အခန်း (၂၅၁၇-၂၅၁၈)

အပိုင်း(၂၅၁၇)

တစ်ပိုင်းတစ်စ အမှန်တရားများနှင့် ဝေဝါးသော မသေချာမရေရာမှုများသည် အာရုဏ်ဦး မိုးကုပ်စက်ဝိုင်း မျှော်စင် အတွက် ဆိုးရွားသည့် ဇာတ်ကြောင်းတစ်ခုအဖြစ်သို့ ဦးတည်သွားစေခဲ့သည်။ အစွမ်းကုန် သန့်စင်ခြင်း ဂလက်ဆီ ၏ လှပစင်ကြယ်လှသော အဂ္ဂိရတ် တာအို ၏ အစိတ်အပိုင်းတစ်ခု ဖြစ်လာရန် ၎င်းတို့၏ အရည်အချင်းများနှင့် ပတ်သက်၍ မေးခွန်းထုတ်စရာ ဖြစ်လာခဲ့သည်။

ဝေ့ဝူယင် တံခါးပိတ်ကျင့်ကြံမှု စတင်ပြီး ဒုတိယလ မတိုင်မီမှာပင် အာရုဏ်ဦး မိုးကုပ်စက်ဝိုင်း မျှော်စင် နှင့် အရောင်းအဝယ် ကိစ္စရပ်များ အားလုံးကို ရပ်ဆိုင်းလိုက်ကြပြီး၊ အာရုဏ်ဦး အဂ္ဂိရတ် ရှန့်ထို ကိုယ်တိုင်နှင့် စကားပြောဆိုရန် ကြိုးပမ်းလာခဲ့ကြသည်။

သို့ရာတွင် လော့နင် သည် နစ်မြုပ်ဟင်းလင်းပြင် ချောက်ကမ်းပါး အတွင်း ပိတ်မိနေဆဲဖြစ်ပြီး၊ ချောင်စွေ့ဖုန်း မှာလည်း ပုန်းရှောင်နေခဲ့သည်။ ဝေ့ဝူယင် နှင့် ဆက်စပ်နေသူများ အားလုံးသည် အာရုဏ်ဦး မိုးကုပ်စက်ဝိုင်း မျှော်စင် အတွင်း၌သာ ပုန်းအောင်းနေခဲ့ကြသည်။

နှလုံးသားများနှင့် စိတ်အာရုံများအတွင်း၌ ဆူပွက်နေသော ဒေါသတရားများ စတင်ဖြစ်ပေါ်လာခဲ့သည်။ တုံ့ပြန်မှု မရှိခြင်းက အပြစ်ရှိကြောင်း သက်သေပြနေခြင်းလော။

သူခိုးယူထားသော ခန္ဓာကိုယ်၏ မူလပိုင်ရှင်သည် ကောင်းကင်ရှန့်ထို အဂ္ဂိရတ် ပညာရှင် တစ်ဦး ဖြစ်လာပြီးနောက်၊ အဂ္ဂိရတ် တာအို ၏ ခိုင်မာသော ဆန္ဒကို ရရှိကာ ထိန်းချုပ်မှုအတွက် ပြန်လည်တိုက်ခိုက်နေပြီး ထိုအခြေအနေမှ ရုန်းမထွက်နိုင်ဘဲ ဖြစ်နေခြင်းများလော။

သို့တည်းမဟုတ်... သူက ထိုတိုက်ပွဲတွင် ရှုံးနိမ့်သွားခဲ့ခြင်း ဖြစ်နိုင်မည်လော။

ခန့်မှန်းချက်များ၊ ကောလာဟလများ၊ အခြေအမြစ်မရှိသော ကောက်ချက်ချမှုများနှင့် သံသယအတွေးများသည် ကြားသိရသူတိုင်း၏ နှလုံးသားများနှင့် စိတ်အာရုံများကို လောင်ကျွမ်းစေခဲ့သည်။ အာရုဏ်ဦး မိုးကုပ်စက်ဝိုင်း မျှော်စင် ကို ဂလက်ဆီ မှ နှင်ထုတ်ရန် အသံတစ်ခုပင် ထွက်ပေါ်လာခဲ့သည်။

အာရုဏ်ဦး အင်ပါယာ တွင် သေမျိုး တစ်ဦးအနေဖြင့် လောကရှန့်ထို အဂ္ဂိရတ် ပညာရှင် တစ်ဦး ဖြစ်လာခဲ့သော အတုမရှိ ပါရမီရှင် အဂ္ဂိရတ် ပညာရှင် တစ်ဦး အမှန်တကယ် ရှိခဲ့ကြောင်းကို မိုးကုပ်စက်ဝိုင်း လောကပြောင်းလဲခြင်း က အတည်ပြုပေးလိုက်ပြီးနောက် ဤအသံသည် ဆက်လက် ကြီးထွားလာခဲ့သည်။

ဂလက်ဆီ တစ်ဝန်းလုံးတွင် အကြီးကျယ်ဆုံးသော ဆူပူအုံကြွမှုကြီးတစ်ခု ပေါက်ကွဲထွက်ပေါ်လာခဲ့သည်။ မိုးကုပ်စက်ဝိုင်း လောကပြောင်းလဲခြင်း ၏ စကားများသည် အာရုဏ်ဦး အဂ္ဂိရတ် ရှန့်ထို က တစ်စုံတစ်ဦးကို ဝင်ရောက်ပူးကပ်ထားကြောင်း အတည်မပြုပေးခဲ့သော်လည်း၊ ထိုအတွေးသည် လူတိုင်း၏ စိတ်ထဲတွင် ကိန်းအောင်းနေခဲ့ပြီဖြစ်ပြီး၊ ကြီးမားသော အာဟာရဓာတ်ဖြင့် အညှောက်ပေါက်လာကာ၊ ထိုကဲ့သို့ စက်ဆုပ်ရွံရှာဖွယ်ကောင်းသော လုပ်ရပ်အတွက် ကောင်းကင်ကြီး၏ ဒေါသတရားကို လှုံ့ဆော်ပေးလိုက်လေသည်။

ဝင်ပူးခြင်း...

