ဟုန်ကျယ် မှ ဖြစ်ရပ်

ဘေးမှ ရပ်ကြည့်နေသူတစ်ဦးအနေဖြင့်ပင် ယဲ့လန် သေမင်းနှင့် ရင်ဆိုင်ရချိန်တွင် သားအဖနှစ်ဦး၏မျှော်လင့်ချက်အလုံးစုံကင်းမဲ့မှုကို ခံစားနိုင်၏။

သူမကိုယ်တိုင်က တာအိုကို စူးစမ်းလေ့လာနေသူတစ်ဦးဖြစ်ရာ ဤလမ်းကြောင်းက မည်မျှခက်ခဲကြောင်းကို ပို၍ပင်နားလည်သဘောပေါက်ထားချေသည်။

တာအိုအသီးအပွင့် နှင့် အာဟတ်အသီးအပွင့်တို့သည် တူညီသောအရာများ မဟုတ်သော်လည်း ၎င်းတို့နှစ်ခုစလုံးက စည်းမျဉ်းကြီး ၇၂ ခု နှင့် ကိုက်ညီကြပေ၏။ ထိုက်ရွှီတာအိုအသီးအပွင့်က ထိပ်တန်းအဆင့်ဆယ်ခုစာရင်းဝင်ပြီး အဆင့်သုံးဆယ်ကျော်တွင်ရှိသော ကျားနဂါးတာအိုအသီးအပွင့်ထက်များစွာ သာလွန်လှပေသည်။

သို့သော် သူ၏လမ်းကြောင်း ပြီးပြည့်စုံသွားချိန်တွင် ရှန်းယီ၏အသီးအပွင့်စွမ်းအားက တာအိုသခင်မုယန်ကျင့်ကြံထားသော ထိုက်ရွှီနတ်ဘုရားနေမင်း၏တာအိုကိုပင်ချေမွပစ်နိုင်ခဲ့ချေသည်။

ဤမျှနက်နဲပြီး လျှို့ဝှက်ဆန်းကြယ်လှသော တာအိုကိုနားလည်သဘောပေါက်နိုင်စွမ်းရှိသော ကောင်းကင်ဘုံပါရမီဆိုသည်မှာ မည်သို့သောအရာမျိုးဖြစ်မည်နည်း။

"ကံကောင်းလို့ပါ" ရှန်းယီက နှိမ့်ချနေခြင်းမဟုတ်ပေ။ အဓိကအားဖြင့် ၎င်းမှာ ကပ်ဘေးများကို ဖြတ်ကျော်ရာတွင် ကူညီရန် နတ်ဆိုးဝိညာဉ်နှစ်ခုကို ပြန်လည်တည်ဆောက်ရန် သူ၏မူလ အကြံဥာဏ်ကြောင့် ဖြစ်ပေ၏။

၎င်းမှာ သူ၏ရည်ရွယ်ချက်မဟုတ်ဘဲ ဗောဓိဂိုဏ်း မှ လောကခရီးသည်ကျင့်ကြံသူ နှစ်ဦး ဖန်တီးထားသော ကျားနဂါးအာဟတ်ရွှေရောင်ခန္ဓာကို မြင်တွေ့ပြီးနောက် ဖြစ်ပေါ်လာသော သိမ်မွေ့သည့်အထင်အမြင်လွဲမှားမှုတစ်ခုသာဖြစ်သည်။

သို့သော် အခြားသော လောကခရီးသည်ကျင့်ကြံသူများတွင် အလားတူအကြံဥာဏ်များ ရှိခဲ့လျှင်ပင် ပုံစံခွက်တစ်ခု၏အကူအညီမပါဘဲ ပြည့်စုံသော နတ်ဆိုးဝိညာဉ်တစ်ခုကို ပြန်လည်ရယူရန်မှာ ခက်ခဲလှပြီဖြစ်ရာ နတ်ဆိုးဝိညာဉ်နှစ်ခုကို ကပ်ဘေးတစ်ထောင်တိုင်တိုင်ဖြတ်သန်းခိုင်းပြီး ထိုကပ်ဘေးများ၏ညှဉ်းပန်းနှိပ်စက်မှုကြောင့် သူတို့ပျောက်ကွယ်မသွားစေရန် မည်သို့ထိန်းသိမ်းထားနိုင်မည်နည်း။

၎င်းက မဖြစ်နိုင်လုနီးပါးဖြစ်သော အလုပ်တစ်ခု ဖြစ်၏

"..."

