လင်းရင်၏ သရုပ်မှန်
Vol. 82 Ch. 854
တစ်လကြာပြီးနောက်
ထန်ထျန်း၏ စီစဉ်မှုအောက်တွင် တစ်ကမ္ဘာလုံးက လှုပ်ရှားလာကြသည်။
စကြာဝဠာအတွင်းရှိ မြင့်မြတ်နယ်မြေအားလုံးနီးပါးက တစ်ချိန်တည်းမှာပင် အပြင်လူများအတွက် တံခါးများကို အတိုင်းအတာတစ်ခုအထိ ဖွင့်လှစ်ပေးလိုက်ကြ၏။
ယခင်က မြင့်မြတ်နယ်မြေတစ်ခုသို့ ဝင်ရောက်ရန်မှာ အလွန်ခက်ခဲသော ကိစ္စဖြစ်သော်လည်း ယခုအခါ၌မူ ထိုအခက်အခဲမှာ အလွန်ပင် လျော့ပါးသွားခဲ့ချေသည်။
၎င်းတို့က အပြင်ဘက်မှ လူများကိုပင် တက်ကြွစွာ စုပ်ယူနေကြသော်လည်း သတ်မှတ်ထားသည့် စံနှုန်းများမှာမူ တစ်ခုနှင့်တစ်ခု မတူညီကြပေ။
အချို့က အသက်အရွယ်အရ၊ အချို့က ပါရမီအရ၊ အချို့ကမူ ခွန်အား အပေါ် မူတည်၍ ရွေးချယ်ကြသည်။
ထို့ပြင် ဆွေမျိုးသားချင်းနှင့် မိတ်ဆွေသူငယ်ချင်း စသည့် ပတ်သက်မှုများအပေါ် အခြေခံ၍ ရွေးချယ်မှုများလည်း ရှိနေ၏။
မြင့်မြတ်နယ်မြေတစ်ခုစီက သူတို့နှင့် ကိုက်ညီမည့် စည်းမျဉ်းများကိုသာ အသုံးပြုကြခြင်း ဖြစ်ပေသည်။
ဤသည်မှာ ထန်ထျန်းကိုယ်တိုင်လည်း ထိန်းချုပ်၍ မရနိုင်သော ကိစ္စပင် ဖြစ်၏။ သူက မြင့်မြတ်နယ်မြေအားလုံးကို စည်းမျဉ်းတစ်ခုတည်း သတ်မှတ်၍ အတင်းအကျပ် ခိုင်းစေရန် မဖြစ်နိုင်ခြင်းကြောင့် ၎င်းတို့၏ အခြေအနေအရသာ အစီအစဉ်များ ဆွဲခိုင်းခဲ့ပေသည်။
မည်သို့ပင် ဖြစ်စေကာမူ လူနည်းစုသာ မြင့်မြတ်နယ်မြေအတွင်းသို့ ဝင်ခွင့်ရရှိကြပြီး လူအများစုမှာမူ စွန့်ပစ်ခံရသူများအဖြစ် ကျန်ရှိနေရသည်။
သို့သော်လည်း အခြားနည်းလမ်းမရှိခြင်းကြောင့် ဤသို့သာ လုပ်ရချေသည်။
လွန်ခဲ့သော လဝက်ခန့်က ထန်ထျန်းသည် ချန်ဝူဟွေ့ကို ကျိကျွင်းအဆင့်သို့ တက်လှမ်းနိုင်ရန် ကူညီပေးခဲ့၏။
ချန်ဝူဟွေ့က သူ၏ ပါရမီကို အလဟဿ မဖြစ်စေခဲ့ဘဲ ကျိကျွင်း ဖြစ်လာပြီးနောက်၌ သူ၏ ခွန်အားက ရှို့ကျွင်းကျိကျွင်းနှင့် ယိရှန်းကဲ့သို့သော ကျိကျွင်းဟောင်းကြီးများပြီးလျှင် ထိပ်တန်းအဆင့်တွင် ရောက်ရှိသွားခဲ့ပေသည်။
