှည်လျားလှသော သမိုင်းကြောင်းကို အကြမ်းဖျင်း နားလည်လာခဲ့သည်။
ဖန်ဆင်းရှင်အမွေအနှစ်ကို ပထမဆုံး ထိတွေ့ခဲ့သည့် သက်ရှိမှာ မည်သူဖြစ်ကြောင်း အတည်မပြုနိုင်တော့သော်လည်း ထိုသူ့ထံမှအစပြု၍ ကျင့်ကြံသူအားလုံး၏ စိတ်ထဲတွင် ရှင်းလင်းသည့် ပန်းတိုင်တစ်ခု ရှိလာခဲ့သည်။
ထာဝရ
အစပိုင်းတွင် သက်ရှိများက သူတို့ကိုယ်သူတို့ ယုံကြည်မှု အပြည့်ရှိခဲ့ကြပြီး ထိုနယ်ပယ်သာ တည်ရှိနေပါက အမြဲတစေ ရှေ့သို့ လျှောက်လှမ်းနေသရွေ့ ထိုပန်းတိုင်သို့ မုချရောက်ရှိမည်ဟု ယူဆခဲ့ကြသည်။
သို့သော် အချိန်များ ကုန်လွန်လာသည်နှင့်အမျှ ကျိကျွင်းအဆင့်သို့ ရောက်ရှိလာသည့် သက်ရှိအရေအတွက် ပိုမိုများပြားလာသောအခါမှသာ ထိုအရာမှာ မြင်သာသော်လည်း လှမ်းမမီနိုင်သည့် အိပ်မက်တစ်ခုဖြစ်ကြောင်း လူတို့ သိရှိလာခဲ့ကြသည်။
သူတို့ မည်မျှပင် ကြိုးစားအားထုတ်စေကာမူ အချည်းနှီးသာ ဖြစ်ခဲ့ရသည်။
၎င်းမှာ ကောင်းကင်ယံမှ မြင်ယောင်နေရသည့် တံလျှပ်တစ်ခုကဲ့သို့ပင် ဖြစ်သည်။ ရှင်းရှင်းလင်းလင်း မြင်နေရသော်လည်း အမှန်တကယ် ထိတွေ့၍ မရနိုင်ပေ။
သက်ရှိများက ဤအတိုင်း အလျှော့ပေးလိမ့်မည် မဟုတ်ပေ။
နှစ်သန်းပေါင်းများစွာအတွင်း သူတို့က ထိုတံလျှပ်ဆီသို့ သွားနိုင်မည့် လမ်းကြောင်းကို နည်းမျိုးစုံဖြင့် ရှာဖွေခဲ့ကြသည်။
နောက်ဆုံးတွင် သူတို့က ပြဿနာ၏ အဓိကသော့ချက်ကို ရှာတွေ့သွားခဲ့ကြသည်။
ဖန်ဆင်းရှင်စွမ်းအား
ဤစွမ်းအားက ဖန်ဆင်းရှင်အမွေအနှစ် ငါးပါးမှသာ မြစ်ဖျားခံပြီး ၎င်းမှလွဲ၍ စကြာဝဠာ၏ မည်သည့်နေရာတွင်မျှ အလားတူအရာမျိုးကို ရှာမတွေ့နိုင်ပေ။
၎င်းသည် ထာဝရဖြစ်ခြင်း၏ သက်သေဖြစ်ပါက ထာဝရဆီသို့ သွားမည့် သော့ချက်လည်း ဖြစ်နိုင်ပေသည်။
ထို့ကြောင့် ဖန်ဆင်းရှင်အမွေအနှစ် ငါးပါးကို သိမ်းပိုက်မည့် စစ်ပွဲတစ်ခု စတင်ခဲ့လေသည်။
ထိုစစ်ပွဲက နှစ်သန်းပေါင်း ရာနှင့်ချီ၍ ကြာမြင့်ခဲ့သည်။
သို့သော် ဖန်ဆင်းရှင်အမွေအနှစ်များ၏ အစွမ်းထက်မှုနှင့်အတူ စကြာဝဠာဆန္ဒ၊ နေနတ်ဘုရား စသည့် မူလဦးစွာသော သက်ရှိများ၏ ကာကွယ်မှုကြောင့် သက်ရှိများက ထိုအရာများကို မည်သို့မျှ မလုပ်နိုင်ခဲ့ကြပေ။
