အခန်း (၅-၆)

အခန်း (၅) ချီစုစည်းခြင်းနယ်ပယ်သို့ အောင်မြင်စွာ တက်လှမ်းခြင်းနှင့် အခွင့်အရေး ရှာဖွေခြင်း

​နှစ်ရက်ကြာပြီးနောက်

​ရှုချွမ်းက ကျင့်ကြံရေးအခန်းအတွင်း ‘ရွှမ်းယန်ကျွယ်’ ကို ဆက်လက်ကျင့်ကြံနေဆဲ ဖြစ်သည်။

ဤအချိန်တွင် သူ၏ခန္ဓာကိုယ်အတွင်းရှိ မူလချီများက ‘ရွှမ်းယန်ကျွယ်’ ၏ ‘နေမင်းစွမ်းအား’ အဖြစ်သို့ အပြည့်အဝ ပြောင်းလဲသွားပြီဖြစ်ပြီး သူ၏ သိုင်းတာအိုအခြေခံမှာလည်း အလွန်ပင် ခိုင်မာလာခဲ့သည်။

​ရှုချွမ်းက သူ၏ ပြတ်သားသော စိတ်ဓာတ်ကို အသုံးချကာ ဤကျင့်စဉ်၏ အခက်ခဲဆုံး အပိုင်းကို ကျော်ဖြတ်နိုင်ခဲ့သည်။

ယခုဆိုလျှင် သူက ချီစုစည်းခြင်းနယ်ပယ် ထဲသို့ ခြေတစ်ဖက် လှမ်းထားနိုင်ပြီ ဖြစ်သည်။

​ဘုန်း

​နောက်ဆုံးကျန်ရှိနေသော နေမင်းအော်ရာကို သန့်စင်ပြီးချိန်တွင် ဤကောင်းကင်အဆင့် ကျင့်စဉ် အပိုင်းအစကို ရှုချွမ်း အပြည့်အဝ တတ်မြောက်သွားတော့သည်။

သူ၏ ခန္ဓာကိုယ်က ရုတ်တရက် အကြီးအကျယ် ပြောင်းလဲလာသည်။

အရိုးများနှင့် ကြွက်သားများက နေမင်းစွမ်းအား၏ သန့်စင်မှုအောက်တွင် တဖြည်းဖြည်း သန်မာလာခဲ့သည်။

​အရပ်မျက်နှာအနှံ့မှ မူလချီများက အဆက်မပြတ် စီးဝင်လာပြီး ကြမ်းပြင်ပေါ်ရှိ ယွမ်ကျောက်တုံးများမှာလည်း တစ်ခုပြီးတစ်ခု ကွဲအက်ကုန်သည်။ ထိုစွမ်းအင်များကို ရှုချွမ်း၏ ဒန်တျန် က အကုန်အစင် စုပ်ယူလိုက်တော့သည်။

​ကံကောင်းထောက်မစွာဖြင့် ရှုချွမ်းက ယွမ်ကျောက်တုံးအားလုံးကို ကြိုတင်ထုတ်ထားခဲ့ခြင်း ဖြစ်သည်။ မဟုတ်လျှင် ကျင့်ကြံရေးအခန်းမှ ပေးသော စွမ်းအင်တစ်ခုတည်းနှင့် သူ စုပ်ယူရန် လုံလောက်မည် မဟုတ်ပေ။

ဤအချိန်တွင် ရှုချွမ်း၏ နောက်ကျောဘက်၌ တောက်ပလှသော နေမင်းကြီး၏ ပုံရိပ်ယောင်တစ်ခုပင် ထွက်ပေါ်လာသည်။

ထိုပုံရိပ်ယောင်မှ နေမင်း၏ အပူရှိန်နှင့် ခန့်ညားလှသော ကောင်းကင်အော်ရာများ ထွက်ပေါ်လာရာ သူ့ကို ဝန်းရံထားတော့သည်။

​နောက်ဆုံးတွင် သူက ‘ခန္ဓာကိုယ်သန့်စင်ခြင်း’ နဝမအဆင့် အကန့်အသတ်ကို ကျော်ဖြတ်ကာ ‘ချီစုစည်းခြင်းနယ်ပယ်’ သိုင်းပညာရှင်တစ်ဦး တရားဝင် ဖြစ်လာခဲ့ပြီ။

ဒါက အစပဲ ရှိပါသေးသည်။

​ချီစုစည်းခြင်းနယ်ပယ်သို့ ရောက်ရှိသွားသည်နှင့် ယခင်က သူ၏ ကိုယ်ပိုင်စွမ်းအားများကို လောင်ကျွမ်းစေခဲ့သော အကျိုးကျေးဇူးများမှာ သိသာလာသည်။

ရှုချွမ်း၏ ကျင့်ကြံခြင်း အဆင့်မှာ ဝါးပင်ကို ဓားနှင့်ခုတ်သကဲ့သို့ အဟန့်အတားမရှိ တိုးတက်လာသည်။

မကြာမီမှာပင် သူက ‘ချီစုစည်းခြင်း’ ဒုတိယအဆင့်သို့ တိုက်ရိုက် ရောက်ရှိသွားတော့သည်။

သူ၏ အော်ရာမှာလည်း လုံးဝ တည်ငြိမ်သွားခဲ့သည်။

ထိုအခါမှ ရှုချွမ်း၏ ခန္ဓာကိုယ်ပေါ်ရှိ အော်ရာများမှာ တဖြည်းဖြည်း ပြန်လည် ပျောက်ကွယ်သွားသည်။

​"ကောင်းကင်အဆင့် ကျင့်စဉ်ဆိုတာ တကယ်ကို မတူဘူးပဲ။ ချီစုစည်းခြင်းနယ်ပယ်အတွက် ပျက်စီးနေတဲ့ အစိတ်အပိုင်းလေးကတောင် ငါ့ကို နဝမအဆင့်ကနေ ဒုတိယအဆင့်အထိ တိုက်ရိုက် ခုန်တက်စေနိုင်ခဲ့တယ်"

