အခန်း (၆၇-၆၈)

အခန်း (၆၇) - ကျေးဇူးကို ရန်တုံ့ပြန်ခြင်း

​လျူယန်တို့ သုံးဦးသည် တိုက်ပွဲမှ ရရှိလာသော ဆုလာဘ်များကို သိမ်းဆည်းရန် အလုပ်ရှုပ်နေကြသည်။ တစ်ဖက်တွင်မူ သူတို့ ကယ်တင်လိုက်သော နိုးထသူ သုံးဦးမှာ မှင်သက်နေရာမှ သတိပြန်ဝင်လာကြတော့သည်။

​မူလက လျူယန်၊ မုရုံရွှယ်နှင့် ချူလုံတို့မှာ သေချာပေါက် အသတ်ခံရမည်ဟု သူတို့ ထင်ထားခဲ့ခြင်း ဖြစ်သည်။ သို့သော် မု​ရုံရွှယ်က လူ (၁၃) ဦးကို တစ်ဦးတည်းနှင့် အပြတ်အသတ် ချေမှုန်းနိုင်လိမ့်မည်ဟု သူတို့ လုံးဝ မထင်ထားခဲ့ပေ။

​ထိုသူ သုံးဦးသည် မုရုံရွှယ်အနားသို့ အပြေးအလွှား ရောက်လာကြပြီး ခေါင်းဆောင်ဖြစ်သူက အထင်ကြီးလေးစားဟန်ဖြင့် ပြုံးကာ မေးလိုက်၏။

"မင်္ဂလာပါ မိန်းကလေး... ကျုပ်နာမည်က ရှုထျန်းပါ... သူတို့ရဲ့ ခေါင်းဆောင်ပါ... ကျုပ်တို့ အသက်ကို ကယ်တင်ပေးလို့ ကျေးဇူးအများကြီး တင်ပါတယ်... မင်းတို့က အရမ်းသန်မာတာပဲ၊ ငါတို့တွေ မဟာမိတ်ဖွဲ့ပြီး တစ်ယောက်ကိုတစ်ယောက် စောင့်ရှောက်ကြရင် မကောင်းဘူးလား"

​မုရုံရွှယ်ကတော့ ထိုစကားကို ကြားသောအခါ အေးစက်သော မျက်နှာထားဖြင့် ဘာမှပြန်မပြောဘဲ နေလိုက်သည်။ သူမသည် ငယ်စဉ်ကတည်းက ပါရမီရှင်အဖြစ် အထူးအခွင့်အရေးများဖြင့် ကြီးပြင်းလာသူဖြစ်ရာ သူမအား ဝိုင်းဝန်းမြှောက်ပင့်ကြသူများကို အလွန်ပင် စိတ်ကုန်နေပြီ ဖြစ်သည်။

​"မဟာမိတ်ဖွဲ့ချင်တာလား... အဲ့ဒါဆိုရင် ငါတို့ခေါင်းဆောင်ကို သွားမေးလိုက်"

မုရုံရွှယ်က လျူယန်ကို လက်ညှိုးထိုးပြကာ အေးစက်စွာ ပြောပြီးနောက် သူမ၏ ပစ္စည်းများကို ဆက်လက်သိမ်းဆည်းနေတော့သည်။

​ရှုထျန်းနှင့် သူ၏အပေါင်းအပါများမှာ အံ့ဩသွားကြသည်။ သူတို့အမြင်တွင် မုရုံရွှယ်မှာ အသန်မာဆုံးဖြစ်ပြီး လျူယန်မှာမူ မြားပစ်တတ်ရုံ၊ ပစ္စည်းကောက်တတ်ရုံသာရှိသော အချောင်သမားဟု ထင်နေကြသည်။ ဤကဲ့သို့သော လူစားမျိုးက ဘာဖြစ်လို့ ခေါင်းဆောင် ဖြစ်နေရသနည်းဟု သူတို့ တွေးမိကြသည်။

​ခဏအကြာတွင် သူတို့သည် လျူယန်ရှေ့သို့ ရောက်လာကြသော်လည်း မု​ရုံရွှယ်ကို ဆက်ဆံသကဲ့သို့ ရိုသေမှုမရှိတော့ပေ။