ဤစကားများကို ကြားလိုက်ရသောအခါ ယဲ့လန် အနည်းငယ်ဆွံ့အသွားခဲ့သည်။

မည်သို့ပင်ဆိုစေ သူမက အချိန်အတော်ကြာကတည်းက ကိုယ့်ကိုစီနီယာ တစ်ဦးအဖြစ် သတ်မှတ်ထားခဲ့သော ကျင့်ကြံသူတစ်ဦး လည်း ဖြစ်ပေ၏။ သူမ ရှန်းယီအပေါ် ကောင်းမွန်သော အထင်အမြင်ရှိထားသော်လည်း သူမကိုယ်တိုင် ကျော်တက်ခံလိုက်ရသည်ကို မြင်တွေ့ရခြင်းက သူမ၏နှလုံးသားထဲသို့ ခံစားချက်အချို့ကို အလိုအလျောက်ယူဆောင်လာပေးဆဲပင်။

အကယ်၍လောကကြီးတွင် ဤမျှကံကောင်းသော အခိုက်အတန့်များ အမှန်တကယ် များပြားနေမည်ဆိုပါက သူမ ပဉ္စမအဆင့်နယ်ပယ်တွင် အချိန်အကြာကြီး မည်သို့လုပ်၍ပိတ်မိနေမည်နည်း။

ရှန်းယီတွင် ဤကောင်းကင်ဘုံမျက်နှာသာပေးခံရသူများ၏သေးငယ်သော အတွေးများကို ဂရုစိုက်ရန် အချိန်များများစားစားမရှိခဲ့ချေ။

သူက ထိုက်ရွှီနယ်ပယ်မှ သေချာစွာခေါက်ထားသောစာရွက်တစ်ရွက်ကို ပေါ့ပေါ့ပါးပါး ထုတ်ယူလိုက်၏

သွေးစွန်းနေသော စာရွက်ကိုဖြန့်ကာ ရှန်းယီ အကြောင်းအရာကို တစ်ချက်ကြည့်လိုက်သည်။

သူ သံသယဖြစ်ခဲ့သည့်အတိုင်းပင်။

အတွေ့အကြုံနုနယ်သော လူငယ်လေးတစ်ဦး မဟုတ်တော့သဖြင့် ရှန်းယီက တာအိုသခင်မုယန်၏စကားအနည်းငယ်မျှဖြင့် အရူးအလုပ်ခံရမည် မဟုတ်ပေ။

ဤစာ၏အကြောင်းအရာအရ ၎င်းက ကောက်ချက်ချနိုင်လောက်သည့် အနေအထားနှင့် များစွာဝေးကွာနေသေးချေသည်။ ချင်းလွမ်တွင် အထောက်အထားတစ်ခုမျှပင်ရှိသေးမည်မဟုတ်ဘဲ ခန့်မှန်းရုံသက်သက်သာရှိနေဆဲဖြစ်ပေ၏

သေချာသည်မှာ တစ်ဖက်မှ တစ်စုံတစ်ဦးက မေးမြန်းရန်ရှန်းရွှီတောင်သို့ အမှန်တကယ် လာရောက်ခဲ့ခြင်းက ရှန်းယီ၏မျှော်လင့်ချက်များထက် အနည်းငယ် ကျော်လွန်နေခဲ့ချေသည်။

