အခန်း (၃၉၃-၃၉၄)
Vol. 20 Ch. 393-394
အခန်း (၃၉၃) - တန်ရွှင်း၏ လာရောက်မှု
ကျောက်စိမ်းနဂါး ပွဲတော် အခမ်းအနားသည် ပြီးဆုံးလုနီးပြီဖြစ်ရာ လူအုပ်ကြီးမှာ ဘုရားကျောင်းမှ ပြန်လည် ထွက်ခွာသွားကြပြီ ဖြစ်သည်။ သို့သော်လည်း ယနေ့ သူတို့ မြင်တွေ့ခဲ့ရသည့် အရာများမှာ နောင်အနာဂတ်အထိ သူတို့၏ စကားဝိုင်းများတွင် အဓိက ပြောစရာ ခေါင်းစဉ်တစ်ခု ဖြစ်နေပေလိမ့်မည်။
မိမိတို့၏ သားရဲများ ဆင့်ကဲပြောင်းလဲသွားသည်ကို မြင်တွေ့ခဲ့ရသည့်တိုင်အောင် ကံထူးရှင် ငါးဦးမှာ အိပ်မက်မက်နေဆဲကဲ့သို့ ခံစားနေကြရ၏။ သူတို့ တစ်ဦးစီတိုင်းသည် ယနေ့မှစ၍ ဘဝသစ်ကို ပိုင်ဆိုင်ခွင့် ရရှိတော့မည် ဖြစ်သည်။ ယခင်က သူတို့ မည်ကဲ့သို့သော ဘဝမျိုးတွင် နေထိုင်ခဲ့ပါစေ၊ ယခုအခါတွင်မူ ထိုအရာများမှာ အရေးမပါတော့ပေ။
၎င်းမှာ ကံကြမ္မာ အလှည့်အပြောင်းပင် ဖြစ်၏။
သာမန်လူတစ်ယောက်အနေဖြင့် အဆင့် (၂) သားရဲတစ်ကောင် ပိုင်ဆိုင်ထားလျှင် ပိုမိုမြင့်မားသော အလုပ်အကိုင် အဆင့်အတန်းကို ရရှိနိုင်မည်ဖြစ်ပြီး အဆင့် (၃) သားရဲတစ်ကောင် ပိုင်ဆိုင်ထားပါက အဖွဲ့အစည်းအသစ်တစ်ခုကိုပင် လွယ်လွယ်ကူကူ ထူထောင်နိုင်စွမ်း ရှိပေသည်။
ထိုငါးဦးထဲမှ အချို့ကို နန်းတွင်းအရာရှိအချို့ကပင် မျက်စိကျနေကြပြီဖြစ်ရာ အခမ်းအနားအပြီးတွင် ဆက်သွယ်ရန် ပြင်ဆင်နေကြတော့သည်။
ဤကဲ့သို့သော အသေးအဖွဲ ကိစ္စများကို ထားရစ်ခဲ့ပြီးနောက် လင်းကျင်းသည်လည်း ပြန်ရန် အသင့်ဖြစ်နေပြီ ဖြစ်၏။ မိုးမလင်းမီကတည်းက စတင်ခဲ့သော ဤပင်ပန်းဆင်းရဲလှသည့် အခမ်းအနားကြောင့် သူသည် အလွန်အမင်း နွမ်းနယ်နေခဲ့ပြီ။ အမှန်အတိုင်း ပြောရလျှင် သူသည် ထိုသားရဲ ငါးကောင်ကို တစ်ကောင်ချင်းစီ ဆင့်ကဲပြောင်းလဲပေးခြင်းဖြင့် လူအုပ်ကြီး ရှေ့တွင် အစွမ်းပြ ပြပွဲတစ်ခုကဲ့သို့ ဟန်ဆောင် ပြသနိုင်သော်လည်း သူ ထိုသို့ မလုပ်ခဲ့ပေ။
သူ စိတ်မပါတော့သောကြောင့်ပင်။ သူသည် သားရဲများ၏ ခေါင်းကို ပုတ်လိုက်ရုံမျှဖြင့် သွေးကြောရှာဖွေခြင်း အတတ်နှင့် သူ၏ ဝိညာဉ်စွမ်းအင်ကို အသုံးပြုကာ ဆင့်ကဲပြောင်းလဲပေးလိုက်ခြင်း ဖြစ်သည်။ ဤကမ္ဘာပေါ်တွင် ဤကဲ့သို့သော ဆင့်ကဲပြောင်းလဲခြင်း နည်းလမ်းကို အသုံးပြုနိုင်သူမှာ သူတစ်ဦးတည်းသာ ရှိပေလိမ့်မည်။
သူ ပြန်ရန် အဆင်သင့် ဖြစ်နေချိန်တွင် ဟယ်ယုနှင့် ဟယ်ချန်းတို့ သူ့ထံသို့ လျှောက်လှမ်းလာသည်ကို မြင်လိုက်ရ၏။
"အကဲဖြတ်မှူးလင်း"
ဟယ်ချန်းက နှုတ်ဆက်လိုက်သည်။ လင်းကျင်းကလည်း ပြုံး၍ ပြန်နှုတ်ဆက်ကာ ခြေလှမ်းများကို ရပ်တန့်လိုက်၏။
ဟယ်ချန်းနှင့် လင်းကျင်းမှာ တစ်ဦးနှင့်တစ်ဦး ရင်းနှီးပြီးသားဟု ပြော၍ ရပေသည်။ လင်းကျင်း နောက်ဆုံးအကြိမ် ဤနေရာသို့ လာစဉ်ကပင် သူတို့ တွေ့ဆုံခဲ့ကြဖူးသည်။ သို့သော် ဟယ်ယုကတော့ ထိုအချိန်က သတိမေ့မြောနေခဲ့သဖြင့် လင်းကျင်းနှင့် တွေ့ဆုံမှုမှာ မရေရာခဲ့ပေ။ ယခုမှသာ သူတို့ အမှန်တကယ် တွေ့ဆုံကြခြင်း ဖြစ်၏။
ပထမဆုံးအကြိမ် တွေ့ဆုံခဲ့သည်မှာ လွန်ခဲ့သော လအနည်းငယ်က မေပယ်မြို့တွင် ဖြစ်သည်။ ထိုစဉ်က လင်းကျင်းမှာ နာမည်ပျက်ဖြင့် အဆင့် (၁) အကဲဖြတ်မှူးလေးသာ ဖြစ်သော်လည်း ယခုမူ သူသည် 'ကျောက်စိမ်းနဂါး၏ အထူးချွန်ဆုံး အကဲဖြတ်မှူး' ဖြစ်နေလေပြီ။
