အခးန် (၁၅၈၅-၁၅၈၆)

အခန်း (၁၅၈၅) : ရှေးဦးမူလ အဆင့်အတန်းများ ခွဲခြားခြင်း

ရှေးဦးမူလများ၏ အဆင့်အတန်းကို နားလည်သဘောပေါက်သွားပြီးနောက် ဝမ်ဝေ့မှာ မိမိကိုယ်ကိုယ် အခက်တွေ့နိုင်ကြောင်း ရိပ်မိလိုက်သည်။ သူတို့လေ့ကျင့်စဉ်ကာလအတွင်း ဝူဟုန်က ဝမ်ဝေ့၏ အခြေအနေနှင့် သူ သင်ယူရန် လိုအပ်သည့်ပမာဏကို ပိုမိုနားလည်စေရန်အတွက် ရှေးဦးမူလကို အဆင့်ခြောက်ဆင့် ခွဲခြားပြခဲ့သည်။ ဤသည်မှာ သူ မာန်တက်မလာစေရန် တားဆီးသည့် နည်းလမ်းတစ်ခုလည်း ဖြစ်ပေသည်။

အနိမ့်ဆုံးအတန်းအစားမှာ ပဉ္စမမြောက်တန်းစား ဖြစ်ပြီး ဤအဆင့်ကို ချို့ယွင်းချက်ရှိသော ရှေးဦးမူလများဖြစ်သည့် ရွှေရှန်းကဲ့သို့ သူများအတွက် သတ်မှတ်ထားသည်။ လွန်ခဲ့သော ယွမ်ခေတ်ကာလ အနည်းငယ်ခန့်က အကန့်အသတ်မဲ့လဲလှယ်ရေးခန်းမကို ထိန်းချုပ်ရန်အတွက် ထိုသူတို့ကို နယ်ရုပ်အဖြစ် အသုံးမပြုမီအထိ ဤအဆင့်မှာ မတည်ရှိခဲ့ပေ။ ပဉ္စမမြောက်တန်းစား ရှေးဦးမူလများ၏ အစွမ်းမှာ တခြားအဆင့်နှင့် သိပ်မကွာခြားသော်လည်း သူတို့၏ ချို့ယွင်းချက်များမှာ အလွယ်တကူ တိုက်ခိုက်ခံရနိုင်သည့် အားနည်းချက်ကြီးများ ဖြစ်နေသည်။

စတုတ္ထမြောက်တန်းစား ရှေးဦးမူလများမှာ ပုံမှန်အဆင့်များ ဖြစ်ကြသည်။ သူတို့သည် အကြွင်းမဲ့စွမ်းရည် သုံးမျိုးကို ကျွမ်းကျင်ပိုင်နိုင်ကြပြီး မိုးမြေ၏ ကောင်းချီးကို ရရှိထားသဖြင့် ဝိညာဉ်များ သန်မာကာ ထိုစွမ်းရည်များကို ဝန်ထုပ်ဝန်ပိုးမရှိဘဲ အသုံးပြုနိုင်သည်။ စုန့်အမြွှာနှစ်ယောက်၊ ယန်းရှစ်ရုန်နှင့် နန်းတွင်းအကြံပေးကြီးတို့ကဲ့သို့သော ရှေးဦးမူလအသစ်များမှာ ဤအဆင့်တွင် ပါဝင်သည်။

ဤအဆင့်သည် စံပြ တားမြစ်တိုက်ခိုက်ရေးအဆင့်ကို ရရှိရန် လိုအပ်ချက်လည်း ဖြစ်သည်။ တစ်နည်းအားဖြင့် ဝမ်ဝေ့အနေဖြင့် သူ့အစွမ်းကို ၉၀ ရာခိုင်နှုန်းအထိ ပိတ်ထားစဉ်တွင် ဤအဆင့်ရှိ တိုက်ခိုက်နိုင်စွမ်းရှိနေရုံဖြင့် တားမြစ်တိုက်ခိုက်ရေးအဆင့်၏ အောင်မြင်မှုကို ရရှိမည်ဖြစ်သည်။

ဝူဟုန်နှင့် အတူတွက်ချက်မှုများအရ အဆင့်မြင့်ရှေးဦးမူလများ၏ အစွမ်းရှိနေခြင်းမှာ ဘာမှအဓိပ္ပာယ်မရှိပေ။ အကြောင်းမှာ ဤသို့ အဆင့်ခွဲခြားခြင်းမှာ တရားဝင်သတ်မှတ်ချက် မဟုတ်ဘဲ ဝူဟုန်က သူမကိုယ်တိုင်နှင့် သူမဘေးနားရှိ လူများအတွက် ဖန်တီးထားခြင်းသာ ဖြစ်သောကြောင့် ဖြစ်သည်။

တတိယတန်းစား ရှေးဦးမူလများမှာ အောက်ခြေအဆင့်ထက် တစ်ဆင့်မြင့်သည်။ ထိုအဆင့်တွင် ရှေးဦးမူလများသည် အကြွင်းမဲ့စွမ်းရည် သုံးမျိုးသာ ရှိနေခြင်းမဟုတ်ပေ။ သူတို့တွင် အမြန်နှုန်း အကြွင်းမဲ့စွမ်းရည်၊ ကာကွယ်ရေးအကြွင်းမဲ့စွမ်းရည်၊ စည်းပိတ်ခြင်းအကြွင်းမဲ့စွမ်းရည်၊ လွတ်မြောက်ခြင်း အကြွင်းမဲ့စွမ်းရည်နှင့် အခြားများစွာ ရှိကြသည်။ ထိုအဆင့်ရှိ ရှေးဦးမူလများသည် နည်းစနစ်များစွာကို အထွတ်အထိပ်အထိ မြှင့်တင်ထားကြသဖြင့် သူတို့ကို တိုက်ခိုက်ခြင်းမှာ ရန်သူ့အနေနှင့် သူတို့၏အကြွင်းမဲ့စွမ်းရည်များဖြင့် မရပ်မနား ဗုံးကြဲတိုက်ခိုက်ခံရသကဲ့သို့ ဖြစ်နေလိမ့်မည်။

ထိုအဆင့်တွင် အသက်အရွယ်မှာလည်း အရေးကြီးသော အခန်းကဏ္ဍမှ ပါဝင်လာသည်။ ရှေးဦးမူလတစ်ဦး အသက်ကြီးလေလေ အကြွင်းမဲ့စွမ်းရည်များ ဖန်တီးရန် အချိန်ပိုရလေလေဖြစ်သည်။ ဝမ်ဝေ့သည် မိမိ၏ ငယ်ရွယ်သောအသက်အရွယ်ကြောင့် ရှိနေသည့် ကန့်သတ်ချက်ကို သိရှိထားသည်။ ထို့ကြောင့် သူသည် အစွမ်းထိန်းချုပ်ရေးစွမ်းရည်ကို အသုံးချကာ ထိုရှေးဦးမူလအဆင့်သို့ တစ်ဆင့်တည်းနှင့် ရောက်ရှိရန် စီစဉ်နေခြင်း ဖြစ်၏။