ကံကောင်းထောက်မစွာဖြင့် သူက ရှန်းရွှီတောင် နှင့် များစွာပတ်သက်မှု မရှိခဲ့သလို မုယန်က သူ၏ဂိုဏ်းတူတပည့်များကို သစ္စာဖောက်ချင်လျှင်ပင် အသုံးဝင်သောသတင်းအချက်အလက် တစ်ခုမျှပေးနိုင်မည် မဟုတ်ချေ။

"ဟူး"

ရှန်းယီ စာကိုပြန်ခေါက်လိုက်၏။

ထိုသို့ဖြစ်သော်လည်း သူ ပေါ့ဆ၍တော့ မရနိုင်ပေ။

"ဘယ်လိုလဲ" ဤဂျူနီယာမောင်လေးက ပြဿနာများဖန်တီးခဲ့ကြောင်း သိရှိထားသဖြင့် ယဲ့လန် သူ၏နောက်ခံအကြောင်းကိုမမေးမြန်းခဲ့သော်လည်း ဤအခိုက်အတန့်တွင် သူမ အနည်းငယ် စိုးရိမ်နေဆဲဖြစ်ပေ၏

မည်သို့ပင်ဆိုစေ ရှန်းရွှီတောင်၏နောက်ခံဖြင့်ပင် ဖုံးကွယ်၍မရနိုင်သောအရာတစ်ခုဖြစ်ပါက ၎င်းက သေးငယ်သော ပြဿနာတစ်ခုသေချာပေါက် ဖြစ်မည်မဟုတ်ပေ။

ယဲ့လန် ရှန်းယီ နှင့် သိကျွမ်းသည်မှာ မကြာသေးသော်လည်း သူမ၏အမြင်အရ လမ်းတစ်လျှောက် သူ၏လုပ်ရပ်များက ပြတ်သားပြီး ရက်စက်သော်လည်း ၎င်းတို့အားလုံးမှာ ခိုင်လုံသော အကြောင်းပြချက်များရှိခဲ့ပြီး သူက မိစ္ဆာဆန်သောလူတစ်ယောက် သေချာပေါက်မဟုတ်ချေ။

"အဆင်ပြေပါတယ်၊ ကိစ္စတွေကို အဆုံးသတ်ပြီး ပြန်သွားကြတာပေါ့"

ရှန်းယီ သူ၏ပစ္စည်းများကို သိမ်းဆည်းပြီးနောက် ကျန်းယန်စီရင်စုသို့ပြန်သွားခြင်းက သေချာပေါက် အကြောင်းပြချက် ခိုင်လုံပေ၏။ ထို့နောက်တွင် ပြဿနာများက ချင်းဟွာထံမှဖြစ်စေ၊ ဟုန်ကျယ် ထံမှဖြစ်လာစေ သူကဖြစ်ရာနေရာသို့ အချိန်မီ ရောက်ရှိနိုင်ပါလိမ့်မည်။

ထိုသို့ပြောပြီးနောက် သူလေဟာနယ်ထဲသို့ တိုက်ရိုက်ခြေလှမ်းကာ ရှန်းရွှီတောင်ရှိရာဘက်သို့ ဦးတည်သွားခဲ့၏။

"အာ" ယဲ့လန် အနည်းငယ် ကူကယ်ရာမဲ့စွာဖြင့် သူမ၏ လက်သီးကို ဆုပ်လိုက်ချေသည်။

သို့သော် သေချာစဉ်းစားကြည့်မည်ဆိုလျှင် ၎င်းမှာ ပုံမှန်ဖြစ်ကြောင်း ခံစားလိုက်ရကာ ရှန်းယီက ယုံကြည်စိတ်ချရသူဖြစ်သောကြောင့် သူမနှင့် အခြားသူများ၏ယုံကြည်မှုကို ရရှိခဲ့ခြင်း ဖြစ်ချေသည်။

သူမကိုယ်တိုင်နှင့် ပတ်သက်၍မူ ရှန်းယီ၏ယုံကြည်မှုကိုရရှိရန် သူမ ဘာလုပ်ခဲ့ဖူးသနည်း။

သူ အဲဒီအကြောင်းမပြောတာက ပုံမှန်ပါပဲ။ အကယ်၍ သူက အလွယ်တကူယုံကြည်တတ်သူသာဆိုရင် သူ ဒီလောက်အထိ ရောက်လာမှာ မဟုတ်ဘဲလမ်းဘေးမှာ သေသွားတာ ကြာလောက်ပြီ။

..