"ဪ... မင်းသမီးတို့ကို တွေ့ရတာ ဝမ်းသာပါတယ်ခင်ဗျာ"
လင်းကျင်းက အရိုအသေ ပေးလိုက်သည်။
"နေပါဦး အကဲဖြတ်မှူးလင်း၊ အားမနာပါနဲ့"
ဟယ်ယုက ပြောရင်း သူ့ကို ဦးညွှတ်လိုက်သည်။
"ကျွန်မရဲ့ အသက်ကို ကယ်တင်ပေးခဲ့တဲ့အတွက် အကဲဖြတ်မှူးလင်းကို ကျေးဇူးတင်ချင်ပါတယ်... မေပယ်မြို့ကို သွားပြီးတော့ အကဲဖြတ်မှူးကို ကိုယ်တိုင်ကိုယ်ကျ ကျေးဇူးတင်ချင်တဲ့အကြောင်း ခမည်းတော်ဆီကိုလည်း ကျွန်မ အရင်က ပြောပြထားပြီးသားပါ"
ညီအစ်မနှစ်ဦး ဖြစ်ကြသဖြင့် ရုပ်ချင်းဆင်ကြသော်လည်း ဟယ်ချန်းနှင့် ဟယ်ယုတို့၏ စရိုက်မှာ လုံးဝ ကွဲပြားကြသည်။ ဟယ်ယုမှာ ယဉ်ကျေးသိမ်မွေ့ပြီး စည်းကမ်းနှင့် ထုံးတမ်းစဉ်လာများကို အလွန်အလေးထားသူ ဖြစ်၏။ သူမသည် တစ်ဖက်လူကို မျက်လုံးချင်း စေ့စေ့ပင် ကြည့်လေ့မရှိပေ။ တစ်ဖက်တွင်မူ ဟယ်ချန်းမှာ ဤကဲ့သို့သော လုပ်ကြံစည်းကမ်းများကို ဂရုစိုက်မည့်သူ မဟုတ်ပေ။ ဘေးတွင် လူများသာ မရှိပါက ဟယ်ချန်းသည် လင်းကျင်းကို တစ်နေရာရာသို့ ခေါ်သွားကာ တစ်နေ့ကုန် စကားပြောနေမည်ကို လင်းကျင်း သေချာပေါက် သိနေသည်။
"ဒီနေ့ ကျုပ်တို့ တွေ့ခွင့်ရပြီဆိုတော့ မင်းသမီးအနေနဲ့ မေပယ်မြို့အထိ ခရီးထွက်စရာ မလိုတော့ဘူးပေါ့ ဟုတ်လား"
လင်းကျင်းက ပြုံး၍ မေးလိုက်သည်။
"အဲဒီလိုတော့ မရဘူးလေ"
ဟယ်ချန်းက ပျာပျာသလဲ ပြောလိုက်သည်။
"နန်းတော်ထဲကနေ အပြင်ထွက်ပြီး ခရီးထွက်ဖို့ အခွင့်အရေး ရထားတာကို၊ အကဲဖြတ်မှူးက ကျွန်မတို့ကို မလာခိုင်းလို့ ဘယ်ဖြစ်မလဲ"
"မင်းသမီးလည်း လိုက်လာမလို့လား"
ဟယ်ချန်းမှာ နန်းတော်တံတိုင်းနောက်ကွယ်တွင် ပိတ်လှောင်ခံထားရသည်ကို မုန်းတီးပြီး ဆော့ကစားချင်သော မိန်းကလေးတစ်ဦး ဖြစ်မှန်း သိသဖြင့် လင်းကျင်းက သူမကို စနောက်လိုက်ခြင်း ဖြစ်သည်။
"လိုက်မှာပေါ့... အကဲဖြတ်မှူးလင်း... ဒီအကြောင်းကို ခမည်းတော်ရှေ့မှာ မပြောမိစေနဲ့နော်၊ မဟုတ်ရင် ခမည်းတော်က သူ့အမိန့်ကို ပြန်ရုပ်သိမ်းသွားလိမ့်မယ်"
ဟယ်ချန်းက တိုးတိုးလေး ကပ်ပြောလိုက်သည်။
"အို... ဟယ်ချန်း၊ ယဉ်ယဉ်ကျေးကျေး နေစမ်းပါ"
ဟယ်ယုက အပြစ်တင်လိုက်သည်။ သို့သော်လည်း သူမသည် ဂရုမစိုက်သလို ဟန်ဆောင်နေရင်း လင်းကျင်းကို ခိုးခိုးကြည့်နေခဲ့၏။ သူမ၏ အကွက်ကိုတော့ ဟယ်ချန်းက ချက်ချင်းပင် ဖော်ထုတ်လိုက်တော့သည်။
"နေပါဦး... အစ်မကိုယ်တိုင်လည်း ဒီခရီးစဉ်ကို မျှော်လင့်နေတာ မဟုတ်ဘူးလား... အစ်မက အဲဒီလို လုပ်နေမယ်ဆိုရင်တော့ ညီမ အစ်မကို ထားခဲ့ပြီး တစ်ယောက်တည်း သွားလိုက်မှာနော်"
ဟယ်ယုသည် ဒေါသထွက်ကာ ခြေဆောင့်လိုက်ပြီး ဟယ်ချန်း၏ ဝတ်ရုံကို ဆွဲလိုက်တော့သည်။
"ဟားဟားဟား... ယုအာ... ချန်းအာ... သမီးတို့ ဘာတွေ ပြောနေကြတာလဲ"
အရှင်မင်းကြီး ဟယ်ရွှမ်က ပြုံးရွှင်စွာဖြင့် လျှောက်လှမ်းလာသည်။
သူ၏ သမီးနှစ်ဦး လင်းကျင်းနှင့် စကားပြောနေသည်ကို သတိထားမိသဖြင့် အရှင်မင်းကြီးသည် သူတို့၏ စကားဝိုင်းထဲသို့ မဝင်မီ ခဏ စောင့်ဆိုင်းနေခဲ့ခြင်း ဖြစ်၏။ ဟယ်ရွှမ်သည် ဟယ်ချန်းနှင့် လင်းကျင်းတို့၏ ခင်မင်မှုကို သိထားပြီးသား ဖြစ်သည်။ အမှန်စင်စစ် ထိုမိန်းကလေးသည် 'ပြတိုက်မှူး' နှင့် ရင်းနှီးနေသည်ကိုပင် သူ သိထား၏။
နန်းတော်တံတိုင်း အတွင်းတွင် ဘာပဲဖြစ်ဖြစ် ဟယ်ရွှမ်သည် တစ်ချိန်မဟုတ် တစ်ချိန် သိရှိမည်သာ ဖြစ်သည်။