ဒုတိယတန်းစား ရှေးဦးမူလများမှာမူ နောက်တစ်ဆင့်တွင် ရှိနေသည်။ စံပြအဆင့် တိုက်ပွဲများ၏ အဓိကအစိတ်အပိုင်းတစ်ခုမှာ မဟာယန္တရားများကို အသုံးချခြင်း ဖြစ်သည်။ စံပြတစ်ယောက်၏ အစွမ်းမြင့်မားလေလေ ဤအချက်မှာ ပိုမိုထင်ရှားလေလေ ဖြစ်ပြီး ရှေးဦးမူလအဆင့်တွင်လည်း မပြောင်းလဲပေ။ ဆန့်ကျင်ဘက်အနေဖြင့် ထိုအရာမှာ ပို၍ပင် အရေးကြီးလာသည်။

ဝူဟုန်၏ ပြောကြားချက်အရ ဒုတိယတန်းစား ရှေးဦးမူလတစ်ဦးသည် မဟာယန္တရားတစ်ခုခုနှင့် ပြီးပြည့်စုံသော ဆက်နွှယ်မှုကို တည်ဆောက်ထားပြီး သူတို့၏ စွမ်းအားများကို ခန္ဓာကိုယ် သို့မဟုတ် ဝိညာဉ်အပေါ် ဝန်ထုပ်ဝန်ပိုးမဖြစ်ဘဲ သဘာဝအလျောက် ဆွဲထုတ်နိုင်သည်။ အသုံးအများဆုံး မဟာယန္တရားမှာ အရင်းအမြစ်ချီ နေရာလွတ်ဖြစ်ပြီး ထိုအရာသည် ဘက်စုံအသုံးဝင်ကာ ဂုဏ်သတ္တိအားလုံးကို လွှမ်းခြုံထားသောကြောင့် ဖြစ်သည်။

ဒုတိယတန်းစား ရှေးဦးမူလတစ်ဦးသည် နေရာလွတ်ထဲမှ မသေမျိုးချီ သို့မဟုတ် အခြားချီ အမျိုးမျိုးကို ဆွဲထုတ်နိုင်ပြီး သူတို့၏ အကြွင်းမဲ့စွမ်းရည်အားလုံးကို မြှင့်တင်နိုင်သည်။ သူတို့သည် ဤလုပ်ငန်းစဉ်ကို အလွန်ကျွမ်းကျင်သဖြင့် အရင်းအမြစ်ချီ နေရာလွတ်နှင့် ဆက်နွယ်မှုကို ဖြတ်တောက်ရန် အလွန်ခက်ခဲပြီး သူတို့အပေါ်တွင်လည်း သိသာသော ဝန်ထုပ်ဝန်ပိုး ဖြစ်စေခြင်း မရှိပေ။

ဒုတိယတန်းစားအဆင့်သည် ပုံမှန်နှင့် လက်ရွေးစင် ရှေးဦးမူလများအကြား ပိုင်းခြားထားသော စည်း ဖြစ်၏။ အချိန်အလုံအလောက် ပေးမည်ဆိုလျှင် မည်သူမဆို တတိယတန်းစား ရှေးဦးမူလ ဖြစ်လာနိုင်သည်။ သို့သော် မဟာယန္တရားများကို နှစ်ပေါင်းများစွာ လေ့လာနားလည်ရန် ကြိုးစားခဲ့သည့် ပါရမီရှင်များသာလျှင် ဤအဆင့်သို့ ရောက်ရှိနိုင်သည်။

ပထမတန်းစားအဆင့်မှာမူ ခက်ခဲမှုအဆင့် အလွန်မြင့်မားသွားပြန်သည်။ ဤအဆင့်အတွက် အနည်းဆုံး လိုအပ်ချက်မှာ မဟာယန္တရား သုံးခုကို ကျွမ်းကျင်ပိုင်နိုင်ရန် ဖြစ်သည်။ ယန္တရားများ၏ သဘာဝကြောင့် ကျင့်ကြံသူများသည် ဤအဆင့်သို့ ရောက်ရန် ခက်ခဲကြသည်။ အရင်းအမြစ်ချီ နေရာလွတ်မှ မည်သူနှင့်မဆို ကိုက်ညီသည့် ချီကို ရှာဖွေနိုင်သဖြင့် အောင်မြင်မှုမှာ အချိန်နှင့် ကြိုးစားအားထုတ်မှုအပေါ်တွင်သာ မူတည်သည်။

မဟာတာအိုအရင်းအမြစ်မှာမူ ဂုဏ်သတ္တိများတွင် ကြားနေကျသော စစ်မှန်သည့် အကြမ်းထည်စွမ်းအားများကို ထုတ်လွှတ်နိုင်ပြီး ရှေးဦးမူလအများစုမှာ ထိုအရာကို သူတို့၏ စွမ်းရည်များအတွက် အခြေခံအဖြစ် အသုံးပြုနိုင်သည်။ ထိုအရာကို မြင့်မားသော ကျင့်ကြံဆင့်များသို့ ကူးပြောင်းရန် စွမ်းအင်အဖြစ် အဓိကအသုံးပြုကြသော်လည်း တိုက်ပွဲအတွက်လည်း အသုံးပြုနိုင်သည်။ ရှေးဦးမူလများအနေနှင့် ထိုအကြမ်းထည်စွမ်းအားများကို သူတို့၏ တာအိုနှင့် တူညီသော ဂုဏ်သတ္တိရှိသည့် စွမ်းအားအဖြစ်သို့ပင် ပြောင်းလဲနိုင်သည်။

ပထမတန်းစား ရှေးဦးမူလ ဖြစ်လာရန် အဓိကစိန်ခေါ်မှုမှာ ကျန်ရှိနေသည့် ယန္တရားများ ဖြစ်သည်။ အချိန်မြစ်ကြောင်း သို့မဟုတ် ကံကြမ္မာမြစ်ကြောင်းတွင် ထူးခြားသော ဝိသေသလက္ခဏာများစွာ ရှိနေသည်။ အကယ်၍ ရှေးဦးမူလတစ်ဦးသည် သူတို့နှင့် မသက်ဆိုင်သော တာအိုကို ကျင့်ကြံမည်ဆိုပါက သူတို့နှင့် သဟဇာတဖြစ်မှု နည်းပါးနိုင်ခြေ များလှသည်။ သို့မဟုတ် ထိုယန္တရားများနှင့် မပြိုကွဲနိုင်သော ဆက်နွှယ်မှုတစ်ခု တည်ဆောက်ရန် လုံလောက်သော နားလည်မှု မရှိခြင်းလည်း ဖြစ်နိုင်သည်။ ထိုအရာတို့ကို အစွမ်းကုန် အသုံးချနိုင်ရန်မှာ ပို၍ပင် မဖြစ်နိုင်ပေ။

ကျန်ရှိနေသော မဟာယန္တရားများအတွက်လည်း ပြဿနာမှာ အတူတူပင် ဖြစ်၏။ ကမ္ဘာဦးဟွင်သွမ်းက ထူးခြားသော စွမ်းအားတစ်ခု ဖြစ်သော်လည်း ထိုအရာ၏ စွမ်းအားကို ကျွမ်းကျင်ပိုင်နိုင်ရန် ပိုမိုကြီးမားသော အတားအဆီးမှာ ကမ္ဘာဦးအလိုဆန္ဒ၏ ခုခံမှုပင် ဖြစ်သည်။ ပထမတန်းစား ရှေးဦးမူလတစ်ဦးသည် ကမ္ဘာဦးအလိုဆန္ဒ၏ နှောင့်ယှက်မှုများကြားမှ ကမ္ဘာဦးဟွင်သွမ်း၏ စွမ်းအားကို မည်သို့အသုံးပြုရမည်ကို သင်ယူရမည် ဖြစ်သည်။

