အကာအကွယ်
Vol. 82 Ch. 853
ပြီးပြည့်စုံသော နိယာမများ ရှိနေသည့် ကမ္ဘာတစ်ခု
ချန်ဝူဟွေ့၏ ဤမျှော်လင့်ချက်သည် ကြားရသည်မှာ လွယ်ကူသလို ရှိပေမည့် တကယ်တမ်း၌မူ ကမ္ဘာသစ်တစ်ခု ဖန်တီးသည်ထက် ပို၍ ခက်ခဲလှပေသည်။
နိယာမဆိုသည်မှာ အကြီးဖြစ်စေ၊ အသေးဖြစ်စေ အကြွင်းမဲ့ ပြီးပြည့်စုံနေရန်မှာ မဖြစ်နိုင်သလောက်ပင် ဖြစ်၏။
နိယာမတစ်ခုတည်းကပင် လူတစ်စုအတွက် အလွန်ကောင်းမွန်နေနိုင်သော်လည်း တခြားလူတစ်စုအတွက်မူ မတရားမှု၏ ပြယုဂ် ဖြစ်နေနိုင်ပေသည်။
ဥပမာအားဖြင့် ကျင့်ကြံခြင်း ပါရမီဆိုသည့် အရာမျိုးပင် ဖြစ်၏။
ဘယ်သူ့ပါရမီက ပို၍ သန်မာသနည်း၊ ထိုလူက ကျင့်ကြံခြင်းလမ်းစဉ်တွင် ပို၍ ဝေးဝေးရောက်ရန် အခွင့်အရေးရှိမည်။ ဤနိယာမက ရိုးရှင်းပေမည့် တကယ်ပဲ ပြီးပြည့်စုံပါသလော။
ဘာကြောင့်နည်း။
ဘာကြောင့် ပါရမီသန်မာသူက ပို၍ အဆင်ပြေချောမွေ့နေရသနည်း။
ဘာကြောင့် ချမ်းသာသောမိသားစုတွင် မွေးဖွားလာသူက မွေးကတည်းက စားဝတ်နေရေး ပူစရာမလိုဘဲ သာမန်လူများ တစ်သက်လုံး မမှီနိုင်သည့် နေရာ၌ ရောက်နေရသနည်း။
သို့သော် ဤသည်မှာ နိယာမပင် ဖြစ်ပေသည်။
ပြန်ကြည့်မည်ဆိုလျှင် နတ်ဘုရားရတနာ ရမှသာ ကျိကျွင်းအဆင့်သို့ တက်လှမ်းနိုင်မည်ဆိုသည်မှာလည်း အလားတူ နိယာမတစ်ခုပင် ဖြစ်၏။
မင်း ချန်ဝူဟွေ့က နတ်ဘုရားရတနာကို မရှာတွေ့နိုင်ခြင်းမှာ ဘယ်သူ့ကို သွားအပြစ်တင်၍ ရမည်နည်း။
ထို့ကြောင့် အကြွင်းမဲ့ ပြီးပြည့်စုံသော နိယာမဆိုသည်မှာ လူတို့၏ စိတ်ကူးယဉ်မှုထဲ၌သာ ရှိနေပေသည်။
သို့သော် နိယာမများတွင် အကောင်းနှင့် အဆိုးဟူ၍ ရှိ၏။
တကယ်လို့ နိယာမတစ်ခုက လူအများစု၏ အကျိုးစီးပွားကို ထိခိုက်စေမည်ဆိုလျှင် ထိုနိယာမ က မကောင်းသော နိယာမသာ ဖြစ်ရမည်ဖြစ်ပြီး ဖျက်စီးသင့်သော နိယာမလည်း ဖြစ်ပေသည်။
ကျိကျွင်း ဆိုသည်မှာလည်း ထိုကဲ့သို့ ပုံစံမျိုးပင် ဖြစ်၏။
ကျိကျွင်းတို့က သန်မာလွန်း၏၊ ဘယ်လိုမှ ကျော်ဖြတ်၍ မရနိုင်လောက်အောင် သန်မာလွန်းလှပေသည်။
တစ်ချိန်တည်းမှာပင် သူတို့၏ သန်မာမှုက သက်ရှိများကို လက်ခံထားသည့် ကမ္ဘာကြီးကိုပါ ထိခိုက်စေ၏။
ဤအဆင့်သို့ ရောက်လာပြီဆိုလျှင်မူ ထိုနိယာမကို ဖျက်စီးလိုက်ရန်မှာ မှန်ကန်သော ကိစ္စတစ်ခု ဖြစ်လာချေသည်။
"ငါ နားလည်ပြီ"
ထန်ထျန်းက အေးအေးဆေးဆေး ခေါင်းညိတ်လိုက်သော်လည်း ချန်ဝူဟွေ့မှာမူ အနည်းငယ် ပျာယာခတ်သွားပုံရသည်။
"အရှင်သခင်..."