အပတ်စဉ် တစ်ကြိမ်တိုင်း ခုနစ်ဦးမြောက် မင်းသမီးလေးမှာ ညဘက်တွင် ခဏတာ ပျောက်ကွယ်သွားလေ့ ရှိသည်။ တစ်ခါတစ်ရံ နှစ်နာရီခန့် ကြာတတ်ပြီး တစ်ခါတစ်ရံ ထိုထက်မက ကြာတတ်၏။ ဟယ်ချန်းက သူမ၏ ပျောက်ကွယ်မှုများကို ကောင်းစွာ ဖုံးကွယ်ထားနိုင်သည်ဟု ထင်သော်လည်း ဟယ်ရွှမ်ထံမှ မည်သည့်အရာကို ဖုံးကွယ်နိုင်ပါမည်နည်း။ ၎င်းမှာ ပြတိုက်မှူး၏ လက်ချက် ဖြစ်ရမည်ဟု ဟယ်ရွှမ်ခန့်မှန်းထားသည်။
ဟယ်ချန်း၏ သားရဲမှာ ရုတ်တရက် ဆင့်ကဲပြောင်းလဲသွားခြင်းအပေါ် သူ ဇဝေဇဝါ ဖြစ်ခဲ့ရသည်။ နောက်ပိုင်းတွင် ၎င်းမှာ ပြတိုက်မှူးနှင့် သက်ဆိုင်နေနိုင်ကြောင်း သိလိုက်ရသဖြင့် အနည်းငယ် စုံစမ်းကြည့်ရာတွင် ပြတိုက်မှူးတွင် လူများကို ဆန်းကြယ်သော နေရာတစ်ခုသို့ ပို့ဆောင်ပေးနိုင်သည့် ထူးခြားသော စွမ်းရည်ရှိကြောင်း သူ သိလာရသည်။
လူဆိုးဂိုဏ်းမှ ပညာရှင်များကို ထိန်းချုပ်နိုင်ခြင်းမှာလည်း ဤနည်းစနစ်ကြောင့် ဖြစ်ပေလိမ့်မည်။
ဟယ်ရွှမ် ၎င်းကို စတင် သိရှိစဉ်က ဟယ်ချန်းမှာ ငယ်ရွယ်သော မိန်းကလေးတစ်ဦး ဖြစ်သဖြင့် အခွင့်အရေး အယူခံရမည်ကို စိုးရိမ်ခဲ့သည်။ သို့သော် သူ၏ နန်းတွင်း အစေခံများကို တိတ်တဆိတ် မေးမြန်းကြည့်ရာ ခုနစ်ဦးမြောက် မင်းသမီးလေးမှာ အပျိုစင်ဘဝ ပျက်စီးခြင်း မရှိသေးကြောင်း အတည်ပြုနိုင်သဖြင့် ဟယ်ရွှမ်မှာ သူ အလွန်အကျွံ စဉ်းစားမိသွားကြောင်း သိလိုက်ရသည်။ အနည်းငယ် ထပ်မံစဉ်းစားကြည့်ပြီးနောက်တွင်မူ ၎င်းမှာ အခွင့်အရေးကောင်းတစ်ခု ဖြစ်ကြောင်း သူ ယူဆလိုက်သည်။ သူ၏ အစီအစဉ်များမှာ သာမန်လူသားများ မတွေးဝံ့စရာပင်။ ပြတိုက်မှူးက သူ၏ သမီးကို တပည့်အဖြစ် လက်ခံလိုက်မည်ဆိုလျှင်ကော။
ထိုသို့ မဟုတ်သည့်တိုင်အောင် သူမကို ပြတိုက်မှူးက ရွေးချယ်ခဲ့သည်ဆိုခြင်းမှာပင် လုံလောက်လှပြီ ဖြစ်၏။
မည်သို့ပင်ဖြစ်စေ၊ ၎င်းမှာ အခွင့်အရေးတစ်ခုပင်။ ထို့အပြင် ဟယ်ရွှမ်သည် သူ၏ အားနည်းချက်များကို ကောင်းစွာ သိရှိထားသည်။ ကျောက်စိမ်းနဂါးနိုင်ငံ၏ ဧကရာဇ် တစ်ပါးအနေဖြင့် သူသည် အစွမ်းထက်သူဟု ထင်ရသော်လည်း ကမ္ဘာပေါ်တွင် သူ့ထက် ပို၍ စွမ်းအားကြီးမားသူများစွာ ရှိနေသည်ကို ဟယ်ရွှမ်သိသည်။ သူကဲ့သို့သော အလယ်အလတ်တန်းစား နိုင်ငံတစ်ခု၏ ဧကရာဇ်ဆိုသည်မှာ ထိုလူများအတွက် ပြောပလောက်သည့် အဆင့် မဟုတ်ပေ။ အဆင့် (၅) သားရဲတစ်ကောင် ပိုင်ဆိုင်ထားသူ သို့မဟုတ် အဆင့် (၄) အကဲဖြတ်မှူး တစ်ဦးဦးဆိုလျှင် သူ့ကို လျစ်လျူရှုနိုင်စွမ်း ရှိပေသည်။
ထိုအကြောင်းရင်းကြောင့်ပင် ဟယ်ရွှမ်သည် ပို၍ ကြိုးစားရမည် ဖြစ်၏။
"ဟုတ်သားပဲ ယုအာ... သမီး အကဲဖြတ်မှူးလင်းကို အကူအညီ တောင်းစရာ ရှိတယ်ဆိုတာ မေ့နေပြီလား"
ဟယ်ရွှမ်က ရုတ်တရက် မေးလိုက်သည်။ ဟယ်ယုကလည်း ၎င်းကို သတိရသွားပုံ ရသော်လည်း သူမမှာ အလွန်အမင်း ရှက်ရွံ့နေသဖြင့် တိုက်ရိုက် မပြောဝံ့ပေ။
"အကဲဖြတ်မှူးလင်း... ငါ့ရဲ့ သမီးက ရှက်နေလို့ ငါကပဲ သူမကိုယ်စား တောင်းဆိုပါရစေ"
ဟယ်ရွှမ်က ကိုယ်ကို မတ်လိုက်ပြီး ပြောလိုက်သည်။
