အခန်း (၁၅၈၃-၁၅၈၄)

အခန်း (၁၅၈၃) : နယ်ရုပ်များအားလုံး နေရာချထားပြီးခြင်း

တုကုပိုင်ထျန်းနှင့် ယန်းအိုက်တို့က တစ်ယောက်နှင့် တစ်ယောက် စက္ကန့်အနည်းငယ်ကြာ စိုက်ကြည့်နေကြပြီး သူတို့၏ အရှိန်အဝါများ ထိပ်တိုက်တွေ့မှုကြောင့် ပတ်ဝန်းကျင်ရှိ ဟင်းလင်းပြင်မှာ တွန့်လိမ်သွားခဲ့သည်။ သူတို့က လေဟာနယ်တိုက်ပွဲကွင်းပြင်သို့ တစ်ပြိုင်နက်တည်း ကူးသန်းပြောင်းရွှေ့သွားကြပြီး ရောက်ရှိသည်နှင့် တိုက်ပွဲကို ချက်ချင်း စတင်လိုက်ကြသည်။

မည်သည့်စကားပြောဆိုမှု သို့မဟုတ် စမ်းသပ်မှုမျိုးမျှ မရှိဘဲ တစ်ဦးကိုတစ်ဦး သတ်ဖြတ်ရန် တိုက်ရိုက် အားထုတ်ကြတော့သည်။

……………….

"သားရဲဘုရင် ... ငါတို့ လက်ရည်မစမ်းဖြစ်တာ တော်တော်ကြာသွားပြီမလား" ဝမ်ချုံးက ပြုံးလျက် ပြောလိုက်သည်။ သူတို့က သန့်စင်သော ကိုယ်ခန္ဓာလေ့ကျင့်သူများအဖြစ်နှင့် ရှေးဦးမူလအဆင့်သို့ ရောက်ရှိခဲ့သည့် လူနည်းစုထဲမှ ဖြစ်ကြသည်။ ထို့ကြောင့်ပင် သူတို့က တစ်ဦးနှင့်တစ်ဦး ရင်းနှီးကြသလို ပြိုင်ဘက်ဟောင်းများလည်း ဖြစ်နေကြ၏။

"ဒီတစ်ခါတော့ မင်းအနေနဲ့ ငကြောက်တစ်ယောက်လို ထွက်မပြေးဖို့ မျှော်လင့်တယ်" သားရဲဘုရင်က ဆိုသည်။ ကိုယ်ခန္ဓာလေ့ကျင့်သူတစ်ဦး ဖြစ်သော်လည်း သူ့ပုံစံမှာ ရိုးရှင်းသော အနက်ရောင်ဝတ်စုံနှင့် အတော်လေး ပိန်ပါးပြီး သာမန်လူတစ်ဦးကဲ့သို့ ဖြစ်၏။ သို့သော် သားရဲဘုရင်နှင့် ရင်းနှီးသူများကမူ ထိုအရာမှာ သူ့ယဉ်ပါးသောပုံစံသာဖြစ်ကြောင်း သိကြသည်။ တိုက်ပွဲစတင်သည်နှင့် သူသည် သားရဲပုံစံသို့ ကူးပြောင်းသွားမည်ဖြစ်ပြီး လုံးဝခြားနားသော လူတစ်ဦး ဖြစ်လာပေလိမ့်မည်။

"ဒီတစ်ခါတော့ မင်းမှာ သွေးအဆီအနှစ်ရဲ့ ပံ့ပိုးမှုမရှိတော့ဘူးဆိုတော့ ငါက ဘာလို့ ထွက်ပြေးရမှာလဲ" ဝမ်ချုံးက လှောင်ပြောင်လိုက်ပြီး သူ့လည်ပင်းကို အသံမြည်အောင် စောင်းပြီး အညောင်းအညာဖြေလိုက်သည်။

"မင်းမှာ အဲဒီသွေးအဆီအနှစ်ရှိတယ်ဆိုရင်တောင် ဘယ်သူက နောက်ဆုံးအောင်နိုင်သူ ဖြစ်မလဲဆိုတာ ပြောဖို့ခက်ပါတယ်"

သားရဲဘုရင်က မျက်လုံးများကို မှေးစင်းကြည့်လိုက်သည်။ သူက ဝမ်ချုံး၏ ယုံကြည်မှုကို သဘောမကျပေ။

"မင်းက စကားပဲ တတ်တာလား… တကယ်ပဲ အစွမ်းရှိတာလားဆိုတာ ကြည့်ကြသေးတာပေါ့"

သူ့အပေါ်ပိုင်းဝတ်စုံမှာ ပေါက်ကွဲထွက်သွားပြီး ပိန်ပါးသော ကိုယ်ခန္ဓာမှာ ကြွက်သားများဖြင့် ပြည့်နှက်လာသည်။ အရေပြားပေါ်တွင် တိရစ္ဆာန်ပုံစံ မျိုးနွယ်စုအမှတ်အသားများ ပေါ်ထွက်လာပြီးနောက် သားရဲဘုရင်သည် အထွတ်အထိပ် အမဲလိုက်သတ္တဝါတစ်ကောင်၏ လွှမ်းမိုးချုပ်ကိုင်သော အရှိန်အဝါကို ထုတ်လွှတ်လိုက်သည်။

"ဒါမှ ငါပြောတဲ့ တိုက်ပွဲမျိုး" ဝမ်ချုံးက ရယ်မောရင်း ပြောကာ သူကိုယ်တိုင်လည်း အသွင်ပြောင်းလိုက်သည်။

ဝမ်ဝေ့က ရှေးဟောင်းဖျက်ဆီးခြင်း အသွင်ပြောင်းလဲခြင်းကို စွန့်လွှတ်ခဲ့သည်မှာ ကြာပြီဖြစ်သော်လည်း ထိုကျင့်စဉ်ကို ဖန်တီးခဲ့သူမှာမူ စွန့်လွှတ်ခြင်း မရှိသေးပေ။ ဝမ်ချုံး၏ ကိုယ်ခန္ဓာမှာ ရှစ်ပေကျော်အထိ ကြီးထွားလာပြီး အရေပြားမှာ နီရဲလာကာ ရင်ဘတ်တွင် ရွှေရောင်အမှတ်အသားများ ပေါ်လာသည်။ နဖူးပေါ်တွင် အထက်သို့ ကွေးတက်နေသော ဦးချိုနှစ်စုံ ပေါက်လာပြီး မျက်လုံးများမှာ နီရဲသွားကာ လက်ကောက်ဝတ်များတွင် ကြေးလက်ကောက်တစ်စုံ ပေါ်ထွက်လာသည်။ သူ့အရှိန်အဝါမှာ ကြမ်းတမ်းကာ ပတ်ဝန်းကျင်ရှိ အသက်စွမ်းအင်အားလုံးကို အတင်းအကျပ် စုပ်ယူနေပုံရသည်။

"တိုက်ကြစို့" ဝမ်ချုံးက ဟိန်းဟောက်လိုက်ပြီး သားရဲဘုရင်နှင့်အတူ လေဟာနယ်တိုက်ပွဲကွင်းပြင်သို့ ဝင်ရောက်သွားသည်။