၎င်းသည် ရှားပါးသော်လည်း၊ အချို့သော အခြေအနေများတွင် ဖြစ်နိုင်ခြေရှိပေသည်။ အကယ်၍ တွေ့ရှိထားသည့် ပဟေဠိများကို ဆက်စပ်ကြည့်မည်ဆိုပါက၊ လျှို့ဝှက် အင်အား နှင့် အဂ္ဂိရတ် တာအို ၏ လောကရှန့်ထို အဂ္ဂိရတ် ပညာရှင် အဆင့် အသိအမှတ်ပြုမှုတို့က၊ အမည်ပေးပုံစံပင် ပြောင်းလဲသွားသော ဤ အာရုဏ်ဦး အရှင်သခင် ၏ ခန္ဓာကိုယ်သည် ဝင်ပူးခံရမှုကြောင့် သူ၏ တက်လှမ်းခြင်း ကျရှုံးခဲ့ရသော အဂ္ဂိရတ် တာအို ၏ အတုမရှိ သေမျိုး ပါရမီရှင်ဖြစ်ကြောင်း အတည်ပြုပေးသကဲ့သို့ ဖြစ်နေခဲ့သည်။

အရာအားလုံးသည် အချိတ်အဆက်မိမိဖြင့် အဓိပ္ပာယ်ရှိလာခဲ့သည်။ ရှင်းလင်းချက် အတွက် တောင်းဆိုမှုများသည် ကျယ်လောင်စွာ ထွက်ပေါ်လာခဲ့သည်။ သူတို့သည် မိုးကုပ်စက်ဝိုင်းများ ကို တောင်းဆိုခဲ့ကြသည်။ သူတို့သည် အဂ္ဂိရတ် ပညာရှင်များကို တောင်းဆိုခဲ့ကြသည်။

မည်သည့် အဂ္ဂိရတ် ပညာရှင်ကိုမဆို… အဂ္ဂိရတ် ပညာရှင်များ အားလုံးကိုပင်။

တရားမျှတမှုကို ရှာဖွေပါ။ ပါရမီရှင်ကို ကယ်တင်ပါ။

ဝေ့ဝူယင် တံခါးပိတ်ကျင့်ကြံပြီးနောက် နှစ်လခွဲခန့်အကြာ… အစစ်အမှန် လျှို့ဝှက် အာဏာရှင် တစ်ပါးဖြစ်သော လျှို့ဝှက် ဝိညာဉ် အဆင့် ကျင့်ကြံသူ တစ်ဦးအဖြစ် တက်လှမ်းပြီးနောက် ကြီးမားလှသော ပေါင်းစပ်သွင်းယူမှုများကို ခံယူနေချိန်တွင်၊ အာရုဏ်ဦး မိုးကုပ်စက်ဝိုင်း မျှော်စင် သည် ကျင့်ကြံသူများ၏ ဝန်းရံခြင်းကို ခံလိုက်ရလေသည်။

၎င်းတို့အထဲတွင် အထွတ်အထိပ် သူတော်စင်များ ပင် ပါဝင်နေခဲ့သည်။

အာရုဏ်ဦး မိုးကုပ်စက်ဝိုင်း မျှော်စင်သည် လျှို့ဝှက်အဆင့် ကုန်ကြမ်းပစ္စည်းများဖြင့် သွန်းလုပ်ထားပြီး အစီအရင်များဖြင့် ခိုင်ခံ့စေထားသည့် မူလအာရုဏ်ဦး နန်းတော် ပင်ဖြစ်သည်။

၎င်းသည် မဟာအစီအရင်ကြီးတစ်ခု၏ ဗဟိုချက်အဖြစ် တည်ရှိနေပြီး နတ္ထိနယ်မြေဆီသို့ ဦးတည်ရာ တံခါးပေါက်ကြီးတစ်ခုအဖြစ်လည်း ဆောင်ရွက်နေပေသည်။

ထိုနေရာသည် ကောင်းကင်သန့်စင်ခြင်း ဂလက်ဆီဇုံ၏ နယ်နိမိတ်အစွန်အဖျားကို အနည်းငယ် ကျော်လွန်နေပြီး၊ မူလကတည်းက ဒေသဆိုင်ရာ တားမြစ်နယ်မြေတစ်ခုအဖြစ် သီးခြားရပ်တည်နေခဲ့ခြင်း ဖြစ်သည်။

ခမ်းနားထည်ဝါသော ထိုနန်းတော်ကြီးတွင် ငွေရောင်၊ မီးခိုးရောင်၊ အနက်ရောင်နှင့် အဖြူရောင်တို့ကို အဓိကအဆင်းအရောင်အဖြစ် ခြယ်သထားပြီး အဂ္ဂိရတ် တာအို၏ အရောင်များကိုမူ ဒုတိယအဆင်းအဖြစ် ပေါင်းစပ်ထား၏။

ထို့အပြင် ၎င်းသည် အာရုဏ်ဦး အဂ္ဂိရတ်မျိုးဆက်၏ အမှတ်အသား မီးရှူးတိုင်ကြီးပမာ တည်ရှိနေပြီး၊ ကြီးမားလှသော အရွယ်အစားနှင့် ကြည်လင်တောက်ပသည့် အလင်းတန်းများ ဖြာထွက်နေမှုတို့ကြောင့် ကြယ်တာရာ ကောင်းကင်ယံထက်၌ အလွန်ပင် ထင်ရှားပေါ်လွင်လှပေသည်။