နောက်ဆုံး မဟာယန္တရားမှာ သံသရာ လမ်းစဉ်ခြောက်ပါး ဖြစ်၏။ သေခြင်းတရား သို့မဟုတ် သံသရာတာအိုနှင့် သဟဇာတဖြစ်ရမည့်အပြင် ရှေးဦးမူလတစ်ဦးသည် ထိုအရာ၏စွမ်းအားကို အသုံးပြုရန်အတွက် ယမမင်းများနှင့် ဆက်ဆံရမည် ဖြစ်သည်။ သူတို့သည် ထိုသူများနှင့် သဘောတူညီချက် ရယူရမည် သို့မဟုတ် သူတို့ သတိမထားမိစေဘဲ သို့မဟုတ် တမလွန်ဘုံ၏ လည်ပတ်မှုကို မထိခိုက်စေဘဲ ထိုစွမ်းအားကို အသုံးပြုနိုင်မည့် နည်းလမ်းကို ရှာဖွေရလိမ့်မည်။

ဤစိန်ခေါ်မှုများကြောင့် ရှေးဦးမူလအများအပြားမှာ အထက်သို့ တက်လှမ်းရန် မျှော်လင့်ချက်မရှိဘဲ ဒုတိယတန်းစားအဆင့်တွင်သာ ပိတ်မိနေကြသည်။ သို့သော် ပထမတန်းစားအဆင့်မှာ ဤအဆင့်ခွဲခြားမှု၏ အကန့်အသတ် မဟုတ်ပေ။

ဝူဟုန်၏ ပြောကြားချက်အရ ပထမတန်းစားအဆင့်၏ အစွမ်းမှာ အတက်အကျ ရှိသည်။ သူမအနေဖြင့် မဟာယန္တရား သုံးခုနှင့် ဆက်နွှယ်မှုကို ဤအဆင့်အတွက် လိုအပ်ချက်အဖြစ် ရွေးချယ်ခဲ့ရသည့် အကြောင်းအရင်း ရှိသည်။

အလွန်ပါရမီထူးသော ရှေးဦးမူလများသည် မဟာယန္တရား ခြောက်ခုလုံးကို ကျွမ်းကျင်ပိုင်နိုင်နိုင်သည်။ သူတို့သည် ခြောက်ခုလုံး၏ အားဖြည့်မှုကို ရရှိထားသော အကြွင်းမဲ့စွမ်းရည်များကိုပင် အသုံးပြုနိုင်သည်။ သို့သော် ပထမတန်းစား ရှေးဦးမူလများသည် ယန္တရားသုံးခုကိုသာ ဝန်ထုပ်ဝန်ပိုးမရှိဘဲ အသုံးပြုနိုင်သည်။

ယန္တရား လေးခုနောက်ပိုင်းတွင် တိုက်ကွက်တိုင်းသည် သူတို့၏ ဝိညာဉ်ကိုသာမက ခန္ဓာကိုယ်ကိုပါ အကြီးအကျယ် ထိခိုက်စေမည်ဖြစ်ရာ ထိုသို့သော ထူးကဲသည့်အကြွင်းမဲ့စွမ်းရည်များကို အသုံးပြုရာတွင် အလွန်သတိထားကြရသည်။

ဝူဟုန်က သူမ၏ ပြီးပြည့်စုံသော အုတ်မြစ်ကို ပြန်လည်ဖွဲ့စည်းပြီးနောက် ယခုအခါ မဟာယန္တရား လေးခုကို မည်သည့်ဝန်ထုပ်ဝန်ပိုး သို့မဟုတ် တုံ့ပြန်မှုဒဏ်မှ မခံရဘဲ ပုံမှန်အတိုင်း အသုံးပြုနိုင်ပြီဖြစ်ကြောင်း သိရှိသွားသည်။ ထို့ကြောင့် သူမက ထူးကဲသာလွန်အုတ်မြစ် တစ်ခုရှိပြီး မဟာယန္တရား လေးခုကို ကျွမ်းကျင်ပိုင်နိုင်သူများအတွက် အထူးတန်းစား ရှေးဦးမူလအဆင့်ကို ဖန်တီးခဲ့သည်။

ကံမကောင်းစွာဖြင့် သူမသည် ထူးကဲသာလွန်အုတ်မြစ် (၁၃) ပါးကို မကြာသေးမီကမှ အပြီးသတ်နိုင်ခဲ့ခြင်းဖြစ်ပြီး ယင်ကျန်း မတိုက်ခိုက်မီ စမ်းသပ်ကြည့်ရန် အချိန်မရခဲ့ပေ။ ဝူဟုန်၏ ခွဲခြမ်းစိတ်ဖြာချက်အရ ဒုတိယမြောက် ထူးကဲသာလွန်အုတ်မြစ်သည် သူမအား မဟာယန္တရား ၅ ခုကို ပြဿနာမရှိဘဲ အသုံးပြုနိုင်စေမည်ဖြစ်ပြီး တတိယမြောက် ထူးကဲသာလွန်အုတ်မြစ်သည် အများသိ မဟာယန္တရား ခြောက်ခုလုံးကို အသုံးချနိုင်စေမည် ဖြစ်သည်။

လျို့ဝှက်ယန္တရားများအတွက်မူ လူနည်းစုသာ ထိုအရာများ တည်ရှိကြောင်း သိရှိသဖြင့် ကိစ္စမရှိပေ။ အချို့လူများက ရှာဖွေတွေ့ရှိခဲ့သော်လည်း ထိုအရာများမှ စွမ်းအားဆွဲထုတ်နိုင်လိမ့်မည်ဟု ဝမ်ဝေ့ သို့မဟုတ် ဝူဟုန်တို့အနေဖြင့် မယုံကြည်ပေ။ ထို့ကြောင့် လူတစ်ဦးသည် ကမ္ဘာဦးဟွင်သွမ်းသူတော်စင် မဖြစ်လာမီ လိုအပ်သည့် ထူးကဲသာလွန်အုတ်မြစ် အကန့်အသတ်မှာ သုံးခုဖြစ်သည်ဟု ယူဆထားကြသည်။

ဒုတိယတန်းစား ရှေးဦးမူလကတော့ ပြဿနာပဲ

လုပ်ကြံသတ်ဖြတ်သူ၏ လွတ်မြောက်ခြင်းစွမ်းရည် အလုပ်လုပ်သွားစဉ် ဝမ်ဝေ့ တွေးလိုက်သည်။ သူ၏ ဗလာနတ္ထိ တွင်းနက်သည် အတိတ် သို့မဟုတ် အခြားသော အချိန်စက်ဝန်းသို့ ထွက်ပြေးသည့် ကိုယ်ပွားများကို ဖမ်းဆီးနိုင်ခဲ့သော်လည်း အနာဂတ်သို့ ပြေးသွားသော ကိုယ်ပွားမှာမူ အောင်မြင်စွာ လွတ်မြောက်သွားခဲ့သည်။

