မင်းလက်သီးဘယ်လောက်ပဲကြီးကြီး ဒီရှန်းရဲ့လက်သီးထက် ကြီးလို့လား

ဤကဲ့သို့ ပြင်းထန်သော ဖိအားပေးမှု၊အကြောင်းပြချက်နှင့် ယုတ္တိကင်းမဲ့နေခြင်း၊ ၎င်းက တရားမျှတမှုဟု ခေါ်ဆိုသောအရာလော။

ရှီယန်က ဟုန်ကျယ်ရှိ သက်ရှိအားလုံးကို အစုလိုက်အပြုံလိုက် သတ်ဖြတ်ရန် အမိန့်ပေးခဲ့ပြီးပြီ၊ ဤသတ္တဝါများက သူတို့၏ အသတ်ခံရမှုကို လိမ္မာစွာ လက်ခံသင့်သည်လော၊ ထို့နောက် အခွင့်အလမ်းမဲ့နေသော ကာလရှည်ကြာပြီးနောက် မသေမျိုးမိသားစုမှ မသေမျိုးတစ်ပါးက သူတို့၏အပြစ်ကင်းသောဝိညာဉ်များကို တရားမျှတမှု ပေးလာမည့်အချိန်ကို မျှော်လင့်သင့်သည်လော။

ကျစ်ယန်က နားလည်ရခက်စွာဖြင့် တစ်ကိုယ်လုံး အနည်းငယ် တုန်ရီနေခဲ့ချေသည်။

"သေသွားပြီ" ချင်းလွမ်က ခေါင်းကိုအနည်းငယ် ငုံ့ကာ ဤစကားလုံး နှစ်လုံးကို သူ၏ပါးစပ်ထဲတွင် အကြိမ်အနည်းငယ် ရေရွက်နေခဲ့၏။

တစ်ခဏအကြာတွင် သူ၏နှုတ်ခမ်းထောင့်များ အနည်းငယ် ကွေးတက်သွားခဲ့သည်။ "ဆိုလိုတာက သေဆုံးသူရဲ့သက်သေအထောက်အထား မရှိဘဲ မင်းပြောတာကိုပဲ ငါ နားထောင်ရမယ်ပေါ့"

"နောက်ထပ် ရှိသေးတယ်" ချင်းလွမ်က သူ၏ခေါင်းကိုနောက်တစ်ကြိမ် မော့လိုက်ရာ အေးစက်သော အလင်းတန်းတစ်ခု သူ၏မျက်လုံးများထဲတွင် ပေါ်လာပြီး သူ၏အသံက ခံစားချက်ကင်းမဲ့သော လေသံတစ်ခုသို့ ပြောင်းလဲသွားခဲ့၏။

"မသေမျိုးအရာရှိတွေဟာ အပြစ်ရှိရင် ကောင်းကင်ဘုံဥပဒေက သူတို့ကို အရေးယူပါလိမ့်မယ်။ မသေမျိုးအရာရှိတစ်ယောက်ကို ကိုယ့်ဆန္ဒနဲ့ အရေးယူဖို့ မင်းကိုဘယ်သူက အခွင့်အရေးပေးထားတာလဲ"

"ဒါဆို ရှင်ဆိုလိုချင်တာက ကျွန်မတို့အားလုံး သေသင့်တယ်လို့ ပြောချင်တာလား" ကျစ်ရှန်း၏နှုတ်ခမ်းနီနီများတုန်ခါသွားပြီး သူမက ထုံထိုင်းစွာ မော့ကြည့်လိုက်သည်။

ထိုအချိန်မှာပင် မောင်နှမနှစ်ယောက်၏အနောက်မှ နဂါးခေါင်းတစ်ခု ထွက်ပေါ်လာခဲ့၏။

အရှေ့ဘက်နဂါးဘုရင်သည် တစ်ချိန်ကမသေမျိုးခုံရုံးကို အယုံကြည်ရဆုံးသူ ဖြစ်ခဲ့သော်လည်း ယခုအခါမသေမျိုးစစ်သူကြီးချင်းလွမ်ကို တိတ်ဆိတ်စွာကြည့်နေစဉ် သူ၏မျက်လုံးများမှာ မှိုင်းညို့နေပြီး သူ၏အသံမှာ အက်ကွဲနေခဲ့သည်။

