အခန်း (၇၇-၇၈)
Vol. 8 Ch. 77-78
အခန်း (၇၇) - ခြုံခိုတိုက်ခိုက်ခံရခြင်း
သူတို့ သုံးဦးသည် ခရီးကို ဆက်လက်နှင်ခဲ့ကြသည်။
လိုဏ်ဂူလမ်းမှ ထွက်လိုက်သည်နှင့် 'ယန်' နယ်မြေသို့ ရောက်ရှိသွားသည်။ သူတို့ မြင်တွေ့လိုက်ရသည်မှာ မြင့်မားသော သစ်ပင်ကြီးများနှင့် ထူထပ်လှသော ပန်းမာန်များ ရှိသည့် ရှေးဦးသစ်တောကြီးတစ်ခုပင်။ ၎င်းသည် 'ယင်' နယ်မြေနှင့် ဆင်တူသော်လည်း ပိုမိုတောက်ပကာ လှပနေသည်။ လေထုထဲတွင်လည်း ပြင်းထန်သော မီးဓာတ်စွမ်းအင်များ စိမ့်ဝင်နေသည်ကို လျူယန်ခံစားမိသည်။
"ဒါက ယန်နယ်မြေပေါ့... ကြည့်ရတာ ယင်နယ်မြေနဲ့ သိပ်မထူးခြားလှပါလား"
မုရုံရွှယ်က ဘေးပတ်ဝန်းကျင်ကို လှည့်ပတ်ကြည့်ရင်း ဆိုသည်။
ချူလုံကမူ လေးနက်သော မျက်နှာထားဖြင့် သတိပေးလိုက်သည်။
"ယန်နယ်မြေက ယင်နယ်မြေထက် ပိုအန္တရာယ်များတယ်လို့ ငါကြားဖူးတယ်၊ ငါတို့ သတိထားသင့်တယ်"
သူတို့အဖွဲ့ ရှေ့သို့ ဆက်လျှောက်လာစဉ် လျူယန်သည် သူ၏ A-အဆင့် စွမ်းရည် [အလုံးစုံသိမြင်သောအာရုံ] ကို အသုံးပြုကာ ဝန်းကျင်ကို စူးစမ်းလိုက်သည်။ ထိုစဉ် 'နိုးထသူ' အဖွဲ့နှစ်ဖွဲ့၊ စုစုပေါင်း လူခြောက်ဦးသည် သူတို့ဆီသို့ မကောင်းသော ရည်ရွယ်ချက်များဖြင့် ချဉ်းကပ်လာနေသည်ကို သူ သိရှိလိုက်ရသည်။
လျူယန်က ရုတ်တရက် ခြေလှမ်းရပ်လိုက်သဖြင့် မုရုံရွှယ်နှင့် ချူလုံတို့က ဇဝေဇဝါဖြင့် ကြည့်လိုက်ကြသည်။
"တစ်ခုခု ဖြစ်လို့လား"
ချူလုံက မေးသည်။
လျူယန်က ခပ်ပြုံးပြုံးဖြင့် ပြောလိုက်၏။
"ဧည့်သည်အချို့ ရောက်လာပြီ... သူတို့ကို ဧည့်ခံဖို့ ပြင်ထားကြတော့"
မိန်းကလေးနှစ်ဦးမှာ လျူယန်၏ ဆိုလိုရင်းကို ချက်ချင်းနားလည်သွားကာ တိုက်ပွဲဝင်ပုံစံ ပြင်လိုက်ကြသည်။ မကြာမီမှာပင် 'နိုးထသူ' ခြောက်ဦးမှာ ရှေ့နှင့်နောက် ညှပ်လျက် သူတို့ကို ဝိုင်းရံထားလိုက်တော့သည်။
ထိုသူများထဲမှ ခေါင်းဆောင်ဖြစ်သူက လျူယန်တို့ကို ကြည့်ကာ လှောင်ပြုံးဖြင့် ပြောလိုက်၏။
"ငါပြောသားပဲ... လိုဏ်ဂူလမ်း ပွင့်သွားတာနဲ့ ကောင်လေးတွေ ရောက်လာတော့မှာပါလို့"
အခြားသူများကလည်း လျူယန်တို့အဖွဲ့ကို သားကောင်အဖြစ် မြင်နေသည့်အလား လောဘဇောတက်နေသော မျက်လုံးများဖြင့် ကြည့်နေကြသည်။