"ညီလေး... မင်းက တကယ့်ကို စွမ်းတာပဲ...ဒီလောက်သန်မာပြီး ချောမောတဲ့ အသင်းဖော်မျိုး ရထားတာဆိုတော့ တကယ့်ကို ကံကောင်းတဲ့ကောင်ပဲ"

"ငါတို့ကို ကယ်ခဲ့တာ ကျေးဇူးပဲ"

"ညီလေး... ငါတို့ ခြောက်ယောက်ပေါင်းပြီး သွားကြရင် ပိုအဆင်ပြေမယ် မထင်ဘူးလား... တစ်ယောက်နဲ့တစ်ယောက်လည်း ကူညီလို့ရတာပေါ့"

​သူတို့က ကျေးဇူးတင်စကား ဆိုနေကြသော်လည်း မျက်နှာအမူအရာမှာ လျူယန်ကို အထင်အမြင်သေးနေသည့်ဟန် ပေါ်လွင်နေသည်။ လျူယန်ကလည်း မုရုံရွှယ်ကဲ့သို့ပင် အေးစက်သော အမူအရာဖြင့် ပြတ်သားစွာ ပြောလိုက်သည်။

"ငါတို့ အဖွဲ့မဖွဲ့ဘူး... ကိုယ့်ဘာသာကိုယ်ပဲ သွားမယ်... ဖယ်ကြစမ်း... လမ်းမပိတ်နဲ့"

​လျူယန်သည် သူတို့ကို ကယ်တင်ရန် ရည်ရွယ်ချက်ဖြင့် တိုက်ခိုက်ခဲ့ခြင်းမဟုတ်ဘဲ အမာရွတ်မျက်နှာတို့အဖွဲ့ကို သင်ခန်းစာပေးရန်နှင့် ထိုသူတို့ထံမှ ပစ္စည်းများကို လုယူရန်သာ ရည်ရွယ်ခဲ့ခြင်း ဖြစ်သည်။

​မုရုံရွှယ်က သူတို့ကို အဖက်မလုပ်သည်ကို ရှုထျန်းတို့က လက်ခံနိုင်သော်လည်း၊ သူတို့အမြင်တွင် အားနည်းလှသော လျူယန်က အေးစက်စွာ ဆက်ဆံသောအခါတွင်မူ သူတို့မှာ အရှက်ရသွားသလို ခံစားလိုက်ရသည်။

"မင်းက ဘာတွေ ပြောနေတာလဲ... မင်းက သူတို့နောက်က လိုက်နေရတဲ့ အချောင်သမား မဟုတ်ဘူးလား... ကိုယ့်ကိုယ်ကိုယ် သိပ်သန်မာလှပြီ ထင်နေတာလား"

​သူတို့က လျူယန်၏ ကွယ်ရာတွင် တိုးတိုးလေး အတင်းပြောနေကြသော်လည်း [အလုံးစုံသိမြင်သောအာရုံ] စွမ်းရည်ရှိသော လျူယန်ကတော့ အကုန်လုံးကို အတိုင်းသား ကြားနေရသည်။ သို့သော် သူက ဂရုမစိုက်ဘဲ ပစ္စည်းများကိုသာ ဆက်လက် သိမ်းဆည်းနေခဲ့သည်။

​ရရှိလာသော ဆုလာဘ်များကို စစ်ဆေးလိုက်ရာ လက်နက်ပစ္စည်းများမှာ အဆင့်နိမ့်သဖြင့် လျူယန်တို့က စိတ်မဝင်စားကြပေ။ ရိက္ခာများကိုမူ အရေးပေါ်အခြေအနေအတွက် သိမ်းဆည်းလိုက်ကြသည်။ အကြီးမားဆုံး ဆုလာဘ်မှာမူ 'ယင်' ကတ်များပင် ဖြစ်သည်။

​အမာရွတ်မျက်နှာတို့ ၁၃ ယောက်ထံတွင် ယင်ကတ် (၁၃) ကတ်သာ ရှိမည်ဟု ခန့်မှန်းထားသော်လည်း အမှန်တကယ်တွင်မူ ယင်ကတ်ပေါင်း (၆၂) ကတ်အထိ ရရှိခဲ့သဖြင့် အားလုံး အံ့ဩသွားကြသည်။ ဤသူများသည် အခြားသော နိုးထသူအဖွဲ့များစွာကို သတ်ဖြတ်ကာ လုယက်ထားခြင်းဖြစ်ကြောင်း သိသာလှသည်။

