အခန်း (၅၅၉-၅၆၀)

အခန်း ၅၅၉ - ဆဋ္ဌမအလွှာ ရွှေအမြုတေ သို့ တက်လှမ်းခြင်း၊ ကျားဖြူ ကန်းရွှေ အင်း (၂)

ဒေါင်။

ညင်သာသော ရိုက်ခတ်မှုလေး တစ်ခုဖြင့်ပင် ကြီးမားကျယ်ပြန့်လှသော ဝိညာဉ် စွမ်းအား မြစ်ကြီးသည် အဟန့်အတားကို ရိုက်ခတ်သွားခဲ့သည်။ ထိုအခါ ဆဋ္ဌမအလွှာ ရွှေအမြုတေ၏ အဟန့်အတားမှာ အသက်တစ်ရှိုက်စာ အချိန်လေးမျှပင် တောင့်ခံထားနိုင်စွမ်း မရှိဘဲ ကွဲကြေသွားခဲ့၏။

သူသည် ထိုသို့ဖြင့် အသစ်စက်စက် သွေးကြောဆုံမှတ် တစ်ခုကို လွယ်ကူစွာ ဖွင့်လှစ်နိုင်ခဲ့သည်။

ဆဋ္ဌမအလွှာ ရွှေအမြုတေ။

သံသယဖြစ်ဖွယ် မရှိအောင်ပင် ကျန်းဖန်သည် ဆဋ္ဌမအလွှာ ရွှေအမြုတေ အဆင့်သို့ အားစိုက်ထုတ်စရာမလိုဘဲ တက်လှမ်းသွားခဲ့ပြီ ဖြစ်၏။

'ဒန်တျန်' နှင့် 'ချီပင်လယ်' နက်ရှိုင်းရာရှိ မူလ ရွှေအမြုတေသည် လျင်မြန်စွာ စတင် ကျယ်ပြန့်လာပြီး ယခင်ကထက် အနည်းဆုံး သုံးပုံတစ်ပုံခန့် ပိုမို ကြီးမားလာ၏။ တစ်ချိန်တည်းမှာပင် ၎င်းသညိ လောင်ကျွမ်းနေသော နေမင်း တစ်စင်း ကဲ့သို့ ဖျော့တော့သော ရွှေရောင် အလင်းတန်းကိုလည်း ထုတ်လွှတ်နေခဲ့သည်။

ထို့အပြင် သူ၏ ဝိညာဉ် စွမ်းအားမှာလည်း လျင်မြန်စွာ တိုးတက်လာခဲ့ပြီး ဆဋ္ဌမအလွှာ ယွမ်ယင်း အဆင့် နှင့် ညီမျှလှပေသည်။

ရွှေအမြုတေ ကျင့်ကြံသူ တစ်ဦး အတွက်၊ ရွှေအမြုတေ အဆင့်တွင် ယွမ်ယင်း အဆင့် ဝိညာဉ် စွမ်းအား ရှိနေခြင်း သက်သက်ကပင် သေချာပေါက် အံ့ဖွယ်တစ်ခု ဖြစ်၏။

အဘယ်ကြောင့်ဆိုသော် ၎င်းတို့ နှစ်ခု အကြားရှိ ကွာဟချက် မှာ ယုံကြည်နိုင်စရာ မရှိလောက်အောင် ကြီးမားကျယ်ပြန့်လွန်းသောကြောင့်ပင် ဖြစ်သည်။

သို့သော် ဤသည်မှာ သူ၏ သာမန်ထက် ထူးကဲသော ပါရမီကြောင့်လည်း ဖြစ်သည်။ သူ၏ ဝိညာဉ် စွမ်းအားသည် မွေးရာပါ အစွမ်းထက်လှ၏။

ထို့ကြောင့် ကျင့်ကြံမှု တိုးတက်လာတိုင်း ဝိညာဉ် ကြီးထွားမှုကိုလည်း အားပေးပြီး ဝိညာဉ်အာရုံကို မြင့်တက်လာစေသည်။

"မဆိုးဘူးပဲ၊ နောက်ဆုံးတော့ ဆဋ္ဌမအလွှာ ရွှေအမြုတေကို တက်လှမ်းနိုင်ခဲ့ပြီ။"

ကျန်းဖန် သူ၏ လက်သီးများကို ဆုပ်လိုက်ပြီး၊ သူ၏ ခန္ဓာကိုယ် အတွင်းရှိ ပေါကြွယ်ဝလှသော မူလ ဝိညာဉ်စွမ်းအားများ နှင့် သူ၏ ကြံ့ခိုင်သော ခန္ဓာကိုယ်ကြီးကို ခံစားလိုက်၏။

ထိုအခိုက် ယုံကြည်နိုင်စရာ မရှိလောက်အောင် အစွမ်းထက်သော စွမ်းအား တစ်ရပ် သူ၏ ခန္ဓာကိုယ် အတွင်းမှ လှိုင်းထန် ထွက်ပေါ်လာခဲ့သည်။

အတွေးတစ်ချက်ဖြင့် ကြောက်မက်ဖွယ်ကောင်းသော စွမ်းအားကို ထုတ်လွှတ်ရန် အဆုံးအစမရှိသော ကောင်းကင်နှင့် မြေကြီး၏ စွမ်းအားကို ဆင့်ခေါ်နိုင်မည်ဟုပင် ထင်မှတ်ရ၏။

ယခင်ကနှင့် နှိုင်းယှဉ်ပါက သူ၏ တိုက်ခိုက်ရေး စွမ်းအား မှာ အနည်းဆုံး သုံးပုံတစ်ပုံခန့် တိုးတက်လာခဲ့သည်။

မည်သို့ဆိုစေ ဤသည်မှာ အသေးစား နယ်ပယ် တစ်ခု၏ တက်လှမ်းမှုသာ ဖြစ်ရာ ဤကဲ့သို့သော တိုးတက်မှုမျိုးမှာ အတော်လေး အံ့မခန်း ဖြစ်ပေသည်။

"နောက်တစ်ကြိမ် ထပ်ပြီး ဖောက်ထွင်း ကျော်လွန်သွားပြန်ပြီလား။"

ကျန်းဖန်၏ ကျင့်ကြံမှုတွင် ဖြစ်ပေါ်လာသော ပြောင်းလဲမှုကို အာရုံခံမိလိုက်ပြီးနောက် မူလအင်းစုတ်တံသည် ဘာပြောရမှန်း မသိဘဲ တိတ်ဆိတ်နေခဲ့၏။

ဤ လူငယ်၏ ပါရမီကို ၎င်း ယခင်က မြင်တွေ့ခဲ့ဖူးသည်။

သို့သော် ထိုသို့ ဆိုလျှင်တောင်မှ ၎င်း၏ အတွင်းစိတ်ထဲတွင် အလွန်အမင်း တုန်လှုပ်နေခဲ့၏။