သို့သော် သက်ရှိတို့၏ ဉာဏ်ပညာမှာ အဆုံးမဲ့ပင် ဖြစ်သည်။
ဖန်ဆင်းရှင်အမွေအနှစ်များကို အမှန်တကယ် ပိုင်ဆိုင်ခွင့် မရခဲ့သော်လည်း နှစ်ရှည်လများ စစ်ပွဲများအတွင်း သက်ရှိများက အမွေအနှစ်များ၏ ထူးခြားချက်နှင့် ဖန်ဆင်းရှင်စွမ်းအား၏ သဘောသဘာဝကို အခြေခံအားဖြင့် နားလည်လာခဲ့ကြသည်။
အောင်ပွဲ၏ အလေးသာမှုက တဖြည်းဖြည်း တိမ်းစောင်းလာခဲ့သည်။
နောက်ဆုံးတွင် အလွန်အရေးပါသည့် ပုဂ္ဂိုလ်တစ်ဦး ပေါ်ထွက်လာခဲ့၏။
"မင်းလား"
ထန်ထျန်းက မေးလိုက်သည်။
ကမ္ဘာ့အရှင်က ခေါင်းယမ်းလိုက်သည်။
"မဟုတ်ဘူး"
"သူက လမ်းပြတစ်ယောက်ပဲ၊ ငါ့မတိုင်ခင် သမိုင်းတစ်လျှောက်မှာ အင်အားအကြီးဆုံး သက်ရှိတစ်ယောက်ပေါ့"
"လူတွေက သူ့ကို ထာဝရဧကရာဇ် လို့ ခေါ်ကြတယ်"
ကမ္ဘာ့အရှင်က ဆက်လက်ပြောပြနေသည်။
ထာဝရဧကရာဇ်က သက်ရှိတို့၏ သမိုင်းတစ်လျှောက်တွင် အတောက်ပဆုံးသော ကြယ်တစ်ပွင့် ဖြစ်ပြီး နှိုင်းယှဉ်စရာ မရှိပေ။
နောက်ပိုင်းတွင် ပေါ်ထွန်းလာသည့် ကမ္ဘာ့အရှင်ပင်လျှင် သူနှင့် ယှဉ်ရန် မဖြစ်နိုင်ပေ၊ အကြောင်းမှာ သူ၏ စွမ်းဆောင်ချက်များမှာ အလွန်ပင် ကြီးကျယ်ခမ်းနားလှသောကြောင့် ဖြစ်သည်။
ထိုစဉ်က စကြာဝဠာကြီးမှာ အလွန်ပင် စည်ပင်ထွန်းကားနေပြီး အလွန်အစွမ်းထက်သည့် သက်ရှိများစွာ ရှိနေသော်လည်း မျိုးနွယ်စု အများစုမှာ အချင်းချင်း တိုက်ခိုက်နေကြကာ အချို့မျိုးနွယ်စုများမှာ သေကျေပျက်စီးသည်အထိ ရန်ငြိုးများ ရှိနေခဲ့ကြသည်။ သူတို့က တူညီသည့် လမ်းကြောင်းပေါ်တွင် ရပ်တည်မနေခဲ့ကြပေ။
သက်ရှိများက ဖန်ဆင်းရှင်အမွေအနှစ်များနှင့် တိုက်ခိုက်ရာတွင် အကြိမ်ကြိမ် ရှုံးနိမ့်ခဲ့ရခြင်းမှာလည်း ဤအကြောင်းရင်းကြောင့်ပင် ဖြစ်သည်။
သို့သော် ထာဝရဧကရာဇ်က သူ၏ စွမ်းအားတစ်ခုတည်းဖြင့် တစ်ဖက်သတ် အခြေအနေအရပ်ရပ်ကို ပြောင်းလဲပစ်ခဲ့သည်။
သူက အနှိုင်းမဲ့စွမ်းအားဖြင့် သက်ရှိမျိုးနွယ်စု အားလုံးကို သိမ်းပိုက်ခဲ့ပြီး စကြာဝဠာရှိ မျိုးနွယ်စုအားလုံးကို ပထမဆုံးအကြိမ် စစ်မှန်သည့် စည်းလုံးညီညွတ်မှုသို့ ရောက်ရှိစေခဲ့သည်။