"ငါ့ရဲ့ ခြောက်ဦးမြောက် သမီးက ငယ်စဉ်ကတည်းက ကျန်းမာရေး မကောင်းခဲ့လို့ ဘယ်သားရဲနဲ့မှ သွေးကတိသစ္စာ မပြုခဲ့ဖူးဘူးဆိုတာ အကဲဖြတ်မှူးလင်း သိထားမှာပါ... လွန်ခဲ့တဲ့ အချိန်အနည်းငယ်က အကဲဖြတ်မှူးသာ မကူညီခဲ့ရင် သူမဟာ ဒီကမ္ဘာပေါ်မှာ ရှိတော့မှာ မဟုတ်ဘူး... အခုတော့ သူမ ကျန်းမာရေး ပြန်ကောင်းလာပြီဆိုတော့ သူမနဲ့ သင့်တော်မယ့် သားရဲတစ်ကောင်ကို ရှာပေးချင်တယ်... အကဲဖြတ်မှူးလင်းက ဒီပညာရပ်မှာ ကျွမ်းကျင်သူ ဖြစ်တဲ့အတွက် ငါတို့ကို ကူညီပေးစေချင်ပါတယ်"
၎င်းမှာ ဟယ်ယုအတွက် သင့်တော်မယ့် သားရဲတစ်ကောင်ကို အကဲဖြတ် ရွေးချယ်ပေးရန်နှင့် သွေးကတိသစ္စာ ပြုလုပ်ရာတွင် ကူညီပေးရန် တောင်းဆိုခြင်း ဖြစ်၏။
ဤအရာများမှာ သားရဲအကဲဖြတ်မှူးတိုင်း တတ်မြောက်ထားရမည့် အခြေခံ ပညာရပ်များပင် ဖြစ်သည်။
ဟယ်ရွှမ်ကိုယ်တိုင် ပြောဆိုလာသဖြင့် လင်းကျင်းအနေဖြင့် မငြင်းသာပေ။ ထို့အပြင် ၎င်းမှာ အလွန် လွယ်ကူသော အလုပ်ဖြစ်သဖြင့် လင်းကျင်းက ဝန်လေးခြင်း မရှိဘဲ သဘောတူလိုက်သည်။
"ကောင်းပါပြီ... အကဲဖြတ်မှူးလင်းလည်း အခု ပင်ပန်းနေလောက်ပြီ... ကောင်းကောင်း အနားယူလိုက်ပါ၊ မနက်ဖြန်ကျရင် အကဲဖြတ်မှူးကို နန်းတော်ထဲ ခေါ်ဆောင်လာဖို့ အသင်းချုပ်ဆီကို လူလွှတ်လိုက်ပါ့မယ်"
ဟယ်ရွှမ်က သူ့ကို ပြန်ခွင့်ပေးလိုက်သဖြင့် လင်းကျင်းသည် နှုတ်ဆက်ကာ ထွက်ခွာလာခဲ့သည်။ ဟယ်ချန်းနှင့် ဟယ်ယုတို့မှာ အားမရသလို ဖြစ်နေကြသော်လည်း ထပ်၍ ဘာမှ မပြောဝံ့ကြပေ။
အသင်းချုပ်သို့ ပြန်ရောက်သောအခါ လင်းကျင်းသည် ထိုင်ချလိုက်ပြီး လက်ဖက်ရည် တစ်ငုံ သောက်လိုက်မှသာ စိတ်အေးလက်အေး ရှိသွားတော့သည်။
'ဒီလို ကျောက်စိမ်းနဂါး ပွဲတော်မျိုးကို နောက်တစ်ခါ ဘယ်တော့မှ မတက်တော့ဘူး'
လင်းကျင်းက သူ့ဘာသာ တွေးလိုက်မိ၏။
သူသည် ပြင်းထန်သော တိုက်ပွဲတစ်ခုကိုပင် တိုက်ခိုက်လိုစိတ် ရှိသေးသည်။
အပြင်ဘက်တွင် မှောင်စပြုလာသောအခါ တစ်ဦးက သူ့ထံသို့ အစားအသောက်များ လာပို့ပေးသည်။ ထိုအထဲတွင် ကောင်းမွန်သော ဟင်းလျာများ၊ အရက်တစ်ပုလင်းနှင့် အချိုပွဲအချို့ ပါဝင်သည်။ သို့သော် လင်းကျင်း စိတ်ဝင်စားသည်မှာ အစားအသောက်ထက် လာပို့ပေးသော လူကို ဖြစ်၏။
ထိုသူမှာ အကဲဖြတ်မှူး တန်ရွှင်း ဖြစ်နေခြင်းပင်။
"အကဲဖြတ်မှူးတန်... ဒီလိုတွေ လုပ်နေစရာ မလိုပါဘူးဗျာ"
တံခါးကို ဖွင့်လိုက်ပြီးနောက် လင်းကျင်းသည် တန်ရွှင်း၏ လက်ထဲမှ အစားအသောက် ဗူးကို အမြန် လှမ်းယူလိုက်သည်။
တန်ရွှင်းက ပြုံးလိုက်၏။
"မင်းနဲ့ တွေ့ချင်တာနဲ့ ဒါလေးပါ တစ်ခါတည်း ယူလာခဲ့တာပါ"
သူ၏ လေသံမှာ အေးဆေး တည်ငြိမ်နေခဲ့သည်။
အသင်းချုပ်အတွင်း လင်းကျင်း အရင်းနှီးဆုံးနှင့် အလေးစားဆုံး ပုဂ္ဂိုလ်မှာ အကဲဖြတ်မှူး တန်ရွှင်းပင် ဖြစ်၏။ လင်းကျင်း၏ သားရဲအကဲဖြတ်ခြင်း အရည်အချင်းမှာ တန်ရွှင်းထက် များစွာ သာလွန်နေသော်လည်း တန်ရွှင်းအပေါ် လင်းကျင်း၏ လေးစားမှုမှာမူ လျော့နည်းသွားခြင်း မရှိပေ။
အခန်း (၃၉၄) - ဝိညာဉ်သွေးကြော ပြန်လည်တည်ဆောက်ခြင်း
လင်းကျင်းသည် တန်ရွှင်းကို အခန်းထဲသို့ အမြန်ပင် ဖိတ်ခေါ်လိုက်သည်။
"အကဲဖြတ်မှူးလင်း... ဒီနေရာနဲ့ရော အသားကျပြီလား"
တန်ရွှင်းက ဝမ်းမြောက်ဝမ်းသာ မေးလိုက်သည်။ လင်းကျင်းက ခေါင်းညိတ်ပြလိုက်၏။ ဤဧည့်သည်ဆောင်မှာ မေပယ်မြို့ရှိ သူ၏ ကိုယ်ပိုင်အိမ်တော်ကဲ့သို့ မခန့်ညားသော်လည်း သူ၏ အိမ်ဟောင်းလေးထက်စာလျှင် များစွာ သာလွန်ပြီး လုံလောက်မှု ရှိပေသည်။ ထို့အပြင် သူသည် ဤနေရာတွင် ခဏတာသာ နေထိုင်မည် ဖြစ်သဖြင့် အလွန်အမင်း ရွေးချယ်နေစရာ မလိုပေ။