အဘယ်ကြောင့်ဆိုသော် ယခုအခါ ရှေးခေတ်ကာလ မဟုတ်တော့ဘဲ ဝိညာဉ် စွမ်းအင်များ ယိုယွင်း ကျဆင်းနေသော အချိန်အခါ ဖြစ်သောကြောင့်ပင် ဖြစ်သည်။

ပုံမှန်အားဖြင့် ကောင်းကင် ဝိညာဉ်အမြစ် ကျင့်ကြံသူ တစ်ဦးပင်လျှင် ဤမျှ လျင်မြန်စွာ ကျင့်ကြံနိုင်မည် မဟုတ်ချေ။

သို့သော် ဤ လူငယ်သည် သာမန် ကောင်းကင် ဝိညာဉ်အမြစ် ကျင့်ကြံသူ တစ်ဦး မဟုတ်ကြောင်း ရှင်းလင်းလှသည်။ သူသည် အံ့မခန်း ပါရမီကို ပိုင်ဆိုင်ထားရုံ သာမကဘဲ ယုံကြည်နိုင်စရာ မရှိလောက်အောင် ကြီးမားသော နားလည်သဘောပေါက်နိုင်စွမ်းကိုလည်း ပိုင်ဆိုင်ထားသည်။ အခြေခံအားဖြင့် မည်သည့် အားနည်းချက်မျှ မရှိသော ပြီးပြည့်စုံသည့် ကျင့်ကြံသူ တစ်ဦးပင် ဖြစ်၏။

ကျင့်ကြံခြင်း လောကတွင် တစ်ခါတစ်ရံ၌ နားလည်သဘောပေါက်နိုင်စွမ်းသည် ဝိညာဉ်အမြစ် ပါရမီထက် များစွာ ပိုမို အရေးကြီးသည်ဟု ၎င်း ယုံကြည်ထားသည်။

အထူးသဖြင့် ယွမ်ယင်း အဆင့်သို့ တက်လှမ်းပြီးနောက် ဝိညာဉ်အမြစ်က ကျင့်ကြံခြင်း အပေါ် အထောက်အကူပြုမှုသည် နားလည်သဘောပေါက်နိုင်စွမ်းက ပေးစွမ်းသော အကူအညီနှင့် နှိုင်းယှဉ်ပါက များစွာ လျော့နည်းသွားပေသည်။

ထို့ကြောင့် ရှေးခေတ်ကာလတွင် ဂိုဏ်း အများအပြားသည် သူတို့၏ ကျင့်ကြံသူများ၏ နားလည်သဘောပေါက်နိုင်စွမ်းကို အတော်လေး တန်ဖိုးထားခဲ့ကြ၏။

သို့သော် ဤခေတ်တွင်တော့ အရာအားလုံး ကွဲပြားခြားနားပေသည်။

အများအားဖြင့် ဝိညာဉ်အမြစ် ပါရမီက အရာအားလုံးကို လွှမ်းမိုးထား၏။

ဤသည်မှာ ရှောင်လွှဲ၍ မရနိုင်သော အခြေအနေ တစ်ရပ်ပင် ဖြစ်သည်။

အဘယ်ကြောင့်ဆိုသော် ဤခေတ်တွင် အရင်းအမြစ်များ ရှားပါးလာသဖြင့် ၎င်းသည် အဆင့်မြင့် ဝိညာဉ်အမြစ် ကျင့်ကြံသူများ၏ အားသာချက်များကို ပိုမို ကြီးမားလာစေသောကြောင့်ပင် ဖြစ်၏။

အဆင့်မြင့် ဝိညာဉ်အမြစ် တစ်ခုကို ပိုင်ဆိုင်ထားခြင်းက သာလွန်သော ကျင့်ကြံခြင်း အမြန်နှုန်းအား ပိုင်ဆိုင်ထားခြင်းကို ဆိုလိုပြီး အရင်းအမြစ်များ သုံးစွဲမှု လျော့နည်းခြင်းကို ကိုယ်စားပြုပေသည်။

မင်းရဲ့ နားလည်သဘောပေါက်နိုင်စွမ်း က ဘယ်လောက်ပဲ ထူးကဲနေပါစေ၊ ချီ ကျင့်ကြံခြင်း အဆင့် ကျင့်ကြံသူ တစ်ယောက်ဟာ ဘယ်လောက်ပဲ အစွမ်းထက် နေပါစေ၊ သူတို့ဟာ အုတ်မြစ်တည်ဆောက်ခြင်း ကျင့်ကြံသူ တစ်ယောက်ကို အနိုင်မယူနိုင်ဘူး။

ဤသည်မှာ ကျင့်ကြံခြင်း လောက၏ လက်ရှိ နယ်ပယ် သီအိုရီပင် ဖြစ်၏။

သို့သော် ရှေးခေတ်ကာလတွင် အရင်းအမြစ်များ ပေါကြွယ်ဝမှုကြောင့် နှစ်တစ်ထောင် သက်တမ်းရှိ ဝိညာဉ်ဆေးဝါး အမျိုးမျိုးကို နေရာတိုင်းတွင် တွေ့ရလေ့ရှိသည်။

ညံ့ဖျင်းသော ဝိညာဉ်အမြစ် ရှိသည့် ကျင့်ကြံသူများပင်လျှင် အရင်းအမြစ်များကို စားသုံးခြင်းဖြင့် သူတို့၏ ကျင့်ကြံမှုကို လျင်မြန်စွာ မြှင့်တင်နိုင်ကြ၏။

ထို့ကြောင့် ကနဦးတွင် ဝိညာဉ်အမြစ် ပါရမီ၏ သာလွန်မှုကို ထိရောက်စွာ ထုတ်ဖော် ပြသနိုင်ခဲ့ခြင်း မရှိချေ။

"သခင်က တကယ်ကို မကောင်းဆိုးဝါးပဲ။"

အသွင်သောင်းပြောင်း ဆေးမီးဖိုသည်လည်း အံ့အားသင့် မှင်သက်နေခဲ့၏။

၎င်းသည် ၎င်း၏ လက်ရှိ သခင် နှင့် နှိုင်းယှဉ်လျှင် သေးသိမ်သွားသည့် ဝမ်ဟွာ တာအိုမိတ်ဆွေ၏ အတိတ်က ကျင့်ကြံခြင်းများကို တွေးတောမိလိုက်သည်။