………………

"မြေကမ္ဘာ ဓားနတ်ဘုရား"လီမင်က မိမိရှေ့ရှိ လူငယ်ကို ကြည့်ရင်း ပြောလိုက်သည်။ ထိုလူငယ်မှာ အဝါရောင်ဆံပင်၊ မျက်လုံးညိုညို၊ ပိန်ပါးသောကိုယ်ခန္ဓာရှိပြီး အစိမ်းရင့်ရောင် သံချပ်ကာကို ဝတ်ဆင်ထားကာ ၁၂ လက်မထက်ပိုကျယ်သော ကြီးမားသည့် အနက်ရောင်ဓားကြီးကို ကိုင်ဆောင်ထားသည်။ သူ့တည်ရှိမှုမှာ တစ်စုံတစ်ဦးကို မြေကမ္ဘာ၏ အလေးချိန်ဖြင့် ဖိနှိပ်ထားသကဲ့သို့ လေးလံလှသည်။ စိတ်မကောင်းစရာမှာ သူ့ဂုဏ်သတင်းကြောင့် သူ့ခြိမ်းခြောက်မှုမှာ အခြားရှေးဦးမူလများအတွက် အရာမထင်ဘဲ သူ့အပေါ် အထင်သေးမှုကိုသာ ပိုတိုးစေသည်။

"တိုက်ပွဲရူး"လုကျန်းမင်ဟုလည်း သိကြသည့် မြေကမ္ဘာဓားနတ်ဘုရားက ခေါင်းညိတ်ပြသည်။

"မင်းကို နားချဖို့ ကြိုးစားတာက အပိုပဲဆိုတာ သိပေမဲ့ ငါ ကြိုးစားကြည့်ချင်သေးတယ်" လီမင်က ပြောသည်။

"မင်းက ငါ့ရဲ့ ပြိုင်ဘက်မဟုတ်ဘူး။ ဒါကြောင့် အချိန်မဖြုန်းနေနဲ့"

"အဲဒါက ဖြစ်နိုင်ပါတယ်" လုကျန်းမင်က တည်ငြိမ်စွာ ဆိုသည်။

"ဒါပေမဲ့ အရှင်တုကုရဲ့ အစီအစဉ် အောင်မြင်ဖို့အတွက် ငါ့အသက်ကို ရင်းဖို့ အသင့်ပဲ။ မင်းရော အဲဒီလိုလုပ်ဖို့ ပြင်ဆင်ထားရဲ့လား"

"မင်းက တကယ်ပဲ ထူးဆန်းတဲ့သူပဲ" လီမင်က သက်ပြင်းချလိုက်သည်။ ဤကဲ့သို့ ကျင့်ကြံဆင့်သို့ ရောက်ရှိနိုင်သူတိုင်းမှာ ရည်မှန်းချက်ကြီးမားပြီး မိမိကိုယ်ကိုယ် ရှင်းလင်းစွာ သိမြင်သူများ ဖြစ်ရမည်။ တစ်စုံတစ်ဦးကို လေးစားခြင်း သို့မဟုတ် အားကျခြင်းမှာ တစ်ပိုင်းဖြစ်သော်လည်း မြေကမ္ဘာဓားနတ်ဘုရားက တုကုပိုင်ထျန်းအပေါ် ထားရှိသည့်အတိုင်း ကိုးကွယ်ယုံကြည်နေခြင်းမှာ လုံးဝခြားနားသော ကိစ္စ ဖြစ်၏။

ဤကဲ့သို့သော စိတ်အခြေအနေမျိုးနှင့် သူ့ကျင့်ကြံဆင့်သို့ ရောက်ရှိရန်မှာ မဖြစ်နိုင်သလောက် ဖြစ်ပေသည်။ သို့သော်လည်း သူ့ထူးခြားသော ပါရမီ သို့မဟုတ် တစ်စုံတစ်ခုအပေါ် စွဲလမ်းမှုကြောင့် လုကျန်းမင်သည် မဖြစ်နိုင်သည်ကို ဖြစ်အောင် လုပ်ဆောင်နိုင်ခဲ့သည်။ သူသည် သူ့ကိုယ်ခန္ဓာ၊ ဝိညာဉ်နှင့် စိတ်ဓာတ်တို့ကို အခြားသူတစ်ဦးအတွက် မြှုပ်နှံထားသော်လည်း ခေတ်ဟောင်း၏ အမြင့်ဆုံး ကျင့်ကြံခြင်းအဆင့်သို့ ရောက်ရှိခဲ့ဆဲ ဖြစ်၏။

"ငြင်းခုံနေတာက အပိုပဲဆိုတော့ လက်သီးနဲ့ပဲ အဆုံးအဖြတ်ပေးကြတာပေါ့" သူတို့နှစ်ဦးသည် စကားစစ်ထိုးခြင်းကို ရပ်တန့်ကာ လေဟာနယ်တိုက်ပွဲကွင်းပြင်သို့ တိုက်ရိုက် ကူးသန်းပြောင်းရွှေ့သွားကြသည်။

…………..

မြေဆီလွှာနူးညံ့သည် မိန်းမလှတစ်ဦးဖြစ်ပြီး သူမ၏ နဖူးပေါ်တွင် မီးတောက်အမှတ်အသားတစ်ခု ရှိကာ သူမ ဝတ်ဆင်ထားသော မီးနီရောင် ဟန်ဖုနှင့် အလွန်လိုက်ဖက်လှသည်။ သူမက လေဟာနယ်တိုက်ပွဲကွင်းပြင်သို့ ဝင်ရောက်သွားပြီး ယန်းရှစ်ရုန် ပေါ်လာမည်ကို စောင့်ဆိုင်းနေသည်။ ယန်းရှစ်ရုန်၏ နဖူးပေါ်တွင် ဂိုဏ်း၏ ကံကောင်းခြင်းစွမ်းအားက သူ့ကို ပံ့ပိုးပေးနေကြောင်း ပြသသည့် သင်္ကေတတစ်ခု ပေါ်လာသည့်တိုင်အောင် သူမက ပြုံးနေခဲ့သည်။

"ဒါက တကယ်ပဲ တစ်ခုခု ထူးခြားသွားမယ်လို့ မင်း ထင်နေတာလား။ ချီယွမ်က ငါ့ကို အားအနည်းဆုံးလို့ ခေါ်လိုက်တာနဲ့ မင်းမှာ အမှန်တကယ် အနိုင်ရဖို့ အခွင့်အရေးရှိသွားပြီလို့ ထင်နေတာလား"

"ငါ အနိုင်ရဖို့ မလိုပါဘူး။ မင်ကို အချိန်အတော်ကြာအောင် ဆွဲထားနိုင်ရင် လုံလောက်ပါပြီ" ယန်းရှစ်ရုန်က ပြန်ဖြေလိုက်သည်။

"ဒါဆို မင်းတို့ရဲ့ အဖိုးတန် မဟာအကြီးအကဲရော။ ငါသိသလောက်တော့ သူက မင်းတို့ဂိုဏ်း စတင်တည်ထောင်ကတည်းက အပါရမီအရှိဆုံးသူ ဖြစ်နိုင်တယ်လေ။ သူ့ရဲ့ ဘေးကင်းလုံခြုံရေးအတွက် မင်း မစိုးရိမ်ဘူးလား" သူမက မေးသည်။

"သူ အဆင်ပြေမှာ သိတယ်"

"မင်းတို့လူတွေအပေါ် ထားရှိတဲ့ ယုံကြည်မှုက ချီးကျူးစရာပါပဲ" မြေဆီလွှာနူးညံ့က ပြုံးသည်။

"ဒါပေမဲ့ မင်းအတွက် စိတ်မကောင်းစရာကတော့ ချီယွမ်က မင်းအပေါ် အဲဒီလောက် ယုံကြည်မှု ထားရှိလိုက်တာဟာ ဉာဏ်မရှိတဲ့ လုပ်ရပ်ပဲ"

မြေဆီလွှာနူးညံ့၏ နဖူးပေါ်တွင်လည်း အလားတူအမှတ်အသားတစ်ခု ပေါ်လာပြီး သူမသည်လည်း သူမအင်အားစု၏ ကံကောင်းခြင်းကို သုံးကာ ခွန်အားကို မြှင့်တင်လိုက်သည်။ ယန်းရှစ်ရုန်မှာ တာအိုအခွင့်အလမ်းဂိုဏ်း၏ အားနည်းချက်ဖြစ်ပြီး သူ့ကို အနိုင်ယူနိုင်ခြင်းက တုကုပိုင်ထျန်း၏ အစီအစဉ် နောက်တစ်ဆင့်အတွက် အရေးပါလှသည်။

…………….