ယခုအခါတွင်မူ ထိုနန်းတော်ကြီးကို အစွမ်းကုန် သန့်စင်ခြင်း မြူခိုးများက ရစ်သိုင်းဖုံးလွှမ်းထားပြီး နန်းတော်ကို ကာကွယ်စောင့်ရှောက်ထားပေသည်။

ပုံမှန်အားဖြင့်ဆိုလျှင် ဤကာကွယ်မှုမျိုးသည် အသုံးမဝင်သလို စွမ်းအားလည်း ကင်းမဲ့နေမည်ဖြစ်သော်လည်း၊ အစွမ်းကုန် သန့်စင်ခြင်း မြူခိုးများ သို့မဟုတ် အဂ္ဂိရတ်ဖြစ်စဉ်များကို ဖျက်ဆီးခြင်းမှာ အစွမ်းကုန် သန့်စင်ခြင်း ဂလက်ဆီရှိ မိုးကုပ်စက်ဝိုင်းများ ချမှတ်ထားသော စည်းမျဉ်းများကို ပြင်းထန်စွာ ချိုးဖောက်ရာရောက်နေပေသည်။

ယင်းသည် အဂ္ဂိရတ်ပညာရှင်များအတွက် သွယ်ဝိုက်သောနည်းဖြင့် အကာအကွယ်ပေးသည့် အသက်ကယ် အဆောင်လက်ဖွဲ့တစ်ခု ဖြစ်ကာ၊ အကူအညီတောင်းခံခြင်းနှင့် သေဘေးမှ ကင်းလွတ်ခွင့်ရစေရန် အထောက်အကူ ပြုနေခြင်းပင် ဖြစ်သည်။

ထိုကဲ့သို့ အကူအညီတောင်းခံသည့် အခြေအနေမျိုးကို မိုးကုပ်စက်ဝိုင်းများ၏ သက်ဆိုင်ရာ စံအိမ်အသီးသီးမှ အလွယ်တကူ အာရုံခံမိနိုင်ပြီး စုံစမ်းစစ်ဆေးရန် တရားဥပဒေ ထိန်းသိမ်းသူများကို စေလွှတ်လေ့ရှိသည်။

အကယ်၍ စည်းမျဉ်းများကို ချိုးဖောက်ကြောင်း စစ်ဆေးတွေ့ရှိပါက၊ အထူးသဖြင့် အဂ္ဂိရတ် ဝိညာဉ် ပိုင်ဆိုင်ထားသော အဂ္ဂိရတ်ပညာရှင် (သို့မဟုတ်) အဂ္ဂိရတ် တာအို၏ အသိအမှတ်ပြုခြင်းကို ရရှိထားသူများကို သတ်ဖြတ်မိပါက သေဒဏ်အထိ ပြင်းထန်သော ပြဿနာပေါင်း သောင်းခြောက်ထောင်နှင့် ရင်ဆိုင်ရမည် ဖြစ်သည်။

အတိတ်က ဝေ့ဝူယင်သည် အထွတ်အထိပ် သူတော်စင်များကို တားဆီးကာ စုရီ အရိုးပြာ နယ်မြေဆီသို့ ထွက်ပြေးလွတ်မြောက်ရန် အချိန်ဆွဲပေးနိုင်ရေးအတွက် ဤစည်းမျဉ်းကိုပင် အလွဲသုံးစား ပြုလုပ်ခဲ့ဖူးသည်။ဤအချက်က မိုးကုပ်စက်ဝိုင်းများ ကိုယ်တိုင်ပင်လျှင် သူတို့ချမှတ်ထားသော စည်းမျဉ်းများကို တင်းကျပ်စွာ လိုက်နာကြကြောင်း သက်သေပြနေခဲ့သည်။

ယခုအခြေအနေသည်လည်း ခြွင်းချက်မဟုတ်ပေ။ အထွတ်အထိပ် သူတော်စင် ဖြစ်စေ၊ မဖြစ်စေ ရောက်ရှိလာသူ အားလုံးသည် ဤပါးလွှာလှသော အကာအကွယ်လေး၏ တားဆီးခြင်းကို ခံခဲ့ရသည်။ သို့ရာတွင် အဆိုပါဖြစ်စဉ်များ ဆက်လက်တည်ရှိနေရန်အတွက် အသန့်စင်ဆုံး မြူခိုးများကို လိုအပ်လှသဖြင့် ပုံမှန်အားဖြင့် အချိန်အတိုင်းအတာ တစ်ခုအထိသာ ခံနိုင်ရည်ရှိပေသည်။

ဤအထူးဖြစ်စဉ်သည် အသန့်စင်ဆုံး မြူခိုးများကြောင့် အသက်ဝင်နေခြင်းဖြစ်သည်။ သို့ဖြစ်၍ ၎င်းဆက်လက်တည်ရှိနိုင်မည့် အချိန်မှာ အကန့်အသတ်ရှိလှပေသည်။ အလွန်တရာကို ကန့်သတ်ချက် ရှိနေခြင်းပင်။ မှန်ပေသည်။ ထိုအရာက ပုံမှန် စံနှုန်းများ အတွက်သာပင်။

ဝေ့ဝူယင် ရှေးဟောင်းအပျက်အစီးများဆီသို့ ထွက်ခွာသွားပြီး နှစ်လခွဲအကြာတွင်၊ အင်အားစုအသီးသီးသည် ကြယ်များကိုပင် ချေမှုန်းနိုင်မည့် အဟုန်ဖြင့် အာရုဏ်ဦး မိုးကုပ်စက်ဝိုင်း မျှော်စင် ဆီသို့ ဆင်းသက်လာကြသော်လည်း၊ အစစ်အမှန် သူတော်စင် တစ်ပါး၏ လောကနိုးထခြင်း အဖြစ်အပျက်ကြောင့် တံခါးဝတွင်ပင် တားဆီးခံလိုက်ရလေသည်။