​သူ့စိတ်ထဲတွင် အတွေးများစွာ ပေါ်လာသည်။

လဝက်အတွင်းမှာတင် ရှုချွမ်းသည် ခန္ဓာကိုယ်သန့်စင်ခြင်း ဆဋ္ဌမအဆင့်မှ ချီစုစည်းခြင်း ဒုတိယအဆင့်သို့ ရောက်ရှိခဲ့ခြင်း ဖြစ်သည်။ ဤတိုးတက်မှုနှုန်းမှာ အလွန်ပင် ထူးခြားလှသည်။

သူ၏ အခြေခံကို မထိခိုက်စေဘဲ ဤမျှမြန်ဆန်စွာ တိုးတက်နိုင်ခြင်းမှာ ပြိုင်ဘက်ကင်း ပါရမီရှင်များသာ လုပ်ဆောင်နိုင်သည့် အရာဖြစ်သည်။

​လဝက်ခန့်က သူသည် ဂိုဏ်းမှ အထုတ်မခံရရန်သာ ကြိုးစားနေခဲ့ရသူ ဖြစ်သည်။

ယခုမူ ‘ရွှမ်းယန်ကျွယ်’ ကို ကျင့်ကြံပြီး ခိုင်မာသော အခြေခံကို တည်ဆောက်နိုင်ခဲ့ပြီဖြစ်ရာ သူ၏ သိုင်းလမ်းစဉ်မှာ လွယ်ကူချောမွေ့မည် မဟုတ်လျှင်ပင် အနည်းဆုံးတော့ နယ်ပယ်တစ်ခုတည်းမှာတင် နှစ်ပေါင်းများစွာ ကြန့်ကြာနေတော့မည် မဟုတ်ပေ။

​"ကျင့်ကြံခြင်း အရင်းအမြစ်တွေက တကယ်ကို အရေးကြီးတာပဲ။ ဒီအခွင့်အရေးနှစ်ခုသာ မရခဲ့ရင် ငါ့တစ်သက်မှာ ချီစုစည်းခြင်းနယ်ပယ်ကို ရောက်မှာ မဟုတ်ဘူး။ နောက်ဆုံးတော့ စနစ်က ပြထားတဲ့အတိုင်း ငယ်ငယ်ရွယ်ရွယ်နဲ့ သေရမှာပဲ"

​ရှုချွမ်းမှာ သက်ပြင်းမချဘဲ မနေနိုင်တော့ပေ။

ဤလဝက်အတွင်း တိုးတက်မှုမှာ ရှစ်နှစ်ကြာ ခက်ခက်ခဲခဲ ကျင့်ကြံခဲ့ရသည်ထက် အဆပေါင်းများစွာ သာလွန်သည်။

ဤမျှ ကြီးမားသော ပြောင်းလဲမှုကြောင့် သူကိုယ်တိုင်ပင် အိပ်မက်လိုလို ခံစားနေရသည်။

​"ချီစုစည်းခြင်းနယ်ပယ်ကို ရောက်ပြီဆိုတော့ အပြင်စည်း စစ်ဆေးမှု အောင်ဖို့ကတော့ သေချာသွားပြီ။ ဒါကြောင့် ဂိုဏ်းက အထုတ်ခံရမှာကို စိုးရိမ်နေစရာ မလိုတော့ဘူး"

" ဒါပေမဲ့ နောက်တစ်ကြိမ် စစ်ဆေးမှုကျင်းပဖို့ ဆယ်ရက်ကျော် လိုသေးတယ်။ ဒါက အခွင့်အရေးပဲ၊ ငါ အပြင်ထွက်ပြီး တခြား အခွင့်အရေးကောင်းတွေ ထပ်ရှာကြည့်ရမယ်"

​ထိုက်ယိမြင့်မြတ်နယ်မြေတွင် အပြင်စည်းတပည့် ဦးရေမှာ များပြားလှသော်လည်း ကြီးမားသော အခွင့်အရေးများ ပေါ်ပေါက်လာနိုင်ခြေမှာ မများလှပေ။

အတွင်းစည်းကိုတော့ ယခုအချိန်တွင် သူ မဝင်နိုင်သေးပေ

ထို့ကြောင့် ဂိုဏ်းအပြင်ဘက် ထွက်ပြီး ကံစမ်းကြည့်ခြင်းက ပို၍ ကောင်းပေလိမ့်မည်။

သူ ဝယ်ယူထားသော ‘အနီရောင်သွေးဓားသိုင်း’ ကိုလည်း လေ့ကျင့်နိုင်မည် မဟုတ်ပါလား။

​ထိုသို့ တွေးမိပြီးနောက် ရှုချွမ်းက ကျင့်ကြံရေးအခန်းမှ ထွက်လာခဲ့သည်။

နှစ်ရက်အတွင်းမှာတင် ရှုချွမ်း လက်ထဲ၌ ရှိသော ယွမ်ကျောက်တုံး ငါးရာမှာ ကျင့်ကြံခြင်းနှင့် အခန်းငှားရမ်းခများအတွက် အကုန်အစင် ကုန်သွားခဲ့သည်။

ကောင်းကင်အဆင့် ကျင့်စဉ်မှာ အစွမ်းထက်သလောက် အရင်းအမြစ် သုံးစွဲမှုမှာလည်း ထိတ်လန့်စရာ အဆင့်မှာ ရှိနေသည်။

​အကယ်၍ သူသာ အပြင်ထွက်ပြီး အခွင့်အရေးအသစ် မရှာနိုင်လျှင် နောက်တစ်ကြိမ် ကျင့်ကြံရန်အတွက် အရင်းအမြစ် ဝယ်ယူနိုင်မည် မဟုတ်ပေ။

ထိုသို့ဆိုလျှင် အရင်းအမြစ် မရှိသဖြင့် ကျင့်ကြံခြင်း တိုးတက်မှု နှေးကွေးခဲ့ရသော နေ့ရက်များဆီသို့ ပြန်ရောက်သွားပေလိမ့်မည်။