"ကောင်းကင်ဘုံဥပဒေကို ကျုပ်တို့ မဆန့်ကျင်ရဲပါဘူး။ဒီအသနားခံစာကို ရှီယန်ကို စွပ်စွဲဖို့ စီစဉ်တုန်းကပြင်ဆင်ခဲ့တာဖြစ်ပြီး ကောင်းကင်ဘုံကို အခက်အခဲကြီးစွာနဲ့ ပို့ခဲ့တာပါ"

"ဒါပေမယ့်"

အရှေ့ဘက်နဂါးဘုရင်က မျက်လုံးများကို မှိတ်ထားလိုက်၏။ "ခင်ဗျားရှေ့ကို ရောက်ရမယ့် ဒီအသနားခံစာကို ကျုပ်သမီးက ကြားဖြတ်ဟန့်တားပြီး ရှီယန်ဆီ တိုက်ရိုက်ပြန်ပို့ခဲ့တာကြောင့် နောက်ဆက်တွဲအနေနဲ့ ဟုန်ကျယ်ကို ရှင်းလင်းမှုတွေ ဖြစ်ပေါ်လာခဲ့တာပါ"

"အဲဒီ မိန်းကလေးငယ်လေး... နာမည်က ကျစ်လင် ပါ"

ထိုနာမည်ကို ကြားလိုက်ရသောအခါ ချင်းလွမ်၏မျက်ခွံများအနည်းငယ် တုန်ခါသွားခဲ့သည်။ သူက နှုတ်ခမ်းများကို တင်းကျပ်စွာစေ့ထားပြီး အရှေ့ဘက်နဂါးဘုရင်ကို လှည့်ကြည့်လိုက်၏။

"ကျစ်လင်ဟာ တစ်ချိန်က ဟုန်ကျယ်ရဲ့ ကောင်းကင်ဂုဏ်ယူဖွယ်ရာ ရွှမ်ချင်းရဲ့အဖော်ဖြစ်ခဲ့ပါတယ်။ကောင်းကင်ဘုံကို တက်လှမ်းဖို့အတွက် သူမဟာ ရွှမ်ချင်းကို ထောင်ချောက်ဆင်ဖို့ ရှီယန် နဲ့ ပူးပေါင်းကြံစည်ခဲ့ပါတယ်။ အဲဒီကိစ္စကြောင့်ပဲ နှစ်တစ်သောင်းကြာအစုလိုက်အပြုံလိုက်သတ်ဖြတ်မှုကြီးဖြစ်ပွားခဲ့တာပါ"

"ဒီကိစ္စကို ဖုံးကွယ်ဖို့အတွက် ဒီအသနားခံစာကို ခင်ဗျားရှေ့မှာပေါ်လာခွင့် သူမ ဘယ်တော့မှ ပေးမှာမဟုတ်ဘူး"

"အသနားခံစာကို ဟုန်ကျယ်ဆီပြန်ပို့ခဲ့တယ်၊ ဒီနိမ့်ကျတဲ့နဂါးရဲ့ခေါင်းကို ရှီယန်က ဖြတ်ပစ်ခဲ့ပြီး နတ်ဝိညာဉ်ကို ကျစ်လင်က ထိန်းသိမ်းထားခဲ့တယ်"

"ကျုပ်တို့ရှေ့မှာ လမ်းမရှိတော့ဘူး" အရှေ့ဘက်နဂါးဘုရင်စကားပြောအပြီးတွင် ဟုန်ကျင်း ပင်လျှင်အေးစက်စွာ အသက်ရှူသွင်းရင်း နောက်သို့ ဆုတ်သွားခဲ့ချေသည်။

ထိုအသိဉာဏ်ရှိပြီး အပြစ်ကင်းပုံရသော မိန်းကလေးက ဖခင်ကိုသတ်ခြင်းနှင့် ဝိညာဉ်အကျဉ်းချခြင်းကဲ့သို့သော ဆိုးရွားသည့် လုပ်ရပ်များကိုကျူးလွန်နိုင်ပြီး သူမ၏အနာဂတ်အတွက် သူမ၏မွေးရပ်မြေကို သေမင်းကမ္ဘာတစ်ခုအဖြစ်သို့ ပြောင်းလဲရန် မတုံ့ဆိုင်းခဲ့ချေ။