ထိုက်ရွှီနယ်ပယ်ထဲမှ ပုံရိပ်နှစ်ခု ထွက်ပေါ်လာသည်နှင့်အမျှ တောင်ထွတ်တိုင်းက ၎င်းကို ခံစားမိလိုက်ကြ၏။

တောင်ထိပ်သခင်များ တစ်ယောက်ပြီးတစ်ယောက် လေထဲသို့ ပျံတက်လာကြသည်။

"သူ ဒီလောက် မြန်မြန် ပြန်ရောက်လာတာပဲ၊ နောက်ထပ်ရက်အနည်းငယ် ကြာဦးမယ်လို့ ငါ ထင်နေတာ" တာအိုသခင်ကျင်းယွဲ့ က ပြုံးကာ ပြောလိုက်ပေ၏

"..."

တောင်ထွတ်ရှစ်ခု၏အကြီးအကဲအနေဖြင့် ကျင်းလွဲ့ဟူသော တာအိုအမည်ရှိ အကြီးဆုံးစီနီယာအစ်ကိုက စကားမပြောခဲ့သော်လည်း သူ၏သဘောထားမှာ သဘောတူလက်ခံပုံရကြောင်း ရှင်းလင်းလှ၏။

သူ၏ဂိုဏ်းတူတပည့်များအပေါ် သူ၏မျှော်လင့်ချက်များမှာ မမြင့်မားလှချေ။ ဆရာသခင်၏သွန်သင်ချက်များကို မှတ်မိပြီး နှလုံးသားထဲတွင် သိမ်းဆည်းထားသရွေ့ ၎င်းက လုံလောက်ပါသည်။

"လွန်ခဲ့တဲ့ရက်အနည်းငယ်က အခု ကောင်းကင်ဘုံကမသေမျိုးစစ်သူကြီးတစ်ဦးဖြစ်နေပြီဖြစ်တဲ့ ကျောက်စိမ်းရေကန်မသေမျိုးဂိုဏ်းက ဟုန်ကျင်း ဟာ ရှန်းရွှီတောင်ကို လာပြီး မင်းကို လာရှာခဲ့တယ်။မသေမျိုးစစ်သူကြီးချင်းလွမ်က မင်းကို မြင်မြင်ချင်း သဘောကျပြီး ခင်မင်ရင်းနှီးချင်တယ်လို့ ပြောပေမယ့် နောက်ပိုင်းကျတော့ မုယန်က သူ့ကို ကြိုဆိုလက်ခံသွားတယ်" တာအိုသခင်ချန်းဖုန်းက ရှန်းယီကို တစ်ချက်ကြည့်ကာ ပေါ့ပေါ့ပါးပါး စကားပြောနေပုံရသော်လည်း သတိပေးချက် အရိပ်အယောင်တစ်ခု ပါဝင်နေခဲ့၏။

ထိုမသေမျိုးစစ်သူကြီးက ခင်မင်ရင်းနှီးမှုအတွက် အမှန်တကယ် လာရောက်ခဲ့လျှင်ပင် မုယန်၏သဘောထားသေးသိမ်မှုကြောင့် သူတို့ကွယ်ရာတွင်ဂုဏ်သိက္ခာကျဆင်းစေသော မှတ်ချက်များပေးကာ အခြားသူများ၏ဂုဏ်သတင်းကို ထိခိုက်စေမည်ကို သတိထားရပါလိမ့်မည်။