​"၆၂ ကတ်ဆိုတော့ ငါတို့ တစ်ယောက်ကို ၂၀ ကျော်စီ ရပြီပေါ့... ဒါဆိုရင် ယင်ကတ်အတွက် စိတ်ပူစရာ မလိုတော့ဘူး... ငါတို့ မူလလမ်းကြောင်းအတိုင်း ဆက်သွားပြီး ရသမျှ အလောင်းတွေဆီက ပစ္စည်းသိမ်းမယ်၊ ပြီးရင်တော့ 'ယန်' နယ်မြေကိုသွားဖို့ နည်းလမ်းရှာကြတာပေါ့"

လျူယန်က ရှင်းပြလိုက်သည်။

​ထို့နောက် မုရုံရွှယ်နှင့် ချူလုံတို့က လမ်းကြောင်းဟောင်းအတိုင်း ရှေ့ပြေးထွက်ခွာသွားကြပြီး လျူယန်ကတော့ ကျန်ရှိနေသော အလောင်းများထံမှ စွမ်းအားများကို ထုတ်ယူရန် ကျန်ရစ်ခဲ့သည်။

​ထိုအချိန်တွင် ရှုထျန်းနှင့် ကျန်နိုးထသူ နှစ်ဦးမှာ တစ်ဦးကိုတစ်ဦး ကြည့်ကာ ယုတ်မာသော အကြံများဖြင့် လျူယန်ကို ဝိုင်းရံလိုက်ကြတော့သည်။

​"ညီလေး... ငါတို့က အတူတူသွားဖို့ ပြောတာကို မင်းက ငြင်းတယ်ပေါ့... မင်းက ကိုယ့်ကိုယ်ကိုယ် ဘာထင်နေတာလဲ... အဲ့ဒီ မိန်းကလေးက သန်မာတာနဲ့တင် မင်းက လူစွမ်းကောင်း ဖြစ်သွားပြီ ထင်နေတာလား... အခုတော့ သူလည်း မရှိတော့ဘူးဆိုတော့ မင်းရဲ့ ယင်ကတ် ၆၂ ကတ်လုံးကို အခုချက်ချင်း ပေးစမ်း... မပေးရင်တော့ မင်းကို သတ်ပစ်မယ်"

ရှုထျန်းက ယုတ်မာသော မျက်နှာထားဖြင့် ခြိမ်းခြောက်လိုက်သည်။

​သူ့အပေါင်းအပါများကလည်း လျူယန်ကို လှောင်ပြောင်ကြည့် ကြည့်နေကြသည်။ သူတို့က ယင်ကတ်များကို ရယူကာ သားရဲများနှင့် မတိုက်ခိုက်ဘဲ 'ယန်' နယ်မြေတွင် အလွယ်တကူ လဲလှယ်ပြီး အဆင့်မြင့်သော အလုပ်အကိုင်များကို ရယူရန် စိတ်ကူးယဉ်နေကြသည်။

​လျူယန်သည် ကျေးဇူးတရားကို ရန်တုံ့ပြန်နေကြသော ထိုသုံးဦးကို ကြည့်ကာ ခေါင်းခါလိုက်မိသည်။ လူသားတွေရဲ့ စိတ်ဓာတ်က ဒီလောက်အထိ နိမ့်ကျလိမ့်မယ်လို့ သူ မထင်ထားခဲ့မိပေ။

​အခန်း (၆၈) - နယ်မြေရှင်းလင်းခြင်း၏ နိဂုံး

​"ငါ မင်းတို့ကို မကယ်ခဲ့သင့်ဘူးပဲ"

လျူယန်က တည်ငြိမ်စွာ ပြောလိုက်သည်။

​အမှန်တကယ်တော့ လျူယန်သည် သူတို့ကို ကယ်တင်ရန် သီးသန့်ရည်ရွယ်ခဲ့ခြင်း မဟုတ်ပေ။ သူ၏ အဓိကပစ်မှတ်မှာ အမာရွတ်မျက်နှာနှင့် သူ၏နောက်လိုက်များထံမှ 'ယင်' ကတ်များကို ရယူရန်သာ ဖြစ်သည်။ သို့သော် ထိုစဉ်က လျူယန်သည် အမာရွတ်မျက်နှာတို့က ဤသုံးဦးကို သတ်ဖြတ်ပြီးသည်အထိ စောင့်ဆိုင်းပြီးမှ တိုက်ခိုက်လျှင်လည်း ရနိုင်သော်လည်း၊ လူသားအချင်းချင်းဖြစ်၍ အသက်ရှင်စေလိုသော စိတ်ရင်းဖြင့် စောစီးစွာ ဝင်ရောက်တိုက်ခိုက်ခဲ့ခြင်း ဖြစ်သည်။