သူမ၏နိမ့်ကျသော ဇာစ်မြစ်သာ မဟုတ်ခဲ့လျှင် ဤမျှရက်စက်သော သဘာဝကကြီးမားသော အောင်မြင်မှုတစ်ခုကို သေချာပေါက် ရရှိစေနိုင်ပေလိမ့်မည်။

"ဟူး" ချင်းလွမ် မျက်လုံးများကို မှိတ်ထားလိုက်ပြီး သူ၏ လည်ချောင်း အနည်းငယ်လှုပ်ရှားသွားကာ ပေါ့ပေါ့ပါးပါး သက်ပြင်းချလိုက်ချေသည်။

ထိုမျက်လုံးများ နောက်တစ်ကြိမ် ပွင့်လာသောအခါ ၎င်းတို့သည် တည်ငြိမ်မှုသို့ ပြန်လည်ရောက်ရှိသွား၏။ "ဒါဆို သူမ ဘယ်မှာလဲ"

ဟုန်ကျယ်မှ သက်ရှိများ နောက်တစ်ကြိမ် တိတ်ဆိတ်သွားကြချေသည်။

ယခုအခါ အရှေ့ဘက်နဂါးဘုရင် ပြန်လာပြီဖြစ်ရာ ကျစ်လင်မည်သည့်နေရာသို့ သွားသည်ကို ထင်ရှားလှ၏။

"ဟက်" ၎င်းကို မြင်လိုက်ရသောအခါ ချင်းလွမ်က နောက်ဆုံးတွင် လှောင်ပြောင်လိုက်ချေသည်။ "မင်းတို့အားလုံးက သဘောကောင်းတယ်၊ သနားစရာကောင်းတယ်၊အားနည်းပြီး အနိုင်ကျင့်ခံရလွယ်ပုံရတယ်၊လုပ်ရပ်တိုင်းက တရားမျှတပြီး အရာရာတိုင်းကမျှော်လင့်ချက်မဲ့မှုကြောင့် လုပ်ဆောင်ရသလိုပဲ"

"ဒါပေမယ့် မင်းတို့နဲ့ ဆန့်ကျင်ဘက်မှာ ရပ်နေတဲ့ လူယုတ်မာတွေအားလုံးက ချွင်းချက်မရှိ သေကုန်ကြပြီ"

"သေသွားတဲ့လူတွေက မငြင်းခုံနိုင်ဘူး၊ သေချာတာပေါ့၊မင်းတို့ကို ကြိုက်သလိုပြောခွင့်ပေးထားမှာ"

"ဒီအရာက ရယ်စရာကောင်းတယ်လို့ မင်းတို့ထဲက ဘယ်သူမှ မထင်ဘူးလား"

သူ၏အေးစက်ပြီး လှောင်ပြောင်သော စကားလုံးများက ခန်းမကြီးတစ်ခုလုံးတွင် ပဲ့တင်ထပ်သွားခဲ့သည်။

"ချင်းလွမ် " ချီဖုန်းကြယ်တာရာက အေးစက်သော အသံဖြင့် ပြစ်တင်ကြိမ်းမောင်းလိုက်ပြီး သတိပေးလိုက်၏။

"မသေမျိုးခုံရုံးက အမှုတွေကို ကိုင်တွယ်နေတာ၊ မင်းရဲ့ စိတ်ခံစားချက်တွေကို ဖယ်ထားလိုက်"

"သေချာတာပေါ့" ချင်းလွမ်၏အပြုံးက မှေးမှိန်သွားပြီး သူ၏မျက်နှာက အေးခဲသွားကာ ရုတ်တရက် သူ၏လက်ဖြင့် အချက်ပြလိုက်ချေသည်။

"အခြေအနေက ဒီလိုဖြစ်နေမှတော့ လုပ်ထုံးလုပ်နည်းအတိုင်းသွားကြတာပေါ့၊ တစ်ခုချင်းစီကိုကိုယ်တိုင်ကိုင်တွယ်မယ်။ ဟုန်ကျယ် ရဲ့ မသေမျိုးအရာရှိ အတွက်၊ ကျစ်လင်အတွက်နဲ့ မင်းတို့အားလုံးအတွက်၊ တစ်ယောက်ချင်းစီက ပေးဆပ်ရမယ့်တရားမျှတမှုကို ငါက တစ်ခုချင်းစီ ပြန်ဆပ်ပေးမယ်"