တန်ရွှင်းတွင် ပြောစရာ စကားတစ်စုံတစ်ရာ ရှိနေသည်ကို သူ ရိပ်မိသည်။
"အကဲဖြတ်မှူးတန်... ကျုပ်တို့ တစ်ခွက်လောက် သောက်ကြမလား"
လင်းကျင်းက မေးရင်း အစားအသောက်ဗူးထဲမှ အရက်ပုလင်းကို ထုတ်လိုက်သည်။ တန်ရွှင်းကလည်း စိတ်အားထက်သန်စွာ ခေါင်းညိတ်လိုက်၏။
အမှန်ပင်၊ သူသည် အကြောင်းအရင်း တစ်ခုကြောင့် ရောက်လာခြင်း ဖြစ်သည်။
အမှန်စင်စစ် အခြား အဆင့် (၃) အကဲဖြတ်မှူး ချူချန်ဟယ်မှာလည်း လိုက်လာချင်သော်လည်း လင်းကျင်းနှင့် ထိုမျှအထိ မရင်းနှီးသဖြင့် မလာရဲခဲ့ပေ။ ယင်းအစား သူသည် တန်ရွှင်းကို အကူအညီတောင်းကာ လင်းကျင်းအနေဖြင့် ထိုအဆင့် (၁) အမဲလိုက်ခွေး သုံးကောင်၏ ဝိညာဉ်သွေးကြောများကို မည်သို့ ပြန်လည်တည်ဆောက်ပေးခဲ့သည်ကို မေးမြန်းပေးရန် မှာကြားလိုက်ခြင်း ဖြစ်၏။
တန်ရွှင်းနှင့် ချူချန်ဟယ်တို့သည် တစ်နေ့လယ်ခင်းလုံး ဤအကြောင်းကိုသာ ဆွေးနွေးနေခဲ့ကြသည်။
ပွဲတော်အတွင်း လင်းကျင်းက သားရဲငါးကောင်ကို ဆင့်ကဲပြောင်းလဲပေးနေစဉ်က သူတို့၏ အာရုံအားလုံးမှာ အဆင့် (၂) သားရဲများဆီ၌သာ ရှိနေခဲ့သည်။ အဆင့် (၂) မှ (၃) သို့ မြှင့်တင်ရန်မှာ အခက်ခဲဆုံးဟု ယူဆထားသောကြောင့်ပင်။
သို့သော်လည်း တန်ရွှင်းနှင့် ချူချန်ဟယ်ကဲ့သို့သော ဝါရင့် အကဲဖြတ်မှူးများအတွက်မူ သူတို့ကို အံ့အားအသင့်ဆုံး ဖြစ်စေခဲ့သည်မှာ အဆင့် (၁) အမဲလိုက်ခွေး သုံးကောင်၏ ဆင့်ကဲပြောင်းလဲမှုပင် ဖြစ်သည်။
သူတို့၏ ကနဦး အကဲဖြတ်ချက်အရ ထိုခွေးသုံးကောင်မှာ အလွန်ပင် သာမန်ကာလျှံကာ နိုင်လှသဖြင့် ဆင့်ကဲပြောင်းလဲရန် လုံးဝ မဖြစ်နိုင်ဟု ယူဆခဲ့ကြသည်။
ထို့အပြင် ထိုသားရဲ တစ်ကောင်ချင်းစီတွင် ကိုယ်ပိုင် ပြဿနာများ ရှိနေကြသည်။ အချို့မှာ အဓိက ဒြပ်စင်စွမ်းအား မရှိကြ၊ အချို့မှာ ဒြပ်စင်စွမ်းအား မလုံလောက်ကြ၊ သို့မဟုတ် သူတို့၏ ဝိညာဉ်သွေးကြောများမှာ အလွန်အမင်း ပျက်စီးနေသဖြင့် ဆင့်ကဲပြောင်းလဲရန် မျှော်လင့်ချက် မရှိကြပေ။
ဤသတ္တဝါများထဲမှ တစ်ကောင်ကို ဆင့်ကဲပြောင်းလဲပေးရန် ဆိုသည်မှာပင် အဆင့် (၂) အကဲဖြတ်မှူး တစ်ဦးအတွက် အလွန် ခက်ခဲလှပေလိမ့်မည်။ အဆင့် (၁) အကဲဖြတ်မှူး တစ်ဦးဆိုလျှင်တော့ ပြောနေစရာပင် မလိုတော့ပေ။
အကယ်၍ အဆင့် (၁) အကဲဖြတ်မှူး တစ်ဦးဦးကသာ ထိုခွေးသုံးကောင်၏ ဖုံးကွယ်ထားသော အခြေအနေများကို သိရှိနိုင်ခဲ့လျှင်ပင် တန်ရွှင်းနှင့် ချူချန်ဟယ်တို့မှာ အံ့သြမိကြပေလိမ့်မည်။ ဤကဲ့သို့သော အခြေအနေရှိသည့် သားရဲကို ဆင့်ကဲပြောင်းလဲပေးရန် တောင်းဆိုခြင်းမှာ လူအများရှေ့တွင် အရှက်ခွဲလိုက်ခြင်းနှင့် အတူတူပင် ဖြစ်၏။ အဘယ်ကြောင့်ဆိုသော် သူတို့အနေဖြင့် ၎င်းကို အောင်မြင်အောင် လုပ်ဆောင်နိုင်ရန်မှာ မဖြစ်နိုင်သောကြောင့် ဖြစ်သည်။
အဆင့် (၂) အကဲဖြတ်မှူးများမှာမူ ၎င်းကို ကိုင်တွယ်နိုင်ကောင်း ကိုင်တွယ်နိုင်လိမ့်မည် ဖြစ်သော်လည်း အလွန် ခက်ခဲပေလိမ့်မည်။ ထို့အပြင် နည်းလမ်းတစ်ခုကို စဉ်းစားမိခြင်းနှင့် လက်တွေ့တွင် အောင်မြင်အောင် လုပ်ဆောင်နိုင်ခြင်းမှာ လုံးဝ ကွဲပြားခြားနားလှပေသည်။ သေချာပါသည်၊ တန်ရွှင်းနှင့် ချူချန်ဟယ်ကဲ့သို့သော အဆင့် (၃) အကဲဖြတ်မှူးများအတွက်မူ ဤသတ္တဝါများကို ဆင့်ကဲပြောင်းလဲပေးနိုင်ရန် သံသယဖြစ်စရာ မလိုပေ။ လုပ်ငန်းစဉ်ကိုယ်တိုင်မှာ ထိုမျှအထိ မခက်ခဲလှသောကြောင့် ဖြစ်၏။