ချီယွမ်က သူ့ပြိုင်ဘက်ကို ကြည့်လိုက်သည်။

"ဒါကို တတ်နိုင်သမျှ မြန်မြန် အဆုံးသတ်ကြရအောင်" သူက သူ့တာအိုသက်သေပြလက်နက်ကို ဆင့်ခေါ်လိုက်ရာ မူလကျမ်းစာဟု ခေါ်သော စာအုပ်ပုံသဏ္ဌာန်ဖြင့် ပေါ်လာသည်။

"ငါက မင်းရဲ့ ပြိုင်ဘက်မဟုတ်ဘူးဆိုတာ သိတယ်။ ဒါပေမဲ့ ငါ့ကို အလွယ်တကူ ဖယ်ရှားနိုင်မယ်လို့ မင်းထင်နေရင်တော့ မင်းမှားသွားလိမ့်မယ်" ဖန်ကလောင်တံသူတော်စင်က လှောင်ပြောင်ရင်း သူ့ကျော်ကြားလှသော လက်နက်ဖြစ်သည့် စိန်များထက် ပိုမိုတောက်ပသော ဖောက်ထွင်းမြင်ရသည့် ကလောင်တံ သို့မဟုတ် စုတ်တံကို ဆင့်ခေါ်လိုက်သည်။ သူက ထိုအရာကို ဝှေ့ယမ်းလိုက်ရာ လေထုထဲတွင် စာသားအချို့ ပေါ်ထွက်လာသည်။

[ပညာရှိတစ်ဦးက ကွေးညွတ်နိုင်သော်လည်း ကျိုးပျက်ခြင်း မရှိစေရ။]

[လူတစ်ယောက်ရဲ့ အနာဂတ်မှာ ဘယ်လို အတားအဆီးပဲ ရှိပါစေ ရှေ့ဆက်သွားနိုင်စွမ်းအပေါ်ပဲ မူတည်တယ်။]

[မိုးမြေက သီလရှိသူတွေကို စောင့်ရှောက်တယ်။]

[သီလ၊ ယုံကြည်ခြင်းနဲ့ ကိုယ်ကျင့်တရားတို့က မတရားသော ဘဝအတွက် သံချပ်ကာတွေပဲ]

ထိုစာသားများသည် ဖန်ကလောင်တံသူတော်စင်ကို ကာကွယ်ပေးသည့် အရှိန်အဝါတစ်ခုအဖြစ် ပြောင်းလဲသွားသည်။

ချီယွမ်က မျက်မှောင်ကြုတ်လိုက်သည်။ အကယ်၍ ဤလူက လိပ်တစ်ကောင်ကဲ့သို့ အလုံပိတ်ကာကွယ်နေမည်ဆိုပါက ဤတိုက်ပွဲသည် နှစ်ပေါင်းသန်းချီ သို့မဟုတ် ယွမ်ခေတ်ကာလများစွာတိုင်အောင် ကြာရှည်သွားနိုင်သည်။

သူ့ကို အကာအကွယ် လျှော့ချလာအောင် ငါ ဆွဲဆောင်ရမယ်

ချီယွမ်က တွေးကာ အစီအစဉ်တစ်ခုကို ဖြည်းဖြည်းချင်း စတင်ရေးဆွဲလိုက်သည်။

…………………..

အထွတ်အမြတ်မျိုးနွယ်စုတောင်

ခေါင်းဆောင်နှစ်ဦးသည် ရုတ်ရုတ်သည်းသည်း ဖြစ်နေသည်ကို မြင်သောအခါ ချက်ချင်းပင် စိတ်လှုပ်ရှားသွားကြသည်။ သူတော်စင်က ရုတ်တရက် ပေါ်လာပြီး ဤရှုပ်ထွေးမှုများကို ရပ်တန့်မလားဆိုသည်ကို ခဏမျှ စောင့်ကြည့်နေခဲ့ကြသည်။ သူမ ပေါ်လာမည့် အရိပ်အယောင် မရှိသည်ကို တွေ့ရသောအခါ သူတို့ ချက်ချင်းပင် စတင်လှုပ်ရှားကြတော့သည်။

အထွတ်အမြတ်တောင်သည် ကစားနေခြင်း မဟုတ်ပေ။ သူတို့၏ ရှေးဦးမူလ နှစ်ပါးသာ လှုပ်ရှားခြင်း မဟုတ်ဘဲ ထိပ်သီးစံပြအဆင့် ဒါဇင်ဝက်နှင့် သာမန် စံပြအဆင့်များစွာကိုပါ ခေါ်ဆောင်ကာ နတ်ဆိုးနတ်ဘုရားချိုင့်ဝှမ်းဆီသို့ တိုက်ရိုက် ဦးတည်သွားကြသည်။ သူတို့က မည်သည့် အကြောင်းပြချက် သို့မဟုတ် နိုင်ငံရေးကစားကွက်ကိုမျှ အသုံးမပြုဘဲ သူတို့၏ အင်အားအကောင်းဆုံး လက်နက်နှင့် အဆောင်များကို အသုံးပြုကာ ထိုချိုင့်ဝှမ်းကို တိုက်ရိုက် တိုက်ခိုက်ကြပြီး ကာကွယ်ရေးအစီအရင်ကို ဖျက်ဆီးရန် အစွမ်းကုန် ကြိုးစားကြတော့သည်။

……………………..

ဗုဒ္ဓတစ်သောင်းဘုံ

ရှေးဦးမူလ လေးပါးသည် အတိုချုံး ဆွေးနွေးပွဲတစ်ခု ပြုလုပ်ခဲ့ကြသည်။

"ငါတို့ ဘာလုပ်သင့်လဲ"

"ငါတို့ကတော့ ကိုယ့်အလုပ်ကိုယ်ပဲ လုပ်ကြမယ်"

"ဒီလို ရုတ်ရုတ်သည်းသည်း ဖြစ်နေတာကို သူတော်စင်က အလိုရှိမှာ မဟုတ်ဘူးဆိုတာ မင်းသိသားပဲ"

"သူတော်စင်ရဲ့ ဘေးကင်းရေးက ငါတို့အတွက် ပထမဦးစားပေးပဲ။ အခု သူက ကျင့်ကြံရေးထဲ နစ်မျှောနေတာ။ တကယ်လို့ ရန်သူက တိုက်ခိုက်လာရင် ဘယ်လိုလုပ်မလဲ"

"သူမလို အဆင့်အတန်းရှိတဲ့ ရန်သူက တိုက်ခိုက်လာရင် ငါတို့က ဘာများ လုပ်နိုင်မှာမို့လို့လဲ"