ဝမ်ဝေ့သည် ဤအခွင့်အရေးကို အသုံးပြု၍ သူ့ခန္ဓာကိုယ်ကို ပြန်လည်ကုသပြီး ဝိညာဉ်ပင်ပန်းနွမ်းနယ်မှုကို သက်သာစေရန် ဝိညာဉ်ကွင်းကို အသုံးပြုလိုက်သည်။

ငါက ဒုတိယတန်းစား ရှေးဦးမူလ အတုအယောင်ပဲ ရှိသေးတာ … သူ့ကို ရင်ဆိုင်ရတာ ပြဿနာ ဖြစ်နိုင်တယ်

သူ့တွင် အကြွင်းမဲ့စွမ်းရည် နှစ်မျိုးသာ ရှိသော်လည်း ကျိချန်းမင်ကို လေ့လာခြင်းဖြင့် ဖန်တီးထားသည့် "ပြီးပြည့်စုံသော စွမ်းရည်" များစွာ ရှိသည်။ ပြီးပြည့်စုံသော စွမ်းရည်များမှာ အခြေခံအားဖြင့် အကြွင်းမဲ့စွမ်းရည်များ၏ ရှေ့ပြေးပုံစံများ ဖြစ်ကြသည်။ သင့်တော်သော အကူအညီများ ရရှိပါက ထိုအရာများသည် အကြွင်းမဲ့စွမ်းရည်အဆင့်သို့ တက်လှမ်းနိုင်သည်။

ထင်ရှားသော ဥပမာတစ်ခုမှာ ဗလာနတ္ထိ တွင်းနက် ဖြစ်၏။ သူ၏ ဗလာနတ္ထိ စက်ဝိုင်းမှ စွမ်းအင်အမြောက်အမြားကို အာရုံစိုက် ထည့်သွင်းခြင်းမပြုပါက ဤမန္တန်မှာ ထိုမျှ အစွမ်းထက်လိမ့်မည် မဟုတ်ပေ။ သို့သော် အကယ်၍ ဝမ်ဝေ့အနေဖြင့် ဗလာနတ္ထိ စွမ်းအားအမြောက်အမြားကို ဤမန္တန်နှင့် ချက်ချင်းပေါင်းစပ်နိုင်မည့် နည်းလမ်းကို ရှာတွေ့ပါက ထိုအရာသည် အကြွင်းမဲ့စွမ်းရည် တစ်ခု ဖြစ်လာလိမ့်မည်။

ကံကောင်းထောက်မစွာဖြင့် သူသည် အစွမ်းထိန်းချုပ်ရေးပညာရပ်ကို အပြီးသတ်ရန်သာ လိုအပ်ပြီး သူ၏ ဗလာနတ္ထိစွမ်းအားအပေါ် ထိန်းချုပ်မှုသည် ဤပြီးပြည့်စုံသော စွမ်းရည်ကို အကြွင်းမဲ့စွမ်းရည်အဖြစ် အဆင့်မြှင့်တင်နိုင်သည့် အဆင့်သို့ ရောက်ရှိလာမည် ဖြစ်သည်။

ဝမ်ဝေ့တွင် ပြီးပြည့်စုံသော စွမ်းရည်များစွာ ရှိနေသဖြင့် မှန်ကန်သော တိုက်ပွဲဗျူဟာများဖြင့် သူတို့ကို အကြွင်းမဲ့စွမ်းရည်များအဖြစ် ပြောင်းလဲနိုင်သည်။ နောက်ဆုံးအနေဖြင့် သူသည် ကံကြမ္မာ၏ သားတော် ဖြစ်၏။

ကံကြမ္မာမြစ်ကြောင်းနှင့် သူ၏ သဟဇာတဖြစ်မှုနှင့် ဆက်နွှယ်မှုမှာ အမြဲတမ်း ပြိုင်ဘက်ကင်းခဲ့သည်။ လွန်ခဲ့သော ယွမ်ခေတ်ကာလ အနည်းငယ်အတွင်း လေ့ကျင့်ပြီးနောက် သူသည် ထိုမြစ်ကြောင်းနှင့် မပြိုကွဲနိုင်သော ဆက်နွှယ်မှုကို တည်ဆောက်နိုင်ခဲ့ကာ ဒုတိယတန်းစားအတွက် လိုအပ်ချက်ကို ပြည့်မီပြီ ဖြစ်၏။

တစ်ခုတည်းသော ပြဿနာမှာ သူ့ဝိညာဉ်သည် ထိုစွမ်းအားကို အဆက်မပြတ် အသုံးပြုခြင်းကြောင့် ဖြစ်ပေါ်လာသည့် ဝန်ထုပ်ဝန်ပိုးကို မခံနိုင်ခြင်း ဖြစ်သော်လည်း ထိုအရာအတွက် ဝိညာဉ်ကွင်းများ ရှိနေခြင်း ဖြစ်သည်။

ဝမ်ဝေ့သည် ဒုတိယတန်းစားအဆင့် တစ်ဦးကို ရင်ဆိုင်နိုင်စွမ်းရှိကြောင်း သိသည်။ သို့သော် တိုက်ပွဲကြာရှည်လေလေ သူ၏ အားနည်းချက်များမှာ ပိုမိုထင်ရှားလာပြီး ထိုအရာများကို အသုံးချ၍ တိုက်ခိုက်ခံရလေလေ ဖြစ်လိမ့်မည်။

ဒီတိုက်ပွဲကို မြန်မြန်အဆုံးသတ်ဖို့ လိုတယ်

ဝမ်ဝေ့က ခွဲခြမ်းစိတ်ဖြာလိုက်သည်။ အတုအယောင် ဒုတိယတန်းစားအဆင့် တစ်ဦးအနေဖြင့် သူ၏ အကြီးမားဆုံး အားနည်းချက်မှာ အချိန်စိတ်ဝိညာဉ် အကြွင်းမဲ့စွမ်းရည် ကင်းမဲ့နေခြင်း ဖြစ်၏။ သူ၏ ပြိုင်ဘက်တွင် သူ့ကို အပြီးတိုင် သတ်ဖြတ်နိုင်မည့် နည်းလမ်း ရှိနိုင်သော်လည်း သူကမူ သူမကို မပြီးမပြတ်အခြေအနေသို့သာ ပို့ဆောင်နိုင်သည်။ ထို့အပြင် ဤတိုက်ပွဲ ကြာရှည်လေလေ သူ့တွင် ပို၍ အန္တရာယ်များလေလေ ဖြစ်၏။