​သူ၏ နေအိမ်သို့ ပြန်ကာ ပစ္စည်းများ သိမ်းဆည်းပြီးနောက် ရှုချွမ်းက ဂိုဏ်းတံခါးဝမှ တစ်ဖန် ပြန်လည် ထွက်လာခဲ့သည်။

သူ၏ ဦးတည်ရာမှာ ‘ထာဝရမြို့’ ပင် ဖြစ်သည်။

လူသားတို့ ၏ မြို့ကြီးတစ်မြို့ ဖြစ်သည့်အတိုင်း ထာဝရမြို့တွင် နေ့စဉ် သွားလာနေသော လူဦးရေမှာ အလွန်များပြားလှသဖြင့် ဂိုဏ်းအတွင်းရှိ တပည့်အရေအတွက်နှင့်ပင် နှိုင်းယှဉ်၍ မရပေ။

​ဤကဲ့သို့သော ပတ်ဝန်းကျင်မျိုးတွင် အခွင့်အရေးကောင်းများစွာ ရှိနေမှာ သေချာသည်

ထို့ပြင် ယခင်တစ်ခေါက်က သူ အလျင်စလို ပြန်လာခဲ့ရသဖြင့် မြို့ထဲကို သေချာ မပတ်ခဲ့ရပေ။ ယခုတစ်ကြိမ်တွင်တော့ သူ သေချာ လေ့လာကြည့်ရန် ပြင်ဆင်ထားသည်။

​စိုးရိမ်ပူပန်စရာ မရှိသောအခါ စိတ်မှာလည်း ပေါ့ပါးနေတော့သည်။

ဤအချိန်တွင် ရှုချွမ်း၏ စိတ်အခြေအနေမှာ ယခင်ကကဲ့သို့ စိုးရိမ်ပူပန်မှုများ မရှိတော့ဘဲ ကြည်လင်နေသည်။

​ထာဝရမြို့အတွင်း၌ ချောမောသော လူငယ်တစ်ဦးက ပတ်ဝန်းကျင်ကို အေးအေးလူလူ ကြည့်ရှုရင်း လမ်းလျှောက်နေသည်။

​"ထာဝရမြို့ဟာ မြင့်မြတ်နယ်မြေရဲ့ လက်အောက်ခံ အကြီးဆုံးမြို့ဆိုတဲ့အတိုင်းပါပဲ။ သိုင်းပညာရှင်တွေ စုဝေးနေကြသလို လူပေါင်းစုံကိုလည်း တွေ့နိုင်တယ်"

​ယခုတစ်ကြိမ်တွင် ရှုချွမ်းမှာ မလောတော့ဘဲ လမ်းပေါ်တွင် အေးဆေးစွာ လမ်းလျှောက်ရင်း သူ့ဘေးမှ ဖြတ်သွားသူတိုင်းကို တိတ်တဆိတ် စောင့်ကြည့်နေသည်။ သို့သော် လူအများစုမှာ သာမန်လူများသာ ဖြစ်ပြီး သူတို့၏ အခွင့်အရေးများမှာလည်း သေးငယ်လှသဖြင့် ရှုချွမ်း စိတ်မဝင်စားပေ။ အကြောင်းမှာ ထိုအရာများက ချီစုစည်းခြင်း ဒုတိယအဆင့်ရှိသော သူ့အတွက် ဘာမှ အထောက်အကူ မပြုနိုင်သောကြောင့် ဖြစ်သည်။

​သို့သော် ဇွဲရှိလျှင် အောင်မြင်မှု ရစမြဲပင်။

လူပေါင်းများစွာ၏ ဘဝဇာတ်ညွှန်းကို ဖတ်ပြီးနောက် သူ၏ အာရုံကို ဖမ်းစားနိုင်သူ တစ်ဦး ပေါ်လာခဲ့သည်။

​【အမည် - လန်ဖုန်း】

【ကျင့်ကြံခြင်း နယ်ပယ် - ချီစုစည်းခြင်း ပထမအဆင့်】

【ပါရမီ - အလွန် သာမန်】

【ကံကြမ္မာ - ဆေးပင် ကောင်လေး (အပြာရောင်)၊ အားနည်းသူကို နိုင်စားပြီး သန်မာသူကို ကြောက်ရွံ့သူ (အဖြူရောင်)】

【ဘဝဇာတ်ညွှန်း - ပိုက်ဆံပေးမည့်ကောင်လေး 】

【အခွင့်အရေး - ဒီနေ့မနက်တွင် မြို့အပြင်ဘက်ရှိ ‘လန်ဖုန်းချိုင့်ဝှမ်း’ ထဲမှ ကျောက်လှိုဏ်ဂူ တစ်ခုတွင် နှစ်ငါးရာသက်တမ်းရှိ ‘သန့်စင်ဝိညာဉ်မြက်’ ကို တွေ့ရှိခဲ့သည်။ ထို့နောက် သူက သူငယ်ချင်းငါးဦးကို ခေါ်ဆောင်ကာ ထိုမြက်ကို စောင့်ကြပ်နေသော သားရဲကို သတ်ဖြတ်ပြီး ဆေးမြက်ကို ခူးယူမည်။ ၎င်းကို ရောင်းချပြီးနောက် ယွမ်ကျောက်တုံး တစ်ထောင် ရရှိလိမ့်မည်】

​ဤလူကို တွေ့လိုက်ရချိန်တွင် ရှုချွမ်းအဖို့ အိပ်ငိုက်နေတုန်း ခေါင်းအုံး လာပေးသလို ခံစားလိုက်ရသည်။