သို့သော်လည်း ဆင့်ကဲပြောင်းလဲခြင်း နည်းလမ်းများမှာ ကွဲပြားကြသည်။ ယခုကဲ့သို့ အခြေအနေမျိုးတွင် အမြန်ဆုံးနှင့် အန္တရာယ် အကင်းဆုံး ဆင့်ကဲပြောင်းလဲခြင်းကို ရရှိရန်အတွက် အလွန် သာမန်ကျသော နည်းလမ်းကိုသာ အသုံးပြုရပေလိမ့်မည်။ ထို့ကြောင့် ဆိုးကျိုးများ သို့မဟုတ် ချို့ယွင်းချက်များ ရှိနေသည်မှာ ရှောင်လွှဲ၍ မရနိုင်ပေ။
သို့သော်လည်း လင်းကျင်းကမူ သူတို့အသိုင်းအဝိုင်းတွင် အခက်ခဲဆုံးဟု ယူဆထားသော နည်းလမ်းကို အသုံးပြုခဲ့သည်။ သူသည် 'ဝိညာဉ်သွေးကြော ပြန်လည်တည်ဆောက်ခြင်း' နည်းစနစ်ကို အသုံးပြုခဲ့ခြင်း ဖြစ်၏။
၎င်းမှာ အဆင့်မြင့်လွန်းသော နည်းစနစ်တစ်ခု ဖြစ်သဖြင့် အဆင့် (၁) အကဲဖြတ်မှူး အနည်းငယ်သာ ယင်းအကြောင်းကို ကြားဖူးကြပေလိမ့်မည်။ ၎င်းမှာ မွေးရာပါ ဂုဏ်သတ္တိ သို့မဟုတ် အရည်အသွေး ညံ့ဖျင်းသော သားရဲတစ်ကောင်၏ ဝိညာဉ်သွေးကြောများကို ပြန်လည် တည်ဆောက်ပေးရသည့် နည်းစနစ် ဖြစ်သည်။ အဓိက ဂုဏ်သတ္တိ မရှိသော သတ္တဝါတစ်ကောင်ကို ဆင့်ကဲပြောင်းလဲရန်မှာ အလွန် ခက်ခဲလှသည်၊ သို့မဟုတ် မဖြစ်နိုင်သလောက်ပင်။ ထိုနေရာတွင် ဤနည်းစနစ်က အခန်းကဏ္ဍတစ်ခုမှ ပါဝင်လာခြင်း ဖြစ်၏။ ၎င်းသည် ရောထွေးနေသော ဒြပ်စင်များကို အရည်ပျော်စေပြီး ဒြပ်စင်ငါးပါးထဲမှ တစ်ခုတည်းသော အဓိက ဂုဏ်သတ္တိကိုသာ ကျန်ရစ်စေခြင်း ဖြစ်သည်။
ဖြေရှင်းနည်းမှာ ရိုးရှင်းသည်ဟု ထင်ရသော်လည်း လက်တွေ့ လုပ်ဆောင်ရန်မှာမူ အလွန်ပင် စိန်ခေါ်မှု ကြီးမားလှသည်။ တန်ရွှင်းနှင့် ချူချန်ဟယ်ကဲ့သို့သော အဆင့် (၃) အကဲဖြတ်မှူးများပင်လျှင် ဝိညာဉ်သွေးကြော ပြန်လည်တည်ဆောက်ခြင်း နည်းစနစ်ကို နှစ်ပေါင်းများစွာ လေ့ကျင့်ခဲ့ကြသော်လည်း အောင်မြင်မှု မရရှိခဲ့ကြပေ။ အောင်မြင်ခဲ့သော ဆင့်ကဲပြောင်းလဲမှု အနည်းငယ်မှာလည်း တိုက်ဆိုင်မှုကြောင့်သာ ဖြစ်ခဲ့ခြင်း ဖြစ်၏။ ထိုသို့ ပြုလုပ်ရန်အတွက် အချိန်နှင့် ဆေးဝါးများစွာ အကုန်အကျ ခံခဲ့ရသည့်တိုင်အောင် ရလဒ်မှာ အမြဲတမ်း အားရစရာ မရှိခဲ့ပေ။
သို့သော် ယနေ့တွင်မူ လင်းကျင်းသည် ညံ့ဖျင်းလှသော အဆင့် (၁) သားရဲ သုံးကောင်၏ ဝိညာဉ်သွေးကြောများကို လက်ဖြင့် တစ်ချက် ပုတ်ရုံမျှဖြင့် တစ်ပြိုင်နက်တည်း ပြန်လည် တည်ဆောက်ပေးလိုက်သည်ကို တွေ့ရသဖြင့် တန်ရွှင်းမှာ အံ့အားသင့်သွားခဲ့ရသည်။
သူသည် သားရဲနှင့် ထိတွေ့လိုက်စဉ်မှာပင် ဂါထာမန္တန်များနှင့် နည်းစနစ်များကို ပေါင်းစပ်ကာ အသုံးပြုခဲ့ခြင်း ဖြစ်ရမည်။
သားရဲအကဲဖြတ်ခြင်း ပညာရပ်အပေါ် တစ်ဘဝလုံး ရူးသွပ်လာခဲ့သော လူတစ်ယောက်အတွက် ဤအရာထက် ပို၍ လိုချင်စရာကောင်းသော အရာ ရှိပါဦးမည်လော။
မရှိနိုင်တော့ပေ။