အခန်း (၁၅၈၆) : စွမ်းရည်အရင်းအမြစ်

ဝမ်ဝေ့က ဗလာနတ္ထိတွင်းနက်ကို အချိန်အကြာကြီး ထိန်းထားနိုင်စွမ်း မရှိပေ။ ထို့ကြောင့် သူ၏ ကိုယ်ခန္ဓာ အပြည့်အဝ ပြန်လည်ကောင်းမွန်လာသည်နှင့် တစ်ပြိုင်နက် ထိုမန္တန်ကို ရပ်တန့်လိုက်သည်။ စက္ကန့်အနည်းငယ်အကြာတွင် အနာဂတ်သို့ ခုန်ကူးသွားခဲ့သော လုပ်ကြံသတ်ဖြတ်သူ အမျိုးသမီးက ပြန်လည်ပေါ်လာသည်။ သူမ၏ တည်ငြိမ်လှသော အပြာရောင်မျက်လုံးများက ဝမ်ဝေ့ကို စိုက်ကြည့်နေပြီး အနီရောင်ဆံနွယ်များက လေထဲတွင် တလွင့်လွင့် ဖြစ်နေ၏။

"ဗလာနတ္ထိစွမ်းအား..." သူမက အကြွင်းမဲ့ သုညဒီဂရီကဲ့သို့ အေးစက်စက် အသံဖြင့် ရေရွတ်လိုက်သည်။

"မင်းရဲ့ အကြည့်တွေက ဒီစွမ်းအားရှိတဲ့ လူတွေကို အရင်က မြင်ဖူးတယ်ဆိုတာ ပြောနေတယ်" ဝမ်ဝေ့က မှတ်ချက်ပေးလိုက်သည်။

"ပြီးပြည့်စုံခြင်းလမ်းစဉ် ဒါမှမဟုတ် ဗလာနတ္ထိလမ်းစဉ်မှာ အောင်မြင်မှုရထားတဲ့သူတွေဟာ အမောက်မာဆုံးလူတွေထဲမှာ ပါတယ်။ သူတို့က တားမြစ်ထားတဲ့အရာကို လိုက်စားနေလို့ သူတို့ကိုယ်သူတို့ ထူးခြားနေတယ်လို့ ထင်နေကြတာ" လုပ်ကြံသတ်ဖြတ်သူက တည်ငြိမ်စွာ ပြောလိုက်သည်။

"ဗလာနတ္ထိကို ကိုင်တွယ်တဲ့သူတွေက ပိုဆိုးသေးတယ်... ဘယ်အရာကမှ သူတို့ကို မထိနိုင်ဘူးလို့ ထင်နေကြတာကိုး"

လုပ်ကြံသတ်ဖြတ်သူက သူမ၏လက်ကို မြှောက်လိုက်ပြီး သက်ရှိအငွေ့အသက်များ ထွက်ပေါ်နေသည့် အနီရောင် ဓားကောက်တစ်စင်းအဖြစ် ပေါင်းစည်းလိုက်သည်။ ထိုအရာသည် သာမန်သက်ရှိတစ်ခုတည်း၏ အငွေ့အသက်မဟုတ်ဘဲ မည်သည့်ပုံစံဖြင့် တည်ရှိနေသည်ဖြစ်စေ အသိစိတ်ရှိသော သက်ရှိအားလုံး၏ တည်ရှိမှုစွမ်းအား ဖြစ်နေသည်။

ထိုလက်နက်ကို မြင်လိုက်ရသောအခါ ဝမ်ဝေ့ မျက်မှောင်ကြုတ်မိသွားသည်။

"တည်ရှိမှုဓားလား"

ဗလာနတ္ထိရဲ့ ဆန့်ကျင်ဘက်က ဘာလဲ … ဖန်ဆင်းခြင်း၊ အရာခပ်သိမ်းနဲ့ တည်ရှိမှုတို့ပဲလေ ….

"ဒီစကြဝဠာရဲ့ အခြေခံစည်းမျဉ်းက မျှခြေပဲ" လုပ်ကြံသတ်ဖြတ်သူက ဆိုသည်။

"မဟာတာအိုက ဘာကြောင့် ဗလာနတ္ထိနဲ့ ပြီးပြည့်စုံခြင်းကို ဟွင်သွမ်းစကြဝဠာထဲမှာ ထူးခြားတဲ့ ဝိသေသတွေအဖြစ် ခွင့်ပြုထားလဲဆိုတာ ငါ မသိဘူး။ ဒါပေမဲ့ ငါ စိတ်ဝင်စားတာက အဲဒီစွမ်းအားတွေကို တန်ပြန်မျှခြေညှိနိုင်တဲ့ အင်အားစုတွေ ရှိနေတယ်ဆိုတာပဲ"

သူမ၏ အနောက်ဘက်တွင် ပုံရိပ်နှစ်ခု ပေါ်ထွက်လာသည်။

အချိန်မြစ်ကြောင်းနှင့် အရင်းအမြစ်ချီနေရာလွတ်တို့ ဖြစ်သည်။

ဝမ်ဝေ့က သူမကို ကြည့်ပြီး သူ၏ ခွဲခြမ်းစိတ်ဖြာမှုမှာ မှန်ကန်သလို မှားယွင်းနေကြောင်း သဘောပေါက်သွားသည်။ လုပ်ကြံသတ်ဖြတ်သူသည် အမှန်တကယ်ပင် ဒုတိယတန်းစား ရှေးဦးမူလဖြစ်သော်လည်း သူမ၏ အောင်မြင်မှုမှာ အရင်းအမြစ်ချီနေရာလွတ်မှ လာခြင်း ဖြစ်သည်။ အချိန်မြစ်ကြောင်းနှင့် သူမ၏ ဆက်နွှယ်မှုမှာ အားကောင်းသော်လည်း လိုအပ်ချက်ကို ပြည့်မီခြင်း မရှိသေးပေ။ ဆိုလိုသည်မှာ ဝမ်ဝေ့အနေဖြင့် ထိုဆက်နွှယ်မှုကို ဖြတ်တောက်နိုင်ခွင့် ရှိသေးသည်။

လုပ်ကြံသတ်ဖြတ်သူက ဝမ်ဝေ့ရှေ့တွင် ရုတ်တရက် ပေါ်လာပြီး သူမ၏ ဓားဖြင့် ဝမ်ဝေ့ကို နှစ်ပိုင်းပိုင်းရန် ရွယ်ကာ ခုတ်ချလိုက်သည်။ သူမ၏ လှုပ်ရှားမှုမှာ အလွန်မြန်ဆန်လှသည်။ သူမက အချိန်နှင့် နေရာလွတ် ဆက်နွှယ်မှုကို လောက်လေးခွတစ်ခုကဲ့သို့ အသုံးပြုကာ သူမ၏ အရှိန်ကို သင်္ချာနှင့် ရုပ်ဗေဒသဘောတရားအရ အဓိပ္ပာယ်မရှိနိုင်လောက်အောင် မြှင့်တင်လိုက်ခြင်း ဖြစ်သည်။ အဆိုးဆုံးမှာ ဤအရှိန်အကြွင်းမဲ့စွမ်းရည်သည် အချိန်မြစ်ကြောင်း၏ စွမ်းအားကို ရယူထားသဖြင့် အရင်ကထက်ပင် ပိုမိုမြန်ဆန်နေခြင်း ဖြစ်၏။