သူက ယွမ်ကျောက်တုံးများ မည်သို့ ရှာရမည်ကို စဉ်းစားနေချိန် ဖြစ်သည်။

​‘ခန္ဓာကိုယ်သန့်စင်ခြင်း ဆေးရည်’ မှာ တန်ဖိုးကြီးသော်လည်း ၎င်းကို လူသိရှင်ကြား ထုတ်မရောင်းနိုင်ပေ။ အကြိမ်ကြိမ် ရောင်းချမိပါက မသမာသူများ၏ အာရုံစိုက်ခြင်းကို ခံရပေလိမ့်မည်။

ရှုချွမ်း၏ လက်ရှိ ကျင့်ကြံခြင်း အဆင့်နှင့်ဆိုလျှင် ဤဆေးနည်းကို ကာကွယ်နိုင်မည် မဟုတ်ဘဲ အသက်အန္တရာယ်ပင် ရှိနိုင်ပါသည်။

​ထို့ကြောင့် သူ၏ ကျင့်ကြံမှုအတွက် ယွမ်ကျောက်တုံး ရနိုင်မည့် အခြားနည်းလမ်းကို သူ ရှာနေခြင်း ဖြစ်သည်။

ထာဝရမြို့သို့ ရောက်ပြီး မကြာမီမှာပင် တစ်စုံတစ်ယောက်က သူ့တံခါးဝအထိ ယွမ်ကျောက်တုံးများ လာပို့ပေးလိမ့်မည်ဟု သူ မထင်ထားခဲ့ပေ

​ရှုချွမ်းက အချိန်မဆွဲတော့ဘဲ ချက်ချင်းပင် လှည့်ထွက်ကာ ‘လန်ဖုန်းချိုင့်ဝှမ်း’ ဆီသို့ ဦးတည် ပြေးသွားတော့သည်။

​လန်ဖုန်းချိုင့်ဝှမ်းက ထာဝရမြို့အပြင်ဘက်ရှိ အန္တရာယ်များသော နေရာတစ်ခု ဖြစ်ပြီး လန်ဖုန်းတောင်တန်း၏ အစွန်အဖျားတွင် တည်ရှိသည်။ ထိုတောင်တန်းတွင် မြင့်မားသော သစ်တောကြီးများရှိပြီး လမ်းခရီးမှာလည်း အလွန်ပင် ကြမ်းတမ်းလှသည်။

ထို့ပြင် ၎င်းအတွင်း၌ သားရဲအမြောက်အမြား နေထိုင်ကြသည်။ ထာဝရမြို့ရှိ သိုင်းပညာရှင်များက ယွမ်ကျောက်တုံးနှင့် လဲလှယ်ရန် ထိုနေရာသို့ သားရဲသွားရောက် အမဲလိုက်လေ့ ရှိကြသည်။

​မြင့်မြတ်နယ်မြေမှ တပည့်များသည်လည်း လေ့ကျင့်မှုများ ပြုလုပ်ရန် ထိုတောင်တန်းသို့ လာလေ့ရှိကြသည်။

လမ်းခရီးတွင် ရှုချွမ်းက သူနှင့် တွေ့သော ခန္ဓာကိုယ်သန့်စင်ခြင်းနယ်ပယ်ရှိ သားရဲများကို အလွယ်တကူပင် အနိုင်ယူ ခဲ့သည်။

​သူ၏ ချီစုစည်းခြင်းနယ်ပယ် ကျင့်စဉ်နှင့် ‘ရွှမ်းယန်ကျွယ်’ ၏ အစွမ်းကြောင့် ထိုသားရဲများကို တစ်ချက်တည်းနှင့် အပြတ်ရှင်းနိုင်ခဲ့သည်။

ရှုချွမ်း တွက်ကြည့်ရာ ချီစုစည်းခြင်း တတိယအဆင့်ရှိသော သားရဲကိုပင် သူ အနိုင်ယူနိုင်စွမ်း ရှိသည်။

ပဉ္စမအဆင့်ရှိသော သားရဲနှင့်ဆိုလျှင်ပင် သူ ခက်ခက်ခဲခဲ ခုခံနိုင်စွမ်း ရှိပါသည်။

​"ရောက်ပြီ"

​နောက်ဆုံးတွင် ရှုချွမ်းက လန်ဖုန်းချိုင့်ဝှမ်းသို့ ရောက်ရှိလာခဲ့သည်။

ဤနေရာမှာ ငှက်သံလေးများဖြင့် သာယာလှပြီး ပန်းနံ့များ သင်းပျံ့နေသော ချိုင့်ဝှမ်းတစ်ခု ဖြစ်သည်။ ချိုင့်ဝှမ်းထဲတွင် ချောက်ကမ်းပါး နက်ကြီး တစ်ခုရှိပြီး ရေတံခွန်တစ်ခုလည်း စီးဆင်းနေသည်။

​ဒဏ္ဍာရီများအရ ဤနေရာတွင် ‘ဖီးနစ်’ ငှက်တစ်ကောင် လာရောက် နားခိုခဲ့ဖူးသဖြင့် လန်ဖုန်းချိုင့်ဝှမ်းဟု အမည်တွင်ခဲ့ခြင်း ဖြစ်သည်။

ချိုင့်ဝှမ်းအတွင်းသို့ ကြည့်လိုက်သည့်အခါ ချောက်ကမ်းပါး တွင် ကျောက်လှိုဏ်ဂူ တစ်ခုကို သူ အမှန်တကယ်ပင် တွေ့လိုက်ရသည်။

ထိုချိုင့်ဝှမ်းတစ်ခုလုံးတွင် ထိုကျောက်လှိုဏ်ဂူ တစ်ခုတည်းသာ ရှိသည်။

​"သန့်စင်ဝိညာဉ်မြက်က အဲဒီပေါ်မှာ ရှိနေတာ ဖြစ်ရမယ်။ အဲဒီပေါ် ရောက်အောင် ဘယ်လိုတက်ရမလဲဆိုတာ ငါ စဉ်းစားရမယ်"

​ရှုချွမ်းက ခေတ္တမျှ လေ့လာကြည့်ပြီးနောက် ကျောက်လှိုဏ်ဂူထဲသို့ ခုန်တက်ရန် ပြင်လိုက်စဉ်မှာပင်...