အလှအပကို မက်မောသော ကာမဂုဏ်လိုက်စားသူများနှင့် စည်းစိမ်ဥစ္စာကို မက်မောသော သူခိုးများကဲ့သို့ပင် တန်ရွှင်းနှင့် ချူချန်ဟယ်တို့မှာ ဝိညာဉ်သွေးကြော ပြန်လည်တည်ဆောက်ခြင်း နည်းစနစ်အပေါ် ရူးသွပ်နေကြခြင်း ဖြစ်သည်။ ထိုခွေးသုံးကောင် ဆင့်ကဲပြောင်းလဲသွားပြီးနောက်တွင် သူတို့၏ စူးစမ်းလိုစိတ်မှာ အထွတ်အထိပ်သို့ ရောက်ရှိသွားခဲ့သည်။ သူတို့ အံ့သြသွားရသည့် အချက်မှာ ထိုသားရဲများတွင် ယခင်က ရှိခဲ့သော ညံ့ဖျင်းသည့် ဂုဏ်သတ္တိများကို မတွေ့ရတော့ခြင်းပင် ဖြစ်၏။ ထိုသတ္တဝါများမှာ မွေးရာပါ သန်မာသော သားရဲများနှင့် မနှိုင်းယှဉ်နိုင်သေးသော်လည်း ယခင် အခြေအနေနှင့် နှိုင်းယှဉ်လျှင်မူ လုံးဝ အသွင်ပြောင်းလဲသွားခဲ့ပြီ ဖြစ်သည်။
ဤသို့ လုပ်ဆောင်နိုင်ခြင်းမှာ အဆင့် (၃) သားရဲ နှစ်ကောင်ကို တစ်ပြိုင်နက် ဆင့်ကဲပြောင်းလဲပေးခြင်းထက် များစွာ ပို၍ ခက်ခဲလှပေသည်။
ဤအကြောင်းရင်းကြောင့်ပင် တန်ရွှင်း ရောက်လာခဲ့ခြင်း ဖြစ်၏။
သူသည် ဤနည်းစနစ်အပေါ် လင်းကျင်း၏ လမ်းညွှန်မှုကို ခံယူရန် ရောက်လာခြင်း ဖြစ်သည်။ အနည်းဆုံးတော့ လင်းကျင်း ၎င်းကို မည်သို့ လုပ်ဆောင်ခဲ့သည်ကို သူ သိရှိလိုပေသည်။
တစ်ချိန်တည်းမှာပင် ချူချန်ဟယ်မှာလည်း အပြင်ဘက်တွင် စိုးရိမ်တကြီး လမ်းလျှောက်နေခဲ့သည်။ တစ်ခါတစ်ရံတွင် သူသည် အခန်းထဲသို့ ခိုးကြည့်နေမိ၏။
အခန်းအတွင်းတွင်မူ အရက်များကို ငှဲ့ပြီးနောက် လင်းကျင်းနှင့် တန်ရွှင်းတို့သည် တစ်ခွက်စီ သောက်လိုက်ကြသည်။
မြို့တော်မှ ထွက်ရှိသော အရက်ဟောင်းများမှာ အနည်းဆုံး ဆယ်နှစ်သက်တမ်း ရှိကြသည်။ အမှန်တကယ်တော့ အချို့မှာ နှစ်ပေါင်း နှစ်ဆယ်၊ သုံးဆယ်အထိပင် ရှိတတ်၏။ ယခု ဤပုဂ္ဂိုလ် သောက်နေသော ပုလင်းမှာ နှစ်ပေါင်း နှစ်ဆယ်သက်တမ်း ရှိသည်။
အရက်ကောင်း တစ်ခု၏ လက္ခဏာမှာ ၎င်း၏ ရနံ့နှင့် သောက်လိုက်ပြီးနောက် ကျန်ရစ်ခဲ့သော ချိုခါးခါး နောက်ဆက်တွဲ အရသာပင် ဖြစ်သည်။
လင်းကျင်းသည် အရက်သောက်ရသည်ကို ဝါသနာမပါသော်လည်း ဤမျှလောက်တော့ သူ သိရှိထားပေသည်။
ဤအရက်မှာ အလွန်ပင် စျေးကြီးပေလိမ့်မည်၊ ၎င်းမှာ အကဲဖြတ်မှူးတန်တွင် တောင်းဆိုစရာ တစ်ခုခု ရှိနေသည်ကို ပြသနေခြင်းပင် ဖြစ်၏။
"အကဲဖြတ်မှူးလင်း... ဒီနေ့ သားရဲ ငါးကောင်လုံးကို လက်နဲ့ တစ်ချက် ပုတ်ရုံနဲ့ ဆင့်ကဲပြောင်းလဲပေးလိုက်တာက တကယ်ကို အံ့သြစရာ ကောင်းတယ်"
တန်ရွှင်းက စကားလမ်းကြောင်း စတင်လိုက်သည်။
လင်းကျင်းက ပြုံးလိုက်၏။
"ဒါတွေက ပြောပလောက်တဲ့ အတတ်ပညာတွေ မဟုတ်ပါဘူးဗျာ"
"အကဲဖြတ်မှူးလင်းကတော့ အလွန် နှိမ့်ချလွန်းပါတယ်"
တန်ရွှင်းက ချက်ချင်းပင် ပြန်ပြောလိုက်သည်။
"ကျုပ်သာ မင်းရဲ့ နေရာမှာဆိုရင် ဒါကို လုပ်နိုင်မှာ မဟုတ်ဘူး... ကျုပ်အမြင်အရဆိုရင် အကဲဖြတ်မှူးလင်းက အခုအချိန်မှာ အဆင့် (၄) အကဲဖြတ်မှူး တောင် ဖြစ်နေနိုင်ပါပြီ"
လင်းကျင်း မှင်တက်သွား၏။
အခြားသူ တစ်ဦးဦးကသာ ဤသို့ ပြောခဲ့လျှင် လင်းကျင်းအနေဖြင့် ၎င်းကို မြှောက်ပင့်စကားဟုသာ ယူဆမိပေလိမ့်မည်။ သို့သော် တန်ရွှင်းမှာမူ ထိုသို့သော လူမျိုး မဟုတ်ပေ။ သူသည် စကားမပြောမီ သေချာ စဉ်းစားတတ်သော လူမျိုး ဖြစ်သည်။
"အကဲဖြတ်မှူးလင်းရဲ့ အရည်အချင်းတွေက အလွန်ကို နက်ရှိုင်းတယ်ဆိုတာ ကျုပ် ဝန်ခံရပါလိမ့်မယ်... ဒါကြောင့် ကျုပ် ဒီနေ့ မင်းရဲ့ လမ်းညွှန်မှုကို ခံယူဖို့ ရောက်လာတာပါ... အဆင်ပြေမယ်ဆိုရင် မင်းရဲ့ နည်းစနစ်အကြောင်း ကျုပ်ကို အနည်းငယ် ရှင်းပြပေးစေချင်ပါတယ်"
တန်ရွှင်းက ပြောရင်း သူ၏ ခွက်ထဲမှ အရက်ကို တစ်ကျိုက်တည်းနှင့် ကုန်အောင် သောက်လိုက်သည်။