ကံကောင်းထောက်မစွာဖြင့် ဝမ်ဝေ့၏ ကံကြမ္မာတုံ့ပြန်မှုနည်းစနစ်က အလုပ်လုပ်သွားပြီး ဓားသွားထိမည့်နေရာမှ သူ၏ ကိုယ်ခန္ဓာကို ခွဲထုတ်လိုက်သည်။ ဝမ်ဝေ့၏ အပေါ်ပိုင်းနှင့် အောက်ပိုင်းမှာ သူ၏ ထိန်းချုပ်မှုအောက်တွင် ရှိနေဆဲ ဖြစ်သော်လည်း တည်ရှိမှုဓားဖြင့် ခုတ်ဖြတ်ခံလိုက်ရသော ခါးလယ်ပိုင်းမှာမူ လုံးဝ ဥဿုံ ပျက်စီးသွားခဲ့သည်။ ဤသည်မှာ အနည်းငယ် ရယ်စရာကောင်းသော မြင်ကွင်း ဖြစ်နေသည်။

ဝမ်ဝေ့၏ အောက်ပိုင်းက လုပ်ကြံသတ်ဖြတ်သူကို ကန်လိုက်သည်။ သို့သော် သူမက ထိုတိုက်ခိုက်မှုကို အထင်သေးစွာ ကြည့်လိုက်သည်။ ဝမ်ဝေ့၏ ကိုယ်ခန္ဓာမှာ ဒသမကောင်းကင်ဘုံ၏ အထွတ်အထိပ်သို့ ရောက်နေသော်လည်း ဤသို့သော တိုက်ခိုက်မှုမျိုးမှာ အကြွင်းမဲ့စွမ်းရည်မဟုတ်သဖြင့် သူမအတွက် အဓိပ္ပာယ်မရှိပေ။ သို့သော် သူမအနေနှင့် ဝမ်ဝေ့ကို အထင်သေးမိသွားသည်။

ဝမ်ဝေ့၏ ပြီးပြည့်စုံသော စွမ်းရည်များသည် အကြွင်းမဲ့အဆင့်သို့ ရောက်ရန် တစ်စုံတစ်ရာသော တွန်းအား လိုအပ်ကြောင်း သူသိသည်။ ထို့ကြောင့် လုပ်ကြံသတ်ဖြတ်သူက ဤကန်ချက်ကို ရှောင်တိမ်းပြီး ဆက်လက်တိုက်ခိုက်ရန် ပြင်လိုက်ချိန်တွင် ဝမ်ဝေ့၏ အောက်ပိုင်းမှာ ရုတ်တရက် ပေါက်ကွဲသွားခဲ့သည်။ သူသည် သူ့အောက်ပိုင်းကိုယ်ခန္ဓာကို စတေးလိုက်ပြီး ထိုအရာကို အစစ်မှန်ဆုံးသော သေခြင်းစွမ်းအားအဖြစ် ပြောင်းလဲလိုက်ခြင်းဖြင့် သူ၏ စွမ်းရည်ကို မြှင့်တင်ရန် လိုအပ်ချက်ကို ဖြည့်ဆည်းလိုက်သည်။

ထိုအခါ လုပ်ကြံသတ်ဖြတ်သူ၏ နောက်ကျောတွင် ငရဲပြည်မှ အနက်ရောင်တံခါးကြီးတစ်ခု ပေါ်ထွက်လာသည်။ ထို သံသရာတံခါးထဲမှ ဧရာမ အနက်ရောင် အရိုးစုလက်ကြီးတစ်ဖက် ထွက်လာပြီး သူမကို ဖမ်းဆီးရန် ကြိုးစားလာသည်။ လုပ်ကြံသတ်ဖြတ်သူက မျက်မှောင်ကြုတ်လိုက်ပြီး သူမ၏ ဓားကို အသာအယာ ဝှေ့ယမ်းလိုက်ရာ အချိန်ကာလ အက်ကွဲကြောင်းတစ်ခု ဖြစ်ပေါ်လာပြီး သံသရာတံခါးကို နှင်ထုတ်ပစ်လိုက်သည်။

ဒါက ဘာကြီးလဲ …

ဝမ်ဝေ့က ထူးဆန်းသောအချက်တစ်ခုကို သတိပြုမိလိုက်သည်။ သူသည် စွမ်းရည်များကို အဆင့် (၄) ဆင့် ခွဲခြားထားသည်။ သာမန်၊ ပြီးပြည့်စုံသော၊ အကြွင်းမဲ့နှင့် မဟာယန္တရားတို့ ဖြစ်သည်။ ဒုတိယတန်းစားအဆင့် ရှေးဦးမူလများသည် သူတို့၏ အကြွင်းမဲ့စွမ်းရည်များကို မဟာယန္တရားတစ်ခုဖြင့် ထပ်မံမြှင့်တင်ထားသော မဟာယန္တရားစွမ်းရည်များကို အသုံးပြုကြသည်။

လုပ်ကြံသတ်ဖြတ်သူ၏ ပထမအကြိမ် တိုက်ခိုက်မှုတွင် သူမ၏ အရှိန်မှာ အချိန်မြစ်ကြောင်းမှ စွမ်းအားကို ရယူထားသော်လည်း သူမ၏ ဓားမှာမူ အရင်းအမြစ်ချီနေရာလွတ်မှ သာမန် "ချီ" စွမ်းအားကိုသာ သုံးထားသည်။ သို့သော် ဝမ်ဝေ့၏ နည်းစနစ်ကို ဖျက်ဆီးလိုက်ချိန်တွင်မူ သူမ၏ ဓားတိုက်ခွက်မှာ အချိန်မြစ်နှင့် အရင်းအမြစ်မှ ထူးခြားသော အချိန်ချီကို အသုံးပြုသွားခဲ့သည်။

ဝမ်ဝေ့၏ ဇဝေဇဝါဖြစ်မှုမှာ ချီစွမ်းအား ရုတ်တရက် ပြောင်းလဲသွားခြင်းကြောင့် ဖြစ်သည်။ အကယ်၍ ဤအမျိုးသမီးတွင် အခြားသော ဂုဏ်သတ္တိများသို့ ပြောင်းလဲနိုင်သည့် လိုက်လျောညီထွေဖြစ်မှုချီ ရှိနေလျှင် နားလည်ပေးနိုင်သော်လည်း ယခုမူ ထိုသို့မဟုတ်ပေ။ သူမသည် လုံးဝကွဲပြားသော စွမ်းအင်ကို အသုံးပြုသွားသော်လည်း သူမ၏ တိုက်ခိုက်မှုမှာ မဟာယန္တရားစွမ်းရည်အဆင့်သို့ ရောက်ရှိသွားဆဲ ဖြစ်သည်။

တစ်ခုခုတော့ မှားနေပြီ …

ဝမ်ဝေ့က ခွဲခြမ်းစိတ်ဖြာလိုက်သည်။ လုပ်ကြံသတ်ဖြတ်သူ၏ ဤထူးခြားချက်မှာ သူ့အောင်နိုင်မှု သို့မဟုတ် ရှုံးနိမ့်မှုအတွက် အဆုံးအဖြတ်ပေးမည့် သော့ချက် ဖြစ်လာနိုင်သည်။