ထိုစဉ်က ရွှေအမြုတေ အဆင့်တွင် ဝမ်ဟွာ တာအိုမိတ်ဆွေ၏ ကျင့်ကြံခြင်း မှာ အလွန်အမင်း ပင်ပန်းဆင်းရဲခဲ့၏။

အဆင့် ၃ ဝိညာဉ်ဆေးဝါး နှင့် အဆင့် ၃ ဆေးလုံးများကို ရှာဖွေရန် အတွက် မည်မျှသော ကြိုးပမ်းအားထုတ်မှုများ နှင့် အချိန်များ သုံးစွဲခဲ့ရသည်ကို ဘယ်သူ သိနိုင်မည်နည်း။

အရင်းအမြစ်များ အတွက် ယှဉ်ပြိုင်ရန်ပင်လျှင် အခြား ရွှေအမြုတေ ကျင့်ကြံသူများ နှင့် ပြင်းထန်စွာ တိုက်ခိုက်ခဲ့ရပြီး အင်အားစု အများအပြားကို စော်ကားခဲ့မိသည်။

ထို့ကြောင့် ဝမ်ဟွာ တာအိုမိတ်ဆွေသည် နေရာတိုင်းတွင် ရန်သူများ ဝန်းရံနေခြင်းကို ခံခဲ့ရ၏။

၎င်း၏ လက်ရှိ သခင်ကတော့ ဘယ်လိုလုပ် ဒီလောက်တောင် ကြောက်စရာ ကောင်းနေရတာလဲ။

သူသည် အရင်းအမြစ်များကို လိုက်လံ ရှာဖွေရန် လိုအပ်သည့်ပုံ မပေါ်ချေ။ ရတနာ အများအပြားသည် သူ့ထံသို့ အလိုအလျောက် ရောက်ရှိလာကြသည်။

လူများ အကြားရှိ ကွာဟချက်မှာ တကယ်ကို ကြီးမားကျယ်ပြန့် လွန်းလှပေသည်။

"ဆဋ္ဌမအလွှာ ရွှေအမြုတေကို တက်လှမ်း ပြီးပြီ ဆိုတော့ အသက်သွေးကြောအင်း အသစ် တစ်ခုကို ရေးထွင်းဖို့ အချိန်ကျပြီ။"

ကျန်းဖန်သည် မြေပြင်ပေါ်တွင် တင်ပျဉ်ခွေ ထိုင်ရင်း သူ၏ နောက်ထပ် အသက်သွေးကြောအင်း အကြောင်း စဉ်းစား တွေးတောလိုက်၏။

ယခင်က သူသည် သင်္ကေတ လေးပါး ဝိညာဉ်အင်း အမျိုးအစား နှစ်ခု ဖြစ်သော စိမ်းပြာရောင် နဂါး သစ်သား သံချပ်ကာ အင်း နှင့် ကြက်တူရွေးနီ ကောင်းကင် လောင်ကျွမ်းခြင်း အင်း တို့ကို ရေးထွင်းခဲ့ပြီး ဖြစ်သည်။

နောက်တစ်ခု မှာ တတိယမြောက် သင်္ကေတ လေးပါး ဝိညာဉ်အင်း ဖြစ်သည့် ကျားဖြူ ကန်းရွှေ အင်းပင် ဖြစ်၏။

ဤသည်မှာ ရွှေဓာတ် ဝိညာဉ်အင်း တစ်ခု ဖြစ်ပြီး ဓားတစ်သောင်း ဂိုဏ်းသို့ ပြန်လည်ရောက်ရှိခြင်း အင်း နှင့် ရွှေရောင် အလင်းတန်း အင်း တို့နှင့် ဆင်တူသည်။

ထို့ကြောင့် သူသည် ကျားဖြူ ကန်းရွှေ အင်း နှင့် အနည်းငယ် ရင်းနှီးကျွမ်းဝင်နေခဲ့၏။

ဝုန်း ဒိုင်း~~

မျက်တောင်တစ်ခတ် အတွင်းမှာပင် ကျန်းဖန်သည် ကံကောင်းခြင်း အမှတ် အမြောက်အမြားကို သုံးစွဲလိုက်ရာ လျှို့ဝှက်ဆန်းကြယ်သော စွမ်းအင် တစ်ရပ်က သူ၏ ဝိညာဉ်ထဲသို့ ဝင်ရောက်လာပြီး၊ သူ၏ နားလည်သဘောပေါက်နိုင်စွမ်းကို ကြီးမားစွာ မြှင့်တင်ပေးလိုက်သည်။

ရုတ်တရက် ကျားဖြူ ကန်းရွှေ အင်း နှင့် ပတ်သက်သော သတင်းအချက်အလက် အများအပြားသည် သူ၏ အသိစိတ်ပင်လယ် အတွင်းသို့ အလုံးအရင်းဖြင့် ဝင်ရောက်လာခဲ့၏။

၎င်းမှာ နတ်ဘုရား သားရဲ ကျားဖြူသည် သူ၏ စိတ် နက်ရှိုင်းရာတွင် ပေါ်လာပြီး အပေါ်တွင် ထူထပ်သော ကျားဖြူ သင်္ကေတများ လွင့်မျောနေသည် နှင့် တူညီလှပေသည်။

မရေမတွက်နိုင်သော ကျားဖြူ သင်္ကေတများ စုစည်းလာပြီး နိယာမ တစ်ခုကို ဖန်တီးလိုက်၏။

နတ်ဘုရား သားရဲ ကျားဖြူ သည် ဤ နိယာမ၏ ပြယုဂ် တစ်ခု ဖြစ်ပုံ ရပေသည်။

"ငါ နားလည်ပြီ။"

ကျန်းဖန် ၏ မျက်လုံးများတွင် နားလည်သဘောပေါက်မှု အရိပ်အယောင်များ ထွက်ပေါ်လာခဲ့သည်၊ ကျားဖြူ ကန်းရွှေ အင်းကို သူ နားလည် သဘောပေါက်သွားခဲ့ပြီ၊ ၎င်းမှာ နတ်ဘုရား သားရဲ ကျားဖြူ၏ အရေးအသား မှ ဆင်းသက်လာသော ကန်းရွှေ သင်္ကေတများ နှင့် ပေါင်းစပ်ထားသည့် ရွှေ အင်းများထဲတွင် ပါဝင်သော အင်း တစ်ခုပင် ဖြစ်၏။

အဘယ်ကြောင့်ဆိုသော် ကျားဖြူ ကိုယ်တိုင်က ရွှေဓာတ် စွမ်းအားကို ကိုင်စွဲထားပြီး လောကရှိ စစ်မက် စွမ်းအားကို ထိန်းချုပ်ထားသောကြောင့်ပင် ဖြစ်သည်။