"ဆရာပြောတာ မှန်တယ်... ဒီလိုဏ်ဂူလမ်းမှာ ခြုံခိုတိုက်ရင် ယင်နယ်မြေက လာတဲ့ကောင်တွေဆီကနေ ကတ်ပြားတွေ လုလို့ရတာပေါ့... ဒါဆိုရင် ငါတို့ ယင်နယ်မြေထဲထိ သွားပြီး ဒုက္ခခံစရာ မလိုတော့ဘူး"
"ဟုတ်တယ်... တခြားအကောင်တွေကတော့ ထိုက်ကျိတောင်တန်းကို ပတ်သွားနေကြတာ၊ အတော်အတာပဲ... ငါတို့ကတော့ ဒီမှာတင် အေးဆေး လုယူရုံပဲ"
"ဒါပေမဲ့ ဒီသုံးယောက်က ယင်နယ်မြေကနေ ပထမဆုံး ထွက်လာနိုင်တဲ့သူတွေဆိုတော့ အင်အားနည်းမှာ မဟုတ်ဘူး... ငါတို့ ခြောက်ယောက်ပေါင်းရင်တော့ လွယ်လွယ်လေး နှိမ်နင်းနိုင်မှာပါ"
သူတို့၏ စကားများကို နားထောင်ပြီးနောက် လျူယန်တို့ သုံးဦးမှာ ထိုသူများ၏ ရည်ရွယ်ချက်ကို အကုန်သိသွားကြသည်။ သူတို့သည် ယင်နယ်မြေထဲသို့ သွား၍ ကတ်ပြားရှာရန် စိတ်မကူးဘဲ၊ လိုဏ်ဂူလမ်းအဝတွင် စောင့်ကာ တခြားသူများဆီမှ ကတ်ပြားများကို လုယူရန် ကြံစည်နေကြခြင်း ဖြစ်သည်။
ထိုသူခြောက်ဦးသည် သူတို့၏ အစီအစဉ်များကို ပြောဆိုပြီးနောက် လျူယန်တို့ဘက်သို့ လှည့်ကြည့်လိုက်ရာ ချောမောလှပသော မုရုံရွှယ်နှင့် ချူလုံတို့ကို တွေ့လိုက်ရသဖြင့် မျက်လုံးများ တောက်ပသွားကြသည်။ မျှော်စင်ထဲတွင် အမျိုးသမီး 'နိုးထသူ' မှာ နည်းပါးလှပြီး ဤမျှ လှပသော မိန်းကလေးများကို မြင်တွေ့ရရန်မှာ အလွန်ပင် ခဲယဉ်းလှသည်။
"ဟေး... ဒီကောင်လေးကတော့ ကံကောင်းလှချည်လား... ဒီလောက်လှတဲ့ မိန်းကလေး နှစ်ယောက်နဲ့ အတူရှိနေတာ"
"အပြင်လောကမှာတောင် ဒီလောက်လှတာ မတွေ့ဖူးဘူး... ဒီနေ့တော့ ငါတို့ ကံပွင့်ပြီဟေ့"
"ဟေ့ကောင်လေး... ငါပြောတာ နားထောင်.. မင်းဆီက ယင်ကတ်ပြားတွေကို ပေးပြီး အခုပဲ ထွက်သွားတော့... ဒါဆိုရင် မင်းရဲ့ အသုံးမကျတဲ့ အသက်ကို ငါတို့ ချမ်းသာပေးမယ်"
"ဟုတ်တယ်... မြန်မြန်ပေးပြီး လစ်တော့... ငါတို့ ဒီအလှလေးတွေနဲ့ ပျော်ပါးဖို့ကို မနှောင့်ယှက်နဲ့"
ထိုသူများ၏ ရိုင်းစိုင်းသော စကားများကြောင့် လျူယန်မှာ စိတ်ထဲမှ ရယ်မိသွားသည်။ သူတို့၏ အစီအစဉ်မှာ လိမ္မာပါးနပ်သည်ဟု ဆိုနိုင်သော်လည်း မိမိတို့၏ အင်အားကို အထင်ကြီးလွန်းနေကြသည်။ ယင်နယ်မြေမှ ယန်နယ်မြေသို့ ပထမဆုံး ရောက်လာနိုင်သော သူများမှာ အင်အားအလွန်ကြီးမားမည်ကို သူတို့ လုံးဝ ထည့်မတွေးခဲ့ကြပေ။
လျူယန်သည် ဤကဲ့သို့သော 'လူညံ့' များကို ကိုင်တွယ်ရန် ပျင်းရိနေသဖြင့် မုရုံရွှယ်နှင့် ချူလုံတို့ကို ပြောလိုက်သည်။