လုပ်ကြံသတ်ဖြတ်သူ၏ ဓားမှာ ဝမ်ဝေ့ ရင်းနှီးနေသော သတ်ဖြတ်ခြင်းစွမ်းအား အငွေ့အသက်ရှိသည့် အနက်ရောင်အလင်းများကို ထုတ်လွှတ်လာသည်။ သူမသည် သူ၏ရှေ့တွင် ပေါ်လာပြီး ဓားဖြင့် ပြင်းထန်စွာ ရိုက်ချလိုက်သည်။ ယခုတစ်ကြိမ် တိုက်ခိုက်မှုမှာ ခုတ်ဖြတ်ခြင်း မဟုတ်ဘဲ ဝမ်ဝေ့၏ ကျန်ရှိနေသော အပေါ်ပိုင်းကိုပါ အမှုန့်ချေပစ်မည့် ပြင်းထန်သော ထိုးနှက်ချက် ဖြစ်သည်။

ဝမ်ဝေ့က အခြားသော ပြီးပြည့်စုံသော စွမ်းရည်ကို အသုံးမပြုတော့ဘဲ ပတ်ဝန်းကျင်ကို အသုံးချလိုက်သည်။ တိုက်ပွဲမှာ မူလစည်းတံဆိပ်မြို့တော်အနီးတွင် ဖြစ်နေဆဲ ဖြစ်သည်။ ထို့ကြောင့် သူသည် မြို့တော်၏ အစီအရင်လွှမ်းမိုးမှုကို သူ ရှိရာအထိ ဖြန့်ကြက်လိုက်သည်။ သူ့ဇနီးလောင်းလေး ဖန်တီးထားသော ထိုပြောင်မြောက်လှသည့် လက်ရာသည် လုပ်ကြံသတ်ဖြတ်သူ၏ ဓားသွားကို ဟန့်တားပေးလိုက်သည်။ ထိုခဏတာ အချိန်အတွင်းမှာပင် ဝမ်ဝေ့က သူ၏ ပျောက်ဆုံးနေသော အောက်ပိုင်းကိုယ်ခန္ဓာကို ပြန်လည်တည်ဆောက်လိုက်သည်။

သို့သော် လုပ်ကြံသတ်ဖြတ်သူက သူ့ကို အသက်ရှူခွင့် မပေးပေ။ သူမ၏ တိုက်ခိုက်မှု အတားအဆီးခံလိုက်ရသည်နှင့် သူမက အစီအရင်ဖြိုခွင်းခြင်း စွမ်းရည်သို့ ချက်ချင်း ပြောင်းလဲလိုက်သည်။ ဝမ်ဝေ့က ကံကြမ္မာတာအိုကို သုံးကာ အစီအရင်၏ အခြေအနေကို ယာယီပြောင်းလဲလိုက်သည်။ တစ်နည်းအားဖြင့် ဓားနှင့် ထိတွေ့ချိန်တွင် ဤသည်မှာ အစီအရင် မဟုတ်တော့ဘဲ အခြားအရာတစ်ခု ဖြစ်သွားသဖြင့် သူမ၏ အစီအရင်ကို တိုက်ရိုက်ပစ်မှတ်ထားသော နည်းစနစ်မှာ အသုံးမဝင်တော့ပေ။

ဝမ်ဝေ့က အစီအရင်ထဲတွင်သာ ပုန်းအောင်းနေမည် မဟုတ်ပေ။ ဤလုပ်ကြံသတ်ဖြတ်သူ၏ စွမ်းရည်စုံလင်မှုအရ သူမသည် အစီအရင်ကို ဖျက်ဆီးရန် နည်းလမ်းတစ်ခုခု ရှာတွေ့သွားပေလိမ့်မည်။ ထို့အပြင် ဤအမျိုးသမီးနှင့် အချိန်အကြာကြီး တိုက်ခိုက်နေ၍ မရပေ။ မဟုတ်ပါက သူ့အချိန်အမှတ်အသားမှာ ဖော်ထုတ်ခံရနိုင်ခြေ ရှိသည်။

ငါ သူမရဲ့ အရှိန်ကို ကိုင်တွယ်ဖို့ လိုတယ်

ဝမ်ဝေ့က ခွဲခြမ်းစိတ်ဖြာလိုက်သည်။ ဤတိုက်ပွဲတွင် သူ၏ အကြီးမားဆုံး ပြဿနာမှာ အရှိန် လစ်ဟာနေခြင်း ဖြစ်၏။ သူသည် သူ၏ ကံကြမ္မာတုံ့ပြန်မှုစွမ်းရည်ကို အကြွင်းမဲ့အဆင့်သို့ မြှင့်တင်ရန် ကံကြမ္မာမြစ်ကြောင်းမှ စွမ်းအားများကို ရယူနေရသည်။ သို့သော် ဤနည်းစနစ်မှာ အမြဲတမ်း စွမ်းအင်ဖြည့်တင်းပေးရန် လိုအပ်သည့် လက်ခံစနစ် ဖြစ်နေသည်။ ကံမကောင်းစွာဖြင့် ဝမ်ဝေ့၏ ဝိညာဉ်က ဤလုပ်ငန်းစဉ်ကို အချိန်ကြာကြာ မခံနိုင်သဖြင့် သူ၏ ဝိညာဉ်ကွင်းများကို အစွမ်းကုန် အသုံးပြုနေရသည်။

အခုမှပဲ ရှေးဦးမူလ မဟုတ်တဲ့သူတွေက ဘာလို့ ရှေးဦးမူလတွေကို မယှဉ်နိုင်တာလဲဆိုတာ ငါနားလည်တော့တယ်

ဝမ်ဝေ့က အကြံအစည်တစ်ခုကို ကြံစည်ရင်း ညည်းတွားလိုက်သည်။ အကယ်၍ သူ၏ ထူးကဲလှသော ပါရမီနှင့် ကံကြမ္မာကြောင့် ရရှိထားသော အခွင့်အရေးများသာ မရှိပါက စတုတ္ထတန်းစားအဆင့် ရှေးဦးမူလတစ်ယောက်ကပင် သူ့ကို ရိုက်သတ်သွားနိုင်ပေသည်။

နာနိုစက္ကန့်ပိုင်းအတွင်းမှာပင် ဝမ်ဝေ့က အစီအစဉ်တစ်ခု ဆွဲပြီး အကောင်အထည်ဖော်လိုက်သည်။ သူသည် တုံ့ပြန်မှုများအတွက် စွမ်းအင်ပို့လွှတ်မှုကို ရပ်တန့်လိုက်ပြီး လုပ်ကြံသတ်ဖြတ်သူ၏ အန္တရာယ်အာရုံ သို့မဟုတ် အလိုလိုသိစိတ်ကို လွှမ်းမိုးမည့် နည်းစနစ်တစ်ခုကို အသုံးပြုလိုက်သည်။ ထို့နောက် လက်ဖဝါးတွင် တံဆိပ်များ ခတ်နှိပ်နေစဉ်မှာပင် သူ၏ ကိုယ်ခန္ဓာရှိ ဗလာနတ္ထိစွမ်းအားကို အသုံးပြုကာ ဝိညာဉ်အမှုန်အမွှား အချို့ကို ပတ်ဝန်းကျင်တွင် လျှို့ဝှက်စွာ ဖြန့်ကြက်လိုက်သည်။

ငါ့ကို စည်းပိတ်ဖို့ အသေခံတိုက်ခိုက်တာလား

လုပ်ကြံသတ်ဖြတ်သူက တွေးကာ လှောင်ပြုံးပြုံးလိုက်သည်။ သူမ အနားမကပ်မီမှာပင် သူမက သူ့ကို အမှုန့်ချေနိုင်သဖြင့် ဤသို့သော တိုက်ခိုက်မှုမှာ အသုံးမဝင်ပေ။