ဤအခြေအနေကို မြင်သောအခါ ထန်ထျန်းလည်း ပို၍ စိတ်အေးသွားရ၏။
ချန်ဝူဟွေ့ ရှိနေသရွေ့ သူ ပြန်မလာနိုင်ခဲ့လျှင်ပင် မြင့်မြတ်နယ်မြေက အချိန်အတိုင်းအတာတစ်ခုအထိ အေးအေးချမ်းချမ်း တည်ရှိနေနိုင်မည် ဖြစ်သည်။
ထို့နောက် သူက တခြားသော မြင့်မြတ်နယ်မြေများ၏ ကိစ္စများကိုပါ ချန်ဝူဟွေ့အား စီမံခန့်ခွဲရန် လွှဲအပ်လိုက်၏။
ဤကိစ္စမှာ ထိုက်ယိ မြင့်မြတ်နယ်မြေထက်ပင် ပို၍ ရှုပ်ထွေးလှပေသည်။
အကျိုးအမြတ် ခွဲဝေမှုများနှင့် ပတ်သက်၍ ထန်ထျန်း တွေးကြည့်ရုံနှင့်ပင် ခေါင်းခဲလှခြင်းကြောင့် ချန်ဝူဟွေ့ကဲ့သို့ ကျွမ်းကျင်သူကိုသာ လွှဲပေးလိုက်ခြင်း ဖြစ်၏။
အနာဂတ်တွင် မည်သို့ဖြစ်လာမည်နည်း ဆိုသည်မှာမူ သူ အစွမ်းကုန် ကြိုးစားခဲ့ပြီးပြီ ဖြစ်ပေသည်။
အရာအားလုံး လမ်းကြောင်းမှန်ပေါ် ရောက်သွားချိန်တွင် နောက်ဆုံးကိစ္စတစ်ခုသာ ကျန်ရှိပါတော့သည်။
ထန်ထျန်းက သူ၏ အကြည့်ကို ဂျင်ဂိုကမ္ဘာအတွင်းသို့ ပို့လိုက်၏။
ကုရှောင်းရွှယ်က သစ်ပင်အိမ်လေးအတွင်း၌ စာအုပ်များ ဝန်းရံလျက် ငြိမ်သက်စွာ ထိုင်နေသည်။
ဤအတောအတွင်း သူမက စာဖတ်ခြင်းကို ရုတ်တရက် ဝါသနာပါလာပုံရ၏။
သူမ၏ ကိုယ်ပေါ်တွင်မူ သဘာဝမျိုးစေ့၏ ကမ္မကြိုးများက ခရစ်စတယ် ခေါင်းတလားနှင့် တင်းကျပ်စွာ ဆက်နွှယ်နေဆဲပင် ဖြစ်ပေသည်။
ကမ္ဘာသစ်တစ်ခု ဖြစ်ပေါ်လာရန်အတွက် သဘာဝမျိုးစေ့ လိုအပ်သည်။
သို့သော် ထန်ထျန်းက ကုရှောင်းရွှယ်ကို စတေး ခံသူအဖြစ် အဖြစ်ခံမည် မဟုတ်ပေ။
သူက သဘာဝမျိုးစေ့ ကို တခြားသော သက်ရှိတစ်ခုထံသို့ ပြောင်းရွှေ့ပေးရန် လိုအပ်၏။
ဤပြဿနာကို သူ အချိန်အတော်ကြာ စဉ်းစားခဲ့ရသည်။
ယခင်က ဤကမ္ဘာ၏ အမှန်တရားကို မသိရှိခြင်းကြောင့် သင့်တော်သော ကြားခံနယ်တစ်ခုကို မရှာတွေ့နိုင်ခဲ့ချေ။
သို့သော် ယခုမူ သူက အရာအားလုံးကို သိရှိသွား ကြောင့် ကြားခံနယ် ရွေးချယ်ခြင်းမှာ မခက်ခဲတော့ပေ။ မည်သည့်သက်ရှိမဆို ဖြစ်နိုင်သည်။