သူတို့သည် ထိုနေရာ၊ တံခါးဝတွင် ရပ်စောင့်နေခဲ့သည်မှာ သီတင်းနှစ်ပတ် တင်းတင်း ပြည့်ခဲ့လေပြီ။

စောင့်ဆိုင်းရင်း... စောင့်ဆိုင်းနေရုံသာ။

အစွမ်းကုန် သန့်စင်ခြင်း ဂလက်ဆီ ၏ စည်းမျဉ်းများနှင့် ဥပဒေသများတွင် အလွန်ထူးဆန်းသော ခြွင်းချက်များ ရှိနေတတ်သဖြင့် ဤအဂ္ဂိရတ်ဖြစ်စဉ်သည် အမြဲတမ်း ထိရောက်သော အကာအကွယ်တစ်ခုတော့ မဟုတ်ပေ။

ဥပမာအားဖြင့် အဂ္ဂိရတ် တာအို အတွင်း ပိုမိုအားကောင်းသော အာဏာပိုင် တစ်ဦးက လှုပ်ရှားလာပါက၊ ထိုအကာအကွယ်ကို ချိုးဖျက်ပြီး အစီအရင်ချသူကို တိုက်ရိုက်တိုက်ခိုက်ရန်မှာ သိပ်မခက်ခဲလှပေ။

သို့ရာတွင် ယင်းသို့ပြုလုပ်ရန် အဂ္ဂိရတ် တာအို ၏ ထူးခြားသော ရည်ရွယ်ချက် ဖြစ်သည့် ပိုမိုအားကောင်းသော အဂ္ဂိရတ် ကြယ်တာရာများ ကို လိုအပ်ပေသည်။

ဤအစစ်အမှန် သူတော်စင် ၏ လောကနိုးထခြင်းတွင် သာလွန် သန့်စင် အဂ္ဂိရတ် ကြယ်တာရာများ ၏ စွမ်းအား ပါဝင်နေပေသည်။ ဤစွမ်းအားကို ပိုင်ဆိုင်ထားသော အဂ္ဂိရတ်ပညာရှင်များစွာက ပူးပေါင်းလုပ်ဆောင်ခြင်း သို့မဟုတ် နောက်တစ်ဆင့်ဖြစ်သော သန့်စင်သော ဉာဏ်အလင်း အဂ္ဂိရတ် ကြယ်တာရာများ ကို ပိုင်ဆိုင်ထားသည့် အဂ္ဂိရတ်ပညာရှင် တစ်ဦးက ဝင်ရောက်မစွက်ဖက်ပါက၊ ၎င်းကို ဖျက်ဆီးပစ်ရန်မှာ လုံးဝနီးပါး မဖြစ်နိုင်ပေ။

ထို့ကြောင့် တံခါးလာခေါက်သူများအတွက်မူ ဤအကျပ်အတည်းက အလွန်ပင် အဖြစ်ဆိုးလှပေသည်။

၎င်းကို ဖျက်ဆီးနိုင်ရန်အတွက် လောကရှန့်ထို အဂ္ဂိရတ်ပညာရှင်များ၏ အထွတ်အထိပ်အဆင့်ဖြစ်သော မဟာ လောကရှန့်ထို အဂ္ဂိရတ်ပညာရှင် အများအပြား လိုအပ်မည်ဖြစ်ပြီး၊ သို့မဟုတ်ပါက ကောင်းကင်ရှန့်ထို အဂ္ဂိရတ်ပညာရှင်များ ကဲ့သို့ ပိုမိုမြင့်မားသူများ၊ ဒါမှမဟုတ် ထူးချွန်ထက်မြက်လှသည့် ကောင်းကင်ရှန့်ထို အဂ္ဂိရတ်ပညာရှင် တစ်ဦးဦး လိုအပ်မည် ဖြစ်သည်။

သီတင်းနှစ်ပတ်တိတိ ကြာမြင့်သွားသည့်တိုင် အနှစ်သာရကင်းမဲ့နေသော ဤဖြစ်စဉ်ကြီးမှာ ပျောက်ကွယ်သွားခြင်းမရှိသည်ကို မြင်တွေ့လိုက်ရပြီးနောက် သူတို့အနေဖြင့် ဤနည်းဗျူဟာကို အသုံးမပြုဘဲ နေနိုင်ပါတော့မည်လော။

***

အပိုင်း(၂၅၁၈)

အာရုဏ်ဦး မိုးကုပ်စက်ဝိုင်း မျှော်စင် ၏ ပေါင်းစည်းခြင်း ခန်းမဆောင်…

ကျက်သရေရှိသော အနုပညာလက်ရာ အလှဆင်မှုများနှင့် လှပသောရှုခင်းများကို ပြသထားကာ ထိုကျယ်ဝန်းလှသည့် အခန်းကြီးထဲတွင် လူနှစ်ဒါဇင်ခန့်သည် ထိုင်သူကထိုင်၊ ရပ်သူကရပ်၊ ခေါက်တုံ့ခေါက်ပြန် လမ်းလျှောက်သူက လျှောက်ဖြင့် ရှိနေကြ၏။

သူတို့၏ မျက်နှာပေါ်တွင် စိုးရိမ်ပူပန်မှု၊ တည်ငြိမ်အေးဆေးမှု သို့မဟုတ် စိတ်အနှောင့်အယှက်ဖြစ်မှု အစရှိသည့် မျိုးစုံသော ခံစားချက်များက အသီးသီး လွှမ်းမိုးနေကြပေသည်။