ဤအင်းကို သူ နားလည် သဘောပေါက်သွားသည်နှင့် တစ်ပြိုင်နက်၊ ၎င်းသည် ရွှေဓာတ် စွမ်းအားကို နားလည် သဘောပေါက်ခြင်း နှင့် ကန်းသတ္တု စွမ်းအားကို ကျွမ်းကျင်ပိုင်နိုင်ခြင်း နှင့် ညီမျှလှပေသည်။

ဒေါင်။

နောက်တစ်စက္ကန့်တွင်၊ ကျန်းဖန်သည် သူ၏ 'ဒန်တျန်' နှင့် 'ချီပင်လယ်' နက်ရှိုင်းရာရှိ မူလ ရွှေအမြုတေကို လည်ပတ်စေပြီး၊ ၎င်း၏ မျက်နှာပြင်ပေါ်တွင် မူလ ဝိညာဉ်စွမ်းအားကို ရေးထွင်းလိုက်သည်။ ပုံစံ တစ်ခုစီတိုင်းသည် ကျားဖြူ ကန်းရွှေ အင်းထံမှ ဖြစ်၏။

ထိုအခါ ကောင်းကင်နှင့် မြေကြီးကြားမှ ရွှေ ဓာတ် စွမ်းအား အမျှင်များ စုစည်းလာပြီး၊ မူလ ရွှေအမြုတေ အတွင်းသို့ ပေါင်းစပ် ဝင်ရောက်သွားကြသည်။

…

နောက်ထပ် တစ်နေ့ နှင့် တစ်ည ကုန်လွန်သွားခဲ့၏။

ဝုန်း ဒိုင်း~~

မူလ ရွှေအမြုတေ၏ မျက်နှာပြင်ပေါ်ရှိ နောက်ဆုံး အင်း ပုံစံ အတွင်းသို့ ပေါင်းစပ် ဝင်ရောက်သွားချိန်တွင် ကျန်းဖန်၏ ခန္ဓာကိုယ် တုန်ခါသွားခဲ့သည်။

ကျားဖြူ ကန်းရွှေ အင်း၊ ပြီးပြည့်စုံပြီ။

ရုတ်တရက် မူလ ရွှေအမြုတေပေါ်တွင် ကျားဖြူ တစ်ကောင် ပေါ်လာ၏။ ၎င်းသည် ဤဂြိုဟ်ပေါ်တွင် ရပ်နေသကဲ့သို့ပင်။ ၎င်းသည် အဆုံးအစမရှိသော ကန်းသတ္တု စွမ်းအားများဖြင့် လွှမ်းခြုံထားကာ လေဟာနယ် နက်ရှိုင်းရာမှ ထွက်ပေါ်လာသော နတ်ဘုရား သားရဲ တစ်ကောင် နှင့် တူညီလှပေသည်။

ကျန်းဖန်၏ ခန္ဓာကိုယ်ကို ဗဟိုပြု၍ မရေမတွက်နိုင်သော ကန်းသတ္တု စွမ်းအင်များ စုစည်းလာသည်။ ထို့နောက် ရွှေရောင် အင်း တစ်ခု အဖြစ်သို့ ပေါင်းစပ်သွားကာ မရေမတွက်နိုင်သော ဓားချီများ စုစည်းမှုဖြင့် ဖန်တီးထားပုံ ရ၏။

အတွေးတစ်ချက်ဖြင့်ပင် ကြောက်မက်ဖွယ်ကောင်းသော ကျားဖြူ ဓား ဆန္ဒသည် အရာအားလုံးကို ဖျက်ဆီးပစ်နိုင်သော စွမ်းအားများ ပါဝင်လျက် ရှေ့သို့ ရိုက်ချသွားမည် ဖြစ်သည်။

"ဒါက ကျားဖြူ ကန်းရွှေ အင်းလား။"

"သင်္ကေတ လေးပါး ဝိညာဉ်အင်းတွေထဲက တစ်ခုဆိုတဲ့ အတိုင်း အတော်လေး အစွမ်းထက်တာပဲ။"

ကျန်းဖန်၏ မျက်လုံးများတွင် တောက်ပသော အရောင်များ လင်းလက်သွားခဲ့၏။

သူ၏ လက်ချောင်းများမှ ရွှေရောင် အလင်းတန်း တစ်ခု ထွက်ပေါ်လာခဲ့သည်။ ဤသည်မှာ ကျားဖြူ ကန်းရွှေ အင်း မှ စုစည်း ဖန်တီးထားသော ဓား အလင်းတန်း ဖြစ်ပြီး၊ သူ၏ နောက်ကျောတွင် နတ်ဘုရား သားရဲ ကျားဖြူ၏ ပုံရိပ် တစ်ခု ပေါ်ထွက်လာသည်။

ဒေါင်။

နောက်တစ်စက္ကန့်တွင် သူ ညင်သာစွာ ဝှေ့ယမ်းလိုက်ရာ ဤ ရွှေရောင် အလင်းတန်းသည် ရှေ့သို့ ပစ်လွှတ်သွားပြီး ကြီးမားကျယ်ပြန့်လှသော ဖျက်ဆီးမှုများကို ဖြစ်ပေါ်စေခဲ့၏။

ချက်ချင်းဆိုသလိုပင်၊ ကြောက်မက်ဖွယ်ကောင်းသော အက်ကွဲကြောင်းကြီး တစ်ခု မြေပြင်ပေါ်တွင် ထွက်ပေါ်လာ၏။ ၎င်းသည် ကီလိုမီတာ ဒါဇင်နှင့်ချီကာ ရှည်လျားသည်။

၎င်း ရောက်ရှိသွားသော နေရာတိုင်းတွင် အရာအားလုံးကို ဆွဲဖြဲပစ်နိုင်ပြီး မြေကြီးပင်လျှင် ၎င်းကို မခုခံနိုင်ခဲ့ချေ။

"အခြေခံ အဆင့် ရှိတဲ့ ကျားဖြူ ကန်းရွှေ အင်း မှာ ဒီလောက်ထိ စွမ်းအား ရှိလိမ့်မယ်လို့ ငါ မမျှော်လင့်ထားခဲ့ဘူး။"

ကျန်းဖန်သည် အလွန်အမင်း အံ့အားသင့်သွားခဲ့၏။

ဤ သင်္ကေတ လေးပါး ဝိညာဉ်အင်းသည် ကောင်းကင်နှင့် မြေကြီးကြားရှိ ကန်းသတ္တု စွမ်းအားကို စုဆောင်းပေးပြီး ရွှေရောင် ဓား အလင်းတန်းကို ဖန်တီးနိုင်ကြောင်း အခြေခံ အဆင့်တွင်သာ ရှိသေးသဖြင့် ထိုးဖောက် နိုင်သော ဂုဏ်သတ္တိသာ ပါဝင်ကြောင်း သူ အာရုံခံမိလိုက်သည်။