"သူမအတွက် အချိန်ဆွဲပေးနိုင်ဖို့ ငါတို့ရဲ့ အစီအရင်ကို သုံးလို့ရတာပဲ"

"ငါကတော့ ငါတို့ တစ်ခုခု လုပ်သင့်တယ်လို့ ထင်တုန်းပဲ"

"အတိအကျ ပြောရရင် ဘာလဲ။ သူတော်စင်က ကမ္ဘာ့အရေးအရာတွေကို အာရုံမစိုက်နိုင်တော့တဲ့ အချိန်နဲ့ ကွက်တိ သူတို့ တိုက်ခိုက်ကြတာက တိုက်ဆိုင်မှုလို့ မင်းထင်နေလား။ ဒီလူတွေက ငါတို့ စကားကို နားထောင်မှာ မဟုတ်ဘူး။ ငါတို့ တစ်ဖက်ဖက်က မရပ်တည်သရွေ့ပေါ့။ ဒါပေမဲ့ အဲဒီလို လုပ်ရပ်က အခြေအနေကို ပိုပြီး ရှုပ်ထွေးသွားစေလိမ့်မယ်"

"ငါ စိုးရိမ်တာက တုကုပိုင်ထျန်းကိုပဲ။ တကယ်လို့ သူက ဒီအခွင့်အရေးကို သုံးပြီး ရွေးချယ်ခံကို တိုက်ခိုက်လာရင် ငါတို့ ဘာလုပ်ကြမလဲ"

"အခြေအနေက အဲဒီအဆင့်ထိ ဆိုးရွားသွားပြီဆိုမှပဲ အဲဒီကိစ္စကို ငါတို့ စဉ်းစားကြတာပေါ့"

ကြားနေရန် ဆုံးဖြတ်ခဲ့သည်မှာ ဗုဒ္ဓဘာသာ အင်အားစု တစ်ခုတည်း မဟုတ်ပေ။ အခြားသော အင်အားစု အားလုံးမှာလည်း ချက်ချင်းပင် စောင့်ကြည့်ရန် ဆုံးဖြတ်လိုက်ကြသည်။ တာအိုဘာသာ အင်အားစုတွင်မူ ဝင်ရောက်စွက်ဖက်သင့်၊ မသင့် ငြင်းခုံနေကြသည်။ သူတို့ ခေါင်းဆောင်အချို့က ဤအခွင့်အရေးကို သုံးပြီး အားနည်းသော အာဏာရှင်များကို တိုက်ခိုက်ကာ အကျိုးအမြတ်အချို့ ရယူလိုကြသည်။

အခြားအုပ်စုတစ်ခုကမူ ကြားဝင်ဖျန်ဖြေပေးလိုကြသည်။ လက်ရှိ တာအိုဘာသာအင်အားစုကို ဒုက္ခပေးနေသော အခြေခံပြဿနာမှာ သူတို့၏ ခေါင်းဆောင်ဖြစ်သူ အန္တိမသဟဇာတ၏ လုပ်ရပ်ကြောင့် ကမ္ဘာပေါ်တွင် သူတို့၏ ယုံကြည်မှုနှင့် ဂုဏ်သိက္ခာ ကင်းမဲ့နေခြင်းပင် ဖြစ်သည်။ အကယ်၍ သူတို့က ဤအခြေအနေကို ငြိမ်းချမ်းစွာ ဖြေရှင်းပေးနိုင်ပါက တာအိုဘာသာအတွက် ဂုဏ်သိက္ခာအချို့ ပြန်လည်ရရှိနိုင်မည်ဟု ယုံကြည်ကြသည်။ ကံကောင်းထောက်မစွာဖြင့် အများစုက ကြားနေရန် မဲပေးခဲ့ကြသဖြင့် ထိုအကြံအစည်များမှာ ပျောက်ကွယ်သွားခဲ့ရသည်။

အခြားသော ဂနာမငြိမ် ဖြစ်နေသူတစ်ဦးမှာ အကန့်အသတ်မဲ့လဲလှယ်ရေးခန်းမမှ ရွှေရှန်းပင် ဖြစ်၏။ သူက ဤရုတ်ရုတ်သည်းသည်း အခြေအနေကို အံ့ဖွယ်ယုံကြည်မှုဘုံရှိ နတ်ဘုရားများကို သင်ခန်းစာပေးရန် အကောင်းဆုံး အခွင့်အရေးအဖြစ် မြင်နေမိသည်။ သို့သော်လည်း လူအိုကြီးရှန်းချီက သူ့ကို စိတ်အေးအေးထားပြီး ကြားနေရန် အောင်မြင်စွာ ဖျောင်းဖျနိုင်ခဲ့သည်။

………….

မူလစည်းတံဆိပ်ကုန်းမြေ

ဝမ်ဝေ့က သူ့စစ်ကူများ ရောက်မလာသည်ကို သတိပြုမိလိုက်သည်။ သူ့ဦးနှောက်က ဖြေရှင်းချက်တစ်ခုကို ရှာဖွေရန် တတ်နိုင်သမျှ မြန်မြန် တုံ့ပြန်လိုက်သည်။ သူသည် နောက်ထပ် သဘောတူညီချက်တစ်ခုအတွက် လူရိုင်းမျိုးနွယ်စုနှင့် ဆက်သွယ်လိုက်သည်။ ခန္ဓာသာလွန်ခြင်းနှင့် ပတ်သက်သော အချက်အလက်များကြောင့် သူတို့က ဝမ်ဝေ့ကို ကူညီရန် သဘောတူညီခဲ့ကြသည်။

ထို့နောက်တွင် တိရစ္ဆာန်သားရေ ဘောင်းဘီကို ဝတ်ဆင်ထားပြီး၊ လည်ပင်းတွင် ခြင်္သေ့လည်ဆံမွှေးများ ပါသည့် ရင်ဘတ်ဟောင်းလောင်း ဝတ်စုံကို ဝတ်ဆင်ထားကာ၊ အရိုးဖြင့် ပြုလုပ်ထားသော ထိပ်ဖူးပါသည့် ရွှေရောင်လှံကို ကိုင်ဆောင်ထားသော ခုနစ်ပေနီးပါး မြင့်သည့် အမျိုးသားတစ်ဦးသည် အာကာပြင်ကို ဆွဲဖြဲကာ မူလစည်းတံဆိပ်မြို့တော်ဆီသို့ ကူးသန်းပြောင်းရွှေ့ ပေါ်လာခဲ့သည်။ သူက မြေစေးစစ်သည်တော်ကြီးကို ကြည့်လိုက်သည်။

"ငါ ရုပ်သေးတစ်ရုပ်ကို တရားဝင် အမဲမလိုက်ဖူးသေးဘူးလို့ ထင်တယ်" အုပ်ချုပ်သူခန်က ဆိုလိုက်သည်။

အခန်း (၁၅၈၄) : လုပ်ကြံသတ်ဖြတ်သူ၏ ထူးခြားချက်

လုပ်ကြံသတ်ဖြတ်သူက ရုတ်တရက် လှုပ်ရှားလိုက်ရာ သူမ၏အရှိန်မှာ အလွန်ပင် မြန်ဆန်လွန်းလှသဖြင့် ဝမ်ဝေ့ပင်လျှင် အချိန်မီ တုံ့ပြန်နိုင်ရန် ခဲယဉ်းသွားလေသည်။ ကံကောင်းထောက်မစွာဖြင့် သူက နည်းစနစ်တစ်ခုကို အလိုအလျောက် တုံ့ပြန်နိုင်စွမ်းအဖြစ် ပြောင်းလဲထားခဲ့ပြီးသား ဖြစ်၏။