"ဟုန်ကျယ်ကို ဝိုင်းထား၊ မသေမျိုးအရာရှိ ကို တိုက်ခိုက်တဲ့နေရာမှာ ပါဝင်ပတ်သက်သူ တစ်ယောက်မှ အလွတ်မပေးနဲ့"

သူ၏အေးစက်သော စကားလုံးများနှင့်အတူ စွမ်းအားကြီးမားသော မသေမျိုးစွမ်းအင် လှိုင်းလုံးတစ်ခု ချက်ချင်းပျံ့နှံ့သွားပြီး သူ့အနီးဆုံးတွင် ရပ်နေသော ချင်းဟွာက ပထမဆုံး ခံစားလိုက်ရ၏။

ဘုန်း

ဆယ်ကျန်း ကျော်မြင့်သော ရွှေရောင်ခန္ဓာကိုယ်က မြေကြီးပေါ်သို့ ဒူးထောက်ကျသွားစေရန် ချက်ချင်း ဖိနှိပ်ခံလိုက်ရပြီး ခန်းမကြီး၏ကြမ်းပြင်ပင်လျှင် ကြေမွသွားခဲ့ချေသည်။

မသေမျိုးစံအိမ်၏အပြင်ဘက်တွင် မရေမတွက်နိုင်သော ကောင်းကင်စစ်သည်များ သည် သူတို့၏လှံရှည်များကို တင်းကျပ်စွာဆုပ်ကိုင်လိုက်ကြပြီး သူတို့၏အော်ဟစ်သံများ ပဲ့တင်ထပ်သွားသည်နှင့်အမျှအဆုံးအစမဲ့သော မသေမျိုးစွမ်းအင်က ဟုန်ကျယ် တစ်ခုလုံးကို ချက်ချင်း ဖုံးလွှမ်းသွားကာ သက်ရှိများကို တုန်လှုပ်သွားစေခဲ့၏။

မသေမျိုးခုံရုံး၏စွမ်းအားက ဤအခိုက်အတန့်တွင် ထင်ရှားစွာ ပေါ်လွင်နေချေသည်။

ချီဖုန်းကြယ်တာရာ၏အမူအရာ အနည်းငယ် ပြောင်းလဲသွားပြီး ချင်းလွမ်၏မသေမျိုးစွမ်းအင် ကို ဖယ်ရှားရန် သူ၏လက်ကို အလိုအလျောက် လှုပ်ခါလိုက်ကာ ချင်းဟွာကို မျက်စိတစ်မှိတ်အတွင်း ပြန်လည် ဆွဲတင်လိုက်၏။

သူက ဒေါသတကြီးဖြင့် ပြောလိုက်သည်။ "တစ်ခုချင်းစီကို ကိုယ်တိုင်ကိုင်တွယ်မယ်ဆိုတာက ဘာကိုဆိုလိုတာလဲ။ တကယ်လို့ စုံစမ်းစစ်ဆေးမှုက အမှန်တရားကို အတည်ပြုတယ်ဆိုရင် မသေမျိုးခုံရုံးဟာ သူ့ရဲ့ကြီးကြပ်မှုမှာ ကျရှုံးခဲ့ပြီး မိစ္ဆာမသေမျိုးတွေကို ပြည်သူတွေကြားမှာ သောင်းကျန်းခွင့်ပေးခဲ့တယ်ဆိုတဲ့ အဓိပ္ပါယ်ပဲ၊ အသက်ရှင်ဖို့ပဲ မျှော်လင့်နေကြတဲ့သူတွေအတွက် ဒါက နားလည်ပေးလို့ ရပါတယ်"

"မင်းက အမှုကိုတောင် မစုံစမ်းဘဲ သေမျိုးလောက နဲ့ စတင်လိုက်တာပဲ၊ မင်းရဲ့ ရာထူးတံဆိပ်ကို ဆုံးရှုံးရမှာ မကြောက်ဘူးလား"

"ဒီနေ့ ငါ လိုက်လာတာ ကံကောင်းလို့၊ မဟုတ်ရင် မဟာမသေမျိုးစစ်သူကြီး ချင်းလွမ် ရဲ့ မျက်နှာအစစ်က ဘယ်လိုလဲဆိုတာ တကယ်ကို မသိနိုင်လောက်ဘူး"