"ဒါက ကျွန်တော့်ရဲ့ တစ်ကိုယ်ရည် အမြင်သက်သက်ပါပဲ..."
ထန်ထျန်းက ပြုံးလိုက်သည်။
"ငါက မင်းရဲ့ အမှန်အတိုင်း ထင်မြင်ချက်ကို ကြားချင်ရုံသက်သက်ပါ၊ တခြား ဘာရည်ရွယ်ချက်မှ မရှိပါဘူး"
"မင်းကို ခေါ်လိုက်တာက မြင့်မြတ်နယ်မြေရဲ့ နောက်ဆက်တွဲ စီစဉ်မှုတွေကို ဆွေးနွေးချင်လို့ပဲ"
"အဲ့ဒီအချိန်ကျရင် လူအမြောက်အမြား မြင့်မြတ်နယ်မြေထဲ ဝင်လာတဲ့အခါ မစဉ်းစားဘဲနဲ့တောင် သိနိုင်တယ်၊ ရှုပ်ထွေးတဲ့ ပြဿနာတွေ အများကြီး ဖြစ်လာမှာပဲ"
"မင်းက မြင့်မြတ်နယ်မြေရဲ့ ဦးဆောင်သူ တစ်ယောက်အနေနဲ့ ဒါတွေကို ကောင်းကောင်း ထိန်းကျောင်းပေးပါ၊ တိုက်ပွဲတွေ အကြီးအကျယ် မဖြစ်အောင် တားဆီးပေးဖို့ မျှော်လင့်ပါတယ်"
ချန်ဝူဟွေ့က အလေးအနက် ခေါင်းညိတ်လိုက်သည်။
"ငယ်သား အစွမ်းကုန် ကြိုးစားပါ့မယ်"
ထန်ထျန်းက အင်းဟု တစ်ချက်ဆိုလိုက်၏။
ထို့နောက် သူက လက်ဖဝါးကို ဖြန့်လိုက်ရာ မီးခိုးရောင် ကျောက်စိမ်းပြား အချို့က စားပွဲပေါ်သို့ ရောက်ရှိလာသည်။
ထိုကျောက်စိမ်းပြားများဆီမှ ထွက်ပေါ်နေသော အော်ရာများကို ခံစားမိလိုက်သောအခါ ချန်ဝူဟွေ့မှာ ချက်ချင်းပင် အံ့အားသင့်သွားရပေသည်။
"ဒါက..."