"မင်းတို့ပဲ ကိုင်တွယ်လိုက်တော့၊ ငါကတော့ တိုက်ရမှာ ပျင်းလို့"
မုရုံရွှယ်က ခေါင်းညိတ်ကာ ရှေ့သို့ တက်သွားပြီး၊ ချူလုံကမူ အနောက်မှနေ၍ ကုသမှုပေးရန် ပြင်လိုက်သည်။ လျူယန်သည် သူ၏ အရိပ်ဝံပုလွေကိုလည်း လေ့ကျင့်ခန်းအဖြစ် ထုတ်လွှတ်လိုက်သည်။
ထိုသူများက လျူယန်သည် မိန်းကလေးများနောက်တွင် ပုန်းနေသည်ဟု ထင်ကာ ပို၍ လှောင်ပြောင်လာကြသည်။
"ဒီကောင်က မိန်းကလေးတွေနောက်မှာ ပုန်းနေတဲ့ အသုံးမကျတဲ့ကောင်ပဲ"
"အလှလေး... အဲ့ဒီလက်သီးတွေကို ချလိုက်စမ်းပါ... မင်းရဲ့ နုနယ်တဲ့ လက်ကလေးတွေ နာကုန်ပါဦးမယ်... ဟားဟားဟား"
၎င်းတို့ ပြောဆိုရင်း မုရုံရွှယ်ထံသို့ တစ်ပြိုင်နက်တည်း ပြေးဝင်သွားကြသည်။ မုရုံရွှယ်မှာ လုံးဝ မကြောက်ဘဲ [အာဏာရှင် ခန္ဓာကိုယ်] ဒုတိယအဆင့်ကို အသက်သွင်းကာ ရှေ့သို့ တစ်လှမ်းတက်လိုက်သည်။ အနောက်တွင် ချူလုံ၏ ကုသမှုရှိနေသဖြင့် သူမသည် ခုခံရန်ပင် မစဉ်းစားဘဲ တိုက်စစ်သက်သက်ကိုသာ အာရုံစိုက်လိုက်သည်။
ဘုန်း... ဘုန်း...
မုရုံရွှယ်၏ လက်သီးချက်နှစ်ချက်အတွင်းမှာပင် လူနှစ်ဦးမှာ လွင့်စင်သွားပြီး ပြင်းထန်စွာ ဒဏ်ရာရသွားကြသည်။ ကျန်သူများ၏ တိုက်ကွက်များက မုရုံရွှယ်ကို ထိမှန်သော်လည်း သူမအတွက် အနည်းငယ်မျှပင် မထိခိုက်ပေ။ ရရှိသော ဒဏ်ရာအနည်းငယ်မှာလည်း ချူလုံ၏ ကုသမှုကြောင့် တစ်ခဏအတွင်း ပျောက်ကွယ်သွားသည်။
ကျန်ရှိနေသော 'နိုးထသူ' လေးဦးမှာ သူတို့၏ သူငယ်ချင်းနှစ်ဦး မျက်စိတစ်မှိတ်အတွင်း ရှုံးနိမ့်သွားသည်ကို မြင်လိုက်ရသဖြင့် တုန်လှုပ်သွားကြသည်။ ဤလှပသော မိန်းကလေးမှာ ဤမျှ အစွမ်းထက်လိမ့်မည်ဟု သူတို့ လုံးဝ မထင်မှတ်ထားခဲ့ကြပေ။
အခန်း (၇၈) - ခြေရာခံ ခံနေရခြင်း
"မဖြစ်နိုင်ဘူး... ငါတို့ သူ့ကို မယှဉ်နိုင်ဘူး... ဒီမိန်းမက မိစ္ဆာပဲ... အမြန်ပြေးကြ"
ခြုံခိုတိုက်ခိုက်သည့်အဖွဲ့၏ ခေါင်းဆောင်ဖြစ်သူမှာ အခြေအနေကို ဦးစွာရိပ်မိသွားပြီး အော်ဟစ်ကာ ထွက်ပြေးရန် ပြင်တော့သည်။ အခြားသူများကလည်း နောက်လှည့်ကာ ထွက်ပြေးရန် အားထုတ်ကြသည်။
သို့သော် လျူယန်ထုတ်လွှတ်ထားသော အရိပ်ဝံပုလွေမှာမူ [ရေခဲနှင့် မီးတောက် ဝံပုလွေခေါင်းနှစ်လုံး] အဖြစ် အသွင်ပြောင်းကာ ၎င်းတို့၏ ထွက်ပြေးမည့်လမ်းကို နောက်ကျောမှ ပိတ်ဆို့ထားပြီး ဖြစ်သည်။ ဧရာမ သားရဲကြီး၏ ကိုယ်ထည်မှ ထွက်ပေါ်နေသော ရေခဲနှင့် မီးဓာတ်စွမ်းအင်များမှာ ကြည့်ရသူကို တုန်လှုပ်ချောက်ချားစေသည်။