ဆိုလိုသည်မှာ ဤ ရွှေရောင် ဓား အလင်းတန်းသည် စွမ်းအား အများအပြားကို ဖောက်ထွင်းသွားနိုင်ပေသည်။

၎င်းမှာ မည်သည့် ကာကွယ်ရေး မှော်ရတနာ သို့မဟုတ် ကာကွယ်ရေး အတားအဆီး ဖြစ်စေကာမူ၊ အလွယ်တကူ ထိုးဖောက် ဝင်ရောက်နိုင်သည်။ ထို့နောက် ရန်သူကို တိုက်ခိုက် နိုင်၏။

ဤအင်း တွင် ကြောက်မက်ဖွယ်ကောင်းသော ဖျက်ဆီးခြင်း စွမ်းအား ရှိပေသည်။

သေချာသည်မှာ အကယ်၍ ကျားဖြူ ကန်းရွှေ အင်း၏ ကျွမ်းကျင်မှု အဆင့် ဆက်လက် မြင့်တက်လာပါက နောက်ထပ် ဂုဏ်သတ္တိများ ပိုမို ရရှိလာမည် ဖြစ်၏။

ဥပမာအားဖြင့်၊ အကယ်၍ ၎င်းကို ကျွမ်းကျင်အဆင့်သို့ မြှင့်တင်နိုင်ပါက၊ ထွက်ပေါ်လာသော ကျားဖြူ ဓား အလင်းတန်းသည် ခိုင်မာသော ဂုဏ်သတ္တိကို ပိုင်ဆိုင်လာမည် ဖြစ်၏။ ၎င်းကို လမ်းခုလတ်တွင် ပိတ်ဆို့ရန် သို့မဟုတ် ကြားဖြတ် တားဆီးရန် မဖြစ်နိုင်တော့ချေ။

အကယ်၍ ၎င်းကို ပိုင်နိုင်အဆင့်သို့ မြှင့်တင်နိုင်ပါက၊ ၎င်းသည် ဖျက်ဆီး ချေမှုန်းနိုင်သော ဂုဏ်သတ္တိကို ပိုင်ဆိုင်လာမည် ဖြစ်ပြီး ကျားဖြူ ဓား အလင်းတန်းအား အရာဝတ္ထု အမျိုးမျိုးကို ဖျက်ဆီးပစ်ရန် ခွင့်ပြုမည် ဖြစ်၏။ အကယ်၍ ခန္ဓာကိုယ် ကျင့်ကြံသူ တစ်ဦးသည် ကျားဖြူ ဓား အလင်းတန်း၏ တိုက်ခိုက်ခြင်းကို ခံရပါက၊ သူတို့၏ ခန္ဓာကိုယ် နှင့် ဝိညာဉ်ပင်လျှင် ဖျက်ဆီး ချေမှုန်းခံရမည် ဖြစ်သည်။

ကြီးမားသော အောင်မြင်မှု အဆင့်သို့ မြှင့်တင်လိုက်သည် နှင့် တစ်ပြိုင်နက် ၎င်းသည် ဝါးမျိုနိုင်သော ဂုဏ်သတ္တိ ရှိလာမည် ဖြစ်သည်။ ထို့ပြင်ကျားဖြူ ဓား အလင်းတန်းဖြင့် အနည်းငယ်မျှ ရှရာ ရယုံဖြင့်ပင်၊ ဓား အလင်းတန်းသည် တစ်ဖက်လူ၏ သက်စောင့်အင်အား အပြည့်အဝ ကုန်ခမ်းသွားသည် အထိ ရန်သူ၏ သက်စောင့်အင်အားကို ဝါးမျိုပစ်မည် ဖြစ်၏။

အကယ်၍ ပြီးပြည့်စုံသည့်အဆင့်သို့ ရောက်ရှိသွားပါက ၎င်းသည် ပို၍ပင် ကြောက်မက်ဖွယ် ကောင်းလာမည် ဖြစ်ပြီး ခြေရာခံနိုင်သော ဂုဏ်သတ္တိကိုပါ ပိုင်ဆိုင်လာမည် ဖြစ်၏။ ရန်သူ၏ ရောင်ဝါကို သော့ခတ်လိုက်သည် နှင့် တစ်ပြိုင်နက် ကျားဖြူ ဓား အလင်းတန်းသည် ပစ်မှတ်ကို မထိမချင်း လိုက်လံ တိုက်ခိုက်မည် ဖြစ်ပြီး သေချာပေါက် အကြိမ်တိုင်း ထိမှန်မည် ဖြစ်သည်။

ထို့ကြောင့် ရှေးခေတ်ကာလတွင် ကျားဖြူ ကန်းရွှေ အင်း၏ စွမ်းအားသည် နာမည်ကြီးလှ၏။

သို့သော် ဤအင်းကို အောင်မြင်စွာ သန့်စင်နိုင်သည့် ကျင့်ကြံသူ အရေအတွက်မှာ သိပ်မများလှချေ။

…….

အခန်း ၅၆၀ - ဘေးအန္တရာယ်ကြီး ပေါက်ကွဲထွက်ပေါ်လာခြင်း၊ မြို့တော် ဝိုင်းရံခံရခြင်း။

"ကျားဖြူ ကန်းရွှေ အင်းကို ဒီလောက် မြန်မြန်နဲ့ ထပ်ပြီး ကျင့်ကြံနိုင်ခဲ့ပြန်ပြီလား။ တကယ်ကို အံ့မခန်းပဲ။"

"သူက မကြာခင်မှာ သင်္ကေတ လေးပါး ဝိညာဉ်အင်းကို လုံးလုံးလျားလျား ကျွမ်းကျင်ပိုင်နိုင်သွားမယ့် ပုံပဲ။"

မူလအင်းစုတ်တံသည် ဤစွမ်းအားကို အာရုံခံမိလိုက်ပြီး၊ ၎င်း၏ အတွင်းစိတ်ထဲတွင် အလွန်အမင်း အံ့အားသင့် မှင်သက်သွားခဲ့၏။

ရိုးရိုးသားသား ဆိုရလျှင် သင်္ကေတ လေးပါး ဝိညာဉ်အင်းများထဲမှ မည်သည့် အင်း တစ်ခုကိုမဆို အောင်မြင်စွာ ကျင့်ကြံနိုင်ပါက ရွှေအမြုတေ နယ်ပယ်တွင် ပြိုင်ဘက်ကင်းလုနီးပါး လွှမ်းမိုးနိုင်ပေသည်။