​သူသည် ကျေးဇူးဆပ်ရန် မမျှော်လင့်ခဲ့သော်လည်း ယခုကဲ့သို့ ကျေးဇူးကို ရန်တုံ့မူလာလိမ့်မည်ဟုလည်း မထင်ထားခဲ့ပေ။

​ရှုထျန်းက လျူယန်၏စကားကို ကြားသောအခါ ရယ်မောလိုက်ပြီး ဆိုလိုက်၏။

"ငါ့ကောင်... သန်မာတဲ့သူက အားနည်းတဲ့သူကို အနိုင်ကျင့်တာ လောကနိယာမပဲကွ... မင်းကတော့ သန်မာတဲ့ အသင်းဖော်ရထားလို့ ကံကောင်းသွားတာပါ"

​လျူယန်က အသာအယာ ပြုံးလိုက်ရင်း ပြန်ပြောလိုက်သည်။

"ဒါဆိုလည်း တိုက်ကြည့်ကြတာပေါ့... ဘယ်သူက တကယ်သန်မာလဲဆိုတာ သိရတာပေါ့"

​"မင်းကတော့ တကယ့်ကို ဘဝင်မြင့်တာပဲ"

ရှုထျန်းနှင့် သူ၏နောက်လိုက်များမှာ လျူယန်ကို အဝေးပစ်သမားတစ်ဦးဟုသာ ထင်ထားကြသဖြင့် အနီးကပ်တိုက်ခိုက်ရန် လက်နက်များကို မြှောက်ကာ ပြေးဝင်လာကြတော့သည်။

​လျူယန်သည် သူ၏ အဆင့်-A လက်နက်ဖြစ်သော [ဓားသွားပျော့ လက်အိတ်] မှ ဓားသွားများကို ထုတ်လိုက်ပြီး အဆင့်-A စွမ်းရည်ဖြစ်သော [မီးတောက်ဘုရင်လက်သီး] ကို အသက်သွင်းကာ ရှေ့သို့ တိုးဝင်လိုက်သည်။

​ရှုထျန်းတို့ သုံးဦးသည် လျူယန်က သူတို့၏ လက်နက်များကို လက်သီးဖြင့် ရင်ဆိုင်ရန် ကြိုးစားသည်ကို မြင်သောအခါ ပို၍ပင် အထင်သေးသွားကြသည်။ သို့သော် နောက်တစ်စက္ကန့်တွင် လျူယန်၏ လက်သီးချက်မှာ သူတို့၏ လက်နက်များနှင့် ထိတွေ့သွားပြီး ကြောက်မက်ဖွယ်ကောင်းသော ခွန်အားကြောင့် သူတို့၏ လက်နက်များ လွင့်ထွက်သွားကာ လက်ဖဝါးများမှာလည်း ကွဲအက်နာကျင်သွားကြတော့သည်။

​လျူယန်၏ ရိုးရှင်းလှသော လက်သီးချက်အနည်းငယ်အောက်တွင် နိုးထသူနှစ်ဦးမှာ နေရာမှာတင် လဲကျသေဆုံးသွားပြီး ရှုထျန်းတစ်ဦးတည်းသာ ကျန်ရစ်တော့သည်။

​ရှုထျန်းမှာ ကြောင်အမ်းသွားပြီး ဘာဖြစ်သွားမှန်းပင် သေချာမမြင်လိုက်ရပေ။ သူ၏ အသင်းဖော်နှစ်ဦး သေဆုံးသွားသည်ကို မြင်မှသာ လျူယန်သည် အမှန်တကယ် အသန်မာဆုံး ခေါင်းဆောင်ဖြစ်ကြောင်း သူ နားလည်သွားတော့သည်။

​"ညီလေး... ငါမှားသွားပါတယ်... ငါ့အသက်ကို ချမ်းသာပေးပါ"