ထိုသူများအထဲတွင် စုမေ့ လည်း ပါဝင်ပြီး သူမသည် စစ်ဝတ်တန်ဆာကို အပြည့်အစုံ ဝတ်ဆင်ထားလျက် ခုံပေါ်တွင် တည်ငြိမ်စွာ ထိုင်နေကာ၊ နေ့စဉ် ဖတ်နေကျ စာအုပ်တစ်အုပ်ကို ဖတ်နေသည့်နှယ် စာလိပ်တစ်လိပ်ကို ဖတ်ရှုနေလေသည်။

သူမသည် လုံးဝကို သက်တောင့်သက်သာ ရှိနေ၏။ ချောင်စွေ့ဖုန်း သည်လည်း ကျယ်ဝန်းပြီး သက်တောင့်သက်သာရှိသော ကုလားထိုင်တစ်ခုပေါ်တွင် ထိုင်နေလေသည်။ သူမ၏ အနောက်တွင်တော့ ကျိုးယီရင် နှင့် မီးခိုးရောင်နှင်းဆီ တို့သည် မှုန်ကုပ်သော မျက်နှာထားဖြင့် သတိအနေအထားနှင့် မတ်မတ်ရပ်နေကြသည်။ အစေခံအမျိုးသမီးများ ဆိုသော်လည်း သူတို့သည် ချောင်စွေ့ဖုန်း၏ ဆရာများအပြင် စောင့်ရှောက်သူများ အဖြစ်ပါ တာဝန်သုံးရပ်ကို ယူထားကြခြင်း ဖြစ်သည်။

မကြာသေးမီကမှ လုပ်ကြံခံခဲ့ရသော်လည်း ဒဏ်ရာအနည်းငယ်မျှပင် မရရှိခဲ့သည့် ချောင်စွေ့ဖုန်းသည်လည်း စုမေ့ ကဲ့သို့ပင် လုံးဝကို ပေါ့ပေါ့ပါးပါး ရှိနေခဲ့သည်။

သူမသည် ကျောက်စိမ်းခွက်ဖြင့် လျှို့ဝှက်မြေကြီး အဆင့် အရည်အသွေးရှိသော တည်ခင်းထားသည့် လက်ဖက်ရည်ကြမ်းကို သောက်သုံးနေလေသည်။

အခန်းထဲရှိ တည်ငြိမ်နေသူများထဲတွင် စုမေ့ ၊ ယွီစွန်းလီ ၊ ဝေ့စီ ၊ လျူစုရင် တို့နှင့် ချင်ချူးမူ တို့ ပါဝင်ကြသည်။

လျူစုယင်နှင့် ချင်ချူးမူတို့ နှစ်ဦးသည် စိတ်အားထက်သန်စွာ စကားစမြည် ပြောဆိုနေကြပြီး၊ အထူးသဖြင့် လျူစုရင် သည် အဆုံးမဲ့ ဟင်းလင်းပြင် နယ်မြေ၏ ရိုးရာပုံပြင်အချို့ကို ပြောပြရင်း လက်ဟန်ခြေဟန်များဖြင့် အတော်လေး အသက်ဝင်နေလေသည်။

သူမ၏ ဂရုမစိုက်တတ်သော အေးစက်စက် အမူအကျင့်များသည် ဝေ့ဝူယင် ၏ ရှိနေမှုကြောင့် အရည်ပျော်သွားခဲ့ပြီဖြစ်ကာ၊ သူမကို အသက်ဝင်သော အရောင်အသွေးများနှင့် ကြွယ်ဝသော ကိုယ်ရည်ကိုယ်သွေးတို့ကို ပေးစွမ်းထားခဲ့လေပြီ။

သူတို့အနက်မှ မည်သူကမျှ လက်ရှိအခြေအနေနှင့် ပတ်သက်၍ စိုးရိမ်ပူပန်နေပုံ မရကြချေ။ ဤသည်မှာ အခြေအနေကို နားမလည်၍မဟုတ်ဘဲ၊ စုမေ့သည် ဝေ့ဝူယင် ၏ ညာလက်ရုံးဖြစ်ကြောင်း သူတို့ ကောင်းစွာ သိရှိထားကြသောကြောင့် ဖြစ်သည်။

စုမေ့ အနေဖြင့် စာဖတ်နိုင်လောက်သည်အထိ တည်ငြိမ်နေနိုင်သည်ဆိုလျှင် အရာအားလုံးသည် ထိန်းချုပ်နိုင်သော အတိုင်းအတာအတွင်း၌ ရှိနေကြောင်း သေချာနေပေသည်။

ထို့အပြင် ချင်ချူးမူ နှင့် ဝေ့စီ တို့သည် ဝေ့ဝူယင် ၏ စရိုက်ကို အကောင်းဆုံး နားလည်ထားကြ၏။ သူသည် အရေးပေါ်အစီအမံ တစ်ခုပြီးတစ်ခု၊ ထိုအစီအမံများအတွက် နောက်ထပ် အစီအမံများနှင့်၊ ထိုအစီအမံများအတွက်ပင် အလွှာလိုက် ထပ်ဆင့်အစီအမံများကိုပါ ကြိုတင်ပြင်ဆင်ထားတတ်သော လူစားမျိုး ဖြစ်ပေသည်။

သူတို့သည် နံပါတ်တစ် လုံခြုံရေးအစီအမံဖြစ်သော အာရုဏ်ဦး မိုးကုပ်စက်ဝိုင်း မျှော်စင် အတွင်း ဆက်လက်နေထိုင်ခြင်းကို ကျင့်သုံးနေဆဲဖြစ်ရာ ထိတ်လန့်ရန် အကြောင်းမရှိပေ။

အမှန်တကယ်ဆိုရလျှင် သူတို့ လုံးဝ တိုက်ခိုက်မခံရသေးပေ။ အပြင်ဘက်ရှိ အဂ္ဂိရတ်ဖြစ်စဉ်ကြီးက မျှော်စင်၏ ကာကွယ်ရေးစနစ်များကိုပင် အသုံးပြုရန် မလိုသေးဘဲ ငါးမန်းဆိုးကြီးများအားလုံးကို အဝေးသို့ ဖယ်ရှားထားနိုင်ခဲ့လေသည်။