သို့သော် အင်း လေးခုလုံးကို ကျွမ်းကျင်ပိုင်နိုင်ပြီး သင်္ကေတ လေးပါး ပေါင်းစည်းခြင်းကိုပါ အောင်မြင်နိုင်မည် ဆိုပါက ၎င်းသည် ရွှေအမြုတေ နယ်ပယ်တွင် လုံးဝ ရှုံးနိမ့်ခြင်း မရှိဘဲ ရပ်တည်နိုင်စေရုံ သာမက ယွမ်ယင်း ကျင့်ကြံသူ တစ်ဦးကိုပင်လျှင် တိုက်ပွဲတွင် စိန်ခေါ် နိုင်စွမ်း ရှိပေသည်။

ကံမကောင်းစွာဖြင့် မူလအင်း ဂိုဏ်း၏ သမိုင်းကြောင်း တစ်လျှောက်လုံးတွင် ရွှေအမြုတေ နယ်ပယ်၌ သင်္ကေတ လေးပါး ဝိညာဉ်အင်းကို လုံးလုံးလျားလျား ကျွမ်းကျင်ပိုင်နိုင်ခဲ့သူ မည်သူ တစ်ဦးတစ်ယောက်ကိုမျှ ဘယ်သောအခါကမျှ သူ မမြင်တွေ့ခဲ့ဖူးချေ။

အကယ်၍ ကျန်းဖန်သာ ၎င်းကို အောင်မြင်နိုင်မည် ဆိုပါက သူသည် မူလအင်း ဂိုဏ်းတွင် ပထမဆုံးသော သူ ဖြစ်လာမည် ဖြစ်၏။

သို့သော်၊ ၎င်းမှာ အချိန်ယူရမည့် ကိစ္စ တစ်ခုမျှသာ ဖြစ်ကြောင်း ၎င်း ခံစားမိပေသည်။

"မဆိုးဘူးပဲ၊ နောက်တစ်ဆင့်ကတော့ အသက်သွေးကြောအင်းတွေရဲ့ ကျွမ်းကျင်မှု အဆင့်ကို အဆက်မပြတ် မြှင့်တင်ရမယ်။"

ကျန်းဖန်သည် မြေပြင်ပေါ်တွင် တင်ပျဉ်ခွေ ထိုင်နေပြီး သူ၏ ခန္ဓာကိုယ်ပေါ်ရှိ အသက်သွေးကြောအင်း တစ်ခုစီ၏ စွမ်းအားကို အာရုံခံကြည့်လိုက်၏။

သူသည် အတွေးတစ်ချက်ဖြင့် သူ၏ ပကတိ မြင်ကွင်းချပ်ကို ချက်ချင်း ဖွင့်လိုက်သည်။

[အမည် - ကျန်းဖန်]

[ကံဇာတာ - ကောင်းကင်နှင့် ညီမျှသော ကြီးမားသည့် ကောင်းချီးမင်္ဂလာ၊ ဝိသေသလက္ခဏာ - ကြီးမားသော ဘေးဒုက္ခများမှ အသက်ရှင် လွတ်မြောက်ပြီးနောက်၊ ကောင်းမွန်သော ကံကြမ္မာများ ဆက်လက် ရောက်ရှိလာမည်]

[သက်တမ်း - ၈၀၀၀]

[ဝိညာဉ်အမြစ် - ကောင်းကင် ဝိညာဉ်အမြစ်]

[ကံကောင်းခြင်း အမှတ် - ၈၀၀,၀၀၀]

[ကြွယ်ဝမှု - ဝိညာဉ်ကျောက်တုံး သန်း ၂၀]

[ကျင့်ကြံခြင်း ကျင့်စဉ် - မြွေပျံ ကျင့်စဉ်၊ ရွှေအမြုတေ အပိုင်း (အဆင့် ၃ အလယ်အလတ် အဆင့်)]

[ကျင့်ကြံခြင်း ကျင့်စဉ် - ရောနှောစွမ်းအင် အင်းကျမ်း၊ တတိယအလွှာ]

[မွေးရာပါ နတ်ဘုရား ကျင့်စဉ်များ - ဧကရာဇ်၏ အကြည့်၊ မြေကမ္ဘာကို လက်မအဖြစ် ကျုံ့ပစ်ခြင်း၊ လက်ဝါးလေဟုန်၊ ရေကို ထိန်းချုပ်ခြင်း]

[အသက်သွေးကြောအင်း - ကြာညိုမြေကမ္ဘာမီးလျှံအင်း (ကြီးမားသော အောင်မြင်မှု အဆင့်)၊ ယင်ယန် မန်ဒရင်းဘဲ အင်း (ပိုင်နိုင်အဆင့်)၊ နိမိတ်ဖတ်အင်း (ကြီးမားသော အောင်မြင်မှု အဆင့်)၊ လိပ်နက် ကာကွယ်ရေးအင်း (ပိုင်နိုင်အဆင့်)၊ ဓားတစ်သောင်း ဂိုဏ်းသို့ ပြန်လည်ရောက်ရှိခြင်း အင်း (ကြီးမားသော အောင်မြင်မှု အဆင့်)၊ ဓာတ်ကြီးငါးပါး အစီအရင် ဖျက်ဆီးခြင်း အင်း (ကျွမ်းကျင်အဆင့်)၊ စိမ်းပြာရောင် နဂါး သစ်သား သံချပ်ကာ အင်း (ကြီးမားသော အောင်မြင်မှု အဆင့်)၊ ကြက်တူရွေးနီ ကောင်းကင် လောင်ကျွမ်းခြင်း အင်း (ကြီးမားသော အောင်မြင်မှု အဆင့်)၊ ကျားဖြူ ကန်းရွှေ အင်း (အခြေခံ အဆင့်)]

[နယ်ပယ် - ဆဋ္ဌမအလွှာ ရွှေအမြုတေ (၁%)]

[အသက်မွေးဝမ်းကျောင်း - အဆင့် ၃ အလယ်အလတ် အဆင့် အင်းဆရာ (၇၅%)]

သံသယဖြစ်ဖွယ် မရှိအောင်ပင် ဆဋ္ဌမအလွှာ ရွှေအမြုတေသို့ တက်လှမ်းပြီးနောက် သူ၏ အချက်အလက်များ အားလုံး သိသိသာသာ တိုးတက်လာခဲ့ပြီ ဖြစ်၏။

တစ်ချိန်တည်းမှာပင် သူ၏ ကြွယ်ဝမှု မှာ ဝိညာဉ်ကျောက်တုံး သန်း ၂၀ အထိ ရောက်ရှိသွားခဲ့သည်။