သို့သော် ထန်ထျန်းတွင် ပို၍ သင့်တော်သော ရွေးချယ်မှုတစ်ခု ရှိနေ၏။
သူက လက်ညှိုးကို ဆန့်ထုတ်လိုက်ရာ အိပ်မောကျနေသော အမျိုးသမီးတစ်ဦးက သူ၏ ရှေ့မှောက်၌ ပေါ်လာသည်။
သူမမှာ လင်းယွင်တောင်တန်းတွင် ရှိစဉ်က ဟင်းလင်းပြင်ရွှံ့နွံ ဖြင့် သူ ဖမ်းဆီးခဲ့သော အမျိုးသမီး 'လင်းရင်' ပင် ဖြစ်သည်။
ထိုစဉ်က လင်းရင်သည် ထန်ထျန်းကို အသုံးချ၍ ဝိညာဉ်ရေကန် အတွင်းသို့ ဝင်ရောက်ကာ သူမ၏ မသိနားမလည်နိုင်သော ရည်ရွယ်ချက်များကို အကောင်အထည်ဖော်ရန် ကြိုးစားခဲ့၏။
သို့သော် သူမ၏ အကြံအစည်ကို ထန်ထျန်းက ရိပ်မိသွားကာ သူမကို ချိပ်ပိတ် ၍ သူ၏ ကိုယ်ပိုင်နေရာလွတ် အတွင်း၌ ပိတ်လှောင်ထားခဲ့ခြင်း ဖြစ်ပေသည်။
သူမက အလွန်ကောင်းမွန်သော ကြားခံနယ်တစ်ခု ဖြစ်လာနိုင်၏။
အဘယ်ကြောင့်ဆိုသော် လင်းရင်နှင့် ကျွင်းချန်ချင်းတို့၏ ပတ်သက်မှုမှာ မရိုးရှင်းခြင်းကြောင့် မထင်မှတ်ထားသော ရလဒ်အချို့ကို ဖြစ်ပေါ်စေနိုင်သောကြောင့်ပင် ဖြစ်သည်။
သို့သော် ဤအရာကို မလုပ်မီ သူ လုပ်ရမည့် တခြားကိစ္စတစ်ခု ရှိသေး၏။
သူက နောက်ထပ် လင်းရင်တစ်ယောက်နှင့် တွေ့ရန် လိုအပ်သည်။
ယခင်က ဝူယွဲ့ ချောက်ကမ်းပါး တွင် သူနှင့် လင်းရင်တို့ ရှည်လျားသော စကားဝိုင်းတစ်ခု ရှိခဲ့ဖူး၏။
ထိုစကားဝိုင်းအတွင်း၌ မထင်မှတ်ထားသော အခြေအနေတစ်ခု ဖြစ်ပေါ်ခဲ့သည်။
နောက်ထပ် လင်းရင်တစ်ယောက်၏ စိတ်ဆန္ဒက ယခုရှိနေသော လင်းရင်၏ ကိုယ်ပေါ်သို့ သက်ဆင်းလာကာ ဝှက်ထား သော လျှို့ဝှက်ချက်အချို့ကို ပြောပြခဲ့၏။ ဥပမာအားဖြင့် လနတ်သမီးက သစ္စာဖောက်ဖြစ်ကြောင်း အရိပ်အမြွက် ပြောခဲ့ခြင်းမျိုးပင် ဖြစ်သည်။
နှမြောစရာကောင်းသည်မှာ ထိုစဉ်က ထန်ထျန်းအနေဖြင့် သူမ၏ စကားများကို နားမလည်ခဲ့ခြင်းပင်။
ထိုလင်းရင်က ရှေ့မှ လင်းရင်နှင့် မတူဘဲ သူမက ကျွင်းချန်ချင်းနှင့် တစ်ဖက်တည်း မဟုတ်ပုံရပေသည်။
သူမ၏ ရပ်တည်မှုမှာ မည်သို့ရှိသည်ကို ထန်ထျန်း မသိသော်လည်း သူမတွင် မည်သည့်ရည်ရွယ်ချက် ရှိရှိ၊ ယခုအခါ၌မူ သူမ ပေါ်လာသင့်ပြီ ဖြစ်သည်။