​ရုတ်တရက် အန္တရာယ်အငွေ့အသက်တစ်ခုက သူ၏ ရင်ထဲသို့ တိုးဝင်လာခဲ့သည်။

​

အခန်း (၆) အဆင့်ကျော်ပြီး ကင်းခြေများသားရဲကို သတ်ဖြတ်ခြင်း

​ဘုန်း

​အန္တရာယ်ကို အလိုလိုသိလိုက်သဖြင့် ရှုချွမ်းက နောက်သို့ ခြေလှမ်းအနည်းငယ် ချက်ချင်း ဆုတ်လိုက်သည်။

ထို့နောက် သူရပ်ခဲ့သောနေရာက ပေါက်ကွဲထွက်သွားပြီး မြေကြီးများ လွင့်စင်ကာ အနက်ရောင် အရိပ်တစ်ခု ရုတ်တရက် ထွက်ပေါ်လာသည်။

တစ်ချိန်တည်းမှာပင် ပုပ်စော်နံသော အနံ့ဆိုးတစ်ခု ပျံ့နှံ့လာတော့သည်။

​ရှုချွမ်း ထိုအနံ့ကို ရှူမိသည်နှင့် ခေါင်းမူးသွားသည်။

​"အဆိပ်ပဲ"

​ရှုချွမ်း၏ မျက်နှာပျက်သွားပြီး သူက မူလချီ ဖြင့် နှာခေါင်းနှင့် ပါးစပ်ကို ချက်ချင်း ပိတ်လိုက်ကာ ထိုနေရာမှ အမြန် ခွာလိုက်သည်။

ထိုအခါမှ ရှုချွမ်းက သူ့ရှေ့မှ အရာကို သေချာ မြင်လိုက်ရသည်။

​ပေ ၂၀ မှ ၂၅ ပေခန့် ရှည်လျားပြီး ခြေထောက်ပေါင်းများစွာ ပါရှိသော ကင်းခြေများ သားရဲကြီးတစ်ကောင်က သူ့ကို စူးစိုက်ကြည့်နေသည်။

ပတ်ဝန်းကျင်ရှိ အဆိပ်ငွေ့များမှာ ၎င်း၏ ပါးစပ်ကြီးထဲမှ ထွက်ပေါ်နေခြင်း ဖြစ်သည်။

အကယ်၍ ရှုချွမ်းသာ ခုနက အန္တရာယ်ကို ကြိုတင် မသိခဲ့ပါက ယခုအချိန်တွင် ထိုကင်းခြေများကြီး၏ ပါးစပ်ထဲ ရောက်နေလောက်ပြီ ဖြစ်သည်။

​ဤကင်းခြေများ သားရဲကြီးမှ ထွက်ပေါ်နေသော အော်ရာမှာ ရှုချွမ်း ယခင်က တွေ့ခဲ့ဖူးသော သားရဲများအားလုံးထက် ပိုမို ပြင်းထန်သည်။

၎င်း၏ နီရဲသော မျက်လုံးတစ်စုံမှ သတ်ဖြတ်လိုသော အငွေ့အသက်များ အထင်အရှား ပေါ်လွင်နေသည်။

ရှုချွမ်းသာ ရှေ့သို့ တစ်လှမ်းတိုးလိုက်ပါက ၎င်းသည် သေချာပေါက် တိုက်ခိုက်တော့မည် ဖြစ်သည်။

​"အနည်းဆုံးတော့ ချီစုစည်းခြင်း တတိယအဆင့် သားရဲပဲ၊ ဒါထက်လည်း ပိုနိုင်သေးတယ်"

​ရှုချွမ်းက ၎င်း၏ အော်ရာကို ဂရုတစိုက် ခံစားကြည့်ပြီးနောက် သားရဲ၏ အစွမ်းကို ချက်ချင်း သိလိုက်သဖြင့် သူ၏ မျက်နှာမှာ တည်ကြည်သွားသည်။

ဒါဟာ အပြင်ဘက်က ‘ခန္ဓာကိုယ်သန့်စင်ခြင်းနယ်ပယ်’ သားရဲလေးတွေလို မဟုတ်ပေ။

ဒါက အစစ်အမှန် ‘ချီစုစည်းခြင်းနယ်ပယ်’ သားရဲဖြစ်ပြီး ရှုချွမ်းထက်ပင် ကျင့်ကြံခြင်း အဆင့် မြင့်မားနေသည်။

​သို့သော် ရှုချွမ်းမှာ ကြောက်ရွံ့ခြင်း မရှိပေ။

ထိုအစား သူ၏ ရင်ထဲတွင် တိုက်ခိုက်လိုစိတ်များ ပြင်းထန်စွာ ပေါ်ပေါက်လာသည်။

ချီစုစည်းခြင်းနယ်ပယ်သို့ ရောက်ရှိလာပြီးနောက် ရှုချွမ်းက ပြိုင်ဘက်ကောင်း မျိုးနှင့် မတွေ့ရသေးပေ။

ဤကင်းခြေများကြီးက သူ၏ စွမ်းအားကို စမ်းသပ်ရန် အကောင်းဆုံး ပြိုင်ဘက်ပင် ဖြစ်သည်။ ၎င်းကို အနိုင်ယူနိုင်ပါက နောင်တွင် ရန်သူများနှင့် ရင်ဆိုင်ရချိန်တွင် သူ ပို၍ ယုံကြည်မှု ရှိလာပေလိမ့်မည်။

​အားသာချက်၊ အားနည်းချက်များကို တွက်ချက်ပြီးနောက် ရှုချွမ်းက စတင် လှုပ်ရှားရန် ပြင်လိုက်သည်။

စကားပုံတစ်ခု ရှိသည် မဟုတ်ပါလား... လက်ဦးသူက အသာရစမြဲပင်။

​ရှုချွမ်းက နောက်ခြေဖြင့် အရှိန်ယူကာ မြေပြင်ကို ကန်လိုက်ရာ မြေကြီးမှာ ချက်ချင်းပင် ကျင်းကြီးတစ်ခု ဖြစ်သွားသည်။