မည်သို့ပင်ဆိုစေကာမူ သွေးဓား နတ်သက်တမ်းရှည် မဟာမိတ်အဖွဲ့ ထံမှ ကြီးမားကျယ်ပြန့်လှသော ကြွယ်ဝမှုကြီး တစ်ရပ်ကို သူ စုဆောင်းရရှိခဲ့သည် မဟုတ်ပါလား။

၎င်း၏ အစိတ်အပိုင်း အနည်းငယ်မျှကို အသုံးပြုရုံဖြင့်ပင် သာမန် ရွှေအမြုတေ ကျင့်ကြံသူ တစ်ဦးအတွက် အတော်လေး အံ့မခန်း ဖြစ်နေပြီ ဖြစ်၏။

…

ရက်အနည်းငယ် ကြာပြီးနောက်။

သွေးဓား စံအိမ်၏ အိပ်ခန်း တစ်ခန်း အတွင်း၌။

ကျန်းဖန် နှင့် စုဝေဝေတို့သည် ကြင်စဦး ဇနီးမောင်နှံများကဲ့သို့ ပြန်လည် ပေါင်းဖက်မိကြပြီး၊ ကျန်းဖန်၏ ကျင့်ကြံမှုကို သေချာစွာ တည်ငြိမ်သွားစေရန် ပြုလုပ်ခဲ့သည်။ ပြီးနောက်၊ သူတို့သည် ရက်အနည်းငယ် ကြာအောင် အတူတကွ အချိန်ဖြုန်းခဲ့ကြကာ ရင်းနှီး နက်ရှိုင်းစွာ ချစ်တင်း နှီးနှောခဲ့ကြသဖြင့် ယင်ယန် မန်ဒရင်းဘဲ အင်း၏ တိုးတက်မှုကို ကြီးမားစွာ မြင့်တက်လာစေခဲ့၏။

"ခုတလော မင်းရဲ့ ကျင့်ကြံမှုရော ဘယ်လိုနေလဲ။"

ဤအခိုက်အတန့်တွင် ကျန်းဖန်သည် အနည်းငယ် မျက်နှာရဲနေသော စုဝေဝေကို ဖက်ထားရင်း ဤ ပြိုင်ဘက်ကင်း အလှပိုင်ရှင်လေး၏ အလှတရားကို မြတ်နိုးစွာ ကြည့်ရှုနေခဲ့သည်။

အချိန် အကြာကြီး အတူတကွ နေထိုင်ခဲ့ပြီး ဖြစ်သော်ငြားလည်း သူသည် ဘယ်သောအခါကမျှ ရိုးအီ မသွားခဲ့ပေ။ အကြိမ်တိုင်းတွင် လန်းဆန်း တက်ကြွမှုကိုသာ ခံစားခဲ့ရ၏။

"ကျင့်ကြံခြင်းက ချောချောမွေ့မွေ့ းပါပဲ။"

"ဒီမြို့က ကျင့်ကြံခြင်း အရင်းအမြစ်တွေက အတော်လေး ပေါများတယ်။"

"အနည်းငယ် အန္တရာယ်များတယ် ဆိုပေမယ့်၊ သွေးဓား စံအိမ်ထဲမှာ နေသရွေ့တော့၊ လုံခြုံရေးက သိပ်ပြသာနာ မရှိပါဘူး။"

စုဝေဝေ က ပြုံးလိုက်၏။

လောလောဆယ်တွင် သူမ၏ ကျင့်ကြံမှုသည် ဆဋ္ဌမအလွှာ အုတ်မြစ်တည်ဆောက်ခြင်း နယ်ပယ်သို့ တက်လှမ်းသွားခဲ့ပြီ ဖြစ်ပြီး၊ သူမ၏ ဝိညာဉ် အိမ်မွေးကောင်များ ဖြစ်ကြသော တောင်ပံခြောက်ခု အဆိပ်ပျား နှင့် ခရမ်းရောင် လျှပ်စီး မေဖလိုင်း တို့မှာလည်း ပို၍ပို၍ အစွမ်းထက်လာခဲ့ကြပြီ ဖြစ်သည်။

တိုက်ခိုက်ရေး စွမ်းအားအရ ဆိုလျှင်၊ အုတ်မြစ်တည်ဆောက်ခြင်း ကျင့်ကြံသူ အများအပြား၏ အကြားတွင် သူမသည် အတော်လေး အစွမ်းထက်သူ အဖြစ် သတ်မှတ် ခံရပေသည်။

မည်သို့ဖြစ်စေ ဤ ရှေးဟောင်း ထူးဆန်းသော အင်းဆက်များ၏ အစွမ်းထက်မှုမှာ အတော်လေး ကြောက်မက်ဖွယ် ကောင်းလှသည် မဟုတ်ပါလား။

သေချာသည်မှာ ကြွေကျ နတ်သက်တမ်းရှည် တောင်တန်းတွင် ရှိနေသော အစွမ်းထက် ကျင့်ကြံသူ အရေအတွက်မှာ များပြားလွန်းလှပြီး၊ အုတ်မြစ်တည်ဆောက်ခြင်း အဆင့် ဆိုသည်မှာ အရေးမပါလှချေ။

ပေါ့ပေါ့ဆဆ နေမိပါက ကြီးမားသော ဘေးဒုက္ခ တစ်ခု နှင့် ကြုံတွေ့ရနိုင်ပေသည်။

၎င်းနှင့် နှိုင်းယှဉ်ပါက တောင်ပိုင်း တိုက်ကြီးပေါ်ရှိ သားရဲ တစ်သောင်း တောင်တန်းသည် အတော်လေး ပိုမို လုံခြုံ ဘေးကင်းလှ၏။

တောင်ပိုင်း တိုက်ကြီး၏ အရင်းအမြစ်များသည် အရှေ့ပိုင်း တိုက်ကြီးကို မယှဉ်နိုင်သော်ငြားလည်း အနည်းဆုံးတော့ အဆင့်မြင့် ကျင့်ကြံသူ အရေအတွက် ပိုမို နည်းပါးပေသည်။

ဤနည်းအားဖြင့်၊ ကြုံတွေ့ရသော အန္တရာယ်များမှာလည်း အတော်လေး နည်းပါးသွား၏။

အုတ်မြစ်တည်ဆောက်ခြင်း ကျင့်ကြံသူ တစ်ဦးပင်လျှင် လွတ်လပ်စွာ လျှောက်သွားနိုင်ပြီး အဆင့်မြင့် ကျင့်ကြံသူများ၏ သတ်ဖြတ်ခြင်း ခံရမည်ကို စိုးရိမ်ပူပန်နေရန် မလိုချေ။

"ဒါ ကောင်းတာပေါ့။"