"သဘာဝ အကြွင်းအကျန်လား "
ထန်ထျန်း ခေါင်းညိတ်လိုက်၏။
"ဟုတ်တယ်"
"ဒါက အသန့်စင်ဆုံး သဘာဝ အကြွင်းအကျန် တွေပဲ၊ တစ်ခုချင်းစီက အထွတ်အထိပ် တာအိုအရှင် တစ်ယောက်ကို ကျိကျွင်းအဆင့် ရောက်အောင် ကူညီပေးနိုင်တယ်"
ပြောရင်းနှင့် သူက သက်ပြင်းတစ်ချက်ကို အသာအယာ ချလိုက်သည်။
"မြင့်မြတ်နယ်မြေတစ်ခုကို စီမံခန့်ခွဲဖို့အတွက် လုံလောက်တဲ့ ခွန်အားမရှိရင်တော့ မဖြစ်ဘူးလေ"
"တကယ်လို့ ကပ်ဘေးကြီး ဖြစ်ပြီးနောက် ငါ ပြန်မလာနိုင်ခဲ့ရင် မြင့်မြတ်နယ်မြေတစ်ခုလုံးကို မင်းကပဲ ဦးဆောင်ရလိမ့်မယ်"
"မင်း ကျိကျွင်းအဆင့် ရောက်အောင် ငါ ကူညီပေးမယ်၊ ပြီးရင် ကျန်တဲ့ သဘာဝ အကြွင်းအကျန် တွေကိုတော့ မင်းဘာသာမင်း ကြည့်ပြီး ခွဲဝေပေးလိုက်ပါ"
"အနာဂတ်ရဲ့ ရလဒ်က ဘယ်လိုပဲဖြစ်ဖြစ် ဒီပစ္စည်းတွေရှိရင် ထိုက်ယိ မြင့်မြတ်နယ်မြေက အနည်းဆုံးတော့ ပိုပြီး ကြာကြာ တောင့်ခံထားနိုင်လိမ့်မယ်"
ရှေ့မှ သဘာဝ အကြွင်းအကျန် များကို ကြည့်ရင်း ချန်ဝူဟွေ့၏ အကြည့်တို့က တုန်လှုပ်နေ၏။
သူ့၏ အသက်ရှူသံများပင် အနည်းငယ် မြန်ဆန်လာချေသည်။
သူက ကျိကျွင်းအဆင့်သည် မတည်ရှိသင့်ဟု ယူဆထားသော်လည်း ကျိကျွင်း ဖြစ်မလာချင်ဟုမူ မဆိုလိုပေ။
ပိုမိုသန်မာလာရန်ဆိုသည်မှာ ကျင့်ကြံသူတိုင်း၏ ရင်ထဲတွင် အကြီးမားဆုံးသော ဆန္ဒပင် မဟုတ်ပါလော။
အခုဆိုလျှင် သူ အမြဲတမ်း မျှော်လင့်ခဲ့ရသည့်..... အိပ်မက်ထဲမှာတောင် လိုချင်ခဲ့သည့်အရာက သူ့ရှေ့တွင် တည့်တည့် ရောက်နေပြီ ဖြစ်၏။
ဤသည်က သူ့ကို ဘယ်လိုလုပ် စိတ်မလှုပ်ရှားဘဲ ထားနိုင်ပါမည်နည်း။
ခေတ္တအကြာတွင် ချန်ဝူဟွေ့ မတ်တတ်ရပ်လိုက်ပြီး ထန်ထျန်းကို အလေးအနက် ဦးညွှတ်လိုက်သည်။
"ငယ်သား၊ အရှင်သခင်ကို အထူးပဲ ကျေးဇူးတင်ပါတယ်"
"အရှင်သခင် စိတ်ချပါ၊ အနာဂတ်မှာ ဘာပဲဖြစ်လာလာ ငယ်သားကတော့ ထိုက်ယိ မြင့်မြတ်နယ်မြေနဲ့အတူ အသက်ပေးပြီး ကာကွယ်သွားပါ့မယ်"
ထန်ထျန်းက ပြုံး၍ ခေါင်းညိတ်လိုက်၏။
"တကယ်တော့ အခြေအနေက အဲ့ဒီလောက်အထိ ဆိုးချင်မှလည်း ဆိုးမှာပါ"
"ငါတို့မှာ အနိုင်ရဖို့ အခွင့်အရေး ရှိနေပါသေးတယ်"
"ဒါက ကြိုတင်ပြင်ဆင်ထားတဲ့ သဘောပါပဲ"
ချန်ဝူဟွေ့ကို ဦးဆောင်သူအဖြစ် ရွေးချယ်ထားပြီးမှတော့ ကိစ္စများကို သေချာ ရှင်းပြထားခြင်းက ပို၍ ကောင်းပေသည်။