၎င်းမှာ အစွမ်းထက်ရုံဖြင့် လုပ်ဆောင်နိုင်သည့် ကိစ္စမျိုး မဟုတ်ပေ၊ အကြောင်းမှာ စကြာဝဠာကြီး ပျက်စီးသွားလျှင်ပင် ပျောက်ပျက်မသွားနိုင်သည့် ရန်ငြိုးကြီးမားလှသော မျိုးနွယ်စုများစွာ ရှိနေသောကြောင့် ဖြစ်သည်။
သို့သော် ထာဝရဧကရာဇ်က မယုံကြည်နိုင်ဖွယ်ရာ ဤကြီးကျယ်သော လုပ်ရပ်ကို ပြီးမြောက်အောင်မြင်စေခဲ့သည်။
ထိုခေတ်ကာလတွင် သက်ရှိအားလုံးမှာ မကြုံစဖူး စည်းလုံးညီညွတ်ခဲ့ကြသည်။
စည်းလုံးညီညွတ်သော သက်ရှိများက အနှိုင်းမဲ့ပင် ဖြစ်သည်။
ထာဝရဧကရာဇ်၏ ဦးဆောင်မှုအောက်တွင် ဖန်ဆင်းရှင်အမွေအနှစ်များနှင့် မူလ ဝိညာဉ် များအကြား စစ်ပွဲမှာ ချက်ချင်း ပြောင်းပြန်လှန်သွားခဲ့သည်။
နောက်ဆုံးတွင် ထာဝရဧကရာဇ်က သူတို့ကို အနိုင်ယူနိုင်ခဲ့ပြီး ဖန်ဆင်းရှင်စွမ်းအား၏ မြစ်ဖျားခံရာကို အောင်မြင်စွာ ရှာဖွေတွေ့ရှိခဲ့သည်။
ဖန်ဆင်းခြင်း ကောင်းကင်တိုင်
၎င်းမှာ ဖန်ဆင်းရှင်စွမ်းအား၏ မြစ်ဖျားခံရာဖြစ်သလို ဖန်ဆင်းရှင်အမွေအနှစ်များ စတင်ပေါ်ပေါက်ရာ နေရာလည်း ဖြစ်သည်။
ထိုနေရာတွင် ထာဝရဧကရာဇ်က ပထမဆုံးအကြိမ် ထာဝရတည်ရှိမှုကို အမှန်တကယ် ထိတွေ့ခွင့် ရခဲ့သည်။
ထို့အပြင် ထာဝရဖြစ်ခြင်း၏ အနှစ်သာရအချို့ကိုလည်း မြင်တွေ့ခဲ့ရသည်။
သို့သော် သက်ရှိအားလုံးက ထိုအရာအတွက် ဝမ်းသာအားရ ကြွေးကြော်နေကြစဉ်မှာပင် မည်သူမျှ မထင်မှတ်ထားသည့် ကိစ္စတစ်ခု ဖြစ်ပျက်ခဲ့သည်။
ထာဝရဧကရာဇ် ရူးသွပ်သွားခဲ့သည်။
သူက ငိုတစ်လှည့် ရယ်တစ်လှည့်နှင့် သူကိုယ်တိုင် တည်ထောင်ခဲ့သည့် အနှိုင်းမဲ့ အင်ပါယာကြီးကို ဖျက်ဆီးပစ်ခဲ့ပြီး နောက်ဆုံးတွင် ဟင်းလင်းပြင် ထဲသို့ ပြေးဝင်သွားကာ မည်သည့်အခါမျှ ပြန်မလာတော့ပေ။
နောက်ပိုင်းတွင် သူ့ကို မတော်တဆ မြင်တွေ့ရသူများ ရှိခဲ့သော်လည်း သူက ထိုကဲ့သို့ ရူးသွပ်နေဆဲပင် ဖြစ်သည်။
"အဲ့ဒီအချိန်ကစပြီး ထာဝရဆိုတဲ့ အရာမှာ နောက်ထပ် နာမည်တစ်ခု တိုးလာခဲ့တယ်"
"တားမြစ်ချက် တဲ့"
ကမ္ဘာ့အရှင်က ဖြည်းဖြည်းချင်း ပြောပြလိုက်လေသည်။