ထိုအရှိန်ကို အသုံးပြု၍ ရှုချွမ်းက လူသားဒုံးပျံတစ်စုံအလား ကင်းခြေများကြီးထံသို့ ပြေးဝင်သွားတော့သည်။

​​ရှုချွမ်း ပြေးဝင်လာသည်ကို မြင်သောအခါ ကင်းခြေများကြီးက ဟိန်းဟောက်လိုက်ပြီး အနက်ရောင် အရိပ်တစ်ခုအဖြစ် ပြောင်းလဲကာ ရှုချွမ်းထံသို့ ခုန်အုပ်လိုက်သည်။

အဆိပ်ငွေ့များ ပါဝင်သော လေပြင်းတစ်ခုက ရှုချွမ်းထံသို့ တိုးဝင်လာသည်။

ရှုချွမ်းမှာ မရှောင်တိမ်းဘဲ ကင်းခြေများကြီး၏ ဦးခေါင်းကို လက်သီးဖြင့် တိုက်ရိုက် ထိုးနှက်လိုက်သည်။

​ဘန်း

​လူနှင့် သားရဲ ထိပ်တိုက်တွေ့ဆုံချိန်တွင် မည်သူမျှ အသာမရဘဲ နှစ်ဦးစလုံး နောက်သို့ လွင့်စင်သွားကြသည်။

ရှုချွမ်းက သူ၏ လက်သီးဖြင့် သံပြားကြီးကို ထိုးမိသလို ခံစားလိုက်ရပြီး တုံ့ပြန်လာသော အရှိန်ကြောင့် သူ၏ လက်မောင်းမှာ ထုံကျဉ်သွားသည်။

​"ချီစုစည်းခြင်း တတိယအဆင့် အထွတ်အထိပ်ပဲ၊ စတုတ္ထအဆင့်ကို တက်ဖို့ ခြေတစ်လှမ်းပဲ လိုတော့တာကိုး... မရိုင်းတာပဲ ဆန်းတယ်"

" ဒီ ‘သန့်စင်ဝိညာဉ်မြက်’ က ဒီသားရဲ အဆင့်တက်ဖို့အတွက် အဓိက သော့ချက် ဖြစ်ရမယ်"

​တစ်ချက်တည်းနှင့်ပင် ရှုချွမ်းက ကင်းခြေများကြီး၏ အစွမ်းကို ခန့်မှန်းမိသွားသည်။

ရှုချွမ်း၏ လက်သီးဒဏ်ကို ခံလိုက်ရသော ကင်းခြေများကြီးမှာလည်း သိပ်မဟန်ပေ။ ၎င်း၏ ဦးခေါင်းပေါ်ရှိ အကြေးခွံများမှာ ကွဲအက်သွားပြီး အစိမ်းရောင် သွေးအချို့ ထွက်လာသည်။

ထိုသွေးများ မြက်ပင်ပေါ်သို့ ကျသွားသည်နှင့် အဖြူရောင် အခိုးအငွေ့များ ထွက်လာပြီး မျက်စိတစ်မှိတ်အတွင်းမှာပင် မြက်ပင်များမှာ အရည်ပျော်သွားတော့သည်။

​"တကယ့်ကို အဆိပ်ပြင်းတဲ့ သားရဲပဲ"

​သားရဲသွေး၏ အဆိပ်ပြင်းပုံကို မြင်လိုက်ရသည့်အခါ ရှုချွမ်းပင် အံ့ဩသွားမိသည်။

ရှုချွမ်းက ပို၍ သတိထားရန် ပြင်လိုက်သည်။ ဤအရာနှင့် ထိတွေ့မိပါက မလွယ်ကူလှပေ။

​ကင်းခြေများကြီးမှာလည်း ရှုချွမ်း၏ တိုက်ခိုက်မှုကြောင့် အကြီးအကျယ် ဒေါသထွက်နေသော်လည်း ဦးခေါင်းမှ ဒဏ်ရာကြောင့် ထိပ်တိုက် ထပ်မံတွေ့ဆုံရန် ဝန်လေးနေသည်။

ထို့ကြောင့် ၎င်းက ပါးစပ်ကို ဟကာ ရှုချွမ်းထံသို့ အနက်ရောင် အဆိပ်ငွေ့များကို မှုတ်ထုတ်လိုက်တော့သည်။

​ရှုချွမ်းမှာ အမြန် ရှောင်တိမ်းလိုက်ရသည်။

အဆိပ်ငွေ့များ မြေပြင်ပေါ်သို့ ကျသွားသည့်အခါ မြေကြီးမှာ ကျင်းအသေးလေးများ ဖြစ်သွားသည်။

ပစ်မှတ်ကို မထိမှန်သဖြင့် ကင်းခြေများကြီးမှာ ပို၍ ဒေါသထွက်လာပြီး အဆိပ်ငွေ့များကို ဆက်တိုက် မှုတ်ထုတ်နေတော့သည်။

​ရှုချွမ်းအဖို့ ရှောင်တိမ်းနေရုံမှအပ အခြားမရှိပေ။

ခဏအတွင်းမှာပင် မြေပြင်ပေါ်၌ အဆိပ်ငွေ့များကြောင့် ဖြစ်ပေါ်လာသော ကျင်းပေါင်းများစွာ ရှိနေပြီ ဖြစ်သည်။

​"တောက်... မင်းက ငါ့ကို အကွက်ဆင်နေတာလား"

​ရှုချွမ်း၏ မျက်နှာမှာ မည်းမှောင်သွားသည်။ ဤသားရဲမှာ အလွန်ပါးနပ်လှပြီး အဆိပ်ငွေ့များကိုသာ ဆက်တိုက် မှုတ်ထုတ်နေသဖြင့် သူ ပြန်လည် တိုက်ခိုက်ရန် အခွင့်အရေး မရဘဲ ဖြစ်နေသည်။