"ကျေးဇူးတင်ပါတယ်" ရှန်းယီ အသာအယာ ခေါင်းညိတ်ပြလိုက်၏။

သူ၏နောက်တွင် ရပ်နေသော ယဲ့လန် လူငယ်လေး၏တည်ငြိမ်သော အမူအရာကို ကြည့်ရင်း စိတ်လှုပ်ရှားမှုများဖြင့်ပြည့်နှက်နေခဲ့ချေသည်။ သူက ယခုလေးတင် တာအိုသခင်မုယန်ကို ကိုယ်တိုင်ကိုယ်ကျ သတ်ဖြတ်ခဲ့သည်ဟု မည်သူက ထင်မည်နည်း။

ဒီလောက်ခိုင်မာတဲ့ မျက်နှာကြောကိုများဘယ်လိုပုံဖော်ခဲ့တာလဲ။

"စကားတွေအလကားပြောတာ တော်လောက်ပြီ။ လိုအပ်တဲ့ပြင်ဆင်မှုတွေ အားလုံး လုပ်ပြီးသွားပြီဆိုတော့ အရေးကြီးတဲ့ ကိစ္စတွေကို ကိုင်တွယ်ကြရအောင်" တာအိုသခင်ကျင်းလွဲ့က သူ၏လက်ကို ဝှေ့ယမ်းကာ လူတိုင်း၏စကားပြောဆိုမှုများကို ဖြတ်တောက်လိုက်၏။

ရှန်းရွှီတာအိုအသီးအပွင့်က တတိယအဆင့်တာ့လော်တာအိုအသီးအပွင့်များအနက်မှ တစ်ခုဖြစ်၏။

၎င်း၏လျှို့ဝှက်ဆန်းကြယ်မှုမှာ ထိုက်ရွှီကို ဖြတ်သန်းသွားလာနိုင်ခြင်း ဖြစ်ချေသည်။

ထို့ကြောင့် ရှန်းရွှီဘိုးဘေးက များသောအားဖြင့် ဤအခြေအနေတွင်သာရှိနေပြီး သူအားဖြည့်ရန် လိုအပ်ချိန်တွင်သာ အစစ်အမှန်လောကသို့ ပြန်လည်ရောက်ရှိလာကာ သူ၏ငြိမ်သက်နေမှုမှ ယာယီ နိုးထလာလေ့ရှိ၏။

ကျင့်ကြံခြင်းလမ်းကြောင်းနှင့် ပတ်သက်၍ တိုင်ပင်ဆွေးနွေးလိုသော သို့မဟုတ် အရေးကြီးသောကိစ္စရပ်များကို ဂိုဏ်းသို့ တင်ပြလိုသော တောင်ထိပ်သခင်များက ဆရာသခင်က အားဖြည့်မှုပြီးစီး၍ထိုက်ရွှီအတွင်းသို့ပြန်မသွားမီအချိန်အထိသာ စောင့်ဆိုင်းနိုင်ကြသည်။

"သူ့ကို မင်းခေါ်သွားလိုက်"

တာအိုသခင်ကျင်းလွဲ့က လှုပ်ရှားရန် ပြင်နေသောဂျူနီယာညီမကျင်းယွဲ့ကို တားဆီးရန် သူ၏အကြည့်ကို အသုံးပြုလိုက်ပြီးနောက် ယဲ့လန်ရှိရာဘက်သို့ ကြည့်လိုက်၏။

"..."

ရှန်းယီ နှင့် အချိန်အကြာကြီး အတူရှိနေခဲ့ခြင်းကြောင့်ဖြစ်ကောင်းဖြစ်နိုင်ပေသည်။ ယဲ့လန် ယခုအခါ သူမ၏စိတ်ခံစားချက်များကို အလွယ်တကူ မထုတ်ပြတတ်တော့ချေ။

သူမ ခေါင်းညိတ်လိုက်၏။ "ကောင်းပါပြီ"