"ဒါက ပုဂ္ဂိုလ်ရေးဘက်လိုက်မှု မရှိတာလား"

သူတို့နှစ်ယောက်စလုံးဟာ သေသွားပြီ၊ ဒေါသထွက်သောအကြောင်းပြချက်မဟုတ်လျှင် ၎င်းတို့ကို မည်သို့များအပြစ်ပေးနိုင်မည်နည်း။

"အစစ်အမှန်နတ်ဘုရား တစ်ပါးအနေနဲ့ ခင်ဗျားက မြင့်မားတဲ့ရာထူးကို ကိုင်ဆောင်ထားပေမယ့် မမေ့ပါနဲ့... ဟုန်ကျယ်ဟာ ချင်းလွမ်ရဲ့စီမံအုပ်ချုပ်မှုအောက်မှာ ရှိတယ်၊ ခင်ဗျားက ဒီကို အပန်းဖြေဖို့ သက်သက် လာတာပါ၊ ကျွန်တော်လည်း ကောင်းကင်ဘုံဥပဒေအတိုင်း ဆောင်ရွက်နေတာပါ"

ချင်းလွမ်က ချီဖုန်း ကို မကြည့်ဘဲ အပြင်ဘက်သို့သာ တိတ်ဆိတ်စွာ စိုက်ကြည့်နေခဲ့၏။

သူ၏အကြည့်အောက်တွင် ကောင်းကင်စစ်သည်များနှင့် စစ်သူကြီးများ အားလုံး တုန်လှုပ်သွားကြပြီးအလျင်အမြန်လှုပ်ရှားလိုက်ကြချေသည်။

ဤသို့တင်းကြပ်သော လေထုအောက်တွင်.

မြေကြီးပေါ်တွင် ဒူးထောက်နေသော ကျစ်ယန်က ထုံထိုင်းသော အမူအရာကိုဖြင့် ဒယိမ်းဒယိုင်ဖြင့် မတ်တပ်ရပ်လာကာ ဆက်လက်၍ ဒူးမထောက်ချင်တော့ချေ။ "ဒါဆို ခင်ဗျားကဘာအဓိပ္ပါယ်မှ မရှိဘူးပေါ့"

"ငါက ကောင်းကင်ဘုံဥပဒေအကြောင်းပဲ ပြောတာ၊အကြောင်းပြချက် မဟုတ်ဘူး" ချင်းလွမ်က သူ့ကို အလောင်းတစ်လောင်းလို တစ်ချက်ကြည့်ကာ အေးစက်စွာ တုံ့ပြန်လိုက်၏။

၎င်းကို ကြားလိုက်ရသောအခါ ကျစ်ယန်က သူ၏နှုတ်ခမ်းထောင့်များကို ဖြည်းညှင်းစွာကွေးကာ သေသပ်သောသွားဖြူဖြူများကို ထုတ်ဖော်ပြသလိုက်ပြီး လှောင်ပြောင်သောဟန်ဖြင့် ခေါင်းခါလိုက်ချေသည်။ "ခင်ဗျား မှားနေပြီ၊ အဲဒါက ခင်ဗျားပြောနေတဲ့ ကောင်းကင်ဘုံဥပဒေ မဟုတ်ဘူး"

ဤထူးခြားမှုမရှိသော နဂါးနတ်ဆိုးက သူ၏လည်ချောင်းထဲမှ အက်ကွဲနေသော လှောင်ပြောင်မှုကို အတင်းအကျပ်ညှစ်ထုတ်လိုက်သည့်အလား ပြောလိုက်၏။ "ခင်ဗျား ပြောနေတာက လက်သီးတွေအကြောင်း၊ လက်သီးပိုကြီးတဲ့သူက တရားမျှတမှုရှိတယ်လေ"

စကားမဆုံးမီမှာပင်..

ချင်းလွမ်၏မျက်နှာက ရုတ်တရက်ဖြူရော်သွားပြီး သူ၏သူငယ်အိမ်များအတွင်းရှိ မြင့်တက်လာသော သတ်ဖြတ်လိုသည့် ရည်ရွယ်ချက်ကို ဖုံးကွယ်ရန် မျက်လုံးများကိုအောက်ချလိုက်ချေသည်။