ချန်ဝူဟွေ့မှာမူ ခဏ မှင်တက်သွား၏။
"ဒါဆို ဘာလို့ စောစောက အကုန်လုံးကို မပြောခဲ့တာလဲ"
ထန်ထျန်းက ခေါင်းယမ်းပြလိုက်သည်။
"မင်း တစ်ယောက်တည်း သိထားရင် ရပြီ၊ လူအများကြီး သိသွားရင် သူတို့က မျှော်လင့်ချက်အမှားတွေ ထားပြီး ပေါ့ဆသွားမှာကို ငါ စိုးရိမ်တယ်"
"တကယ်လို့ ကပ်ဘေးကြီးက တကယ် ကျရောက်လာရင် အဲ့ဒီအချိန်ကျမှ ပြင်ဆင်လို့ မမီတော့ဘူး"
"မင်း ပြောင်းရွှေ့ရေး ကိစ္စတွေကို သေချာ စီစဉ်ထားပါ၊ ဖြေရှင်းရခက်တဲ့ ပြဿနာရှိရင် ငါ့ကို လာရှာ ငါ ဒီအတောအတွင်းမှာ ရှိနေမှာပဲ"
ချန်ဝူဟွေ့က ရိုသေစွာ နာခံခဲ့ပေသည်။
ထို့နောက် ထန်ထျန်းက ချန်ဝူဟွေ့နှင့် တခြားကိစ္စအချို့ကို ဆက်လက်ဆွေးနွေးပြီးနောက် သူ့ကို ပြန်လွှတ်လိုက်၏။
ဤမျှအထိ ကြီးမားသော ပြောင်းရွှေ့ရေးကိစ္စက အလွန်ရှုပ်ထွေးသော ကိစ္စတစ်ခုဖြစ်ခြင်းကြောင့် ချန်ဝူဟွေ့နှင့် တခြား တာအိုအရှင်များ သေချာတိုင်ပင်ပြီး အစီအစဉ်တစ်ခု ဆွဲကြရဦးမည် ဖြစ်ပေသည်။
အစီအစဉ်များ အကြမ်းဖျင်း ပြီးသွားမှ ထန်ထျန်းကိုယ်တိုင် ချန်ဝူဟွေ့ကို ကျိကျွင်းအဆင့် တက်လှမ်းနိုင်ရန် ကူညီပေးမည် ဖြစ်၏။
ချန်ဝူဟွေ့တွင် ကိုယ်ပိုင်ကမ္ဘာငယ် ရှိပြီးသား ဖြစ်ခြင်းကြောင့် ယခု သဘာဝ အကြွင်းအကျန် ရပြီဆိုလျှင် ထန်ထျန်း၏ အကူအညီဖြင့်ဆိုပါက မကြာခင်၌ အစစ်အမှန် ကျိကျွင်း ဖြစ်လာတော့မည် ဖြစ်ပေသည်။
ချန်ဝူဟွေ့ ထွက်သွားပြီးနောက်၌ ထန်ထျန်း၏ ပုံရိပ်က ထိုက်ယိ မြင့်မြတ်နယ်မြေ၏ အပြင်ဘက် ဟင်းလင်းပြင်ဆီသို့ ရောက်ရှိသွားခဲ့၏။
ခြေထောက်အောက်မှ ကမ္ဘာငယ်လေးကို ကြည့်ရင်း ထန်ထျန်းက လက်ကို ဆန့်ထုတ်လိုက်ရာ မြင်မရသော အော်ရာတစ်ခုက ကမ္ဘာထဲမှ ထွက်ပေါ်လာပြီး ထန်ထျန်း၏ လက်ဖဝါးထဲ၌ ရောက်ရှိလာပေသည်။
ဤကမ္ဘာငယ်၏ အမှတ်အသားပင် ဖြစ်၏။
ထို့နောက် ထန်ထျန်း၏ စိတ်ဝိညာဉ်အာရုံကြောင့် ဟိုးအဝေးကြီးမှ ဟင်းလင်းပြင်ထဲ၌ ရှိနေသည့် ဂျင်ဂိုကမ္ဘာက ဂျင်ဂိုပင်ကြီး၏ ဦးဆောင်မှုအောက်တွင် မြင်မရသော ကြိုးတစ်မျှင်ကို ထုတ်လွှတ်လိုက်ပြီး အဆုံးမဲ့ ဟင်းလင်းပြင်ကို ဖြတ်ကျော်ကာ ထန်ထျန်း၏ လက်ထဲသို့ ရောက်လာခဲ့သည်။