မဟုတ်လျှင် အရာအားလုံး နောက်ကျသွားလိမ့်မည် ဖြစ်၏။
အိပ်မောကျနေသော လင်းရင်ကို ကြည့်ရင်း ထန်ထျန်းက သူ၏ စိတ်ဝိညာဉ်အာရုံကို လွှတ်ထုတ်၍ သူမ၏ ဝိညာဉ်အတွင်းသို့ ကျူးကျော်ဝင်ရောက်လိုက်သည်။
ထင်သည့်အတိုင်းပင်၊ လင်းရင်၏ ဝိညာဉ်အနက်ရှိုင်းဆုံးနေရာ၌ နောက်ထပ် ဝိညာဉ်အမှတ်အသားတစ်ခုကို သူ ရှာတွေ့ခဲ့၏။
ထိုအမှတ်အသားမှာ အလွန်ပင် ဝေဝါးလှပြီး လက်ရှိ လင်းရင်နှင့်လည်း ထပ်တူနီးပါး တူညီနေသည်။
ယခုကဲ့သို့ အစွမ်းထက်နေသော ထန်ထျန်းပင် လျှော့တွက်မိပါက သတိမထားမိနိုင်လောက်အောင် ဖြစ်၏။ နေနတ်ဘုရား ကဲ့သို့သော အဆင့်မျိုးပင် ရှာတွေ့နိုင်မည် မဟုတ်ပေ။
သူမအနေဖြင့် ကျွင်းချန်ချင်း၏ မျက်စိကို ဖုံးကွယ်နိုင်ခဲ့ခြင်းမှာ မဆန်းတော့ချေ။
ထန်ထျန်းက ခဏမျှ စဉ်းစားပြီးနောက် ထိုဝိညာဉ်အမှတ်အသားကို တိုက်ရိုက် လောင်မြိုက်စေလိုက်သည်။
"မင်းမှာ ပြောချင်တာရှိရင် အခုပဲ ပြောဖို့ အချိန်ရှိတော့တယ်"
ထန်ထျန်းက လောင်မြိုက်နေသော ဝိညာဉ်အမှတ်အသားမှတစ်ဆင့် သူ၏ စိတ်ဆန္ဒကို ပေးပို့လိုက်၏။
အချိန်အနည်းငယ် ကြာပြီးနောက် ဝိညာဉ်အမှတ်အသား လောင်ကျွမ်းလုနီးပါး အချိန်၌ ရင်းနှီးသော စိတ်ဆန္ဒတစ်ခုက အဝေးတစ်နေရာမှ လင်းရင်၏ ကိုယ်ပေါ်သို့ သက်ဆင်းလာချေသည်။
ထို့နောက် လင်းရင်က သူမ၏ မျက်လုံးများကို ဖြည်းညင်းစွာ ဖွင့်လိုက်၏။
"မင်း တကယ်ပဲ ရောက်လာတာပဲ"
ထန်ထျန်းက အသာအယာ ပြုံးလိုက်သည်။
လင်းရင် မတ်တတ်ရပ်လိုက်ချိန်၌ သူမ၏ ကိုယ်မှ ထွက်ပေါ်လာသော အော်ရာ မှာ ယခင် လင်းရင်နှင့် လုံးဝ ကွာခြားလှပေသည်။
သူမက ထန်ထျန်းကို ရှုပ်ထွေးသော အကြည့်များဖြင့် ကြည့်လိုက်၏။
"ကိစ္စတွေက ဒီလိုမျိုး ဖြစ်သွားလိမ့်မယ်လို့ ကျွန်မ မထင်ထားခဲ့ဘူး"
"အရာအားလုံးက မြန်ဆန်လွန်းတော့ ကျွန်မ ဘာအစီအစဉ်မှ မဆွဲနိုင်ခဲ့ဘူး"
" ရှင်က ကျွန်မ ချန်ထားခဲ့တဲ့ အမှတ်အသားကို လောင်မြိုက်အောင် မလုပ်ခဲ့ရင် ကျွန်မ ထွက်လာဖို့တောင် မဖြစ်နိုင်ဘူး"