ကံကောင်းထောက်မစွာဖြင့် မကြာမီမှာပင် ကင်းခြေများကြီးမှာ အားကုန်သွားပြီး အဆိပ်ငွေ့များကို ထပ်မံ မမှုတ်ထုတ်နိုင်တော့ပေ။

၎င်းက ရှုချွမ်းကို မျက်လုံးပြူးကြည့်ကာ ရှူးရှူးရှဲရှဲ အသံများသာ ပြုလုပ်နိုင်တော့သည်။

၎င်းမှာ ရှုချွမ်းကို အနားမကပ်ရန် သတိပေးနေခြင်း ဖြစ်ပုံရသည်။

​သေချာတာပေါ့... ရှုချွမ်းကတော့ ဒါကို ဂရုမစိုက်ပေ။

​"မင်း အဆိပ်မမှုတ်နိုင်တော့ရင် ငါ့အလှည့် ရောက်ပြီပေါ့"

​မျက်စိတစ်မှိတ်အတွင်းမှာပင် ရှုချွမ်းက ရှေ့သို့ ခြေလှမ်းအနည်းငယ် ချက်ချင်း တိုးလိုက်ပြီး ကင်းခြေများကြီး၏ ရှေ့သို့ ရောက်သွားကာ ၎င်း၏ အစွယ်များကို လက်သီးဖြင့် အားရပါးရ ထိုးနှက်လိုက်သည်။

ပေါင်တစ်သောင်းခန့်ရှိသော အော်ရာများ ပေါက်ကွဲထွက်လာသည်။

​ဘန်း

​မွဲပြာသောအသံနှင့်အတူ ကင်းခြေများကြီး၏ အစွယ်များမှာ တိုက်ရိုက် ကျိုးပြတ်သွားတော့သည်။

​"အား"

​ပြင်းထန်လှသော နာကျင်မှုကြောင့် ကင်းခြေများကြီးမှာ ရူးသွပ်စွာ အော်ဟစ်တော့သည်။

သားရဲကြီး ဒဏ်ရာရသွားသည်ကို မြင်သောအခါ ရှုချွမ်းက အခွင့်အရေးကို လက်မလွှတ်ပေ။

သူ၏ လက်နှစ်ဖက်လုံးကို မူလချီဖြင့် ဝန်းရံလိုက်ပြီး လက်သီးကို တင်းတင်းဆုပ်ကာ ကင်းခြေများကြီး၏ ကိုယ်ခန္ဓာကို အားကုန် ထိုးဖောက်လိုက်သည်။

​နာကျင်နေသော ကင်းခြေများကြီးမှာ ခေါင်းကို လှည့်ကာ ရှုချွမ်း၏ ဦးခေါင်းကို ကိုက်ရန် ကြိုးစားသည်။

ရှုချွမ်းမှာ ရှောင်တိမ်းလိုက်ပြီးနောက် သူ၏ လက်ကို ပြန်ဆွဲထုတ်ကာ ကင်းခြေများကြီး၏ အမြီးကို ကိုင်ပြီး ဘေးပတ်ဝန်းကျင်ရှိ ကျောက်တောင်နံရံများနှင့် ပြင်းထန်စွာ ရိုက်ပုတ်တော့သည်။

ကျောက်တုံးများ လွင့်စင်လာပြီး အစိမ်းရောင်သွေးများ ပျံ့နှံ့သွားသည်။

​ကင်းခြေများကြီးမှာ ပြန်လည် ခုခံနိုင်စွမ်း မရှိတော့ဘဲ ရှုချွမ်း၏ လက်ထဲတွင် အရုပ်တစ်ခုလို ဖြစ်နေပြီး တောင်နံရံနှင့် ဆောင့်မိနေတော့သည်။

ရှုချွမ်းက အကြိမ်ပေါင်းများစွာ ဆောင့်မိပြီးနောက် ချွေးများ ရွှဲနစ်လာခဲ့သည်။

ကင်းခြေများကြီးမှာ အသက်ငင်နေပြီဟု ခံစားရမှသာ သူ ရပ်လိုက်တော့သည်။

အခွင့်အရေးကို အသုံးချကာ ရှုချွမ်းက ကင်းခြေများကြီး၏ ဦးခေါင်းကို လက်သီးဖြင့် ထိုးလိုက်ရာ ဦးခေါင်းမှာ ပေါက်ကွဲထွက်သွားသည်။

​ထို့နောက် သူက ၎င်း၏အတွင်းမှ 'သားရဲအူတိုင် ' ကို ထုတ်ယူလိုက်ပြီး သားရဲအလောင်းကို ဘေးသို့ ပစ်ချလိုက်သည်။

ထိုအခါမှသာ ကျောက်တုံးတစ်တုံးပေါ်တွင် ထိုင်ကာ အနားယူတော့သည်။

​သူက ချီစုစည်းခြင်း ဒုတိယအဆင့် ရောက်နေပြီ ဖြစ်သော်လည်း အဆင့်ကျော် တိုက်ခိုက်ရခြင်းမှာ သူ့အတွက် အင်အားအတော် ကုန်ဆုံးစေသည်။

ထို့ပြင် ဤသားရဲ၏ အကြေးခွံများမှာ အလွန်မာကျောပြီး တစ်ကိုယ်လုံးမှာလည်း အဆိပ်ပြင်းလှသဖြင့် ရှုချွမ်းမှာ တိုက်ခိုက်တိုင်း သူ၏ လက်ကို ကာကွယ်ရန် မူလချီ အမြောက်အမြား အသုံးပြုခဲ့ရသည်။