ထို့ကြောင့် သူ့အာရုံကြောများနှင့် ဆက်နွှယ်နေသော မမြင်နိုင်ဖွယ် ကံကြမ္မာကြိုးမျှင်များက တုံ့ပြန်လိုက်သဖြင့် ပြန်လည်ခုခံနိုင်ခဲ့ကာ လုပ်ကြံသတ်ဖြတ်သူကို နောက်ဆုတ်ခွာသွားစေသည်။

သူမရဲ့ တာအိုက အတိအကျ ဘာလဲ…

ဝမ်ဝေ့က မိမိကိုယ်ကိုယ် မေးခွန်းထုတ်လိုက်မိသည်။ ထိုသူကို မြင်လိုက်ရသည့် အခိုက်အတန့်တွင် သူ သိထားသမျှ နည်းလမ်းအားလုံးကို အသုံးပြုကာ သတင်းအချက်အလက် စုဆောင်းရန် ကြိုးစားခဲ့သော်လည်း လုပ်ကြံသတ်ဖြတ်သူ၏ ဝတ်စုံမှာ သတင်းအချက်အလက် ဖုံးကွယ်ခြင်းအတွက် အပြည့်စုံဆုံး ပုံစံ ဖြစ်နေ၏။ ထို့ကြောင့် ဝမ်ဝေ့မှာ သူမ၏ တည်ရှိမှုပုံကြမ်းကို ချောင်းကြည့်ရန်မှတစ်ပါး အခြားရွေးချယ်စရာ မရှိတော့ပေ။

သူမ၏ တည်ရှိမှုမှတစ်ဆင့် သူမသည် အမျိုးသမီးတစ်ဦးဖြစ်ကြောင်း အချက်အလက်အချို့ကို သိရှိခဲ့ရသော်လည်း ကျန်အချက်အလက်အများစုမှာ အသုံးမဝင်လှပေ။ ဝမ်ဝေ့က ကျင့်ကြံခြင်းနှင့် ပတ်သက်သည့် အရာများကို သိရှိရန် ကြိုးစားသည့်အခါ အားလုံးမှာ ပိတ်ဆို့ခံထားရသည်။

ထိုအချက်ကြောင့် ဝမ်ဝေ့က မျက်မှောင်ကြုတ်သွားသော်လည်း ယခုမှာ သီအိုရီများ ထုတ်နေရမည့် အချိန်မဟုတ်ပေ။ ထို့အစား သူ့အနေနှင့် သတင်းအချက်အလက် အကန့်အသတ်ဖြင့်သာ ရှိနေသော တိုက်ပွဲတစ်ခုကို ဆင်နွှဲရတော့မည်ကို သိရှိကာ စိတ်ကို တင်းထားလိုက်သည်။

လုပ်ကြံသတ်ဖြတ်သူ၏ လှုပ်ရှားမှုများက ရုတ်တရက် ပိုမိုမြန်ဆန်လာသည်။ သူမ၏ ကိုယ်ခန္ဓာမှာ ဝမ်ဝေ့အနီးတွင် ကူးသန်းပြောင်းရွှေ့နေသကဲ့သို့ အလွန်မြန်ဆန်စွာ ရွေ့လျားနေ၏။ သို့သော် သူမ၏ ကြိုးပမ်းမှုမှာ အချည်းနှီးသာ ဖြစ်၏။ သူမ မည်သည့်ဘက်သို့ ရွေ့လျားသည်ဖြစ်စေ ထိုနေရာရှိ ဆွဲအားမှာ ရုတ်တရက် ပြောင်းလဲသွားစေရန် ကံကြမ္မာက ဆုံးဖြတ်ထားသကဲ့သို့ ဖြစ်နေပြီး သူမ၏ အရှိန်မှာ သိသိသာသာ လျော့ကျသွားခဲ့သည်။

ဝမ်ဝေ့အနေနှင့် ရန်သူက တိုက်ပွဲအပေါ် လွှမ်းမိုးထားသည်ကို ဤအတိုင်း ရပ်ကြည့်နေမည့်သူ မဟုတ်ပေ။ ထို့ကြောင့် သူ့ကံကြမ္မာမျက်လုံးကို အသုံးပြုကာ သူမ၏ နောက်ထပ်လှုပ်ရှားမှုကို ကြိုတင်ခန့်မှန်းလိုက်သည်။ သူမက သူ့ခေါင်းပေါ်မှနေ၍ ထိုးနှက်ရန် ပေါ်လာသည့်အချိန်တွင် ဝမ်ဝေ့သည် ပတ်ဝန်းကျင်ရှိ အာကာပြင်နှင့် အခြားသော ထွက်ပေါက်အားလုံးကို ချက်ချင်း ပိတ်ဆို့ထားသည့် ကြိုးမျှင်အချို့ကို ဖန်တီးလိုက်သည်။

သို့သော် အမျိုးသမီး လုပ်ကြံသတ်ဖြတ်သူ၏ တုံ့ပြန်မှုမှာ တည်ငြိမ်လှသည်။ သူမ၏ ခြေဖဝါးအောက်တွင် ရွှေရောင်အလင်းတစ်ခု ပေါ်လာပြီး ကြိုးမျှင်များ နီးကပ်လာသည်နှင့် သူမ၏ အရှိန်မှာ ရုတ်တရက် မြင့်တက်လာခဲ့သည်။

အမှန်စင်စစ် သူမကို ဖမ်းဆီးရန် ဖန်တီးထားသည့် ပိတ်ဆို့မှုများကို ထိတွေ့တော့မည့် အချိန်တိုင်းတွင် သူမ၏ ကိုယ်ခန္ဓာအရှိန်မှာ ပိုမိုမြန်ဆန်လာခြင်း ဖြစ်သည်။

တွန်းကန်အားလား …

ဝမ်ဝေ့က ခွဲခြမ်းစိတ်ဖြာလိုက်သည်။

သူမရဲ့ ကိုယ်ခန္ဓာက သူမအနားကို ချဉ်းကပ်လာတဲ့ ဘယ်စွမ်းအားကိုမဆို တွန်းကန်နိုင်တယ်။ ဒါပေမဲ့ ဒီတွန်းကန်အားက ကာကွယ်ရေးပုံစံ မဟုတ်ဘဲ ထွက်ပြေးဖို့အတွက် သူမရဲ့ အရှိန်ကို မြှင့်တင်ပေးတဲ့ နည်းလမ်းတစ်ခုပဲ။ သူမက အရှိန်တာအိုကို ကျင့်ကြံတာလား

ဝမ်ဝေ့အနေဖြင့် သူ့ခန့်မှန်းချက် မှန်၊ မမှန် မသေချာသော်လည်း ဤသည်မှာ သူ ရရှိနိုင်သမျှ သတင်းအချက်အလက်သာ ဖြစ်သဖြင့် ထိုအရာပေါ် အခြေခံကာ လှုပ်ရှားလိုက်သည်။ သူက သူ့အစီအစဉ်ကျမှု၊ မကျမှု တာအိုကို အသက်သွင်းလိုက်သည်။

[အစီအစဉ်ကျမှု : မည်သူကမှ အလင်းရဲ့ အရှိန်ထက် ပိုမမြန်ရ။]

[အစီအစဉ်မကျမှု : အရှိန်ကို အသစ်ပြန်လည် သတ်မှတ်လိုက်ပြီ။ တကယ်လို့ မင်းက အကန့်အသတ်ကို ကျော်ဖြတ်ချင်တယ်ဆိုရင် ဒီညီမျှခြင်းအသစ်ကို ဖြေရှင်းရမယ်။]