မဟုတ်ဘူး... ငါ သတိထားရမယ်

ဤလူမှာ ထူးခြားသူဖြစ်သည်။ အနက်ရောင်လုပ်ကြံသတ်ဖြတ်သူ အဖွဲ့အစည်းတွင် တင်းကျပ်သော အဆင့်အတန်း သတ်မှတ်ချက် ရှိသည်။ သေမျိုးအဆင့် ကျင့်ကြံသူများအတွက် သံ ဖြစ်ပြီး သူတို့ကို ကြယ်တစ်ပွင့်မှ ကိုးပွင့်အထိ သတ်မှတ်ထားသည်။ မသေမျိုးနယ်ပယ် သုံးခုမှာ ကြေး၊ ငွေ နှင့် ရွှေ အဆင့်များ ဖြစ်ကြသည်။

သို့သော် သူမကဲ့သို့သော အဆင့်ရှိသည့် လုပ်ကြံသတ်ဖြတ်သူများကို လုပ်ကြံသတ်ဖြတ်သူဘုရင်ဟူသော ဘွဲ့ကို ပေးအပ်ထားသည်။ ထိုဘုရင်များထဲတွင်ပင် ပြာလဲ့မီးလျှံမှာ ထိပ်သီးတစ်ဦး ဖြစ်သည်။ သို့သော် သူမသည် ဤ အဆုံးစွန်မဲ့စံပြကို မသတ်နိုင်ခဲ့ပေ။ မဟုတ်သေးဘူး ... ပိုဆိုးသည်မှာ ထိုသူက သူမနှင့် အချိန်အတိုင်းအတာတစ်ခုအထိ အဆင့်တူ တိုက်ခိုက်နိုင်နေခြင်း ဖြစ်၏။

ပြာလဲ့မီးလျှံသည် သူမ၏ ကိုယ်ခန္ဓာကို မည်သူမျှ မသိနိုင်ဘဲ ကိုယ်ပွားတစ်ခုနှင့် လဲလှယ်လိုက်သည်။ ထိုကိုယ်ပွားမှာ စစ်မှန်သော သူမနှင့် မခြားနားဘဲ ခွန်အားအားလုံး ရှိသည်။ ထိုအချိန်တွင် သူမ၏ မူလကိုယ်ခန္ဓာမှာ အာကာပြင်နှင့် လုံးဝ တစ်သားတည်း ဖြစ်သွားသည်။

ထို့ကြောင့် ဝမ်ဝေ့၏ "အသေခံတိုက်ခိုက်မှု" က သူမထံသို့ ရောက်ရှိလာချိန်တွင် ပြာလဲ့မီးလျှံ၏ ဓားက လျင်မြန်စွာ လှုပ်ရှားသွားပြီး ဝမ်ဝေ့ကို ပြင်းထန်စွာ တိုက်ခိုက်လိုက်သည်။ သူမသည် ဝမ်ဝေ့၏ ကိုယ်ခန္ဓာရှိ အက်တမ်အရေအတွက် အတိအကျအတိုင်း သူ့ကို ခုတ်ဖြတ်ပစ်လိုက်သည်။

"လှလိုက်တာ..." ဝမ်ဝေ့က သူ၏ ကိုယ်ခန္ဓာ အစိတ်စိတ်အမွှာမွှာ မကွဲမီမှာပင် ရေရွတ်လိုက်သည်။ သို့သော် သေဆုံးခြင်းမှာ သူ့ရည်ရွယ်ချက်ပင် ဖြစ်၏။

ပြာလဲ့မီးလျှံက သူ့ကို သတ်လိုက်သည့် အခိုက်အတန့်မှာပင် သူမ၏ ကံကြမ္မာကို သူမ ကိုယ်တိုင် သတ်မှတ်လိုက်ခြင်း ဖြစ်သည်။ ဝမ်ဝေ့၏ ကိုယ်ခန္ဓာမှာ သင်္ကေတအက္ခရာတစ်ခုအဖြစ် ပြောင်းလဲသွားပြီး လုပ်ကြံသတ်ဖြတ်သူနှင့် အချိန်မြစ်ကြောင်းကြား ဆက်နွှယ်မှုဆီသို့ တိုက်ရိုက် ဦးတည်သွားသည်။

ဝမ်ဝေ့အနေဖြင့် အရင်းအမြစ်ချီနေရာလွတ်ကို ဘာမှမလုပ်နိုင်သော်လည်း ဤဆက်နွှယ်မှုကိုမူ သူ ဖယ်ရှားနိုင်သည်။

လုပ်ကြံသတ်ဖြတ်သူသည် အာကာပြင်ထဲမှ ထွက်ပေါ်လာပြီး စည်းတံဆိပ်ကို ဖျက်ဆီးရန် ကြိုးစားသည်။ ကံမကောင်းစွာဖြင့် ဤသင်္ကေတအက္ခရာမှာ ဝူဟုန်၏ စည်းတံဆိပ်များထဲမှ တစ်ခုဖြစ်နေသဖြင့် သူမ၏ ရုတ်တရက် ကြိုးပမ်းမှုက မလုံလောက်ခဲ့ပေ။ နောက်ဆုံးတွင် သူမသည် အချိန်မြစ်ကြောင်းနှင့် သူမ၏ ဆက်နွှယ်မှု ပြတ်တောက်သွားသည်ကို ဤအတိုင်း ကြည့်နေခဲ့ရတော့သည်။

ပြာလဲ့မီးလျှံသည် ဝမ်ဝေ့ အမှုန်အမွှားတစ်ခုမှတစ်ဆင့် ပြန်လည်ရှင်သန်လာသည့် အဝေးတစ်နေရာကို စိုက်ကြည့်လိုက်သည်။

"ဒါက ဘာကိုမှ ပြောင်းလဲစေမှာ မဟုတ်ဘူး" ပြာလဲ့မီးလျှံက အေးစက်စွာ ပြောလိုက်သည်။

"အခုတော့ ငါ နားလည်သွားပြီ" ဝမ်ဝေ့က ဆိုသည်။ သူ့အစီအစဉ်များမှာ ဘယ်သောအခါမှ မရိုးရှင်းပေ။ ဤအစီအစဉ်မှာ သူမ၏ အရှိန်ကို စည်းတံဆိပ်ခတ်ရန်သာမက သူမ၏ လျှို့ဝှက်ချက်များကို ချောင်းကြည့်ရန်လည်း ဖြစ်သည်။

“အနက်ရောင်လုပ်ကြံသတ်ဖြတ်သူ အဖွဲ့အစည်းက ဘာလို့ ဒီလောက် အောင်မြင်နေလဲဆိုတာ အံ့သြစရာ မရှိတော့ဘူး"

ပြာလဲ့မီးလျှံ မျက်မှောင်ကြုတ်လိုက်သည်။

"မင်း စွမ်းရည်အရင်းအမြစ်ကို မြင်သွားတာလား"

"ဟုတ်တယ်... ငါ မြင်လိုက်ရတယ်"