ကျန်းဖန် ခေါင်းညိတ်လိုက်၏။

စုဝေဝေသည် ဤနေရာရှိ ဘဝ နှင့် သေချာ အသားမကျမည်ကို သူ စိုးရိမ်နေခဲ့သော်ငြားလည်း သူမသည် အတော်လေး ကောင်းမွန်စွာ အသားကျနေပုံ ရပေသည်။

သွေးဓား နတ်သက်တမ်းရှည် မဟာမိတ်အဖွဲ့ ကို လုံးလုံးလျားလျား ထိန်းချုပ်လိုက်ခြင်းမှာ သူ့အတွက် ပညာရှိသော ရွေးချယ်မှု တစ်ခု ဖြစ်ကြောင်း ရှင်းလင်းလှ၏။

ရွှေအမြုတေ အင်အားစု တစ်ခု၏ အကာအကွယ် မရှိဘဲ၊ ဤမြို့တွင် သက်တောင့်သက်သာ နေထိုင်နိုင်ရန် မှာ အခြေခံအားဖြင့် မဖြစ်နိုင်သလောက်ပင် ဖြစ်သည်။

"ယောက်ျား၊ လက်တလော ကြွေကျ နတ်သက်တမ်းရှည် တောင်တန်းထဲကို စွန့်စား ဝင်ရောက်ဖို့ အစီအစဉ် ရှိလားဟင်။"

စုဝေဝေက သိချင်စိတ်ဖြင့် မေးလိုက်၏။

မည်သို့ဆိုစေ ဟွာမင်မြို့သို့ ရောက်ရှိလာသော ကျင့်ကြံသူတိုင်းသည် ကံကြမ္မာကို ရှာဖွေရန် ကြွေကျ နတ်သက်တမ်းရှည် တောင်တန်းထဲသို့ ဝင်ရောက်လိုကြသည် မဟုတ်ပါလား။

သို့သော် ကြွေကျ နတ်သက်တမ်းရှည် တောင်တန်းသည် အလွန်အမင်း အန္တရာယ်များလှပေသည်။

မရေမတွက်နိုင်သော ရွှေအမြုတေ ကျင့်ကြံသူများပင်လျှင် ကြွေကျ နတ်သက်တမ်းရှည် တောင်တန်းတွင် သေဆုံးသွားခဲ့ကြရာ သူမ ခင်ပွန်း၏ လုံခြုံရေး အတွက် သူမကို အလွန်အမင်း စိုးရိမ်ပူပန်စေခဲ့၏။

ယွမ်ယင်း ကျင့်ကြံသူ တစ်ဦးအတွက်ပင်လျှင်၊ ဤတောင်တန်းထဲသို့ ဝင်ရောက်ခြင်းက အထူးတလည် လုံခြုံ ဘေးကင်းလှသည် မဟုတ်ချေ။

"စိတ်မပူပါနဲ့၊ လောလောဆယ် ကြွေကျ နတ်သက်တမ်းရှည် တောင်တန်းထဲကို ဝင်ဖို့ ငါ့မှာ ဘာအစီအစဉ်မှ မရှိသေးပါဘူး။"

"ဘာပဲဖြစ်ဖြစ်၊ လောလောဆယ် ငါ့အတွက်က ကျင့်ကြံခြင်း အရင်းအမြစ်တွေ မလိုသေးဘူးလေ။"

ကျန်းဖန် ခေါင်းယမ်းလိုက်၏။

သွေးဓား နတ်သက်တမ်းရှည် မဟာမိတ်အဖွဲ့ မှ ရွှေအမြုတေ ကျင့်ကြံသူ အများအပြား ထံမှတစ်ဆင့် ကြွေကျ နတ်သက်တမ်းရှည် တောင်တန်း နှင့် ပတ်သက်သော အရေးကြီးသည့် သတင်းအချက်အလက် အများအပြားကို သူ သိရှိထားခဲ့ပြီး ဖြစ်သည်။

ကြွေကျ နတ်သက်တမ်းရှည် တောင်တန်းတွင် မရေမတွက်နိုင်သော ရတနာများ ရှိနေရခြင်း၏ အကြောင်းရင်းမှာ ၎င်းအတွင်း၌ လျှို့ဝှက် နယ်မြေ ကမ္ဘာ ထောင်ပေါင်းများစွာ ပါဝင်နေသောကြောင့်ပင် ဖြစ်၏။

ဤ လျှို့ဝှက်နယ်မြေ ကမ္ဘာများသည် ရှေးခေတ်ကာလက ဘေးအန္တရာယ်ကြီး တစ်ခုကြောင့် ဖြစ်ပေါ်လာခဲ့ခြင်း ဖြစ်သည်ဟု ဆိုကြသည်။

အဘယ်ကြောင့်ဆိုသော် ထိုစစ်ပွဲကြီးသည် ကြောက်မက်ဖွယ် ကောင်းလွန်းလှပြီး လေဟာနယ်ကြီးကို အစိတ်စိတ်အမွှာမွှာ ဖြစ်သွားစေခဲ့သောကြောင့်ပင် ဖြစ်၏။

သို့သော် နှစ်ပေါင်း မရေမတွက်နိုင်အောင် ကုန်လွန်ပြီးနောက် ဤ လေဟာနယ် အပိုင်းအစများသည် လျှို့ဝှက်နယ်မြေ ကမ္ဘာ မျိုးစုံ အဖြစ်သို့ အမှန်တကယ် ပြောင်းလဲသွားခဲ့သည်။

ထို့အပြင် ဤ လျှို့ဝှက်နယ်မြေ ကမ္ဘာများတွင် ရှေးဟောင်း ရတနာ အများအပြား ပါဝင်ပြီး ဝိညာဉ်ဆေးဝါးများလည်း ပေါကြွယ်ဝလှပေသည်။

ကျင့်ကြံသူ အများအပြားသည် ကံကြမ္မာကို ရှာဖွေဖို့အတွက် ဤ လျှို့ဝှက် နယ်မြေ ကမ္ဘာများထဲသို့ ဝင်ရောက်နိုင်ရန် မျှော်လင့်ချက်ဖြင့် ကြွေကျ နတ်သက်တမ်းရှည် တောင်တန်းသို့ လာရောက်ကြခြင်း ဖြစ်၏။

ပြဿနာမှာ ဤ လျှို့ဝှက် နယ်မြေ ကမ္ဘာများသို့ သွားသည့် ဝင်ပေါက်များမှာ ပုံသေ သတ်မှတ်ထားခြင်းမရှိဘဲ ကြွေကျ နတ်သက်တမ်းရှည် တောင်တန်း၏ မည်သည့် နေရာတွင်မဆို ကျပန်း ထွက်ပေါ်လာနိုင်သောကြောင့်ပင် ဖြစ်သည်။

…….