ထို့ကြောင့် ဤတိုက်ပွဲမှာ အလွန် ခက်ခဲခဲ့ခြင်း ဖြစ်သည်။

​ဒါက 'ရွှမ်းယန်ကျွယ်' ကြောင့် မူလချီ အမြောက်အမြား ရရှိခဲ့ခြင်းကြောင့်သာ ဖြစ်သည်။

အကယ်၍ သာမန် ချီစုစည်းခြင်း ဒုတိယအဆင့် သိုင်းသမားသာဆိုလျှင် ဤသားရဲ၏ အနိုင်ကျင့်ခြင်းကို အကြီးအကျယ် ခံရမှာ သေချာသည်။

​ကံကောင်းထောက်မစွာဖြင့် ရလဒ်မှာ အလွန် ကောင်းမွန်ခဲ့သည်။

ရှုချွမ်းက သူ့ အစွမ်းမှာ မည်မျှအထိ ရှိသည်ကို သိသွားခဲ့ပြီး သူ့ကိုယ်သူ ပို၍ ယုံကြည်မှု ရှိလာသည်။

သာမန် ချီစုစည်းခြင်း တတိယအဆင့်မှာ သူ့ကို ယှဉ်နိုင်မည် မဟုတ်ပေ။ စတုတ္ထအဆင့်နှင့်ဆိုလျှင်လည်း သူ ယှဉ်ပြိုင်နိုင်စွမ်း ရှိပြီး ပဉ္စမအဆင့်နှင့်ဆိုလျှင်လည်း အနိုင်မရရင်တောင် သူ ထွက်ပြေးနိုင်စွမ်း ရှိပါသည်။

​သို့သော် ဤတိုက်ပွဲကြောင့် ပြဿနာအချို့ကိုလည်း သူ သိမြင်သွားသည်။

ဒါကတော့ သူ၏ တိုက်ခိုက်မှု နည်းလမ်းများမှာ နည်းပါးလွန်းနေခြင်းပင်။

လက်သီးနှင့် ခြေထောက်အပြင် သူသာ သိုင်းကွက် တစ်ခုခု သို့မဟုတ် လက်နက်ကောင်းတစ်ခုခု ရှိမည်ဆိုပါက ဤတိုက်ပွဲမှာ ဤမျှ ခက်ခဲမည် မဟုတ်ပေ။

​သိုင်းကွက်များကို လေ့ကျင့်ရန် သူ အချိန်ရှာရဦးမည်။

ဝမ်ပေါင်မျှော်စင်တွင် သူ ဝယ်ယူထားသော ‘အနီရောင်သွေးဓားသိုင်း’ ကလည်း ရှိနေသည် မဟုတ်ပါလား။

၎င်းမှာ သေမျိုး အဆင့် အလယ်အလတ်သာ ဖြစ်သော်လည်း လက်ဗလာနှင့် တိုက်ခိုက်ခြင်းထက်စာလျှင် ပို၍ ကောင်းမွန်ပါသည်။

​နောက်ထပ် ရရှိလိုက်သည့်အရာမှာ ဤသားရဲ၏ ‘သားရဲအူတိုင်’ ပင် ဖြစ်သည်။

ခန္ဓာကိုယ်သန့်စင်ခြင်းနယ်ပယ် သားရဲများနှင့် မတူဘဲ ချီစုစည်းခြင်းနယ်ပယ် သားရဲများက သူတို့၏ ခန္ဓာကိုယ်အတွင်း၌ သားရဲအူတိုင် များ ဖြစ်ပေါ်စေနိုင်သည်။

​ဤသားရဲအူတိုင် မှာ သားရဲ၏ အဆီအနှစ်ဖြစ်ပြီး သိုင်းသမားများအတွက် အလွန် အသုံးဝင်သည်။

၎င်းထဲတွင် သားရဲစွမ်းအားများ ပါဝင်နေသဖြင့် သိုင်းသမားများ တိုက်ရိုက် စုပ်ယူ၍ မရသော်လည်း မြို့ရှိ သားရဲအူတိုင် များ ဝယ်ယူသော ဆိုင်များတွင် ရောင်းချနိုင်ပါသည်။

​ဤကဲ့သို့သော တတိယအဆင့် သားရဲ၏ သားရဲအူတိုင် မှာ ယွမ်ကျောက်တုံး ၃၀၀ ခန့် ရနိုင်သည်ဟု ခန့်မှန်းရသည်။

ထို့ပြင် ဤသားရဲအူတိုင် ကို အသုံးပြု၍ သိုင်းသမားများအတွက် အထောက်အကူဖြစ်စေသော ဆေးလုံးများကိုလည်း ဖော်စပ်နိုင်ပါသည်။

​ဥပမာအားဖြင့် ချီစုစည်းခြင်းနယ်ပယ် သိုင်းသမားများအတွက် အသုံးဝင်သော ‘ချီတည်မြဲခြင်း ဆေးလုံး’ များ၏ အဓိကကုန်ကြမ်းမှာ ဤသားရဲအူတိုင် များ ဖြစ်သည်။

သားရဲအူတိုင် အဆင့်မြင့်လေ၊ ဖော်စပ်လိုက်သော ဆေးလုံး၏ အာနိသင်မှာ ပို၍ ကောင်းမွန်လေ ဖြစ်သည်။

‘ချီတည်မြဲခြင်း ဆေးလုံး’က ချီ စုပ်ယူမှုနှုန်းကို မြန်ဆန်စေပြီး အခြေခံကို ခိုင်မာစေရန် အထောက်အကူပြုသည်။

​ထို့ပြင် ဤသားရဲ၏ အကြေးခွံများသာ ပျက်စီးမသွားပါက ချပ်ဝတ် ပြုလုပ်ရန် အလွန်ကောင်းမွန်သော ပစ္စည်းများ ဖြစ်နေပေလိမ့်မည်။

နှမြောစရာကောင်းသည်မှာ ရှုချွမ်း၏ တိုက်ခိုက်ပုံမှာ ကြမ်းတမ်းလွန်းသဖြင့် ကင်းခြေများကြီး၏ အကြေးခွံများမှာ အပေါက်အပြဲများ ဖြစ်ကုန်ပြီး တန်ဖိုးမရှိတော့ခြင်းပင်။