"ကျွင်းချန်ချင်းက... ကျွန်မကို အမြဲ စောင့်ကြည့်နေတာ"
လင်းရင်က ပြောလိုက်သည်။
သူမ၏ စကားကို ထန်ထျန်းက အထူးတလည် တုံ့ပြန်ခြင်း မရှိဘဲ ခေါင်းကိုသာ အသာအယာ ညိတ်လိုက်၏။
"မင်း အရင်က ပြောခဲ့တယ်၊ ငါနဲ့ ကျွင်းချန်ချင်းက ကံပါလာတဲ့ ပြိုင်ဘက်တွေဆို"
"အရင်က ငါ ဒါကို နားမလည်ခဲ့ပေမဲ့ အခုတော့ ဖြည်းဖြည်းချင်း နားလည်လာပြီ"
" မင်းပြောတာ တကယ်ပဲ မှားတာ မရှိပါဘူး"
ထန်ထျန်းက ပြောလိုက်၏။
လင်းရင်၏ မျက်လုံးများ လှုပ်ရှားသွားသည်။
"ရှင် ကောင်းကင်ဝါးမြိုနတ်ဆိုး အကြောင်း သိသွားပြီလား"
ထန်ထျန်းက အင်းဟု တစ်ချက်ဆိုလိုက်သည်။
"ဟုတ်တယ်၊ ငါ သိသွားပြီ"
" ကောင်းကင်ဝါးမြိုနတ်ဆိုးဆိုတာ ကမ္ဘာ့အရှင်နဲ့ ကျွင်းချန်ချင်းကြားက သဘောတူညီချက်တစ်ခုဆိုတာလည်း ငါ သိတယ်။ အဲ့ဒါက ကမ္ဘာ့အရှင်က ကျွင်းချန်ချင်းကို လက်ဆောင်ပေးခဲ့တာပဲ"
"ဒါပေမဲ့... "
"အဲ့ဒီအရာက ငါ့ဆီမှာ ရှိနေတာကို မင်း ဘယ်လို သိတာလဲ"
လင်းရင်၏ မျက်နှာတွင် ရှုပ်ထွေးသော အရိပ်အယောင်များ ပေါ်လာ၏။
"ကျွင်းချန်ချင်းက ကျွန်မကို ပြောပြတာပါ"
ဤအဖြေမှာ ထန်ထျန်း၏ ထင်မြင်ချက်ထက် ကျော်လွန်မသွားပေ။
ကောင်းကင်ဝါးမြိုနတ်ဆိုး ရှိနေခြင်းကို ကမ္ဘာ့အရှင်၊ ကျွင်းချန်ချင်း၊ လနတ်သမီးနှင့် သဘာဝမိခင်တို့သာ သိရှိကြသည်။
ယခုအခါ၌မူ ကျွင်းချန်ချင်း တစ်ယောက်သာ ကျန်ရှိတော့၏။
ကောင်းကင်ဝါးမြိုနတ်ဆိုးက သူ၏ ကိုယ်ပေါ်တွင် ရှိနေကြောင်း ခွဲခြမ်းစိတ်ဖြာနိုင်သူမှာ ကျွင်းချန်ချင်းသာ ဖြစ်ပေသည်။
"တကယ်တော့ ငါ နည်းနည်း သိချင်နေမိတယ်"
ထန်ထျန်းက အေးအေးလူလူပင် ဆက်ပြောလိုက်၏။ "ကောင်းကင်ဝါးမြိုနတ်ဆိုး ဆိုတာ ကျွင်းချန်ချင်းအတွက်တောင်မှ အလွန်အရေးကြီးတဲ့ တည်ရှိမှုတစ်ခုပဲ"
" အလွန်အမင်း အရေးပါလှတယ်လို့ ပြောရင်တောင် မမှားဘူး"
"သူက ဒီကိစ္စကို မင်းကို ဘာလို့ ပြောပြရတာလဲ"
"မင်းက... တကယ်တော့ ဘယ်သူလဲ"