မိုးမြေ၏ နိယာမများမှာ ရုတ်တရက် ပြောင်းလဲသွားလေသည်။ ဝမ်ဝေ့နှင့် လုပ်ကြံသတ်ဖြတ်သူတို့မှာ သူတို့၏ အရှိန်မှာ လိပ်များကဲ့သို့ နှေးကွေးသွားသည်ကို တွေ့ရှိလိုက်ရသည်။ သို့သော် ဤသည်မှာ ပြဿနာ၏ အစသာ ရှိသေးသည်။ ဤမန္တန်အရ လုပ်ကြံသတ်ဖြတ်သူသည် ညီမျှခြင်းအချို့ကို ဖြေရှင်းနိုင်သရွေ့ အရှိန်မြှင့်တင်နိုင်လိမ့်မည်။

ကံမကောင်းစွာဖြင့် ထိုစည်းမျဉ်းများကို သူမ၏ ပြိုင်ဘက်အတွက် အကျိုးရှိစေရန် ရည်ရွယ်၍ ပုံစံထုတ်ထားခြင်း ဖြစ်သည်။ အရှိန်ကို ပြန်လည်သတ်မှတ်လိုက်ခြင်းဖြင့် အချိန်နှင့် အကွာအဝေးကို အခြေခံသည့် သာမန်ညီမျှခြင်းများမှာ အကျုံးမဝင်တော့ပေ။

အဆိုးရွားဆုံးမှာ အရှိန်အတွက် ညီမျှခြင်းသည် စက္ကန့်တိုင်းတွင် ပြောင်းလဲနိုင်ပြီး ရူပဗေဒနိယာမများကို လိုက်နာရန် မလိုခြင်းပင် ဖြစ်သည်။ မှန်ကန်သော ညီမျှခြင်းကို ရှာဖွေနိုင်မှသာ တည်ဆောက်ထားသော စနစ်သစ်၏ အကန့်အသတ်ကို ချိုးဖျက်နိုင်မည် ဖြစ်သည်။

ဝမ်ဝေ့သည် သူ တစ်ချိန်က ရှာဖွေတွေ့ရှိခဲ့သော စိုးရိမ်ရသည့် ထိုးနှက်မှုစနစ်အပေါ် အခြေခံ၍ ဤမန္တန်ကို ဖန်တီးခဲ့သူဖြစ်သဖြင့် ထိုအဓိပ္ပာယ်မရှိသော ညီမျှခြင်းများကို တွက်ချက်ရာတွင် အခက်အခဲ မရှိပေ။ သို့သော် လုပ်ကြံသတ်ဖြတ်သူအတွက်မူ ထိုသို့မဟုတ်ပေ။

ထို့ကြောင့် ညီမျှခြင်းကို တွက်ချက်ပြီးနောက် ဝမ်ဝေ့သည် အရှိန်အကန့်အသတ်ကို ရုတ်တရက် ချိုးဖျက်လိုက်သည်။ သူက သူမ၏ ခေါင်းအထက် ပေါ်လာပြီး သူမ၏ မျက်နှာကို ကန်ချလိုက်ရာ မြေပြင်ပေါ်သို့ ပြုတ်ကျသွားစေသည်။

ထိုမျှ မြင့်မားသောအဆင့် တိုက်ပွဲတစ်ခုတွင် သူ့ကိုယ်ခန္ဓာ ခေတ္တရပ်တန့်သွားခြင်းမှာ အသက်အန္တရာယ် ရှိနိုင်သော်လည်း အရှိန်အကန့်အသတ်ကြောင့် ၎င်းမှာ ပြဿနာ မဟုတ်တော့ပေ။ သူက နောက်ထပ် ညီမျှခြင်းတစ်ခုကို ထပ်မံဖြေရှင်းလိုက်ပြီး သူ့ကိုယ်ခန္ဓာက လှုပ်ရှားသွားသည်။ သူက အလွန်မြန်ဆန်လှသဖြင့် လုပ်ကြံသတ်ဖြတ်သူ မြေပြင်ပေါ်သို့ မကျမီတွင် သူမရှေ့သို့ ရောက်ရှိနေလေပြီ။

ဝမ်ဝေ့က သူမ၏ ကျောရိုးကို ချိုးပစ်ရန် ရည်ရွယ်ကာ လက်သီးဖြင့် ထိုးနှက်လိုက်သည်။ အမှန်စင်စစ် သူ့ရည်ရွယ်ချက်အစစ်အမှန်မှာ သူ့အကြွင်းမဲ့တာအိုစိတ်ဆန္ဒကို သူမ၏ ကိုယ်ခန္ဓာအတွင်း ပျံ့နှံ့သွားစေရန် ဖြစ်၏။

ဝမ်ဝေ့၏ တာအိုစိတ်ဆန္ဒ နည်းစနစ် အားသာချက်တစ်ခုမှာ ကာကွယ်ရေးများကို ကျော်လွှားနိုင်စွမ်း ရှိခြင်း ဖြစ်သည်။ တစ်စုံတစ်ရာသော နေရာတွင် တည်ရှိနေရန် ကံကြမ္မာပါလာသည်ဟူသော အယူအဆဖြင့် သူ့အစစ်အမှန်စိတ်ဆန္ဒသည် ကာကွယ်ရေး အစီအမံအများစုကို ကျော်ဖြတ်နိုင်သည်။ သို့သော် ထိုနေရာတွင် မြဲမြံအောင် ထားရှိရန်မှာမူ အခြားကိစ္စတစ်ခု ဖြစ်ပေသည်။

ထိပ်သီးစံပြများနှင့် ရင်ဆိုင်ရချိန်တွင် ဝမ်ဝေ့သည် သူ့အစစ်အမှန်စိတ်ဆန္ဒကို တစ်နေရာတည်းတွင် မြဲမြံနေစေရန် ကံကြမ္မာကို စီမံနိုင်သည်။ သို့သော် ဤနည်းလမ်းမှာ အခြားသော ရှေးဦးမူလများအတွက် အသုံးမဝင်ပေ။ ရှေးဦးမူလများ၏ တာအိုစိတ်ဆန္ဒ သို့မဟုတ် စိတ်ဆန္ဒသဏ္ဍာန်ပြခြင်းများတွင်လည်း ကိုယ်ပိုင်ဂုဏ်သတ္တိများ ရှိနေသဖြင့် ပြင်ပမှ စိတ်ဆန္ဒများကို ဖယ်ရှားနိုင်သည့် နည်းလမ်းများ ရှိကြသည်။

လုပ်ကြံသတ်ဖြတ်သူ၏ ကိုယ်ခန္ဓာမှာ ကျိုးပဲ့သံနှင့်အတူ အပေါ်သို့ လွင့်တက်သွားသည်။ ဝမ်ဝေ့က ညီမျှခြင်းအသစ်ကို လျင်မြန်စွာ တွက်ချက်လိုက်သော်လည်း သူ အောင်မြင်ပြီး တိုက်ခိုက်ရန် ပြင်လိုက်ချိန်တွင် လုပ်ကြံသတ်ဖြတ်သူ၏ ကိုယ်ခန္ဓာမှာ ပျောက်ကွယ်သွားခဲ့ပြီ ဖြစ်သည်။