တည်ငြိမ်မှုမရှိသူများမှာမူ လူသစ်များ ဖြစ်ကြသော ရှီနင် ၊ ရှန့်ဝမ်ချင်း ၊ အဖြူရောင်ကောင်းကင် ၊ မေ့ရှောင်ယန် ၊ အိုအေစစ်မြစ် သူတော်စင် ၊ ချီယင်ယင် ၊ သူတော်စင် နက်ပစ် နှင့် သူတော်စင် နက်ပရီ တို့ပင် ဖြစ်ကြ၏။

စိတ်အနှောင့်အယှက်ဖြစ်နေသူများမှာမူ ဒဏ်ရာရထားသည်ဟု ဆိုသော အဂ္ဂိရတ် သူရဲကောင်း ပါခက် ပင်ဖြစ်သည်။ သူမသည် ပဲ့တင်ထပ် ချီ အဆောင် ဖြင့် တိုက်ခိုက်ခံခဲ့ရသူ တစ်ဦးဖြစ်လင့်ကစား အံ့ဩဖွယ်ကောင်းလောက်အောင် ကျန်းမာသန်စွမ်းနေပုံ ပေါ်နေ၏။ ထို့အပြင် စုရီ ပြန်လည်ဝင်စားလာသော ထို ဓားသမား သည်လည်း မထင်မှတ်ဘဲ ဤနေရာသို့ ရောက်ရှိနေခဲ့လေသည်။

သူသည် တစ်ကိုယ်လုံး အဖြူရောင်ဝတ်စုံကို ဆင်ယင်ထားပြီး ဓားကို ပေါင်ပေါ်၌ အပြားလိုက်တင်ကာ မျက်လွှာချလျက် တင်ပျဉ်ခွေထိုင်၍ တရားမှတ်နေလေသည်။ သူ၏ဘေးတွင်မူ ယွီပေါင်ယွဲ့ နှင့် ချူရှင်း တို့ ရှိနေကြ၏။

ချူရှင်း မှာလည်း ဤအခြေအနေများကြောင့် ထပ်တူထပ်မျှ စိတ်ပျက်လက်ပျက် ဖြစ်နေရ၏။ သူမသည် အထွတ်အထိပ် သူတော်စင် တစ်ပါး ဖြစ်သော်ငြား ရရှိထားသော ဒဏ်ရာများမှာ ကျယ်ပြန့်ပြင်းထန်လှပေသည်။

ပြီးခဲ့သည့် တိုက်ပွဲတွင် သေလုမျောပါးအထိ မိမိကိုယ်ကို အစွမ်းကုန် တွန်းအားပေးခဲ့ရသည့်အတွက် ယခုအခါတွင် အထွတ်အထိပ် သူတော်စင် အဆင့် တိုက်ခိုက်သူတစ်ဦးအဖြစ် သတ်မှတ်ရန်ပင် ခက်ခဲနေလေသည်။

သို့ရာတွင် သူမ ပြန်လည်သက်သာမလာမီမှာပင်၊ သူတို့အတွက် အသက်ကို မတုံ့မဆိုင်း ရဲရဲဝံ့ဝံ့ စတေးခဲ့သော ထိုအမျိုးသမီး ဟုန်ရွှမ်နူ မှာ အကြောင်းပြချက်မရှိဘဲ ပျောက်ကွယ်သွားခဲ့လေပြီ။

စုရီ နှင့် သူမတို့ နှစ်ဦးစလုံး အဖြေရှာရန် ဤနေရာသို့ ရောက်လာခဲ့ကြခြင်းဖြစ်သော်လည်း ယွီပေါင်ယွဲ့ မှာ ဤနေရာ၌ ကြိုရောက်နေနှင့်ကြောင်း တွေ့လိုက်ရ၏။ ဤသည်ကား မျှော်လင့်ထားပြီးသား ကိစ္စပင်ဖြစ်သည်။

ဝေ့ဝူယင် သည် သူမ၏ဘဝအပေါ် ထူးထူးခြားခြား စိတ်ဝင်စားမှု ပြသခဲ့ဖူးသည်။ အကယ်၍ ရန်သူများက သူ့ကို အန္တရာယ်ပြုရန် သို့မဟုတ် တံခါးပိတ်ကျင့်ကြံနေခြင်းမှ ထွက်လာစေရန် ရည်ရွယ်ပါက ချောင်စွေ့ဖုန်း၊ ရှီနင် ပြီးနောက် နောက်ထပ်ပစ်မှတ်မှာ သူမပင် ဖြစ်လာမည်ဖြစ်သည်။

သို့သော် သူမသည် ယခုအခါ ဤနေရာ၌ လုံခြုံစွာ ရှိနေလေပြီ။

အာရုဏ်ဦး မိုးကုပ်စက်ဝိုင်း မျှော်စင် သို့ ဝင်ရောက်ရေးနှင့် ပတ်သက်၍မူ သူမ ထင်ထားသည်ထက် များစွာ လွယ်ကူနေခဲ့ပေသည်။ လက်ရှိအခြေအနေကို သိရှိနိုင်ရန် ယွီပေါင်ယွဲ့ ထံ ဆက်သွယ်လိုက်ပြီးနောက်၊ စုမေ့ အမည်ရှိ ဆံပင်အနက်ရောင်နှင့် ထိုအမျိုးသမီးက ဟင်းလင်းပြင် တံခါးပေါက် တစ်ခုကို ဖန်တီးကာ သူတို့ကို တိုက်ရိုက် ခေါ်ဆောင်လာခဲ့ခြင်း ဖြစ်သည်။ သူမသည် သူတို့အပေါ် မည်သို့သော သတိထားစောင့်ကြည့်မှုမျိုးမျှ မရှိခဲ့ချေ။ သို့တည်းမဟုတ် သူမက သူတို့ကို ခြိမ်းခြောက်နိုင်သည့် အန္တရာယ်တစ်ခုအဖြစ် မမြင်ခဲ့ခြင်းလည်း ဖြစ်ကောင်းဖြစ်နိုင်ပေသည်။