'နိုးထသူ'များမှာ ကြောင်အသွားကြသည်။ ဤမျှ အစွမ်းထက်သော သားရဲကြီး မိမိတို့နောက်သို့ မည်သည့်အချိန်တွင် ရောက်ရှိလာသည်ကို သူတို့ လုံးဝ သတိမထားမိခဲ့ကြပေ။ ဝံပုလွေကြီးမှာ ညှာတာခြင်းမရှိဘဲ ခေါင်းနှစ်လုံးမှ မီးလုံးကြီးတစ်လုံးနှင့် ရေခဲစူးကြီးတစ်ခုကို တစ်ပြိုင်နက် မှုတ်ထုတ်လိုက်ရာ လူနှစ်ဦးမှာ ချက်ချင်းပင် အသက်ပျောက်သွားတော့သည်။
မုရုံရွှယ်ကလည်း သူမ၏ တိုက်စစ်ကို ဆက်လက်ဆင်နွှဲရာ ကျန်ရှိနေသော နှစ်ဦးမှာလည်း ခဏအတွင်းမှာပင် ကျဆုံးသွားကြသည်။ တိုက်ပွဲတစ်ခုလုံးတွင် လျူယန်မှာ လက်ဖျားနှင့်ပင် မတို့လိုက်ရဘဲ အဆုံးသတ်သွားခဲ့သည်။ ရန်သူက လူအင်အား သာသော်လည်း အင်အားချင်း ကွာခြားလွန်းလှသဖြင့် မျက်စိတစ်မှိတ်အတွင်း အပြတ်အသတ် ရှုံးနိမ့်သွားခြင်း ဖြစ်သည်။
"ဒီလူတွေက တကယ်ယုတ်မာတာပဲ... လိုဏ်ဂူလမ်းအထွက်မှာ ခြုံခိုတိုက်ဖို့ လူခြောက်ယောက်တောင် စုထားကြတာ... ငါတို့သာ အင်အားမရှိရင် အသက်ပျောက်နေတာ ကြာပြီ"
မုရုံရွှယ်က မျက်မှောင်ကြုတ်ကာ ဆိုသည်။
ချူလုံကလည်း ထောက်ခံလိုက်၏။
"လိုဏ်ဂူလမ်းကနေ ထွက်လာတဲ့သူတွေက ပုံမှန်ဆိုရင် တိုက်ပွဲတွေကြောင့် မောပန်းနေမှာ ဒါမှမဟုတ် ဒဏ်ရာရနေမှာပဲ... အဲ့ဒီအချိန်မှာ ဒီလို ခြုံခိုတိုက်ခိုက်မှုကို ဘယ်လိုမှ ခုခံနိုင်မှာ မဟုတ်ဘူး"
လျူယန်ကတော့ စိတ်ထဲမှ ရယ်မိသည်။ ထိုသူများမှာ အကြံအစည်ကောင်းသော်လည်း အင်အားမရှိသည့်အပြင် ကံလည်း မကောင်းကြပေ။ လျူယန်နှင့် တွေ့ဆုံခြင်းက သူတို့အတွက် သေမင်းနှင့် တွေ့ဆုံခြင်းပင် ဖြစ်သည်။
လျူယန်သည် အလောင်းများဆီမှ ပစ္စည်းများကို စစ်ဆေးရာ အထောက်အပံ့အချို့နှင့်အတူ အဓိက အကျိုးအမြတ်ဖြစ်သော 'ယန်' ကတ်ပြား ၆ ခု ကို ရရှိခဲ့သည်။ ယန်နယ်မြေထဲ ခြေချရုံရှိသေးသော်လည်း သူတို့ သုံးဦးလုံးအတွက် တစ်ယောက်လျှင် ကတ်ပြား ၂ ခုစီ ခွဲဝေနိုင်ပြီဖြစ်ရာ တတိယအဆင့် စမ်းသပ်မှုကို အောင်မြင်ရန် လုံလောက်နေပြီ ဖြစ်သည်။
တစ်ပြိုင်နက်တည်းမှာပင် လျူယန်သည် SSS-အဆင့် [နတ်ဘုရားအဆင့် ထုတ်ယူခြင်း ] ကို အသုံးပြုကာ အလောင်းများမှ စွမ်းရည်များကို ထုတ်ယူလိုက်သည်။ သူ ရရှိသမျှကို ရေတွက်ရန် ပြင်ဆင်နေစဉ် [အလုံးစုံသိမြင်သော အာရုံ] စွမ်းရည်အရ အဝေးမှ 'နိုးထသူ' အများအပြား သူတို့ဆီသို့ အပြင်းအနှင် လာနေကြသည်ကို သူ အာရုံရလိုက်သည်။