သူ့အန္တရာယ်အာရုံက နိုးကြားလာပြီး ကိုယ်ခန္ဓာက သူ့အလိုလို လှုပ်ရှားသွားသည်။ ကံကြမ္မာမြစ်နှင့် ဆက်နွှယ်နေသော ကံကြမ္မာကြိုးမျှင်များကြောင့် သူ့တုံ့ပြန်မှုများကို အတိတ်၊ ပစ္စုပ္ပန်နှင့် အနာဂတ်တို့က ကိုယ်တိုင် လမ်းညွှန်ပေးနေသည်။

ထို့ကြောင့် သူ တုံ့ပြန်နိုင်သည်ထက် ပိုမြန်သော အရာဟူ၍ အနည်းငယ်သာ ရှိသင့်သည်။ သို့သော် ဤအမျိုးသမီးမှာမူ ထိုကဲ့သို့သော အရှိန်အဆင့်သို့ ရောက်ရှိနေခဲ့သည်။ ဝမ်ဝေ့က သူ့ဦးခေါင်းကို သီသီလေး ရှောင်တိမ်းလိုက်နိုင်သော်လည်း သူမ၏ တိုက်ခိုက်မှုကြောင့် သူ့ပုခုံးသားတစ်ပိုင်း ပြတ်ထွက်သွားခဲ့သည်။

သို့သော် အန္တရာယ်မှာ ယခုမှ စတင်ခြင်းသာ ဖြစ်သည်။ ဝမ်ဝေ့၏ ကိုယ်ခန္ဓာသည် ဗီဇအရ တုံ့ပြန်လိုက်ပြီး သူ့နှလုံးသားကို ကျုံ့လိုက်ကာ ကိုယ်ခန္ဓာ၏ အခြားတစ်နေရာသို့ ရွှေ့ပြောင်းလိုက်သည်။ ထိုလှုပ်ရှားမှုမှာ အချိန်ကိုက်ပင် ဖြစ်၏၊ အကြောင်းမှာ ဓားငယ်တစ်လက်က သူ့ရင်ဘတ်ကို ဖောက်ထွက်သွားပြီး တာအိုစိတ်ဆန္ဒတစ်ခုကို ဗိုင်းရပ်စ်တစ်ခုကဲ့သို့ ပျံ့နှံ့စေခဲ့သောကြောင့် ဖြစ်၏။

ဝမ်ဝေ့ကဲ့သို့သော မြင့်မားသည့် တည်ရှိမှုတစ်ခုအတွက် နှလုံးသား၊ ကျောရိုး သို့မဟုတ် ဦးခေါင်းကဲ့သို့သော နေရာများသည် အားနည်းချက်များ မဟုတ်တော့ပေ။ သို့သော် ထိုနေရာများသည် တာအိုစိတ်ဆန္ဒများ၏ တိုက်ခိုက်မှုကို ပိုမိုခံရလွယ်သည်။ တစ်ခါမျှ ကူးစက်ခံရပြီဆိုလျှင် ထိုစွမ်းအားများကို ပြန်လည်ရှင်းလင်းရန်မှာ ပိုမိုခက်ခဲလှသည်။

ဝမ်ဝေ့မှာ ကျပ်တည်းသော အခြေအနေနှင့် ရင်ဆိုင်နေရသော်လည်း ထိတ်လန့်ခြင်း မရှိပေ။ ထို့အစား သူက ပြင်းထန်သော နည်းလမ်းတစ်ခုကို အသုံးပြုလိုက်သည်။ သူသည် ပတ်ဝန်းကျင်ရှိ အရာအားလုံးကို ဖျက်ဆီးပစ်ရန် ဗလာနတ္ထိစွမ်းအားကို ပေါက်ကွဲထုတ်လွှတ်လိုက်သည်။

သူ့လုပ်ရပ်မှာ သူ နားမလည်နိုင်လောက်အောင် မြန်ဆန်နေသော လုပ်ကြံသတ်ဖြတ်သူကို သေစေခြင်း သို့မဟုတ် ဒဏ်ရာရစေခြင်း မရှိသော်လည်း သူမကို သူမြင်နိုင်လောက်သည့် အရှိန်အထိ နှေးကွေးသွားစေခဲ့သည်။

သူသည် မိမိ၏ ကံကြမ္မာကို အသိပညာဖြင့် ကျိန်စာတိုက်ခံထားရသူအဖြစ် ပြောင်းလဲလိုက်ရာ သူ့ထောက်လှမ်းနိုင်စွမ်းကို မြှင့်တင်ပေးလိုက်သည်။ ထိုအခါမှ ဝမ်ဝေ့သည် သူမ၏ အရှိန်များ ရုတ်တရက် မြင့်တက်လာခြင်း၏ အရင်းအမြစ်ကို သဘောပေါက်သွားတော့သည်။

သူမ၏ နည်းစနစ်မှာ ကျိလန်ဖန်း၏ နည်းစနစ်နှင့် ဆင်တူသည်။ သူမသည် သူမ၏ အရှိန်ကို ဟန့်တားနိုင်သည့် မိုးမြေ၏ နိယာမများမှ ခေတ္တကင်းလွတ်ခွင့် ရရှိသွားခြင်း ဖြစ်၏။ တစ်နည်းအားဖြင့် ပွတ်တိုက်အား၊ ဆွဲငင်အား၊ ဟင်းလင်းပြင်နှင့် အခြားသော အချက်အလက်များစွာတို့က သူမ မည်မျှမြန်သည်ဆိုခြင်းကို မဆုံးဖြတ်နိုင်တော့ခြင်း ဖြစ်သည်။

တစ်ခုခုတော့ မှားနေပြီ

ဝမ်ဝေ့က တွေးလိုက်သည်။ ဤကဲ့သို့ ပြောင်မြောက်လှသော နည်းစနစ်မှာ သူမ၏ တာအိုသည် အရှိန်ဖြစ်ကြောင်း ကောက်ချက်ချရန် ခိုင်လုံသော သက်သေပင် ဖြစ်သင့်သည်။

သို့သော် သူသည် ထူးခြားချက်တစ်ခုကို သတိပြုမိလိုက်သည်။ ထိုအရာမှာ သူမတာအိုစိတ်ဆန္ဒ၏ ဂုဏ်သတ္တိမှာ အရှိန်မဟုတ်ဘဲ လိုက်လျောညီထွေဖြစ်မှုနှင့် ပြောင်းလဲမှုတို့ ဖြစ်နေခြင်း ဖြစ်၏။ လုပ်ကြံသတ်ဖြတ်သူသည် သူမ၏ ကိုယ်ပိုင်စိတ်ဆန္ဒကို ဝမ်ဝေ့၏ ကံကြမ္မာစွမ်းအားနှင့် လိုက်လျောညီထွေ ဖြစ်စေကာ ထိုအရာကို ပြန်လည်တုံ့ပြန်နိုင်သော အရာအဖြစ် ပြောင်းလဲခြင်းဖြင့် ဝမ်ဝေ့၏ တာအိုစိတ်ဆန္ဒကို သူမ၏ ကိုယ်ခန္ဓာမှ ဖယ်ရှားခဲ့ခြင်း ဖြစ်သည်။

ဝုန်း

ဝမ်ဝေ့သည် အလင်းတစ်ချက်ကို မြင်လိုက်ရပြီး သူသတိမထားမိခင်မှာပင် သူ့ဘယ်ဘက်လက်မောင်းမှာ ပျောက်ဆုံးသွားခဲ့လေပြီ။ သို့သော် သူ့မျက်လုံးများထဲတွင် အလင်းတစ်ချက် လက်သွားသည်။