သို့ရာတွင် သူမကို စိတ်ရှုပ်ထွေးစေခဲ့သည့် အချက်မှာ အပြင်ဘက်ရှိ ရန်သူများသည် စုရီ ကဲ့သို့ အခြားသူများ ထွက်ပြေးလွတ်မြောက်မှုမျိုး ထပ်မံမဖြစ်ပွားစေရေးအတွက် ဟင်းလင်းပြင် နှင့် နေရာအာကာသ၏ ဒိုင်မန်းရှင်း သုံးခု လုံးကို သိသိသာသာ ပိတ်ဆို့ထားခြင်းပင် ဖြစ်သည်။

အလွန်ဝေးကွာလှသည့် အကွာအဝေးဖြစ်လင့်ကစား ဤအမျိုးသမီးသည် ဟင်းလင်းပြင် တံခါးပေါက် ကို မည်သို့မည်ပုံ ဖန်တီးနိုင်ခဲ့ပါသနည်း။

ထိုပိတ်ဆို့ရေး နည်းလမ်းများ၊ ဖမ်းဆီးခြင်း အစီအရင် များ နှင့် ခြေရာခံ မန္တန်များသည် ထို ဟင်းလင်းပြင် တံခါးပေါက် များ ဖန်တီးမှုကို လုံးဝ မဟန့်တားနိုင်သည်မှာ ဖြစ်နိုင်ပါသလော။

ထိုသို့သာဆိုလျှင် မည်မျှပင် ရယ်စရာကောင်းလှပါသနည်း။

သို့တည်းမဟုတ် အပြင်ဘက်ရှိ ရန်သူများသည် သူတို့အားလုံးကို တစ်ကြိမ်တည်း တစ်စုတစ်ဝေးတည်း ဖမ်းဆီးလိုသဖြင့် တမင်သက်သက် ဖြတ်သန်းခွင့် ပြုလိုက်ခြင်းလည်း ဖြစ်နိုင်ပေသည်။

ယွီပေါင်ယွဲ့ မှာ စုရီ ၏ဘေးတွင် ထိုင်ကာ လူတိုင်း၏ တုံ့ပြန်မှုများကို အကဲခတ်နေ၏။ သူမက သိပ်တော့ တည်ငြိမ်နေပုံမပေါ်ချေ။ သူမသည် စိုးရိမ်ပူပန်မှု အနည်းငယ် ရောယှက်နေသည့်အပြင် သိချင်စိတ်က ပိုမို ကြီးစိုးနေလေသည်။

ဝေ့ဝူယင် ဘယ်မှာနည်း။ သူ ဘေးကင်း၏လော။ သူမ၏ အတွေးများထဲတွင် ထိုကောင်းကင်ရှန့်ထို အဂ္ဂိရတ်ပညာရှင် အတွက် စိုးရိမ်ပူပန်မှုများဖြင့် ပြည့်နှက်နေလေသည်။

နောက်ဆုံးတွင်တော့ စုရီ ၏ မျက်လုံးများ ပွင့်လာခဲ့၏။

စုမေ့၏ စာဖတ်နှုန်း နှေးကျသွားသည်။ သူမကို စိုက်ကြည့်နေသည့် သူ့အကြည့်ကို အာရုံခံမိပြီး သူမက လှမ်းကြည့်လိုက်သည်။

"သာလွန် သန့်စင် အဂ္ဂိရတ် ကြယ်တာရာတွေ ကို ပိုင်ဆိုင်တဲ့ အဂ္ဂိရတ်ပညာရှင် အလုံအလောက်ကို သူတို့ စုစည်းမိသွားကြပြီ"

စုရီ က တည်ငြိမ်စွာပင် ပြောလိုက်သည်။ ဤစကားများက စိုးရိမ်ပူပန်နေကြသူများကို၊ အထူးသဖြင့် နက်ပစ် ကို ပို၍ပင် ဂဏာမငြိမ် ဖြစ်သွားစေခဲ့သည်။

ဝေ့ဝူယင်၏နောက်သို့ လိုက်ပါလာသည့် သူတို့၏ ခရီးစဉ်တွင် အထွတ်အထိပ် သူတော်စင် များကိုပါ ရင်ဆိုင်ရနိုင်ခြေရှိမည်ဟု သူမ လုံးဝ မျှော်လင့်မထားခဲ့ပေ။ သူမ၏ နှလုံးခုန်နှုန်းများ မြန်လာကာ၊ စိတ်ပိုင်းဆိုင်ရာ အားပေးနှစ်သိမ့်မှု ရလိုရငြား ခင်ပွန်းဖြစ်သူထံသို့ အလိုအလျောက် လှမ်းကြည့်မိလိုက်သည်။

နက်ပရီ က သူမကို ကြည့်ကာ ယုံကြည်ချက်ရှိရှိ ပြုံးပြလိုက်ပြီး၊ တီးတိုးပြောလိုက်သည်။

"တို့တွေ အဆင်ပြေသွားမှာပါ"

ဤစကားများသည် အနည်းငယ် ထိရောက်မှုရှိပုံရပြီး၊ သူမကို အတန်ငယ် ငြိမ်ကျသွားစေသည်။

သို့သော် နက်ပရီ၏ စကားလုံးများက မေ့ရှောင်ယန်၏ စိုးရိမ်ပူပန်မှုများကိုတော့ ဖယ်ရှား မပစ်နိုင်ပါချေ။ သူမသည် သူ၏ ဇနီးလည်း မဟုတ်သလို သူမ၏ ကျင့်ကြံခြင်းစွမ်းရည်ကလည်း သိပ်မမြင့်မားလှပေ။