တန်ရွှင်း၏ သဘောထားမှာ ချီးကျူးစရာ ကောင်းလှသည်။ သူသည် ပို၍ အတွေ့အကြုံရှိသူ ဖြစ်သော်လည်း မာနကြီးသော အမူအရာ တစ်စုံတစ်ရာမျှ မပြသခဲ့ပေ။ ဤကဲ့သို့သော စရိုက်လက္ခဏာမှာ အဆင့်မြင့် သားရဲအကဲဖြတ်မှူးများအကြားတွင် တွေ့ရခဲလှပေသည်။
လင်းကျင်းလည်း သောက်လိုက်သည်။
"မေးပါ အကဲဖြတ်မှူးတန်... ကျုပ် သိသလောက် ပြန်ပြောပြပေးပါ့မယ်"
တန်ရွှင်းမှာ အတိုင်းမသိ ဝမ်းသာသွားတော့သည်။ သူ၏ ပထမဆုံး မေးခွန်းမှာ လင်းကျင်းအနေဖြင့် လက်တစ်ချက် ပုတ်ရုံဖြင့် သားရဲများ၏ ဝိညာဉ်သွေးကြောများကို မည်သို့ ပြန်လည်တည်ဆောက်ပေးခဲ့သနည်း ဟူ၍ ဖြစ်သည်။ ၎င်းမှာ သူ အလေးအနက်ထား စူးစမ်းလိုသော ပညာရပ်ပင် ဖြစ်၏။
လင်းကျင်းသည် စားပွဲကို လက်ဖြင့် တစ်ချက် ပုတ်လိုက်ရာ ချက်ချင်းပင် ငွေအပ်တစ်ချောင်းသည် သစ်သားမျက်နှာပြင်ကို ထိုးဖောက်သွားပြီး ကြမ်းပြင်ပေါ်တွင် စိုက်ဝင်သွားခဲ့သည်။
တန်ရွှင်း၏ မျက်လုံးများမှာ ပြူးကျယ်သွားတော့သည်။
"လက်တစ်ချက် ပုတ်လိုက်တာလို့ ထင်ရပေမဲ့ ကျုပ် အဲဒီထဲမှာ နည်းစနစ်များစွာကို ပေါင်းစပ်ထားတာပါ... အဲဒီထဲက နည်းစနစ်တစ်ခုကတော့ ဒီအပ်ကို အသုံးပြုပြီး အတွင်းပိုင်း အပ်စိုက်ကုထုံးကို လုပ်ဆောင်တာပါပဲ"
လင်းကျင်းက ရှင်းပြလိုက်သည်။
တန်ရွှင်းသည် လင်းကျင်း၏ အတွင်းပိုင်း အပ်စိုက်ကုထုံးကို ယခင်က မြင်ဖူးခဲ့ပြီး လင်းကျင်း မည်မျှအထိ ကျွမ်းကျင်သည်ကို သိထားသော်လည်း လင်းကျင်းသည် ဤအတတ်ပညာကို ဤမျှအထိ ကျွမ်းကျင်လိမ့်မည်ဟုတော့ သူ မမျှော်လင့်ထားခဲ့ပေ။
လင်းကျင်းက ဆက်လက် ပြောလိုက်၏။
"အတွင်းပိုင်း အပ်စိုက်ကုထုံးကို အသုံးပြုပြီး မီးဝိညာဉ်စွမ်းအင်ကို စုစည်းဖို့အတွက် ဝိညာဉ်မဏ္ဍိုင် အပ်စိုက်မှတ်ကို ထိုးဖောက်လိုက်တာပဲ... ဒီစွမ်းအင်တွေကို ပေါင်းစပ်ပြီး မသန့်စင်သေးတဲ့ မီးတောက်တွေကို ဖန်တီးလိုက်တာပေါ့... သူ့ရဲ့ နာမည်နဲ့ ဆန့်ကျင်ဘက်ဖြစ်တာကတော့ အဲဒီမီးတောက်တွေဟာ သားရဲရဲ့ အတွင်းအင်္ဂါတွေကို မထိခိုက်စေဘူး... ဒါပေမဲ့ အဲဒီမီးတောက်တွေကပဲ ဝိညာဉ်သွေးကြောတွေကို ပြန်လည် သွန်းလောင်းဖို့အတွက် ကျုပ် အသုံးပြုခဲ့တဲ့ အရာတွေပါပဲ... သန့်စင်ခြင်း လုပ်ငန်းစဉ် ပြီးဆုံးသွားတဲ့အခါမှာ ဆင့်ကဲပြောင်းလဲခြင်းက ဖြစ်နိုင်သွားတာပေါ့... ဒါပေမဲ့ ကျုပ်က မီးဂုဏ်သတ္တိနဲ့ အလုပ်လုပ်ရတာ ပိုပြီး အသားကျနေတဲ့အတွက် အဲဒီခွေးသုံးကောင်ကို မီးဂုဏ်သတ္တိရှိတဲ့ သားရဲတွေ ဖြစ်လာအောင် အတင်းအကျပ် ပြောင်းလဲပေးလိုက်တာ"
တန်ရွှင်းမှာ အံ့သြမှင်တက်သွားတော့သည်။ လင်းကျင်း၏ ရှင်းပြချက်မှာ ရိုးရှင်းသည်ဟု ထင်ရသော်လည်း သူပြောသွားသော နည်းလမ်းများမှာ အလွန်ပင် ရှုပ်ထွေးပြီး ကျယ်ပြန့်လှပေသည်။ အမှားအယွင်း အနည်းငယ် ဖြစ်သွားရုံနှင့် လုပ်ငန်းစဉ်တစ်ခုလုံး ပျက်စီးသွားနိုင်ပေသည်။
နောက်ထပ် အရေးကြီးသော အချက်မှာ အရည်အချင်းပင် ဖြစ်၏။ နည်းစနစ်မှာ တူညီနေပါစေ၊ ခန္ဓာကိုယ် တည်ဆောက်ပုံ မတူညီကြသဖြင့် လုပ်ဆောင်ရမည့် ပမာဏမှာ ကွဲပြားကြပေလိမ့်မည်။ အချို့သော သားရဲများမှာ အနည်းငယ် ပြုပြင်ရန်သာ လိုအပ်ပြီး အနည်းငယ်မျှ မှားယွင်းသွားခြင်းကပင် လုပ်ငန်းစဉ်တစ်ခုလုံးကို ကျရှုံးစေနိုင်သောကြောင့် ဖြစ်သည်။