သူမက ဗလာနတ္ထိစွမ်းအားနဲ့ လိုက်လျောညီထွေ ဖြစ်အောင် လုပ်လိုက်တာပဲ … ဒါကြောင့် သူမရဲ့ အရင်က အရှိန်ကို ပြန်ရသွားတာ

သူမ၏ တာအိုမှာ လိုက်လျောညီထွေဖြစ်ခြင်း ဖြစ်ကြောင်း သူ မသေချာသေးသော်လည်း တစ်ခုခုက သူ့ကို ဇဝေဇဝါ ဖြစ်စေဆဲ ဖြစ်သည်။ ထိုအရာမှာ သူမသည် အရှိန်တာအိုကို အဘယ်ကြောင့် ဤမျှ ကောင်းမွန်စွာ အသုံးပြုနိုင်သနည်း ဆိုသည့် မေးခွန်း ဖြစ်ပေသည်။

သူမ အရှိန်တာအိုကို အသုံးပြုပုံမှာ အခြားသော တာအိုများမှတစ်ဆင့် အရှိန်ကို မြှင့်တင်ပေးသူထက် အရှိန်ကို ပင်မတာအိုအဖြစ် ကျင့်ကြံထားသူနှင့် ပို၍ တူညီနေသည်။

ငါ တစ်ခုခု လွဲနေပြီ …

ဝမ်ဝေ့ တွေးလိုက်သည်။ သို့သော် ယခုမှာ ထိုအရာများကို စဉ်းစားနေရမည့် အချိန်မဟုတ်ပေ။ သူသည် အန္တရာယ်အတွင်း ရောက်ရှိနေဆဲဖြစ်ပြီး ဖြေရှင်းချက်တစ်ခု လိုအပ်နေသည်။

သူသည် မန္တန်တစ်ခုကို ရွတ်ဆိုရန် သူ့ဘယ်ဘက်လက်ကို မြှောက်လိုက်သည်။

ဗလာနတ္ထိ တွင်းနက်

ဝမ်ဝေ့၏ လက်ဖဝါးပေါ်တွင် တောက်ပသော အလင်းလုံးတစ်ခု ပေါ်လာပြီး နယ်ပယ်တစ်ခုလုံးကို တုန်ခါသွားစေသည်။ ခန်နှင့် မြေစေးစစ်သည်တော်ကြီးတို့မှာ ဝမ်ဝေ့၏ အစီအစဉ်ကျမှု၊ မကျမှုတာအို နည်းစနစ်ကို သုံးကတည်းက ဤနေရာမှ ဝေးရာသို့ ရှောင်ထွက်သွားကြခြင်းမှာ ပညာရှိရာ ရောက်ပေသည်။

အရာအားလုံးသည် တစ်နေ့တွင် ဗလာနတ္ထိသို့ ပြန်သွားရမည် ဖြစ်သည်။ ဖန်ဆင်းခြင်း အားလုံး၊ စကြဝဠာ၊ ဟင်းလင်းပြင်နှင့် ကံကြမ္မာပင် ဖြစ်စေ အရာအားလုံးမှာ မူလအစသို့ ပြန်သွားရမည် ဖြစ်ပြီး ထိုမူလအစမှာ ဗလာနတ္ထိပင် ဖြစ်၏။

ဤအယူအဆကို အခြေခံ၍ ဝမ်ဝေ့၏ လက်ဖဝါးပေါ်ရှိ ဗလာနတ္ထိ တွင်းနက်သည် အရှိန်မြန်သော လုပ်ကြံသတ်ဖြတ်သူ အပါအဝင် ပတ်ဝန်းကျင်ရှိ အရာအားလုံးကို စုပ်ယူတော့သည်။

သူမက ပစ်မှတ်နှင့် ဝေးရာသို့ အမြန်ဆုံး ပြေးထွက်ရန် ကြိုးစားလိုက်သည်။ သို့သော် သူမ၏ ကြိုးပမ်းမှုမှာ အချည်းနှီး ဖြစ်ခဲ့ရသည်။ တွင်းနက်သည် အရာအားလုံးကို စုပ်ယူနေပြီး သူမက နိယာမများမှ ကင်းလွတ်ခွင့် ရရှိရန် အသုံးပြုခဲ့သော အခြေခံအယူအဆများကိုပါ စုပ်ယူနေခြင်း ဖြစ်သည်။

လုပ်ကြံသတ်ဖြတ်သူသည် သူမ၏ ကံကြမ္မာကို အလွယ်တကူ လက်ခံမည့်သူ မဟုတ်သဖြင့် အပြင်းအထန် ပြန်လည်ခုခံသည်။ မိုးမြေအကြားတွင် အချိန်မြစ်ကြောင်း၏ ပုံရိပ်တစ်ခု ပေါ်လာပြီး သူမနှင့် တိုက်ရိုက် ဆက်သွယ်လိုက်သည်။ သူမက ပြေးထွက်ရန်အတွက် ထိုစွမ်းအားကို အသုံးပြုခဲ့သော်လည်း အသုံးမဝင်ခဲ့ပေ။

ဝမ်ဝေ့၏ နည်းစနစ်မှာ သဘောတရားအရ အကြွင်းမဲ့စွမ်းရည် မဟုတ်သေးသော်လည်း ဆင်တူသော စွမ်းပကား ရှိသည်။ သူ့ဝိညာဉ်ကို ပြန်လည်ဖြည့်တင်းရန် မစိုးရိမ်ဘဲ ဝမ်ဝေ့သည် သူ့ဗလာနတ္ထိဘီးလုံးမှ စွမ်းအင် အမြောက်အမြားကို သုံးကာ မန္တန်ကို မြှင့်တင်လိုက်သည်။

လုပ်ကြံသတ်ဖြတ်သူ၏ မျက်နှာဖုံးမှာ ကိုယ်ခန္ဓာမှ ကွာကျကာ တွင်းနက်ထဲသို့ ပါသွားပြီး အပြာရောင် မျက်လုံးများနှင့် အနီရောင် ဆံပင်ရှိသော မိန်းမလှတစ်ဦး၏ မျက်နှာ ပေါ်ထွက်လာသည်။ သို့သော် မည်သူမျှ သူမ၏ ရုပ်ရည်ကို စိတ်မဝင်စားကြပေ။ အထူးသဖြင့် သူမ၏ အသက်အန္တရာယ် စိုးရိမ်နေရသော လုပ်ကြံသတ်ဖြတ်သူကိုယ်တိုင်ပင် ဖြစ်၏။

သူမ၏ ကိုယ်ခန္ဓာမှာ ရုတ်တရက် တုန်ခါသွားပြီးနောက် အခြားသော ကိုယ်ပွားနှစ်ခု ပေါ်ထွက်လာသည်။ ကိုယ်ပွားတစ်ခုက လွတ်မြောက်ရန်အတွက် အတိတ်သို့ သွားရန် ကြိုးစားပြီး ဒုတိယတစ်ခုက အခြားသော အချိန်စက်ဝန်းတစ်ခုသို့ ဦးတည်ကာ နောက်ဆုံးတစ်ခုကမူ အနာဂတ်သို့ ဦးတည်သွားသည်။

အကြွင်းမဲ့ လွတ်မြောက်ရေး အရည်အချင်းလား …

ဝမ်ဝေ့က မျက်မှောင်ကြုတ်လျက် တွေးလိုက်သည်။

သူမက ဒုတိယတန်းစား ရှေးဦးမူလတစ်ယောက် ဖြစ်နိုင်တယ် …