ရှုထျန်းသည် နေရာမှာတင် ဒူးထောက်ကာ အသနားခံတော့သည်။

​သို့သော် လျူယန်သည် မဆိုင်းမတွပင် ပြင်းထန်သော တိုက်ကွက်တစ်ခုဖြင့် ရှုထျန်းကို အဆုံးစီရင်လိုက်သည်။ အမှန်တကယ်တော့ သူတို့သုံးဦး တိုးတိုးလေး ကြံစည်နေစဉ်ကတည်းက လျူယန်သည် [အလုံးစုံသိမြင်သောအာရုံ] စွမ်းရည်ဖြင့် အကုန်လုံးကို ကြားနေရခြင်း ဖြစ်သည်။ သူတို့ကို အခွင့်အရေးပေးခဲ့သော်လည်း သူတို့က ယုတ်မာမှုကို ရွေးချယ်ခဲ့သည့်အတွက် လျူယန်ကလည်း သနားညှာတာမနေတော့ပေ။

​လျူယန်သည် ရှေ့ရှိ အလောင်း (၁၇) လောင်းနှင့် သားရဲအလောင်းများထံမှ စွမ်းအားများကို စတင်ထုတ်ယူလိုက်တော့သည်။

​[ချပ်ဝတ်တန်ဆာသုံး ကြံ့ကြီး (C-အဆင့် ပါရမီ၊ အဆင့် ၁၅) ထံမှ ထုတ်ယူခြင်း အောင်မြင်ပါသည်။ ခွန်အား +၂၄၅၊ ခံနိုင်ရည် +၃၁၂၊ လိုက်လျောညီထွေမှု +၁၇၈ နှင့် EXP ၆၀၀ ရရှိပါသည်။]

​[တောအုပ်မြွေစိမ်းကြီး (C-အဆင့် ပါရမီ၊ အဆင့် ၁၈) ထံမှ ထုတ်ယူခြင်း အောင်မြင်ပါသည်။ ခွန်အား +၂၂၅၊ ခံနိုင်ရည် +၂၁၂၊ စိတ်ဝိညာဉ် +၂၄၈ နှင့် EXP ၆၅၀ ရရှိပါသည်]

​[နိုးထသူအလောင်း (D-အဆင့် ပါရမီ၊ အဆင့် ၅) ထံမှ ထုတ်ယူခြင်း အောင်မြင်ပါသည်။ ခွန်အားမြှင့်တင်ခြင်း (D-အဆင့်) ကို ရရှိပြီး ဆိတ်သုဉ်းခြင်းခွန်အား (A-အဆင့်) နှင့် ပေါင်းစပ်ကာ စွမ်းအား ၁% တိုးမြင့်သွားပါသည်]

​...

​ဤထုတ်ယူမှုများမှတစ်ဆင့် လျူယန်သည် အဆင့်နိမ့်နိုးထသူများထံမှ ရရှိမှုထက် သားရဲများထံမှ ရရှိသော အရည်အချင်းအမှတ်နှင့် EXP မှာ ပိုမိုများပြားကြောင်း သတိပြုမိသွားသည်။

​နေဝင်ရီတရောအချိန်တွင် လျူယန်တို့ သုံးဦးသည် သစ်ပင်ကြီးတစ်ပင်အောက်တွင် ပြန်လည်ဆုံတွေ့ကြသည်။ သူတို့တွင် စုစုပေါင်း 'ယင်' ကတ် (၇၂) ကတ်အထိ ရှိနေပြီ ဖြစ်သည်။

​လျူယန်သည် ကင်ထားသော ကြံ့ခြေထောက်ကြီးကို စားရင်းဖြင့် ခရီးစဉ်ကို သုံးသပ်လိုက်သည်။

"ဒီတောအုပ်က အရမ်းကျယ်လွန်းတယ်... ငါတို့ အကုန်လုံးကို လိုက်ရှင်းဖို့ အချိန်မရှိဘူး... ဒီနေ့ ရခဲ့တဲ့ ပစ္စည်းတွေကလည်း လုံလောက်နေပါပြီ"

​"ယင်ကတ်တွေ ဘယ်လောက်ပဲ ရှိရှိ၊ 'ယန်' ကတ်မရှိရင် အသုံးမဝင်ဘူး... ဒါကြောင့် ဒီညမှာပဲ ငါတို့ 'ယန်' နယ်မြေကို ဦးတည်ပြီး ထွက်ခွာကြမယ်"