၎င်းတို့မှာ ခုနက တိုက်ပွဲကြောင့် ဆွဲဆောင်ခံရခြင်း ဖြစ်သည်။ ယန်နယ်မြေရှိ သူများမှာ ယင်ကတ်ပြားများ လိုအပ်နေသဖြင့်၊ ယင်နယ်မြေမှ လာသောသူများကို လုယူရန် တစ်ဦးပြီးတစ်ဦး ရောက်လာကြခြင်း ဖြစ်သည်။
လျူယန်က အခြေအနေကို ရှင်းပြရာ မုရုံရွှယ်က ဆိုလိုက်၏။
"လာသမျှလူကို တစ်ယောက်ချင်း နှိမ်နင်းလိုက်ရုံပဲပေါ့"
ချူလုံကမူ အကြံပေးလိုက်၏။
"လူအုပ်ကြီးနဲ့ဆိုရင် ငါတို့ အင်အားကုန်သွားနိုင်တယ်... ဘေးကင်းအောင် အရင်ဆုတ်တာ ပိုကောင်းမယ်"
လျူယန်က ချူလုံ၏ စကားကို သဘောတူကာ ဆုံးဖြတ်လိုက်သည်။
'ဟုတ်တယ်၊ အန္တရာယ်ကင်းအောင် အရင်ထွက်သွားကြစို့"
သူသည် မိန်းကလေးနှစ်ဦးကို ဝံပုလွေကြီး၏ ကျောပေါ်သို့ တက်ခိုင်းကာ အမြန်ထွက်ခွာစေသည်။ လျူယန်ကိုယ်တိုင်မှာမူ [အသံအရှိန်၏ ဆယ့်ခြောက်ဆ] ရှိနေသဖြင့် ဝံပုလွေပေါ် တက်စရာမလိုဘဲ လွတ်လွတ်လပ်လပ် ပြေးလွှားနိုင်ခဲ့သည်။ သူသည် ဝံပုလွေကြီးထက်ပင် ရှေ့မှ ရောက်နေပြီး "မြန်မြန်လာကြစမ်းပါ၊ ဘာလို့ ဒီလောက်နှေးနေတာလဲ" ဟုပင် လှမ်းအော်လိုက်သေးသည်။
ဝံပုလွေကြီးမှာ စိတ်ထဲမှ မကျေမနပ် ဖြစ်သွားသော်လည်း၊ လျူယန်ကဲ့သို့ 'မိစ္ဆာ' တစ်ကောင်နှင့် မယှဉ်နိုင်ကြောင်း သိသဖြင့် အစွမ်းကုန်သာ ပြေးလွှားနေတော့သည်။
သူတို့အဖွဲ့ ဝေးကွာသော နေရာသို့ ရောက်ရှိသွားသော်လည်း နောက်မှ လိုက်လာသော 'နိုးထသူ' များမှာ သူတို့ရှိရာကို အတိအကျ သိနေသည့်အလား ဆက်တိုက် ခြေရာခံလိုက်နေကြသည်။ လျူယန်သည် မျက်မှောင်ကြုတ်သွားသည်။
ဒီကောင်တွေက ခါချလို့ မရဘူးလား...
ထိုစဉ် လျူယန်သည် ယန်ရေကန်အနီးသို့ ရောက်ရှိလာပြီး ရေကန်အောက်ခြေတွင် အလွန်ပြင်းထန်သော သားရဲအရှိန်အဝါများကို အာရုံရလိုက်သည်။ ထိုအရှိန်အဝါမှာ ရွှေဝတ်စုံဝတ် မျောက်ပြာကြီးနှင့် အလားတူပင်။ ၎င်းမှာ ယခုလက်ရှိ လျူယန်ပင်လျှင် အနိုင်ယူရန် မလွယ်ကူသော အစွမ်းထက် သားရဲကြီးတစ်ကောင် ဖြစ်သည်။
လျူယန်သည် နောက်မှ လိုက်လာသော လူအုပ်ကြီးကို တစ်ချက်ကြည့်ကာ အကြံရသွားပြီး အေးစက်စွာ ပြုံးလိုက်သည်။
"မင်းတို့က ငါ့နောက်ကို လိုက်ချင်ကြတာလား... အေးလေ... လိုက်ခဲ့ကြပေါ့... ငါ့ကိုတော့ အငြိုးမထားနဲ့တော့"