အဲ့ဒီနောက်တွင်မူ ကွဲပြားခြားနားသော ကမ္ဘာနှစ်ခု၏ အမှတ်အသားများကို ထန်ထျန်းက ထိန်းချုပ်၍ ပေါင်းစည်းပေးလိုက်၏။
နှစ်ဖက်ကြားမှ ဆက်နွှယ်မှုက တည်ဆောက်ပြီးသွားခဲ့ပြီ ဖြစ်ပေသည်။
တကယ်လို့ စကြာဝဠာကြီး ပျက်စီးသွားလျှင် ဂျင်ဂိုကမ္ဘာက ဤကမ္ဘာငယ်လေး၏ ပင်မကမ္ဘာအသစ် ဖြစ်လာပါလိမ့်မည်။
ဤသို့ လုပ် ပြီးသည့်နောက် ထန်ထျန်းက မြင့်မြတ်နယ်မြေ၏ လက်အောက်ခံ ထျန်းဖူ ကမ္ဘာ ၉ ခုဆီသို့လည်း သွားခဲ့၏။
ပြီးနောက် အလားတူပင် လုပ်ဆောင်၍ ဂျင်ဂိုကမ္ဘာနှင့် ချိတ်ဆက်ပေးခဲ့သည်။
ဤနည်းလမ်းက တကယ်ပင် သက်ရှိအမြောက်အမြားကို ကာကွယ်ပေးနိုင်သည့် အကောင်းဆုံးနည်းလမ်းပင် ဖြစ်၏။
မူလက ထျန်းဖူ ကမ္ဘာ ၉ ခုလုံးမှ သက်ရှိများကို မခံနိုင်သော ဂျင်ဂိုကမ္ဘာက ယခုကဲ့သို့ ချိတ်ဆက်မှု ပုံစံမျိုးဖြင့်ဆိုလျှင်မူ အကုန်လုံးကို လက်ခံထားနိုင်သည့်အပြင် နေရာလွတ်တချို့တောင် ကျန်နေပါသေး၏။
ခေတ္တစဉ်းစားပြီးနောက် ထန်ထျန်းက တခြားသော မြင့်မြတ်နယ်မြေတစ်ခုဆီသို့ အကြည့်ပို့လိုက်၏။
ရှို့ကျွင်းကျိကျွင်း၏ ယောင်ရန် မြင့်မြတ်နယ်မြေပင် ဖြစ်သည်။
ယခုမူ ထိုနယ်မြေ မှာလည်း သူ၏ မြင့်မြတ်နယ်မြေပင် ဖြစ်ချေသည်။
သို့သော် ယောင်ရန် မြင့်မြတ်နယ်မြေက ထိုက်ယိ မြင့်မြတ်နယ်မြေလိုမျိုး ကမ္ဘာငယ်တစ်ခုကို အခြေခံ၍ တည်ရှိနေခြင်း မဟုတ်ပေ။
ခဏလောက် စဉ်းစားပြီးနောက် ထန်ထျန်းက ကမ္ဘာငယ်တစ်ခုကို ထုတ်ယူလိုက်ပြီး ယောင်ရန် မြင့်မြတ်နယ်မြေနှင့် တခြားသူ၏ မြင့်မြတ်နယ်မြေများကိုပါ ထိုအထဲသို့ အတတ်နိုင်ဆုံး ပြောင်းရွှေ့ပေးရန် ဆုံးဖြတ်လိုက်၏။
အဓိက အစိတ်အပိုင်းများ ရှိနေသရွေ့ အနာဂတ်တွင် ဘာပဲဖြစ်လာလာ လှုပ်ရှား၍ရသော အခွင့်အရေး ရှိနေဦးမည် ဖြစ်ပေသည်။
နောက်ဆုံး၌ လူဘယ်လောက်ကို ကာကွယ်ပေးနိုင်မည်နည်း ဆိုသည်မှာမူ...
ကံတရားအပေါ်၌သာ မူတည်ပါတော့မည်။
သူ့ဘက်မှမူ အစွမ်းကုန် ကြိုးစားခဲ့ပြီးပြီ ဖြစ်၏။
"ကမ္ဘာ့အရှင် ပြောတဲ့ ကယ်တင်ရှင်ဆိုတာ ဒီကိစ္စကို ပြောတာတော့ မဟုတ်လောက်ပါဘူးနော်"
"တကယ်လို့ ဒါကိုပဲ ဆိုလိုတာဆိုရင်တော့ အားလုံးကို လုပ်နိုင်တယ်ဆိုတဲ့ ငါးမွေးသူက တကယ်ပဲ ညံ့လွန်းရာ ကျနေမှာပေါ့"
ထန်ထျန်းက ပြုံး၍ ခေါင်းယမ်းလိုက်ကာ ပျောက်ကွယ်သွားတော့ပေသည်။