"သူတို့က အဂ္ဂိရတ်ဖြစ်စဉ်ကို ဖျက်ဆီးပြီး မျှော်စင်ကို ချိုးဖောက်ဝင်ရောက်တော့မှာပဲ… မျှော်စင်ရဲ့ ကာကွယ်ရေး အစီအရင်တွေကရော ခံနိုင်ရည်ရှိပါ့မလား"

သူမက အကြောက်တရားများ ဖုံးလွှမ်းနေသည့် အသံကို ထိန်းချုပ်ကာ မေးလိုက်သည်။

အဖြူရောင်ကောင်းကင် မှာ ပို၍ပင် ထိတ်လန့်နေခဲ့ပြီး၊ သူမ၏ဘေးတွင် ရပ်နေသည့် တာအို စောင့်ရှောက်သူ (အရှင်သခင် ကျားနှလုံးသား) ကလည်း မည်သည့် နှစ်သိမ့်မှုမျှ မပေးနိုင်ခဲ့ပေ။

သူမသည် သေလုမတတ် ကြောက်ရွံ့နေခဲ့သည်။ မည်သို့ပင်ဆိုစေ သူမသည် သတင်းကွန်ရက်များစွာ၏ အဆင့်မြင့်ကြေးပေး ဖောက်သည်တစ်ဦး ဖြစ်သဖြင့်၊ အာရုဏ်ဦး အဂ္ဂိရတ် ရှန့်ထို ၏ နာမည်ကောင်းနှင့် စီးပွားရေးလုပ်ငန်းများကို စနစ်တကျ ဖြိုခွင်းနေမှုအကြောင်း အပြည့်အဝ သိရှိထားသူ ဖြစ်လေသည်။

"ကောင်းကင်ရှန့်ထို အာရုဏ်ဦး က မိုးကုပ်စက်ဝိုင်း တွေနဲ့ လျှို့ဝှက် စာချုပ်တစ်ခု ချုပ်ဆိုထားတယ်လို့ ရှင် ပြောခဲ့တယ် မဟုတ်ဘူးလား။ အခုလို အခြေအနေကို ဖြေရှင်းပေးဖို့ သူတို့က ဘာလို့ ပေါ်မလာကြတာလဲ"

အဖြူရောင်ကောင်းကင် က အလောတကြီး မေးလိုက်သည်။

အစောပိုင်းက ချောင်စွေ့ဖုန်း သည် အာရုဏ်ဦး မိုးကုပ်စက်ဝိုင်း မျှော်စင် ၌ လျှို့ဝှက် စာချုပ်တစ်ခု ရှိနေကြောင်း၊ သို့ဖြစ်၍ ဂလက်ဆီထဲမှ သူတို့ကို ဖယ်ရှားပစ်ရန် မလွယ်ကူကြောင်း ထုတ်ဖော်ပြောဆိုကာ နှစ်သိမ့်ပေးခဲ့သည်။

သို့သော် သူမအနေဖြင့် အသေးစိတ် အချက်အလက်များကိုမူ သေချာမသိပေ။ ဝေ့ဝူယင်သည် အကြမ်းဖျင်းမျှသာ ပြောပြခဲ့ခြင်းဖြစ်သည်။ သူမသည် သူမ၏ ကိုယ်ပိုင် ကျင့်ကြံခြင်းလမ်းစဉ်ကိုသာ ပို၍ အာရုံစိုက်နေခဲ့သည်။ လော့နင် က သူမထက် အများကြီး ပိုသိပေလိမ့်မည်။

"အစွမ်းကုန် သန့်စင်ခြင်း ဂလက်ဆီ ထဲမှာ နှစ်ပေါင်း ၂၅၀,၀၀၀ ကြာတဲ့အထိ အရင်းအမြစ်တွေ ဝယ်ယူ၊ ရောင်းချ၊ လဲလှယ်နိုင်ဖို့ အကာအကွယ်တွေ၊ အာဏာပိုင်တွေရဲ့ အခွင့်အရေးတွေရမယ့် မျှော်စင်တစ်ခုကို တည်ဆောက်ခွင့်၊ ပြီးတော့ ဒီကာလအတွင်းမှာ လက်ရှိ မိုးကုပ်စက်ဝိုင်း တွေ ဒါမှမဟုတ် နောက်ထပ် အနာဂတ် မိုးကုပ်စက်ဝိုင်း မျိုးဆက် နှစ်ဆက်ကနေ ဘယ်လို အခြေအနေမျိုးမှာမဆို ဖယ်ရှားခွင့် မရှိဘဲ၊ အာရုဏ်ဦး အာဏာရှင် ဧကရာဇ် ရဲ့ တိုက်ရိုက်ထိန်းချုပ်မှုအောက်မှာ လွတ်လွတ်လပ်လပ် ရပ်တည်ခွင့် စတာတွေ ပါဝင်တယ်"

ဝေ့ဝူယင် ရှင်းပြခဲ့ဖူးသည့်အတိုင်း စုမေ့ က ကိုးကားပြောဆိုလိုက်သည်။

သူမ၏ စကားများက လူအချို့ကို တုန်လှုပ်သွားစေသလို အချို့ကိုလည်း စိတ်အေးသွားစေခဲ့၏။ သို့သော်လည်း… စုရီကမူ ချက်ချင်းပင် မျက်မှောင်ကြုတ်လိုက်သည်။

"လျှို့ဝှက် စာချုပ် ထဲမှာ ယေဘုယျ ကာကွယ်ရေး အပိုဒ် မပါဘူးလား...."

***